မးသဲ
၂၁ ဖဲအဝဲသ့ၣ် လဲၤဘူးကတုၤလၢ ဝ့ၢ်ယရူၤၡလ့ၣ် ဒီးလဲၤတုၤဝဲဖဲ ဘ့ၤသဖၤက့ လၢကစၢၢ်သ့ၣ်စၤယံးအခါ ယ့ၣ်ၡူးမၢ အပျဲၢ်အဘီၣ်ခံဂၤ+ ၂ ဒီးတဲအဝဲသ့ၣ်လၢ “လဲၤနုာ်လီၤလၢသဝီလၢ သုကွၢ်စိအီၤဖျါတဖျၢၣ် ဒီးတဘျီဃီန့ၣ် သုကထံၣ် ကသ့ၣ်ယီၤအမိၢ်လၢ တၢ်စၢဃာ်အီၤ ဒီးအဖိ ကအိၣ်ဒီးအီၤလီၤ. ဃဲၣ်လီၤအဝဲသ့ၣ် ဒီးဟဲက့ၤမူၤအဝဲသ့ၣ်လၢ ယအိၣ်တက့ၢ်. ၃ ပှၤတဂၤဂၤမ့ၢ်တဲသု တၢ်တမံၤမံၤန့ၣ် သုဘၣ်တဲအီၤလၢ ‘ကစၢ်လိၣ်ဘၣ်ဝဲလီၤ.’ ဒီးအကဟ့ၣ်လီၤဝဲ တဘျီဃီလီၤ.”
၄ တၢ်မၤအသးအံၤ မၤလၢထီၣ်ပှဲၤထီၣ်ဝဲ ဝံအတၢ်စံးပာ် လၢအမ့ၢ် ၅ “တဲဘၣ်စံယိၣ် အဖိမုၣ်လၢ* ‘ကွၢ်မီၤ, နစီၤပၤ ဟဲလၢနအိၣ်လံ.+ အသးစူၤ+ ဒီးအဒိးထီၣ်ဝဲ ကသ့ၣ်ယီၤ လၢအမ့ၢ်ဝဲ ကသ့ၣ်ယီၤဖိလီၤ.’”+
၆ အဃိ အပျဲၢ်အဘီၣ်တဖၣ် လဲၤမၤဝဲဒ် ယ့ၣ်ၡူး မၢအဝဲသ့ၣ်အသိးလီၤ.+ ၇ အဝဲသ့ၣ် ဟဲက့ၤမူၤ ကသ့ၣ်ယီၤအမိၢ် ဒီးအဖိ ဒီးဒါလီၤဝဲ အတၢ်ကူတၢ်ကၤလၢ ကသ့ၣ်ယီၤအမိၢ် ဒီးအဖိအလိၤ ဒီးယ့ၣ်ၡူးဆ့ၣ်နီၤဝဲလၢ အလိၤလီၤ.+ ၈ ဒီးပှၤဂီၢ်မုၢ်အါတက့ၢ်န့ၣ် ဒါလီၤအကူအကၤ လၢကျဲပူၤ+ ဒီးတနီၤန့ၣ် ကျီလီၤဝဲသ့ၣ်ဒ့ ဒီးပာ်လီၤဝဲလၢ ကျဲပူၤလီၤ. ၉ တကးဒံးဘၣ် ပှၤဂီၢ်မုၢ်လၢ အဟးလၢအမဲာ်ညါ ဒီးလၢအလီၢ်ခံန့ၣ် ကိးပသူထီၣ်ဝဲလၢ “ပှၤလၢ အအိၣ်လၢ တၢ်လီၢ်ထီၣ်ထီတဂၤဧၢ, ပဃ့ကညးနၤလၢ မၤပူၤဖျဲး စီၤဒၤဝံးအဖိခွါ* တက့ၢ်.+ ဒီးပှၤလၢအဟဲလၢ ယဟိဝၤယွၤ* အမံၤတဂၤအံၤန့ၣ် မ်အဘၣ်ဆိၣ်ဂ့ၤတက့ၢ်.+ ပဃ့ကညးနၤလၢ မၤပူၤဖျဲးအီၤတက့ၢ်.”+
၁၀ ဖဲယ့ၣ်ၡူး နုာ်လီၤလၢ ဝ့ၢ်ယရူၤၡလ့ၣ်အခါ တၢ်တၢထီၣ်တၢလီၤ အိၣ်ထီၣ်ဝဲလၢ ဝ့ၢ်ဒီတဖျၢၣ်အပူၤ ဒီးပှၤသံကွၢ်ဝဲလၢ “အဝဲ မ့ၢ်မတဂၤလဲၣ်.” ၁၁ ပှၤဂီၢ်မုၢ်တဖၣ် တဲဝဲလၢ “အဝဲမ့ၢ် ဝံယ့ၣ်ၡူးလၢ+ အဟဲလၢ ဝ့ၢ်နစၤရ့း လၢကီၢ်ကၤလံၤလါ အပူၤလီၤ.”
