၁ ပ့းတရူး

၂ လၢတၢ်န့ၣ်အဃိ ပာ်တ့ၢ်ကွံာ် တၢ်အၢတၢ်သီခဲလၢာ်, တၢ်လီတၢ်ဝ့ၤ, တၢ်ပာ်မၤသး, တၢ်သူၣ်က့ၣ်သးကါ ဒီးတၢ်တဲဆါခဲလၢာ်တက့ၢ်. ၂ ဒီးဒ်ဖိသၣ်လၢ အအိၣ်ဖျဲၣ်ထီၣ်သီသီ ဆၢန့ၢ်ဘၣ် တၢ်နုၢ်ထံအသိး သုဝဲစ့ၢ်ကီး မၤဒိၣ်ထီၣ် သုတၢ်သးအိၣ်ဆၢန့ၢ်ဘၣ် တၢ်နုၢ်ထံစီဆှံလၢ အဟဲလၢ ယွၤအကလုၢ်ကထါအပူၤ ဒ်သိးသု ကဒိၣ်ထီၣ်ထီထီၣ် တုၤလၢ တၢ်အုၣ်က့ၤခီၣ်က့ၤ ခီဖျိလၢ တၢ်နုၢ်ထံစီဆှံအံၤ အဃိန့ၣ်တက့ၢ်. ၃ ဒီးသုမၤဒ်န့ၣ်သ့မ့ၢ်လၢ သုလ့ၣ်ကွၢ်တ့ၢ်လံလၢ ကစၢ်န့ၣ် အသူၣ်ဂ့ၤသးဝါအဃိလီၤ.

၄ အဝဲမ့ၢ်လၢၢ်မူတဖျၢၣ်လၢ ပှၤဟီၣ်ခိၣ်ဖိတဖၣ် တၢၤကွံာ်အီၤ ဘၣ်ဆၣ် ကစၢ်ယွၤဃုထၢအီၤ ဒီးပာ်လုၢ်ပာ်ပှ့ၤအီၤဒိၣ်မးလီၤ. ဖဲသုလဲၤလၢအအိၣ်အခါ ၅ ဒ်သုမ့ၢ် လၢၢ်မူတဖၣ်အသိးန့ၣ် တၢ်သူၣ်ထီၣ်သုလၢ နီၢ်သးအဟံၣ်လၢ သုကကဲထီၣ် ပှၤလုၢ်တၢ်အဒိၣ် စီဆှံတဒူၣ် ဒ်သိးသု ကဟ့ၣ်လုၢ်ထီၣ် နီၢ်သးတၢ်လုၢ်တၢ်ပာ် တဖၣ်လၢ ကစၢ်ယွၤ ဘၣ်သူၣ်ဘၣ်သးဝဲ ခီဖျိလၢ ယ့ၣ်ၡူးခရံာ်လီၤ. ၆ တၢ်ကွဲးအသး တဲဝဲလၢ “ကွၢ်တက့ၢ်, ယကပာ်လီၤလၢၢ်လၢ အဘၣ် တၢ်ဃုထၢထီၣ်အီၤတဖျၢၣ်န့ၣ် လၢစံယိၣ်အပူၤလီၤ. လၢၢ်အံၤ မ့ၢ်တၢ်သူၣ်ထီၣ်အခီၣ်ထံး အလၢၢ်လၢ အလုၢ်ဒိၣ်ပှ့ၤဒိၣ်တဖျၢၣ်န့ၣ်လီၤ. ဒီးပှၤလၢ အစူၢ်က့ၤနာ်က့ၤအီၤန့ၣ်အသးတဟးဂီၤဝဲနီတဘျီဘၣ်.”

