၂ ၡမူၤအ့လး
၂၄ ဒီးပှၤတဂၤ ထိၣ်ဟူးထိၣ်ဂဲၤထီၣ် စီၤဒၤဝံး ဒီးတဲဝဲလၢ “လဲၤဂံၢ်+ အံၣ်စရ့လး ဒီးပှၤအိၣ်လၢယူဒၤအဒူၣ်ကျါ အနီၣ်ဂံၢ်သၢၤ.”+ ယဟိဝၤယွၤ သးပှံၢ်ထီၣ်ကဒီး ပှၤအံၣ်စရ့လးဖိ ဒိၣ်မးလီၤ.+ ၂ ဒီးစီၤပၤဒၤဝံး တဲဘၣ် သုးခိၣ်ကျၢၢ် စီၤယိၤအာ်+ လၢအအိၣ်ဒီးအီၤန့ၣ်လၢ “ဝံသးစူၤ လဲၤလၢအံၣ်စရ့လး ကိးဒူၣ်ဒဲးအအိၣ် စးထီၣ်လၢဒၣ် ပၢၢ်တုၤလၢ ဘ့ၢ်ၡဘၤ+ ဒီးဂံၢ်ပှၤဂီၢ်မုၢ်* အနီၣ်ဂံၢ် ဒ်သိး ယကသ့ၣ်ညါလၢ ပှၤဂီၢ်မုၢ်အနီၣ်ဂံၢ် အိၣ်ထဲလဲၣ်န့ၣ်တက့ၢ်.” ၃ ဘၣ်ဆၣ် စီၤယိၤအာ်တဲဘၣ်စီၤပၤလၢ “မ်နကစၢ်ယဟိဝၤယွၤ မၤအါထီၣ်ပှၤဂီၢ်မုၢ်အနီၣ်ဂံၢ် အစး ၁၀၀ ဒီးမ်ကစၢ်စီၤပၤ ထံၣ်ဘၣ်လၢအမဲာ်တက့ၢ်. ဘၣ်ဆၣ် ဘၣ်မနုၤအဃိ ကစၢ်စီၤပၤအဲၣ်ဒိးမၤဒ်အံၤလဲၣ်.”
၄ ဘၣ်ဆၣ် စီၤပၤမၢဆူၣ် စီၤယိၤအာ် ဒီးသုးခိၣ်တဖၣ် အဃိ စီၤယိၤအာ်ဒီး သုးခိၣ်တဖၣ် ဟးထီၣ်လၢ စီၤပၤအမဲာ်ညါ ဒီးလဲၤဝဲဒ်သိးကဂံၢ် ပှၤအံၣ်စရ့လးဖိ အနီၣ်ဂံၢ်အဂီၢ်လီၤ.+ ၅ အဝဲသ့ၣ်ခီဂာ်ဝဲ ထံကျိယၢ်ဒ့ၣ် ဒီးဆီလီၤဒဲဖဲ ဝ့ၢ်ဧရိၤဧ့ၢ်+ လၢဝ့ၢ်လၢ အအိၣ်လၢ တၢ်တြီၤအခၢၣ်သးန့ၣ် အထွဲတခီလီၤ.* ဒီးအဝဲသ့ၣ် လဲၤဝဲလၢ ပှၤကးဖိအဟီၣ်ကဝီၤ ဒီးဆဲးလဲၤဝဲလၢ ဝ့ၢ်ယၤစ့ၢ်န့ၣ်လီၤ.+ ၆ ဝံၤဒီး အဝဲသ့ၣ် ဆဲးလဲၤလၢ ကံးလဧးအဟီၣ်ကဝီၤ,+ တၤဃတံၣ်ဃီဒၡံၤ အဟီၣ်ကဝီၤ, ဒၣ်ယၤဧၣ် ဒီးလဲၤတရံးဝဲ တုၤလၢ ဝ့ၢ်စံဒိၣ်လီၤ.