ယံးရမံယၤ
၇ ယဟိဝၤယွၤ တဲဘၣ် စီၤယံးရမံယၤလၢ ၂ “ဆၢထၢၣ်လၢ ယဟိဝၤယွၤ အဟံၣ်အတြဲၤ ဒီးတဲဖျါထီၣ် တၢ်ကစီၣ် ဒ်အံၤတက့ၢ်. ‘ယူဒၤအပှၤဂီၢ်မုၢ်ခဲလၢာ် လၢအဟဲနုာ်လီၤလၢ တြဲၤတဖၣ်အံၤ လၢကဘူၣ်ထီၣ်ဘါထီၣ် ယဟိဝၤယွၤအဂီၢ် သ့ၣ်ဧၢ, ဒိကနၣ် ယဟိဝၤယွၤ အတၢ်ကတိၤတက့ၢ်. ၃ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ဆီတလဲက့ၤ သုသကဲာ်ပဝး, သုတၢ်မၤတဖၣ် ဒီးမၤတၢ်လၢ အဘၣ်တက့ၢ်. သုမ့ၢ်မၤဒ်န့ၣ်န့ၣ် ယကပျဲလၢ သုကဆဲးအိၣ်လၢ တၢ်လီၢ်ဖဲအံၤလီၤ.+ ၄ တဘၣ်နာ်န့ၢ် တၢ်လံၣ်တၢ်လီ ဒီးတဲလၢ ‘အဝဲအံၤ မ့ၢ်ဝဲ ယဟိဝၤယွၤ အတၢ်လုၢ်ဟံၣ်, ယဟိဝၤယွၤ အတၢ်လုၢ်ဟံၣ်, ယဟိဝၤယွၤ အတၢ်လုၢ်ဟံၣ်’ တဂ့ၤ.+ ၅ သုမ့ၢ် ဆီတလဲ သုတၢ်မၤတဖၣ်ဒီး မၤတၢ်လၢအဘၣ်, ဆီတလဲက့ၤ သုသကဲာ်ပဝး, သုမ့ၢ် စံၣ်ညီၣ်န့ၢ်တၢ်လၢ ပှၤခံဂၤအဘၢၣ်စၢၤ တီတီလိၤလိၤ,+ ၆ သုမ့ၢ် တဆီၣ်တံၢ်မၤနၢၤ ပှၤထံဂၤကီၢ်ဂၤဖိ, ပှၤဖိၣ်ဃဲ ဒီးမုၣ်ကမဲတဖၣ်ဘၣ်,+ သုမ့ၢ် တလူလီၤ ပှၤလၢအတၢ်ကမၣ် တအိၣ်ဘၣ်အသွံၣ် လၢတၢ်လီၢ်ဖဲအံၤဘၣ် ဒီးသုမ့ၢ်တဘူၣ်ထီၣ်ဘါထီၣ် ယွၤအဂၤတဖၣ် လၢသုကမၤဟးဂီၤလီၤသုသး အဂီၢ်ဘၣ်န့ၣ်+ ၇ ယကပျဲလၢ သုကဆဲးအိၣ်လၢ တၢ်လီၢ်ဖဲအံၤ လၢအမ့ၢ် ကီၢ်လၢ ယဟ့ၣ်လီၤပာ်စၢၤ သုမိၢ်ပၢ်ဖံဖု လၢပျၢၤတဖၣ် လီၤထူလီၤယိာ်လီၤ.”’”