၇ သုဝဲသ့ၣ်အံၤ မ့ၢ်လၢသုမ့ၢ် ပှၤလၢ အစူၢ်က့ၤနာ်က့ၤတၢ်တဖၣ်အဃိ အဝဲမ့ၢ်ပှၤလၢ အလုၢ်ဒိၣ်ပှ့ၤဒိၣ် လၢသုဂီၢ်လီၤ. ဘၣ်ဆၣ် မ့မ့ၢ် လၢပှၤလၢ အတစူၢ်တနာ်တၢ်ဘၣ်တဖၣ်အဂီၢ်န့ၣ် တမ့ၢ်ဒ်န့ၣ်ဘၣ်. တၢ်ကွဲးအသးတဲဝဲလၢ “လၢၢ်တဖျၢၣ်လၢ ပှၤသူၣ်ဟံၣ်ဖိတဖၣ် တၢၤကွံာ်ဝဲန့ၣ် ကဲထီၣ်ဝဲလၢၢ်လၢ အရ့ဒိၣ်ကတၢၢ်တဖျၢၣ်”* ၈ ဒီး “ကဲထီၣ် တၢ်ဘၣ်တိၢ်အလၢၢ်တဖျၢၣ် ဒီးတၢ်မၤလီၤဃံၢ်အလၢၢ်တဖျၢၣ်” လီၤ. အဝဲသ့ၣ် လီၤဃံၢ်မ့ၢ်လၢ အဝဲသ့ၣ် တဒိကနၣ် ကစၢ်ယွၤ အကလုၢ်ကထါဘၣ် အဃိလီၤ. တၢ်အကတၢၢ်ဒ်အံၤ အိၣ်ခိးပာ်စၢၤအဝဲသ့ၣ်လီၤ. ၉ ဘၣ်ဆၣ် သုမ့ၢ် “ပှၤလၢအဘၣ် တၢ်ဃုထၢထီၣ်အီၤတဒူၣ်, ပှၤလုၢ်တၢ်အဒိၣ် လၢအမ့ၢ်စ့ၢ်ကီး စီၤပၤတဖၣ်, ပှၤစီဆှံတကလုာ်, ပှၤဂီၢ်မုၢ်လီၤလီၤဆီဆီ လၢကစၢ်ယွၤအဂီၢ်, ဒ်သိးသုကတဲဖျါထီၣ် ကစၢ်ယွၤ အတၢ်ဂ့ၤတၢ်ဝါတဖၣ် သကုၤဆးဒးလီၤ.” အဝဲမ့ၢ်ပှၤလၢ အကိးထီၣ်သုလၢ တၢ်ခံးကျါဆူ အတၢ်ကပီၤလီၤလးအပူၤန့ၣ်လီၤ. ၁၀ တဘျီခါ သုတမ့ၢ် ကစၢ်ယွၤအပှၤဂီၢ်မုၢ်ဘၣ်. ဘၣ်ဆၣ်ခဲအံၤ သုကဲထီၣ်ကစၢ်ယွၤ အပှၤဂီၢ်မုၢ်လီၤ. ဒီးတဘျီခါ ကစၢ်ယွၤတပာ်ဖျါထီၣ် တၢ်သးကညီၤလၢ သုဖီခိၣ်ဘၣ်. ဘၣ်ဆၣ်ခဲအံၤ အဝဲပာ်ဖျါထီၣ် တၢ်သးကညီၤလၢ သုဖီခိၣ်လီၤ.

