၁ ပ့းတရူး

၃ ဒ်န့ၣ်အသိး မါသ့ၣ်ဧၢ, ဒိးပၢသုသးလၢ သုဝၤအဖီလာ် ဒ်သိးအဝဲသ့ၣ် မ့ၢ်တဒိကနၣ် ယွၤအကလုၢ်ကထါဘၣ် ဒီးသုမ့ၢ်တတဲ တၢ်အကလုၢ်ကထါ နီတစဲးဘၣ် သနာ်က့ တၢ်ကထုးန့ၢ် အဝဲသ့ၣ်ဆူ တၢ်စူၢ်တၢ်နာ် ခီဖျိလၢ သုလုၢ်လၢ်သကဲာ်ပဝးအဃိ, ၂ မ့ၢ်လၢအဝဲသ့ၣ် ကထံၣ်ဘၣ်သု လုၢ်လၢ်သကဲာ်ပဝး လၢအကဆှီ ဒီးလၢသုပာ်ကဲအီၤဒိၣ်မး အဃိန့ၣ်လီၤ. ၃ မ်သုတၢ်ဃံတၢ်လၤန့ၣ် တဘၣ်မ့ၢ် တၢ်လၢအအိၣ်ဖျါလၢခိ, ဒ်သိးဒီး တၢ်သံၣ်ခိၣ်ဆူၣ်, တၢ်သိးထူသိးလွဲ ဒီးတၢ်ကူတၢ်သိး ဃံဃံလၤလၤတဖၣ် န့ၣ်တဂ့ၤ. ၄ ဘၣ်ဆၣ် မ်အကမ့ၢ်တၢ်လၢ အအိၣ်ခူသူၣ်အသးလၢ သုသူၣ်ကံၢ်သးလဲအပူၤ, တၢ်ဃံတၢ်လၤလၢ အဟးဂီၤတသ့ဘၣ် လၢအမ့ၢ် တၢ်ပာ်သး မုာ်မုာ်ခုၣ်ခုၣ် ဒီးတၢ်သူၣ်စူၤသးစူၤန့ၣ်တက့ၢ်. တၢ်အဝဲအံၤ မ့ၢ်တၢ်လၢ အလုၢ်ဒိၣ်ပှ့ၤဒိၣ်လၢ ကစၢ်ယွၤအမဲာ်ညါလီၤ. ၅ ပိာ်မုၣ်စီဆှံ လၢပျၢၤတဖၣ် လၢအမုၢ်လၢ်တၢ်လၢ ယွၤအအိၣ်န့ၣ် မၤဃံမၤလၤထီၣ်အသးလၢ ကျဲဒ်န့ၣ် ခီဖျိလၢအဝဲသ့ၣ် ဒိးပၢအသးလၢ အဝၤအဖီလာ် ၆ ဒ်နီၢ်စၤရါ ဒိကနၣ် စီၤအၤဘြၤဟၣ် ဒီးကိးအီၤလၢ ကစၢ်အသိးန့ၣ်လီၤ. ဒီးသုမ့ၢ်ဆဲးမၤတၢ်ဂ့ၤ ဒီးသုမ့ၢ်တပျံၤတၢ် နီတမံၤဘၣ်န့ၣ် သုကဲထီၣ် နီၢ်စၤရါအဖိတဖၣ်လံ.

၇ ဒ်န့ၣ်အသိး ဝၤသ့ၣ်ဧၢ, ဆဲးအိၣ်မူတပူၤဃီ ဒီးသုမါလၢ တၢ်သ့ၣ်ညါနၢ်ပၢၢ်အပူၤတက့ၢ်. ဆိကမိၣ်န့ၢ်တၢ်လၢ အဝဲသ့ၣ်အဂီၢ် မ့ၢ်လၢ ပိာ်မုၣ်တဖၣ်န့ၣ် လီၤဂာ်ဒ် သပၢၤလၢအသ့ၣ်ဖးညီ ဒိၣ်န့ၢ်ဒံးသု ဒီးမ့ၢ်လၢ အဝဲသ့ၣ်ကန့ၢ်သါဘၣ်တၢ်မူ ဃုာ်ဒီးသု လၢတၢ်သးကညီၤ ဒိၣ်ဒိၣ်မုၢ်မုၢ် အဃိလီၤ. သုကဘၣ်မၤဒ်အံၤ ဒ်သိးသုတၢ်ထုကဖၣ် သုတဘၣ် တၢ်တြီအီၤတဂ့ၤအဂီၢ်လီၤ.