၁၂ ယ့ၣ်ၡူး လဲၤနုာ်လီၤလၢ တၢ်လုၢ်ဟံၣ်အပူၤ ဒီးနီဟးထီၣ်ကွံာ်ဝဲ ကယဲၢ်ပှၤလၢအ ပှ့ၤတၢ်ဆါတၢ်လၢ တၢ်လုၢ်ဟံၣ်အပူၤလီၤ. ဒီးအဝဲ မၤလီၤတကျၢၢ်ဝဲ ပှၤခီလဲစ့ဖိတဖၣ် အစီၢ်နီၤခိၣ် ဒီးပှၤဆါ ထိၣ်လွံၢ်တဖၣ် အလီၢ်ဆ့ၣ်နီၤလီၤ.+ ၁၃ ယ့ၣ်ၡူးတဲ အဝဲသ့ၣ်လၢ “တၢ်ကွဲးအသးအိၣ်ဝဲလၢ ‘ယဟံၣ်န့ၣ် ကဘၣ် တၢ်ကိးအီၤလၢ တၢ်ဃ့ထုကဖၣ်အဟံၣ်’+ ဘၣ်ဆၣ် သုမၤကဲထီၣ်အီၤလၢ တၢ်ဟုၣ်တၢ်ဘျၣ် အဟံၣ်လီၤ.”+ ၁၄ ဒီးပှၤမဲာ်တထံၣ်တၢ် ဒီးပှၤခီၣ်ဟးဂီၤတဖၣ် လဲၤလၢ ယ့ၣ်ၡူးအအိၣ် လၢတၢ်လုၢ်ဟံၣ်ပူၤ ဒီးယ့ၣ်ၡူးမၤဘျါက့ၤ အဝဲသ့ၣ်လီၤ.
၁၅ ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် ထံၣ်ယ့ၣ်ၡူး မၤတၢ်လီၤလးတဖၣ် ဒီးဖိသၣ်ပိာ်ခွါတဖၣ် ကိးပသူထီၣ်လၢ တၢ်လုၢ်ဟံၣ်ပူၤလၢ “ပဃ့ကညးနၤလၢ မၤပူၤဖျဲး စီၤဒၤဝံးအဖိခွါတက့ၢ်.”+ ဖဲန့ၣ်အခါ အဝဲသ့ၣ် သးဒိၣ်ထီၣ်တၢ်လီၤ.+ ၁၆ အဝဲသ့ၣ်တဲဘၣ် ယ့ၣ်ၡူးလၢ “ဖိသၣ်တဖၣ် တဲတၢ်မနုၤလဲၣ်န့ၣ် နနၢ်ဟူဧါ.” ယ့ၣ်ၡူးတဲဆၢက့ၤ အဝဲသ့ၣ်လၢ “မ့ၢ်, ယနၢ်ဟူ. ဘၣ်ဆၣ် ‘တၢ်စံးထီၣ်ပတြၢၤ ကဟဲထီၣ်လၢ ဖိသၣ် ဒီးဖိသၣ်အီနုၢ်တဖၣ် အထးခိၣ်’ န့ၣ် သုတဖးဘၣ် နီတဘျီဧီၤ.”+ ၁၇ ဒီးယ့ၣ်ၡူး ဟးထီၣ်ကွံာ်လၢ ဝ့ၢ်ပူၤ ဒီးလဲၤဝဲလၢ ဘ့ၤသနံသဝီ ဒီးအိၣ်ဝဲဖဲန့ၣ် တနၤလီၤ.+
