၂ ၡမူၤအ့လး
၁၃ ဒီးစီၤဒၤဝံး အဖိခွါ စီၤအးဘၡါလိၣ်န့ၣ် အိၣ်ဒီး အဒီပုၢ်ဝဲၢ်မုၣ် လၢအဒိၣ်တၢ်ဂ့ၤတဂၤ ဒီးအမံၤမ့ၢ်ဝဲ နီၢ်တၤမၢ်လီၤ.+ ဒီးစီၤဒၤဝံး အဖိခွါ စီၤအၤမနိၣ်+ အဲၣ်ဘၣ်အီၤလီၤ. ၂ စီၤအၤမနိၣ် အသးဘၣ်ဖှီၣ် ဒိၣ်မးလၢ အဒီပုၢ်ဝဲၢ်မုၣ် နီၢ်တၤမၢ်အဃိ တုၤဒၣ်လဲာ် အဝဲဆိးက့လီၤ. ဒီးမ့ၢ်လၢ နီၢ်တၤမၢ် မ့ၢ်ဝဲ မုၣ်ကနီၤ အဃိ လၢစီၤအၤမနိၣ် ကမၤအီၤတမံၤမံၤအဂီၢ် ကီဒိၣ်မးလီၤ. ၃ ဒီးစီၤအၤမနိၣ် အိၣ်ဒီးအသကိးတဂၤ လၢအမံၤမ့ၢ်ဝဲ စီၤယိၤနဒာ်န့ၣ်လီၤ.+ စီၤယိၤနဒာ် အပၢ်န့ၣ်မ့ၢ်ဝဲ စီၤဒၤဝံး အဒီပုၢ်ဝဲၢ်ခွါ စီၤၡံမံးလီၤ.+ ဒီးစီၤယိၤနဒာ် မ့ၢ်ဝဲ ပှၤလၢအဖၠဲးဒိၣ်မးလီၤ. ၄ စီၤယိၤနဒာ် တဲစီၤအၤမနိၣ်လၢ “နမ့ၢ်စီၤပၤအဖိခွါဒၢး ဘၣ်မနုၤအဃိ နသးဘၣ်ဖှီၣ် ကိးဂီၤဒဲးလဲၣ်. တဲဘၣ်ယၤမီၤ.” စီၤအၤမနိၣ် တဲအီၤလၢ “ယအဲၣ်ဘၣ် ယဒီပုၢ်ဝဲၢ်ခွါ စီၤအးဘၡါလိၣ် အဒီပုၢ်ဝဲၢ်မုၣ် နီၢ်တၤမၢ်လီၤ.”+ ၅ စီၤယိၤနဒာ် တဲအီၤလၢ “မံနီၤလၢ နလီၢ်မံခိၣ် ဒီးပာ်မၤနသး ဒ်သိးဒီး နဆိးက့တက့ၢ်. ဒီးဖဲနပၢ်ဟဲကွၢ်နၤအခါ နဘၣ်တဲအီၤလၢ ‘ဝံသးစူၤ မၢယဒီပုၢ်ဝဲၢ်မုၣ် နီၢ်တၤမၢ် ဟဲဒုးအီၣ်ယၤတၢ်အီၣ်မီၤ. အဝဲမ့ၢ်ဟဲကတဲာ်ကတီၤ တၢ်အီၣ်လၢ ပှၤဆါအဂီၢ်လၢ ယမဲာ်ညါန့ၣ် ယကအီၣ်တၢ်လၢ အဝဲဟဲဆှၢန့ၢ်ယၤလီၤ.’”
