၂ ကွဲးနီၣ်တၢ်
၁ စီၤဒၤဝံး အဖိခွါ စီၤၡလိၤမိၤ အဘီမုၢ် ဂၢၢ်ကျၢၤဒိၣ်ထီၣ်မး ဒိၣ်ထီၣ်လီၤ. ဒီးအကစၢ် ယဟိဝၤယွၤ အိၣ်ဒီးအီၤ ဒီးဒုးကဲထီၣ်အီၤလၢ ပှၤဖးဒိၣ်တဂၤလီၤ.+
၂ စီၤၡလိၤမိၤ ကိးဖှိၣ်ဝဲ ပှၤအံၣ်စရ့လးဖိ ခဲလၢာ် လၢအမ့ၢ် ပှၤတကထိအခိၣ်တဖၣ်, ပှၤတကယၤအခိၣ်တဖၣ်, စံၣ်ညီၣ်ကွီၢ်တဖၣ် ဒီးပှၤအံၣ်စရ့လးဖိ အပှၤခိၣ်ပှၤနၢ် ကိးဂၤဒဲးလၢအမ့ၢ် ဒူၣ်ဖိထၢဖိ အခိၣ်အနၢ်တဖၣ်လီၤ. ၃ ဒီးစီၤၡလိၤမိၤ ဒီးတၢ်အိၣ်ဖှိၣ်ဒီတဖု လဲၤဝဲလၢ တၢ်လီၢ်ထီၣ်ထီ ဖဲဝ့ၢ်ကံးဘိၣ်အပူၤ+ မ့ၢ်လၢတၢ်အိၣ်ဖှိၣ်အဒဲ လၢယဟိဝၤယွၤ အခ့အပှၤ စီၤမိၤၡ့ တ့ထီၣ်ဝဲလၢ ပှၢ်မုၢ်ကနၢအပူၤန့ၣ် အိၣ်ဝဲဖဲန့ၣ် အဃိလီၤ. ၄ ဘၣ်ဆၣ် လၢညါန့ၣ် ယွၤလၢအမ့ၢ်အတီ အတလါစီဆှံလၢ အအိၣ်လၢ ဝ့ၢ်ကံးရယးယဧၤရံၣ်န့ၣ်+ စီၤဒၤဝံး ဆှၢထီၣ်ဝဲဆူ တၢ်လီၢ်လၢ အဝဲကတဲာ်ကတီၤပာ်စၢၤဝဲ ဒီးဖဲဒဲလၢ အသူၣ်လီၤဝဲလၢ တလါစီဆှံအဂီၢ် လၢဝ့ၢ်ယရူၤၡလ့ၣ် အပူၤလီၤ.+ ၅ ဒီးတၢ်လုၢ်လီၢ်တိၢ်ဘီလၢ+ စီၤဘစၤလအ့လး+ တ့ထီၣ်ဝဲန့ၣ် ပှၤပာ်လီၤပာ်စၢၤဝဲလၢ ယဟိဝၤယွၤအဒဲစီဆှံ အမဲာ်ညါလီၤ. စီၤဘစၤလအ့လး မ့ၢ်ဝဲ စီၤအူရံၤအဖိခွါ ဒီးစီၤအူရံၤ မ့ၢ်ဝဲ စီၤဃူၢ်အဖိခွါလီၤ. ဒီးစီၤၡလိၤမိၤ ဒီးတၢ်အိၣ်ဖှိၣ် ဒီတဖုန့ၣ် ညီနုၢ်ဃ့ထုကဖၣ်လၢ တၢ်လုၢ်လီၢ်အံၤ အမဲာ်ညါလီၤ. ၆ ဒီးစီၤၡလိၤမိၤ ဟ့ၣ်လုၢ်ထီၣ်တၢ်လၢ ယဟိဝၤယွၤ အမဲာ်ညါဖဲန့ၣ်လီၤ. အဝဲလုၢ်ထီၣ်ဝဲ တၢ်လုၢ်ဒွဲၣ်အူအခါ ၁,၀၀၀ လၢတၢ်အိၣ်ဖှိၣ်အဒဲ အတၢ်လုၢ်လီၢ်တိၢ်ဘီ အဖီခိၣ်န့ၣ်လီၤ.+
