ယံးရမံယၤ
၁၄ ဘၣ်ဃးဒီး တၢ်ယီၤဃ့န့ၣ် ယဟိဝၤယွၤ တဲဘၣ် စီၤယံးရမံယၤ ဒ်အံၤလီၤ.+
၂ ယူဒၤအပှၤဂီၢ်မုၢ် ဟီၣ်ဝဲယၢၤဝဲ,+ ယူဒၤအတြဲၤတဖၣ် လီၤပှီၢ်
ဒီးအအိၣ်ခီလီလီလၢ ဟီၣ်ခိၣ်လိၤလံ.
ဒီးတၢ်ကိးပသူကိးပသီ အိၣ်ဝဲလၢ ဝ့ၢ်ယရူၤၡလ့ၣ် အပူၤလီၤ.
၃ အဝဲသ့ၣ် အကစၢ်တဖၣ် ဆှၢလီၤ အဝဲသ့ၣ် အခ့အပှၤတဖၣ် လၢကလဲၤဒၢၣ်ထံ အဂီၢ်လီၤ.
တၢ်ခ့တၢ်ပှၤတဖၣ် လဲၤလၢထံကမါ ဒီးတထံၣ်န့ၢ်ဝဲထံဘၣ်.
အဝဲသ့ၣ် ဟဲက့ၤဒီး အထံဒၢ ခီလီလီလီၤ.
အဝဲသ့ၣ် မဲာ်ဆှး ဒီးသးဟးဂီၤ
အဃိ အဝဲသ့ၣ် ကးဘၢအခိၣ်လီၤ.
၄ လၢကီၢ်ပူၤန့ၣ် တၢ်တဟဲစူၤလီၤ ဘၣ်အဃိ+
ဟီၣ်ခိၣ်တဲၤထီၣ်ဝဲလီၤ.
ပှၤမၤစံာ်ဖိတဖၣ် အသးလီၤစၢ်အဃိ အဝဲသ့ၣ် ကးဘၢအခိၣ်လီၤ.
၅ ခီဖျိလၢ နီၣ်တအိၣ်ဘၣ်အဃိ
တၤဟိမိၢ် လၢပျီပူၤဒၣ်လဲာ် ပာ်တ့ၢ်ကွံာ် အဖိလၢ အအိၣ်ဖျဲၣ် ထီၣ်သီလီၤ.
၆ ကသ့ၣ်ယီၤအမံၤတဖၣ် ဆၢထၢၣ်လၢ တၢ်လူၢ်ခိၣ်,
ကသါအီခၣ် ဒ်သိးဒီး ထွံၣ်မံၤတဖၣ်
ဒီးအဝဲသ့ၣ် အမဲာ်ကဒုလီၤ မ့ၢ်လၢ တၢ်မုၢ်တၢ်ဘိတဖၣ် တအိၣ်လၢၤဘၣ် အဃိလီၤ.+
၇ အိ ယဟိဝၤယွၤဧၢ, ပမၤတၢ်လၢ တၢ်သးတတီဘၣ် အိၣ်အဘျီအါမး,+
ပမၤကမၣ်ဘၣ်နၤ
ဒီးပတၢ်ကမၣ်န့ၣ် ကဲဝဲတၢ်အုၣ်အသးလၢ အထီဒါပှၤ
သနာ်က့ မၤတၢ်လၢနမံၤ+ အဂီၢ်တက့ၢ်.
၈ နမ့ၢ်အံၣ်စရ့လး အတၢ်မုၢ်လၢ် ဒီးအံၣ်စရ့လး အတၢ်အုၣ်က့ၤ ခီၣ်က့ၤ+ ဖဲတၢ်ကီတၢ်ခဲ အဆၢကတီၢ်လီၤ.
ဘၣ်ဆၣ် တဘျီအံၤ ဘၣ်မနုၤအဃိ နလီၤဂာ်ဒ် ပှၤလၢ ပတသ့ၣ်ညါအီၤဘၣ်တဂၤလၢ ကီၢ်ပူၤ
ဒီးဒ်ပှၤလၢ အလဲၤတၢ်က့ၤတၢ်တဂၤလၢ အမံတ့ၢ် ထဲတနၤ အသိးန့ၣ်လဲၣ်.
၉ ဘၣ်မနုၤအဃိ နလီၤဂာ်ဒ် ပှၤတဂၤလၢ အသးလီၤကတုၤ
ဒီးဒ်ပှၤလၢ အဂံၢ်ဆူၣ်ဘါဆူၣ်လၢ အမၤပူၤဖျဲးတၢ် တသ့ဘၣ်တဂၤ အသိးန့ၣ်လဲၣ်.
