မၤလကံ
၃ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “ယကမၢလီၤ ယပှၤစိာ်တၢ်ကစီၣ်ဖိတဂၤ ဒ်သိး အဝဲကကတဲာ်ကတီၤန့ၢ် ကျဲလၢယမဲာ်ညါလီၤ.+ ကစၢ် အမ့ၢ်အတီလၢ သုဃုအီၤတဂၤန့ၣ် ကဟဲလၢ အတၢ်လုၢ်ဟံၣ် သတူၢ်ကလာ်လီၤ.+ ဒီးပှၤစိာ်တၢ်ကစီၣ်ဖိလၢ တၢ်အၢၣ်လီၤအီလီၤအဂီၢ် လၢသုဘၣ်သူၣ်ဘၣ်သးအီၤန့ၣ် ကဟဲဝဲ သပှၢ်တၢၢ်လီၤ.
၂ အဝဲကလီၤဂာ် ဒ်သိးဒီး မ့ၣ်အူလၢ ပှၤမၤကဆှီထီၣ်က့ၤထး ဒီးပှၤဆှုၣ်တၢ်ဖိ အဆးပၠၣ်လီၤ.+ အဃိ မုၢ်နံၤဖဲအဟဲန့ၣ် မတဂၤ ကအိၣ်ဂၢၢ်ဆိးကျၢၤလဲၣ်. ဒီးဖဲအဝဲ အိၣ်ဖျါထီၣ်အခါ မတဂၤ ဆၢထၢၣ် ကကဲတဂၤလဲၣ်. ၃ အဝဲကဆ့ၣ်နီၤဒ် ပှၤလၢအမၤကဆှီထီၣ်ထး ဒီးပှၤလၢအပှံၢ်စီ စ့ညၣ်အသိး+ ဒီးအဝဲ ကမၤကဆှီထီၣ် စီၤလ့ၤဝံ အစၢၤအသွဲၣ်တဖၣ်လီၤ. အဝဲကမၤ ကဆှီထီၣ်အဝဲသ့ၣ်ဒ် ထူဒီးစ့ညၣ်အသိး ဒီးအဝဲသ့ၣ် ကကဲထီၣ် ယဟိဝၤယွၤ အပှၤဂီၢ်မုၢ် လၢအဟ့ၣ်လုၢ်ထီၣ်တၢ်လၢ တၢ်တီတၢ်လိၤအပူၤ သပှၢ်တၢၢ်လီၤ. ၄ ဒီးယူဒၤအပှၤဂီၢ်မုၢ် ဒီးဝ့ၢ်ယရူၤၡလ့ၣ် အပှၤဂီၢ်မုၢ် အတၢ်ဟ့ၣ်လုၢ်ထီၣ်န့ၣ် ကဘၣ်ယဟိဝၤယွၤအသး ဒ်လၢညါအသိးလီၤ.+
၅ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “ယကဟဲစံၣ်ညီၣ်သုလီၤ. ပှၤအူတၢ်လိၢ်တၢ်မ့ၢ်ဂ့ၤ,+ ပှၤအဲၣ်ဘၢမါ အဲၣ်ဘၢဝၤမ့ၢ်ဂ့ၤ, ပှၤလၢ အမၤတၢ်အၢၣ်လီၤ ကဘျံးကဘျၣ်မ့ၢ်ဂ့ၤ,+ ပှၤလၢအလံၣ်န့ၢ်လီန့ၢ် ပှၤမၤတၢ်ဖိလၢ အဒိးလဲသးမ့ၢ်ဂ့ၤ,+ ပှၤလၢအလံၣ်န့ၢ်လီန့ၢ် ပှၤမုၣ်ကမဲ ဒီးပှၤဖိၣ်ဃဲတဖၣ်မ့ၢ်ဂ့ၤ,+ ပှၤလၢအတအဲၣ်ဒိးမၤစၢၤ ပှၤထံဂၤကီၢ်ဂၤဖိဘၣ်မ့ၢ်ဂ့ၤ+ ယကပာ် တၢ်ကမၣ်လၢ အဝဲသ့ၣ်အလိၤ တဘျီဃီလီၤ. ပှၤသ့ၣ်တဖၣ်န့ၣ် တပျံၤယၤဘၣ်.”
