ဖံလံးပံၤ
၂ ဟ့ၣ်ဂံၢ်ဟ့ၣ်ဘါလိာ်သး လၢခရံာ်အပူၤ, မၤမုာ်ထီၣ်လိာ်သးလၢ တၢ်အဲၣ်တၢ်ကွံအပူၤ, အိၣ်ဒီးတၢ်ရ့လိာ်သးလၢ နီၢ်သးတခီ, ကဟုကယာ်လိာ်သး ဒီးပာ်ဖျါထီၣ် တၢ်သးကညီၤတက့ၢ်. ၂ သုမ့ၢ်မၤဒ်န့ၣ်န့ၣ် ယတၢ်သးခုကအိၣ် လၢလၢပှဲၤပှဲၤ မ့ၢ်လၢ သုကဆိကမိၣ်တၢ် တမံၤဃီ, သုကအဲၣ်လိာ်ကွံလိာ်သး ဒီးသုကအိၣ်ဃူအိၣ်ဖိး လၢလၢပှဲၤပှဲၤ လၢတၢ်သးတဖျၢၣ်ဃီ အပူၤလီၤ.+ ၃ တဘၣ်မၤတၢ်လၢ တၢ်သးထီၣ်+ မ့တမ့ၢ် တၢ်ဆိကမိၣ်ဒိၣ်လီၤသးအဃိ နီတမံၤတဂ့ၤ.+ လၢတၢ်ဆီၣ်လီၤသးအပူၤ ဆိကမိၣ်လၢ ပှၤဂၤတဖၣ် ဂ့ၤဒိၣ်* န့ၢ်ဒံးသုတက့ၢ်.+ ၄ တဘၣ်ကွၢ်လီၤထဲလၢ သုနီၢ်ကစၢ် အဘျုးတဂ့ၤ.+ ဆိကမိၣ်န့ၢ်တၢ်လၢ ပှၤဂၤအဂီၢ် စ့ၢ်ကီးတက့ၢ်.+
၅ ဆဲးအိၣ်ဒီး တၢ်ပာ်သူၣ်ပာ်သး ဒ်ယ့ၣ်ၡူးခရံာ် အသိးတက့ၢ်.+ ၆ အဝဲအိၣ်ဒီး ကစၢ်ယွၤ အက့ၢ်အဂီၤ*+ ဘၣ်ဆၣ် အတဆိကမိၣ်လၢ အကဟံးန့ၢ် ကစၢ်ယွၤအလီၢ် ဒီးပာ်အသးထဲသိးဒီးအီၤ နီတဘျီဘၣ်.+ ၇ လၢတၢ်န့ၣ်အလီၢ် အဝဲပာ်တ့ၢ်ကွံာ်တၢ်လၢ အအိၣ်ဒီးအီၤခဲလၢာ် ဒီးတူၢ်လိာ်လၢ အကအိၣ်ဒီး ကုၢ်အက့ၢ်အဂီၤ+ ဒီးကဲထီၣ်ပှၤဟီၣ်ခိၣ်ဖိလီၤ.+ ၈ တကးဒံးဘၣ် ဖဲအကဲထီၣ် ပှၤဟီၣ်ခိၣ်ဖိအခါ အဝဲဆီၣ်လီၤအသး ဒီးအအိၣ်ဒီးတၢ်ဒိကနၣ် တုၤလၢ အသံတစုလီၤ.+ မ့ၢ်လံ, အဝဲသံလၢ တၢ်မၤအၢမၤနး အသ့ၣ်တၢၣ်* အလိၤလီၤ.+ ၉ လၢတၢ်န့ၣ်အဃိ ကစၢ်ယွၤ ပာ်ထီၣ်အလီၢ်အလၤ ထီန့ၢ်ဒံးလၢညါလီၤ.+ ဒီးလၢတၢ်သူၣ်ဂ့ၤ သးဝါအပူၤ ကစၢ်ယွၤဟ့ၣ်အီၤ မံၤတဖျၢၣ်လၢ အဒိၣ်န့ၢ်ဒံး ကယဲၢ်မံၤအဂၤ ခဲလၢာ်လီၤ.+ ၁၀ ကစၢ်ယွၤ မၤဝဲဒ်န့ၣ်န့ၣ် ဒ်သိးကယဲၢ် ပှၤအိၣ်လၢမူခိၣ်, ပှၤအိၣ်လၢဟီၣ်ခိၣ် ဒီးပှၤအိၣ်လၢ ဟီၣ်ခိၣ်လာ်ကိးဂၤဒဲး ကမၤလၤကပီၤ* ယ့ၣ်ၡူးအမံၤ အဂီၢ်လီၤ.+ ၁၁ ဒီးကယဲၢ် ပှၤခဲလၢာ် ကတဲဖျါထီၣ်ဝဲပျီပျီလၢ ယ့ၣ်ၡူးခရံာ်မ့ၢ်ကစၢ်လၢ+ ပၢ်ကစၢ်ယွၤ အလၤကပီၤ အဂီၢ်လီၤ.