၈ “ဘၣ်ဆၣ် သုနာ်န့ၢ် တၢ်လံၣ်တၢ်လီ+ လၢအတကဲဘျုးလၢသုဂီၢ် နီတစဲးဘၣ်. ၉ သုဟုၣ်တၢ်,+ သုမၤသံတၢ်, သုအဲၣ်ဘၢမါအဲၣ်ဘၢဝၤ, သုတတီဒီး သုတၢ်အၢၣ်လီၤဘၣ်,+ သုလုၢ်ထီၣ်တၢ်လၢ ဘဧၤလးအအိၣ်+ ဒီးဘူၣ်ထီၣ်ဘါထီၣ် ယွၤလၢ သုတသ့ၣ်ညါအီၤဘၣ်တဖၣ်လီၤ. ၁၀ သုမၤတၢ်လၢ အလီၤသးဘၣ်အၢတဖၣ်အံၤ ခဲလၢာ်ဝံၤဒီး သုဟဲဆၢထၢၣ်လၢ ယမဲာ်ညါလၢ ဟံၣ်တဖျၢၣ်အံၤလၢ အဘၣ်ထွဲဒီးယမံၤ ဒီးသုတဲလၢ ‘ပကပူၤဖျဲးလီၤ’ န့ၣ်ကန့ၢ်ဧါ. ၁၁ ဟံၣ်တဖျၢၣ်အံၤလၢ အဘၣ်ထွဲဒီး ယမံၤန့ၣ် မ့ၢ်သုပာ်အီၤ ဒ်သိးဒီး တၢ်ဟုၣ်တၢ်ဘျၣ် အဟံၣ်ဧါ.+ သုမၤတၢ်န့ၣ် ယထံၣ်ဘၣ်လၢ ယနီၢ်ကစၢ်လီၤ.” ယဟိဝၤယွၤ တဲဝဲဒ်န့ၣ်လီၤ.
၁၂ “‘လဲၤကွၢ်ယတၢ်လီၢ်လၢ ဝ့ၢ်ၡံလိၤသၢၤ.+ တၢ်လီၢ်အဝဲန့ၣ် ယဃုထၢပာ်စၢၤလၢ ယမံၤအဂီၢ်လၢ အခီၣ်ထံးခါလံ.+ ဘၣ်ဆၣ် ခီဖျိလၢ ယပှၤဂီၢ်မုၢ် ပှၤအံၣ်စရ့လးဖိတဖၣ် မၤတၢ်အၢတၢ်သီအဃိ ယမၤတၢ်လီၢ်အဝဲန့ၣ် ဒ်လဲၣ်ဒ်လဲၣ်န့ၣ် ကွၢ်သၢၤ.+ ၁၃ ဘၣ်ဆၣ် သုဆဲးမၤတၢ်သ့ၣ်တဖၣ်န့ၣ် ခဲလၢာ်လီၤ.’ ယဟိဝၤယွၤ တဲဝဲလၢ ‘ယတဲတၢ်ဒီးသု တဘျီဝံၤတဘျီ* သနာ်က့ သုတဒိကနၣ်ဘၣ်.+ ဒီးယကိးသု ခဲအံၤခဲအံၤ ဘၣ်ဆၣ် သုတစံးဆၢယၤဘၣ်.+ ၁၄ အဃိ ဟံၣ်လၢသုနာ်န့ၢ်အီၤ+ လၢအမ့ၢ် ဟံၣ်တဖျၢၣ်လၢ အဘၣ်ထွဲဒီးယမံၤ+ ဒီးတၢ်လီၢ်အံၤလၢ ယဟ့ၣ်လီၤ သုမိၢ်ပၢ်ဖံဖု လၢပျၢၤတဖၣ်န့ၣ် ယကမၤအီၤဒ် ယမၤဝ့ၢ်ၡံလိၤ အသိးလီၤ.+ ၁၅ ယကနီဟးထီၣ်ကွံာ် သုလၢယမဲာ်ညါ ဒ်ယနီဟးထီၣ်ကွံာ် သုဒီပုၢ်ဝဲၢ် လၢအမ့ၢ် အ့ဖရဲၣ်အစၢၤအသွဲၣ် ခဲလၢာ်အသိးလီၤ.’+
