ယိၤဘး

၁ စီၤယိၤဘးမ့ၢ်+ ပှၤတဂၤလၢ အအိၣ်လၢ ကီၢ်ဧူစး အပူၤလီၤ. အဝဲမ့ၢ် ပှၤတီပှၤလိၤ လၢအအိၣ်ဒီး တၢ်သးတီလီၤ.+ ဒီးအမ့ၢ် ပှၤတဂၤလၢ အပျံၤယွၤ ဒီးဟးဆှဲး တၢ်အၢလီၤ.+ ၂ အဝဲအိၣ်ဒီး အဖိခွါနွံဂၤ ဒီးအဖိမုၣ် သၢဂၤလီၤ. ၃ အဝဲအိၣ်ဒီး သိအဒု ၇,၀၀၀, ကီၤလၤအူးအဒု ၃,၀၀၀, ကျီၢ်အဒု ၁,၀၀၀, ကသ့ၣ်ယီၤ အဒု ၅၀၀ ဒီးအခ့အပှၤ အိၣ်ဒီဒူၣ်လီၤ. အဃိ လၢပှၤမုၢ်ထီၣ်ဖိတဖၣ် အကျါန့ၣ် အဝဲမ့ၢ်ပှၤလၢ အဒိၣ်ကတၢၢ်လီၤ.

၄ ဒီးအဖိခွါတဂၤစုာ်စုာ် မၤဝဲတၢ်အီၣ်အမူးလၢ အနီၢ်ကစၢ်အဟံၣ်ပူၤ ဒ်တၢ်ပာ်ပနီၣ်ဃာ် မုၢ်နံၤအိၣ်ဝဲအသိး ဒီးအဝဲသ့ၣ် ကွဲမုာ်ဝဲ အဒီပုၢ်ဝဲၢ်မုၣ်သၢဂၤ ဒ်သိး အကဟဲ အီၣ်သကိးအီသကိးတၢ်ဒီး အဝဲသ့ၣ် အဂီၢ်လီၤ. ၅ ဖဲတၢ်အီၣ်အမူး အမုၢ်နံၤတဖၣ် ဝံၤအလီၢ်ခံ စီၤယိၤဘး မၢအဖိတဖၣ် ဟဲဒ်သိး ကမၤကဆှီထီၣ်က့ၤ အဝဲသ့ၣ် အဂီၢ်လီၤ. ဒီးစီၤယိၤဘးန့ၣ် ဂဲၤဆၢထၢၣ်ဂီၤဂီၤ ဒီးလုၢ်ထီၣ် တၢ်လုၢ်ဒွဲၣ်အူလၢ+ အဝဲသ့ၣ် တဂၤစုာ်စုာ်အဂီၢ်, မ့ၢ်လၢ စီၤယိၤဘး ဆိကမိၣ်ဝဲလၢ “ဘၣ်သ့ၣ်သ့ၣ် ယဖိတဖၣ် ကမၤဘၣ်ဖုး တၢ်ဒဲးဘး ဒီးကဆိၣ်အၢ ကစၢ်ယွၤ လၢအဝဲသ့ၣ် အသးပူၤလီၤ.” ဒီးစီၤယိၤဘး မၤဝဲဒ်န့ၣ် ထီဘိလီၤ.+

၆ ဖဲမုၢ်နံၤဘၣ်လၢ ကစၢ်ယွၤ လၢအမ့ၢ်အတီ အဖိခွါတဖၣ်*+ ဟဲပာ်ဖျါထီၣ်အသးလၢ ယဟိဝၤယွၤ+ အမဲာ်ညါအခါ မုၣ်ကီၤလံၢ်*+ စ့ၢ်ကီး ဟဲနုာ်လီၤလၢ အဝဲသ့ၣ်အကျါလီၤ.+

၇ ဒီးယဟိဝၤယွၤ တဲဘၣ် မုၣ်ကီၤလံၢ်လၢ “နဟဲဖဲလဲၣ်.” မုၣ်ကီၤလံၢ် တဲဆၢက့ၤ ယဟိဝၤယွၤလၢ “ယဟးဝ့ၤဝီၤ လၢဟီၣ်ခိၣ်ချၢ ဒီးလဲၤတၢ်က့ၤတၢ် လၢအပူၤလီၤ.”+ ၈ ဒီးယဟိဝၤယွၤ တဲမုၣ်ကီၤလံၢ်လၢ “မ့ၢ်နပာ်သူၣ်ပာ်သးဘၣ် ယခ့ယပှၤ စီၤယိၤဘးဧါ. လၢဟီၣ်ခိၣ်ချၢန့ၣ် ပှၤလီၤဂာ်ဒ်သိးဒီးအီၤ တအိၣ်နီတဂၤဘၣ်. အဝဲမ့ၢ် ပှၤတီပှၤလိၤ လၢအအိၣ်ဒီး တၢ်သးတီ,*+ အပျံၤကစၢ်ယွၤ ဒီးဟးဆှဲး တၢ်အၢလီၤ.” ၉ မုၣ်ကီၤလံၢ် တဲဆၢက့ၤ ယဟိဝၤယွၤလၢ “စီၤယိၤဘး မ့ၢ်တန့ၢ်ဘၣ် အဘျုးနီတမံၤဘၣ်န့ၣ် မ့ၢ်အကပျံၤ ကစၢ်ယွၤဒံးဧါ.+ ၁၀ နဆီလီၤတၢ်ဒူၣ် ဝးတရံးလၢ ကဒီသဒၢအီၤ+ ဒီးအဟံၣ်ဖိဃီဖိ* ဒီးတၢ်လၢအအိၣ်ဒီးအီၤခဲလၢာ် တမ့ၢ်ဧီၤ. နဆိၣ်ဂ့ၤ အတၢ်မၤခဲလၢာ်+ ဒီးအဆၣ်ဖိကီၢ်ဖိတဖၣ် အါထီၣ်ဂီၢ်ထီၣ်ဝဲ လၢကီၢ်ပူၤလီၤ. ၁၁ ဘၣ်ဆၣ် ယူာ်ဃီၤနစု ဒီးဟံးထီၣ်ကွံာ် တၢ်လၢအအိၣ်ဒီးအီၤ ခဲလၢာ် ဒီးအဝဲ ကဆိၣ်အၢနၤလၢ နမဲာ်ညါ တီတီလီၤ.” ၁၂ ဒီးယဟိဝၤယွၤ တဲမုၣ်ကီၤလံၢ်လၢ “တၢ်လၢအအိၣ်ဒီးအီၤ ခဲလၢာ်န့ၣ် အိၣ်လၢ နစုပူၤလီၤ. ဘၣ်ဆၣ် မ့မ့ၢ် အနီၢ်ကစၢ်န့ၣ် တဘၣ်မၤဆါအီၤတဂ့ၤ.” ဒီးမုၣ်ကီၤလံၢ် ဟးထီၣ်ဝဲလၢ ယဟိဝၤယွၤ အမဲာ်ညါလီၤ.+

၁၃ ဘၣ်တနံၤ စီၤယိၤဘး အဖိမုၣ်အဖိခွါတဖၣ် အီၣ်တၢ် ဒီးအီစပံးထံလၢ အဝဲသ့ၣ် အကၠီအဒိၣ်ကတၢၢ် အဟံၣ်လီၤ.+ ၁၄ ဖဲန့ၣ်အခါ ပှၤစိာ်တၢ်ကစီၣ်ဖိတဂၤ ဟဲလၢစီၤယိၤဘးအအိၣ် ဒီးတဲအီၤလၢ “ဖဲကျီၢ်တဖၣ် ထဲၣ်တၢ် ဒီးကသ့ၣ်ယီၤတဖၣ် အီၣ်အဆၣ် လၢကျီၢ်တဖၣ်အဃၢၤအခါ ၁၅ ပှၤစဘၤဖိတဖၣ် ဟဲဒုးပှၤ ဒီးဟံးန့ၢ် ဆၣ်ဖိကီၢ်ဖိတဖၣ်လီၤ. ဒီးအဝဲသ့ၣ် မၤသံ နခ့နပှၤတဖၣ် လၢနး ဒီးယပူၤဖျဲးထဲတဂၤ ဒီးယဟဲတဲဘၣ်နၤ တၢ်ဂ့ၢ်အံၤလီၤ.”

၁၆ ဖဲအဝဲ တဲတၢ်ဒံးအခါ ပှၤအဂၤတဂၤ ဟဲဝဲဒီး တဲဝဲလၢ “ကစၢ်ယွၤ အမ့ၣ်အူလၢမူခိၣ် ဟဲလီၤအီၣ်တၢ်လၢ နသိဒီးနခ့နပှၤတဖၣ်အကျါ ဒီးအီၣ်ကွံာ် အဝဲသ့ၣ်လီၤ. ယပူၤဖျဲးထဲတဂၤ ဒီးယဟဲတဲဘၣ်နၤ တၢ်ဂ့ၢ်အံၤလီၤ.”

၁၇ ဖဲအဝဲ တဲတၢ်ဒံးအခါ ပှၤအဂၤတဂၤ ဟဲဝဲဒီး တဲဝဲလၢ “ပှၤက့ၤစ့းဖိ+ သၢဖု ဟဲတမျာ်ဝဲ နကီၤလၤအူးတဖၣ် ဒီးက့ၤကိးဝဲလံ ဒီးအဝဲသ့ၣ် မၤသံ နခ့နပှၤတဖၣ် လၢနး ဒီးယပူၤဖျဲးထဲတဂၤ ဒီးယဟဲတဲဘၣ်နၤ တၢ်ဂ့ၢ်အံၤလီၤ.”

၁၈ ဖဲအဝဲ တဲတၢ်ဒံးအခါ ပှၤအဂၤတဂၤ ဟဲဝဲဒီး တဲဝဲလၢ “ဖဲနဖိမုၣ်ဖိခွါတဖၣ် အီၣ်တၢ် ဒီးအီစပံးထံလၢ အဝဲသ့ၣ် အကၠီအဒိၣ်ကတၢၢ် အဟံၣ်အခါ ၁၉ ကလံၤမုၢ်ဖးဒိၣ် လၢပှၢ်မုၢ်ကနၢန့ၣ် ဟဲအူထီၣ်ဝဲ သတူၢ်ကလာ် ဒီးမၤဟးဂီၤကွံာ် ဟံၣ်ဒီးဟံၣ်လီၤပှီၢ်ဒိးဝဲ နဖိတဖၣ် ဒီးအဝဲသ့ၣ် သံဝဲလီၤ. ယပူၤဖျဲးထဲတဂၤ ဒီးယဟဲတဲဘၣ်နၤ တၢ်ဂ့ၢ်အံၤလီၤ.”

၂၀ ဖဲန့ၣ်န့ၣ် စီၤယိၤဘး ဆၢထၢၣ်ဖှီညာ် အဆ့ကၤ ဒီးတံာ်ကွံာ် အခိၣ်ဆူၣ် ခဲလၢာ်လီၤ. ဒီးအဝဲ ထိၣ်လီၤပှီၤအသး ဒီးကျးလီၤအမဲာ် လၢဟီၣ်ခိၣ်လိၤလီၤ. ၂၁ ဒီးအဝဲတဲဝဲလၢ

“ယဟဲထီၣ်ဘ့ၣ်ဆ့ လၢယမိၢ် အဒၢလီၢ်ပူၤ

ဒီးယကက့ၤကဒါက့ၤ ဘ့ၣ်ဆ့လီၤ.+

ယဟိဝၤယွၤ ဟ့ၣ်တၢ်+ ဒီးယဟိဝၤယွၤ ထုးထီၣ်ကွံာ်ဝဲလီၤ.

မ်ယဟိဝၤယွၤအမံၤ ဘၣ်တၢ်စံးထီၣ်ပတြၢၤအီၤ ထီဘိတက့ၢ်.”

၂၂ တၢ်မၤအသးဒ်အံၤ ဘၣ်ဆၣ် စီၤယိၤဘး တမၤတၢ်ဒဲးဘးဘၣ် ဒီးတပာ်ဒ့ၣ်ပာ်ကမၣ် ကစၢ်ယွၤ နီတမံၤဘၣ်.

၂ လၢခံ ဖဲမုၢ်နံၤလၢ ကစၢ်ယွၤ လၢအမ့ၢ်အတီ အဖိခွါတဖၣ်*+ ဟဲပာ်ဖျါထီၣ်အသးလၢ ယဟိဝၤယွၤ အမဲာ်ညါအခါ+ မုၣ်ကီၤလံၢ်* စ့ၢ်ကီး ဟဲနုာ်လီၤလၢ အဝဲသ့ၣ်အကျါ ဒ်သိးကပာ်ဖျါထီၣ်အသးလၢ ယဟိဝၤယွၤ အမဲာ်ညါလီၤ.+

၂ ဒီးယဟိဝၤယွၤ တဲဘၣ် မုၣ်ကီၤလံၢ်လၢ “နဟဲဖဲလဲၣ်.” မုၣ်ကီၤလံၢ် တဲဆၢက့ၤ ယဟိဝၤယွၤလၢ “ယဟးဝ့ၤဝီၤ လၢဟီၣ်ခိၣ်ချၢ ဒီးလဲၤတၢ်က့ၤတၢ် လၢအပူၤလီၤ.”+ ၃ ဒီးယဟိဝၤယွၤ တဲမုၣ်ကီၤလံၢ်လၢ “မ့ၢ်နပာ်သူၣ်ပာ်သးဘၣ် ယခ့ယပှၤ စီၤယိၤဘးဧါ. လၢဟီၣ်ခိၣ်ချၢန့ၣ် ပှၤလီၤဂာ်ဒ်သိးဒီးအီၤ တအိၣ်နီတဂၤဘၣ်. အဝဲမ့ၢ် ပှၤတီပှၤလိၤ လၢအအိၣ်ဒီး တၢ်သးတီ,*+ အပျံၤကစၢ်ယွၤ ဒီးဟးဆှဲး တၢ်အၢလီၤ. နအဲၣ်ဒိးလၢ ယကမၤဟးဂီၤအီၤ+ ခီလီလီ သနာ်က့ အဝဲပၢၤဃာ်ဒံး အတၢ်သးတီ ဂၢၢ်ဂၢၢ်ကျၢၤကျၢၤလီၤ.”+ ၄ ဘၣ်ဆၣ် မုၣ်ကီၤလံၢ် တဲဆၢက့ၤ ယဟိဝၤယွၤလၢ “ပှၤကိးဂၤဒဲး ဆိကမိၣ်တၢ်လၢ အနီၢ်ကစၢ် အဂီၢ်လီၤ.* ပှၤကညီတဂၤ ကဟ့ၣ်လီၤကွံာ် တၢ်ခဲလၢာ်လၢ အအိၣ်ဒီးအီၤ ဒ်သိး အသးသမူ သုတလီၤမၢ်တဂ့ၤ အဂီၢ်လီၤ. ၅ အဃိ ယူာ်ဃီၤနစု ဒီးမၤဆါ အဃံဒီးအညၣ်န့ၣ်, အဝဲ ကဆိၣ်အၢနၤလၢ နမဲာ်ညါ တီတီလီၤ.”+

၆ ဒီးယဟိဝၤယွၤတဲ မုၣ်ကီၤလံၢ်လၢ “အဝဲအိၣ်လၢ နစုပူၤလီၤ. ဘၣ်ဆၣ် တဘၣ်မၤသံအီၤတဂ့ၤ.” ၇ ဒီးမုၣ်ကီၤလံၢ် ဟးထီၣ်လၢ ယဟိဝၤယွၤ အမဲာ်ညါ ဒီးမၤနးမၤဖှီၣ် စီၤယိၤဘးလၢ တၢ်ဝ့လၢအဆါနးမး+ စးထီၣ်လၢအခိၣ် တုၤလီၤလၢ အခီၣ်လီၤ. ၈ ဒီးစီၤယိၤဘး ဟံးန့ၢ် သပၢၤက့ ဒ်သိး ကဝာ်လီၤအလိၤ အဂီၢ် ဒီးအဝဲ ဆ့ၣ်နီၤဝဲလၢ ဖၣ်ဆါကျါလီၤ.+

၉ လၢခံကတၢၢ်န့ၣ် အမါတဲအီၤလၢ “နပၢၤဃာ်ဒံး နတၢ်သးတီ ဂၢၢ်ဂၢၢ်ကျၢၤကျၢၤဒံးဧီၤ. ဆိၣ်အၢ ကစၢ်ယွၤဒီး သံသၢၤ.” ၁၀ ဘၣ်ဆၣ် စီၤယိၤဘးတဲအီၤလၢ “နတဲတၢ်ဒ် ပိာ်မုၣ်ဟးဂီၤတဂၤ အသိးလီၤ. မ့ၢ်ပကြၢးတူၢ်လိာ်ထဲဒၣ် တၢ်အဂ့ၤတဖၣ်လၢ ကစၢ်ယွၤ အအိၣ်လီၤဧါ. မ့မ့ၢ်တၢ်လၢ အတဂ့ၤဘၣ်တဖၣ် တခီမီၤ ပတကြၢး တူၢ်လိာ်အီၤဧီၤ.”+ စီၤယိၤဘး လဲၤခီဖျိ တၢ်သ့ၣ်တဖၣ်အံၤခဲလၢာ် သနာ်က့ အတမၤဘၣ် တၢ်ဒဲးဘးလၢ အထးခိၣ်ဘၣ်.+

၁၁ ဖဲစီၤယိၤဘး အသကိးသၢဂၤ နၢ်ဟူဝဲ တၢ်နးတၢ်ဖှီၣ်လၢ စီၤယိၤဘး တူၢ်ဘၣ်ဝဲအခါ အဝဲသ့ၣ် တဂၤစုာ်စုာ် ဟးထီၣ်လၢ အနီၢ်ကစၢ်တၢ်လီၢ် ဒီးဟဲလၢ စီၤယိၤဘးအအိၣ်လီၤ. အဝဲသ့ၣ်န့ၣ် မ့ၢ်ဝဲ ပှၤတ့မၣ်ဖိ စီၤအလံဖးစး,+ ပှၤၡူဧၤဖိ+ စီၤဘံးလဒး+ ဒီးပှၤနၤမးဖိ စီၤစိဖၢ်လီၤ.+ ဒီးဒ်အဝဲသ့ၣ် ဆၢတဲာ်ဝဲအသိး အဝဲသ့ၣ် ပာ်ဖှိၣ်ထီၣ်အသး ဒီးလဲၤသကိးလၢ စီၤယိၤဘးအအိၣ် ဒ်သိး ကပာ်ဖျါထီၣ် တၢ်သးကညီၤ ဒီးကမၤမုာ်ထီၣ်အီၤ အဂီၢ်လီၤ. ၁၂ ဖဲအဝဲသ့ၣ်ထံၣ်စိ စီၤယိၤဘး လၢအယံၤအခါ အဝဲသ့ၣ် ကွၢ်နီၣ်အီၤ တဘၣ်ဘၣ်. အဝဲသ့ၣ် ဟီၣ်ဝဲဖးဒိၣ် ဒီးအဝဲသ့ၣ် ဖှီညာ်အဆ့ကၤ ဒီးဖှံထီၣ်ဝဲ ဟီၣ်ခိၣ်ကမူၣ်လၢ ကလံၤကျါ ဒီးလၢအဝဲသ့ၣ် အခိၣ်လိၤလီၤ.+ ၁၃ ဒီးအဝဲသ့ၣ် ဆ့ၣ်နီၤဒီးအီၤလၢ ဟီၣ်ခိၣ်လိၤ နွံနံၤ ဒီးနွံနၤလီၤ. မ့ၢ်လၢ အဝဲသ့ၣ်ထံၣ်ဘၣ်ဝဲလၢ စီၤယိၤဘး တူၢ်ဘၣ်တၢ် နးဒိၣ်မးအဃိ အဝဲသ့ၣ် တတဲတၢ်ဒီးအီၤ နီတထံၣ်ဘၣ်.+

၃ တၢ်မၤအသးတဖၣ်န့ၣ် ဝံၤအလီၢ်ခံ စီၤယိၤဘး စးထီၣ်တဲတၢ်ဒီး ဆိၣ်အၢဝဲ မုၢ်နံၤလၢ အအိၣ်ဖျဲၣ်ထီၣ်ဝဲလီၤ.+ ၂ စီၤယိၤဘး တဲဝဲလၢ

၃ “မုၢ်နံၤလၢ ယဟဲအိၣ်ဖျဲၣ်ထီၣ်န့ၣ် မ်အဟးဂီၤကွံာ်တက့ၢ်.+

ဒီးမုၢ်နၤလၢ ပှၤတဂၤဂၤတဲဝဲလၢ ‘ပှၤဒၢထီၣ် ဖိသၣ်ပိာ်ခွါတဂၤလံ’ န့ၣ် မ်အဟးဂီၤကွံာ်တက့ၢ်.

၄ မ်မုၢ်နံၤ အဝဲန့ၣ် ခံးလီၤကွံာ်တက့ၢ်.

မ်ကစၢ်ယွၤ သးပ့ၤနီၣ်ကွံာ် မုၢ်နံၤအဝဲန့ၣ်

ဒီးမ်တၢ်ကပီၤ သုတဆဲးလီၤဘၣ် မုၢ်နံၤအဝဲန့ၣ် တဂ့ၤ.

၅ မ်တၢ်ခံးယိာ် လုၢ်ဘၢကွံာ်အီၤတက့ၢ်.

မ်တၢ်အၢၣ်ခံးသူ ကးဘၢကွံာ်အီၤတက့ၢ်.

မုၢ်နံၤအံၤ အတၢ်ကပီၤန့ၣ် မ်တၢ်ခံးသူ လၢအလီၤပျံၤလီၤဖုး လုၢ်ဘၢကွံာ်အီၤတက့ၢ်.

၆ မ်မုၢ်နၤအဝဲန့ၣ် ပှဲၤဒီး တၢ်ခံးသူပံးကလာ်တက့ၢ်.+

မ်တၢ်သူၣ်ဖှံသးညီ သုတအိၣ်လၢ မုၢ်နံၤအဝဲန့ၣ်တဂ့ၤ.

ဒီးမ်တၢ်သုတဂံၢ်ဃုာ်အီၤ လၢလါတဖၣ် အကျါတဂ့ၤ.

၇ မ်မုၢ်နၤအဝဲန့ၣ် အိၣ်သယုၢ်သညိ

ဒီးမ်ပှၤသုတနၢ်ဟူဘၣ် တၢ်ကိးပသူထီၣ် လၢတၢ်သးခုအပူၤ တဂ့ၤ.

၈ မ်ပှၤလၢအဆိၣ်အၢတၢ် လၢအမၤပၢၢ်ထီၣ် သမၣ်*+ သ့န့ၣ်

ဆိၣ်အၢမုၢ်နၤအဝဲန့ၣ် တက့ၢ်.

၉ ဖဲတၢ်တနၤန့ၣ် မ်ဆၣ်တဖၣ် ခံးလီၤတက့ၢ်.

မ်တၢ်တနၤန့ၣ် အိၣ်ခိးမုၢ်ဆါခီ အတၢ်ကပီၤ ခီလီလီ

ဒီးမ်အသုတထံၣ်ဘၣ် မုၢ်ဝါထီၣ် အတၢ်ကပီၤတဂ့ၤ,

၁၀ မ့ၢ်လၢ တၢ်တနၤန့ၣ် အတပံးဃာ် ယမိၢ်အဒၢလီၢ် အတြဲၤဘၣ်+

ဒီးအတပာ်သဒၢယၤလၢ တၢ်ကီတၢ်ခဲဘၣ် အဃိလီၤ.

၁၁ ဘၣ်မနုၤအဃိ ယတသံ ဖဲယအိၣ်ဖျဲၣ်ထီၣ် အခါဘၣ်လဲၣ်.

ဖဲယအိၣ်လၢ ယမိၢ်ဒၢလီၢ်ပူၤအခါ ဘၣ်မနုၤအဃိ ယတသံဆိပာ်စၢၤဘၣ်လဲၣ်.+

၁၂ ဘၣ်မနုၤအဃိ ယမိၢ်ဘၣ်စိာ်ယၤလၢ အကံၣ်ဒုၣ်လိၤ

ဒီးဒုးအီယၤနုၢ်လဲၣ်.

၁၃ ယမ့ၢ်သံ ဖဲန့ၣ်အခါန့ၣ် ခဲအံၤ ယကမံဘၣ်မုာ်မုာ်+

ဒီးယကမံအိၣ်ဘှံးဘၣ်လံ.+

၁၄ ယကမံဘၣ် တပူၤဃီဒီး ဟီၣ်ခိၣ်အ စီၤပၤတဖၣ် ဒီးအဝဲသ့ၣ် အပှၤဟ့ၣ်ကူၣ်တၢ်တဖၣ်

လၢအသူၣ်ထီၣ် တၢ်လီၢ်တဖၣ်လၢ အဟးဂူာ်ဟးဂီၤတ့ၢ်လံ.

၁၅ ဒီးယကမံဘၣ် တပူၤဃီဒီး ပဒိၣ်ဖးဒိၣ်တဖၣ်လၢ အအိၣ်ဒီးထူ

ဒီးအဟံၣ်ပှဲၤဒီး စ့ညၣ်န့ၣ်လံ.

၁၆ တချုးလၢ ယအိၣ်ဖျဲၣ်ထီၣ်န့ၣ် ဘၣ်မနုၤအဃိ ယတသံဒ်

ဖိသၣ်လၢ အသံလၢ ဒၢလီၢ်ပူၤန့ၣ်လဲၣ်.

၁၇ လၢတၢ်သွၣ်ခိၣ် အပူၤန့ၣ် ပှၤအၢပှၤသီတဖၣ်ဒၣ်လဲာ် အသးတဘၣ် တံာ်တာ်လၢၤဘၣ်.

ဒီးဖဲန့ၣ်န့ၣ် ပှၤလၢ အလီၤဘှံးလီၤတီၤတဖၣ် အိၣ်ဘှံးဘၣ်ဝဲလီၤ.+

၁၈ ဖဲန့ၣ်န့ၣ် ပှၤဃိာ်ဖိတဖၣ် အိၣ်ဘၣ်ဝဲ မုာ်မုာ်ခုၣ်ခုၣ်လီၤ.

အဝဲသ့ၣ် တနၢ်ဟူဘၣ် တၢ်ကလုၢ်လၢ အမၢဆူၣ်အီၤလၢ ကမၤတၢ်မၤ န့ၣ်ဘၣ်.

၁၉ ဖဲန့ၣ်န့ၣ် ပှၤဒိၣ်ပှၤပှၢ်မ့ၢ်ဂ့ၤ ပှၤပတီၢ်ဖုၣ်မ့ၢ်ဂ့ၤ မ့ၢ်တၢ်ဒ်သိးသိးလီၤ.+

ဒီးကုၢ်တဖၣ်န့ၣ် ပူၤဖျဲးလၢ အကစၢ် အစုပူၤလီၤ.

၂၀ ဘၣ်မနုၤအဃိ ကစၢ်ယွၤ ဘၣ်ဟ့ၣ်လီၤ တၢ်ကပီၤဆူ ပှၤလၢအဘၣ်နးဘၣ်ဖှီၣ်တဖၣ် အအိၣ်လဲၣ်

ဒီးတၢ်မူဆူ ပှၤလၢအသး ဘၣ်ဒိဆါမးတဖၣ် အအိၣ်လဲၣ်.+

၂၁ အဝဲသ့ၣ် အဲၣ်ဒိးသံဘၣ်ဆၣ် တသံဘၣ်.+

အဝဲသ့ၣ် ဃုဝဲတၢ်သံအါန့ၢ်ဒံး အဃုဝဲ တၢ်လုၢ်ဒိၣ်ပှ့ၤဒိၣ်လၢ အအိၣ်ခူသူၣ်ဒံးလီၤ.

၂၂ အဝဲသ့ၣ် မ့ၢ်ထံၣ်န့ၢ် တၢ်သွၣ်ခိၣ်န့ၣ်

ကသးခုဝဲ ဒိၣ်မးလီၤ.

၂၃ ပှၤလၢအဟးဖျိးကျဲ ဒီးကစၢ်ယွၤ တြီဃာ်အီၤလၢ ကိးကပၤဒဲးန့ၣ်

ဘၣ်မနုၤအဃိ ကစၢ်ယွၤ ပျဲမူအီၤဒံးလဲၣ်.+

၂၄ လၢယတၢ်အီၣ်အလီၢ်န့ၣ် ယတၢ်သးဟးဂီၤ ဟဲဝဲလီၤ.+

ဒီးယတၢ်ကအုကစွါန့ၣ်+ ယွၤလီၤဝဲဒ် ထံလီၤဆူအသိးလီၤ.

၂၅ တၢ်လၢယပျံၤအီၤန့ၣ် ဟဲဘၣ်ယၤလံ

ဒီးတၢ်လၢ ယပျံၤအီၤန့ၣ် လီၤဘၣ်လၢ ယလိၤလံ.

၂၆ တၢ်မုာ်တၢ်ခုၣ်, တၢ်ဘှ့ၣ်တၢ်ဘှီၣ် ဒီးတၢ်အိၣ်ဘှံးအိၣ်သါ တအိၣ်ဒီးယၤဘၣ်.

ယတၢ်ကီတၢ်ခဲတဖၣ် အါထီၣ်ဝဲ ထီဘိလီၤ.”

၄ ပှၤတ့ၤမၣ်ဖိ စီၤအလံဖးစး+ တဲဆၢအီၤလၢ

၂ “ပှၤတဂၤဂၤ မ့ၢ်အဲၣ်ဒိးတဲတၢ်ဒီး နၤန့ၣ် နကနၣ်ကကဲဒံးဧါ.

ဘၣ်ဆၣ် ယမ့ၢ်တတဲဘၣ်န့ၣ် ယအိၣ်ကကဲဧါ.

၃ လၢညါ နသိၣ်လိ ပှၤအါဂၤ

ဒီးနဒုးဆူၣ်ထီၣ် ပှၤလၢအဂံၢ်စၢ် ဘါစၢ်တဖၣ်လီၤ.

၄ လၢညါ နတၢ်ကတိၤတဖၣ် ဒုးဆၢထၢၣ်ဂၢၢ်ကျၢၤ ပှၤလၢအခီၣ်ဘၣ်တိၢ် တဂၤဂ့ၤ တဂၤဂ့ၤလီၤ.

ဒီးနမၤဆူၣ်ထီၣ်ပှၤလၢ အခီၣ်လ့ၢ်ခိၣ် ကနိးတဖၣ် အဂံၢ်အဘါလီၤ.

၅ ခဲအံၤ တုၤလၢနကလဲး ဘျီဒု နတူၢ်အီၤတပှဲၤလၢၤဧီၤ.

တၢ်ဘၣ်နၤဒီး နသူၣ်ဟးဂီၤ သးဟးဂီၤလီၤ.

၆ နတၢ်ပျံၤယွၤန့ၣ် တမၤဆူၣ်ထီၣ် နသးဧီၤ.

နမၤတၢ် တီတီလိၤလိၤ+ အဃိ အတဟ့ၣ်နၤ တၢ်မုၢ်လၢ်ဧီၤ.

၇ ဝံသးစူၤ သ့ၣ်နီၣ်ထီၣ်လၢ ပှၤလၢအတၢ်ကမၣ် တအိၣ်ဘၣ်န့ၣ် သံဆိတဘျီဘျီဧါ.

ပှၤတီပှၤလိၤန့ၣ် ဘၣ်တၢ်မၤဟးဂီၤအီၤ တဘျီဘျီဧါ.

၈ ဒ်ယထံၣ်ဘၣ်အသိး ပှၤလၢ အထဲၣ်တၢ်အၢ

ဒီးပှၤလၢ အဖှံလီၤ တၢ်ကီတၢ်ခဲန့ၣ် ကကူးဘၣ်က့ၤ တၢ်အဝဲန့ၣ်လီၤ.

၉ အဝဲသ့ၣ် ဟးဂီၤကွံာ်လၢ ကစၢ်ယွၤ အတၢ်ကသါလီၤ အဃိလီၤ.

ဒီးအဝဲသ့ၣ် အကျဲကတၢၢ်ကွံာ် လၢအတၢ်သးဒိၣ်ထီၣ် အဃိလီၤ.

၁၀ ခ့ယုၢ်ကညီၤတၢ် ဒီးခ့ယုၢ်ဖိ ကညီၤတၢ်လီၤ.

ခ့ယုၢ်လၢ အဂံၢ်ဆူၣ်ဒ်န့ၣ်တဖၣ်ဒၣ်လဲာ် အမဲပိာ်ကွံာ်သ့လီၤ.

၁၁ ခ့ယုၢ်တဖၣ်န့ၣ် အတၢ်အီၣ်တအိၣ်ဘၣ်အဃိ ဘၣ်သံဝဲ

ဒီးခ့ယုၢ်ဖိတဖၣ်န့ၣ် လီၤပြံလီၤပြါ ဝဲလီၤ.

၁၂ ပှၤဟဲတဲခူသူၣ်ယၤ တၢ်တမံၤ

ဒီးတဲကသွံတၢ်လၢ ယနၢ်ပူၤလီၤ.

၁၃ ဖဲမုၢ်နၤ ပှၤမံဒီးပှၤနၢ်လီၤ ဖးယိာ်အခါ ယထံၣ်ဘၣ် တၢ်ထံၣ်လၢညါခီတဖၣ်လၢ

အမၤဘံဘူ ယတၢ်ဆိကမိၣ်လီၤ.

၁၄ ယပျံၤတၢ်ဖးဒိၣ်

တုၤလၢ ယဃံတဖၣ် ကနိးလီၤ.

၁၅ ပှၤနီၢ်သးဖိတဂၤ လဲၤခီဂာ်တၢ်လၢ ယမဲာ်ညါ

ဒီးယဘ့ၣ်ကဆှၣ်ထီၣ်လီၤ.

၁၆ ဒီးပှၤနီၢ်သးဖိတဂၤန့ၣ် ဆၢထၢၣ်ဝဲ ဂၢၢ်တပၢၢ်

ဒီးယထံၣ် တၢ်တမံၤန့ၣ် လၢယမဲာ်ညါ ဘၣ်ဆၣ်

အကဲမနုၤလဲၣ်န့ၣ် ယတသ့ၣ်ညါဘၣ်.

ဒီးတၢ်အိၣ်ဘှ့ၣ်ကလာ်လၢ ယကပိာ်ကပၤ ဒီးယနၢ်ဟူ တၢ်ကလုၢ် သီၣ်ထီၣ်လၢ

၁၇ ‘မ့ၢ်ပှၤဟီၣ်ခိၣ်ဖိ ကတီလိၤဒိၣ်န့ၢ်ဒံး ကစၢ်ယွၤဒံးဧါ.

မ့ၢ်ပှၤကညီန့ၣ် ကစီဆှံဒိၣ်န့ၢ်ဒံး ပှၤလၢအတ့လီၤအီၤဒံးဧါ.’

၁၈ ကွၢ်မီၤ, အဝဲတနာ်န့ၢ် အခ့အပှၤတဖၣ်ဘၣ်,

ဒီးအဝဲဃု အမူခိၣ်ကလူးတဖၣ် အတၢ်ကမၣ်လီၤ.

၁၉ မ့မ့ၢ်ဒ်န့ၣ်န့ၣ် ပှၤကညီလၢ အမ့ၢ်ဒၣ် ဟီၣ်ခိၣ်ကမူၣ်+ ဒီးအိၣ်ဝဲဆိးဝဲလၢ ဟံၣ်လၢ ပှၤတ့အီၤလၢကပံာ်

ဒီးလၢ အဘၣ်တၢ်မၤသဘှံးအီၤညီ ဒ်တၢ်အဃၢ်တဖၣ် အသိးန့ၣ်

အကနးဒိၣ်န့ၢ်အန့ၣ်လၢ အဝဲသ့ၣ်အဂီၢ်လီၤ.

၂၀ အဝဲသ့ၣ် လီၤကလဲကွံာ် ခဲလၢာ်ခဲဆ့ လၢတနံၤအတီၢ်ပူၤလီၤ.

အဝဲသ့ၣ်ဟးဂီၤကွံာ်ဝဲ လီၤထူလီၤယိာ် ဘၣ်ဆၣ် ပှၤတပာ်သူၣ်ပာ်သးဝဲ နီတဂၤဘၣ်.

၂၁ အဝဲသ့ၣ်လီၤဂာ်ဒ် ဒဲလၢ ပှၤထုးထီၣ်ကွံာ် အပျံၤအသိး

ဒီးသံဒ် ပှၤလၢအတအိၣ်ဒီး တၢ်ကူၣ်သ့အသိးလီၤ.

၅ “နကကိးထီၣ်လၢ ပှၤစီဆှံ ဖဲလဲၣ်တဂၤ အအိၣ်လဲၣ်.

ဝံသးစူၤ ကိးကွၢ်သၢၤ, မ့ၢ်ပှၤကစံးဆၢနၤ တဂၤဂၤဧါ.

၂ တၢ်သူၣ်ဒိၣ်သးဖျိး ကမၤသံ ပှၤမၢးဖိ,

ဒီးတၢ်သးက့ၣ် ကမၤသံ ပှၤလၢအတအိၣ်ဒီး တၢ်ကူၣ်သ့ဘၣ်လီၤ.

၃ ယထံၣ်ဘၣ် ပှၤဟးဂီၤဖိ လဲၤထီၣ်လဲၤထီ

ဘၣ်ဆၣ် အတၢ်အိၣ်တၢ်ဆိး အလီၢ်န့ၣ် ဘၣ်တၢ်ဆိၣ်အၢ သတူၢ်ကလာ်လီၤ.

၄ အဖိခွါတဖၣ်န့ၣ် အိၣ်ယံၤဒီး တၢ်ဒီသဒၢ

ဒီးပှၤဆီၣ်တံၢ်မၤနၢၤအဝဲသ့ၣ်လၢ ဝ့ၢ်အတြဲၤလီၤ.+ ဒီးပှၤတမၤစၢၤ အဝဲသ့ၣ် နီတဂၤဘၣ်.

၅ တၢ်လၢအကူးဝဲတဖၣ်န့ၣ် ပှၤလၢအလီၤဒိ အီၣ်ကွံာ်ဝဲ

ဒီးဟံးန့ၢ်ဝဲတၢ်လၢ အမဲထီၣ်လၢ တၤဆှုၣ်တၤမဲအကျါ ဒၣ်လဲာ်လီၤ.

ဒီးအဝဲသ့ၣ် အတၢ်ဖိတၢ်လံၤတဖၣ်န့ၣ် ပှၤဂုာ်န့ၢ်အီၤ စ့ၢ်ကီးလီၤ.

၆ တၢ်လၢ အမၤဘၣ်ဒိဆါတၢ်တဖၣ်န့ၣ် တဟဲမဲထီၣ်လၢ ဟီၣ်ခိၣ်ကမူၣ် အကျါဘၣ်.

ဒီးဟီၣ်ခိၣ် တဒုးအိၣ်ထီၣ် တၢ်ကီတၢ်ခဲတဖၣ်ဘၣ်.

၇ ဒ်မ့ၣ်အူဖီ ကဘၣ်ဒံထီၣ်ကွံာ် လၢတၢ်ဖးဖီအသိး

ပှၤကညီ အိၣ်ဖျဲၣ်လၢ ကဘၣ်ကီ ဘၣ်ခဲ အဂီၢ်လီၤ.

၈ ယမ့မ့ၢ်နၤန့ၣ် ယကဃၣ်ယသးဆူ ကစၢ်ယွၤအအိၣ်

ဒီးယကတီၣ်ထီၣ် ယတၢ်ဂ့ၢ်လၢ အအိၣ်လီၤ.

၉ အဝဲမၤတၢ်လၢ အဒိၣ်အမုၢ် ဒီးအတၢ်မၤတဖၣ်န့ၣ် ပှၤနၢ်ပၢၢ်အီၤ တလၢာ်ဘၣ်.

ဒီးအတၢ်လီၤလိၢ်လီၤလးတဖၣ်န့ၣ် ပှၤဂံၢ်ကွၢ်အီၤ တလၢာ်ဘၣ်.

