၂ ၡမူၤအ့လး
၁၇ ဒီးစီၤအဃံသဖ့ၤလး တဲဘၣ် စီၤအးဘၡါလိၣ်လၢ “ဝံသးစူၤပျဲ ယဃုထၢထီၣ် ပှၤ ၁၂,၀၀၀ ဒ်သိးယကလဲၤလူၤ စီၤဒၤဝံး လၢတနၤညါအံၤ အဂီၢ်တက့ၢ်. ၂ ဖဲအလီၤဘှံး ဒီးအဂံၢ်အဘါ တအိၣ်လၢၤဘၣ်အခါ+ ယကမၤပျံၤမၤဖုးအီၤ ဝံၤဒီးအပှၤလၢ အအိၣ်ဒီးအီၤခဲလၢာ်န့ၣ် ကဃ့ၢ်ထီၣ်ကွံာ် ဒီးယကမၤသံကွံာ်ထဲ စီၤပၤတဂၤလီၤ.+ ၃ ဒီးယကဒုးဟဲက့ၤ ပှၤခဲလၢာ်လၢ နအိၣ်လီၤ. ဘၣ်ဆၣ် ပှၤခဲလၢာ်ကဟဲက့ၤလၢ နအိၣ်ဧါ တဟဲက့ၤဘၣ်ဧါန့ၣ် ဒိးသန့ၤထီၣ်အသးလၢ တၢ်မၤအသးဒီး ပှၤလၢနဃုအသးသမူတဂၤန့ၣ် အဖီခိၣ်လီၤ. အမ့ၢ်သံန့ၣ် ပှၤခဲလၢာ် ကအိၣ်ဒီး တၢ်မုာ်တၢ်ခုၣ်လီၤ.” ၄ စီၤအးဘၡါလိၣ် ဒီးအံၣ်စရ့လး အပှၤသူၣ်က့သးပှၢ် ခဲလၢာ် ဘၣ်သူၣ်ဘၣ်သးဝဲ တၢ်ဟ့ၣ်ကူၣ်အံၤလီၤ.
၅ ဘၣ်ဆၣ် စီၤအးဘၡါလိၣ် တဲဝဲလၢ “ဝံသးစူၤ ကိးန့ၢ်စ့ၢ်ကီး ပှၤအၢ်ကံဖိ စီၤဃူၡဲၤ+ ဒီးပကဒိကနၣ်ကွၢ် တၢ်လၢအဝဲ ကတဲဝဲတဖၣ်လီၤ.” ၆ အဃိ စီၤဃူၡဲၤ ဟဲလၢ စီၤအးဘၡါလိၣ် အအိၣ်လီၤ. ဒီးစီၤအးဘၡါလိၣ် တဲဘၣ်အီၤလၢ “စီၤအဃံသဖ့ၤလး ဟ့ၣ်ကူၣ်ဝဲဒ်အံၤလီၤ. မ့ၢ်ပကဘၣ်မၤထွဲ အတၢ်ဟ့ၣ်ကူၣ်ဧါ. ပမ့ၢ်တဘၣ်မၤထွဲဘၣ်န့ၣ် ပကဘၣ်မၤဒ်လဲၣ်, တဲဘၣ်ပှၤတက့ၢ်.” ၇ ဒီးစီၤဃူၡဲၤ တဲဘၣ် စီၤအးဘၡါလိၣ်လၢ “စီၤအဃံသဖ့ၤလး အတၢ်ဟ့ၣ်ကူၣ် တဘျီအံၤဒု တဂ့ၤဘၣ်.”+
