၁ ပ့းတရူး
၃ ဒ်န့ၣ်အသိး မါသ့ၣ်ဧၢ, ဒိးပၢသုသးလၢ သုဝၤအဖီလာ်+ ဒ်သိးအဝဲသ့ၣ် မ့ၢ်တဒိကနၣ် ကစၢ်ယွၤ အကလုၢ်ကထါဘၣ် ဒီးသုမ့ၢ်တတဲ ကစၢ်ယွၤ အကလုၢ်ကထါ နီတစဲးဘၣ် သနာ်က့ သုကထုးန့ၢ် အဝဲသ့ၣ်အသးဆူ တၢ်စူၢ်တၢ်နာ် ခီဖျိလၢ သုလုၢ်လၢ်သကဲာ်ပဝးအဃိ,+ ၂ မ့ၢ်လၢအဝဲသ့ၣ် ကထံၣ်ဘၣ် သုလုၢ်လၢ်သကဲာ်ပဝး လၢအကဆှီ+ ဒီးသုပာ်ကဲအီၤဒိၣ်မး အဃိလီၤ. ၃ မ်သုတၢ်ဃံတၢ်လၤန့ၣ် တဘၣ်မ့ၢ် တၢ်လၢအအိၣ်ဖျါလၢခိ ဒ်သိးဒီး တၢ်သံၣ်ခိၣ်ဆူၣ်, တၢ်သိးထူသိးလွဲ+ ဒီးတၢ်ကူတၢ်ကၤ ဃံဃံလၤလၤတဖၣ် န့ၣ်တဂ့ၤ. ၄ ဘၣ်ဆၣ် မ်အကမ့ၢ်တၢ်လၢ အအိၣ်ခူသူၣ်အသးလၢ သုသူၣ်ကံၢ်သးလဲအပူၤ, တၢ်ဃံတၢ်လၤလၢ အဟးဂီၤတသ့ဘၣ် လၢအမ့ၢ် တၢ်ပာ်သး မုာ်မုာ်ခုၣ်ခုၣ် ဒီးတၢ်သူၣ်စူၤသးစူၤန့ၣ်တက့ၢ်.+ တၢ်အဝဲအံၤ မ့ၢ်တၢ်လၢ အလုၢ်ဒိၣ်ပှ့ၤဒိၣ်လၢ ကစၢ်ယွၤအမဲာ်ညါလီၤ. ၅ ပိာ်မုၣ်စီဆှံ လၢပျၢၤတဖၣ် လၢအမုၢ်လၢ်တၢ်လၢ ကစၢ်ယွၤ အအိၣ်န့ၣ် မၤဃံမၤလၤထီၣ်အသးလၢ ကျဲဒ်န့ၣ်လီၤ. အဝဲသ့ၣ် ဒိးပၢအသးလၢ အဝၤအဖီလာ် ၆ ဒ်နီၢ်စၤရါ ဒိကနၣ် စီၤအၤဘြၤဟၣ် ဒီးကိးအီၤလၢ ကစၢ်အသိးလီၤ.+ ဒီးသုမ့ၢ်ဆဲးမၤတၢ်ဂ့ၤ ဒီးသုမ့ၢ်တပျံၤတၢ် နီတမံၤဘၣ်န့ၣ် သုကဲထီၣ် နီၢ်စၤရါအဖိတဖၣ်လံ.+
၇ ဒ်န့ၣ်အသိး ဝၤသ့ၣ်ဧၢ, ရ့* သုမါလၢ တၢ်သ့ၣ်ညါနၢ်ပၢၢ် အပူၤတက့ၢ်. ဆိကမိၣ်န့ၢ်တၢ်လၢ အဝဲသ့ၣ်အဂီၢ်+ မ့ၢ်လၢ ပိာ်မုၣ်တဖၣ်န့ၣ် လီၤဂာ်ဒ် သပၢၤလၢအသ့ၣ်ဖးညီ ဒိၣ်န့ၢ်ဒံးသု ဒီးမ့ၢ်လၢ အဝဲသ့ၣ်ကန့ၢ်သါဘၣ်တၢ်မူ ဃုာ်ဒီးသု+ လၢတၢ်သးကညီၤ ဒိၣ်ဒိၣ်မုၢ်မုၢ် အဃိလီၤ. သုကဘၣ်မၤဒ်အံၤ ဒ်သိးသုတၢ်ထုကဖၣ် သုတဘၣ် တၢ်တြီအီၤတဂ့ၤအဂီၢ်လီၤ.