၁၀ ဘၣ်ဃးဒီး ပှၤသ့ၣ်တဖၣ်အံၤန့ၣ် ယဟိဝၤယွၤ တဲဝဲလၢ “အဝဲသ့ၣ် ဟးဝ့ၤဝီၤမုာ်မး+ ဒီးအိၣ်ဃိဒိ တကဲဘၣ်.+ အဃိ ယၤ, ယဟိဝၤယွၤ တဘၣ်သူၣ်ဘၣ်သး အဝဲသ့ၣ် နီတစဲးဘၣ်.+ ခဲအံၤ ယကသ့ၣ်နီၣ်ထီၣ် အဝဲသ့ၣ် အတၢ်ကမၣ် ဒီးယကဟံးန့ၢ် အဝဲသ့ၣ်အရ့ လၢအဝဲသ့ၣ် အတၢ်ဒဲးဘးအဃိလီၤ.”+
၁၁ ဒီးယဟိဝၤယွၤ တဲယၤလၢ “တဘၣ်ဃ့ထုကဖၣ်လၢ တၢ်ကလဲၤအသး ဂ့ၤဂ့ၤဘၣ်ဘၣ် လၢပှၤသ့ၣ်တဖၣ်အံၤ အဂီၢ်တဂ့ၤ.+ ၁၂ ဖဲအဝဲသ့ၣ် ဒုၣ်တၢ်အီၣ်အခါ ယတဒိကနၣ် အဝဲသ့ၣ် အတၢ်ဃ့ကညးဘၣ်.+ ဖဲအဝဲသ့ၣ် လုၢ်ထီၣ် တၢ်လုၢ်ဒွဲၣ်အူတဖၣ် ဒီးတၢ်လုၢ်ဘုတဖၣ် အခါ ယတဘၣ်သူၣ်ဘၣ်သး နီတစဲးဘၣ်.+ ယကမၤဟးဂီၤ အဝဲသ့ၣ် ခီဖျိ တၢ်ဒုးတၢ်ယၤ, တၢ်သၣ်ဝံၤလီၤဒိ ဒီးတၢ်ဆါသံသတြိာ်လီၤ.”+
၁၃ ဒီးယတဲလၢ “အၣ်လါ, တၢ်ပၢကစၢ် ယဟိဝၤယွၤဧၢ, ဝံတဖၣ် တဲဘၣ်အဝဲသ့ၣ်လၢ အဝဲသ့ၣ် တထံၣ်ဘၣ် တၢ်ဒုးတၢ်ယၤ ဒီးတၢ်သၣ်ဝံၤလီၤဒိဘၣ်. ဒီးတဲစ့ၢ်ကီးဝဲလၢ ကစၢ်ယွၤ ကဟ့ၣ်လီၤ အဝဲသ့ၣ် တၢ်ဃူတၢ်ဖိး ဖဲတၢ်လီၢ်အံၤလီၤ.”+
၁၄ ယဟိဝၤယွၤ တဲယၤလၢ “ဝံတဖၣ်လၢ အတဲဝံအတၢ်စံးပာ်လၢ ယမံၤအပူၤန့ၣ် မ့ၢ်ဒၣ် တၢ်လံၣ်တၢ်လီတဖၣ်လီၤ.+ ယတဆှၢလီၤ အဝဲသ့ၣ်ဘၣ်, ယတမၤလိာ် အဝဲသ့ၣ်ဘၣ် ဒီးယတတဲတၢ်ဒီး အဝဲသ့ၣ်ဘၣ်.+ အဝဲသ့ၣ် တဲသုလၢ ဝံအတၢ်စံးပာ်တဖၣ်န့ၣ် အိၣ်ဒၣ်အဝဲသ့ၣ် ထုးထီၣ်တၢ်လံၣ်တၢ်လီလၢ အနီၢ်ကစၢ်အခိၣ်နူာ်ပူၤ* ဒီးမ့ၢ်ဝဲ တၢ်ထံၣ်လၢညါခီလၢ အတမ့ၢ်တတီဘၣ် ဒီးတၢ်ဖးတၢ်လၢ အကမၤအသးလၢ ခါဆူညါတဖၣ်လၢ အဘျုးတအိၣ်ဘၣ်လီၤ.+ ၁၅ အဃိ ဘၣ်ဃးဒီးဝံလၢ ယတဆှၢလီၤအီၤဘၣ်တဖၣ် လၢအတဲ ဝံအတၢ်စံးပာ်တဖၣ် လၢယမံၤအပူၤ ဒီးတဲဝဲလၢ တၢ်ဒုးတၢ်ယၤမ့ၢ်ဂ့ၤ, တၢ်သၣ်ဝံၤလီၤဒိမ့ၢ်ဂ့ၤ တဟဲအိၣ်ထီၣ် လၢကီၢ်အံၤ အပူၤဘၣ်န့ၣ် ယၤ, ယဟိဝၤယွၤအံၤ ယတဲလၢ ‘ဝံတဖၣ်န့ၣ် ကသံလၢ တၢ်ဒုးတၢ်ယၤ ဒီးတၢ်သၣ်ဝံလီၤဒိ အဃိလီၤ.