ယိၤဟၣ်
၂ ဒီးလၢသၢနံၤတနံၤန့ၣ် တၢ်ဖျီအမူး အိၣ်ဝဲလၢကၤနါ လၢကၤလံၤလါအပူၤ ဒီးယ့ၣ်ၡူးအမိၢ် အိၣ်ဝဲဖဲန့ၣ်လီၤ. ၂ ယ့ၣ်ၡူး ဒီးအပျဲၢ်အဘီၣ်တဖၣ်စ့ၢ်ကီး ပှၤကွဲမုာ်အဝဲသ့ၣ်လၢ တၢ်ဖျီအမူးအံၤလီၤ.
၃ ဖဲစပံးထံ ဘူးကလၢာ်အခါ ယ့ၣ်ၡူးအမိၢ် တဲအီၤလၢ “အဝဲသ့ၣ် အစပံးထံ တအိၣ်လၢၤဘၣ်.” ၄ ဘၣ်ဆၣ် ယ့ၣ်ၡူး တဲဆၢအီၤလၢ “ပိာ်မုၣ်ဧၢ, တၢ်ဂ့ၢ်အဝဲန့ၣ် အဘၣ်ဃးဒီး နၤဒီးယၤဒ်လဲၣ်.* ယတၢ်ဆၢကတီၢ် တဘၣ်ဒံးဘၣ်.” ၅ ဒီးအမိၢ်တဲဘၣ် ပှၤမၤစၢၤတၢ်ဖိတဖၣ်လၢ “မၤဒ်အ တဲသုအသိးနီၤ.” ၆ ဒီးဒ်ပှၤယူဒၤဖိ အတၢ်သိၣ်တၢ်သီလၢ တၢ်ကမၤကဆှီတၢ်အဂီၢ် အိၣ်ဝဲအသိး ထံကတံၤလၢ ပှၤတ့အီၤလၢလၢၢ်န့ၣ် အိၣ်ဝဲဖဲန့ၣ် ဃုဖျၢၣ်လီၤ.+ ဒီးတဖျၢၣ်စုာ်စုာ်န့ၣ် တြီၢ်ဝဲ တၢ်ထံတၢ်နိ ခံဘၤသၤ, သၢဘၤသၤလီၤ.* ၇ ယ့ၣ်ၡူးတဲဘၣ် အဝဲသ့ၣ်လၢ “မၤပှဲၤကတံၤတဖၣ်လၢ ထံဟီ.” အဃိ အဝဲသ့ၣ် မၤပှဲၤဝဲတုၤလၢ ကတံၤအခိၣ်ဒူလီၤ. ၈ ဒီးယ့ၣ်ၡူးတဲဘၣ် အဝဲသ့ၣ်လၢ “ဘျၢၣ်ထီၣ်န့ၢ် တနီၤဒီး လဲၤစိာ်အီၤလၢမူးခိၣ် တဂၤန့ၣ် အအိၣ်နီၤ.” ဒီးအဝဲသ့ၣ် လဲၤစိာ်ဝဲလီၤ. ၉ ဒီးမူးခိၣ်တဂၤန့ၣ် အီကွၢ်ဝဲထံလၢ အကဲထီၣ် စပံးထံလီၤ. ဘၣ်ဆၣ် စပံးထံအံၤ ဟဲဖဲလဲၣ်န့ၣ် အတသ့ၣ်ညါဝဲဘၣ်. (မ့မ့ၢ် တၢ်အခ့အပှၤတဖၣ်လၢ အဘျၢၣ်ထီၣ်ထံန့ၣ် သ့ၣ်ညါဝဲလီၤ) ဒီးမူးခိၣ် ကိးန့ၢ်ဝဲ တလးမူးပိာ်ခွါ ၁၀ ဒီးတဲအီၤလၢ “ပှၤခဲလၢာ် ပာ်လီၤဆိဝဲ စပံးထံလၢအဝံၣ် ဒီးဖဲပှၤမူၤဝဲအခါ ပှၤပာ်လီၤက့ၤဝဲ စပံးထံလၢ အတဝံၣ် အါအါဘၣ်လီၤ. နၤန့ၣ် နပာ်ဃာ် စပံးထံလၢအဝံၣ် တုၤလၢခဲအံၤလီၤ.” ၁၁ ယ့ၣ်ၡူးမၤဝဲ အတၢ်လီၤလး အဆိကတၢၢ်တခါအံၤလၢ ကၤနါ လၢကၤလံၤလါအပူၤလီၤ. အဃိ အဝဲပာ်ဖျါထီၣ် အလၤအကပီၤ+ ဒီးအပျဲၢ်အဘီၣ်တဖၣ် စူၢ်က့ၤနာ်က့ၤအီၤလီၤ.
၁၂ တၢ်န့ၣ်ဝံၤအလီၢ်ခံ ယ့ၣ်ၡူးဒီးအမိၢ် ဒီးအဒီပုၢ်ဝဲၢ်ခွါတဖၣ်+ ဒီးအပျဲၢ်အဘီၣ်တဖၣ် လဲၤလီၤလၢ ဝ့ၢ်ကပ့းရနီၣ်+ ဘၣ်ဆၣ် အဝဲသ့ၣ် တအိၣ်ဝဲဖဲန့ၣ် အါသီဘၣ်.
