ယိၤၡူ
၄ ပှၤအံၣ်စရ့လးဖိခဲလၢာ် ခီဂာ်ဝဲ ထံကျိယၢ်ဒ့ၣ် ဝံၤဒီး ယဟိဝၤယွၤတဲ စီၤယိၤၡူလၢ ၂ “ကိးန့ၢ် ပှၤပိာ်ခွါ ၁၂ ဂၤလၢ ပှၤဂီၢ်မုၢ်အကျါ တဒူၣ်တဂၤ တဒူၣ်တဂၤ+ ၃ ဒီးမၤလိာ်အဝဲသ့ၣ် ဒ်အံၤတက့ၢ်. ‘လၢထံကျိယၢ်ဒ့ၣ် အခၢၣ်သး ဖဲတၢ်လီၢ်လၢ ပှၤလုၢ်တၢ်ဒိၣ်တဖၣ် ဆၢထၢၣ်ဝဲအလီၢ်န့ၣ်+ ဟံးန့ၢ်လၢၢ် ၁၂ ဖျၢၣ်ဒီး ဟဲက့ၤယိးအီၤ ဒီးပာ်လီၤအီၤဖဲ တၢ်လီၢ်လၢ သုကမံတနၤအံၤန့ၣ်တက့ၢ်.’”+
၄ အဃိ စီၤယိၤၡူကိးန့ၢ် ပှၤပိာ်ခွါ ၁၂ ဂၤလၢ အဃုထၢထီၣ်ပာ်စၢၤဝဲ လၢပှၤအံၣ်စရ့လးဖိအကျါ တဒူၣ်တဂၤ တဒူၣ်တဂၤန့ၣ်လီၤ. ၅ ဒီးစီၤယိၤၡူ တဲအဝဲသ့ၣ်လၢ “လဲၤလၢ သုကစၢ် ယဟိဝၤယွၤ အတလါစီဆှံ အမဲာ်ညါ တုၤလၢထံကျိယၢ်ဒ့ၣ် အခၢၣ်သးတက့ၢ်. ဒီးသုကဘၣ်ယိးထီၣ် လၢၢ်တဂၤတဖျၢၣ်လၢ သုဖံဘၣ်ခိၣ်အလိၤ ဒ်ပှၤအံၣ်စရ့လးဖိအဒူၣ် အနီၣ်ဂံၢ် အိၣ်ဝဲအသိးလီၤ. ၆ လၢၢ်သ့ၣ်တဖၣ်အံၤ ကကဲထီၣ်တၢ်ပနီၣ် လၢသုကျါန့ၣ်လီၤ. လၢခံသုဖိတဖၣ် မ့ၢ်သံကွၢ်သုလၢ ‘ဘၣ်မနုၤအဃိ သုဘၣ်ပာ်လီၤ လၢၢ်တဖၣ်အံၤ ဖဲအံၤလဲၣ်’ န့ၣ်+ ၇ သုကဘၣ်တဲ အဝဲသ့ၣ်လၢ ‘မ့ၢ်လၢ ထံကျိယၢ်ဒ့ၣ်အထံ ပတုာ်ယွၤလီၤဝဲလၢ ယဟိဝၤယွၤ အတၢ်အၢၣ်လီၤအီလီၤ အတလါ အမဲာ်ညါအဃိလီၤ.+ ဖဲပှၤယိးတလါအံၤ ဒီးခီဂာ်ထံကျိယၢ်ဒ့ၣ်အခါ ထံကျိယၢ်ဒ့ၣ် အထံပတုာ်ယွၤလီၤဝဲလီၤ. ဒီးလၢၢ်တဖၣ်အံၤ ကကဲထီၣ် တၢ်သ့ၣ်နီၣ်လၢ ပှၤအံၣ်စရ့လးဖိအဂီၢ် လီၤထူလီၤယိာ်လီၤ.’”+
၈ ဒီးပှၤအံၣ်စရ့လးဖိတဖၣ် မၤဝဲဒ်စီၤယိၤၡူ မၤလိာ်ဝဲ အသိးန့ၣ်လီၤ. ဒ်ယဟိဝၤယွၤ တဲဘၣ်စီၤယိၤၡူအသိး ပှၤအံၣ်စရ့လးဖိတဖၣ် ဟံးန့ၢ်လၢၢ် ၁၂ ဖျၢၣ်လၢ ထံကျိယၢ်ဒ့ၣ် အခၢၣ်သး ပှဲၤသိးဒီး ပှၤအံၣ်စရ့လးဖိတဖၣ် အဒူၣ်အိၣ်ဝဲအသိးလီၤ. ဒီးအဝဲသ့ၣ် ဟဲက့ၤယိးဝဲလၢ တၢ်လီၢ်လၢ အကမံဝဲတနၤန့ၣ် ဒီးပာ်လီၤဝဲဖဲန့ၣ်လီၤ.
