၂ ၡမူၤအ့လး
၁၄ ဒီးနီၢ်စရူယၤအဖိခွါ+ စီၤယိၤအာ် သ့ၣ်ညါဝဲလၢ စီၤပၤ သးသယုၢ်ဘၣ် စီၤအးဘၡါလိၣ်လီၤ.+ ၂ အဃိ စီၤယိၤအာ် မၢပှၤလဲၤကိးန့ၢ်အီၤ ပိာ်မုၣ်လၢ အကူၣ်တၢ်သ့တဂၤ လၢအအိၣ်ဝဲလၢ ဝ့ၢ်တကိၤန့ၣ်လီၤ.+ ဒီးစီၤယိၤအာ် တဲဘၣ်အီၤလၢ “ပာ်မၤနသး ဒ်သိးဒီး နသူၣ်အုးသးအုး ဒီးကူထီၣ်ကၤထီၣ် ပှၤဟီၣ်တၢ်ယၢၤတၢ် အကူအကၤ ဒီးတဘၣ်ဖှူနလိၤလၢသိတဂ့ၤ.+ ပာ်မၤနသး ဒ်သိးဒီး ပိာ်မုၣ်တဂၤလၢ အဟီၣ်ဝဲလၢ ပှၤသံအဃိ န့ၢ်ဖးယံာ်လံန့ၣ်တက့ၢ်. ၃ ဒီးလဲၤတဲစီၤပၤ ဒ်အံၤတက့ၢ်.” ဒီးစီၤယိၤအာ် တဲဘၣ် ပိာ်မုၣ်လၢ အကဘၣ်တဲ တၢ်မနုၤလဲၣ်န့ၣ်လီၤ.
၄ ပှၤတကိၤမုၣ်တဂၤန့ၣ် လဲၤလၢစီၤပၤအအိၣ် ဒီးထိၣ်လီၤပှီၤအသး ဒီးတဲဝဲလၢ “အိ စီၤပၤဧၢ, မၤစၢၤယၤ.” ၅ ဒီးစီၤပၤ တဲဆၢက့ၤအီၤလၢ “ဘၣ်မနုၤလဲၣ်.” ဒီးပိာ်မုၣ်န့ၣ် တဲဝဲလၢ “ယဝၤသံလံ အဃိ ယကဲမုၣ်ကမဲလီၤ. ၆ နခ့နပှၤ ယၤအံၤ, လၢညါ ယဖိခွါအိၣ်ခံဂၤ ဘၣ်ဆၣ် အဝဲသ့ၣ် ထိလိာ်သးလၢ ပျီပူၤ ဒီးပှၤလၢအကဟဲ မၤပတုာ်အဝဲသ့ၣ် တအိၣ်နီတဂၤဘၣ်. အဃိ တဂၤန့ၣ် တီၢ်သံအဝဲတဂၤလီၤ. ၇ ဒီးခဲအံၤ ယဘူးယတံၢ်ခဲလၢာ် ဂဲၤဆၢထၢၣ်ထီဒါယၤ ဒီးတဲဝဲလၢ ‘ပှၤလၢ အကန့ၢ်သါဘၣ်တၢ် မ့ၢ်ကလီၤမၢ် သနာ်က့ ဟ့ၣ်လီၤ နဖိခွါလၢ အမၤသံ အဒီပုၢ်ဝဲၢ်ခွါတဂၤန့ၣ်+ ဒ်သိးပကမၤသံအီၤလၢ အဒီပုၢ်ဝဲၢ်ခွါ အသးသမူ အဂီၢ်န့ၣ်တက့ၢ်.’ အဃိ အဝဲသ့ၣ် ကမၤဟးဂီၤ ယတၢ်မုၢ်လၢ်လၢ အအိၣ်တ့ၢ်ဒီးယၤ အလီၢ်ခံကတၢၢ်အံၤ* ဒီးအဝဲသ့ၣ် ကမၤလီၤမၢ် ယဝၤအမံၤ ဒီးအစၢၤအသွဲၣ်လၢ ဟီၣ်ခိၣ်ချၢလီၤ.”