၆ “ယမ့ၢ် ယဟိဝၤယွၤ ဒီးယတဆီတလဲဘၣ်.+ ဒီးသုမ့ၢ်စီၤယၤကိာ် အစၢၤအသွဲၣ်အဃိ သုတတုၤလၢ တၢ်ဟးဂီၤဒံးဘၣ်. ၇ စးထီၣ်လၢ သုမိၢ်ပၢ်ဖံဖု လၢပျၢၤတဖၣ်အစိၤန့ၣ် သုဃၣ်ကွံာ်သုသးလၢ ယတၢ်ဘျၢတဖၣ် ဒီးသုတမၤထွဲအီၤဘၣ်.+ ဟဲက့ၤကဒါက့ၤလၢ ယအိၣ် ဒီးယကဟဲက့ၤကဒါက့ၤလၢ သုအိၣ်လီၤ.”+ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.
ဘၣ်ဆၣ်သုတဲလၢ “ဘၣ်မနုၤအဃိ ပကဘၣ် ဟဲက့ၤကဒါက့ၤလဲၣ်.”
၈ “ပှၤဟီၣ်ခိၣ်ဖိ ဟုၣ်ကစၢ်ယွၤအတၢ်ကသ့ဧါ. ဘၣ်ဆၣ် သုဟုၣ် ယတၢ်လီၤ.”
ဒီးသုတဲလၢ “ပဟုၣ် နတၢ်ဒ်လဲၣ်.”
“ခီဖျိသုတဟဲစိာ် တၢ်ဆံဆဲၣ်ပူတပူ ဒီးတၢ်မၤဘူၣ်တဖၣ်ဘၣ်အဃိ သုဟုၣ် ယတၢ်လီၤ. ၉ သုဝဲဒီတကလုာ် ဟုၣ်ယတၢ်အဃိ သုဘၣ်ဆိၣ်အၢ* သပှၢ်တၢၢ်လီၤ. ၁၀ ဒ်သိး တၢ်အီၣ်ကအိၣ်လၢ ယဟံၣ်ပူၤအဂီၢ်န့ၣ်+ ဟဲစိာ် တၢ်ဆံဆဲၣ်ပူတပူခဲလၢာ် လၢတၢ်လုၢ်ဟံၣ်ပူၤတက့ၢ်.*+ ဘၣ်ဃးဒီး တၢ်ဂ့ၢ်တခါအံၤန့ၣ် ဝံသးစူၤ မၤကွၢ်ယၤသၢၤ. ဒီးသုကထံၣ်ဘၣ်လၢ ယကအိးထီၣ် မူခိၣ်အတြဲၤတဖၣ်+ ဒီးလူလီၤန့ၢ်သု* တၢ်ဆိၣ်ဂ့ၤ တုၤလၢ သုတလိၣ်ဘၣ် တၢ်နီတမံၤလၢၤဘၣ်လီၤ.”+ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.
၁၁ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “ယကသိၣ်ဃီၣ်န့ၢ်သု ဒွဲၣ်တဖၣ်* ဒီးအတမၤဟးဂီၤ သုဟီၣ်ခိၣ် အတၤသူတၤသၣ်တဖၣ်ဘၣ်. ဒီးစပံးမုၢ်တဖၣ်လၢ သုပျီပူၤန့ၣ် အတမၤဟးဂီၤဝဲဘၣ်.”+
၁၂ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “သုကီၢ်န့ၣ် ကကဲထီၣ်ကီၢ်လၢ အလီၤဘၣ်သူၣ်ဘၣ်သးအဃိ ပှၤကလုာ်ခဲလၢာ် ကကိးသုလၢ ပှၤသးခုလီၤ.”+
၁၃ ယဟိဝၤယွၤ တဲဝဲလၢ “သုတၢ်ကတိၤလၢ သုတဲကမၣ်ယၤန့ၣ် ဆူၣ်မး.”
