မးသဲ

၂၆ ဖဲယ့ၣ်ၡူး တဲတၢ်သ့ၣ်တဖၣ်န့ၣ်​ ခဲလၢာ်ဝံၤအလီၢ်ခံ အဝဲတဲဘၣ်​ အပျဲၢ်အဘီၣ်တဖၣ်လၢ ၂ “ဒ်သုသ့ၣ်ညါအသိး ဘူၣ်လဲၤကပာ်ကဘၣ်န့ၣ်​ အိၣ်တ့ၢ်က့ၤထဲ ခံသီလီၤ.+ ဒီးပှၤကညီဖိခွါအံၤ ကဘၣ်​ တၢ်ဟ့ၣ်လီၤကွံာ်အီၤ ဒ်သိး ပှၤကမၤသံအီၤလၢ သ့ၣ်တၢၣ်အလိၤလီၤ.”+

၃ ဒီးပှၤလုၢ်တၢ်ဒိၣ်အခိၣ်တဖၣ်​ ဒီးပှၤဂီၢ်မုၢ် အပှၤသူၣ်က့သးပှၢ်တဖၣ်​ အိၣ်ဖှိၣ်ရိဖှိၣ်ဝဲလၢ ပှၤလုၢ်တၢ်ခိၣ်​ အဒိၣ်ကတၢၢ် စီၤကၤယါဖၤ အကရၢၢ်ပူၤလီၤ.+ ၄ အဝဲသ့ၣ်​ ကူၣ်ထီၣ်ဖးလီၤသကိးဝဲလၢ+ ကသူတၢ်လီတၢ်ဝ့ၤ ဒ်သိး ကဖီၣ်ယ့ၣ်ၡူး ဒီးမၤသံအီၤအဂီၢ်လီၤ. ၅ ဘၣ်ဆၣ်​ အဝဲသ့ၣ်တဲဝဲလၢ “ဒ်သိးပှၤဂီၢ်မုၢ်တဖၣ်​ သုတမၤတၢထီၣ်တၢလီၤတၢ် တဂ့ၤအဂီၢ် ပတဘၣ်မၤဖဲ ဘူၣ်ဘၣ်အဆၢကတီၢ်ဘၣ်.”

၆ ဖဲယ့ၣ်ၡူးအိၣ်လၢ ဘ့ၤသနံသဝီ လၢပှၤဘၣ်တၢ်ဆါအၢ စီၤၡံမိၣ်​ အဟံၣ်အခါ+ ၇ ပိာ်မုၣ်တဂၤဟဲလၢ ယ့ၣ်ၡူးအအိၣ်​ ဒီးစိာ်ဝဲဒီး ပလီလၢၢ်ဝါတဖျၢၣ်​ လၢအအိၣ်ဒီး သိနၢမူ လၢအလုၢ်ဒိၣ်ပှ့ၤဒိၣ်လီၤ. ဒီးဖဲယ့ၣ်ၡူး အီၣ်တၢ်အဆၢကတီၢ် အဝဲလူလီၤသိနၢမူလၢ ယ့ၣ်ၡူးအခိၣ်လိၤလီၤ. ၈ ဖဲအပျဲၢ်အဘီၣ်တဖၣ်​ ထံၣ်ဝဲအခါ အဝဲသ့ၣ်​ သးဒိၣ်ထီၣ်တၢ် ဒီးတဲဝဲလၢ “အမၤလၢာ်ဂီၤတၢ် ဒ်အံၤဘၣ်လဲၣ်. ၉ ပှၤမ့ၢ်ဆါသိအံၤန့ၣ်​ ကန့ၢ်ဘၣ်စ့ဒီဒူၣ်​ ဒီးဟ့ၣ်လီၤဝဲ ပှၤဖှီၣ်ဖိယာ်ဖိသ့လီၤ.” ၁၀ ယ့ၣ်ၡူး ပာ်သူၣ်ပာ်သးဝဲအဃိ တဲဘၣ်အဝဲသ့ၣ်လၢ “သုမၤကီမၤခဲ ပိာ်မုၣ်တဂၤအံၤ ဘၣ်လဲၣ်. အဝဲမၤဂ့ၤတၢ် လၢယဂီၢ်လီၤ. ၁၁ ပှၤဖှီၣ်ဖိယာ်ဖိတဖၣ်​ ကအိၣ်ဒီးသုထီဘိလီၤ.