၈ ဒီးစီၤပၤ တဲဘၣ်ပိာ်မုၣ်န့ၣ်လၢ “က့ၤလၢနဟံၣ်ဟီ, နတၢ်ဂ့ၢ်န့ၣ် ယကရဲၣ်ကျဲၤန့ၢ်နၤလီၤ.” ၉ အဃိ ပှၤတကိၤမုၣ်န့ၣ် တဲစီၤပၤလၢ “အိ ကစၢ်စီၤပၤဧၢ, မ်တၢ်ကမၣ်န့ၣ် လီၤဘၣ်လၢယၤဒီး ယပၢ်အဒူၣ်ဖိထၢဖိတဖၣ် အလိၤတက့ၢ်. မ်စီၤပၤ ဒီးအလီၢ်ပစိာ်န့ၣ် ပူၤဖျဲးဒီး တၢ်ကမၣ်တက့ၢ်.” ၁၀ စီၤပၤတဲဝဲလၢ “ပှၤတဂၤဂ့ၤ တဂၤဂ့ၤ မ့ၢ်တဲကဒီးနၤ တမံၤမံၤန့ၣ် ဟဲကိးအီၤလၢယအိၣ် ဒီးအဝဲ တမၤတံာ်တာ်နၤ နီတဘျီလၢၤဘၣ်.” ၁၁ ဘၣ်ဆၣ် ပိာ်မုၣ်န့ၣ် တဲဝဲလၢ “ဒ်သိး ပှၤလၢအမၤကၣ်က့ၤတၢ်တဂၤ*+ သုတဟဲမၤဟးဂီၤတၢ် ဒီးမၤသံကွံာ် ယဖိခွါတဂ့ၤအဂီၢ် မ်စီၤပၤ သ့ၣ်နီၣ်ထီၣ် ကစၢ်ယဟိဝၤယွၤတက့ၢ်.” ဒီးစီၤပၤတဲဝဲလၢ “ယအၢၣ်လီၤတၢ်လၢ ယဟိဝၤယွၤလၢ အမူဝဲတဂၤအမဲာ်ညါလၢ+ နဖိခွါ အခိၣ်ဆူၣ် ထဲတဘိဒၣ်လဲာ် တလီၤတဲာ်လၢ ဟီၣ်ခိၣ်လိၤဘၣ်.” ၁၂ ဒီးပိာ်မုၣ်န့ၣ် တဲဝဲလၢ “ဝံသးစူၤ ဟ့ၣ်ယၤအခွဲးလၢ ယကတဲ ယကစၢ်စီၤပၤ တၢ်ကတိၤတထံၣ်မီၤ.” ဒီးစီၤပၤ တဲဝဲလၢ “တဲသၢၤ.”
၁၃ ပိာ်မုၣ်န့ၣ် တဲအီၤလၢ “မ့မ့ၢ်ဒ်န့ၣ်န့ၣ် စီၤပၤဧၢ, ဘၣ်မနုၤအဃိ နမၤတၢ်ဒ်အံၤတမံၤလၢ အမၤဘၣ်ဒိ ကစၢ်ယွၤ အပှၤဂီၢ်မုၢ်လဲၣ်.+ ခီဖျိလၢ နတကိးက့ၤ နဖိခွါလၢ အဘၣ်တၢ်နီဟးထီၣ်ကွံာ်အီၤ တဂၤဘၣ်အဃိ တၢ်လၢ နတဲဖဲမကၢာ်န့ၣ် ပာ်ဖျါထီၣ်ဝဲလၢ နတၢ်ကမၣ်အိၣ်လံ.+ ၁၄ ပဝဲဒၣ်အံၤ ပကသံသပှၢ်တၢၢ် ဒီးပကလီၤဂာ် ဒ်ထံလၢပှၤလူလီၤအီၤလၢ ဟီၣ်ခိၣ်လိၤ ဒီးပှၤမၤန့ၢ်က့ၤအီၤ တသ့လၢၤဘၣ် အသိးန့ၣ်လီၤ. ဘၣ်ဆၣ် တမ့ၢ်လၢ ကစၢ်ယွၤ ကထုးထီၣ်ကွံာ် ပှၤတဂၤအသးသမူဘၣ်. ဒီးကစၢ်ယွၤ ကဆိကမိၣ်ထီၣ်တၢ်ဂ့ၢ် ဒ်သိးကကိးက့ၤ ပှၤလၢအဘၣ် တၢ်နီဟးထီၣ်ကွံာ်အီၤ လၢအအိၣ်တဂၤ အဂီၢ်လီၤ. ၁၅ ခီဖျိလၢ ပှၤမၤပျံၤမၤဖုးယၤအဃိ ယဟဲတဲဘၣ် ကစၢ်စီၤပၤ တၢ်ဂ့ၢ်တခါအံၤလီၤ. ယတဲလီၤယသးလၢ ‘ယကတဲတၢ်ဒီးစီၤပၤ ဒီးဘၣ်သ့ၣ်သ့ၣ် စီၤပၤ ကမၤဝဲဒ် ယဃ့အသိးလီၤ. ၁၆ ဒီးဘၣ်သ့ၣ်သ့ၣ် စီၤပၤ ကဒိကနၣ် ဒီးကမၤပူၤဖျဲးယၤလၢ ပှၤတဂၤလၢ အဃုမၤဟးဂီၤယၤ ဒီးယဖိခွါထဲတဂၤ ဒ်သိးပသုတဒိးန့ၢ်ဘၣ် တၢ်န့ၢ်သါလၢ ကစၢ်ယွၤဟ့ၣ်လီၤပှၤ တဂ့ၤအဂီၢ်န့ၣ် အအိၣ်လီၤ.’+ ၁၇ ဒီးယတဲလီၤယသးလၢ ‘ယကစၢ် စီၤပၤအတၢ်ကတိၤန့ၣ် ကမၤမုာ်ထီၣ်ယသးလီၤသၢၤ,’ မ့ၢ်လၢ ဘၣ်ဃးဒီး တၢ်ပဲာ်ဖးနီၤဖး တၢ်လၢအဂ့ၤဒီး တၢ်လၢအအၢန့ၣ် ယကစၢ်စီၤပၤ လီၤဂာ် ဒ်ယွၤလၢ အမ့ၢ်အတီတဂၤ အမူခိၣ်ကလူးအသိး အဃိလီၤ. မ်နကစၢ် ယဟိဝၤယွၤ အိၣ်ဒီးနၤတက့ၢ်.”
၁၈ ဒီးစီၤပၤ တဲဆၢက့ၤ ပိာ်မုၣ်လၢ “ဝံသးစူၤ တၢ်လၢ ယကသံကွၢ်နၤန့ၣ် စံးဆၢယၤနီၤ, တဘၣ်ပာ်ခူသူၣ် နီတမံၤတဂ့ၤ.” ဒီးပိာ်မုၣ် တဲဆၢက့ၤဝဲလၢ “ဝံသးစူၤ မ်ယကစၢ်စီၤပၤ သံကွၢ်တက့ၢ်.” ၁၉ ဒီးစီၤပၤ သံကွၢ်ဝဲလၢ “မ့ၢ်စီၤယိၤအာ် မၢနမၤဒ်အံၤဧါ.”+ ပိာ်မုၣ်န့ၣ် တဲဆၢအီၤလၢ “အိ ကစၢ်စီၤပၤဧၢ, ယအၢၣ်လီၤတၢ်လၢ နမဲာ်ညါလၢ တၢ်လၢယကစၢ်စီၤပၤ တဲတၢ်န့ၣ် ဘၣ်ဝဲတီတီလီၤ. နခ့နပှၤ စီၤယိၤအာ် ဟံးစုနဲၣ်ကျဲယၤ ဒီးမၢယတဲ တၢ်ဂ့ၢ်တဖၣ်အံၤလီၤ. ၂၀ နခ့နပှၤ စီၤယိၤအာ် မၤဝဲဒ်အံၤ ဒ်သိးအကဆီတလဲ နတၢ်ထံၣ်အဂီၢ်လီၤ. ဘၣ်ဆၣ် ယကစၢ်စီၤပၤ အိၣ်ဒီးတၢ်ကူၣ်သ့ ဒ်ယွၤလၢအမ့ၢ်အတီတဂၤ အမူခိၣ်ကလူးအသိး ဒီးသ့ၣ်ညါ တၢ်လၢအကဲထီၣ်အသး လၢကီၢ်ပူၤ ခဲလၢာ်လီၤ.”