၈ စီၤဃူၡဲၤ ဆဲးတဲဝဲလၢ “နပၢ် ဒီးပှၤလၢ အအိၣ်ဒီးအီၤတဖၣ်န့ၣ် မ့ၢ်ပှၤလၢ အဂံၢ်ဆူၣ်ဘါဆူၣ်န့ၣ် နသ့ၣ်ညါဂ့ၤဂ့ၤလီၤ.+ ဒီးအဝဲသ့ၣ် သးအ့န့ဒ်သိး တၤသူမိၢ်တဒုလၢ အဖိလီၤမၢ်သဒၣ်န့ၢ်အီၤလၢ ပျီပူၤန့ၣ်လီၤ.+ တကးဒံးဘၣ် နပၢ်န့ၣ် မ့ၢ်ပှၤဒူပှၤဃိၤတဂၤ+ အဃိတမ့ၢ်လၢ အဝဲကမံလၢ ပှၤဂၤတဖၣ်အကျါဘၣ်. ၉ ဆၢကတီၢ်ခဲအံၤနာ်က့ အဝဲကအိၣ်ခူသူၣ်ဝဲလၢ လ့ကိတဖျၢၣ်ဖျၢၣ်အပူၤ မ့တမ့ၢ် လၢတၢ်လီၢ်အဂၤ တတီၤတီၤသၢၤ.+ စီၤဒၤဝံး မ့ၢ်ဒုးဆိ နပှၤတဖၣ်န့ၣ် ပှၤလၢအနၢ်ဟူ တၢ်ကစီၣ်အံၤ ကတဲဝဲလၢ ‘ပှၤလၢအပိာ် စီၤအးဘၡါလိၣ် အခံန့ၣ် ၡူလံ.’ ၁၀ ပိာ်ခွါတဂၤလၢ အဒူ ဒ်ခ့ယုၢ်တဒု+ အသိးဒၣ်လဲာ် အသးကလီၤစၢ် ဒီးကပျံၤတၢ်လီၤ. ပှၤအံၣ်စရ့လးဖိခဲလၢာ် သ့ၣ်ညါဝဲလၢ နပၢ်န့ၣ် မ့ၢ်ပှၤလၢ အဂံၢ်ဆူၣ်ဘါဆူၣ်+ ဒီးပှၤလၢ အအိၣ်ဒီးအီၤတဖၣ်န့ၣ် မ့ၢ်ပှၤလၢ အဒူလီၤ. ၁၁ ယကဟ့ၣ်ကူၣ်နၤဒ်အံၤ, ပှၤအံၣ်စရ့လးဖိခဲလၢာ်လၢ အအိၣ်လၢ ဝ့ၢ်ဒၣ် တုၤလီၤလၢ ဘ့ၢ်ၡဘၤန့ၣ်+ မၢပှၤကိးဖှိၣ်အဝဲသ့ၣ် အါအါဂီၢ်ဂီၢ် တုၤလၢ အနီၣ်ဂံၢ်အိၣ်အါ ဒ်မဲးလၢအအိၣ်လၢ ပီၣ်လဲၣ်နံၤအသိး+ ဒီးနကဘၣ် တီခိၣ်ရိၤမဲအဝဲသ့ၣ်လၢ တၢ်ဒုးပူၤလီၤ. ၁၂ ဒီးဖဲပထံၣ်န့ၢ်အီၤလၢ တၢ်လီၢ်တတီၤဂ့ၤ တတီၤဂ့ၤန့ၣ် ပကလဲၤလီၤလၢအအိၣ် ဒ်ပစီၤထံလီၤဝဲလၢ ဟီၣ်ခိၣ်လိၤအသိး ဒီးအီၤမ့ၢ်ဂ့ၤ, ပှၤလၢအအိၣ် ဒီးအီၤမ့ၢ်ဂ့ၤ ကသံကိးဂၤဒဲးလီၤ. ၁၃ အဝဲမ့ၢ်ဂုၤက့ၤ အလီၢ်ခံလၢ ဝ့ၢ်တဖျၢၣ်ဖျၢၣ်အပူၤန့ၣ် ပှၤအံၣ်စရ့လးဖိခဲလၢာ် ကလဲၤစိာ်ပျံၤတဖၣ်လၢ ဝ့ၢ်တဖျၢၣ်န့ၣ်အပူၤ ဒီးထုးလီၤပှီၢ်ဝ့ၢ်တဖျၢၣ်န့ၣ် ဒီးတွံၢ်လီၤဝ့ၢ်လၢ တၢ်တြီၤပူၤ တုၤလၢ လၢၢ်ဖိပြံတဖျၢၣ်ဒၣ်လဲာ် တအိၣ်တ့ၢ်လၢၤဘၣ်.”