၉ လၢထံကျိယၢ်ဒ့ၣ် အခၢၣ်သး ဖဲပှၤလုၢ်တၢ်ဒိၣ်တဖၣ် လၢအယိးဝဲ တၢ်အၢၣ်လီၤအီလီၤ အတလါ ဆၢထၢၣ်ဝဲအလီၢ်န့ၣ် စီၤယိၤၡူ ဆီလီၤစ့ၢ်ကီးလၢၢ် ၁၂ ဖျၢၣ်ဖဲန့ၣ်လီၤ.+ ဒီးလၢၢ်တဖၣ်အံၤ အိၣ်ဝဲဖဲန့ၣ် တုၤလၢ မုၢ်မဆါတနံၤအံၤလီၤ.
၁၀ ပှၤလုၢ်တၢ်ဒိၣ်တဖၣ်လၢ အယိးတလါစီဆှံန့ၣ် အိၣ်ဆၢထၢၣ်လၢ ထံကျိယၢ်ဒ့ၣ် အခၢၣ်သး တုၤလၢပှၤဂီၢ်မုၢ်တဖၣ် မၤဝဲတၢ်လၢ ယဟိဝၤယွၤ မၢစီၤယိၤၡူမၤလိာ်အဝဲသ့ၣ်တဖၣ် ဝံၤဝဲတစု ဒ်စီၤမိၤၡ့ မၤလိာ်ပာ်စၢၤ စီၤယိၤၡူအသိးလီၤ. ဒီးဖဲန့ၣ်အခါ ပှၤဂီၢ်မုၢ်ခီဂာ် ထံကျိချ့ချ့လီၤ. ၁၁ ဖဲပှၤဂီၢ်မုၢ်ခဲလၢာ် ခီဂာ်တၢ်ဝံၤအခါ ပှၤလုၢ်တၢ်ဒိၣ်တဖၣ် လၢအအိၣ်ဒီး ယဟိဝၤယွၤ အတလါစီဆှံန့ၣ် ခီဂာ်တၢ်လၢ ပှၤဂီၢ်မုၢ်အမဲာ်ညါလီၤ.+ ၁၂ ဒီးပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ်န့ၣ် လဲၤခီဂာ်တၢ်လၢ ပှၤအံၣ်စရ့လးဖိအဂၤတဖၣ် အမဲာ်ညါ ဒီးအိၣ်ကတဲာ်ကတီၤအသးလၢ တၢ်ဒုးအဂီၢ်+ ဒ်စီၤမိၤၡ့ တဲဘၣ်အဝဲသ့ၣ်အသိးလီၤ.+ ၁၃ ဒီးပှၤသုးဖိ ၄၀,၀၀၀ လၢအအိၣ်ဒီး တၢ်စုကဝဲၤန့ၣ် လဲၤခီဂာ်တၢ်လၢ ယဟိဝၤယွၤ အမဲာ်ညါ လၢယရံၤဃိ အတၢ်ပၢၤခိၣ်လီၤ.
၁၄ ဖဲနံၤအဝဲန့ၣ် ယဟိဝၤယွၤ ပာ်ထီၣ်ထီစီၤယိၤၡူ လၢပှၤအံၣ်စရ့လးဖိခဲလၢာ် အမဲာ်ညါလီၤ.+ ဒီးဒ်ပှၤအံၣ်စရ့လးဖိတဖၣ် ပာ်ကဲစီၤမိၤၡ့ ဒိၣ်မးအသိး+ လၢစီၤယိၤၡူ အတၢ်အိၣ်မူ ဒီတစိၤန့ၣ် ပှၤအံၣ်စရ့လးဖိတဖၣ် ပာ်ကဲအီၤဒိၣ်မးလီၤ.