၆ အဃိ စီၤအၤမနိၣ် မံနီၤပာ်မၤအသး ဒ်သိးဒီးအဆိးက့ ဒီးစီၤပၤဟဲကွၢ်အီၤလီၤ. ဒီးစီၤအၤမနိၣ် တဲစီၤပၤလၢ “ဝံသးစူၤ မၢယဒီပုၢ်ဝဲၢ်မုၣ် နီၢ်တၤမၢ် ဟဲဖဲအံၤလၢ ယမဲာ်ညါ ဒီးတ့ကိၣ်ခံလိၣ် လၢအလီၤဂာ်ဒီး သးဂီၤခံဖျၢၣ် ဒီးယကအီၣ်တၢ်လၢ အဟဲဆှၢန့ၢ်ယၤလီၤ.” ၇ ဒီးစီၤဒၤဝံး ဆှၢလီၤတၢ်ကစီၣ်လၢ နီၢ်တၤမၢ်အအိၣ် လၢဟံၣ်ပူၤလၢ “ဝံသးစူၤ လဲၤလၢနဒီပုၢ်ဝဲၢ်ခွါ စီၤအၤမနိၣ် အဟံၣ် ဒီးကတဲာ်ကတီၤန့ၢ်အီၤ တၢ်အီၣ်တက့ၢ်.” ၈ အဃိ နီၢ်တၤမၢ် လဲၤလၢ အဒီပုၢ်ဝဲၢ်ခွါ စီၤအၤမနိၣ် အဟံၣ် ဖဲအဝဲမံနီၤအလီၢ်န့ၣ်လီၤ. ဒီးအဝဲဟံးန့ၢ် ကိၣ်ကမူၣ် ဒီးဘံးဝဲ ဒီးတ့ကိၣ်တဖၣ်လၢ အမဲာ်ညါလီၤ. ၉ ဒီးနီၢ်တၤမၢ် ဟံးန့ၢ်ကိၣ် ဒီးဒုးအီၣ်အီၤလီၤ. ဘၣ်ဆၣ် စီၤအၤမနိၣ် တအီၣ်ဝဲဘၣ် ဒီးတဲပှၤခဲလၢာ်လၢ “ဟးထီၣ်ကွံာ်ကိးဂၤဒဲး.” အဃိ ပှၤဟးထီၣ်ကွံာ် ခဲလၢာ်လီၤ.
၁၀ ဒီးစီၤအၤမနိၣ် တဲဘၣ်နီၢ်တၤမၢ်လၢ “ဟဲစိာ် တၢ်အီၣ် လၢဒၢးပူၤ ဒ်သိးယကအီၣ်အီၤလၢ နစုပူၤတက့ၢ်.” အဃိ နီၢ်တၤမၢ် ဟံးန့ၢ် ကိၣ်သးဂီၤခံဖျၢၣ်လၢ အတ့ဝဲ ဒီးဟဲစိာ်ဝဲလၢ အဒီပုၢ်ဝဲၢ်ခွါ စီၤအၤမနိၣ် အအိၣ်လၢဒၢးပူၤလီၤ. ၁၁ ဖဲနီၢ်တၤမၢ် ဟဲစိာ်န့ၢ်အီၤ ကိၣ်အခါ အဝဲဖ့ၣ်ထုးအီၤ ဒီးတဲဝဲလၢ “ဒီပုၢ်ဝဲၢ်မုၣ်ဧၢ, ဟဲမံဃုာ်ဒီးယၤမီၤ.” ၁၂ ဘၣ်ဆၣ် နီၢ်တၤမၢ် တဲအီၤလၢ “ဟၢၤအၢ ယဒီပုၢ်ဝဲၢ်ခွါဧၢ, လၢအံၣ်စရ့လးအပူၤန့ၣ် ပှၤတမၤဒ်အံၤဘၣ်.+ အဃိ တဘၣ်မၤ မဲာ်ဆှးယၤ ဒီးတဘၣ်မၤတၢ်လၢ အလီၤမဲာ်ဆှးတခါအံၤတဂ့ၤ.+ ၁၃ နမ့ၢ်မၤတၢ်လၢ အလီၤမဲာ်ဆှး ထဲအံၤညါန့ၣ် ယတူၢ်ကကဲဒ်လဲၣ်. ဒီးပှၤကထံၣ်နၤ ဒ်ပှၤဟးဂီၤဖိတဂၤ လၢအအိၣ်လၢ ပှၤအံၣ်စရ့လးဖိအကျါ အသိးလီၤ. အဃိ ဝံသးစူၤ လဲၤဃ့ယၤလၢ စီၤပၤအအိၣ်မီၤ, တမ့ၢ်လၢ အဝဲကဂ့ၢ်လိာ်နၤဘၣ်.” ၁၄ ဘၣ်ဆၣ် စီၤအၤမနိၣ် တဒိကနၣ်အကလုၢ်ဘၣ် ဒီးအဝဲမၤဆူၣ်နီၢ်တၤမၢ် ဒီးမၤတရီတပါအီၤလီၤ. ၁၅ ဝံၤဒီး စီၤအၤမနိၣ် သးဟ့နီၢ်တၤမၢ် သပှၢ်ကတၢၢ်လီၤ. စီၤအၤမနိၣ် သးဟ့အီၤ အသဟီၣ်ဆူၣ်န့ၢ်ဒံး အအဲၣ်အီၤလၢညါလီၤ. ဒီးစီၤအၤမနိၣ် တဲနီၢ်တၤမၢ်လၢ “ဂဲၤဆၢထၢၣ် ဒီးဟးကွံာ်မ့ၢ်ယံၤ.” ၁၆ ဒီးနီၢ်တၤမၢ် တဲအီၤလၢ “ဟၢၤအၢ ယဒီပုၢ်ဝဲၢ်ခွါဧၢ, နမ့ၢ်နီဟးထီၣ်ကွံာ်ယၤ ခဲအံၤန့ၣ် အနးန့ၢ်ဒံး တၢ်လၢနမၤယၤဒံးလီၤ.” ဘၣ်ဆၣ် အဝဲတဒိကနၣ် နီၢ်တၤမၢ်အကလုၢ်ဘၣ်.
