၂ ပ့းတရူး
၂ ဘၣ်ဆၣ် လၢအပူၤကွံာ်န့ၣ် ဝံအဘျၣ်တဖၣ် ဟဲအိၣ်ထီၣ်စ့ၢ်ကီး လၢပှၤဂီၢ်မုၢ်အကျါလီၤ. ဒ်န့ၣ်အသိး သရၣ်အဘျၣ်တဖၣ် ကအိၣ်ထီၣ်စ့ၢ်ကီးဝဲလၢ သုကျါလီၤ.+ အဝဲသ့ၣ်ကဒုးအိၣ်ထီၣ် တၢ်လီၤမုၢ်လီၤဖးကစုဒုလၢ အကမၤဟးဂီၤသုတၢ်နာ် ဒီးကသမၢဒၣ်လဲာ် ပှၤလၢ* အပှ့ၤက့ၤအဝဲသ့ၣ်လီၤ.+ အဃိ တၢ်ကမၤဟးဂီၤ အဝဲသ့ၣ်ချ့ချ့လီၤ. ၂ ဒီးပှၤအါဂၤ ကမၤပိာ်ထွဲအဝဲသ့ၣ် အတၢ်မၤကမၣ်တၢ်လၢ တအိၣ်ဒီးတၢ်မဲာ်ဆှးဘၣ်*+ ဒီးလၢအဝဲသ့ၣ်အဃိ ပှၤကဒုၣ်ဒွဲၣ်စံးအၢ တၢ်မ့ၢ်တၢ်တီအကျဲလီၤ.+ ၃ လၢတၢ်သးကွံအပူၤ အဝဲသ့ၣ်ကသူ တၢ်ကတိၤလၢ အတမ့ၢ်တတီဘၣ်တဖၣ် ဒ်သိးကဟံးန့ၢ် တၢ်ခွဲးတၢ်ယာ်လၢ သုဖီခိၣ်လီၤ. တၢ်စံၣ်ညီၣ်လၢ ကစၢ်ယွၤဆၢတဲာ်ပာ်စၢၤလၢ အဝဲသ့ၣ်အဂီၢ် လၢပျၢၤလံၤလံၤန့ၣ်+ တဟဲစဲၤခံဘၣ် ဒီးတၢ်ကစံၣ်ညီၣ် အဝဲသ့ၣ် သပှၢ်တၢၢ်လီၤ.+
၄ မူခိၣ်ကလူးတဖၣ်လၢ အမၤတ့ၢ်တၢ်ဒဲးဘးန့ၣ်+ ကစၢ်ယွၤတပျဲပူၤအဝဲသ့ၣ် ဒ်သိးအသုတဘၣ် တၢ်သိၣ်ဃီၣ်အီၤတဂ့ၤ အဂီၢ်ဘၣ်. ကစၢ်ယွၤ ကွံာ်လီၤ အဝဲသ့ၣ်လၢ ထၤထၢရၢးအပူၤ*+ ဒီးစၢဃာ်အဝဲသ့ၣ်လၢ တၢ်ခံးသူအပူၤ ဒ်သိးကပာ်ဃာ် အဝဲသ့ၣ်လၢ တၢ်စံၣ်ညီၣ်အဂီၢ်လီၤ.+ ၅ ဒီးကစၢ်ယွၤ တပျဲပူၤစ့ၢ်ကီး ဟီၣ်ခိၣ်လၢပျၢၤ ဒ်သိးအသုတဘၣ် တၢ်သိၣ်ဃီၣ်အီၤတဂ့ၤ အဂီၢ်ဘၣ်.+ ဘၣ်ဆၣ် ဖဲအဝဲဒုးလုၢ်ဘၢကွံာ် ဟီၣ်ခိၣ်လၢအပှဲၤဒီး ပှၤလၢအတယူးယီၣ်ယွၤဘၣ်+ လၢထံအခါ အဝဲဒီသဒၢဝဲ စီၤနိအၤလၢ အမ့ၢ်ပှၤစံၣ်တဲၤတဲလီၤ တၢ်တီတၢ်လိၤအဂ့ၢ်တဂၤန့ၣ်+ ဃုာ်ဒီး ပှၤအဂၤနွံဂၤလီၤ.+ ၆ ဒီးအဝဲစံၣ်ညီၣ် ဝ့ၢ်စဒိၣ် ဒီးဝ့ၢ်ဂမိရၤ ခီဖျိလၢ အဒုးကဲထီၣ်အီၤလၢဖၣ်ဆါ+ ဒီးပာ်ဖျါထီၣ် တၢ်လၢ အကဟဲကဲထီၣ်အသးဒီး ပှၤလၢအတယူးယီၣ်ယွၤဘၣ် အဂီၢ်လီၤ.