မးသဲ

၁၀ အဃိ ယ့ၣ်ၡူးကိးဖှိၣ်ဝဲ အပျဲၢ်အဘီၣ်​ ၁၂ ဂၤ ဆူအအိၣ်​ ဒီးဟ့ၣ်လီၤဝဲ တၢ်စိတၢ်ကမီၤ+ ဒ်သိးအဝဲသ့ၣ်​ နီဟးထီၣ်ကွံာ် တၢ်ဝံတၢ်နါတဖၣ်​ ဒီးမၤဘျါက့ၤ တၢ်ဆူးတၢ်ဆါ အကလုာ်ကလုာ် ကသ့အဂီၢ်လီၤ.

၂ တၢ်မၢဖိ ၁၂ ဂၤန့ၣ်​ အမံၤမ့ၢ်ဝဲ+ စီၤၡံမိၣ်​ လၢဘၣ်တၢ်ကိးအီၤလၢ စီၤပ့းတရူး+ ဒီးအဒီပုၢ်ဝဲၢ်ခွါ စီၤအၣ်ဒရ့း,+ စီၤစ့းဘ့းဒဲအဖိခွါ စီၤယၤကိာ် ဒီးစီၤယိၤဟၣ်,+ ၃ စီၤဖံလံးပူး, စီၤဘၢ်သလီးမဲ,+ စီၤသိၤမါ,+ ပှၤထၢတၢ်ခိတၢ်သွဲဖိ စီၤမးသဲ,+ စီၤအၤလဖဲအဖိခွါ စီၤယၤကိာ်, စီၤသးဒဲ, ၄ ပှၤကနၤနံဖိ စီၤၡံမိၣ်* ဒီးစီၤယူဒၤအံၣ်စကၤရံၤအိာ် လၢအဆါလီၤကွံာ် ယ့ၣ်ၡူးန့ၣ်လီၤ.+

၅ ယ့ၣ်ၡူးမၢလီၤဝဲပှၤ ၁၂ ဂၤအံၤ ဒီးမၤလိာ်အဝဲသ့ၣ်လၢ+ “တဘၣ်လဲၤလၢ ပှၤကလုာ်အဂၤတဖၣ်​ အအိၣ်တဂ့ၤ. ဒီးတဘၣ်​ လဲၤနုာ်လီၤစ့ၢ်ကီးလၢ ၡၤမရံအဝ့ၢ်တဖၣ်​ အပူၤတဂ့ၤ.+ ၆ လၢတၢ်န့ၣ်အလီၢ် ဆဲးလဲၤလၢ ပှၤအံၣ်စရ့လးဖိ လၢအမ့ၢ်သိလၢ အလီၤမၢ်တဖုအအိၣ်တက့ၢ်.+ ၇ ဖဲသုလဲၤ စံၣ်တဲၤတဲလီၤတၢ်အခါန့ၣ်​ တဲလၢ ‘မူခိၣ်အဘီအမုၢ် ဟဲဘူးထီၣ်လံ.’+ ၈ မၤဘျါပှၤဆူးပှၤဆါ,+ မၤသမူထီၣ်ပှၤသံ, မၤကဆှီထီၣ်​ ပှၤလၢအဘၣ်တၢ်ဆါအၢ ဒီးနီဟးထီၣ်​ တၢ်ဝံတၢ်နါတဖၣ်တက့ၢ်. သုန့ၢ်ဘၣ်ကလီတၢ်အဃိ ဟ့ၣ်ကလီတၢ်တက့ၢ်. ၉ တဘၣ်စိာ်ထူမ့ၢ်ဂ့ၤ, စ့ညၣ်မ့ၢ်ဂ့ၤ, တိၢ်ဘီမ့ၢ်ဂ့ၤလၢ နစ့ထၢၣ်​ အပူၤတဂ့ၤ.