၁၃ ပှၤယူဒၤဖိ အဘူၣ်လဲၤကပာ်+ ဘူးထီၣ်ဝဲ အဃိ ယ့ၣ်ၡူးလဲၤဝဲလၢ ဝ့ၢ်ယရူၤၡလ့ၣ်လီၤ. ၁၄ လၢတၢ်လုၢ်ဟံၣ်အပူၤန့ၣ် အဝဲထံၣ်ဝဲ ပှၤဆါကျီၢ်, သိ, ထိၣ်လွံၢ်တဖၣ်+ ဒီးပှၤခီလဲစ့ဖိတဖၣ် ဆ့ၣ်နီၤဝဲလၢ အဝဲသ့ၣ် အလီၢ်ဆ့ၣ်နီၤ အလိၤလီၤ. ၁၅ အဃိ အဝဲတ့ထီၣ်နီၣ်ဖျ့လၢပျံၤတဖၣ် ဒီးနီဟးထီၣ်ကွံာ် အဝဲသ့ၣ်ခဲလၢာ် ဃုာ်ဒီးအသိ ဒီးအကျီၢ်လၢ တၢ်လုၢ်ဟံၣ်ပူၤ ဒီးအဝဲလူလီၤဝဲ ပှၤခီလဲစ့ဖိတဖၣ်အစ့ ဒီးမၤတကျၢၢ်ကွံာ် အဝဲသ့ၣ် အစီၢ်နီၤခိၣ်တဖၣ်လီၤ.+ ၁၆ ဒီးအတဲ ပှၤလၢအဆါ ထိၣ်လွံၢ်တဖၣ်လၢ “ထုးထီၣ်ကွံာ် တၢ်သ့ၣ်တဖၣ်အံၤ လၢတၢ်လီၢ်ဖဲအံၤ, ယပၢ်အဟံၣ်န့ၣ် တဘၣ်ဒုးကဲထီၣ်အီၤလၢ တၢ်ဆါတၢ်ပှ့ၤ အလီၢ်လၢၤတဂ့ၤ.”+ ၁၇ ဒီးအပျဲၢ်အဘီၣ်တဖၣ် သ့ၣ်နီၣ်ထီၣ်က့ၤ တၢ်ကွဲးအသးလၢ “တၢ်သးဆူၣ်လၢ နဟံၣ်အဂီၢ်န့ၣ် အိၣ်ပှဲၤလၢယပူၤလီၤ.”+
၁၈ အဃိ ပှၤယူဒၤဖိတဖၣ် တဲဆၢက့ၤအီၤလၢ “ဒ်သိး နကပာ်ဖျါထီၣ်န့ၢ်ပှၤ လၢနအိၣ်ဒီး တၢ်ခွဲးတၢ်ယာ်လၢ နကမၤဒ်အံၤအဂီၢ်န့ၣ် နကဒုးနဲၣ်ပှၤလၢ တၢ်ပနီၣ်လီၤလး မနုၤလဲၣ်.”+ ၁၉ ယ့ၣ်ၡူး တဲဆၢက့ၤ အဝဲသ့ၣ်လၢ “မၤလီၤပှီၢ်ကွံာ် တၢ်လုၢ်ဟံၣ်အဝဲအံၤ ဒီးယကသူၣ်ထီၣ်ကဒါက့ၤအီၤ လၢသၢသီအတီၢ်ပူၤလီၤ.”+ ၂၀ ပှၤယူဒၤဖိတဖၣ် တဲဝဲလၢ “တၢ်လုၢ်ဟံၣ်အံၤ ပှၤသူၣ်ထီၣ်အီၤ ယံာ်ဝဲ ၄၆ နံၣ်ညါ ဒီးနက သူၣ်ထီၣ်ကဒါက့ၤအီၤလၢ သၢသီအတီၢ်ပူၤဧါ.” ၂၁ ဘၣ်ဆၣ် တၢ်လုၢ်ဟံၣ်လၢ အတဲဝဲန့ၣ် အဲၣ်ဒိးတဲဝဲ အနီၢ်ခိလီၤ.+ ၂၂ ဖဲအဂဲၤဆၢထၢၣ်လၢ တၢ်သံအခါ အပျဲၢ်အဘီၣ်တဖၣ် သ့ၣ်နီၣ်ထီၣ်က့ၤဝဲ တၢ်လၢအတဲတ့ၢ်ဝဲ ဘၣ်ဃးဒီး တၢ်ဂ့ၢ်အံၤ+ ဒီးအဝဲသ့ၣ်နာ်ဝဲ တၢ်ကွဲးအသးဒီး တၢ်လၢယ့ၣ်ၡူး တဲတ့ၢ်ဝဲန့ၣ်လီၤ.
၂၃ ဘၣ်ဆၣ် ဖဲအအိၣ်လၢ ဘူၣ်လဲၤကပာ်အမူး လၢဝ့ၢ်ယရူၤၡလ့ၣ် အပူၤအခါ ပှၤအါဂၤထံၣ်ဘၣ်ဝဲ တၢ်ပနီၣ်လီၤလးလၢ အမၤဝဲတဖၣ်အဃိ အဝဲသ့ၣ် စူၢ်က့ၤနာ်က့ၤအီၤလီၤ.* ၂၄ ဘၣ်ဆၣ် ယ့ၣ်ၡူးတနာ်န့ၢ် အဝဲသ့ၣ် ဒိၣ်ဒိၣ်ဒံးဘၣ်, မ့ၢ်လၢ ယ့ၣ်ၡူးသ့ၣ်ညါ အဝဲသ့ၣ်ခဲလၢာ်အဂ့ၢ် ၂၅ ဒီးမ့ၢ်လၢ ယ့ၣ်ၡူးသ့ၣ်ညါ တၢ်အိၣ်လၢ ပှၤသးပူၤအဃိ တလိၣ်လၢ ပှၤကတဲဘၣ်အီၤ ဘၣ်ဃးဒီး ပှၤဂ့ၢ်ဘၣ်.+