၁ ပ့းတရူး
၂ လၢတၢ်န့ၣ်အဃိ ပာ်တ့ၢ်ကွံာ် တၢ်အၢတၢ်သီခဲလၢာ်,+ တၢ်လီတၢ်ဝ့ၤ, တၢ်ပာ်မၤသး, တၢ်သူၣ်က့ၣ်သးကါ ဒီးတၢ်တဲဆါခဲလၢာ်တက့ၢ်. ၂ ဒီးဒ်ဖိသၣ်လၢ အအိၣ်ဖျဲၣ်ထီၣ်သီသီ+ ဆၢန့ၢ်ဘၣ် တၢ်နုၢ်ထံအသိး သုဝဲစ့ၢ်ကီး မၤဒိၣ်ထီၣ် သုတၢ်သးအိၣ်ဆၢန့ၢ်ဘၣ် တၢ်နုၢ်ထံစီဆှံလၢ အဟဲလၢ ကစၢ်ယွၤ အကလုၢ်ကထါအပူၤတက့ၢ်. သုမ့ၢ်မၤဒ်န့ၣ်န့ၣ် သုကဒိၣ်ထီၣ်ထီထီၣ် တုၤလၢ တၢ်အုၣ်က့ၤခီၣ်က့ၤ ခီဖျိလၢ တၢ်နုၢ်ထံစီဆှံအံၤ အဃိလီၤ.+ ၃ ဒီးသုမၤဒ်န့ၣ်သ့ မ့ၢ်လၢ သုလဲၤခီဖျိ ဒီးသ့ၣ်ညါဘၣ်* လၢကစၢ်န့ၣ် အသူၣ်ဂ့ၤသးဝါအဃိလီၤ.
၄ အဝဲမ့ၢ်လၢၢ်မူတဖျၢၣ်လၢ ပှၤဟီၣ်ခိၣ်ဖိတဖၣ် တၢၤကွံာ်အီၤ+ ဘၣ်ဆၣ် ကစၢ်ယွၤဃုထၢအီၤ ဒီးပာ်လုၢ်ပာ်ပှ့ၤအီၤဒိၣ်မးလီၤ.+ ဖဲသုလဲၤလၢအအိၣ်အခါ ၅ ဒ်သုမ့ၢ် လၢၢ်မူတဖၣ်အသိးန့ၣ် တၢ်သူၣ်ထီၣ်သုလၢ နီၢ်သးအဟံၣ်လၢ+ သုကကဲထီၣ် ပှၤလုၢ်တၢ်ဒိၣ် စီဆှံတဒူၣ် ဒ်သိးသု ကဟ့ၣ်လုၢ်ထီၣ် နီၢ်သးတၢ်လုၢ်တၢ်ပာ်တဖၣ်လၢ+ ကစၢ်ယွၤ ဘၣ်သူၣ်ဘၣ်သးဝဲ ခီဖျိလၢ ယ့ၣ်ၡူးခရံာ်လီၤ.+ ၆ တၢ်ကွဲးအသး တဲဝဲလၢ “လၢစံယိၣ်အပူၤန့ၣ် ယကပာ်လီၤလၢၢ်လၢ အဘၣ် တၢ်ဃုထၢထီၣ်အီၤတဖျၢၣ်လီၤ. လၢၢ်တဖျၢၣ်အံၤ မ့ၢ်ဝဲ တၢ်သူၣ်ထီၣ်အခီၣ်ထံး အလၢၢ်လၢ အလုၢ်ဒိၣ်ပှ့ၤဒိၣ်တဖျၢၣ်လီၤ. ဒီးပှၤလၢ အစူၢ်က့ၤနာ်က့ၤအီၤန့ၣ် အသးတဟးဂီၤဝဲ နီတဘျီဘၣ်.”+
၇ သုဝဲသ့ၣ်အံၤ မ့ၢ်လၢသုမ့ၢ် ပှၤလၢ အစူၢ်က့ၤနာ်က့ၤတၢ်တဖၣ်အဃိ အဝဲမ့ၢ်ပှၤလၢ အလုၢ်ဒိၣ်ပှ့ၤဒိၣ် လၢသုဂီၢ်လီၤ. ဘၣ်ဆၣ် မ့မ့ၢ်လၢ ပှၤလၢ အတစူၢ်တနာ်တၢ်ဘၣ်တဖၣ်အဂီၢ်န့ၣ် တမ့ၢ်ဒ်န့ၣ်ဘၣ်. တၢ်ကွဲးအသးတဲဝဲလၢ “လၢၢ်တဖျၢၣ်လၢ ပှၤသူၣ်ဟံၣ်ဖိတဖၣ် တၢၤကွံာ်ဝဲန့ၣ်+ ကဲထီၣ်ဝဲလၢၢ်လၢ အရ့ဒိၣ်ကတၢၢ်တဖျၢၣ်”*+ ၈ ဒီး “ကဲထီၣ် တၢ်ဘၣ်တိၢ်အလၢၢ်တဖျၢၣ် ဒီးတၢ်မၤလီၤဃံၢ်အလၢၢ်တဖျၢၣ်” လီၤ.