+ ၁၀ တဘၣ်စိာ်စ့ၢ်ကီး ထၢၣ်လၢတၢ်အီၣ်အဂီၢ်, ဆ့ကၤခံဘ့ၣ်,* ခီၣ်ဖံး မ့တမ့ၢ် နီၣ်ထိးဘိတဂ့ၤ.+ ပှၤလၢအမၤတၢ်န့ၣ်​ ကြၢးဒိးန့ၢ်ဘၣ်​ တၢ်အီၣ်တၢ်အီလီၤ.+

၁၁ “ဖဲသုလဲၤနုာ်လၢ ဝ့ၢ်တဖျၢၣ်ဖျၢၣ်​ အပူၤမ့ၢ်ဂ့ၤ, သဝီတဖျၢၣ်ဖျၢၣ်​ အပူၤမ့ၢ်ဂ့ၤ ဃုကွၢ်ပှၤလၢ အကတူၢ်လိာ်သုဂ့ၤဂ့ၤ ဒီးအိၣ်ဖဲန့ၣ်​ တုၤသုဟးထီၣ်ကွံာ်လၢ တၢ်လီၢ်အဝဲန့ၣ်တက့ၢ်.+ ၁၂ ဖဲသုလဲၤနုာ်လီၤလၢ ဟံၣ်ပူၤအခါ ဆၢဂ့ၤဆၢဝါ* ပှၤအိၣ်လၢ ဟံၣ်ပူၤတဖၣ်တက့ၢ်. ၁၃ အဝဲသ့ၣ်​ မ့ၢ်တူၢ်လိာ်သုန့ၣ်​ အဝဲသ့ၣ်​ ကဒိးန့ၢ်တၢ်ဆိၣ်ဂ့ၤ*+ ဘၣ်ဆၣ်​ မ့ၢ်တတူၢ်လိာ်သုဘၣ်န့ၣ်​ သုတၢ်ဆိၣ်ဂ့ၤ ကအိၣ်ဝဲဒီးသုလီၤ. ၁၄ တၢ်လီၢ်လၢ ပှၤတဂၤဂၤ မ့ၢ်တတူၢ်လိာ်သု မ့တမ့ၢ် တဒိကနၣ်​ သုတၢ်ကတိၤတဖၣ်ဘၣ်န့ၣ်​ ဖဲသုဟးထီၣ်လၢ ဟံၣ်ဝဲန့ၣ်​ မ့တမ့ၢ် လၢဝ့ၢ်တဖျၢၣ်န့ၣ်​ အပူၤအခါ တရုၤလီၤက့ၤ ဟီၣ်ခိၣ်ကမူၣ်လၢ သုခီၣ်လိၤတက့ၢ်.*+ ၁၅ ယကတဲဘၣ်သု တီတီလၢ ဖဲမုၢ်စံၣ်ညီၣ်အနံၤန့ၣ်​ ဝ့ၢ်တဖျၢၣ်အံၤ ကဘၣ်တၢ်စံၣ်ညီၣ်အီၤ နးဒိၣ်န့ၢ်ဒံး ဝ့ၢ်စဒိၣ်ဒီးဂမိရၤလီၤ.+

၁၆ “ကနၣ်လၢအံၤ, ယကမၢလီၤသု ဒ်သိတဖၣ်လၢ ထွံၣ်မံၤအကျါအသိးလီၤ. အဃိ သုကဘၣ်ကူၣ်တၢ်သ့ ဒ်ဂုၢ်အသိး ဒီးလီၤဂာ်ဒ် ထိၣ်လွံၢ်လၢ ပှၤဃုအတၢ်ကမၣ်​ တဘၣ်ဘၣ်အသိးလီၤ.