၂ ကရံၣ်သူး
၁၂ ယဘၣ်ပာ်ကဖၢလၢ ယသးလီၤ. မ့ၢ်လီၤ, အတကဲဘျုးဘၣ် ဘၣ်ဆၣ် ယကဆဲးတဲ ဘၣ်ဃးဒီး တၢ်ထံၣ်လၢညါခီ+ ဒီးတၢ်လီၣ်ဖျါတဖၣ် လၢအဟဲလၢ ကစၢ်အအိၣ်လီၤ.+ ၂ ယသ့ၣ်ညါ ပှၤပိာ်ခွါတဂၤလၢ အမ့ၢ်ခရံာ်အပျဲၢ်အဘီၣ် ဒီးလၢအပူၤကွံာ် ၁၄ နံၣ်န့ၣ် အဝဲဘၣ်တၢ်စိာ်ထီၣ်အီၤ သတူၢ်ကလာ်ဆူ မူခိၣ်သၢတီၤတတီၤ ဒီးမ့ၢ်အအိၣ်လၢ နီၢ်ခိဧါ တအိၣ်လၢ အနီၢ်ခိဘၣ်ဧါန့ၣ် ယတသ့ၣ်ညါဘၣ်. ဘၣ်ဆၣ် ကစၢ်ယွၤသ့ၣ်ညါဝဲလီၤ. ၃ မ့ၢ်, ယသ့ၣ်ညါ ပှၤပိာ်ခွါတဂၤန့ၣ် ဒီးမ့ၢ်အအိၣ်လၢ နီၢ်ခိဧါ တအိၣ်လၢ အနီၢ်ခိဘၣ်ဧါန့ၣ် ယတသ့ၣ်ညါဘၣ်. ဘၣ်ဆၣ် ကစၢ်ယွၤ သ့ၣ်ညါဝဲလီၤ. ၄ ဒီးအဝဲ ဘၣ်တၢ်စိာ်ထီၣ်အီၤ သတူၢ်ကလာ် ဆူပၤရဒံစူးအပူၤလီၤ. ဒီးအဝဲနၢ်ဟူဘၣ် တၢ်ကတိၤတဖၣ်လၢ ပှၤတဲဖျါထီၣ်က့ၤအီၤ တသ့ဘၣ် ဒီးတၢ်တဟ့ၣ်အခွဲးလၢ ပှၤကတဲ တၢ်ကတိၤတဖၣ်န့ၣ်ဘၣ်. ၅ ယကပာ်ကဖၢလၢ ယသးလၢ ပှၤဒ်န့ၣ်တဂၤအဃိ ဘၣ်ဆၣ် ဘၣ်ဃးဒီး ယနီၢ်ကစၢ်န့ၣ် ယကပာ်ကဖၢလၢယသး ထဲဒၣ်လၢ ယတၢ်ဂံၢ်စၢ်ဘါစၢ် အဃိလီၤ. ၆ ယမ့ၢ်အဲၣ်ဒိး ပာ်ကဖၢလၢ ယသးဒၣ်လဲာ် ယတကဲထီၣ်ပှၤတဂၤလၢ အသးတဆးဘၣ်, မ့ၢ်လၢယတဲ တၢ်မ့ၢ်တၢ်တီအဃိလီၤ. ဘၣ်ဆၣ် ဒ်သိး ပှၤသုတဆိကမိၣ်ဒိၣ်ယၤ အါန့ၢ်ဒံး တၢ်လၢအဝဲသ့ၣ် ထံၣ်ဝဲလၢယအိၣ် ဒီးနၢ်ဟူဝဲလၢ ယအိၣ်တဂ့ၤအဂီၢ် ယတပာ်ကဖၢလၢ ယသးဘၣ်. ၇ ဒီးပှၤတကြၢး ဆိကမိၣ်ဒိၣ်ယၤ ခီဖျိလၢ ယဒိးန့ၢ်ဘၣ် တၢ်လီၣ်ဖျါလၢ အလီၤလိၢ်လီၤလးတဖၣ်အံၤ အဃိဘၣ်.