+ ၁၆ ဒီးပှၤလၢအဒိကနၣ် ဝံအတၢ်စံးပာ်တဖၣ်န့ၣ် ယကဒုးလီၤဘၣ် အဝဲသ့ၣ်လၢ တၢ်ကီတၢ်ခဲဖးဒိၣ် ဒ်အကြၢးဒီး အဝဲသ့ၣ်အသိးလီၤ. ဒီးခီဖျိလၢ တၢ်ဒုးတၢ်ယၤ ဒီးတၢ်သၣ်ဝံၤလီၤဒိအဃိ ပှၤကတၢၤကွံာ် အဝဲသ့ၣ်အစိၣ်လၢ ဝ့ၢ်ယရူၤၡလ့ၣ် အကျဲတဖၣ်အပူၤလီၤ.+ ဒီးအဝဲသ့ၣ်မ့ၢ်ဂ့ၤ, အမါမ့ၢ်ဂ့ၤ ဒီးအဖိမုၣ်ဖိခွါတဖၣ်မ့ၢ်ဂ့ၤ ပှၤတအိၣ် ခူၣ်လီၤအစိၣ် နီတဂၤဘၣ်.’+
၁၇ “နကဘၣ်တဲဘၣ် အဝဲသ့ၣ်လၢ
‘ယပှၤကလုာ် အဖိမုၣ် မုၣ်ကနီၤစီဆှံ ဘၣ်ဒိနးမး+
ဒီးဟးဂီၤလၢာ်လံအဃိ
ယမဲာ်ထံကလီၤ ဒီနံၤဒီနၤ ဒီးအတပတုာ်ဘၣ်.+
၁၈ ဖဲယလဲၤလၢ ပျီပူၤအခါ
ယထံၣ်ဘၣ်ပှၤသံ လၢတၢ်ဒုး တၢ်ယၤအဃိ+
ဒီးဖဲယလဲၤနုာ်လီၤလၢ ဝ့ၢ်ပူၤအခါ
ယထံၣ်ဘၣ် ပှၤဘၣ်ကီဘၣ်ခဲလၢ တၢ်သၣ်ဝံၤလီၤဒိ အဃိလီၤ.+
ဝံဒီးပှၤလုၢ်တၢ်ဒိၣ် လဲၤဟးဝ့ၤဝီၤဝဲလၢ ကီၢ်လၢအဝဲသ့ၣ် တသ့ၣ်ညါဝဲဘၣ် အပူၤလီၤ.’”+
၁၉ ကစၢ်ယွၤဧၢ, မ့ၢ်နပာ်တ့ၢ်ကွံာ် ယူဒၤအပှၤဂီၢ်မုၢ် လၢာ်လၢာ်ဆ့ဆ့လံဧါ. မ့ၢ်နသးဟ့ ဝ့ၢ်စံယိၣ်လံဧါ.+
ဘၣ်မနုၤအဃိ နမၤဘၣ်ဒိပှၤ တုၤလၢ ပဘျါက့ၤ တသ့လၢၤဘၣ်လဲၣ်.+
လၢညါန့ၣ် ပမုၢ်လၢ်လၢ ပကန့ၢ်ဘၣ် တၢ်ဃူတၢ်ဖိး ဘၣ်ဆၣ် ပတန့ၢ်ဘၣ် တၢ်လၢအဂ့ၤ နီတမံၤဘၣ်.
ပမုၢ်လၢ်တ့ၢ်လၢ ပကဘျါက့ၤ ဘၣ်ဆၣ် တၢ်လီၤပျံၤလီၤဖုး လီၤဘၣ်ပှၤလီၤ.+
၂၀ အိ ယဟိဝၤယွၤဧၢ, ပမၤကမၣ်ဘၣ်နၤလံအဃိ
ပအၢၣ်လီၤတူၢ်လိာ် ပတၢ်အၢတၢ်သီ
ဒီးပမိၢ်ပၢ် ဖံဖုလၢပျၢၤတဖၣ် အတၢ်ကမၣ်လီၤ.+
၂၁ ခီဖျိလၢ နမံၤအဃိ တဘၣ် ပာ်တ့ၢ်ကွံာ် ပှၤတဂ့ၤ.+
တဘၣ်မၤလီၤစှၤ နလီၢ်ပစိာ်လၢ အလီၤကဟုကညီၢ် အလၤကပီၤတဂ့ၤ.
သ့ၣ်နီၣ်ထီၣ်က့ၤ တၢ်အၢၣ်လီၤ အီလီၤ လၢနမၤတ့ၢ်ဒီးပှၤ ဒီးတဘၣ်မၤဟးဂီၤအီၤတဂ့ၤ.+
၂၂ ပှၤကလုာ် အယွၤတဖၣ်* လၢအဘျုးတအိၣ်ဘၣ်န့ၣ် ဒုးစူၤလီၤ မူခိၣ် ကသ့ဧါ.
မူခိၣ်ဒုးစူၤလီၤတၢ်စူၤထံ လၢ အနီၢ်ကစၢ် ကသ့ဧါ.
အိ ပကစၢ် ယဟိဝၤယွၤဧၢ,+ ပှၤလၢ အမၤဝဲသ့န့ၣ် အိၣ်ထဲနၤ တဂၤလီၤ.
ထဲဒၣ်နၤတဂၤန့ၣ် နမၤတ့ၢ် တၢ်သ့ၣ်တဖၣ်အံၤ ခဲလၢာ်အဃိ
ပမုၢ်လၢ်တၢ်လၢနၤလီၤ.