၂ ၡမူၤအ့လး
၁၆ ဖဲစီၤဒၤဝံး လဲၤတလၢကွံာ် ကစၢၢ်ဒီခိၣ်တစဲးဖိန့ၣ်+ စီၤမဖံဘိၤၡ့း+ အခ့အပှၤ စီၤစံဘၤ+ အိၣ်ခိးအခိၣ်ဖဲန့ၣ်လီၤ. အဝဲအိၣ်ဒီး ကသ့ၣ်ယီၤခံဒုလၢ အတီၣ်ဝဲ ကိၣ်အလိၣ် ၂၀၀, ကိၣ်လၢအဘၣ်တၢ်တ့အီၤလၢ စပံးသၣ်ဃ့ အလိၣ် ၁၀၀, ကိၣ်လၢ အဘၣ်တၢ်တ့အီၤလၢ ချၢၣ်ဒၢသၣ် ဒီးစူၣ်ပလိၣ်သၣ်တဖၣ် အလိၣ် ၁၀၀, ဒီးစပံးထံ ဖးဒိၣ်တကိလီၤ.+ ၂ ဒီးစီၤပၤတဲဘၣ် စီၤစံဘၤလၢ “ဘၣ်မနုၤအဃိ နဟဲစိာ်တၢ်သ့ၣ်တဖၣ်အံၤလဲၣ်.” စီၤစံဘၤ တဲဆၢက့ၤဝဲလၢ “ကသ့ၣ်ယီၤတဖၣ်အံၤ မ့ၢ်ဝဲလၢ စီၤပၤအဟံၣ်ဖိဃီဖိ ကဒိးဝဲအဂီၢ်, ကိၣ် ဒီးတၤသူတၤသၣ်တဖၣ်အံၤ မ့ၢ်ဝဲလၢ ပှၤပိာ်ခွါသးစၢ်တဖၣ် ကအီၣ်ဝဲအဂီၢ် ဒီးစပံးထံန့ၣ် မ့ၢ်ဝဲလၢ ပှၤလၢအလီၤဘှံးလီၤတီၤလၢ ပှၢ်မုၢ်ကနၢအပူၤ ကအီဝဲအဂီၢ်လီၤ.”+ ၃ စီၤပၤဒၤဝံးတဲဝဲလၢ “နကစၢ် အလံၤခွါ* အိၣ်ဖဲလဲၣ်.”+ ဒီးစီၤစံဘၤ တဲဆၢစီၤပၤလၢ “အဝဲအိၣ်လၢ ဝ့ၢ်ယရူၤၡလ့ၣ်အပူၤလီၤ. အဝဲတဲဝဲလၢ ‘တနံၤအံၤ ပှၤအံၣ်စရ့လးဖိ ကဟ့ၣ်ကဒါက့ၤ ယဖု* အဘီအမုၢ် လၢယအိၣ်လီၤ.’”+ ၄ ဒီးစီၤပၤဒၤဝံးတဲဘၣ် စီၤစံဘၤလၢ “စီၤမဖံဘိၤၡ့း အတၢ်ခဲလၢာ်န့ၣ် ကဲထီၣ်နတၢ်လံ.”+ ဒီးစီၤစံဘၤ တဲဆၢက့ၤဝဲလၢ “ယကဲနခ့နပှၤတဂၤလီၤ. ယကစၢ်စီၤပၤဧၢ, မ်နဘၣ်သူၣ်ဘၣ်သးယၤတက့ၢ်.”+
၅ ဖဲစီၤပၤဒၤဝံး လဲၤတုၤလၢ ဘၤဃူရံၣ်အခါ ပိာ်ခွါတဂၤလၢ စီၤစီလူး အဒူၣ်ဖိထၢဖိအကျါန့ၣ် ဟဲထီၣ်ဝဲ ဒီးဖဲအလဲၤဃီၤလၢ စီၤဒၤဝံးအအိၣ်အဆၢကတီၢ် အကိးဃါအီၤ ဒီးဆိၣ်အၢအီၤလီၤ.+ ပိာ်ခွါတဂၤန့ၣ် မ့ၢ်ဝဲ စီၤက့ရၤ အဖိခွါ စီၤၡံမံၤလီၤ.+ ၆ အဝဲကွံာ်ဝဲ စီၤပၤဒၤဝံး ဒီးအခ့အပှၤကိးဂၤဒဲး လၢလၢၢ်လီၤ. ဒီးစီၤဒၤဝံး အသုးမုၢ် ဒီးအပှၤသုးဖိလၢ အဂံၢ်ဆူၣ်ဘါဆူၣ် လၢအအိၣ်လၢ စီၤဒၤဝံး အစုစ့ၣ်မ့ၢ်ဂ့ၤ စုထွဲမ့ၢ်ဂ့ၤန့ၣ် အဝဲကွံာ်ဝဲလၢ လၢၢ်စ့ၢ်ကီးလီၤ. ၇ စီၤၡံမံၤ ကိးဃါ ဒီးဆိၣ်အၢဝဲ စီၤဒၤဝံးလၢ “ပှၤလၢ တၢ်သွံၣ်လီၤတီလၢအခိၣ် ဒီးပှၤလၢ အဘျုးတအိၣ်ဘၣ် တဂၤဧၢ, ဟးထီၣ်ကွံာ်သၢၤ, ဟးထီၣ်ကွံာ်သၢၤ. ၈ နပၢက့ၤတၢ်ဒ် စီၤပၤအသိး လၢစီၤစီလူးအလီၢ် ဒီးစီၤစီလူး ဒီးအဒူၣ်ဖိထၢဖိတဖၣ် အသွံၣ်လီၤတီလၢ နခိၣ်လၢာ်လံအဃိ ယဟိဝၤယွၤ ဟ့ၣ်ကၣ်က့ၤနၤလံ. ယဟိဝၤယွၤ ဟ့ၣ်လီၤနဘီနမုၢ်လၢ နဖိခွါ စီၤအးဘၡါလိၣ် အစုပူၤလံ. တၢ်သွံၣ်လီၤတီလၢ နခိၣ်လိၤအဃိ ခဲအံၤ နထံၣ်ဘၣ် တၢ်နးတၢ်ဖှီၣ်လံ.”+
၉ ဒီးနီၢ်စရူယၤ+ အဖိခွါ စီၤအဘံၡဲၤ တဲဘၣ်စီၤပၤလၢ “ဘၣ်မနုၤအဃိ ထွံၣ်သံတဒုအံၤ+ ဆိၣ်အၢယကစၢ်စီၤပၤလဲၣ်.+ ဝံသးစူၤ ပျဲယလဲၤ ဒီၣ်တဲာ်ကွံာ်အခိၣ်တထံၣ်.”+ ၁၀ ဘၣ်ဆၣ် စီၤပၤတဲဝဲလၢ “နီၢ်စရူယၤ+ အဖိခွါသ့ၣ်ဧၢ, သုဘၣ်ဃးဒီးယၤဒ်လဲၣ်. အဝဲဆိၣ်အၢယၤဒၣ်ဝဲ,+ ယဟိဝၤယွၤ တဲအီၤလၢ ‘ဆိၣ်အၢ စီၤဒၤဝံးတက့ၢ်.’+ အဃိ ပှၤသံကွၢ်အီၤလၢ ‘ဘၣ်မနုၤအဃိ နမၤဒ်အံၤလဲၣ်’ န့ၣ်ကသ့တဂၤဂၤဧါ.” ၁၁ ဝံၤဒီးစီၤဒၤဝံး တဲစီၤအဘံၡဲၤ ဒီးအခ့အပှၤခဲလၢာ်လၢ “ယနီၢ်ကစၢ်အဖိခွါ လၢအမ့ၢ် ယသွံၣ်ထံဖံးညၣ်မး ဃုမၤသံယၤအဃိ+ ပှၤဘံၣ်ယၤမံၣ်ဖိတဂၤအံၤ+ ကအဲၣ်ဒိးမၤသံယၤန့ၣ် တမ့ၢ်တၢ်လၢ အလီၤကမၢကမၣ် နီတစဲးဘၣ်. မ့ၢ်လၢယဟိဝၤယွၤ မၢအမၤယၤ ဒ်န့ၣ်အဃိ အဝဲကဆိၣ်အၢယၤဒၣ်ဝဲ, တြီအီၤတဂ့ၤ. ၁၂ ဘၣ်သ့ၣ်သ့ၣ် ယဟိဝၤယွၤ ကထံၣ်လီၤ ယတၢ်နးတၢ်ဖှီၣ်တဖၣ်ဒီး+ လၢပှၤကိးဃါယၤလၢ တၢ်ဆိၣ်အၢတဖၣ် တနံၤအံၤအလီၢ်န့ၣ် ယဟိဝၤယွၤ ကဟ့ၣ်ဆၢက့ၤယၤလၢ တၢ်ဆိၣ်ဂ့ၤတဖၣ်လီၤ.”+ ၁၃ ဒီးစီၤဒၤဝံး ဒီးအပှၤတဖၣ် ဆဲးလဲၤတၢ်လၢကျဲ ဒီးစီၤၡံမံၤ ဟးဝဲလၢ ကစၢၢ်လိၤ သဃဲၤဒီးစီၤဒၤဝံး အကပၤ ဒီးအဝဲကိးဃါ ဒီးဆိၣ်အၢဝဲ+ စီၤဒၤဝံး ဒီးကွံာ်အဝဲသ့ၣ်လၢ လၢၢ်ဒီး ဟီၣ်ခိၣ်ကမူၣ်လီၤ.
၁၄ လၢခံ စီၤပၤ ဒီးပှၤလၢအိၣ်ဒီးအီၤခဲလၢာ် လဲၤတုၤဝဲလၢ တၢ်လီၢ်လၢ အဝဲသ့ၣ်အဲၣ်ဒိးလဲၤဝဲ ဒီးအဝဲသ့ၣ် လီၤဘှံးလီၤတီၤလီၤ. အဃိ အဝဲသ့ၣ် အိၣ်ဘှံးအိၣ်သါဝဲလီၤ.
