ပမ့ၢ်ယဟိဝၤယွၤအတၢ်

၁. ဘၣ်မနုၤအဃိ ပတဲသ့လၢ တၢ်ခဲလၢာ်န့ၣ်​ မ့ၢ်ယဟိဝၤယွၤအတၢ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)

တၢ်ခဲလၢာ်န့ၣ်​ မ့ၢ်ဝဲယဟိဝၤယွၤအတၢ်လီၤ. ကယဲၢ် “မူခိၣ်ဒီးမူခိၣ်အမူခိၣ်​ . . . ဟီၣ်ခိၣ်ဒီးကယဲၢ်တၢ်အိၣ်လၢအချၢ” န့ၣ်​ မ့ၢ်ယွၤအတၢ်ခဲလၢာ်လီၤ. (၅ မိၤၡ့ ၁၀:၁၄; လီၣ်ဖျါ ၄:၁၁) ခီဖျိလၢ ယဟိဝၤယွၤတ့လီၤပှၤအဃိ ပဝဲခဲလၢာ်ပမ့ၢ်အတၢ်လီၤ. (စံးထီၣ်ပတြၢၤ ၁၀၀:၃) ဘၣ်ဆၣ်​ လၢပှၤဟီၣ်ခိၣ်ဖိခဲလၢာ်အကျါ ယဟိဝၤယွၤဃုထၢထီၣ်ဝဲ ပှၤလီၤဆီတဖုလၢ ကကဲထီၣ်အတၢ်လီၤ.

၂. ဒ်လံာ်စီဆှံပာ်ဖျါထီၣ်ဝဲအသိး မတၤတဖၣ်​ မ့ၢ်ယဟိဝၤယွၤအပှၤဂီၢ်မုၢ်လၢ အလီၤဆီလဲၣ်.

^၂ အဒိ စံးထီၣ်ပတြၢၤ ၁၃၅ ပာ်ဖျါထီၣ်ဝဲလၢ ပှၤအံၣ်စရ့လးဖိလၢပျၢၤလၢ အသးတီဒီးယဟိဝၤယွၤန့ၣ်​ ဘၣ်တၢ်ကိးအီၤလၢ ကစၢ်ယွၤ “အတၢ်လုၢ်ဒိၣ်ပှ့ၤဒိၣ်” လီၤ. (စံးထီၣ်ပတြၢၤ ၁၃၅:၄) တကးဒံးဘၣ်​ ဝံဟိၤၡ့တဲဆိပာ်ဝဲလၢ ပှၤတနီၤလၢအတမ့ၢ် ပှၤအံၣ်စရ့လးဖိန့ၣ်​ အဝဲသ့ၣ်ကကဲထီၣ်​ ယဟိဝၤယွၤအပှၤဂီၢ်မုၢ်လီၤ. (ဟိၤၡ့ ၂:၂၃) ဝံအတၢ်ကတိၤအံၤ ဟဲလၢထီၣ်ပှဲၤထီၣ်ဝဲဖဲ ယဟိဝၤယွၤဃုထၢထီၣ်ဝဲ ပှၤလၢအတမ့ၢ် ပှၤအံၣ်စရ့လးဖိတဖၣ်​ လၢကပၢဃုာ်တၢ်ဒီး ခရံာ်လၢမူခိၣ်အခါန့ၣ်လီၤ. (မၤတၢ် ၁၀:၄၅; ရိမ့ၤ ၉:၂၃-၂၆) ပှၤလၢဘၣ်တၢ်ဒိးဖှူအီၤလၢ သးစီဆှံန့ၣ်​ ဘၣ်တၢ်ကိးအီၤလၢ “ပှၤစီဆှံတကလုာ်” ဒီးအဝဲသ့ၣ်မ့ၢ် ယဟိဝၤယွၤအ “ပှၤဂီၢ်မုၢ်လၢတၢ်ပှ့ၤက့ၤ” အီၤလီၤ. (၁ ပ့းတရူး ၂:၉, ၁၀) ဘၣ်ဆၣ်မ့မ့ၢ် ခရံာ်ဖိလၢအသးတီ ဒီးအိၣ်ဒီးတၢ်မုၢ်လၢ်လၢ ကအိၣ်မူဘၣ်လီၤထူလီၤယိာ်လၢ ဟီၣ်ခိၣ်တဖၣ်န့ၣ်​ ဘၣ်တၢ်ကိးအီၤဒ်လဲၣ်. ယဟိဝၤယွၤ ကိးစ့ၢ်ကီးအဝဲသ့ၣ်လၢ “ယပှၤဂီၢ်မုၢ်” ဒီး “ယပှၤဃုထၢဖိ” လီၤ.—ယၡါယၤ ၆၅:၂၂.

၃. (က) မုၢ်မဆါတနံၤအံၤ မတၤတဖၣ်​ ဒိးန့ၢ်ဘၣ်တၢ်ခွဲးတၢ်ယာ်လၢ ကရ့လိာ်အသးဒီး ယဟိဝၤယွၤလဲၣ်. (ခ) ပကတဲသကိး တၢ်ဂ့ၢ်မနုၤတဖၣ်လဲၣ်.