+ မ့မ့ၢ်ယၤန့ၣ်​ တမ့ၢ်လၢ ယကအိၣ်ဒီးသုထီဘိဘၣ်.+ ၁၂ ပိာ်မုၣ်တဂၤအံၤ လူလီၤ သိနၢမူလၢယလိၤ ဒ်သိးကကတဲာ်ကတီၤယနီၢ်ခိလၢ တၢ်ကခူၣ်လီၤယၤအဂီၢ်လီၤ.+ ၁၃ ယကတဲဘၣ်သု တီတီလၢ ဖဲပှၤစံၣ်တဲၤတဲလီၤ တၢ်သးခုကစီၣ်အံၤ လၢတၢ်လီၢ် တပူၤဂ့ၤတပူၤဂ့ၤ လၢဟီၣ်ခိၣ်ဒီဘ့ၣ်အခါ တၢ်လၢပိာ်မုၣ်တဂၤအံၤ မၤဝဲအဂ့ၢ်န့ၣ်​ ပှၤကတဲဖျါထီၣ်ဝဲလၢ တၢ်သ့ၣ်နီၣ်ထီၣ်က့ၤအီၤ အဂီၢ်လီၤ.”+

၁၄ ဝံၤဒီး ပှၤလၢ အဘၣ်တၢ်ကိးအီၤလၢ စီၤယူဒၤအံၣ်စကၤရံၤအိာ်+ လၢအပၣ်ဃုာ်လၢ ပှၤတဆံခံဂၤအကျါန့ၣ်​ လဲၤဝဲလၢ ပှၤလုၢ်တၢ်ဒိၣ်အခိၣ်တဖၣ်+ အအိၣ်​ ၁၅ ဒီးတဲဝဲလၢ “ယမ့ၢ်ဟ့ၣ်လီၤကွံာ်အီၤလၢ သုစုပူၤန့ၣ်​ သုကဟ့ၣ်ယၤ တၢ်မနုၤလဲၣ်.”+ အဝဲသ့ၣ်​ အၢၣ်လီၤအီၤလၢ ကဟ့ၣ်အီၤ စ့ညၣ်အဘ့ၣ်​ ၃၀ လီၤ.+ ၁၆ အဃိ စးထီၣ်ဖဲန့ၣ်​ အဃုဝဲတၢ်ခွဲးတၢ်ယာ်လၢ အကဟ့ၣ်လီၤကွံာ် ယ့ၣ်ၡူးလီၤ.

၁၇ လၢဘူၣ်ကိၣ်​ လၢအတပၣ်ဒီးကိၣ်မံၣ်ဘၣ်​ အဆိကတၢၢ်တသီန့ၣ်+ ယ့ၣ်ၡူးအပျဲၢ်အဘီၣ်တဖၣ်​ ဟဲတဲယ့ၣ်ၡူးလၢ “ဒ်သိး နကအီၣ်​ ဘူၣ်လဲၤကပာ်အဂီၢ် နအဲၣ်ဒိးလၢ ပလဲၤကတဲာ်ကတီၤန့ၢ်နၤတၢ် လၢတၢ်လီၢ်ဖဲလဲၣ်.”+ ၁၈ ယ့ၣ်ၡူးတဲဝဲလၢ “လဲၤနုာ်လီၤလၢဝ့ၢ်ပူၤ ဒီးသုကထံၣ်ပှၤတဂၤ, တဲအီၤလၢ ‘သရၣ်တဲဝဲလၢ “ယကဘၣ်သံ အဆၢကတီၢ်န့ၣ်​ ဘူးထီၣ်လံအဃိ ယကမၤ ဘူၣ်လဲၤကပာ်ဒီး ယပျဲၢ်ယဘီၣ်တဖၣ်​ လၢနဟံၣ်ပူၤလီၤ.”’” ၁၉ အဃိ အပျဲၢ်အဘီၣ်တဖၣ်န့ၣ်​ မၤဝဲဒ် ယ့ၣ်ၡူးမၢအဝဲသ့ၣ်အသိး ဒီးကတဲာ်ကတီၤတၢ်လၢ ဘူၣ်လဲၤကပာ် အဂီၢ်လီၤ.