၁၈ လၢဂီၤခီအဆၢကတီၢ် ဖဲအဝဲက့ၤလၢ ဝ့ၢ်ယရူၤၡလ့ၣ်အခါ လၢကျဲန့ၣ် အဝဲအဲၣ်ဒိးအီၣ်တၢ်လီၤ.+ ၁၉ ဒီးဖဲအဝဲ ထံၣ်စိဃီၤ ချၢၣ်ဒၢတထူၣ် လၢကျဲကပၤအခါ အဝဲလဲၤလၢ အခီၣ်ထံး ဒီးတထံၣ် အသၣ်နီတဖျၢၣ်ဘၣ်, အိၣ်ထဲအလၣ်လီၤ.+ ဖဲန့ၣ်အခါ အဝဲတဲ ချၢၣ်ဒၢတထူၣ်အံၤလၢ “မ်နသုတသၣ်ထီၣ် နီတဘျီလၢၤတဂ့ၤ.”+ ဒီးချၢၣ်ဒၢတထူၣ်န့ၣ် ဃ့ထီဝဲတဘျီဃီလီၤ. ၂၀ ဖဲအပျဲၢ်အဘီၣ်တဖၣ် ထံၣ်ဝဲအခါ အဝဲသ့ၣ် ကမၢကမၣ် ဒီးတဲဝဲလၢ “ချၢၣ်ဒၢတထူၣ်အံၤ ဃ့ထီဝဲ တဘျီဃီသ့ဒ်လဲၣ်.”+ ၂၁ ယ့ၣ်ၡူးတဲဆၢ အဝဲသ့ၣ်လၢ “ယကတဲဘၣ်သု တီတီလၢ သုတၢ်နာ်မ့ၢ်အိၣ် ဒီးသုသးမ့ၢ်တဒ့ဒီဘၣ်န့ၣ် သုမၤဃ့ထီချၢၣ်ဒၢအထူၣ် ဒ်ယမၤအသိးသ့ဝဲ တကးဒံးဘၣ် သုမ့ၢ်တဲကစၢၢ်တဖျၢၣ်အံၤလၢ ‘သုးနသး ဒီးကွံာ်လီၤနသးလၢ ပီၣ်လဲၣ်ပူၤ’ န့ၣ်ကကဲထီၣ်ဝဲဒ်န့ၣ်လီၤ.+ ၂၂ ကယဲၢ်တၢ်လၢ သုဃ့အီၤလၢ တၢ်နာ်လၢ တၢ်ထုကဖၣ်အပူၤန့ၣ် သုကဒိးန့ၢ်ဘၣ်အီၤလီၤ.”+
၂၃ လၢခံ ယ့ၣ်ၡူးလဲၤနုာ်လီၤလၢ တၢ်လုၢ်ဟံၣ်ပူၤ ဒီးဖဲအဝဲသိၣ်လိတၢ်အခါ ပှၤလုၢ်တၢ်ဒိၣ်အခိၣ်တဖၣ် ဒီးပှၤဂီၢ်မုၢ် အပှၤသူၣ်က့သးပှၢ်တဖၣ် ဟဲလၢအအိၣ် ဒီးတဲအီၤလၢ “နမၤတၢ်သ့ၣ်တဖၣ်အံၤ လၢမတဂၤ အစိကမီၤလဲၣ်. ဒီးမတဂၤ ဟ့ၣ်နၤ တၢ်စိတၢ်ကမီၤအံၤလဲၣ်.”+ ၂၄ ယ့ၣ်ၡူးတဲဆၢ အဝဲသ့ၣ်လၢ “ယၤနာ်က့ ယကသံကွၢ်သုတၢ်တမံၤ. သုမ့ၢ်တဲဆၢယၤန့ၣ် ယၤစ့ၢ်ကီး ယမၤတၢ်သ့ၣ်တဖၣ်အံၤ လၢမတဂၤ အစိအကမီၤလဲၣ်န့ၣ် ယကတဲဘၣ်သုလီၤ. ၂၅ မတဂၤ မၢလီၤ စီၤယိၤဟၣ်လၢ ကဒိးဘျၢပှၤဂၤ လၢထံလဲၣ်. ကစၢ်ယွၤလၢ အအိၣ်လၢမူခိၣ်န့ၣ်ဧါ မ့တမ့ၢ် ပှၤဟီၣ်ခိၣ်ဖိဧါ.” ဒီးအဝဲသ့ၣ် တဲလိာ်အသး ကဒဲကဒဲလၢ “ပမ့ၢ်တဲလၢ ‘ယွၤလၢအအိၣ်လၢ မူခိၣ်’ န့ၣ်အကတဲပှၤလၢ ‘မ့မ့ၢ်ဒ်န့ၣ်န့ၣ် ဘၣ်မနုၤအဃိ သုတနာ်အီၤဘၣ်လဲၣ်.’