၂ ၡမူၤအ့လး
၁၈ ဒီးစီၤဒၤဝံး ဂံၢ်ဝဲပှၤပိာ်ခွါလၢ အအိၣ်ဒီးအီၤတဖၣ် ဒီးပာ်ထီၣ်ဝဲ သုးဖိတကထိ အခိၣ် ဒီးသုးဖိတကယၤ အခိၣ်လၢ အဝဲသ့ၣ်အကျါလီၤ.+ ၂ ဒီးစီၤဒၤဝံး နီၤဖးလီၤပှၤလၢ အအိၣ်ဒီးအီၤတဖၣ် ဒီးဆှၢလီၤအဝဲသ့ၣ် သၢဒူၣ်လီၤ. ဒီးတဒူၣ်န့ၣ် အိၣ်ဝဲလၢ နီၢ်စရူယၤ+ အဖိခွါ စီၤယိၤအာ်+ အတၢ်တီခိၣ်ရိၤမဲ အဖီလာ်, အဝဲတဒူၣ်န့ၣ် အိၣ်ဝဲလၢ စီၤယိၤအာ် အဒီပုၢ်ဝဲၢ်ခွါ စီၤအဘံၡဲၤ+ အတၢ်တီခိၣ်ရိၤမဲ အဖီလာ် ဒီးအဂၤတဒူၣ်န့ၣ် အိၣ်ဝဲလၢ ပှၤကံးတံးဖိ စီၤအံတဲၤ+ အတၢ်တီခိၣ်ရိၤမဲ အဖီလာ်လီၤ. ဒီးစီၤပၤတဲဘၣ် ပှၤတဖၣ်န့ၣ်လၢ “ယကလဲၤထီၣ်ဒီးသု စ့ၢ်ကီးလီၤ.” ၃ ဘၣ်ဆၣ် အဝဲသ့ၣ် တဲဝဲလၢ “နတဘၣ်လဲၤဘၣ်.+ ပမ့ၢ်ဘၣ်ဂုၤက့ၤ ပလီၢ်ခံ ဒီးဃ့ၢ်မ့ၢ်ဂ့ၤ ဒီးပပှၤမ့ၢ်သံတဝာ် သနာ်က့ အဝဲသ့ၣ် တပာ်ဝဲလၢ တၢ်နီတမံၤဘၣ်, မ့ၢ်လၢ နလုၢ်နပှ့ၤ အိၣ်ထဲသိးဒီး ပဝဲအဂၤ ၁၀,၀၀၀ ညါအဃိလီၤ.+ အဃိန့ၣ် နမ့ၢ်အိၣ်လၢ ဝ့ၢ်ပူၤ ဒီးဆှၢလီၤန့ၢ်ပှၤ တၢ်မၤစၢၤန့ၣ် ကဂ့ၤဒိၣ်ဝဲလီၤ.” ၄ စီၤပၤ တဲဘၣ်အဝဲသ့ၣ်လၢ “ကွၢ်လၢ သုဆိကမိၣ်လၢ အဂ့ၤကတၢၢ်န့ၣ် ယကမၤလီၤ.” အဃိ စီၤပၤ လဲၤဆၢထၢၣ် ဘူးဒီးဝ့ၢ်အတြဲၤ ဒီးပှၤလၢ အအိၣ်ဒီးအီၤခဲလၢာ်န့ၣ် ဟးထီၣ်ဝဲတဘျုးဒူၣ်, ဘၣ်တဒူၣ်ဒူၣ်အိၣ်ဝဲ အဂၤလၢ အကယၤ ဒီးဘၣ်တဒူၣ်ဒူၣ် အိၣ်ဝဲအဂၤလၢ အကထိလီၤ. ၅ ဒီးစီၤပၤ မၤလိာ် စီၤယိၤအာ်, စီၤအဘံၡဲၤ ဒီးစီၤအံတဲၤလၢ “ပိာ်ခွါသးစၢ် စီၤအးဘၡါလိၣ်န့ၣ် မ့ၢ်ယဖိခွါသးဘိအဃိ မၤဘၣ်ဒိအီၤတဂ့ၤ.”+ ဖဲစီၤပၤ မၤလိာ်သုးခိၣ်ကိးဂၤဒဲးလၢ အဘၣ်ဃးဒီး စီၤအးဘၡါလိၣ် အဂ့ၢ်အခါ ပှၤခဲလၢာ်နၢ်ဟူဝဲလီၤ.