၁၄ စီၤအးဘၡါလိၣ် ဒီးအံၣ်စရ့လးပိာ်ခွါခဲလၢာ် တဲဝဲလၢ “ပှၤအၢ်ကံဖိ စီၤဃူၡဲၤ အတၢ်ဟ့ၣ်ကူၣ်န့ၣ် ဂ့ၤဒိၣ်န့ၢ်ဒံး+ စီၤအဃံသဖ့ၤလး အတၢ်ဟ့ၣ်ကူၣ်လီၤမၢၤ.” အနီၢ်ကီၢ်န့ၣ် ယဟိဝၤယွၤ ဆၢတဲာ်ပာ်စၢၤအသးလၢ အကမၤဟးဂီၤ စီၤအဃံသဖ့ၤလး+ အတၢ်ဟ့ၣ်ကူၣ် ဒ်သိးယဟိဝၤယွၤ ကဒုးအိၣ်ထီၣ် တၢ်ကီတၢ်ခဲဖးဒိၣ်လၢ စီၤအးဘၡါလိၣ် အဂီၢ်လီၤ.+
၁၅ လၢခံစီၤဃူၡဲၤ တဲဘၣ်ပှၤလုၢ်တၢ်ဒိၣ်တဖၣ် လၢအမ့ၢ် စီၤစၤဒိး ဒီးစီၤအ့ဘယၤသၢ်လၢ+ “စီၤအဃံသဖ့ၤလး ဟ့ၣ်ကူၣ် စီၤအးဘၡါလိၣ် ဒီးအံၣ်စရ့လး အပှၤသူၣ်က့သးပှၢ်တဖၣ် ဒ်အံၤ ဒီးမ့မ့ၢ်ယၤန့ၣ် ယဟ့ၣ်ကူၣ်အဝဲသ့ၣ် ဒ်အံၤလီၤ. ၁၆ အဃိ ခဲအံၤဆှၢလီၤ တၢ်ကစီၣ်လၢ စီၤဒၤဝံးအအိၣ်လၢအချ့ ဒီးဟ့ၣ်ပလီၢ်အီၤလၢ ‘တနၤညါအံၤ အိၣ်ဖဲပှၢ်မုၢ်ကနၢ အထံဒီၣ်အလီၢ်တဖၣ်တဂ့ၤ. လဲၤခီဂာ်တၢ် တဘျီဃီဟီ. သုမ့ၢ်တမၤ ဒ်န့ၣ်ဘၣ်န့ၣ် စီၤပၤဒီး ပှၤလၢအအိၣ်ဒီးအီၤတဖၣ် ကလီၤမၢ်ဘၣ်ဖုး ခဲလၢာ်လီၤ.’”+
၁၇ ဒီးခီဖျိလၢ စီၤယိနၤသၣ်+ ဒီးစီၤအဃံမဧး+ နုာ်လီၤပာ်ဖျါထီၣ်အသးလၢ ဝ့ၢ်ပူၤတဘူၣ်ဘၣ် အဃိ အဝဲသ့ၣ် ဆဲးအိၣ်ဝဲလၢ ဧ့ၣ်ရိၤက့လး+ အထံထီၣ်ပၢၢ်လီၤ. အဃိ ကုၢ်မုၣ်တဂၤ လဲၤတဲကျၢ အဝဲသ့ၣ် ဒီးအဝဲသ့ၣ်လဲၤဝဲ ဒ်သိးကတဲကျၢ စီၤပၤဒၤဝံး အဂီၢ်လီၤ. ၁၈ ဘၣ်ဆၣ် ပိာ်ခွါသးစၢ်တဂၤ ထံၣ်ချုးအဝဲသ့ၣ် ဒီးတဲဘၣ်ဝဲ စီၤအးဘၡါလိၣ်လီၤ. အဃိ စီၤယိနၤသၣ် ဒီးစီၤအဃံမဧး ကရီဟးထီၣ်ဝဲ ဒီးလဲၤဝဲလၢ ပိာ်ခွါတဂၤအဟံၣ် လၢဘၤဃူရံၣ်န့ၣ်လီၤ.