၂၀ ဖဲဟါလီၤခီ အဆၢကတီၢ်န့ၣ်+ အဝဲဆ့ၣ်နီၤ သန့ၤအသးလၢ စီၢ်နီၤခိၣ်​ ဒီးအပျဲၢ်အဘီၣ်​ ၁၂ ဂၤလီၤ.+ ၂၁ ဖဲအဝဲသ့ၣ်​ အီၣ်တၢ်အခါ ယ့ၣ်ၡူးတဲဝဲလၢ “ယကတဲဘၣ်သုတီတီလၢ ပှၤလၢသုကျါတဂၤန့ၣ်​ ကဟ့ၣ်လီၤကွံာ်ယၤလီၤ.”+ ၂၂ အဃိ အဝဲသ့ၣ်​ သးအုးဒိၣ်မး ဒီးအဝဲသ့ၣ်ကိးဂၤဒဲး သံကွၢ်အီၤလၢ “ကစၢ်ဧၢ, အကဲယၤဧါ.” ၂၃ အဝဲတဲဆၢဝဲလၢ “ပှၤလၢ အဘုးလီၤအစု တဘျီဃီဒီးယၤ လၢလီခီပူၤန့ၣ်​ မ့ၢ်ပှၤလၢ အကဟ့ၣ်လီၤကွံာ် ယၤလီၤ.+ ၂၄ မ့ၢ်လံ, ဒ်တၢ်ကွဲးအသးအသိး ပှၤကညီဖိခွါအံၤ ကသံဝဲလီၤ. ဘၣ်ဆၣ်​ ပှၤလၢ အကဟ့ၣ်လီၤကွံာ် ပှၤကညီဖိခွါတဂၤအံၤန့ၣ်+ ကဘၣ်ကီဘၣ်ခဲလီၤ.+ ဒီးပှၤတဂၤအံၤ မ့ၢ်တအိၣ်ဖျဲၣ်ထီၣ်ဘၣ်န့ၣ်​ ကဂ့ၤဒိၣ်ဝဲလၢ အဂီၢ်လီၤ.”+ ၂၅ စီၤယူဒၤ လၢအကဟ့ၣ်လီၤကွံာ် ယ့ၣ်ၡူးန့ၣ်​ သံကွၢ်ဝဲလၢ “သရၣ်ဧၢ,* အကဲယၤဧါ.” ယ့ၣ်ၡူးတဲအီၤလၢ “ဒ်နတဲအသိးလီၤ.”

၂၆ ဖဲအဝဲသ့ၣ်​ ဆဲးအီၣ်တၢ်အခါ ယ့ၣ်ၡူးဟံးန့ၢ်ကိၣ်, ဃ့တၢ်ဆိၣ်ဂ့ၤ ဒီးဘိးကၢ်ဝဲဝံၤဒီး+ ဟ့ၣ်လီၤဝဲ အပျဲၢ်အဘီၣ်တဖၣ်လီၤ. ဒီးတဲဝဲလၢ “ဟံးန့ၢ်အီၣ်တက့ၢ်. ကိၣ်အံၤ ဒိလီၤဝဲ ယနီၢ်ခိလီၤ.”+ ၂၇ ဒီးအဝဲဟံးန့ၢ်စပံးထံတခွး, စံးဘျုးယွၤဝံၤဒီး ဟ့ၣ်လီၤအဝဲသ့ၣ်​ ဒီးတဲဝဲလၢ “အီကိးဂၤဒဲး တက့ၢ်.+ ၂၈ စပံးထံတခွးအံၤ ဒိလီၤဝဲ ‘ယသွံၣ်လၢ+ အဘၣ်ဃးဒီး တၢ်အၢၣ်လီၤအီလီၤ’+ လၢအကဘၣ်​ တၢ်လူလီၤအီၤဒ်သိး ပှၤအါဂၤ+ အတၢ်ဒဲးဘးကပျၢ်ဝဲ အဂီၢ်လီၤ.+ ၂၉ ဘၣ်ဆၣ်​ ယကတဲဘၣ်သုလၢ ဆူညါန့ၣ်​ လ့ၤတက့ၤ ယတအီ စပံးထံလၢၤဘၣ်​ တုၤလၢ မုၢ်တနံၤဖဲ ယအီစပံးထံအသီဒီးသုလၢ ယပၢ် အဘီမုၢ်အပူၤလီၤ.”+ ၃၀ လၢခံကတၢၢ်န့ၣ်​ အဝဲသ့ၣ်သးဝံၣ်​ စံးထီၣ်ပတြၢၤ ကစၢ်ယွၤ ဝံၤဒီး အဝဲသ့ၣ်​ လဲၤဝဲလၢ ကစၢၢ်သ့ၣ်စၤယံးလီၤ.+

၃၁ ယ့ၣ်ၡူး တဲအဝဲသ့ၣ်လၢ “တနၤအံၤ သုကလီၤဃံၢ်ကိးဂၤဒဲး ခီဖျိတၢ်လၢ ကကဲထီၣ်အသးဒီးယၤ အဃိလီၤ. တၢ်ကွဲးအသးအိၣ်လၢ ‘ယကကျီကွံာ် ပှၤကွၢ်သိ ဒီးသိတဖၣ်န့ၣ်​ ကလီၤပြံလီၤပြါလီၤ.’+ ၃၂ ဘၣ်ဆၣ်​ ဖဲတၢ်မၤဂဲၤဆၢထၢၣ်က့ၤယၤ ဝံၤအလီၢ်ခံ ယကလဲၤဆိလၢသုမဲာ်ညါဆူ ကၤလံၤလါလီၤ.”+ ၃၃ စီၤပ့းတရူး တဲဆၢအီၤလၢ “ပှၤအဂၤခဲလၢာ် မ့ၢ်လီၤဃံၢ် ခီဖျိ တၢ်လၢကကဲထီၣ်​ အသးဒီးနၤ အဃိဘၣ်ဆၣ်​ မ့မ့ၢ်ယၤန့ၣ်​ ယတလီၤဃံၢ် နီတဘျီဘၣ်.”+ ၃၄ ယ့ၣ်ၡူး တဲဘၣ်အီၤလၢ “ယကတဲဘၣ်နၤတီတီလၢ တနၤအံၤ တချုးလၢဆီဖါ အိၣ်အိထီၣ်ဒံးဘၣ်န့ၣ်​ နကသမၢယၤ သၢဘျီလီၤ.”+ ၃၅ စီၤပ့းတရူး တဲဘၣ်အီၤလၢ “ယမ့ၢ်ဘၣ်သံဃုာ်ဒီးနၤ သနာ်က့ လ့ၤတက့ၤ ယတသမၢနၤဘၣ်.”+ ဒီးအပျဲၢ်အဘီၣ်​ အဂၤခဲလၢာ် တဲဝဲဒ်န့ၣ်စ့ၢ်ကီးလီၤ.

၃၆ ဝံၤဒီး ယ့ၣ်ၡူးလဲၤဒီးအဝဲသ့ၣ်​ လၢတၢ်လီၢ်တတီၤ လၢပှၤကိးအီၤလၢ က့ၤသစ့းမနၤ+ ဒီးယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “ဆ့ၣ်နီၤဖဲအံၤ ဒီးယကလဲၤ ဃ့ထုကဖၣ်တၢ် လၢန့ၣ်လီၤ.”+ ၃၇ အဝဲလဲၤကိးဃုာ်ဝဲ စီၤပ့းတရူး ဒီးစီၤစ့းဘ့းဒဲ အဖိခွါခံဂၤလီၤ. ယ့ၣ်ၡူးသးအုးဝဲ ဒီးပှဲၤဝဲဒီး တၢ်သူၣ်ကိၢ်သးဂီၤလီၤ.+ ၃၈ ယ့ၣ်ၡူးတဲဘၣ်​ အဝဲသ့ၣ်လၢ “ယသးအုးဒိၣ်မး တုၤလၢ ယကသံလီၤ. အိၣ်ဖဲအံၤဒီး ဆိးသီ* ဒီးယၤနီၤ.”+ ၃၉ ဒီးအဝဲလဲၤလၢ အမဲာ်ညါတစဲး, ထိၣ်လီၤပှီၤအသးလၢ ဟီၣ်ခိၣ်လိၤ, ဃ့ဘါထုကဖၣ်တၢ်+ ဒီးတဲဝဲလၢ “ပါဧၢ, မ့ၢ်သ့န့ၣ်​ ထုးထီၣ်ကွံာ်ခွးအံၤ*+ လၢယအိၣ်တက့ၢ်. ဘၣ်ဆၣ်​ တဘၣ်မ့ၢ်ဒ် ယတၢ်ဘၣ်သး အသိးဘၣ်. မ်တၢ်ကကဲထီၣ်အသးဒ် နတၢ်ဘၣ်သး အသိးတက့ၢ်.”+