၁၀ အဝဲ ဒုးစူၤလီၤတၢ်လၢ ဟီၣ်ခိၣ်လိၤ

ဒီးဟ့ၣ်လီၤ စံာ်ပျီတဖၣ် လၢထံလီၤ.

၁၁ အဝဲပာ်ထီၣ်ထီ ပှၤလၢ အပတီၢ်ဖုၣ်တဖၣ်

ဒီးဝံၢ်ဆၢထၢၣ် ပှၤလၢအသူၣ်အုးသးအုး ဒီးအုၣ်က့ၤခီၣ်က့ၤအီၤလီၤ.

၁၂ အဝဲ မၤဟးဂီၤ ပှၤလၢအကူၣ်အၢတၢ် အတၢ်ကူၣ်ထီၣ်ဖးလီၤလီၤ.

အဃိ အဝဲသ့ၣ် အစုအတၢ်မၤတဖၣ် တကဲထီၣ်လိၣ်ထီၣ်ဘၣ်.

၁၃ အဝဲမၤလီၤဃံၢ် ပှၤကူၣ်တၢ်သ့လၢ အဝဲသ့ၣ်အနီၢ်ကစၢ် အပျံၤသကွီၤအပူၤ+

ဒ်သိးအဝဲသ့ၣ် အတၢ်ကူၣ်ထီၣ်ဖးလီၤ ကဟးဂီၤအဂီၢ်လီၤ.

၁၄ ဖဲမုၢ်ဆါခီန့ၣ် တၢ်ခံးအိၣ်ဝးတရံး အဝဲသ့ၣ်

ဒီးဖဲမုၢ်ထူၣ်န့ၣ် အဝဲသ့ၣ် ဘၣ်ဟးပလၢၢ်တၢ်ဒ် မုၢ်နၤခီအသိးလီၤ.

၁၅ အဝဲမၤပူၤဖျဲး ပှၤဂၤလၢ အဝဲသ့ၣ် အပျ့ၤလၢ အလီၤဂာ်ဒ် နးအသိး

ဒီးအဝဲမၤပူၤဖျဲး ပှၤဖှီၣ်ဖိယာ်ဖိလၢ ပှၤလၢအဆူၣ် အစုပူၤလီၤ.

၁၆ အဃိ ပှၤလၢအပတီၢ်ဖုၣ်န့ၣ် အတၢ်မုၢ်လၢ်အိၣ်ထီၣ်,

မ့မ့ၢ် ပှၤတတီတလိၤဘၣ် အထးခိၣ်န့ၣ် ဘၣ်တၢ်ကးပံးအီၤလီၤ.

၁၇ ပှၤလၢ ကစၢ်ယွၤ သိၣ်ဃီၣ်အီၤန့ၣ် ကသးခုဝဲလီၤ.

အဃိ တဘၣ်ဂ့ၢ်လိာ်ကွံာ် သ့တၢ်လၢာ်ကစၢ် အတၢ်သိၣ်က့ၤ သီက့ၤ တဂ့ၤ.

၁၈ အဝဲမၤဆါတၢ် ဘၣ်ဆၣ် အဝဲဘိၣ်ထီၣ် တၢ်ပူၤလီၢ်လီၤ.

အဝဲမၤဘၣ်ဒိတၢ် ဘၣ်ဆၣ် အဝဲမၤဘျါက့ၤဝဲ လၢအနီၢ်ကစၢ်လီၤ.

၁၉ အဝဲ ကမၤပူၤဖျဲးနၤလၢ တၢ်ကီတၢ်ခဲဃုခါ

ဒီးတၢ်ကီတၢ်ခဲ နွံခါတခါန့ၣ် တမၤဘၣ်ဒိနၤဘၣ်.

၂၀ ဖဲတၢ်သၣ်ဝံၤလီၤဒိ အိၣ်ထီၣ်အခါ အဝဲ ကမၤပူၤဖျဲးနၤ လၢတၢ်သံ

ဒီးဖဲတၢ်ဒုးတၢ်ယၤ အိၣ်ထီၣ်အခါ အဝဲ ကမၤပူၤဖျဲးနၤလၢ နးလီၤ.

၂၁ အဝဲကဒီသဒၢနၤလၢ ပျ့ၤလၢ အလီၤဂာ်ဒ် နီၣ်ဖျ့+

ဒီးဖဲတၢ်မၤဟးဂီၤ ဟဲအခါ နတပျံၤဘၣ်တၢ်ဘၣ်.

၂၂ နကနံၤဘၣ် တၢ်မၤဟးဂီၤ ဒီးတၢ်သၣ်ဝံၤလီၤဒိ

ဒီးနတပျံၤဘၣ် ဆၣ်ဖိကီၢ်ဖိအအၢ လၢဟီၣ်ခိၣ်ချၢဘၣ်.

၂၃ နစံာ်ပျီ တအိၣ်ပှဲၤဒီးလၢၢ်တဖၣ်ဘၣ်.

ဒီးဆၣ်ဖိကီၢ်ဖိ အအၢလၢ တၢ်ပျီပူၤန့ၣ် ကအိၣ်ဃူအိၣ်ဖိးဒီးနၤလီၤ.

၂၄ နကအိၣ်ဘၣ် ဘံၣ်ဘံၣ်ဘၢဘၢ လၢနဒဲပူၤ သပှၢ်ကတၢၢ်လီၤ.

ဖဲနလဲၤလၢ နဆၣ်ဖိကီၢ်ဖိ အီၣ်ဆၣ်လီၢ်အခါ နဆၣ်ဖိကီၢ်ဖိ တလီၤမၢ် နီတဒုဘၣ်.

၂၅ နကအိၣ်ဒီး နဖိအါဂၤ

ဒီးနစၢၤနသွဲၣ်တဖၣ်န့ၣ် ကအိၣ်အါ ဒ်သိး နီၣ်ဧိၤမံၤဧိၤလၢ ဟီၣ်ခိၣ်လိၤလီၤ.

၂၆ ဖဲနလဲၤလီၤဆူ တၢ်သွၣ်ခိၣ်ပူၤအခါ နဂံၢ်ကဆူၣ်ဒံး

ဒ်ဘုကဒိၣ်တဖၣ်လၢ ပှၤထၢဖှိၣ်အီၤဖဲ ကူးဘုအဆၢကတီၢ် အသိးလီၤ.

၂၇ ပဃုသ့ၣ်ညါ တၢ်ဂ့ၢ်တဖၣ်အံၤ ဝံၤလံ ဒီးပထံၣ်ဘၣ်လၢ အမ့ၢ်ဝဲတီဝဲလီၤ.

အဃိ ဒိကနၣ် ဒီးတူၢ်လိာ်အီၤသၢၤ.”

၆ ဒီးစီၤယိၤဘး တဲဆၢက့ၤဝဲလၢ

၂ “ပှၤစီၤယတၢ်သူၣ်ကိၢ်သးဂီၤ+ လီၤတံၢ်လီၤဆဲးမ့ၢ်န့ၢ်

ဒီးပှၤပာ်ဖှိၣ်အီၤ တပူၤဃီဒီး ယတၢ်နးတၢ်ဖှီၣ် လၢစီၤပီၢ်အပူၤ မ့ၢ်န့ၢ်န့ၣ်

၃ အကဃၢဒိၣ်န့ၢ်ဒံး ပီၣ်လဲၣ်အမဲးလီၤ.

လၢတၢ်န့ၣ်အဃိ ယဟးတဲကြီ တၢ်လီၤ.+

၄ သ့တၢ်လၢာ်ကစၢ် အပျၢ်တဖၣ်န့ၣ် ဆဲးဖျိယၤလံ

ဒီးယအီဘၣ် ပျၢ်တဖၣ်အံၤ အစုၣ်အပျၢ်လံ.+

ဒီးကစၢ်ယွၤ အတၢ်မၤပျံၤမၤဖုးန့ၣ် ရဲၣ်လီၤအသး ထီဒါယၤလီၤ.

၅ ဖဲနီၣ်အိၣ်ဝဲအခါ မ့ၢ်ကသ့ၣ်ယီၤအမံၤ+ ကကိးထီၣ်လၢ တၢ်သးအုးအပူၤဧါ.

ဖဲနီၣ်အိၣ်အခါ မ့ၢ်ကျီၢ် ကကိးထီၣ်ဧါ.

၆ တၢ်အီၣ်မ့ၢ်တပၣ်ဒီး အံသၣ်ဘၣ်န့ၣ် ပှၤအီၣ်အီၤ ကဝံၣ်ဧါ.

မဲလိၤ* အထံန့ၣ် အဝံၣ်အဆၢ ကအိၣ်ဧါ.

၇ ယတထိး တၢ်သ့ၣ်တဖၣ်န့ၣ်ဘၣ်,

မ့ၢ်လၢ အလီၤဂာ်ဒ် တၢ်အီၣ်လၢ အနၢဆံၣ်ဘီအဃိလီၤ.

၈ ယမ့ၢ်ဒိးန့ၢ်ဘၣ် တၢ်လၢယဃ့

ဒီးကစၢ်ယွၤ မ့ၢ်ဟ့ၣ်လီၤယၤ တၢ်လၢ ယလီကီန့ၣ် ကဂ့ၤဝဲလီၤ.

၉ ကစၢ်ယွၤ မ့ၢ်မၤသဘှံးယၤ

ဒီးမ့ၢ်ယူာ်ထီၣ်အစု ဒီးမၤသံယၤန့ၣ် ကဂ့ၤဝဲလီၤ.+

၁၀ တၢ်မ့ၢ်ကဲထီၣ်အသး ဒ်န့ၣ်န့ၣ် ကဆါဒိၣ်မး သနာ်က့

ယသးကမုာ် ဒီးယကဖုကဆဲးထီၣ်* လၢတၢ်သးခုအပူၤ

မ့ၢ်လၢ ယတဂ့ၢ်လိာ် တၢ်စီဆှံတဂၤ အတၢ်ကတိၤတဖၣ် နီတဘျီဘၣ် အဃိလီၤ.+

၁၁ ယဂံၢ်ယဘါလၢ ယကဆဲးတူၢ်တၢ် အဂီၢ်န့ၣ် ကအိၣ်ဧါ.+

ယမ့ၢ်အိၣ်မူနာ်က့ မ့ၢ်ယတၢ်မုၢ်လၢ် ကအိၣ်တမံၤမံၤဒံးဧါ.

၁၂ မ့ၢ်ယကျၢၤ ဒ်သိးဒီးလၢၢ်ဟီဧါ.

ယညၣ်န့ၣ် မ့ၢ်အကဲတိၢ်ဘီဟီဧါ.

၁၃ ပှၤလၢအဆီၣ်ထွဲမၤစၢၤယၤ တအိၣ်နီတဂၤလၢၤဘၣ်အဃိ

မ့ၢ်ယမၤစၢၤလီၤယသး ကသ့လၢ ကျဲတဘိဘိဧါ.

၁၄ ပှၤလၢ အတပာ်ဖျါထီၣ် တၢ်အဲၣ်လၢအတီလၢ အသကိး အဖီခိၣ်ဘၣ်န့ၣ်+

မ့ၢ်ပှၤလၢ အတပျံၤ သ့တၢ်လၢာ်ကစၢ်ဘၣ်လီၤ.+

၁၅ ယသကိးတဖၣ်အံၤ* ပှၤနာ်န့ၢ်အီၤ တသ့ဘၣ်.+

အဝဲသ့ၣ် လီၤဂာ်ဒ် ထံကျိဖိလၢ အယွၤလီၤလၢ တၢ်ဂိၢ်ခါ ဒီးလၢခံ ဃ့ထီဝဲလီၤ.

၁၆ ထံကျိဖိတဖၣ်န့ၣ် ဒုထီၣ်ဝဲ ခီဖျိလၢ ထံချံၣ်ကိၣ်လိၣ်

ဒီးမူခိၣ်ဖီလၢ အပှံၢ်လီၤဝဲ ကယီကယီအဃိလီၤ.

၁၇ ဘၣ်ဆၣ် ဖဲတၢ်ကိၢ်ထီၣ်အခါ ထံကျိဖိတဖၣ်အံၤ အထံလီၤသံးကွံာ်ဝဲ

အဃိ လၢခံန့ၣ် အထံတအိၣ်လၢၤဘၣ် ဒီးထံကျိဖိ လီၤမၢ်ကွံာ်ဝဲလီၤ.

၁၈ ထံကျိဖိတဖၣ်အံၤ အထံဆီတလဲကွံာ် အကျိၤ

ဒီးယွၤလီၤဝဲလၢ မဲးမုၢ်ခိၣ် ဒီးလီၤမၢ်ကွံာ်ဝဲလီၤ.

၁၉ ပှၤတ့မၤဖိလၢ+ အလဲၤတၢ်က့ၤတၢ်န့ၣ် ဃုကွၢ် ထံကျိဖိတဖၣ်အံၤ

ဒီးပှၤလဲၤတၢ်က့ၤတၢ်ဖိလၢ စဘၤအဘီမုၢ်စ့ၢ်ကီး+ ဃုကွၢ် ထံကျိဖိတဖၣ်အံၤလီၤ.

၂၀ အဝဲသ့ၣ် တူၢ်ဘၣ်တၢ်မဲာ်ဆှး ခီဖျိလၢ အနာ်ဝဲလၢ အကထံၣ်န့ၢ် ထံအဃိလီၤ.

အဝဲသ့ၣ် လဲၤဖဲန့ၣ် ဒ်သိးအသူၣ်ကဟးဂီၤသးဟးဂီၤ အဂီၢ်လီၤ.

၂၁ ဖဲသုထံၣ် ယတၢ်နးတၢ်ဖှီၣ်ဖးဒိၣ်အခါ သုပျံၤတၢ်ဒီး+

သုလီၤဂာ်ဒ်သိးဒီး ထံကျိဖိတဖၣ်အံၤ ဒီးသုတကဲထီၣ် တၢ်မၤစၢၤလၢ ယဂီၢ်ဘၣ်.+

၂၂ မ့ၢ်ယတဲလၢ ‘ဟ့ၣ်ယၤတၢ်တမံၤမံၤ’ ဧါ,

ဒီးမ့ၢ်ယဃ့ သုတၢ်ထူးတၢ်တီၤ တမံၤမံၤဧါ.

၂၃ မ့ၢ်ယမၢ သုမၤပူၤဖျဲးယၤ လၢဒုၣ်ဒါ အစုပူၤ

ဒီးမၤပူၤဖျဲးယၤလၢ ပှၤလၢအဆီၣ်တံၢ်မၤနၢၤတၢ် အစုပူၤဧါ.

၂၄ သိၣ်လိယၤ ဒီးယကအိၣ်ဘှီၣ် ကလာ်လီၤ.+

မၤစၢၤယၤ ဒ်သိး ယကသ့ၣ်ညါလီၤ ယတၢ်ကမၣ်သၢၤ.

၂၅ မ့မ့ၢ် တၢ်ကတိၤလၢ အမ့ၢ်အတီန့ၣ် တမၤဘၣ်ဒိဆါ ပှၤဂၤဘၣ်.+

ဘၣ်ဆၣ် သုတၢ်သိၣ်ဃီၣ်အံၤ ကဲဘျုးဒ်လဲၣ်.+

၂၆ မ့ၢ်သုကူၣ်ထီၣ်လၢ သုကသိၣ်ဃီၣ်ယၤ ခီဖျိလၢ ယတၢ်ကတိၤ တဖၣ် အဃိဧါ.

မ့ၢ်သုဆိကမိၣ်လၢ ယတၢ်ကတိၤတဖၣ် ကဒံကွံာ် လၢကလံၤကျါ ဒ်ပှၤလၢအကျဲကတၢၢ်တဂၤ တဲတၢ် အသိးဧါ.+

၂၇ တယံာ်ဘၣ်ဒု သုကကွံာ်လီၤတၢ်ဖးလၢ ပှၤဖိၣ်ဃဲအဂီၢ်+ ဒ်သိးသုက သ့ၣ်ညါလၢ အကကဲ မတဂၤ အကုၢ်လဲၣ်.

ဒီးသုကဆါအီၣ် သုသကိးလီၤ.+

၂၈ အဃိ ဃၣ်သုသးဒီး ကွၢ်ယမဲာ်သၢၤ,

ယတတဲလံၣ်သုဘၣ်.

၂၉ ဝံသးစူၤ က့ၤဆိကမိၣ်ကွၢ်က့ၤသၢၤ, တဘၣ်စံၣ်ညီၣ်ကမၣ်ယၤ တဂ့ၤ.

ဆိကမိၣ်ကွၢ်က့ၤသၢၤ, ယမ့ၢ်ဒံး ပှၤတီပှၤလိၤလီၤ.

၃၀ မ့ၢ်သုဆိကမိၣ်လၢ ယတဲတၢ် ကမၣ်ဟီဧါ.

ယဘၣ်ကီဘၣ်ခဲလၢ မနုၤအဃိလဲၣ်န့ၣ် မ့ၢ်သုဆိကမိၣ်လၢ ယနၢ်တပၢၢ်ဧီၤ.

၇ “ပှၤဟီၣ်ခိၣ်ဖိ အတၢ်အိၣ်မူ လၢဟီၣ်ခိၣ်ချၢန့ၣ် လီၤဂာ်ဒ် ပှၤမၤတၢ်ဖိလၢ အဘၣ်မၤတၢ်ဆူၣ်ဆူၣ်တဂၤ

ဒီးဒ်ပှၤမၤတၢ်ဖိတဂၤလၢ အဒိးငါအသး အသိးလီၤ.+

၂ ဒ်ကုၢ်အသိး အဝဲသ့ၣ် ဆၢအိၣ်ဘၣ်လၢ တၢ်အကဒုအဖီလာ်

ဒီးဒ်ပှၤဒိးငါအသးအသိး အဝဲသ့ၣ် အိၣ်ခိး အဘူးအလဲလီၤ.+

၃ အဃိ ယတၢ်အိၣ်မူန့ၣ် အဘျုးတအိၣ်ဘၣ် တဘျုးလါလံ.

ဒီးယသးဘၣ်ဖှီၣ်ဒိၣ်မး အိၣ်တဘျုး နၤလံ.+

၄ ဖဲယမံနီၤအခါ ယတဲလၢ ‘မုၢ်ကဝါထီၣ် ဆံးယံာ်လဲၣ်.’+

မုၢ်နၤန့ၣ် ယံာ်ဝဲ ဒီးယမံတန့ၢ်ဘၣ် တုၤလၢ မုၢ်ဝါထီၣ်လီၤ.

၅ လၢၣ်တဖၣ် ဒီးတၢ်ပူၤလီၢ်ဘၣ်အၢ အိၣ်ဝဲလၢ ယလိၤဒီဂၤညါ+

ဒီးယဘ့ၣ်အိၣ်ပှဲၤထဲ တၢ်ပူၤလီၢ် ဒီးအဖံယွၤဝဲလီၤ.+

၆ ယတၢ်အိၣ်မူ တနံၤဘၣ်တနံၤ လဲၤပူၤကွံာ်ဝဲ ချ့န့ၢ်ဒံး ပှၤထါတၢ်ဖိ အလုၣ်ဆွံလီၤ.+

ယတၢ်အိၣ်မူ ဘူးထီၣ်ကကတၢၢ်လံ ဒီးယတၢ်မုၢ်လၢ် တအိၣ်ဘၣ်.+

၇ သ့ၣ်နီၣ်ထီၣ်လၢ ယတၢ်အိၣ်မူ လီၤဂာ်ဒ် ကလံၤအသိး*+

ဒီးယတထံၣ်ဘၣ် တၢ်သးခု နီတဘျီလၢၤဘၣ်.

၈ ပှၤလၢ အထံၣ်ယၤခဲအံၤန့ၣ် လၢခံ တထံၣ်ဘၣ်ယၤလၢၤဘၣ်.

နကဃုယၤ ဘၣ်ဆၣ် ယတအိၣ်လၢၤဘၣ်.+

၉ ဒ်တၢ်အၢၣ် လီၤမၢ်ကွံာ်ဝဲအသိး

ပှၤတဂၤလၢ အလဲၤလီၤလၢ တၢ်သွၣ်ခိၣ်န့ၣ်* တဟဲက့ၤလၢၤဘၣ်.+

၁၀ အဝဲ တဟဲက့ၤကဒါက့ၤ လၢအဟံၣ် နီတဘျီလၢၤဘၣ်

ဒီးပှၤလၢအအိၣ်လၢ အတၢ်လီၢ်န့ၣ် သးပ့ၤနီၣ်ကွံာ်အီၤလီၤ.+

၁၁ အဃိ ယတကးပံး ယထးခိၣ်ဘၣ်.

ယကတဲတၢ်လၢ တၢ်သူၣ်ကိၢ်သးဂီၤအပူၤ

ဒီးယကကဒူးကဒ့ၣ်တၢ် ခီဖျိလၢ ယသးဟးဂီၤနးမးအဃိလီၤ.+

၁၂ လၢနကပာ်လီၤ ပှၤလၢ ကခိးကွၢ်ယၤ အဂီၢ်န့ၣ်

မ့ၢ်ယကဲပီၣ်လဲၣ် မ့တမ့ၢ် တၢ်သးသမူဖးဒိၣ် လၢပီၣ်လဲၣ် အပူၤဧါ.

၁၃ ဖဲယတဲလၢ ‘ယလီၢ်မံခး ကမၤမုာ်ထီၣ်ယၤ

ဒီးယလီၢ်မံခိၣ် ကမၤမုာ်ထီၣ်ယသးလၢ အဘၣ်ဒိ’ အခါ

၁၄ နမၤပျံၤမၤဖုးယၤလၢ တၢ်မံမီၢ်

ဒီးမၤပျံၤယၤလၢ တၢ်ထံၣ်လၢညါခီတဖၣ်လီၤ.

၁၅ ယကသါမ့ၢ် တပၢၢ်လၢၤဘၣ်

ဒီးယမ့ၢ်သံန့ၣ် ကဂ့ၤဒိၣ်န့ၢ်ဒံး ယဘၣ်အိၣ်ဒ်အံၤလီၤ.+

၁၆ ယသးဟ့လီၤ ယတၢ်အိၣ်မူ+ အဃိ ယတအဲၣ်ဒိး ဆဲးအိၣ်မူလၢၤဘၣ်.

ယတၢ်အိၣ်မူန့ၣ် လီၤဂာ်ဒ် တၢ်ကသါလီၤတထံၣ်အဃိ+ တဘၣ်ကနၣ်ဃုာ်ယၤလၢၤတဂ့ၤ.

၁၇ ဘၣ်မနုၤအဃိ နဘၣ်ယိၣ်တၢ်လၢ ပှၤဟီၣ်ခိၣ်ဖိအဃိလဲၣ်,

ဘၣ်မနုၤအဃိ နသးစၢၢ်ဆၢအီၤ အါထဲအံၤညါလဲၣ်.+

၁၈ ဘၣ်မနုၤအဃိ နသမံသမိးအီၤ ကိးဂီၤဒဲး

ဒီးမၤကွၢ်အီၤ ဒီယုၢ်လဲၣ်.+

၁၉ ဘၣ်မနုၤအဃိ နကွၢ်ထံယၤ ထီဘိလဲၣ်,

ဘၣ်မနုၤအဃိ နတပျဲယအိၣ်ဒၣ်ယတၢ် ထဲတဘျးဖိလဲၣ်.*+

၂၀ ပှၤလၢအကွၢ်ထံကွၢ်ဆး ပှၤဟီၣ်ခိၣ်ဖိဧၢ, ယမ့ၢ်မၤ တၢ်ဒဲးဘးနာ်က့ မ့ၢ်အကမၤဘၣ်ဒိနၤ ဒ်လဲၣ်.+

ဘၣ်မနုၤအဃိ နပာ်ယၤဒ် တၢ်ပနီၣ်လၢ နကခးအီၤ အဂီၢ်လဲၣ်.

မ့ၢ်ယကဲထီၣ် တၢ်ဝံဃၢ လၢနဂီၢ်ဟီဧါ.

၂၁ ဘၣ်မနုၤအဃိ နတပျၢ် ယတၢ်ဒဲးဘး

ဒီးနတသးပ့ၤနီၣ် ယတၢ်ကမၣ် ဘၣ်လဲၣ်.

တယံာ်လၢၤဘၣ်န့ၣ် ယကဘၣ်သံ ဒီးကဲထီၣ်က့ၤ ဟီၣ်ခိၣ်လီၤ.+

ဒီးနကဃုယၤ ဘၣ်ဆၣ် ယတအိၣ်လၢၤဘၣ်.”

၈ ပှၤၡူဧၤဖိ+ စီၤဘံးလဒး+ တဲဆၢအီၤလၢ

၂ “နကဆဲးတဲတၢ်ဒ်အံၤ ကယံာ်ဒံးထဲလဲၣ်.+

တၢ်ကတိၤလၢ အဟဲထီၣ်လၢ နထးခိၣ်န့ၣ် မၤသးဒ် ကလံၤ အူတၢ်ဆူၣ်ဆူၣ် အသိးလီၤ.

၃ ကစၢ်ယွၤ စံၣ်ညီၣ်တၢ် တတီဘၣ်န့ၣ် ကအိၣ်တဘျီဘျီဧါ.

သ့တၢ်လၢာ်ကစၢ် မၤတၢ် တတီတလိၤဘၣ်န့ၣ် မ့ၢ်ကအိၣ် တဘျီဘျီ စ့ၢ်ကီးဧါ.

၄ ကမ့ၢ်လၢ နဖိခွါတဖၣ် မၤကမၣ်အီၤအဃိ

အဝဲစံၣ်ညီၣ် နဖိခွါတဖၣ်လၢ အဝဲသ့ၣ် အတၢ်ကမၣ် အဃိလီၤ.

၅ နမ့ၢ်ကွၢ်ထီၣ်တၢ် ဆူကစၢ်ယွၤ အအိၣ်+

ဒီးဃ့သ့တၢ်လၢာ်ကစၢ် အတၢ်သးကညီၤန့ၣ်,

၆ နမ့မ့ၢ် ပှၤလၢအစီဆှံ နီၢ်ကီၢ်ကီၢ် ဒီးနသးမ့ၢ်ဘျၢန့ၣ်+

အဝဲ ကဒိကနၣ်နၤသၢၤ.

ဒီးအဝဲ ကဟ့ၣ်က့ၤနၤ နလီၢ် ဒ်အကြၢးဒီးနၤအသိး ဒီးနတၢ်အိၣ်သး ကအိၣ်က့ၤ ဒ်လၢညါ အသိးလီၤ.

၇ နတၢ်အိၣ်သး လၢအခီၣ်ထံးန့ၣ် မ့ၢ်ဖှီၣ် ဘၣ်ဆၣ်

ခါဆူညါန့ၣ် ကဘီၣ်ထီၣ်ညီထီၣ်လီၤ.+

၈ ဝံသးစူၤ သံကွၢ် ပှၤလၢညါတဖၣ်

ဒီးဒိကနၣ် တၢ်လၢအဝဲသ့ၣ် အမိၢ်ပၢ်ဖံဖု လၢပျၢၤတဖၣ် သ့ၣ်ညါထီၣ်ဝဲသၢၤ.+

၉ ပဝဲဒၣ်န့ၣ် ပအိၣ်ဖျဲၣ်ထီၣ် ဖဲမဟါ ဒီးပတသ့ၣ်ညါ တၢ်နီတမံၤဘၣ်,

မ့ၢ်လၢ ပတၢ်အိၣ်မူ လၢဟီၣ်ခိၣ်ချၢန့ၣ် လီၤဂာ်ဒ် တၢ်ကဒုတခါ အသိးလီၤ.

၁၀ တၢ်လၢအဝဲသ့ၣ် သ့ၣ်ညါန့ၣ် အဝဲသ့ၣ်ကတဲဘၣ်နၤ

ဒီးကသိၣ်လိနၤ, တမ့ၢ်ဧီၤ.

၁၁ ကပံာ် မ့ၢ်တအိၣ်ဘၣ်န့ၣ် ဆှဲအထူၣ် ကဒိၣ်ထီၣ်ထီထီၣ်ဧါ.

ထံမ့ၢ်တအိၣ်ဘၣ်န့ၣ် တပိၢ်အထူၣ် ကဒိၣ်ထီၣ်ထီထီၣ်ဧါ.

၁၂ ဖဲအကဘိၣ်ထီၣ် ဒီးတချုးလၢ အဆၢကတီၢ်ဘၣ်လၢ ပှၤကကျီအီၤ ဒံးဘၣ်န့ၣ်

အကဃ့ထီဆိလၢ တၢ်မုၢ်တၢ်ဘိ အဂၤတဖၣ် အမဲာ်ညါလီၤ.

၁၃ ပှၤလၢအသးပ့ၤနီၣ် ကစၢ်ယွၤန့ၣ် အတၢ်အိၣ်သး ကမၤအသး ဒ်န့ၣ်လီၤ.

ပှၤလၢအတပာ်ကဲယွၤဘၣ်န့ၣ်* အတၢ်မုၢ်လၢ် ကဟးဂီၤကွံာ်လီၤ.

၁၄ တၢ်လၢအဝဲ နာ်န့ၢ်ဝဲတဖၣ်န့ၣ် မ့ၢ်တၢ်ကလီကလီ

ဒီးဟးဂီၤဝဲညီ ဒ်ကပီၤလုၤ* အသိးလီၤ.

၁၅ အဝဲ ကသန့ၤအသး လၢအဟံၣ် ဘၣ်ဆၣ် အဟံၣ် ကလီၤပှီၢ်ဝဲလီၤ.

ဒီးကဖီၣ်ဂၢၢ်ဃာ်အဟံၣ် ဘၣ်ဆၣ် အဟံၣ် တဂၢၢ်ကျၢၤဘၣ်.

၁၆ အဝဲကလီၤဂာ်ဒ် တၢ်မုၢ်တၢ်ဘိလၢ အလါဟ့ လၢအဒိးန့ၢ်ဘၣ် မုၢ်အတၢ်ကပီၤ

ဒီးဒိးထီၣ်ဝဲလၢ ကရၢၢ်အပူၤ ပှဲၤပှဲၤလီၤ.+

၁၇ လၢလၢၢ်ပူၣ် အကျါန့ၣ် အဂံၢ်တဖၣ် ဘံဝးတရံးအသး

ဒီးအဃုဝဲ အဟံၣ်လၢ လၢၢ်တဖၣ် အကျါလီၤ.

၁၈ ဘၣ်ဆၣ် ဖဲပှၤထဲးထီၣ်ကွံာ်အီၤလၢ တၢ်လီၢ်ဖဲန့ၣ်အခါ

တၢ်လီၢ်အဝဲန့ၣ် ကသမၢအီၤ ဒီးကတဲအီၤလၢ ‘ယတထံၣ်ဘၣ်နၤ နီတဘျီမၢၤ.’+

၁၉ အဝဲကလီၤမၢ်ကွံာ်ဝဲ+ ဒ်န့ၣ်

ဒီးတၢ်မုၢ်တၢ်ဘိ လၢအဂၤ ကမဲထီၣ် လၢအလီၢ်လီၤ.

၂၀ ကစၢ်ယွၤ တပာ်တ့ၢ် ပှၤလၢအပၢၤဃာ် အတၢ်သးတီဘၣ်,

ဒီးအဝဲ တဆီၣ်ထွဲ ပှၤအၢပှၤသီ တဖၣ်ဘၣ်.

၂၁ အဝဲကမၤပှဲၤ နမဲာ်ဒီး တၢ်နံၤတၢ်အ့

ဒီးနထးခိၣ် ကကိးပသူထီၣ် လၢ တၢ်သးခု အပူၤလီၤ.

၂၂ ပှၤလၢအသးဟ့နၤန့ၣ် ကဒိးန့ၢ်ဘၣ် တၢ်မဲာ်ဆှးလီၤ.

ဒီးပှၤအၢပှၤသီတဖၣ် အဒဲန့ၣ် ကလီၤမၢ်ကွံာ်ဝဲလီၤ.”

၉ စီၤယိၤဘး တဲဆၢဝဲလၢ

၂ “တၢ်အဝဲန့ၣ်န့ၣ် ယသ့ၣ်ညါဧဲၤ.

ဘၣ်ဆၣ် လၢကစၢ်ယွၤ အမဲာ်ညါန့ၣ် ပှၤဟီၣ်ခိၣ်ဖိ တဲလီၤအသးလၢ အတီအလိၤ ကသ့ဒ်လဲၣ်.+

၃ ပှၤတဂၤ မ့ၢ်အဲၣ်ဒိး တဲအါတဲစှၤတၢ်ဒီးအီၤန့ၣ်*+

အတၢ်သံကွၢ် အဖျၢၣ်တကထိအကျါ တဖျၢၣ်ဒၣ်လဲာ် ပှၤတဂၤန့ၣ် စံးဆၢဝဲ တဘၣ်ဘၣ်.

၄ အဝဲ ကူၣ်တၢ်သ့ဒိၣ်မး* ဒီးအစိကမီၤဒိၣ် ဒိၣ်မးလီၤ.+

ပှၤလၢအထီဒါအီၤ ဒီးတဘၣ်ဒိဘၣ်ထံးဘၣ်န့ၣ် ကအိၣ်တဂၤဂၤဧါ.+

၅ အဝဲ သုးကွံာ်ကစၢၢ်တဖၣ် ဘၣ်ဆၣ် ပှၤတသ့ၣ်ညါဝဲ နီတဂၤဘၣ်.

အဝဲကျၢၢ်အီထီ ကစၢၢ်တဖၣ် လၢတၢ်သးဒိၣ် အပူၤလီၤ.

၆ အဝဲမၤဟူး ဟီၣ်ခိၣ်အဃိ

ဟီၣ်ခိၣ်အထူၣ်တဖၣ် ကနိးဝဲလီၤ.+

၇ အဝဲမၤလိာ်မုၢ် ဒ်သိး အသု တကပီၤလီၤ တဂ့ၤအဂီၢ်

ဒီးပာ်သဒၢဝဲ ဆၣ်သ့ၣ်တဖၣ် အတၢ်ကပီၤလီၤ.+

၈ အဝဲသလၣ်ထီၣ် မူခိၣ်လၢ အနီၢ်ကစၢ်+

ဒီးယီၢ်လီၤ ပီၣ်လဲၣ်အလပီ လၢအကစီၤထီၣ်ထီတဖၣ်လီၤ.+

၉ အဝဲတ့လီၤ ဆၣ်ကဆီ, ဆၣ်ယိးမါ ဒီးဆၣ်ဒၢမုၢ် အကရူၢ်တဖၣ်+

ဒီးဆၣ်ကရူၢ်တဖၣ် လၢမူခိၣ် အကလံၤထံးလီၤ.

၁၀ အမၤတၢ်လၢ အဒိၣ်အမုၢ် ဒီးအတၢ်မၤတဖၣ်န့ၣ် ပှၤနၢ်ပၢၢ်အီၤ တသ့ဘၣ်.+

ဒီးအတၢ်လီၤလိၢ်လီၤလးတဖၣ်န့ၣ် ပှၤဂံၢ်ကွၢ်အီၤ တလၢာ်ဘၣ်.+

၁၁ အဝဲလဲၤခီဂာ်တၢ်လၢ ယကပၤ ဘၣ်ဆၣ် ယထံၣ်အီၤတသ့ဘၣ်,

အဝဲ လဲၤတလၢယၤ ဘၣ်ဆၣ် ယတသ့ၣ်ညါထွဲဘၣ်.

၁၂ ဖဲအဖီၣ်ထုးန့ၢ် တၢ်တမံၤမံၤအခါ မတဂၤတြီအီၤ ကန့ၢ်လဲၣ်.

မတဂၤတဲအီၤလၢ ‘နမၤမနုၤလဲၣ်’ န့ၣ်ကသ့လဲၣ်.+

၁၃ ကစၢ်ယွၤ တပၢၤဃာ် အတၢ်သးဒိၣ်ဘၣ်+

အဃိ ပှၤလၢအမၤစၢၤ ရၤဃး*+ တဖၣ်ဒၣ်လဲာ် ကဆုးလီၤအခိၣ် လၢအမဲာ်ညါလီၤ.

၁၄ အဃိ ယမ့ၢ် တဲအါတဲစှၤတၢ်ဒီး ကစၢ်ယွၤန့ၣ်

ယကဘၣ်ဃုထၢ တၢ်ကတိၤ မူာ်မူာ်နီၢ်နီၢ် လၢယကစံးဆၢအီၤ အဂီၢ်သၢၤ.

၁၅ ယမ့ၢ် ဘၣ်သနာ်က့ ယစံးဆၢအီၤ တဘူၣ်ဘၣ်.+

အိၣ်ဒၣ်ထဲ ယကဘၣ်ဃ့ တၢ်သးကညီၤ လၢယစံၣ်ညီၣ်ကွီၢ် အအိၣ်လီၤ.

၁၆ ယမ့ၢ်ကိးထီၣ်အီၤ နာ်က့ မ့ၢ်အဝဲ ကစံးဆၢယၤဧါ.

ယဆိကမိၣ်လၢ အဝဲတဒိကနၣ် ယကလုၢ်ဘၣ်.

၁၇ အဝဲမၤသဘှံးယၤလၢ ကလံၤမုၢ်

ဒီးတၢ်ဂ့ၢ်တအိၣ် နီတမံၤဘၣ် သနာ်က့ အဝဲမၤအါထီၣ် ယတၢ်ပူၤလီၢ်တဖၣ်လီၤ.+

၁၈ အဝဲ တဒုးကသါယၤလၢၤဘၣ်,

အမၤအါထီၣ် ယတၢ်ကီတၢ်ခဲတဖၣ် ထီဘိလီၤ.

၁၉ မ့မ့ၢ်ဘၣ်ဃးဒီး တၢ်စိတၢ်ကမီၤန့ၣ် ကစၢ်ယွၤ မ့ၢ်ပှၤလၢအအိၣ်ဒီး တၢ်စိတၢ်ကမီၤ,+

ဒီးမ့မ့ၢ်လၢ တၢ်စံၣ်ညီၣ်တီ တကပၤန့ၣ် ကစၢ်ယွၤ တဲဝဲလၢ ‘မတဂၤ ဟံးန့ၢ်ယၤအရ့ ကသ့လဲၣ်.’

၂၀ ယမ့ၢ် ဘၣ်သနာ်က့ ယကစံၣ်ညီၣ်လီၤက့ၤ ဘၣ်ဖုးယသး ခီဖျိလၢ ယထးခိၣ်လီၤ.

ယမ့ၢ်ဆဲးအိၣ်ဒီး တၢ်သးတီဘၣ်ဆၣ် အဝဲကတဲလၢ ယတၢ်ကမၣ်အိၣ်လီၤ.

၂၁ ယမ့ၢ်ပၢၤဃာ် ယတၢ်သးတီဘၣ်ဆၣ် ယတနာ်လီၤယသးလၢၤဘၣ်.

ယသးလၢာ် ယတၢ်အိၣ်မူလီၤ.

၂၂ တၢ်တလီၤဆီလိာ်သး နီတမံၤဘၣ်. လၢတၢ်န့ၣ်အဃိ ယတဲလၢ

‘အဝဲမၤဟးဂီၤ ပှၤလၢအတၢ်ကမၣ် တအိၣ်ဘၣ်ဒီးပှၤအၢပှၤသီ ဒ်သိးသိးလီၤ.’

၂၃ ထံမ့ၢ်ဒိၣ်ထီၣ် သတူၢ်ကလာ်

ဒီးပှၤလၢအတၢ်ကမၣ် တအိၣ်ဘၣ်တဖၣ် မ့ၢ်သံဃုာ်ဒီး ပှၤဂၤတဖၣ် နာ်က့ ကစၢ်ယွၤကနံၤဝဲလီၤ.

၂၄ ကစၢ်ယွၤ ဟ့ၣ်လီၤ ဟီၣ်ခိၣ်အံၤလၢ ပှၤအၢပှၤသီ အစုပူၤလီၤ.+

အဝဲကးဘၢ ဟီၣ်ခိၣ် အစံၣ်ညီၣ်ကွီၢ်တဖၣ် အမဲာ်လီၤ.

ပှၤမၤတၢ်အဝဲန့ၣ် မ့တမ့ၢ်အီၤဘၣ်န့ၣ် ကမ့ၢ်မတဂၤလဲၣ်.

