၁ ကရံၣ်သူး
၉ ဖဲယအဲၣ်ဒိးမၤန့ၣ် မ့ၢ်ယမၤတသ့ဘၣ်ဧါ. ယမ့ၢ်တၢ်မၢဖိတဂၤ တမ့ၢ်ဘၣ်ဧါ. လၢညါ ယထံၣ်ဘၣ် ပကစၢ်ယ့ၣ်ၡူး တမ့ၢ်ဘၣ်ဧါ.+ သုမ့ၢ် ယတၢ်ဖံးတၢ်မၤလၢ ယမၤအီၤလၢကစၢ်အပူၤ တမ့ၢ်ဘၣ်ဧါ. ၂ ယမ့တမ့ၢ် တၢ်မၢဖိလၢ ပှၤဂၤအဂီၢ်ဘၣ်သနာ်က့ ယမ့ၢ်တၢ်မၢဖိ လၢသုဂီၢ်သပှၢ်တၢၢ်လီၤ. ဒီးသုမ့ၢ်တၢ်အုၣ်အသးလၢ အပာ်ဂၢၢ်ပာ်ကျၢၤဝဲလၢ ယမ့ၢ်တၢ်မၢဖိလၢ ကစၢ်အပူၤလီၤ.
၃ ပှၤလၢ အသမံသမိးယၤန့ၣ် ယကစံးဆၢက့ၤ အဝဲသ့ၣ်ဒ်အံၤလီၤ. ၄ ပအိၣ်ဒီး တၢ်ခွဲးတၢ်ယာ်လၢ ပကအီၣ်တၢ်ဒီးအီတၢ် တမ့ၢ်ဘၣ်ဧါ. ၅ ပအိၣ်ဒီး တၢ်ခွဲးတၢ်ယာ်လၢ ပကဟံးန့ၢ်ပမါလၢ အစူၢ်က့ၤနာ်က့ၤတၢ်တဂၤ+ ဒီးလဲၤသကိးဃုာ်တၢ်ဒီးအီၤ ဒ်တၢ်မၢဖိအဂၤတဖၣ်, ဒ်ကစၢ် အဒီပုၢ်ဝဲၢ်ခွါတဖၣ်+ ဒီးဒ်စီၤက့ၤဖး*+ မၤဝဲအသိး တမ့ၢ်ဘၣ်ဧါ. ၆ ဒီးပှၤလၢ အကဘၣ်မၤတၢ်မၤလၢ ကလုၢ်အီၣ်သးသမူအဂီၢ်န့ၣ် အိၣ်ထဲယၤဒီး စီၤဘၢ်နါဘၤ+ ခံဂၤလီၤဧါ. ၇ ပှၤသုးဖိလၢ အထုးထီၣ် အနီၢ်ကစၢ် အတၢ်လၢာ်ဘူၣ်လၢာ်စ့ၤ ဖဲအကဲသုး အဆၢကတီၢ်န့ၣ် အိၣ်တဂၤဂၤဧါ. ပှၤလၢအဒုးအိၣ်ထီၣ် စပံးအကျီး ဒီးတအီၣ် အတၤသၣ်ဘၣ်န့ၣ် အိၣ်တဂၤဂၤဧါ.+ ဒီးပှၤလၢအကွၢ်သိန့ၣ် မ့ၢ်အတအီဝဲ သိတဖုန့ၣ် အနုၢ်ထံဘၣ်ဧါ.