၆ ဒီးပှၤသုးဖိတဖၣ် လဲၤထီၣ်လၢ ပျီပူၤ ဒ်သိးကလဲၤသဂၢၢ်ဝဲ ပှၤအံၣ်စရ့လးဖိ အဂီၢ်လီၤ. တၢ်ဒုးန့ၣ် ကဲထီၣ်ဝဲလၢ အ့ဖရဲၣ် အပှၢ်လၢ်ကျါလီၤ.+ ၇ ဖဲန့ၣ်န့ၣ် စီၤဒၤဝံး အခ့အပှၤတဖၣ်+ မၤနၢၤဝဲ ပှၤအံၣ်စရ့လးဖိ+ ဒီးဖဲတၢ်တနံၤန့ၣ် တၢ်ဒုးကဲထီၣ်ဝဲဖးဒိၣ် ဒီးပှၤသံဝဲ အဂၤ ၂၀,၀၀၀ လီၤ. ၈ တၢ်ဒုးကဲထီၣ်ဝဲလၢ ဟီၣ်ကဝီၤဒီတဘ့ၣ်ညါလီၤ. တကးဒံးဘၣ် ဖဲနံၤအဝဲန့ၣ် ပှၤသံလၢ ပှၢ်ပူၤ အိၣ်အါန့ၢ် ပှၤသံလၢနးအဃိဒံးလီၤ.
၉ လၢခံ စီၤအးဘၡါလိၣ် တိဒီး စီၤဒၤဝံး အခ့အပှၤတဖၣ် အဃိ အဝဲဃ့ၢ်ကွံာ်ဝဲလီၤ. စီၤအးဘၡါလိၣ် ဒိးဝဲကသ့ၣ်ယီၤ* ဒီးကသ့ၣ်ယီၤန့ၣ် လဲၤဃ့ၢ်ဝဲလၢ သ့ၣ်ဖးဒိၣ်အဒ့တဖၣ် အဖီလာ်ဒီး စီၤအးဘၡါလိၣ် အခိၣ်ဆူၣ် ဘၣ်ကွးလၢ သ့ၣ်ဖးဒိၣ်အဒ့တဖၣ်လီၤ. အဃိ အဝဲလီၤကစဲၤလၢ သ့ၣ်ဖးဒိၣ်အခံ ဒီးမ့မ့ၢ် အကသ့ၣ်ယီၤန့ၣ် ဆဲးဃ့ၢ်ဒံးဝဲလီၤ. ၁၀ ဒီးပှၤတဂၤ ထံၣ်ဝဲစီၤအးဘၡါလိၣ် ဒီးတဲဘၣ် စီၤယိၤအာ်လၢ+ “ယထံၣ်စီၤအးဘၡါလိၣ် လီၤကစဲၤလၢ သ့ၣ်ဖးဒိၣ်အခံ လၢန့ၣ်.” ၁၁ စီၤယိၤအာ် တဲဘၣ်ပိာ်ခွါတဂၤန့ၣ်လၢ “နထံၣ်အီၤဒၢး ဘၣ်မနုၤအဃိ နတမၤသံအီၤဒီး မၤလီၤတဲာ်ကွံာ်အီၤလၢ ဟီၣ်ခိၣ်လိၤ ဖဲန့ၣ်ဘၣ်လဲၣ်. နမ့ၢ်မၤဘၣ်ဖုးဒ်န့ၣ်န့ၣ် ယကဘၣ်ဟ့ၣ်နၤ စ့ညၣ် အဘ့ၣ်တဆံ ဒီးယီၢ်တကိးတဘ့ၣ်ညါ.” ၁၂ ဒီးပှၤတဂၤန့ၣ် တဲစီၤယိၤအာ်လၢ “နမ့ၢ်ဟ့ၣ်လီၤယၤ စ့ညၣ်အဘ့ၣ် ၁,၀၀၀ သနာ်က့ ယယူာ်ထီၣ်ယစု ဒ်သိးကမၤဘၣ်ဒိ စီၤပၤအဖိခွါအဂီၢ် တဘူၣ်ဘၣ်. ပနၢ်ဟူစီၤပၤ ဟ့ၣ်လီၤအကလုၢ်လၢ နၤ, စီၤအဘံၡဲၤ ဒီးစီၤအံတဲၤအအိၣ်လၢ ‘ဒ်သိးပှၤသးစၢ် စီၤအးဘၡါလိၣ်တဂၤ သုတဘၣ်ဒိတဂ့ၤအဂီၢ် ပလီၢ်သုသးတက့ၢ်.’+ ၁၃ ယမ့ၢ်တဒိကနၣ် စီၤပၤအကလုၢ်ဘၣ် ဒီးမၤသံဘၣ်ဖုး စီၤအးဘၤၡါလိၣ်န့ၣ် တၢ်ဂ့ၢ်တခါအံၤ ကဟူထီၣ်လၢ စီၤပၤအအိၣ် ဒီးတမ့ၢ်လၢ နကဒီသဒၢယၤဘၣ်.” ၁၄ ဒီးစီၤယိၤအာ် တဲဝဲလၢ “ယတမၤလၢာ်ဂီၤ ယတၢ်ဆၢကတီၢ်ဒီး နၤလၢၤဘၣ်.” ဒီးအဝဲဟံးထီၣ် ထးခိၣ်စူသၢဘိ ဒီးလဲၤဝဲလၢ စီၤအးဘၡါလိၣ်အအိၣ်လီၤ. ဒီးဖဲစီၤအးဘၡါလိၣ် လီၤကစဲၤမူဒံးဝဲလၢ သ့ၣ်ခံ အခါ စီၤယိၤအာ် ဆဲးအသးနါပှၢ်* လၢထးခိၣ်စူတဖၣ်န့ၣ်လီၤ. ၁၅ ဒီးပှၤမၤစၢၤတၢ် အဂၤတဆံလၢ အစိာ်ဝဲစီၤယိၤအာ် အစုကဝဲၤန့ၣ် လဲၤကျီဝဲ စီၤအးဘၡါလိၣ် တုၤလၢအသံဝဲလီၤ.+ ၁၆ စီၤယိၤအာ် အူထီၣ်ကွဲၤ ဒ်သိးကပတုာ် တၢ်ဒုးအဂီၢ်လီၤ. အဃိ ပှၤလၢအလူၤဒုး ပှၤအံၣ်စရ့လးဖိတဖၣ်န့ၣ် ဟဲက့ၤကဒါက့ၤဝဲလီၤ. ၁၇ ဒီးအဝဲသ့ၣ် ဟံးန့ၢ် စီၤအးဘၡါလိၣ်အစိၣ် ဒီးကွံာ်လီၤဝဲလၢ တၢ်ပူၤယိာ် လၢအအိၣ်လၢ ပှၢ်ကျါ ဒီးအဝဲသ့ၣ် ပာ်ပူၣ်ထီၣ်လၢၢ်လၢအဖီခိၣ် ဖးဒိၣ်တပူၣ်လီၤ.+ ဒီးပှၤအံၣ်စရ့လးဖိခဲလၢာ် က့ၤဃ့ၢ်ကွံာ်ဝဲလၢ အဝဲသ့ၣ်အဟံၣ်လီၤ.
