လီၣ်ဖျါ

၈ ဖဲအဝဲအိးထီၣ် တၢ်စဲပနီၣ်ဃာ် နွံဖျၢၣ်တဖျၢၣ်အဆၢကတီၢ် တၢ်ဘှ့ၣ်တၢ်ဘှီၣ်အိၣ်ဝဲလၢ မူခိၣ် တခီနၣ်ရံၣ်ဃၣ်ဃၣ်လီၤ. ၂ ဒီးယထံၣ်ဘၣ် မူခိၣ်ကလူးနွံဂၤလၢအဆၢထၢၣ်လၢ ကစၢ်ယွၤအမဲာ်ညါ ဒီးတၢ်ဟ့ၣ်လီၤအဝဲသ့ၣ်လၢ ကွဲၤနွံဖျၢၣ်လီၤ.

၃ မူခိၣ်ကလူး အဂၤတဂၤလၢ အဟံးဃာ် တၢ်ဒွဲၣ်ထီၣ်တၢ်နၢမူ အသပၢၤထူတဖျၢၣ်န့ၣ် ဟဲတုၤဒီး ဆၢထၢၣ်ဝဲဘူးဒီး တၢ်လုၢ်လီၢ်လီၤ. တၢ်ဟ့ၣ်လီၤအီၤတၢ်နၢမူ အါအါဂီၢ်ဂီၢ်ဒ်သိး အကဟ့ၣ်လုၢ်ထီၣ်ဝဲလၢ တၢ်လုၢ်လီၢ်ထူအဖီခိၣ် လၢအအိၣ်လၢ လီၢ်ပစိာ်အမဲာ်ညါ ဖဲပှၤစီဆှံခဲလၢာ် ဃ့ထုကဖၣ်တၢ် အခါန့ၣ်လီၤ. ၄ ဒီးတၢ်နၢမူအခုၣ်လၢ အဟဲထီၣ်လၢ မူခိၣ်ကလူးအစုပူၤ ဃုာ်ဒီးပှၤစီဆှံ အတၢ်ထုကဖၣ်သ့ၣ်တဖၣ်န့ၣ် လဲၤထီၣ်လၢ ကစၢ်ယွၤအမဲာ်ညါလီၤ. ၅ ဘၣ်ဆၣ် တဘျီဃီန့ၣ် မူခိၣ်ကလူးတဂၤအံၤ ဟံးန့ၢ်တၢ်ဒွဲၣ်ထီၣ် တၢ်နၢမူအသပၢၤ ဒီးမၤပှဲၤဝဲလၢ မ့ၣ်အူတနီၤလၢ အအိၣ်လၢ တၢ်လုၢ်လီၢ် ဒီးကွံာ်လီၤဝဲဆူ ဟီၣ်ခိၣ်ချၢလီၤ. ဒီးလီသီၣ်ထီၣ်ဝဲ, တၢ်အကလုၢ်တဖၣ် သီၣ်ထီၣ်ဒီး လီဝၢ်ဒံးကပီၤထီၣ် ဒီးဟီၣ်ခိၣ်ဟူးဝဲလီၤ. ၆ ဒီးမူခိၣ်ကလူးနွံဂၤလၢ အအိၣ်ဒီး ကွဲၤနွံဖျၢၣ်န့ၣ် ကတဲာ်ကတီၤထီၣ်အသးလၢ ကအူထီၣ်ကွဲၤလီၤ.

၇ ဒီးအဆိကတၢၢ်တဂၤန့ၣ် အူထီၣ်ဝဲအကွဲၤလီၤ. သူၣ်ဒီးမ့ၣ်အူလၢ အဃါဃုာ်အသး ဒီးတၢ်သွံၣ်န့ၣ် ဘၣ်တၢ်ကွံာ်လီၤအီၤလၢ ဟီၣ်ခိၣ်န့ၣ်လီၤ. ဒီးဟီၣ်ခိၣ်သၢပူတပူန့ၣ် အူအီၣ်ဝဲ ဒီးသ့ၣ်ထူၣ်သၢပူတပူန့ၣ် အူအီၣ်ဝဲ ဒီးတၢ်မုၢ်တၢ်ဘိလၢအလါခဲလၢာ် အူအီၣ်ဝဲလီၤ.