၄၀ အဝဲဟဲက့ၤလၢ အပျဲၢ်အဘီၣ်တဖၣ်အအိၣ်​ ဒီးထံၣ်ဝဲလၢ အဝဲသ့ၣ်​ မံဘၣ်အသးလီၤ. ဒီးအဝဲတဲဘၣ်​ စီၤပ့းတရူးလၢ “သုဆိးသီဒီးယၤ ထဲတနၣ်ရံၣ်မး တကဲဧီၤ.+ ၄၁ ဒ်သိး သုသုတလီၤလၢ တၢ်လ့ပစီအပူၤ တဂ့ၤအဂီၢ်+ ဆိးသီ+ ဒီးဃ့ထုကဖၣ်တၢ် ထီဘိတက့ၢ်.+ သးန့ၣ်ဆူၣ်ဝဲ* ဘၣ်ဆၣ်​ မ့မ့ၢ်နီၢ်ခိန့ၣ်* အဂံၢ်အဘါစၢ်ဝဲလီၤ.”+ ၄၂ အဝဲလဲၤကဒီး ခံဘျီတဘျီ ဒီးဃ့ဘါထုကဖၣ်ဝဲလၢ “ပါဧၢ, ခွးအံၤ လဲၤပူၤကွံာ်ယၤ မ့ၢ်တသ့ဘၣ်​ ဒီးယမ့ၢ်ဘၣ်အီအီၤန့ၣ်​ မ်အကဲထီၣ်ဒ် နတၢ်ဘၣ်သး အသိးတက့ၢ်.”+ ၄၃ ဒီးအဟဲက့ၤကဒီး ဒီးထံၣ်ဝဲလၢ အဝဲသ့ၣ်​ မံဘၣ်အသး, မ့ၢ်လၢ အမဲာ်ဖံးဃၢ အဃိလီၤ. ၄၄ ဒီးယ့ၣ်ၡူးဟးထီၣ်လၢ အဝဲသ့ၣ်အအိၣ်​ ဒီးလဲၤကဒီးဝဲ သၢဘျီတဘျီ ဒီးဃ့ဘါထုကဖၣ်တၢ် ဒ်အလီၢ်လီၢ်လီၤ. ၄၅ ဝံၤဒီး အဝဲဟဲက့ၤလၢ အပျဲၢ်အဘီၣ်တဖၣ်အအိၣ်​ ဒီးတဲဘၣ်​ အဝဲသ့ၣ်လၢ “တၢ်ဆၢကတီၢ် ဒ်အံၤဒၣ်လဲာ် သုမံ ဒီးအိၣ်ဘှံးအိၣ်သါဒံးဧါ. တၢ်ကဟ့ၣ်လီၤကွံာ် ပှၤကညီဖိခွါအံၤလၢ ပှၤတၢ်ဒဲးဘးဖိ အစုပူၤန့ၣ်​ အနၣ်ရံၣ်​ ဘူးထီၣ်လံ. ၄၆ ဂဲၤဆၢထၢၣ်, ပကလဲၤလီၤ. လၢန့ၣ်, ပှၤလၢ ကဟ့ၣ်လီၤကွံာ်ယၤတဂၤန့ၣ်​ ဟဲဘူးထီၣ်လံ.” ၄၇ ဖဲယ့ၣ်ၡူး တဲတၢ်ဒံးအခါ စီၤယူဒၤ လၢအပၣ်ဃုာ်လၢ တၢ်မၢဖိတဆံခံဂၤအကျါန့ၣ်​ ဟဲဝဲဒီး ပှၤဂီၢ်မုၢ်ဖးဒိၣ်​ လၢအအိၣ်ဒီးနး ဒီးနီၣ်တီၢ်တဖၣ်လီၤ. ပှၤတဖၣ်န့ၣ်​ မ့ၢ်ပှၤလၢ ပှၤလုၢ်တၢ်ဒိၣ်အခိၣ်တဖၣ်​ ဒီးပှၤဂီၢ်မုၢ် အပှၤသူၣ်က့သးပှၢ်တဖၣ်​ ဆှၢလီၤဝဲလီၤ.+

၄၈ ဒီးပှၤလၢ အကဟ့ၣ်လီၤကွံာ်အီၤတဂၤန့ၣ်​ ဟ့ၣ်ပာ်စၢၤ ပှၤတဖၣ်န့ၣ်​ တၢ်ပနီၣ်​ ခီဖျိ တဲပာ်စၢၤအဝဲသ့ၣ်လၢ “ပှၤလၢ ယနၢမူအီၤတဂၤန့ၣ်​ မ့ၢ်ပှၤလၢ သုကဘၣ်က့ၤဖီၣ်အီၤလီၤ.” ၄၉ ဒီးစီၤယူဒၤ လဲၤလၢယ့ၣ်ၡူးအအိၣ်​ တဘျီဃီ ဒီးတဲဝဲလၢ “ဟါလၢဂ့ၤသရၣ်” ဒီးနၢမူအီၤ ကဖီလီဖိလီၤ. ၅၀ ဘၣ်ဆၣ်​ ယ့ၣ်ၡူးတဲအီၤလၢ “ခွါဧၢ, နဟဲမၤမနုၤလဲၣ်.”