+ ၁၇ မ့ၢ်လၢ ပှၤကဟ့ၣ်လီၤကွံာ်သုလၢ လီၢ်ကဝီၤအရူ+ ဒီးပှၤကတီၢ်သုလၢ+ ဘူၣ်ဘျီၣ်ပူၤအဃိ+ အိၣ်ဒီး တၢ်ပလီၢ်သူၣ်ပလီၢ်သးတက့ၢ်. ၁၈ ဒီးပှၤကလဲၤကိးသုလၢ ပဒိၣ်ပပှၢ်တဖၣ်​ ဒီးစီၤပၤတဖၣ်အမဲာ်ညါ+ လၢယဃိလီၤ. ဖဲန့ၣ်အခါ သုအုၣ်သုသးလၢ အဝဲသ့ၣ်အမဲာ်ညါ ဒီးပှၤကလုာ်တဖၣ်​ အမဲာ်ညါ ကသ့ဝဲလီၤ.+ ၁၉ ဘၣ်ဆၣ်​ ဖဲပှၤဟ့ၣ်လီၤသုလၢ အဝဲသ့ၣ်​ အစုပူၤအခါ သုကဘၣ်တဲတၢ်ဒ်လဲၣ်​ ဒီးကဘၣ်တဲ တၢ်မနုၤလဲၣ်န့ၣ်​ တဘၣ်သူၣ်ကိၢ်သးဂီၤတဂ့ၤ. ဖဲနၣ်ရံၣ်အဝဲန့ၣ်​ သုကဘၣ်တဲ တၢ်မနုၤလဲၣ်န့ၣ်​ သုကသ့ၣ်ညါဘၣ်လီၤ.+ ၂၀ တၢ်လၢ သုကတဲတဖၣ်န့ၣ်​ တမ့ၢ်ထဲသုနီၢ်ကစၢ် အတၢ်ကတိၤဘၣ်. သုပၢ်အိၣ်လၢမူခိၣ်​ အသးစီဆှံ ကမၤစၢၤသုဒ်သိး သုကတဲတၢ်လီၤ.+ ၂၁ တကးဒံးဘၣ်​ ပှၤကဟ့ၣ်လီၤ အဒီပုၢ်ဝဲၢ်ခွါလၢ ကဘၣ်တၢ်မၤသံအီၤအဂီၢ် ဒီးပၢ်စ့ၢ်ကီး ကမၤအဖိ ဒ်န့ၣ်အသိးလီၤ. ဒီးဖိတဖၣ်​ ကထီဒါက့ၤအမိၢ်အပၢ် ဒီးကဟ့ၣ်လီၤကွံာ် အဝဲသ့ၣ်ဒ်သိး ပှၤကမၤသံအီၤ အဂီၢ်လီၤ.+ ၂၂ ဒီးပှၤခဲလၢာ် ကသးဟ့သုလၢ ယမံၤအဃိ+ ဘၣ်ဆၣ်​ ပှၤလၢအတူၢ်တၢ်လၢ တၢ်သးတီအပူၤ တုၤလၢအကတၢၢ်န့ၣ်​ ကတုၤလၢ တၢ်အုၣ်က့ၤခီၣ်က့ၤလီၤ.+ ၂၃ ပှၤမ့ၢ်မၤအၢမၤသီသုလၢ ဝ့ၢ်တဖျၢၣ်အပူၤန့ၣ်​ လဲၤဃ့ၢ်လၢ ဝ့ၢ်အဂၤတဖျၢၣ်တက့ၢ်.+ ယကတဲဘၣ်သုတီတီလၢ တချုးသုစံၣ်တဲၤတဲလီၤတၢ် သကုၤလၢ အံၣ်စရ့လးအဝ့ၢ် ခဲလၢာ်ဒံးဘၣ်န့ၣ်​ ပှၤကညီဖိခွါအံၤ ကဟဲတုၤဝဲလီၤ.