+ ၇ အဝဲမၤပူၤဖျဲး ပှၤတီပှၤလိၤစီၤလိာ်လီၤ.+ လၢညါန့ၣ် စီၤလိာ် သူၣ်ကိၢ်သးဂီၤတၢ်ဒိၣ်မး ခီဖျိလၢ ပှၤအၢပှၤသီတဖၣ် မၤကမၣ်တၢ်လၢ တအိၣ်ဒီးတၢ်မဲာ်ဆှးဘၣ် အဃိလီၤ. ၈ တနံၤဘၣ်တနံၤ ဖဲပှၤတီပှၤလိၤတဂၤအံၤ အိၣ်မူဘၣ်ဝဲလၢ အဝဲသ့ၣ်အကျါအခါ အနၢ်ဟူဘၣ် ဒီးထံၣ်ဘၣ်ဝဲ တၢ်အၢတၢ်သီတဖၣ်လၢ အဝဲသ့ၣ်မၤဝဲအဃိ အသးတမုာ်နီတစဲးဘၣ်. ၉ အဃိ ယဟိဝၤယွၤ* ကဘၣ်မၤပူၤဖျဲး ပှၤလၢအတီဒီးအီၤတဖၣ်လၢ တၢ်မၤကွၢ်အပူၤဒ်လဲၣ်န့ၣ်+ အသ့ၣ်ညါဝဲလီၤ. ဘၣ်ဆၣ် အဝဲပာ်ဃာ် ပှၤတတီတလိၤတဖၣ်လၢ တၢ်ဟးဂီၤအဂီၢ် ဖဲတၢ်စံၣ်ညီၣ်အမုၢ်နံၤ+ ၁၀ လီၤဆီဒၣ်တၢ် ပှၤလၢအလူၤပှၤဂၤ ဒ်သိးကမၤဘၣ်အၢအဝဲသ့ၣ်+ ဒီးပှၤလၢအဆိကမိၣ်ဆံး ပှၤလၢအအိၣ်ဒီး တၢ်စိတၢ်ကမီၤတဖၣ်လီၤ.+
ပှၤတဖၣ်အံၤ မ့ၢ်ပှၤလၢအဘူၣ်တၢ် ဒီးမၤဖဲအသးလီၤ. ဒီးအဝဲသ့ၣ်ဒုၣ်ဒွဲၣ်စံးအၢ ပှၤလၢအအိၣ်ဒီး အလၤကပီၤတဖၣ်န့ၣ် ဘူၣ်ဝဲလီၤ. ၁၁ မ့မ့ၢ် မူခိၣ်ကလူးတဖၣ်န့ၣ် အဂံၢ်အဘါဆူၣ်န့ၢ်အဝဲသ့ၣ် ဒီးအစိအကမီၤ ဒိၣ်န့ၢ်အဝဲသ့ၣ် သနာ်က့ ခီဖျိမူခိၣ်ကလူးတဖၣ်ပာ်ကဲ ယဟိဝၤယွၤအဃိ+ တပာ်ဒ့ၣ်ပာ်ကမၣ်အဝဲသ့ၣ် လၢတၢ်ဒုၣ်ဒွဲၣ်စံးအၢ အပူၤဘၣ်. ၁၂ မ့မ့ၢ်ပှၤတဖၣ်အံၤန့ၣ် အဝဲသ့ၣ် ဒုၣ်ဒွဲၣ်စံးအၢဝဲ တၢ်လၢအဝဲသ့ၣ် တနၢ်ပၢၢ်ဝဲဘၣ်. အဝဲသ့ၣ် လီၤဂာ်ဒီးဆၣ်ဖိကီၢ်ဖိလၢ အပဲာ်ထံနီၤဖးတၢ် တဘၣ်ဘၣ် လၢအမၤဖဲအသးဒၣ်ဝဲ ဒီးအိၣ်ဖျဲၣ်ထီၣ်လၢ ပှၤကဖီၣ်န့ၢ်အီၤ ဒီးကမၤဟးဂီၤအီၤ အဂီၢ်လီၤ.+ မ့ၢ်လၢ အဝဲသ့ၣ်အကျဲ မ့ၢ်တၢ်ဟးဂီၤအဃိ အဝဲသ့ၣ် ကဘၣ်တၢ်မၤဟးဂီၤအီၤလီၤ. ၁၃ ဒီးခီဖျိလၢ အဝဲသ့ၣ်လဲၤကျဲလၢ အမၤဘၣ်ဒိဘၣ်ထံးတၢ်အဃိ အဝဲသ့ၣ်ကဒိးန့ၢ်ဘၣ်က့ၤ တၢ်ဘၣ်ဒိဘၣ်ထံး ဒ်တၢ်သိၣ်ဃီၣ်အသိးလီၤ.