၂၅ ယတၢ်အိၣ်မူ တနံၤဘၣ်တနံၤ လဲၤပူၤကွံာ်အသး ချ့န့ၢ်ဒံး ပှၤဃ့ၢ်ပြၢတၢ်ဖိတဂၤ ဃ့ၢ်ဝဲ+

ဒီးယတထံၣ်ဘၣ် တၢ်သးခု နီတဘျီဘၣ်.

၂၆ ယတၢ်အိၣ်မူ လဲၤပူၤကွံာ် ဒ်ချံတဖၣ်လၢ ပှၤတ့အီၤလၢ တပိၢ်ဘိ

ဒီးလီၤဂာ်ဒ် လံာ်ကြီကြာ်လၢ အယူၤလီၤ စှီၤန့ၢ်အဆၣ် ချ့ချ့လီၤ.

၂၇ ယမ့ၢ်တဲလၢ ‘ယကသးပ့ၤနီၣ်ကွံာ် ယတၢ်ကဒူးကဒ့ၣ်,

ဒီးယကဆီတလဲ ယတၢ်ပာ်မဲာ်ပာ်နါ ဒီးယကသးခုက့ၤ’ နာ်က့

၂၈ မ့ၢ်လၢ ယတူၢ်ဘၣ်တၢ် ဆါနးမးအဃိ ယကပျံၤတၢ်ဒံးလီၤ.+

ဒီးယသ့ၣ်ညါလၢ နတထံၣ်ယၤဒ် ပှၤလၢ အတၢ်ကမၣ် တအိၣ်ဘၣ် န့ၣ်ဘၣ်.

၂၉ ပှၤကထံၣ်ယၤဒ် ပှၤလၢအတၢ်ကမၣ်အိၣ် အသိး

အဃိ ယမ့ၢ်ဟ့ၣ်အၡူခဲအံၤန့ၣ် ဝံၤလီၤ.+

၃၀ ယမ့ၢ်လုၢ် မူခိၣ်ဖီအထံ

ဒီးသ့စီ ယစုလၢ ဆးပၠၣ်နာ်က့+

၃၁ နကဘျၢလီၤယၤလၢ ကပံာ်ကျါ

အဃိ ယကူယကၤဒၣ်လဲာ် ကသးဘၣ်အၢယၤလီၤ.

၃၂ အဝဲတမ့ၢ် ပှၤကညီ ဒ်သိးဒီး ယၤဘၣ် အဃိ

ယကလဲၤထီၣ်ရူဒီးအီၤ လၢယကတဲဆၢက့ၤအီၤ အဂီၢ်န့ၣ် တန့ၢ်ဘၣ်.+

၃၃ ပှၤလၢအကကဲန့ၢ်ပှၤ စံၣ်ညီၣ်ကွီၢ်လၢ

အကစံၣ်ညီၣ်န့ၢ်တၢ်လၢ ပဘၢၣ်စၢၤန့ၣ် တအိၣ်ဘၣ်.

၃၄ အဝဲ မ့ၢ်တတီၢ်ယၤလၢၤဘၣ်

ဒီးမ့ၢ်တမၤပျံၤယၤလၢၤဘၣ်န့ၣ်+

၃၅ ယတဲတၢ်ဒီးအီၤ ကဘူၣ်

မ့ၢ်လၢ တၢ်ဂ့ၢ်အဂၤလၢ ယကဘၣ်ပျံၤအီၤန့ၣ် တအိၣ်လၢၤဘၣ် အဃိလီၤ.

၁၀ “ယသးဟ့လီၤ ယတၢ်အိၣ်မူ.+

ယက ကဒူးကဒ့ၣ်တၢ်

ဒီးယကတဲတၢ် လၢတၢ်သးအုးဖးဒိၣ် အပူၤလီၤ.

၂ ယကတဲ ကစၢ်ယွၤလၢ ‘တဘၣ်တဲလၢ ယတၢ်ကမၣ် အိၣ်တဂ့ၤ.

ဘၣ်မနုၤအဃိ နမၤထီၣ်နသးဒ် ယဒုၣ်ယဒါအသိးလဲၣ်န့ၣ် တဲယၤတက့ၢ်.

၃ နဘၣ်သူၣ်ဘၣ်သး ပှၤအၢပှၤသီ အတၢ်ဟ့ၣ်ကူၣ်

ဒီးနဆီၣ်တံၢ်မၤနၢၤယၤ ဒီးဆိကမိၣ်ဆံး တၢ်လၢနစုတ့အီၤန့ၣ်+

အကဲဘျုးလၢနဂီၢ် ဒ်လဲၣ်.

၄ မ့ၢ်နအိၣ်ဒီး ပှၤဟီၣ်ခိၣ်ဖိ အမဲာ်ချံ

ဒီးနထံၣ်တၢ်ဒ် ပှၤဟီၣ်ခိၣ်ဖိအသိးဧါ.

၅ မ့ၢ်နတၢ်အိၣ်မူဖုၣ် ဒ်ပှၤကညီ အသိးဧါ.

မ့ၢ်နအိၣ်မူထဲ စှၤကိာ်နံၣ် ဒ်ပှၤဟီၣ်ခိၣ်ဖိအသိး+

၆ လၢနကဃု ယတၢ်ကမၣ်

ဒီးနကဆဲးဃုကွၢ် ယတၢ်ဒဲးဘးန့ၣ်ဧါ.+

၇ နသ့ၣ်ညါလၢ ယတၢ်ကမၣ် တအိၣ်ဘၣ်+

ဒီးပှၤမၤပူၤဖျဲးယၤ လၢနစုပူၤ တန့ၢ်နီတဂၤဘၣ်.+

၈ နတ့လီၤယၤ လၢနစု+

ဒီးအခဲအံၤန့ၣ် နကမၤဟးဂီၤကွံာ်ယၤ လၢာ်လၢာ်ဆ့ဆ့လီၤ.

၉ ဝံသးစူၤ သ့ၣ်နီၣ်ထီၣ်လၢ နတ့လီၤယၤလၢ ကပံာ်,+

ဘၣ်ဆၣ် ခဲအံၤန့ၣ် နကဒုးကဲထီၣ်က့ၤယၤလၢ ဟီၣ်ခိၣ်ကမူၣ်လီၤ.+

၁၀ လၢညါန့ၣ် နလူလီၤယၤလၢ ယမိအဒၢလီၢ် ဒ်တၢ်နုၢ်ထံအသိး

ဒီးဒုးလီၤသကၤယၤ ဒ်တၢ်နုၢ်ထံ လီၤသကၤအသိးန့ၣ် တမ့ၢ်ဧီၤ.

၁၁ နဒုးကူဒုးသိးယၤလၢ ယညၣ်ဒီး ယဘ့ၣ်

ဒီးနတ့လီၤယၤ ဃုာ်ဒီး ယဃံ ဒီးယထူၣ်ယပျၢ်တဖၣ်လီၤ.+

၁၂ နဟ့ၣ်လီၤယၤ သးသမူ ဒီးတၢ်အဲၣ်လၢအတီ

ဒီးနဒီသဒၢ ဒီးအံးထွဲကွၢ်ထွဲ ယၤလီၤ.*+

၁၃ ဘၣ်ဆၣ် နတိာ်ပာ်ခူသူၣ်လၢ နကမၤအၢယၤ ဒ်အံၤလီၤ.

ယသ့ၣ်ညါလၢ တၢ်သ့ၣ်တဖၣ်အံၤ ဟဲလၢနအိၣ်လီၤ.

၁၄ နအိၣ်ခိးကွၢ်ယၤ+ ဒီးယမ့ၢ်မၤဘၣ်ဖုး တၢ်ဒဲးဘးန့ၣ်

နတပျၢ် ယတၢ်ကမၣ်ဘၣ်.

၁၅ ယတၢ်ကမၣ် မ့ၢ်အိၣ်န့ၣ် ကလီၤသးအုး လၢယဂီၢ်ထဲလဲၣ်.

ဒီးယတၢ်ကမၣ် မ့ၢ်တအိၣ်ဘၣ် သနာ်က့ မ့ၢ်လၢ ယမဲာ်ဆှးဒိၣ်မး ဒီးယဘၣ်နးဘၣ်ဖှီၣ် သပှၢ်တၢၢ်အဃိ+

ယမိာ်ထီၣ်ယခိၣ်မး တဘူၣ်ဘၣ်.+

၁၆ ယမ့ၢ် မိာ်ထီၣ်ယခိၣ်န့ၣ် နကပှီၤယၤ ဒ်ခ့ယုၢ်အသိး+

ဒီးနကမၤဘၣ်ဒိယၤ လၢနစိနကမီၤလီၤ.

၁၇ နကိးထီၣ် ပှၤအုၣ်အသးအသီတဖၣ် လၢကထီဒါယၤ

ဒီးနတၢ်သးဒိၣ်ထီၣ်ယၤ အါထီၣ်အါထီၣ်

အဃိ တၢ်ကီတၢ်ခဲ ဘၣ်ယၤ တခါဝံၤတခါလီၤ.

၁၈ ဘၣ်မနုၤအဃိ နဒုးဟးထီၣ်ယၤလၢ ယမိၢ်အဒၢလီၢ်လဲၣ်.+

ယကြၢးသံဖဲ တချုးပှၤထံၣ်ဘၣ်ယၤ နီတဂၤဒံးဘၣ်အခါလီၤ.

၁၉ ယမ့ၢ်သံဆိလၢ ယမိၢ်အဒၢလီၢ်ပူၤန့ၣ်

ပှၤကလဲၤစိာ်ယၤလၢ တၢ်သွၣ်ခိၣ် တဘျီဃီ ဒီးကလီၤဂာ်ဒ် ယတအိၣ်မူဘၣ် နီတဘျီဘၣ် အသိးလီၤ.’

၂၀ ယတအိၣ်မူ ယံာ်ယံာ်လၢၤဘၣ်.+ အဃိ မ်ကစၢ်ယွၤ သုတကနၣ်ဃုာ်ယၤလၢၤတဂ့ၤ.

ဒီးမ်အဝဲ ဃၣ်ကွံာ်အသးလၢယအိၣ် ဒ်သိး ယကကိညၢ်လီၤတစဲး အဂီၢ်တက့ၢ်.+

၂၁ တယံာ်ဘၣ်န့ၣ် ယကလဲၤလၢ တၢ်လီၢ်လၢ အခံးဒိၣ်ကတၢၢ်+

ဒီးယတဟဲက့ၤလၢၤဘၣ်.+

၂၂ တၢ်လီၢ်အဝဲန့ၣ် ပှဲၤဒီးတၢ်ခံးသူ,

တၢ်ကဒု ဒီးတၢ်ဘံဘူစၢၤသၢလီၤ.

ဖဲန့ၣ်န့ၣ် တၢ်ကပီၤစ့ၢ်ကီး လီၤဂာ်ဒ်သိးဒီး တၢ်ခံးတၢ်နၤလီၤ.”

၁၁ ပှၤနၤမးဖိ စီၤစိဖၢ်+ တဲဆၢဝဲလၢ

၂ “နတၢ်ကတိၤ သ့ၣ်တဖၣ်အံၤန့ၣ် မ့ၢ်ပှၤတကြၢး စံးဆၢက့ၤအီၤဟီဧါ.

ဒီးနတဲတၢ်အါ အဃိ အခီပညီ နတဲတၢ် ဘၣ်န့ၣ်ဧါ.

၃ နဆိကမိၣ်လၢ နတၢ်ကတိၤ ကလီကလီတဖၣ်န့ၣ် ကမၤဘှ့ၣ် ပှၤဂၤစ့ၢ်ကီးဧါ.

နဆိကမိၣ်လၢ ပှၤကသိၣ်နၤလၢ နတၢ်ကတိၤဆဲးအဲးတဖၣ်အံၤ အဃိန့ၣ် တအိၣ်နီတဂၤဘၣ်ဟီဧါ.+

၄ နတဲလၢ နတၢ်သိၣ်လိ တဖၣ်န့ၣ် ဘၣ်ဝဲ+

ဒီးကစၢ်ယွၤ ထံၣ်နၤဒ် ပှၤလၢအကဆှီ အသိးလီၤ.+

၅ ဘၣ်ဆၣ် ကစၢ်ယွၤ မ့ၢ်အိးထီၣ် အထးခိၣ်

ဒီးတဲတၢ်ဒီးနၤန့ၣ်+

၆ အဝဲကပာ်ဖျါထီၣ်န့ၢ်နၤ တၢ်ခူသူၣ်တဖၣ်လၢ အဒုးကူၣ်ဘၣ်ကူၣ်သ့နၤ

မ့ၢ်လၢ တၢ်ကူၣ်သ့ နီၢ်ကီၢ်န့ၣ် အကျိၤအကျဲ အသနၢၣ် အိၣ်ဝဲအါမး အဃိလီၤ.

ဒီးဖဲန့ၣ် နကသ့ၣ်ညါဘၣ်လၢ ကစၢ်ယွၤန့ၣ် ကွၢ်ကပာ်ကွံာ်ဝဲ နတၢ်ကမၣ်တနီၤလံ.

၇ နဃုကွၢ် ကစၢ်ယွၤ အတၢ်ကူၣ်သ့

ဒီးသ့တၢ်လၢာ်ကစၢ် အဂ့ၢ် ခဲလၢာ်ကသ့ဧါ.

၈ အတၢ်ကူၣ်သ့န့ၣ် ထီန့ၢ်မူခိၣ် အဃိ နသ့ၣ်ညါအီၤ တစဲးစဲးလံဧါ.

ဒီးအယိာ်န့ၢ်ဒံး တၢ်သွၣ်ခိၣ်* အဃိ နသ့ၣ်ညါအီၤ တစဲးစဲးလံဧါ.

၉ ဒီးအတၢ်ကူၣ်သ့န့ၣ် ဒိၣ်န့ၢ်ဟီၣ်ခိၣ်

ဒီးလဲၢ်န့ၢ် ပီၣ်လဲၣ်လီၤ.

၁၀ အဝဲ မ့ၢ်ဟဲဖီၣ်န့ၢ် ပှၤတဂၤဂၤ ဒီးလဲၤကိးအီၤလၢ စံၣ်ညီၣ်ကွီၢ် အရူန့ၣ်

မတဂၤတြီအီၤ ကသ့လဲၣ်.

၁၁ ကစၢ်ယွၤ သ့ၣ်ညါဝဲ ပှၤလၢအလံၣ်တၢ်လီတၢ်လီၤ.

ဖဲအဝဲထံၣ် ပှၤမၤတၢ်အၢတၢ်သီအခါ အဝဲတပာ်သူၣ်ပာ်သးဘၣ်န့ၣ် ကအိၣ်ဧါ.

၁၂ ဘၣ်ဆၣ် ကသ့ၣ်ယီၤမံၤ မ့ၢ်အိၣ်ဖျဲၣ်ထီၣ်ဝဲ ပှၤဟီၣ်ခိၣ်ဖိမး

ပှၤလၢ အခိၣ်နူာ် တအိၣ်ဘၣ်တဂၤန့ၣ် ကနၢ်ပၢၢ်ထီၣ်တၢ်လီၤ.

၁၃ ဆီတလဲ နတၢ်ပာ်သူၣ်ပာ်သး

ဒီးဃ့ဘါထုကဖၣ်လၢ ကစၢ်ယွၤ အအိၣ်သၢၤ.

၁၄ နမ့ၢ်မၤတၢ်ကမၣ်န့ၣ် တဘၣ်မၤအီၤလၢၤတဂ့ၤ.

တဘၣ်ပျဲလၢ တၢ်တတီတလိၤ ကအိၣ်လၢ နဒဲပူၤနီတစဲးတဂ့ၤ.

၁၅ နမ့ၢ်မၤထွဲဒ်န့ၣ်န့ၣ် နမိာ်ထီၣ်နခိၣ်ကဘူၣ် ဒီးနတလိၣ်မဲာ်ဆှးလၢၤဘၣ်

ဒီးနကဆၢထၢၣ်ဂၢၢ်ကျၢၤ ဒီးနတလိၣ်ပျံၤတၢ်လၢၤဘၣ်.

၁၆ ဒီးနကသးပ့ၤနီၣ် နတၢ်ကီတၢ်ခဲတဖၣ်

ဒီးနကသးပ့ၤနီၣ်ကွံာ်အီၤ ဒ်ထံလၢ အယွၤလီၤကွံာ် လၢအယံၤန့ၣ်လီၤ.

၁၇ နတၢ်အိၣ်မူ ကကပီၤန့ၢ်ဒံး မုၢ်ထူၣ် အတၢ်ကပီၤ

ဒီးတၢ်ခံး ဒၣ်လဲာ် ကလီၤဂာ်ဒ် မုၢ်ဝါထီၣ်အသိးလီၤ.

၁၈ မ့ၢ်လၢ နကအိၣ်ဒီး တၢ်မုၢ်လၢ်အဃိ နတဘၣ်ယိၣ်တၢ် လၢခါဆူညါ အဂီၢ်လၢၤဘၣ်.

ဒီးနကကွၢ်တရံးတၢ်လၢ နခိၣ်နဃၢၤ ဝံၤဒီးနကမံလီၤဘၣ် လၢတၢ်ဘံၣ်တၢ်ဘၢ အပူၤလီၤ.

၁၉ နကမံနီၤလီၤ ဒီးပှၤမၤပျံၤမၤဖုးနၤ တအိၣ်နီတဂၤဘၣ်.

ဒီးပှၤအါဂၤ ကအဲၣ်ဒိးလၢ နဘၣ်သူၣ်ဘၣ်သးအီၤလီၤ.

၂၀ မ့မ့ၢ် ပှၤအၢပှၤသီန့ၣ် အမဲာ်ကခံးလီၤ

ဒီးအဝဲသ့ၣ် တထံၣ်န့ၢ် တၢ်ပူၤဖျဲးအလီၢ်ဘၣ်.

ဒီးအဝဲသ့ၣ် အိၣ်ဒီး တၢ်မုၢ်လၢ်ထဲတခါ လၢအမ့ၢ် တၢ်သံလီၤ.”+

၁၂ စီၤယိၤဘး တဲဆၢဝဲလၢ

၂ “သုသ့ၣ်ညါတၢ်ဂ့ၤမးလဲၣ်.

သုမ့ၢ်သံဒု ပှၤကူၣ်တၢ်သ့ တအိၣ်တ့ၢ်နီတဂၤလၢၤဘၣ်.

၃ ယၤစ့ၢ်ကီး ယတၢ်သ့ၣ်ညါနၢ်ပၢၢ် အိၣ်ဧဲၤ.

ယတအိၣ်တ့ၢ်လၢ သုလီၢ်ခံဘၣ်.

တၢ်လၢသုတဲအီၤတဖၣ်န့ၣ် ပှၤလၢအတသ့ၣ်ညါဘၣ်န့ၣ် ကအိၣ်ဧါ.

၄ မ့ၢ်လၢ ယကိးထီၣ်ကစၢ်ယွၤ ဒီးမုၢ်လၢ်လၢ အကစံးဆၢယၤအဃိ+

ယသကိးတဖၣ် နံၤဘၣ်ယၤလံ.+

ပှၤလၢအတီအလိၤ ဒီးအတၢ်ကမၣ် တအိၣ်ဘၣ်န့ၣ် ကဲထီၣ်တၢ်လီၤနံၤလၢ ပှၤဂီၢ်လံ.

၅ ပှၤလၢ အအိၣ်ဘၣ်ဘီၣ်ဘီၣ်ညီညီန့ၣ် ဆိကမိၣ်ဆံး ပှၤလၢအဘၣ်ကီ ဘၣ်ခဲတဖၣ်,

ဒီးဆိကမိၣ်ဝဲလၢ တၢ်ကီတၢ်ခဲတဖၣ်န့ၣ် ဘၣ်ထဲပှၤလၢ အခီၣ်တဂၢၢ် တကျၢၤဘၣ်တဖၣ်လီၤ.

၆ တမျာ်တဖၣ်န့ၣ် အိၣ်ဘၣ်မုာ်မုာ် ခုၣ်ခုၣ် လၢအဒဲပူၤ,+

ဒီးပှၤလၢ အစိာ်တၢ်ဂီၤတၢ်ဖှီၣ်တဖၣ် ဒီးအမၤသးထီၣ် ကစၢ်ယွၤန့ၣ်

အိၣ်ဘၣ်ဘံၣ်ဘံၣ်ဘၢဘၢလီၤ.+

၇ ဝံသးစူၤ သံကွၢ်တၢ်လၢ ဆၣ်ဖိကီၢ်ဖိတဖၣ်အအိၣ် ဒီးအဝဲသ့ၣ် ကသိၣ်လိနၤ

ဒီးထိၣ်တဖၣ်လၢမူခိၣ်န့ၣ် ကတဲဘၣ်နၤလီၤ.

၈ ဆိကမိၣ်ကွၢ် တၢ်အိၣ်လၢ ဟီၣ်ခိၣ်တဖၣ်အဂ့ၢ် ဒီးနကန့ၢ်ဘၣ် တၢ်မၤလိလီၤ.

ဒီးညၣ်လၢ အအိၣ်လၢ ပီၣ်လဲၣ်ပူၤန့ၣ် ကတဲဘၣ်နၤ တၢ်မ့ၢ်တၢ်တီလီၤ.

၉ လၢယဟိဝၤယွၤ အတၢ်ဘၣ်တ့တဖၣ်အံၤအကျါ တၢ်ဘၣ်တ့

လၢအတသ့ၣ်ညါ တၢ်ဂ့ၢ်တဖၣ်အံၤဘၣ်န့ၣ် ကအိၣ်ဧါ.

၁၀ တၢ်သးသမူခဲလၢာ် ဒီးပှၤဟီၣ်ခိၣ်ဖိကိးဂၤဒဲး အသးန့ၣ်*

အိၣ်လၢအစုပူၤလီၤ.+

၁၁ ဒ်ပျ့ၤလ့ၣ်ကွၢ် တၢ်အီၣ်အသိး

နၢ်န့ၣ် ဒိကနၣ်တၢ်လၢ ပှၤတဲဝဲတဖၣ်ထံထံ ဒ်သိး ကနီၤဖးဝဲ တၢ်အဘၣ် ဒီးတၢ်အကမၣ် အဂီၢ်လီၤ.+

၁၂ ပှၤလၢအသးပှၢ်န့ၣ် အိၣ်ဒီး တၢ်ကူၣ်သ့+

ဒီးပှၤလၢ အသးသမူထီန့ၣ် သ့ၣ်ညါနၢ်ပၢၢ်တၢ် တမ့ၢ်ဧီၤ.

၁၃ ကစၢ်ယွၤ အိၣ်ဒီး တၢ်ကူၣ်သ့ ဒီးအဂံၢ်ဆူၣ်ဘါဆူၣ်+

ဒီးအဝဲအိၣ်ဒီး တၢ်ကူၣ်ထီၣ်ဖးလီၤ ဒီးတၢ်သ့ၣ်ညါနၢ်ပၢၢ်လီၤ.+

၁၄ ဖဲအဝဲ မၤလီၤပှီၢ်တၢ် တမံၤမံၤအခါ ပှၤတ့ထီၣ်က့ၤအီၤ တသ့ဘၣ်.+

ဖဲအဝဲ ကးတံာ်တၢ်အခါ ပှၤအိးထီၣ်အီၤ တသ့နီတဂၤဘၣ်.

၁၅ ဖဲအဝဲတြီဃာ်ထံအခါ တၢ်ဃ့ထီကွံာ်ခဲလၢာ်+

ဒီးဖဲအဝဲ ပျၢ်လီၤကွံာ် ထံအခါ ထံလုၢ်ဘၢတၢ်လီၤ.+

၁၆ အဝဲအိၣ်ဒီး တၢ်ဂံၢ်တၢ်ဘါ ဒီးတၢ်ကူၣ်သ့+

ဒီးပှၤလၢ အလဲၤကမၣ်ကျဲ ဒီးပှၤလၢအဒုးလဲၤကမၣ် ပှၤဂၤအကျဲန့ၣ် အိၣ်လၢအစုပူၤလီၤ.

၁၇ အဝဲမၤမဲာ်ဆှး ပှၤဟ့ၣ်ကူၣ်တၢ်ဖိတဖၣ်

ဒီးမၤပျုၢ် စံၣ်ညီၣ်ကွီၢ်တဖၣ်လီၤ.+

၁၈ အဝဲမၤလီၤမၢ်ကွံာ် စီၤပၤတဖၣ် အစိအကမီၤ+

ဒီးစၢထီၣ် စီၤပၤတဖၣ် အယီၢ်ဒ့လၢ ကုၢ်အယီၢ်တကိးလီၤ.*

၁၉ အဝဲ ကမၤမဲာ်ဆှး ပှၤလုၢ်တၢ်ဒိၣ်တဖၣ်+

ဒီးအဝဲ မၤဟးဂီၤကွံာ် ပှၤလၢ အဆၢထၢၣ်ဂၢၢ်ကျၢၤတဖၣ် အတၢ်စိတၢ်ကမီၤလီၤ.+

၂၀ အဝဲ ကးဘၢဝဲ ပှၤဟ့ၣ်ကူၣ်တၢ်လၢ ပှၤနာ်အီၤသ့တဖၣ် အကိာ်ပူၤလီၤ.

ဒီးအဝဲထုးထီၣ်ကွံာ် ပှၤသးပှၢ်တဖၣ် အတၢ်ကူၣ်သ့လီၤ.

၂၁ အဝဲ ဆိကမိၣ်ဆံး ပှၤဒိၣ်ပှၤပှၢ်တဖၣ်+

ဒီးအဝဲ မၤစၢ်လီၤ ပှၤလၢအအိၣ်ဒီး အစိအကမီၤလီၤ.

၂၂ ဒီးတၢ်လၢအအိၣ်ခူသူၣ် လၢတၢ်ခံးကျါန့ၣ် အဝဲ လီၣ်ဖျါထီၣ်ဝဲ+

ဒီးအဝဲ မၤကပီၤထီၣ် တၢ်ခံးယိာ်လီၤ.

၂၃ အဝဲ မၤဆူၣ်ထီၣ် ပှၤကလုာ်တဖၣ် ဒ်သိး ကမၤဟးဂီၤကွံာ် အဝဲသ့ၣ်

ဒီးမၤလဲၢ်ထီၣ် အဝဲသ့ၣ် အဟီၣ်ကဝီၤ ဒ်သိး အကနီဟးထီၣ်ကွံာ် အဝဲသ့ၣ်အဂီၢ်လီၤ.

၂၄ အဝဲ ဟံးထီၣ်ကွံာ် ပှၤဂီၢ်မုၢ် အခိၣ်အနၢ်တဖၣ် အတၢ်သ့ၣ်ညါနၢ်ပၢၢ်

ဒီးဒုးဟးဝ့ၤဝီၤ အဝဲသ့ၣ်လၢ ပှၢ် မုၢ်ကနၢလၢ ကျဲတအိၣ်ဘၣ်အပူၤလီၤ.+

၂၅ အဝဲသ့ၣ် ဟးကလၢၢ်တၢ်လၢ တၢ်ခံးကျါ+ လၢတၢ်ကပီၤ တအိၣ်ဘၣ် အလီၢ်န့ၣ်လီၤ.

ဒီးကစၢ်ယွၤ ဒုးဟးအဝဲသ့ၣ် ကနူၤကပၤ ဒ်ပှၤမူၤသံးအသိးလီၤ.+

၁၃ “ယထံၣ်ဘၣ် တၢ်သ့ၣ်တဖၣ်န့ၣ်ခဲလၢာ်

ဒီးယနၢ်ဟူဘၣ် ဒီးယနၢ်ပၢၢ်အီၤလံ.

၂ တၢ်လၢသုသ့ၣ်ညါန့ၣ် ယသ့ၣ်ညါလီၤ.

ဒီးယတအိၣ်တ့ၢ်လၢ သုလီၢ်ခံဘၣ်.

၃ မ့မ့ၢ်ယၤန့ၣ် ယအဲၣ်ဒိးတဲတၢ်ဒီး သ့တၢ်လၢာ်ကစၢ်လီၤ.

ဘၣ်ဃးဒီး ယတၢ်ဂ့ၢ်န့ၣ် ယအဲၣ်ဒိး တဲအါလိာ်သးဒီး ကစၢ်ယွၤလီၤ.+

၄ မ့မ့ၢ်သုန့ၣ် သုဖှူဘၣ်အၢယၤလၢ တၢ်လံၣ်တၢ်လီတဖၣ်

ဒီးသုဝဲသ့ၣ်ခဲလၢာ်န့ၣ် မ့ၢ်ကသံၣ်သရၣ်တဖၣ်လၢ အတကျိးဘၣ်.+

၅ သုမ့ၢ်အိၣ်ဘှ့ၣ်ကလာ်န့ၣ်

သုကပာ်ဖျါထီၣ်လၢ သုမ့ၢ်ပှၤလၢ အအိၣ်ဒီး တၢ်ကူၣ်သ့လီၤ.+

၆ ဝံသးစူၤ ဒိကနၣ် တၢ်လၢယက တဲဖျါထီၣ်

ဒီးသးစၢၢ်ဆၢ ယတၢ်စံးဆၢသၢၤ.

၇ မ့ၢ်သုကတဲတၢ် တတီတလိၤလၢ ကစၢ်ယွၤ အမံၤအပူၤဧါ.

ဒီးဖဲသုတဲတၢ်လၢ ကစၢ်ယွၤ အခၢၣ်စးအခါ မ့ၢ်သုကတဲလံၣ် တဲလီတၢ်ဧါ.

၈ မ့ၢ်သုကအိၣ် လၢအအိၣ် တကပၤဧါ.

မ့ၢ်သုကတဲန့ၢ်တၢ်လၢ ယွၤလၢအမ့ၢ်အတီတဂၤ အတၢ်ဂ့ၢ်အဂီၢ်ဧါ.

၉ အဝဲ မ့ၢ်သမံသမိးကွၢ်သုန့ၣ် မ့ၢ်အကဘၣ်သူၣ်ဘၣ်သးသုဧါ.+

သုလံၣ်အီၣ်လီအီၣ် ကစၢ်ယွၤ ဒ်သုမၤ ပှၤဟီၣ်ခိၣ်ဖိအသိး ကန့ၢ်ဧါ.

၁၀ သုမ့ၢ်အိၣ်ဃူ ကစၢ်ယွၤ လၢတၢ်ခူသူၣ်အပူၤ ဒ်သိး သုကမၤယၤ တတီတလိၤ အဂီၢ်န့ၣ်

အဝဲ ကသိၣ်ဃီၣ်သု သပှၢ် ကတၢၢ်လီၤ.+

၁၁ အတၢ်လၤကပီၤန့ၣ် တလီၤပျံၤ ဘၣ်သုဧီၤ.

ဒီးသုတပျံၤအီၤဧီၤ.

၁၂ သုတၢ်ကတိၤလၢအအိၣ်ဒီး တၢ်ကူၣ်သ့န့ၣ် လီၤဂာ်ဒ်သိးဒီး ဖၣ်ဆါအ့ၣ်လၢ အဘျုးတအိၣ်ဘၣ်.

သုတၢ်စံးဆၢန့ၣ် ကၢ်ကွံာ်ဝဲညီညီဖိ ဒ်သိးဒီး ကတီၤလၢ ပှၤတ့အီၤလၢ ကပံာ်လီၤ.

၁၃ ဒ်သိး ယကတဲဘၣ်တၢ်အဂီၢ် အိၣ်ဘှ့ၣ်န့ၢ်ယၤသၢၤ.

ဒီးတၢ်လၢ ကဟဲဘၣ်ယၤန့ၣ် ကဘၣ်ဒၣ်ဝဲ.

၁၄ တၢ်ဘၣ်ယိၣ်အလီၢ်လၢ ယသးသမူအဂီၢ် မ့ၢ်အိၣ်သနာ်က့ ယအိၣ်ကတဲာ်ကတီၤပာ်စၢၤယသးလံ

ဒီးယသံဘူၣ်လံ.

၁၅ အဝဲ မ့ၢ်ကမၤသံယၤဒၣ်လဲာ် ယကအိၣ်ခိးအီၤဒံး+

ဒီးဘၣ်ဃးဒီး ယတၢ်ဂ့ၢ်န့ၣ် ယကတဲအါလိာ်သးဒီးအီၤလီၤ.

၁၆ ဒီးအဝဲ ကကဲထီၣ် ယတၢ်အုၣ်က့ၤ ခီၣ်က့ၤ+

မ့ၢ်လၢ ပှၤလၢ အတပာ်ကဲယွၤဘၣ်န့ၣ်* ဟဲလၢ ကစၢ်ယွၤ အမဲာ်ညါ တသ့နီတဂၤဘၣ် အဃိလီၤ.+

၁၇ ကနၣ်ယတၢ်ကတိၤ ထံထံ

ဒီးသးစၢၢ်ဆၢ တၢ်လၢ ယတဲအီၤသၢၤ.

၁၈ ကွၢ်မီၤ, ခဲအံၤ ယကတဲာ်ကတီၤထီၣ် ယတၢ်မူးတၢ်ရၢ်လံ.

ဒီးယသ့ၣ်ညါလၢ ယတၢ်ဘၣ်လီၤ.

၁၉ မတဂၤ ကတဲအါလိာ်သးဒီးယၤလဲၣ်.

ယမ့ၢ်ဘၣ်အိၣ်ဘှ့ၣ်ဒု ယကသံလီၤ.

၂၀ ကစၢ်ယွၤဧၢ, ယကဃ့နၤတၢ် ထဲခံမံၤ

ဒီးယတပာ်သဒၢယသး လၢနမဲာ်ညါလၢၤဘၣ်.

၂၁ ထုးထီၣ်ကွံာ် နစုလၢအဃၢ လၢယအိၣ်

ဒီးမၤပျံၤယၤလၢၤတဂ့ၤ.+

၂၂ တဲဆိတၢ် ဒီးယကစံးဆၢနၤ,

မ့တမ့ၢ် ပျဲယတဲဆိတၢ် ဒီးစံးဆၢယၤမီၤ.

၂၃ ယတၢ်ကမၣ် ဒီးယတၢ်ဒဲးဘး အိၣ်ဒ်လဲၣ်.

ပာ်ဖျါထီၣ်န့ၢ်ယၤ ယတၢ်ကမၣ် ဒီးယတၢ်ဒဲးဘးသၢၤ.

၂၄ ဘၣ်မနုၤအဃိ နပာ်ခူသူၣ်နမဲာ်+

ဒီးထံၣ်ယၤဒ် နဒုၣ်နဒါ အသိးလဲၣ်.+

၂၅ မ့ၢ်နကမၤပျံၤသ့ၣ်လၣ်လၢ ကလံၤအူဖျိးဝဲ

ဒီးနကလူၤ လီၢ်ဘိ* လၢအဃ့ထီ န့ၣ်ဧါ.

၂၆ နကွဲးနီၣ်ကွဲးဃါ တၢ်ဂ့ၢ်လၢ နပာ်ဒ့ၣ်ပာ်ကမၣ်ယၤတဖၣ်

ဒီးနသိၣ်ဃီၣ်ယၤ ဘၣ်ဃးဒီး ယတၢ်ဒဲးဘးလၢ ယမၤဘၣ်တ့ၢ် ဖဲယသးစၢ်အခါလီၤ.

၂၇ နကျီၤတံၢ်ဃာ် ယခီၣ်လၢသ့ၣ်ကျီၤ,

ဒီးဖဲယလဲၤ တပူၤဂ့ၤတပူၤဂ့ၤ နကွၢ်ယၤ ထံထံဆးဆးလီၤ.

ဒီးယခီၣ်လီၢ်တဖၣ်ဒၣ်လဲာ် နလူၤမၤနီၣ်ဃာ်အီၤလီၤ.

၂၈ အဃိ ပှၤဟီၣ်ခိၣ်ဖိန့ၣ်* အုၣ်သံကျၣ်သံဒ် တၢ်အုၣ်တၢ်ကျၣ် အသိး

ဒီးဒ်တၢ်ကူတၢ်ကၤလၢ အဃၢ်အီၣ်ကွံာ်အီၤ အသိးလီၤ.

၁၄ “ပှၤလၢ ပှၤပိာ်မုၣ် အိၣ်ဖျဲၣ်ထီၣ်အီၤန့ၣ်

အတၢ်အိၣ်မူဖုၣ်+ ဒီးပှဲၤဒီး တၢ်ကီတၢ်ခဲလီၤ.+

၂ အဝဲလီၤဂာ်ဒ် ဖီတဖိးလၢ အဖီထီၣ် ဝံၤဒီး လီၤညွံးလီၤဘဲဝဲအသိး+

ဒီးအဝဲ လဲၤပူၤကွံာ်ဝဲဒ် တၢ်အကဒုအသိး ဒီးလီၤမၢ်ကွံာ်ဝဲလီၤ.+

၃ နကွၢ်ထံကွၢ်ဆးအီၤ

ဒီးနကိးထီၣ်အီၤလၢ စံၣ်ညီၣ်ကွီၢ် အရူလီၤ.+

၄ ပှၤလၢအတကဆှီဘၣ် အိၣ်ဖျဲၣ်ထီၣ် ပှၤလၢအကဆှီ ကသ့ဧါ.+

ပှၤမၤတသ့ နီတဂၤဘၣ်.

၅ အမုၢ်နံၤတဖၣ်န့ၣ် ဘၣ်တၢ်ဆၢတဲာ်ပာ်စၢၤအီၤ

ဒီးအလါတဖၣ်န့ၣ် အိၣ်လၢ နစုပူၤလီၤ.

ပှၤဟီၣ်ခိၣ်ဖိ ကအိၣ်မူဘၣ်အယံာ်ကတၢၢ် ထဲလဲၣ်န့ၣ် နပာ်ပနီၣ်ဃာ်ဝံၤလံ အဃိ အဝဲသ့ၣ် အိၣ်မူ ယံာ်န့ၢ်အန့ၣ် တသ့ဘၣ်.+

၆ ပှၤဟီၣ်ခိၣ်ဖိ လီၤဂာ်ဒ်သိးဒီး ပှၤလၢအဒိးငါလီၤအသးတဂၤလီၤ.

အဃိ ဒ်သိးအဝဲ မၤအတၢ်မၤလၢ တနံၤအဂီၢ် တုၤလၢအဝံၤ ကန့ၢ်အဂီၢ် ဃၣ်ကွံာ်နမဲာ်လၢအအိၣ် ဒီးမၤကိၢ်မၤဂီၤအီၤတဂ့ၤ.+

၇ ပှၤမ့ၢ်ကူာ်လီၤကွံာ် သ့ၣ်ထူၣ်သနာ်က့

ပမုၢ်လၢ်ဒံးလၢ အကဒိးထီၣ်က့ၤလၢ အသီတဘျီကဒီး

ဒီးအဒ့တဖၣ် ကဆဲးဒိၣ်ထီၣ်လီၤ.

၈ အဂံၢ်မ့ၢ်ပှၢ်ထီၣ်ဝဲလၢ ဟီၣ်ခိၣ်လာ်

ဒီးအခိၣ်ဆၢၣ် မ့ၢ်ဃ့ထီဝဲဘၣ်ဆၣ်

၉ အမ့ၢ်အီဘၣ်ထံန့ၣ် အက ဒိးထီၣ်ဝဲလီၤ.

ဒီးအဒ့တဖၣ် ကဟဲထီၣ်ဝဲဒ် သ့ၣ်ဖိ မဲထီၣ်သီသီ အသိးလီၤ.

၁၀ ဘၣ်ဆၣ် ဖဲပှၤတဂၤသံအခါ အစိကမီၤ လီၤမၢ်ကွံာ်ဝဲလီၤ.

ဖဲပှၤဟီၣ်ခိၣ်ဖိတဂၤ အသးသမူကတၢၢ်ကွံာ်အခါ အဝဲလဲၤအိၣ် ဖဲလဲၣ်.+

၁၁ ပီၣ်လဲၣ်အထံ လီၤသံးကွံာ်

ဒီးထံကျိအထံ သဝံထီၣ် ဒီးထံကျိန့ၣ် ဃ့ထီကွံာ်ဝဲလီၤ.