ဒ်သိးယသု တပာ်ကဖၢလၢယသး အါတလၢတဂ့ၤအဂီၢ် တၢ်ကီတၢ်ခဲတခါ လၢအလီၤဂာ်ဒ်သိးဒီး တၤဆှုၣ်တၤမဲလၢ ယဖံးယညၣ်အကျါန့ၣ် ဆဲးမၤတံာ်တာ်ယၤ+ ဒီးအလီၤဂာ်ဒီး မုၣ်ကီၤလံၢ်* အမူခိၣ်ကလူးလီၤ. ဒီးအဆဲးမၤဆါယၤ ဒ်သိး ယသုတပာ်ကဖၢလၢယသး အါတလၢတဂ့ၤ အဂီၢ်လီၤ. ၈ ဒီးဒ်သိး တၤဆှုၣ်တၤမဲတခါအံၤ ကဟးထီၣ်ကွံာ်လၢ ယအိၣ်အဂီၢ် ယဃ့ကညးကစၢ် သၢဘျီညါ. ၉ ဘၣ်ဆၣ် အဝဲတဲဘၣ်ယၤလၢ “ယတၢ်သးကညီၤ ဒိၣ်ဒိၣ်မုၢ်မုၢ်လၢ ယပာ်ဖျါထီၣ်တ့ၢ်လၢနဖီခိၣ်န့ၣ် လၢပှဲၤလၢနဂီၢ်လံ. ဖဲနဂံၢ်စၢ်ဘါစၢ်အခါ နအိၣ်ဒီး ယတၢ်စိတၢ်ကမီၤ လၢလၢပှဲၤပှဲၤလီၤ.”+ အဃိ လၢတၢ်သးခုဒိၣ်ဒိၣ်အပူၤ ယကပာ်ကဖၢလၢယသး ဘၣ်ဃးဒီး ယတၢ်ဂံၢ်စၢ်ဘါစၢ်တဖၣ် ဒ်သိးခရံာ်အစိကမီၤ ကအိၣ်ကဆိးလၢယဖီခိၣ် ဒ်ဒဲတဖျၢၣ်အသိးလီၤ. ၁၀ အဃိ လၢခရံာ်အဂီၢ်န့ၣ် ယသးခုလၢ တၢ်ဂံၢ်စၢ်ဘါစၢ်တဖၣ်, တၢ်တဲဆါ, တၢ်တယၢဘၣ်, တၢ်မၤနးမၤဖှီၣ် ဒီးလၢတၢ်ကီတၢ်ခဲတဖၣ် အပူၤလီၤ. ဖဲယဂံၢ်စၢ်ဘါစၢ်အခါ ယအိၣ်ဒီး တၢ်စိတၢ်ကမီၤလီၤ.+
၁၁ သုတတဲဖျါထီၣ် တၢ်ဂ့ၤလၢ ယမၤအီၤတဖၣ်ဘၣ် အဃိ မ့ၢ်ဒၣ်သုမၢဆူၣ်ယၤလၢ ယကကဲထီၣ် ပှၤလၢအသးတဆးဘၣ်. ယမ့တမ့ၢ် တၢ်နီတမံၤဘၣ် သနာ်က့ တၢ်လၢ အပာ်ဖျါထီၣ်လၢ ယဆံးန့ၢ်ဒံး သုတၢ်မၢဖိဖးဒိၣ်တဖၣ်န့ၣ် တအိၣ်နီတမံၤဘၣ်.+ ၁၂ နီၢ်ကီၢ်န့ၣ် လၢတၢ်တူၢ်န့ၢ်ခီၣ်ကဲ အါမးအပူၤ ယပာ်ဖျါထီၣ်န့ၢ်သု တၢ်အုၣ်အသးတဖၣ်လၢ ယမ့ၢ် ပှၤတၢ်မၢဖိတဂၤ+ ဒီးယမၤတၢ်ပနီၣ်လီၤလးတဖၣ် ဒီးတၢ်ဖံးတၢ်မၤလၢအအိၣ်ဒီး အစိကမီၤတဖၣ်လီၤ.+ ၁၃ သုဒိးန့ၢ်ဘၣ် တၢ်ခွဲးတၢ်ယာ်စှၤန့ၢ်ဒံး တၢ်အိၣ်ဖှိၣ်အဂၤတဖၣ် လၢကျဲဒ်လဲၣ်. ဘၣ်သ့ၣ်သ့ၣ်ကမ့ၢ် ခီဖျိထဲလၢ ယတကဲထီၣ် တၢ်ဝံဃၢလၢ သုဂီၢ်ဘၣ်အဃိဧါသၢၤ.+ လၢတၢ်ကမၣ်တခါအံၤအဃိ ဝံသးစူၤပျၢ် ယတၢ်ကမၣ်သၢၤ.