၈ အဂၤတမံၤန့ၣ် သုဝဲခဲလၢာ် ဘၣ်အိၣ်ဒီးတၢ်သးတဖျၢၣ်ဃီ,+ တၢ်ဒိသူၣ်ဒိသး, ဒီပုၢ်ဝဲၢ်တၢ်အဲၣ်, တၢ်သးကညီၤ+ ဒီးတၢ်ဆီၣ်လီၤသးလီၤ.+ ၉ မၤဆၢက့ၤတၢ်အၢလၢ တၢ်အၢတဂ့ၤ+ ဒီးတဲဆါက့ၤတၢ်လၢ တၢ်တဲဆါအဂီၢ်တဂ့ၤ.+ လၢတၢ်န့ၣ်အလီၢ် မၤဂ့ၤတၢ်*+ လၢပှၤဂၤအဖီခိၣ် တက့ၢ်. ကစၢ်ယွၤကိးန့ၢ်သုလၢ သုကမၤဒ်န့ၣ်အဂီၢ် ဒ်သိးသုကဒိးန့ၢ်ဘၣ် တၢ်ဆိၣ်ဂ့ၤအဂီၢ်လီၤ.
၁၀ တၢ်ကွဲးအသးအိၣ်ဝဲလၢ “ပှၤလၢအအဲၣ်တၢ်မူ ဒီးဆၢထံၣ် မုၢ်နံၤလၢအဂ့ၤတဖၣ်န့ၣ် ကဘၣ်ပၢၤဃာ်အပျ့ၤ ဒ်သိးအသုတတဲတၢ်လၢ အအၢတဂ့ၤဒီး+ ကဘၣ်ပၢၤဃာ်အထးခိၣ် ဒ်သိးအသု တတဲလံၣ်တဲလီတၢ် တဂ့ၤအဂီၢ်လီၤ. ၁၁ မ်အဃၣ်ကွံာ်အသးလၢ တၢ်အၢ+ ဒီးမၤတၢ်ဂ့ၤတက့ၢ်.+ မ်အဃု တၢ်ဃူတၢ်ဖိး ဒီးလူၤအီၤတက့ၢ်.+ ၁၂ ယဟိဝၤယွၤ* အမဲာ်ကွၢ် ပှၤတီပှၤလိၤ ဒီးနၢ်ဟူအဝဲသ့ၣ် အတၢ်ဃ့ကညးလီၤ.+ ဘၣ်ဆၣ် ယဟိဝၤယွၤ ထီဒါပှၤလၢ အမၤတၢ်အၢတဖၣ်လီၤ.”+
၁၃ နီၢ်ကီၢ်န့ၣ် သုသးမ့ၢ်ဆူၣ်လၢ သုကမၤတၢ်ဂ့ၤအဂီၢ်န့ၣ် မတဂၤ မၤဘၣ်ဒိသုကသ့လဲၣ်.+ ၁၄ သုမ့ၢ်ဘၣ်တူၢ်တၢ်လၢ တၢ်တီတၢ်လိၤအဃိဒၣ်လဲာ် သုကသးခုလီၤ.+ ဘၣ်ဆၣ် တၢ်လၢပှၤဂၤ ပျံၤဝဲတဖၣ်န့ၣ် တဘၣ်ပျံၤအီၤတဂ့ၤ ဒီးတဘၣ် သူၣ်ကိၢ်သးဂီၤတဂ့ၤ.+ ၁၅ လၢတၢ်န့ၣ်အလီၢ် ပာ်စီဆှံခရံာ် ဒ်ကစၢ်အသိး လၢသုသးပူၤတက့ၢ်. အိၣ်ကတဲာ်ကတီၤပာ်စၢၤသုသး ထီဘိလၢ သုကတဲဆၢ ပှၤတဂၤဂ့ၤတဂၤဂ့ၤလၢ အသံကွၢ်သု ဘၣ်ဃးဒီး သုတၢ်မုၢ်လၢ်အဂ့ၢ်န့ၣ်တက့ၢ်. ဘၣ်ဆၣ် ဖဲသုတဲဆၢတၢ်အခါ သုကဘၣ်ပာ်ဖျါထီၣ် တၢ်သးစူၤ+ ဒီးတၢ်ပာ်ကဲဒိၣ်မးလီၤ.+