^၃ မုၢ်မဆါတနံၤအံၤ “သိလၢအစှၤတဖု” လၢကအိၣ်မူဘၣ်လၢ မူခိၣ်လီၤထူလီၤယိာ် ဒီး “သိလၢအဂုၤအဂၤ” လၢကအိၣ်မူဘၣ်လၢ ဟီၣ်ခိၣ်လီၤထူလီၤယိာ်န့ၣ်​ အဝဲသ့ၣ်ဘူၣ်ထီၣ်ဘါထီၣ်​ ယဟိဝၤယွၤ ဒ်သိးသိး “ဒ်သိတဖုဃီ” အသိးလီၤ. (လူၤကၣ်​ ၁၂:၃၂; ယိၤဟၣ်​ ၁၀:၁၆) ခီဖျိလၢ ပဒိးန့ၢ်ဘၣ်တၢ်ခွဲးတၢ်ယာ်လၢ ပကရ့လိာ်သးဒီးယဟိဝၤယွၤ ဒ်အံၤအဃိ ပစံးဘျုးဘၣ်အီၤဒိၣ်မးလီၤ. လၢတၢ်မၤလိအံၤအပူၤ ပကမၤလိဘၣ်လၢ ယဟိဝၤယွၤ ဟ့ၣ်ပှၤတၢ်ခွဲးတၢ်ယာ်ဒ်အံၤအဃိ ပပာ်ဖျါထီၣ်လၢ ပစံးဘျုးစံးဖှိၣ်အီၤကသ့လၢ ကျဲဒ်လဲၣ်န့ၣ်လီၤ.

ပဟ့ၣ်လုၢ်ထီၣ်ပသးဆူ ယဟိဝၤယွၤအအိၣ်

၄. ပဒိးန့ၢ်ဘၣ်​ တၢ်ခွဲးတၢ်ယာ်လၢ ပရ့ဘၣ်ဒီးယဟိဝၤယွၤအဃိ ပပာ်ဖျါထီၣ်လၢ ပစံးဘျုးစံးဖှိၣ်အီၤကသ့ဒ်လဲၣ်. ဒီးယ့ၣ်ၡူးစ့ၢ်ကီး ပာ်ဖျါထီၣ်ဝဲဒ်လဲၣ်.

^၄ ဖဲပဟ့ၣ်လုၢ်ထီၣ်ပသးလၢ ယဟိဝၤယွၤအအိၣ်​ ဒီးဒိးဘျၢထံအခါ မ့ၢ်ဒၣ်ပပာ်ဖျါထီၣ်လၢ ပစံးဘျုးစံးဖှိၣ်အီၤလီၤ. ဖဲန့ၣ်အခါ မ့ၢ်ဒၣ်ပပာ်ဖျါထီၣ်လၢ ပမ့ၢ်ယဟိဝၤယွၤအတၢ် ဒီးပသးအိၣ်ဒိကနၣ်​ အကလုၢ်လီၤ. (ဧ့ၤဘြံၤ ၁၂:၉) ဖဲယ့ၣ်ၡူးဒိးဘျၢထံအခါ အဝဲပာ်ဖျါထီၣ်ဝဲ ဒ်န့ၣ်အသိးစ့ၢ်ကီးလီၤ. ယ့ၣ်ၡူးမ့ၢ်ကလုာ်ဒူၣ်လၢ အဟ့ၣ်လုၢ်ထီၣ်သးလၢ ယဟိဝၤယွၤအအိၣ်ဝံၤလံ သနာ်က့ အဝဲဟ့ၣ်လုၢ်ထီၣ်ဒံးအသး ဒ်သိးကမၤယဟိဝၤယွၤ အတၢ်ဘၣ်သးအဂီၢ်လီၤ. ဖဲအဝဲမၤဝဲဒ်န့ၣ်အခါ လီၤဂာ်ဒ်အဝဲတဲဝဲလၢ “ဘၣ်ယသးလၢ ယကမၤဖဲဒၣ်နသးလီၤ, ယကစၢ်ဧၢ.”—စံးထီၣ်ပတြၢၤ ၄၀:၇, ၈.

၅, ၆. (က) ဖဲယ့ၣ်ၡူး ဒိးဘျၢထံဝံၤအခါ ယဟိဝၤယွၤ တဲဝဲဒ်လဲၣ်. (ခ) ယဟိဝၤယွၤ ပာ်လုၢ်ပာ်ပှ့ၤ ပတၢ်ဟ့ၣ်လုၢ်ထီၣ်သးန့ၣ်​ ပသ့ၣ်ညါအီၤသ့ဒ်လဲၣ်​ ဟ့ၣ်တၢ်အဒိတက့ၢ်.

^၅ ဖဲယ့ၣ်ၡူးဒိးဘျၢထံအခါ ယဟိဝၤယွၤတူၢ်ဘၣ်ဝဲဒ်လဲၣ်. လံာ်စီဆှံတဲဝဲလၢ “ယ့ၣ်ၡူးဒိးဘျၢအသးဝံၤဒီး, လဲၤထီၣ်တကီၢ်ခါလၢ ထံကျါ, ဒီးကွၢ်ကွၢ်, မူခိၣ်အိးထီၣ်​ အသးလၢအဂီၢ်, ဒီးထံၣ်ယွၤအသးယုၢ်လီၤဒ် ထိၣ်လွံၢ်အသိး, ဒီးဟဲလီၤလၢအလိၤန့ၣ်လီၤ. ဒီးကွၢ်ကွၢ်, တၢ်ကလုၢ်သီၣ်လီၤလၢမူခိၣ်​ ဒီးစံးဝဲဒၣ်, အဝဲတဂၤအံၤ မ့ၢ်ယဖိခွါလၢယအဲၣ်, ဒီးဘၣ်ယသးလၢအီၤလီၤ.” (မးသဲ ၃:၁၆, ၁၇) ယ့ၣ်ၡူးမ့ၢ်ကစၢ်ယွၤအတၢ် ဘၣ်ဆၣ်​ ဖဲယဟိဝၤယွၤထံၣ်ဝဲလၢအဖိခွါ သးအိၣ်ဟ့ၣ်လီၤအသးသမူလၢ ကမၤအတၢ်မၤအဃိ အဝဲကသးခုဒိၣ်မးလီၤ. ဒ်န့ၣ်အသိး ဖဲပဟ့ၣ်လုၢ်ထီၣ်သးလၢ ယဟိဝၤယွၤအအိၣ်အခါ အဝဲသးခု ဒီးကဆိၣ်ဂ့ၤပှၤလီၤ.—စံးထီၣ်ပတြၢၤ ၁၄၉:၄.

^၆ ယဟိဝၤယွၤန့ၣ်​ တၢ်အိၣ်ဒီးအီၤခဲလၢာ်အဃိ ပကဘၣ်ဟ့ၣ်အီၤ တၢ်မနုၤဒံးလဲၣ်. ဆိကမိၣ်ကွၢ် ပၢ်တဂၤသူၣ်လီၤဝဲဖီလၢ အဟံၣ်အကရၢၢ်ပူၤလီၤ. ဒီးဘၣ်တနံၤ အဖိမုၣ်ဖိတဂၤ ဒဲးန့ၢ်ဝဲဖီတဖီးဒီး ဟ့ၣ်လီၤအီၤလီၤ. ဖီအံၤမ့ၢ်အပၢ်အတၢ် ဘၣ်ဆၣ်​ ပၢ်လၢအိၣ်ဒီး တၢ်အဲၣ်တၢ်ကွံတဂၤအံၤ ဖဲအဒိးန့ၢ်ဘၣ်တၢ်ဟ့ၣ်အံၤအခါ ကသးခုဝဲဒိၣ်မးလီၤ. တၢ်ဟ့ၣ်အံၤပာ်ဖျါထီၣ်ဝဲလၢ အဖိမုၣ်ဖိအဲၣ်အီၤအဃိ ဖီအံၤအလုၢ်အပှ့ၤဒိၣ်န့ၢ်ဒံး ဖီအဂၤလၢအိၣ်လၢ အကရၢၢ်ပူၤန့ၣ်လီၤ. ဒ်န့ၣ်အသိး ဖဲပသးအိၣ်​ ဟ့ၣ်လုၢ်ထီၣ်ပသးလၢ ယဟိဝၤယွၤအိၣ်အခါ အဝဲကသးခုဒိၣ်မးလီၤ.—၂ မိၤၡ့ ၃၄:၁၄.

၇. ယဟိဝၤယွၤ ပာ်လုၢ်ပာ်ပှ့ၤ အခ့အပှၤတဖၣ်န့ၣ်​ ဝံမၤလကံ ပာ်ဖျါထီၣ်ဝဲဒ်လဲၣ်.

^၇ ဖး မၤလကံ ၃:၁၆ တက့ၢ်. ဘၣ်မနုၤအဃိ အရ့ဒိၣ်လၢ ပကဘၣ်ဟ့ၣ်လုၢ်ထီၣ်ပသးလၢ ယဟိဝၤယွၤအအိၣ်​ ဒီးဒိးဘျၢထံလဲၣ်. စးထီၣ်ဖဲပကဲထီၣ်ပှၤကညီအခါ ပမ့ၢ်ယဟိဝၤယွၤအတၢ်လံ. ဘၣ်ဆၣ်​ ဆိကမိၣ်ကွၢ် ဖဲပတူၢ်လိာ်အီၤလၢ ပတၢ်ပၢကစၢ် ဒီးပဟ့ၣ်လုၢ်ထီၣ်သးလၢအအိၣ်အခါ ယဟိဝၤယွၤ ကသးခုထဲလဲၣ်န့ၣ်တက့ၢ်. (ကတိၤဒိ ၂၃:၁၅) ယဟိဝၤယွၤ သ့ၣ်ညါပှၤလၢအဲၣ်ဒိးမၤ အတၢ်မၤတဖၣ်​ ဒီးအဝဲကွဲးလီၤဝဲ ပှၤတဖၣ်အံၤအမံၤလၢ “လံာ်သ့ၣ်နီၣ်ထီၣ်က့ၤ” အပူၤန့ၣ်လီၤ.

