ယၡါယၤ
၄၉ ကီးတဖၣ်ဧၢ, ကနၣ်ယၤတက့ၢ်.
ပှၤကလုာ် လၢအအိၣ်လၢ တၢ်လီၢ်ယံၤသ့ၣ်ဧၢ, ကနၣ် ထံထံဆးဆးတက့ၢ်.+
တချုးလၢ ယအိၣ်ဖျဲၣ်ထီၣ်ဒံးဘၣ်န့ၣ် ယဟိဝၤယွၤ ကိးန့ၢ်ယၤ+
ဒီးလၢယအိၣ်လၢ ယမိၢ်ဒၢလီၢ်ပူၤ လံၤလံၤန့ၣ် ကစၢ်ယွၤ ကိးယၤလၢ ယမံၤလီၤ.
၂ အဝဲဒုးကဲထီၣ် ယထးခိၣ်ဒ် နးလၢအကနၣ်အ့ၣ်တဘ့ၣ်
ဒီးအဝဲပာ်ခူသူၣ်ယၤလၢ အစုအကဒု ဖီလာ်လီၤ.+
အဝဲဒုးကဲထီၣ်ယၤ ဒ်ပျၢ်တဘိလၢ ပှၤမၤအ့ၣ်ထီၣ်အကနၣ်
ဒီးအဝဲပာ်ခူသူၣ်ယၤလၢ အပျၢ်ပီၤ ပူၤလီၤ.
၄ ဘၣ်ဆၣ် ယတဲလၢ “ယမၤတ့ၢ်တၢ် ကလီကလီလီၤ.
ယသူလၢာ် ယဂံၢ်ယဘါ ခီလီလီ ဒီးအတကဲဘျုးဘၣ်.
၅ ဖဲယအိၣ်လၢ ယမိၢ်ဒၢလီၢ်ပူၤအခါ ယဟိဝၤယွၤ မ့ၢ်ပှၤလၢ အတ့ယၤ ဒ်အခ့အပှၤ အသိးလီၤ.
ဒီးအဝဲမၢယကိးက့ၤ စီၤယၤကိာ် အစၢၤအသွဲၣ်တဖၣ် လၢအအိၣ်
ဒ်သိး ပှၤအံၣ်စရ့လးဖိတဖၣ် ကဘၣ်တၢ်ပာ်ဖှိၣ်ထီၣ်အီၤလၢ အအိၣ်အဂီၢ်လီၤ.+
ယကအိၣ်ဒီး တၢ်လၤကပီၤလၢ ယဟိဝၤယွၤ အမဲာ်ညါ
ဒီးယကစၢ်ယွၤ ကကဲထီၣ် ယဂံၢ်ယဘါလီၤ.
၆ ဒီးအဝဲတဲယၤလၢ “နမ့ၢ် ယခ့ယပှၤလၢ
ကဝံၣ်ဆၢထၢၣ် စီၤယၤကိာ် အဒူၣ်တဖၣ်
ဒီးဘှီဂ့ၤထီၣ်က့ၤ* ပှၤအံၣ်စရ့လးဖိ လၢအဘၣ်တၢ်ပာ်မူအီၤတဖၣ်
တကးဒံးဘၣ် ယဒုးကဲထီၣ်စ့ၢ်ကီးနၤလၢ တၢ်ကပီၤလၢ ပှၤကလုာ်တဖၣ် အဂီၢ်လီၤ.+
