နဃ့မယၤ

၁ အဝဲအံၤမ့ၢ်ဝဲ စီၤဃကါလယၤ အဖိခွါ စီၤနဃ့မယၤ+ အတၢ်ကတိၤလီၤ. ဖဲအနံၣ်​ ၂၀ နံၣ်တနံၣ်, လါကံးစလ့ၤန့ၣ်* ယအိၣ်လၢ နီ* ၡူၡၣ်+ အပူၤလီၤ. ၂ ဖဲန့ၣ်အခါ ယဒီပုၢ်ဝဲၢ်ခွါ စီၤဃနၤနံ+ ဒီးပှၤပိာ်ခွါအဂၤတဖၣ်လၢ အအိၣ်ဟဲလၢ ယူဒၤအဟီၣ်ကဝီၤန့ၣ်​ ဟဲဟးလၢယအိၣ်လီၤ. ဒီးယသံကွၢ်အဝဲသ့ၣ်​ ဘၣ်ဃးဒီး ဝ့ၢ်ယရူၤၡလ့ၣ်​ ဒီးပှၤယူဒၤဖိလၢ အက့ၤအိၣ်လၢ ကီၢ်ပူၤအဂ့ၢ်အကျိၤလီၤ.+ ၃ အဝဲသ့ၣ်​ တဲယၤလၢ “ပှၤလၢအက့ၤအိၣ်​ လၢကီၢ်ပူၤ ဒီးအိၣ်ဒံးလၢ ယူဒၤအဟီၣ်ကဝီၤတဖၣ်န့ၣ်​ အတၢ်အိၣ်သး နးဒိၣ်မး ဒီးအဝဲသ့ၣ်​ မဲာ်ဆှးဒိၣ်မး.+ ဒီးယရူၤၡလ့ၣ်​ အဝ့ၢ်ဒူၣ်တဖၣ်​ လၢပှၤမၤလီၤပှီၢ်တ့ၢ်အီၤ+ ဒီးဝ့ၢ်အတြဲၤလၢ ပှၤဒွဲၣ်အူထီၣ်တ့ၢ်အီၤတဖၣ်န့ၣ်+ အိၣ်ဝဲဒ်န့ၣ် တုၤခဲအံၤလီၤ.”

၄ ဖဲယနၢ်ဟူ တၢ်ကတိၤတဖၣ်န့ၣ်အခါ ယဆ့ၣ်နီၤဟီၣ်လီၤ. ယသးအုး ဒီးယဒုၣ်တၢ်အီၣ်+ ဒီးဃ့ထုကဖၣ်လၢ မူခိၣ်ကစၢ်အအိၣ်​ အါနံၤအါသီလီၤ. ၅ ယတဲလၢ “အိ မူခိၣ်ကစၢ် ယဟိဝၤယွၤဧၢ, နမ့ၢ် ယွၤလၢအဒိၣ်အမုၢ် ဒီးအလီၤယူးယီၣ်ပာ်ကဲ ဒီးနမၤလၢပှဲၤ နတၢ်အၢၣ်လီၤအီလီၤ ဒီးနပာ်ဖျါထီၣ်​ တၢ်အဲၣ်လၢအတီ လၢပှၤလၢအအဲၣ်နၤ ဒီးအမၤထွဲ နတၢ်မၤလိာ်တဖၣ်​ အဖီခိၣ်လီၤ.+ ၆ ဝံသးစူၤ ကွၢ်လီၤ ဒီးဒိကနၣ်​ နခ့နပှၤယၤအံၤ အတၢ်ထုကဖၣ်လၢ အဃ့နၤလၢ တနံၤအံၤတက့ၢ်. လၢမုၢ်ဆါခီ ဒီးလၢမုၢ်နၤခီန့ၣ်+ ယဃ့ထုကဖၣ်​ ဘၣ်ဃးဒီး ပှၤအံၣ်စရ့လးဖိတဖၣ်​ ဒီးယအၢၣ်လီၤ ပှၤအံၣ်စရ့လးဖိတဖၣ်​ အတၢ်ကမၣ်လၢ အမၤကမၣ်ဘၣ်နၤလီၤ. ယၤဒီးယပၢ် အဒူၣ်ဖိထၢဖိတဖၣ်န့ၣ်​ ပမၤကမၣ်ဘၣ်တၢ်လံ.+ ၇ မ့ၢ်လၢ ပတမၤထွဲ နတၢ်မၤလိာ်, နတၢ်ဘျၢ ဒီးနတၢ်သိၣ်တၢ်သီတဖၣ်လၢ နဟ့ၣ်လီၤ နခ့နပှၤ စီၤမိၤၡ့ဘၣ်အဃိ+ ပမၤကမၣ်ဘၣ်နၤ+ သပှၢ်ကတၢၢ်လံ.

၈ “ဝံသးစူၤ သ့ၣ်နီၣ်ထီၣ်​ နတၢ်ကတိၤလၢ နမၤလိာ် နခ့နပှၤ စီၤမိၤၡ့တက့ၢ်. နတဲလၢ ‘သုမ့ၢ်မၤကမၣ်တၢ်န့ၣ်​ ယကမၤ လီၤပြံလီၤပြါသုလၢ ပှၤကလုာ်တဖၣ်​ အကျါလီၤ.+ ၉ ဘၣ်ဆၣ်​ သုမ့ၢ်ဟဲက့ၤဆူယအိၣ်​ ဒီးမၤထွဲ ယတၢ်မၤလိာ်တဖၣ်န့ၣ်​ သုမ့ၢ်လီၤပြံလီၤပြါ တုၤလၢ ဟီၣ်ခိၣ်အနၢၣ်​ အကတၢၢ် ဒၣ်လဲာ် ယကပာ်ဖှိၣ်က့ၤသု+ ဒီးဟဲက့ၤကိးသုလၢ တၢ်လီၢ်လၢ ယဃုထၢအီၤလၢ ယမံၤကအိၣ်​ အလီၢ်န့ၣ်လီၤ.’+ ၁၀ အဝဲသ့ၣ်မ့ၢ် နခ့နပှၤတဖၣ်​ ဒီးနပှၤဂီၢ်မုၢ်လၢ နမၤပူၤဖျဲးအီၤလၢ နစိနကမီၤလၢ အဒိၣ်​ ဒီးနစုလၢ အဂံၢ်ဆူၣ်ဘါဆူၣ်လီၤ.+ ၁၁ အိ ယဟိဝၤယွၤဧၢ, ဝံသးစူၤ ဒိကနၣ်​ နခ့နပှၤယၤအံၤ အတၢ်ထုကဖၣ်​ ဒီးကယဲၢ် နခ့နပှၤခဲလၢာ် လၢအသးအိၣ်​ မၤလၤကပီၤ* နမံၤ အတၢ်ထုကဖၣ်တက့ၢ်. ဝံသးစူၤ တနံၤအံၤ မၤစၢၤယၤ ဒ်သိး တၢ်လၢ ယမၤအံၤ ကကဲထီၣ်လိၣ်ထီၣ်အဂီၢ် ဒီးဒ်သိး စီၤပၤ ကသးကညီၤယၤ အဂီၢ်တက့ၢ်.”+

ဖဲန့ၣ်အခါ ယကဲ စီၤပၤ အပှၤစိာ်စပံးထံဖိလီၤ.+

၂ ဖဲစီၤပၤ အၢ်တၤၡါၡတၤ+ ပၢတၢ် ၂၀ နံၣ်တနံၣ်,+ လါနံစၣ်* ထီၣ်ဝဲအခါန့ၣ်​ ပှၤပာ်လီၤ စပံးထံလၢ စီၤပၤအမဲာ်ညါ ဒီးဒ်ညီနုၢ်အသိး ယဟံးန့ၢ် စပံးထံ ဒီးယလဲၤဟ့ၣ်လီၤ စီၤပၤလီၤ.+ ဖဲန့ၣ်အခါ ယသးအုးဒိၣ်မး ဒီးစီၤပၤတထံၣ်​ ယအိၣ်ဒ်န့ၣ်​ နီတဘျီဘၣ်. ၂ အဃိ စီၤပၤတဲယၤလၢ “ဘၣ်မနုၤအဃိ နမဲာ်တမုာ်ဘၣ်​ ထဲအံၤညါလဲၣ်. နတဆိးက့ဘၣ်အဃိ တၢ်တခါအံၤဒု တမ့ၢ်တၢ်အဂၤဘၣ်. ကမ့ၢ်လၢ နသးဘၣ်ဒိလၢ တၢ်ဂ့ၢ်တမံၤမံၤ အဃိဧါသၢၤ.” ဒီးဖဲန့ၣ်န့ၣ်​ ယပျံၤတၢ်ဒိၣ်မးလီၤ.

၃ ဒီးယတဲဘၣ်​ စီၤပၤလၢ “မ်စီၤပၤ အိၣ်မူဘၣ်​ ဖးယံာ်တက့ၢ်. လၢညါ ပှၤမၤဟးဂီၤ ဝ့ၢ်တဖျၢၣ်လၢ ယမိၢ်ပၢ်ဖံဖု လၢပျၢၤတဖၣ်​ ဘၣ်တၢ်ခူၣ်လီၤအီၤ လၢအပူၤ ဒီးပှၤဒွဲၣ်အူထီၣ်တ့ၢ် ဝ့ၢ်အတြဲၤတဖၣ်လီၤ. ဒီးအအိၣ်ဝဲဒ်န့ၣ်​ တုၤခဲအံၤအဃိ ယတသးအုးဘၣ်​ ကသ့ဧါ.”+ ၄ ဒီးစီၤပၤ တဲယၤလၢ “နအဲၣ်ဒိးဃ့ တၢ်မနုၤလဲၣ်.” တဘျီဃီန့ၣ်​ ယဃ့ဘါထုကဖၣ်တၢ်လၢ မူခိၣ်ကစၢ်အအိၣ်လီၤ.+ ၅ ဒီးယတဲစီၤပၤလၢ “မ့ၢ်ဘၣ်​ စီၤပၤအသး ဒီးနမ့ၢ်ဘၣ်သူၣ်ဘၣ်သး နခ့နပှၤယၤအံၤန့ၣ်​ ပျဲက့ၤယၤလၢ ယူဒၤအဟီၣ်ကဝီၤ လၢဝ့ၢ်လၢ ယမိၢ်ပၢ်ဖံဖု လၢပျၢၤတဖၣ်​ ဘၣ်တၢ်ခူၣ်လီၤအီၤ လၢအပူၤတက့ၢ်. ဒီးယကတ့ထီၣ်က့ၤ ဝ့ၢ်အံၤလီၤ.”+ ၆ ဒီးစီၤပၤ သံကွၢ်ယၤလၢ (ဖဲန့ၣ်အဆၢကတီၢ် အနီၢ်ပၤမုၣ်​ ဆ့ၣ်နီၤလၢ အကပၤ) “နလဲၤတၢ် ကယံာ်ထဲလဲၣ်​ ဒီးနကဟဲက့ၤ ဆံးယံာ်လဲၣ်.” ဒီးစီၤပၤ သးအိၣ်ပျဲက့ၤယၤ+ ဒီးယတဲဘၣ်အီၤ တၢ်ဆၢကတီၢ် လၢယကဟဲက့ၤလီၤ.+

၇ ဒီးယတဲဘၣ်​ စီၤပၤလၢ “မ့ၢ်ဘၣ်​ စီၤပၤအသးန့ၣ်​ မၢပှၤဟ့ၣ်ယၤ လံာ်ပရၢတဖၣ်လၢ ပဒိၣ်ဖးဒိၣ်တဖၣ်လၢ အအိၣ်လၢ ထံကျိ* ဝၢ်ဘးခီအဂီၢ်+ ဒ်သိး အဝဲသ့ၣ်​ ကဒုးလဲၤခီဂာ်ယၤ ဒီးယကလဲၤတုၤလၢ ယူဒၤ အဟီၣ်ကဝီၤပူၤ ပူၤပူၤဖျဲးဖျဲး အဂီၢ်တက့ၢ်. ၈ တကးဒံးဘၣ်​ ဝံသးစူၤ ဟ့ၣ်လီၤစ့ၢ်ကီးယၤ လံာ်ပရၢတဘ့ၣ်လၢ စီၤအၤစာ် လၢအမ့ၢ် ပှၤကွၢ်ထွဲ စီၤပၤအသ့ၣ်ပှၢ် အဂီၢ်တက့ၢ်. နမ့ၢ်မၤဒ်န့ၣ်န့ၣ်​ အကဟ့ၣ်လီၤယၤ သ့ၣ်လၢ ပှၤကတ့ထီၣ်​ သုးအတၢ်သူၣ်ထီၣ်ဖးဒိၣ်​ အတြဲၤအဂီၢ်,+ ဝ့ၢ်ဒူၣ်တဖၣ်အဂီၢ်+ ဒီးဟံၣ်လၢ ယကအိၣ်အဂီၢ်လီၤ. သုးအတၢ်သူၣ်ထီၣ်ဖးဒိၣ်န့ၣ်​ အိၣ်ဝဲလၢ တၢ်လုၢ်ဟံၣ်အကပၤလီၤ.” မ့ၢ်လၢ ကစၢ်ယွၤလၢအသးဂ့ၤတဂၤ အိၣ်ဒီးယၤအဃိ+ စီၤပၤ ဟ့ၣ်လီၤယၤ လံာ်ပရၢ တဖၣ်န့ၣ်လီၤ.+

၉ စီၤပၤ မၢဝဲ သုးခိၣ်တဖၣ်​ ဒီးပှၤဒိးကသ့ၣ်ဖိတဖၣ်​ လဲၤပိာ်ယခံလီၤ. ဒီးယလဲၤလၢ ပဒိၣ်ဖးဒိၣ်တဖၣ်လၢ အအိၣ်လၢ ထံကျိဝၢ်ဘးခီ အအိၣ်​ ဒီးယဟ့ၣ်လီၤ အဝဲသ့ၣ်လၢစီၤပၤ အလံာ်ပရၢလီၤ. ၁၀ ဒီးပှၤဘ့ၤသဃိရိၣ်ဖိ စီၤစၤနဘၤလး+ ဒီးပှၤဧၣ်မိၣ်ဖိ+ စီၤတိၤဘံယၤ+ လၢအမ့ၢ် ပဒိၣ်န့ၣ်​ ဖဲအဝဲသ့ၣ်​ နၢ်ဟူဝဲလၢ ပှၤတဂၤ ကဟဲမၤစၢၤပှၤအံၣ်စရ့လးဖိတဖၣ်​ အခါ အဝဲသ့ၣ်​ တဘၣ်သူၣ်ဘၣ်သးဝဲ နီတစဲးဘၣ်.

၁၁ လၢခံ ယဟဲက့ၤတုၤလၢ ယရူၤၡလ့ၣ်လီၤ. သၢသီဝံၤ အလီၢ်ခံ ၁၂ ယဆၢထၢၣ်​ လၢမုၢ်နၤခီ ဒီးယကိးထီၣ်​ ပှၤပိာ်ခွါ စှၤဂၤလီၤ. ဒီးဘၣ်ဃးဒီး ကစၢ်ယွၤ ထိၣ်ဟူးထိၣ်ဂဲၤထီၣ်ယၤလၢ ယကဘၣ်မၤန့ၢ်တၢ်လၢ ဝ့ၢ်ယရူၤၡလ့ၣ်အဂီၢ် ဒ်လဲၣ်ဒ်လဲၣ်န့ၣ်​ ယတတဲဘၣ်​ ပှၤနီတဂၤဘၣ်. ဒီးမ့တမ့ၢ်လၢ ကသ့ၣ်ယီၤလၢ ယဒိးအီၤဘၣ်န့ၣ်​ ဆၣ်ဖိကီၢ်ဖိအဂၤ လၢပကျါန့ၣ်​ တအိၣ်နီတဒုဘၣ်. ၁၃ ဖဲမုၢ်နၤခီန့ၣ်​ ပလဲၤလၢ တၢ်တြီၤအတြဲၤ+ ဒီးပလဲၤတလၢ ဂုၢ်ဖးဒိၣ်အထံထီၣ်ပၢၢ် ဒီးပလဲၤဆူ ဖၣ်ဆါအ့ၣ်အတြဲၤလီၤ.+ ဒီးပကွၢ်ထံကွၢ်ဆး ယရူၤၡလ့ၣ်​ အဝ့ၢ်ဒူၣ်တဖၣ်​ လၢအလီၤပှီၢ် ဒီးအတြဲၤတဖၣ်လၢ မ့ၣ်အူအီၣ်တ့ၢ်အီၤလီၤ.+ ၁၄ ပလဲၤလၢ ထံထီၣ်ပၢၢ်အတြဲၤ+ ဒီးပလဲၤဆူ စီၤပၤအကမါလီၤ. ဖဲန့ၣ်န့ၣ်​ ကသ့ၣ်ယီၤလၢ ယဒိးအီၤတဒုန့ၣ်​ လဲၤခီဝဲတတြီၢ်ဘၣ်. ၁၅ ဒီးပဆဲးလဲၤလၢ တၢ်တြီၤပူၤ+ ဒီးပကွၢ်ထံကွၢ်ဆး ဝ့ၢ်ဒူၣ်လီၤ. ဝံၤဒီး ပဟဲက့ၤနုာ်လီၤက့ၤလၢ တၢ်တြီၤအတြဲၤ ဒီးပဟဲက့ၤလီၤ.

၁၆ မ့ၢ်လၢ ယတတဲဘၣ်​ ပှၤယူဒၤဖိတဖၣ်, ပှၤလုၢ်တၢ်ဒိၣ်တဖၣ်, ပှၤဒိၣ်ပှၤပှၢ်တဖၣ်, ပဒိၣ်တဖၣ်+ ဒီးပှၤမၤတၢ်ဖိအဂၤတဖၣ်​ လၢတၢ်နီတမံၤဘၣ်အဃိ ယလဲၤဖဲလဲၣ်​ ဒီးယမၤမနုၤလဲၣ်န့ၣ်​ ပဒိၣ်တဖၣ်​ တသ့ၣ်ညါဝဲဘၣ်. ၁၇ လၢခံ ယတဲအဝဲသ့ၣ်လၢ “သုထံၣ်ဘၣ်လၢ ပတၢ်အိၣ်သးန့ၣ်​ နးဒိၣ်မး ဒီးအကဲထီၣ်​ တၢ်မဲာ်ဆှးလၢပဂီၢ်လီၤ. ဝ့ၢ်ယရူၤၡလ့ၣ်န့ၣ်​ ဟးဂီၤဝဲ ဒီးဝ့ၢ်အတြဲၤတဖၣ်န့ၣ်​ မ့ၣ်အူအီၣ်ကွံာ်ဝဲ အဃိ ဟဲမီၤ, ပကတ့ထီၣ်က့ၤ ယရူၤၡလ့ၣ်​ အဝ့ၢ်ဒူၣ်တဖၣ်လီၤ.” ၁၈ ဒီးယတဲဘၣ်​ အဝဲသ့ၣ်လၢ ကစၢ်ယွၤ လၢအသးဂ့ၤတဂၤ အိၣ်ဒီးယၤဒ်လဲၣ်အဂ့ၢ်+ ဒီးတၢ်ကတိၤလၢ စီၤပၤ တဲယၤတဖၣ်လီၤ.+ အဝဲသ့ၣ်​ တဲယၤလၢ “ပကလဲၤတ့ထီၣ်လီၤ.” ဒီးအဝဲသ့ၣ်​ ပာ်ဆူၣ်ထီၣ်အသးလၢ တၢ်မၤလၢ အဂ့ၤတခါအံၤ အဂီၢ်လီၤ.+

၁၉ ပှၤဘ့ၤသဃိရိၣ်ဖိ စီၤစၤနဘၤလး, ပှၤဧၣ်မိၣ်ဖိ+ စီၤတိၤဘံယၤ+ လၢအမ့ၢ် ပဒိၣ်​ ဒီးပှၤဧ့ရ့းဖိ+ စီၤက့ၤၡ့ၣ်န့ၣ်​ နၢ်ဟူဝဲ ဒီးဒုၣ်ဒွဲၣ်ပှၤလီၤ.+ အဝဲသ့ၣ်​ တပာ်ကဲပှၤဘၣ်​ ဒီးတဲပှၤလၢ “သုကမၤမနုၤလဲၣ်, သုကထီဒါ စီၤပၤဟီဧါ.”+ ၂၀ ဘၣ်ဆၣ်​ ယတဲဆၢက့ၤလၢ “မူခိၣ်အကစၢ် တဂၤန့ၣ်​ ကမၤစၢၤပှၤဒ်သိးပတၢ်မၤ ကကဲထီၣ်လိၣ်ထီၣ်+ ဒီးပဝဲအခ့အပှၤတဖၣ်န့ၣ်​ ပကတ့ထီၣ်တၢ်လီၤ. မ့မ့ၢ်သုန့ၣ်​ သုတဘၣ်ဃးဒီး ဝ့ၢ်ယရူၤၡလ့ၣ်​ ဒီးအတၢ်စံၣ်စိၤတဲစိၤ နီတစဲးဘၣ်. ဒီးလၢဝ့ၢ်ယရူၤၡလ့ၣ်​ အပူၤန့ၣ်​ သုတအိၣ်ဒီး တၢ်ခွဲးတၢ်ယာ်လၢ သုကဒိးန့ၢ်ဘၣ်​ တၢ်နီတမံၤဘၣ်.”+

၃ ပှၤလုၢ်တၢ်ခိၣ်အဒိၣ်ကတၢၢ် စီၤအ့လယၤၡံၣ်+ ဒီးအဒီပုၢ်ဝဲၢ် ပှၤလုၢ်တၢ်ဒိၣ်တဖၣ်​ တ့ထီၣ်က့ၤဝဲ သိအတြဲၤလီၤ.+ ဒီးအဝဲသ့ၣ်​ ပာ်စီဆှံဝဲ သိအတြဲၤ+ ဒီးထီထီၣ်ဝဲ အပဲတြီတဖၣ်လီၤ. အဝဲသ့ၣ်​ ပာ်စီဆှံ ဝ့ၢ်ဒူၣ်​ တုၤလၢ မ့ၤအၤ အတၢးထီ+ ဒီးတုၤလၢ ဃနၤန့လး အတၢးထီလီၤ.+ ၂ ဒီးလၢ အဝဲသ့ၣ်​ အကပၤန့ၣ်​ ပှၤယရံၤဃိဖိတဖၣ်+ သူၣ်ထီၣ်တၢ်လီၤ. ဒီးလၢ ပှၤယရံၤဃိဖိတဖၣ်​ အကပၤန့ၣ်​ စီၤအံၤမရံ အဖိခွါ စီၤစးကူၢ် သူၣ်ထီၣ်တၢ်လီၤ.

၃ စီၤဟးစနုၤအၤ အဖိခွါတဖၣ်​ တ့ထီၣ်က့ၤ ညၣ်အတြဲၤလီၤ.+ အဝဲသ့ၣ်​ ထီထီၣ်အသ့ၣ်ဘၣ်တဖၣ်+ ဝံၤဒီး ထီထီၣ်​ အပဲတြီတဖၣ်, အတၢ်ခးတံၢ်တၢ်တဖၣ်​ ဒီးအနီၣ်ဘိတဖၣ်လီၤ. ၄ ဒီးလၢအဝဲသ့ၣ်​ အကပၤန့ၣ်​ စီၤဧူၤရံယၤ အဖိခွါ စီၤမရ့မိး+ လၢအမ့ၢ် စီၤဟးကိး အလံၤခွါန့ၣ်​ ဘှီဘၣ်ထီၣ်က့ၤတၢ်လီၤ. ဒီးလၢအဝဲသ့ၣ်​ အကပၤန့ၣ်​ စီၤဘရ့ကံယၤ အဖိခွါ စီၤမၡူလၣ်+ လၢအမ့ၢ် စီၤမၡ့စဘ့လး အလံၤခွါန့ၣ်​ ဘှီဘၣ်ထီၣ်က့ၤတၢ်လီၤ. ဒီးလၢအဝဲသ့ၣ်​ အကပၤန့ၣ်​ စီၤဘၤနါ အဖိခွါ စီၤစၤဒိးန့ၣ်​ ဘှီဘၣ်ထီၣ်က့ၤတၢ်လီၤ. ၅ ဒီးလၢအဝဲသ့ၣ်​ အကပၤန့ၣ်​ ပှၤတကိၤဖိတဖၣ်+ ဘှီဘၣ်ထီၣ်က့ၤတၢ်လီၤ. ဘၣ်ဆၣ်​ မ့မ့ၢ်ပှၤလၢ အဝဲသ့ၣ်အကျါ လၢအမံၤဒိၣ်​ တဖၣ်န့ၣ်​ တဆီၣ်လီၤအသး ဒ်သိးကမၤတၢ်လၢ ပှၤလၢအတီခိၣ်ရိၤမဲတၢ်တဖၣ်​ အဖီလာ်ဘၣ်.

၆ စီၤပးစ့ၤ အဖိခွါ စီၤယိယဒၤ ဒီးစီၤဘစိဒယၤ အဖိခွါ စီၤမၡူလၣ်န့ၣ်​ တ့ထီၣ်က့ၤ ဝ့ၢ်လီၢ်လံၤ အတြဲၤလီၤ.+ အဝဲသ့ၣ်​ ထီထီၣ်အသ့ၣ်ဘၣ်တဖၣ်​ ဝံၤဒီး ထီထီၣ်​ အပဲတြီတဖၣ်, အတၢ်ခးတံၢ်တၢ်တဖၣ်​ ဒီးအနီၣ်ဘိတဖၣ်လီၤ. ၇ လၢအဝဲသ့ၣ်​ အကပၤန့ၣ်​ ပှၤကံးဘိၣ်ဖိ+ စီၤမလၤတယၤ ဒီးပှၤမ့ၤရိနိၤသးဖိ စီၤယၤဒိၣ်န့ၣ်​ ဘှီဘၣ်ထီၣ်က့ၤတၢ်လီၤ. အဝဲသ့ၣ်​ အိၣ်လၢ ကံးဘိၣ်​ ဒီးမံးစပၤ+ ဒီးအဝဲသ့ၣ်​ အိၣ်ဝဲလၢ ပဒိၣ်ဖးဒိၣ်လၢ အပၢဟီၣ်ကဝီၤ လၢထံကျိ* ဝၢ်ဘးခီ အတၢ်ပၢဖီလာ်လီၤ.+ ၈ လၢအဝဲသ့ၣ်​ အကပၤန့ၣ်​ စီၤဃၤရဟယၤ အဖိခွါ စီၤဧူးစံၤအ့လး လၢအမ့ၢ် ပှၤပိာ်ထူဖိန့ၣ်​ ဘှီဘၣ်ထီၣ်က့ၤတၢ်လီၤ. ဒီးလၢအကပၤန့ၣ်​ စီၤဃနၤနယၤ လၢအမ့ၢ် ပှၤတ့သိနၢမူန့ၣ်​ ဘှီဘၣ်ထီၣ်က့ၤတၢ်လီၤ. ဒီးအဝဲသ့ၣ်​ ဒါလီၤလၢၢ်လၢ ဝ့ၢ်ယရူၤၡလ့ၣ်အပူၤ တုၤလၢ တၢ်ဒူၣ်လၢအလဲၢ်လီၤ.+ ၉ ဒီးလၢအဝဲသ့ၣ်​ အကပၤန့ၣ်​ စီၤဃူၢ် အဖိခွါ စီၤရဖါယၤ လၢအမ့ၢ် ပဒိၣ်လၢ အပၢဝ့ၢ်ယရူၤၡလ့ၣ်​ အကီၢ်ရ့ၣ်​ တဝာ်န့ၣ်​ ဘှီဘၣ်ထီၣ်က့ၤတၢ်လီၤ. ၁၀ ဒီးလၢအဝဲသ့ၣ်​ အကပၤန့ၣ်​ စီၤဃရူမာ် အဖိခွါ စီၤယဒါယၤ ဘှီဘၣ်ထီၣ်က့ၤတၢ် လၢအနီၢ်ကစၢ် အဟံၣ်မဲာ်ညါလီၤ. ဒီးလၢအကပၤန့ၣ်​ စီၤဃၡၤဘံယၤ အဖိခွါ စီၤဃးတူၣ်​ ဘှီဘၣ်ထီၣ်က့ၤတၢ်လီၤ.

၁၁ စီၤဃၤရံၣ်​ အဖိခွါ+ စီၤမၤလကံယၤ ဒီးစီၤပးဃးမိၤအး အဖိခွါ+ စီၤဃၤၡူာ်န့ၣ်​ ဘှီဘၣ်ထီၣ်က့ၤ ဝ့ၢ်ဒူၣ်အဂၤတတီၤ ဃုာ်ဒီး ဖၣ်ကပူၤ အတၢးထီလီၤ.+ ၁၂ ဒီးလၢအဝဲသ့ၣ်​ အကပၤန့ၣ်​ စီၤၡၤလူၣ်​ ဒီးအဖိမုၣ်တဖၣ်န့ၣ်​ ဘှီဘၣ်ထီၣ်က့ၤတၢ်လီၤ. စီၤၡၤလူၣ်န့ၣ်​ မ့ၢ်စီၤဟးလိဃ့ၣ်​ အဖိခွါ ဒီးအဝဲမ့ၢ် ပဒိၣ်လၢ အပၢဘၣ်​ ဝ့ၢ်ယရူၤၡလ့ၣ်​ အကီၢ်ရ့ၣ်တဝာ်လီၤ.

၁၃ စီၤဃၤနူၣ်​ ဒီးပှၤလၢ အအိၣ်ဝဲဆိးဝဲလၢ ဝ့ၢ်စါနိၤန့ၣ်+ ဘှီဘၣ်ထီၣ်က့ၤ တၢ်တြီၤအတြဲၤလီၤ.+ အဝဲသ့ၣ်​ တ့ထီၣ်က့ၤဝဲ ဝံၤဒီး ထီထီၣ်အပဲတြီတဖၣ်, အတၢ်ခးတံၢ်တၢ်တဖၣ်​ ဒီးအနီၣ်ဘိတဖၣ်လီၤ. ဒီးအဝဲသ့ၣ်​ ဘှီထီၣ်က့ၤဝဲ ဝ့ၢ်ဒူၣ်​ အပျၢ်* ၁,၀၀၀ ပၢၢ်တုၤလၢ ဖၣ်ဆါအ့ၣ်အတြဲၤလီၤ.+ ၁၄ စီၤရ့ကး အဖိခွါ စီၤမၤလကံယၤ လၢအမ့ၢ် ဘ့ၤသဟးကၤရ့ၣ်+ အကီၢ်ရ့ၣ်​ အပဒိၣ်န့ၣ်​ ဘှီဘၣ်ထီၣ်က့ၤဝဲ ဖၣ်ဆါအ့ၣ်​ အတြဲၤလီၤ. အဝဲ တ့ထီၣ်ဝဲတြဲၤအံၤ ဒီးထီထီၣ်ဝဲ အပဲတြီတဖၣ်, အတၢ်ခးတံၢ်တၢ်တဖၣ်​ ဒီးအနီၣ်ဘိတဖၣ်လီၤ.