၁၅ ဒီးယဟိဝၤယွၤ တဲစီၤယိၤၡူလၢ ၁၆ “မၤလိာ် ပှၤလုၢ်တၢ်ဒိၣ်တဖၣ် လၢအယိး တၢ်အၢၣ်လီၤအီလီၤ အတလါန့ၣ်လၢ+ အကဟဲက့ၤထီၣ်လၢ ထံကျိယၢ်ဒ့ၣ်အပူၤတက့ၢ်.” ၁၇ ဒီးစီၤယိၤၡူ မၤလိာ် ပှၤလုၢ်တၢ်ဒိၣ်တဖၣ်လၢ “ဟဲက့ၤထီၣ်လၢ ထံကျိယၢ်ဒ့ၣ် အပူၤတက့ၢ်.” ၁၈ ဖဲပှၤလုၢ်တၢ်ဒိၣ်တဖၣ် လၢအယိး ယဟိဝၤယွၤ အတၢ်အၢၣ်လီၤအီလီၤ အတလါန့ၣ်+ ဟဲက့ၤထီၣ်လၢ ထံကျိယၢ်ဒ့ၣ် အခၢၣ်သး ဒီးဖဲအဝဲသ့ၣ် ခါထီၣ်အခီၣ် လၢခိခိၣ်အခါ ယၢ်ဒ့ၣ်အထံ ယွၤလီၤကဒါက့ၤ ဒီးဒိၣ်ထီၣ်တုၤလၢ ထံကၢၢ်နံၤအဖီခိၣ်+ ဒ်လၢညါအသိးလီၤ.
၁၉ ဖဲလါအခီၣ်ထံးတလါ, လါထီၣ်အသီ ၁၀ န့ၣ်ပှၤဂီၢ်မုၢ် ဟးထီၣ်ကွံာ်လၢ ထံကျိယၢ်ဒ့ၣ်အပူၤ ဒီးအဝဲသ့ၣ် သူၣ်ဒဲလၢ ဝ့ၢ်ကံးလကၤလး+ လၢအအိၣ်လၢ ဝ့ၢ်ယရံၤဃိအဃၢၤ လၢမုၢ်ထီၣ်တခီန့ၣ်လီၤ.
၂၀ ဒီးလၢၢ် ၁၂ ဖျၢၣ်လၢ အဝဲသ့ၣ် ဟံးန့ၢ်ဝဲလၢ ထံကျိယၢ်ဒ့ၣ်န့ၣ် စီၤယိၤၡူ ဆီလီၤဝဲလၢ ဝ့ၢ်ကံးလကၤလးန့ၣ်လီၤ.+ ၂၁ ဝံၤဒီး စီၤယိၤၡူတဲဘၣ် ပှၤအံၣ်စရ့လးဖိတဖၣ်လၢ “လၢခံ သုဖိတဖၣ် မ့ၢ်သံကွၢ်သုလၢ ‘လၢၢ်သ့ၣ်တဖၣ်အံၤ အခီပညီဒ်လဲၣ်’ န့ၣ်+ ၂၂ သုကဘၣ် တဲနၢ်ပၢၢ် သုဖိတဖၣ်လၢ ‘ပှၤအံၣ်စရ့လးဖိတဖၣ် လဲၤခီဂာ် ထံကျိယၢ်ဒ့ၣ် လၢဟီၣ်ခိၣ်ဃ့ထီအလိၤလီၤ.+ ၂၃ ဒ်သုကစၢ် ယဟိဝၤယွၤ မၤလီၤသံးဝဲ ပီၣ်လဲၣ်ဂီၤလၢ အဝဲသ့ၣ်အမဲာ်ညါ တုၤလၢအဝဲသ့ၣ်ခီဂာ် ဝံၤတစုအသိး သုကစၢ် ယဟိဝၤယွၤ မၤလီၤသံးဝဲ ထံကျိယၢ်ဒ့ၣ် အထံလၢ အဝဲသ့ၣ်အမဲာ်ညါ တုၤလၢ အဝဲသ့ၣ်ခီဂာ်ဝဲ ဝံၤတစုန့ၣ်လီၤ.+ ၂၄ ကစၢ်ယွၤ မၤဝဲဒ်အံၤန့ၣ် မ့ၢ်ဒ်သိး ပှၤဟီၣ်ခိၣ်ဖိခဲလၢာ် ကသ့ၣ်ညါလၢ ယဟိဝၤယွၤ အစိအကမီၤ+ ဒိၣ်ထဲလဲၣ် ဒီးဒ်သိး သုကပျံၤ သုကစၢ် ယဟိဝၤယွၤ ထီဘိန့ၣ်လီၤ.’”