၂၁ စီၤပၤ တဲစီၤယိၤအာ်လၢ “မ့ၢ်လံ, ယကမၤဒ်န့ၣ်.+ လဲၤကိးန့ၢ် စီၤအးဘၡါလိၣ် ဒီးဟဲက့ၤကိးအီၤတက့ၢ်.”+ ၂၂ စီၤယိၤအာ် ထိၣ်လီၤပှီၤအသး ဒီးစံးပတြၢၤ စီၤပၤလီၤ. ဒီးစီၤယိၤအာ် တဲဝဲလၢ “အိ ကစၢ်စီၤပၤဧၢ, မ့ၢ်လၢနမၤဒ် တၢ်လၢ ယဃ့ထီၣ် အသိးအဃိ တနံၤအံၤ ယသ့ၣ်ညါလၢ နဘၣ်သူၣ်ဘၣ်သးယၤလီၤ.” ၂၃ ဒီးစီၤယိၤအာ် ဆၢထၢၣ်ဒီးလဲၤလၢ ကၡူၢ်+ ဒီးဟဲက့ၤကိး စီၤအးဘၡါလိၣ် လၢဝ့ၢ်ယရူၤၡလ့ၣ်လီၤ. ၂၄ ဘၣ်ဆၣ် စီၤပၤတဲဝဲလၢ “စီၤအးဘၡါလိၣ် ဘၣ်က့ၤလၢ အနီၢ်ကစၢ်အဟံၣ် ဒီးအတဘၣ်ဟဲထံၣ် ယမဲာ်ဘၣ်.” အဃိ စီၤအးဘၡါလိၣ် က့ၤလၢ အနီၢ်ကစၢ်အဟံၣ် ဒီးအတထံၣ်ဘၣ် စီၤပၤအမဲာ်ဘၣ်.
၂၅ လၢပှၤအံၣ်စရ့လးဖိအကျါန့ၣ် ပှၤလၢအဘၣ်တၢ် ပတြၢၤအီၤလၢ အဒိၣ်တၢ်ဂ့ၤအဃိ အါထဲသိးဒီး စီၤအးဘၡါလိၣ်န့ၣ် တအိၣ်နီတဂၤဘၣ်. စးထီၣ်လၢ အခိၣ် တုၤလီၤလၢ အခီၣ်န့ၣ် တၢ်လၢအလာ်အၢ တအိၣ်နီတမံၤဘၣ်. ၂၆ ဒီးတနံၣ်ဘၣ်တနံၣ် ခီဖျိလၢ အခိၣ်ဆူၣ် ဃၢဘၣ်အီၤဒိၣ်မးအဃိ အဝဲကဘၣ် တံာ်အခိၣ်ဆူၣ် ဖဲနံၣ်ကတၢၢ်အဆၢကတီၢ် ကိးနံၣ်ဒဲးလီၤ. ဒီးဖဲအတံာ် အခိၣ်ဆူၣ်အခါ အခိၣ်ဆူၣ်န့ၣ် အဃၢအိၣ်ဝဲ ၡက့လး ၂၀၀* ဒ်စီၤလိၣ်စီၤပၤ အစီၤပီၢ်သၣ် အနီၣ်ထိၣ်အိၣ်ဝဲ အသိးန့ၣ်လီၤ. ၂၇ စီၤအးဘၡါလိၣ် အဖိခွါအိၣ်သၢဂၤ+ ဒီးအဖိမုၣ် အိၣ်ဝဲတဂၤလီၤ. ဒီးအဖိမုၣ်န့ၣ် အမံၤလၢ နီၢ်တၤမၢ် ဒီးအဝဲမ့ၢ်ပိာ်မုၣ်လၢ အဒိၣ်တၢ်ဂ့ၤ ဒိၣ်မးတဂၤလီၤ.