+ အဝဲသ့ၣ် လီၤဃံၢ်မ့ၢ်လၢ အဝဲသ့ၣ် တဒိကနၣ် ကစၢ်ယွၤ အကလုၢ်ကထါဘၣ် အဃိလီၤ. တၢ်အကတၢၢ်ဒ်အံၤ အိၣ်ခိးပာ်စၢၤအဝဲသ့ၣ်လီၤ. ၉ ဘၣ်ဆၣ် သုမ့ၢ် “ပှၤလၢအဘၣ် တၢ်ဃုထၢထီၣ်အီၤတဒူၣ်, ပှၤလုၢ်တၢ်ဒိၣ် လၢအမ့ၢ်စ့ၢ်ကီး စီၤပၤတဖၣ်, ပှၤစီဆှံတကလုာ်,+ ပှၤဂီၢ်မုၢ်လီၤလီၤဆီဆီ+ လၢကစၢ်ယွၤ အဂီၢ်လီၤ. သုဘၣ်တၢ်ဃုထၢထီၣ်သု ဒ်သိးသုကတဲဖျါထီၣ် ကစၢ်ယွၤ အတၢ်ဂ့ၤတၢ်ဝါတဖၣ် သကုၤဆးဒးလီၤ.”+ အဝဲမ့ၢ်ပှၤလၢ အကိးထီၣ်သုလၢ တၢ်ခံးကျါဆူ အတၢ်ကပီၤလီၤလးအပူၤလီၤ.+ ၁၀ တဘျီခါ သုတမ့ၢ် ကစၢ်ယွၤအပှၤဂီၢ်မုၢ်ဘၣ်. ဘၣ်ဆၣ်ခဲအံၤ သုကဲထီၣ်ကစၢ်ယွၤ အပှၤဂီၢ်မုၢ်လီၤ.+ ဒီးတဘျီခါ ကစၢ်ယွၤတပာ်ဖျါထီၣ် တၢ်သးကညီၤလၢ သုဖီခိၣ်ဘၣ်. ဘၣ်ဆၣ်ခဲအံၤ အဝဲပာ်ဖျါထီၣ် တၢ်သးကညီၤလၢ သုဖီခိၣ်လီၤ.+
၁၁ ဒီပုၢ်ဝဲၢ်သးဘိသ့ၣ်ဧၢ, ဒ်သုမ့ၢ်ပှၤထံဂၤကီၢ်ဂၤဖိ ဒီးပှၤလၢအိၣ်ဝဲဆိးဝဲ တစိၢ်တလီၢ် လၢဟီၣ်ခိၣ်အံၤအသိး+ ယဟ့ၣ်သဆၣ်ထီၣ်သုလၢ ဆဲးဟးဆှဲး တၢ်ဖံးတၢ်ညၣ် အတၢ်သူၣ်လီသးကွံတဖၣ်+ လၢအဒုးလိာ်သးဒီး သုန့ၣ်တက့ၢ်.+ ၁၂ ဆဲးပၢၤဃာ် သုလုၢ်လၢ်သကဲာ်ပဝး လၢအဂ့ၤလၢ ပှၤကလုာ်တဖၣ်အကျါတက့ၢ်.+ သုမ့ၢ်မၤဒ်န့ၣ်န့ၣ် ဖဲအဝဲသ့ၣ် ပာ်ဒ့ၣ်ပာ်ကမၣ်သုလၢ သုမ့ၢ်ပှၤမၤကမၣ်တၢ်တဖၣ်အခါ အဝဲသ့ၣ်ကထံၣ်ဘၣ် သုတၢ်မၤလၢ အဂ့ၤတဖၣ်လီၤ.+ လၢတၢ်န့ၣ်အဃိ အဝဲသ့ၣ်ကမၤလၤကပီၤ ကစၢ်ယွၤ ဖဲကစၢ်ယွၤ သမံသမိးကွၢ်တၢ် အမုၢ်နံၤအတီၢ်ပူၤလီၤ.