ဒီးယမၤဒ်န့ၣ်န့ၣ် ဒ်သိးယတၢ်အုၣ်က့ၤခီၣ်က့ၤ ကတုၤလၢ ဟီၣ်ခိၣ် ဒီဘ့ၣ်အဂီၢ်လီၤ.”+
၇ ပဒိၣ်တဖၣ်အခ့အပှၤတဂၤ လၢအမ့ၢ် ပှၤတဂၤလၢ ပှၤဂၤသးဘၣ်အၢဝဲ+ ဒီးပှၤကလုာ်တကလုာ်သးဟ့ဝဲန့ၣ် အံၣ်စရ့လး အကစၢ်ယဟိဝၤယွၤ လၢအစီဆှံတဂၤ+ လၢအမ့ၢ် ပှၤလၢအပှ့ၤက့ၤ ပှၤအံၣ်စရ့လးဖိန့ၣ် တဲဘၣ်အီၤဒ်အံၤ,
“စီၤပၤတဖၣ် ကထံၣ်ဘၣ် ဒီးကဂဲၤဆၢထၢၣ်
ဒီးပဒိၣ်ဖးဒိၣ်တဖၣ် ကချံးလီၤအခီၣ်
ခီဖျိလၢ ယဟိဝၤယွၤအဃိလီၤ. အဝဲမ့ၢ် ကစၢ်လၢ ပှၤနာ်န့ၢ် အီၤသ့တဂၤ+
ဒီးမ့ၢ်ဝဲ အံၣ်စရ့လး အကစၢ်ယွၤ လၢအစီဆှံတဂၤလၢ အဃုထၢထီၣ် နၤလီၤ.”+
၈ ယဟိဝၤယွၤ တဲဝဲလၢ
“ဆၢကတီၢ်ဖဲ ယပာ်ဖျါထီၣ် တၢ်ဂ့ၤတၢ်ဝါ အကတီၢ်န့ၣ် ယကစံးဆၢနၤ+
ဒီးဖဲတၢ်အုၣ်က့ၤခီၣ်က့ၤ အမုၢ်နံၤအတီၢ်ပူၤန့ၣ် ယကမၤစၢၤနၤလီၤ.+
ယကဆဲးဒီသဒၢနၤ ဒ်သိးနကလီၤဂာ်ဒီး တၢ်အၢၣ်လီၤအီလီၤတခါလၢ ယၤဒီးပှၤဂီၢ်မုၢ်တဖၣ် အဘၢၣ်စၢၤလီၤ.+
ကီၢ်ကအိၣ်က့ၤ ဒ်သိးဒီးလၢညါ
ဒီးယပှၤဂီၢ်မုၢ် ကန့ၢ်ဘၣ်က့ၤ အတၢ်န့ၢ်သါလၢ အအိၣ်သယုၢ် တဖၣ်လီၤ.+
၉ နကတဲဘၣ် ပှၤဃိာ်ဖိတဖၣ်လၢ ‘ဟးထီၣ်တက့ၢ်.’+
ဒီးနကတဲဘၣ် ပှၤအိၣ်လၢ တၢ်ခံးကျါလၢ+ ‘ဟဲပာ်ဖျါထီၣ် သုသးတက့ၢ်.’
ဒ်သိတဖၣ်အသိး အဝဲသ့ၣ် ကအီၣ်တၢ်လၢ ကျဲအဃၢၤ
ဒီးအဝဲသ့ၣ် အတၢ်အီၣ်ဆၣ်လီၢ်တဖၣ်န့ၣ် ကမ့ၢ်ဝဲလၢ ကျဲဖိတဖၣ် အကပိာ်ကပၤလီၤ.