ဒီးသုတဲလၢ “ပတဲကမၣ်နၤ ဒ်လဲၣ်.”+
၁၄ “သုတဲလၢ ‘ပမၤကစၢ်ယွၤ အတၢ်မၤသနာ်က့ အဘျုးတအိၣ်ဘၣ်.+ ပမၤလၢပှဲၤ ပမူဒါ ဒ်အမၤလိာ်ပှၤအသိး ဒီးပပာ်ဖျါထီၣ်န့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤလၢ ပသးအုး ခီဖျိလၢ ပတၢ်ဒဲးဘးအဃိ သနာ်က့ အကဲဘျုးလၢ ပဂီၢ်ဒ်လဲၣ်. ၁၅ စးထီၣ် ခဲအံၤ ပကတဲလၢ ပှၤလၢ အပာ်ထီၣ်ထီသးတဖၣ်န့ၣ် မ့ၢ်ပှၤလၢ အသးခု ဒီးပကတဲလၢ ပှၤလၢအမၤ တၢ်အၢတၢ်သီတဖၣ်န့ၣ် မ့ၢ်ပှၤလၢ အမၤတၢ် ကဲထီၣ်လိၣ်ထီၣ်လီၤ.+ အဝဲသ့ၣ် မၤကွၢ် ကစၢ်ယွၤ ဘူၣ်ဒိၣ်မး ဒီးအဝဲသ့ၣ် တဘၣ်တၢ်ကမၣ် နီတမံၤဘၣ်.’”
၁၆ ဖဲန့ၣ်အဆၢကတီၢ် ပှၤလၢအပျံၤ ယဟိဝၤယွၤန့ၣ် တဲသကိးတၢ် တဂၤဒီးတဂၤ ဒီးယဟိဝၤယွၤ ဆဲးဒိကနၣ် အဝဲသ့ၣ် ဒီးသးစၢၢ်ဆၢ အဝဲသ့ၣ်လီၤ. ဒီးလံာ်တၢ်သ့ၣ်နီၣ်ထီၣ်က့ၤန့ၣ် ဘၣ်တၢ်ကွဲးလီၤအီၤလၢ+ ယဟိဝၤယွၤ အမဲာ်ညါလၢ ပှၤလၢ အပျံၤအီၤ ဒီးပှၤလၢအဆိကမိၣ်ထံ* အမံၤအဂီၢ်လီၤ.+
၁၇ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “မုၢ်နံၤဖဲ ယဒုးကဲထီၣ်အဝဲသ့ၣ်လၢ ပှၤလုၢ်ဒိၣ်ပှ့ၤဒိၣ်တဒူၣ် လၢယဂီၢ်န့ၣ်+ အဝဲသ့ၣ်ကကဲ ယတၢ်လီၤ.+ ယကပာ်ဖျါထီၣ် တၢ်သးကညီၤ လၢအဝဲသ့ၣ် အဖီခိၣ် ဒ်ပှၤတဂၤ ပာ်ဖျါထီၣ် တၢ်သးကညီၤလၢ အဖိခွါလၢ အမၤအတၢ်န့ၣ် အဖီခိၣ်လီၤ.+ ၁၈ ဒီးသုကထံၣ်ဘၣ်ကဒီးလၢ ပှၤတီပှၤလိၤ ဒီးပှၤအၢပှၤသီန့ၣ်+ လီၤဆီလိာ်သးဒ်လဲၣ် ဒီးပှၤလၢအမၤ ကစၢ်ယွၤအတၢ် ဒီးပှၤလၢအတမၤ ကစၢ်ယွၤအတၢ်ဘၣ်န့ၣ် လီၤဆီလိာ်သးဒ်လဲၣ်န့ၣ်လီၤ.”