၁၅ စီၤကိးလဃိစ့ၤ အဖိခွါ စီၤၡးလူၣ်​ လၢအမ့ၢ် ပဒိၣ်လၢ အပၢဘၣ်​ မံးစပၤ အကီၢ်ရ့ၣ်န့ၣ်+ ဘှီဘၣ်ထီၣ်က့ၤဝဲ ထံထီၣ်ပၢၢ်အတြဲၤလီၤ.+ အဝဲ တ့ထီၣ်ဝဲ တြဲၤအံၤ ဒီးအခိၣ်ဒုး ဒီးထီထီၣ်ဝဲ အပဲတြီတဖၣ်, အတၢ်ခးတံၢ်တၢ်တဖၣ်​ ဒီးအနီၣ်ဘိတဖၣ်လီၤ. ဒီးအဝဲသ့ၣ်​ ဘှီဘၣ်ထီၣ်က့ၤဝဲ ကမါၡံလိၤ* အဒူၣ်+ တုၤလၢ ဃီသွါလၢ+ အဟဲလီၤစးထီၣ်လၢ စီၤဒၤဝံးအဝ့ၢ်လီၤ.+ ကမါၡံလိၤန့ၣ်​ အိၣ်ဝဲလၢ စီၤပၤ အကရၢၢ် အကပၤလီၤ.+

၁၆ လၢစီၤၡးလူၣ်​ အကပၤန့ၣ်​ စီၤဧၤစဘူး အဖိခွါ စီၤနဃ့မယၤ လၢအမ့ၢ် ပဒိၣ်လၢ အပၢဘၣ်​ ဘ့ၤသစူၢ်+ အကီၢ်ရ့ၣ်တဝာ်န့ၣ်​ ဘှီဘၣ်ထီၣ်က့ၤတၢ်လၢ စီၤပၤဒၤဝံး အတၢ်သွၣ်ခိၣ်အလီၢ်+ အမဲာ်ညါ တုၤလၢ ကမါလၢ+ ပှၤတ့ထီၣ်ပာ်စၢၤအီၤ ဒီးတုၤလၢ ပှၤဒူပှၤဃိၤ အဟံၣ်လီၤ.

၁၇ လၢအကပၤန့ၣ်​ ပှၤလ့ၤဝံဖိ လၢလာ်အံၤ ဘှီဘၣ်ထီၣ်က့ၤတၢ်လီၤ. လၢအဝဲသ့ၣ်အကျါန့ၣ်​ ပၣ်ဃုာ်ဒီး စီၤဘၤနံ အဖိခွါ စီၤရဃူၣ်​ ဒီးလၢအကပၤန့ၣ်​ စီၤဃၡၤဘယၤ လၢအမ့ၢ် ပှၤလၢအပၢဘၣ်​ ကံလၤ အကီၢ်ရ့ၣ်တဝာ်လီၤ.+ လၢတၢ်ဘှီဘၣ်ထီၣ်က့ၤ တၢ်မၤအပူၤ စီၤဃၡၤဘယၤ ခၢၣ်စးတၢ်လၢ အကီၢ်ရ့ၣ်အဂီၢ်လီၤ. ၁၈ လၢအကပၤန့ၣ်​ ပှၤလ့ၤဝံဖိ အဂၤတဖၣ်​ ဘှီဘၣ်ထီၣ်က့ၤတၢ်လီၤ. အပၣ်ဃုာ်ဒီး စီၤဃ့နါဒး အဖိခွါ စီၤဘၤဝဲၤ လၢအမ့ၢ် ပှၤလၢအပၢဘၣ်​ ကံလၤအကီၢ်ရ့ၣ်​ အဝဲတဝာ်လီၤ.

၁၉ လၢအဝဲသ့ၣ်​ အကပၤန့ၣ်​ စီၤယ့ၤၡူ အဖိခွါ+ စီၤဧ့စ့ၢ် လၢအမ့ၢ် မံးစပၤ အပဒိၣ်န့ၣ်​ ဘှီဘၣ်ထီၣ်က့ၤ ဝ့ၢ်ဒူၣ်​ အဂၤတတီၤလၢ အအိၣ်လၢ တၢ်လူၢ်အမဲာ်ညါ ဒီးတုၤလီၤလၢ တၢ်ပာ်ဃာ် တၢ်စုကဝဲၤအလီၢ်လီၤ. တၢ်ပာ်ဃာ် တၢ်စုကဝဲၤ အလီၢ်န့ၣ်​ အိၣ်ဘူးဒီး ဝ့ၢ်ဒူၣ်အထူၣ်လီၤ.+

၂၀ ဒီးလၢ အကပၤန့ၣ်​ စီၤစးဘဲအဖိခွါ+ စီၤဘၤရူး မၤတၢ်လၢ တၢ်သူၣ်ဆူၣ်သးဆူၣ်အပူၤ ဒီးဘှီဘၣ်ထီၣ်က့ၤ ဝ့ၢ်ဒူၣ်​ အဂၤတတီၤ စးထီၣ်လၢ ဝ့ၢ်ဒူၣ်အထူၣ်​ ပၢၢ်တုၤလၢ ပှၤလုၢ်တၢ်ခိၣ်​ အဒိၣ်ကတၢၢ် စီၤအ့လယၤၡံၣ်+ အဟံၣ်အပဲတြီလီၤ.

၂၁ လၢအကပၤန့ၣ်​ စီၤဧူၤရံယၤ အဖိခွါ စီၤမရ့မိး+ လၢအမ့ၢ် စီၤဟးကိး အလံၤခွါန့ၣ်​ ဘှီဘၣ်ထီၣ်က့ၤဝဲ ဝ့ၢ်ဒူၣ်​ အဂၤတတီၤ စးထီၣ်လၢ စီၤအ့လယၤၡံၣ်​ အဟံၣ်အပဲတြီ တုၤလၢ စီၤအ့လယၤၡံၣ်​ အဟံၣ်​ အဝဲ တကပၤလီၤ.

၂၂ ဒီးလၢအကပၤန့ၣ်​ ယၢ်ဒ့ၣ်အဟီၣ်ကဝီၤ+ အပှၤလုၢ်တၢ်ဒိၣ်တဖၣ်န့ၣ်​ ဘှီဘၣ်ထီၣ်က့ၤတၢ်လီၤ. ၂၃ ဒီးလၢအဝဲသ့ၣ်​ အကပၤန့ၣ်​ စီၤဘံၣ်ယၤမံၣ်​ ဒီးစီၤဃၤၡူာ်န့ၣ်​ ဘှီဘၣ်ထီၣ်က့ၤတၢ်လၢ အဝဲသ့ၣ်​ အနီၢ်ကစၢ် အဟံၣ်မဲာ်ညါလီၤ. လၢအဝဲသ့ၣ်​ အကပၤန့ၣ်​ စီၤမၤစ့ယၤ အဖိခွါ စီၤဧစၤရယၤ လၢအမ့ၢ် စီၤဧနၤနယၤ အလံၤခွါန့ၣ်​ ဘှီဘၣ်ထီၣ်က့ၤတၢ်လၢ အဟံၣ်ကပၤလီၤ. ၂၄ ဒီးလၢအကပၤန့ၣ်​ စီၤဃ့နါဒး အဖိခွါ စီၤဘံနူၤ ဘှီဘၣ်ထီၣ်က့ၤ ဝ့ၢ်ဒူၣ်လၢ အဂၤတတီၤ စးထီၣ်လၢ စီၤဧစၤရယၤ အဟံၣ်​ တုၤလၢ ဝ့ၢ်ဒူၣ်အထူၣ်+ ဒီးတုၤလၢ တၢ်အနၢၣ်လီၤ.

၂၅ ဒီးလၢအကပၤန့ၣ်​ စီၤဧူၤစံၤ အဖိခွါ စီၤပလါလးန့ၣ်​ ဘှီဘၣ်ထီၣ်က့ၤတၢ်လၢ ဝ့ၢ်ဒူၣ်အထူၣ်​ အမဲာ်ညါ ဒီးတၢးထီလၢ ထးခီတဖျၢၣ်​ အမဲာ်ညါလီၤ. တၢးထီတဖျၢၣ်အံၤ ဘုးတာ်လိာ်သးဒီး စီၤပၤအဟံၣ်+ ဒီးအိၣ်ဝဲလၢ ပှၤခိးတၢ်ဖိတဖၣ်​ အကရၢၢ်ပူၤလီၤ.+ ဒီးလၢပှၤတဂၤန့ၣ်​ အကပၤန့ၣ်​ စီၤပးရိာ် အဖိခွါ စီၤပဒါယၤ ဘှီဘၣ်ထီၣ်က့ၤတၢ်လီၤ.+

၂၆ တၢ်လုၢ်ဟံၣ်​ အခ့အပှၤတဖၣ်*+ လၢအအိၣ်လၢ ဧိၤဖ့လးန့ၣ်+ ဘှီဘၣ်ထီၣ်က့ၤတၢ် ပၢၢ်တုၤလၢ ထံအတြဲၤ+ လၢမုၢ်ထီၣ်တခီ အမဲာ်ညါ ဒီးတၢးထီလၢ အဖျိးထီၣ်​ လၢတၢ်ဒူၣ်ကပၤ တဖျၢၣ်လီၤ.

၂၇ လၢအဝဲသ့ၣ်​ အကပၤန့ၣ်​ ပှၤတကိၤဖိတဖၣ်+ ဘှီဘၣ်ထီၣ်က့ၤ ဝ့ၢ်ဒူၣ်​ အဂၤတတီၤ စးထီၣ်လၢ တၢးထီဖးဒိၣ်လၢ အဖျိးထီၣ်​ လၢတၢ်ဒူၣ်ကပၤတဖျၢၣ်​ တုၤလၢ ဧိၤဖ့လး အဒူၣ်လီၤ.

၂၈ ပှၤလုၢ်တၢ်ဒိၣ်တဖၣ်န့ၣ်​ ဘှီဘၣ်ထီၣ်က့ၤတၢ်လၢ ကသ့ၣ်အတြဲၤ+ အကပၤလီၤ. အဝဲသ့ၣ်​ တဂၤစုာ်စုာ်န့ၣ်​ ဘှီဘၣ်ထီၣ်က့ၤတၢ် ဖဲအဟံၣ်မဲာ်ညါလီၤ.

၂၉ ဒီးလၢအဝဲသ့ၣ်​ အကပၤန့ၣ်​ စီၤအံးမ့ၢ် အဖိခွါ စီၤစၤဒိးန့ၣ်+ ဘှီဘၣ်ထီၣ်က့ၤတၢ်လၢ အနီၢ်ကစၢ် အဟံၣ်မဲာ်ညါလီၤ.

ဒီးလၢအကပၤန့ၣ်​ စီၤၡကါနယၤ အဖိခွါ စီၤၡမါယၤ လၢအမ့ၢ် ပှၤခိး မုၢ်ထီၣ်အတြဲၤန့ၣ်+ ဘှီဘၣ်ထီၣ်က့ၤတၢ်လီၤ.

၃၀ ဒီးလၢအကပၤန့ၣ်​ စီၤၡလ့မယၤ အဖိခွါ စီၤဃနၤနယၤ ဒီးစီၤစၤလာ် အဖိခွါ ဃုဂၤတဂၤ လၢအမ့ၢ် စီၤဃၤနူၣ်န့ၣ်​ ဘှီဘၣ်ထီၣ်က့ၤ ဝ့ၢ်ဒူၣ်​ အဂၤတတီၤလီၤ.

ဒီးလၢအကပၤန့ၣ်​ စီၤဘရ့ကံယၤ အဖိခွါ စီၤမၡူလၣ်+ ဘှီဘၣ်ထီၣ်က့ၤတၢ်လၢ နီၢ်ကစၢ် အဒၢးဖးဒိၣ်​ အမဲာ်ညါလီၤ.

၃၁ ဒီးလၢအကပၤန့ၣ်​ ပှၤပိာ်ထူဖိ စီၤမၤလကံယၤ ဘှီဘၣ်ထီၣ်က့ၤတၢ် ပၢၢ်တုၤလၢ တၢ်လုၢ်ဟံၣ်​ အခ့အပှၤအဟံၣ်+ ဒီးပှၤပနံာ်တၢ်ကၤတၢ်ဖိတဖၣ်အအိၣ်​ လၢတၢ်သမံသမိးအတြဲၤမဲာ်ညါ ဒီးပၢၢ်တုၤလၢ ဒၢးတဖျၢၣ်လၢ အအိၣ်လၢ ဝ့ၢ်ခိၣ်ဒူ အသနၢၣ်လီၤ.

၃၂ ပှၤပိာ်ထူ ဒီးပှၤပနံာ်တၢ်ကၤတၢ်ဖိတဖၣ်န့ၣ်​ ဘှီထီၣ်က့ၤတၢ် စးထီၣ်လၢ ဒၢးတဖျၢၣ်လၢ အအိၣ်လၢ ဝ့ၢ်ခိၣ်ဒူအသနၢၣ်​ တုၤလၢ သိအတြဲၤလီၤ.+

၄ ဖဲစီၤစၤနဘၤလး+ နၢ်ဟူဝဲလၢ ပဘှီထီၣ်က့ၤဝဲ ဝ့ၢ်ဒူၣ်အခါ အသးဒိၣ်ထီၣ်တၢ် ဒီးအသးအ့န့ဝဲ ဒိၣ်မးအဃိ အဝဲတဲဆဲးအဲး ပဝဲ ပှၤယူဒၤဖိတဖၣ်​ ထီဘိလီၤ. ၂ လၢအသကိးတဖၣ်​ ဒီးၡၤမရံ အသုးမုၢ် အမဲာ်ညါန့ၣ်​ အဝဲတဲဝဲလၢ “ပှၤယူဒၤဖိလၢ အဂံၢ်စၢ်ဘါစၢ် တဒူၣ်အံၤ မၤဝဲတၢ်မနုၤလဲၣ်. မ့ၢ်အဝဲသ့ၣ်​ မၤဝဲဒ်အံၤလၢ အနီၢ်ကစၢ် ကသ့ဧါ. မ့ၢ်အဝဲသ့ၣ်​ ကလုၢ်ထီၣ်တၢ်ဧါ. မ့ၢ်အဝဲသ့ၣ်မၤဝဲ တနံၤဃီ ကဝံၤဧါ. လၢၢ်တဖၣ်​ လၢအအူအီၣ်​ လၢတၢ်ဟးဂီၤ အပူၣ်တဖၣ်အကျါန့ၣ်​ မ့ၢ်အဝဲသ့ၣ်​ သူက့ၤဝဲ ကန့ၢ်ဒံးဧါ.”+

၃ ဒီးပှၤဧၣ်မိၣ်ဖိ+ စီၤတိၤဘံယၤ+ လၢအဆၢထၢၣ်လၢ အကပၤန့ၣ်​ တဲဝဲလၢ “တၢ်ဒူၣ်လၢ အဝဲသ့ၣ်​ တ့ထီၣ်ဝဲလၢ လၢၢ်တဖၣ်န့ၣ်​ ထွံၣ်မံၤမ့ၢ်လဲၤထီၣ်မး ကလီၤပှီၢ်ဒံး.”

၄ အဃိ ယဃ့ထုကဖၣ်လၢ အိ, ပကစၢ်ယွၤဧၢ, ဒိကနၣ်​ ယကလုၢ်တက့ၢ်. အဝဲသ့ၣ်​ ဆိကမိၣ်ဆံးပှၤလံ.+ အဃိ မ်အဝဲသ့ၣ်​ အတၢ်ဒုၣ်ဒွဲၣ်တဖၣ်န့ၣ်​ က့ၤလီၤဘၣ်လၢ အဝဲသ့ၣ်​ အခိၣ်လိၤတက့ၢ်.+ ဟ့ၣ်လီၤက့ၤ အဝဲသ့ၣ်လၢ အဒုၣ်အဒါအစုပူၤ ဒီးမ်ပှၤက့ၤဖီၣ်​ အဝဲသ့ၣ်ဆူ ထံကီၢ်အဂၤတက့ၢ်. ၅ မ့ၢ်လၢ အဝဲသ့ၣ်​ ဒုၣ်ဒွဲၣ်​ ပှၤသူၣ်ထီၣ်တၢ်ဖိတဖၣ်အဃိ တဘၣ်ကွၢ်ကပာ်ကွံာ် အဝဲသ့ၣ်​ အတၢ်ကမၣ်​ ဒီးတဘၣ်​ ထူးသံကွံာ် အဝဲသ့ၣ်​ အတၢ်ဒဲးဘးလၢ နမဲာ်ညါတဂ့ၤ.+

၆ ဒီးပဆဲးတ့ထီၣ်က့ၤ ဝ့ၢ်ဒူၣ်​ တုၤလၢဝ့ၢ်ဒူၣ်န့ၣ်​ ဘုးတာ်လိာ်သးဝးဝး ဒီးပတ့ထီၣ်က့ၤဝ့ၢ်ဒူၣ်​ အကစီၤထီၣ်ထီန့ၣ်​ န့ၢ်တဝာ်လံလီၤ. ဒီးပှၤဂီၢ်မုၢ်တဖၣ်​ မၤတၢ်လၢ တၢ်သူၣ်ဆူၣ်သးဆူၣ်အပူၤလီၤ.

၇ ဖဲစီၤစၤနဘၤလး, စီၤတိၤဘံယၤ+ ဒီးပှၤဧ့ရ့းဖိ,+ ပှၤဧၣ်မိၣ်ဖိ ဒီးပှၤအၤစဒိာ်ဖိတဖၣ်+ နၢ်ဟူဝဲလၢ တၢ်ဘှီဘၣ်ထီၣ်က့ၤ ယရူၤၡလ့ၣ်​ အဝ့ၢ်ဒူၣ်​ အတၢ်မၤန့ၣ်​ လဲၤထီၣ်လဲၤထီ ဒီးပတ့ပှဲၤထီၣ်က့ၤ ဝ့ၢ်ဒူၣ်​ အတၢ်လီၤဟိတဖၣ်လံအခါ အဝဲသ့ၣ်​ အသးဒိၣ်ထီၣ်တၢ်ဒိၣ်မးလီၤ. ၈ အဝဲသ့ၣ်​ ကူၣ်ထီၣ်ခူသူၣ်​ သကိးဝဲလၢ ကဟဲဒုး ယရူၤၡလ့ၣ်​ ဒီးကမၤတံာ်တာ်ပှၤအဂီၢ်လီၤ. ၉ ဘၣ်ဆၣ်​ ပဃ့ဘါထုကဖၣ်​ လၢပကစၢ်ယွၤအအိၣ်​ ဒီးပဆီလီၤ ပှၤခိးတၢ်ဖိတဖၣ်​ လၢမုၢ်ဆါခီ ဒီးမုၢ်နၤခီ ဒ်သိးကဒီသဒၢပှၤလၢ အဝဲသ့ၣ်​ အစုပူၤအဂီၢ်လီၤ.

၁၀ ဒီးပှၤလၢအအိၣ်လၢ ယူဒၤအဟီၣ်ကဝီၤန့ၣ်​ တဲဝဲလၢ “ပှၤမၤတၢ်ဖိတဖၣ်န့ၣ်​ အဂံၢ်အဘါ လီၤစၢ်လံ. ဒီးလၢၢ်အက့အခီလၢ ပကဘၣ်ထုးထီၣ်ကွံာ်အီၤန့ၣ်​ အိၣ်ဒီဒူၣ်. အဃိ ပတ့ထီၣ်က့ၤ ဝ့ၢ်ဒူၣ်အံၤ တန့ၢ် နီတဘျီလၢၤဘၣ်.”

၁၁ ဒီးပဒုၣ်ပဒါတဖၣ်​ တဲဝဲလၢ “တချုးလၢ အဝဲသ့ၣ်​ သ့ၣ်ညါထွဲဝဲ ဒီးထံၣ်ပှၤဒံးဘၣ်န့ၣ်​ ပကလဲၤနုာ်လီၤ သတူၢ်ကလာ်လၢ အဝဲသ့ၣ်အကျါ ဒီးမၤသံအဝဲသ့ၣ်​ ဒီးမၤပတုာ် တၢ်မၤတခါအံၤလီၤ.”

၁၂ ဖဲပှၤယူဒၤဖိလၢ အအိၣ်ဘူးဒီး ဒုၣ်ဒါတဖၣ်​ ဟဲဝဲတဘျီဂ့ၤတဘျီဂ့ၤန့ၣ်​ အဝဲသ့ၣ်​ တဲပှၤလၢ “ဒုၣ်ဒါတဖၣ်​ ကဟဲလၢ တၢ်လီၢ်ကိးတီၤဒဲး ဒီးကဒုးပှၤလီၤ.” အဝဲသ့ၣ်​ တဲပှၤဒ်န့ၣ်​ အဘျီတဖၣ်အဘျီလီၤ.

၁၃ အဃိ ယဆီလီၤ ပှၤပိာ်ခွါတနီၤလၢ ဝ့ၢ်ဒူၣ်​ အကိပူၤတကပၤ ဖဲတၢ်လီၢ်လီၤပျီလၢ အတအိၣ်ထီၣ်ထီဘၣ်တဖၣ်​ အလီၢ်လီၤ. ယဆီလီၤ အဝဲသ့ၣ်​ ဒ်အဒူၣ်ဖိထၢဖိတဖၣ်​ အိၣ်ဝဲအသိး တဒူၣ်ဘၣ်တဒူၣ်​ ဒီးအဝဲသ့ၣ်​ အိၣ်ဒီး နးတဖၣ်, ဘီတဖၣ်​ ဒီးချံၣ်တဖၣ်လီၤ. ၁၄ ဖဲယထံၣ်လၢ အဝဲသ့ၣ်​ ပျံၤတၢ်အခါ ယဂဲၤဆၢထၢၣ်​ တဘျီဃီ ဒီးယတဲဘၣ်​ ပှၤဒိၣ်ပှၤပှၢ်တဖၣ်,+ ပဒိၣ်တဖၣ်​ ဒီးပှၤအဂၤတဖၣ်လၢ “တဘၣ်ပျံၤ အဝဲသ့ၣ်တဂ့ၤ.+ သ့ၣ်နီၣ်ထီၣ်က့ၤ ယဟိဝၤယွၤ လၢအမ့ၢ် ယွၤလၢအဒိၣ်အမုၢ် ဒီးအလီၤယူးယီၣ်ပာ်ကဲ တဂၤန့ၣ်တက့ၢ်.+ ဒုးတၢ်လၢ သုဒီပုၢ်ဝဲၢ်တဖၣ်အဂီၢ်, သုဖိမုၣ်ဖိခွါတဖၣ်အဂီၢ်, သုမါတဖၣ်အဂီၢ် ဒီးသုဟံၣ်သုဃီတဖၣ်​ အဂီၢ်သၢၤ.”

၁၅ ဒီးပဒုၣ်ပဒါတဖၣ်​ နၢ်ဟူဝဲလၢ ပသ့ၣ်ညါထွဲ တၢ်လၢအဝဲသ့ၣ်​ ကမၤဝဲတဖၣ်​ ဒီးကစၢ်ယွၤ မၤဟးဂီၤ အဝဲသ့ၣ်​ အတၢ်ရဲၣ်တၢ်ကျဲၤလီၤ. ဝံၤဒီး ပဆဲးသူၣ်ထီၣ်က့ၤ ဝ့ၢ်ဒူၣ်လီၤ. ၁၆ စးထီၣ်ဖဲ တၢ်တနံၤန့ၣ်​ ပှၤပိာ်ခွါတဝာ်န့ၣ်​ သူၣ်ထီၣ်တၢ်+ ဒီးအဂၤတဝာ်န့ၣ်​ ဖီၣ်ဃာ် ဘီတဖၣ်, ကတီၤတဖၣ်, ချံၣ်တဖၣ်​ ဒီးသိးဝဲ ဆ့ကၤသုးလီၤ. မ့မ့ၢ် ပဒိၣ်တဖၣ်န့ၣ်+ ဆၢထၢၣ်လၢ ပှၤယူဒၤဖိတဖၣ်​ အလီၢ်ခံ ဒီးဆီၣ်ထွဲမၤစၢၤ အဝဲသ့ၣ်လီၤ. ၁၇ ပှၤယူဒၤဖိတဖၣ်အံၤ မ့ၢ်ပှၤလၢ အတ့ထီၣ်က့ၤ ဝ့ၢ်ဒူၣ်လီၤ. ဒီးပှၤလၢ အဝံတၢ်ယိးတၢ်ဃၢတဖၣ်န့ၣ်​ မၤတၢ်လၢ အစုတခီ ဒီးဖီၣ်ဃာ် တၢ်စုကဝဲၤလၢ အစုလၢ အဝဲတခီလီၤ. ၁၈ ပှၤလၢအသူၣ်ထီၣ်တၢ် တဂၤစုာ်စုာ်န့ၣ်​ ဆှိးဃာ်ဝဲ အနးလၢ အယီၢ်ဒ့လိၤ ဖဲအသူၣ်ထီၣ်တၢ် အခါလီၤ. ဒီးပှၤအူကွဲၤဖိတဂၤ+ ဆၢထၢၣ်လၢ ယကပၤလီၤ.

၁၉ ဒီးယတဲဘၣ်​ ပှၤဒိၣ်ပှၤပှၢ်တဖၣ်, ပဒိၣ်တဖၣ်​ ဒီးပှၤအဂၤတဖၣ်လၢ “ပဘၣ်မၤတၢ်အိၣ်ဒီဒူၣ်​ ဒီးပဝဲတဂၤဒီးတဂၤ ပအိၣ်ယံၤလိာ်သး လၢဝ့ၢ်ဒူၣ်အလိၤလီၤ. ၂၀ ဖဲသုနၢ်ဟူ ကွဲၤသီၣ်ထီၣ်အခါ ဟဲအိၣ်ဖှိၣ်​ ဖဲပအိၣ်တၢ်လီၢ်အံၤတက့ၢ်. ပကစၢ်ယွၤ ကဒုးတၢ်လၢပဂီၢ်လီၤ.”+

၂၁ ဒီးပပှၤတဝာ်န့ၣ်​ ဆဲးတ့ထီၣ်တၢ်လီၤ. ဖဲန့ၣ်အဆၢကတီၢ် မ့မ့ၢ် ပှၤအဂၤတဝာ်န့ၣ်​ ဖီၣ်ဃာ်ဝဲ ဘီတဖၣ်​ စးထီၣ်လၢ မုၢ်ဝါထီၣ်​ တုၤလီၤလၢ ဆၣ်ဟဲထီၣ်လီၤ. ၂၂ ဖဲန့ၣ်အခါ ယတဲဘၣ်​ ပှၤဂီၢ်မုၢ်တဖၣ်လၢ “ပှၤပိာ်ခွါတဖၣ်​ ဃုာ်ဒီး အဝဲသ့ၣ်​ တဂၤစုာ်စုာ် အပှၤမၤစၢၤတၢ်န့ၣ်​ ကအိၣ်တ့ၢ်လၢ ဝ့ၢ်ယရူၤၡလ့ၣ်အပူၤ လၢမုၢ်နၤခီ စ့ၢ်ကီးလီၤ. ဖဲမုၢ်နၤခီန့ၣ်​ အဝဲသ့ၣ်​ ကဒီသဒၢပှၤ ဒီးဖဲမုၢ်ဆါခီန့ၣ်​ အဝဲသ့ၣ်​ ကမၤတၢ်မၤလီၤ.” ၂၃ ယၤဒီးပှၤယူဒၤဖိတဖၣ်​ ဒီးယခ့ယပှၤတဖၣ်+ ဒီးပှၤခိးတၢ်ဖိလၢ အပိာ်ယခံတဖၣ်န့ၣ်​ ပဆီတလဲ ပဆ့ကူဆ့ကၤမး တချုးနီတဘျီဘၣ်. ဒီးပဝဲတဂၤစုာ်စုာ်န့ၣ်​ ပစိာ်ဃာ် ပစုကဝဲၤလၢ ပစုထွဲတခီ ထီဘိလီၤ.

၅ ဒီးပှၤပိာ်ခွါတဖၣ်​ ဒီးအဝဲသ့ၣ်​ အမါတဖၣ်န့ၣ်​ ကဒူးကဒ့ၣ်အဒီပုၢ်ဝဲၢ် ပှၤယူဒၤဖိတဖၣ်​ ဒိၣ်မးလီၤ.+ ၂ အဝဲသ့ၣ်တနီၤ တဲဝဲလၢ “ပဖိမုၣ်ဖိခွါ အိၣ်အါမး. အဃိ ပလိၣ်ဘၣ်ဘုလၢ ပကအီၣ်အီၤ ဒီးအိၣ်မူဘၣ်အဂီၢ်လီၤ.” ၃ ဒီးအဝဲသ့ၣ်တနီၤ တဲဝဲလၢ “ဖဲတၢ်အီၣ်​ တအိၣ်လၢၤဘၣ်​ အခါ ပဘၣ်ပီၣ်လီၤ ပစံာ်ပပှဲၤ, ပစပံးကျီး ဒီးပဟံၣ်ပဃီ ဒ်သိးပကန့ၢ်ဘၣ်ဘုအဂီၢ်လီၤ.” ၄ ဒီးပှၤအဂၤတနီၤ တဲဝဲလၢ “ပဘၣ်​ ပီၣ်လီၤ ပစံာ်ပပှဲၤ ဒီးပစပံးကျီး ဒ်သိး ပကဟ့ၣ်​ စီၤပၤ အတၢ်ခိတၢ်သွဲတဖၣ်​ အဂီၢ်လီၤ.+ ၅ ပဒီပုၢ်ဝဲၢ်သ့ၣ်တဖၣ်န့ၣ်​ မ့ၢ်ဒၣ်​ ပသွံၣ်ပထံ ဒီးပဖိပလံၤတဖၣ်န့ၣ်​ လီၤဂာ်ဒ် အဝဲသ့ၣ်​ အဖိအလံၤ အသိးလီၤ. ဘၣ်ဆၣ်​ ပဖိမုၣ်ဖိခွါတဖၣ်န့ၣ်​ ပကဘၣ်ဒုးကဲထီၣ်​ အဝဲသ့ၣ်လၢ ကုၢ်တဖၣ်လီၤ. ပဖိမုၣ်တနီၤန့ၣ်​ ကဲထီၣ်ကုၢ်လံ.+ တကးဒံးဘၣ်​ ပစံာ်ပပှဲၤ ဒီးစပံးကျီးတဖၣ်​ ကဲထီၣ်ပှၤဂၤအတၢ်လံအဃိ ပမၤတဘၣ်​ နီတမံၤလၢၤဘၣ်.”