၁၀ အဝဲသ့ၣ် တလီၤဘဲ* အီၣ်တၢ် ဒီးတလီၤဘဲအီထံဘၣ်.+
တၢ်ကိၢ်ဆါမ့ၢ်ဂ့ၤ မုၢ်ဆဲးလီၤမ့ၢ်ဂ့ၤ တမၤဘၣ်ဒိ အဝဲသ့ၣ်ဘၣ်,+
မ့ၢ်လၢ ယၤ, ကစၢ်ယွၤလၢ အသးကညီၤအဝဲသ့ၣ်န့ၣ် ကဆှၢအဝဲသ့ၣ်+
ဒီးကဟံးစုနဲၣ်ကျဲအဝဲသ့ၣ်လၢ ထံထီၣ်ပၢၢ်တဖၣ် အဃၢၤလီၤ.+
၁၁ ယကမၤဒ်သိး ကစၢၢ်ခဲလၢာ် ကကဲထီၣ်က့ၤ ကျဲတဖၣ်
ဒီးယကျဲမုၢ်တဖၣ်န့ၣ် ကအိၣ်ဝဲလၢ တၢ်လီၢ်ထီၣ်ထီလီၤ.+
၁၂ ကွၢ်မီၤ, ပှၤဂီၢ်မုၢ် အိၣ်ဝဲလၢ တၢ်လီၢ်ဖးယံၤန့ၣ် ဟဲဝဲလီၤ.+
တနီၤန့ၣ် အိၣ်လၢကလံၤစိး ဒီးမုၢ်နုာ်
ဒီးအဂၤတနီၤန့ၣ် အိၣ်ဝဲလၢ ကီၢ်စံၣ်နံၤလီၤ.”+
၁၃ မူခိၣ်ဧၢ, ကိးပသူထီၣ်လၢ တၢ်သးခုတက့ၢ်. ဟီၣ်ခိၣ်ဧၢ, သူၣ်ဖှံသးညီတက့ၢ်.+
မ်ကစၢၢ်ကလိတဖၣ် သးခု ဒီးကိးပသူထီၣ်လၢ တၢ်သူၣ်ခုသးခု အပူၤတက့ၢ်.+
ယဟိဝၤယွၤ မၤမုာ်ထီၣ်က့ၤ အပှၤဂီၢ်မုၢ်+
ဒီးအဝဲပာ်ဖျါထီၣ် တၢ်သးကညီၤလၢ အပှၤလၢ အဘၣ်နးဘၣ်ဖှီၣ်တဖၣ် အဖီခိၣ်လံ.+
၁၅ မ့ၢ်မိၢ်တဂၤ ကသးပ့ၤနီၣ်ကွံာ် အဖိလၢ အဒုးအီနုၢ်ဝဲ တဂၤန့ၣ်ဧါ.
မ့ၢ်အတသးကညီၤ အဖိလၢ အအိၣ်ဖျဲၣ်ထီၣ်သီသီဘၣ်ဧါ.
မိၢ်တဂၤ မ့ၢ်သးပ့ၤနီၣ်ဝဲဒၣ်လဲာ် ယတသးပ့ၤနီၣ်နၤ နီတဘျီဘၣ်.+
၁၆ ကွၢ်မီၤ, ယကွဲးလီၤနမံၤလၢ ယစုညါသးအလိၤလီၤ.
နဝ့ၢ်ဒူၣ်တဖၣ် အိၣ်ဝဲလၢ ယမဲာ်ညါ ထီဘိလီၤ.
၁၇ နဖိတဖၣ် ဟဲက့ၤဝဲ ချ့မးလီၤ.
ပှၤလၢ အမၤလီၤပှီၢ်နၤ ဒီးမၤဟးဂီၤနၤန့ၣ် ကဟးထီၣ်ကွံာ် လၢနအိၣ်လီၤ.
၁၈ ကွၢ်တရံးတၢ်တက့ၢ်.
အဝဲသ့ၣ် ပာ်ဖှိၣ်ထီၣ်အသးတပူၤဃီ+
ဒီးဟဲက့ၤလၢနအိၣ်လံ.
ယဟိဝၤယွၤ တဲဝဲလၢ “ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ
နကကူထီၣ်သိးထီၣ် အဝဲသ့ၣ် ဒ်တၢ်ကယၢကယဲအသိး
ဒီးဒ်တၢ်လၢ အဃံအလၤလၢ တလးမူးပိာ်မုၣ် စၢဃာ်ဝဲလၢအလိၤ အသိးလီၤ.