၈, ၉. ပှၤလၢအမံၤ ဘၣ်တၢ်ကွဲးလီၤအီၤလၢ ယဟိဝၤယွၤအ “လံာ်သ့ၣ်နီၣ်ထီၣ်က့ၤ” အပူၤန့ၣ်​ ယဟိဝၤယွၤဃ့အဝဲသ့ၣ်​ တၢ်မနုၤလဲၣ်.

^၈ ပမ့ၢ်အဲၣ်ဒိးလၢ ပမံၤကအိၣ်လၢ ယဟိဝၤယွၤအ “လံာ်သ့ၣ်နီၣ်ထီၣ်က့ၤ” အပူၤန့ၣ်​ တၢ်လၢပဘၣ်မၤအိၣ်ဝဲလီၤ. ဝံမၤလကံတဲဝဲလၢ ပကဘၣ်ပျံၤယဟိဝၤယွၤ ဒီးဆိကမိၣ်ထံ အမံၤအဂ့ၢ်အကျိၤလီၤ. ပမ့ၢ်ဘူၣ်ထီၣ်ဘါထီၣ်​ ပှၤတဂၤဂၤ မ့တမ့ၢ် တၢ်တမံၤမံၤန့ၣ်​ ပမံၤကဘၣ်​ တၢ်ထုးထီၣ်ကွံာ်အီၤလၢ ယဟိဝၤယွၤအလံာ်ပူၤလီၤ.—၂ မိၤၡ့ ၃၂:၃၃; စံးထီၣ်ပတြၢၤ ၆၉:၂၈.

^၉ ထဲလၢပအၢၣ်လီၤ ယဟိဝၤယွၤလၢ ပကမၤအတၢ်ဘၣ်သး ဒီးဒိးဘျၢထံန့ၣ်​ တဝံၤဒံးဘၣ်. တၢ်အၢၣ်လီၤတဖၣ်အံၤ ပဘၣ်မၤအီၤထဲတဘျီလီၤ. ဘၣ်ဆၣ်​ တၢ်ဘူၣ်ထီၣ်ဘါထီၣ်​ ယဟိဝၤယွၤန့ၣ်​ ပကဘၣ်မၤအီၤလၢ ပတၢ်အိၣ်မူတစိၤသးလီၤ. ပဒိကနၣ်​ ယဟိဝၤယွၤအကလုၢ် လၢပတၢ်အိၣ်မူကိးနံၤဒဲးအပူၤန့ၣ်​ ပကဘၣ်ပာ်ဖျါထီၣ်အီၤ ခီဖျိပတၢ်မၤလီၤ.—၁ ပ့းတရူး ၄:၁, ၂.

ပဂ့ၢ်လိာ်ကွံာ် ဟီၣ်ခိၣ်အတၢ်သူၣ်လီသးကွံ

၁၀. ပှၤလၢအဘူၣ်ထီၣ်ဘါထီၣ်​ ယဟိဝၤယွၤ ဒီးပှၤလၢအတဘူၣ်ထီၣ်ဘါထီၣ်​ ယဟိဝၤယွၤန့ၣ်​ ကဘၣ်လီၤဆီဒ်လဲၣ်.

^၁၀ တၢ်မၤလိလၢ အပူၤကွံာ်တခါန့ၣ်​ ပမၤလိဘၣ်လၢ စီၤကၤယံၣ်, စီၤၡလိၤမိၤ ဒီးပှၤအံၣ်စရ့လးဖိတဖၣ်​ တဲဝဲလၢအဘူၣ်ထီၣ်ဘါထီၣ်​ ယဟိဝၤယွၤ ဘၣ်ဆၣ်​ အဝဲသ့ၣ်တတီဒီးအီၤဘၣ်. အဝဲသ့ၣ်အဒိအတဲာ်န့ၣ်​ သိၣ်လိပှၤလၢ ထဲပတဲလၢ ပဘူၣ်ထီၣ်ဘါထီၣ်​ ယဟိဝၤယွၤန့ၣ်​ တလၢပှဲၤဒံးဘၣ်. ပကဘၣ်သးဟ့တၢ်အၢ ဒီးအဲၣ်တၢ်ဂ့ၤလီၤ. (ရိမ့ၤ ၁၂:၉) ယဟိဝၤယွၤတဲဝဲလၢသုက “သ့ၣ်ညါနီၤဖး ပှၤတီဒီးပှၤတတီဘၣ်အဆၢ, ပှၤလၢအမၤယွၤအတၢ်, ဒီးပှၤလၢအတမၤဘၣ်​ ယွၤအတၢ်အဆၢလီၤ.”—မၤလကံ ၃:၁၈.

၁၁. ပအိၣ်လၢ ယဟိဝၤယွၤအအိၣ်တကပၤန့ၣ်​ ဘၣ်မနုၤအဃိ ကဘၣ်ဖျါလၢ ပှၤကိးဂၤဒဲးအမဲာ်ညါလဲၣ်.