+ ၇ ဒီးအဝဲသ့ၣ် လဲၤဝဲလၢ ဝ့ၢ်စိၢ်လၢ+ အအိၣ်ဒီး အဒူၣ်လၢအကျၢၤ ဒီးပှၤဃံၤဝံဖိ+ ဒီးပှၤကနၤဧၣ်ဖိ အဝ့ၢ်ခဲလၢာ်လီၤ. လၢခံကတၢၢ် အဝဲသ့ၣ်လဲၤဝဲလၢ ဝ့ၢ်ဘ့ၢ်ၡဘၤ+ လၢအအိၣ်လၢ နဲကဲၤလၢ+ ယူဒၤအဟီၣ်ကဝီၤအပူၤန့ၣ်လီၤ. ၈ အဃိ လၢခွံလါဒီးအသီ ၂၀ အတီၢ်ပူၤန့ၣ် အဝဲသ့ၣ်လဲၤလၢ ကီၢ်ဒီတဘ့ၣ်အပူၤဒီး ဟဲက့ၤတုၤဝဲလၢ ဝ့ၢ်ယရူၤၡလ့ၣ်လီၤ. ၉ ဒီးစီၤယိၤအာ်ဟ့ၣ်လီၤ စီၤပၤလၢ ပှၤဂီၢ်မုၢ်အနီၣ်ဂံၢ်လီၤ. အံၣ်စရ့လး သုးဖိလၢ အဂံၢ်ဆူၣ်ဘါဆူၣ် လၢအအိၣ်ဒီးနးန့ၣ် ခဲလၢာ်ခဲဆ့ အိၣ်ဝဲအဂၤ ၈၀၀,၀၀၀ ဒီးပှၤပိာ်ခွါလၢယူဒၤ အဒူၣ်အကျါန့ၣ်အိၣ်ဝဲ အဂၤ ၅၀၀,၀၀၀ လီၤ.+
၁၀ စီၤဒၤဝံး ဂံၢ်ပှၤဂီၢ်မုၢ် ဝံၤအလီၢ်ခံ စီၤဒၤဝံး အသးသိၣ်ဃီၣ်အီၤလီၤ.+ ဒီးစီၤဒၤဝံး တဲယဟိဝၤယွၤလၢ “ယဟိဝၤယွၤဧၢ, ယဟးမၤနါစိၤတၢ်ဒ်န့ၣ်+ အဃိ ယမၤကမၣ်ဘၣ်နၤ+ ဖးဒိၣ်လံ. ခဲအံၤ ဝံသးစူၤ ပျၢ်ယတၢ်ကမၣ်တက့ၢ်.”+ ၁၁ ဖဲစီၤဒၤဝံး ဂဲၤဆၢထၢၣ်လၢ ဂီၤခီအခါ ယဟိဝၤယွၤတဲဘၣ် ဝံကး+ လၢအမ့ၢ် စီၤဒၤဝံး အပှၤထံၣ်တၢ်ထံၣ်လၢညါခီတဂၤလၢ ၁၂ “လဲၤတဲဘၣ်စီၤဒၤဝံးလၢ ‘ယဟိဝၤယွၤတဲဝဲလၢ “ယကဟ့ၣ်နၤ တၢ်ဃုထၢသၢခါလီၤ. လၢတၢ်သၢခါအံၤအကျါန့ၣ် ဃုထၢအီၤတခါ ဒီးယကမၤနၤဒ် နဃုထၢအသိးလီၤ.”’”+ ၁၃ အဃိ ဝံကး ဟဲတဲဘၣ် စီၤဒၤဝံးလၢ “တၢ်သၣ်ဝံၤလီၤဒိ ကဘၣ်အိၣ်လၢ နကီၢ်ပူၤနွံနံၣ်ဧါ,+ နကဃ့ၢ်လၢ နဒုၣ်နဒါတဖၣ် လူၤနၤအဃိန့ၣ် သၢလါဧါ+ မ့တမ့ၢ် တၢ်ဆါသံသတြိာ် ကအိၣ်လၢ နကီၢ်ပူၤသၢသီဧါ.+ ယကဘၣ် စံးဆၢက့ၤပှၤလၢ အမၢလီၤယၤတဂၤ ဒ်လဲၣ်န့ၣ် ခဲအံၤဆိကမိၣ်ထံ လီၤတံၢ်လီၤဆဲးတက့ၢ်.” ၁၄ အဃိ စီၤဒၤဝံးတဲဘၣ် ဝံကးလၢ “ယဘၣ်ကိၢ်ဘၣ်ဂီၤဒိၣ်မးလၢ တၢ်ဂ့ၢ်တခါအံၤအဃိ ဘၣ်ဆၣ် တဘၣ်ဟ့ၣ်လီၤယၤလၢ ပှၤကညီအစုပူၤတဂ့ၤ.+ ယဟိဝၤယွၤ အတၢ်သးကညီၤအိၣ်အါမး+ အဃိ မ်ပလီၤဘၣ်လၢ အစုပူၤတက့ၢ်.”+