၂၄ “ပျဲၢ်န့ၣ်​ တအိၣ်လၢ အသရၣ်အဖီခိၣ်ဘၣ်​ ဒီးကုၢ်န့ၣ်​ တအိၣ်လၢ အကစၢ်အဖီခိၣ်​ စ့ၢ်ကီးဘၣ်.+ ၂၅ ပျဲၢ်တဂၤမ့ၢ်ကဲထီၣ်​ ဒ်အသရၣ်အသိး ဒီးကုၢ်တဂၤမ့ၢ်ကဲထီၣ်​ ဒ်အကစၢ်အသိးန့ၣ်+ လၢပှဲၤလၢအဂီၢ်လံ. ပှၤမ့ၢ်ကိးဟံၣ်ခိၣ်လၢ ဘၤဧၤလစဘူာ်*+ ဒီးပှၤကကိးစ့ၢ်ကီး အဟံၣ်ဖိဃီဖိတဖၣ်​ ဒ်န့ၣ်သပှၢ်ကတၢၢ် တမ့ၢ်ဧီၤ. ၂၆ အဃိ ပျံၤအဝဲသ့ၣ်တဂ့ၤ. တၢ်လၢအကျၢၢ်ဘၢအသးခဲလၢာ်န့ၣ်​ ကဘၣ်တၢ်မၤဖျါထီၣ်အီၤလီၤ. ဒီးတၢ်ခူသူၣ်ခဲလၢာ်န့ၣ်​ ကဘၣ်​ တၢ်သ့ၣ်ညါထီၣ်အီၤလီၤ.+ ၂၇ တၢ်လၢယတဲသုလၢ တၢ်ခံးကျါန့ၣ်​ တဲအီၤလၢ တၢ်ကပီၤအကျါတက့ၢ်. ဒီးတၢ်လၢ သုနၢ်ဟူကသွံဒံန့ၣ်​ စံၣ်တဲၤတဲလီၤအီၤလၢ ဟံၣ်ခိၣ်ဒုးတက့ၢ်.+ ၂၈ ပှၤလၢ အမၤသံ ပနီၢ်ခိသ့ ဘၣ်ဆၣ်​ မၤဟးဂီၤပသးသမူ* တသ့ဘၣ်န့ၣ်​ တဘၣ်ပျံၤအီၤတဂ့ၤ.+ လၢတၢ်န့ၣ်အလီၢ် ပျံၤပှၤလၢအမၤဟးဂီၤ ပသးသမူ ဒီးပနီၢ်ခိလၢ ကဟဲနၢ်* သ့တဂၤန့ၣ်တက့ၢ်.+ ၂၉ ပှၤဆါကွံာ် ထိၣ်ဖှံးဖိခံဘ့ၣ်လၢ စ့လၢအလုၢ်အပှ့ၤ စှၤတဘ့ၣ်* တမ့ၢ်ဧီၤ. ဘၣ်ဆၣ်​ ထိၣ်ဖှံးဖိတဘ့ၣ်ဒၣ်လဲာ် မ့ၢ်လီၤတဲာ်လၢ ဟီၣ်ခိၣ်လိၤန့ၣ်​ သုပၢ်သ့ၣ်ညါဝဲလီၤ.+ ၃၀ ဒီးသုခိၣ်ဆူၣ်​ အဘိဒၣ်လဲာ် အဝဲဂံၢ်ဝဲခဲလၢာ်လီၤ. ၃၁ အဃိ ဘၣ်ယိၣ်တၢ်တဂ့ၤ, သုလုၢ်သုပှ့ၤဒိၣ်န့ၢ်ဒံး ထိၣ်ဖှံးဖိအါဘ့ၣ်လီၤ.+

၃၂ “ကယဲၢ်ပှၤလၢ အအၢၣ်လီၤတူၢ်လိာ်ယၤလၢ ပှၤဟီၣ်ခိၣ်ဖိ အမဲာ်ညါန့ၣ်+ ယကအၢၣ်လီၤတူၢ်လိာ် စ့ၢ်ကီးအီၤလၢ ယပၢ်အိၣ်လၢ မူခိၣ်အမဲာ်ညါလီၤ.+ ၃၃ ဘၣ်ဆၣ်​ ပှၤလၢ အသမၢယၤလၢ ပှၤဟီၣ်ခိၣ်ဖိ အမဲာ်ညါန့ၣ်​ ယကသမၢ စ့ၢ်ကီးအီၤလၢ ယပၢ်အိၣ်လၢ မူခိၣ်အမဲာ်ညါလီၤ.