၁၂ ဒ်န့ၣ်အသိး ပှၤကညီ မ့ၢ်သံန့ၣ် အဝဲသ့ၣ် တဆၢထၢၣ်လၢၤဘၣ်.+

ဖဲမူခိၣ်အိၣ်ဒံးအခါ အဝဲသ့ၣ် တပၢၢ်ထီၣ်ဘၣ်,

ဒီးအဝဲသ့ၣ် ကဆဲးမံဝဲလီၤ.+

၁၃ ဝံသးစူၤ ပာ်သဒၢယၤလၢ တၢ်သွၣ်ခိၣ်* အပူၤ+

ဒီးပာ်ခူသူၣ်ယၤ တုၤလၢ နတၢ်သးထီၣ် ခုၣ်လီၤကွံာ်

ဒီးပာ်ပနီၣ်ဃာ် တၢ်ဆၢကတီၢ် လၢနကသ့ၣ်နီၣ်ထီၣ်ယၤ အဂီၢ်တက့ၢ်.+

၁၄ ပှၤတဂၤမ့ၢ်သံန့ၣ် မ့ၢ်အကမူထီၣ် က့ၤဒံးဧါ.+

ယကအိၣ်ခိး တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ* ဒီတကတီၢ်အပူၤ

တုၤလၢ တၢ်မၤပူၤဖျဲးယၤ ဟဲဝဲအခါလီၤ.+

၁၅ နကကိးထီၣ် ဒီးယကစံးဆၢနၤလီၤ.+

မ့ၢ်လၢ နတ့လီၤယၤအဃိ နကဆၢထံၣ်ဘၣ်က့ၤယၤ သပှၢ်တၢၢ်လီၤ.

၁၆ ဘၣ်ဆၣ် မ့မ့ၢ်ခဲအံၤန့ၣ် နကွၢ်ဟုၣ် ယခီၣ်ခါထီဘိ,

ဒီးနဃုထဲယတၢ်ကမၣ်လီၤ.

၁၇ ယတၢ်ကမၣ်န့ၣ် ဘၣ်တၢ်ဘိၣ်ဃာ်အီၤ လၢထၢၣ်ပူၤ

ဒီးနပံးတံာ်ဃာ်ထၢၣ်လၢကီၣ် ဒ်သိး နကပာ်ဃာ် ယတၢ်ကမၣ်ဂ့ၤဂ့ၤအဂီၢ်လီၤ.

၁၈ ဒ်ကစၢၢ် လီၤပှီၢ် ဒီးလီၤကလဲ ကွံာ်ဝဲအသိး

ဒီးဒ်လၢၢ်တဖျၢၣ် ဖျိးထီၣ်ကွံာ်လၢ လ့အလိၤအသိး

၁၉ ဒီးဒ်ထံအီၣ်ကွံာ် လၢၢ်တဖၣ် ကယီကယီ

ဒီးအယွၤလီၤဆူၣ်ဆူၣ် ဒီးစိာ်ကွံာ် ဟီၣ်ခိၣ်ညၣ်ထ့ၣ်အသိး

နမၤဟးဂီၤကွံာ် ပှၤဟီၣ်ခိၣ်ဖိ အတၢ်မုၢ်လၢ်လီၤ.

၂၀ နမၤနၢၤအီၤ တုၤလၢအသံလီၤ.+

နဆီတလဲ အက့ၢ်အဂီၤ ဒီးဆှၢအီၤလၢ တၢ်သွၣ်ခိၣ်လီၤ.

၂၁ ဒီးအဖိခွါတဖၣ် ဒိးန့ၢ်ဘၣ်ဝဲ တၢ်လၤကပီၤမ့ၢ်ဂ့ၤ

ပှၤဆိကမိၣ်ဆံး အဝဲသ့ၣ်မ့ၢ်ဂ့ၤ အဝဲတသ့ၣ်ညါဝဲဘၣ်.+

၂၂ ဘၣ်ဆၣ် ဖဲအဝဲအိၣ်မူဒံးအခါ

အတူၢ်ဘၣ်တၢ် ဒီးဟီၣ်ဝဲလီၤ.”

၁၅ ပှၤတ့ၤမၣ်ဖိ စီၤအလံဖးစး+ တဲဆၢက့ၤဝဲလၢ

၂ “ဖဲပှၤကူၣ်တၢ်သ့တဂၤ စံးဆၢက့ၤတၢ်အခါ မ့ၢ်အကဟးအူကလံၤဧါ.

မ့ၢ်အကမၤပှဲၤ အဟၢဖၢဒီး ကလံၤလၢ မုၢ်ထီၣ်တခီဧါ.

၃ အဝဲမ့ၢ်သိၣ်သီတၢ် လၢတၢ်ကတိၤ ကလီကလီန့ၣ် အတကဲဘျုးဘၣ်.

ထဲအတဲတၢ်တခါန့ၣ် တကဲဘျုးဘၣ်.

၄ လၢနဃိန့ၣ် ပှၤတပျံၤယွၤလၢၤဘၣ်

ဒီးပှၤတဆိကမိၣ်ထံ ကစၢ်ယွၤအဂ့ၢ် အါအါလၢၤဘၣ်.

၅ မ့ၢ်လၢ နတၢ်ကမၣ်အိၣ်အဃိ နတဲတၢ်ဒ်န့ၣ်

ဒီးနသူ တၢ်ကတိၤလၢ အလဲၣ်သံတဖၣ်လီၤ.

၆ ပှၤလၢအစံၣ်ညီၣ်နၤန့ၣ် တမ့ၢ်ယၤဘၣ်, မ့ၢ်နကိာ်ပူၤလီၤ.

ဒီးတၢ်လၢနတဲန့ၣ် ကဲတၢ်အုၣ်အသးလၢ အထီဒါက့ၤနနီၢ်ကစၢ်လီၤ.+

၇ မ့ၢ်နကဲပှၤဟီၣ်ခိၣ်ဖိ လၢအအိၣ်ဖျဲၣ်ထီၣ် အဆိကတၢၢ်တဂၤဟီဧါ.

မ့ၢ်နအိၣ်ဖျဲၣ်ထီၣ် တချုးလၢ ကစၢၢ်ကလိ ဟဲအိၣ်ထီၣ်ဒံးဘၣ်န့ၣ်ဧါ.

၈ မ့ၢ်နနၢ်ဟူဘၣ် တၢ်လၢ ကစၢ်ယွၤ တဲခူသူၣ်ဝဲတဖၣ် နီၢ်ကီၢ်ဧါ.

မ့တမ့ၢ် နဆိကမိၣ်လၢ ပှၤလၢအအိၣ်ဒီး တၢ်ကူၣ်သ့န့ၣ် အိၣ်ထဲ နၤတဂၤလီၤဧါ.

၉ တၢ်လၢ နသ့ၣ်ညါလၢ ပတသ့ၣ်ညါအီၤဘၣ်န့ၣ် အိၣ်ဧါ.+

တၢ်လၢ နနၢ်ပၢၢ်လၢ ပတနၢ်ပၢၢ်အီၤဘၣ်န့ၣ် အိၣ်ဧါ.

၁၀ လၢပကျါန့ၣ် ပှၤလၢအခိၣ်ဆူၣ်ဝါ ဒီးအသးပှၢ်အိၣ်ဝဲ+

ဒီးအဝဲသ့ၣ်အသးပှၢ်န့ၢ်ဒံး နပၢ်လီၤ.

၁၁ တၢ်မၤမုာ်ထီၣ်က့ၤလၢ အဟဲလၢ ကစၢ်ယွၤအအိၣ်

ဒီးတၢ်ကတိၤလၢ အကပုာ်လုး ကဖီလီတဖၣ်န့ၣ် တလၢပှဲၤလၢ နဂီၢ်ဒံးဧီၤ.

၁၂ ဘၣ်မနုၤအဃိ နပာ်ထီၣ်ထီ နသးဒိၣ်မး

ဒီးနကွၢ်ဟ့ကွၢ်ကျိၣ်ပှၤ လၢတၢ်သးထီၣ် အပူၤလဲၣ်.

၁၃ နသးဒိၣ်ထီၣ် ကစၢ်ယွၤအဃိ

နတဲတၢ်ကတိၤ ဒ်အံၤတဖၣ်လီၤ.

၁၄ ပှၤဟီၣ်ခိၣ်ဖိန့ၣ် စီဆှံ ကသ့ဒ်လဲၣ်.

ဒီးပှၤလၢ ပိာ်မုၣ် အိၣ်ဖျဲၣ်ထီၣ်အီၤန့ၣ် တီလိၤ ကသ့ဒ်လဲၣ်.+

၁၅ အဝဲတနာ်န့ၢ် အမူခိၣ်ကလူး တဖၣ်ဘၣ်*

ဒီးမူခိၣ်န့ၣ် တစီဆှံလၢ အမဲာ်ညါ စ့ၢ်ကီးဘၣ်.+

၁၆ မ့မ့ၢ်ပှၤလၢ အလီၤသးဘၣ်အၢ ဒီးအၢဝဲသီဝဲ+

ဒီးအဲၣ်ဒိး မၤတၢ်တတီတလိၤ ဒ်ပှၤအဲၣ်ဒိး အီထံအသိးန့ၣ် အဝဲနာ်န့ၢ်အီၤ ကသ့ဒ်လဲၣ်.

၁၇ ယကတဲဘၣ်နၤ အဃိ ကနၣ်သၢၤ.

ယကတဲနၤ တၢ်လၢယထံၣ်တ့ၢ်တဖၣ်လီၤ.

၁၈ တၢ်ဂ့ၢ်တဖၣ်အံၤ ပှၤကူၣ်တၢ်သ့တဖၣ် ဒိးန့ၢ်ဘၣ်ဝဲလၢ အဝဲသ့ၣ် အပၢ်အအိၣ်+

ဝံၤဒီး တဲဖျါထီၣ်ဝဲ ဒီးတပာ်ခူသူၣ်ဝဲဘၣ်.

၁၉ ထဲဒၣ် အဝဲသ့ၣ်န့ၣ် န့ၢ်ဘၣ် တၢ်လီၢ်တၢ်ကျဲ

ဒီးပှၤထံဂၤကီၢ်ဂၤဖိ တလဲၤခီဂာ်တၢ် လၢအဝဲသ့ၣ် အကျါဘၣ်.

၂၀ ပှၤအၢပှၤသီ လၢအမၤနၢၤအီၣ်ဃီၣ် ပှၤဂၤန့ၣ် တူၢ်ဘၣ်ဝဲ တၢ်နးတၢ်ဖှီၣ်တဖၣ်လၢ အတၢ်အိၣ်မူ တစိၤသးလီၤ.

ဖဲအအိၣ်မူ အဆၢကတီၢ် အကထံၣ်ဘၣ် တၢ်ကီတၢ်ခဲတဖၣ်လီၤ.

၂၁ အဝဲကနၢ်ဟူ တၢ်သီၣ်လၢ အလီၤပျံၤလီၤဖုး+

ဒီးဖဲအအိၣ်ဘၣ် မုာ်မုာ်အခါ တမျာ်တဖၣ် ကဟဲတမျာ်အီၤလီၤ.

၂၂ အဝဲ တနာ်ဝဲလၢ အကပူၤဖျဲးထီၣ် လၢတၢ်ခံးကျါဘၣ်.+

နးကခိးလီၤအခိၣ် လၢကမၤသံအီၤ အဂီၢ်လီၤ.

၂၃ အဝဲဘၣ်ဟးဃုဝ့ၤဝီၤ တၢ်အီၣ် ဒီး အတဲဝဲလၢ “တၢ်အီၣ် အိၣ်ဖဲလဲၣ်.”

ဒီးအသ့ၣ်ညါဝဲလၢ မုၢ်နံၤလၢအကသံန့ၣ် ဘူးထီၣ်လံ.

၂၄ တၢ်သူၣ်ကိၢ်သးဂီၤ ဒီးတၢ်ကီတၢ်ခဲ မၤပျံၤမၤဖုးအီၤ

ဒီးဒိၣ်စိလၢ အဖီခိၣ် ဒ်စီၤပၤလၢ အအိၣ်ကတဲာ်ကတီၤအသး လၢ ကဒုးတၢ်အဂီၢ်လီၤ.

၂၅ တၢ်ကဲထီၣ်အသးဒီးအီၤဒ်န့ၣ် မ့ၢ်လၢ အဝဲယၤထီၣ်အစု လၢကထီဒါကစၢ်ယွၤ

ဒီးအဝဲဃ့ဘူၣ်ဝဲ* သ့တၢ်လၢာ်ကစၢ်လီၤ.

၂၆ အခိၣ်ကိၤအဃိ အဝဲ စိာ်ထီၣ်ကတီၤလၢ အကျၢၤတဘ့ၣ်

ဒီးလဲၤဃ့ၢ်သဖှိ လၢကစၢ်ယွၤအအိၣ် ဒ်သိး ကဒုးအီၤ အဂီၢ်လီၤ.

၂၇ အမဲာ်သၣ်ဘီၣ်အုၣ်

ဒီးအဟၢဖၢ အိၣ်ဒီးအသိ တပလူာ်တပလူာ်လီၤ.*

၂၈ အဝဲအိၣ်ဘၣ်လၢ ဝ့ၢ်တဖၣ်လၢ အကဘၣ် တၢ်မၤဟးဂီၤကွံာ်အီၤ

ဒီးဟံၣ်တဖၣ်လၢ အကအိၣ်ခီလီလီ

ဒီးကကဲထီၣ် လၢၢ်အပူၣ်တဖၣ်လီၤ.

၂၉ အဝဲတကဲဒိၣ်ထီၣ်ဘၣ်, အတပာ်ဖှိၣ်ဘၣ် တၢ်ထူးတၢ်တီၤတဖၣ်ဘၣ်

ဒီးအတၢ်စုလီၢ်ခီၣ်ခိၣ်တဖၣ် တအါထီၣ်ဝဲဘၣ်.

၃၀ အဝဲ တပူၤဖျဲးထီၣ်လၢ တၢ်သံဘၣ်.

အဝဲ ကလီၤဂာ်ဒီး သ့ၣ်ထူၣ်လၢ မ့ၣ်အူအီၣ်ကွံာ်အဒ့*

ဒီးအဝဲ ကသံလၢ ကစၢ်ယွၤ အတၢ်ကသါလီၤတထံၣ် အဃိလီၤ.+

၃၁ အဝဲ တကြၢးလဲၤကမၣ်ကျဲ ဒီးသန့ၤအသးလၢ တၢ်လၢ အဘျုးတအိၣ်ဘၣ်န့ၣ်ဘၣ်,

မ့ၢ်လၢ အမ့ၢ်မၤဝဲဒ်န့ၣ်န့ၣ် အကန့ၢ်ဘၣ်က့ၤဒၣ် တၢ်လၢအဘျုးတအိၣ်ဘၣ် အဃိလီၤ.

၃၂ တၢ်ကကဲထီၣ်အသးဒီးအီၤဒ်န့ၣ် ဘူးထီၣ်လံ

ဒီးအကလီၤဂာ်ဒ် သ့ၣ်ထူၣ်လၢ အဒ့တဖၣ် တဒိၣ်ထီၣ်ထီထီၣ် နီတဘျီဘၣ် အသိးလီၤ.+

၃၃ အကလီၤဂာ်ဒီး စပံးမုၢ်လၢ အသၣ်လၢ အတမံဒံးဘၣ်တဖၣ်န့ၣ် လီၤတဲာ်ဝဲ

ဒီးကလီၤဂာ် ဒ်သ့ၣ်စၤယံးထူၣ်လၢ အဖီတဖၣ် လီၤဆှုကွံာ် အသိးလီၤ.

၃၄ ပှၤလၢ အတပာ်ကဲယွၤဘၣ်* အတၢ်အိၣ်ဖှိၣ်န့ၣ် ကအိၣ်သယုၢ်ဝဲလီၤ.+

ဒီးမ့ၣ်အူ ကအီၣ်ကွံာ် ပှၤလၢ အတူၢ်လိာ် တၢ်ထီးကျိၣ်ထီးစ့ အဒဲတဖၣ်လီၤ.

၃၅ အဝဲသ့ၣ် ဒၢထီၣ် တၢ်ကီတၢ်ခဲ ဒီးအိၣ်ဖျဲၣ်ထီၣ် တၢ်အၢတၢ်သီ

ဒီးအဝဲသ့ၣ် အဒၢလီၢ်န့ၣ် ဒုးအိၣ်ထီၣ် တၢ်လံၣ်တၢ်လီလီၤ.”

၁၆ စီၤယိၤဘး တဲဆၢဝဲလၢ

၂ “တၢ်ဒ်န့ၣ်တဖၣ်န့ၣ် လၢညါ ယနၢ်ဟူဘၣ်ဒီဒူၣ်.

သုမ့ၢ် ပှၤမၤမုာ်ထီၣ်တၢ်ဖိလၢ အမၤအါထီၣ် ယတၢ်ကီတၢ်ခဲတဖၣ်လီၤ.+

၃ တၢ်ကတိၤလၢ အဘျုးတအိၣ်ဘၣ်တဖၣ်အံၤ ကကတၢၢ် ဆံးယံာ်လဲၣ်.

တၢ်မနုၤ ထိၣ်ဟူးထိၣ်ဂဲၤထီၣ်နၤလၢ နကတဲတၢ်ဒ်အံၤ အဂီၢ်လဲၣ်.

၄ ယတဲတၢ် ဒ်သိးဒီးသု သ့စ့ၢ်ကီးလီၤ.

သုမ့ၢ်အိၣ်လၢ ယလီၢ်ဒု

ယပာ်ဒ့ၣ်ပာ်ကမၣ်သုသ့

ဒီးယဂံၤဂုၤယခိၣ်လၢ သုဃိသ့စ့ၢ်ကီးလီၤ.+

၅ ဘၣ်ဆၣ် လၢယကမၤ ဒ်န့ၣ်အလီၢ် ယကမၤဆူၣ်ထီၣ် သုဂံၢ်ဘါ လၢယတၢ်ကတိၤတဖၣ်

ဒီးယတၢ်ကတိၤလၢအမုာ်န့ၣ် ကမၤမုာ်ထီၣ် သုသးလီၤ.+

၆ ယမ့ၢ်တဲတၢ်နာ်က့ ယတူၢ်ဘၣ် တၢ်ဆါ တကိညၢ်လီၤဘၣ်.+

ဒီးယမ့ၢ်တတဲတၢ်လၢၤဘၣ် နာ်က့ ယတူၢ်ဘၣ်တၢ်ဆါ ဒ်အလီၢ်လီၢ်လီၤ.

၇ ခဲအံၤန့ၣ် ကစၢ်ယွၤ မၤလီၤဘှံးလီၤတီၤယၤလံ+

ဒီးမၤဟးဂီၤ ပှၤလၢအအိၣ်လၢ ယဟံၣ်ပူၤ ခဲလၢာ်ဝံၤလံ.

၈ န* ဖီၣ်တံၢ်ဃာ်ယၤ အဃိ ယဃဲၤလီၤဒိၣ်မး

ဒီးပှၤဂၤထံၣ်ဝဲအဃိ ယတၢ်အိၣ်သးအံၤ လီၤဂာ်ဒ် ပှၤအုၣ်အသးတဂၤလၢ အဆၢထၢၣ် ပာ်ဒ့ၣ်ပာ်ကမၣ်ယၤလီၤ.

၉ အဝဲသးဟ့ယၤ ဒီးဖှီညာ်ယၤလၢ တၢ်သးဒိၣ်အပူၤ တက့တက့+

ဒီးအ့ၣ်သဃံးအမဲ လၢယဃိလီၤ.

ဒီးအပာ်ယၤဒ်သိးဒီး ဒုၣ်ဒါတဂၤ ဒီးကွၢ်ဟ့ယၤ လၢကမၤဘၣ်ဒိယၤ အဂီၢ်လီၤ.+

၁၀ ပှၤအိးထီၣ်အကိာ်ပူၤ ဖးလဲၢ်လၢ ကဒုၣ်ဒွဲၣ်ယၤ+

ဒီးဒဲယဘိးပၤလၢ တၢ်တပာ်ကဲဘၣ်အပူၤ,

အဝဲသ့ၣ် ပာ်ဖှိၣ်ထီၣ်အသးဒီဒူၣ် လၢကထီဒါယၤအဂီၢ်လီၤ.+

၁၁ ကစၢ်ယွၤ ပျဲလၢ ပိာ်ခွါသးစၢ်တဖၣ် ကထီဒါယၤ

ဒီးအဝဲအးလီၤယၤလၢ ပှၤအၢပှၤသီတဖၣ် အစုပူၤလီၤ.+

၁၂ လၢညါ ယအိၣ်ဘၣ်မုာ်မုာ် ဘၣ်ဆၣ် အဝဲမၤလီၤကလဲယၤ သတူၢ်ကလာ်လီၤ.+

ဒီးအဝဲဖီၣ်တံၢ်ဃာ် ယကိာ်ကျၢၢ်ခံ ဒီးမၤလီၤသဘှံးယၤလီၤ.

ဒီးအဝဲပညိၣ်ယၤ ဒ်သိး ကခးယၤ လၢပျၢ်အဂီၢ်လီၤ.

၁၃ အပှၤခးပျၢ်ဖိတဖၣ် အိၣ်ဝးတရံးယၤ+

ဒီးအဝဲ တသးကညီၤတၢ်ဘၣ် ဒီးခးဖျိ ယကလ့ၢ်လီၤ.+

ဒီးအဝဲလူလီၤ ယသဒံ လၢ ဟီၣ်ခိၣ်လိၤလီၤ.

၁၄ ယလီၤဂာ်ဒ်သိးဒီး တၢ်ဒူၣ်လၢ အဝဲမၤထူၣ်ဖျိဝဲ တဘျီဝံၤတဘျီ

ဒီးအဝဲ ဟဲဃ့ၢ်သဖှိ ဆူယအိၣ် ဒ်သိးဒီး ပှၤသုးဖိတဂၤလီၤ.

၁၅ ယဆးထီၣ် ထၢၣ်တၢ်ကံးညာ်လၢ* ယကသိးထီၣ်အီၤအဂီၢ်+

ဒီးယခူၣ်လီၤကွံာ် ယသူးသ့ၣ်လၤကပီၤ လၢဟီၣ်ခိၣ်ကမူၣ်ကျါလံ.+

၁၆ ယမဲာ်သၣ် ထီၣ်ဂီၤလၢ ယဟီၣ်အဃိ+

ဒီးယမဲာ်ချံ လီၤကအိညါ.

၁၇ ဘၣ်ဆၣ် နီၢ်ကီၢ်န့ၣ် ယတမၤဆါ ပှၤနီတဂၤဘၣ်

ဒီးယတၢ်ထုကဖၣ်န့ၣ် စီဆှံဝဲလီၤ.

၁၈ ဟီၣ်ခိၣ်ဧၢ, တဘၣ်ပာ်ခူသူၣ် ယသွံၣ်တဂ့ၤ,+

ပျဲအကိးပသူထီၣ် လၢယဂီၢ်တက့ၢ်.

၁၉ ခဲအံၤန့ၣ် ပှၤလၢအအုၣ်အသး လၢယဂီၢ်သ့န့ၣ် အိၣ်လၢမူခိၣ်

ဒီးပှၤလၢအကတဲဖျါထီၣ်လၢ ယတၢ်ကမၣ်တအိၣ်ဘၣ်န့ၣ် အိၣ်လၢတၢ်လီၢ် ထီၣ်ထီလီၤ.

၂၀ မ့ၢ်လၢ ယဃ့ကညးတၢ်လၢ ကစၢ်ယွၤအအိၣ် လၢမဲာ်ထံမဲာ်နိ အဃိ+

ယသကိးတဖၣ် တဲဆါယၤလီၤ.+

၂၁ ဒ်ပှၤတဂၤ ဘၣ်စံၣ်ညီၣ်န့ၢ်တၢ်လၢ ပှၤခံဂၤ အဘၢၣ်စၢၤအသိး

မ်ပှၤတဂၤ စံၣ်ညီၣ်န့ၢ်တၢ်လၢ ယၤဒီး ကစၢ်ယွၤ အဘၢၣ်စၢၤတက့ၢ်.+

၂၂ ယတအိၣ်မူဘၣ် အါနံၣ်အါလါ လၢၤဘၣ်.

တယံာ်လၢၤဘၣ် ယကလဲၤတၢ် ဒီးယတဟဲက့ၤလၢၤဘၣ်.+

၁၇ “ယသးဂံၢ်ဘါလၢာ် ဒီးဘူးထီၣ်လၢ ယကသံလံ.

တၢ်သွၣ်ခိၣ်န့ၣ် အိၣ်ခိးယခိၣ်လံ.+

၂ ပှၤလၢအဒုၣ်ဒွဲၣ်တၢ်တဖၣ် အိၣ်ဝးတရံးယၤ+

ဒီးယဘၣ်ကွၢ် အဝဲသ့ၣ် အတၢ်ထီဒါတၢ် ဒ်န့ၣ်လီၤ.

၃ ကစၢ်ယွၤဧၢ, တူၢ်လိာ်ယတၢ်အုၣ်ကီၤ ဒီးပာ်ဃာ်အီၤလၢ နအိၣ်တက့ၢ်.

ပှၤအဂၤလၢ အကမၤစၢၤယၤ တအိၣ်နီတဂၤဘၣ်အဃိ ဝံသးစူၤ အၢၣ်လီၤယၤလၢ နကဆီၣ်ထွဲမၤစၢၤယၤတက့ၢ်.+

၄ မ့မ့ၢ် အဝဲသ့ၣ်န့ၣ် နတြီအဝဲသ့ၣ် ဒ်သိးအသု တသ့ၣ်ညါနၢ်ပၢၢ်တၢ် တဂ့ၤအဂီၢ်လီၤ.+

အဃိ နတဟ့ၣ်စ့ၢ်ကီးအဝဲသ့ၣ် တၢ်မၤနၢၤဘၣ်.

၅ အဝဲသ့ၣ် တဲဝဲလၢ အကဟ့ၣ်နီၤလီၤ အသကိးတဖၣ် လၢအတၢ်ဖိတၢ်လံၤတနီၤ

ဘၣ်ဆၣ် အဝဲသ့ၣ် အဖိတဖၣ်လီၤဘဲ ဒီးစီၣ်ထီၣ်အမဲာ်မး တန့ၢ်ဘၣ်.

၆ ကစၢ်ယွၤ ပာ်ယၤဒ် တၢ်ကတိၤဒိ လၢပှၤဂၤအဂီၢ်+

အဃိ အဝဲသ့ၣ် ထူးပှဲာ် ယမဲာ်သၣ်လီၤ.+

၇ ယမဲာ်ချံ ကဒုထီၣ်လၢ တၢ်သူၣ်ကိၢ်သးဂီၤအဃိလီၤ.+

ဒီးယဃဲၤသံဃဲၤကျိ ဒီဂၤညါ.

၈ ပှၤလၢအသူၣ်တီသးလိၤတဖၣ် ကမၢကမၣ် လၢတၢ်ဂ့ၢ်အံၤအဃိ

ဒီးပှၤလၢအတၢ်ကမၣ် တအိၣ်ဘၣ်တဖၣ် အသးဘၣ်တံာ်တာ်လၢ ပှၤလၢအတပာ်ကဲယွၤဘၣ်* အဃိလီၤ.

၉ ပှၤတီပှၤလိၤန့ၣ် ကဆဲးမၤတၢ် တီတီလိၤလိၤ+

ဒီးပှၤလၢအတၢ်ကမၣ် တအိၣ်ဘၣ်န့ၣ် အဂံၢ်အဘါ ကဆူၣ်ထီၣ်လၢ ကမၤတၢ်အဘၣ် အဂီၢ်လီၤ.+

၁၀ ဘၣ်ဆၣ် သုဆဲး တဲအါတဲစှၤတၢ်ဒီးယၤသ့,

မ့ၢ်လၢ လၢသုကျါန့ၣ် ယတထံၣ် ပှၤလၢအကူၣ်တၢ်သ့ နီတဂၤဒံးဘၣ်အဃိလီၤ.+

၁၁ ယတအိၣ်မူဘၣ် ယံာ်ယံာ်လၢၤဘၣ်.+

ယတၢ်ရဲၣ်တၢ်ကျဲၤတဖၣ် ဒီးယတၢ်မုၢ်လၢ်န့ၣ် ဟးဂီၤလၢာ်လံ.+

၁၂ ခီဖျိသုတဲလၢ ‘တၢ်ခံးအဃိ တၢ်ကပီၤ ဘူးကဟဲတုၤလံ’

အဃိ မုၢ်နၤန့ၣ် သုပာ်ပနီၣ်အီၤလၢ မုၢ်ဆါလီၤ.

၁၃ ယမ့ၢ်ဘၣ် ဆဲးအိၣ်ခိးတၢ်န့ၣ် တၢ်သွၣ်ခိၣ်* ကကဲထီၣ် ယဟံၣ်+

ဒီးယကဒါလီၤ ယလီၢ်မံလၢ တၢ်ခံးကျါလီၤ.+

၁၄ ယမ့ၢ်ကိးတၢ်ပူၤ+ လၢယပၢ်,

ဒီးယမ့ၢ်ကိးလၢၣ်လၢ ယမိၢ်ဒီးယဒီပုၢ်ဝဲၢ်မုၣ်န့ၣ်

၁၅ ယတၢ်မုၢ်လၢ် ကအိၣ်ဒံးဧါ.+

ဒီးမတဂၤတဲလၢ ယကသးခုထီၣ်က့ၤ ကသ့လဲၣ်.

၁၆ ယတၢ်မုၢ်လၢ် ကလဲၤလီၤဝဲလၢ တၢ်သွၣ်ခိၣ်

ဒီးယၤစ့ၢ်ကီး ယကလဲၤလီၤဃုာ်ဒီးအီၤ လၢဟီၣ်ခိၣ်ကမူၣ် အကျါလီၤ.”+

၁၈ ပှၤၡူဧၤဖိ စီၤဘံးလဒး+ တဲဆၢဝဲလၢ

၂ “သု* ဟးတဲတၢ် ဒ်အံၤန့ၣ် သုကပတုာ် ဆံးယံာ်လဲၣ်.

ပာ်ဖျါထီၣ် တၢ်သ့ၣ်ညါနၢ်ပၢၢ်တစဲးသၢၤ, ဝံၤဒီး ပကဆဲးတဲတၢ်လီၤ.

၃ ဘၣ်မနုၤအဃိ သုထံၣ်ပှၤ ဒ်ဆၣ်ဖိကီၢ်ဖိ အသိးလဲၣ်.+

ဒီးဘၣ်မနုၤအဃိ သုပာ်ပှၤဒ် ပှၤငီငးဖိ အသိးလဲၣ်.

၄ နမ့ၢ်ဖှီလီၤက့ၤနသး တက့တခီ လၢ နတၢ်သးဒိၣ်ထီၣ်အပူၤ သနာ်က့

မ့ၢ်ဟီၣ်ခိၣ် ကအိၣ်က့ၤ ခီလီလီ လၢ နဃိဧါ.

မ့ၢ်လၢၢ်တဖၣ် ကသုးကွံာ်အသး လၢ နဃိဧါ.

၅ ပှၤအၢပှၤသီ အတၢ်ကပီၤန့ၣ် ကလီၤပံာ်ဝဲ

ဒီးအမ့ၣ်အူလၣ်န့ၣ် တကပီၤထီၣ်လၢၤဘၣ်.+

၆ တၢ်ကပီၤ လၢအဒဲပူၤန့ၣ် ကခံးလီၤဝဲ သပှၢ်တၢၢ်

ဒီးမ့ၣ်အူဒၢ လၢအကပီၤထီၣ်န့ၢ်အီၤန့ၣ် ကလီၤပံာ်လီၤ.

၇ လၢအကဆဲးဟးဝဲအဂီၢ် အဂံၢ်အဘါ စှၤလီၤဝဲကွ့ၢ်ကွ့ၢ်

ဒီးအတၢ်ကူၣ်တဖၣ် မၤလီၤဃံၢ်က့ၤ အနီၢ်ကစၢ်လီၤ.+

၈ အခီၣ်ကဆှၢအီၤလၢ ပှာ်ဧိၤစၤဧိၤ အပူၤ

ဒီးကလဲၤနုာ်ဝဲ ဖဲန့ၣ်လီၤ.

၉ အခီၣ်နၢၣ်ခံ ကဘျးဒီးထု

ဒီးအဝဲကလီၤဘၣ်လၢ ပျံၤသကွီၤ အပူၤလီၤ.+

၁၀ ပျံၤအိၣ်ခိးခူသူၣ်အီၤလၢ ဟီၣ်ခိၣ်လိၤ

ဒီးထုအိၣ်ဝဲလၢ အကျဲပူၤလီၤ.

၁၁ အဝဲပျံၤတၢ်လၢ အအိၣ်ဝးတရံးအီၤ ကိးမံၤဒဲး+

ဒီးတၢ်ပျံၤတၢ်ဖုး လူၤပိာ်အခံ ထီဘိလီၤ.

၁၂ အဂံၢ်အဘါ လၢာ်ကွံာ်ဝဲ

ဒီးလၢ တၢ်ကီတၢ်ခဲဖးဒိၣ်အဃိ+ အကဟး တကျဲၢ်တကျဲၢ်လီၤ.

၁၃ တၢ်ဆါအိၣ်လၢ အဘ့ၣ်လိၤပှဲၤပှဲၤ

ဒီးတၢ်ဆါလၢ အမၤသံတၢ် အီၣ်ကွံာ် အစုအခီၣ်လီၤ.

၁၄ အဝဲကဘၣ်တၢ်ထုးထီၣ်ကွံာ်အီၤ လၢအဒဲလၢ အအိၣ်ဒီး တၢ်ဘံၣ်တၢ်ဘၢအပူၤ+

ဒီးအကဘၣ်လဲၤလၢ တၢ်ပျံၤတၢ်ဖုး အစီၤပၤ* အအိၣ်လီၤ.

၁၅ ပှၤလၢအဝဲ တသ့ၣ်ညါဘၣ်တဖၣ် ကဟဲအိၣ် လၢအဒဲ

ဒီးတၢ်ကဖှံလီၤကးလၢ အဟံၣ်လိၤလီၤ.+

၁၆ ဒ်သ့ၣ်ထူၣ်အသိး အဂံၢ်ကဃ့ထီကွံာ်

ဒီးအဒ့တဖၣ် ကဃ့သံကွံာ်လီၤ.

၁၇ လၢဟီၣ်ခိၣ်ချၢန့ၣ် ပှၤကသးပ့ၤနီၣ်ကွံာ်အီၤလီၤ.

ဒီးလၢကျဲပူၤစ့ၢ်ကီး ပှၤတသ့ၣ်ညါ အမံၤလၢၤဘၣ်.

၁၈ တၢ်ကထုးထီၣ်ကွံာ်အီၤလၢ တၢ်ကပီၤကျါ ဒီးအကဘၣ်အိၣ်က့ၤလၢ တၢ်ခံးကျါလီၤ.

ဒီးတၢ်ကနီဟးထီၣ်ကွံာ်အီၤ လၢဟီၣ်ခိၣ်ချၢလီၤ.

၁၉ လၢအပှၤကလုာ်အကျါန့ၣ် အဖိဒီးအစၢၤအသွဲၣ်တဖၣ် တအိၣ် နီတဂၤဘၣ်.

ဒီးလၢအအိၣ်တၢ်လီၢ်န့ၣ် အဝဲသ့ၣ် အသးသမူ တပူၤဖျဲး နီတဂၤဘၣ်.

၂၀ အတၢ်ဟးဂီၤ အမုၢ်နံၤ မ့ၢ်ဟဲတုၤန့ၣ် ပှၤလၢမုၢ်နုာ် ကဖုးဘၣ်အသး

ဒီးပှၤလၢမုၢ်ထီၣ် ကပျံၤတၢ် သပှၢ်ကတၢၢ်လီၤ.

၂၁ ပှၤလၢအမၤတၢ်ကမၣ်န့ၣ် တၢ်ကမၤအသးဒီး အဒဲဒ်န့ၣ်

ဒီးပှၤလၢ အတသ့ၣ်ညါယွၤဘၣ်တဂၤ အတၢ်လီၢ်န့ၣ် ကကဲထီၣ်အသး ဒ်န့ၣ်လီၤ.

၁၉ စီၤယိၤဘး တဲဆၢဝဲလၢ

၂ “သုကမၤအ့န့ယသး*+

လၢတၢ်ကတိၤလၢ အမၤလီၤကလဲယၤန့ၣ် ဆံးယံာ်ဒံးလဲၣ်.+

၃ သုဒူယၤ အဘျီတဆံလံ.

ဒီးသုတမဲာ်ဆှး လၢသုရ့ယၤ အၢအၢသီသီ အဃိဘၣ်.+

၄ ယမ့ၢ်မၤတ့ၢ်ဘၣ်ဖုး တၢ်ကမၣ် တမံၤမံၤနာ်က့

အဘၣ်ဃးဒီးယၤလီၤ.

၅ သုမ့ၢ်အဲၣ်ဒိး ဆဲးပာ်ဒိၣ်ပာ်ထီသုသး လၢယဖီခိၣ်

ဒီးသုမ့ၢ်ဆဲးတဲလၢ ယဘၣ်ကီဘၣ်ခဲဒ်အံၤ မ့ၢ်တၢ်လၢ အကြၢးအဘၣ်န့ၣ်

၆ သ့ၣ်ညါလၢ ကစၢ်ယွၤ ကွဲန့ၢ်လွဲန့ၢ်ယၤ

ဒီးဖီၣ်န့ၢ်ယၤလၢ အပျံၤသကွီၤ ပူၤလီၤ.

၇ ကွၢ်မီၤ, ယကိးပသူထီၣ်လၢ ‘အမၤဘၣ်ဒိယၤလံ’ ဘၣ်ဆၣ် ပှၤတစံးဆၢယၤ နီတဂၤဘၣ်.+

ယဃ့တၢ်မၤစၢၤ ဘၣ်ဆၣ် ပှၤစံၣ်ညီၣ်န့ၢ်ယၤတီတီ တအိၣ်နီတဂၤဘၣ်.+

၈ အဝဲ မၤပံးယကျဲဒီး တၢ်ဒူၣ်အဃိ ယလဲၤခီဂာ်အီၤ တန့ၢ်ဘၣ်.

ဒီးအဝဲမၤခံးလီၤယကျဲလီၤ.+

၉ အဝဲဘ့ၣ်လီၤကွံာ် ယလၤကပီၤ

ဒီးထုးထီၣ်ကွံာ် ခိၣ်သလုးလၢ ယခိၣ်လိၤလီၤ.

၁၀ ယလီၤဂာ်ဒ် တၢ်သူၣ်ထီၣ်လၢ အဟးဂီၤကွံာ် လၢာ်လၢာ်ဆ့ဆ့ ဒီးအဝဲ မၤသဘှံးယၤ တုၤလၢ ယသံလီၤ.

ယတၢ်မုၢ်လၢ်န့ၣ် လီၤဂာ်ဒ်သိးဒီး သ့ၣ်တထူၣ်လၢ အဝဲထဲးထီၣ်ကွံာ်ဝဲ န့ၣ်လီၤ.

၁၁ အတၢ်သးဒိၣ် အူအီၣ်ကွံာ်ယၤ

ဒီးအဝဲထံၣ်ယၤဒ်သိးဒီး အဒုၣ်အဒါလီၤ.+

၁၂ အသုးမုၢ်တဖၣ် ဟဲကဝီၤဃာ်ယၤ

ဒီးဆီလီၤအသးဝးတရံးဝဲ ယဒဲလီၤ.

၁၃ အဝဲမၤယံၤထီၣ် ယဘူးယတံၢ် တဖၣ်ဒီးယၤ

ဒီးပှၤလၢအသ့ၣ်ညါယၤန့ၣ် ဟးဆှဲးယၤလီၤ.+

၁၄ ယသကိးလၢ အဘူးဒီးယၤတဖၣ်န့ၣ် လီၤမၢ်ကွံာ်လံ

ဒီးပှၤလၢယသ့ၣ်ညါအီၤ ဂ့ၤဂ့ၤတဖၣ်န့ၣ် သးပ့ၤနီၣ်ယၤလံ.+

၁၅ ပှၤတမှံၤလၢ ယဟံၣ်ပူၤ+ ဒီးယကုၢ်မုၣ်တဖၣ်န့ၣ် ထံၣ်ယၤဒ် ပှၤထံဂၤကီၢ်ဂၤဖိ အသိး

ဒီးယလီၤဂာ်ဒ် ပှၤထံဂၤကီၢ်ဂၤဖိ လၢအဝဲသ့ၣ် အမဲာ်ချံပူၤလီၤ.

