ယိၤၡူ
၂၂ စီၤယိၤၡူ ကိးဖှိၣ်ဝဲ ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ်လီၤ. ၂ ဒီးစီၤယိၤၡူ တဲအဝဲသ့ၣ်လၢ “တၢ်လၢ ယဟိဝၤယွၤ အခ့အပှၤစီၤမိၤၡ့ မၤလိာ်သုန့ၣ် သုမၤအီၤဝံၤခဲလၢာ်လံ,+ ဒီးသုမၤထွဲ တၢ်လၢယမၤလိာ်သု ကိးမံၤဒဲးလီၤ.+ ၃ တုၤလီၤလၢခဲအံၤ သုတပာ်တ့ၢ် သုဒီပုၢ်ဝဲၢ်တဖၣ်ဘၣ်.+ ဒီးသုမၤထွဲ သုကစၢ်ယဟိဝၤယွၤ အတၢ်မၤလိာ်လီၤ.+ ၄ ဒ်သုကစၢ်ယဟိဝၤယွၤ အၢၣ်လီၤပာ်စၢၤ သုဒီပုၢ်ဝဲၢ်တဖၣ်အသိး ခဲအံၤအဒုးအိၣ် အဝဲသ့ၣ် မုာ်မုာ်ခုၣ်ခုၣ်လံ.+ အဃိ က့ၤကဒါက့ၤလၢ သုဒဲ လၢအအိၣ်လၢ တၢ်လီၢ်လၢ ယဟိဝၤယွၤ အခ့အပှၤစီၤမိၤၡ့ ဟ့ၣ်သုလၢ ထံကျိယၢ်ဒ့ၣ် အဝၢ်ခီန့ၣ်တက့ၢ်.+ ၅ ဘၣ်ဆၣ် ဒ်သိးသုကမၤထွဲ တၢ်မၤလိာ် ဒီးတၢ်သိၣ်တၢ်သီလၢ ယဟိဝၤယွၤ အခ့အပှၤ စီၤမိၤၡ့ဟ့ၣ်လီၤသုအဂီၢ်+ သုကဘၣ် ပလီၢ်သုသးဒိၣ်မးလီၤ. ဒီးသုမၤဒ်န့ၣ် ကသ့ခီဖျိလၢ သုအဲၣ်သုကစၢ်ယဟိဝၤယွၤ,+ မၤအတၢ်ဘၣ်သးထီဘိ,*+ မၤထွဲအတၢ်မၤလိာ်တဖၣ်,+ တီဒီးအီၤထီဘိ+ ဒီးမၤအတၢ်မၤလၢ+ သုသးဒီဖျၢၣ် ဒီးလၢသုတၢ်အိၣ်မူ ကိးသနၢၣ်ဒဲးအပူၤလီၤ.”+
၆ ဒီးစီၤယိၤၡူ ဆိၣ်ဂ့ၤအဝဲသ့ၣ်ဝံၤ ပျဲက့ၤအဝဲသ့ၣ်လၢ အဒဲလီၤ. ၇ ဒီးမ့မ့ၢ် မနၤၡ့ၤအဒူၣ်တဝာ်န့ၣ် စီၤမိၤၡ့ ဟ့ၣ်အဝဲသ့ၣ် တၢ်န့ၢ်သါလၢ ကီၢ်ဘၤၡၣ်အပူၤလီၤ.+ ဒီးမနၤၡ့ၤအဒူၣ်လၢ အဂၤတဝာ်န့ၣ် စီၤယိၤၡူ ဟ့ၣ်အဝဲသ့ၣ်တၢ်လီၢ်လၢ ထံကျိယၢ်ဒ့ၣ် အမုၢ်နုာ်တခီ+ ဒ်အဒီပုၢ်ဝဲၢ်တဖၣ်န့ၢ်ဘၣ်ဝဲ အသိးလီၤ. ဒီးဖဲစီၤယိၤၡူ ပျဲက့ၤအဝဲသ့ၣ်အခါ အဝဲဆိၣ်ဂ့ၤစ့ၢ်ကီး အဝဲသ့ၣ် ၈ ဒီးတဲဘၣ်အဝဲသ့ၣ်လၢ “သုမၤန့ၢ်တၢ်ထူးတၢ်တီၤ, ဆၣ်ဖိကီၢ်ဖိ, ထူ, စ့, တိၢ်ဘီဒီးထး ဒီးဆ့ကူဆ့ကၤ အါအါဂီၢ်ဂီၢ်လံ.+ က့ၤစိာ်တၢ်သ့ၣ်တဖၣ်အံၤလၢ သုဒဲတက့ၢ်. တၢ်လၢသုမၤန့ၢ်လၢ သုဒုၣ်သုဒါအအိၣ်န့ၣ် ဟံးန့ၢ်အီၤတနီၤ+ ဒ်သုဒီပုၢ်ဝဲၢ်တဖၣ် မၤဝဲအသိးန့ၣ်တက့ၢ်.”