+ ဒီးပှၤသ့ၣ်တဖၣ်န့ၣ်​ ဟဲဖီၣ်န့ၢ်ယ့ၣ်ၡူးလီၤ. ၅၁ ဘၣ်ဆၣ်​ ပှၤတဂၤလၢအအိၣ်ဒီး ယ့ၣ်ၡူးန့ၣ်​ ဟံးန့ၢ်အနးဒီးထုးထီၣ်ဝဲ ဒီးကျီဝဲ ပှၤလုၢ်တၢ်ခိၣ်​ အဒိၣ်ကတၢၢ် အကုၢ်တဂၤ ဒီးအနၢ်ကု ထီၣ်တဲာ်ဝဲတခီလီၤ.+ ၅၂ ဒီးယ့ၣ်ၡူး တဲဘၣ်အီၤလၢ “ဒၢနုာ်လီၤက့ၤ နနးလၢအလီၢ်တက့ၢ်.+ ကယဲၢ်ပှၤလၢ အဟံးထီၣ်နးန့ၣ်​ ကသံလၢနးလီၤ.+ ၅၃ ခဲအံၤ ယမ့ၢ်ဃ့ ယပၢ်လၢ ကဟ့ၣ်လီၤယၤ မူခိၣ်ကလူး အသုးမုၢ်အါန့ၢ်ဒံး ၁၂ ဖုန့ၣ်​ မ့ၢ်သုဆိကမိၣ်​ တန့ၢ်ဘၣ်ဟီဧါ.+ ၅၄ ဘၣ်ဆၣ်​ ယမ့ၢ်မၤဒ်န့ၣ်န့ၣ်​ တၢ်ကွဲးအသးလၢ အတဲဝဲလၢ တၢ်ကဘၣ်မၤအသး ဒ်အံၤန့ၣ်​ ဟဲလၢထီၣ်ပှဲၤထီၣ်ဝဲ ကသ့ဒ်လဲၣ်.” ၅၅ ဖဲနၣ်ရံၣ်အဝဲန့ၣ်​ ယ့ၣ်ၡူးတဲဘၣ်​ ပှၤဂီၢ်မုၢ်တဖၣ်လၢ “သုဟဲဖီၣ်ယၤဒီး နးဒီးနီၣ်တီၢ် ဒ်သုဟဲဖီၣ်​ တၢ်ဟုၣ်တၢ်ဘျၣ်အသိးဧါ. တနံၤဘၣ်တနံၤန့ၣ်​ ယဆ့ၣ်နီၤလၢ တၢ်လုၢ်ဟံၣ်အပူၤ ဒီးယသိၣ်လိတၢ်+ သနာ်က့ သုတဖီၣ်ယၤဘၣ်.+ ၅၆ ဘၣ်ဆၣ်​ တၢ်မၤအသးသ့ၣ်တဖၣ်အံၤ ခဲလၢာ်န့ၣ်​ မၤလၢထီၣ်ပှဲၤထီၣ်ဝဲ ဝံအတၢ်ကွဲးအသးလီၤ.”+ ဒီးအပျဲၢ်အဘီၣ်တဖၣ်​ ပာ်တ့ၢ်အီၤဒီး ဃ့ၢ်ကွံာ်ဝဲလီၤ.+

၅၇ ပှၤလၢအဟဲဖီၣ်​ ယ့ၣ်ၡူးန့ၣ်​ က့ၤကိးအီၤလၢ ပှၤလုၢ်တၢ်ခိၣ်​ အဒိၣ်ကတၢၢ် စီၤကၤယါဖၤ+ အအိၣ်လီၤ. ဒီးပှၤကွဲးလံာ်ဖိ ဒီးပှၤသူၣ်က့သးပှၢ်တဖၣ်​ အိၣ်ဖှိၣ်ဝဲဖဲန့ၣ်လီၤ.+ ၅၈ ဒီးစီၤပ့းတရူး ဆဲးပိာ်ဝဲအခံ တယံၤတဘူးဒီးအီၤ တုၤလီၤလၢ ပှၤလုၢ်တၢ်ခိၣ်​ အဒိၣ်ကတၢၢ် အကရၢၢ်ပူၤလီၤ. အဝဲလဲၤနုာ်လီၤ ဒီးဆ့ၣ်နီၤဃုာ်ဒီး တၢ်အကုၢ်အပှၤတဖၣ်​ ဒ်သိး ကသ့ၣ်ညါဝဲ တၢ်ကမၤအသး ဒ်လဲၣ်လီၤ.+