၁၆ “စီၤယံးရမံယၤဧၢ, မ့မ့ၢ်နၤန့ၣ် တဘၣ်ဃ့ထုကဖၣ်န့ၢ်တၢ်လၢ ပှၤတဖၣ်အံၤအဂီၢ်တဂ့ၤ. တဘၣ်ကိးပသူထီၣ်, ဃ့ထုကဖၣ် ဒီးဃ့ကညးန့ၢ်တၢ်လၢ အဝဲသ့ၣ်အဂီၢ်တဂ့ၤ.+ နမ့ၢ်မၤဒ်န့ၣ်န့ၣ် ယတဒိကနၣ်နၤဘၣ်.+ ၁၇ တၢ်လၢအဝဲသ့ၣ်မၤဝဲလၢ ယူဒၤအဝ့ၢ်တဖၣ်အပူၤ ဒီးဝ့ၢ်ယရူၤၡလ့ၣ် အကျဲတဖၣ်အပူၤန့ၣ် နတထံၣ်ဧီၤ. ၁၈ ဖိခွါတဖၣ် ထၢဖှိၣ်သ့ၣ်မုၣ်, ပါတဖၣ် မၤကဲၤထီၣ်မ့ၣ်အူ ဒီးမိတဖၣ် ဘံးဝဲ* ကိၣ်ဒ်သိးကတ့ကိၣ်လၢ ကလုၢ်ထီၣ်တၢ်လၢ မူခိၣ်အနီၢ်ပၤမုၣ်*+ အအိၣ် ဒီးအဝဲသ့ၣ် လူလီၤစပံးထံ ဒ်တၢ်လုၢ်တၢ်ပာ်အသိးလၢ ယွၤအဂၤတဖၣ်အအိၣ် ဒ်သိး ကမၤဆါယသးအဂီၢ်လီၤ.+ ၁၉ ယဟိဝၤယွၤ တဲဝဲလၢ ‘အဝဲသ့ၣ် တမၤဆါယၤဘၣ်. ဘၣ်ဆၣ် အဝဲသ့ၣ် မၤဆါလီၤအနီၢ်ကစၢ်အသး ဒီးအဝဲသ့ၣ် ကမဲာ်ဆှးလီၤ.’+ ၂၀ အဃိ တၢ်ပၢကစၢ် ယဟိဝၤယွၤ တဲဝဲလၢ ‘ယတၢ်သးဒိၣ် ဒီးယတၢ်သးထီၣ် ကလီၤဘၣ်ဝဲ တၢ်လီၢ်အံၤ,+ ပှၤကညီ, ဆၣ်ဖိကီၢ်ဖိ, သ့ၣ်ထူၣ်တဖၣ် လၢပျီပူၤ ဒီးတၤသူတၤသၣ်လၢ အမဲထီၣ်လၢ ဟီၣ်ခိၣ်လိၤလီၤ. ယတၢ်သးဒိၣ်န့ၣ် ကကဲၤထီၣ်ဝဲ ဒ်သိးဒီးမ့ၣ်အူ ဒီးတလီၤပံာ်ဝဲဘၣ်.’+
၂၁ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘မၤဟီ. ပာ်ဖှိၣ်သု တၢ်လုၢ်ဒွဲၣ်အူတဖၣ် ဒီးသုတၢ်လုၢ်တၢ်ပာ်အဂၤတဖၣ် ဒီးအီၣ်က့ၤတၢ်ညၣ်လၢ သုနီၢ်ကစၢ်တက့ၢ်.+ ၂၂ မုၢ်နံၤဖဲ ယဒုးဟးထီၣ် သုမိၢ်ပၢ်ဖံဖု လၢပျၢၤတဖၣ်လၢ ကီၢ်အဲၤကူပတူးန့ၣ် ယတတဲအဝဲသ့ၣ် ဒီးမၤလိာ်အဝဲသ့ၣ် ဘၣ်ဃးဒီး တၢ်လုၢ်ဒွဲၣ်အူတဖၣ် ဒီးတၢ်လုၢ်တၢ်ပာ်တဖၣ် အဂ့ၢ်ဘၣ်.