၁၆ ယကိးယခ့ယပှၤ ဒီးယဃ့ကညး အတၢ်သးကညီၤ

ဘၣ်ဆၣ် အဝဲတစံးဆၢယၤဘၣ်.

၁၇ ယတၢ်ကသါန့ၣ် လီၤဂာ်ဒ် တၢ်လီၤသးဘၣ်အၢ လၢယမါအဂီၢ်+

ဒီးယကဲထီၣ် တၢ်နၢအုၣ်လၢ ယဒီပုၢ်ဝဲၢ်တဖၣ် အဂီၢ်လီၤ.

၁၈ ပှၤဖိသၣ်တဖၣ်န့ၣ် တပာ်ကဲ ယၤဘၣ်.

ဒီးဖဲအဝဲသ့ၣ် ထံၣ်ယၤအခါ* အဝဲသ့ၣ် နံၤဆဲးအဲးယၤလီၤ.

၁၉ ယသကိး လၢအဘူးဒီးယၤ ကိးဂၤဒဲးန့ၣ် သးဘၣ်အၢယၤ+

ဒီးပှၤလၢယအဲၣ်အီၤတဖၣ်န့ၣ် ထီဒါက့ၤယၤလံ.+

၂၀ ယအိၣ်တ့ၢ်က့ၤထဲ ယဃံဒီး ယဘ့ၣ်လီၤ.+

ယကသံန့ၣ် လိၣ်တစဲးလီၤ.*

၂၁ မ့ၢ်လၢ ကစၢ်ယွၤ တီၢ်ယၤလၢအစုအဃိ+

သးကညီၤယၤ ယသကိးသ့ၣ်ဧၢ, သးကညီၤယၤသၢၤ.

၂၂ ဘၣ်မနုၤအဃိ သုဆဲးမၤနးမၤဖှီၣ်ယၤ ဒ်ကစၢ်ယွၤ မၤဝဲအသိးလဲၣ်.+

ဒီးဘၣ်မနုၤအဃိ သုထီဒါယၤ ထီဘိလဲၣ်.+

၂၃ ယတၢ်ကတိၤတဖၣ် မ့ၢ်ဘၣ်တၢ်ကွဲးလီၤအီၤ

ဒီးမ့ၢ်ဘၣ် တၢ်မၤနီၣ်အီၤလၢ လံာ်ပူၤန့ၣ် ကဂ့ၤထဲလဲၣ်.

၂၄ လၢလၢၢ်အလိၤန့ၣ် ယတၢ်ကတိၤတဖၣ် မ့ၢ်ဘၣ်တၢ်စိးပျၤအီၤလၢ

ထးဒီးစၢၢ် ဒ်သိး အကအိၣ်ဂၢၢ်ကျၢၤ လီၤထူလီၤယိာ်အဂီၢ်န့ၣ် ကဂ့ၤထဲလဲၣ်.

၂၅ ယသ့ၣ်ညါဂ့ၤဂ့ၤလၢ ပှၤလၢအပှ့ၤက့ၤယၤန့ၣ်+ မူဝဲ

ဒီးလၢခံန့ၣ် အဝဲကဟဲ ဒီးကဆၢထၢၣ်လၢ ဟီၣ်ခိၣ်လိၤလီၤ.

၂၆ တၢ်ပူၤလီၢ် မ့ၢ်မၤဟးဂီၤ ယဘ့ၣ် ဘၣ်ဆၣ်

ဖဲယမူဒံးအခါ ယကထံၣ်ဘၣ် ကစၢ်ယွၤလီၤ.

၂၇ ယကထံၣ်ဘၣ် ကစၢ်ယွၤလၢ ယနီၢ်ကစၢ်လီၤ.

ယကထံၣ်ဘၣ် ကစၢ်ယွၤ လၢ ယနီၢ်ကစၢ် အမဲာ်ချံ ဒီးတမ့ၢ်လၢ ပှၤဂၤကထံၣ်အီၤဘၣ်.+

ဘၣ်ဆၣ် ယသးလီၤဘှံးလၢာ်လံ.*

၂၈ သုဆိကမိၣ်လၢ ယတၢ်ကီတၢ်ခဲ အခီၣ်ထံးခီၣ်ဘိ မ့ၢ်ဒၣ်ယၤအဃိ

သုတဲလၢ ‘ပမၤနးမၤဖှီၣ်အီၤ လၢကျဲဒ်လဲၣ်.’+

၂၉ နးကစံၣ်ညီၣ် ပှၤလၢအမၤကမၣ်တၢ်

အဃိ ပှၤလၢအကဘၣ်ပျံၤနးန့ၣ် မ့ၢ်လၢသုဟီ.+

သုကြၢးသ့ၣ်ညါလၢ စံၣ်ညီၣ်ကွီၢ် လၢအစံၣ်ညီၣ်သုသ့န့ၣ် အိၣ်ဝဲ တဂၤလီၤ.”+

၂၀ ပှၤနၤမးဖိ စီၤစိဖၢ်+ တဲဆၢဝဲလၢ

၂ “ယသူၣ်ကိၢ်သးဂီၤတၢ်

ဒီးယသးအ့န့အဃိ ယကတဲဆၢက့ၤနၤလီၤ.

၃ ယနၢ်ဟူဘၣ် တၢ်သိၣ်ဃီၣ်လၢ အမၤမဲာ်ဆှးယၤ

ဘၣ်ဆၣ် မ့ၢ်လၢယအိၣ်ဒီး တၢ်ကူၣ်သ့အဃိ ယကဘၣ်တဲဆၢတၢ်လီၤ.

၄ တၢ်လၢယကတဲန့ၣ် နကသ့ၣ်ညါပာ်စၢၤလံဧါသၢၤ.

စးထီၣ်လၢ ပှၤဟီၣ်ခိၣ်ဖိ အိၣ်ထီၣ်လၢ ဟီၣ်ခိၣ်ချၢလံၤလံၤန့ၣ်+

၅ ပှၤအၢပှၤသီ အတၢ်ကိးပသူထီၣ်လၢ တၢ်သးခုအပူၤန့ၣ် အိၣ်ထဲတစိၢ်ဖိ

ဒီးပှၤလၢ အတပာ်ကဲယွၤဘၣ်* အတၢ်သူၣ်ဖှံသးညီန့ၣ် အိၣ်ထဲ တစိၢ်ဖိလီၤ.+

၆ အမ့ၢ်ပာ်ထီၣ်ထီအသး တုၤလၢမူခိၣ်

ဒီးအခိၣ်မ့ၢ်တုၤလၢ တၢ်အၢၣ်နာ်က့

၇ အဝဲကဟးဂီၤဝဲ လီၤထူလီၤယိာ် ဒ်အနီၢ်ကစၢ်အအ့ၣ်အသိး

ဒီးပှၤလၢအထံၣ်အီၤ လၢညါတဖၣ်န့ၣ် ကတဲဝဲလၢ ‘ခဲအံၤ အအိၣ်ဖဲလဲၣ်.’

၈ အကလီၤမၢ်ကွံာ်ဒ် တၢ်မံမီၢ်အသိး ဒီးပှၤတထံၣ်ဘၣ်အီၤ နီတဂၤလၢၤဘၣ်.

ဒီးအဝဲကဟါမၢ်ကွံာ် ဒ်တၢ်ထံၣ်လၢညါခီ လၢမုၢ်နၤ အသိးလီၤ.

၉ မဲာ်ချံလၢ အထံၣ်အီၤန့ၣ် တထံၣ်အီၤ နီတဘျီလၢၤဘၣ်

ဒီးပှၤတထံၣ်အီၤ လၢအဟံၣ် နီတဘျီလၢၤဘၣ်.+

၁၀ အဖိတဖၣ် ကဃ့တၢ်မၤစၢၤလၢ ပှၤဖှီၣ်ဖိယာ်ဖိအအိၣ်

ဒီးတၢ်ထူးတၢ်တီၤလၢ အဟံးန့ၢ်ဝဲလၢ ပှၤဂၤအအိၣ်န့ၣ် အကဟ့ၣ်က့ၤဝဲလၢ အနီၢ်ကစၢ်လီၤ.+

၁၁ လၢညါန့ၣ် အဂံၢ်အဘါ အိၣ်ပှဲၤပှဲၤ ဒ်ပှၤသးစၢ်တဖၣ်အသိး

ဘၣ်ဆၣ် အတၢ်ဂံၢ်တၢ်ဘါတဖၣ်န့ၣ် ကဟးဂီၤဃုာ်ဒီးအီၤ လၢဟီၣ်ခိၣ်ကမူၣ် အကျါလီၤ.

၁၂ တၢ်လၢအတဂ့ၤဘၣ် မ့ၢ်ဆၢဘၣ်အီၤလၢ အကိာ်ပူၤ

ဒီးအမ့ၢ်ပာ်ခူသူၣ်ဝဲလၢ အပျ့ၤဖီလာ်

၁၃ ဒီးအဝဲ မ့ၢ်ဘၣ်သူၣ်ဘၣ်သးဝဲ ဒီးမ့ၢ်တခါလီၤဝဲဘၣ်

ဒီးမ့ၢ်ကမၢၤဃာ်ဝဲလၢ အကိာ်ပူၤန့ၣ်

၁၄ အတၢ်အီၣ်န့ၣ် ကခၣ်ဝဲလၢ အဟၢဖၢပူၤ

ဒီးကကဲထီၣ်ဒ်သိးဒီး ဂုၢ်သီအစုၣ်အပျၢ် လၢအမိၢ်ပှၢ်ပူၤလီၤ.

၁၅ အဝဲယူၢ်လီၤ ပှၤဂၤ အတၢ်ထူးတၢ်တီၤသနာ်က့

ကစၢ်ယွၤ ကဒုးဟးထီၣ်ကွံာ်ဝဲလၢ အဟၢဖၢပူၤ ဒီးအဝဲ ကဘၣ်ဘှိးထီၣ်က့ၤဝဲလီၤ.

၁၆ ဂုၢ်သီ အစုၣ်ကထီၣ်အီၤ

ဒီးဂုၢ်ဘၣ်အၢ အမဲ ကမၤသံအီၤလီၤ.

၁၇ အဝဲတထံၣ်ဘၣ်ဝဲ တၢ်နုၢ်ထံ ဒီးကနဲစီလၢ အယွၤလီၤဝဲဒ်

ထံကျိဖိအသိး နီတဘျီလၢၤဘၣ်.

၁၈ အကဘၣ်ဟ့ၣ်လီၤက့ၤ တၢ်ဖိတၢ်လံၤလၢ အဟံးန့ၢ်ဝဲတဖၣ်လီၤ.

ဒီးအဝဲ တသူဘၣ်ဝဲ တၢ်ထူးတၢ်တီၤလၢ အန့ၢ်ဘၣ်ဝဲ ခီဖျိလၢ အပနံာ်တၢ်ကၤတၢ် အဃိဘၣ်.+

၁၉ အဝဲ ဆီၣ်တံၢ်မၤနၢၤဝဲ ပှၤဖှီၣ်ဖိယာ်ဖိ ဝံၤဒီးပာ်တ့ၢ်အဝဲသ့ၣ်

ဒီးအဝဲ ဟံးန့ၢ်ဆူၣ် ဟံၣ်လၢ အတသူၣ်ထီၣ်ဝဲဘၣ်.

၂၀ ဘၣ်ဆၣ် အဝဲတအိၣ်ဒီး တၢ်သူၣ်မံသးမုာ် နီတစဲးဘၣ်

ဒီးအတၢ်ထူးတၢ်တီၤန့ၣ် တမၤစၢၤအီၤလၢ အကပူၤဖျဲးအဂီၢ်ဘၣ်.

၂၁ တၢ်လၢ အကယူၢ်လီၤဝဲန့ၣ် တအိၣ်တ့ၢ် နီတမံၤလၢၤဘၣ်.

အဃိ အဝဲ တဘီၣ်ထီၣ်ညီထီၣ် လၢၤဘၣ်.

၂၂ ဖဲအတၢ်ထူးတၢ်တီၤ အိၣ်ဝဲ အအါကတၢၢ် အဆၢကတီၢ် တၢ်ကိၢ်တၢ်ဂီၤ ကလုၢ်ဘၢအီၤ

ဒီးတၢ်ကီတၢ်ခဲလၢ အသဟီၣ်ဆူၣ်ကတၢၢ် ကဟဲဘၣ်အီၤလီၤ.

၂၃ ဖဲအအီၣ်တၢ်အခါ

ကစၢ်ယွၤ ကဆှၢလီၤ အတၢ်သးဒိၣ်လၢ အလိၤ

ဒီးကလူလီၤ တၢ်အၢတၢ်သီလၢ အလိၤလီၤ.

၂၄ ဖဲအဃ့ၢ်ပူၤဖျဲးအသး လၢတၢ်စုကဝဲၤထးတဖၣ် အအိၣ်အခါ

ချံၣ်တိၢ်ဘီအပျၢ်တဖၣ် ကဆဲးဖျိအီၤလီၤ.

၂၅ အဝဲကထုးထီၣ်က့ၤ ပျၢ်လၢအကနၣ်အ့ၣ်တဘ့ၣ် လၢအနုာ်လီၤလၢ အချၢဃံ

လၢအဆဲးဘၣ် အသဒံ

ဒီးအဝဲကပျံၤတၢ်ဒိၣ်မးလီၤ.+

၂၆ အဝဲကဘၣ်တူၢ်ၡူကွံာ် အတၢ်ထူးတၢ်တီၤတဖၣ်

ဒီးကလီၤဂာ်ဒ်သိးဒီး မ့ၣ်အူလၢ ပှၤတဝံၢ်ဝၢ်ဝဲန့ၣ် အီၣ်ကွံာ်အဝဲလီၤ.

ဒီးပှၤလၢအအိၣ်လၢ အဒဲပူၤလၢ အပူၤဖျဲးန့ၣ် တၢ်ကီတၢ်ခဲ ကဘၣ်အဝဲသ့ၣ်လီၤ.

၂၇ မူခိၣ်ကပာ်ဖျါထီၣ် အတၢ်ကမၣ်

ဒီးဟီၣ်ခိၣ် ကထီဒါအီၤလီၤ.

၂၈ ဖဲကစၢ်ယွၤ အတၢ်သးထီၣ်အနံၤန့ၣ် ထံကယွၤလီၤဝဲဆူၣ်ဆူၣ်

ဒီးထံကလုၢ်ဘၢတၢ် ဒီးကစိာ်ကွံာ်အဟံၣ်လီၤ.

၂၉ အဝဲန့ၣ် မ့ၢ်တၢ်လၢ ပှၤအၢပှၤသီတဂၤ ကဒိးန့ၢ်ဘၣ်လၢ ကစၢ်ယွၤ အအိၣ်လီၤ.

ဒီးတၢ်န့ၢ်သါအံၤ ကစၢ်ယွၤ ရဲၣ်ကျဲၤန့ၢ်အီၤလီၤ.”

၂၁ စီၤယိၤဘး တဲဆၢဝဲလၢ

၂ “ကနၣ်မ့ၢ်ထံ, ယကတဲသု.

သုမ့ၢ်မၤဒ်န့ၣ်န့ၣ် ယသး ကမုာ်ထီၣ်လီၤ.

၃ ဖဲယတဲတၢ်အခါ ကနၣ်ယၤလၢ တၢ်သးစူၤအပူၤ

ဒီးယတဲတၢ်မ့ၢ်ဝံၤမး သုမ့ၢ်အဲၣ်ဒိး ဒုၣ်ဒွဲၣ်ယၤန့ၣ် ဒုၣ်ဒွဲၣ်ဟီ.+

၄ မ့ၢ်ယကဒူးကဒ့ၣ်တၢ်လၢ ပှၤဟီၣ်ခိၣ်ဖိအမဲာ်ညါဧါ.

မ့မ့ၢ်ဘၣ်ဖုး ဒ်န့ၣ်န့ၣ် ယဝံသးစူၤတၢ် ကကဲဒ်လဲၣ်.

၅ ကွၢ်ယၤ ဒီးသုကကမၢကမၣ်

ဒီးသုကကးဘၢ သုထးခိၣ် ဒီးသုစုလီၤ.

၆ ဖဲယဆိကမိၣ်က့ၤ ယတၢ်လဲၤခီဖျိအခါန့ၣ် ယသးဘၣ်တံာ်တာ်

ဒီးယကနိး ဒီဂၤညါလီၤ.

၇ ဘၣ်မနုၤအဃိ ပှၤအၢပှၤသီ ဆဲးအိၣ်မူဘၣ်+

တုၤလၢအသးပှၢ် ဒီးထူးထီၣ် တီၤထီၣ်လဲၣ်.+

၈ အဝဲသ့ၣ် အဖိတဖၣ် အိၣ်ဘူးဒီး အဝဲသ့ၣ်ထီဘိ

ဒီးအဝဲသ့ၣ် ထံၣ်ဘၣ် အစၢၤအသွဲၣ်တဖၣ်လီၤ.

၉ အဝဲသ့ၣ် အဟံၣ်န့ၣ် ပှဲၤဒီး တၢ်ဘံၣ်တၢ်ဘၢ ဒီးအဝဲသ့ၣ် တပျံၤဘၣ်တၢ်ဘၣ်.+

ဒီးကစၢ်ယွၤ တစံၣ်ညီၣ် အဝဲသ့ၣ်လၢ နီၣ်တီၢ်ဘၣ်.

၁၀ အဝဲသ့ၣ် အကျီၢ်မိၢ်တဖၣ် အဟုးတဟးဂီၤဘၣ် ဒီးဖှံလီၤအဖိ အဃိ

ကျီၢ်ဖါတဖၣ် အိၣ်ဒီးအဖိ အါမးလီၤ.

၁၁ အဝဲသ့ၣ် အဖိခွါတဖၣ် စံၣ်လိာ်ကွဲလၢ တၢ်ပျီပူၤ ဒ်သိဒီးမဲာ်တဲးလဲး တဖုအသိး

ဒီးအဝဲသ့ၣ် ဖုကဆဲး* လၢတၢ်သးခု အပူၤလီၤ.

၁၂ အဝဲသ့ၣ် သးဝံၣ်တၢ်ဒီး တၢ်ခြ့ခြ့ ဒီးတနၢ်

ဒီးအဝဲသ့ၣ် သူၣ်ဖှံသးညီလၢ ပံသီၣ်အဃိလီၤ.+

၁၃ အဝဲသ့ၣ်ပှဲၤဒီး တၢ်သူၣ်မံသးမုာ် လၢအတၢ်အိၣ်မူ ဒီတစိၤ

ဒီးလဲၤလီၤလၢ တၢ်သွၣ်ခိၣ်* လၢတၢ်မုာ်တၢ်ခုၣ်အပူၤလီၤ.

၁၄ အဝဲသ့ၣ် တဲယွၤလၢ အမ့ၢ်အတီလၢ ‘ပျဲပအိၣ်ဒၣ်ပတၢ်သၢၤ.

ပတအဲၣ်ဒိးသ့ၣ်ညါ နတၢ်သိၣ်လိတဖၣ် နီတစဲးဘၣ်.+

၁၅ သ့တၢ်လၢာ်ကစၢ်န့ၣ် အမ့ၢ်မတဂၤလၢ ပကဘၣ်မၤအတၢ်လဲၣ်.+

ဒီးပမ့ၢ်ဘါထုကဖၣ် လၢအအိၣ်ဘၣ်ဆၣ် ကကဲဘျုးလၢပဂီၢ် ဒ်လဲၣ်.’+

၁၆ ဘၣ်ဆၣ် ဒ်သိးအဝဲသ့ၣ် ကဆဲးဘီၣ်ထီၣ်ညီထီၣ် ထီဘိအဂီၢ်န့ၣ် အဝဲသ့ၣ်မၤဝဲတန့ၢ်ဘၣ်.+

လ့ၤတက့ၤ ယတဆိကမိၣ်တၢ်ဒ် အဝဲသ့ၣ် ဆိကမိၣ်ဝဲ အသိးဘၣ်.+

၁၇ ပှၤအၢပှၤသီတဖၣ် အမ့ၣ်အူဒၢ လီၤပံာ်ကွံာ်န့ၣ် အိၣ်ဝဲပှဲၤဘျီလဲၣ်.+

တၢ်ကီတၢ်ခဲ ဘၣ်အဝဲသ့ၣ်န့ၣ် အိၣ်ပှဲၤဘျီလဲၣ်.

ကစၢ်ယွၤ မၤဟးဂီၤကွံာ် အဝဲသ့ၣ်လၢ တၢ်သးဒိၣ်ထီၣ်အပူၤန့ၣ် အိၣ်ဝဲပှဲၤဘျီလဲၣ်.

၁၈ ဒီးအဝဲသ့ၣ် လီၤဂာ်ဒီး လီၢ်ဘိလၢ ကလံၤအူဖျိးကွံာ်အီၤ

ဒီးဖ့လၢ ကလံၤအူဒံကွံာ်အီၤအသိး တဘျီဘျီဧါ.

၁၉ ကစၢ်ယွၤ ကစံၣ်ညီၣ် ပှၤအၢပှၤသီတဂၤ အဖိခွါတဖၣ်လၢ အပၢ်အတၢ်ကမၣ် အဃိလီၤ.

ဘၣ်ဆၣ် မ်ကစၢ်ယွၤ ဟ့ၣ်ကၣ်က့ၤ ပှၤအၢပှၤသီတဂၤအံၤ ဒ်သိး အနီၢ်ကစၢ် ကသ့ၣ်ညါလီၤအသးလၢ အမၤတၢ်ကမၣ်တက့ၢ်.+

၂၀ မ်အထံၣ်ဘၣ်ဝဲ အနီၢ်ကစၢ် တုၤလၢတၢ်ဟးဂီၤ

ဒီးမ်အကဲပှၤလၢ အအီဝဲ တၢ်ထီကတၢၢ်တဂၤ အတၢ်သးဒိၣ်ထီၣ်တက့ၢ်.+

၂၁ အမ့ၢ်သံဆိန့ၣ်

ခါဆူညါ တၢ်ကမၤအသးဒီး အစၢၤအသွဲၣ်တဖၣ် ဒ်လဲၣ်န့ၣ် မ့ၢ်အကဘၣ်ယိၣ်ဝဲဒံးဧါ.+

၂၂ ကစၢ်ယွၤ မ့ၢ်ပှၤလၢ အစံၣ်ညီၣ်ဝဲ ပှၤလၢအထီကတၢၢ်တဖၣ်+ အဃိ

မတဂၤ သိၣ်လိကစၢ်ယွၤ ဒ်သိး အတၢ်သ့ၣ်ညါ ကအါထီၣ်အဂီၢ် ကသ့လဲၣ်.+

၂၃ ပှၤတဂၤသံဝဲ ဖဲအတၢ်ဂံၢ်တၢ်ဘါအိၣ်ဒံး လၢလၢပှဲၤပှဲၤ,+

ဖဲအအိၣ်ဘၣ် မုာ်မုာ်ခုၣ်ခုၣ် ဒီးအတၢ်ဘၣ်ယိၣ်ဘၣ်ဘှီ တအိၣ်ဘၣ်,+

၂၄ ဒီးဖဲအခီၣ်ကံၣ်ဒုၣ် အိၣ်ဘီၣ်ဘီၣ်သိသိ

ဒီးအဃံတဖၣ် ကျၢၤဝဲ အခါလီၤ.

၂၅ ဘၣ်ဆၣ် မ့မ့ၢ် ပှၤအဂၤတဂၤန့ၣ် တူၢ်ဘၣ်တၢ်ကီတၢ်ခဲ တုၤလၢအသံ

ဒီးအတအီၣ်ဘၣ် တၢ်ဝံၣ်တၢ်ဘဲ နီတဘျီဘၣ်.

၂၆ အဝဲသ့ၣ်ခံဂၤ ကကဲထီၣ်ကဒါက့ၤ ဟီၣ်ခိၣ်ကမူၣ် ဒ်သိးသိး+

ဒီးလၢၣ်ကအီၣ်ကွံာ် အဝဲသ့ၣ်လီၤ.+

၂၇ တၢ်လၢသုဆိကမိၣ်တဖၣ်န့ၣ် ယသ့ၣ်ညါလၢာ်လံဧဲၤ.

သုကူၣ်ထီၣ်တၢ်လၢ သုကမၤကီမၤခဲယၤလီၤ.+

၂၈ သုတဲလၢ ‘ပှၤလၢအမံၤဒိၣ် အဟံၣ်န့ၣ် အိၣ်ဖဲလဲၣ်,

ဒီးပှၤအၢပှၤသီအဒဲန့ၣ် အိၣ်ဖဲလဲၣ်.’+

၂၉ မ့ၢ်သုတသံကွၢ်တၢ်လၢ ပှၤလဲၤတၢ်က့ၤတၢ်တဖၣ် အအိၣ်ဧီၤ.

တၢ်လၢအဝဲသ့ၣ် တဲဝဲတဖၣ်န့ၣ် သုတနာ်ဧီၤ.

၃၀ ဖဲတၢ်နးတၢ်ဖှီၣ် ဟဲဝဲအခါ ပှၤအၢပှၤသီ တဘၣ်ဒိဘၣ်.

ဒီးဖဲတၢ်သးထီၣ်တၢ် အမုၢ်နံၤန့ၣ် အဝဲပူၤဖျဲးလီၤ.

၃၁ မတဂၤ သိၣ်ဃီၣ်အီၤလၢ အတၢ်မၤလၢ အအၢအသီအဃိ ကဘူၣ်လဲၣ်.

မတဂၤ ကဟ့ၣ်ကၣ်အီၤလၢ တၢ်လၢအမၤဝဲ အဃိလဲၣ်.

၃၂ ဖဲပှၤလဲၤစိာ်အီၤလၢ တၢ်သွၣ်ခိၣ်အခါ

ပှၤခိးတၢ်ဖိ အိၣ်ခိးအတၢ်သွၣ်ခိၣ်လီၤ.

၃၃ အကအိၣ်ဘှံးဘၣ်လၢ ဟီၣ်ခိၣ်အပူၤ မုာ်မုာ်ခုၣ်ခုၣ်*+

ဒီးပှၤဟီၣ်ခိၣ်ဖိခဲလၢာ် လဲၤပိာ်အခံ+

ဒ်ပှၤအါဂၤလၢ အမဲာ်ညါတဖၣ် လဲၤတ့ၢ်ဝဲအသိးလီၤ.

၃၄ အဃိ သုတၢ်မၤမုာ်ထီၣ်ယၤတခါအံၤ အခီပညီကအိၣ်ဧါ.+

တၢ်လၢသုတဲယၤတဖၣ်န့ၣ် မ့ၢ်ထဲ တၢ်လံၣ်တၢ်လီ ဒီးတကဲဘျုး နီတမံၤဘၣ်.”

၂၂ ပှၤတ့ၤမၣ်ဖိ စီၤအလံဖးစး+ တဲဆၢဝဲလၢ

၂ “တၢ်လၢ ပှၤကညီန့ၣ် ကစၢ်ယွၤ သူအီၣ်အီၤကသ့ဧါ.

ပှၤလၢအအိၣ်ဒီး တၢ်ကူၣ်သ့နာ်က့ မ့ၢ်အကကဲဘျုးလၢ ကစၢ်ယွၤ အဂီၢ်ဧါ.+

၃ နမ့မ့ၢ် ပှၤတီပှၤလိၤသနာ်က့ မ့ၢ်သ့တၢ်လၢာ်ကစၢ် ကပာ်သူၣ် ပာ်သးဝဲဧါ.

နမ့ၢ်အိၣ်မူလၢ တၢ်သးတီအပူၤ သနာ်က့ မ့ၢ်အကကဲဘျုးလၢအဂီၢ် တမံၤမံၤဧါ.+

၄ နမ့ၢ်ယူးယီၣ်ပာ်ကဲအီၤန့ၣ်

မ့ၢ်အဝဲကစံၣ်ညီၣ်နၤ ဒီးလဲၤကိးထီၣ်နၤ လၢရူဧါ.

၅ အဝဲစံၣ်ညီၣ်နၤန့ၣ် မ့ၢ်လၢ နမၤ တၢ်အၢတၢ်သီဒီဒူၣ်

ဒီးနမၤကမၣ်တၢ် တကတၢၢ်နီတဘျီဘၣ်အဃိ တမ့ၢ်ဧီၤ.+

၆ တၢ်လၢနဒီပုၢ်ဝဲၢ် ပီၣ်လီၤဝဲန့ၣ် နဟံးန့ၢ်ဆူၣ်အီၤ တတီတလိၤ

ဒီးနဂုာ်န့ၢ်ဆူၣ် ပှၤဂၤအဆ့ကၤ ဒီးနပာ်အိၣ်ဘ့ၣ်ဆ့ အဝဲသ့ၣ်လီၤ.+

၇ ပှၤလၢအလီၤဘှံးန့ၣ် နတဟ့ၣ်ဒုးအီအီၤထံဘၣ်,

ပှၤလၢအလီၤဘဲန့ၣ် နတဒုးအီၣ်အီၤ တၢ်အီၣ်ဘၣ်.+

၈ ပှၤလၢအအိၣ်ဒီး တၢ်စိတၢ်ကမီၤ ဒ်သိးဒီးနၤန့ၣ် ဟံးန့ၢ်တၢ်လီၢ် တၢ်ကျဲအါမး+

ဒီးထဲဒၣ် ပှၤလၢအအိၣ်ဒီး တၢ်ခွဲးတၢ်ယာ် လီၤဆီတဖၣ်န့ၣ် အိၣ်ဘၣ်ဝဲ ဖဲန့ၣ်လီၤ.

၉ မ့မ့ၢ် မုၣ်ကမဲတဖၣ်န့ၣ် နတအဲၣ်ဒိး မၤစၢၤ အဝဲသ့ၣ်ဘၣ်

ဒီးနမၤဆါ ဖိၣ်ဃဲတဖၣ်လီၤ.

၁၀ အဃိ ခဲအံၤ ပျံၤသကွီၤတဖၣ် အိၣ်ဝးတရံးနၤ+

ဒီးတၢ်ပျံၤတၢ်ဖုး လီၤဘၣ်နၤ သတူၢ်ကလာ်လီၤ.

၁၁ တကးဒံးဘၣ် တၢ်ခံးလီၤဘၣ်နၤ ဒီးနတထံၣ်တၢ်လၢၤဘၣ်.

ဒီးထံလၢ အလုၢ်ဘၢတၢ်တဖၣ် လုၢ်ဘၢကွံာ်နၤလီၤ.

၁၂ ကစၢ်ယွၤအိၣ်လၢ မူခိၣ်လၢ တၢ်လီၢ်လၢ အထီၣ်ထီကတၢၢ် တမ့ၢ်ဧီၤ.

ကွၢ်မီၤ, ဆၣ်တဖၣ်လၢမူခိၣ်စ့ၢ်ကီး အိၣ်လၢ တၢ်လီၢ်ထီၣ်ထီလီၤ.

၁၃ ဘၣ်ဆၣ် နတဲလၢ ‘မ့ၢ်ကစၢ်ယွၤ သ့ၣ်ညါ တၢ်လၢအကဲထီၣ်အသး လၢဟီၣ်ခိၣ်ချၢ သပှၢ်ကတၢၢ်ဧါ.

မ့ၢ်လၢ တၢ်အၢၣ်ခံးသူ အိၣ်ကးဘၢတၢ် အဃိ အဝဲစံၣ်ညီၣ်တၢ် ကဘၣ်ဧါ.

၁၄ မ့ၢ်လၢ တၢ်အၢၣ်တဖၣ် အိၣ်တဒၢအီၤအဃိ

ဖဲအဟးလၢမူခိၣ် အခိၣ်ဒူအခါ အတထံၣ်တၢ်ဘၣ်.’

၁၅ မ့ၢ်နကပိာ် ကျဲလၢပျၢၤတဘိလၢ

ပှၤအၢပှၤသီ လၢညါတဖၣ် လဲၤဝဲန့ၣ်ဧါ.

၁၆ ပှၤတဖၣ်န့ၣ် သံဝဲသတူၢ်ကလာ် တချုးလၢ အဆၢကတီၢ်ဘၣ်ဒံးဘၣ်

ဒီးအဝဲသ့ၣ် လီၤထွံဝဲ ဒ်ဟံၣ်ထူၣ်တဖၣ် လၢအလီၤထွံဝဲဖဲ ထံလုၢ်ဘၢတၢ်* အခါလီၤ.+

၁၇ အဝဲသ့ၣ် တဲဝဲ ယွၤလၢအမ့ၢ်အတီလၢ ‘ပျဲပအိၣ်ဒၣ်ပတၢ်’

ဒီး ‘သ့တၢ်လၢာ်ကစၢ်န့ၣ် မၤပှၤ တၢ်မနုၤ ကသ့လဲၣ်.’

၁၈ နီၢ်ကီၢ်န့ၣ် ကစၢ်ယွၤ မ့ၢ်ပှၤလၢ အမၤပှဲၤ အဝဲသ့ၣ်အဟံၣ်ဒီး တၢ်လၢအဂ့ၤတဖၣ်လီၤ.

(တၢ်ဆိကမိၣ်လၢ အအၢအသီ ဒ်န့ၣ်န့ၣ် ယတဆိကမိၣ် နီတဘျီဘၣ်.)

၁၉ ဒီးပှၤတီပှၤလိၤ ကထံၣ်ဘၣ်လၢ ပှၤတဖၣ်န့ၣ် ဘၣ်တၢ်မၤဟးဂီၤကွံာ်အီၤအဃိ ကသးခုဝဲ

ဒီးပှၤလၢ အတၢ်ကမၣ် တအိၣ်ဘၣ်န့ၣ် ကတဲဆဲးအဲး အဝဲသ့ၣ်လၢ

၂၀ ‘ပှၤတဖၣ်လၢ အထီဒါပှၤန့ၣ် ဘၣ်တၢ်မၤဟးဂီၤကွံာ်အီၤလံ

ဒီးအဝဲသ့ၣ် အတၢ်ဖိတၢ်လံၤလၢ အအိၣ်တ့ၢ်ခဲလၢာ်န့ၣ် ကဘၣ်တၢ်ဒွဲၣ်အူထီၣ်ကွံာ်အီၤ လၢမ့ၣ်အူလီၤ.’

၂၁ နမ့ၢ်သ့ၣ်ညါထီၣ် ကစၢ်ယွၤဂ့ၤဂ့ၤန့ၣ် နကအိၣ်ဒီး တၢ်သူၣ်မံသးမုာ်

ဒီးနကဘၣ်ဆိၣ်ဂ့ၤလီၤ.

၂၂ တူၢ်လိာ် အတၢ်သိၣ်တၢ်သီ လၢအဟဲထီၣ် လၢအကိာ်ပူၤ

ဒီးတိၢ်နီၣ်ဃာ် အတၢ်ကတိၤ လၢနသးပူၤတက့ၢ်.+

၂၃ နမ့ၢ်ဟဲက့ၤကဒါက့ၤ လၢသ့တၢ်လၢာ်ကစၢ် အအိၣ်န့ၣ် နကဘီၣ်ထီၣ်ညီထီၣ်က့ၤ+

ဒီးနမ့ၢ်ထုးထီၣ်ကွံာ် တၢ်တတီတလိၤ လၢနဒဲပူၤ,

၂၄ ဒီးနမ့ၢ်တၢၤကွံာ်နထူ လၢဟီၣ်ခိၣ်ကမူၣ်ကျါ

ဒီးနမ့ၢ်တၢၤကွံာ် အိဖ့ၢ်အထူ+ လၢ တၢ်တြီၤပူၤ လၢအအိၣ်ထဲလၢၢ်န့ၣ်

၂၅ သ့တၢ်လၢာ်ကစၢ် ကကဲထီၣ်နထူ

ဒီးအဝဲကကဲထီၣ် နစ့ညၣ် လၢအဂ့ၤကတၢၢ်လီၤ.

၂၆ ဒီးနကသူၣ်ခုသးခု လၢသ့တၢ်လၢာ်ကစၢ် အပူၤ

ဒီးနကွၢ်ထီၣ်တၢ်လၢအအိၣ် ကဘူၣ်ဝဲလီၤ.

၂၇ နကဃ့ထုကဖၣ်လၢအအိၣ် ဒီးအဝဲ ကဒိကနၣ်နၤ

ဒီးနကမၤလၢပှဲၤဘၣ် နတၢ်အၢၣ်လီၤလီၤ.

၂၈ ဒီးတၢ်လၢနပာ်လီၤနသးလၢ နကမၤန့ၣ် ကကဲထီၣ်လိၣ်ထီၣ်

ဒီးနကျဲကကပီၤထီၣ်လီၤ.

၂၉ ဘၣ်ဆၣ် ဖဲနပာ်ထီၣ်ထီနသးအခါ တၢ်ကမၤမဲာ်ဆှးနၤ

ဒီးအကမၤပူၤဖျဲး ပှၤလၢ အဆီၣ်လီၤအသးလီၤ.

၃၀ အဝဲကမၤပူၤဖျဲး ပှၤလၢအတၢ်ကမၣ် တအိၣ်ဘၣ်

အဃိ နမ့ၢ်တမၤ တၢ်အၢတၢ်သီ* နီတမံၤဘၣ်န့ၣ် နကပူၤဖျဲး သပှၢ်တၢၢ်လီၤ.”

၂၃ စီၤယိၤဘး တဲဆၢဝဲလၢ

၂ “တနံၤညါအံၤစ့ၢ်ကီး ယကကဒူးကဒ့ၣ်ဒံး တၢ် ဆူၣ်ဆူၣ်လီၤ.+

မ့ၢ်လၢ ယသးလီၤဘှံးအဃိ ယဂံၢ်လၢာ်ယဘါလၢာ်လံ.

၃ ယမ့ၢ်သ့ၣ်ညါလၢ ယကဘၣ်လဲၤဃု ကစၢ်ယွၤ လၢတၢ်လီၢ်ဖဲလဲၣ်န့ၣ်+

ယကလဲၤလၢ အတၢ်အိၣ်တၢ်ဆိး အလီၢ်လီၤ.+

၄ ယကတီၣ်ဖျါထီၣ် ယတၢ်ဂ့ၢ် လၢအအိၣ်

ဒီးယကအိၣ်ကတဲာ်ကတီၤယသးလၢ ယကတဲအါတဲစှၤတၢ် အဂီၢ်လီၤ.

၅ ယကသ့ၣ်ညါဘၣ် အတၢ်စံးဆၢ

ဒီးယကတိၢ်နီၣ်တၢ်လၢ အတဲယၤလီၤ.

၆ မ့ၢ်ကစၢ်ယွၤ ကသူအတၢ်စိတၢ်ကမီၤ ဒ်သိးကတဲနၢၤယၤအဂီၢ်ဧါ.

အဝဲတမၤဝဲ ဒ်န့ၣ်ဘၣ်, အဝဲကဒိကနၣ်ယၤလီၤ.+

၇ ဖဲန့ၣ်န့ၣ် ပှၤလၢ အသူၣ်တီသးလိၤတဂၤ မၤဘၣ်ဂီၢ်က့ၤ အတၢ်ဂ့ၢ်တၢ်ကျိၤဒီး ကစၢ်ယွၤသ့လီၤ.

ဒီးယစံၣ်ညီၣ်ကွီၢ်န့ၣ် ကမၤပူၤဖျဲးယၤလၢ တၢ်စံၣ်ညီၣ် လီၤထူ လီၤယိာ်လီၤ.

၈ ဖဲယလဲၤလၢ မုၢ်ထီၣ်အခါ ယတထံၣ်အီၤဘၣ်.

ဒီးဖဲယဟဲက့ၤလၢ မုၢ်နုာ်အခါ ယဃုအီၤတဘၣ်ဘၣ်.