^၁၁ ပသးခုဒိၣ်မးလၢ ယဟိဝၤယွၤ ဃုထၢပှၤလၢ ပကကဲအပှၤဂီၢ်မုၢ်အဃိလီၤ. ပအိၣ်လၢယဟိဝၤယွၤ အအိၣ်တခီန့ၣ်​ ကဘၣ်ဖျါလၢ ပှၤကိးဂၤဒဲးအမဲာ်ညါလီၤ. (မးသဲ ၅:၁၆; ၁ တံၤမသ့း ၄:၁၅) သံကွၢ်လီၤနသးလၢ ‘မ့ၢ်ပှၤဂၤထံၣ်ယၤလၢ ယတီဒီးယဟိဝၤယွၤ လၢယသးဒီဖျၢၣ်ဧါ. မ့ၢ်ယသူၣ်ဆူၣ်ယသးဆူၣ်လၢ ကတဲဘၣ်ပှၤဂၤလၢ ယကဲယဟိဝၤပှၤအုၣ်အသးန့ၣ်ဧါ.’ ဆိကမိၣ်ကွၢ် ပမ့ၢ်မဲာ်ဆှးလၢ ပကတဲဘၣ်ပှၤဂၤလၢ ပမ့ၢ်ယဟိဝၤယွၤအတၢ်န့ၣ်​ အဝဲကတူၢ်ဘၣ်ဒ်လဲၣ်.—စံးထီၣ်ပတြၢၤ ၁၁၉:၄၆; ဖး မၢ်ကူး ၈:၃၈ တက့ၢ်.

၁၂, ၁၃. ပှၤတနီၤနီၤန့ၣ်​ အဝဲသ့ၣ်မ့ၢ် ယဟိဝၤပှၤအုၣ်အသးဧါ တမ့ၢ်ဧါန့ၣ်​ ဘၣ်မနုၤအဃိ ပှၤနီၤဖးအီၤတဘၣ်ဘၣ်လဲၣ်.

^၁၂ လီၤသးအုးဒိၣ်မးလၢ ယဟိဝၤပှၤအုၣ်အသးတနီၤဒၣ်လဲာ် အိၣ်ဒီး “ဟီၣ်ခိၣ်အသး” လီၤ. လၢတၢ်န့ၣ်အဃိ အဝဲသ့ၣ်တလီၤဆီဒီး ပှၤလၢတဘူၣ်ထီၣ်ဘါထီၣ်​ ယဟိဝၤယွၤန့ၣ်ဘၣ်. (၁ ကရံၣ်သူး ၂:၁၂) ပှၤလၢအအိၣ်ဒီး “ဟီၣ်ခိၣ်အသး” န့ၣ်အဝဲသ့ၣ်​ သးစၢၢ်ဆၢဝဲထဲ အနီၢ်ကစၢ် တၢ်သူၣ်လီသးကွံလီၤ. (အ့းဖ့းစူး ၂:၃) အဒိ ဘၣ်ဃးဒီးတၢ်ကူတၢ်သိးန့ၣ်​ ပဒိးန့ၢ်ဘၣ်​ တၢ်ဟ့ၣ်ပလီၢ်ခဲအံၤခဲအံၤ ဘၣ်ဆၣ်​ ပှၤတနီၤနီၤ ဃုထၢဝဲတၢ်ကူတၢ်သိးလၢ အတဖျါသညူးသပှၢ်အဖၢမုၢ်လီၤ. ခရံာ်ဖိတနီၤန့ၣ်​ ဖဲအဝဲသ့ၣ်​ ထီၣ်တၢ်အိၣ်ဖှိၣ်အခါဒၣ်လဲာ် အဝဲသ့ၣ်ကူကၤဝဲ တၢ်ကူတၢ်ကၤလၢ အဃံးတလၢ, တဘံၣ်တဘၢ ဒီးမၤဝဲအခိၣ်ဆူၣ်​ ဒ်ပှၤတၢ်ချၢအသိးန့ၣ်လီၤ. (၁ တံၤမသ့း ၂:၉, ၁၀) လၢတၢ်န့ၣ်အဃိ အဝဲသ့ၣ်​ မ့ၢ်ယဟိဝၤပှၤအုၣ်အသးဧါ တမ့ၢ်ဧါန့ၣ်​ ပှၤနီၤဖးအီၤတဘၣ်လၢၤဘၣ်.—ယၤကိာ် ၄:၄.