၇ တၢ်တနၤန့ၣ် ကစၢ်ယွၤ လီၣ်ဖျါထီၣ်အသးလၢ စီၤၡလိၤမိၤအအိၣ် ဒီးတဲအီၤလၢ “ဃ့ယၤတၢ်လၢ နလီကီတက့ၢ်.”+ ၈ ဖဲန့ၣ် စီၤၡလိၤမိၤ တဲဘၣ် ကစၢ်ယွၤလၢ “နပာ်ဖျါထီၣ် တၢ်အဲၣ်လၢအတီလၢ ယပၢ်စီၤဒၤဝံး+ အဖီခိၣ် ဒီးနဒုးကဲထီၣ်ယၤလၢ စီၤပၤ လၢအလီၢ်လီၤ.+ ၉ အိ ယဟိဝၤယွၤဧၢ, နဒုးကဲထီၣ်ယၤလၢစီၤပၤ လၢပှၤဂီၢ်မုၢ်လၢ အနီၣ်ဂံၢ်အါဝဲ ဒ်ဟီၣ်ခိၣ်အကမူၣ်အသိး အဖီခိၣ်လီၤ.+ အဃိ နတၢ်အၢၣ်လီၤလၢ နအၢၣ်လီၤ ယပၢ်စီၤဒၤဝံးန့ၣ် မ်အလၢထီၣ်ပှဲၤထီၣ်တက့ၢ်.+ ၁၀ နပှၤဂီၢ်မုၢ်လၢ အအိၣ်ဝဲ အါအါဂီၢ်ဂီၢ်န့ၣ် မတဂၤ စံၣ်ညီၣ်န့ၢ်တၢ်လၢ အဝဲသ့ၣ် အဂီၢ် ကသ့တဂၤလဲၣ်. အဃိ ဟ့ၣ်ယၤ တၢ်ကူၣ်သ့ ဒီးတၢ်သ့ၣ်ညါနၢ်ပၢၢ်+ ဒ်သိး ယကတီခိၣ်ရိၤမဲ နပှၤဂီၢ်မုၢ်အံၤ အဂီၢ်တက့ၢ်.”+
၁၁ ကစၢ်ယွၤတဲဘၣ် စီၤၡလိၤမိၤလၢ “နတဃ့ တၢ်ထူးတၢ်တီၤ, တၢ်စုလီၢ်ခီၣ်ခိၣ် ဒီးတၢ်လၤကပီၤဘၣ်. နတဃ့စ့ၢ်ကီးလၢ ပှၤလၢအသးဟ့နၤတဖၣ် ကသံ မ့တမ့ၢ် လၢနသးသမူကထီအဂီၢ်ဘၣ်. ဘၣ်ဆၣ် နသးဆူၣ်လၢ နကဃ့တၢ်ကူၣ်သ့ဒီး တၢ်သ့ၣ်ညါနၢ်ပၢၢ် ဒ်သိးနကစံၣ်ညီၣ်န့ၢ်တၢ်လၢ ယပှၤဂီၢ်မုၢ်လၢ ယပာ်ထီၣ် နၤလၢ စီၤပၤလၢအဝဲသ့ၣ် အဖီခိၣ်လီၤ.+ ၁၂ အဃိ ယကဟ့ၣ်နၤ တၢ်ကူၣ်သ့ ဒီးတၢ်သ့ၣ်ညါနၢ်ပၢၢ်လီၤ. တကးဒံးဘၣ် ယကဟ့ၣ်စ့ၢ်ကီးနၤ တၢ်စုလီၢ်ခီၣ်ခိၣ်, တၢ်ထူးတၢ်တီၤ ဒီးတၢ်လၤကပီၤတဖၣ်လၢ စီၤပၤလၢ အအိၣ်မူလၢ နမဲာ်ညါမ့ၢ်ဂ့ၤ လၢနလီၢ်ခံမ့ၢ်ဂ့ၤ တဒိးန့ၢ်ဘၣ်ဝဲ နီတဂၤဘၣ်န့ၣ်လီၤ.”+