လၢမုၢ်ဆါခီဒၣ်လဲာ် အဝဲသ့ၣ်အိၣ်မူဖဲအသး ဒီးပာ်ပနီၣ်ဝဲ ဒ်တၢ်မုာ်တၢ်ပၠီၣ်အသိးလီၤ.+ အဝဲသ့ၣ်လီၤဂာ်ဒီး တၢ်မဲၣ်သူမဲၣ်ဂီၤတဖၣ် ဒီးတၢ်ဘၣ်အၢလၢ တၢ်ကူတၢ်ကၤအလိၤလီၤ. ဒီးဖဲအဝဲသ့ၣ်အီၣ်သကိး အီသကိးတၢ်ဒီးသုအခါ+ အဝဲသ့ၣ်ဆှၢကမၣ်ပှၤဂၤလၢ တၢ်သိၣ်လိလၢ အကဘျံးကဘျၣ်အဃိ ကဲထီၣ်တၢ်မၤမုာ်မၤဖှံသးလၢ အဝဲသ့ၣ်အဂီၢ်ဒိၣ်မးလီၤ. ၁၄ အဝဲသ့ၣ် သးဆူၣ်လၢ ကအဲၣ်ဘၢမါအဲၣ်ဘၢဝၤ*+ ဒီးအဝဲသ့ၣ် ပတုာ်မၤတၢ်ဒဲးဘး တန့ၢ်ဘၣ်. အဝဲသ့ၣ်ကွဲန့ၢ်လွဲန့ၢ် ပှၤလၢအတဂၢၢ်တကျၢၤဘၣ်တဖၣ်လီၤ. အဝဲသ့ၣ် သိၣ်လိသ့ထီၣ်အသးလၢ တၢ်သးကွံတကပၤ ဒီးအဝဲသ့ၣ်မ့ၢ်ဖိလၢ အဘၣ်တၢ်ဆိၣ်အၢအီၤလီၤ. ၁၅ ဒီးအဝဲသ့ၣ် ပာ်တ့ၢ်ကွံာ်ကျဲလၢအလိၤ ဒီးတၢ်ဆှၢကမၣ်အဝဲသ့ၣ်လံ. ဒီးအဝဲသ့ၣ် ပိာ်ထွဲထီၣ် စီၤဘဧိၢ်အဖိခွါ စီၤဘံးလၣ်အကျဲလီၤ.+ စီၤဘံးလၣ် မၤကမၣ်တၢ် ခီဖျိလၢ အသးလီဝဲ ခိၣ်ဖးဒိၣ်မး အဃိလီၤ.+ ၁၆ ဘၣ်ဆၣ် အဝဲဘၣ်တၢ်သိၣ်ဃီၣ်အီၤလၢ အတၢ်ကမၣ်အဃိလီၤ.+ ကသ့ၣ်ယီၤလၢ အတဲတၢ်တသ့ဘၣ်န့ၣ် တဲထီၣ်တၢ်ဒ် ပှၤကညီအသိး ဒီးတြီဃာ်ဝံတဂၤအံၤ အတၢ်မၤကြီတၢ်လီၤ.+
၁၇ အဝဲသ့ၣ်န့ၣ် မ့ၢ်ဝဲထံထီၣ်ပၢၢ်လၢ အထံတအိၣ်ဘၣ် ဒီးတၢ်ကသွံလၢ အဒံကွံာ်ဝဲ ခီဖျိလၢ ကလံၤမုၢ်အူတၢ် ဆူၣ်ဆူၣ်အဃိ ဒီးတၢ်ခံးသူအဒိၣ်ကတၢၢ်န့ၣ် ဘၣ်တၢ်ပာ်ဃာ်အီၤလၢ အဝဲသ့ၣ်အဂီၢ်လီၤ.