၆ ဖဲယနၢ်ဟူ တၢ်ကတိၤတဖၣ်န့ၣ်​ ဒီးအဝဲသ့ၣ်​ အတၢ်ကဒူးကဒ့ၣ်အခါ ယသးဒိၣ်ထီၣ်တၢ် ဒိၣ်မးလီၤ. ၇ ဒီးယဆိကမိၣ်ထံ တၢ်ဂ့ၢ်သ့ၣ်တဖၣ်န့ၣ်​ လၢယသးပူၤ ဒီးယလဲၤသိၣ်​ ပှၤဒိၣ်ပှၤပှၢ်တဖၣ်​ ဒီးပဒိၣ်တဖၣ်​ ဒီးတဲအဝဲသ့ၣ်လၢ “သုဝဲကိးဂၤဒဲး သုဃ့န့ၢ်ဆူၣ်​ စ့အ့ၣ်တဖၣ်လၢ သုဒီပုၢ်ဝဲၢ်တဖၣ်​ အအိၣ်လီၤ.”+

ဒီးယရဲၣ်ကျဲၤ တၢ်အိၣ်ဖှိၣ်ဖးဒိၣ်​ လၢအဝဲသ့ၣ်​ အဃိလီၤ. ၈ ဒီးယတဲဘၣ်​ အဝဲသ့ၣ်လၢ “တသ့ဖဲအသ့ ပပှ့ၤက့ၤ ပဒီပုၢ်ဝဲၢ် ပှၤယူဒၤဖိတဖၣ်လၢ အဘၣ်တၢ်ဆါလီၤ အဝဲသ့ၣ်​ လၢပှၤကလုာ်တဖၣ်​ အအိၣ်လီၤ. ဘၣ်ဆၣ်​ ခဲအံၤ မ့ၢ်သုဆါလီၤကွံာ် သုနီၢ်ကစၢ် အဒီပုၢ်ဝဲၢ်လံဧီၤ.+ ဒီးမ့ၢ်ပဘၣ်ပှ့ၤကဒါက့ၤ အဝဲသ့ၣ်လၢ သုအိၣ်ဟီဧါ.” ဖဲန့ၣ်န့ၣ်​ အဝဲသ့ၣ်အိၣ်ဘှ့ၣ်​ ဒီးတဲဆၢက့ၤတၢ်တဘၣ်​ နီတမံၤလၢၤဘၣ်. ၉ ဒီးယတဲလၢ “သုမၤဒ်အံၤန့ၣ်​ တဂ့ၤဘၣ်. ဒ်သိး ပှၤကလုာ်တဖၣ်​ လၢအမ့ၢ် ပဒုၣ်ပဒါတဖၣ်​ သုတဒုၣ်ဒွဲၣ်ပှၤ တဂ့ၤအဂီၢ် သုကြၢးပာ်ဖျါထီၣ်လၢ သုပျံၤ ပကစၢ်ယွၤလၢ+ တၢ်ခဲလၢာ်အပူၤ တမ့ၢ်ဧီၤ. ၁၀ ယၤ, ယဒီပုၢ်ဝဲၢ်တဖၣ်​ ဒီးယခ့ယပှၤတဖၣ်န့ၣ်​ ပဟ့ၣ်လိၢ်စ့ ဒီးဘု ဘၣ်ဆၣ်​ ပတဃ့အအ့ၣ်ဘၣ်. ဝံသးစူၤ ဖဲသုဟ့ၣ်လိၢ်တၢ်အခါ တဘၣ်ဃ့ အအ့ၣ်တဂ့ၤ.+ ၁၁ ဝံသးစူၤ ဟ့ၣ်က့ၤအဝဲသ့ၣ်​ အစံာ်ပျီ,+ အစပံးကျီး, အသ့ၣ်စၤယံးကျီး ဒီးအဝဲသ့ၣ်အဟံၣ်အဃီ လၢတနံၤအံၤ တက့ၢ်. ဒီးကျိၣ်စ့, ဘု, စပံးထံအသီ ဒီးသိလၢ သုဃ့အဝဲသ့ၣ်​ ဒ်တၢ်အအ့ၣ်အသိးန့ၣ်​ ဟ့ၣ်က့ၤအဝဲသ့ၣ်​ အပူတကယၤန့ၣ်​ တပူ ကိးလါဒဲးတက့ၢ်.”

၁၂ အဝဲသ့ၣ်​ တဲဆၢယၤလၢ “ပကဟ့ၣ်က့ၤ အဝဲသ့ၣ်​ တၢ်သ့ၣ်တဖၣ်န့ၣ်​ ဒီးပတဃ့ အဝဲသ့ၣ်​ တၢ်နီတမံၤလၢၤဘၣ်. ပကမၤဒ် နတဲအသိး လီၤတံၢ်လီၤဆဲးလီၤ.” အဃိ ယကိးန့ၢ် ပှၤလုၢ်တၢ်ဒိၣ်တဖၣ် ဒီးယမၢ ပှၤသ့ၣ်တဖၣ်န့ၣ်​ အၢၣ်လီၤတၢ်လၢ ပှၤလုၢ်တၢ်ဒိၣ်တဖၣ်​ အမဲာ်ညါလီၤ. ၁၃ တကးဒံးဘၣ်​ ယတရုၤလီၤ ယဆ့ကၤ လၢယဖၢတၢ်အလီၢ်* ဒီးယတဲအဝဲသ့ၣ်လၢ “ပှၤကိးဂၤဒဲးလၢ အတမၤလၢပှဲၤ အတၢ်အၢၣ်လီၤအံၤဘၣ်န့ၣ်​ မ်ကစၢ်ယွၤလၢ အမ့ၢ်အတီတဂၤ တရုၤလီၤအီၤ ဒ်အံၤတက့ၢ်. ကစၢ်ယွၤ ကတရုၤလီၤကွံာ် အဟံၣ်အဃီ ဒီးတၢ်လၢ အအိၣ်ဒီးအီၤတဖၣ်​ တုၤလၢ အတၢ်တအိၣ်​ ဒီးအီၤနီတမံၤလၢၤဘၣ်.” ဒီးတၢ်အိၣ်ဖှိၣ်ဒီတဖုန့ၣ် တဲဆၢဝဲလၢ “အၤမ့ၣ်.”* ဒီးအဝဲသ့ၣ်​ စံးထီၣ်ပတြၢၤ ယဟိဝၤယွၤ ဒီးပှၤဂီၢ်မုၢ်တဖၣ်​ မၤဝဲဒ် အအၢၣ်လီၤဝဲအသိးလီၤ.

၁၄ အဂၤတမံၤန့ၣ်​ စီၤပၤအၢ်တၤၡါၡတၤ+ ပာ်ထီၣ်ယၤလၢ ယူဒၤအဟီၣ်ကဝီၤ အပဒိၣ်ဖးဒိၣ်+ စးထီၣ်ဖဲ အဝဲ ပၢတၢ် ၂၀ နံၣ်တနံၣ်+ တုၤလၢ ၃၂ နံၣ်တနံၣ်လီၤ.+ ဖဲတၢ် ၁၂ နံၣ်အံၤ အတီၢ်ပူၤန့ၣ်​ ယၤဒီးယဒီပုၢ်ဝဲၢ်ခွါတဖၣ်န့ၣ်​ ပတဟံးန့ၢ် တၢ်အီၣ်လၢ စီၤပၤ မၢပဒိၣ်ဖးဒိၣ်​ ဟံးန့ၢ်ဝဲလၢ ပှၤဂီၢ်မုၢ်အအိၣ်ဘၣ်.+ ၁၅ ဘၣ်ဆၣ်​ လၢညါ ပှၤလၢအကဲပဒိၣ်ဖးဒိၣ်​ လၢယမဲာ်ညါတဖၣ်န့ၣ်​ တီၣ်ထီၣ်​ တၢ်ဝံတၢ်ယိး လၢပှၤဂီၢ်မုၢ်တဖၣ်အလိၤ ဒီးအဝဲသ့ၣ်​ ဟံးန့ၢ် စ့ညၣ်ၡက့လး* ၄၀ လၢကိၣ်ဒီးစပံးထံအဂီၢ် ကိးနံၤဒဲးလီၤ. ဒီးအဝဲသ့ၣ်​ အခ့အပှၤတဖၣ်န့ၣ်​ ဆီၣ်တံၢ်မၤနၢၤ ပှၤဂီၢ်မုၢ်လီၤ. ဘၣ်ဆၣ်​ မ့မ့ၢ်ယၤန့ၣ်​ မ့ၢ်လၢယပျံၤ ကစၢ်ယွၤအဃိ+ ယတမၤဒ်န့ၣ်ဘၣ်.+

၁၆ ယမၤစၢၤတၢ်လၢ တၢ်သူၣ်ထီၣ်​ ဝ့ၢ်ဒူၣ်အံၤ ဒီးယခ့ယပှၤခဲလၢာ်န့ၣ်​ ပာ်ဖှိၣ်မၤသကိးတၢ် လၢတၢ်မၤအံၤအဂီၢ် သနာ်က့ ပတဟံးန့ၢ် စံာ်ပျီနီတဘ့ၣ်ဘၣ်.+ ၁၇ တကးဒံးဘၣ်​ ပှၤအဂၤ ၁၅၀ လၢအမ့ၢ် ပှၤယူဒၤဖိ ဒီးပဒိၣ်တဖၣ်​ ဃုာ်ဒီးပှၤကလုာ်တဖၣ်​ လၢအဟဲလၢ ပအိၣ်န့ၣ်​ အီၣ်တၢ်လၢ ယစီၢ်နီၤခိၣ်​ ထီဘိလီၤ. ၁၈ ကိးနံၤဒဲးန့ၣ်​ ယမၢပှၤကတဲာ်ကတီၤ ကျီၢ်ဖါတဒု, သိလၢအဂ့ၤကတၢၢ် ဃုဒု ဒီးထိၣ်တဖၣ်လီၤ. ဒီးပှၤကတဲာ်ကတီၤန့ၢ်ပှၤ စပံးထံ အကလုာ်ကလုာ် အါအါဂီၢ်ဂီၢ် အသီတဆံတဘျီလီၤ. ဘၣ်ဆၣ်​ ယတဃ့န့ၢ်ဆူၣ်​ တၢ်အီၣ်လၢ စီၤပၤမၢ ပဒိၣ်ဖးဒိၣ်​ ဟံးန့ၢ်ဝဲလၢ ပှၤဂီၢ်မုၢ်အအိၣ်​ နီတဘျီဘၣ်, မ့ၢ်လၢ ပှၤဂီၢ်မုၢ်တဖၣ်န့ၣ်​ အတၢ်ဝံတၢ်ယိး ဃၢပာ်စၢၤလံအဃိလီၤ. ၁၉ အိ ယကစၢ်ယွၤဧၢ, မ့ၢ်လၢ ယမၤစၢၤ ပှၤဂီၢ်မုၢ်တဖၣ်အံၤအါမး အဃိ သ့ၣ်နီၣ်ထီၣ်က့ၤယၤ ဒီးဆိၣ်ဂ့ၤယၤတက့ၢ်.+

၆ ဖဲပှၤတဲဘၣ်​ စီၤစၤနဘၤလး, စီၤတိၤဘံယၤ,+ ပှၤဧ့ရ့းဖိ+ စီၤက့ၤၡ့ၣ်​ ဒီးပဒုၣ်ပဒါ အဂၤတဖၣ်လၢ ယတ့ထီၣ်က့ၤ ဝ့ၢ်ဒူၣ်+ ဒီးဝ့ၢ်ဒူၣ်​ အတၢ်လီၤဟိတဖၣ်​ တအိၣ်ဝဲ နီတတီၤလၢၤဘၣ်အခါ (ဘၣ်ဆၣ်​ ဖဲန့ၣ်အခါ ယတထီထီၣ်ဘၣ်​ ပဲတြီတဖၣ်လၢ ဝ့ၢ်အတြဲၤလိၤဒံးဘၣ်)+ ၂ စီၤစၤနဘၤလး ဒီးစီၤက့ၤၡ့ၣ်​ ဆှၢလီၤ တၢ်ကစီၣ်​ လၢယအိၣ်လီၤ. အဝဲသ့ၣ်တဲဝဲလၢ “မ်ပပာ်ပနီၣ်​ တၢ်ဆၢကတီၢ် လၢပကထံၣ်လိာ်သးလၢ သဝီတဖၣ်​ လၢအအိၣ်လၢ အိနိၤ အတၢ်ပၢၤခိၣ်တက့ၢ်.”+ နီၢ်ကီၢ်န့ၣ်​ အဝဲသ့ၣ်​ ကူၣ်ထီၣ်တၢ်လၢ ကမၤအၢယၤလီၤ. ၃ အဃိ ယဆှၢလီၤ ပှၤစိာ်တၢ်ကစီၣ်ဖိတဖၣ်လၢ ပှၤတဖၣ်န့ၣ်အအိၣ်​ ဒီးယမၢ အဝဲသ့ၣ်တဲလၢ “ယမၤတၢ်မၤ ဖးဒိၣ်တခါ အဃိယလဲၤလီၤ တသ့ဘၣ်. ယမ့ၢ်ဘၣ်လဲၤလီၤလၢ သုအိၣ်န့ၣ်​ တၢ်မၤတခါအံၤ ကပတုာ်ကွံာ်လီၤ.” ၄ အဝဲသ့ၣ်​ ဆှၢလီၤန့ၢ်ယၤ တၢ်ကစီၣ်​ ဒ်အလီၢ်လီၢ် လွံၢ်ဘျီ ဒီးယၤစ့ၢ်ကီး ယတဲဆၢ အဝဲသ့ၣ်​ ဒ်အလီၢ်လီၢ် ကိးဘျီဒဲးလီၤ.

၅ စီၤစၤနဘၤလး ဆှၢလီၤတၢ်ကစီၣ်​ လၢယအိၣ်​ ဒ်အလီၢ်လီၢ် ယဲၢ်ဘျီတဘျီ ဒီးအခ့အပှၤတဂၤ ဟဲစိာ်န့ၢ်ယၤ လံာ်ပရၢလၢ အအိးထီၣ်အသး လၢအစုပူၤလီၤ. ၆ လံာ်ပရၢတဘ့ၣ်အံၤ တဲဝဲလၢ “ပှၤကလုာ်တဖၣ်​ နၢ်ဟူဝဲလၢ နၤဒီးပှၤယူဒၤဖိတဖၣ်န့ၣ်​ ကူၣ်ထီၣ်တၢ်ဒ်သိး ကထီဒါ စီၤပၤအဂီၢ်လီၤ.+ ဒီးစီၤက့ၤၡ့ၣ်+ စ့ၢ်ကီး တဲဝဲဒ်န့ၣ်လီၤ. မ့ၢ်လၢ နအဲၣ်ဒိးထီဒါ စီၤပၤအဃိ နသူၣ်ထီၣ်​ ဝ့ၢ်ဒူၣ်လီၤ. ဒီးတၢ်ကစီၣ်​ ဟူထီၣ်သါလီၤဝဲလၢ နကကဲထီၣ်​ အဝဲသ့ၣ်​ အစီၤပၤလီၤ. ၇ တကးဒံးဘၣ်​ နဃုထၢထီၣ်​ ဝံတဖၣ်လၢ အကဟးတဲနဂ့ၢ်လၢ ဝ့ၢ်ယရူၤၡလ့ၣ်​ ဒီဝ့ၢ်အပူၤ လၢနကဲစီၤပၤလၢ ယူဒၤ အဟီၣ်ကဝီၤပူၤလီၤ. တၢ်ဂ့ၢ်တခါအံၤ ပှၤကတဲဘၣ်က့ၤ ပစီၤပၤဧါသၢၤ. အဃိ ဟဲလၢပအိၣ်​ ဒီးပကတဲသကိး တၢ်ဂ့ၢ်အံၤမီၤ.”

၈ ဘၣ်ဆၣ်​ ယဆှၢလီၤ တၢ်စံးဆၢလၢ အအိၣ်ဒ်အံၤ, “တၢ်လၢ နတဲသ့ၣ်တဖၣ်န့ၣ်​ နထုးထီၣ်လၢ နနီၢ်ကစၢ် အခိၣ်နူာ်လီၤ. တၢ်တကဲထီၣ်အသး ဒ်န့ၣ်နီတမံၤဘၣ်.” ၉ အဝဲသ့ၣ်​ ကိးဂၤဒဲး ဂုာ်ကျဲးစၢး မၤပျံၤပှၤ ဒီးတဲဝဲလၢ ပသးဂံၢ်ဘါကလီၤစၢ်* ဒီးပတၢ်မၤ တဝံၤလၢၤဘၣ်.+ အဃိ ယဃ့ဘါထုကဖၣ်လၢ ယဂံၢ်ယဘါ ကဆူၣ်ထီၣ်အဂီၢ်လီၤ.*+

၁၀ ဝံၤဒီးယလဲၤလၢ စီၤဒလါယၤ အဖိခွါ စီၤၡမါယၤ လၢအမ့ၢ် စီၤမဟ့တးဘးအ့လး အလံၤခွါအဟံၣ်​ ဒီးဘၣ်ဖဲအတဟးထီၣ်လၢ အဟံၣ်ပူၤလၢၤဘၣ်အခါလီၤ. အဝဲတဲယၤလၢ “အဝဲသ့ၣ်​ ကဟဲမၤသံနၤလီၤ. အဃိ ပကလဲၤလၢ ယွၤလၢအမ့ၢ်အတီတဂၤ အဟံၣ်​ ဒီးပကပာ်ပနီၣ်​ တၢ်ဆၢကတီၢ်လၢ ပကထံၣ်လိာ်သး လၢတၢ်လုၢ်ဟံၣ်ပူၤမီၤ. ဒီးပကပံးဃာ် တၢ်လုၢ်ဟံၣ်​ အပဲတြီတဖၣ်လီၤ. ပမ့ၢ်တမၤဒ်န့ၣ်ဘၣ်န့ၣ်​ အဝဲသ့ၣ်​ ကဟဲမၤသံနၤလၢ မုၢ်နၤခီလီၤ.” ၁၁ ဘၣ်ဆၣ်​ ယတဲအီၤလၢ “ပှၤဒ်သိးဒီးယၤန့ၣ်​ ကဘၣ်ဃ့ၢ် အိၣ်ခူသူၣ်န့ၣ်. ဒီးပှၤဒ်သိးယၤန့ၣ်​ မ့ၢ်လဲၤနုာ်လၢ တၢ်လုၢ်ဟံၣ်အပူၤနာ်က့ အကဆဲးအိၣ်မူဘၣ်ဒံးဧါ.+ အဃိ ယတလဲၤဘၣ်.” ၁၂ ဖဲန့ၣ်န့ၣ်​ ယသ့ၣ်ညါလၢ ပှၤတဂၤအံၤ တမ့ၢ်ဝံလၢ ကစၢ်ယွၤ ဆှၢလီၤအီၤဘၣ်. အမ့ၢ်ပှၤလၢ စီၤတိၤဘံယၤ ဒီးစီၤစၤနဘၤလး+ ငါအီၤဒ်သိး အကမၤအၢယၤလၢ အတၢ်ကတိၤတဖၣ်​ အဃိလီၤ. ၁၃ အဝဲသ့ၣ်​ ငါအီၤဒ်သိး အကမၤပျံၤမၤဖုးယၤ ဒီးယကမၤဘၣ်​ တၢ်ဒဲးဘး အဂီၢ်လီၤ. တၢ်မ့ၢ်ကဲထီၣ်အသး ဒ်န့ၣ်န့ၣ်​ အဝဲသ့ၣ်​ မၤဟးဂီၤယမံၤ ဒီးဒုၣ်ဒွဲၣ်စံးအၢယၤ ကန့ၢ်ဝဲလီၤ.

၁၄ အိ ယကစၢ်ယွၤဧၢ, တဘၣ်သးပ့ၤနီၣ်​ တၢ်လၢ စီၤတိၤဘံယၤ+ ဒီးစီၤစၤနဘၤလး မၤဝဲတဖၣ်တဂ့ၤ ဒီးတဘၣ်သးပ့ၤနီၣ်စ့ၢ်ကီး ဝံမုၣ်နီၢ်နိဒယၤ ဒီးဝံအဂၤတဖၣ်​ လၢအဂုာ်ကျဲးစၢး မၤပျံၤမၤဖုးယၤ တလီၢ်လီၢ်န့ၣ်တဂ့ၤ.

၁၅ ဖဲလါအလူလး* ၂၅ သီတသီန့ၣ်​ ပှၤတ့ထီၣ်​ ဝ့ၢ်ဒူၣ်​ ဝံၤဝဲလီၤ. တၢ်မၤအံၤ ဝံၤဝဲလၢ ၅၂ သီ အတီၢ်ပူၤလီၤ.

၁၆ ဖဲပဒုၣ်ပဒါခဲလၢာ် နၢ်ဟူတၢ်ဂ့ၢ်အံၤ ဒီးပှၤကလုာ်တဖၣ်လၢ အအိၣ်ဝးတရံးပှၤ ခဲလၢာ်န့ၣ်​ ထံၣ်ဘၣ်ဝဲအခါ အဝဲသ့ၣ်​ မဲာ်ဆှးဒိၣ်မးလီၤ.+ ဒီးအဝဲသ့ၣ်​ သ့ၣ်ညါဝဲလၢ တၢ်မၤအံၤဝံၤဝဲ ခီဖျိလၢ ပကစၢ်ယွၤ အတၢ်မၤစၢၤ အဃိလီၤ. ၁၇ ဖဲန့ၣ်အဆၢကတီၢ်န့ၣ်​ ယူဒၤအပှၤဒိၣ်ပှၤပှၢ်တဖၣ်+ ဆှၢလီၤ လံာ်ပရၢအါဘ့ၣ်လၢ စီၤတိၤဘံယၤ အအိၣ်​ ဒီးစီၤတိၤဘံယၤ စံးဆၢ အဝဲသ့ၣ်လီၤ. ၁၈ စီၤတိၤဘံယၤ အမံၤပှၢ်ပိာ်ခွါန့ၣ်​ မ့ၢ်ဝဲ စီၤအၤရၤ အဖိခွါ+ စီၤၡကါနယၤလီၤ. တကးဒံးဘၣ်​ စီၤတိၤဘံယၤ အဖိခွါ စီၤယိဃၤနၣ်န့ၣ်​ ဆီဟံၣ်ဆီဃီဒီး စီၤမၡူလၣ်​ အဖိမုၣ်လီၤ. စီၤမၡူလၣ်မ့ၢ်+ စီၤဘရ့ကံယၤ အဖိခွါလီၤ. လၢတၢ်ဂ့ၢ်တဖၣ်အံၤအဃိ ပှၤယူဒၤဖိအါဂၤ အၢၣ်လီၤဝဲလၢ အဝဲသ့ၣ်​ ကတီဒီးအီၤလီၤ. ၁၉ ဒီးအဝဲသ့ၣ်​ တဲဂ့ၤဝဲ စီၤတိၤဘံယၤ လၢယမဲာ်ညါ တလီၢ်လီၢ် ဒီးအဝဲသ့ၣ်​ က့ၤတဲဘၣ်​ စီၤတိၤဘံယၤလၢ တၢ်လၢ ယတဲတဖၣ်လီၤ. ဝံၤဒီးစီၤတိၤဘံယၤ ဆှၢလီၤလံာ်ပရၢတဖၣ်​ ဒ်သိးကမၤပျံၤမၤဖုး ယၤအဂီၢ်လီၤ.+

၇ ဖဲပှၤသူၣ်ထီၣ်က့ၤ ဝ့ၢ်ဒူၣ်ဝံၤအခါ+ ယထီထီၣ်​ ပဲတြီတဖၣ်လီၤ.+ ဒီးယဟ့ၣ်လီၤ ပှၤခိးတြဲၤဖိတဖၣ်,+ ပှၤသးဝံၣ်တၢ်ဖိတဖၣ်+ ဒီးပှၤလ့ၤဝံဖိတဖၣ်+ အမူဒါတဖၣ်လီၤ. ၂ ဒီးယပာ်ထီၣ်​ ယဒီပုၢ်ဝဲၢ်ခွါ စီၤဃနၤနံ+ ဒီးယပာ်ထီၣ်စ့ၢ်ကီး စီၤဃနၤနယၤ လၢအမ့ၢ် သုးအတၢ်သူၣ်ထီၣ်အခိၣ်+ ဒ်သိး အဝဲသ့ၣ်​ ကအံးထွဲကွၢ်ထွဲ ဝ့ၢ်ယရူၤၡလ့ၣ်အဂီၢ်လီၤ. စီၤဃနၤနယၤန့ၣ်​ မ့ၢ်ပှၤလၢ ပှၤနာ်န့ၢ်အီၤသ့ဂ့ၤဂ့ၤ ဒီးအပျံၤ ယွၤလၢအမ့ၢ်အတီ+ အါန့ၢ် ပှၤအဂၤတဖၣ်လီၤ. ၃ ဒီးယတဲအဝဲသ့ၣ်လၢ “တနံၤဘၣ်တနံၤန့ၣ်​ တချုးလၢ မုၢ်ကိၢ်ထီၣ်ဒံးဘၣ်န့ၣ်​ ပှၤတဘၣ်​ အိးထီၣ်​ ဝ့ၢ်ယရူၤၡလ့ၣ်​ အတြဲၤတဖၣ်ဘၣ်. ဒီးတချုးလၢ ပှၤခိးတြဲၤဖိတဖၣ်​ မၤအမူဒါ ဝံၤဒံးဘၣ်န့ၣ်​ အဝဲသ့ၣ်​ ကဘၣ်ကးတံာ် ပဲတြီတဖၣ်​ ဒီးခးတံာ်ဃာ်အီၤလီၤ. ဒီးသုကဘၣ်​ ပာ်ထီၣ်​ ပှၤလၢ အအိၣ်လၢ ဝ့ၢ်ယရူၤၡလ့ၣ်အပူၤတဖၣ်​ ဒ်ပှၤခိးတၢ်ဖိအသိးလီၤ. အဝဲသ့ၣ်တနီၤန့ၣ်​ ကဘၣ်အိၣ်ခိးတၢ်လၢ အလီၤဘၣ်မူဒါအလီၢ် ဒီးတနီၤန့ၣ်​ ကဘၣ်အိၣ်ခိးတၢ်လၢ အနီၢ်ကစၢ် အဟံၣ်မဲာ်ညါလီၤ.” ၄ တၢ်လၢ ဝ့ၢ်ယရူၤၡလ့ၣ်န့ၣ်​ မ့ၢ်ဝ့ၢ်ဖးဒိၣ်တဖျၢၣ်​ ဒီးပှၤအိၣ်လၢအပူၤ ထဲစှၤဂၤ+ ဒီးဟံၣ်အိၣ်ဝဲ စှၤဖျၢၣ်လီၤ.

၅ ဘၣ်ဆၣ်​ ကစၢ်ယွၤ ထိၣ်ဟူးထိၣ်ဂဲၤထီၣ်ယၤလၢ ယကကိးဖှိၣ်​ ပှၤဒိၣ်ပှၤပှၢ်တဖၣ်, ပဒိၣ်တဖၣ်​ ဒီးပှၤဂီၢ်မုၢ်တဖၣ်​ ဒ်သိး ကကွဲးနီၣ်ကွဲးဃါလီၤ ပှၤမံၤဒ် အဝဲသ့ၣ်​ အတၢ်ဟဲလီၤစၢၤလီၤသွဲၣ်​ အိၣ်ဝဲအသိးလီၤ.+ ဒီးယထံၣ်န့ၢ် ပှၤလၢအဟဲက့ၤ အဆိကတၢၢ်တဖၣ်​ အတၢ်ဟဲလီၤစၢၤလီၤသွဲၣ်​ အလံာ်ကွဲးနီၣ်ကွဲးဃါလီၤ. ဖဲန့ၣ်န့ၣ်​ တၢ်ကွဲးအသး အိၣ်ဝဲဒ်အံၤလီၤ.

၆ လၢညါန့ၣ်​ ဘၤဘူၤလိၣ်​ အစီၤပၤ နဘူၤကးန့စၢ်+ က့ၤဖီၣ်ယူဒၤ အပှၤဂီၢ်မုၢ်တဖၣ်လီၤ.+ ပှၤလၢအဝဲသ့ၣ်အကျါ လၢအဟဲက့ၤဝဲန့ၣ်* ဘၣ်တၢ်ပာ်ဖျါထီၣ်အီၤ လၢလာ်လီၤ. အဝဲသ့ၣ်​ အိၣ်ဘၣ်လၢ ကီၢ်ရ့ၣ်အပူၤ* ဒီးအဝဲသ့ၣ်​ တဂၤစုာ်စုာ် ဟဲက့ၤအိၣ်ဝဲလၢ အနီၢ်ကစၢ်အဝ့ၢ် လၢယူဒၤ အဟီၣ်ကဝီၤအပူၤ ဒီးလၢ ဝ့ၢ်ယရူၤၡလ့ၣ်လီၤ.+ ၇ အဝဲသ့ၣ်​ အခိၣ်အနၢ်တဖၣ်​ မ့ၢ်ဝဲ စီၤစရူဘၤဘ့လး,+ စီၤယ့ၤၡူ,+ စီၤနဃ့မယၤ, စီၤဧစၤရယၤ, စီၤရၤမယၤ, စီၤနဃၤမနံ, စီၤမၢ်ဒကဲၤ, စီၤဘံးလၡၣ်, စီၤမံးစပ့ရ့း, စီၤဘံးကဝဲၤ, စီၤရဃူၢ် ဒီးစီၤဘၤနါလီၤ.