^၁၃ ကျဲအဂၤလၢ ယဟိဝၤပှၤအုၣ်အသးတဖၣ်​ တအိၣ်လီၤဆီဒီးဟီၣ်ခိၣ်န့ၣ်​ အိၣ်ဒံးဝဲလီၤ. အဒိ ဖဲပှၤမၤဖၤထံၤအခါ ပှၤတနီၤနီၤဂဲၤကလံၣ်​ ဒီးအတၢ်အိၣ်ထီၣ်အိၣ်လီၤန့ၣ်​ တလီၤဂာ်ဒီး ခရံာ်ဖိတဖၣ်ဘၣ်. ဒီးအဂၤတနီၤနီၤန့ၣ်​ အဝဲသ့ၣ်ပာ်ထီၣ်တၢ်ဂီၤလၢ online ဒီးကွဲးလီၤဝဲတၢ်ဂ့ၢ်တၢ်ကျိၤလၢ တကြၢးတဘၣ်တဖၣ်န့ၣ်လီၤ. အဝဲသ့ၣ်မၤဝဲဒ်န့ၣ်န့ၣ်​ တမ့ၢ်တၢ်ကမၣ်ဖးဒိၣ်အဃိ တၢ်အိၣ်ဖှိၣ်တသိၣ်အဝဲသ့ၣ်ဘၣ်. ဘၣ်ဆၣ်​ အဝဲသ့ၣ်တကဲထီၣ်​ ပှၤဒိဂ့ၤတဲာ်ဘၣ်လၢ ပှၤလၢအဂုာ်ကျဲးစၢး အိၣ်လီၤဆီဒီး ဟီၣ်ခိၣ်တဖၣ်အဂီၢ်လီၤ.—ဖး ၁ ပ့းတရူး ၂:၁၁, ၁၂ တက့ၢ်.

၁၄. ဒ်သိးပတၢ်ရ့လိာ်သးဒီး ယဟိဝၤယွၤ သုတဘၣ်ဒိတဂ့ၤအဂီၢ် ပကဘၣ်မၤတၢ်မနုၤလဲၣ်.

^၁၄ မုၢ်မဆါတနံၤအံၤ ပှၤဟီၣ်ခိၣ်ဖိတဖၣ်​ ထုးထီၣ်ဝဲတၢ်လၢ ကထုးန့ၢ်ပသး ဒ်သိးပကသးစၢၢ်ဆၢ “ကယဲၢ်တၢ်အိၣ်လၢဟီၣ်ခိၣ်ချၢ, ပဖံးပညၣ်အသးကွံတၢ်, ဒီးပမဲာ်အတၢ်သးကွံ, ဒီးအအံၤတဃၣ်အသးကဖၢလၢန့ၣ်” လီၤ. (၁ ယိၤဟၣ်​ ၂:၁၆) ပမ့ၢ်ယဟိဝၤယွၤအတၢ်အဃိ ပလီၤဆီဒီး အဝဲသ့ၣ်လီၤ. ပ “ညိကွံာ်တၢ်တယူးတယီၣ်ဘၣ်ယွၤ” ဒီး “တၢ်သးကွံဘၣ်ဃးဒီးဟီၣ်ခိၣ်, ဒီးလၢပဘၣ်အိၣ်ပဘၣ်ဆိးလၢ အအံၤတဃၣ်​ အိၣ်ဒီးတၢ်ပာ်ပသးသပှၢ်သပှၢ်, အိၣ်ဒီးပသူၣ်တီပသးလိၤ, ဒီးတၢ်ယူးယီၣ်ယွၤန့ၣ်” လီၤ. (တံတူး ၂:၁၂) လၢပတၢ်အိၣ်မူ ကိးသနၢၣ်ဒဲးအပူၤဃုာ်ဒီး ပတၢ်စံးတၢ်ကတိၤ, ပအီၣ်တၢ်အီတၢ်, ပတၢ်ကူတၢ်သိး, ပတၢ်ဖံးတၢ်မၤတဖၣ်န့ၣ်​ ကဘၣ်ပာ်ဖျါထီၣ်လၢ ပမ့ၢ်ယဟိဝၤယွၤအတၢ်လီၤ.—ဖး ၁ ကရံၣ်သူး ၁၀:၃၁, ၃၂ တက့ၢ်.

အိၣ်ဒီး “တၢ်အဲၣ်တၢ်ကွံဒိၣ်မးလၢ သုကျါ” တက့ၢ်

၁၅. ဘၣ်မနုၤအဃိ ပကဘၣ်ရ့ဒီး ပဒီပုၢ်ဝဲၢ်ခရံာ်ဖိတဖၣ်လၢ တၢ်သးကညီၤ ဒီးတၢ်အဲၣ်တၢ်ကွံအပူၤလဲၣ်.

^၁၅ ပပာ်ဖျါထီၣ်လၢ ပပာ်လုၢ်ပာ်ပှ့ၤ ပတၢ်ရ့လိာ်သးဒီးယဟိဝၤယွၤ သ့ခီဖျိ ပရ့လိာ်သးဒီး ပဒီပုၢ်ဝဲၢ်မုၣ်ခွါတဖၣ်ဒ်လဲၣ်န့ၣ်လီၤ. အဝဲသ့ၣ်စ့ၢ်ကီး မ့ၢ်ယဟိဝၤယွၤအတၢ်လီၤ. ပမ့ၢ်သ့ၣ်နီၣ်တၢ်ဂ့ၢ်တခါအံၤန့ၣ်​ ပကရ့ဒီးအဝဲသ့ၣ်လၢ တၢ်သးကညီၤ ဒီးတၢ်အဲၣ်တၢ်ကွံအပူၤလီၤ. (၁ သ့းစၤလနံ ၅:၁၅) ပကမၤဒ်န့ၣ်အဂီၢ် မ့ၢ်တၢ်လၢအရ့ဒိၣ်ဧါ. ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “လၢတၢ်အံၤ, လၢသုအဲၣ်လိာ်ကွံလိာ်သုသးအဃိဒီး, ပှၤခဲလၢာ်ကသ့ၣ်ညါလၢ သုမ့ၢ်ယပျဲၢ်ယဘီၣ်လီၤ.”—ယိၤဟၣ်​ ၁၃:၃၅.