+ ပိာ်ခွါတဂၤအံၤ အိၣ်ဒီးထံကမျၢလၢ အဟံၣ်ကရၢၢ်ပူၤလီၤ. ဒီးစီၤယိနၤသၣ် ဒီးစီၤအဃံမဧး လဲၤနုာ်လီၤလၢ ထံကမျၢပူၤလီၤ. ၁၉ ဒီးပိာ်ခွါတဂၤန့ၣ် အမါ ဒါလီၤဘၢဝဲ ထံကမျၢအခိၣ်လၢ တၢ်ကံးညာ် ဒီးလိဃ့ဝဲဘုလၢ တၢ်ကံးညာ်အလိၤလီၤ. အဃိ ပှၤတသ့ၣ်ညါဝဲ နီတဂၤဘၣ်. ၂၀ ဒီးစီၤအးဘၡါလိၣ် အခ့အပှၤတဖၣ် လဲၤဝဲလၢပိာ်မုၣ်တဂၤန့ၣ်အဟံၣ် ဒီးသံကွၢ်အီၤလၢ “စီၤအဃံမဧး ဒီးစီၤယိနၤသၣ် အိၣ်ဖဲလဲၣ်.” ဒီးပိာ်မုၣ်န့ၣ် တဲဆၢဝဲလၢ “အဝဲသ့ၣ်လဲၤ တလၢယဟံၣ်ဒီး လဲၤလီၤလၢ ထံကျိတကပၤလံ.”+ ဒီးပိာ်ခွါတဖၣ်န့ၣ် ဟးဃုအဝဲသ့ၣ် ဘၣ်ဆၣ် ဃုဝဲတဘၣ်ဘၣ်. အဃိ ပိာ်ခွါတဖၣ်န့ၣ် က့ၤကဒါက့ၤလၢ ဝ့ၢ်ယရူၤၡလ့ၣ်လီၤ.
၂၁ ပိာ်ခွါတဖၣ်န့ၣ် ဟးထီၣ်ကွံာ်ဝံၤအလီၢ်ခံ စီၤအဃံမဧး ဒီးစီၤယိနၤသၣ် ဟးထီၣ်ကွံာ်လၢ ထံကမျၢပူၤ ဒီးလဲၤလၢ စီၤပၤဒၤဝံး အအိၣ်လီၤ. အဝဲသ့ၣ်တဲဘၣ် စီၤဒၤဝံးလၢ တၢ်လၢစီၤအဃံသဖ့ၤလး ကူၣ်ထီၣ်ဝဲတဖၣ် ဒီးတဲအီၤလၢ “လဲၤခီဂာ်ထံကျိ မ့ၢ်ချ့ဟီ.”+ ၂၂ တဘျီဃီန့ၣ် စီၤဒၤဝံး ဒီးပှၤလၢအအိၣ်ဒီးအီၤတဖၣ် လဲၤခီဂာ်ဝဲ ထံကျိယၢ်ဒ့ၣ်လီၤ. ဖဲမုၢ်ဝါထီၣ်အခါ အဝဲသ့ၣ် လဲၤခီဂာ်ဝဲ ထံကျိယၢ်ဒ့ၣ် ဝံၤဝဲကိးဂၤဒဲးလီၤ.