ပှၤအံၣ်စရ့လးဖိ အပိာ်ခွါလၢ အဟဲက့ၤန့ၣ်​ အနီၣ်ဂံၢ် ဘၣ်တၢ်ပာ်ဖျါထီၣ်အီၤ ဒ်လၢလာ်အံၤ အသိးလီၤ.+ ၈ စီၤပးရိာ် အဖိခွါတဖၣ်* အိၣ်ဝဲ ၂,၁၇၂ ဂၤလီၤ. ၉ စီၤၡဖးတယၤ အဖိခွါတဖၣ်​ အိၣ်ဝဲ ၃၇၂ ဂၤလီၤ. ၁၀ စီၤအၤရၤ အဖိခွါတဖၣ်+ အိၣ်ဝဲ ၆၅၂ ဂၤလီၤ. ၁၁ စီၤပးဃးမိၤအး အဖိခွါတဖၣ်+ လၢအမ့ၢ် စီၤယ့ၤၡူ ဒီးစီၤယိၤအာ် အဖိခွါတဖၣ်န့ၣ်+ အိၣ်ဝဲ ၂,၈၁၈ ဂၤလီၤ. ၁၂ စီၤဧ့ၤလၣ်​ အဖိခွါတဖၣ်+ အိၣ်ဝဲ ၁,၂၅၄ ဂၤလီၤ. ၁၃ စီၤစးတူၤ အဖိခွါတဖၣ်​ အိၣ်ဝဲ ၈၄၅ ဂၤလီၤ. ၁၄ စီၤစးကဲ အဖိခွါတဖၣ်​ အိၣ်ဝဲအဂၤ ၇၆၀ လီၤ. ၁၅ စီၤဘံနူၤ အဖိခွါတဖၣ်​ အိၣ်ဝဲ ၆၄၈ ဂၤလီၤ. ၁၆ စီၤဘ့ဘဲၤ အဖိခွါတဖၣ်​ အိၣ်ဝဲ ၆၂၈ ဂၤလီၤ. ၁၇ စီၤဧၤစကး အဖိခွါတဖၣ်​ အိၣ်ဝဲ ၂,၃၂၂ ဂၤလီၤ. ၁၈ စီၤအဒိၤနံကၣ်​ အဖိခွါတဖၣ်​ အိၣ်ဝဲ ၆၆၇ ဂၤလီၤ. ၁၉ စီၤဘံးကဝဲၤ အဖိခွါတဖၣ်​ အိၣ်ဝဲ ၂,၀၆၇ ဂၤလီၤ. ၂၀ စီၤဧၤဒံၣ်​ အဖိခွါတဖၣ်​ အိၣ်ဝဲ ၆၅၅ ဂၤလီၤ. ၂၁ စီၤအ့ၤတၢ် အဖိခွါတဖၣ်​ လၢအဟဲလီၤစၢၤလီၤသွဲၣ်လၢ စီၤဃံးစကံယၤန့ၣ်​ အိၣ်ဝဲ ၉၈ ဂၤလီၤ. ၂၂ စီၤဃၤၡူၣ်​ အဖိခွါတဖၣ်​ အိၣ်ဝဲ ၃၂၈ ဂၤလီၤ. ၂၃ စီၤဘ့စဲၤ အဖိခွါတဖၣ်​ အိၣ်ဝဲ ၃၂၄ ဂၤလီၤ. ၂၄ စီၤဃၤရံာ် အဖိခွါတဖၣ်​ အိၣ်ဝဲ ၁၁၂ ဂၤလီၤ. ၂၅ ကံးဘိၣ်​ အဖိခွါတဖၣ်+ အိၣ်ဝဲ ၉၅ ဂၤလီၤ. ၂၆ ပှၤဘ့ၤသလ့ဃ့ၣ်ဖိ ဒီးပှၤနတိဖၤဖိန့ၣ်​ အိၣ်ဝဲ ၁၈၈ ဂၤလီၤ. ၂၇ ပှၤဧၤနသိးဖိန့ၣ်+ အိၣ်ဝဲ ၁၂၈ ဂၤလီၤ. ၂၈ ပှၤဘ့ၤသဧၤစမၤဝ့းဖိန့ၣ်​ အိၣ်ဝဲ ၄၂ ဂၤလီၤ. ၂၉ ပှၤကံးရယးယဧၤရံၣ်ဖိ,+ ပှၤကဖံရၤဖိ ဒီးပှၤဘအ့ရိးဖိန့ၣ်+ အိၣ်ဝဲ ၇၄၃ ဂၤလီၤ. ၃၀ ပှၤရၤမါဖိ ဒီးပှၤက့ဘၤဖိန့ၣ်+ အိၣ်ဝဲ ၆၂၁ ဂၤလီၤ. ၃၁ ပှၤမံးကမၢ်ဖိန့ၣ်+ အိၣ်ဝဲ ၁၂၂ ဂၤလီၤ. ၃၂ ပှၤဘ့ၤသ့လးဖိ+ ဒီးပှၤဂဲဖိန့ၣ်+ အိၣ်ဝဲ ၁၂၃ ဂၤလီၤ. ၃၃ ပှၤနဘိဖိ လၢအဂၤတဒူၣ်န့ၣ်​ အိၣ်ဝဲ ၅၂ ဂၤလီၤ. ၃၄ စီၤဧ့ၤလၣ်​ လၢအဂၤတဂၤ အဖိခွါတဖၣ်​ အိၣ်ဝဲ ၁,၂၅၄ ဂၤလီၤ. ၃၅ စီၤဃၤရံၣ်​ အဖိခွါတဖၣ်​ အိၣ်ဝဲ ၃၂၀ ဂၤလီၤ. ၃၆ ယရံၤဃိ အဖိခွါတဖၣ်​ အိၣ်ဝဲ ၃၄၅ ဂၤလီၤ. ၃၇ စီၤလိး အဖိခွါတဖၣ်, စီၤဃၤဒံး အဖိခွါတဖၣ်​ ဒီးစီၤအိနိၤ+ အဖိခွါတဖၣ်န့ၣ်​ အိၣ်ဝဲ ၇၂၁ ဂၤလီၤ. ၃၈ စီၤစနါအၤ အဖိခွါတဖၣ်​ အိၣ်ဝဲအဂၤ ၃,၉၃၀ လီၤ.

၃၉ ဒီးလၢ ပှၤလုၢ်တၢ်ဒိၣ်တဖၣ်+ အကျါ စီၤယဒါယၤ အဖိခွါတဖၣ်​ လၢအမ့ၢ် စီၤယ့ၤၡူ အဒူၣ်ဖိထၢဖိတဖၣ်န့ၣ်​ အိၣ်ဝဲ ၉၇၃ ဂၤလီၤ. ၄၀ စီၤအံးမ့ၢ် အဖိခွါတဖၣ်​ အိၣ်ဝဲ ၁,၀၅၂ ဂၤလီၤ. ၄၁ စီၤပးၡဃူၢ် အဖိခွါတဖၣ်+ အိၣ်ဝဲ ၁,၂၄၇ ဂၤလီၤ. ၄၂ စီၤဃၤရံၣ်​ အဖိခွါတဖၣ်+ အိၣ်ဝဲ ၁,၀၁၇ ဂၤလီၤ.

၄၃ ဒီးလၢပှၤလ့ၤဝံဖိတဖၣ်+ အကျါ စီၤယ့ၤၡူ အဖိခွါတဖၣ်​ အိၣ်ဝဲ ၇၄ ဂၤလီၤ. အဝဲသ့ၣ်မ့ၢ် စီၤကးမံၤအ့လး+ အဒူၣ်ဖိထၢဖိ လၢအပၣ်ဃုာ်လၢ စီၤဟိၤဒၤနယၤ အစၢၤအသွဲၣ်ကျါလီၤ. ၄၄ စီၤအၤစာ် အဖိခွါတဖၣ်+ လၢအမ့ၢ် ပှၤသးဝံၣ်တၢ်ဖိတဖၣ်န့ၣ်+ အိၣ်ဝဲ ၁၄၈ ဂၤလီၤ. ၄၅ ပှၤခိးတြဲၤဖိတဖၣ်+ လၢအမ့ၢ် စီၤၡၤလူၣ်​ အဖိခွါတဖၣ်, စီၤအ့ၤတၢ် အဖိခွါတဖၣ်, စီၤတၤလမိၣ်​ အဖိခွါတဖၣ်, စီၤဧးကူာ် အဖိခွါတဖၣ်,+ စီၤဃတံတၤ အဖိခွါတဖၣ်​ ဒီးစီၤၡိဘံၤ အဖိခွါတဖၣ်န့ၣ်​ အိၣ်ဝဲ ၁၃၈ ဂၤလီၤ.

၄၆ လၢတၢ်လုၢ်ဟံၣ်​ အခ့အပှၤတဖၣ်*+ အကျါန့ၣ်​ ပၣ်ဃုာ်ဒီး စီၤစံဃၤ အဖိခွါတဖၣ်, စီၤဃစူဖၤ အဖိခွါတဖၣ်, စီၤတးဘၤဧိး အဖိခွါတဖၣ်, ၄၇ စီၤက့ရိၣ်​ အဖိခွါတဖၣ်, စီၤစံဟၤ အဖိခွါတဖၣ်, စီၤပးဒိၣ်​ အဖိခွါတဖၣ်, ၄၈ စီၤလဘၤနၤ အဖိခွါတဖၣ်, စီၤဃၤကဘၤ အဖိခွါတဖၣ်, စီၤၡၤလမဲၤ အဖိခွါတဖၣ်, ၄၉ စီၤဃၤနၣ်​ အဖိခွါတဖၣ်, စီၤကံးဒ့လး အဖိခွါတဖၣ်, စီၤကၤဃၢ် အဖိခွါတဖၣ်, ၅၀ စီၤရအါယၤ အဖိခွါတဖၣ်, စီၤရစံၣ်​ အဖိခွါတဖၣ်, စီၤနကိဒၤ အဖိခွါတဖၣ်, ၅၁ စီၤကးစၣ်​ အဖိခွါတဖၣ်, စီၤဧူးစး အဖိခွါတဖၣ်, စီၤပးစ့ၤ အဖိခွါတဖၣ်, ၅၂ စီၤဘ့စဲၤ အဖိခွါတဖၣ်, စီၤမူနး အဖိခွါတဖၣ်, စီၤနဖူစံၣ်​ အဖိခွါတဖၣ်, ၅၃ စီၤဘၤကဘူး အဖိခွါတဖၣ်, စီၤဃၤကူဖၤ အဖိခွါတဖၣ်, စီၤဃၢ်ဃူၢ် အဖိခွါတဖၣ်, ၅၄ စီၤဘၤစလံး အဖိခွါတဖၣ်, စီၤမဃံဒၤ အဖိခွါတဖၣ်, စီၤဃၤရၡၤ အဖိခွါတဖၣ်, ၅၅ စီၤဘၢ်ကိၣ်​ အဖိခွါတဖၣ်, စီၤစံစရၤ အဖိခွါတဖၣ်, စီၤသၤမၤ အဖိခွါတဖၣ်, ၅၆ စီၤနစံၤ အဖိခွါတဖၣ်​ ဒီးစီၤဃၤတံဖၤ အဖိခွါတဖၣ်လီၤ.

၅၇ လၢစီၤၡလိၤမိၤ အခ့အပှၤတဖၣ်​ အဖိခွါတဖၣ်အကျါန့ၣ်+ ပၣ်ဃုာ်ဒီး စီၤစိတဲၤ အဖိခွါတဖၣ်, စီၤစိဖ့ၤရ့း အဖိခွါတဖၣ်, စီၤပရံဒၤ အဖိခွါတဖၣ်, ၅၈ စီၤယၤလၤ အဖိခွါတဖၣ်, စီၤဒၢ်ကိၣ်​ အဖိခွါတဖၣ်, စီၤကံးဒ့လး အဖိခွါတဖၣ်, ၅၉ စီၤၡဖးတယၤ အဖိခွါတဖၣ်, စီၤဃးတံလး အဖိခွါတဖၣ်, စီၤဖိၤက့ရ့းဃးစဘဲၣ်​ အဖိခွါတဖၣ်, စီၤအၤမိၣ်​ အဖိခွါတဖၣ်လီၤ. ၆၀ တၢ်လုၢ်ဟံၣ်​ အခ့အပှၤတဖၣ်+ ဒီးစီၤၡလိၤမိၤ အခ့အပှၤတဖၣ်​ အဖိခွါခဲလၢာ်န့ၣ်​ အိၣ်ဝဲ ၃၉၂ ဂၤလီၤ.

၆၁ ပှၤတနီၤလၢ အအိၣ်ဝဲလၢ တ့ၤလမ့ၤလၤ, တ့လဃၢ်ၡၤ, ခ့ရူာ်, အးဒၣ်​ ဒီးအံးမ့ၢ်န့ၣ်​ ဟဲက့ၤဝဲ ဘၣ်ဆၣ်​ အပၢ်အဒူၣ်ဖိထၢဖိ မ့ၢ်ဂ့ၤ အတၢ်ဟဲလီၤစၢၤလီၤသွဲၣ်​ မ့ၢ်ဂ့ၤ မ့ၢ်အဝဲသ့ၣ်ကဲ ပှၤအံၣ်စရ့လးဖိဧါ တကဲဘၣ်ဧါန့ၣ်​ အဝဲသ့ၣ်​ ပာ်ဖျါထီၣ်ဝဲ တၢ်အုၣ်အသးတဘၣ်ဘၣ်. ပှၤတဖၣ်န့ၣ်​ ပၣ်ဃုာ်ဒီး+ ၆၂ စီၤဒလါယၤ အဖိခွါတဖၣ်, စီၤတိၤဘံယၤ အဖိခွါတဖၣ်​ ဒီးစီၤနကိဒၤ အဖိခွါတဖၣ်​ ဒီးအဝဲသ့ၣ်အိၣ်ဝဲ ၆၄၂ ဂၤလီၤ. ၆၃ လၢပှၤလုၢ်တၢ်ဒိၣ်တဖၣ်​ အကျါန့ၣ်​ ပၣ်ဃုာ်ဒီး စီၤဃဘါနယၤ အဖိခွါတဖၣ်, စီၤဟးကိး အဖိခွါတဖၣ်+ ဒီးစီၤဘၢ်စံးလဲ အဖိခွါတဖၣ်လီၤ. မ့ၢ်လၢ စီၤဘၢ်စံးလဲန့ၣ်​ ဟံးန့ၢ်အမါလၢ ပှၤကံးလဧးဖိ စီၤဘၢ်စံးလဲ+ အဖိမုၣ်​ ဒီးဟံးန့ၢ် အမံၤပှၢ် အမံၤအဃိ အမံၤကဲထီၣ်ဝဲ စီၤဘၢ်စံးလဲလီၤ. ၆၄ ပှၤတဖၣ်န့ၣ်​ ဃုကွၢ်ဝဲ အဒူၣ်ဖိထၢဖိအမံၤတဖၣ်​ လၢတၢ်ကွဲးနီၣ်ကွဲးဃါအကျါ ဒ်သိး ကပာ်ဖျါထီၣ်​ တၢ်အုၣ်အသး ဘၣ်ဃးဒီး အဝဲသ့ၣ်​ အတၢ်ဟဲလီၤစၢၤလီၤသွဲၣ်​ ဘၣ်ဆၣ်​ အဝဲသ့ၣ်​ ဃုဝဲတဘၣ်ဘၣ်. အဃိ တၢ်ပာ်ပနီၣ်​ အဝဲသ့ၣ်လၢ ပှၤလၢ အတကဆှီဘၣ်​ ဒီးတၢ်တဟ့ၣ်အခွဲးလၢ အဝဲသ့ၣ်​ ကမၤတၢ်ဒ် ပှၤလုၢ်တၢ်ဒိၣ်တဖၣ်​ အသိးဘၣ်.+ ၆၅ ဒီးပဒိၣ်ဖးဒိၣ်+ တဲအဝဲသ့ၣ်လၢ တချုးလၢ ပှၤလုၢ်တၢ်ဒိၣ်တဂၤဂၤ သံကွၢ်တၢ်လၢ ယွၤအအိၣ်​ ခီဖျိလၢ အူရံၣ်​ ဒီးတူမံၣ်ဒံးဘၣ်န့ၣ်+ သုအီၣ်တၢ်လၢ အစီဆှံနီၢ်ကီၢ် တန့ၢ်ဘၣ်.+

၆၆ တၢ်အိၣ်ဖှိၣ်ဒီတဖုန့ၣ်​ အနီၣ်ဂံၢ်အိၣ်ဝဲ အဂၤ ၄၂,၃၆၀ လီၤ.+ ၆၇ ဒီးအဝဲသ့ၣ်​ အကုၢ်ပိာ်မုၣ်​ ဒီးအကုၢ်ပိာ်ခွါန့ၣ်+ အိၣ်ဝဲ ၇,၃၃၇ ဂၤလီၤ. ဒီးအဝဲသ့ၣ်အိၣ်ဒီး ပှၤသးဝံၣ်တၢ်ဖိ အပိာ်မုၣ်ဒီးအပိာ်ခွါ+ ၂၄၅ ဂၤလီၤ. ၆၈ ဒီးအဝဲသ့ၣ်အိၣ်ဒီး ကသ့ၣ်​ ၇၃၆ ဒု, ကသ့ၣ်လၤ* ၂၄၅ ဒု, ၆၉ ကီၤလၤအူး ၄၃၅ ဒု ဒီးကသ့ၣ်ယီၤ အဒု ၆,၇၂၀ လီၤ.

၇၀ ဒူၣ်ဖိထၢဖိတဖၣ်​ အခိၣ်အနၢ်တနီၤန့ၣ်​ ဟ့ၣ်မၤဘူၣ်လီၤတၢ်လၢ တၢ်မၤအဂီၢ်လီၤ.+ ပဒိၣ်ဖးဒိၣ်​ ဟ့ၣ်လီၤဝဲ ထူဒြးမူး* အဘ့ၣ်​ ၁,၀၀၀, လီခီဖျၢၣ်​ အဖျၢၣ်​ ၅၀ ဒီးပှၤလုၢ်တၢ်ဒိၣ်​ အဆ့ဖးထီ+ အဘ့ၣ်​ ၅၃၀ လၢတၢ်ပာ်ဖှိၣ်​ တၢ်လုၢ်ဒိၣ်ပှ့ၤဒိၣ်အလီၢ်လီၤ. ၇၁ ဒူၣ်ဖိထၢဖိတဖၣ်​ အခိၣ်အနၢ် တနီၤန့ၣ်​ ဟ့ၣ်လီၤဝဲ ထူဒြးမူး အဘ့ၣ်​ ၂၀,၀၀၀ ဒီးစ့ညၣ်​ ၂,၂၀၀ မနါ* လၢတၢ်ပာ်ဖှိၣ်​ တၢ်လုၢ်ဒိၣ်ပှ့ၤဒိၣ်အလီၢ် လၢတၢ်မၤတခါအံၤ အဂီၢ်လီၤ. ၇၂ ဒီးပှၤအဂၤတဖၣ်န့ၣ်​ ဟ့ၣ်လီၤဝဲ ထူဒြးမူး အဘ့ၣ်​ ၂၀,၀၀၀ ဒီးစ့ညၣ်​ ၂,၀၀၀ မနါ ဒီးပှၤလုၢ်တၢ်ဒိၣ်​ အဆ့ဖးထီ ၆၇ ဘ့ၣ်လီၤ.

၇၃ ပှၤလုၢ်တၢ်ဒိၣ်တဖၣ်, ပှၤလ့ၤဝံဖိတဖၣ်, ပှၤခိးတြဲၤဖိတဖၣ်, ပှၤသးဝံၣ်တၢ်ဖိတဖၣ်,+ ပှၤအဂၤတနီၤ, တၢ်လုၢ်ဟံၣ်​ အခ့အပှၤတဖၣ်​ ဒီးပှၤအံၣ်စရ့လးဖိအဂၤ ခဲလၢာ်န့ၣ်​ လဲၤဆီလီၤအသး လၢ အဝဲသ့ၣ်အဝ့ၢ်တဖၣ်အပူၤလီၤ.+ ဒီးဖဲလါနွံလါတလါ, လါထီၣ်န့ၣ်+ အဝဲသ့ၣ်​ အိၣ်ဝဲလၢ အဝ့ၢ်တဖၣ်အပူၤလီၤ.+

၈ ပှၤဂီၢ်မုၢ်ခဲလၢာ် ပာ်ဖှိၣ်ထီၣ်အသးလၢ တၢ်လီၢ်ဖးလဲၢ်တတီၤ လၢထံအတြဲၤ+ အမဲာ်ညါ လၢတၢ်သးတဖျၢၣ်ဃီအပူၤလီၤ. ဒီးအဝဲသ့ၣ်​ မၢစီၤဧ့စြၤ+ လၢအမ့ၢ် ပှၤကွဲးကူ ယွၤအကလုၢ်ကထါ* တဂၤ ဟဲစိာ်ဝဲ စီၤမိၤၡ့ အလံာ်တၢ်သိၣ်တၢ်သီ+ လၢအအိၣ်ဒီး ယဟိဝၤယွၤ အတၢ်မၤလိာ် လၢပှၤအံၣ်စရ့လးဖိတဖၣ်​ အဂီၢ်လီၤ.+ ၂ ဖဲလါနွံလါတလါ, လါထီၣ်​ အဆိကတၢၢ်တသီန့ၣ်+ ပှၤလုၢ်တၢ်ဒိၣ်​ စီၤဧ့စြၤ ဟဲစိာ်ဝဲ စီၤမိၤၡ့ အတၢ်သိၣ်တၢ်သီလၢ ပှၤလၢ အဟဲအိၣ်ဖှိၣ်တဖၣ်​ အမဲာ်ညါလီၤ.+ ပှၤလၢအဟဲအိၣ်ဖှိၣ်တဖၣ်န့ၣ်​ မ့ၢ်ဝဲ ပှၤပိာ်မုၣ်ပိာ်ခွါ ဒီးပှၤခဲလၢာ်လၢ အဒိကနၣ်တၢ် ဒီးနၢ်ပၢၢ်တၢ်သ့တဖၣ်လီၤ. ၃ အဝဲအိၣ်ဝဲလၢ တၢ်မဲာ်ညါ ဒီးဖးပၠးဝဲ ပှၤပိာ်မုၣ်ပိာ်ခွါ ဒီးပှၤလၢအနၢ်ပၢၢ်တၢ်သ့ လၢအအိၣ်လၢ တၢ်လီၢ်ဖးလဲၢ်တတီၤအံၤလီၤ. တၢ်လီၢ်ဖးလဲၢ်တတီၤအံၤ အိၣ်ဝဲလၢ ထံအတြဲၤ အမဲာ်ညါလီၤ. အဝဲဖးဝဲလၢ အကလုၢ်ဖးဒိၣ်+ စးထီၣ်လၢ မုၢ်ဝါထီၣ်​ တုၤလၢမုၢ်ထူၣ်လီၤ. ဒီးပှၤဂီၢ်မုၢ်တဖၣ်​ ဒိကနၣ်ဝဲ+ လံာ်တၢ်သိၣ်တၢ်သီအံၤ လၢတၢ်သးစၢၢ်ဆၢ အပူၤလီၤ. ၄ စီၤဧ့စြၤ လၢအမ့ၢ် ပှၤကွဲးကူ ယွၤအကလုၢ်ကထါ တဂၤန့ၣ်​ ဆၢထၢၣ်လၢ သ့ၣ်အပျဲၢ်စီၢ်ခိၣ်​ လၢပှၤတ့အီၤလၢ တၢ်အိၣ်ဖှိၣ်တခါအံၤ အဂီၢ် အလိၤလီၤ. ဒီးပှၤလၢ အဆၢထၢၣ်လၢ အစုထွဲတခီန့ၣ်​ မ့ၢ်ဝဲ စီၤမးတံးသယၤ, စီၤၡ့မၤ, စီၤဧနၤယၤ, စီၤအူၤရံယၤ, စီၤဃံးလကံယၤ ဒီးစီၤမၤစ့ယၤလီၤ. မ့မ့ၢ်ပှၤလၢ အဆၢထၢၣ်လၢ အစုစ့ၣ်တခီန့ၣ်​ မ့ၢ်ဝဲ စီၤပဒါယၤ, စီၤမံၡအ့လး, စီၤမၤလကံယၤ,+ စီၤဃၤၡူၣ်, စီၤဃၤၡဘးဒနၤ, စီၤစကၤရယၤ ဒီးစီၤမၡူလၣ်လီၤ.

၅ ဖဲစီၤဧ့စြၤ အိးထီၣ်လံာ်အခါ ပှၤဂီၢ်မုၢ်ခဲလၢာ်ထံၣ်အီၤ မ့ၢ်လၢ အဝဲ ဆၢထၢၣ်လၢ တၢ်လီၢ်ထီၣ်ထီန့ၢ်ဒံး ပှၤဂီၢ်မုၢ်တဖၣ်အဃိလီၤ. ဖဲအဝဲအိးထီၣ်​ လံာ်အခါ ပှၤဂီၢ်မုၢ်ခဲလၢာ် ဆၢထၢၣ်ဝဲလီၤ. ၆ စီၤဧ့စြၤ စံးထီၣ်ပတြၢၤ ယဟိဝၤ လၢအမ့ၢ် ယွၤလၢအမ့ၢ်အတီ ဒီးအဒိၣ်အထီတဂၤ ဒီးပှၤဂီၢ်မုၢ်ခဲလၢာ် ယူာ်ထီၣ်အစု ဒီးတဲဝဲလၢ “အၤမ့ၣ်,* အၤမ့ၣ်” လီၤ.+ ဒီးအဝဲသ့ၣ်​ ချံးလီၤအခီၣ်​ ဒီးကျးလီၤအမဲာ် လၢဟီၣ်ခိၣ်လိၤ လၢယဟိဝၤယွၤ အမဲာ်ညါလီၤ. ၇ ဖဲပှၤဂီၢ်မုၢ်တဖၣ်​ ဆၢထၢၣ်ဝဲအခါ စီၤယ့ၤၡူ, စီၤဘၤနံ, စီၤၡ့ရ့ဘယၤ,+ စီၤယၤမံၣ်, စီၤဧးကူာ်, စီၤၡၤဘသဲၤ, စီၤဟိၤဒံယၤ, စီၤမၤစ့ယၤ, စီၤက့လံၤတၤ, စီၤဧစၤရယၤ, စီၤယိစဘး,+ စီၤဃၤနၣ်​ ဒီးစီၤပလါယၤ လၢအမ့ၢ် ပှၤလ့ၤဝံဖိတဖၣ်န့ၣ်​ တဲနၢ်ပၢၢ်ဝဲ ပှၤဂီၢ်မုၢ်တဖၣ်လၢ စီၤမိၤၡ့အတၢ်သိၣ်တၢ်သီလီၤ.+ ၈ ဒီးအဝဲသ့ၣ်ဆဲးဖးဝဲ ယွၤလၢအမ့ၢ်အတီတဂၤ အလံာ်တၢ်သိၣ်တၢ်သီလၢ အကလုၢ်ဒိၣ်ဒိၣ်​ ဒီးတဲပၠးဝဲ လီၤတံၢ်လီၤဆဲး ဒီးတဲဖျါထီၣ်​ တၢ်ကတိၤတဖၣ်​ အခီပညီ စ့ၢ်ကီးလီၤ. အဝဲသ့ၣ်​ မၤစၢၤပှၤဂီၢ်မုၢ် ဒ်သိး ကနၢ်ပၢၢ်ထီၣ်​ တၢ်လၢ အဝဲသ့ၣ်​ ဖးဝဲန့ၣ်လီၤ.+

၉ ဖဲပှၤဂီၢ်မုၢ်တဖၣ်​ နၢ်ဟူ တၢ်ကတိၤတဖၣ်လၢ အအိၣ်လၢ စီၤမိၤၡ့ အတၢ်သိၣ်တၢ်သီအပူၤအခါ အဝဲသ့ၣ်​ ဟီၣ်ဝဲလီၤ. အဃိ ပဒိၣ်ဖးဒိၣ်​ စီၤနဃ့မယၤ, စီၤဧ့စြၤ+ လၢအမ့ၢ် ပှၤလုၢ်တၢ်ဒိၣ်​ လၢအကွဲးကူ ကစၢ်ယွၤ အကလုၢ်ကထါ ဒီးပှၤလ့ၤဝံဖိတဖၣ်​ လၢအသိၣ်လိ ပှၤဂီၢ်မုၢ်န့ၣ်​ တဲဝဲ ပှၤဂီၢ်မုၢ်တဖၣ်လၢ “တနံၤအံၤ မ့ၢ်မုၢ်နံၤစီဆှံ လၢသုကစၢ် ယဟိဝၤယွၤ အဂီၢ်လီၤ.+ တဘၣ်သူၣ်အုးသးအုး ဒီးဟီၣ်တဂ့ၤ.” ၁၀ ဒီးအဝဲတဲ အဝဲသ့ၣ်လၢ “လဲၤအီၣ်လဲၤအီ တၢ်လၢအဝံၣ်အဆၢတဖၣ်​ ဒီးဟ့ၣ်ဒုးအီၣ်​ ပှၤလၢအတၢ်အီၣ်+ တအိၣ်ဘၣ်တဖၣ်​ စ့ၢ်ကီးတက့ၢ်. တနံၤအံၤန့ၣ်​ မ့ၢ်ဝဲ မုၢ်နံၤစီဆှံလၢ ပကစၢ်အဂီၢ် အဃိ တဘၣ်သးအုးတဂ့ၤ. တၢ်သးခုလၢ အဟဲလၢ ယဟိဝၤယွၤအအိၣ်န့ၣ်​ မ့ၢ်သုဂံၢ်သုဘါလီၤ.” ၁၁ ဒီးပှၤလ့ၤဝံဖိတဖၣ်​ တဲမုာ်ထီၣ်​ ပှၤဂီၢ်မုၢ်တဖၣ်​ အသးလၢ “ဟီၣ်တဂ့ၤ, တနံၤအံၤ မ့ၢ်မုၢ်နံၤစီဆှံအဃိ တဘၣ်သူၣ်အုးသးအုးတဂ့ၤ.” ၁၂ ခီဖျိလၢ အဝဲသ့ၣ်​ နၢ်ပၢၢ်တၢ်လၢ ပှၤတဲဖျါထီၣ်တဖၣ်အဃိ+ အဝဲသ့ၣ်ခဲလၢာ် က့ၤအီၣ်တၢ်အီတၢ် ဒီးဆှၢန့ၢ်ပှၤဂၤ တၢ်အီၣ်တၢ်အီ ဒီးမၤဝဲ တၢ်သူၣ်ဖှံသးညီ ဒိၣ်ဒိၣ်မုၢ်မုၢ်လီၤ.+

၁၃ ဖဲခံသီတသီန့ၣ်​ ဒူၣ်ဖိထၢဖိ အခိၣ်အနၢ်တဖၣ်, ပှၤလုၢ်တၢ်ဒိၣ်တဖၣ်​ ဒီးပှၤလ့ၤဝံဖိတဖၣ်န့ၣ်​ ဟဲပာ်ဖှိၣ်ထီၣ်အသးလၢ စီၤဧ့စြၤ အကပၤဝးဝး ဒ်သိး အဝဲသ့ၣ်​ ကနၢ်ပၢၢ်အါထီၣ်ဝဲ တၢ်ဂ့ၢ်လၢ စီၤမိၤၡ့ အတၢ်သိၣ်တၢ်သီ အပူၤလီၤ. ၁၄ ဖဲလံာ်တၢ်သိၣ်တၢ်သီအံၤ အပူၤန့ၣ်​ အဝဲသ့ၣ်​ ထံၣ်ဘၣ်ဝဲလၢ ယဟိဝၤယွၤ မၤလိာ်စီၤမိၤၡ့လၢ ပှၤအံၣ်စရ့လးဖိတဖၣ်​ ကဘၣ်အိၣ်လၢ ဒဲပူၤ ဖဲဘူၣ်ဘၣ်ဝဲ လၢလါနွံလါတလါလီၤ.+ ၁၅ ဒီးအဝဲသ့ၣ်​ ကဘၣ်ဘိးဘၣ်သ့ၣ်ညါဝဲ+ ပှၤအိၣ်လၢ ဝ့ၢ်ယရူၤၡလ့ၣ်​ ဒီးဝ့ၢ်အဂၤ ခဲလၢာ်အပူၤလၢ “လဲၤထီၣ်လၢ ကစၢၢ်ကလိကျါ ဒီးဟဲက့ၤစိာ် သ့ၣ်ဒ့လၢ အလၣ်အိၣ်အါ လၢအမ့ၢ် သ့ၣ်စၤယံးအဒ့, သ့ၣ်ဆှိအဒ့, သ့ၣ်သမ့ၤဟဒးအဒ့ ဒီးစူၣ်ပလိၣ်အဒ့ ဒီးသ့ၣ်အဂၤတဖၣ်​ အဒ့လၢ အလၣ်အိၣ်အါတက့ၢ်. ဒီးသုကဘၣ်တ့ထီၣ်​ ဒဲတဖၣ်​ ဒ်တၢ်ကွဲးအသးအသိးလီၤ.”