+ ၂၆ ဘၣ်ဆၣ် ပမ့ၢ်တဲလၢ ‘ပှၤဟီၣ်ခိၣ်ဖိ’ န့ၣ်ပပျံၤပှၤဂီၢ်မုၢ်, မ့ၢ်လၢ အဝဲသ့ၣ်ခဲလၢာ် နာ်ဝဲလၢ စီၤယိၤဟၣ်န့ၣ် မ့ၢ်ဝံတဂၤအဃိလီၤ.” ၂၇ အဃိ အဝဲသ့ၣ်တဲဆၢ ယ့ၣ်ၡူးလၢ “ပတသ့ၣ်ညါဘၣ်.” ယ့ၣ်ၡူးတဲဆၢ အဝဲသ့ၣ်လၢ “ယၤစ့ၢ်ကီး ယမၤတၢ်သ့ၣ်တဖၣ်အံၤ လၢမတဂၤ အစိအကမီၤလဲၣ်န့ၣ် ယတတဲသုဘၣ်.
၂၈ “မ့ၢ်သုဆိကမိၣ်ဒ်လဲၣ်. ပှၤတဂၤ အဖိအိၣ် ခံဂၤလီၤ. အဝဲလဲၤတဲအဖိလၢအဒိၣ်တဂၤလၢ ‘ဖိဧၢ, တနံၤညါအံၤ လဲၤမၤတၢ်လၢ စပံးကျီး အပူၤနီၤ.’ ၂၉ အဖိတဂၤအံၤ တဲဆၢအီၤလၢ ‘ယတလဲၤဘၣ်.’ ဘၣ်ဆၣ် လၢခံန့ၣ် အသးတမုာ်ဘၣ်အဃိ အလဲၤဝဲလီၤ. ၃၀ ဒီးအဝဲလဲၤကဒီးလၢ အဖိလၢ အဆံးတဂၤအအိၣ် ဒီးတဲအီၤဒ်သိးဒီးမၢကၢာ်လီၤ. ဒီးအဖိတဂၤအံၤ တဲဆၢအီၤလၢ ‘ယကလဲၤ’ ဘၣ်ဆၣ်အဝဲတလဲၤဝဲဘၣ်. ၃၁ မ့မ့ၢ်ဒ်န့ၣ်န့ၣ် အဝဲသ့ၣ်ခံဂၤအံၤ မၤတၢ်လၢအဘၣ်အပၢ်အသး ဖဲလဲၣ်တဂၤလဲၣ်.” ဒီးပှၤတဖၣ်န့ၣ် တဲဝဲလၢ “အဒိၣ်တဂၤလီၤ.” ဒီးယ့ၣ်ၡူး တဲအဝဲသ့ၣ်လၢ “ယကတဲဘၣ်သု တီတီလၢ ပှၤထၢတၢ်ခိတၢ်သွဲဖိ ဒီးပိာ်မုၣ်ဆါလီၤအီၣ်သးတဖၣ် ကလဲၤနုာ်လီၤလၢ ကစၢ်ယွၤအဘီမုၢ်အပူၤ လၢသုမဲာ်ညါလီၤ. ၃၂ စီၤယိၤဟၣ် ဟဲလၢသုအိၣ် ဒီးပာ်ဖျါထီၣ်န့ၢ်သုလၢ တၢ်တီတၢ်လိၤအကျဲ ဘၣ်ဆၣ် သုတနာ်အီၤဘၣ်.+ မ့မ့ၢ် ပှၤထၢတၢ်ခိတၢ်သွဲဖိ ဒီးပိာ်မုၣ်ဆါလီၤအီၣ်သးတဖၣ် နာ်အီၤလီၤ. ဖဲသုထံၣ်ဘၣ် ဒ်န့ၣ်အခါဒၣ်လဲာ် သုတပီၢ်ယၢ်လီၤက့ၤသုသး ဒီးသုတနာ်အီၤဘၣ်.