၅၉ ဒီးပှၤလုၢ်တၢ်ဒိၣ်အခိၣ်တဖၣ်​ ဒီးပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်ဒီတဖု ဃုဝဲတၢ်အုၣ်အသးလၢ အတမ့ၢ်တတီ ဒ်သိး ကမၤသံယ့ၣ်ၡူး အဂီၢ်လီၤ.+ ၆၀ ဒီးပှၤအုၣ်အသးလၢ အကဘျံးကဘျၣ်​ ဟဲဝဲအါဂၤ ဘၣ်ဆၣ်​ ပှၤတဖၣ်န့ၣ်​ တထံၣ်န့ၢ်ဝဲ တၢ်အုၣ်အသးလၢ အကြၢးဝဲဘၣ်ဝဲဘၣ်.+ လၢခံ ပှၤခံဂၤဟဲဃီၤဝဲ ၆၁ ဒီးတဲဝဲလၢ “ပှၤတဂၤအံၤ တဲဝဲလၢ အမၤလီၤပှီၢ်ကွံာ် ယွၤအတၢ်လုၢ်ဟံၣ်​ ဒီးအသူၣ်ထီၣ်က့ၤဝဲလၢ သၢသီအတီၢ်ပူၤ သ့ဝဲလီၤ.”+ ၆၂ ဖဲန့ၣ်​ ပှၤလုၢ်တၢ်ခိၣ်​ အဒိၣ်ကတၢၢ် ဂဲၤဆၢထၢၣ်​ ဒီးတဲယ့ၣ်ၡူးလၢ “ပှၤသ့ၣ်တဖၣ်အံၤ ပာ်ဒ့ၣ်ပာ်ကမၣ်နၤန့ၣ်​ နတတဲဆၢက့ၤတၢ် နီတမံၤဧီၤ.”+ ၆၃ ဘၣ်ဆၣ်​ ယ့ၣ်ၡူး အိၣ်ဘှ့ၣ်လီၤ.+ အဃိ ပှၤလုၢ်တၢ်ခိၣ်​ အဒိၣ်ကတၢၢ် တဲအီၤလၢ “မ့ၢ်နကဲ ကစၢ်ယွၤအဖိခွါ ခရံာ်ဧါန့ၣ်​ ယမၢနတဲဘၣ်ပှၤ ဒီးအၢၣ်လီၤနသးလၢ ကစၢ်ယွၤလၢ အမူဝဲတဂၤ အမဲာ်ညါလီၤ.”+ ၆၄ ယ့ၣ်ၡူး တဲဆၢက့ၤအီၤလၢ “ဒ်နတဲအသိးလီၤ. ဘၣ်ဆၣ်​ ယကတဲဘၣ်သုလၢ စးထီၣ်လၢ ဆၢကတီၢ်ခဲအံၤ ဒီးဆူညါန့ၣ်​ သုကထံၣ်ဘၣ်​ ပှၤကညီဖိခွါအံၤ+ ဆ့ၣ်နီၤလၢ ပှၤလၢ အစိဒိၣ်ကမီၤဒိၣ်တဂၤ အစုထွဲတခီ+ ဒီးဟဲဝဲလၢ မူခိၣ်အတၢ်အၢၣ်တဖၣ်​ အလိၤလီၤ.”+ ၆၅ ဝံၤဒီး ပှၤလုၢ်တၢ်ခိၣ်​ အဒိၣ်ကတၢၢ်န့ၣ်​ ဖှီညာ်အနီၢ်ကစၢ် အကူအသိး ဒီးတဲဝဲလၢ “အဝဲကတိၤထီဒါ ကစၢ်ယွၤလံ. မ့ၢ်ပလိၣ်ဘၣ်​ ပှၤအုၣ်အသး အဂၤတဖၣ်ဒံးဧါ. ကွၢ်မီၤ, အတၢ်ကတိၤ ထီဒါယွၤန့ၣ်​ သုနၢ်ဟူလံ. ၆၆ သုဆိကမိၣ်ဒ်လဲၣ်.” အဝဲသ့ၣ်​ တဲဆၢဝဲလၢ “အဝဲကြၢးသံလီၤ.”+ ၆၇ ဒီးအဝဲသ့ၣ်​ ထူးပှဲာ်ဒိးအမဲာ်+ ဒီးထိအီၤလၢ အစုခိၣ်သၣ်လီၤ.+ မ့မ့ၢ် ပှၤအဂၤတနီၤန့ၣ်​ ဒဲအမဲာ်သၣ်+ ၆၈ ဒီးတဲဝဲလၢ “ခရံာ်ဧၢ, နမ့မ့ၢ်ဝံဒီး မတဂၤ တီၢ်နၤလဲၣ်န့ၣ်​ တဲဘၣ်ပှၤတထံၣ်သၢၤ.”