၈ လၢခံကတၢၢ်န့ၣ် သုဝဲခဲလၢာ် ဘၣ်အိၣ်ဒီးတၢ်သးတဖျၢၣ်ဃီ, တၢ်ဒိသူၣ်ဒိသး, ဒီပုၢ်ဝဲၢ်တၢ်အဲၣ်, တၢ်သးကညီၤ ဒီးတၢ်ဆီၣ်လီၤသးလီၤ. ၉ မၤဆၢက့ၤတၢ်အၢလၢ တၢ်အၢတဂ့ၤ ဒီးတဲဆါက့ၤတၢ်လၢ တၢ်တဲဆါအဂီၢ်တဂ့ၤ. မ့မ့ၢ် ဟ့ၣ်ဆၢက့ၤတၢ်လၢ တၢ်ဆိၣ်ဂ့ၤ, မ့ၢ်လၢ တၢ်ကိးန့ၢ်သုလၢ သုကမၤဒ်န့ၣ်အဂီၢ် ဒ်သိးသုကဒိးန့ၢ်ဘၣ် တၢ်ဆိၣ်ဂ့ၤအဂီၢ်လီၤ.

၁၀ တၢ်ကွဲးအသးအိၣ်ဝဲလၢ “ပှၤလၢအအဲၣ်တၢ်မူ ဒီးဆၢထံၣ် မုၢ်နံၤလၢအဂ့ၤတဖၣ်န့ၣ် ကဘၣ်ပၢၤဃာ်အပျ့ၤ ဒ်သိးအသုတတဲတၢ်လၢ အအၢတဂ့ၤဒီး ကဘၣ်ပၢၤဃာ်အပျုၤ ဒ်သိးအသု တတဲလံၣ်တဲလီတၢ် တဂ့ၤအဂီၢ်န့ၣ်လီၤ. ၁၁ မ်အဃၣ်ကွံာ်အသးလၢ တၢ်အၢအအိၣ် ဒီးမၤတၢ်ဂ့ၤတက့ၢ်. မ်အဃု တၢ်ဃူတၢ်ဖိး ဒီးလူၤအီၤတက့ၢ်. ၁၂ ယဟိဝၤယွၤအမဲာ်ကွၢ် ပှၤတီပှၤလိၤ ဒီးနၢ်ဟူအဝဲသ့ၣ် အတၢ်ဃ့ကညးလီၤ. ဘၣ်ဆၣ် ယဟိဝၤယွၤအမဲာ် ထီဒါပှၤလၢ အမၤတၢ်အၢတဖၣ်န့ၣ်လီၤ.”

၁၃ နီၢ်ကီၢ်န့ၣ် သုသးမ့ၢ်ဆူၣ်လၢ ကမၤတၢ်ဂ့ၤအဂီၢ်န့ၣ် မတၤကမၤဘၣ်ဒိသုလဲၣ်. ၁၄ သုမ့ၢ်ဘၣ်တူၢ်တၢ်လၢ တၢ်တီတၢ်လိၤအဃိဒၣ်လဲာ် သုကသးခုလီၤ. ဘၣ်ဆၣ် တၢ်လၢအဝဲသ့ၣ် ပျံၤဝဲတဖၣ်န့ၣ် တဘၣ်ပျံၤအီၤတဂ့ၤ ဒီးတဘၣ် သူၣ်ကိၢ်သးဂီၤတဂ့ၤ. ၁၅ လၢတၢ်န့ၣ်အလီၢ် ပာ်စီဆှံခရံာ် ဒ်ကစၢ်အသိး လၢသုသးပူၤတက့ၢ်. အိၣ်ကတဲာ်ကတီၤပာ်စၢၤသုသး ထီဘိလၢ သုကတဲဆၢ ပှၤတဂၤဂ့ၤတဂၤဂ့ၤလၢ အသံကွၢ်သု ဘၣ်ဃးဒီး သုတၢ်မုၢ်လၢ်အဂ့ၢ်န့ၣ်တက့ၢ်. ဘၣ်ဆၣ် ဖဲသုတဲဆၢတၢ်အခါ သုကဘၣ်ပာ်ဖျါထီၣ် တၢ်သးစူၤ ဒီးတၢ်ပာ်ကဲဒိၣ်မးလီၤ.