၉ ဖဲအမၤတၢ်လၢ ကလံၤထံးတခီန့ၣ် ယကွၢ်အီၤတဖျါဘၣ်

ဝံၤဒီး အဝဲဃၣ်အသးလၢ ကလံၤစိးတခီ သနာ်က့ ယတထံၣ်အီၤ ဒံးဘၣ်.

၁၀ ဘၣ်ဆၣ် အဝဲသ့ၣ်ညါဝဲ တၢ်လၢ ယမၤတ့ၢ်တဖၣ်+

ဒီးဖဲအဝဲ မၤကွၢ်ယၤ ဝံၤအခါ ယကကဲထီၣ်ဒ်သိးဒီး ထူစီလီၤ.+

၁၁ ယယီၢ်အခီၣ်လီၢ် ဘူးဘူး

ဒီးယဒိကနၣ်အကလုၢ် ဒီးယတလဲၤကမၣ်ကျဲ နီတဘျီဘၣ်.+

၁၂ ယတလဲၤသဒၣ် တၢ်မၤလိာ်လၢ အဟဲထီၣ်လၢ အထးခိၣ်န့ၣ်ဘၣ်.

ယပာ်လုၢ်ပာ်ပှ့ၤ အတၢ်ကတိၤတဖၣ်+ အဃိ ယမၤအါန့ၢ်ဒံး တၢ်လၢအဃ့ယၤလီၤ.

၁၃ ကစၢ်ယွၤ မ့ၢ်ပာ်လီၤအသးလံန့ၣ် မတဂၤ တြီအီၤကန့ၢ်လဲၣ်.+

အမ့ၢ်အဲၣ်ဒိး မၤတၢ်တမံၤမံၤန့ၣ် အမၤဝဲလီၤ.+

၁၄ တၢ်လၢအတိာ်ပာ်ဝဲလၢ အကမၤယၤန့ၣ် အဝဲကမၤဝဲ သပှၢ်ကတၢၢ်

ဒီးအဝဲပာ်ဃာ် တၢ်ဂ့ၢ်ဒ်အံၤတဖၣ် လၢအသးပူၤန့ၣ် အိၣ်အါမးလီၤ.

၁၅ အဃိ ဖဲယဆိကမိၣ်ထီၣ် ကစၢ်ယွၤ အဂ့ၢ်အခါ

ယဘၣ်ယိၣ်တၢ် ဒီးယပျံၤအီၤ ဒိၣ်ထီၣ်လီၤ.

၁၆ ကစၢ်ယွၤန့ၣ် မၤလီၤစၢ်ယသး

ဒီးသ့တၢ်လၢာ်ကစၢ် တဂၤန့ၣ် မၤပျံၤမၤဖုးယၤလီၤ.

၁၇ တၢ်ခံးဖးဒိၣ် မ့ၢ်ကးဘၢ ယမဲာ်သနာ်က့

ယတအိၣ်ဘှ့ၣ်ဒံးဘၣ်.

၂၄ “ဘၣ်မနုၤအဃိ သ့တၢ်လၢာ်ကစၢ် တပာ်ပနီၣ် မုၢ်နံၤလၢ ကစံၣ်ညီၣ်တၢ် အဂီၢ်လဲၣ်.+

ဘၣ်မနုၤအဃိ ပှၤလၢအသ့ၣ်ညါအီၤန့ၣ် တထံၣ်ဘၣ်ဝဲ မုၢ်နံၤ အဝဲန့ၣ်လဲၣ်.

၂ အဝဲသ့ၣ် သုးအံၣ်လီၤ ပှၤဂၤ အဟီၣ်ခိၣ်အဆၢ+

ဒီးအဝဲသ့ၣ် ဟုၣ်ဝဲသိတဖၣ် ဒီးက့ၤကိးဝဲဆူ အဝဲသ့ၣ် အဆၣ်ဖိကီၢ်ဖိ အီၣ်ဆၣ်အလီၢ်လီၤ.

၃ အဝဲသ့ၣ်ဟံးန့ၢ် ပှၤဖိၣ်ဃဲ အကသ့ၣ်ယီၤ

ဒီးဟံးန့ၢ်ဝဲ ပှၤမုၣ်ကမဲ အကျီၢ်ဖါ ဒ်တၢ်အုၣ်အသးတမံၤလၢ အဝဲကဘၣ်လိးက့ၤ အဒ့ၣ်ကမၢ်အသိးလီၤ.+

၄ အဝဲသ့ၣ် တဟ့ၣ်အခွဲးလၢ ပှၤဖှီၣ်ဖိယာ်ဖိ ကဟးလၢကျဲဘၣ်.

ဒီးပှၤလၢ အလိၣ်ဘၣ်တၢ်မၤစၢၤန့ၣ် ဘၣ်အိၣ်ခူသူၣ် အဝဲသ့ၣ်လီၤ.+

၅ ပှၤဖှီၣ်ဖိယာ်ဖိ ဘၣ်ဟးဃုအီၣ်တၢ်အီၣ် ဒ်သိးဒီး ကသ့ၣ်ယီၤမံၤ+ လၢပှၢ်မုၢ်ကနၢ

ဒီးအဝဲသ့ၣ် ဘၣ်ဟးဃုအီၣ် တၢ်အီၣ်လၢ မဲးမုၢ်ခိၣ် လၢအဖိတဖၣ် အဂီၢ်လီၤ.

၆ အဝဲသ့ၣ် ဘၣ်လဲၤမၤတၢ်မၤလၢ ပှၤဂၤအစံာ်ပျီပူၤ

ဒီးဘၣ်ထၢဖှိၣ်တၢ်လၢ ပှၤအၢပှၤသီ အစပံးကျီးလီၤ.

၇ ဖဲမုၢ်နၤ တၢ်ချံၣ်အခါ အဝဲသ့ၣ် ဘၣ်မံဘ့ၣ်ဆ့ ဒီးအတၢ်ကူတၢ်ကၤ တအိၣ်နီတမံၤဘၣ်,+

ဒီးတၢ်လၢ အဝဲသ့ၣ်ကလုးဘၢအသးအဂီၢ်န့ၣ် တအိၣ်နီတမံၤဘၣ်.

၈ အဝဲသ့ၣ် ဘၣ်စီၣ်ဝဲလၢ မူခိၣ်ထံလၢ အစူၤလီၤဝဲလၢ ကစၢၢ်ကလိကျါ

ဒီးမ့ၢ်လၢ တၢ်အိၣ်သဒၢအလီၢ် လၢအဝဲသ့ၣ်အဂီၢ် တအိၣ်ဘၣ်အဃိ အဝဲသ့ၣ် လဲၤအိၣ်ကဒုလၢ လၢၢ်အကပၤလီၤ.

၉ ဖိၣ်ဃဲန့ၣ် ဘၣ်တၢ်ဟံးထီၣ်ကွံာ်အီၤ လၢအမိၢ် အသးနါပှၢ်ပူၤ+

ဒီးပှၤဖှီၣ်ဖိယာ်ဖိ အတၢ်ကူတၢ်ကၤန့ၣ် ဘၣ်တၢ်ဟံးန့ၢ်အီၤ ဒ်တၢ်အုၣ်အသး တမံၤလၢ အဝဲကဘၣ်လိးက့ၤ အဒ့ၣ်ကမၢ် အသိးလီၤ.+

၁၀ အဃိ အဝဲသ့ၣ် အတၢ်ကူတၢ်ကၤ တအိၣ်လၢၤဘၣ် ဒီးဘၣ်ဟးဘ့ၣ်ဆ့လီၤ.

ဒီးအဝဲသ့ၣ် လီၤဘဲဝဲ ဘၣ်ဆၣ် ဘၣ်စိာ်ဝဲ ဘုကဒိၣ်လီၤ.

၁၁ ဖဲမုၢ်ဆါခီ တၢ်ကိၢ်အဆၢကတီၢ် အဝဲသ့ၣ် ဘၣ်မၤတၢ်ဆူၣ်ဆူၣ် လၢတၢ်လူၢ်ခိၣ် လၢအအိၣ်ဒီး တၢ်ဒူၣ်လၢၢ်တဖၣ် အကပိာ်ကပၤလီၤ.

ဒီးအဝဲသ့ၣ် ယီၢ်စပံးသၣ်တဖၣ် ဒ်သိး ကတ့ထီၣ်စပံးထံ ဘၣ်ဆၣ် အဝဲသ့ၣ် လီၤဘဲအီထံ* ဒံးလီၤ.+

၁၂ ပှၤလၢ အဘူးကသံတဖၣ် ကအုကစွါထီၣ် လၢဝ့ၢ်ပူၤ,

ပှၤလၢအဘၣ်ဒိဘၣ်ထံး တုၤလၢ အကသံတဖၣ် ဃ့တၢ်မၤစၢၤ+

ဘၣ်ဆၣ် ကစၢ်ယွၤ တကနၣ်ဃုာ် ဝဲဘၣ်.

၁၃ ပှၤလၢအသးဟ့ တၢ်ကပီၤန့ၣ်+

တအဲၣ်ဒိးသ့ၣ်ညါ တၢ်ကပီၤ အကျဲဘၣ်

ဒီးအဝဲသ့ၣ် တပိာ်ဝဲ တၢ်ကပီၤ အကျဲဘၣ်.

၁၄ ပှၤမၤသံတၢ် ဟဲပၢၢ်ထီၣ်လၢ မုၢ်ဆ့ၣ်ဝါထီၣ်

ဒီးအမၤသံဝဲ ပှၤလၢအလိၣ်ဘၣ် တၢ်မၤစၢၤ ဒီးပှၤဖှီၣ်ဖိယာ်ဖိ,+

ဒီးအဝဲ ဟုၣ်တၢ်ဖဲ မုၢ်နၤခီလီၤ.

၁၅ ပှၤလၢ အအဲၣ်ဘၢမါအဲၣ်ဘၢဝၤန့ၣ် အိၣ်ခိးဝဲလၢ မုၢ်ကလီၤနုာ်+

ဒီးမၤဘၢအမဲာ်

ဒီးတဲလီၤအသးလၢ ‘ပှၤတထံၣ်ယၤ နီတဂၤဘၣ်.’+

၁၆ လၢမုၢ်နၤခီန့ၣ် တၢ်ဘျၣ် မၤဖျိဟံၣ်

ဒီးလၢမုၢ်ဆါခီန့ၣ် အဝဲသ့ၣ် အိၣ်လၢဟံၣ်ပူၤလီၤ.

အဝဲသ့ၣ် ဟးဆှဲး တၢ်ကပီၤလီၤ.+

၁၇ အဝဲသ့ၣ် ပျံၤဂီၤခီ ဒ်ပှၤပျံၤတၢ်လၢ တၢ်ခံးကျါအသိး

ဒီးတၢ်ပျံၤတၢ်ဖုးလၢ အကဲထီၣ်ညီနုၢ်အသး ဖဲတၢ်ခံးကျါန့ၣ် တမ့ၢ်တၢ်လီၤဆီလၢ အဝဲသ့ၣ် အဂီၢ်လၢၤဘၣ်.

၁၈ ထံကဆူဖျိး အဝဲသ့ၣ် လၢအယံၤ

ဒီးအဝဲသ့ၣ် အဟီၣ်ခိၣ်န့ၣ် ကဘၣ်တၢ်ဆိၣ်အၢ+

ဒီးအဝဲသ့ၣ် တဟဲက့ၤကဒါက့ၤဘၣ်လၢ အစပံးကျီးဘၣ်.

၁၉ ဒ်မူခိၣ်ဖီအထံလၢ အပှံၢ်လီၤတဖၣ် သဝံထီၣ် ဒီးလီၤမၢ်ကွံာ်အသိး

ပှၤတၢ်ဒဲးဘးဖိ ကလီၤမၢ်ကွံာ် လၢတၢ်သွၣ်ခိၣ်* အပူၤလီၤ.+

၂၀ အမိၢ် ကသးပ့ၤနီၣ်အီၤ ဒီးလၢၣ်ကအီၣ်ကွံာ်အီၤလီၤ.

ဒီးပှၤတသ့ၣ်နီၣ်အီၤလၢၤဘၣ်.+

ဒီးပှၤတတီတလိၤ ကကၢ်ကွံာ် ဒ်သ့ၣ်တထူၣ် အသိးလီၤ.

၂၁ အဝဲသ့ၣ်မၤအၢမၤနး ပှၤတူာ်ဖိ

ဒီးမၤအၢမၤသီ ပှၤမုၣ်ကမဲလီၤ.

၂၂ ကစၢ်ယွၤ ကသူအဂံၢ်အဘါ ဒီး ကမၤဟးဂီၤကွံာ် ပှၤလၢအအိၣ်ဒီး တၢ်စိတၢ်ကမီၤလီၤ.

အဝဲသ့ၣ် မ့ၢ်လဲၤထီၣ်လဲၤထီနာ်က့ တမ့ၢ်လၢအဝဲသ့ၣ် ကဆဲးအိၣ်မူဘၣ်လၢၤဘၣ်.

၂၃ ကစၢ်ယွၤ ပျဲလၢ အဝဲသ့ၣ် ကအိၣ်ဒီး တၢ်နာ်န့ၢ်လီၤသး ဒီး တၢ်ဘံၣ်တၢ်ဘၢ+

ဘၣ်ဆၣ် ကစၢ်ယွၤ ကွၢ်ဝဲတၢ်လၢ အဝဲသ့ၣ်မၤဝဲ ကိးမံၤဒဲးလီၤ.+

၂၄ တၢ်ကပာ်ထီၣ်ထီ အဝဲသ့ၣ် တစိၢ်ဖိ ဝံၤအလီၢ်ခံအဝဲသ့ၣ် တအိၣ်လၢၤဘၣ်.+

တၢ်ကထုးလီၤ+ အဝဲသ့ၣ် ဒီးတၢ်ကပာ်ဖှိၣ်ထီၣ်အီၤ ဒ်ပှၤကိးဂၤဒဲး အသိးလီၤ.

ဒီးအဝဲသ့ၣ် ကဘၣ်တၢ် ကူးကွံာ်အီၤဒ် ဘုအသိးလီၤ.

၂၅ မတဂၤ ပာ်ဖျါထီၣ်လၢ ယလံၣ်တၢ်

ဒီးယတဲတၢ်ကမၣ်န့ၣ် ကသ့တဂၤလဲၣ်.”

၂၅ ပှၤၡူဧၤဖိ စီၤဘံးလဒး+ တဲဆၢဝဲလၢ

၂ “ကစၢ်ယွၤန့ၣ် လီၤပျံၤလီၤဖုး ဒိၣ်မး ဒီးအဝဲပၢဘၣ်တၢ်လီၤ.

အဝဲဒုးအိၣ်ထီၣ် တၢ်မုာ်တၢ်ခုၣ်လၢ မူခိၣ်လီၤ.

၃ အသုးမုၢ်သံၣ်ဘိတဖၣ်န့ၣ် ပှၤဂံၢ်အီၤကဘၣ်ဧါ.

ဒီးပှၤလၢ ကစၢ်ယွၤ အတၢ်ကပီၤ တဆဲးလီၤဘၣ်လၢအလိၤန့ၣ် အိၣ်တဂၤဂၤဧါ.

၄ မ့မ့ၢ်ဒ်န့ၣ်န့ၣ် ပှၤဟီၣ်ခိၣ်ဖိ တီဝဲလိၤဝဲလၢ ကစၢ်ယွၤ အမဲာ်ညါကသ့ဧါ.+

ဒီးပှၤလၢ ပိာ်မုၣ် အိၣ်ဖျဲၣ်ထီၣ်အီၤန့ၣ် အတၢ်ကမၣ် တအိၣ်ဘၣ် ကသ့ဒ်လဲၣ်.+

၅ လၢအတၢ်ထံၣ်န့ၣ် လါဒၣ်လဲာ် တကပီၤဘၣ်

ဒီးဆၣ်တဖၣ် တစီဆှံဘၣ်.

၆ မ့မ့ၢ် ပှၤဟီၣ်ခိၣ်ဖိလၢ အလီၤဂာ် ဒ်လၢၣ်

ဒီးပှၤကညီလၢ အလီၤဂာ်ဒ် ထိးကလဲာ်အသိးန့ၣ် ကနးန့ၢ် အန့ၣ်သၢၤ.”

၂၆ စီၤယိၤဘး တဲဆၢဝဲလၢ

၂ “ပှၤလၢအလိၣ်ဘၣ်တၢ်မၤစၢၤန့ၣ် နမၤစၢၤအီၤ သ့ဂ့ၤမးသၢၤ.

ပှၤလၢအဂံၢ်အဘါ တအိၣ်ဘၣ်န့ၣ် နမၤပူၤဖျဲးအီၤ ဂ့ၤဒိၣ်မးသၢၤ.+

၃ ပှၤလၢ အတၢ်ကူၣ်သ့တအိၣ်ဘၣ်န့ၣ် နဟ့ၣ်ကူၣ်ဟ့ၣ်ဖးအီၤ ဘၣ်ဂ့ၤမးသၢၤ.+

နပာ်ဖျါထီၣ် နတၢ်ကူၣ်သ့ ဒီဒူၣ်ဒီထၢလံ.

၄ မ့ၢ်နအဲၣ်ဒိးသိၣ်ယၤဟီဧါ.

မတဂၤ ထိၣ်ဟူးထိၣ်ဂဲၤထီၣ်နၤလၢ နကတဲတၢ် ဒ်အံၤလဲၣ်.

၅ ပှၤသံတဖၣ်လၢ အစိကမီၤ တအိၣ်လၢၤဘၣ်န့ၣ် ကနိးကစုာ်လၢ ကစၢ်ယွၤ အမဲာ်ညါလီၤ.

အဝဲသ့ၣ် အပတီၢ်ဖုၣ်န့ၢ်ဒံး ပီၣ်လဲၣ်ဒီးတၢ်သးသမူလၢ အိၣ်လၢအပူၤတဖၣ်လီၤ.

၆ တၢ်သွၣ်ခိၣ်န့ၣ်* တအိၣ်သဒၢလၢ ကစၢ်ယွၤ အမဲာ်ညါဘၣ်.+

အဝဲထံၣ် တၢ်လၢအအိၣ်လၢ တၢ်ဟးဂီၤအလီၢ် ခဲလၢာ်လီၤ.

၇ ကစၢ်ယွၤ ထုးသလၣ်ထီၣ်ဝဲ မူကပိာ်လိၤလၢ တၢ်တအိၣ် နီတမံၤဘၣ်အပူၤ+

ဒီးတစဲၤလီၤ ဟီၣ်ခိၣ်လၢ တၢ်အလိၤနီတမံၤဘၣ်.

၈ အဝဲဘိၣ်ထီၣ်ဝဲ ထံတဖၣ်လၢ တၢ်အၢၣ်တဖၣ်အပူၤ+

အဃိ တၢ်အၢၣ် အတယၢၢ် အိၣ်ဝဲဘၣ်ဆၣ် တပိၢ်ဖးကွံာ်ဝဲဘၣ်.

၉ အဝဲပာ်သဒၢ အလီၢ်ပစိာ်

ခီဖျိ အကးဘၢဝဲဒီး အတၢ်အၢၣ်လီၤ.+

၁၀ အဝဲပာ်လီၤဝဲ တၢ်အဆၢလၢ မူခိၣ် ဒီးပီၣ်လဲၣ် အဘၢၣ်စၢၤ+

ဒီးပာ်လီၤဝဲ တၢ်ခံး ဒီးတၢ်ကပီၤ အဆၢလီၤ.

၁၁ မူခိၣ်အထူၣ် ဟူးဝးဝဲ

ဒီးကနိးကစုာ်ဝဲလၢ အတၢ်သိၣ်ဃီၣ်အဃိလီၤ.

၁၂ အဝဲ ခွံခွးထီၣ် ပီၣ်လဲၣ်လၢ အစိအကမီၤ+

ဒီးခီဖျိလၢ အတၢ်သ့ၣ်ညါနၢ်ပၢၢ်အဃိ အမၤလီၤကရဲ တၢ်သးသမူဖးဒိၣ်* လၢအအိၣ်လၢ ပီၣ်လဲၣ်ပူၤလီၤ.+

၁၃ အဝဲမၤကဆှီထီၣ် မူခိၣ်လၢကလံၤ*

ဒီးမၤသံဝဲ ဂုၢ်လၢ အဘျိၣ်န့ၣ်လီၤ.

၁၄ တၢ်လၢအမၤဝဲတဖၣ်အံၤန့ၣ် မ့ၢ်ဒၣ်ထဲ တစဲးဖိဒံးလီၤ.+

တၢ်လၢပနၢ်ဟူတ့ၢ် ဘၣ်ဃးဒီးအီၤန့ၣ် လီၤဂာ်ဒ် တၢ်ကတိၤ ကသွံဒံဖိလီၤ.

အဝဲဒုးသီၣ်ထီၣ် လီအသီၣ်ဖးဒိၣ် ဒ်လဲၣ်ဒ်လဲၣ်န့ၣ် မတဂၤ နၢ်ပၢၢ်ကသ့လဲၣ်.”+

၂၇ စီၤယိၤဘး ဆဲးတဲဝဲလၢ

၂ “ဒ်ယွၤလၢ အမၤယၤတတီတလိၤတဂၤ မူဝဲ သပှၢ်တၢၢ်အသိး,+

ဒ်သ့တၢ်လၢာ်ကစၢ်လၢ အမၤကီမၤခဲယၤတဂၤ မူဝဲသပှၢ်တၢၢ်အသိးန့ၣ် ယအၢၣ်လီၤလၢ+

၃ ဖဲယကသါဒံး

ဒီးဖဲတၢ်အသါလၢ အဟဲလၢ ကစၢ်ယွၤအအိၣ်န့ၣ် အိၣ်ဒံးလၢယပူၤအခါ+

၄ ယထးခိၣ်တတဲတၢ် လၢ အတတီတလိၤ

ဒီးယပျ့ၤ တတဲ တၢ်လီတၢ်ဝ့ၤဘၣ်.

၅ လ့ၤတက့ၤ ယတတဲလၢ သုတၢ်ဘၣ် နီတဘျီဘၣ်.

တုၤလၢယသံဒၣ်လဲာ် ယတမၤဟးဂီၤ ယတၢ်သးတီဘၣ်.+

၆ ယကဟံးဃာ် ယတၢ်တီတၢ်လိၤ ဒီးယတပျၢ်ကွံာ်အီၤ နီတဘျီဘၣ်.+

ဖဲယအိၣ်မူဒံးအခါန့ၣ် ယသးတပာ်ဒ့ၣ်ပာ်ကမၣ်လီၤ ယနီၢ်ကစၢ်ဘၣ်.

၇ မ်ယဒုၣ်ယဒါန့ၣ် ဘၣ်တၢ်စံၣ်ညီၣ်အီၤ ဒ်ပှၤအၢပှၤသီ

ဒီးပှၤလၢ အမၤအၢမၤသီယၤန့ၣ် မ်အကဲထီၣ်ဒ် ပှၤတတီတလိၤဘၣ် အသိးတက့ၢ်.

၈ ဖဲပှၤလၢအတပာ်ကဲယွၤဘၣ်* ဘၣ်တၢ်မၤဟးဂီၤကွံာ်အီၤအခါ,+

ဖဲကစၢ်ယွၤ ထုးထီၣ်ကွံာ် အသးသမူအခါ မ့ၢ်အတၢ်မုၢ်လၢ် အိၣ်ဒံး တမံၤမံၤဧါ.

၉ ဖဲတၢ်ကိၢ်တၢ်ဂီၤ ဟဲဘၣ်အီၤအခါ

မ့ၢ်ကစၢ်ယွၤ ကဒိကနၣ် အတၢ်ဃ့ကညးဧါ.+

၁၀ မ့ၢ်အဝဲ ကဃုဝဲ တၢ်သးခုလၢ သ့တၢ်လၢာ်ကစၢ် အအိၣ်ဧါ.

မ့ၢ်အကကိးထီၣ် ကစၢ်ယွၤ ကိးဆၢကတီၢ်ဒဲးဧါ.

၁၁ ယကသိၣ်လိသုလၢ ကစၢ်ယွၤ အတၢ်စိတၢ်ကမီၤအဂ့ၢ်

ဒီးယတပာ်ခူသူၣ် သ့တၢ်လၢာ်ကစၢ်အဂ့ၢ် နီတမံၤဘၣ်.

၁၂ သုဝဲခဲလၢာ် သုမ့ၢ်ထံၣ်တ့ၢ် တၢ်ထံၣ်လၢညါခီတဖၣ်န့ၣ်

ဘၣ်မနုၤအဃိ သုဟးတဲ တၢ်လၢအဘျုးတအိၣ် နီတစဲးဘၣ်လဲၣ်.

၁၃ တၢ်လၢ ပှၤအၢပှၤသီ ကန့ၢ်ဘၣ်ဝဲလၢ ကစၢ်ယွၤအအိၣ်+

ဒီးတၢ်န့ၢ်သါလၢ ပှၤလၢအမၤနၢၤအီၣ်ဃီၣ်တၢ် ကန့ၢ်ဘၣ်ဝဲလၢ သ့တၢ်လၢာ်ကစၢ် အအိၣ်န့ၣ် မ့ၢ်ဝဲဒ်အံၤလီၤ.

၁၄ အဖိခွါတဖၣ် မ့ၢ်အိၣ်ဒီဒူၣ် ဘၣ်ဆၣ် အဝဲသ့ၣ်ကသံလၢ နးအဃိ+

ဒီးအစၢၤအသွဲၣ်တဖၣ် တဒိးန့ၢ်ဘၣ် တၢ်အီၣ် လၢလၢပှဲၤပှဲၤဘၣ်.

၁၅ ဒီးပှၤလၢ အပူၤဖျဲးတဖၣ်န့ၣ် ကဘၣ်သံလၢ တၢ်ဆါလၢအလီၤပျံၤ လီၤဖုးအဃိ

ဒီးအဝဲသ့ၣ် အမါတဖၣ်န့ၣ် တဟီၣ်လၢ အဝဲသ့ၣ်အဃိဘၣ်.

၁၆ ဘၣ်သ့ၣ်သ့ၣ် အဝဲ ကပာ်ဖှိၣ်ထီၣ် စ့ညၣ် ဒ်ဟီၣ်ခိၣ်ကမူၣ်အသိး

ဒီးအဝဲကပာ်ဖှိၣ် တၢ်ကူတၢ်ကၤ လၢအဂ့ၤတဖၣ် အါအါဂီၢ်ဂီၢ် ဒ်ကပံာ်အသိးလီၤ.

၁၇ အဝဲမ့ၢ်ပာ်ဖှိၣ် တၢ်ကူတၢ်ကၤ ဘၣ်ဆၣ်

ပှၤတီပှၤလိၤ ကကူဘၣ်ကၤဘၣ်ဝဲ+

ဒီးပှၤလၢအတၢ်ကမၣ်တအိၣ်ဘၣ် ကနီၤလီၤန့ၢ်လိာ်သးလၢ အစ့ညၣ်တဖၣ်လီၤ.

၁၈ ဟံၣ်လၢ အတ့ထီၣ်ဝဲန့ၣ် ဟးဂီၤညီ ဒ်တၢ်ဖိဃၢ်အဒၢ* အသိး

ဒီးဒ်ပှၤခိးတၢ်ဖိ အဒဲတဖျၢၣ်+ အသိးလီၤ.

၁၉ အဝဲကမံဒ်သိးဒီး ပှၤထူးပှၤတီၤတဂၤ ဘၣ်ဆၣ် အတပာ်ဖှိၣ်ဘၣ် အတၢ်ထူးတၢ်တီၤ နီတမံၤဘၣ်.

ဖဲအစီၣ်ထီၣ် အမဲာ်အခါ တၢ်တအိၣ် နီတမံၤလၢၤဘၣ်.

၂၀ တၢ်ပျံၤတၢ်ဖုး ကချုးန့ၢ်အီၤ ဒ်ထံလုၢ်ဘၢတၢ်အသိး

ဒီးကလံၤမုၢ် ကအူဖျိးအီၤ လၢမုၢ်နၤခီလီၤ.+

၂၁ ကလံၤ လၢမုၢ်ထီၣ်တခီ ကစိာ်ကွံာ်အီၤ ဒီးအဝဲကလီၤမၢ်ကွံာ်လီၤ.

ဒီးကလံၤ ကခွဲဖျိးထီၣ်ကွံာ်အီၤ လၢအတၢ်လီၢ်လီၤ.+

၂၂ အဝဲ ကဂုာ်ကျဲးစၢး ဃ့ၢ်ပူၤဖျဲးအသးလၢ ကလံၤအသဟီၣ်အကျါ သပှၢ်ကတၢၢ်+

ဘၣ်ဆၣ် ကလံၤကလီၤဘၣ်အီၤ လၢတၢ်တသးကညီၤဘၣ်အပူၤလီၤ.+

၂၃ ဖဲကလံၤအိၣ်ဝဲအလီၢ်န့ၣ် ပှၤကကွ့ကလံၤ+

ဒီးဒဲဆဲးအဲးအစု လၢအဃိလီၤ.

၂၈ “တၢ်လီၢ်လၢ ပှၤကခူၣ်န့ၢ် စ့ညၣ်

ဒီးတၢ်လီၢ်လၢ ပှၤကခူၣ်န့ၢ်ထူ လၢအကဘၣ် တၢ်ပှံၢ်စီအီၤန့ၣ် အိၣ်ဝဲလီၤ.+

၂ ပှၤခူၣ်န့ၢ်ထးတဖၣ်လၢ ဟီၣ်ခိၣ်လာ်

ဒီးပှၤမၤလီၤပှံၢ် လၢၢ်တဖၣ် ဒ်သိး ကမၤန့ၢ် တိၢ်ဘီအဂီၢ်လီၤ.+

၃ ပှၤကညီ မၤကပီၤထီၣ်တၢ်လၢ တၢ်ခံးကျါ

ဒ်သိး ကလဲၤဃုကွၢ် တၢ်လၢအလုၢ်ဒိၣ်ပှ့ၤဒိၣ်တဖၣ်အံၤ

လၢတၢ်ခံးသူအကျါလီၤ.

၄ ဖဲတၢ်လီၢ်လၢ အအိၣ်ယံၤဒီး ပှၤကညီ လၢပှၤတလ့ၢ်ထီၣ်လ့ၢ်လိၤဘၣ် အလီၢ်န့ၣ်

ပှၤခူၣ်တၢ်ပူၤဖးဒိၣ်လၢ ဟီၣ်ခိၣ်လာ်

ဒီးပှၤတနီၤန့ၣ် ထိၣ်လီၤစဲၤအသးလၢပျံၤ ဒီးမၤတၢ်ဖဲန့ၣ်လီၤ.

၅ တၢ်အီၣ်တၢ်အီတဖၣ် မဲထီၣ်ဝဲလၢ ဟီၣ်ခိၣ်လိၤ

ဘၣ်ဆၣ် လၢဟီၣ်ခိၣ်လာ်န့ၣ် ဘံဘူစၢၤသၢ ဒ်မ့ၣ်အူအီၣ်တၢ် အသိးလီၤ.

၆ လၢလၢၢ်တဖၣ်အပူၤန့ၣ် အိၣ်ဒီး တၢ်မျၢ်နံၤလါအဲး

ဒီးလၢဟီၣ်ခိၣ်ကမူၣ်အကျါန့ၣ် ထူအိၣ်ဝဲလီၤ.

၇ လံာ်ကြီကြာ် တသ့ၣ်ညါဝဲလၢ အကဘၣ်ဃု တၢ်သ့ၣ်တဖၣ်န့ၣ် ဖဲလဲၣ်န့ၣ်ဘၣ်.

ဒီးလံာ်သူစ့ၢ်ကီး တထံၣ်ဝဲ တၢ်သ့ၣ်တဖၣ်န့ၣ်ဘၣ်.

၈ ဆၣ်ဖိကီၢ်ဖိအဒူ လၢပှၢ်လၢ်ကျါန့ၣ် တလဲၤယီၢ်လီၤဝဲ ဖဲန့ၣ်ဘၣ်,

ဒီးခ့ယုၢ်ဖိ တဟးဝ့ၤဝီၤ ဖဲန့ၣ်ဘၣ်.

၉ ပှၤမၤလီၤကလဲ လၢၢ်လၢအကိၤ*

ဒီးပှၤမၤလီၤပှီၢ်ကွံာ် ကစၢၢ် အခီၣ်ထံးလီၤ.

၁၀ အဝဲခူၣ်ဝဲ ထံကျိၤတဖၣ်+ လၢလၢၢ်ဧိၤလ့ဧိၤအပူၤ

ဒီးအထံၣ်ဝဲ လၢၢ်လၢ အလုၢ်ဒိၣ်ပှ့ၤဒိၣ် ကိးဖျၢၣ်ဒဲးလီၤ.

၁၁ အဝဲတ့ထီၣ် ထံကျိတဖၣ် အတမၢၣ်

ဒီးထုးထီၣ်ဝဲ တၢ်လုၢ်ဒိၣ်ပှ့ၤဒိၣ်လၢ အအိၣ်ခူသူၣ်တဖၣ်လီၤ.

၁၂ ဘၣ်ဆၣ် တၢ်ကူၣ်သ့န့ၣ် ပှၤဃုထံၣ်န့ၢ်အီၤ ကသ့ဖဲလဲၣ်+

ဒီးတၢ်သ့ၣ်ညါနၢ်ပၢၢ်န့ၣ် အခီၣ်ထံး ခီၣ်ဘိ ဟဲဖဲလဲၣ်.+

၁၃ ပှၤတသ့ၣ်ညါ အလုၢ်အပှ့ၤ နီတဂၤဘၣ်.+

ဒီးပှၤတထံၣ်န့ၢ်အီၤလၢ ဟီၣ်ခိၣ်ချၢ နီတတီၤဘၣ်.

၁၄ ဒီးအတအိၣ်လၢ ထံယိာ်ပူၤဘၣ်

ဒီးအတအိၣ်လၢ ပီၣ်လဲၣ်ပူၤ စ့ၢ်ကီးဘၣ်.+

၁၅ ပှၤပှ့ၤအီၤလၢ ထူစီတန့ၢ်ဘၣ်

ဒီးပှၤခီလဲအီၤလၢ စ့ညၣ်တန့ၢ်ဘၣ်.+

၁၆ ပှၤပှ့ၤအီၤလၢ အိဖ့ၢ်အထူ+ တန့ၢ်ဘၣ်,

ဒီးပှၤပှ့ၤအီၤလၢ တၢ်မျၢ်မဟူယၤ ဒီးတၢ်မျၢ်နံၤလါအဲး တန့ၢ်စ့ၢ်ကီးဘၣ်.

၁၇ ထူ ဒီးမဲာ်ထံကလၤန့ၣ် ပှၤထိၣ်သတြီၤအီၤဒီး တၢ်ကူၣ်သ့ တန့ၢ်ဘၣ်

ဒီးတၢ်ကူၣ်သ့န့ၣ် ပှၤခီလဲအီၤလၢ သပၢၤထူစီ တန့ၢ်စ့ၢ်ကီးဘၣ်.+

၁၈ ဒီးလၢၢ်ဖီ ဒီးလၢၢ်ဖျါကလၤန့ၣ် ပှၤထိၣ်သတြီၤအီၤဒီး တၢ်ကူၣ်သ့ တန့ၢ်နီတစဲးဘၣ်.+

ဒီးတၢ်ကူၣ်သ့န့ၣ် အလုၢ်ဒိၣ်ပှ့ၤဒိၣ် ဒိၣ်န့ၢ်ဒံး ထၢၣ်တဖျၢၣ် လၢအပှဲၤဒီး ပလဲတဖၣ်လီၤ.

၁၉ ကူၤၡး* အတၢ်မျၢ်ဘီအူးသပးယၢ်န့ၣ်+ ပှၤထိၣ်သတြီၤအီၤဒီး တၢ်ကူၣ်သ့ တန့ၢ်ဘၣ်.

ဒီးတၢ်ကူၣ်သ့န့ၣ် ပှၤပှ့ၤအီၤလၢ ထူစီ တန့ၢ်စ့ၢ်ကီးဘၣ်.

၂၀ မ့မ့ၢ်ဒ်န့ၣ်န့ၣ် တၢ်ကူၣ်သ့န့ၣ် အဟဲလၢ တၢ်လီၢ်ဖဲလဲၣ်,

ဒီးတၢ်သ့ၣ်ညါနၢ်ပၢၢ်န့ၣ် အခီၣ်ထံး ခီၣ်ဘိ အိၣ်ဝဲဖဲလဲၣ်.+

၂၁ အအိၣ်ခူသူၣ်လၢ ပှၤဟီၣ်ခိၣ်ဖိ ဒီးဆၣ်ဖိကီၢ်ဖိခဲလၢာ် အမဲာ်ညါ+

ဒီးထိၣ်လၢမူခိၣ်တဖၣ် တထံၣ်န့ၢ်အီၤဘၣ်.

၂၂ တၢ်ဟးဂီၤအလီၢ် ဒီးတၢ်သံန့ၣ် တဲဝဲလၢ

‘အိၣ်ဒၣ်ပနၢ်ဟူဘၣ် အကစီၣ်လီၤ.’

၂၃ ထဲဒၣ် ကစၢ်ယွၤတဂၤန့ၣ် သ့ၣ်ညါဝဲ ကျဲလၢပှၤကဘၣ်ဃု တၢ်ကူၣ်သ့လီၤ.

ဒီးထဲဒၣ် အဝဲတဂၤန့ၣ် သ့ၣ်ညါဝဲ တၢ်ကူၣ်သ့ အိၣ်ဝဲအလီၢ်,+

၂၄ မ့ၢ်လၢ ကစၢ်ယွၤ ကွၢ်ဃီၤတၢ် တုၤလၢဟီၣ်ခိၣ် အနၢၣ်အကတၢၢ်

ဒီးအဝဲထံၣ်ဝဲ တၢ်ခဲလၢာ်လၢ အအိၣ်လၢ မူခိၣ်အဖီလာ်လီၤ.+

၂၅ ဖဲအဝဲပာ်ပနီၣ်ဝဲ ကလံၤအသဟီၣ်အခါ+

ဒီးဖဲအထိၣ်ဝဲ ထံတဖၣ်အခါ+

၂၆ ဖဲအပာ်လီၤ တၢ်ဘျၢလၢ တၢ်စူၤအဂီၢ်အခါ+

ဒီးဒုးအိၣ်ထီၣ် တၢ်အၢၣ်ခံးသူ ဒီးလီဖျးတၢ်အကျိၤအခါ+

၂၇ အဝဲထံၣ်ဘၣ် တၢ်ကူၣ်သ့ ဒီးတဲဖျါထီၣ်ဝဲ တၢ်ကူၣ်သ့,

အဝဲဒုးအိၣ်ထီၣ် တၢ်ကူၣ်သ့ ဒီးသမံသမိးကွၢ်ဝဲ အလုၢ်အပှ့ၤလီၤ.

၂၈ ဒီးအဝဲတဲဘၣ် ပှၤဟီၣ်ခိၣ်ဖိလၢ

‘တၢ်ပျံၤ ယဟိဝၤယွၤန့ၣ် မ့ၢ်တၢ်ကူၣ်သ့+

ဒီးတၢ်ဟးဆှဲး တၢ်လၢအတဂ့ၤဘၣ်န့ၣ် မ့ၢ်ဝဲ တၢ်သ့ၣ်ညါနၢ်ပၢၢ် တၢ်လီၤ.’”+

၂၉ စီၤယိၤဘး ဆဲးတဲဝဲလၢ

၂ “ယမ့ၢ်အိၣ်ဘၣ်ကဒါက့ၤ ဒ်တၢ်ဆၢကတီၢ်လၢ အပူၤကွံာ်အသိးန့ၣ် ကဂ့ၤဝဲလီၤ.

ဖဲန့ၣ်အဆၢကတီၢ် ကစၢ်ယွၤ အံးထွဲကွၢ်ထွဲယၤ,

၃ ဒီးအဝဲ မၤကပီၤထီၣ်န့ၢ်ယၤ အမ့ၣ်အူဒၢ

ဖဲယလဲၤတၢ်လၢ တၢ်ခံးကျါ အခါလီၤ.+

၄ ဖဲန့ၣ်အခါ ယသးစၢ်န့ၢ်ဒံးအခဲအံၤ ဒီးယဂံၢ်ယဘါအိၣ်ပှဲၤပှဲၤ

ဒီးယတၢ်ရ့လိာ်သးဒီး ကစၢ်ယွၤ ဂ့ၤဝဲလီၤ.+

၅ ဒီးသ့တၢ်လၢာ်ကစၢ် အိၣ်ဒီးယၤ

ဒီးယဖိတဖၣ် အိၣ်ဝးတရံးယၤလီၤ.

