စံးထီၣ်ပတြၢၤ
စီၤဒၤဝံးအထါ.
၁၄၄ ယလၢၢ်+ လၢအမ့ၢ် ယဟိဝၤယွၤန့ၣ် မ်ပှၤစံးထီၣ်ပတြၢၤအီၤတက့ၢ်.
အဝဲသိၣ်လိယစုလၢ ယကဒုးတၢ်အဂီၢ်
ဒီးယစုမုၢ်စုနၢတဖၣ်လၢ တၢ်ဒုးသုးအဂီၢ်လီၤ.+
၂ ကစၢ်ယွၤ ပာ်ဖျါထီၣ် တၢ်အဲၣ်လၢအတီ လၢယဖီခိၣ်, အမ့ၢ် ယတၢ်အိၣ်သဒၢအလီၢ်,+
ယတၢ်အိၣ်သဒၢအလီၢ် လၢအကျၢၤ, ပှၤလၢ အမၤပူၤဖျဲးယၤ,
ယကတီၤ, ပှၤလၢ အဒီသဒၢယၤ
ဒီးပှၤလၢ အဆီၣ်လီၤ ပှၤဂီၢ်မုၢ်တဖၣ် လၢယဖီလာ်လီၤ.+
၃ အိ ယဟိဝၤယွၤဧၢ, ပှၤဟီၣ်ခိၣ်ဖိ မ့ၢ်တၢ်မနုၤလၢ နကပာ်သူၣ်ပာ်သးအီၤ အဂီၢ်လဲၣ်.+
ဒီးပှၤကညီဖိခွါ မ့ၢ်တၢ်မနုၤလၢ နကသးအိၣ်အီၤ အဂီၢ်လဲၣ်.
၄ ပှၤဟီၣ်ခိၣ်ဖိန့ၣ် လီၤဂာ်ဒ်သိးဒီး တၢ်သါလီၤ ထဲတထံၣ်လီၤ.+
အတၢ်အိၣ်မူန့ၣ် လဲၤပူၤကွံာ်ဝဲ ဒ်တၢ်ကဒုအသိးလီၤ.+
၅ အိ ယဟိဝၤယွၤဧၢ, ဆီၣ်လီၤနမူခိၣ် ဒီးဟဲလီၤတက့ၢ်.+
ထိးကစၢၢ်တဖၣ် ဒီးမၤခုၣ်ထီၣ်အီၤတက့ၢ်.+
၆ မၤကပီၤထီၣ် လီဝၢ်ဒံး ဒီးမၤလီၤပြံလီၤပြါ ဒုၣ်ဒါတက့ၢ်.+
ခးထီၣ်နပျၢ်တဖၣ် ဒီးမၤဘံဘူ အဝဲသ့ၣ် အတၢ်ဆိကမိၣ်တက့ၢ်.+
၇ လၢမူခိၣ်န့ၣ် ယူာ်လီၤနစု,
ထုးထီၣ်ကွံာ်ယၤ ဒီးမၤပူၤဖျဲးယၤလၢ ထံလၢအယွၤလီၤဆူၣ်ဆူၣ်
လၢအမ့ၢ် ပှၤထံဂၤကီၢ်ဂၤဖိတဖၣ် အစုပူၤတက့ၢ်.+
၈ အဝဲသ့ၣ် တဲလံၣ်တဲလီတၢ်
ဒီးယူာ်ထီၣ်အစုထွဲ ဒ်သိး ကအုၣ်အသး ကဘျံးကဘျၣ်အဂီၢ်လီၤ.
၉ အိ ကစၢ်ယွၤဧၢ, ယကသးဝံၣ်ထီၣ်နၤလၢ တၢ်သးဝံၣ်အသီ တယုၢ်လီၤ.+
ယကသးဝံၣ် စံးထီၣ်ပတြၢၤနၤ ဒီးဒ့သီတူၢ်လၢ အအိၣ်ဒီး အပျံၤအဘိတဆံ,
၁၀ မ့ၢ်လၢနဟ့ၣ် စီၤပၤတဖၣ်လၢ တၢ်မၤနၢၤ+
ဒီးနမၤပူၤဖျဲး နခ့နပှၤ စီၤဒၤဝံး ဒ်သိး ပှၤသုတမၤသံအီၤလၢ နးတဂ့ၤအဃိလီၤ.+
၁၁ ပှၤထံဂၤကီၢ်ဂၤဖိတဖၣ် တဲလံၣ်တဲလီတၢ်
ဒီးယူာ်ထီၣ်အစုထွဲ ဒ်သိး ကအုၣ်အသး ကဘျံးကဘျၣ်အဂီၢ်လီၤ.
အဃိ မၤပူၤဖျဲးယၤ ဒီးအုၣ်က့ၤခီၣ်က့ၤယၤလၢ အဝဲသ့ၣ် အစုပူၤတက့ၢ်.
၁၂ နမ့ၢ်မၤဒ်န့ၣ်န့ၣ် ပဖိခွါတဖၣ် ကလီၤဂာ် ဒ်သိးဒီး တၢ်မုၢ်တၢ်ဘိ လၢအဒိၣ်ထီၣ်ချ့မး
ဒီးပဖိမုၣ်တဖၣ် ကလီၤဂာ် ဒ်သိးဒီး တၢ်အထူၣ်တဖၣ်လၢ အမၤဃံမၤလၤထီၣ်နီ* အနၢၣ်ထံးလီၤ.
၁၃ ပတၢ်ပာ်ဖှိၣ်အလီၢ်တဖၣ် ကအိၣ်ပှဲၤဝဲဒီး တၢ်အီၣ်တၢ်အီ အကလုာ်ကလုာ်,
ပသိဒီးမဲာ်တဲးလဲးတဖၣ် လၢပျီပူၤန့ၣ် ကအါထီၣ်ဝဲ လၢအကထိ အကလးတဖၣ်လီၤ.
၁၄ ဒီးပကျီၢ်လၢ အဒၢထီၣ်တဖၣ်န့ၣ် တဘၣ်ဒိဘၣ်ထံးဘၣ် ဒီးအဖိတလီၤတဲာ် နီတဒုဘၣ်.*
ဒီးတၢ်ကိးပသူထီၣ်လၢ တၢ်ကိၢ်တၢ်ဂီၤအပူၤန့ၣ် တအိၣ်ထီၣ်လၢ ပတၢ်ဆါတၢ်ပှ့ၤအလီၢ်ဘၣ်.
၁၅ ပှၤလၢ တၢ်ကဲထီၣ်အသးဒီးအီၤ ဒ်န့ၣ်န့ၣ် ကသးခုဝဲလီၤ.
ပှၤလၢ အကစၢ်ယွၤမ့ၢ် ယဟိဝၤယွၤန့ၣ် ကသးခုဝဲလီၤ.+