၈ မ့ၢ်ယတဲတၢ်ဂ့ၢ်တဖၣ်အံၤ ဒ်ပှၤဟီၣ်ခိၣ်ဖိ အတၢ်ထံၣ်အသိးဧါ. စီၤမိၤၡ့အတၢ်သိၣ်တၢ်သီ ပာ်ဖျါထီၣ်ဝဲ တၢ်ဂ့ၢ်တဖၣ်အံၤ တမ့ၢ်ဘၣ်ဧါ. ၉ လၢစီၤမိၤၡ့ အတၢ်သိၣ်တၢ်သီအပူၤန့ၣ် တၢ်ကွဲးအသး အိၣ်ဝဲလၢ “ဖဲကျီၢ်ဖါယီၢ်ဘုအခါ နတဘၣ်ဖျီၣ်ဃာ် အကိာ်ပူၤတဂ့ၤ.”+ မ့ၢ်ကစၢ်ယွၤ ဘၣ်ယိၣ်တၢ်လၢ ကျီၢ်ဖါတဖၣ်အဂီၢ်ဧါ. ၁၀ မ့တမ့ၢ် အဝဲတဲဝဲဒ်န့ၣ် လၢပဂီၢ်ဧါ. နီၢ်ကီၢ်န့ၣ် တၢ်ကွဲးအသးအံၤန့ၣ် မ့ၢ်ဝဲလၢ ပဂီၢ်လီၤ. အဃိ ပှၤလၢအထဲၣ်တၢ်မ့ၢ်ဂ့ၤ, ပှၤလၢအယီၢ်ဘုမ့ၢ်ဂ့ၤ ဖဲအဖံးတၢ်မၤတၢ်အခါ အဝဲမ့ၢ်မုၢ်လၢ်ဝဲလၢ ကန့ၢ်ဘုန့ၣ် ကြၢးဝဲဘၣ်ဝဲလီၤ.
၁၁ ပမ့ၢ်ဖှံလီၤတၢ်လၢ နီၢ်သးတကပၤ လၢသုကျါ ဒီးပမ့ၢ်ဒိးန့ၢ်ဘၣ် တၢ်မၤစၢၤလၢ နီၢ်ခိတကပၤ လၢသုအိၣ်န့ၣ် မ့ၢ်အကမၣ်ဧါ.+ ၁၂ ပှၤအဂၤတဖၣ် မ့ၢ်အိၣ်ဒီးတၢ်ခွဲးတၢ်ယာ်လၢ အကန့ၢ်ဘၣ် တၢ်လၢသုအိၣ်န့ၣ် ပဝဲသ့ၣ်တဖၣ်အံၤ ပအိၣ်ဒီးတၢ်ခွဲးတၢ်ယာ် အါန့ၢ်အန့ၣ် တမ့ၢ်ဘၣ်ဧါ. ဘၣ်ဆၣ် ပတသူ ပတၢ်ခွဲးတၢ်ယာ် တခါအံၤဘၣ်+ ဒီးပတူၢ်တၢ်ခဲလၢာ်လီၤ. ပမ့ၢ်တမၤဒ်န့ၣ်ဘၣ်န့ၣ် ပကဒုးအိၣ်ထီၣ်ဘၣ်ဖုး တၢ်တြီမၤတံာ်တာ်တမံၤမံၤလၢ တၢ်သးခုကစီၣ်လၢ အဘၣ်ဃးဒီးခရံာ် အတၢ်လဲၤထီၣ်လဲၤထီအဂီၢ်လီၤ.+ ၁၃ ပှၤလၢအမၤတၢ်လၢ တၢ်လုၢ်ဟံၣ်ပူၤန့ၣ် ဒိးန့ၢ်ဘၣ်တၢ်အီၣ်လၢ တၢ်လုၢ်ဟံၣ်ပူၤ တမ့ၢ်ဘၣ်ဧါ. ဒီးပှၤလၢအမၤတၢ်လၢ တၢ်လုၢ်လီၢ်ထီဘိန့ၣ် ဒိးန့ၢ်ဘၣ်ဝဲ တၢ်လၢပှၤလုၢ်ထီၣ်ဝဲတနီၤ တမ့ၢ်ဘၣ်ဧါ.+ ၁၄ ဒ်န့ၣ်အသိးစ့ၢ်ကီး ကစၢ်ဟ့ၣ်လီၤအကလုၢ်လၢ ပှၤလၢအစံၣ်တဲၤတဲလီၤ တၢ်သးခုကစီၣ်န့ၣ် ကအီၣ်ဘၣ်အီဘၣ်တၢ်လၢ တၢ်သးခုအကစီၣ်အဃိလီၤ.+