၂၈ ဒီးစီၤအးဘၡါလိၣ် ဆဲးအိၣ်ဝဲလၢ ဝ့ၢ်ယရူၤၡလ့ၣ်အပူၤ ပှဲၤထီၣ်ခံနံၣ်လံ ဘၣ်ဆၣ် အဝဲတထံၣ်ဘၣ် စီၤပၤအမဲာ် နီတထံၣ်ဒံးဘၣ်.+ ၂၉ အဃိ စီၤအးဘၡါလိၣ် မၢပှၤလဲၤကိးန့ၢ်အီၤ စီၤယိၤအာ် ဒ်သိးအဝဲ ကဆှၢလီၤအီၤဆူ စီၤပၤအအိၣ် အဂီၢ်လီၤ. ဘၣ်ဆၣ် စီၤယိၤအာ် တဟဲလၢအအိၣ်ဘၣ်. ဒီးအဝဲမၢ ပှၤလဲၤကိးကဒီး စီၤယိၤအာ် ခံဘျီတဘျီ ဘၣ်ဆၣ် စီၤယိၤအာ် တဟဲဒံးဘၣ်. ၃၀ လၢခံ စီၤအးဘၡါလိၣ် တဲအခ့အပှၤတဖၣ်လၢ “စီၤယိၤအာ် အဟီၣ်ခိၣ်လီၢ်န့ၣ် အိၣ်ဖဲ ယဟီၣ်ခိၣ်လီၢ် အကပၤ ဒီးဖဲန့ၣ် အဘုမုယီၤအိၣ်တနီၤလီၤ. လဲၤဒွဲၣ်ထီၣ်ကွံာ် အဟီၣ်ခိၣ်လီၢ်န့ၣ်.” အဃိ စီၤအးဘၡါလိၣ် အခ့အပှၤတဖၣ် လဲၤဒွဲၣ်ထီၣ်ကွံာ်ဝဲ ဟီၣ်ခိၣ်လီၢ်တခါန့ၣ်လီၤ. ၃၁ ဒီးစီၤယိၤအာ် လဲၤလၢ စီၤအးဘၡါလိၣ် အဟံၣ်ဒီးတဲအီၤလၢ “ဘၣ်မနုၤအဃိ နခ့နပှၤတဖၣ် ဒွဲၣ်ထီၣ်ကွံာ် ယဟီၣ်ခိၣ်လီၢ်လဲၣ်.” ၃၂ စီၤအးဘၡါလိၣ် တဲဆၢ စီၤယိၤအာ်လၢ “ယဆှၢလီၤ တၢ်ကစီၣ်လၢနအိၣ်လၢ ‘ဟဲဒီး ယကဆှၢလီၤနၤလၢ စီၤပၤအအိၣ် ဒ်သိး ကသံကွၢ်အီၤလၢ “ယအိၣ်လၢ ကၡူၢ်န့ၣ်+ ဘၣ်မနုၤအဃိ ယဘၣ်ဟဲက့ၤဖဲအံၤလဲၣ်. ယမ့ၢ်ဆဲးအိၣ်ဖဲန့ၣ်န့ၣ် ကဂ့ၤဒိၣ်ဒံး. ပျဲယထံၣ်လိာ်သးဒီးစီၤပၤ ဒီးယတၢ်ကမၣ်မ့ၢ်အိၣ်န့ၣ် အကြၢးမၤသံယၤလီၤ.”’”
၃၃ အဃိ စီၤယိၤအာ် လဲၤတဲဘၣ် စီၤပၤလီၤ. ဒီးစီၤပၤကိး စီၤအးဘၡါလိၣ် ဒီးစီၤအးဘၡါလိၣ် ထိၣ်လီၤပှီၤအသးလၢ စီၤပၤအမဲာ်ညါလီၤ. ဒီးစီၤပၤနၢမူဝဲ စီၤအးဘၡါလိၣ်လီၤ.+