၁၁ ဒီပုၢ်ဝဲၢ်သးဘိသ့ၣ်ဧၢ, ဒ်သုမ့ၢ်ပှၤထံဂၤကီၢ်ဂၤ ဒီးပှၤလၢအိၣ်ဝဲဆိးဝဲ တစိၢ်တလီၢ် လၢဟီၣ်ခိၣ်အံၤအပူၤအသိး ယဟ့ၣ်သဆၣ်ထီၣ်သုလၢ ဆဲးဟးဆှဲး တၢ်ဖံးတၢ်ညၣ် အတၢ်သူၣ်လီသးကွံတဖၣ် လၢအဒုးလိာ်သးဒီးသုန့ၣ်တက့ၢ်. ၁၂ ဆဲးပၢၤဃာ် သုလုၢ်လၢ်သကဲာ်ပဝး လၢအဂ့ၤလၢ ပှၤကလုာ်တဖၣ်အကျါတက့ၢ်. သုမ့ၢ်မၤဒ်န့ၣ်န့ၣ် ဖဲအဝဲသ့ၣ် ပာ်ဒ့ၣ်ပာ်ကမၣ်သုလၢ သုမ့ၢ်ပှၤမၤကမၣ်တၢ်တဖၣ်အခါ အဝဲသ့ၣ်ကထံၣ်ဘၣ် သုတၢ်မၤလၢ အဂ့ၤတဖၣ်လီၤ. လၢတၢ်န့ၣ်အဃိ အဝဲသ့ၣ်ကမၤလၤကပီၤ ကစၢ်ယွၤ ဖဲအသမံသမိးကွၢ်တၢ် အမုၢ်နံၤအတီၢ်ပူၤလီၤ.

၁၃ လၢကစၢ်အဃိ ဒိးပၢသုသးလၢ တၢ်စိတၢ်ကမီၤလၢ ပှၤဟီၣ်ခိၣ်ဖိ ဒုးအိၣ်ထီၣ်ဝဲခဲလၢာ် အဖီလာ်တက့ၢ်. စီၤပၤလၢအမ့ၢ် ပှၤလၢအဒိၣ်န့ၢ်ဒံးသု ၁၄ ဒီးပဒိၣ်ဖးဒိၣ်တဖၣ် လၢအမ့ၢ် ပှၤလၢစီၤပၤဆှၢလီၤဝဲလၢ အကစံၣ်ညီၣ် ပှၤမၤကမၣ်တၢ်တဖၣ် ဒီးပတြၢၤ ပှၤလၢ အမၤတၢ်ဂ့ၤတဖၣ်န့ၣ် ဒိးပၢသုသးလၢ အဝဲသ့ၣ် အဖီလာ်တက့ၢ်. ၁၅ ကစၢ်ယွၤ အတၢ်ဘၣ်သးအိၣ်ဝဲလၢ သုကမၤဘှ့ၣ် ပှၤလၢအသးတဆးဘၣ် အတၢ်ကတိၤလၢ အကမၣ်တဖၣ် ခီဖျိလၢ သုမၤတၢ်ဂ့ၤအဃိလီၤ. ၁၆ အိၣ်ဒ်ပှၤလၢအအိၣ်ဒီး တၢ်သဘျ့အသိးတက့ၢ်. ဘၣ်ဆၣ် တဘၣ်သူသုတၢ်သဘျ့ ဒ်တၢ်တဲပူၤဖျဲး လၢသုကမၤကမၣ်တၢ်အဂီၢ်တဂ့ၤ. မ့မ့ၢ် သူအီၤဒ်သိး သုကမၤတၢ်ဒ်ကစၢ်ယွၤအကုၢ်တဖၣ် အသိးန့ၣ်တက့ၢ်. ၁၇ ယူးယီၣ်ပာ်ကဲ ပှၤကိးကလုာ်ဒဲးတက့ၢ်. အဲၣ်ဒီပုၢ်ဝဲၢ်တဖၣ် ခဲလၢာ်တက့ၢ်. ပျံၤကစၢ်ယွၤ ဒီးယူးယီၣ်ပာ်ကဲ စီၤပၤတက့ၢ်.