၃၃ “ကနၣ်တၢ်ကတိၤဒိ အဂၤတခါတက့ၢ်. ပှၤအိၣ်ဝဲတဂၤ, အဝဲအိၣ်ဒီး အဟီၣ်ခိၣ်လီၢ် တကဝီၤ ဒီးအဝဲသူၣ်လီၤဝဲ စပံးတကျီး+ ဒီးကရၢဃာ်ဝဲလီၤ. ဒီးလၢကရၢၢ်ပူၤန့ၣ် အဝဲတ့ထီၣ်စ့ၢ်ကီး စပံးထံအကျိးတခါ ဒီးသူၣ်ထီၣ်ဝဲ တၢးတဖျၢၣ်+ ဒီးငါလီၤဝဲလၢ ပှၤမၤတၢ်ဖိတဖၣ်အအိၣ် ဝံၤဒီး အဝဲလဲၤလၢ ထံဂၤကီၢ်ဂၤလီၤ.+ ၃၄ ဖဲတၢ်ဒဲးတၤသူတၤသၣ် အဆၢကတီၢ် ဘၣ်ဝဲအခါ အဝဲမၢလီၤအကုၢ်တဖၣ် ဒ်သိး ကလဲၤဟံးန့ၢ် တၤသူတၤသၣ် လၢပှၤမၤတၢ်ဖိတဖၣ် အအိၣ်လီၤ. ၃၅ ဘၣ်ဆၣ် ပှၤမၤတၢ်ဖိတဖၣ် ဖီၣ်န့ၢ် အကုၢ်တဖၣ် ဒီးတီၢ်ဝဲတဂၤ, မၤသံဝဲတဂၤ ဒီးကွံာ်သံဝဲ လၢလၢၢ်တဂၤလီၤ.+ ၃၆ ဒီးအဝဲဆှၢလီၤကဒီးဝဲ အကုၢ်လၢအဂၤတဖၣ် အါန့ၢ်ဒံး အဆိကတၢၢ်တဒူၣ်လီၤ. ဘၣ်ဆၣ် ပှၤမၤတၢ်ဖိတဖၣ်န့ၣ် မၤအဝဲသ့ၣ်ဒ်န့ၣ် စ့ၢ်ကီးလီၤ.+ ၃၇ လၢခံကတၢၢ် အဝဲဆှၢလီၤအဖိခွါလၢ အဝဲသ့ၣ်အအိၣ် ဒီးတဲလီၤအသးလၢ ‘အဝဲသ့ၣ် ကပာ်ကဲ ယဖိခွါလီၤ.’ ၃၈ ဖဲပှၤမၤတၢ်ဖိတဖၣ် ထံၣ်ဝဲ ဖိခွါတဂၤအံၤအခါ အဝဲသ့ၣ်တဲလိာ်အသး ကဒဲကဒဲလၢ ‘အဝဲမ့ၢ် ပှၤလၢ အကန့ၢ်သါဘၣ်တၢ် တဂၤလီၤ.+ ဟဲဟီ, ပကလဲၤမၤသံအီၤ ဒီးပကဟံးန့ၢ် အတၢ်န့ၢ်သါလီၤ.’ ၃၉ အဝဲသ့ၣ် ဖီၣ်န့ၢ်အီၤ, ထုးထီၣ်ကွံာ်အီၤလၢ စပံးကျီးအချၢ ဒီးမၤသံအီၤလီၤ.