+ ၂၃ ဘၣ်ဆၣ် ယမၤလိာ်အဝဲသ့ၣ်လၢ “ဒိကနၣ်ယကလုၢ် ဒီးယကကဲထီၣ်သုကစၢ်ယွၤ ဒီးသုကကဲထီၣ် ယပှၤဂီၢ်မုၢ်လီၤ.+ ဒ်သိးသုတၢ်အိၣ်မူ ကလဲၤအသးဂ့ၤဂ့ၤဘၣ်ဘၣ်အဂီၢ် သုကဘၣ်အိၣ်မူမၤထွဲဒ် တၢ်လၢယမၤလိာ်သုအသိး ခဲလၢာ်လီၤ.”’+ ၂၄ ဘၣ်ဆၣ် အဝဲသ့ၣ်တဒိကနၣ် ယကလုၢ်ဘၣ် ဒီးတကနၣ်ဃုာ်တၢ်* စ့ၢ်ကီးဘၣ်.+ အဝဲသ့ၣ်အခိၣ်ကိၤ, လဲၤဝဲဒ် အနီၢ်ကစၢ်အတၢ်ကူၣ်အသိး ဒီးမၤထွဲဒ်အနီၢ်ကစၢ် အသးလၢအအၢအသီ ဟံးစုနဲၣ်ကျဲအီၤအသိးလီၤ.+ လၢအဝဲသ့ၣ်ကဂ့ၤထီၣ်အလီၢ် အဝဲသ့ၣ်နးထီၣ်ဝဲဟီ. ၂၅ ဒီးတၢ်မၤအသးဒ်န့ၣ် စးထီၣ်မုၢ်နံၤလၢ သုမိၢ်ပၢ်ဖံဖု လၢပျၢၤတဖၣ် ဟးထီၣ်ကွံာ်လၢ ကီၢ်အဲၤကူပတူး တုၤလၢ မုၢ်မဆါတနံၤအံၤလီၤ.+ အဃိ ယဆှၢလီၤ ယခ့ယပှၤခဲလၢာ် လၢအမ့ၢ် ဝံတဖၣ်လၢ သုအိၣ် တနံၤဝံၤတနံၤ တဘျီဝံၤတဘျီလီၤ.+ ၂၆ ဘၣ်ဆၣ် အဝဲသ့ၣ် တဒိကနၣ် ယကလုၢ်ဘၣ် ဒီးတကနၣ်ဃုာ်တၢ်ဘၣ်.+ အဝဲသ့ၣ်အခိၣ်ကိၤ ဒီးမၤတၢ်အၢ ဒိၣ်န့ၢ်ဒံး အဝဲသ့ၣ် အမိၢ်ပၢ်ဖံဖု လၢပျၢၤတဖၣ်လီၤ.
၂၇ “နကတဲဘၣ် အဝဲသ့ၣ်လၢ တၢ်ကတိၤတဖၣ်အံၤခဲလၢာ်+ ဘၣ်ဆၣ်အဝဲသ့ၣ် တဒိကနၣ်နၤဘၣ်. နကကိးအဝဲသ့ၣ် ဘၣ်ဆၣ် အဝဲသ့ၣ်တစံးဆၢနၤဘၣ်. ၂၈ ဒီးနကတဲအဝဲသ့ၣ်လၢ ‘သုမ့ၢ်ပှၤတကလုာ်လၢ အတဒိကနၣ် သုကစၢ် ယဟိဝၤယွၤအကလုၢ်ဘၣ် ဒီးတအဲၣ်ဒိးတူၢ်လိာ် အတၢ်သိၣ်က့ၤသီက့ၤဘၣ်. တၢ်သးတီတအိၣ်လၢၤဘၣ် ဒီးသုတယၢၤထီၣ် တၢ်သးတီအဂ့ၢ်လၢၤဘၣ်.’+