၁၆ အဃိ ပှၤဂီၢ်မုၢ်တဖၣ်​ လဲၤဟံးန့ၢ် တၢ်သ့ၣ်တဖၣ်န့ၣ်​ ဒီးဟဲက့ၤစိာ်ဝဲ ဒ်သိးကသူၣ်ထီၣ်​ ဒဲတဖၣ်လၢ အဝဲသ့ၣ်​ အဟံၣ်ခိၣ်ဒုး, အတၢ်ပျီပူၤ, ကစၢ်ယွၤအဟံၣ်​ အတၢ်ပျီတဖၣ်အပူၤ,+ တၢ်ဆါတၢ်ပှ့ၤအလီၢ်လၢ အအိၣ်ဖဲ ထံအတြဲၤ+ ဒီးတၢ်ဆါတၢ်ပှ့ၤအလီၢ်လၢ အအိၣ်ဖဲ အ့ဖရဲၣ်အတြဲၤန့ၣ်လီၤ.+ ၁၇ အဃိ ပှၤလၢ အဟဲက့ၤ ကိးဂၤဒဲးန့ၣ်​ တ့ထီၣ်ဒဲတဖၣ်​ ဒီးအိၣ်ဝဲလၢ ဒဲပူၤလီၤ. စးထီၣ်လၢ စီၤနိၣ်အဖိခွါ စီၤယိၤၡူအစိၤ+ တုၤလီၤလၢ တၢ်တနံၤန့ၣ်န့ၣ်​ ပှၤအံၣ်စရ့လးဖိတဖၣ်​ တမၤဝဲဒ်အံၤ နီတဘျီဘၣ်. အဃိ အဝဲသ့ၣ်​ သးခုဝဲဒိၣ်မးလီၤ.+ ၁၈ စးထီၣ်လၢ အဆိကတၢၢ်တနံၤ တုၤလၢ အလီၢ်ခံကတၢၢ် တနံၤန့ၣ်​ ပှၤဖးဖျါထီၣ်​ ယွၤလၢအမ့ၢ်အတီတဂၤ အလံာ်တၢ်သိၣ်တၢ်သီအံၤ ကိးနံၤဒဲးလီၤ.+ အဝဲသ့ၣ်​ မၤဝဲ ဘူၣ်နွံသီ ဒီးဖဲဃိးသီတသီန့ၣ်​ အဝဲသ့ၣ်​ မၤဝဲ တၢ်အိၣ်ဖှိၣ်စီဆှံ ဒ်တၢ်သိၣ်တၢ်သီ အိၣ်ဝဲအသိးလီၤ.+

၉ ဖဲလါတလါအံၤ လါထီၣ်​ ၂၄ သီတသီန့ၣ်​ ပှၤအံၣ်စရ့လးဖိတဖၣ်​ ပာ်ဖှိၣ်ထီၣ်အသး ဒီးအဝဲသ့ၣ်​ ဒုၣ်တၢ်အီၣ်, ကူထီၣ်သိးထီၣ်ဝဲ ထၢၣ်တၢ်ကံးညာ်* ဒီးပာ်ထီၣ်ဝဲ ဟီၣ်ခိၣ်ကမူၣ်လၢ အလိၤလီၤ.+ ၂ ဒီးပှၤအံၣ်စရ့လးဖိ စဲၤနီၢ်တဖၣ်​ မၤလီၤဖးအသးဒီး ပှၤထံဂၤကီၢ်ဂၤဖိတဖၣ်လီၤ.+ ဒီးအဝဲသ့ၣ်​ ဆၢထၢၣ်အၢၣ်လီၤ အတၢ်ဒဲးဘးတဖၣ်​ ဒီးအမိၢ်ပၢ်ဖံဖု လၢပျၢၤတဖၣ်​ အတၢ်ကမၣ်တဖၣ်လီၤ.+ ၃ ဒီးအဝဲသ့ၣ်​ ဆၢထၢၣ်လၢ အလီၢ် ဒီးဖးဝဲကစၢ် ယဟိဝၤယွၤ အလံာ်တၢ်သိၣ်တၢ်သီ+ လၢအကလုၢ်ဒိၣ်ဒိၣ်​ သၢနၣ်ရံၣ်​ ဒီးအၢၣ်လီၤဝဲ အတၢ်ကမၣ်​ သၢနၣ်ရံၣ်လီၤ. ဒီးအဝဲသ့ၣ်​ ထိၣ်လီၤပှီၤအသးလၢ ကစၢ်ယဟိဝၤယွၤ အမဲာ်ညါလီၤ.

၄ စီၤယ့ၤၡူ, စီၤဘၤနံ, စီၤကးမံၤအ့လး, စီၤၡဘၤနယၤ, စီၤဘူနံၤ, စီၤၡ့ရ့ဘယၤ,+ စီၤဘၤနံ ဒီးစီၤကနၤနံန့ၣ်​ ဆၢထၢၣ်ဝဲလၢ ပှၤလ့ၤဝံဖိ အပျဲၢ်စီၢ်ခိၣ်+ ဒီးဃ့ဘါထုကဖၣ်တၢ်လၢ အဝဲသ့ၣ်​ အကစၢ် ယဟိဝၤယွၤအအိၣ်​ လၢအကလုၢ်ဖးဒိၣ်လီၤ. ၅ ဒီးပှၤလ့ၤဝံဖိတဖၣ်​ လၢအမ့ၢ် စီၤယ့ၤၡူ, စီၤကးမံၤအ့လး, စီၤဘၤနံ, စီၤဃၡၤဘံယၤ, စီၤၡ့ရ့ဘယၤ, စီၤဟိၤဒံယၤ, စီၤၡဘၤနယၤ ဒီးစီၤပသၤဃယၤန့ၣ်​ တဲဝဲလၢ “ဆၢထၢၣ်​ စံးထီၣ်ပတြၢၤ သုကစၢ် ယဟိဝၤယွၤ အစိၤစိၤအဃၣ်ဃၣ်တက့ၢ်.+ မ်အဝဲသ့ၣ်​ စံးထီၣ်ပတြၢၤနမံၤ လၢအဘၣ်တၢ်ပာ်ထီၣ်ထီအီၤလၢ ကယဲၢ်တၢ်စံးထီၣ်ပတြၢၤ ဒီးတၢ်ဆိၣ်ဂ့ၤခဲလၢာ် အဖီခိၣ်တက့ၢ်.

၆ “နမ့ၢ် ယဟိဝၤယွၤ ထဲတဂၤဧိၤ+ ဒီးနတ့လီၤ မူခိၣ်လၢ အလဲၢ်အထီ ဒီးတၢ်အိၣ်လၢအပူၤခဲလၢာ်,* ဟီၣ်ခိၣ်​ ဒီးတၢ်အိၣ်လၢအပူၤခဲလၢာ်, ပီၣ်လဲၣ်​ ဒီးတၢ်အိၣ်လၢအပူၤ ခဲလၢာ်လီၤ. နပာ်မူ အဝဲသ့ၣ်ခဲလၢာ် ဒီးတၢ်အိၣ်လၢ မူခိၣ်တဖၣ်န့ၣ်​ ထိၣ်လီၤပှီၤအသး လၢနမဲာ်ညါလီၤ. ၇ နမ့ၢ် ကစၢ်ယဟိဝၤယွၤလၢ အမ့ၢ်အတီ ဒီးနဃုထၢထီၣ်​ စီၤအၤဘြၣ်+ ဒီးနမၢအဟးထီၣ်လၢ ဝ့ၢ်အူၢ်+ လၢအမ့ၢ် ပှၤက့ၤစ့းဖိ အဝ့ၢ် ဒီးနကိးန့ၢ် အမံၤလၢ စီၤအၤဘြၤဟၣ်လီၤ.+ ၈ နထံၣ်ဘၣ်လၢ အသးတီဒီးနၤ+ အဃိ နမၤတၢ်အၢၣ်လီၤအီလီၤဒီးအီၤ လၢနကဟ့ၣ်အီၤ ဒီးအချံအသၣ်တဖၣ်လၢ ပှၤကနၤဧၣ်ဖိ, ပှၤဃ့ၤသးဖိ, ပှၤအမိၢ်ဖိ, ပှၤပရးစၤဖိ, ပှၤယဘူၣ်ဖိ, ပှၤကံၢ်ကၣ်ဖိ အကီၢ်လီၤ.+ ဒီးနမ့ၢ်ပှၤလၢ အတီအလိၤအဃိ နတီဒီး နတၢ်အၢၣ်လီၤလီၤ.

၉ “ဒီးနထံၣ်ဘၣ်​ ပမိၢ်ပၢ်ဖံဖု လၢပျၢၤတဖၣ်​ အတၢ်နးတၢ်ဖှီၣ်​ လၢကီၢ်အဲၤကူပတူးအပူၤ+ ဒီးဖဲအဝဲသ့ၣ်​ ဃ့နၤတၢ်မၤစၢၤ လၢပီၣ်လဲၣ်ဂီၤအခါ နနၢ်ဟူလီၤ. ၁၀ ဒီးနပာ်ဖျါထီၣ်​ တၢ်ပနီၣ်လီၤလး ဒီးတၢ်လီၤလးတဖၣ်​ ဒ်သိး နကစံၣ်ညီၣ်​ ဖၤရိၤ ဒီးအခ့အပှၤခဲလၢာ် ဒီးပှၤလၢအအိၣ်လၢ အကီၢ်ပူၤ ခဲလၢာ်အဂီၢ်,+ မ့ၢ်လၢ နသ့ၣ်ညါလၢ အဝဲသ့ၣ်​ ပာ်ထီၣ်ထီအသးလၢ+ ပမိၢ်ပၢ်ဖံဖု လၢပျၢၤတဖၣ်​ အဖီခိၣ်​ အဃိလီၤ. ဖဲန့ၣ်​ နမၤဒိၣ်ထီၣ်နမံၤ ဒီးပှၤသ့ၣ်ညါ နမံၤဂ့ၤဂ့ၤ တုၤလၢ တနံၤအံၤလီၤ.+ ၁၁ ဒီးနမၤသ့ၣ်ဖး ပီၣ်လဲၣ်လၢ အဝဲသ့ၣ်​ အမဲာ်ညါ ဒ်သိးအဝဲသ့ၣ်​ ကလဲၤခီဂာ် ပီၣ်လဲၣ်လၢ ဟီၣ်ခိၣ်ဃ့ထီ အလိၤလီၤ.+ ဒီးပှၤလၢအလူၤ အဝဲသ့ၣ်န့ၣ်​ နကွံာ်လီၤအီၤ လၢထံယိာ်အပူၤ ဒ်လၢၢ်တဖျၢၣ်လၢ ပှၤကွံာ်လီၤအီၤလၢ ထံယွၤဆူၣ်ဆူၣ်အပူၤ အသိးလီၤ.+ ၁၂ လၢမုၢ်ဆါခီ အဆၢကတီၢ် နဆှၢအဝဲသ့ၣ်​ လၢတၢ်အၢၣ်အထူၣ်​ ဒီးလၢမုၢ်နၤခီ အဆၢကတီၢ် နဆှၢအဝဲသ့ၣ်လၢ မ့ၣ်အူအထူၣ်​ ဒ်သိး ကမၤကပီၤထီၣ်ကျဲလၢ အဝဲသ့ၣ်​ ကဘၣ်လဲၤဝဲ အဂီၢ်လီၤ.+ ၁၃ ဒီးနဟဲလီၤလၢ ကစၢၢ်စံၤနါအလိၤ+ ဒီးနတဲတၢ်ဒီး အဝဲသ့ၣ်​ လၢမူခိၣ်+ ဒီးနဟ့ၣ်လီၤ အဝဲသ့ၣ်လၢ တၢ်စံၣ်ညီၣ်ဆၢတဲာ် လၢအတီအလိၤတဖၣ်, တၢ်သိၣ်တၢ်သီလၢ ပှၤနာ်န့ၢ်အီၤသ့တဖၣ်​ ဒီးတၢ်ဘျၢ ဒီးတၢ်မၤလိာ်တဖၣ်လၢ အဂ့ၤဒိၣ်မးလီၤ.+ ၁၄ နမၢအဝဲသ့ၣ်​ မၤထွဲမုၢ်အိၣ်ဘှံးနံၤ အတၢ်သိၣ်တၢ်သီ ဒ်သိး အကပာ်စီဆှံ မုၢ်အိၣ်ဘှံးနံၤ အဂီၢ်လီၤ.+ ဒီးနဟ့ၣ်လီၤ အဝဲသ့ၣ်လၢ တၢ်မၤလိာ်တဖၣ်, တၢ်ဘျၢတဖၣ်​ ဒီးတၢ်သိၣ်တၢ်သီတဖၣ်​ ခီဖျိလၢ နခ့နပှၤ စီၤမိၤၡ့လီၤ. ၁၅ ဖဲအဝဲသ့ၣ်​ အဲၣ်ဒိးအီၣ်တၢ်အခါ နဟ့ၣ်လီၤ အဝဲသ့ၣ်​ ကိၣ်လၢမူခိၣ်+ ဒီးဖဲအဝဲသ့ၣ်​ အဲၣ်ဒိးအီထံအခါ နဒုးဟဲထီၣ်ထံလၢ လၢၢ်ပူၤ+ ဒီးနမၢအဝဲသ့ၣ်​ လဲၤနုာ်လီၤမၤန့ၢ် ကီၢ်လၢနအၢၣ်လီၤလၢ နကဟ့ၣ်လီၤ အဝဲသ့ၣ်လီၤ.

၁၆ “ဘၣ်ဆၣ်​ ပမိၢ်ပၢ်ဖံဖု လၢပျၢၤတဖၣ်န့ၣ်​ ပာ်ထီၣ်ထီအသး,+ အခိၣ်ကိၤ+ ဒီးတဒိကနၣ်​ နတၢ်မၤလိာ်တဖၣ်ဘၣ်. ၁၇ အဝဲသ့ၣ်​ အတၢ်ဒိကနၣ်​ တအိၣ်ဘၣ်+ ဒီးအဝဲသ့ၣ်​ တသ့ၣ်နီၣ်ထီၣ်က့ၤ တၢ်လီၤလး လၢနပာ်ဖျါထီၣ်​ လၢအဝဲသ့ၣ်​ အကျါဘၣ်. ဒီးအဝဲသ့ၣ်​ အခိၣ်ကိၤတုၤဒၣ်လဲာ် အဝဲသ့ၣ်​ ပာ်ထီၣ်​ ခိၣ်နၢ်တဂၤ ဒ်သိး အဝဲသ့ၣ်​ ကက့ၤကဒါက့ၤလၢ ကုၢ်အလီၢ် လၢကီၢ်အဲၤကူပတူးလီၤ.+ ဘၣ်ဆၣ်​ နမ့ၢ်ကစၢ်ယွၤလၢ အပျၢ်ကွံာ် တၢ်ကမၣ်ညီ, အသးဂ့ၤ, အသးကညီၤတၢ်, တသးဒိၣ်ထီၣ်တၢ် ချ့ချ့ဘၣ်, အိၣ်ဒီးတၢ်အဲၣ်လၢအတီဒိၣ်မး+ ဒီးနတပာ်တ့ၢ်ကွံာ် အဝဲသ့ၣ်ဘၣ်.+ ၁၈ အဝဲသ့ၣ်​ ပိာ်န့ၢ်ကျီၢ်ဖိတဒုအဂီၤ ဒီးအဝဲသ့ၣ်​ တဲဝဲလၢ ‘အဝဲအံၤမ့ၢ် သုကစၢ်ယွၤ လၢအဒုးဟးထီၣ်သု လၢကီၢ်အဲၤကူပတူးလီၤ.’+ ဒီးအဝဲသ့ၣ်​ တပာ်ကဲနၤ နီတစဲးဘၣ်. ၁၉ ဘၣ်ဆၣ်​ နအိၣ်ဒီး တၢ်သးကညီၤ ဒိၣ်ဒိၣ်မုၢ်မုၢ်အဃိ နတပာ်တ့ၢ်ကွံာ် အဝဲသ့ၣ်​ လၢပှၢ်မုၢ်ကနၢ အပူၤဘၣ်.+ ဒီးတၢ်အၢၣ်အထူၣ်​ လၢအဆှၢအဝဲသ့ၣ်​ လၢမုၢ်ဆါခီန့ၣ်​ တဟးထီၣ်ကွံာ် လၢအဝဲသ့ၣ်​ အအိၣ်ဘၣ်. ဒီးမ့ၣ်အူအထူၣ်လၢ အမၤကပီၤထီၣ်ကျဲလၢ အဝဲသ့ၣ်​ ကဘၣ်လဲၤဝဲ လၢမုၢ်နၤခီစ့ၢ်ကီး တဟးထီၣ်ကွံာ်လၢ အဝဲသ့ၣ်​ အအိၣ်ဘၣ်.+ ၂၀ ဒီးနဟ့ၣ်လီၤ နသးစီဆှံ* ဒ်သိး ကဟ့ၣ်အဝဲသ့ၣ်​ တၢ်ကူၣ်တၢ်ဆး+ ဒီးနတတြီဃာ် ကိၣ်မၤနၤ ဒ်သိး ကနုာ်လီၤလၢ အဝဲသ့ၣ်အကိာ်ပူၤ အဂီၢ်ဘၣ်.+ ဖဲအဝဲသ့ၣ်​ အဲၣ်ဒိးအီထံအခါ နဟ့ၣ်လီၤ အဝဲသ့ၣ်​ ထံလီၤ.+ ၂၁ လၢအနံၣ်​ ၄၀ အတီၢ်ပူၤန့ၣ်​ နဟ့ၣ်အဝဲသ့ၣ်​ တၢ်အီၣ်လၢ ပှၢ်မုၢ်ကနၢ အပူၤလီၤ.+ ဒီးတၢ်လၢ အအိၣ်ဒီး အဝဲသ့ၣ်​ တယၢဘၣ်န့ၣ်​ တအိၣ်နီတမံၤဘၣ်. ဒီးအဝဲသ့ၣ်​ အတၢ်ကူတၢ်ကၤတဖၣ်​ တလီၢ်လံၤဘၣ်+ ဒီးအခီၣ်​ တညိးထီၣ်ဘၣ်.

၂၂ “နဟ့ၣ်လီၤ ဘီမုၢ်တဖၣ်​ ဒီးပှၤကလုာ်တဖၣ်လၢ အဝဲသ့ၣ်​ အစုပူၤ+ ဒီးပှၤတဖၣ်န့ၣ်​ အတၢ်လီၢ်တၢ်ကျဲတဖၣ်န့ၣ်​ နနီၤလီၤန့ၢ် အဝဲသ့ၣ်​ တတီၤဘၣ်တတီၤလီၤ. အဃိ အဝဲသ့ၣ်​ လဲၤမၤန့ၢ်ဝဲ ဃ့ၡဘိၣ်+ အစီၤပၤ စံဃိၣ်​ အဟီၣ်ကဝီၤ+ ဒီးဘၤၡၣ်​ အစီၤပၤဧိာ် အဟီၣ်ကဝီၤလီၤ.+ ၂၃ ဒီးနမၤအါထီၣ်​ အဝဲသ့ၣ်​ အဖိတဖၣ်​ ဒ်ဆၣ်တဖၣ်​ လၢမူခိၣ်​ အသိးလီၤ.+ ဒီးနဆှၢအဝဲသ့ၣ်​ လၢကီၢ်လၢ နအၢၣ်လီၤ အဝဲသ့ၣ်​ အမိၢ်ပၢ်ဖံဖု လၢပျၢၤတဖၣ်​ လၢအဝဲသ့ၣ်​ ကလဲၤနုာ်လီၤမၤန့ၢ်ဝဲ အပူၤလီၤ.+ ၂၄ ဒီးအဝဲသ့ၣ်​ အဖိတဖၣ်​ လဲၤနုာ်လီၤမၤန့ၢ်ကီၢ်တဘ့ၣ်န့ၣ်+ ဒီးနမၤစၢၤ အဝဲသ့ၣ်​ ဒ်သိး ကမၤနၢၤ ပှၤကနၤဧၣ်ဖိတဖၣ်​ လၢအအိၣ်လၢ ကီၢ်ပူၤလီၤ.+ ဒီးပှၤကနၤဧၣ်ဖိတဖၣ်​ ဒီးအဝဲသ့ၣ်အစီၤပၤတဖၣ်​ ဒီးပှၤလၢအအိၣ်လၢ ကီၢ်ပူၤတဖၣ်န့ၣ်​ နဟ့ၣ်လီၤအီၤလၢ အဝဲသ့ၣ်အစုပူၤ ဒ်သိးအဝဲသ့ၣ်​ ကမၤပှၤသ့ၣ်တဖၣ်န့ၣ်​ ဒ်အအဲၣ်ဒိးမၤဝဲ အသိးလီၤ. ၂၅ ဒီးအဝဲသ့ၣ်​ မၤန့ၢ်ဝ့ၢ်တဖၣ်လၢ အအိၣ်ဒီး အဒူၣ်လၢ အကျၢၤ,+ ထံကီၢ်လၢ အဟီၣ်ခိၣ်ညၣ်ထ့ၣ်ဂ့ၤ+ ဒီးအဝဲသ့ၣ်​ မၤန့ၢ် ဟံၣ်တဖၣ်​ လၢအပှဲၤဝဲဒီး တၢ်ဖိတၢ်လံၤ လၢအဂ့ၤ အကလုာ်ကလုာ်, ထံကမါတဖၣ်လၢ ပှၤခူၣ်ပာ်စၢၤအီၤ, စပံးကျီးတဖၣ်​ ဒီးသ့ၣ်စၤယံး အကျီးတဖၣ်+ ဒီးသ့ၣ်လၢ အသၣ်ထီၣ်​ တၤသၣ်တဖၣ်​ အါအါဂီၢ်ဂီၢ်လီၤ. အဃိ အဝဲသ့ၣ်​ အီၣ်ဘၣ်အီဘၣ်​ ဒီးပှဲၤဒီး တၢ်သူၣ်မံသးမုာ် ဒီးဘီၣ်ထီၣ်သိထီၣ်​ ဒီးအဝဲသ့ၣ်​ သူၣ်ဖှံသးညီ ခီဖျိလၢ နမၤဂ့ၤ အဝဲသ့ၣ်ဒိၣ်မးအဃိလီၤ.

၂၆ “ဘၣ်ဆၣ်​ အဝဲသ့ၣ်​ တဒိကနၣ်တၢ်ဘၣ်​ ဒီးထီဒါက့ၤနၤ+ ဒီးဃၣ်ကွံာ်အသး လၢနတၢ်သိၣ်တၢ်သီလီၤ. နဝံသ့ၣ်တဖၣ်​ လၢအဟ့ၣ်ပလီၢ် အဝဲသ့ၣ်​ ဒ်သိး ကဒုးဟဲက့ၤကဒါက့ၤ အဝဲသ့ၣ်​ ဆူနအိၣ်အဂီၢ်န့ၣ်​ အဝဲသ့ၣ်​ မၤသံဝဲလီၤ. အဝဲသ့ၣ်​ တပာ်ကဲနၤ နီတစဲးဘၣ်.+ ၂၇ အဃိ နဟ့ၣ်လီၤ အဝဲသ့ၣ်လၢ အဒုၣ်အဒါတဖၣ်+ လၢအမၤကိၢ်မၤဂီၤအီၤ အစုပူၤလီၤ.+ ဘၣ်ဆၣ်​ ဖဲအဝဲသ့ၣ်​ ဘၣ်ကိၢ်ဘၣ်ဂီၤ ဒီးဃ့နၤ တၢ်မၤစၢၤအခါ နအိၣ်လၢမူခိၣ်​ ဒီးဒိကနၣ်​ အဝဲသ့ၣ်လီၤ. ဒီးမ့ၢ်လၢ နအိၣ်ဒီး တၢ်သးကညီၤ ဒိၣ်ဒိၣ်မုၢ်မုၢ်အဃိ နဆှၢလီၤ ပှၤလၢအကမၤပူၤဖျဲး အဝဲသ့ၣ်လၢ အဒုၣ်အဒါတဖၣ်​ အစုပူၤလီၤ.+

၂၈ “ဖဲအဝဲသ့ၣ်​ အိၣ်ဘၣ်က့ၤ မုာ်မုာ်ခုၣ်ခုၣ်အခါ အဝဲသ့ၣ်​ မၤကဒီးတၢ်အၢတၢ်သီ+ အဃိ နဟ့ၣ်လီၤအဝဲသ့ၣ်​ လၢအဒုၣ်အဒါတဖၣ်​ လၢအမၤနၢၤမၤဃၣ်အီၤ အစုပူၤလီၤ.+ ဒီးအဝဲသ့ၣ်​ ဟဲက့ၤကဒါက့ၤ ဒီးဃ့တၢ်မၤစၢၤ+ ဒီးနအိၣ်လၢမူခိၣ်​ ဒီးဒိကနၣ်အဝဲသ့ၣ်​ ဒီးမ့ၢ်လၢ နအိၣ်ဒီး တၢ်သးကညီၤ ဒိၣ်ဒိၣ်မုၢ်မုၢ်အဃိ နမၤပူၤဖျဲး အဝဲသ့ၣ်​ တဘျီဝံၤတဘျီလီၤ.+ ၂၉ နဟ့ၣ်ပလီၢ်ကဒီး အဝဲသ့ၣ်​ ဒ်သိး အဝဲသ့ၣ်​ ကဒိကနၣ်​ နတၢ်သိၣ်တၢ်သီ သနာ်က့ အဝဲသ့ၣ်​ ပာ်ထီၣ်ထီအသး ဒီးတဒိကနၣ်​ နတၢ်မၤလိာ်တဖၣ်ဘၣ်+ ဒီးအဝဲသ့ၣ်​ မၤကမၣ်​ နတၢ်ဘျၢတဖၣ်လီၤ. နီၢ်ကီၢ်န့ၣ်​ ပှၤမ့ၢ်မၤထွဲ တၢ်သ့ၣ်တဖၣ်န့ၣ်န့ၣ်​ ပှၤကအိၣ်မူဘၣ်လီၤ.+ ဘၣ်ဆၣ်​ အဝဲသ့ၣ်​ ဃၣ်ဒူၣ်ချၢအသး လၢနအိၣ်​ ဒီးထီဒါတၢ်လီၤ. ဒီးအဝဲသ့ၣ်​ တဒိကနၣ်တၢ်ဘၣ်. ၃၀ ဒီးနပာ်ဖျါထီၣ်​ တၢ်ဝံသးစူၤလၢ အဝဲသ့ၣ်​ အဖီခိၣ်+ အနံၣ်အါမးလီၤ. ဒီးနဆဲး ဟ့ၣ်ပလီၢ်အဝဲသ့ၣ်​ ခီဖျိ နဝံတဖၣ်လၢ နသးစီဆှံ အိၣ်လၢအလိၤ ဘၣ်ဆၣ်​ အဝဲသ့ၣ်​ တဒိကနၣ်တၢ်ဘၣ်. လၢခံကတၢၢ်န့ၣ်​ နဟ့ၣ်လီၤကွံာ် အဝဲသ့ၣ်​ လၢပှၤကလုာ်တဖၣ်​ အစုပူၤလီၤ.+ ၃၁ နအိၣ်ဒီး တၢ်သးကညီၤ ဒိၣ်ဒိၣ်မုၢ်မုၢ် ဒီးနမ့ၢ်ယွၤ လၢအသးဂ့ၤ ဒီးအသးကညီၤတၢ်အဃိ+ နတမၤဟးဂီၤကွံာ် အဝဲသ့ၣ်+ ဒီးပာ်တ့ၢ်ကွံာ် အဝဲသ့ၣ်ဘၣ်.

၃၂ “အိ ပကစၢ်ယွၤဧၢ, နမ့ၢ်ကစၢ်ယွၤ လၢအဒိၣ်, အဂံၢ်ဆူၣ်ဘါဆူၣ်, အလီၤယူးယီၣ်ပာ်ကဲ, နတီဒီး နတၢ်အၢၣ်လီၤအီလီၤ ဒီးနပာ်ဖျါထီၣ်​ တၢ်အဲၣ်လၢအတီလီၤ.+ စးထီၣ်လၢ ကီၢ်အၤၡူၢ် အစီၤပၤတဖၣ်​ အစိၤ+ တုၤလီၤလၢ မုၢ်မဆါတနံၤအံၤန့ၣ်​ ပစီၤပၤတဖၣ်, ပပဒိၣ်တဖၣ်,+ ပပှၤလုၢ်တၢ်ဒိၣ်တဖၣ်,+ ပဝံတဖၣ်,+ ပမိၢ်ပၢ်ဖံဖု လၢပျၢၤတဖၣ်, ဒီးပှၤဂီၢ်မုၢ်ခဲလၢာ် ဘၣ်ကီဘၣ်ခဲ သပှၢ်ကတၢၢ်လီၤ. အဃိ တၢ်ကီတၢ်ခဲလၢ ပထံၣ်ဘၣ်တဖၣ်အံၤ ဝံသးစူၤ တဘၣ်ပာ်အီၤဒ် တၢ်ဂ့ၢ်ဆံးဆံးဖိတဂ့ၤ. ၃၃ နီၢ်ကီၢ်န့ၣ်​ နတီဒီးနတၢ်ကတိၤ ဒီးနမၤတၢ် တီတီလိၤလိၤအဃိ တၢ်ကဲထီၣ်အသးဒီးပှၤ ဒ်အံၤလီၤ. မ့မ့ၢ် ပဝဲသ့ၣ်တဖၣ်န့ၣ်​ ပမ့ၢ်ပှၤလၢအမၤတၢ် အၢအၢသီသီလီၤ.+ ၃၄ ပစီၤပၤတဖၣ်, ပပဒိၣ်တဖၣ်, ပပှၤလုၢ်တၢ်ဒိၣ်တဖၣ်​ ဒီးပမိၢ်ပၢ်ဖံဖု လၢပျၢၤတဖၣ်န့ၣ်​ တမၤထွဲနတၢ်သိၣ်တၢ်သီဘၣ်​ ဒီးတကနၣ်ဃုာ် နတၢ်မၤလိာ် ဒီးနတၢ်ဒုးသ့ၣ်နီၣ်ထီၣ်တဖၣ်လၢ နဟ့ၣ်ပလီၢ် အဝဲသ့ၣ်န့ၣ်ဘၣ်. ၃၅ လၢခံ အဝဲသ့ၣ်​ အိၣ်ဒီးအနီၢ်ကစၢ် အစီၤပၤ, ဒိးန့ၢ်ဘၣ်​ နတၢ်ဆိၣ်ဂ့ၤအါမး, အိၣ်ဘၣ်လၢ ထံကီၢ်လၢအလဲၢ် ဒီးလၢအဟီၣ်ခိၣ်ညၣ်ထ့ၣ်ဂ့ၤ လၢနဟ့ၣ်လီၤအဝဲသ့ၣ်​ ဘၣ်ဆၣ်​ အဝဲသ့ၣ်​ တမၤနတၢ်ဘၣ်+ ဒီးဆဲးမၤဝဲ တၢ်အၢတၢ်သီတဖၣ်လီၤ. ၃၆ အဃိ ပဘၣ်ကဲကုၢ်လၢ+ ကီၢ်တဘ့ၣ်အံၤ အပူၤလီၤ. နီၢ်ကီၢ်န့ၣ်​ ကီၢ်တဘ့ၣ်အံၤ မ့ၢ်ဝဲကီၢ်လၢ နဟ့ၣ်လီၤ ပမိၢ်ပၢ်ဖံဖု လၢပျၢၤတဖၣ်​ ဒ်သိး အဝဲသ့ၣ်​ ကအီၣ်ဝဲ ကီၢ်တဘ့ၣ်အံၤ အတၤသူတၤသၣ်​ ဒီးန့ၢ်ဘၣ်​ တၢ်လၢအဂ့ၤ လၢအအိၣ်လၢ အပူၤလီၤ. ၃၇ ဒီးခီဖျိလၢ ပမၤတၢ်ဒဲးဘးအဃိ တၢ်လၢအမဲထီၣ်သၣ်ထီၣ်လၢ ကီၢ်ပူၤန့ၣ်​ ကဲထီၣ်ဝဲ စီၤပၤလၢ နပာ်ထီၣ်လၢ ပဖီခိၣ်တဖၣ် အတၢ်လီၤ.+ အဝဲသ့ၣ် ပၢပှၤ* ဒီးပဆၣ်ကီၢ်ဖိတဖၣ် ဒ်အဝဲသ့ၣ်​ အဲၣ်ဒိးပၢဝဲအသိး ဒီးပဘၣ်ကိၢ်ဘၣ်ဂီၤ ဒိၣ်မးလီၤ.