၁၅ ဘၣ်ဆၣ် ယတဃ့တၢ်မၤစၢၤ လၢသုအိၣ်နီတမံၤဘၣ်.+ နီၢ်ကီၢ်န့ၣ် ယကွဲးန့ၢ်သု လၢတၢ်ဂ့ၢ်တဖၣ်အံၤန့ၣ် တမ့ၢ်ဒ်သိး ယကဒိးန့ၢ်ဘၣ် တၢ်မၤစၢၤအဂီၢ်ဘၣ်. ယမ့ၢ်သံန့ၣ် ကဂ့ၤဒိၣ်န့ၢ်ဒံး ပှၤထုးကွံာ် ယတၢ်ခွဲးတၢ်ယာ်လၢ ယကပာ်ကဖၢလၢ ယသးအဂီၢ်လီၤ.+ ၁၆ ယမ့ၢ်စံၣ်တဲၤတဲလီၤ တၢ်သးခုကစီၣ် သနာ်က့ ယပာ်ကဖၢလၢယသး အလီၢ်တအိၣ်ဘၣ်, မ့ၢ်လၢ ယမူဒါအိၣ်လၢ ယကဘၣ်မၤဒ်န့ၣ် အဃိလီၤ. ယမ့ၢ်တစံၣ်တဲၤတဲလီၤ တၢ်သးခုကစီၣ်ဘၣ်န့ၣ် ယကဘၣ်နးဘၣ်ဖှီၣ်လီၤ.+ ၁၇ ယမ့ၢ်မၤအီၤလၢ တၢ်သးအိၣ်အပူၤန့ၣ် ယကန့ၢ်ဘၣ်ခိၣ်ဖးလီၤ. ဒီးယသးမ့ၢ်တအိၣ်ဘၣ် သနာ်က့ မ့ၢ်လၢကစၢ်ယွၤ အးလီၤယၤမူဒါအဃိ ယမၤအီၤဒံးလီၤ.+ ၁၈ မ့မ့ၢ်ဒ်န့ၣ်န့ၣ် ယခိၣ်ဖး မ့ၢ်တၢ်မနုၤလဲၣ်. ယခိၣ်ဖးမ့ၢ်ဝဲ ယကစံၣ်တဲၤတဲလီၤ တၢ်သးခုကစီၣ်လၢ ပှၤတလိၣ်ဟ့ၣ်ယၤအပှ့ၤဘၣ် ဒ်သိး ယသုတသူကမၣ်ဘၣ်ဖုး ယတၢ်ခွဲးတၢ်ယာ်လၢ အဘၣ်ဃးဒီး တၢ်သးခုကစီၣ်တဂ့ၤ အဂီၢ်လီၤ.
၁၉ ယအိၣ်ဒီးတၢ်သဘျ့ ဘၣ်ဆၣ် ယဒုးကဲထီၣ် ယနီၢ်ကစၢ်အသးလၢ ပှၤခဲလၢာ်အကုၢ်ဒ်သိး ယကမၤန့ၢ် ပှၤအါဂၤအဂီၢ်လီၤ. ၂၀ လၢပှၤယူဒၤဖိအဂီၢ်န့ၣ် ယကဲထီၣ်ဒ်သိးဒီး ပှၤယူဒၤဖိ တဂၤ ဒ်သိးယကမၤန့ၢ် ပှၤယူဒၤဖိအဂီၢ်လီၤ.+ ယတအိၣ်လၢ တၢ်သိၣ်တၢ်သီ* အဖီလာ်ဘၣ်. ဘၣ်ဆၣ် လၢပှၤအိၣ်လၢ တၢ်သိၣ်တၢ်သီ အဖီလာ်တဖၣ်အဂီၢ်န့ၣ် ယကဲထီၣ်ဒ်သိးဒီး ပှၤအိၣ်လၢ တၢ်သိၣ်တၢ်သီအဖီလာ် တဂၤ ဒ်သိးယကမၤန့ၢ် ပှၤအိၣ်လၢ တၢ်သိၣ်တၢ်သီ အဖီလာ်တဖၣ်အဂီၢ်လီၤ.