၂၃ ဖဲစီၤအဃံသဖ့ၤလး သ့ၣ်ညါဝဲလၢ ပှၤတမၤထွဲ အတၢ်ဟ့ၣ်ကူၣ်ဘၣ်အခါ အဝဲကတဲာ်ကတီၤထီၣ် အကသ့ၣ်ယီၤ ဒီးက့ၤဝဲလၢ အဟံၣ်လၢ အနီၢ်ကစၢ်အဝ့ၢ်န့ၣ်လီၤ.+ အဝဲရဲၣ်လီၤ ကျဲၤလီၤတၢ်လၢ အဟံၣ်ဖိဃီဖိအဂီၢ်ဝံၤဒီး+ အဝဲလဲၤစၢၢ်သံလီၤအသးလီၤ.+ ဒီးပှၤခူၣ်လီၤအီၤလၢ အမိၢ်ပၢ်ဖံဖု လၢပျၢၤတဖၣ် အတၢ်သွၣ်ခိၣ်လီၤ.
၂၄ ဒီးစီၤဒၤဝံး လဲၤလၢ မၤဃန့ၤလီၤ.+ စီၤအးဘၡါလိၣ် ဒီးအံၣ်စရ့လး ပိာ်ခွါခဲလၢာ် လဲၤခီဂာ် ထံကျိယၢ်ဒ့ၣ်လီၤ. ၂၅ စီၤအးဘၡါလိၣ် ပာ်ထီၣ် စီၤဧမါစၤလၢ+ သုးခိၣ်ကျၢၢ် လၢစီၤယိၤအာ်အလီၢ်လီၤ.+ စီၤဧမါစၤန့ၣ်မ့ၢ်ဝဲ ပှၤအံၣ်စရ့လးဖိ စီၤယ့သ့ၣ် ဒီးနီၢ်အဘံၤကါယံးလး အဖိခွါလီၤ. နီၢ်အဘံၤကါယံးလး+ အပၢ်မ့ၢ်ဝဲ စီၤနၤဃၣ်လီၤ. ဒီးနီၢ်အဘံၤကါယံးလး အဒီပုၢ်ဝဲၢ်မုၣ်မ့ၢ်ဝဲ နီၢ်စရူယၤ လၢအမ့ၢ် စီၤယိၤအာ် အမိၢ်န့ၣ်လီၤ. ၂၆ ပှၤအံၣ်စရ့လးဖိ ဒီးစီၤအးဘၡါလိၣ် ဆီလီၤအဒဲလၢ ကံးလဧးအဟီၣ်ကဝီၤအပူၤလီၤ.+
၂၇ ဖဲစီၤဒၤဝံးလဲၤတုၤလၢ မၤဃန့ၤအခါ စီၤနၤဃၣ် အဖိခွါ စီၤၡိဘံး လၢအအိၣ်လၢ ပှၤဧၣ်မိၣ်ဖိ အဝ့ၢ်ရးဘး,+ စီၤဧးမံၤအ့လး အဖိခွါ စီၤမၤကံၢ်+ လၢအအိၣ်လၢ လိဒဘၢ် ဒီးပှၤကံးလဧးဖိ စီၤဘၢ်စံးလဲလၢ+ အအိၣ်လၢ ဝ့ၢ်ရိကလံၣ်န့ၣ် ၂၈ ဟဲစိာ်ဝဲ လီၢ်မံတဖၣ်, သလၢတဖၣ်, သပၢၤဟီၣ်ခိၣ်တဖၣ်, ဘု, ဘုမုယီၤ, ကိၣ်ကမူၣ်, ဘုဝဲာ်, ပထိး, သဘ့, ၂၉ ကနဲစီ, ထီပး, သိဖိ ဒီးတၢ်နုၢ်ထံ လီၤသကၤတဖၣ်လီၤ. အဝဲသ့ၣ် ဟဲစိာ်တၢ်သ့ၣ်တဖၣ်အံၤလၢ စီၤဒၤဝံး ဒီးပှၤလၢ အအိၣ်ဒီးအီၤတဖၣ် ကအီၣ်ဝဲအဂီၢ်လီၤ.+ ဒီးအဝဲသ့ၣ် တဲဝဲလၢ “ပှၤတဖၣ်အံၤ အိၣ်ဝဲလၢ ပှၢ်မုၢ်ကနၢပူၤအဃိ ကလီၤဘဲ, ကလီၤဘှံး ဒီးကဘၣ်သးအီထံလီၤ.”+