၃၈ “လၢတၢ်သ့ၣ်တဖၣ်အံၤ ခဲလၢာ်အဃိ ပကကွဲးလီၤ တၢ်အၢၣ်လီၤ လၢအဂၢၢ်အကျၢၤတခါ+ ဒီးပဒိၣ်ဖးဒိၣ်, ပှၤလ့ၤဝံဖိ, ပှၤလုၢ်တၢ်ဒိၣ်တဖၣ်​ ကစဲပနီၣ်ဃာ်အီၤလီၤ.”+

၁၀ ပှၤလၢ အစဲပနီၣ်တၢ်တဖၣ်န့ၣ်+ မ့ၢ်ဝဲ

စီၤဃကါလယၤ အဖိခွါ လၢအမ့ၢ် ပဒိၣ်ဖးဒိၣ်​ စီၤနဃ့မယၤ,

ဒီးစီၤစံးဒကံယၤ, ၂ စီၤစရါယၤ, စီၤဧစၤရယၤ, စီၤယံးရမံယၤ, ၃ စီၤပးၡဃူၢ်, စီၤအမၤရယၤ, စီၤမၤလကံယၤ, ၄ စီၤဃးတူၣ်, စီၤၡဘၤနယၤ, စီၤမးလူး, ၅ စီၤဃၤရံၣ်,+ စီၤမရ့မိး, စီၤဧိၤဘါဒယၤ, ၆ စီၤဒၤနံးယ့လး,+ စီၤကံးနသိၣ်, စီၤဘၤရူး, ၇ စီၤမၡူလၣ်, စီၤအဘံယၤ, စီၤမံယမံၣ်, ၈ စီၤမၤဧါစယၤ, စီၤဘံးလကဲၤ ဒီးစီၤၡမါယၤလီၤ. အဝဲသ့ၣ်န့ၣ်​ မ့ၢ်ပှၤလုၢ်တၢ်ဒိၣ်တဖၣ်လီၤ.

၉ ဒီးပှၤလ့ၤဝံဖိတဖၣ်​ လၢအမ့ၢ် စီၤအစၤနယၤ အဖိခွါ လၢအမ့ၢ် စီၤယ့ၤၡူ, စီၤဘံနူၤ လၢစီၤဃ့နါဒး အဖိခွါတဖၣ်အကျါ, စီၤကးမံၤအ့လး,+ ၁၀ ဒီးအဝဲသ့ၣ်​ အဒီပုၢ်ဝဲၢ်တဖၣ်​ လၢအမ့ၢ် စီၤၡဘၤနယၤ, စီၤဟိၤဒံယၤ, စီၤက့လံၤတၤ, စီၤပလါယၤ, စီၤဃၤနၣ်, ၁၁ စီၤမံၤကး, ရဃိာ်, စီၤဃၡၤဘယၤ, ၁၂ စီၤစးကူၢ်, စီၤၡ့ရ့ဘယၤ,+ စီၤၡဘၤနယၤ, ၁၃ စီၤဟိၤဒံယၤ, စီၤဘၤနံ ဒီးစီၤဘနံနူၤလီၤ.

၁၄ ဒီးပှၤဂီၢ်မုၢ် အခိၣ်အနၢ်တဖၣ်​ လၢအမ့ၢ် စီၤပးရိာ်, စီၤပးဃးမိၤအး,+ ဧ့ၤလၣ်, စီၤစးတူၤ, စီၤဘၤနံ, ၁၅ စီၤဘူနံၤ, စီၤဧၤစကး, စီၤဘ့ဘဲၤ, ၁၆ စီၤအဒိနံၤယၤ, စီၤဘံးကဝဲၤ, စီၤဧၤဒံၣ်, ၁၇ စီၤအ့ၤတၢ်, စီၤဃံးစကံယၤ, စီၤဧၤစူၢ်, ၁၈ စီၤဟိၤဒံယၤ, စီၤဃၤၡူၣ်, စီၤဘ့စဲၤ, ၁၉ စီၤဃၤရံာ်, စီၤဧၤနသိး, စီၤန့ဘဲၤ, ၂၀ စီၤမၤကပံဧၣ်, စီၤမၡူလၣ်, စီၤဃ့စံၢ်, ၂၁ စီၤမၡ့စဘ့လး, စီၤစၤဒိး, စီၤယးဒူ, ၂၂ စီၤပလၤတယၤ, စီၤဃၤနၣ်, စီၤဧနၤယၤ, ၂၃ စီၤဟိၤၡ့, စီၤဃနၤနယၤ, စီၤဃၤၡူာ်, ၂၄ စီၤဟးလိဃ့ၣ်, စီၤဖံးလဃၤ, စီၤၡိဘ့း, ၂၅ စီၤရဃူၣ်, စီၤဃၡၤဘနၤ, စီၤမၤစ့ယၤ, ၂၆ စီၤအဃံယၤ, စီၤဃၤနၣ်, စီၤဧၤနၣ်, ၂၇ စီၤမးလူး, စီၤဃၤရံၣ်​ ဒီးစီၤဘၤနါလီၤ.

၂၈ ပှၤအဂၤတဖၣ်လၢ အတၢ်သ့ၣ်ညါနၢ်ပၢၢ် တုၤထီၣ်ထီၣ်ဘး* န့ၣ်မ့ၢ်ဝဲ ပှၤလုၢ်တၢ်ဒိၣ်တဖၣ်, ပှၤလ့ၤဝံဖိတဖၣ်, ပှၤခိးတြဲၤဖိတဖၣ်, ပှၤသးဝံၣ်တၢ်ဖိတဖၣ်, တၢ်လုၢ်ဟံၣ်​ အခ့အပှၤတဖၣ်* ဒီးပှၤကိးဂၤဒဲးလၢ အမၤလီၤဖးအသးဒီး ပှၤကလုာ်တဖၣ်​ ဒ်သိးကမၤထွဲ ကစၢ်ယွၤ အတၢ်သိၣ်တၢ်သီ+ ဃုာ်ဒီး အဝဲသ့ၣ်​ အဖိအမါတဖၣ်လီၤ. ၂၉ ပှၤတဖၣ်န့ၣ်​ ပာ်ဖှိၣ်ထီၣ်အသး ဒီးအဒီပုၢ်ဝဲၢ် ပှၤဒိၣ်ပှၤပှၢ်တဖၣ်​ ဒီးမၤတၢ်အၢၣ်လီၤလၢ အပၣ်ဃုာ်ဒီး တၢ်ဆိၣ်အၢလီၤ.* အဝဲသ့ၣ်​ အၢၣ်လီၤဝဲလၢ အကအိၣ်မူမၤထွဲ ယွၤလၢအမ့ၢ်အတီတဂၤ အတၢ်သိၣ်တၢ်သီလၢ အဟ့ၣ်လီၤဝဲ ခီဖျိလၢ အခ့အပှၤ စီၤမိၤၡ့ ဒီးကမၤထွဲ ယဟိဝၤယွၤ အတၢ်မၤလိာ်, တၢ်သိၣ်တၢ်သီ ဒီးတၢ်ဘျၢခဲလၢာ်လီၤ. ၃၀ ပအၢၣ်လီၤလၢ ပတဟ့ၣ်လီၤ ပဖိမုၣ်လၢ ပှၤကလုာ်တဖၣ်အအိၣ်ဘၣ်​ ဒီးပတဟံးန့ၢ် အဝဲသ့ၣ်​ အဖိမုၣ်တဖၣ်​ လၢပဖိခွါအဂီၢ်ဘၣ်.+

၃၁ ဖဲမုၢ်အိၣ်ဘှံးနံၤ+ ဒီးဖဲမုၢ်နံၤစီဆှံ အဂၤတဖၣ်န့ၣ်+ ပှၤကလုာ်တဖၣ်​ မ့ၢ်ဟဲစိာ် ဘု ဒီးတၢ်အဂၤ တမံၤဂ့ၤတမံၤဂ့ၤ လၢကဆါန့ၢ်ပှၤ အဂီၢ်န့ၣ်​ ပတပှ့ၤ အတၢ်နီတမံၤဘၣ်. ဒီးတကးဒံးဘၣ်​ ဖဲနွံနံၣ်တနံၣ်န့ၣ်+ ပကပာ်အိၣ်ဘှံး ပဟီၣ်ခိၣ်​ ဒီးပကမၤလီၤတူာ် ပှၤအဂၤ အဒ့ၣ်ကမၢ်တဖၣ်​ ခဲလၢာ်လီၤ.+

၃၂ ဒီးပဝဲတဂၤစုာ်စုာ်န့ၣ်​ ပအၢၣ်လီၤစ့ၢ်ကီးလၢ တနံၣ်န့ၣ်​ ပကဟ့ၣ်မၤဘူၣ်လီၤ စ့ညၣ်​ ၡက့လး* သၢပူတပူ လၢတၢ်မၤ ဘၣ်ဃးဒီး ကစၢ်ယွၤ အတၢ်လုၢ်ဟံၣ်​ အဂီၢ်လီၤ.+ ၃၃ တၢ်မၤဘူၣ်တဖၣ်အံၤ ပှၤကသူအီၤလၢ ကိၣ်လၢ တၢ်လုၢ်ထီၣ်တၢ်အဂီၢ်,+ တၢ်လုၢ်ဘုလၢ ပှၤဘၣ်လုၢ်ထီၣ်အီၤ ထီဘိအဂီၢ်,+ တၢ်လုၢ်ဒွဲၣ်အူ လၢမုၢ်အိၣ်ဘှံးနံၤ+ ဒီးလါထီၣ်သီအဂီၢ်,+ မူးလၢ ဘၣ်တၢ်ပာ်ပနီၣ်အီၤတဖၣ်အဂီၢ်,+ လၢတၢ်စီဆှံတဖၣ်အဂီၢ်, လၢတၢ်လုၢ်လၢ တၢ်ဒဲးဘးအဂီၢ်+ ဒ်သိးတၢ်ကမၤဘၣ်လိာ်ဖိးဒ့က့ၤတၢ်လၢ ပှၤအံၣ်စရ့လးဖိတဖၣ်အဂီၢ် ဒီးလၢပကစၢ်ယွၤအဟံၣ်​ အတၢ်မၤတဖၣ်အဂီၢ်လီၤ.

၃၄ ပဖးတၢ်ဘၣ်ဃးဒီး သ့ၣ်မုၣ်လၢ ပှၤလုၢ်တၢ်ဒိၣ်, ပှၤလ့ၤဝံဖိ ဒီးပှၤဂီၢ်မုၢ် အဒူၣ်ဖိထၢဖိတဖၣ်​ ကဘၣ်ဟဲစိာ်ဝဲလၢ ပကစၢ်ယွၤအဟံၣ်​ ဒီးပဆၢတဲာ်လၢ တနံၣ်ဘၣ်တနံၣ်​ မတၤအဒူၣ်ဖိထၢဖိတဖၣ်​ ကဘၣ်ဟဲစိာ် သ့ၣ်မုၣ်​ ဒ်တၢ်ဆၢကတီၢ် ဘၣ်တၢ်ပာ်ပနီၣ်အီၤအသိးလဲၣ်​ န့ၣ်လီၤ. ဒ်တၢ်ကွဲးအသးလၢ စီၤမိၤၡ့ အတၢ်သိၣ်တၢ်သီအပူၤ အိၣ်ဝဲအသိးန့ၣ်​ ပှၤကဘၣ်မၤကဲၤထီၣ်​ သ့ၣ်မုၣ်တဖၣ်အံၤလၢ ပကစၢ် ယဟိဝၤယွၤ အတၢ်လုၢ်လီၢ် အလိၤလီၤ.+ ၃၅ ဒီးတနံၣ်ဘၣ်တနံၣ်န့ၣ်​ ပကဟဲစိာ်စ့ၢ်ကီး ပဟီၣ်ခိၣ်​ အတၤသၣ်ဆိ ဒီးသ့ၣ်သူဝၣ်သၣ်​ အကလုာ်ကလုာ် အတၤသၣ်ဆိလၢ ယဟိဝၤယွၤ အဟံၣ်လီၤ.+ ၃၆ ပကဟဲစိာ်စ့ၢ်ကီး ပဖိခွါဝဲၢ်ကိ, ပဆၣ်ဖိကီၢ်ဖိ အဖိဝဲၢ်ကိ, ပကျီၢ် အဖိဝဲၢ်ကိ ဒီးပသိဒီးပမဲာ်တဲးလဲး အဖိဝဲၢ်ကိ+ ဒ်စီၤမိၤၡ့ အတၢ်သိၣ်တၢ်သီ အိၣ်ဝဲအသိးလီၤ. ပကလဲၤစိာ်အီၤလၢ ပကစၢ်ယွၤအဟံၣ်​ လၢပှၤလုၢ်တၢ်ဒိၣ်တဖၣ်အအိၣ်​ လၢအမၤတၢ်လၢ ပကစၢ်ယွၤ အဟံၣ်န့ၣ်လီၤ.+ ၃၇ ဒီးပကဟဲစိာ် ပတၤသၣ်ဆိ လၢအမ့ၢ် ဘုလၢအဘၣ်​ တၢ်တိၢ်သဘှံးအီၤတစဲး,+ တၢ်ဟ့ၣ်တဖၣ်, သ့ၣ်သၣ်ကိးကလုာ်ဒဲး,+ စပံးထံအသီဒီးသိလီၤ.+ ပကဟဲစိာ် တၢ်သ့ၣ်တဖၣ်န့ၣ်လၢ ပှၤလုၢ်တၢ်ဒိၣ်တဖၣ်အအိၣ်လၢ ပကစၢ်ယွၤအဟံၣ်​ အတၢ်ပာ်ဖှိၣ်တၢ် အဒၢးတဖၣ်* အဂီၢ်လီၤ.+ တကးဒံးဘၣ်​ ပကဟဲစိာ်န့ၢ် ပှၤလ့ၤဝံဖိတဖၣ်လၢ ပဟီၣ်ခိၣ်​ အတၤသူတၤသၣ်​ ဆံဆဲၣ်ပူတပူ+ မ့ၢ်လၢ ပှၤလ့ၤဝံဖိ မ့ၢ်ပှၤလၢအထၢဖှိၣ်​ တၢ်ဆံဆဲၣ်ပူတပူလၢ တၢ်သူၣ်တၢ်ဖျးတၢ်အဝ့ၢ် ကိးဖျၢၣ်ဒဲးအပူၤလီၤ.

၃၈ ဖဲပှၤလ့ၤဝံဖိတဖၣ်​ ထၢဖှိၣ်​ တၢ်ဆံဆဲၣ်ပူတပူ အခါ ပှၤလုၢ်တၢ်ဒိၣ်တဂၤလၢ အဟဲလီၤစၢၤလီၤသွဲၣ်လၢ စီၤအၤဟရိၣ်န့ၣ်​ ကဘၣ်အိၣ်ဒီး အဝဲသ့ၣ်လီၤ. ဒီးလၢတၢ်ဆံဆဲၣ်ပူတပူအံၤ အကျါန့ၣ်​ ပှၤလ့ၤဝံဖိတဖၣ်​ ကဘၣ်ဟံးန့ၢ် တၢ်ဆံဆဲၣ်ပူတပူ+ ဒီးလဲၤစိာ်ဝဲလၢ တၢ်ပာ်ဖှိၣ်တၢ် အဒၢးတဖၣ်* လၢအဘၣ်ထွဲဒီး ပကစၢ်ယွၤအဟံၣ်လီၤ. ၃၉ တၢ်ပာ်ဖှိၣ်တၢ် အဒၢးတဖၣ်န့ၣ်​ မ့ၢ်ဝဲ တၢ်လီၢ်လၢ ပှၤအံၣ်စရ့လးဖိ ဒီးပှၤလ့ၤဝံဖိတဖၣ်​ ကဘၣ်လဲၤစိာ် တၢ်မၤဘူၣ်လၢ+ အမ့ၢ် ဘု, စပံးထံအသီ ဒီးသိလီၤ.+ တကးဒံးဘၣ်​ ဖဲန့ၣ်န့ၣ်​ ပှၤပာ်ဝဲ တၢ်လုၢ်ဟံၣ်​ အတၢ်ပီးတၢ်လီတဖၣ်လီၤ. ပှၤလုၢ်တၢ်ဒိၣ်တဖၣ်​ လၢအလီၤဘၣ်မူဒါ, ပှၤခိးတြဲၤဖိတဖၣ်​ ဒီးပှၤသးဝံၣ်တၢ်ဖိတဖၣ်​ အိၣ်ဝဲဖဲန့ၣ်​ စ့ၢ်ကီးလီၤ. ပဆၢတဲာ်လီၤပသးလၢ ပတကွၢ်ကပာ်ကွံာ် ပကစၢ်ယွၤ အဟံၣ်လၢၤဘၣ်.+

၁၁ ဒီးပှၤဂီၢ်မုၢ် အပဒိၣ်တဖၣ်န့ၣ်​ အိၣ်ဝဲဆိးဝဲလၢ ဝ့ၢ်ယရူၤၡလ့ၣ်​ အပူၤလီၤ.+ ဒီးပှၤအဂၤတဖၣ်န့ၣ်​ ဖးတၢ်+ ဒ်သိးကဃုထၢထီၣ်​ ဟံၣ်ဖိဃီဖိ အဒူၣ်တဆံအကျါ တဒူၣ်​ အဒူၣ်တဆံအကျါ တဒူၣ်လၢ ကလဲၤအိၣ်ဘၣ်လၢ ဝ့ၢ်စီဆှံ ယရူၤၡလ့ၣ်​ အဂီၢ်လီၤ. မ့မ့ၢ် ဟံၣ်ဖိဃီဖိ အဂၤခွံဒူၣ်န့ၣ်​ ဆဲးအိၣ်ဝဲလၢ ဝ့ၢ်အဂၤတဖၣ်​ အပူၤလီၤ. ၂ ဒီးပှၤဂီၢ်မုၢ်တဖၣ်​ ဆိၣ်ဂ့ၤဆိၣ်ဝါ ပှၤလၢ အသးအိၣ်ဟ့ၣ်လီၤအသးလၢ ကလဲၤအိၣ်လၢ ဝ့ၢ်ယရူၤၡလ့ၣ်အပူၤလီၤ.

၃ ပှၤသ့ၣ်တဖၣ်အံၤ မ့ၢ်ဝဲ ကီၢ်ရ့ၣ်​ အခိၣ်တဖၣ်လၢ အအိၣ်ဝဲလၢ ဝ့ၢ်ယရူၤၡလ့ၣ်အပူၤလီၤ. (ပှၤအံၣ်စရ့လးဖိ လၢအဂၤတဖၣ်, ပှၤလုၢ်တၢ်ဒိၣ်, ပှၤလ့ၤဝံဖိ, တၢ်လုၢ်ဟံၣ်​ အခ့အပှၤတဖၣ်*+ ဒီးစီၤၡလိၤမိၤ အခ့အပှၤတဖၣ်​ အဖိခွါတဖၣ်န့ၣ်+ အိၣ်ဝဲလၢ ဝ့ၢ်အဂၤတဖၣ်​ လၢယူဒၤ အဟီၣ်ကဝီၤ အပူၤလီၤ. အဝဲသ့ၣ်​ အိၣ်ဝဲလၢ အဝ့ၢ်ပူၤ လၢတၢ်လီၢ်လၢ အန့ၢ်ဘၣ်ဝဲအပူၤလီၤ.+

၄ ဒီးပှၤတနီၤလၢ ယူဒၤအဒူၣ်အကျါ ဒီးပှၤတနီၤလၢ ဘံၣ်ယၤမံၣ်​ အဒူၣ်အကျါန့ၣ်​ အိၣ်ဝဲလၢ ဝ့ၢ်ယရူၤၡလ့ၣ်​ အပူၤစ့ၢ်ကီးလီၤ.) လၢယူဒၤ အဒူၣ်အကျါန့ၣ်​ ပှၤလၢ အတီခိၣ်ရိၤမဲတၢ်တဖၣ်​ ပၣ်ဃုာ်ဒီး စီၤဧသါယၤလီၤ. စီၤဧသါယၤ မ့ၢ်ဝဲ စီၤဧူးစံယါ အဖိခွါ,* စီၤဧူးစံယါ မ့ၢ်ဝဲ စီၤစကၤရယၤ အဖိခွါ, စီၤစကၤရယၤ မ့ၢ်ဝဲ စီၤအမၤရယၤ အဖိခွါ, စီၤအမၤရယၤ မ့ၢ်ဝဲ စီၤၡဖးတယၤ အဖိခွါ, စီၤၡဖးတယၤ မ့ၢ်ဝဲ စီၤမၤဟလၤလ့လး အဖိခွါ ဒီးစီၤမၤဟလၤလ့လး မ့ၢ်ဝဲ စီၤဖ့ၤရ့း အဖိခွါလီၤ.+ ၅ ဒီးပၣ်ဃုာ်စ့ၢ်ကီးဒီး စီၤမၤစ့ယၤလီၤ. စီၤမၤစ့ယၤ မ့ၢ်ဝဲ စီၤဘၤရူး အဖိခွါ, စီၤဘၤရူး မ့ၢ်ဝဲ စီၤကိးလဃိစ့ၤ အဖိခွါ, စီၤကိးလဃိစ့ၤ မ့ၢ်ဝဲ စီၤဃစါယၤ အဖိခွါ, စီၤဃစါယၤ မ့ၢ်ဝဲ စီၤဧဒါယၤ အဖိခွါ, စီၤဧဒါယၤ မ့ၢ်ဝဲ စီၤယိၤရံာ် အဖိခွါ, စီၤယိၤရံာ် မ့ၢ်ဝဲ စီၤစကၤရယၤ အဖိခွါ ဒီးစီၤစကၤရယၤ ပၣ်ဃုာ်လၢ ပှၤစ့ၤလါဖိ အဒူၣ်ဖိထၢဖိအကျါလီၤ. ၆ စီၤဖ့ၤရ့း အဖိခွါခဲလၢာ် လၢအအိၣ်လၢ ဝ့ၢ်ယရူၤၡလ့ၣ်​ အပူၤန့ၣ်​ အိၣ်ဝဲ ၄၆၈ ဂၤလီၤ. ဒီးအဝဲသ့ၣ်န့ၣ်​ မ့ၢ်ပှၤလၢ အအိၣ်ဒီး တၢ်သ့တၢ်ဘၣ်တဖၣ်လီၤ.

၇ ဒီးလၢ ဘံၣ်ယၤမံၣ်​ အဒူၣ်အကျါန့ၣ်​ ပၣ်ဃုာ်ဒီး စီၤစၤလူၤလီၤ. စီၤစၤလူၤ+ မ့ၢ်ဝဲ စီၤမၡူလၣ်​ အဖိခွါ, စီၤမၡူလၣ်​ မ့ၢ်ဝဲ စီၤယိၤဧ့း အဖိခွါ, စီၤယိၤဧ့း မ့ၢ်ဝဲ စီၤပဒါယၤ အဖိခွါ, စီၤပဒါယၤ မ့ၢ်ဝဲ စီၤကိလယၤ အဖိခွါ, စီၤကိလယၤ မ့ၢ်ဝဲ စီၤမၤစ့ယၤ အဖိခွါ, စီၤမၤစ့ယၤ မ့ၢ်ဝဲ စီၤအံၤသအ့လး အဖိခွါ ဒီးစီၤအံၤသအ့လး မ့ၢ်ဝဲ စီၤယၡၤယါ အဖိခွါလီၤ. ၈ ဒီးပၣ်ဃုာ်ဒီး စီၤကးဘဲ ဒီးစီၤစၤလဲၤ ဒီးခဲလၢာ်ခဲဆ့ အိၣ်ဝဲ ၉၂၈ ဂၤလီၤ. ၉ ဒီးစီၤစံးကရံ အဖိခွါ စီၤယိၤအ့လးန့ၣ်​ တီခိၣ်ရိၤမဲ အဝဲသ့ၣ်လီၤ. စီၤဟးစနူအၤ အဖိခွါ စီၤယူဒၤန့ၣ်​ မ့ၢ်ပှၤတီခိၣ်ရိၤမဲတၢ် ခံဂၤတဂၤ လၢဝ့ၢ်ပူၤလီၤ.

၁၀ ဒီးလၢ ပှၤလုၢ်တၢ်ဒိၣ်တဖၣ်​ အကျါန့ၣ်​ ပၣ်ဃုာ်ဒီး စီၤယိၤရံာ် အဖိခွါ စီၤယဒါယၤ, စီၤယၤကံၣ်,+ ၁၁ ဒီးစီၤစရါယၤ လၢအမ့ၢ် စီၤဃံးလကံယၤ အဖိခွါလီၤ. စီၤဃံးလကံယၤ မ့ၢ်ဝဲ စီၤမၡူလၣ်​ အဖိခွါ, စီၤမၡူလၣ်​ မ့ၢ်ဝဲ စီၤစၤဒိး အဖိခွါ, စီၤစၤဒိး မ့ၢ်ဝဲ စီၤမရၤယိး အဖိခွါ, စီၤမရၤယိး မ့ၢ်ဝဲ စီၤအဃံးတူာ် အဖိခွါလီၤ. စီၤအဃံးတူာ်+ မ့ၢ်ဝဲ ပှၤတီခိၣ်ရိၤမဲတၢ်တဂၤလၢ ယွၤလၢအမ့ၢ်အတီတဂၤ အတၢ်လုၢ်ဟံၣ်လီၤ. ၁၂ ဒီးအဝဲသ့ၣ်​ အဒီပုၢ်ဝဲၢ်ခွါလၢ အမၤတၢ်လၢ တၢ်လုၢ်ဟံၣ်န့ၣ်​ အိၣ်ဝဲ ၈၂၂ ဂၤ ဒီးစီၤဧဒါယၤလီၤ. စီၤဧဒါယၤ မ့ၢ်ဝဲ စီၤယရိဃၣ်​ အဖိခွါ, စီၤယရိဃၣ်​ မ့ၢ်ဝဲ စီၤပလၤလယၤ အဖိခွါ, စီၤပလၤလယၤ မ့ၢ်ဝဲ စီၤအးမစံ အဖိခွါ, စီၤအးမစံ မ့ၢ်ဝဲ စီၤစကၤရယၤ အဖိခွါ, စီၤစကၤရယၤ မ့ၢ်ဝဲ စီၤပးၡဃူၢ် အဖိခွါ ဒီးစီၤပးၡဃူၢ်+ မ့ၢ်ဝဲ စီၤမၤလကံယၤ အဖိခွါ, ၁၃ ဒီးအဒီပုၢ်ဝဲၢ်ခွါတဖၣ်​ လၢအမ့ၢ် ဒူၣ်ဖိထၢဖိတဖၣ်​ အခိၣ်အနၢ်တဖၣ်န့ၣ်​ အိၣ်ဝဲ ၂၄၂ ဂၤ ဒီးစီၤဧမၤၡဲလီၤ. စီၤဧမၤၡဲ မ့ၢ်ဝဲ စီၤဧစၤရ့လး အဖိခွါ, စီၤဧစၤရ့လး မ့ၢ်ဝဲ စီၤအၤဃစဲၤ အဖိခွါ, စီၤအၤဃစဲၤ မ့ၢ်ဝဲ စီၤမၤၡံးလ့မိး အဖိခွါ ဒီးစီၤမၤၡံးလ့မိး မ့ၢ်ဝဲ စီၤအံးမ့ၢ် အဖိခွါ, ၁၄ ဒီးအဝဲသ့ၣ်​ အဒီပုၢ်ဝဲၢ်ခွါတဖၣ်​ လၢအမ့ၢ်ပှၤလၢ အဂံၢ်ဆူၣ်ဘါဆူၣ်​ ဒီးအသူၣ်ဒူသးဒူန့ၣ်​ အိၣ်ဝဲ ၁၂၈ ဂၤလီၤ. ဒီးပှၤလၢ အတီခိၣ်ရိၤမဲ အဝဲသ့ၣ်န့ၣ်​ မ့ၢ်ဝဲ စီၤစးဘဒံၤအ့လးလီၤ. စီၤစးဘဒံၤအ့လးန့ၣ်​ ဟဲလီၤစၢၤလၢ ဒူၣ်ဖိထၢဖိလၢ အမံၤဟူသၣ်ဖျါ အကျါလီၤ.