၉ ဝံၤဒီး ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ်န့ၣ် ဟးထီၣ်ကွံာ်ဝဲလၢ ပှၤအံၣ်စရ့လးဖိ အဂၤတဖၣ်အကျါ လၢဝ့ၢ်ၡံလိၤ လၢအအိၣ်လၢ ကီၢ်ကနၤဧၣ်အပူၤန့ၣ်လီၤ. ဒီးအဝဲသ့ၣ်က့ၤကဒါက့ၤဝဲလၢ အအိၣ်တၢ်အလီၢ်လၢ ကံးလဧး အဟီၣ်ကဝီၤလၢ+ ဘၣ်တၢ်ဟ့ၣ်လီၤအီၤဒ် ယဟိဝၤယွၤ မၤလိာ်စီၤမိၤၡ့ အသိးန့ၣ်လီၤ.+ ၁၀ ဒီးဖဲပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ် က့ၤတုၤလၢ ထံကျိယၢ်ဒ့ၣ် အဟီၣ်ကဝီၤ လၢအအိၣ်လၢ ကီၢ်ကနၤဧၣ် အပူၤအခါ အဝဲသ့ၣ်တ့ထီၣ်ဝဲ တၢ်လုၢ်လီၢ်ဖးဒိၣ်တဖျၢၣ် လၢထံကျိယၢ်ဒ့ၣ် အကပၤလီၤ. ၁၁ လၢခံ ပှၤအံၣ်စရ့လးဖိအဂၤတဖၣ် နၢ်ဟူတၢ်ဂ့ၢ်အံၤ+ ဒီးတဲဝဲလၢ “ကွၢ်လၢအံၤ. ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ်န့ၣ် တ့ထီၣ်တၢ်လုၢ်လီၢ်ဖဲ ကီၢ်ကနၤဧၣ် အကီၢ်ဆၢလၢ ပအိၣ်တကပၤ လၢထံကျိယၢ်ဒ့ၣ် အဟီၣ်ကဝီၤအပူၤလီၤ.” ၁၂ ဖဲပှၤအံၣ်စရ့လးဖိ နၢ်ဟူဘၣ်ဝဲတၢ်ဂ့ၢ်အံၤအခါ အံၣ်စရ့လး အပှၤဂီၢ်မုၢ်ခဲလၢာ် ပာ်ဖှိၣ်ထီၣ်အသးလၢ ဝ့ၢ်ၡံလိၤ+ ဒ်သိးကလဲၤဒုး အဝဲသ့ၣ်လီၤ.