၆ ဒီးယသ့ဘၣ်ယခီၣ်လၢ ထီပး

ဒီးလၢၢ်တဖၣ် လူလီၤန့ၢ်ယၤ သိအါအါဂီၢ်ဂီၢ်လီၤ.+

၇ လၢညါ ဖဲယလဲၤထီၣ်လၢ ဝ့ၢ်အတြဲၤ တဘျီဂ့ၤတဘျီဂ့ၤန့ၣ်+

ယဆ့ၣ်နီၤလၢ ယလီၢ် လၢအအိၣ်လၢ တၢ်ဆါတၢ်ပှ့ၤတၢ် အလီၢ်န့ၣ်လီၤ.+

၈ ဖဲပှၤပိာ်ခွါသးစၢ်တဖၣ် ထံၣ်ယၤအခါ အဝဲသ့ၣ် ပျဲန့ၢ်ယကျဲ

ဒီးပှၤသးပှၢ်တဖၣ်ဒၣ်လဲာ် ဂဲၤဆၢထၢၣ်ဝဲလၢ တၢ်ပာ်ကဲအပူၤလီၤ.+

၉ ပဒိၣ်ဖးဒိၣ်တဖၣ် ကးဘၢဃာ် အထးခိၣ်လၢအစု

ဒီးတတဲတၢ်လၢၤဘၣ်.

၁၀ ပှၤဒိၣ်ပှၤပှၢ်တဖၣ် အိၣ်ဘှ့ၣ်ဝဲ

ဒီးတဲတၢ်တဘၣ် နီတမံၤလၢၤဘၣ်.

၁၁ ပှၤလၢအနၢ်ဟူ ယကလုၢ် ကိးဂၤဒဲးန့ၣ် တဲဂ့ၤယၤ

ဒီးပှၤလၢအထံၣ်ယၤန့ၣ် ပတြၢၤယၤလီၤ.

၁၂ ယမၤပူၤဖျဲး ပှၤဖှီၣ်ဖိယာ်ဖိ လၢအဃ့ တၢ်မၤစၢၤ+

ဒီးပှၤဖိၣ်ဃဲ ဒီးပှၤလၢ ပှၤမၤစၢၤအီၤ တအိၣ်ဘၣ်န့ၣ်လီၤ.+

၁၃ ပှၤလၢအဘၣ်ကီဘၣ်ခဲ ဘူးလၢအကသံန့ၣ် ဆိၣ်ဂ့ၤယၤ+

ဒီးယမၤသးခု မုၣ်ကမဲ အသးလီၤ.+

၁၄ ယကူထီၣ်သိးထီၣ် တၢ်တီတၢ်လိၤ ဒ်တၢ်ကူတၢ်ကၤအသိး

ဒီးယကူထီၣ်သိးထီၣ် တၢ်စံၣ်ညီၣ်တီ ဒ်ဆ့ကၤဖးထီ ဒီးခိၣ်ဖၢၣ်အသိးလီၤ.

၁၅ ယကဲထီၣ် မဲာ်ချံလၢ ပှၤမဲာ်တထံၣ်တၢ်အဂီၢ်

ဒီးယကဲထီၣ်ခီၣ်လၢ ပှၤခီၣ်ဟးဂီၤ အဂီၢ်လီၤ.

၁၆ ယကဲ ပၢ်လၢ ပှၤဖှီၣ်ဖိယာ်ဖိအဂီၢ်+

ဒီးယဃုသ့ၣ်ညါန့ၢ်တၢ်လၢ ပှၤလၢ ယတသ့ၣ်ညါအီၤဘၣ်တဖၣ် အတၢ်မူးတၢ်ရၢ် အဂီၢ်လီၤ.+

၁၇ ယမၤကၢ်ကွံာ် ပှၤလၢအမၤကမၣ်တၢ် အခၣ်ဃံ+

ဒီးယမၤပူၤဖျဲး ပှၤလၢအတူၢ်ဘၣ်တၢ် လၢအဃိလီၤ.

၁၈ ညီနုၢ်န့ၣ်ယတဲလၢ ‘ယကသံလၢ ယဟံၣ်ပူၤ+

ဒီးယတၢ်အိၣ်မူ အမုၢ်နံၤတဖၣ်န့ၣ် ကအါထဲသိးဒီး မဲးတဖၣ်လီၤ.

၁၉ ယကလီၤဂာ်ဒ် သ့ၣ်တထူၣ်လၢ အဂံၢ်တဖၣ် စဲၤလီၤအသးတုၤလၢ ထံကျါ

ဒီးပစီၤထံတဖၣ် ကအိၣ်လၢ အဒ့တဖၣ်အလိၤ ဒီတနၤကျၢၤလီၤ.

၂၀ ပှၤကယူးယီၣ်ပာ်ကဲယၤ ထီဘိ

ဒီးယဂံၢ်ယဘါ တလီၤစၢ် နီတဘျီဘၣ်.’*

၂၁ ပှၤဆၢနၢ်ဟူဘၣ် တၢ်လၢယကတဲ

ဒီးပှၤအိၣ်ခိးကနၣ် ယတၢ်ဟ့ၣ်ကူၣ်ဟ့ၣ်ဖး လၢတၢ်ဘှ့ၣ်တၢ်ဘှီၣ် အပူၤလီၤ.+

၂၂ ဖဲယတဲတၢ် ဝံၤအခါ ပှၤတလိၣ်တဲတၢ် နီတမံၤလၢၤဘၣ်.

ယတၢ်ကတိၤတဖၣ်န့ၣ် ဘၣ်အဝဲသ့ၣ်အနၢ်လီၤ.

၂၃ အဝဲသ့ၣ် ခိးကွၢ်လၢ်ယၤ ဒ်ပှၤအိၣ်ခိး တၢ်စူၤထံအသိးလီၤ.

အဝဲသ့ၣ် အဲၣ်ဒိးနၢ်ဟူ ယတၢ်ကတိၤဒိၣ်မး ဒ်ပှၤတဂၤလၢ အအိၣ်ခိးမူခိၣ်ထံလၢ တၢ်ကိၢ်ထီၣ်သီ အသိးလီၤ.+

၂၄ ဖဲယနံၤပၠးအဝဲသ့ၣ်အခါ တလီၤနာ်ဘၣ် အဝဲသ့ၣ်ဘၣ်.

ဖဲအဝဲသ့ၣ် ထံၣ်ဘၣ် ယတၢ်မဲာ်မုာ်နါဆၢအခါ အဝဲသ့ၣ် အသးမုာ်ထီၣ်ဝဲလီၤ.

၂၅ ယဟံးစုနဲၣ်ကျဲ အဝဲသ့ၣ် ဒ်အဝဲသ့ၣ် အခိၣ်အနၢ်တဂၤ အသိး

ယအိၣ်ဘၣ် ဒ်စီၤပၤတဂၤလၢ အသုးဖိတဖၣ်အကျါ,+

ဒီးယမၤမုာ်ထီၣ် ပှၤလၢအသးအုးတဖၣ်လီၤ.+

၃၀ “ခဲအံၤ ပှၤပိာ်ခွါတဖၣ်လၢ အညါဘီၣ်န့ၢ်ယၤ

လၢအဝဲသ့ၣ်အပၢ် တကြၢးတဘၣ်လၢ ကမၤစၢၤဝဲ

ထွံၣ်တဖၣ်လၢ အကွၢ်ယသိ ဒၣ်လဲာ်န့ၣ်

နံၤဘၣ်ယၤလံ.+

၂ အဝဲသ့ၣ် တသူအတၢ်စိတၢ်ကမီၤ လၢကမၤစၢၤယၤအဂီၢ်ဘၣ်.

အဝဲသ့ၣ် အတၢ်ဂံၢ်တၢ်ဘါ ဟါမၢ်ကွံာ်ဝဲလီၤ.

၃ အဝဲသ့ၣ် ဖှီၣ်ယာ်ဒီးလီၤဒိအဃိ အဂံၢ်အဘါ လၢာ်ဝဲလီၤ.

အဝဲသ့ၣ် အ့ၣ်ဃီၤဝဲ တၢ်လၢ အထံၣ်ဝဲလၢ

မဲးမုၢ်ပျီလၢ အအိၣ်သယုၢ် ဒီးဟးဂီၤဝဲအပူၤလီၤ.

၄ အဝဲသ့ၣ် ဟးဒဲးအီၣ် တၢ်မုၢ်တၢ်ဘိအလၣ်လၢ အဟီတဖၣ် လၢတပှီာ်ကျါ

ဒီးအဝဲသ့ၣ် အတၢ်အီၣ်တၢ်အီန့ၣ် မ့ၢ်ဝဲ တပှီာ်အဂံၢ် လၢအခၣ်လီၤ.

၅ ပှၤနီဟးထီၣ် အဝဲသ့ၣ်လၢ ဝ့ၢ်ပူၤ+

ဒီးပှၤကိးဃါ အဝဲသ့ၣ် ဒ်ပှၤကိးဃါ တၢ်ဘျၣ်အသိးလီၤ.

၆ အဝဲသ့ၣ် အိၣ်ဝဲဆိးဝဲလၢ တၢ်တြိတၢ်တြီၤတဖၣ်

ဒီးအိၣ်ဝဲလၢ တၢ်ပူၤ ဒီးလ့ကအိ အပူၤလီၤ.

၇ အဝဲသ့ၣ် ကိးပသူထီၣ် လၢတပှီာ်ကျါ

ဒီးအိၣ်ဖှိၣ်အိၣ်တံၤဝဲလၢ လးဆါအထူၣ်ကျါလီၤ.

၈ အဝဲသ့ၣ် ဘၣ်တၢ်နီဟးထီၣ်ကွံာ်အီၤလၢ တၢ်လီၢ်တၢ်ကျဲအပူၤ

ဒ်ပှၤလၢ အသးတဆးဘၣ် ဒီးပှၤသူအီၤတသ့ဘၣ် အသိးလီၤ.

၉ ဘၣ်ဆၣ်ခဲအံၤ အဝဲသ့ၣ် သးဝံၣ်ဆဲးအဲးတၢ် ဘၣ်ဃးဒီးယဂ့ၢ်+

ဒီးအဝဲသ့ၣ် နံၤဘၣ်ယၤလီၤ.+

၁၀ အဝဲသ့ၣ် သးဘၣ်အၢယၤ ဒီးအိၣ်ယံၤဒီးယၤလီၤ.+

ဒီးအဝဲသ့ၣ် ထူးပှဲာ်ယမဲာ် ဘူၣ်ဝဲလီၤ.+

၁၁ မ့ၢ်လၢ ကစၢ်ယွၤ မၤလီၤစၢ် ယဂံၢ်ယဘါ ဒီးဆီၣ်လီၤယၤအဃိ

အဝဲသ့ၣ် မၤယၤဖဲအသးလီၤ.

၁၂ အဝဲသ့ၣ် ဆၢထၢၣ်လၢ ယစုထွဲတခီ ဒ်ပှၤဂီၢ်မုၢ်တဖုအသိးလၢ ကထီဒါယၤအဂီၢ်,

ဒီးအဝဲသ့ၣ် လူၤယၤ

ဒီးတြီဃာ်ယကျဲ ဒ်သိးယကတုၤလၢ တၢ်ဟးဂီၤအဂီၢ်လီၤ.

၁၃ အဝဲသ့ၣ် မၤဟးဂီၤကွံာ်ဝဲ ကျဲလၢ ယကလဲၤတဖၣ်,

အဝဲသ့ၣ် မၤနးထီၣ် ယတၢ်ကီတၢ်ခဲတဖၣ်+

ဒီးပှၤလၢအကတြီ အဝဲသ့ၣ် တအိၣ် နီတဂၤဘၣ်.

၁၄ အဝဲသ့ၣ် ဟဲနုာ်လီၤ ဒ်ပှၤနုာ်လီၤလၢ တၢ်ဒူၣ်လၢ အပူၤဖျိဖးလဲၢ်အသိး,

ဒီးယဘၣ်ဒိဘၣ်ထံးလၢာ်လံ သနာ်က့ အဝဲသ့ၣ် သဖှိနုာ်လီၤ ထီဒါယၤလီၤ.

၁၅ တၢ်ပျံၤတၢ်ဖုး လုၢ်ဘၢကွံာ်ယၤ

ဒီးယလၤကပီၤ ဒံကွံာ်ဝဲလၢ ကလံၤကျါ

ဒီးယတၢ်အုၣ်က့ၤခီၣ်က့ၤ လီၤမၢ်ကွံာ် ဒ်တၢ်အၢၣ်အသိးလီၤ.

၁၆ ယဘၣ်နးဘၣ်ဖှီၣ် ကိးနံၤဒဲး+

ဒီးယကသံလီၤ.+

၁၇ ဖဲမုၢ်နၤခီန့ၣ် ယဃံယကွဲတဖၣ် ဆါဝဲဒိၣ်မး+

ဒီးအအ့ၣ်စိၢ်အ့ၣ်ထုး တပတုာ် နီတဘျီဘၣ်.+

၁၈ တၢ်စှီၤတံၢ်ယဆ့ကၤ ဆူၣ်ဆူၣ်အဃိ အချံးချူးဝဲ,

ဒီးအဘံးတံၢ်ဃာ်* ယကိာ်ယူၢ်ဘိ ဒ် ဆ့ကၤအကိာ်ဘိလၢ အဃံးဝဲ အသိးလီၤ.

၁၉ ကစၢ်ယွၤ ကွံာ်လီၤယၤလၢ ကပံာ်ကျါ

ဒီးယကဲထီၣ် ဒ်ဟီၣ်ခိၣ်ကမူၣ် ဒီး ဖၣ်ဆါအသိးလီၤ.

၂၀ ယဃ့နၤ တၢ်မၤစၢၤဘၣ်ဆၣ် နတစံးဆၢယၤဘၣ်+

ယဆၢထၢၣ် ဃ့ကညးနၤ ဘၣ်ဆၣ် နတကနၣ်ဃုာ်ယၤဘၣ်.

၂၁ နထီဒါက့ၤယၤ အၢအၢသီသီ+

ဒီးနမၤဒၢၣ်မၤဆါယၤလၢ နစုအဂံၢ်ဘါ လၢာ်လၢာ်ဆ့ဆ့လီၤ.

၂၂ နဟံးထီၣ်ယၤ ဒီးစိာ်ထီၣ်ယၤ လၢကလံၤ

ဒီးနမၤဟးဂီၤကွံာ်ယၤလၢ ကလံၤမုၢ်ဖးဒိၣ် အကျါလီၤ.

၂၃ ယသ့ၣ်ညါလၢ နကဟ့ၣ်လီၤယၤလၢ တၢ်သံအစုပူၤ

လၢတၢ်လီၢ်လၢ ပှၤကိးဂၤဒဲး ကဘၣ်လဲၤဝဲ အလီၢ်န့ၣ်လီၤ.

၂၄ နီၢ်ကီၢ်န့ၣ် ဖဲပှၤလၢ အဘၣ်ဒိဘၣ်ထံးတဂၤ ဘၣ်ကီဘၣ်ခဲ+

ဒီးဃ့တၢ်မၤစၢၤအခါ တမ့ၢ်လၢ ပှၤကတီၢ်အီၤ နီတဂၤဘၣ်.

၂၅ ဖဲပှၤဘၣ်ကီဘၣ်ခဲအခါ ယတဟီၣ်လၢ အဝဲသ့ၣ်အဃိဧီၤ.

ဒီးယတသးအုးလၢ ပှၤဘၣ်ဖှီၣ် ဘၣ်ယာ်အဃိဧီၤ.+

၂၆ ယမုၢ်လၢ်တၢ်လၢအဂ့ၤ ဘၣ်ဆၣ် ယထံၣ်ဘၣ် တၢ်လၢအတဂ့ၤဘၣ်.

ယခိးကွၢ်လၢ် တၢ်ကပီၤ ဘၣ်ဆၣ် ယထံၣ်ဘၣ် တၢ်ခံးလီၤ.

၂၇ ယတၢ်သူၣ်ကိၢ်သးဂီၤတဖၣ် ကလာ်ထီၣ်ဝဲလၢ ယပူၤလီၤ.

ဒီးတၢ်နးတၢ်ဖှီၣ် အမုၢ်နံၤတဖၣ် သဂၢၢ်လီၤယခိၣ်လီၤ.

၂၈ ယဘၣ်ဟးမိၣ်တၢ်+ ဒီးယတၢ်မုၢ်လၢ် တအိၣ်ဘၣ်.*

ဒီးယဆၢထၢၣ် ဃ့တၢ်မၤစၢၤလၢ တၢ်အိၣ်ဖှိၣ်အပူၤလီၤ.

၂၉ ယကဲထီၣ် ထွံၣ်ဟီၣ်ခိၣ် အဒီပုၢ်ဝဲၢ်

ဒီးယဒီသကိးဒီး ထိၣ်ကီၤလၤအူးလီၤ.+

၃၀ ယဘ့ၣ်ထီၣ်သူ ဒီးလီၤအီးကွံာ်ဝဲ,+

ဒီးယဃံတဖၣ် ကိၢ်ထီၣ်ဝဲလၢ ယတၢ်ဆူးတၢ်ဆါအဃိလီၤ.

၃၁ ယတနၢ်န့ၣ် ဘၣ်တၢ်ဒ့အီၤထဲလၢ တၢ်သူၣ်အုးသးအုးအဂီၢ်

ဒီးယပံန့ၣ် ဘၣ်တၢ်အူအီၤထဲလၢ တၢ်ဟီၣ်တၢ်ယၢၤအဂီၢ်လီၤ.

၃၁ “ယမၤတၢ်အၢၣ်လီၤအီလီၤ ဒီးယမဲာ်ချံဝံၤလံ.+

အဃိ ယကွၢ်မုၣ်ကနီၤလၢ တၢ်သးကတၢအပူၤ ကသ့ဒ်လဲၣ်.+

၂ ယမ့ၢ်မၤဒ်န့ၣ်န့ၣ် ကစၢ်ယွၤ ကဟ့ၣ်ယၤ တၢ်မနုၤလဲၣ်.

မ့ၢ်ယကဒိးန့ၢ်ဘၣ်တၢ်လၢ သ့တၢ်လၢာ်ကစၢ် အအိၣ်တမံၤမံၤဧါ.

၃ တၢ်နးတၢ်ဖှီၣ် အိၣ်ခိးလီၤ ပှၤလၢအမၤကမၣ်တၢ်အခိၣ်

ဒီးတၢ်ကီတၢ်ခဲအိၣ်ခိးဝဲ ပှၤလၢအမၤဘၣ်ဒိဘၣ်ထံးတၢ်အခိၣ် တမ့ၢ်ဧီၤ.+

၄ ကစၢ်ယွၤတထံၣ် တၢ်လၢ ယမၤတဖၣ်ဧီၤ,+

ဒီးအတကွၢ်ဟုၣ် ယခီၣ်ခါခဲလၢာ်ဧီၤ.

၅ မ့ၢ်ယတဲလံၣ်တဲလီတၢ် တဘျီဘျီဧါ.

ဒီးမ့ၢ်ယလံၣ်အီၣ်လီအီၣ် ပှၤဂၤ တဘျီဘျီဧါ.+

၆ ကစၢ်ယွၤ မ့ၢ်စီၤယၤလၢ စီၤပီၢ်လၢ အတီအလိၤန့ၣ်+

အကသ့ၣ်ညါဝဲလၢ ယမ့ၢ်ပှၤလၢ အသးတီလီၤ.+

၇ ယမ့ၢ်ခါထီၣ်ယခီၣ်လၢ ကျဲလၢအကမၣ်မ့ၢ်ဂ့ၤ,+

ယမဲာ်ချံ မ့ၢ်ကွဲန့ၢ်လွဲန့ၢ်ယသးမ့ၢ်ဂ့ၤ,+

ယမ့ၢ်မၤ တၢ်လၢအတဂ့ၤဘၣ်* မ့ၢ်ဂ့ၤ

၈ မ်ပှၤဂၤအီၣ်ကွံာ်ဝဲ တၢ်ချံလၢ ယဖှံလီၤအီၤ+

ဒီးတၢ်မုၢ်တၢ်ဘိ လၢယသူၣ်လီၤန့ၣ် မ်အဘၣ်တၢ်ထဲးထီၣ်ကွံာ်အီၤတက့ၢ်.

၉ ယမ့ၢ်လီၤဘၣ်လၢ ပိာ်မုၣ်အဂၤတဂၤ အတၢ်ကွဲန့ၢ်လွဲန့ၢ်အပူၤ+

ဒီးအိၣ်ခိးခူသူၣ်+ ယသကိးတဂၤအမါလၢ အတြဲၤခီၣ်ထံးန့ၣ်

၁၀ မ်ယမါဂံာ်န့ၢ် ပှၤပိာ်ခွါအဂၤ တဂၤအဘု

ဒီးပှၤပိာ်ခွါအဂၤတဖၣ် မံဃုာ်ဒီးအီၤတက့ၢ်,+

၁၁ မ့ၢ်လၢ ယမ့ၢ်မၤတ့ၢ်ဘၣ် ဒ်န့ၣ်န့ၣ် မ့ၢ်ဝဲ လုၢ်လၢ်သကဲာ်ပဝးလၢ အလီၤမဲာ်ဆှး

ဒီးမ့ၢ်ဝဲတၢ်ကမၣ်လၢ စံၣ်ညီၣ်ကွီၢ်တဖၣ် ကြၢးစံၣ်ညီၣ်ယၤလီၤ.+

၁၂ ဒီးအကလီၤဂာ် ဒ်မ့ၣ်အူလၢ အအီၣ်တၢ် ဒီးအမၤဟးဂီၤတၢ်+

ဒီးကအီၣ်လၢာ်ကွံာ် ယတၢ်ဖိတၢ်လံၤ ခဲလၢာ်လီၤ.

၁၃ ဖဲယကုၢ်မုၣ်မ့ၢ်ဂ့ၤ ယကုၢ်ခွါမ့ၢ်ဂ့ၤ ကဒူးကဒ့ၣ်ယၤအခါ

ယမ့ၢ်တစံၣ်ညီၣ်န့ၢ်တၢ် လၢအဝဲသ့ၣ်အဂီၢ် တီတီလိၤလိၤဘၣ်န့ၣ်

၁၄ ဖဲယဘၣ် ကွၢ်ဆၢၣ်မဲာ်လိာ်သးဒီး ကစၢ်ယွၤအခါ ယမၤတၢ်မနုၤ ကသ့လဲၣ်.

ဒီးဖဲအသံကွၢ်သံဒိးယၤအခါ ယစံးဆၢအီၤ ကသ့ဒ်လဲၣ်.+

၁၅ ပှၤလၢအတ့ယၤ လၢယမိၢ် အဒၢလီၢ်ပူၤန့ၣ် တ့အဝဲသ့ၣ်စ့ၢ်ကီး တမ့ၢ်ဧီၤ.+

ဒီးအမ့ၢ်ပှၤတဂၤဃီလၢ အတ့ပဝဲခဲလၢာ်လၢ ပမိၢ်အဒၢလီၢ်အပူၤ တချုးလၢ ပအိၣ်ဖျဲၣ်ထီၣ်ဒံးဘၣ် တမ့ၢ်ဧီၤ.+

၁၆ ယမ့ၢ်တဟ့ၣ်လီၤ ပှၤဖှီၣ်ဖိယာ်ဖိလၢ တၢ်လၢ အဝဲသ့ၣ် လီကီဘၣ်မ့ၢ်ဂ့ၤ,+

ယမ့ၢ်မၤဟးဂီၤ မုၢ်ကမဲတဖၣ် အတၢ်မုၢ်လၢ်မ့ၢ်ဂ့ၤ,+

၁၇ ယမ့ၢ်အီၣ်တၢ် ထဲတဂၤ

ဒီးယမ့ၢ်တဟ့ၣ်အီၣ် ပှၤဖိၣ်ဃဲ တဖၣ်ဘၣ်မ့ၢ်ဂ့ၤ,+

၁၈ (စးထီၣ်ဖဲ ယသးစၢ်အခါ ပှၤဖိၣ်ဃဲတဖၣ်လၢ အဒိၣ်ထီၣ်ဒီးယၤန့ၣ် ပာ်ယၤဒ် အပၢ်အသိးလီၤ.

ဒီးစးထီၣ်လၢ ယဖိသၣ်အခါန့ၣ် ယမၤစၢၤ ပှၤမုၣ်ကမဲတဖၣ်လီၤ.)

၁၉ ယမ့ၢ်ထံၣ် ပှၤတဂၤဂၤလၢ အတၢ်ကူတၢ်ကၤ တအိၣ်ဘၣ်အဃိ တၢ်ဂိၢ်အသး ဘူးကသံ

ဒီးယမ့ၢ်ထံၣ် ပှၤဖှီၣ်ဖိယာ်ဖိလၢ အတၢ်ကူတၢ်ကၤ တအိၣ်ဘၣ်+

၂၀ ဒီးယမ့ၢ်တဟ့ၣ်အီၤ သိဆူၣ်လၢ ကမၤကလၢၤအသးအဂီၢ်

ဒီးအမ့ၢ်တဆိၣ်ဂ့ၤယၤဘၣ်မ့ၢ်ဂ့ၤ,+

၂၁ ဒီးဖဲပှၤဖိၣ်ဃဲ+ လိၣ်ဘၣ်ယ တၢ်မၤစၢၤ လၢဝ့ၢ်အတြဲၤအခါ+

ယမ့ၢ်ဒုးနဲၣ်အီၤ လၢယစုခိၣ်သၣ် မ့ၢ်ဂ့ၤန့ၣ်

၂၂ မ်ယစုဒုၣ် လီၤဖျုကွံာ် လၢ ယဖံဘၣ်ခိၣ်

ဒီးမ်ယစုနၢၣ်ခံအဆၢ ကၢ်ကွံာ်တက့ၢ်.

၂၃ မ့ၢ်လၢယပျံၤ ကစၢ်ယွၤ အတၢ်စံၣ်ညီၣ်အဃိ ယတမၤ တၢ်သ့ၣ်တဖၣ်န့ၣ် နီတမံၤဘၣ်.

ဒီးယမ့ၢ်မၤဒ်န့ၣ်န့ၣ် ယဆၢထၢၣ်လၢ ယွၤအတၢ်ကဟုကညီၢ် အမဲာ်ညါ တဘူၣ်လၢၤစ့ၢ်ကီးဘၣ်.

၂၄ ယမ့ၢ်သန့ၤယသးလၢထူ

ဒီးယမ့ၢ်တဲလၢ ထူစီမ့ၢ်တၢ်လၢအဟ့ၣ်ယၤ တၢ်ဘံၣ်တၢ်ဘၢမ့ၢ်ဂ့ၤ,+

၂၅ ယမ့ၢ်သးခုလၢ ယအိၣ်ဒီး တၢ်ထူးတၢ်တီၤ အါအါဂီၢ်ဂီၢ်+

ဒီးခီဖျိလၢ ယန့ၢ်ဘၣ်တၢ် အါမးအဃိမ့ၢ်ဂ့ၤ,+

၂၆ ဖဲယထံၣ် မုၢ်ဆဲးကပီၤလီၤ ဒီး လါအတၢ်ဃံတၢ်လၤ

ဖဲအလဲၤခီဂာ်ဝဲ မူကပိာ်လိၤအခါ+

၂၇ လၢတၢ်ခူသူၣ်အပူၤ ယသးမ့ၢ် ကွဲန့ၢ်လွဲန့ၣ်ယၤ

ဒီးယမ့ၢ်နၢမူယစု ဒ်သိး ယကဘူၣ်ထီၣ်ဘါထီၣ် တၢ်သ့ၣ်တဖၣ်န့ၣ် အဂီၢ် မ့ၢ်ဂ့ၤန့ၣ်+

၂၈ အခီပညီ ကမ့ၢ်ဝဲဒၣ်လၢ ယပာ်တ့ၢ်ကွံာ် ကစၢ်ယွၤလၢ အမ့ၢ်အတီတဂၤလီၤ.

ဒီးယမ့ၢ်မၤဒ်န့ၣ်န့ၣ် ကမ့ၢ်ဝဲ တၢ်ကမၣ်လၢ စံၣ်ညီၣ်ကွီၢ်တဖၣ် ကြၢးစံၣ်ညီၣ်ယၤလီၤ.

၂၉ ဖဲယဒုၣ်ယဒါ ဘၣ်တၢ်မၤဟးဂီၤအီၤအခါ မ့ၢ်ယသးခု တဘျီဘျီဧါ,+

ဖဲအထံၣ်ဘၣ် တၢ်အၢတၢ်သီအခါ မ့ၢ်ယသူၣ်မံသးမုာ် တဘျီဘျီဧါ.

၃၀ ယတဆိၣ်သံ ယဒုၣ်ယဒါ နီတဘျီဘၣ်,

ယတမၤ တၢ်ဒဲးဘးဒ်န့ၣ် နီတဘျီဘၣ်.+

၃၁ ပှၤပိာ်ခွါလၢအအိၣ်လၢ ယဟံၣ်ပူၤန့ၣ် တဲဝဲလၢ

‘ပှၤလၢအဟဲလၢ စီၤယိၤဘးအဟံၣ် ကိးဂၤဒဲးန့ၣ် အီၣ်ဘၣ်တၢ်ဘျဲဘျဲ တမ့ၢ်ဧီၤ.’+

၃၂ ယတူၢ်လိာ် ပှၤလဲၤတၢ်က့ၤတၢ်ဖိတဖၣ် လၢယဟံၣ် ထီဘိလီၤ.

ပှၤတမှံၤ တမံဘၣ်လၢ တၢ်ချၢ နီတဘျီဘၣ်.+

၃၃ ယဂုာ်ကျဲးစၢး ပာ်ခူသူၣ် ယတၢ်ကမၣ်ဒ်သိးဒီး ပှၤအဂၤန့ၣ် အိၣ်တဘျီဘျီဧါ.+

မ့ၢ်ယပာ်ခူသူၣ် ယတၢ်ကမၣ်လၢ ယဆ့ကၤအထၢၣ်ပူၤ တဘျီဘျီဧါ.

၃၄ မ့ၢ်ယပျံၤ ပှၤဂီၢ်မုၢ် တဘျီဘျီဧါ.

မ့ၢ်ယပျံၤလၢ ဟံၣ်ဖိဃီဖိ လၢအဂၤတဖၣ် ကမၤမဲာ်ဆှးယၤန့ၣ် အိၣ်တဘျီဘျီဧါ.

မ့ၢ်ယအိၣ်ဘှ့ၣ်လၢဟံၣ်ပူၤ ဒီးဟးထီၣ်လၢ တၢ်ချၢတဘူၣ်ဘၣ်န့ၣ် အိၣ်တဘျီဘျီဧါ.

၃၅ ပှၤဒိကနၣ်ယၤ မ့ၢ်အိၣ်န့ၣ် ကဂ့ၤဝဲလီၤ.+

ယကဆဲးလီၤယမံၤ လၢတၢ်လၢယတဲအီၤတဖၣ် အဂီၢ်လီၤ.

မ်သ့တၢ်လၢာ်ကစၢ် စံးဆၢယၤတက့ၢ်.+

ပှၤလၢ အပာ်ဒ့ၣ်ပာ်ကမၣ်ယၤတဂၤ မ့ၢ်ကွဲးလီၤ အတၢ်ပာ်ဒ့ၣ်ပာ်ကမၣ် လၢလံာ်အုၣ်သးန့ၣ် ကဂ့ၤဝဲလီၤ.

၃၆ ယကယိးဃာ်အီၤ လၢယဖံဘၣ်ခိၣ်

ဒီးယကဖျီၣ်ဃာ်အီၤလၢ ယခိၣ်လိၤ ဒ်ခိၣ်သလုး အသိးလီၤ.

၃၇ ဘၣ်ဃးဒီး ယခီၣ်ခါ ကိးခါဒဲးန့ၣ် ယကၡဲစရီဒီးအီၤ

ဒီးယကလဲၤလၢအအိၣ် လၢတၢ်နာ်န့ၢ်လီၤသးအပူၤ ဒ်ပဒိၣ်တဂၤ အသိးလီၤ.

၃၈ ယစံာ်ပျီ မ့ၢ်ကိးပသူထီၣ် ဒီးပာ်ဒ့ၣ်ပာ်ကမၣ်ယၤ

ဒီးထဲၣ်ကျိၤတဖၣ် မ့ၢ်ဟီၣ်သကိး လၢယဃိ,

၃၉ ဒီးယမ့ၢ်အီၣ် တၤသူတၤသၣ် ဒီးယမ့ၢ်တဟ့ၣ် အပှ့ၤဘၣ်+

မ့တမ့ၢ် ယမ့ၢ်မၤဟးဂီၤပှၤသး ခီဖျိလၢ ယဟံးန့ၢ် ပှၤတၢ်လီၢ် တၢ်ကျဲန့ၣ်+

၄၀ မ်တၤဆှုၣ်တၤမဲတဖၣ် ဟဲမဲထီၣ်လၢ ယဘုကၠူၣ်အလီၢ်

ဒီးမ်နီၣ်နၢသံတဖၣ် ဟဲမဲထီၣ်လၢ ယဘုမုယီၤ အလီၢ်တက့ၢ်.”

စီၤယိၤဘး အတၢ်ကတိၤတဖၣ် ကတၢၢ်ဝဲ ဖဲအံၤလီၤ.

၃၂ စီၤယိၤဘး ဆိကမိၣ်လီၤအသး လၢအမ့ၢ်ပှၤတီပှၤလိၤအဃိ+ ပှၤသၢဂၤအံၤ တတဲဆၢအီၤ နီတမံၤလၢၤဘၣ်. ၂ ဘၣ်ဆၣ် စီၤအလံဟူၤ သးဒိၣ်ထီၣ်တၢ်ဒိၣ်မး ဒီးအသးဒိၣ်ထီၣ် စီၤယိၤဘး မ့ၢ်လၢ စီၤယိၤဘး ဂုာ်ကျဲးစၢး ပာ်ဖျါထီၣ် အနီၢ်ကစၢ်အတၢ်တီတၢ်လိၤ ဒီးတမ့ၢ်ကစၢ်ယွၤ အတၢ်တီတၢ်လိၤဘၣ် အဃိလီၤ.+ စီၤအလံဟူၤ မ့ၢ်ဝဲ ပှၤဘူစးဖိ+ စီၤဘၤရက့လး လၢစီၤအ့ရၣ်အဒူၣ်အကျါ အဖိခွါလီၤ. ၃ အဝဲသးဒိၣ်ထီၣ် စီၤယိၤဘး အသကိးသၢဂၤန့ၣ် စ့ၢ်ကီး, မ့ၢ်လၢအဝဲသ့ၣ်တဲဆၢ စီၤယိၤဘးတဘၣ် နီတဂၤဘၣ် ဒီးတဲဝဲလၢ ကစၢ်ယွၤမ့ၢ် ပှၤအၢပှၤသီအဃိလီၤ.+ ၄ မ့ၢ်လၢ အဝဲသ့ၣ် အသးပှၢ်န့ၢ်ဒံး စီၤအလံဟူၤ အဃိ စီၤအလံဟူၤ အဲၣ်ဒိးတဲတၢ်ဒီး စီၤယိၤဘး ဘၣ်ဆၣ် အဝဲအိၣ်ခိးဝဲ တုၤလၢ အဝဲသ့ၣ် တဲတၢ်ဝံၤဝဲလီၤ.+ ၅ ဖဲစီၤအလံဟူၤ ထံၣ်ဘၣ်ဝဲလၢ ပှၤသၢဂၤန့ၣ် တဲဆၢတၢ် တဘၣ်နီတမံၤလၢၤဘၣ်အခါ အသးဒိၣ်ထီၣ်တၢ်လီၤ. ၆ အဃိ ပှၤဘူစးဖိ စီၤဘၤရက့လး အဖိခွါ စီၤအလံဟူၤ တဲဝဲလၢ

“ယမ့ၢ် ပှၤသးစၢ်တဂၤ

ဒီးမ့မ့ၢ်သုန့ၣ် သုမ့ၢ်ပှၤလၢ အသးပှၢ်တဖၣ်လီၤ.+

အဃိ လၢတၢ်ပာ်ကဲအပူၤ ယအိၣ်ဘှ့ၣ်+

ဒီးတၢ်လၢယသ့ၣ်ညါန့ၣ် ယတဲသု တဘူၣ်ဘၣ်.

၇ ယဆိမိၣ် ‘ယကပျဲလၢ ပှၤသးပှၢ်တဖၣ် တဲတၢ်

ဒီးပှၤလၢ အသးနံၣ်အါတဖၣ် ကတဲဖျါထီၣ် တၢ်ကူၣ်သ့လီၤ.’

၈ ဘၣ်ဆၣ် ကစၢ်ယွၤ အသးစီဆှံလၢ အဟ့ၣ်လီၤ ပှၤဟီၣ်ခိၣ်ဖိ

ဒီးသ့တၢ်လၢာ်ကစၢ် အတၢ်ကသါန့ၣ် ဟ့ၣ်လီၤပှၤဟီၣ်ခိၣ်ဖိ တၢ်သ့ၣ်ညါနၢ်ပၢၢ်လီၤ.+

၉ ထဲဒၣ်လၢ ပှၤသးနံၣ်အါအဃိ ပှၤအိၣ်ဒီးတၢ်ကူၣ်သ့န့ၣ် တမ့ၢ်ဘၣ်.

ဒီးပှၤလၢ အနၢ်ပၢၢ် တၢ်လၢအဘၣ်န့ၣ် တမ့ၢ်ထဲ ပှၤသးပှၢ်တဖၣ်ဘၣ်.+

၁၀ အဃိ ယကတဲတၢ်, ‘ကနၣ်လၢအံၤ.

ယကတဲဘၣ်သု တၢ်လၢယသ့ၣ်ညါတဖၣ်လီၤ.’

၁၁ ဖဲသုဆိကမိၣ်ထံ ဒီးဃုတၢ်ကတိၤလၢ သုကတဲဆၢအီၤအဂီၢ်အခါ+

ယခိးကနၣ် သုတၢ်ကတိၤတဖၣ်

ဒီးဖဲသုတဲဖျါထီၣ် သုတၢ်ထံၣ်အခါန့ၣ် ယဒိကနၣ်လီၤ.+

၁၂ ယကနၣ် သုတဲတၢ်ထံထံ

ဘၣ်ဆၣ် သုပာ်ဖျါထီၣ်လၢ စီၤယိၤဘး အတၢ်ကမၣ်အိၣ်န့ၣ် တန့ၢ်နီတဂၤဘၣ်

ဒီးသုတဲအီၤ တနၢၤ နီတဂၤဘၣ်.

၁၃ အဃိ တဘၣ်တဲလၢ သုမ့ၢ်ပှၤလၢ အအိၣ်ဒီး တၢ်ကူၣ်သ့တဂ့ၤ.

ဒီးတဘၣ်ဆဲးတဲလၢ ကစၢ်ယွၤ မ့ၢ်ပှၤလၢ အသိၣ်အီၤ ဒီးတမ့ၢ်လၢ ပှၤကညီသိၣ်အီၤဘၣ်န့ၣ်တဂ့ၤ.

၁၄ တၢ်လၢ စီၤယိၤဘးတဲဝဲန့ၣ် တဘၣ်ဃးဒီးယၤဘၣ်.

အဃိ ယတတဲဆၢအီၤဒ် သုတဲအီၤအသိးဘၣ်.

၁၅ ပှၤတဖၣ်အံၤ* ဖုးဘၣ်အသး ဒီး အဝဲသ့ၣ် တတဲဆၢတၢ်လၢၤဘၣ်.

ဒီးအဝဲသ့ၣ် တဲတၢ်တဘၣ် နီတမံၤလၢၤဘၣ်.