၁၄ ယအိၣ်ကတဲာ် ကတီၤယသးလၢ ယကလဲၤလၢ သုအိၣ်န့ၣ် ပှဲၤထီၣ်သၢဘျီတဘျီလံ ဒီးတမ့ၢ်လၢ ယကကဲထီၣ် တၢ်ဝံဃၢလၢသုဂီၢ်ဘၣ်. ယတလီကီ သုတၢ်ဖိတၢ်လံၤတဖၣ်ဘၣ်.+ ဘၣ်ဆၣ် ယလီကီသုလီၤ. မ့ၢ်လီၤ, ပှၤတမုၢ်လၢ်လၢ ဖိတဖၣ်+ ကပာ်ဖှိၣ်တၢ်ထူးတၢ်တီၤလၢ မိၢ်ပၢ်အဂီၢ်ဘၣ်. ပှၤမုၢ်လၢ်လၢ မိၢ်ပၢ်ကပာ်ဖှိၣ်တၢ်လၢ အဖိအဂီၢ်တခီလီၤ. ၁၅ မ့မ့ၢ်ယၤန့ၣ် လၢတၢ်သးခုဖးဒိၣ်အပူၤ ယကသူတၢ်လၢ အအိၣ်ဒီးယၤခဲလၢာ် ဒီးဟ့ၣ်လီၤယသး လၢာ်လၢာ်ဆ့ဆ့ လၢသုဂီၢ်လီၤ.+ ယတၢ်အဲၣ်သု မ့ၢ်ဒိၣ်ထဲအံၤညါန့ၣ် မ့ၢ်သုကြၢးအဲၣ်ယၤ ဆံးန့ၢ်အန့ၣ်ဧါ. ၁၆ ဒ်လဲၣ်ဂ့ၤဒ်လဲၣ်ဂ့ၤ ယတကဲထီၣ် တၢ်ဝံဃၢလၢသုဂီၢ်ဘၣ်.+ ဘၣ်ဆၣ် သုတဲလၢ ယ “ခိၣ်နူာ်လဲၣ်မး” ဒီးယဖီၣ်န့ၢ်သုလၢ “တၢ်လီတၢ်ဝ့ၤ” လီၤ. ၁၇ မ့ၢ်ယဟံးန့ၢ် တၢ်ခွဲးတၢ်ယာ်လၢ သုဖီခိၣ် ခီဖျိ ပှၤတဖၣ်လၢ ယဆှၢလီၤအီၤလၢ သုအိၣ်န့ၣ်ဧါ. ၁၈ ယဟ့ၣ်ဂံၢ်ဟ့ၣ်ဘါ စီၤတံတူးလၢ အကလဲၤလၢသုအိၣ် ဒီးယဆှၢလီၤ ဒီပုၢ်ဝဲၢ်ခွါတဂၤ ဃုာ်ဒီးအီၤလီၤ. မ့ၢ်စီၤတံတူး ဟံးန့ၢ်တၢ်ခွဲးတၢ်ယာ်လၢ သုဖီခိၣ် လၢကျဲတဘိဘိဧါ.+ ပလဲၤတၢ်လၢ တၢ်သးတဖျၢၣ်ဃီအပူၤ တမ့ၢ်ဘၣ်ဧါ. ဒီးပမၤတၢ်ဒ်သိးသိး တမ့ၢ်ဘၣ်ဧါ.