၁၅ အဃိ ယဟိဝၤယွၤ ဒုးလီၤဘၣ် တၢ်ဆါသံသတြိာ်လၢ+ အံၣ်စရ့လးအဖီခိၣ် စးထီၣ်လၢဂီၤခီ တုၤလၢ တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤန့ၣ်လီၤ. ဒီးစးထီၣ်လၢ ဝ့ၢ်ဒၣ် တုၤလၢ ဝ့ၢ်ဘ့ၢ်ၡဘၤန့ၣ်+ ပှၤဂီၢ်မုၢ်သံဝဲအဂၤ ၇၀,၀၀၀ လီၤ.+ ၁၆ ဒီးယဟိဝၤယွၤ အမူခိၣ်ကလူးတဂၤန့ၣ် အိၣ်ဝဲလၢ ပှၤယဘူၣ်ဖိ+ စီၤအၤရနၤ အကြဲၢ်ဃၢၤလီၤ.+ ဖဲမူခိၣ်ကလူးတဂၤအံၤ ယူာ်ဃီၤအစုလိၤလိၤ လၢဝ့ၢ်ယရူၤၡလ့ၣ် ဒ်သိးကမၤဟးဂီၤဝဲအခါ,+ ယဟိဝၤယွၤ သးအုးဝဲ လၢတၢ်ဆါသံသတြိာ် လၢအဒုးလီၤဘၣ်ဝဲအဃိလီၤ. ဒီးကစၢ်ယွၤတဲဘၣ် မူခိၣ်ကလူးလၢ အမၤဟးဂီၤတၢ်လၢ ပှၤဂီၢ်မုၢ်အကျါ တဂၤန့ၣ်လၢ “ပာ်လီၤကွံာ် နစု, ပှဲၤန့ၣ်ဘၣ်လံ.”
၁၇ ဖဲစီၤဒၤဝံးထံၣ်ဝဲ မူခိၣ်ကလူးလၢ အမၤသံ ပှၤဂီၢ်မုၢ်အခါ, စီၤဒၤဝံးတဲ ယဟိဝၤယွၤလၢ “ပှၤတဖၣ်အံၤ*+ မၤကမၣ်ဘၣ် တၢ်မနုၤလဲၣ်. ပှၤလၢအမၤတၢ်ဒဲးဘး ဒီးမၤကမၣ်တၢ်န့ၣ် အကဲယၤလီၤ. အဃိ ဝံသးစူၤ မ်နသိၣ်ဃီၣ်ထဲယၤဒီး ယပၢ်အဒူၣ်ဖိထၢဖိတဖၣ်တက့ၢ်.”+
၁၈ ဖဲတၢ်တနံၤန့ၣ် ဝံကးလဲၤလၢ စီၤဒၤဝံးအအိၣ် ဒီးတဲအီၤလၢ “လဲၤသူၣ်ထီၣ် တၢ်လုၢ်လီၢ်တခါ လၢယဟိဝၤယွၤအဂီၢ် လၢပှၤယဘူၣ်ဖိ စီၤအၤရနၤ အကြဲၢ်ပူၤတက့ၢ်.”