၁၇ ဒီးအဝဲကိးဃီၤဝဲ အပှၤမၤစၢၤတၢ်ဖိလၢ အသးစၢ်တဂၤ ဒီးတဲဝဲလၢ “ထုးထီၣ်ကွံာ် ပှၤတဂၤအံၤလၢ ယမဲာ်ညါ ဒီးခးတံၢ်ပဲတြီလၢ သီးတက့ၢ်.” ၁၈ (နီၢ်တၤမၢ် သိးဝဲဆ့ကၤဖးထီ လီၤလီၤဆီဆီလၢ စီၤပၤအဖိမုၣ်လၢ အမုၣ်ကနီၤတဖၣ် သိးဝဲန့ၣ်လီၤ.) ဒီးစီၤအၤမနိၣ် အပှၤမၤစၢၤတၢ်ဖိတဂၤန့ၣ် လဲၤဆှၢထီၣ်အီၤလၢ တၢ်ချၢ ဒီးခးတံၢ်ဝဲ ပဲတြီလၢသီးလီၤ. ၁၉ ဒီးနီၢ်တၤမၢ် ပာ်ထီၣ် ဖၣ်ဆါကမူၣ်လၢ အခိၣ်လိၤ+ ဒီးဖှီညာ်ဝဲ အဆ့ဖးထီလၢ အဂ့ၤတဘ့ၣ်န့ၣ်လီၤ. ဒီးအဝဲပာ်ထီၣ်အစုလၢ အခိၣ်လိၤ ဒီးဟးဝဲတခီခီ ဟီၣ်ဝဲတခီခီလီၤ.
၂၀ ဒီးနီၢ်တၤမၢ် အဒီပုၢ်ဝဲၢ်ခွါ စီၤအးဘၡါလိၣ်+ သံကွၢ်အီၤလၢ “ပှၤလၢအမၤနၤဒ်အံၤန့ၣ် ကဲဝဲ စီၤအၤမနိၣ်ဧါ. ဒီပုၢ်ဝဲၢ်မုၣ်ဧၢ, အဝဲကဲ နဒီပုၢ်ဝဲၢ်ခွါလီၤ.+ အဃိ ဘၣ်ဃးဒီးတၢ်ဂ့ၢ်တခါအံၤ တဘၣ်တဲဘၣ် ပှၤနီတဂၤတဂ့ၤ ဒီးတဘၣ်ပာ်လၢ နခိၣ်နူာ်ပူၤတဂ့ၤ.” ဒီးနီၢ်တၤမၢ် အိၣ်ဝဲလၢ အဒီပုၢ်ဝဲၢ်ခွါ စီၤအးဘၡါလိၣ် အဟံၣ် ဒီးအဝဲတမၤဘူး ပှၤနီတဂၤဘၣ်. ၂၁ ဖဲစီၤပၤဒၤဝံး နၢ်ဟူဝဲ တၢ်ဂ့ၢ်တဖၣ်အံၤအခါ အဝဲသးဒိၣ်ထီၣ်တၢ် ဒိၣ်မးလီၤ.+ ဘၣ်ဆၣ် မ့ၢ်လၢ စီၤအၤမနိၣ်န့ၣ် မ့ၢ်ဝဲအဖိခွါဝဲၢ်ကိ ဒီးအအဲၣ်အီၤဒိၣ်မးအဃိ အဝဲတအဲၣ်ဒိး မၤဘၣ်ဒိအသးဘၣ်. ၂၂ ဒီးစီၤအးဘၡါလိၣ် သးဟ့+ စီၤအၤမနိၣ် ဒိၣ်မးမ့ၢ်လၢ အဝဲမၤမဲာ်ဆှး အဒီပုၢ်ဝဲၢ်မုၣ် နီၢ်တၤမၢ်အဃိလီၤ.+ ဘၣ်ဆၣ် အဝဲတတဲတၢ်ဒီး စီၤအၤမနိၣ် နီတစဲးလၢၤဘၣ်.