၂၉ “တံာ်ကွံာ်န* ခိၣ်ဆူၣ်ဖးထီဒီး တၢၤကွံာ်အီၤ ဒီးသးဝံၣ်ထီၣ် ထါဟီၣ်တယုၢ်လၢ တၢ်လူၢ်တဖၣ်အလိၤတက့ၢ်. ပှၤတစိၤအံၤ လၢအမၤဒိၣ်ထီၣ် ယၤ, ယဟိဝၤယွၤအသးန့ၣ် ယတတူၢ်လိာ် အဝဲသ့ၣ်လၢၤဘၣ် ဒီးကပာ်တ့ၢ်အဝဲသ့ၣ်လီၤ. ၃၀ ယဟိဝၤယွၤ တဲဝဲလၢ ‘ယူဒၤအပှၤဂီၢ်မုၢ် မၤတ့ၢ်တၢ်လၢ ယထံၣ်လၢအအၢလီၤ. အဝဲသ့ၣ် ဆီလီၤတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်လၢ ဟံၣ်လၢအဘၣ်ထွဲဒီး ယမံၤအပူၤလီၤ. အဝဲသ့ၣ်မၤဝဲဒ်န့ၣ်န့ၣ် ဒ်သိးကမၤဘၣ်အၢ ဟံၣ်န့ၣ် အဂီၢ်လီၤ.+ ၃၁ လၢဟံၣ်နိၣ် အတၢ်တြီၤပူၤန့ၣ်*+ အဝဲသ့ၣ်တ့ထီၣ် တိဖ့း အတၢ်လီၢ်ထီၣ်ထီတဖၣ် ဒ်သိးကဒွဲၣ်အူထီၣ် အဖိမုၣ်ဖိခွါတဖၣ်လၢ မ့ၣ်အူလီၤ.+ ယတမၤလိာ်အဝဲသ့ၣ်လၢ ကမၤဝဲဒ်န့ၣ်ဘၣ် ဒီးတၢ်ဂ့ၢ်အံၤ တဟဲအိၣ်ထီၣ်လၢ ယသးပူၤနီတဘျီဘၣ်.’*+
၃၂ “ယဟိဝၤယွၤ တဲဝဲလၢ ‘လၢတၢ်န့ၣ်အဃိ တၢ်ဆၢကတီၢ် ကဟဲဝဲဖဲ ပှၤတကိး တၢ်လီၢ်တဖၣ်န့ၣ်လၢ တိဖ့း ဒီးဟံၣ်နိၣ် အတၢ်တြီၤလၢၤဘၣ်. ဘၣ်ဆၣ် ပှၤကကိးက့ၤလၢ တၢ်မၤသံတၢ် အတၢ်တြီၤလီၤ. ဒီးအဝဲသ့ၣ် ကခူၣ်လီၤ ပှၤသံတဖၣ်လၢ တိဖ့း တုၤလၢတၢ်လီၢ် တတြီၢ်လၢၤဘၣ်လီၤ.+ ၃၃ အဝဲသ့ၣ်အစိၣ်တဖၣ် ကကဲထီၣ် ထိၣ်လၢအယူၤလၢတၢ်ဖးဖီ အတၢ်အီၣ် ဒီးဆၣ်ဖိကီၢ်ဖိ အဒူလၢ ဟီၣ်ခိၣ်ချၢတဖၣ် အတၢ်အီၣ်လီၤ. ဒီးပှၤလၢ အကနီဟးထီၣ်ကွံာ် ထိၣ်ဒီး ဆၣ်ဖိကီၢ်ဖိတဖၣ်အံၤန့ၣ် တအိၣ်နီတဂၤဘၣ်.+ ၃၄ တၢ်သးခုအကလုၢ်, တၢ်သူၣ်ဖှံသးညီအကလုၢ်, တလးမူးပိာ်ခွါ အကလုၢ် ဒီးတလးမူးပိာ်မုၣ် အကလုၢ်လၢ အသီၣ်လၢ+ ယူဒၤအဝ့ၢ်တဖၣ်အပူၤ ဒီးလၢဝ့ၢ်ယရူၤၡလ့ၣ် အကျဲတဖၣ် အပူၤန့ၣ် ယကမၤဘှ့ၣ်အီၤ, မ့ၢ်လၢ ထံကီၢ်ကဘၣ် တၢ်မၤဟးဂီၤအီၤ အဃိလီၤ.’”+