၁၃ လၢကစၢ်အဃိ ဒိးပၢသုသးလၢ တၢ်စိတၢ်ကမီၤလၢ ပှၤဟီၣ်ခိၣ်ဖိ ဒုးအိၣ်ထီၣ်ဝဲခဲလၢာ် အဖီလာ်တက့ၢ်.+ စီၤပၤလၢအမ့ၢ်+ ပှၤလၢအဒိၣ်န့ၢ်ဒံးသု ၁၄ ဒီးပဒိၣ်ဖးဒိၣ်တဖၣ် လၢအမ့ၢ် ပှၤလၢစီၤပၤဆှၢလီၤဝဲဒ်သိး အကစံၣ်ညီၣ် ပှၤမၤကမၣ်တၢ်တဖၣ် ဒီးပတြၢၤ ပှၤလၢ အမၤတၢ်ဂ့ၤတဖၣ်န့ၣ် ဒိးပၢသုသးလၢ အဝဲသ့ၣ် အဖီလာ်တက့ၢ်.+ ၁၅ ကစၢ်ယွၤ အဲၣ်ဒိးဝဲလၢ သုကမၤဘှ့ၣ် ပှၤလၢအသးတဆးဘၣ် အတၢ်ကတိၤလၢ အကမၣ်တဖၣ် ခီဖျိလၢ သုမၤတၢ်ဂ့ၤအဃိလီၤ.+ ၁၆ အိၣ်မူဒ်ပှၤလၢအအိၣ်ဒီး တၢ်သဘျ့အသိးတက့ၢ်.+ ဘၣ်ဆၣ် တဘၣ်သူသုတၢ်သဘျ့ ဒ်သိးသုကတဲပူၤဖျဲးသုသးလၢ သုကမၤကမၣ်တၢ် အဂီၢ်တဂ့ၤ.+ သူအီၤဒ်သိး သုကမၤတၢ်ဒ် ကစၢ်ယွၤအကုၢ်တဖၣ် အသိးတက့ၢ်.+ ၁၇ ယူးယီၣ်ပာ်ကဲ ပှၤအကလုာ်ကလုာ်တက့ၢ်.+ အဲၣ်ဒီပုၢ်ဝဲၢ် ခဲလၢာ်တက့ၢ်.+ ပျံၤကစၢ်ယွၤ+ ဒီးယူးယီၣ်ပာ်ကဲ စီၤပၤတက့ၢ်.+
၁၈ မ်တၢ်အခ့အပှၤတဖၣ် ဒိးပၢအသးလၢ အကစၢ်တဖၣ်အဖီလာ် လၢတၢ်ပာ်ကဲ လၢလၢပှဲၤပှဲၤအပူၤတက့ၢ်.+ ဒီးအဝဲသ့ၣ် ကဘၣ်ဒိးပၢအသးလၢ အကစၢ်တဖၣ်လၢ အသးဂ့ၤ ဒီးအိၣ်ဒီး တၢ်ဆီၣ်လီၤသး* အဖီလာ် တကးဒံးဘၣ် လၢအကစၢ်လၢ အသးတဂ့ၤဘၣ်တဖၣ် အဖီလာ် စ့ၢ်ကီးလီၤ. ၁၉ ပှၤတဂၤ အတၢ်ကမၣ်တအိၣ်ဘၣ် သနာ်က့ အဝဲမ့ၢ်တူၢ်ဘၣ် တၢ်ကီတၢ်ခဲ ဒီးဘၣ်နးဘၣ်ဖှီၣ် မ့ၢ်လၢ အဂုာ်ကျဲးစၢးပၢၤဃာ် အသးလၢအသ့ၣ်ညါဒၣ်တၢ် လၢအကဆှီလၢ ကစၢ်ယွၤ အမဲာ်ညါန့ၣ်+ ကစၢ်ယွၤ ဘၣ်သူၣ်ဘၣ်သးအီၤလီၤ. ၂၀ ပှၤမ့ၢ်တီၢ်သု မ့ၢ်လၢ သုမၤတၢ်ကမၣ်အဃိ ဒီးသုမ့ၢ်တူၢ်တၢ်ခီၣ်တၢ် သနာ်က့ အဘျုးကအိၣ် တမံၤမံၤဧါ.+ ဘၣ်ဆၣ် သုမ့ၢ်တူၢ်တၢ်နးတၢ်ဖှီၣ် မ့ၢ်လၢ သုမၤတၢ်ဂ့ၤအဃိန့ၣ် ကစၢ်ယွၤ ဘၣ်သူၣ်ဘၣ်သးဝဲလီၤ.+
၂၁ နီၢ်ကီၢ်န့ၣ် ကစၢ်ယွၤကိးဃီၤသု ဆူကျဲအဝဲအံၤ, မ့ၢ်လၢ ခရံာ်ဒၣ်လဲာ် တူၢ်တၢ်လၢသုဂီၢ်အဃိလီၤ.+ ဒီးအဝဲပာ်လီၤ တၢ်အဒိအတဲာ် ဒ်သိးသု ကယီၢ်အခီၣ်လီၢ် ဘူးဘူးတံၢ်တံၢ် အဂီၢ်လီၤ.+ ၂၂ အဝဲတမၤ တၢ်ဒဲးဘးနီတမံၤဘၣ်+ ဒီးတၢ်လီတၢ်ဝ့ၤ တဟဲထီၣ်လၢ အကိာ်ပူၤဘၣ်.+ ၂၃ ဖဲပှၤတဲဆါအီၤအခါ+ အဝဲတက့ၤတဲဆါက့ၤဝဲဘၣ်.+ ဖဲပှၤမၤအၢမၤနးအီၤအခါ+ အဝဲတတဲပျံၤတဲဖုးက့ၤဝဲဘၣ်. လၢတၢ်န့ၣ်အလီၢ် အဝဲအးလီၤအသးလၢ ပှၤလၢအစံၣ်ညီၣ်တၢ်+ တီတီလိၤလိၤတဂၤန့ၣ် အစုပူၤလီၤ. ၂၄ အဝဲစိာ် ပတၢ်ဒဲးဘးလၢ+ အနီၢ်ခိအပူၤလၢ သ့ၣ်တၢၣ်အလိၤ*+ ဒ်သိး ပကထူၣ်ဖျဲးထီၣ်လၢ တၢ်ဒဲးဘး ဒီးပကမူလၢ တၢ်တီတၢ်လိၤအဂီၢ်လီၤ. ဒီး “သုဘျါက့ၤလၢ အတၢ်ပူၤလီၢ်တဖၣ် အဃိလီၤ.”+ ၂၅ လၢညါန့ၣ် သုလီၤဂာ် ဒ်သိးဒီး သိလၢအဟးဖျိး+ ဘၣ်ဆၣ်ခဲအံၤ သုဟဲက့ၤလၢ ပှၤကွၢ်သိ+ ဒီးပှၤလၢအကွၢ်ထွဲ သုသးသမူတဂၤန့ၣ် အအိၣ်လံ.