၁၈ ဖဲစီၤအးဘၡါလိၣ် အိၣ်မူဒံးအခါ အတဲဝဲလၢ “ဒ်သိး ပှၤကသ့ၣ်နီၣ်ထီၣ်က့ၤ ယမံၤအဂီၢ် ယဖိခွါ တအိၣ်နီတဂၤဘၣ်.”+ အဃိ အဝဲဆီလီၤ လၢၢ်ထူၣ်တထူၣ် လၢအနီၢ်ကစၢ်အဂီၢ် လၢစီၤပၤ အတၢ်တြီၤပူၤန့ၣ်လီၤ.+ ဒီးအဝဲကိးန့ၢ် လၢၢ်ထူၣ်တထူၣ် ဒ်အနီၢ်ကစၢ် အမံၤအသိး ဒီးတုၤလၢ မုၢ်မဆါတနံၤအံၤန့ၣ် ပှၤကိးလၢၢ်ထူၣ်တထူၣ်အံၤလၢ စီၤအးဘၡါလိၣ် အတၢ်သ့ၣ်နီၣ်ထီၣ် အလၢၢ်ထူၣ်န့ၣ်လီၤ.
၁၉ ဒီးစီၤစၤဒိး အဖိခွါ စီၤအဃံမဧး+ တဲဝဲလၢ “ယဟိဝၤယွၤ စံၣ်ညီၣ်န့ၢ်တၢ်လၢ စီၤပၤအဂီၢ် တီတီလိၤလိၤ ခီဖျိ အမၤပူၤဖျဲးထီၣ်အီၤလၢ အဒုၣ်အဒါတဖၣ် အစုပူၤလီၤ. အဃိ ဝံသးစူၤ ဟ့ၣ်ယၤအခွဲးလၢ ယကလဲၤဃ့ၢ်တဲဘၣ် စီၤပၤ တၢ်ကစီၣ်မီၤ.”+ ၂၀ ဘၣ်ဆၣ် စီၤယိၤအာ် တဲအီၤလၢ “တနံၤအံၤ နတကဲဘၣ် ပှၤစိာ်တၢ်ကစီၣ်ဖိဘၣ်. မ့ၢ်လၢစီၤပၤ အဖိခွါသံဝဲအဃိ တနံၤအံၤ တဘၣ်တဲဖျါထီၣ် တၢ်ကစီၣ်ဒံးတဂ့ၤ, တဲဖျါထီၣ်အီၤလၢ မုၢ်နံၤအဂၤတနံၤတက့ၢ်.”+ ၂၁ ဝံၤဒီးစီၤယိၤအာ် တဲဘၣ် ပှၤကူၤၡးဖိတဂၤလၢ+ “လဲၤတဲဘၣ် စီၤပၤတၢ်လၢနထံၣ်တဖၣ်တက့ၢ်.” အဃိ ပှၤကူၤၡးဖိတဂၤန့ၣ် ဆုးလီၤအခိၣ်လၢ စီၤယိၤအာ် အမဲာ်ညါ ဒီးလဲၤဝဲလီၤ. ၂၂ စီၤစၤဒိး အဖိခွါ စီၤအဃံမဧး တဲကဒီး စီၤယိၤအာ်လၢ “တၢ်မ့ၢ်ကဲထီၣ်အသး တမံၤဂ့ၤတမံၤဂ့ၤ သနာ်က့ ဟ့ၣ်ယၤအခွဲးလၢ ယကလဲၤဃ့ၢ်လၢ ပှၤကူၤၡးဖိ အလီၢ်ခံ စ့ၢ်ကီးမီၤ.” ဘၣ်ဆၣ် စီၤယိၤအာ် တဲအီၤလၢ “ဖိခွါဧၢ, နကဘၣ်လဲၤတဲ တၢ်ကစီၣ်တအိၣ်နီတမံၤဒၢး ဘၣ်မနုၤအဃိ နကလဲၤဃ့ၢ်လဲၣ်.” ၂၃ ဘၣ်ဆၣ် စီၤအဃံမဧး တဲကဒီးဝဲလၢ “တၢ်မ့ၢ်ကဲထီၣ်အသး တမံၤဂ့ၤတမံၤဂ့ၤ သနာ်က့ ဟ့ၣ်ယၤအခွဲးလၢ ယကလဲၤဃ့ၢ်စ့ၢ်ကီးမီၤ.” အဃိ စီၤယိၤအာ် တဲအီၤလၢ “လဲၤဃ့ၢ်ဟီ.” ဒီးစီၤအဃံမဧး လဲၤဃ့ၢ်လၢ ယၢ်ဒ့ၣ် အဟီၣ်ကဝီၤတကပၤ ဒီးအဝဲဃ့ၢ်တလၢကွံာ်ဝဲ ပှၤကူၤၡးဖိလီၤ.