၁၆ ပၢၤဃာ်သုသးလၢ အသ့ၣ်ညါဒၣ်တၢ်လၢအဂ့ၤ ဒ်သိးပှၤမ့ၢ်တဲထီဒါသု တမံၤဂ့ၤတမံၤဂ့ၤန့ၣ် အဝဲသ့ၣ် ကဒိးန့ၢ်ဘၣ် တၢ်မဲာ်ဆှးမ့ၢ်လၢ သုအိၣ်ဒီး တၢ်သကဲာ်ပဝးလၢအဂ့ၤ ဒ်ပှၤလၢအပိာ်ခရံာ်အခံအသိး အဃိန့ၣ်လီၤ. ၁၇ မ့ၢ်ဘၣ်ကစၢ်ယွၤအသးလၢ ကပျဲဝဲလၢ သုကတူၢ်တၢ် ခီဖျိလၢ သုမၤတၢ်ဂ့ၤအဃိန့ၣ် ဂ့ၤဒိၣ်န့ၢ်ဒံး သုတူၢ်တၢ် ခီဖျိလၢ သုမၤတၢ်အၢအဃိန့ၣ်လီၤ. ၁၈ ဒ်သိးကဆှၢသုလၢ ကစၢ်ယွၤအအိၣ်အဂီၢ် ခရံာ်လၢအမ့ၢ် ပှၤတီပှၤလိၤတဂၤ တူၢ်သံအသးထဲတဘျီလၢ ပှၤတတီတလိၤတဖၣ် အတၢ်ဒဲးဘးအဂီၢ်လီၤ. အဝဲဘၣ်တၢ်မၤသံအီၤ ဒ်ပှၤဟီၣ်ခိၣ်ဖိတဂၤအသိး* ဘၣ်ဆၣ် ဘၣ်တၢ်မၤသမူထီၣ်အီၤ ဒ်ပှၤနီၢ်သးဖိတဂၤအသိးလီၤ. ၁၉ ဒီးဒ်ပှၤနီၢ်သးဖိတဂၤအသိး အဝဲလဲၤစံၣ်တဲၤတဲလီၤ ပှၤနီၢ်သးဖိတဖၣ်လၢ အအိၣ်လၢဃိာ်ပူၤ, ၂၀ လၢအတဒိကနၣ်တၢ် ဖဲစီၤနိအၤအစိၤလီၤ. ဖဲန့ၣ်အခါ ကစၢ်ယွၤ အိၣ်ခိးဝဲလၢ တၢ်ဝံသးစူၤအပူၤ ဖဲတၢ်တ့ထီၣ်ကဘီအခါလီၤ. ဒီးကဘီန့ၣ်ဆှၢပှၤဃိးဂၤ* လၢထံကျါ ပူၤပူၤဖျဲးဖျဲးန့ၣ်လီၤ.

၂၁ တၢ်မၤအသးတခါအံၤ မ့ၢ်တၢ်အဒိဘၣ်ဃးဒီး တၢ်ဒိးဘျၢထံလၢအမ့ၢ် တၢ်လၢအမၤပူၤဖျဲးသုလၢ ဆၢကတီၢ်ခဲအံၤ ခီဖျိယ့ၣ်ၡူးခရံာ် အတၢ်ဂဲၤဆၢထၢၣ်သမူထီၣ်က့ၤလီၤ. တၢ်ဒိးဘျၢထံန့ၣ် တမ့ၢ်လၢအမၤလီၤမၢ်ကွံာ် နီၢ်ခိအတၢ်ဘၣ်အၢဘၣ်သီဘၣ်, မ့မ့ၢ် အကဲတၢ်ဃ့လၢ ကစၢ်ယွၤအအိၣ်ဒ်သိး သုကဒိးန့ၢ်ဘၣ် သးလၢအသ့ၣ်ညါဒၣ်တၢ် လၢအဂ့ၤလီၤ. ၂၂ အဝဲက့ၤထီၣ်လၢ မူခိၣ်ဒီးအိၣ်ဝဲလၢ ကစၢ်ယွၤ အစုထွဲတခီလီၤ. ဒီးမူခိၣ်ကလူးတဖၣ်, တၢ်ကဲခိၣ်ကဲနၢ်တဖၣ် ဒီးတၢ်စိတၢ်ကမီၤတဖၣ်န့ၣ် ဘၣ်တၢ်ပာ်လီၤအီၤလၢ အဖီလာ်လီၤ.