၁၈ မ်တၢ်အခ့အပှၤတဖၣ် ဒိးပၢအသးလၢ အကစၢ်တဖၣ်အဖီလာ် လၢတၢ်ပာ်ကဲ လၢလၢပှဲၤပှဲၤအပူၤ ဒီးတမ့ၢ်ထဲ ကစၢ်တဖၣ်လၢအသးဂ့ၤ ဒီးအိၣ်ဒီး တၢ်ဆီၣ်လီၤသးဘၣ်,* ကစၢ်လၢ အသးတဂ့ၤဘၣ်တဖၣ် စ့ၢ်ကီးန့ၣ်တက့ၢ်. ၁၉ ပှၤတဂၤလၢ အတၢ်ကမၣ်တအိၣ်ဘၣ် သနာ်က့ အဝဲမ့ၢ်တူၢ်ဘၣ် တၢ်ကီတၢ်ခဲ ဒီးဘၣ်နးဘၣ်ဖှီၣ် မ့ၢ်လၢ အဂုာ်ကျဲးစၢးပၢၤဃာ် အသးလၢအသ့ၣ်ညါဒၣ်တၢ် လၢအကဆှီလၢ ကစၢ်ယွၤ အမဲာ်ညါန့ၣ် ကစၢ်ယွၤ ဘၣ်သူၣ်ဘၣ်သးအီၤလီၤ. ၂၀ ပှၤမ့ၢ်တီၢ်သု မ့ၢ်လၢ သုမၤတၢ်ကမၣ်အဃိ ဒီးသုမ့ၢ်တူၢ်တၢ်ခီၣ်တၢ် သနာ်က့ အဘျုးကအိၣ်ဒ်လဲၣ်. ဘၣ်ဆၣ် သုမ့ၢ်တူၢ်တၢ်နးတၢ်ဖှီၣ် မ့ၢ်လၢ သုမၤတၢ်ဂ့ၤအဃိန့ၣ် ကစၢ်ယွၤ ဘၣ်သူၣ်ဘၣ်သးဝဲလီၤ.

၂၁ နီၢ်ကီၢ်န့ၣ် တၢ်ကိးဃီၤသု ဆူကျဲအဝဲအံၤ, မ့ၢ်လၢ ခရံာ်ဒၣ်လဲာ် တူၢ်တၢ်လၢသုဂီၢ်အဃိလီၤ. ဒီးအဝဲပာ်လီၤ တၢ်အဒိအတဲာ် ဒ်သိးသု ကယီၢ်အခီၣ်လီၢ် ဘူးဘူးတံၢ်တံၢ် အဂီၢ်လီၤ. ၂၂ အဝဲတမၤ တၢ်ဒဲးဘးနီတမံၤဘၣ် ဒီးတၢ်လီတၢ်ဝ့ၤ တဟဲထီၣ်လၢ အကိာ်ပူၤဘၣ်. ၂၃ ဖဲပှၤတဲဆါအီၤအခါ အဝဲတက့ၤတဲဆါက့ၤဝဲဘၣ်. ဖဲပှၤမၤအၢမၤနးအီၤအခါ အဝဲတတဲပျံၤတဲဖုးက့ၤဝဲဘၣ်. လၢတၢ်န့ၣ်အလီၢ် အဝဲအးလီၤအသးလၢ ပှၤလၢအစံၣ်ညီၣ်တၢ် တီတီလိၤလိၤတဂၤန့ၣ် အစုပူၤလီၤ. ၂၄ အဝဲစိာ် ပတၢ်ဒဲးဘးလၢ အနီၢ်ခိအပူၤလၢ သ့ၣ်တၢၣ်အလိၤဒ်သိး ပကသံကွံာ်လၢ တၢ်ဒဲးဘး ဒီးပကမူလၢ တၢ်တီတၢ်လိၤအဂီၢ်လီၤ. ဒီး “သုဘျါက့ၤလၢ အတၢ်ပူၤလီၢ်တဖၣ် အဃိလီၤ.” ၂၅ လၢညါန့ၣ် သုလီၤဂာ်ဒီး သိလၢအဟးဖျိး ဘၣ်ဆၣ်ခဲအံၤ သုဟဲက့ၤလၢ ပှၤကွၢ်သိ ဒီးပှၤလၢအကွၢ်ထွဲ သုသးသမူတဂၤန့ၣ် အအိၣ်လီၤ.