+ ၁၉ အဃိ စီၤဒၤဝံးလဲၤထီၣ်ဝဲ ဒ်ဝံကးတဲအီၤ ဒီးယဟိဝၤယွၤ မၤလိာ်ဝဲအသိးလီၤ. ၂၀ ဖဲစီၤအၤရနၤ ကွၢ်လီၤတၢ်ဒီး အဝဲထံၣ်ဝဲစီၤပၤဒီး အခ့အပှၤတဖၣ် ဟဲဝဲလိၤလိၤလၢ အအိၣ်အခါ အဝဲလဲၤဝဲတဘျီဃီ ဒီးထိၣ်လီၤပှီၤအသး လၢဟီၣ်ခိၣ်လိၤ လၢစီၤပၤ အမဲာ်ညါလီၤ. ၂၁ စီၤအၤရနၤ သံကွၢ်ဝဲလၢ “ကစၢ်စီၤပၤဧၢ, နဟဲလၢယအိၣ်န့ၣ် ဘၣ်တၢ်တမံၤမံၤဧါ.” စီၤဒၤဝံး တဲဆၢက့ၤဝဲလၢ “ဒ်သိးယဟိဝၤယွၤ သုတသိၣ်ဃီၣ် ပှၤဂီၢ်မုၢ်လၢၤတဂ့ၤအဂီၢ် ယဟဲပှ့ၤနကြဲၢ် လၢယကတ့ထီၣ် တၢ်လုၢ်လီၢ်လၢ အဂီၢ်လီၤ.”+ ၂၂ ဘၣ်ဆၣ် စီၤအၤရနၤတဲ စီၤဒၤဝံးလၢ “ကစၢ်စီၤပၤဧၢ, ဟံးန့ၢ်ခီလီအီၤ ဒီးကွၢ်ဖဲ နအဲၣ်ဒိးမၤန့ၣ် မၤဟီ. ကျီၢ်တဖၣ်လၢ တၢ်လုၢ်ဒွဲၣ်အူအဂီၢ် ဒီးနီၣ်ယီၢ်ဘု ဒီးကျီၢ်အတၢ်ပီးတၢ်လီလၢ နကသူဒ်သ့ၣ်မုၣ်အသိးန့ၣ် အိၣ်ဖဲအံၤလီၤ. ၂၃ အိ စီၤပၤဧၢ, တၢ်သ့ၣ်တဖၣ်အံၤ ခဲလၢာ်န့ၣ် ယ* ဟ့ၣ်လီၤနၤလီၤ.” ဒီးစီၤအၤရနၤ တဲစီၤပၤလၢ “မ်ယဟိဝၤယွၤ ဘၣ်သူၣ်ဘၣ်သးနၤတက့ၢ်.”
၂၄ ဘၣ်ဆၣ် စီၤပၤတဲ စီၤအၤရနၤလၢ “ယတဟံးန့ၢ်ခီလီဘၣ်, ယကပှ့ၤန့ၢ်အီၤလီၤ. တၢ်လၢ ယဒိးန့ၢ်ခီလီအီၤန့ၣ် ယတဟ့ၣ်လုၢ်ထီၣ်အီၤ လၢယကစၢ်ယဟိဝၤယွၤအအိၣ် ဒ်တၢ်လုၢ်ဒွဲၣ်အူတဖၣ်အသိးဘၣ်.” အဃိ စီၤဒၤဝံး ပှ့ၤဝဲကြဲၢ် ဒီးကျီၢ်တဖၣ်လၢ စ့ၡက့လး ၅၀ လီၤ.*+ ၂၅ ဒီးဖဲန့ၣ်န့ၣ် စီၤဒၤဝံး တ့ထီၣ်ဝဲ တၢ်လုၢ်လီၢ်တခါ+ လၢယဟိဝၤယွၤအဂီၢ် ဒီးဟ့ၣ်လုၢ်ထီၣ် တၢ်လုၢ်ဒွဲၣ်အူ ဒီးတၢ်လုၢ်အိၣ်ဃူအိၣ်ဖိးတဖၣ်လီၤ. ဒီးယဟိဝၤယွၤ ဒိကနၣ်စီၤဒၤဝံး အတၢ်ဃ့ကညး လၢပှၤဂီၢ်မုၢ်အဂီၢ်+ ဒီးကစၢ်ယွၤအတၢ်သိၣ်ဃီၣ် ပှၤအံၣ်စရ့လးဖိန့ၣ် ပတုာ်ဝဲလီၤ.