၁၆. ယဟိဝၤယွၤ အဲၣ်အခ့အပှၤတဖၣ်န့ၣ်​ စီၤမိၤၡ့အတၢ်သိၣ်တၢ်သီ ပာ်ဖျါထီၣ်ဝဲဒ်လဲၣ်.

^၁၆ စီၤမိၤၡ့အတၢ်သိၣ်တၢ်သီန့ၣ်​ မၤစၢၤပှၤဒ်သိး ပကနၢ်ပၢၢ်ထီၣ်လၢ ပကဘၣ်ရ့ဒီးပဒီပုၢ်ဝဲၢ်တဖၣ်လၢ တၢ်အိၣ်ဖှိၣ်အပူၤ ဒ်လဲၣ်န့ၣ်လီၤ. လၢယဟိဝၤယွၤ အတၢ်လုၢ်ဟံၣ်အပူၤန့ၣ်​ အိၣ်ဒီးတၢ်ပီးတၢ်လီလၢ ပှၤသူအီၤလၢ တၢ်ဘူၣ်တၢ်ဘါစီဆှံအဂီၢ်လီၤ. တၢ်သိၣ်တၢ်သီ ပာ်ဖျါထီၣ်ဝဲလၢ ပှၤလ့ၤဝံဖိတဖၣ်​ ကဘၣ်ကွၢ်ထွဲဒီးကတီၤဝဲ တၢ်ပီးတၢ်လီတဖၣ်အံၤဒ်လဲၣ်န့ၣ်လီၤ. ဒီးပှၤလၢအတမၤထွဲ တၢ်ဟံးစုနဲၣ်ကျဲတဖၣ်အံၤန့ၣ်​ ကဘၣ်တၢ်မၤသံအီၤလီၤ. (၄ မိၤၡ့ ၁:၅၀, ၅၁) ယဟိဝၤယွၤ မ့ၢ်သးအိၣ်ဝဲ တၢ်ပီးတၢ်လီလၢ ပှၤသူဝဲလၢကဘူၣ်ထီၣ်ဘါထီၣ်အီၤအဂီၢ် ထဲထဲအံၤန့ၣ်​ ပှၤလၢအဟ့ၣ်လုၢ်ထီၣ်သးလၢအအိၣ်​ ဒီးတီဒီးအီၤတဖၣ်န့ၣ်​ အဝဲကသးအိၣ်ဝဲ အါန့ၢ်အန့ၣ်တက့ၢ်လီၤ. အဝဲပာ်ဖျါထီၣ်လၢ အပာ်လုၢ်ပာ်ပှ့ၤပှၤ ခီဖျိ အဝဲတဲဝဲလၢ ‘ပှၤလၢအထိးဘၣ်သုန့ၣ်​ ထိးဘၣ်ယမဲာ်ပှၤဖိလီၤ.’—စကၤရယၤ ၂:၈.

၁၇. ယဟိဝၤယွၤ “ကနၣ်ဝဲ, ဒီးနၢ်ဟူဝဲ” တၢ်မနုၤလဲၣ်.

^၁၇ ဝံမၤလကံတဲဝဲလၢ ယဟိဝၤယွၤ “ကနၣ်ဝဲ, ဒီးနၢ်ဟူဝဲ” အခ့အပှၤတဖၣ်​ ရ့လိာ်အသးတဂၤဒီးတဂၤ ဒ်လဲၣ်န့ၣ်လီၤ. (မၤလကံ ၃:၁၆) ယဟိဝၤယွၤ “သ့ၣ်ညါပှၤလၢ အမ့ၢ်အတၢ်လီၤ.” (၂ တံၤမသ့း ၂:၁၉) တၢ်လၢပမၤဒီးပတဲတဖၣ်န့ၣ်​ အဝဲသ့ၣ်ညါဝဲခဲလၢာ်လီၤ. (ဧ့ၤဘြံၤ ၄:၁၃) ဖဲပတရ့ဒီး ပဒီပုၢ်ဝဲၢ်တဖၣ်ဂ့ၤဂ့ၤဘၣ်အခါ ယဟိဝၤယွၤထံၣ်ဝဲလီၤ. ဒီးပနာ်သ့လၢ ဖဲပတူၢ်လိာ်မုာ်တမှံၤ, သးအိၣ်ဟ့ၣ်တၢ်, ပျၢ်ပှၤဂၤတၢ်ကမၣ်​ ဒီးသးအိၣ်ပှၤဂၤအခါ ယဟိဝၤယွၤကထံၣ်ဝဲစ့ၢ်ကီးလီၤ.—ဧ့ၤဘြံၤ ၁၃:၁၆; ၁ ပ့းတရူး ၄:၈, ၉.