၁၆ ပၢၤဃာ်သုသးလၢ အသ့ၣ်ညါဒၣ်တၢ်လၢ အကဆှီတက့ၢ်.+ ခီဖျိသုမၤဒ်န့ၣ်အဃိ ပှၤမ့ၢ်တဲထီဒါသု တမံၤဂ့ၤတမံၤဂ့ၤ သနာ်က့ အဝဲသ့ၣ် ကဒိးန့ၢ်ဘၣ် တၢ်မဲာ်ဆှးမ့ၢ်လၢ+ သုအိၣ်ဒီး တၢ်သကဲာ်ပဝးလၢအဂ့ၤ ဒ်ပှၤလၢ အပိာ်ခရံာ်အခံအသိး အဃိလီၤ.+ ၁၇ မ့ၢ်ဘၣ်ကစၢ်ယွၤအသးလၢ ကပျဲဝဲလၢ သုကတူၢ်တၢ် ခီဖျိလၢ သုမၤတၢ်ဂ့ၤအဃိန့ၣ်+ ဂ့ၤဒိၣ်န့ၢ်ဒံး သုတူၢ်တၢ် ခီဖျိလၢ သုမၤတၢ်အၢအဃိလီၤ.+ ၁၈ ဒ်သိး ခရံာ်လၢအမ့ၢ် ပှၤတီပှၤလိၤတဂၤ ကဆှၢသုလၢ ကစၢ်ယွၤအအိၣ်အဂီၢ်+ အဝဲတူၢ်သံအသး ထဲတဘျီလၢ ပှၤတတီတလိၤတဖၣ်+ အတၢ်ဒဲးဘးအဂီၢ်လီၤ.+ အဝဲဘၣ်တၢ်မၤသံအီၤ ဒ်ပှၤဟီၣ်ခိၣ်ဖိတဂၤအသိး*+ ဘၣ်ဆၣ် အဘၣ်တၢ်မၤသမူထီၣ်က့ၤအီၤ ဒ်ပှၤနီၢ်သးဖိတဂၤ အသိးလီၤ.+ ၁၉ ဒီးဒ်ပှၤနီၢ်သးဖိတဂၤအသိး အဝဲလဲၤစံၣ်တဲၤတဲလီၤ* ပှၤနီၢ်သးဖိတဖၣ်လၢ အအိၣ်လၢဃိာ်ပူၤ+ ၂၀ လၢအတဒိကနၣ်တၢ် ဖဲစီၤနိအၤအစိၤလီၤ.+ ဖဲန့ၣ်အခါ ကစၢ်ယွၤ အိၣ်ခိးဝဲလၢ တၢ်ဝံသးစူၤအပူၤ ဖဲတၢ်တ့ထီၣ်ကဘီအခါလီၤ.+ ဒီးကဘီန့ၣ်ဆှၢပှၤဃိးဂၤ* လၢထံကျါ ပူၤပူၤဖျဲးဖျဲးလီၤ.+
၂၁ ပထိၣ်သတြီၤ တၢ်မၤအသးတခါန့ၣ်ဒီး တၢ်ဒိးဘျၢထံလၢအမ့ၢ် တၢ်လၢအမၤပူၤဖျဲးသုလၢ ဆၢကတီၢ်ခဲအံၤ ခီဖျိယ့ၣ်ၡူးခရံာ် အတၢ်ဂဲၤဆၢထၢၣ်သမူထီၣ်က့ၤန့ၣ် သ့ဝဲလီၤ. တၢ်ဒိးဘျၢထံန့ၣ် တမ့ၢ်လၢအမၤလီၤမၢ်ကွံာ် နီၢ်ခိအတၢ်ဘၣ်အၢဘၣ်သီဘၣ်. ဘၣ်ဆၣ် အကဲတၢ်ဃ့လၢ ကစၢ်ယွၤအအိၣ် ဒ်သိး သုကဒိးန့ၢ်ဘၣ် သးလၢအသ့ၣ်ညါဒၣ်တၢ် လၢအကဆှီလီၤ.+ ၂၂ ယ့ၣ်ၡူးက့ၤထီၣ်လၢ မူခိၣ်ဒီးအိၣ်ဝဲလၢ ကစၢ်ယွၤ အစုထွဲတခီလီၤ.+ ဒီးမူခိၣ်ကလူးတဖၣ်, တၢ်ကဲခိၣ်ကဲနၢ်တဖၣ် ဒီးတၢ်စိတၢ်ကမီၤတဖၣ်န့ၣ် ဘၣ်တၢ်ပာ်လီၤအီၤလၢ အဖီလာ်လီၤ.+