၈ မူခိၣ်ကလူးခံဂၤတဂၤန့ၣ် အူထီၣ်ဝဲအကွဲၤလီၤ. ဒီးတၢ်တမံၤလၢ အလီၤဂာ်ဒီး ကစၢၢ်ဖးဒိၣ်လၢ မ့ၣ်အူအီၣ်ဝဲန့ၣ် ဘၣ်တၢ်ကွံာ်လီၤအီၤလၢ ပီၣ်လဲၣ်ပူၤလီၤ. ဒီးပီၣ်လဲၣ် သၢပူတပူန့ၣ် ကဲထီၣ်ဝဲ တၢ်သွံၣ်လီၤ. ၉ ဒီးတၢ်သးသမူသၢပူတပူလၢ ပီၣ်လဲၣ်ပူၤန့ၣ် သံကွံာ်ဝဲလီၤ. ဒီးကဘီသၢပူတပူ ဟးဂီၤကွံာ်ဝဲလီၤ.

၁၀ မူခိၣ်ကလူး သၢဂၤတဂၤန့ၣ် အူထီၣ်ဝဲအကွဲၤလီၤ. ဒီးဆၣ်ဖးဒိၣ်တဖျၢၣ်လၢ အကဲၤကပီၤ ဒ်မ့ၣ်အူဒၢအသိးန့ၣ် လီၤတဲာ်ဝဲလၢမူခိၣ် ဒီးလီၤဘၣ်လၢ ထံကျိသၢပူတပူအဖီခိၣ် ဒီးလၢထံထီၣ်ပၢၢ်တဖၣ် အဖီခိၣ်လီၤ. ၁၁ ဒီးဆၣ်တဖျၢၣ်အံၤ အမံၤမ့ၢ်တၢ်ခၣ်အထူၣ်လီၤ. ဒီးထံသၢပူတပူန့ၣ် ကဲထီၣ်ဝဲလၢအခၣ်လီၤ. ဒီးမ့ၢ်လၢ ထံခၣ်ထီၣ်အဃိ ပှၤဟီၣ်ခိၣ်ဖိသံဒီဒူၣ်လၢ ထံအံၤအဃိလီၤ.

၁၂ မူခိၣ်ကလူးလွံၢ်ဂၤတဂၤန့ၣ် အူထီၣ်ဝဲအကွဲၤလီၤ. မုၢ်သၢပူတပူ, လါသၢပူတပူ ဒီးဆၣ်သၢပူတပူန့ၣ် ဘၣ်တၢ်တီၢ်အီၤ ဒ်သိးအဝဲသ့ၣ် သၢပူတပူန့ၣ် ကခံးလီၤ ဒီးမုၢ်နံၤအတၢ်ကပီၤသၢပူတပူ သုတအိၣ်တဂ့ၤ ဒီးမုၢ်နၤစ့ၢ်ကီးဒ်န့ၣ်လီၤ.

၁၃ ဒီးယထံၣ် ဒီးယနၢ်ဟူလံာ်ကြီကြာ်တဘ့ၣ် ယူၤဝဲလၢ တၢ်ဖးဖီဒီးအတဲဝဲလၢ အကလုၢ်ဖးဒိၣ်လၢ “ခီဖျိလၢ မူခိၣ်ကလူးလၢ အအိၣ်တ့ၢ်ဒံးသၢဂၤလၢ အဘူးကအူထီၣ် အကွဲၤအဃိ ပှၤအိၣ်လၢ ဟီၣ်ခိၣ်ချၢတဖၣ်န့ၣ် ကဘၣ်ကီဘၣ်ခဲ, ဘၣ်ကီဘၣ်ခဲ, ဘၣ်ကီဘၣ်ခဲလီၤ.”