+ ၄၀ အဃိ ဖဲစပံးကျီးကစၢ်တဂၤ ဟဲအခါ အကမၤဝဲ ပှၤမၤတၢ်ဖိတဖၣ်န့ၣ်ဒ်လဲၣ်.” ၄၁ အဝဲသ့ၣ် တဲဘၣ်ယ့ၣ်ၡူးလၢ “မ့ၢ်လၢ ပှၤသ့ၣ်တဖၣ်န့ၣ် အၢဝဲသီဝဲအဃိ အဝဲကမၤသံ အဝဲသ့ၣ် ကိးဂၤဒဲးလီၤ. ဒီးအဝဲကငါလီၤ အစပံးကျီးလၢ ပှၤမၤတၢ်ဖိအဂၤတဖၣ် အစုပူၤ လၢအကဟ့ၣ်အီၤ တၤသူတၤသၣ် ဖဲအဆၢကတီၢ်ဘၣ်လီၤ.”
၄၂ ယ့ၣ်ၡူးတဲဘၣ် အဝဲသ့ၣ်လၢ “သုတဖးဘၣ် တၢ်ကွဲးအသးအံၤ နီတဘျီဧီၤ. ‘လၢၢ်တဖျၢၣ်လၢ ပှၤသူၣ်ဟံၣ်ဖိ တၢၤကွံာ်ဝဲန့ၣ် ကဲထီၣ်ဝဲလၢၢ်လၢ အရ့ဒိၣ်ကတၢၢ်တဖျၢၣ်လီၤ.*+ လၢၢ်အံၤဟဲလၢ ယဟိဝၤယွၤ အအိၣ်အဃိ လီၤကမၢကမၣ်ဒိၣ်မးလီၤ.’+ ၄၃ အဃိ ယကတဲဘၣ်သုလၢ ကစၢ်ယွၤ အဘီအမုၢ်န့ၣ် တၢ်ကဟံးထီၣ်ကွံာ်အီၤ လၢသုအိၣ် ဒီးတၢ်ကဟ့ၣ်လီၤအီၤလၢ ပှၤတကလုာ်လၢ အမၤတၢ်လၢ ကစၢ်ယွၤ မၢအမၤတၢ်တဖၣ်လီၤ.* ၄၄ ဒီးပှၤလၢအလီၤတဲာ်လၢ လၢၢ်အံၤအလိၤန့ၣ် ကဘၣ်ဒိဘၣ်ထံးဝဲ နးမးလီၤ.+ ဒီးပှၤလၢလၢၢ်အံၤ လီၤတဲာ်လၢအလိၤန့ၣ် ကသဘှံးဝဲလီၤ.”+
၄၅ ဖဲပှၤလုၢ်တၢ်ဒိၣ်အခိၣ်တဖၣ် ဒီးပှၤဖၤရံၤၡဲတဖၣ် နၢ်ဟူဘၣ်ဝဲ ယ့ၣ်ၡူးအတၢ်ကတိၤဒိတဖၣ်အခါ အဝဲသ့ၣ် သ့ၣ်ညါဝဲလၢ ယ့ၣ်ၡူးတဲတၢ် ဘၣ်ဃးဒီး အဝဲသ့ၣ်လီၤ.+ ၄၆ အဝဲသ့ၣ် အဲၣ်ဒိးဖီၣ်န့ၢ်အီၤ ဘၣ်ဆၣ် အဝဲသ့ၣ်ပျံၤပှၤဂီၢ်မုၢ်, မ့ၢ်လၢပှၤဂီၢ်မုၢ် နာ်ဝဲလၢယ့ၣ်ၡူးမ့ၢ် ဝံတဂၤအဃိလီၤ.+