၂၃ ဒီးခံနံၣ် ပူၤကွံာ်အလီၢ်ခံ စီၤအးဘၡါလိၣ် အပှၤတံာ်သိအဆူၣ်တဖၣ် အိၣ်လၢ ဘဧၤလးဃါစိၢ် လၢအဘူးဒီးအ့ဖရဲၣ်လီၤ.+ ဒီးစီၤအးဘၡါလိၣ် ကွဲမုာ်ဝဲ စီၤပၤအဖိခွါ ခဲလၢာ်လီၤ.+ ၂၄ အဃိ စီၤအးဘၡါလိၣ် လဲၤလၢစီၤပၤအအိၣ် ဒီးတဲအီၤလၢ “ယကတံာ် ယသိဆူၣ်လီၤ. ဝံသးစူၤ ယအဲၣ်ဒိးလၢ စီၤပၤဒီး အခ့အပှၤတဖၣ် ကလဲၤပိာ်ယခံမီၤ.” ၂၅ ဘၣ်ဆၣ် စီၤပၤတဲဘၣ် စီၤအးဘၡါလိၣ်လၢ “ပတလဲၤဘၣ်. ဖိခွါဧၢ, ပမ့ၢ်လဲၤခဲလၢာ်န့ၣ် ပကကဲထီၣ် တၢ်ဝံတၢ်ယိးလၢနဂီၢ်.” ဒီးစီၤအးဘၡါလိၣ် မၢအီၤတဘျီဝံၤတဘျီ ဘၣ်ဆၣ် အဝဲတလဲၤဘၣ်, သနာ်က့ အဝဲဆိၣ်ဂ့ၤအီၤလီၤ. ၂၆ ဒီးစီၤအးဘၡါလိၣ် တဲဝဲလၢ “နမ့ၢ်တလဲၤဘၣ်န့ၣ် ဝံသးစူၤ ပျဲယဒီပုၢ်ဝဲၢ်ခွါ စီၤအၤမနိၣ် လဲၤဒီးပှၤမီၤ.”+ စီၤပၤ တဲဆၢက့ၤအီၤလၢ “ဘၣ်မနုၤအဃိ အဝဲဘၣ်လဲၤဒီးနၤလဲၣ်.” ၂၇ ဘၣ်ဆၣ် စီၤအးဘၡါလိၣ် ဃ့အီၤ သပှၢ်ပှၢ်အဃိ အဝဲမၢ စီၤအၤမနိၣ် ဒီးစီၤပၤအဖိခွါ ကိးဂၤဒဲး လဲၤဝဲလီၤ.
၂၈ စီၤအးဘၡါလိၣ် ဟ့ၣ်လီၤတၢ်ကလုၢ်လၢ အပှၤမၤစၢၤတၢ်တဖၣ်လၢ “ကွၢ် ဒီးဖဲစီၤအၤမနိၣ် အသးဖှံထီၣ်လၢ စပံးထံအဃိအခါ ယကတဲသုလၢ ‘မၤသံကွံာ် စီၤအၤမနိၣ်ဟီ.’ ဖဲန့ၣ်အခါ သုကဘၣ်မၤသံအီၤလီၤ. တဘၣ်ပျံၤတၢ်တဂ့ၤ, ပှၤလၢအမၢလီၤသုန့ၣ် မ့ၢ်ယၤလီၤ. အဃိ ပာ်ဆူၣ်ထီၣ်သုသး ဒီးအိၣ်ဒီး တၢ်သူၣ်ဒူသးဒူတက့ၢ်.” ၂၉ အဃိ စီၤအးဘၡါလိၣ် အပှၤမၤစၢၤတၢ်တဖၣ် မၤဝဲစီၤအၤမနိၣ် ဒ်စီၤအးဘၡါလိၣ် မၤလိာ်ဝဲအသိးလီၤ. ဒီးစီၤပၤအဖိခွါခဲလၢာ် ဂဲၤဆၢထၢၣ်ဒီး ဒိးထီၣ်အကသ့ၣ်ယီၤ* ဒီးဃ့ၢ်ကွံာ်ဝဲလီၤ. ၃၀ ဖဲအဝဲသ့ၣ် ဃ့ၢ်ဝဲလၢ ကျဲအခါ တၢ်ကစီၣ်ဟူထီၣ်ဝဲလၢ စီၤဒၤဝံး အအိၣ်လၢ “စီၤအးဘၡါလိၣ် မၤသံကွံာ်ဝဲ စီၤပၤအဖိခွါခဲလၢာ် ဒီးအဝဲသ့ၣ် တပူၤဖျဲးနီတဂၤဘၣ်.” ၃၁ ဒီးစီၤပၤ ဂဲၤဆၢထၢၣ် ဒီးဖှီညာ်အဆ့ကၤ ဒီးမံၤနီၤဝဲလၢ တၢ်ဖီလာ်လီၤ. ဒီးအခ့အပှၤခဲလၢာ်လၢ ဆၢထၢၣ်လၢ အကပၤန့ၣ် ဖှီညာ်အဆ့ကၤ စ့ၢ်ကီးလီၤ.