+ ၁၈ တၢ်လၢအဝဲသ့ၣ် တဲဝဲတဖၣ်န့ၣ် ဖျါလၢအရ့ဒိၣ်ဘၣ်ဆၣ် အဘျုးတအိၣ်ဘၣ်. ခီဖျိလၢ အဝဲသ့ၣ်ဆီၣ်ထွဲ တၢ်သူၣ်လီသးကွံလၢအကမၣ်တဖၣ်+ ဒီးတၢ်မၤကမၣ်တၢ်လၢ တအိၣ်ဒီးတၢ်မဲာ်ဆှးဘၣ်အဃိ အဝဲသ့ၣ် ကွဲန့ၢ်လွဲန့ၢ်ဝဲ ပှၤလၢ အထုးလီၤဖးအသးဒီး ပှၤလၢအမၤတၢ်အၢတၢ်သီတဖၣ်ဝံၤဖဲမကၢာ်ဒံးလီၤ.+ ၁၉ သရၣ်အဘျၣ်တဖၣ်အံၤ အၢၣ်လီၤဝဲလၢ ပှၤလၢအပိာ်အဝဲသ့ၣ်အခံန့ၣ် ကဒိးန့ၢ်ဘၣ်တၢ်သဘျ့ ဘၣ်ဆၣ် အဝဲသ့ၣ်အနီၢ်ကစၢ်ဒၣ်ဝဲ မ့ၢ်ဝဲ တၢ်ဘၣ်အၢဘၣ်သီအကုၢ်,+ မ့ၢ်လၢ ပှၤတဂၤဂၤလၢ ပှၤမ့ၢ်ဒိၣ်စိလၢအဖီခိၣ်န့ၣ် အဝဲကကဲထီၣ်ပှၤလၢ အဒိၣ်စိလၢ အဖီခိၣ်တဂၤန့ၣ် အကုၢ်လီၤ.+ ၂၀ ပှၤမ့ၢ်ထူၣ်ဖျဲးထီၣ်ကွံာ်လၢ ဟီၣ်ခိၣ်အတၢ်ဘၣ်အၢဘၣ်သီတဖၣ်+ ခီဖျိ တၢ်သ့ၣ်ညါလီၤတံၢ်လီၤဆဲး ဘၣ်ဃးဒီး တၢ်အုၣ်က့ၤခီၣ်က့ၤကစၢ် ယ့ၣ်ၡူးခရံာ် ဘၣ်ဆၣ် အဝဲသ့ၣ်မ့ၢ်က့ၤ မၤဘၣ်ထွဲလိာ်အသးဒီး တၢ်အၢတၢ်သီတဖၣ်အံၤ ဒီးတၢ်အၢတၢ်သီတဖၣ်အံၤ မ့ၢ်ဒိၣ်စိလၢ အဝဲသ့ၣ်အဖီခိၣ်န့ၣ် အဝဲသ့ၣ်အတၢ်အိၣ်သးလၢ အလီၢ်ခံကတၢၢ်အံၤ ကနးဒိၣ်န့ၢ်ဒံး အတၢ်အိၣ်သးလၢ အခီၣ်ထံးလီၤ.+ ၂၁ အဝဲသ့ၣ် မ့ၢ်တသ့ၣ်ညါ တၢ်တီတၢ်လိၤအကျဲ လီၤတံၢ်လီၤဆဲးဘၣ်န့ၣ် ကဂ့ၤဒိၣ်န့ၢ်ဒံး အဝဲသ့ၣ်သ့ၣ်ညါဝဲ တၢ်တီတၢ်လိၤအကျဲ ဝံၤဒီးဃၣ်ကွံာ်အသးလၢ တၢ်မၤလိာ်စီဆှံလၢ အဝဲသ့ၣ်ဒိးန့ၢ်ဘၣ်ဝဲန့ၣ်လီၤ.+ ၂၂ တၢ်ကတိၤဒိအိၣ်ဝဲလၢ “ထွံၣ်န့ၣ် က့ၤအီၣ်ကဒါက့ၤ တၢ်လၢအဘှိးထီၣ်ဝဲ ဒီးထီးန့ၣ် ပှၤမၤကဆှီအီၤဝံၤဒီး အက့ၤကလိာ်ကဒါက့ၤလၢ ကပံာ်ကျါလီၤ.”+ တၢ်ကတိၤဒိအံၤ ဟဲလၢထီၣ်ပှဲၤထီၣ်ဒီး အဝဲသ့ၣ်လီၤ.