၁၅ ဒီးလၢလ့ၤဝံ အဒူၣ်ကျါန့ၣ်​ ပၣ်ဃုာ်ဒီး စီၤဃၤၡူာ် အဖိခွါ စီၤၡမါယၤလီၤ.+ စီၤဃၤၡူာ် မ့ၢ်ဝဲ စီၤဧးစရံကၣ်​ အဖိခွါ, စီၤဧးစရံကၣ်​ မ့ၢ်ဝဲ စီၤဃၡၤဘယၤ အဖိခွါ ဒီးစီၤဃၡၤဘယၤ မ့ၢ်ဝဲ စီၤဘူနံၤ အဖိခွါလီၤ. ၁၆ ဒီးပၣ်ဃုာ်ဒီး စီၤၡၤဘသဲၤ+ ဒီးစီၤယိစဘး+ လၢအမ့ၢ် ပှၤလ့ၤဝံဖိ အခိၣ်အနၢ်တဖၣ်လီၤ. ဒီးအဝဲသ့ၣ်န့ၣ်​ ကွၢ်ထွဲတၢ်ဂ့ၢ်အဂၤလၢ ဘၣ်ဃးဒီး ယွၤလၢအမ့ၢ်အတီတဂၤ အဟံၣ်လီၤ. ၁၇ ဒီးပၣ်ဃုာ်ဒီး စီၤမးတၤနယၤလီၤ.+ စီၤမးတၤနယၤန့ၣ်​ မ့ၢ်ဝဲ စီၤမံၤကါ အဖိခွါ, စီၤမံၤကါ မ့ၢ်ဝဲ စီၤစးဘဒံၤ အဖိခွါ ဒီးစီၤစးဘဒံၤမ့ၢ်ဝဲ စီၤအၤစာ် အဖိခွါလီၤ.+ စီၤမးတၤနယၤ မ့ၢ်ပှၤနဲၣ်တၢ်သးဝံၣ်​ ဒီးအဝဲတီခိၣ်ရိၤမဲ တၢ်စံးထီၣ်ပတြၢၤ ဖဲတၢ်ဃ့ထုကဖၣ်​ အဆၢကတီၢ်လီၤ.+ စီၤဘးကဘူကယၤ မ့ၢ်ပှၤတီခိၣ်ရိၤမဲတၢ် ခံဂၤတဂၤလၢ လၢအဒီပုၢ်ဝဲၢ် ပှၤသးဝံၣ်တၢ်ဖိတဖၣ်​ အကျါလီၤ. ဒီးပၣ်ဃုာ်ဒီး စီၤဧၤဘဒါလီၤ. စီၤဧၤဘဒါ မ့ၢ်ဝဲ စီၤၡးမူၤ အဖိခွါ, စီၤၡးမူၤ မ့ၢ်ဝဲ စီၤကၤလလး အဖိခွါ ဒီးစီၤကၤလလး မ့ၢ်ဝဲ စီၤယဒူသူၣ်​ အဖိခွါလီၤ.+ ၁၈ ပှၤလ့ၤဝံဖိလၢ အအိၣ်လၢ ဝ့ၢ်စီဆှံအပူၤ ခဲလၢာ်န့ၣ်​ အိၣ်ဝဲ ၂၈၄ ဂၤလီၤ.

၁၉ ဒီးပှၤခိးတြဲၤဖိတဖၣ်န့ၣ်​ မ့ၢ်ဝဲ စီၤဧးကူာ်, စီၤတၤလမိၣ်+ ဒီးအဝဲသ့ၣ်​ အဒီပုၢ်ဝဲၢ်ခွါတဖၣ်​ လၢအခိးတြဲၤန့ၣ်​ အိၣ်ဝဲ ၁၇၂ ဂၤလီၤ.

၂၀ ဒီးပှၤအံၣ်စရ့လးဖိ, ပှၤလုၢ်တၢ်ဒိၣ်​ ဒီးပှၤလ့ၤဝံဖိ လၢအဂၤတဖၣ်န့ၣ်​ အိၣ်ဝဲလၢ ဝ့ၢ်အဂၤခဲလၢာ်လၢ အအိၣ်လၢ ယူဒၤ အဟီၣ်ကဝီၤအပူၤလီၤ. အဝဲသ့ၣ်​ အိၣ်ဝဲလၢ တၢ်လီၢ်လၢ အဝဲသ့ၣ်​ န့ၢ်သါဘၣ်ဝဲ အပူၤလီၤ. ၂၁ တၢ်လုၢ်ဟံၣ်​ အခ့အပှၤတဖၣ်န့ၣ်+ အိၣ်လၢ ဧိၤဖ့လးလီၤ.+ စီၤစံဃၤ ဒီးစီၤကံးၡပၤန့ၣ်​ တီခိၣ်ရိၤမဲဝဲ တၢ်လုၢ်ဟံၣ်​ အခ့အပှၤတဖၣ်လီၤ.

၂၂ ပှၤလၢအတီခိၣ်ရိၤမဲ ပှၤလ့ၤဝံဖိတဖၣ်လၢ ဝ့ၢ်ယရူၤၡလ့ၣ်​ အပူၤတဂၤန့ၣ်​ မ့ၢ်ဝဲ စီၤဘၤနံ အဖိခွါ စီၤဧူၤစံလီၤ. စီၤဘၤနံန့ၣ်​ မ့ၢ်ဝဲ စီၤဃၡၤဘယၤ အဖိခွါ, စီၤဃၡၤဘယၤ မ့ၢ်ဝဲ စီၤမးတၤနယၤ အဖိခွါ ဒီးစီၤမးတၤနယၤ+ မ့ၢ်ဝဲ စီၤမံၤကး အဖိခွါလီၤ. စီၤဧူၤစံ ပၣ်ဃုာ်စ့ၢ်ကီးလၢ စီၤအၤစာ် အဖိခွါတဖၣ်​ လၢအမ့ၢ် ပှၤသးဝံၣ်တၢ်ဖိ အကျါလီၤ. ဒီးစီၤဧူၤစံန့ၣ်​ မ့ၢ်ဝဲ ပှၤလၢ အတီခိၣ်ရိၤမဲဝဲ တၢ်မၤဘၣ်ဃးဒီး ယွၤလၢအမ့ၢ်အတီတဂၤ အဟံၣ်လီၤ. ၂၃ စီၤပၤဟ့ၣ်လီၤပာ်စၢၤ တၢ်ကလုၢ်လၢ+ အဘၣ်ဃးဒီး ပှၤသးဝံၣ်တၢ်ဖိတဖၣ်​ အဃိ တၢ်ရဲၣ်တၢ်ကျဲၤ အိၣ်ဝဲလၢ ပှၤသးဝံၣ်တၢ်ဖိတဖၣ်​ အဂီၢ် ဒ်အဝဲသ့ၣ်​ အတၢ်လိၣ်ဘၣ်လၢ တနံၤဘၣ်တနံၤအဂီၢ် အိၣ်ဝဲအသိးလီၤ. ၂၄ စီၤပသၤဃယၤန့ၣ်​ မ့ၢ်ဝဲ ပှၤဟ့ၣ်ကူၣ်ဟ့ၣ်ဖး စီၤပၤ ဘၣ်ဃးဒီး ပှၤဂီၢ်မုၢ်တဖၣ်​ အတၢ်ဂ့ၢ် ခဲလၢာ်န့ၣ်လီၤ. ဒီးစီၤပသၤဃယၤ မ့ၢ်ဝဲ စီၤမၡ့စဘ့လး အဖိခွါ, စီၤမၡ့စဘ့လး ပၣ်ဃုာ်လၢ စီၤစ့ရၤ အဒူၣ်ဖိထၢဖိအကျါ ဒီးစီၤစ့ရၤ မ့ၢ်ဝဲ စီၤယူဒၤ အဖိခွါလီၤ.

၂၅ မ့မ့ၢ် ဒူသဝီတဖၣ်​ ဃုာ်ဒီး အတၢ်ပျီတဖၣ်န့ၣ်​ ဘၣ်တၢ်ပာ်ဖျါထီၣ်အီၤ ဒ်လၢလာ်အံၤအသိးလီၤ. ပှၤတနီၤလၢ ယူဒၤအဒူၣ်အကျါန့ၣ်​ အိၣ်ဝဲလၢ ဝ့ၢ်ကံးရယးအၢ်ဘၤ+ ဒီးအဒူသဝီတဖၣ်, ဝ့ၢ်ဒံၤဘိၣ်​ ဒီးအဒူသဝီတဖၣ်, ဝ့ၢ်ယကၤဘစ့လး+ ဒီးအဒူသဝီတဖၣ်, ၂၆ ဝ့ၢ်ယ့ၤၡူ, ဝ့ၢ်မိၤလဒၤ,+ ဝ့ၢ်ဘ့ၤသပၤလ့း,+ ၂၇ ဝ့ၢ်ဃစၢ်ၡူဧလး,+ ဝ့ၢ်ဘ့ၢ်ၡဘၤ ဒီးအဒူသဝီတဖၣ်, ၂၈ ဝ့ၢ်စံကလး,+ ဝ့ၢ်မကိနၤ ဒီးအဒူသဝီတဖၣ်, ၂၉ ဝ့ၢ်ဧ့ၣ်ရံမိၣ်,+ ဝ့ၢ်စိးရၤ,+ ဝ့ၢ်ယၢ်မူသး, ၃၀ ဝ့ၢ်စါနိၤ,+ ဝ့ၢ်ဧဒူးလၣ်​ ဒီးအဒူသဝီတဖၣ်, ဝ့ၢ်လၤကံၣ်+ ဒီးအတၢ်ပျီတဖၣ်, ဝ့ၢ်ဧစ့ကၤ+ ဒီးအဒူသဝီတဖၣ်လီၤ. ဒီးအဝဲသ့ၣ်​ အိၣ်ဝဲဆိးဝဲ စးထီၣ်လၢ ဝ့ၢ်ဘ့ၢ်ၡဘၤ တုၤလီၤလၢ ဟံၣ်နိၣ်​ အတၢ်တြီၤလီၤ.+

၃၁ ဒီးပှၤလၢ ဘံၣ်ယၤမံၣ်​ အဒူၣ်ကျါန့ၣ်​ အိၣ်ဝဲလၢ ဝ့ၢ်က့ဘၤ,+ ဝ့ၢ်မံးကမၣ်, ဝ့ၢ်ဂဲ, ဝ့ၢ်ဘ့ၤသ့လး+ ဒီးအဒူသဝီတဖၣ်, ၃၂ ဝ့ၢ်ဧၤနသိး,+ ဝ့ၢ်နိၤဘး,+ ဝ့ၢ်ဧနၤနယၤ, ၃၃ ဝ့ၢ်ဃါစိၢ်, ဝ့ၢ်ရၤမါ,+ ဝ့ၢ်ကံးတယၣ်, ၃၄ ဝ့ၢ်ဃၤဒံး, ဝ့ၢ်စဘိဧံၣ်, ဝ့ၢ်နဘးလး, ၃၅ ဝ့ၢ်လိး ဒီးဝ့ၢ်အိနိၤ+ လၢအမ့ၢ် ပှၤစုသ့ဖိ အတၢ်တြီၤလီၤ. ၃၆ ဒီးပှၤလ့ၤဝံဖိတနီၤလၢ အအိၣ်ဝဲလၢ ယူဒၤ အဟီၣ်ကဝီၤအပူၤန့ၣ်​ ဘၣ်လဲၤအိၣ်ဝဲလၢ ဘံၣ်ယၤမံၣ်​ အဟီၣ်ကဝီၤအပူၤလီၤ.

၁၂ ပှၤလုၢ်တၢ်ဒိၣ်တဖၣ်​ ဒီးပှၤလ့ၤဝံဖိတဖၣ်လၢ အဟဲက့ၤဒီး စီၤၡၤလတံၤအ့လး အဖိခွါ+ စီၤစရူဘၤဘ့လးဒီး+ စီၤယ့ၤၡူန့ၣ်+ မ့ၢ်ဝဲ စီၤစရါယၤ, စီၤယံးရမံယၤ, စီၤဧ့စြၤ, ၂ စီၤအမၤရယၤ, စီၤမးလူး, စီၤဃးတူၣ်, ၃ စီၤၡကါနယၤ, စီၤရဃူၣ်, စီၤမရ့မိး, ၄ စီၤဧံးဒိၤ, စီၤကံးနသိၤ, စီၤအဘံယၤ, ၅ စီၤမံယမံၣ်, စီၤမၤဒယၤ, စီၤဘံလကၤ, ၆ စီၤၡမါယၤ, စီၤယိၤရံာ်, စီၤယဒါယၤ, ၇ စီၤစၤလူၤ, စီၤဧးမိး, စီၤဃံးလကံယၤ ဒီးစီၤယဒါယၤလီၤ. အဝဲသ့ၣ်​ မ့ၢ်ပှၤလုၢ်တၢ်ဒိၣ်တဖၣ် အခိၣ်​ ဒီးအဝဲသ့ၣ်​ အဒီပုၢ်ဝဲၢ်တဖၣ်အခိၣ်​ ဖဲစီၤယ့ၤၡူအစိၤလီၤ.

၈ ပှၤလ့ၤဝံဖိတဖၣ်န့ၣ်​ မ့ၢ်ဝဲ စီၤယ့ၤၡူ, စီၤဘံနူၤ, စီၤကးမံၤအ့လး,+ စီၤၡ့ရ့ဘယၤ, စီၤယူဒၤ ဒီးစီၤမးတၤနယၤလီၤ.+ စီၤမးတၤနယၤ ဒီးအဒီပုၢ်ဝဲၢ်တဖၣ်န့ၣ်​ တီခိၣ်ရိၤမဲဝဲ ပှၤလၢ အသးဝံၣ်​ တၢ်စံးဘျုးစံးဖှိၣ်​ အတၢ်သးဝံၣ်န့ၣ်လီၤ. ၉ ဖဲအဝဲသ့ၣ်​ အဒီပုၢ်ဝဲၢ် စီၤဘးကဘူကယၤ ဒီးစီၤဧူးနံၤ လီၤဘၣ်မူဒါလၢ ကအိၣ်ခိးကွၢ်တၢ်အခါ ဆၢထၢၣ်ဝဲလၢ တၢ်လီၢ်လၢ အကွၢ်ဆၢၣ်မဲာ်လိာ်သးဒီး အဝဲသ့ၣ်လီၤ. ၁၀ စီၤယ့ၤၡူ အဖိခွါမ့ၢ်ဝဲ စီၤယိယၤကံၣ်, စီၤယိယၤကံၣ်​ အဖိခွါမ့ၢ်ဝဲ စီၤအ့လယၤၡံၣ်, စီၤအ့လယၤၡံၣ်+ အဖိခွါမ့ၢ်ဝဲ စီၤယိယဒၤလီၤ.+ ၁၁ ဒီးစီၤယိယဒၤ အဖိခွါမ့ၢ်ဝဲ စီၤယိနၤသၣ်​ ဒီးစီၤယိနၤသၣ်​ အဖိခွါမ့ၢ်ဝဲ စီၤယးဒူလီၤ.

၁၂ ဖဲစီၤယိယၤကံၣ်​ အစိၤန့ၣ်​ ပှၤလုၢ်တၢ်ဒိၣ်​ လၢလာ်တဖၣ်အံၤ မ့ၢ်ဝဲ ဒူၣ်ဖိထၢဖိ အခိၣ်အနၢ် တဖၣ်လီၤ. စီၤမရါယၤ မ့ၢ်ဝဲ စီၤစရါယၤ+ အဒူၣ်ဖိထၢဖိ အခိၣ်အနၢ်, စီၤဃနၤနယၤ မ့ၢ်ဝဲ စီၤယံးရမံယၤ အဒူၣ်ဖိထၢဖိ အခိၣ်အနၢ်, ၁၃ စီၤမၡူလၣ်​ မ့ၢ်ဝဲ စီၤဧ့စြၤ+ အဒူၣ်ဖိထၢဖိ အခိၣ်အနၢ်, စီၤယိဃၤနာ် မ့ၢ်ဝဲ စီၤအမၤရယၤ အဒူၣ်ဖိထၢဖိ အခိၣ်အနၢ်, ၁၄ စီၤယိနၤသၣ်​ မ့ၢ်ဝဲ စီၤမံလကူၤ အဒူၣ်ဖိထၢဖိ အခိၣ်အနၢ်, စီၤယိၤသး မ့ၢ်ဝဲ စီၤၡဘၤနယၤ အဒူၣ်ဖိထၢဖိ အခိၣ်အနၢ်, ၁၅ စီၤဧၤဒနၤ မ့ၢ်ဝဲ စီၤဃၤရံၣ်+ အဒူၣ်ဖိထၢဖိ အခိၣ်အနၢ်, စီၤဃ့လကံ မ့ၢ်ဝဲ စီၤမရၤယိး အဒူၣ်ဖိထၢဖိ အခိၣ်အနၢ်, ၁၆ စီၤစကၤရယၤ မ့ၢ်ဝဲ စီၤဧံးဒိၤ အဒူၣ်ဖိထၢဖိ အခိၣ်အနၢ်, စီၤမၡူလၣ်​ မ့ၢ်ဝဲ စီၤကံးနသိၣ်​ အဒူၣ်ဖိထၢဖိ အခိၣ်အနၢ်, ၁၇ စီၤစံးကရံ မ့ၢ်ဝဲ စီၤအဘံယၤ+ အဒူၣ်ဖိထၢဖိ အခိၣ်အနၢ်, . . .* မ့ၢ်ဝဲ စီၤမံးနယၤမံၣ်​ အဒူၣ်ဖိထၢဖိ အခိၣ်အနၢ်, စီၤပံးလတဲၤ မ့ၢ်ဝဲ စီၤမိၤဧၤဒယၤ အဒူၣ်ဖိထၢဖိ အခိၣ်အနၢ်, ၁၈ စီၤၡးမူၤ မ့ၢ်ဝဲ စီၤဘံလကၤ+ အဒူၣ်ဖိထၢဖိ အခိၣ်အနၢ်, စီၤယိနာ်သၣ်​ မ့ၢ်ဝဲ စီၤၡမါယၤ အဒူၣ်ဖိထၢဖိ အခိၣ်အနၢ်, ၁၉ စီၤမးတနဲ မ့ၢ်ဝဲ စီၤယိၤရံာ် အဒူၣ်ဖိထၢဖိ အခိၣ်အနၢ်, စီၤဧူၤစံ မ့ၢ်ဝဲ စီၤယဒါယၤ+ အဒူၣ်ဖိထၢဖိ အခိၣ်အနၢ်, ၂၀ စီၤကးလဲၤ မ့ၢ်ဝဲ စီၤစၤလဲၤ အဒူၣ်ဖိထၢဖိ အခိၣ်အနၢ်, စီၤဧၤဘ့ၢ် မ့ၢ်ဝဲ စီၤဧးမိး အဒူၣ်ဖိထၢဖိ အခိၣ်အနၢ်, ၂၁ စီၤဃၡၤဘယၤ မ့ၢ်ဝဲ စီၤဃံးလကံယၤ အဒူၣ်ဖိထၢဖိ အခိၣ်အနၢ်, စီၤနၤသန့လး မ့ၢ်ဝဲ စီၤယဒါယၤ အဒူၣ်ဖိထၢဖိ အခိၣ်အနၢ်လီၤ.

၂၂ လၢစီၤအ့လယၤၡံၣ်, စီၤယိယဒၤ, စီၤယိဃၤနၣ်​ ဒီးစီၤယးဒူ+ အစိၤန့ၣ်​ လ့ၤဝံ အဒူၣ်ဖိထၢဖိ အခိၣ်အနၢ်တဖၣ်​ ဒီးပှၤလုၢ်တၢ်ဒိၣ်တဖၣ်အမံၤန့ၣ်​ ဘၣ်တၢ်ကွဲးနီၣ်အီၤ ဒီးအအိၣ်ဝဲ တုၤလၢ ဖၢၡၢၣ်အစီၤပၤ ဒၤရယါဝ့ၣ်​ ပၢတၢ်အစိၤလီၤ.

၂၃ ပှၤလ့ၤဝံဖိ လၢအမ့ၢ် ဒူၣ်ဖိထၢဖိ အခိၣ်အနၢ်တဖၣ်​ အမံၤန့ၣ်​ ဘၣ်တၢ်ကွဲးနီၣ်အီၤလၢ တၢ်စံၣ်စိၤတဲစိၤ အလံာ်ပူၤ ဒီးအအိၣ်ဝဲ တုၤလီၤလၢ စီၤအ့လယၤၡံၣ်​ အဖိခွါ စီၤယိဃၤနၣ်​ အစိၤလီၤ. ၂၄ ပှၤလ့ၤဝံဖိ အခိၣ်အနၢ်တဖၣ်န့ၣ်​ မ့ၢ်ဝဲ စီၤဃၡၤဘယၤ, စီၤၡ့ရ့ဘယၤ, စီၤကးမံၤအ့လး+ အဖိခွါ စီၤယ့ၤၡူလီၤ.+ ဒီးအဝဲသ့ၣ်​ အဒီပုၢ်ဝဲၢ်ခွါ ပှၤခိးတၢ်ဖိတဖၣ်​ ဆၢထၢၣ်​ ကွၢ်ဆၢၣ်မဲာ်လိာ်သးဒီး အဝဲသ့ၣ်​ ဒီးဆၢထၢၣ်ဝဲ တဒူၣ်ဘၣ်တဒူၣ်​ ဒ်သိး ကစံးထီၣ်ပတြၢၤ ဒီးစံးဘျုးကစၢ်ယွၤ ဒ်ကစၢ်ယွၤ အခ့အပှၤ စီၤဒၤဝံး အတၢ်ဟံးစုနဲၣ်ကျဲ အိၣ်ဝဲအသိးလီၤ.+ ၂၅ စီၤမးတၤနယၤ,+ စီၤဘးကဘူကယၤ, စီၤဧိၤဘါဒယၤ, စီၤမၡူလၣ်, စီၤတၤလမိၣ်​ ဒီးစီၤဧးကူာ်န့ၣ်+ မ့ၢ်ဝဲ ပှၤခိးတြဲၤဖိတဖၣ်လၢ+ ဘၣ်ခိးဝဲ တၢ်ပာ်ဖှိၣ်တၢ် အဒၢးတဖၣ်​ လၢအအိၣ်ဘူးဒီး တၢ်လုၢ်ဟံၣ်​ အတြဲၤတဖၣ်လီၤ. ၂၆ အဝဲသ့ၣ်​ အိၣ်မူဝဲဖဲ စီၤယိယၤကံၣ်​ ဒီးပဒိၣ်ဖးဒိၣ်​ စီၤနဃ့မယၤ ဒီးပှၤလုၢ်တၢ်ဒိၣ်​ စီၤဧ့စြၤ+ လၢအမ့ၢ် ပှၤကွဲးကူ ယွၤအကလုၢ်ကထါ* အစိၤလီၤ. စီၤယိယၤကံၣ်န့ၣ်​ မ့ၢ်ဝဲ စီၤယ့ၤၡူ+ အဖိခွါ ဒီးစီၤယ့ၤၡူ မ့ၢ်ဝဲ စီၤယိၤစဒး အဖိခွါလီၤ.

၂၇ ဖဲတၢ်ဆၢကတီၢ်လၢ တၢ်ကပာ်စီဆှံ ယရူၤၡလ့ၣ်​ အဝ့ၢ်ဒူၣ်ဘူးထီၣ်ကဘၣ်ဝဲအခါ အဝဲသ့ၣ်​ လဲၤဃု ပှၤလ့ၤဝံဖိတဖၣ်​ လၢအအိၣ်လၢ တၢ်လီၢ်ကိးပူၤဒဲး ဒီးဟဲက့ၤကိး အဝဲသ့ၣ်​ လၢဝ့ၢ်ယရူၤၡလ့ၣ်​ ဒ်သိး ကပာ်စီဆှံ ဝ့ၢ်ဒူၣ်​ လၢတၢ်သူၣ်ဖှံသးညီအပူၤ ဒီးဒ်သိး ကသးဝံၣ်​ တၢ်စံးဘျုးစံးဖှိၣ်​ အတၢ်သးဝံၣ်+ ဃုာ်ဒီး စှၢၣ်စှံးတဖၣ်, သီတူၢ်တဖၣ်​ ဒီးတနၢ်တဖၣ်လီၤ. ၂၈ ပှၤသးဝံၣ်တၢ်ဖိ လၢပှၤသိၣ်လိပာ်စၢၤအီၤတဖၣ်* န့ၣ်​ ပာ်ဖှိၣ်ထီၣ်အသးလီၤ. ပှၤသးဝံၣ်တၢ်ဖိတဖၣ်အံၤ အိၣ်ဟဲလၢ ယၢ်ဒ့ၣ်အဟီၣ်ကဝီၤ, တၢ်လီၢ်လၢ ဝ့ၢ်ယရူၤၡလ့ၣ်​ အကပၤဝးဝး, ပှၤနတိဖၤဖိတဖၣ်​ အဒူသဝီ,+ ၂၉ ဝ့ၢ်ဘ့ၤကံးလကၤလး,+ ဝ့ၢ်က့ဘၤ+ ဒီးဝ့ၢ်ဧၤစမၤဝ့း+ အတၢ်ပျီတဖၣ်, မ့ၢ်လၢ အဝဲသ့ၣ်​ သူၣ်လီၤပာ်စၢၤ အတၢ်လီၢ်တၢ်ကျဲလၢ ဝ့ၢ်ယရူၤၡလ့ၣ်​ အကပၤဝးဝးအဃိလီၤ. ၃၀ ဒီးပှၤလုၢ်တၢ်ဒိၣ်တဖၣ်​ ဒီးပှၤလ့ၤဝံဖိတဖၣ်​ မၤကဆှီထီၣ်အသး ဒီးအဝဲသ့ၣ်​ မၤကဆှီထီၣ်ဝဲ ပှၤဂီၢ်မုၢ်တဖၣ်,+ ဝ့ၢ်အတြဲၤတဖၣ်+ ဒီးဝ့ၢ်ဒူၣ်လီၤ.+

၃၁ ဒီးယလဲၤကိးထီၣ်​ ယူဒၤ အပဒိၣ်တဖၣ်​ လၢဝ့ၢ်ခိၣ်ဒူ အလိၤလီၤ. ဒီးယရဲၣ်လီၤကျဲၤလီၤ ပှၤသးဝံၣ်စံးထီၣ်ပတြၢၤတၢ် အဖုဖးဒိၣ်ခံဖု ဒီးပှၤခံကရူၢ်လၢ အကပိာ်ထီၣ်​ အဝဲသ့ၣ်အခံလီၤ. ဒီးပှၤသးဝံၣ်တၢ်ဖိ တဖုန့ၣ်​ လဲၤတၢ်လၢ ဝ့ၢ်ခိၣ်ဒူအလိၤ လၢစုထွဲတခီ လၢဖၣ်ဆါအ့ၣ်အတြဲၤ တကပၤလီၤ.+ ၃၂ စီၤဟိၤၡၤယၤ ဒီးယူဒၤ အပဒိၣ်တဝာ်န့ၣ်​ လဲၤတၢ်လၢ ကရူၢ်လၢ အပိာ် ပှၤသးဝံၣ်တၢ်ဖိတဖၣ်အခံ အကျါ ၃၃ ဃုာ်ဒီး စီၤဧစၤရယၤ, စီၤဧ့စြၤ, စီၤမၡူလၣ်, ၃၄ စီၤယူဒၤ, စီၤဘံၣ်ယၤမံၣ်, စီၤၡမါယၤ ဒီးစီၤယံးရမံယၤလီၤ. ၃၅ ဒီးပှၤလုၢ်တၢ်ဒိၣ်​ တနီၤလၢ အအိၣ်ဒီးကွဲၤ+ လၢအပိာ် အဝဲသ့ၣ်​ အခံန့ၣ်​ ပၣ်ဃုာ်ဒီး စီၤစကၤရယၤလီၤ. စီၤစကၤရယၤ မ့ၢ်ဝဲ စီၤယိနၤသၣ်​ အဖိခွါ, စီၤယိနၤသၣ်​ မ့ၢ်ဝဲ စီၤၡမါယၤ အဖိခွါ, စီၤၡမါယၤ မ့ၢ်ဝဲ စီၤမးတၤနယၤ အဖိခွါ, စီၤမးတၤနယၤ မ့ၢ်ဝဲ စီၤမံၤကါယၤ အဖိခွါ, စီၤမံၤကါယၤ မ့ၢ်ဝဲ စီၤစးကူၢ် အဖိခွါ, စီၤစးကူၢ် မ့ၢ်ဝဲ စီၤအၤစာ် အဖိခွါလီၤ.+ ၃၆ ဒီးပၣ်ဃုာ်ဒီး စီၤစကၤရယၤ အဒီပုၢ်ဝဲၢ်ခွါတဖၣ်​ လၢအမ့ၢ် စီၤၡမါယၤ, စီၤဧစၤရ့လး, စီၤမံလလဲၤ, စီၤကံလလဲၤ, စီၤမၤဧၤ, စီၤနၤသန့လး, စီၤယူဒၤ ဒီးစီၤဃနၤနံလီၤ. အဝဲသ့ၣ်​ စိာ်ဝဲဒီး ယွၤလၢအမ့ၢ်အတီတဂၤ အခ့အပှၤ စီၤဒၤဝံး အတၢ်ဒ့တၢ်အူ အတၢ်ပီးတၢ်လီတဖၣ်+ ဒီးပှၤကွဲးကူ ယွၤအကလုၢ်ကထါ စီၤဧ့စြၤ+ လဲၤတၢ်လၢ အဝဲသ့ၣ်​ အမဲာ်ညါလီၤ. ၃၇ စးထီၣ်ဖဲ ထံထီၣ်ပၢၢ်အတြဲၤန့ၣ်+ အဝဲသ့ၣ်​ လဲၤထီၣ်လိၤလိၤလၢ ဝ့ၢ်ခိၣ်ဒူတတီၤလၢ အလဲၤတလၢ စီၤဒၤဝံးအဝ့ၢ်+ အဃီသွါလီၤ.+ ဒီးအဝဲသ့ၣ်​ ဟးလၢ ဝ့ၢ်ခိၣ်ဒူ တတီၤန့ၣ်​ အဖီခိၣ်​ တုၤလၢ အဝဲသ့ၣ်လဲၤတလၢ စီၤဒၤဝံးအဟံၣ်​ ဒီးဆဲးလဲၤဝဲဆူ ထံအတြဲၤ+ လၢမုၢ်ထီၣ်တခီလီၤ.

၃၈ ဒီးပှၤသးဝံၣ်စံးထီၣ်ပတြၢၤတၢ် အဝဲတဖုန့ၣ်​ လဲၤတၢ်လၢ အဂၤတကပၤ ဒီးယၤဒီးကရူၢ်လၢ အအိၣ်တ့ၢ် တကရူၢ်န့ၣ်​ ပပိာ်ထီၣ်​ အဝဲသ့ၣ်အခံ ဖဲဝ့ၢ်ခိၣ်ဒူလၢ အလဲၤတလၢ ဖၣ်ကပူၤအတၢးထီ+ ဒီးလၢ တၢ်ဒူၣ်လၢ အလဲၢ်လီၤ.+ ၃၉ ဒီးပဆဲးလဲၤတလၢ အ့ဖရဲၣ်အတြဲၤ+ ဒီးပလဲၤလၢ ဝ့ၢ်လီၢ်လံၤ အတြဲၤအလိၤ+ ဒီးပလဲၤလၢ ညၣ်အတြဲၤ,+ တၢးထီ ဃနၤန့လး,+ တၢးထီ မ့ၤအၤ ဒီးသိအတြဲၤအလိၤ+ ဒီးပအိၣ်ပတုာ်ဖဲ ပှၤခိးတၢ်ဖိ အတြဲၤလီၤ.