+ ၂၁ ယလူၤပိာ်ထွဲ ကစၢ်ယွၤဒီးခရံာ် အတၢ်သိၣ်တၢ်သီ+ ဘၣ်ဆၣ် လၢပှၤလၢအတလူၤပိာ်ထွဲ တၢ်သိၣ်တၢ်သီဘၣ်* အဂီၢ်န့ၣ် ယကဲထီၣ်ဒ်သိးဒီး ပှၤလၢ အတလူၤပိာ်ထွဲ တၢ်သိၣ်တၢ်သီတဂၤ ဒ်သိးယကမၤန့ၢ် ပှၤလၢအတလူၤပိာ်ထွဲ တၢ်သိၣ်တၢ်သီဘၣ်တဖၣ် အဂီၢ်လီၤ. ၂၂ လၢပှၤလၢ အဂံၢ်စၢ်ဘါစၢ်တဖၣ် အဂီၢ်န့ၣ် ယကဲထီၣ်ပှၤလၢ အဂံၢ်စၢ်ဘါစၢ် ဒ်သိးယကန့ၢ်ဘၣ် ပှၤဂံၢ်စၢ်ဘါစၢ်တဖၣ် အဂီၢ်လီၤ.+ ယကဲထီၣ် တၢ်ခဲလၢာ်လၢ ပှၤအကလုာ်ကလုာ်အဂီၢ် ဒီးယမၤလၢ အဂ့ၤကတၢၢ်ဒ်သိး ယမၤပူၤဖျဲး အဝဲသ့ၣ်တနီၤ ကန့ၢ်အဂီၢ်လီၤ. ၂၃ ယမၤတၢ်ခဲလၢာ်လၢ တၢ်သးခုကစီၣ်အဂီၢ် ဒ်သိး ယကစံၣ်တဲၤတဲလီၤ ပှၤဂၤအဂီၢ်လီၤ.+
၂၄ ပှၤဃ့ၢ်ပြၢတၢ်ကိးဂၤဒဲးန့ၣ် ဃ့ၢ်ဝဲလၢ တၢ်ဃ့ၢ်ပြၢတမံၤဃီအပူၤ ဘၣ်ဆၣ် ပှၤကဒိးန့ၢ်ဘၣ် ခိၣ်ဖးထဲတဂၤန့ၣ် မ့ၢ်သုတသ့ၣ်ညါဘၣ်ဧါ. အဃိ ဃ့ၢ်ဒ်သိး သုကနၢၤအဂီၢ်တက့ၢ်.+ ၂၅ ပှၤလၢအနုာ်လီၤလၢ တၢ်ပြၢအပူၤကိးဂၤဒဲးန့ၣ် ဘၣ်ပၢၤအသးလၢ တၢ်ခဲလၢာ်အပူၤလီၤ. အဝဲသ့ၣ် မၤဝဲဒ်န့ၣ်န့ၣ် မ့ၢ်ဒ်သိးအကဒိးန့ၢ်ဘၣ် ခိၣ်သလုးလၢ အဟးဂီၤသ့လီၤ.+ မ့မ့ၢ်ပဝဲဒၣ်အံၤ ပမၤဒ်န့ၣ် ဒ်သိးပကဒိးန့ၢ်ဘၣ် ခိၣ်သလုးလၢအဟးဂီၤ တသ့ဘၣ်အဂီၢ်လီၤ.+ ၂၆ အဃိ ဖဲယဃ့ၢ်တၢ်အခါ ယတဃ့ၢ်ဒ်သိးဒီးပှၤလၢ အတၢ်ပညိၣ် တအိၣ်ဘၣ်န့ၣ်ဘၣ်.+ ဒီးဖဲယထိတၢ်အခါ ယတထိတၢ် ဒ်ပှၤလၢအထိကလံၤအသိးဘၣ်. ၂၇ လၢတၢ်န့ၣ်အလီၢ် ယဒိလီၤတီၢ်လီၤယနီၢ်ခိ*+ ဒီးဒုးကဲထီၣ်အီၤလၢကုၢ်လီၤ. ယမ့ၢ်တမၤဒ်န့ၣ်ဘၣ်န့ၣ် ဖဲယစံၣ်တဲၤတဲလီၤ ပှၤဂၤဝံၤဒီး ယနီၢ်ကစၢ်ဒၣ်ယဲ ယကကဲထီၣ်ဘၣ်ဖုးပှၤလၢ ကစၢ်ယွၤ တဘၣ်သူၣ်ဘၣ်သးအီၤဘၣ် လၢကျဲတဘိဘိလီၤ.