၆၉ စီၤပ့းတရူး ဆ့ၣ်နီၤလၢတၢ်ချၢ လၢကရၢၢ်ပူၤဒီး ကုၢ်မုၣ်တဂၤ ဟဲလၢအအိၣ်​ ဒီးတဲအီၤလၢ “နၤစ့ၢ်ကီး လၢညါနဟးဒီး ပှၤကၤလံၤလါဖိ ယ့ၣ်ၡူးမၢၤ.”+ ၇၀ ဘၣ်ဆၣ်အဝဲ ဂ့ၢ်လိာ်ဝဲလၢ အဝဲသ့ၣ်​ ခဲလၢာ်အမဲာ်ညါ ဒီးတဲဝဲလၢ “နတဲတၢ်ဂ့ၢ်မနုၤလဲၣ်န့ၣ်​ ယတသ့ၣ်ညါဘၣ်.” ၇၁ ဖဲအဝဲဟးထီၣ်ဒီး လဲၤလၢ ကရၢၢ်အကျဲနုာ်လီၤအခါ ပိာ်မုၣ်လၢအဂၤတဂၤ ထံၣ်အီၤ ဒီးတဲပှၤလၢ အအိၣ်ဖဲန့ၣ်တဖၣ်လၢ “ပှၤတဂၤအံၤ လၢညါအဟးဒီး ပှၤနစၤရ့းဖိ ယ့ၣ်ၡူးလီၤ.”+ ၇၂ ဒီးအဝဲ ဂ့ၢ်လိာ်ကဒီးဝဲ ဒီးအၢၣ်လီၤဝဲလၢ “ယတသ့ၣ်ညါ ပှၤတဂၤန့ၣ်ဘၣ်.” ၇၃ လၢခံ တစိၢ်ဖိဒီး ပှၤလၢ အဆၢထၢၣ်ဖဲန့ၣ်တဖၣ်​ ဟဲတဲ စီၤပ့းတရူးလၢ “နတဲတၢ်အသီၣ်န့ၣ်​ ပာ်ဖျါဝဲလၢ နမ့ၢ်ပှၤလၢ အဝဲသ့ၣ်အကျါတဂၤ အနီၢ်ကီၢ်လီၤ.” ၇၄ ဝံၤဒီး အဝဲဆိၣ်အၢလီၤအသး* ဒီးအၢၣ်လီၤဝဲလၢ “ယတသ့ၣ်ညါ ပှၤတဂၤန့ၣ်ဘၣ်.” ဒီးတဘျီဃီန့ၣ်​ ဆီဖါ အိၣ်အိထီၣ်ဝဲလီၤ. ၇၅ ဒီးစီၤပ့းတရူး သ့ၣ်နီၣ်ထီၣ်က့ၤ တၢ်လၢ ယ့ၣ်ၡူးတဲအီၤလၢ “တချုးလၢ ဆီဖါ အိၣ်အိထီၣ်ဒံးဘၣ်န့ၣ်​ နကသမၢယၤ သၢဘျီလီၤ.”+ ဒီးအဝဲ ဟးထီၣ်လၢတၢ်ချၢ ဒီးဟီၣ်ဝဲ နးမးလီၤ.