၁၅ မ့မ့ၢ် စီၤအးဘၡါလိၣ် ဒီးပှၤအံၣ်စရ့လးဖိလၢ အလဲၤပိာ်အခံ ကိးဂၤဒဲးန့ၣ် လဲၤတုၤလၢ ဝ့ၢ်ယရူၤၡလ့ၣ် ဒီးစီၤအဃံသဖ့ၤလး+ အိၣ်ဒီးအီၤ စ့ၢ်ကီးလီၤ. ၁၆ ဖဲစီၤဒၤဝံး အသကိး စီၤဃူၡဲၤလၢအမ့ၢ်+ ပှၤအၢ်ကံဖိန့ၣ်+ လဲၤလၢ စီၤအးဘၡါလိၣ် အအိၣ်အခါ စီၤဃူၡဲၤ တဲစီၤအးဘၡါလိၣ်လၢ “မ်စီၤပၤအိၣ်မူဘၣ် ယံာ်ယံာ်တက့ၢ်.+ မ်စီၤပၤအိၣ်မူဘၣ် ယံာ်ယံာ်တက့ၢ်.” ၁၇ ဒီးစီၤအးဘၡါလိၣ် တဲဘၣ်စီၤဃူၡဲၤလၢ “နပာ်ဖျါထီၣ် တၢ်အဲၣ်လၢအတီလၢ နသကိးအဖီခိၣ် ဒ်အံၤလီၤဧါ. ဘၣ်မနုၤအဃိ နတလဲၤဒီး နသကိးဘၣ်လဲၣ်.” ၁၈ အဃိ စီၤဃူၡဲၤ တဲဘၣ် စီၤအးဘၡါလိၣ်လၢ “ယတလဲၤဘၣ်, ယအိၣ်ဃူ ပှၤလၢယဟိဝၤယွၤ ဃုထၢထီၣ်အီၤ, ပှၤလၢအအိၣ်ဒီးအီၤတဖၣ် ဒီးပှၤအံၣ်စရ့လးဖိခဲလၢာ်လီၤ. အဃိ ယကအိၣ်ဒီးနၤလီၤ. ၁၉ ဒီးယကတဲကဒီး တဘျီလၢ ယကဘၣ်မၤန့ၢ်တၢ်လၢ မတဂၤအဂီၢ်လဲၣ်. ယတကြၢးမၤန့ၢ်တၢ်လၢ ယသကိး အဖိခွါအဂီၢ်ဧီၤ. အဃိ ဒ်ယမၤန့ၢ်တၢ်လၢ နပၢ်အဂီၢ်အသိး ယကမၤန့ၢ်တၢ်လၢ နဂီၢ်လီၤ.”+
၂၀ စီၤအးဘၡါလိၣ် တဲစီၤအဃံသဖ့ၤလးလၢ “ပကဘၣ်မၤဒ်လဲၣ်. ဟ့ၣ်ကူၣ်ယၤမီၤ.”+ ၂၁ ဒီးစီၤအဃံသဖ့ၤလး တဲဘၣ်စီၤအးဘၡါလိၣ်လၢ “မံဃုာ်ဒီးနပၢ် အသံၣ်မါတဖၣ်*+ လၢအပာ်တ့ၢ်ဝဲလၢ ကကွၢ်ထွဲအဟံၣ်န့ၣ်တက့ၢ်.+ ဒီးအံၣ်စရ့လးခဲလၢာ် မ့ၢ်နၢ်ဟူဝဲလၢ နမၤဆါနပၢ်ဒ်အံၤန့ၣ် ပှၤလၢ အဆီၣ်ထွဲနၤတဖၣ် ကဆီၣ်ထွဲနၤ အါန့ၢ်ဒံးလၢညါလီၤ.” ၂၂ အဃိ ပှၤဆီလီၤဒဲတဖျၢၣ် လၢဟံၣ်ခိၣ်+ လၢစီၤအးဘၡါလိၣ် အဂီၢ်လီၤ. ဒီးစီၤအးဘၡါလိၣ် မံဃုာ်ဒီး အပၢ်အသံၣ်မါတဖၣ်+ လၢအံၣ်စရ့လး ခဲလၢာ်အမဲာ်ညါလီၤ.+
၂၃ ဒီးဖဲန့ၣ် အဆၢကတီၢ် တၢ်ဟ့ၣ်ကူၣ်လၢ အဟဲလၢစီၤအဃံသဖ့ၤလး+ အအိၣ်န့ၣ် ပှၤထံၣ်ဝဲဒ် ယွၤလၢ အမ့ၢ်အတီတဂၤ အကလုၢ်ကထါအသိးလီၤ. ကယဲၢ်စီၤအဃံသဖ့ၤလး အတၢ်ဟ့ၣ်ကူၣ်န့ၣ် ပှၤအဂၤ ဃုာ်ဒီးစီၤဒၤဝံး ဒီးစီၤအးဘၡါလိၣ် စ့ၢ်ကီးထံၣ်ဝဲဒ်န့ၣ်လီၤ.