၁၃ ပှၤအံၣ်စရ့လးဖိဆှၢလီၤဝဲ ပှၤလုၢ်တၢ်ဒိၣ် စီၤအလၤဧစၢ် အဖိခွါ စီၤဖံၤနဃၣ်+ ဆူပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ် အအိၣ်လၢ ကံးလဧး အဟီၣ်ကဝီၤန့ၣ်လီၤ. ၁၄ ဒီးပှၤခိၣ်ပှၤနၢ်အဂၤတဆံ လဲၤဒီးအီၤလီၤ. ဒီးပှၤခိၣ်ပှၤနၢ်တဂၤစုာ်စုာ်န့ၣ် ခၢၣ်စးဝဲ အံၣ်စရ့လး အဒူၣ်တဖၣ် တဒူၣ်စုာ်စုာ်လီၤ. ဒီးအဝဲသ့ၣ်တဂၤစုာ်စုာ်န့ၣ် မ့ၢ်ဝဲ ဒူၣ်ဖိထၢဖိ အခိၣ်အနၢ်တဖၣ် လၢပှၤအံၣ်စရ့လးဖိ အကထိတဖၣ်အကျါလီၤ.+ ၁၅ ဖဲအဝဲသ့ၣ် လဲၤတုၤလၢ ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ် လၢအအိၣ်လၢ ကံးလဧး အဟီၣ်ကဝီၤအပူၤအခါ အဝဲသ့ၣ်တဲဝဲလၢ
၁၆ “ယဟိဝၤယွၤ အပှၤဂီၢ်မုၢ် ခဲလၢာ် တဲဝဲလၢ ‘ဘၣ်မနုၤအဃိ သုမၤတၢ်အၢတမံၤလၢ အထီဒါ+ အံၣ်စရ့လး အကစၢ်ယွၤလဲၣ်. သုတ့ထီၣ် တၢ်လုၢ်လီၢ်လၢ သုနီၢ်ကစၢ်အဂီၢ်အဃိ သုပာ်တ့ၢ် ယဟိဝၤယွၤ ဒီးထီဒါ ယဟိဝၤယွၤလံ.+ ၁၇ တၢ်ကမၣ်လၢ အကဲထီၣ်အသးလၢ တၢ်လီၢ်လၢအမ့ၢ် ပဧိၢ်န့ၣ် သုတနီၣ်ဘၣ်လၢၤဧီၤ. တၢ်နးတၢ်ဖှီၣ်လီၤဘၣ်လၢ ယဟိဝၤယွၤအပှၤဂီၢ်မုၢ်အလိၤ သနာ်က့ တုၤလၢ မုၢ်မဆါတနံၤအံၤဒၣ်လဲာ် ပတမၤလီၤမၢ်ကွံာ် တၢ်ကမၣ်တခါအံၤ လၢပကျါဒံးဘၣ်.+ ၁၈ ဒီးတနံၤအံၤ မ့ၢ်သုကပာ်တ့ၢ် ယဟိဝၤယွၤ အနီၢ်ကီၢ်ဧါ. သုမ့ၢ်ထီဒါ ယဟိဝၤယွၤ တနံၤအံၤန့ၣ် ခဲမုၢ်ဆ့ၣ် အဝဲကသူၣ်ဒိၣ်သးဖျိး အံၣ်စရ့လး ဒီတကလုာ်လီၤ.+ ၁၉ သုမ့ၢ်ဆိကမိၣ်လၢ ကီၢ်လၢသုဒိးန့ၢ်ဘၣ်အံၤ တကဆှီဘၣ်န့ၣ် ဟဲသုးလီၢ်သုးကျဲဆူ ကီၢ်လၢအမ့ၢ် ယဟိဝၤယွၤအတၢ်+ ဖဲတၢ်လီၢ်လၢ ယဟိဝၤယွၤ အဒဲစီဆှံအိၣ်ဝဲ+ ဒီးဟဲအိၣ်လၢ ပကျါသၢၤ. ဘၣ်ဆၣ် တဘၣ်ထီဒါ ယဟိဝၤယွၤတဂ့ၤ. တၢ်လုၢ်လီၢ်လၢ ပကစၢ်ယဟိဝၤယွၤအဂီၢ်န့ၣ် အိၣ်ပာ်စၢၤလံအဃိ တဘၣ်တ့ထီၣ် တၢ်လုၢ်လီၢ်အဂၤတဖၣ် ဒီးဒုးကဲထီၣ်ပှၤလၢ ပှၤထီဒါတၢ်တဂ့ၤ.