၂၄ ဒီးစီၤဒၤဝံး ဆ့ၣ်နီၤဝဲလၢ ဝ့ၢ်အတြဲၤ+ ခံဘ့ၣ်အဘၢၣ်စၢၤ ဒီးပှၤခိးကွၢ်တၢ်ဖိတဂၤ+ လဲၤထီၣ်လၢ တြဲၤခိၣ်ဒုးလၢ အဘူးဒီးတၢ်ဒူၣ်ကပၤလီၤ. ဒီးအဝဲကွၢ်စိဝဲ ဒီးထံၣ်ဝဲ ပှၤဃ့ၢ်ဝဲတဂၤလီၤ. ၂၅ အဃိ ပှၤခိးကွၢ်တၢ်ဖိတဂၤန့ၣ် တဲဘၣ်စီၤပၤလီၤ. စီၤပၤတဲဝဲလၢ “အမ့ၢ်ဟဲဃ့ၢ်ထဲတဂၤန့ၣ် မ့ၢ်ဝဲအဟဲစိာ်တၢ်ကစီၣ်လီၤ.” ဖဲအဝဲဟဲဃ့ၢ်ဘူးထီၣ်အခါ ၂၆ ပှၤခိးကွၢ်တၢ်ဖိတဂၤန့ၣ် ထံၣ်ဝဲ ပှၤဟဲဃ့ၢ်ကဒီးလၢ အဂၤတဂၤလီၤ. ဒီးပှၤခိးကွၢ်တၢ်ဖိတဂၤန့ၣ် တဲဘၣ်ပှၤခိးတြဲၤဖိတဂၤလၢ “ပှၤဟဲဃ့ၢ် တဂၤဒံး.” ဒီးစီၤပၤတဲဝဲလၢ “ပှၤတဂၤအံၤ ဟဲစိာ်တၢ်ကစီၣ် စ့ၢ်ကီးလီၤ.” ၂၇ ဒီးပှၤခိးကွၢ်တၢ်ဖိတဂၤန့ၣ် တဲဝဲလၢ “ယကွၢ်န့ၣ် ပှၤဃ့ၢ်အဆိကတၢၢ်တဂၤန့ၣ် ဃ့ၢ်ဝဲလီၤဂာ်လၢ စီၤစၤဒိး အဖိခွါ စီၤအဃံမဧးဟီ.”+ အဃိ စီၤပၤတဲဝဲလၢ “အကဲပှၤအဂ့ၤလီၤ ဒီးအဝဲကဟဲစိာ် တၢ်ကစီၣ်လၢအမုာ်လီၤသၢၤ.” ၂၈ ဒီးစီၤအဃံမဧး တဲစိဝဲစီၤပၤလၢ “ယဟဲစိာ်တၢ်ကစီၣ်လၢ အမုာ်လီၤ.” ဒီးအဝဲထိၣ်လီၤပှီၤအသးလၢ ဟီၣ်ခိၣ်လိၤ ဒီးဆုးလီၤအခိၣ်လၢ စီၤပၤအမဲာ်ညါလီၤ. ဒီးအဝဲတဲဝဲလၢ “ကစၢ်စီၤပၤဧၢ, နကစၢ် ယဟိဝၤယွၤ လၢအဟ့ၣ်လီၤကွံာ် ပှၤလၢအထီဒါက့ၤနၤ လၢနစုပူၤန့ၣ် မ်အဘၣ် တၢ်စံးထီၣ်ပတြၢၤ အီၤတက့ၢ်.”+