၁၉ လၢညါန့ၣ် ပှၤမၤဟးဂီၤနၤ ဒီးဒုးအိၣ်သယုၢ်နၤ ဒီးနတၢ်လီၢ်တၢ်ကျဲ ဟးဂီၤသနာ်က့+
ခဲအံၤ နကအံၣ်တလၢလၢ ပှၤလၢ အအိၣ်လၢ နပူၤအဂီၢ်+
၂၀ နဘၣ်အိၣ်သယုၢ်လၢ နဖိတဖၣ် တအိၣ်လၢၤဘၣ်အဃိ ဝံၤဒီး နဖိခွါလၢ အအိၣ်ဖျဲၣ်ထီၣ်တဖၣ် ကတဲနၤလၢ
‘တၢ်လီၢ်တတီၤအံၤ အံၣ်တလၢ လၢပဂီၢ်အဃိ
မၤန့ၢ်ပှၤတၢ်လီၢ် ဒ်သိးပကအိၣ်ဖဲအံၤ အဂီၢ်တက့ၢ်.’+
၂၁ ဒီးနကတဲလီၤနသးလၢ
‘ယဖိတဖၣ်တအိၣ်လၢၤဘၣ် ဒီးယမ့ၢ်ပိာ်မုၣ်လၢ အဖိအိၣ် တန့ၢ်လၢၤဘၣ်.
တကးဒံးဘၣ် ပှၤက့ၤဖီၣ်ယၤ ဒီးစၢဃာ်ယၤအဃိ
ဖိလၢအဘၣ် တၢ်ဟ့ၣ်လီၤယၤတဖၣ်အံၤ အပါမ့ၢ်မတဂၤလဲၣ်.
မတဂၤ ကွၢ်လုၢ်ဒိၣ်ထီၣ် ဖိတဖၣ်အံၤလဲၣ်.+
၂၂ တၢ်ပၢကစၢ် ယဟိဝၤယွၤ တဲဝဲလၢ
“ကွၢ်မီၤ, ယကယူာ်ထီၣ်ယစုလၢ ပှၤကလုာ်တဖၣ် အအိၣ်
ဒီးယကဆီလီၤ ယတၢ်ပနီၣ်လၢ ပှၤဂီၢ်မုၢ်တဖၣ်အအိၣ်လီၤ.+
ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.
ပှၤလၢ အမုၢ်လၢ်တၢ်လၢယၤန့ၣ် အတဒိးန့ၢ်ဘၣ် တၢ်မဲာ်ဆှးဘၣ်.”+
၂၄ ပှၤတဖၣ်လၢ ပှၤလၢအဂံၢ်ဆူၣ်ဘါဆူၣ်တဂၤ က့ၤဖီၣ်ဝဲန့ၣ် ပှၤဟံးန့ၢ်က့ၤအီၤ ကသ့ဧါ.
ပှၤတဖၣ်လၢ ပှၤပၢဆူၣ်ပၢစိးတၢ်တဂၤ ဖီၣ်န့ၢ်အီၤန့ၣ် ပှၤမၤပူၤဖျဲးအီၤ ကသ့ဧါ.
၂၅ ဘၣ်ဆၣ် ယဟိဝၤယွၤ တဲဝဲ ဒ်အံၤလီၤ.
“ပှၤတဖၣ်လၢ ပှၤလၢအဂံၢ်ဆူၣ်ဘါဆူၣ်တဂၤ က့ၤဖီၣ်ဝဲန့ၣ် ကဘၣ်တၢ်ဟံးန့ၢ်က့ၤအီၤ+
ဒီးပှၤတဖၣ်လၢ ပှၤပၢဆူၣ်ပၢစိးတၢ်တဂၤ ဖီၣ်န့ၢ်အီၤန့ၣ် ကဘၣ်တၢ်မၤပူၤဖျဲးအီၤလီၤ.+
ယကထီဒါ ပှၤလၢအထီဒါသု+
ဒီးယကမၤပူၤဖျဲး သုဖိတဖၣ်လီၤ.
၂၆ ပှၤလၢ အမၤအၢမၤသီနၤန့ၣ် ယကဒုးအီၣ်အဝဲသ့ၣ်လၢ အနီၢ်ကစၢ်အညၣ်
ဒီးအဝဲသ့ၣ် ကအီမူၤအနီၢ်ကစၢ်အသွံၣ် ဒ်ပှၤအီမူၤသးလၢ စပံးထံအသီ အသိးလီၤ.