+ ၂၀ ဖဲစီၤစ့ရၤ အဖိခွါ စီၤဧၤကၣ်+ မၤတၢ်အၢတမံၤလၢ အဘၣ်ဃးဒီး တၢ်လၢပှၤကဘၣ်မၤဟးဂီၤအီၤအခါ ကစၢ်ယွၤ အတၢ်သးထီၣ် ဟဲလီၤဘၣ်လၢ အံၣ်စရ့လးအပှၤဂီၢ်မုၢ်ခဲလၢာ် အလိၤတမ့ၢ်ဘၣ်ဧါ.+ ပှၤလၢအဘၣ်သံလၢ စီၤဧၤကၣ် အတၢ်ကမၣ်အဃိန့ၣ် တမ့ၢ်ထဲ စီၤဧၤကၣ်တဂၤဘၣ်.’”+
၂၁ ဒီးပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ်န့ၣ် စံးဆၢက့ၤဝဲ ပှၤအံၣ်စရ့လးဖိ အကထိတဖၣ် အခိၣ်အနၢ်တဖၣ်လၢ+ ၂၂ “ယဟိဝၤ* လၢအမ့ၢ်ကစၢ်တဖၣ် အကစၢ်ယွၤ သ့ၣ်ညါဝဲလီၤ. မ့ၢ်လံ, ယဟိဝၤလၢအမ့ၢ် ကစၢ်တဖၣ် အကစၢ်ယွၤန့ၣ်+ သ့ၣ်ညါဝဲ ဒီးပှၤအံၣ်စရ့လးဖိ ကသ့ၣ်ညါဝဲစ့ၢ်ကီးလီၤ. ပမ့ၢ်မၤတၢ်လၢ အထီဒါယဟိဝၤယွၤ ဒီးတတီဒီးအီၤဘၣ်န့ၣ် တနံၤအံၤ ပာ်မူပှၤလၢၤတဂ့ၤ. ၂၃ ပမ့ၢ်တ့ထီၣ် တၢ်လုၢ်လီၢ် ဒ်သိးပကပာ်တ့ၢ် ယဟိဝၤယွၤ ဒီးဒ်သိးပကဟ့ၣ်လုၢ်ထီၣ် တၢ်လုၢ်ဒွဲၣ်အူ, တၢ်လုၢ်ဘု ဒီးတၢ်လုၢ်အိၣ်ဃူအိၣ်ဖိးတဖၣ် အဂီၢ်န့ၣ် ယဟိဝၤယွၤ ကစံၣ်ညီၣ်ပှၤလီၤသၢၤ.+ ၂၄ ဘၣ်ဆၣ် တမ့ၢ်ဒ်န့ၣ်ဘၣ်. ပတ့ထီၣ်တၢ်လုၢ်လီၢ်အံၤ မ့ၢ်လၢပဘၣ်ယိၣ်လၢ ခါဆူညါန့ၣ် သုဖိသုလံၤတဖၣ် ကတဲဘၣ်ဖုး ပဖိပလံၤတဖၣ်လၢ ‘မ့ၢ်သုဘၣ်ဃးဒီး အံၣ်စရ့လးအကစၢ် ယဟိဝၤယွၤဒ်လဲၣ်. ၂၅ ယဟိဝၤယွၤ ပာ်ပနီၣ်ဝဲ ထံကျိယၢ်ဒ့ၣ် ဒ်ကီၢ်ဆၢလၢ ပဝဲဒီးသုဝဲလၢအမ့ၢ် ပှၤရူၤဘ့ၣ်ဖိ ဒီးပှၤကးဖိ အဘၢၣ်စၢၤလီၤ. အဃိ သုတဘၣ်ဃးဒီး ယဟိဝၤယွၤဘၣ်.’ ဒီးသုဖိသုလံၤတဖၣ် ကတြီဘၣ်ဖုး ပဖိပလံၤတဖၣ် ဒ်သိးအသု တဘူၣ်ထီၣ်ဘါထီၣ် ယဟိဝၤယွၤ တဂ့ၤအဂီၢ်လီၤ.”
၂၆ “အဃိ ပတဲလိာ်ပသးလၢ ‘မ်ပတ့ထီၣ်သကိး တၢ်လုၢ်လီၢ်တခါတက့ၢ်. ဒီးတဘၣ်မ့ၢ်လၢ တၢ်လုၢ်ဒွဲၣ်အူ ဒီးတၢ်လုၢ်တၢ်ပာ်အဂၤတဖၣ် အဂီၢ်ဘၣ်. ၂၇ ဘၣ်ဆၣ် တၢ်လုၢ်လီၢ်အံၤ ကကဲထီၣ် တၢ်အုၣ်အသးလၢ ပဝဲဒီးသု ဒီးပစၢၤပသွဲၣ်တဖၣ် အဘၢၣ်စၢၤလၢ+ အကပာ်ဖျါထီၣ်လၢ ပကဘူၣ်ထီၣ်ဘါထီၣ် ယဟိဝၤယွၤ ခီဖျိလၢ ပကဟ့ၣ်လုၢ်ထီၣ်အီၤလၢ ပတၢ်လုၢ်ဒွဲၣ်အူ, ပတၢ်လုၢ်တၢ်ပာ် ဒီးတၢ်လုၢ်အိၣ်ဃူအိၣ်ဖိးတဖၣ်လီၤ.+ ဒီးပမ့ၢ်မၤဒ်န့ၣ်န့ၣ် လၢခံ သုဖိသုလံၤတဖၣ် တတဲပဖိပလံၤလၢ “သုတဘၣ်ဃးဒီး ယဟိဝၤယွၤဘၣ်” န့ၣ်ဘၣ်.’ ၂၈ အဃိ ပတဲလိာ်ပသးလၢ ‘လၢခံ အဝဲသ့ၣ်မ့ၢ်တဲပှၤဒီး ပဖိပလံၤတဖၣ် ဒ်န့ၣ်န့ၣ် ပကတဲအဝဲသ့ၣ်လၢ “ကွၢ်မီၤ, ပမိၢ်ပၢ်ဖံဖု လၢပျၢၤတဖၣ် တ့ထီၣ်ပာ်စၢၤ တၢ်လုၢ်လီၢ်လၢ အလီၤဂာ်ဒီး ယဟိဝၤယွၤ အတၢ်လုၢ်လီၢ် ဒ်သိးအကကဲထီၣ် တၢ်အုၣ်အသးလၢ ပဝဲဒီးသုအဘၢၣ်စၢၤ ဒီးအတမ့ၢ်လၢ ပှၤကဟ့ၣ်လုၢ်ထီၣ် တၢ်လုၢ်ဒွဲၣ်အူ ဒီးတၢ်လုၢ်တၢ်ပာ်အဂၤတဖၣ် အဂီၢ်ဘၣ်.”’ ၂၉ ပကစၢ် ယဟိဝၤယွၤ အတၢ်လုၢ်လီၢ် အိၣ်ပာ်စၢၤလၢ အဒဲစီဆှံအမဲာ်ညါလံ. အဃိ ပကတ့ထီၣ် တၢ်လုၢ်လီၢ်အဂၤတဖျၢၣ် ဒ်သိးပကဟ့ၣ်လုၢ်ထီၣ် တၢ်လုၢ်ဒွဲၣ်အူ, တၢ်လုၢ်ဘု ဒီးတၢ်လုၢ်တၢ်ပာ်အဂၤတဖၣ် အဂီၢ် ဒီးထီဒါ ယဟိဝၤယွၤ+ ဒီးပာ်တ့ၢ်ကွံာ် ယဟိဝၤယွၤ ဒ်န့ၣ်ဒု လ့ၤတက့ၤ ပတမၤဘၣ်.”+