၁၂ အဃိ ယပှၤသးဘိသ့ၣ်ဧၢ, ဖဲယအိၣ်ဒီးသုအခါ သုဒိကနၣ်တၢ်ထီဘိ ဒီးဖဲယတအိၣ်ဒီးသုဘၣ် အခါဒၣ်လဲာ် သုအိၣ်ဒီးတၢ်ဒိကနၣ် အါန့ၢ်ဒံးအလီၢ်လီၤ. ဒ်န့ၣ်အသိး ဆဲးဂုာ်ကျဲးစၢးဆူၣ်ဆူၣ်လၢ တၢ်ပျံၤတၢ်ဖုး ဒီးတၢ်ကနိးကစုာ်အပူၤ ဒ်သိး သုကန့ၢ်ဘၣ် တၢ်အုၣ်က့ၤခီၣ်က့ၤ အဂီၢ်တက့ၢ်. ၁၃ ဒ်သိးသုကမၤ ကစၢ်ယွၤအတၢ်ဘၣ်သးအဂီၢ်န့ၣ် ကစၢ်ယွၤ မ့ၢ်ပှၤလၢ အမၤဆူၣ်ထီၣ် သုဂံၢ်သုဘါလီၤ. ဒီးအဝဲဟ့ၣ်လီၤသု တၢ်သူၣ်အိၣ်သးအိၣ်တၢ် ဒီးတၢ်ဂံၢ်တၢ်ဘါလၢ သုကမၤတၢ် အဂီၢ်လီၤ. ၁၄ ဖဲသုမၤတၢ် တမံၤဂ့ၤတမံၤဂ့ၤအခါ တဘၣ်ကဒူးကဒ့ၣ်တၢ်+ ဒီးတဲအါလိာ်သးတဂ့ၤ.+ ၁၅ သုမ့ၢ်မၤထွဲဒ်န့ၣ်န့ၣ် သုကကဲထီၣ် ကစၢ်ယွၤအဖိတဖၣ်လၢ+ အသးကဆှီ ဒီးတၢ်ပာ်ဒ့ၣ်ပာ်ကမၣ်သု အလီၢ်တအိၣ်ဘၣ်. ဒီးသုမ့ၢ်တအိၣ်ဒီး တၢ်လီၤတူာ်လီၤကာ်ဘၣ်န့ၣ် သုမ့ၢ်အိၣ်မူလၢ ပှၤတစိၤလၢ အသကဲာ်ပဝးဟးဂီၤ ဒီးအၢသီ+ အကျါ သနာ်က့ သုကဆဲးကပီၤထီၣ် လၢဟီၣ်ခိၣ်ချၢ ဒ်တၢ်ကပီၤဖးဒိၣ် အသိးလီၤ.+ ၁၆ ဒီးသုကဘၣ် ဟံးဃာ်ကစၢ်ယွၤ အကလုၢ်ကထါလၢ အဟ့ၣ်လီၤတၢ်မူန့ၣ် ဃံးဃံးလီၤ.+ သုမ့ၢ်မၤဒ်န့ၣ်န့ၣ် ဖဲခရံာ်အမုၢ်နံၤအတီၢ်ပူၤ ယကသးခု, မ့ၢ်လၢ ယသ့ၣ်ညါလၢ ယတၢ်ဂုာ်ကျဲးစၢး ဒီးယမၤတၢ်ဆူၣ်ဆူၣ်န့ၣ် တကဲထီၣ် တၢ်ကလီကလီဘၣ် အဃိလီၤ. ၁၇ ဒီးယမ့ၢ်ဘၣ်တၢ်လူလီၤယၤ ဒ်စပံးထံလၢ တၢ်လုၢ်တၢ်ပာ်အဂီၢ်+ အသိးဒၣ်လဲာ် မ့ၢ်ဒၣ်ယဆီၣ်ထွဲ သုတၢ်လုၢ်ထီၣ်+ ဒီးသုတၢ်မၤလၢ သုမၤအီၤခီဖျိလၢ သုတၢ်နာ် ထိၣ်ဟူးထိၣ်ဂဲၤထီၣ်သု အဃိလီၤ. လၢတၢ်န့ၣ်အဃိ ယသးခု ဒီးယသူၣ်ဖှံသးညီဃုာ်ဒီး သုခဲလၢာ်လီၤ. ၁၈ ဒ်န့ၣ်အသိး သုစ့ၢ်ကီး သုကြၢးသးခု ဒီးသူၣ်ဖှံသးညီ ဃုာ်ဒီးယၤလီၤ.