၂၉ ဘၣ်ဆၣ် စီၤပၤတဲဝဲလၢ “ပှၤသးစၢ် စီၤအးဘၡါလိၣ်မီၤ, အတဘၣ်နီတမံၤဘၣ် မ့ၢ်ဧါ.” စီၤအဃံမဧး တဲဆၢဝဲလၢ “ဖဲစီၤယိၤအာ် ဆှၢလီၤ စီၤပၤအခ့အပှၤ ဃုာ်ဒီးယၤ* အခါ ယထံၣ်ဘၣ် တၢ်ဘံဘူစၢၤသၢတခါ ဘၣ်ဆၣ် အကဲတၢ်မနုၤလဲၣ်န့ၣ် ယတဲတဘၣ်ဘၣ်.”+ ၃၀ အဃိ စီၤပၤတဲအီၤလၢ “လဲၤဆၢထၢၣ် လၢန့ၣ်.” ဒီးစီၤအဃံမဧး လဲၤဆၢထၢၣ်ဝဲဖဲန့ၣ်လီၤ.
၃၁ ဒီးပှၤကူၤၡးဖိ ဟဲတုၤဒီး+ တဲဝဲလၢ “စီၤပၤဧၢ, ဝံသးစူၤ ကနၣ်တၢ်ကစီၣ်အံၤတက့ၢ်. တနံၤအံၤ ယဟိဝၤယွၤ စံၣ်ညီၣ်န့ၢ်တၢ် လၢနဂီၢ် တီတီလိၤလိၤ ခီဖျိလၢ အမၤပူၤဖျဲးထီၣ်နၤလၢ ပှၤလၢအထီဒါနၤ ခဲလၢာ်အစုပူၤလံ.”+ ၃၂ ဘၣ်ဆၣ် စီၤပၤ တဲဘၣ်ပှၤကူၤၡးဖိတဂၤလၢ “ပှၤသးစၢ် စီၤအးဘၡါလိၣ်မီၤ, အတဘၣ်နီတမံၤဘၣ် မ့ၢ်ဧါ.” ဒီးပှၤကူၤၡးဖိ တဲဝဲလၢ “ယကစၢ်စီၤပၤဧၢ, နဒုၣ်နဒါ ဒီးပှၤလၢအထီဒါနၤ ခဲလၢာ်န့ၣ် မ်အကဲထီၣ်ဒ် ပှၤသးစၢ်တဂၤအံၤ အသိးတက့ၢ်.”+
၃၃ စီၤပၤ အသးဘၣ်တံာ်တာ်ဝဲလၢ တၢ်ကစီၣ်အံၤအဃိ အဝဲလဲၤထီၣ်လၢ ဒၢးလၢဟံၣ်ခိၣ်လီၤ. ဒီးအဝဲလဲၤထီၣ်တခီခီ ဟီၣ်ဝဲတခီခီ ဒီးတဲဝဲလၢ “ယဖိခွါ စီၤအးဘၡါလိၣ်ဧၢ, ယဖိခွါဧၢ, ယဖိခွါ စီၤအးဘၡါလိၣ်ဧၢ, ယမ့ၢ်သံလၢနလီၢ်န့ၣ် ကဂ့ၤဒိၣ်ဒံး. အိ ယဖိခွါ စီၤအးဘၡါလိၣ်ဧၢ, ယဖိခွါဧၢ.”+