၁၉ ဖဲသုဖး လံာ်ပရၢတဘ့ၣ်အံၤအခါ သုကဆိကမိၣ်လၢ အိၣ်ဒၣ် ပတဲဆၢက့ၤ သုတၢ်ပာ်ဒ့ၣ်ပာ်ကမၣ်ပှၤလီၤ. ဘၣ်ဆၣ် တမ့ၢ်ဘၣ်. ဒ်ပမ့ၢ်ခရံာ်အပျဲၢ်အဘီၣ်တဖၣ်အသိး ပတဲတၢ်တီတီလၢ ကစၢ်ယွၤအမဲာ်ညါလီၤ. ယပှၤသးဘိသ့ၣ်ဧၢ, တၢ်ခဲလၢာ်လၢ ပမၤန့ၣ် မ့ၢ်ဒ်သိး ကဟ့ၣ်ဂံၢ်ဟ့ၣ်ဘါသု အဂီၢ်လီၤ. ၂၀ ယဘၣ်ယိၣ်လၢ ဖဲယလဲၤတုၤလၢ သုအိၣ်အခါ ဘၣ်သ့ၣ်သ့ၣ် ယကထံၣ်ဘၣ်လၢ သုတအိၣ်ဒ် ယဆၢမုၢ်လၢ်အသိးဘၣ် ဒီးဘၣ်သ့ၣ်သ့ၣ် သုကထံၣ်ဘၣ်လၢ ယတအိၣ်ဒ် သုဆၢမုၢ်လၢ် အသိးစ့ၢ်ကီးဘၣ်. ဒီးလၢသုကျါန့ၣ် ဘၣ်သ့ၣ်သ့ၣ် ကအိၣ်ဒီး တၢ်အ့ၣ်လိာ်ဆိးက့, တၢ်သူၣ်က့ၣ်သးက့ၣ်, တၢ်သူၣ်ဒိၣ်သးဖျိး, တၢ်သးတလီၤပလိာ်လိာ်သး, တၢ်တဲဆါ, တၢ်တဲခူသူၣ်ပှၤဂ့ၢ်, တၢ်ပာ်ထီၣ်ထီသး ဒီးတၢ်ဘံဘူတဖၣ်လီၤ. ၂၁ ဒီးဘၣ်သ့ၣ်သ့ၣ် ဖဲယလဲၤတုၤအခါ ယကစၢ်ယွၤ ကပျဲလၢယဒိးန့ၢ်ဘၣ် တၢ်မဲာ်ဆှးလၢ သုမဲာ်ညါလီၤ. ဒီးယသးကဘၣ်ဒိ ခီဖျိလၢ ပှၤအါဂၤလၢ အမၤတ့ၢ် တၢ်ဒဲးဘးလၢ အပူၤကွံာ်တဖၣ်န့ၣ် တပီၢ်ယၢ်လီၤက့ၤ အသးလၢ အဝဲသ့ၣ် အတၢ်တကဆှီဘၣ်တဖၣ်, တၢ်မၤကမၣ်မုၣ်ကမၣ်ခွါ* ဒီးတၢ်မၤကမၣ်တၢ်လၢ တအိၣ်ဒီး တၢ်မဲာ်ဆှးတဖၣ်* အဃိလီၤ.