၃၂ ဒီးစီၤဒၤဝံး အဒီပုၢ်ဝဲၢ်ခွါ စီၤၡံမံး+ အဖိခွါ စီၤယိၤနဒာ်န့ၣ်+ တဲဘၣ်စီၤဒၤဝံးလၢ “ကစၢ်ဧၢ, တဘၣ်ဆိကမိၣ်လၢ အဝဲသ့ၣ် မၤသံနဖိခွါ ခဲလၢာ်တဂ့ၤ, သံထဲ စီၤအၤမနိၣ်တဂၤလီၤ.+ ပှၤလၢ အဟ့ၣ်လီၤ တၢ်ကလုၢ်လၢ ပှၤကမၤဒ်အံၤန့ၣ် မ့ၢ်ဝဲ စီၤအးဘၡါလိၣ်လီၤ.+ အဝဲဆၢတဲာ်ဝဲလၢ ကမၤဝဲဒ်အံၤ စးထီၣ်လၢ စီၤအၤမနိၣ် မၤမဲာ်ဆှး အဒီပုၢ်ဝဲၢ်မုၣ်+ နီၢ်တၤမၢ် လံၤလံၤလီၤ.+ ၃၃ ကစၢ်စီၤပၤဧၢ, တၢ်ကစီၣ်လၢ ပှၤတဲဝဲလၢ ‘စီၤပၤ အဖိခွါ ခဲလၢာ်သံဝဲ’ န့ၣ် တဘၣ်ကနၣ်ဃုာ်တဂ့ၤ, သံထဲ စီၤအၤမနိၣ် တဂၤလီၤ.”
၃၄ ဒီးစီၤအးဘၡါလိၣ် ဃ့ၢ်ကွံာ်ဝဲလီၤ.+ လၢခံ ပှၤခိးကွၢ်တၢ်ဖိတဂၤ ကွၢ်ထီၣ်တၢ် ဒီးထံၣ်ဝဲလၢ လၢအလီၢ်ခံ လၢကျဲလၢအဘူးဒီး ကစၢၢ်န့ၣ် ပှၤဟဲဝဲ အါအါဂီၢ်ဂီၢ်လီၤ. ၃၅ အဃိ စီၤယိၤနဒာ်+ တဲဘၣ်စီၤပၤလၢ “ကွၢ်လၢန့ၣ်, ဒ်ယတဲအသိးလီၤ, စီၤပၤအဖိခွါတဖၣ် ဟဲက့ၤလံ.” ၃၆ ဖဲအတဲတၢ်ဝံၤအခါ စီၤပၤအဖိခွါတဖၣ် ဟဲက့ၤတုၤ ဒီးဟီၣ်ဝဲဖးဒိၣ် ဒီးစီၤပၤ ဒီးအခ့အပှၤခဲလၢာ် ဟီၣ်ဝဲဖးဒိၣ်စ့ၢ်ကီးလီၤ. ၃၇ မ့မ့ၢ် စီၤအးဘၡါလိၣ်န့ၣ် လဲၤဃ့ၢ်ဝဲလၢ ကၡူၢ်ဘီမုၢ် အစီၤပၤ စီၤတးလမဲ+ အအိၣ်လီၤ. ဒီးစီၤတးလမဲန့ၣ် အပၢ်မ့ၢ်ဝဲ စီၤဧးမံၤဟူးလီၤ. စီၤဒၤဝံး သးအုးဝဲလၢ အဖိခွါအဃိ တဘျုးသီညါလီၤ. ၃၈ မ့မ့ၢ် စီၤအးဘၡါလိၣ်န့ၣ် လဲၤဃ့ၢ်လၢကၡူၢ်ဘီမုၢ်+ ဒီးအိၣ်ဝဲဖဲန့ၣ် သၢနံၣ်လီၤ.
၃၉ လၢခံ ဖဲစီၤဒၤဝံး အသးမုာ်ထီၣ်က့ၤလၢ စီၤအၤမနိၣ်အတၢ်သံဝံၤ အဝဲအဲၣ်ဒိးလဲၤထံၣ်လိာ်သးဒီး စီၤအးဘၡါလိၣ်လီၤ.