၄၀ ဝံၤဒီး ပှၤသးဝံၣ်စံးထီၣ်ပတြၢၤတၢ် ခံဖုလၢာ်န့ၣ်​ ဆၢထၢၣ်ဝဲလၢ ယွၤလၢအမ့ၢ်အတီတဂၤ အဟံၣ်မဲာ်ညါလီၤ. ဒီးယၤဒီး ပဒိၣ်တဝာ်လၢ အအိၣ်ဒီးယၤန့ၣ်​ ဆၢထၢၣ်ဖဲန့ၣ်လီၤ. ၄၁ ဒီးစီၤအ့ၤလယါကံၣ်, စီၤမၤစ့ယၤ, စီၤမံးနယၤမံၣ်, စီၤမံၤကါယၤ, စီၤအ့လယိနၤ, စီၤစကၤရယၤဒီး စီၤဃနၤနယၤ လၢအမ့ၢ် ပှၤလုၢ်တၢ်ဒိၣ်တဖၣ်​ လၢအအိၣ်ဝဲဒီးကွဲၤတဖၣ်န့ၣ်​ ဆၢထၢၣ်ဖဲန့ၣ်​ စ့ၢ်ကီးလီၤ. ၄၂ တကးဒံးဘၣ်​ စီၤမၤစ့ယၤ, စီၤၡမါယၤ, စီၤအလၤဧစၢ်, စီၤဧူၤစံ, စီၤယိဃၤနာ်, စီၤမၤလကံယၤ, စီၤဧ့ၤလၣ်​ ဒီးစီၤဧ့စ့ၢ် စ့ၢ်ကီး ဆၢထၢၣ်ဖဲန့ၣ်လီၤ. ဒီးပှၤသးဝံၣ်တၢ်ဖိတဖၣ်န့ၣ်​ သးဝံၣ်တၢ်လၢ စီၤယံးစရၤဃယၤ အတၢ်တီခိၣ်ရိၤမဲ အဖီလာ် လၢအကလုၢ် ဖးဒိၣ်လီၤ.

၄၃ ဖဲတၢ်တနံၤန့ၣ်​ အဝဲသ့ၣ်လုၢ်ထီၣ်တၢ် အါအါဂီၢ်ဂီၢ် ဒီးသူၣ်ခုသးခုဝဲ ဒိၣ်မး,+ မ့ၢ်လၢ ယွၤလၢအမ့ၢ်အတီတဂၤ မၤသးခု အဝဲသ့ၣ်အသး ဒိၣ်ဒိၣ်မုၢ်မုၢ် အဃိလီၤ. ပှၤပိာ်မုၣ်​ ဒီးပှၤဖိသၣ်တဖၣ်စ့ၢ်ကီး သူၣ်ခုသးခုဝဲအဃိ+ ပှၤလၢ ဝ့ၢ်ယရူၤၡလ့ၣ်အပူၤ မၤတၢ်သူၣ်ဖှံသးညီ တဘျီအံၤန့ၣ်​ ဟူထီၣ်ဝဲလၢ တၢ်လီၢ်ဖးယံၤလီၤ.+

၄၄ ဖဲတၢ်တနံၤန့ၣ်​ ပှၤပိာ်ခွါတဖၣ်​ ဘၣ်တၢ်ပာ်ထီၣ်အီၤလၢ ကကွၢ်ထွဲ တၢ်ပာ်ဖှိၣ်အလီၢ်တဖၣ်+ လၢပှၤပာ်ဖှိၣ်​ တၢ်မၤဘူၣ်တဖၣ်,+ တၤသၣ်ဆိတဖၣ်+ ဒီးတၢ်ဆံဆဲၣ်ပူတပူလီၤ.+ အဝဲသ့ၣ်​ ဘၣ်ထၢဖှိၣ်ဝဲ တၢ်လၢ အမဲထီၣ်သၣ်ထီၣ်​ တနီၤလၢ ဝ့ၢ်တဖၣ်​ အစံာ်ပျီအပူၤ လၢပှၤလုၢ်တၢ်ဒိၣ်တဖၣ်​ ဒီးပှၤလ့ၤဝံဖိတဖၣ်+ အဂီၢ် ဒ်စီၤမိၤၡ့ အတၢ်သိၣ်တၢ်သီ အိၣ်ဝဲအသိးလီၤ.+ ဒီးအဝဲသ့ၣ်​ ပာ်ဖှိၣ်ဝဲလၢ တၢ်ပာ်ဖှိၣ်​ အလီၢ်တဖၣ်အံၤ အပူၤလီၤ. ဒီးပှၤယူဒၤဖိတဖၣ်န့ၣ်​ သးခုဝဲဒိၣ်မး ခီဖျိလၢ ပှၤလုၢ်တၢ်ဒိၣ်တဖၣ်​ ဒီးပှၤလ့ၤဝံဖိတဖၣ်​ မၤအတၢ်မၤ အဃိလီၤ. ၄၅ ဒီးအဝဲသ့ၣ်​ စးထီၣ်မၤဝဲ ကစၢ်ယွၤ အတၢ်မၤ ဒီးမၤဝဲ အမူဒါလၢ ဘၣ်ဃးဒီး တၢ်မၤကဆှီထီၣ်တၢ် ဒ်ပှၤသးဝံၣ်တၢ်ဖိတဖၣ်​ ဒီးပှၤခိးတြဲၤဖိတဖၣ်​ မၤဝဲအသိးလီၤ. အဝဲသ့ၣ်​ မၤဝဲဒ် စီၤဒၤဝံး ဒီးအဖိခွါ စီၤၡလိၤမိၤ အတၢ်ဟံးစုနဲၣ်ကျဲ အိၣ်ဝဲအသိးလီၤ. ၄၆ လၢပျၢၤ လၢစီၤဒၤဝံး ဒီးစီၤအၤစာ် အစိၤန့ၣ်​ ပှၤလၢအတီခိၣ်ရိၤမဲ ပှၤသးဝံၣ်တၢ်ဖိတဖၣ်​ ဒီးပှၤလၢအတီခိၣ်ရိၤမဲ တၢ်သးဝံၣ်​ စံးထီၣ်ပတြၢၤ ဒီးတၢ်စံးဘျုးစံးဖှိၣ်​ အတၢ်သးဝံၣ်​ လၢကစၢ်ယွၤအဂီၢ် အိၣ်ဝဲလီၤ.+ ၄၇ ဒီးဖဲ စီၤစရူဘၤဘ့လး+ ဒီးစီၤနဃ့မယၤအစိၤန့ၣ်​ ပှၤအံၣ်စရ့လးဖိခဲလၢာ် ဟ့ၣ်မၤဘူၣ်လီၤတၢ်လၢ ပှၤသးဝံၣ်တၢ်ဖိတဖၣ်+ ဒီးပှၤခိးတြဲၤဖိတဖၣ်+ ဒ်တၢ်လိၣ်ဘၣ်လၢ တနံၤအဂီၢ် တနံၤအဂီၢ် အိၣ်ဝဲအသိးလီၤ. ဒီးအဝဲသ့ၣ်​ ဟ့ၣ်မၤဘူၣ်လီၤ စ့ၢ်ကီးတၢ်လၢ ပှၤလ့ၤဝံဖိတဖၣ်အဂီၢ်+ ဒီးပှၤလ့ၤဝံဖိတဖၣ်​ ဟ့ၣ်မၤဘူၣ်လီၤတၢ်လၢ စီၤအၤဟရိၣ်​ အစၢၤအသွဲၣ်တဖၣ်​ အဂီၢ်လီၤ.

၁၃ ဖဲတၢ်တနံၤန့ၣ်​ ပှၤဖးန့ၢ် ပှၤဂီၢ်မုၢ်တဖၣ်လၢ စီၤမိၤၡ့အလံာ်+ ဒီးဖဲလံာ်ပူၤန့ၣ်​ တၢ်ကွဲးအသးအိၣ်ဝဲလၢ ပှၤဧၣ်မိၣ်ဖိ မ့ၢ်ဂ့ၤ ပှၤမိၤအးဖိမ့ၢ်ဂ့ၤ+ တဘၣ်နုာ်လီၤလၢ ယွၤလၢအမ့ၢ်အတီတဂၤ အတၢ်အိၣ်ဖှိၣ်အကျါ နီတဘျီဘၣ်,+ ၂ မ့ၢ်လၢ လၢညါန့ၣ်​ အဝဲသ့ၣ်​ တဟ့ၣ်ပှၤအံၣ်စရ့လးဖိတဖၣ်​ လၢကိၣ်ဒီးထံဘၣ်​ ဒီးအဝဲသ့ၣ်​ ငါဝဲ စီၤဘံးလၣ်​ လၢကဆိၣ်အၢ ပှၤအံၣ်စရ့လးဖိတဖၣ်​ အဃိလီၤ.+ အဝဲသ့ၣ်​ မၤဝဲဒ်န့ၣ်​ ဘၣ်ဆၣ်​ ပကစၢ်ယွၤ ဆီတလဲကွံာ်ဝဲ တၢ်ဆိၣ်အၢ လၢတၢ်ဆိၣ်ဂ့ၤလီၤ.+ ၃ ဖဲအဝဲသ့ၣ်​ နၢ်ဟူဝဲ စီၤမိၤၡ့ အတၢ်သိၣ်တၢ်သီအခါ အဝဲသ့ၣ်​ မၤလီၤဖးဝဲ ပှၤအံၣ်စရ့လးဖိတဖၣ်ဒီး ပှၤလၢအကးပြါဒီး ပှၤထံဂၤကီၢ်ဂၤဖိတဖၣ်လီၤ.+

၄ တချုးလၢ တၢ်မၤအသးဒ်အံၤဒံးဘၣ်န့ၣ်​ ပှၤလုၢ်တၢ်ဒိၣ်​ လၢအကွၢ်ထွဲ ယွၤလၢအမ့ၢ်အတီတဂၤ အတၢ်လုၢ်ဟံၣ်+ အတၢ်ပာ်ဖှိၣ်အဒၢးတဖၣ်န့ၣ်* မ့ၢ်ဝဲ စီၤအ့လယၤၡံၣ်လီၤ.+ ဒီးအဝဲ ဒီဘူးဒီတံၢ်ဒီး* စီၤတိၤဘံယၤလီၤ.+ ၅ ဒီးအဝဲပျဲ စီၤတိၤဘံယၤ သူဝဲ တၢ်ပာ်ဖှိၣ်တၢ်အဒၢးဖးဒိၣ်​ တဖျၢၣ်လီၤ. လၢညါ လၢဒၢးအံၤ အပူၤန့ၣ်​ ပှၤပာ်ဃာ်ဝဲ တၢ်လုၢ်ဘု, လီၢ်ဘၣ်, တၢ်ပီးတၢ်လီတဖၣ်, ဘုဆံဆဲၣ်ပူတပူ, စပံးထံအသီ ဒီးသိတဖၣ်လၢ+ ပှၤဟ့ၣ်လီၤဝဲလၢ ပှၤလ့ၤဝံဖိ,+ ပှၤသးဝံၣ်တၢ်ဖိ ဒီးပှၤခိးတြဲၤဖိတဖၣ်အဂီၢ် ဒီးပှၤပာ်ဃာ်စ့ၢ်ကီး တၢ်မၤဘူၣ်လၢ ပှၤလုၢ်တၢ်ဒိၣ်တဖၣ်​ အဂီၢ်ဖဲန့ၣ်လီၤ.+

၆ ဖဲန့ၣ်အဆၢကတီၢ် ယတအိၣ်လၢ ဝ့ၢ်ယရူၤၡလ့ၣ်ဘၣ်, မ့ၢ်လၢယက့ၤလၢ စီၤပၤအၢ်တၤၡါၡတၤ+ လၢအပၢဘၣ်​ ဘၤဘူၤလိၣ်​ အအိၣ်​ ဖဲအဝဲပၢတၢ် ၃၂ နံၣ်တနံၣ်+ အဃိလီၤ. ဒီးလၢခံ ယဃ့စီၤပၤအခွဲးလၢ ယကဟဲက့ၤလၢ ဝ့ၢ်ယရူၤၡလ့ၣ်လီၤ. ၇ ဖဲယဟဲက့ၤတုၤလၢ ဝ့ၢ်ယရူၤၡလ့ၣ်အခါ ယထံၣ်ဘၣ်လၢ စီၤအ့လယၤၡံၣ်+ မၤတၢ်အၢခီဖျိလၢ အပျဲ စီၤတိၤဘံယၤ+ သူဝဲတၢ်ပာ်ဖှိၣ်တၢ်အဒၢးတဖျၢၣ်​ လၢအအိၣ်လၢ ယွၤလၢအမ့ၢ်အတီတဂၤ အဟံၣ်​ အတၢ်ပျီပူၤ အဃိလီၤ. ၈ အဃိ ယသးဒိၣ်ထီၣ်တၢ် ဒိၣ်မး ဒီးယထုးထီၣ်ကွံာ် စီၤတိၤဘံယၤ အတၢ်ဖိတၢ်လံၤ ခဲလၢာ်လၢ အအိၣ်လၢ တၢ်ပာ်ဖှိၣ်တၢ် အဒၢးပူၤလီၤ. ၉ ဝံၤဒီး ယဟ့ၣ်လီၤ တၢ်ကလုၢ်လၢ ပှၤကမၤ ကဆှီထီၣ်​ တၢ်ပာ်ဖှိၣ်တၢ် အဒၢးတဖၣ်လီၤ.* ဝံၤဒီး ယပာ်လီၤကဒါက့ၤ ယွၤလၢအမ့ၢ်အတီတဂၤ အဟံၣ်+ အတၢ်အပီးအလီတဖၣ်​ ဃုာ်ဒီး တၢ်လုၢ်ဘု ဒီးလီၢ်ဘၣ်​ ဖဲန့ၣ်လီၤ.+

၁၀ ဒီးယသ့ၣ်ညါဘၣ်လၢ ပှၤတဟ့ၣ်မၤဘူၣ်လီၤတၢ်လၢ+ ပှၤလ့ၤဝံဖိတဖၣ်​ အဂီၢ်လၢၤဘၣ်.+ အဃိ ပှၤလ့ၤဝံဖိတဖၣ်​ ဒီးပှၤသးဝံၣ်တၢ်ဖိတဖၣ်လၢ အမၤတၢ်လၢ တၢ်လုၢ်ဟံၣ်န့ၣ်​ ဘၣ်ဟးထီၣ်ဝဲ ဒီးက့ၤကဒါက့ၤလၢ အနီၢ်ကစၢ် အတၢ်လီၢ်တၢ်ကျဲလီၤ.+ ၁၁ အဃိ ယသိၣ်ဃီၣ်​ ပဒိၣ်တဖၣ်+ ဒီးယတဲလၢ “ဘၣ်မနုၤအဃိ သုကွၢ်ကပာ်ကွံာ် ယွၤလၢအမ့ၢ်အတီတဂၤ အဟံၣ်လဲၣ်.”+ ဒီးယကိးဖှိၣ်​ ပှၤလ့ၤဝံဖိတဖၣ်​ ဒီးယဟ့ၣ်လီၤကဒါက့ၤ အဝဲသ့ၣ်​ အမူဒါတဖၣ်လီၤ. ၁၂ ဒီးပှၤယူဒၤဖိခဲလၢာ် ဟဲစိာ်ဝဲ တၢ်ဆံဆဲၣ်ပူတပူ+ လၢအမ့ၢ် ဘု, စပံးထံအသီ ဒီးသိ လၢတၢ်ပာ်ဖှိၣ်တၢ်အဒၢးတဖၣ်​ အဂီၢ်လီၤ.+ ၁၃ ဒီးယပာ်ထီၣ်​ ပှၤလုၢ်တၢ်ဒိၣ်​ စီၤၡလ့မယၤ, ပှၤကွဲးကူ ယွၤအကလုၢ်ကထါ* စီၤစၤဒိး ဒီးစီၤပဒါယၤ လၢအမ့ၢ် ပှၤလ့ၤဝံဖိ လၢကကွၢ်ထွဲဝဲ တၢ်ပာ်ဖှိၣ်တၢ် အဒၢးတဖၣ်လီၤ. ဒီးယပာ်ထီၣ်​ စီၤဃၤနၣ်​ လၢအဝဲသ့ၣ်​ အပှၤမၤစၢၤတၢ်လီၤ. ပှၤပိာ်ခွါတဖၣ်အံၤန့ၣ်​ မ့ၢ်ပှၤလၢ ပှၤနာ်န့ၢ်အီၤသ့လီၤ. အဝဲသ့ၣ်​ အမူဒါအိၣ်ဝဲလၢ ကဟ့ၣ်နီၤလီၤတၢ်လၢ အဘူးအတံၢ်တဖၣ်​ အအိၣ်လီၤ. စီၤဃၤနၣ်န့ၣ်​ မ့ၢ်ဝဲ စီၤစးကူၢ် အဖိခွါ ဒီးစီၤစးကူၢ်မ့ၢ်ဝဲ စီၤမးတၤနယၤ အဖိခွါလီၤ.

၁၄ အိ ကစၢ်ယွၤဧၢ, သ့ၣ်နီၣ်ထီၣ်က့ၤယၤလၢ+ တၢ်လၢယမၤတ့ၢ်တဖၣ်န့ၣ်​ အဃိတက့ၢ်. ဒီးတၢ်လၢ ယမၤလၢနဟံၣ်​ ဒီးလၢ နဟံၣ်တၢ်မၤအဂီၢ် ခီဖျိလၢ ယတၢ်အဲၣ်လၢအတီ အဃိန့ၣ်​ တဘၣ်သးပ့ၤနီၣ်ကွံာ်တဂ့ၤ.+

၁၅ ဖဲန့ၣ်အဆၢကတီၢ် ယထံၣ်ဘၣ်လၢ ပှၤလၢအအိၣ်လၢ ယူဒၤ အဟီၣ်ကဝီၤအပူၤန့ၣ်​ ယီၢ်ဝဲစပံးသၣ်​ လၢမုၢ်အိၣ်ဘှံးနံၤလီၤ.+ ဒီးအဝဲသ့ၣ်​ ပူၣ်ထီၣ်ဝဲ ဘုတဖၣ်​ ဒီးတီၣ်ထီၣ်ဝဲလၢ ကသ့ၣ်ယီၤအလိၤ ဒီးအဝဲသ့ၣ်​ ဟဲက့ၤတီၣ်ဝဲ စပံးထံ, စပံးသၣ်, ချၢၣ်ဒၢသၣ်​ ဒီးတၢ်အကလုာ်ကလုာ်လၢ ဝ့ၢ်ယရူၤၡလ့ၣ်အပူၤ ဖဲမုၢ်အိၣ်ဘှံးနံၤလီၤ.+ အဃိ ယဟ့ၣ်ပလီၢ်အဝဲသ့ၣ်​ ဒ်သိးအဝဲသ့ၣ်​ သုတဆါ တၢ်အီၣ်လၢ မုၢ်အိၣ်ဘှံးနံၤ တဂ့ၤအဂီၢ်လီၤ. ၁၆ ဒီးပှၤစိၢ်ဖိလၢ အအိၣ်ဝဲဆိးဝဲလၢ ဝ့ၢ်ပူၤန့ၣ်​ ဟဲစိာ်ညၣ်​ ဒီးတၢ်ဖိတၢ်လံၤ အကလုာ်ကလုာ် ဒီးအဝဲသ့ၣ်​ ဆါန့ၢ်ဝဲ ပှၤယူဒၤဖိတဖၣ်လၢ အအိၣ်လၢ ဝ့ၢ်ယရူၤၡလ့ၣ်အပူၤ ဖဲမုၢ်အိၣ်ဘှံးနံၤလီၤ.+ ၁၇ အဃိ ယသိၣ်ဃီၣ်​ ယူဒၤ အပှၤဒိၣ်ပှၤပှၢ်တဖၣ်​ ဒီးယတဲအဝဲသ့ၣ်လၢ “ဘၣ်မနုၤအဃိ သုမၤတၢ်အၢတၢ်သီ ဒ်အံၤလဲၣ်, ဘၣ်မနုၤအဃိ သုမၤကမၣ်​ မုၢ်အိၣ်ဘှံးနံၤ အတၢ်သိၣ်တၢ်သီလဲၣ်. ၁၈ မ့ၢ်လၢ သုမိၢ်ပၢ်ဖံဖု လၢပျၢၤတဖၣ်​ မၤဝဲဒ်အံၤအဃိ ပကစၢ်ယွၤ ဒုးလီၤဘၣ်​ တၢ်ကီတၢ်ခဲ လၢပဝဲ ဒီးဝ့ၢ်တဖျၢၣ်အံၤအလိၤ တမ့ၢ်ဧီၤ. မ့ၢ်လၢ သုမၤကမၣ်​ မုၢ်အိၣ်ဘှံးနံၤ အတၢ်သိၣ်တၢ်သီ အဃိ သုထိၣ်ဟူးထိၣ်ဂဲၤထီၣ်​ ကစၢ်ယွၤ ဒ်သိး အကသးဒိၣ်ထီၣ်​ ပှၤအံၣ်စရ့လးဖိတဖၣ်​ အါန့ၢ် အလီၢ်လီၤ.”+

၁၉ ယဟ့ၣ်လီၤတၢ်ကလုၢ်လၢ ပှၤကကးတံာ် ဝ့ၢ်ယရူၤၡလ့ၣ်​ အတြဲၤတဖၣ်​ ဖဲတၢ်ခံးလီၤသီသီ တချုးဖဲ မုၢ်အိၣ်ဘှံးနံၤ စးထီၣ်ဒံးဘၣ်န့ၣ်လီၤ. ဒီးယတဲ အဝဲသ့ၣ်လၢ တချုးလၢ မုၢ်အိၣ်ဘှံးနံၤ ပူၤကွံာ်ဒံးဘၣ်န့ၣ်​ ပှၤတဘၣ်​ အိးထီၣ်​ တြဲၤတဖၣ်ဘၣ်. ဒီးယမၢ ယခ့ယပှၤတနီၤ ခိးဝဲတြဲၤတဖၣ်​ ဒ်သိးပှၤသုတဆှၢနုာ် တၢ်တမံၤဂ့ၤတမံၤဂ့ၤ လၢဝ့ၢ်ပူၤ ဖဲမုၢ်အိၣ်ဘှံးနံၤ တဂ့ၤအဂီၢ်လီၤ. ၂၀ ပှၤပနံာ်တၢ်ကၤတၢ်ဖိ ဒီးပှၤဆါတၢ်ဖိ လၢအဆါ တၢ်ဖိတၢ်လံၤ အကလုာ်ကလုာ်တဖၣ်န့ၣ်​ မံလၢ ဝ့ၢ်ယရူၤၡလ့ၣ်​ အမဲာ်ညါလၢမုၢ်နၤခီ တဘျီခံဘျီလီၤ. ၂၁ ဒီးယဟ့ၣ်ပလီၢ် အဝဲသ့ၣ်လၢ “ဘၣ်မနုၤအဃိ သုမံလၢ ဝ့ၢ်ဒူၣ်​ အမဲာ်ညါလဲၣ်. သုမ့ၢ်မၤကဒီးဒ်အံၤန့ၣ်​ ယကဖီၣ်သုလီၤ.” စးထီၣ်ဖဲန့ၣ်န့ၣ်​ အဝဲသ့ၣ်​ တဟဲလၢ မုၢ်အိၣ်ဘှံးနံၤ နီတဘျီလၢၤဘၣ်.

၂၂ ဒီးယတဲ ပှၤလ့ၤဝံဖိတဖၣ်လၢ အဝဲသ့ၣ်ကဘၣ်​ မၤကဆှီအသးထီဘိ ဒီးကဘၣ်ဟဲအိၣ်ခိးဝဲ တြဲၤတဖၣ်​ ဒ်သိး မုၢ်အိၣ်ဘှံးနံၤ ကဘၣ်တၢ်ပာ်စီဆှံအီၤ အဂီၢ်လီၤ.+ အိ ယကစၢ်ယွၤဧၢ, သ့ၣ်နီၣ်ထီၣ်ယၤလၢ တၢ်ဂ့ၢ်တခါအံၤအဃိ ဒီးပာ်ဖျါထီၣ်​ တၢ်သးကညီၤလၢ ယဖီခိၣ်​ ဒ်နတၢ်အဲၣ်လၢအတီ အိၣ်ဝဲအါအါဂီၢ်ဂီၢ် အသိးတက့ၢ်.+

၂၃ ဖဲမုၢ်နံၤတဖၣ်န့ၣ်​ အတီၢ်ပူၤ ယထံၣ်ဘၣ်​ ပှၤယူဒၤဖိတဖၣ်လၢ အဆီဟံၣ်ဆီဃီဒီး+ ပှၤအၤစဒိာ်မုၣ်,+ ပှၤဧၣ်မိၣ်မုၣ်​ ဒီးပှၤမိၤအးမုၣ်တဖၣ်လီၤ.+ ၂၄ ဒီးအဝဲသ့ၣ်​ အဖိတဖၣ်န့ၣ်​ တဲဝဲ ပှၤယူဒၤဖိအကျိာ် တဘၣ်နီတဂၤဘၣ်. အဝဲသ့ၣ်​ အဖိတဝာ်န့ၣ်​ တဲဝဲ အၤစဒိာ်အကျိာ် ဒီးအဂၤတဝာ်န့ၣ်​ တဲဝဲ ကျိာ်အဂၤတဖၣ်လီၤ. ၂၅ အဃိ ယသိၣ်ဃီၣ်​ အဝဲသ့ၣ်​ ဒီးယဟ့ၣ်ပလီၢ် အဝဲသ့ၣ်​ ဘၣ်ဃးဒီး ကစၢ်ယွၤ အတၢ်စံၣ်ညီၣ်တဖၣ်လီၤ.* ဒီးပှၤပိာ်ခွါတနီၤန့ၣ်​ ယတီၢ်အဝဲသ့ၣ်+ ဒီးထဲးထီၣ်ကွံာ် အဝဲသ့ၣ်​ အခိၣ်ဆူၣ်​ ဒီးယမၢအဝဲသ့ၣ်​ မၤတၢ်အၢၣ်လီၤလၢ ကစၢ်ယွၤ အမဲာ်ညါ ဒီးယတဲအဝဲသ့ၣ်လၢ “သုတဘၣ်ဟ့ၣ်လီၤ သုဖိမုၣ်တဖၣ်လၢ အဝဲသ့ၣ်​ အဖိခွါတဖၣ်ဘၣ်. ဒီးသုတဘၣ်​ ဟံးန့ၢ်အဝဲသ့ၣ်​ အဖိမုၣ်တဖၣ်လၢ သုဖိခွါတဖၣ်အဂီၢ်မ့ၢ်ဂ့ၤ သုနီၢ်ကစၢ်အဂီၢ်မ့ၢ်ဂ့ၤန့ၣ်ဘၣ်.+ ၂၆ အံၣ်စရ့လး အစီၤပၤ ၡလိၤမိၤ မၤဘၣ်တၢ်ဒဲးဘး လၢတၢ်ဂ့ၢ်အံၤအဃိ တမ့ၢ်ဧီၤ. လၢပှၤကလုာ်ခဲလၢာ် အကျါန့ၣ်​ စီၤပၤလၢ အလီၤဂာ်ဒ်သိးဒီးအီၤ တအိၣ်နီတဂၤဘၣ်.+ အကစၢ်ယွၤ အဲၣ်အီၤအဃိ+ ဒုးကဲအီၤလၢ ပှၤအံၣ်စရ့လးဖိခဲလၢာ် အစီၤပၤလီၤ. ဘၣ်ဆၣ်​ အဝဲမၤဘၣ်တၢ်ဒဲးဘး ခီဖျိလၢ အမါလၢအမ့ၢ် ကလုာ်ဂၤတဖၣ်အဃိလီၤ.+ ၂၇ သုမၤတၢ်ဒဲးဘးဖးဒိၣ်​ ခီဖျိ သုဆီဟံၣ်ဆီဃီဒီး ပိာ်မုၣ်လၢအမ့ၢ် ကလုာ်ဂၤ ဒီးသုမၤတၢ်လၢ အတအိၣ်ဒီးတၢ်သးတီ လၢကစၢ်ယွၤ အဖီခိၣ်န့ၣ်​ တလီၤနာ် နီတစဲးဘၣ်.”+

၂၈ ပှၤလုၢ်တၢ်ခိၣ်​ အဒိၣ်ကတၢၢ် စီၤအ့လယၤၡံၣ်+ အဖိခွါ စီၤယိယဒၤ+ အဖိခွါတဂၤန့ၣ်​ ကဲထီၣ်ဝဲ ပှၤဘ့ၤသဃိရိၣ်ဖိ စီၤစၤနဘၤလး+ အမာ်လီၤ. အဃိ ယနီဟးထီၣ်ကွံာ်အီၤ လၢယအိၣ်လီၤ.

၂၉ အိ ယကစၢ်ယွၤဧၢ, မ့ၢ်လၢ အဝဲသ့ၣ်​ မၤဘၣ်အၢ ပှၤလုၢ်တၢ်ဒိၣ်​ အလီၢ်အလၤ ဒီးတၢ်အၢၣ်လီၤအီလီၤလၢ ဘၣ်ဃးဒီး ပှၤလုၢ်တၢ်ဒိၣ်+ ဒီးပှၤလ့ၤဝံဖိတဖၣ်+ အဃိ သ့ၣ်နီၣ်ထီၣ်​ ဒီးစံၣ်ညီၣ်​ အဝဲသ့ၣ်တက့ၢ်.

၃၀ ယမၤကဆှီထီၣ်​ ပှၤဂီၢ်မုၢ်လၢ တၢ်လၢအလီၤသးဘၣ်အၢ ကိးမံၤဒဲးလၢ အဝဲသ့ၣ်​ မၤဝဲခီဖျိလၢ ပှၤကလုာ်အဂၤတဖၣ်​ အဃိလီၤ. ဒီးယဟ့ၣ်လီၤ ပှၤလုၢ်တၢ်ဒိၣ်တဖၣ်​ အမူဒါ ဒီးပှၤလ့ၤဝံဖိတဖၣ်​ အမူဒါ ဒ်တၢ်လၢ အဝဲသ့ၣ်တဂၤစုာ်စုာ် ဘၣ်မၤဝဲအသိးလီၤ.+ ၃၁ ဒီးယရဲၣ်လီၤကျဲၤလီၤတၢ် ဒ်သိး ပှၤကဟဲစိာ် သ့ၣ်မုၣ်တဖၣ်+ ဒ်တၢ်ဆၢကတီၢ်လၢ တၢ်ပာ်ပနီၣ်အီၤအသိး ဒီးဒ်သိး ပှၤကဟဲစိာ် တၤသၣ်ဆိတဖၣ်​ အဂီၢ်လီၤ.

အိ ယကစၢ်ယွၤဧၢ, သ့ၣ်နီၣ်ထီၣ်က့ၤယၤ ဒီးဆိၣ်ဂ့ၤယၤတက့ၢ်.+