“ယွၤတညိကွံာ်ဘၣ်​ အပှၤဂီၢ်မုၢ်ဘၣ်”

၁၈. ယဟိဝၤယွၤ ဃုထၢထီၣ်ပှၤလၢ အပှၤဂီၢ်မုၢ်အဃိ ပပာ်ဖျါထီၣ်​ တၢ်စံးဘျုးစံးဖှိၣ်​ ကသ့ဒ်လဲၣ်.

^၁၈ ပအဲၣ်ဒိးပာ်ဖျါထီၣ်လၢ ပစံးဘျုးစံးဖှိၣ်​ ယဟိဝၤယွၤ ခီဖျိလၢ ပကဲဘၣ်အတၢ်အဃိလီၤ. ဖဲပဟ့ၣ်လုၢ်ထီၣ်ပသးလၢ ယဟိဝၤယွၤအအိၣ်အခါ မ့ၢ်ဝဲတၢ်ဃုထၢလၢ အဂ့ၤကတၢၢ်တခါလီၤ. ပအိၣ်ဘၣ်​ “လၢပှၤသူၣ်က့ၣ်သးက့ၣ်, သူၣ်ကီသးကီတစိၤအကျါ” သနာ်က့ ပ “ကဲထီၣ်ပှၤလၢတၢ်ပာ်တၢ်ကမၣ်လၢ အလိၤအလီၢ်တအိၣ်ဘၣ်” ဒီးပ “အိၣ်ဖျါထီၣ်ဒ် တၢ်ကပီၤတဖၣ်လၢ ဟီၣ်ခိၣ်ချၢအသိး” သ့ဝဲလီၤ. (ဖံလံးပံၤ ၂:၁၅, ၁၆) လၢတၢ်န့ၣ်အဃိ ပပာ်လီၤပသး ဂၢၢ်ဂၢၢ်ကျၢၤကျၢၤလၢ ပကဟးဆှဲးတၢ်လၢ ယဟိဝၤယွၤသးဟ့ဝဲခဲလၢာ်န့ၣ်လီၤ. (ယၤကိာ် ၄:၇) ခီဖျိလၢ ပဒီပုၢ်ဝဲၢ်မုၣ်ခွါတဖၣ်​ မ့ၢ်ယဟိဝၤယွၤအတၢ်အဃိ ပအဲၣ်အီၤ ဒီးပပာ်ကဲအဝဲသ့ၣ်လီၤ.—ရိမ့ၤ ၁၂:၁၀.

၁၉. ယဟိဝၤယွၤ ဆိၣ်ဂ့ၤဝဲပှၤလၢ အမ့ၢ်အတၢ်တဖၣ်ဒ်လဲၣ်.

^၁၉ လံာ်စီဆှံအၢၣ်လီၤဝဲလၢ “ယွၤတညိကွံာ်ဘၣ်​ အပှၤဂီၢ်မုၢ်ဘၣ်.” (စံးထီၣ်ပတြၢၤ ၉၄:၁၄) လၢတၢ်န့ၣ်အဃိ တၢ်မ့ၢ်ကဲထီၣ်အသးဒီးပှၤ ဒ်လဲၣ်ဂ့ၤဒ်လဲၣ်ဂ့ၤ ယဟိဝၤယွၤကအိၣ်ဒီးပှၤထီဘိလီၤ. ဒီးပမ့ၢ်သံဒၣ်လဲာ် အဝဲတသးပ့ၤနီၣ်ပှၤဘၣ်. တၢ်အၢၣ်လီၤအံၤ ပနာ်အီၤသ့သပှၢ်ကတၢၢ်လီၤ. (ရိမ့ၤ ၈:၃၈, ၃၉) “အဂ့ၢ်ဒ်အံၤ, ပမ့ၢ်မူဒီး, ပမူလၢကစၢ်အဂီၢ်, ဒီးပမ့ၢ်သံဒီး, ပသံလၢကစၢ်အဂီၢ်လီၤ. မၤသးဒ်န့ၣ်ဒီး, ပမူမ့ၢ်ဂ့ၤ, ပသံမ့ၢ်ဂ့ၤ, ပမ့ၢ်ကစၢ်အတၢ်လီၤ.” (ရိမ့ၤ ၁၄:၈) ပခိးကွၢ်လၢ် တၢ်ဆၢကတီၢ်လၢ ယဟိဝၤယွၤ ကမၤဂဲၤဆၢထၢၣ်သမူထီၣ်က့ၤ အတံၤသကိးလၢ အတီဒီးအီၤလၢ အသံတ့ၢ်တဖၣ်န့ၣ်လီၤ. (မးသဲ ၂၂:၃၂) ခဲအံၤစ့ၢ်ကီး ပထံၣ်ဘၣ်​ ယဟိဝၤယွၤအတၢ်ဟ့ၣ်အါမးလီၤ. လံာ်စီဆှံတဲဝဲလၢ “ပှၤတကလုာ်လၢ ယွၤမ့ၢ်အကစၢ်, ပှၤဂီၢ်မုၢ်လၢယွၤဃုထၢအီၤလၢ အတၢ်န့ၢ်သါအဂီၢ်န့ၣ်​ ဘၣ်ဆိၣ်ဂ့ၤဝဲလီၤ.”—စံးထီၣ်ပတြၢၤ ၃၃:၁၂.