၃၀ ဖဲပှၤလုၢ်တၢ်ဒိၣ် စီၤဖံၤနဃၣ် ဒီးပှၤဂီၢ်မုၢ် အခိၣ်အနၢ်တဖၣ် လၢအမ့ၢ် ပှၤအံၣ်စရ့လးဖိ အကထိတဖၣ် အခိၣ်အနၢ်တဖၣ် နၢ်ဟူဝဲ ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အစၢၤအသွဲၣ်တဖၣ် တဲဝဲဒ်န့ၣ်အခါ အဝဲသ့ၣ်သးမံဝဲလီၤ.+ ၃၁ အဃိ ပှၤလုၢ်တၢ်ဒိၣ် စီၤအလၤဧစၢ် အဖိခွါ စီၤဖံၤနဃၣ် တဲဘၣ် ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အစၢၤအသွဲၣ်တဖၣ်လၢ “သုတမၤတၢ်အၢတမံၤလၢ အထီဒါ ယဟိဝၤယွၤဘၣ်အဃိ တနံၤအံၤ ပသ့ၣ်ညါလၢ ယဟိဝၤယွၤ အိၣ်လၢပကျါလီၤ. ခဲအံၤဒု ယဟိဝၤယွၤ တစံၣ်ညီၣ် ပှၤလၢၤဘၣ်.”
၃၂ ဒီးပှၤလုၢ်တၢ်ဒိၣ် စီၤအလၤဧစၢ် အဖိခွါ စီၤဖံၤနဃၣ် ဒီးပှၤခိၣ်ပှၤနၢ်တဖၣ် ဟးထီၣ်ကွံာ်ဝဲလၢ ပှၤရူၤဘ့ၣ်ဖိ ဒီးပှၤကးဖိ အအိၣ်လၢ ကံးလဧး အဟီၣ်ကဝီၤအပူၤ ဒီးက့ၤကဒါက့ၤဝဲ လၢကီၢ်ကနၤဧၣ်လီၤ. အဝဲသ့ၣ် က့ၤတဲဘၣ်ဝဲ ပှၤအံၣ်စရ့လးဖိ အဂၤတဖၣ် လၢတၢ်ဂ့ၢ်တၢ်ကျိၤတဖၣ်အံၤလီၤ. ၃၃ ဖဲပှၤအံၣ်စရ့လးဖိ နၢ်ဟူဘၣ်ဝဲ တၢ်ဂ့ၢ်တၢ်ကျိၤတဖၣ်အံၤအခါ အဝဲသ့ၣ်သးမံဝဲလီၤ. ဒီးဖဲန့ၣ်အခါ အဝဲသ့ၣ် စံးထီၣ်ပတြၢၤ ကစၢ်ယွၤ ဒီးအဝဲသ့ၣ် တတဲဝဲဘၣ်ဃးဒီး ကလဲၤဒုးဝဲ ပှၤရူၤဘ့ၣ်ဖိ ဒီးပှၤကးဖိတဖၣ် ဒီးကမၤဟးဂီၤကွံာ် ထံကီၢ်လၢ အဝဲသ့ၣ် အိၣ်ဝဲန့ၣ်လၢၤဘၣ်.
၃၄ “တၢ်လုၢ်လီၢ်အံၤ မ့ၢ်ဝဲ တၢ်အုၣ်အသးလၢ ပဝဲခဲလၢာ်အဂီၢ်လၢ အပာ်ဖျါထီၣ်လၢ ယဟိဝၤယွၤန့ၣ် မ့ၢ်ဝဲ ယွၤလၢ အမ့ၢ်အတီန့ၣ်လီၤ.” အဃိ ပှၤရူၤဘ့ၣ်ဖိ ဒီးပှၤကးဖိ ကိးန့ၢ်ဝဲ တၢ်လုၢ်လီၢ်အံၤအမံၤလီၤ.*