၁၃ ဒီးစီၤၡလိၤမိၤ ဟးထီၣ်ကွံာ်လၢ ကံးဘိၣ် အတၢ်လီၢ်ထီၣ်ထီ+ ဖဲတၢ်အိၣ်ဖှိၣ်အဒဲ အိၣ်ဝဲအလီၢ်လီၤ. ဒီးအဝဲက့ၤလၢ ဝ့ၢ်ယရူၤၡလ့ၣ် ဒီးပၢတၢ်လၢ ပှၤအံၣ်စရ့လးဖိ အဖီခိၣ်လီၤ. ၁၄ စီၤၡလိၤမိၤ အလ့ၣ်ကဟၣ် ဒီးကသ့ၣ်တဖၣ်* အါထီၣ်ဝဲ ကွ့ၢ်ကွ့ၢ်လီၤ. အလ့ၣ်ကဟၣ်အိၣ်ဝဲ အခိၣ် ၁,၄၀၀ ဒီးအကသ့ၣ် အိၣ်ဝဲအဒု ၁၂,၀၀၀+ ဒီးအဝဲပာ်ဝဲလၢ လ့ၣ်ကဟၣ်အဝ့ၢ်တဖၣ်+ ဒီးလၢဝ့ၢ်ယရူၤၡလ့ၣ်အပူၤ ဘူးဒီးစီၤပၤလီၤ.+ ၁၅ လၢဝ့ၢ်ယရူၤၡလ့ၣ် အပူၤန့ၣ် စ့ညၣ် ဒီးထူတဖၣ် အိၣ်ဝဲအါအါဂီၢ်ဂီၢ် ဒ်လၢၢ်တဖၣ်အသိး+ ဒီးသ့ၣ်ဆှိအ့ရ့း အိၣ်ဝဲအါအါဂီၢ်ဂီၢ်ဒ် သိးဝံာ်ဒၢအထူၣ်တဖၣ် လၢၡ့ဖလၣ် အပူၤအသိးလီၤ.+ ၁၆ ဒီးစီၤပၤမၢလီၤ အပှၤပနံာ်တၢ်ကၤတၢ်ဖိတဖၣ် လၢကလဲၤပှ့ၤန့ၢ်အီၤ ကသ့ၣ်အဖုတဖၣ် လၢအပှ့ၤ ဒ်တၢ်ပာ်ပနီၣ်အီၤ အသိးလီၤ.+ အဃိ စီၤၡလိၤမိၤ အကသ့ၣ်တဖၣ်န့ၣ် ဟဲလၢ ကီၢ်အဲၤကူပတူးလီၤ.+ ၁၇ လ့ၣ်ကဟၣ် တခိၣ်စုာ်စုာ်လၢ အဟဲလၢ ကီၢ်အဲၤကူပတူးန့ၣ် အပှ့ၤအိၣ်ဝဲ စ့ညၣ်အဘ့ၣ် ၆၀၀ ဒီးကသ့ၣ်တဒုန့ၣ် အပှ့ၤအိၣ်ဝဲ ၁၅၀ လီၤ. ဒီးအဝဲသ့ၣ် ဆါန့ၢ်ဝဲ* တၢ်သ့ၣ်တဖၣ်အံၤလၢ ပှၤဃ့ၤသးဖိ အစီၤပၤခဲလၢာ် ဒီးစူၤရံ အစီၤပၤတဖၣ် အအိၣ်လီၤ.