+ ၃၄ တဘၣ်ဆိကမိၣ်လၢ ယဟဲမၤဃူမၤဖိးတၢ်လၢ ဟီၣ်ခိၣ်ချၢအံၤတဂ့ၤ. ယတဟဲ မၤဃူမၤဖိးတၢ်ဘၣ်. လၢတၢ်န့ၣ်အလီၢ် ယဟဲစိာ်နးတဘ့ၣ်လီၤ.+ ၃၅ ယဟဲဒ်သိး ယကမၤလီၤမုၢ်လီၤဖးတၢ်လီၤ. အဃိ ဖိခွါန့ၣ်ကထီဒါအပၢ်, ဖိမုၣ်န့ၣ်ကထီဒါအမိၢ် ဒီးဒဲၣ်မုၣ်န့ၣ်ကထီဒါ အမံၤပှၢ်ပိာ်မုၣ်လီၤ.+ ၃၆ ဒီးပှၤတဂၤ အဒုၣ်အဒါကမ့ၢ် အဟံၣ်ဖိဃီဖိဒၣ်ဝဲလီၤ. ၃၇ ပှၤလၢ အအဲၣ်အမိၢ်အပၢ် ဒိၣ်န့ၢ်ဒံးအအဲၣ်ယၤန့ၣ်​ တကြၢးဒီးယၤဘၣ်​ ဒီးပှၤလၢ အအဲၣ်အဖိမုၣ်ဖိခွါ ဒိၣ်န့ၢ်ဒံးအအဲၣ်ယၤန့ၣ်​ တကြၢးဒီးယၤစ့ၢ်ကီးဘၣ်.+ ၃၈ ဒီးပှၤလၢ အတယိးထီၣ်​ အတၢ်မၤအၢမၤနး အသ့ၣ်တၢၣ်* ဒီးပိာ်ယခံဘၣ်န့ၣ်​ တကြၢးဒီးယၤဘၣ်.+ ၃၉ ပှၤလၢ အဂုာ်ကျဲးစၢးမၤပူၤဖျဲး အနီၢ်ကစၢ်အသးသမူန့ၣ်​ အသးသမူ ကလီၤမၢ်ကွံာ်ဝဲလီၤ. မ့မ့ၢ် ပှၤလၢ အသးသမူလီၤမၢ်ကွံာ်ဝဲ လၢယဃိန့ၣ်​ ကအိၣ်မူဘၣ်ကဒီး လၢအသီတဘျီလီၤ.+

၄၀ “ပှၤလၢအတူၢ်လိာ်သုန့ၣ်​ မ့ၢ်အတူၢ်လိာ် ယၤစ့ၢ်ကီးလီၤ. ဒီးပှၤလၢ အတူၢ်လိာ်ယၤန့ၣ်​ မ့ၢ်အတူၢ်လိာ်စ့ၢ်ကီး ပှၤလၢ အဆှၢလီၤယၤလီၤ.+ ၄၁ ကယဲၢ်ပှၤလၢ အတူၢ်လိာ်ဝံတဂၤ ခီဖျိလၢ ပှၤတဂၤန့ၣ်​ မ့ၢ်ဝံအဃိန့ၣ်​ ကန့ၢ်ဘၣ်ခိၣ်ဖးတမံၤဃီ ဒ်ဝံန့ၢ်ဘၣ်ဝဲအသိးလီၤ.+ ဒီးကယဲၢ်ပှၤလၢ အတူၢ်လိာ် ပှၤတီပှၤလိၤ ခီဖျိလၢ ပှၤတဂၤန့ၣ်​ မ့ၢ်ပှၤတီပှၤလိၤ အဃိန့ၣ်​ ကန့ၢ်ဘၣ်ခိၣ်ဖးတမံၤဃီ ဒ်ပှၤတီပှၤလိၤ န့ၢ်ဘၣ်ဝဲအသိးလီၤ. ၄၂ ဒီးကယဲၢ်ပှၤလၢ အဒုးအီ ပှၤအဆံးတဖၣ်အံၤ အကျါတဂၤ ထဲဒၣ်​ ထံချံၣ်ချံၣ်တခွး ခီဖျိလၢ ပှၤအဆံးတဂၤအံၤ မ့ၢ်ယပျဲၢ်ယဘီၣ်အဃိန့ၣ်​ ယကတဲဘၣ်သု တီတီလၢ အဝဲသ့ၣ်​ ကဒိးန့ၢ်ဘၣ်ခိၣ်ဖး သပှၢ်ကတၢၢ်လီၤ.”+