၁၉ ယမုၢ်လၢ်လၢ ကစၢ်ယ့ၣ်ၡူးကပျဲလၢ ယကဆှၢလီၤ စီၤတံၤမသ့း+ ဆူသုအိၣ် လၢအဆိအချ့ ဒ်သိး ယကဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ ဖဲယနၢ်ဟူဘၣ် သုကစီၣ်အခါလီၤ. ၂၀ ပှၤအဂၤ လၢအတၢ်ပာ်သူၣ်ပာ်သး ဒ်သိးဒီးအီၤ လၢအကကွၢ်ထွဲ သုတၢ်လိၣ်ဘၣ်တဖၣ်လၢ တၢ်သူၣ်အိၣ်သးအိၣ်နီၢ်ကီၢ် အပူၤန့ၣ် တအိၣ်ဒီးယၤ နီတဂၤဘၣ်. ၂၁ ပှၤအဂၤခဲလၢာ်န့ၣ် ဃုထဲအနီၢ်ကစၢ် အဘျုးအဂီၢ် ဒီးတဃုတၢ်လၢ ယ့ၣ်ၡူးခရံာ်ဘၣ်သးဘၣ်. ၂၂ မ့မ့ၢ် စီၤတံၤမသ့းန့ၣ် သုသ့ၣ်ညါလၢ ဒ်ဖိတဂၤ+ မၤသကိးတၢ်ဒီး အပၢ်အသိး အဝဲမၤသကိးတၢ်ဒီးယၤ ဆူၣ်ဆူၣ် ဒ်သိးတၢ်သးခုကစီၣ် ကဒိၣ်ထီၣ်လဲၢ်ထီၣ် အဂီၢ်လီၤ. အဃိ အဝဲမ့ၢ် ပှၤဒ်လဲၣ်တဂၤလဲၣ်န့ၣ် သုသ့ၣ်ညါဂ့ၤဂ့ၤလီၤ. ၂၃ အဃိ ယမ့ၢ်သ့ၣ်ညါလၢ တၢ်ကကဲထီၣ်အသးဒီးယၤ ဒ်လဲၣ်န့ၣ် အဝဲမ့ၢ်ပှၤတဂၤလၢ ယအဲၣ်ဒိးဆှၢလီၤအီၤ လၢသုအိၣ်လီၤ. ၂၄ နီၢ်ကီၢ်န့ၣ် ယနာ်သပှၢ်တၢၢ်လၢ ကစၢ်ကပျဲစ့ၢ်ကီးယၤလၢ ယကလဲၤလၢ သုအိၣ်လၢ အဆိအချ့လီၤ.+
၂၅ ဘၣ်ဆၣ် ခဲအံၤန့ၣ် ယကဘၣ်ဆှၢက့ၤ စီၤအ့းပၤဖရီးဒံတူး လၢအမ့ၢ် ယဒီပုၢ်ဝဲၢ်ခွါ, ပှၤလၢ အမၤသကိးတၢ်ဒီးယၤ ဒီးခရံာ်အသုးဖိ ဒ်သိးဒီးယၤန့ၣ် လၢသုအိၣ်လီၤ. အဝဲမၤတၢ်ဒ် သုပှၤခၢၣ်စးတဂၤ ဒီးအမၤစၢၤယၤလၢ ယတၢ်လိၣ်ဘၣ်တဖၣ် အဂီၢ်လီၤ.+ ၂၆ ခဲအံၤ အဝဲသးသယုၢ်ဘၣ်သု ကိးဂၤဒဲး ဒီးအသးဟးဂီၤမ့ၢ်လၢ သုနၢ်ဟူလၢ အဆိးက့အဃိလီၤ. ၂၇ မ့ၢ်လီၤ, အဝဲဆိးက့ ဘူးကသံညါ, ဘၣ်ဆၣ် ကစၢ်ယွၤ သးကညီၤအီၤ ဒီးကစၢ်ယွၤသးကညီၤစ့ၢ်ကီးယၤ ဒ်သိးယသု တထံၣ်ဘၣ်အါထီၣ်တၢ်သးအုး တဂ့ၤအဂီၢ်လီၤ. ၂၈ အဃိ ယကဆှၢက့ၤအီၤလၢ အဆိအချ့ ဒ်သိးဖဲသုထံၣ်အီၤအခါ သုကသးခုကဒီးတဘျီ ဒီးယတၢ်သူၣ်ကိၢ်သးဂီၤ ကစှၤလီၤဝဲလီၤ. ၂၉ အဃိ တူၢ်လိာ်အီၤဒ် သုညီနုၢ်တူၢ်လိာ် ပှၤလၢအမ့ၢ်ကစၢ်အပျဲၢ်အဘီၣ်အသိး လၢတၢ်သးခုဖးဒိၣ် အပူၤတက့ၢ်. ဒီးပှၤပိာ်ခွါ ဒ်သိးဒီးအီၤတဖၣ်န့ၣ် ဆဲးပာ်ဖျါထီၣ်လၢ သုပာ်လုၢ်ပာ်ပှ့ၤ အဝဲသ့ၣ်တက့ၢ်.+ ၃၀ လၢခရံာ်အတၢ်မၤအဃိ အဝဲဘူးကသံညါလီၤ. ခီဖျိလၢ သုဟဲမၤစၢၤယၤ တသ့ဘၣ်အဃိ အဝဲမၤစၢၤယၤလၢ သုလီၢ်လီၤ. လၢတၢ်ဂ့ၢ်အံၤအဃိ တၢ်လီၤဘၣ်ယိၣ်လၢ အသးသမူအဂီၢ် အိၣ်ထီၣ်ဝဲလီၤ.+