၁၆ ယအိၣ်ခိးဒိကနၣ် ဘၣ်ဆၣ် အဝဲသ့ၣ် တတဲတၢ်လၢၤဘၣ်.

အဝဲသ့ၣ် ဆၢထၢၣ်အိၣ်ဖဲန့ၣ် ဒီးတတဲတၢ် နီတမံၤလၢၤဘၣ်.

၁၇ အဃိ ယကတဲတၢ်

ဒီးယကတဲတၢ်လၢ ယသ့ၣ်ညါအီၤတဖၣ်လီၤ.

၁၈ တၢ်လၢယကဘၣ်တဲန့ၣ် အိၣ်ဖးအါညါ.

သးစီဆှံ ထိၣ်ဟူးထိၣ်ဂဲၤထီၣ်ယၤလၢ ယကတဲတၢ်လီၤ.

၁၉ ဒီးယဘၣ်သးတဲတၢ် သပှၢ်ကတၢၢ်*

ဒီးယမ့ၢ်တတဲဘၣ်တၢ်န့ၣ် ယသးကပိၢ်ဖးလီၤ.*+

၂၀ ဒ်သိး ယသးကမုာ်ထီၣ်အဂီၢ် ပျဲယတဲတၢ်သၢၤ.

ယကအိးထီၣ် ယထးခိၣ် ဒီး တဲဆၢက့ၤတၢ်လီၤ.

၂၁ တမ့ၢ်လၢ ယကကွၢ်မဲာ် ပှၤ နီတဂၤဘၣ်.+

ဒီးယတတဲမုာ်ပှၤနၢ်ဘၣ်.

၂၂ ယဟးတဲမုာ်ပှၤနၢ် တဘၣ်စ့ၢ်ကီးဘၣ်.

ဒီးယမ့ၢ်မၤဒ်န့ၣ်န့ၣ် ပှၤလၢအတ့လီၤယၤတဂၤ ကမၤသံယၤ တဘျီဃီလီၤ.

၃၃ “စီၤယိၤဘးဧၢ, ဝံသးစူၤ ကနၣ်တၢ်လၢယကတဲနီၤ.

ကနၣ်တၢ်လၢ ယတဲ ကိးထံၣ်ဒဲးနီၤ.

၂ ယကးပံး ယကိာ်ပူၤတကဲလၢၤဘၣ်,

ယကတဲတၢ်လီၤ.

၃ ယတၢ်ကတိၤတဖၣ်န့ၣ် ပာ်ဖျါထီၣ်ဝဲလၢ ယမ့ၢ်ပှၤလၢ အသူၣ်ဘျၢသးဘျၢ+

ဒီးလၢတၢ်သူၣ်ဘျၢသးဘျၢအပူၤန့ၣ် ယထးခိၣ်ကတဲ တၢ်လၢယသ့ၣ်ညါတဖၣ်လီၤ.

၄ ကစၢ်ယွၤ အသးစီဆှံ တ့ယၤ+

ဒီးသ့တၢ်လၢာ်ကစၢ် အတၢ်ကသါန့ၣ် ဒုးမူယၤလီၤ.+

၅ နတဲဆၢယၤ မ့ၢ်ဘၣ်န့ၣ် တဲဆၢနီၤ.

ကတဲာ်ကတီၤပာ်စၢၤနသးနီၤ, ဒီးနမ့ၢ်အဲၣ်ဒိးတဲအါတၢ် တမံၤမံၤန့ၣ် နတဲသ့လီၤ.

၆ လၢယွၤလၢအမ့ၢ်အတီတဂၤ အမဲာ်ညါန့ၣ် ပမ့ၢ်တၢ်ဒ်သိးသိးလီၤ.

ယၤစ့ၢ်ကီး တၢ်တ့လီၤယၤလၢ ကပံာ်လီၤ.+

၇ အဃိ နတလိၣ် ပျံၤယၤဘၣ်,

ယတတဲတၢ်ကတိၤလၢ အကကဲထီၣ် တၢ်ဆီၣ်သနံးလၢနဂီၢ် အါတလၢဘၣ်.

၈ တၢ်လၢနတဲန့ၣ် ယနၢ်ဟူဘၣ်,

ဒီးယကနၣ် နတၢ်ကတိၤ တဖၣ်အံၤလီၤ.

၉ နတဲလၢ နမ့ၢ်ပှၤလၢ အစီဆှံ ဒီးနတၢ်ကမၣ်တအိၣ်ဘၣ်,+

နမ့ၢ်ပှၤလၢ အကဆှီ ဒီးနတၢ်ဒဲးဘး တအိၣ်ဘၣ်.+

၁၀ ဒီးနတဲလၢ ကစၢ်ယွၤ ဃုနတၢ်ကမၣ်လၢ ကထီဒါနၤအဂီၢ်

ဒီးအပာ်နၤဒ် အဒုၣ်အဒါ အသိးလီၤ.+

၁၁ ဒီးအကျီၤတံၢ်ဃာ် နခီၣ်လၢ သ့ၣ်ကျီၤ,

ဒီးဖဲနလဲၤ တပူၤဂ့ၤတပူၤဂ့ၤ အကွၢ်နၤ ထံထံဆးဆးလီၤ.+

၁၂ နတဲတၢ် ဒ်န့ၣ်န့ၣ် တဘၣ်ဘၣ်, အဃိ ယကတဲနၤလၢ

ကစၢ်ယွၤ ဒိၣ်န့ၢ်ဒံး ပှၤဟီၣ်ခိၣ်ဖိ စၢၢ်တလၢၢ်လီၤ.+

၁၃ ဘၣ်မနုၤအဃိ နကဒူးကဒ့ၣ် အီၤလဲၣ်.+

မ့ၢ်လၢ အတစံးဆၢနၤဘၣ် အဃိဧါ.+

၁၄ နီၢ်ကီၢ်န့ၣ် ကစၢ်ယွၤ တဲတၢ် တဘျီဝံၤတဘျီ

ဘၣ်ဆၣ် ပှၤတကနၣ် နီတဂၤဘၣ်.

၁၅ အဝဲ တဲတၢ်လၢ တၢ်မံမီၢ်အပူၤ, လၢတၢ်ထံၣ်လၢညါခီအပူၤ+

ဖဲပှၤမံလၢ လီၢ်မံခိၣ်အခါ

ဒီးဖဲပှၤနၢ်လီၤ ဖးယိာ်အခါလီၤ.

၁၆ ကစၢ်ယွၤတဲတၢ်လၢ အဝဲသ့ၣ် အနၢ်ပူၤ+

ဒီးပာ်ဂၢၢ်ပာ်ကျၢၤ တၢ်ဟံးစုနဲၣ်ကျဲလၢ အဟ့ၣ်လီၤအဝဲသ့ၣ်

၁၇ ဒ်သိး ပှၤကပာ်တ့ၢ်ကွံာ် တၢ်လၢအကမၣ်+

ဒီးဒ်သိး ပှၤသုတပာ်ထီၣ်ထီအသး တဂ့ၤအဂီၢ်လီၤ.+

၁၈ ကစၢ်ယွၤ မၤပူၤဖျဲးအီၤလၢ တၢ်သွၣ်ခိၣ်+

ဒီးတပျဲအသံလၢနးဘၣ်.

၁၉ ဖဲပှၤတဂၤ တူၢ်ဘၣ်တၢ်အ့ၣ်စိၢ် အ့ၣ်ထုး ဒီးမံနီၤလၢ အလီၢ်မံခိၣ်

ဒီးဖဲအဃံတဖၣ် ဆါဝဲ ထီဘိအခါ အန့ၢ်ဘၣ်တၢ်မၤလိသ့လီၤ.

၂၀ အဝဲတူၢ်ဘၣ်တၢ် ဒ်န့ၣ်အဃိ အသးလၢာ်တၢ်အီၣ်

ဒီးအတအဲၣ်ဒိးအီၣ် တၢ်အီၣ်လၢ အအီၣ်ဝဲဝံၣ် ဒၣ်လဲာ်န့ၣ်ဘၣ်.+

၂၁ အဝဲဃဲၤလီၤ သပှၢ်တၢၢ်

ဒီးအိၣ်တ့ၢ်က့ၤထဲ အဃံလီၤ.

၂၂ ဒီးအဝဲဘူးထီၣ်ဒီး တၢ်သွၣ်ခိၣ်

ဒီးပှၤလၢ အလူၤမၤသံအီၤန့ၣ် ဟဲဘူးထီၣ်ဝဲလံ.

၂၃ ဘၣ်ဆၣ် လၢပှၤတကထိအကျါန့ၣ်

ပှၤစိာ်တၢ်ကစီၣ်ဖိ မ့ၢ်အိၣ်တဂၤလၢ အကဟဲမၤစၢၤအီၤဒီး

တဲဘၣ်အီၤတၢ်လၢ အတီအလိၤန့ၣ်

၂၄ ကစၢ်ယွၤ ကသးကညီၤဘၣ်အီၤ ဒီးကတဲဝဲလၢ

‘မၤပူၤဖျဲးအီၤ ဒ်သိးအသုတလဲၤလီၤဘၣ်လၢ တၢ်သွၣ်ခိၣ်အပူၤတဂ့ၤ,+

ယထံၣ်န့ၢ် တၢ်ပှ့ၤက့ၤလၢ အဂီၢ်လံ.+

၂၅ မ်အဖံးအညၣ် ဂ့ၤန့ၢ်ဒံး ပှၤသးစၢ် အဖံးအညၣ်+

ဒီးမ်အက့ၤကဲထီၣ်က့ၤဒ် အသးစၢ် အဆၢကတီၢ် ဖဲအပှဲၤဝဲဒီး တၢ်ဂံၢ်တၢ်ဘါအခါ န့ၣ်တက့ၢ်.’+

၂၆ အဝဲကဃ့ကညး ကစၢ်ယွၤ+ ဒီးကစၢ်ယွၤ ကတူၢ်လိာ်အီၤလီၤ.

အဝဲကထံၣ် ကစၢ်ယွၤအမဲာ် ဒီးအကကိးပသူထီၣ်လၢ တၢ်သးခုအပူၤ

ဒီးကစၢ်ယွၤ ကပာ်တီပာ်လိၤက့ၤအီၤလီၤ.

၂၇ ပှၤတဂၤန့ၣ် ကတဲဘၣ် ပှၤအဂၤတဖၣ်လၢ

‘ယမၤတၢ်ဒဲးဘး+ ဒီးယမၤတၢ်တတီတလိၤ

ဘၣ်ဆၣ် ယတဘၣ် တၢ်စံၣ်ညီၣ်ဘၣ်.

၂၈ အဝဲ ပှ့ၤက့ၤယၤ ဒ်သိး ယသုတလဲၤလီၤဘၣ် လၢတၢ်သွၣ်ခိၣ်အပူၤ တဂ့ၤအဂီၢ်+

ဒီးယကဆဲးအိၣ်မူဘၣ်လီၤ.’

၂၉ နီၢ်ကီၢ်န့ၣ် ကစၢ်ယွၤ မၤဝဲတၢ်သ့ၣ်တဖၣ်အံၤခဲလၢာ်

လၢပှၤတဂၤအဂီၢ် ခံဘျီ သၢဘျီလီၤ.

၃၀ အဃိအဝဲ ကမၤပူၤဖျဲးအီၤလၢ တၢ်သွၣ်ခိၣ်

ဒ်သိး အကအိၣ်မူဘၣ်မုာ်မုာ် အဂီၢ်လီၤ.+

၃၁ ကနၣ်လၢအံၤ စီၤယိၤဘးဧၢ, ကနၣ်တၢ်ထံထံ,

အိၣ်ဘှ့ၣ်ဒီး ယကဆဲးတဲတၢ်လီၤ.

၃၂ နမ့ၢ်ဘၣ်သးတဲတၢ် တမံၤမံၤန့ၣ် တဲယၤဟီ.

တဲတၢ်သၢၤ, ယအဲၣ်ဒိးပာ်ဖျါထီၣ်လၢ နတၢ်ကမၣ် တအိၣ်ဘၣ်လီၤ.

၃၃ တၢ်လၢနကတဲ မ့ၢ်တအိၣ်နီတမံၤဘၣ်န့ၣ် နကြၢးကနၣ် တၢ်လၢ ယကတဲလီၤ.

အိၣ်ဘှ့ၣ် ဒီးယကသိၣ်လိနၤ တၢ်ကူၣ်သ့လီၤ.”

၃၄ အဃိ စီၤအလံဟူၤ ဆဲးတဲဝဲလၢ

၂ “ပှၤလၢ အကူၣ်တၢ်သ့သ့ၣ်ဧၢ, ကနၣ်တၢ်လၢယကတဲ.

ပှၤလၢအသ့ၣ်ညါတၢ်အါသ့ၣ်ဧၢ, ကနၣ်ယၤနီၤ.

၃ ဒ်ပျ့ၤလ့ၣ်ကွၢ် တၢ်အီၣ်အသိး

နၢ်န့ၣ် ဒိကနၣ်တၢ်လၢ ပှၤတဲဝဲတဖၣ်ထံထံ ဒ်သိး ကနီၤဖးဝဲ တၢ်အဘၣ် ဒီးတၢ်အကမၣ် အဂီၢ်လီၤ.

၄ အဃိ မ်ပသမံသမိးကွၢ် တၢ်လၢအဘၣ် လၢပနီၢ်ကစၢ်,

ဒီးမ်ပဆၢတဲာ် တၢ်လၢအဘၣ် လၢ ပနီၢ်ကစၢၢ်သၢၤ.

၅ စီၤယိၤဘးန့ၣ် တဲဝဲလၢ အတၢ်ကမၣ် တအိၣ်ဘၣ်,+

ဘၣ်ဆၣ် ကစၢ်ယွၤ တစံၣ်ညီၣ်န့ၢ်တၢ်လၢအဂီၢ် တီတီလိၤလိၤဘၣ်.+

၆ ဒီးအတဲဝဲလၢ အကြၢးဘၣ် တၢ်စံၣ်ညီၣ် ထဲလဲၣ်န့ၣ် မ့ၢ် အကလံၣ်တၢ်လီတၢ် စ့ၢ်ကီးဧါ.

ဒီးအတၢ်ကမၣ် တအိၣ်ဘၣ် ဘၣ်ဆၣ် အတၢ်ပူၤလီၢ်န့ၣ် ဘျါတသ့ဘၣ်.+

၇ ပှၤလၢအလီၤဂာ်ဒီး စီၤယိၤဘးန့ၣ် အိၣ်တဂၤဂၤဧါ.

အဝဲဘၣ်သးအီ တၢ်တဲဆါတဖၣ် ဒ်အအီထံ အသိးလီၤ.

၈ တယံာ်လၢၤဘၣ်ဒု အဝဲကဒီတံၤဒီသကိးဒီး ပှၤမၤတၢ်ကမၣ်

ဒီးအကရ့လိာ်အသးဒီး ပှၤအၢပှၤသီ,+

၉ မ့ၢ်လၢ အတဲဝဲလၢ ‘ပှၤမ့ၢ်ဂုာ်ကျဲးစၢးမၤ တၢ်ဘၣ်ယွၤအသးဘၣ်ဆၣ်

အတကဲဘျုးနီတမံၤဘၣ်.’+

၁၀ ပှၤလၢအအိၣ်ဒီး တၢ်သ့ၣ်ညါနၢ်ပၢၢ်သ့ၣ်ဧၢ, ကနၣ်ယၤနီၤ.

လ့ၤတက့ၤ ယွၤလၢအမ့ၢ်အတီ တမၤတၢ်အၢတၢ်သီဘၣ်.+

ဒီးလ့ၤတက့ၤ သ့တၢ်လၢာ်ကစၢ် တမၤတၢ်ကမၣ်ဘၣ်.+

၁၁ ကစၢ်ယွၤ ကဟ့ၣ်လီၤ ပှၤတဂၤခိၣ်ဖး ဒ်တၢ်လၢအမၤဝဲအသိးလီၤ.+

အဝဲကဟ့ၣ်လီၤအီၤ တၢ်လၢအကြၢးဒိးန့ၢ်ဘၣ်ဝဲလီၤ.

၁၂ ကစၢ်ယွၤ တမၤတၢ်အၢတၢ်သီဘၣ်န့ၣ် လီၤတံၢ်လံ.+

ဒီးသ့တၢ်လၢာ်ကစၢ် စံၣ်ညီၣ်တၢ် တတီဘၣ်န့ၣ် တအိၣ်နီတဘျီဘၣ်.+

၁၃ မတဂၤပာ်ထီၣ် ကစၢ်ယွၤလၢ အကတီခိၣ်ရိၤမဲ ဟီၣ်ခိၣ်လဲၣ်.

ဒီးမတဂၤ ပာ်ထီၣ်အီၤလၢ ဟီၣ်ခိၣ် ဒီဘ့ၣ် အဖီခိၣ်လဲၣ်.

၁၄ ကစၢ်ယွၤ မ့ၢ်ထီဒါက့ၤ ပှၤဟီၣ်ခိၣ်ဖိတဖၣ်

ဒီးအဝဲ မ့ၢ်ထၢဖှိၣ် အဝဲသ့ၣ်အသး ဒီးအဝဲသ့ၣ် အတၢ်သါဆူအအိၣ်န့ၣ်+

၁၅ ပှၤဟီၣ်ခိၣ်ဖိခဲလၢာ် ကသံဝဲဒ်သိးသိး

ဒီးပှၤကညီ ကကဲထီၣ်ကဒါက့ၤ ဟီၣ်ခိၣ်ကမူၣ်လီၤ.+

၁၆ နမ့ၢ်အိၣ်ဒီး တၢ်သ့ၣ်ညါနၢ်ပၢၢ်န့ၣ် ကနၣ်တၢ်လၢ ယကတဲ လီၤတံၢ်လီၤဆဲး

ဒီးကနၣ်အီၤထံထံဆးဆးနီၤ.

၁၇ ပှၤလၢအသးဟ့ တၢ်စံၣ်ညီၣ်တီန့ၣ် အပၢတၢ်တန့ၢ်ဘၣ်.

မ့ၢ်နကပာ်ဒ့ၣ်ပာ်ကမၣ် ပှၤတီပှၤလိၤလၢ အအိၣ်ဒီး တၢ်စိတၢ်ကမီၤတဂၤန့ၣ်ဧါ.

၁၈ ဒီးမ့ၢ်နကတဲ စီၤပၤတဂၤလၢ ‘နၤန့ၣ် နဘျုးတအိၣ် နီတမံၤဘၣ်’ န့ၣ်ဧါ.

မ့ၢ်နကတဲ ပှၤဒိၣ်ပှၤပှၢ်တဖၣ်လၢ ‘သုမ့ၢ်ပှၤအၢပှၤသီ’ န့ၣ်ဧါ.+

၁၉ ကစၢ်ယွၤ တကွၢ်မဲာ် ပဒိၣ်တဖၣ်ဘၣ်

ဒီးအဝဲတကွၢ်ဒိၣ်ဆံးအါစှၤ ပှၤကဲဒိၣ် ဒီးပှၤဖှီၣ်ဖိယာ်ဖိဘၣ်+

မ့ၢ်လၢ အဝဲသ့ၣ်ခဲလၢာ်န့ၣ် ကစၢ်ယွၤ တ့လီၤဝဲလၢအစုလီၤ.+

၂၀ ဘၣ်သ့ၣ်သ့ၣ် ဖဲဖးဖီမုၢ်န့ၣ်+ အဝဲသ့ၣ် ကသံဝဲသတူၢ်ကလာ်+

ဒီးအဝဲသ့ၣ် ကကနိးဝဲဆူၣ်ဆူၣ် ဒီးသံဝဲလီၤ.

ဒီးပှၤလၢ အအိၣ်ဒီးအစိအကမီၤ ဒၣ်လဲာ် ကလီၤမၢ်ကွံာ်ဝဲ ဘၣ်ဆၣ် အတမ့ၢ် ခီဖျိလၢ ပှၤဟီၣ်ခိၣ်ဖိတဖၣ် မၤဝဲအဃိဘၣ်.+

၂၁ ကစၢ်ယွၤ ထံၣ်ဝဲတၢ်လၢ ပှၤတဂၤမၤဝဲ+

ဒီးအဝဲထံၣ်ဝဲ အခီၣ်ခါခဲလၢာ်လီၤ.

၂၂ တၢ်ခံးဒီး တၢ်ခံးယိာ်လၢ

ပှၤမၤတၢ်ကမၣ် ကပာ်ခူသူၣ်အသး အလီၢ်န့ၣ် တအိၣ်နီတပူၤဘၣ်.+

၂၃ ဒ်သိး ကစၢ်ယွၤ ကစံၣ်ညီၣ် ပှၤတဂၤဂ့ၤ တဂၤဂ့ၤအဂီၢ်

အဝဲတလိၣ်ပာ်ပနီၣ် တၢ်ဆၢကတီၢ်လၢ ပှၤကဟဲလၢအအိၣ် အဂီၢ်ဘၣ်.

၂၄ ဒ်သိး အကမၤဟးဂီၤကွံာ် ပှၤလၢအအိၣ်ဒီး တၢ်စိတၢ်ကမီၤတဖၣ်အဂီၢ် အဝဲတလိၣ် သမံသမိးကွၢ်တၢ်ဘၣ်

ဒီးအဝဲပာ်လီၤက့ၤ ပှၤဂၤလၢ အဝဲသ့ၣ် အလီၢ်လီၤ.+

၂၅ ကစၢ်ယွၤ သ့ၣ်ညါဝဲ တၢ်လၢ အဝဲသ့ၣ် မၤဝဲ,+

ဒီးအဝဲ မၤဟးဂီၤကွံာ် အဝဲသ့ၣ် လၢမုၢ်နၤခီ အဃိ အဝဲသ့ၣ် တုၤလၢ တၢ်ဟးဂီၤလီၤ.+

၂၆ မ့ၢ်လၢ အဝဲသ့ၣ် အတၢ်အၢတၢ်သီအဃိ ကစၢ်ယွၤ တီၢ်အဝဲသ့ၣ်လၢ

ပှၤကိးဂၤဒဲး အမဲာ်ညါ,+

၂၇ မ့ၢ်လၢ အဝဲသ့ၣ် ဃၣ်ကွံာ်အသးလၢ ကစၢ်ယွၤအအိၣ်+

ဒီးတပာ်ကဲ ကစၢ်ယွၤ အတၢ်မၤလိာ်တဖၣ် နီတမံၤဘၣ် အဃိလီၤ.+

၂၈ ဒီးခီဖျိတၢ်လၢ အဝဲသ့ၣ် မၤဝဲတဖၣ် အဃိ ပှၤဖှီၣ်ဖိယာ်ဖိတဖၣ် ဘၣ်ဃ့တၢ်မၤစၢၤလၢ ကစၢ်ယွၤအအိၣ်

ဒီးကစၢ်ယွၤ နၢ်ဟူ ပှၤလၢအလိၣ်ဘၣ် တၢ်မၤစၢၤတဖၣ် အတၢ်ဃ့ကညးလီၤ.+

၂၉ ဖဲကစၢ်ယွၤ အိၣ်ဘှ့ၣ်အခါ မတဂၤ ပာ်ဒ့ၣ်ပာ်ကမၣ်အီၤ ကသ့လဲၣ်.

ဖဲအဝဲပာ်ခူသူၣ် အမဲာ်အခါ မတဂၤထံၣ်အီၤ ကသ့လဲၣ်.

အဝဲမ့ၢ်ပာ်ခူသူၣ် အမဲာ်လၢ ပှၤတကလုာ် အမဲာ်ညါမ့ၢ်ဂ့ၤ, ပှၤတဂၤ အမဲာ်ညါမ့ၢ်ဂ့ၤ တၢ်ကကဲထီၣ်အသး ဒ်သိးသိးလီၤ.

၃၀ အဃိ အဝဲတဟ့ၣ်အခွဲးလၢ ပှၤလၢ အတပာ်ကဲယွၤဘၣ်* ကပၢတၢ်+

ဒီးကပာ်လီၤပျံၤသကွီၤလၢ ပှၤဂီၢ်ဘၣ်.

၃၁ မ့ၢ်ပှၤတဲ ကစၢ်ယွၤလၢ

‘ယတမၤဘၣ် တၢ်ကမၣ်နီတမံၤဘၣ် ဘၣ်ဆၣ် ယဘၣ်တၢ်စံၣ်ညီၣ် ယၤလံ.+

၃၂ သိၣ်လိယၤ တၢ်လၢယတသ့ၣ်ညါဘၣ်တဖၣ်

ဒီးယမ့ၢ်မၤဘၣ် တၢ်ကမၣ် တမံၤမံၤန့ၣ် လၢခံ ယတမၤလၢၤဘၣ်’ န့ၣ် ကသ့တဂၤဂၤဧါ.

၃၃ နတတူၢ်လိာ် ကစၢ်ယွၤ အတၢ်စံၣ်ညီၣ်ဘၣ် အဃိ မ့ၢ်အဝဲ ကြၢးဆိၣ်ဂ့ၤနၤဒ် နတၢ်ထံၣ်အိၣ် အသိးဧါ.

အဝဲန့ၣ် ကဲနတၢ်ဆၢတဲာ်လီၤ, တမ့ၢ်ယၤဘၣ်.

နသ့ၣ်ညါနၢ်ပၢၢ် တၢ်ဂ့ၢ်တခါအံၤ ဂ့ၤဂ့ၤအဃိ တဲဘၣ်ယၤတက့ၢ်.

၃၄ ပှၤလၢအအိၣ်ဒီး တၢ်သ့ၣ်ညါနၢ်ပၢၢ်

ဒီးအကူၣ်တၢ်သ့ လၢအနၢ်ဟူယၤ တဂၤဂ့ၤတဂၤဂ့ၤန့ၣ် ကတဲယၤလၢ

၃၅ ‘စီၤယိၤဘး တဲဝဲတၢ်လၢ အတသ့ၣ်ညါဘၣ်တဖၣ်+

ဒီးအတၢ်ကတိၤတဖၣ်န့ၣ် တအိၣ်ဒီး တၢ်ကူၣ်သ့ဘၣ်.’

၃၆ မ့ၢ်လၢ စီၤယိၤဘး စံးဆၢတၢ် ဒ် ပှၤအၢပှၤသီတဖၣ်အသိးအဃိ

မ်အဘၣ်တၢ်မၤကွၢ်အီၤ မူာ်မူာ်နီၢ်နီၢ်တက့ၢ်.

၃၇ အဝဲမၤအါထီၣ် အတၢ်ဒဲးဘး ခီဖျိလၢ အထီဒါက့ၤတၢ်အဃိလီၤ.+

ဒီးလၢတၢ်တပာ်ကဲဘၣ်အပူၤ အဝဲဒဲအစုလၢ ပမဲာ်ညါ

ဒီးပာ်ဒ့ၣ်ပာ်ကမၣ် ယွၤလၢအမ့ၢ်အတီတဂၤ လၢတၢ်ကတိၤ အါမးလီၤ.”+

၃၅ စီၤအလံဟူၤ ဆဲးတဲဝဲလၢ

၂ “မ့ၢ်နနာ်လၢ နတၢ်ထံၣ်န့ၣ် ဘၣ်အဃိ နတဲလၢ

နတီလိၤ ဒိၣ်န့ၢ်ဒံး ကစၢ်ယွၤန့ၣ်ဧါ.+

၃ နတဲလၢ နမ့ၢ်မၤတၢ်လၢအဘၣ် သနာ်က့ အကကဲဘျုးလၢအ* ဂီၢ်ဒ်လဲၣ်.

ဒီးနတဲလၢ မ့ၢ်လၢ နတမၤ တၢ်ဒဲးဘးဘၣ်အဃိ အကဲဘျုး လၢနဂီၢ် တမံၤမံၤဧါ.+

၄ အဃိ ယကတဲက့ၤနၤ

ဒီးနသကိးတဖၣ်လၢ+

၅ ကွၢ်ထီၣ်လၢ မူခိၣ်

ဒီးကွၢ်ထံတၢ်အၢၣ်+ လၢအအိၣ်လၢ တၢ်ထီၣ်ထီလၢ နဖီခိၣ်တက့ၢ်.

၆ နမ့ၢ်မၤ တၢ်ဒဲးဘးနာ်က့ မ့ၢ်အကမၤဘၣ်ဒိအီၤဧါ.+

ဒီးနမ့ၢ်မၤတၢ်ကမၣ် ဒံးယံာ်ဒံးအါထီၣ် သနာ်က့ ကဘၣ်ဃးဒီးအီၤဒ်လဲၣ်.+

၇ နမ့ၢ်မၤ တၢ်တီတၢ်လိၤ သနာ်က့ မ့ၢ်အကကဲထီၣ် တၢ်မၤစၢၤလၢအဂီၢ်တမံၤမံၤဧါ.

ဒီးအဝဲကဒိးန့ၢ်ဘၣ် တၢ်မနုၤလၢ နအိၣ်လဲၣ်.+

၈ နတၢ်အၢတၢ်သီတဖၣ်န့ၣ် မၤဘၣ်ဒိထဲ ပှၤဟီၣ်ခိၣ်ဖိ ဒ်နၤအသိးလီၤ.

ဒီးနတၢ်တီတၢ်လိၤတဖၣ်န့ၣ် ကဲဘျုးထဲလၢ ပှၤဟီၣ်ခိၣ်ဖိအဂီၢ်လီၤ.

၉ ပှၤကိးပသူထီၣ်ဝဲလၢ ပှၤတူၢ်ဘၣ် တၢ်ဆီၣ်တံၢ်မၤနၢၤ ဒိၣ်ဒိၣ်အဃိ,

ဒီးအဝဲသ့ၣ် ကိးပသူထီၣ် ဒ်သိး ကထူၣ်ဖျဲးထီၣ်လၢ ပှၤလၢအအိၣ်ဒီး တၢ်စိတၢ်ကမီၤတဖၣ် အစုပူၤလီၤ.+

၁၀ ဘၣ်ဆၣ် ပှၤတတဲလၢ ‘ကစၢ်ယွၤဖးဒိၣ် လၢအတ့လီၤယၤတဂၤန့ၣ် အိၣ်ဖဲလဲၣ်,+

ဒီးပှၤတဂၤလၢ အဒုးသးဝံၣ်ပှၤတၢ် ဒ်သိးပှၤက စံးထီၣ်ပတြၢၤတၢ် လၢမုၢ်နၤခီန့ၣ် အိၣ်ဖဲလဲၣ်’ န့ၣ် နီတဂၤဘၣ်.+

၁၁ အဝဲသိၣ်လိပှၤအဃိ+ ပကူၣ်တၢ်သ့ ဒိၣ်န့ၢ်ဒံး ဆၣ်ဖိကီၢ်ဖိအဒူတဖၣ် လၢဟီၣ်ခိၣ်ချၢ+

ဒီးအဝဲဒုးကူၣ်သ့ပှၤ ဒိၣ်န့ၢ်ဒံး ထိၣ်လၢမူခိၣ်တဖၣ်လီၤ.

၁၂ မ့ၢ်လၢ ပှၤပာ်ထီၣ်ထီသး ဒီးမၤတၢ်အၢတၢ်သီအဃိ+

ပှၤဃ့တၢ်မၤစၢၤ ဘၣ်ဆၣ် အဝဲတစံးဆၢဝဲဘၣ်.+

၁၃ တၢ်ဃ့ကညးလၢ အဘျုးတအိၣ် နီတမံၤဘၣ်န့ၣ် လ့ၤတက့ၤ ကစၢ်ယွၤ တဒိကနၣ်ဘၣ်.+

သ့တၢ်လၢာ်ကစၢ်န့ၣ် တကနၣ်ဃုာ် တၢ်ဃ့ကညး ဒ်န့ၣ်ဘၣ်.

၁၄ အဃိ နမ့ၢ်ကဒူးကဒ့ၣ်တၢ်လၢ နတထံၣ် အမၤတၢ် နီတမံၤဘၣ်န့ၣ် အကဒိကနၣ်နၤန့ၣ် မုၢ်လၢ်တဂ့ၤ.+

နတၢ်မူးတၢ်ရၢ်န့ၣ် တုၤလၢ အမဲာ်ညါလံအဃိ အိၣ်ခိးအီၤသၢၤ.+

၁၅ နတဲကြီဘၣ်တၢ် သနာ်က့ အတဟံးန့ၢ်နၤအရ့ဒံးဘၣ်

ဒီးအဝဲတစံၣ်ညီၣ်နၤလၢ တၢ်သးဒိၣ်အပူၤဒံးဘၣ်.+

၁၆ တၢ်လၢ စီၤယိၤဘးန့ၣ် အိးထီၣ်အကိာ်ပူၤဖးလဲၢ် လၢတၢ်ကလီကလီအပူၤ

ဒီးတဲတၢ်လၢ အတသ့ၣ်ညါဝဲဘၣ်တဖၣ် အါမးလီၤ.”+

၃၆ စီၤအလံဟူၤ ဆဲးတဲဝဲလၢ

၂ “ယကတဲတၢ် တစိၢ်ဖိဒံးအဃိ ဝံသးစူၤ အိၣ်ဒီးတၢ်သးစူၤနီၤ,

မ့ၢ်လၢ တၢ်လၢယဘၣ်တဲလၢ ကစၢ်ယွၤ အဂီၢ်န့ၣ် အိၣ်ဒံးအဃိလီၤ.

၃ ဒ်သိး ယကပာ်ဖျါထီၣ် ပှၤလၢ အတ့လီၤယၤတဂၤ အတၢ်တီတၢ်လိၤအဂီၢ်

ယကတဲဖျါထီၣ် တၢ်လၢယသ့ၣ်ညါတဖၣ် လၢအကဆူးကတ့ၤ ခဲလၢာ်ခဲဆ့လီၤ.+

၄ တၢ်လၢယကတဲတဖၣ်န့ၣ် တကမၣ် နီတစဲးဘၣ်.

တၢ်ကတိၤတဖၣ်အံၤဟဲလၢ ပှၤလၢအသ့ၣ်ညါနၢ်ပၢၢ်တၢ် လၢလၢပှဲၤပှဲၤတဂၤ+ အအိၣ်လီၤ.

၅ ကစၢ်ယွၤန့ၣ် အဂံၢ်ဆူၣ်ဘါဆူၣ်+

ဒီးအအိၣ်ဒီး တၢ်သ့ၣ်ညါနၢ်ပၢၢ်လၢ အဒိၣ်အယိာ် သနာ်က့ အတဆိကမိၣ်ဆံး ပှၤနီတဂၤဘၣ်.

၆ အဝဲတပာ်မူ ပှၤအၢပှၤသီ တဖၣ်ဘၣ်,+

ဘၣ်ဆၣ် အဝဲစံၣ်ညီၣ်န့ၢ်တၢ်လၢ ပှၤလၢ အဘၣ်တၢ်မၤနးမၤဖှီၣ်အီၤတဖၣ် အဂီၢ် တီတီလိၤလိၤလီၤ.+

၇ အဝဲကွၢ်ထွဲ ပှၤတီပှၤလိၤ ကိးဆၢကတီၢ်ဒဲးလီၤ.+

ဒီးအဝဲပာ်ထီၣ် အဝဲသ့ၣ် ဒ်စီၤပၤတဖၣ်အသိး+ ဒီးအဝဲသ့ၣ် ဘၣ်တၢ်ပာ်ထီၣ်ထီအီၤ လီၤထူလီၤယိာ်လီၤ.

၈ ပှၤတီပှၤလိၤ မ့ၢ်ဘၣ်တၢ်ဖီၣ်အီၤ ဒီးစၢဃာ်အီၤလၢ အမၤတၢ်ဒဲးဘးအဃိ

ဒီးအမ့ၢ်တူၢ်ဘၣ် တၢ်နးတၢ်ဖှီၣ် ခီဖျိလၢ အဘၣ်တၢ်ကျီၤတံၢ်ဃာ်အီၤ အဃိန့ၣ်

၉ ကစၢ်ယွၤ ကပာ်ဖျါထီၣ်န့ၢ် အဝဲသ့ၣ်လၢ အဝဲသ့ၣ် မၤကမၣ်ဘၣ်တၢ် ဒ်လဲၣ်ဒ်လဲၣ်

ဒီးအကပာ်ဖျါထီၣ်လၢ အဝဲသ့ၣ် မၤကမၣ်တၢ်လၢ တၢ်ပာ်ထီၣ်ထီသးအဃိလီၤ.

၁၀ အဝဲအိးထီၣ် အဝဲသ့ၣ်အနၢ် ဒ်သိး အဝဲသ့ၣ် ကနၢ်ဟူ တၢ်သိၣ်က့ၤသီက့ၤ

ဒီးကမၢ အဝဲသ့ၣ် ပာ်တ့ၢ်ကွံာ် အတၢ်မၤလၢ အကမၣ်လီၤ.+

၁၁ အဝဲသ့ၣ် မ့ၢ်ဒိကနၣ်အီၤ ဒီးမၤအတၢ်န့ၣ်

အဝဲသ့ၣ် ကဘီၣ်ထီၣ်ညီထီၣ်

ဒီးကအိၣ်မူဘၣ် မုာ်မုာ်ခုၣ်ခုၣ်လီၤ.+

၁၂ ဘၣ်ဆၣ် အဝဲသ့ၣ် မ့ၢ်တဒိကနၣ်တၢ်ဘၣ်န့ၣ် အဝဲသ့ၣ် ကသံလၢနး+

ဒီးအဝဲသ့ၣ် ကသံဖဲအတၢ်သ့ၣ်ညါ တအိၣ်ထီၣ်ဒံးဘၣ် အခါလီၤ.

၁၃ ပှၤလၢ အတပာ်ကဲယွၤဘၣ်န့ၣ်* ကသးဒိၣ်ထီၣ်တၢ်

ဒီးကစၢ်ယွၤ မ့ၢ်စၢဃာ် အဝဲသ့ၣ် ဘၣ်ဆၣ် အဝဲသ့ၣ် တဃ့ တၢ်မၤစၢၤဘၣ်.

၁၄ ဖဲအဝဲသ့ၣ် အိၣ်မူအခါန့ၣ် ထီဘိ အဝဲသ့ၣ် အိၣ်ဒီး ပှၤပိာ်ခွါတဖၣ်လၢ အဆါလီၤအီၣ်သး* လၢတၢ်ဘူၣ်ထီၣ်ဘါထီၣ် အလီၢ်လီၤ.+

ဒီးအဝဲသ့ၣ် ကသံဝဲဖဲ အသးစၢ် ဒံးအခါ+

၁၅ ကစၢ်ယွၤ မၤပူၤဖျဲး ပှၤလၢအဘၣ်နးဘၣ်ဖှီၣ်လၢ တၢ်နးတၢ်ဖှီၣ်အပူၤ,

ဒီးဖဲတၢ်ဆီၣ်တံၢ်မၤနၢၤအီၤအခါ ကစၢ်ယွၤ အိးထီၣ်အနၢ် ဒ်သိး အကဒိကနၣ်တၢ် အဂီၢ်လီၤ.

၁၆ ကစၢ်ယွၤ ထုးထီၣ်ကွံာ်နၤ လၢတၢ်သူၣ်ကိၢ်သးဂီၤအပူၤ+

ဒီးဒုးအိၣ်နၤလၢ တၢ်ဘံၣ်တၢ်ဘၢအလီၢ် ဖဲတၢ်သူၣ်ကိၢ်သးဂီၤ တအိၣ်ဘၣ်အလီၢ်+

ဒီးတၢ်အီၣ်တၢ်အီ လၢအဝံၣ် လၢအမၤမုာ်နသးန့ၣ် အိၣ်ဝဲလၢ နစီၢ်နီၤခိၣ်အလိၤလီၤ.+

၁၇ ဖဲတၢ်စံၣ်ညီၣ် ဘၣ်ဝဲအဆၢကတီၢ် ဒီးတၢ်စံၣ်ညီၣ်တီ ဟဲအိၣ်ထီၣ်အခါ

ပှၤအၢပှၤသီတဖၣ် ကဘၣ်တၢ်စံၣ်ညီၣ်အီၤအဃိ နကသးမံလီၤ.+

၁၈ ဘၣ်ဆၣ် ပလီၢ်နသးဒ်သိး တၢ်သးဒိၣ် သုတဆှၢနၤလၢ နကဟ့ၣ်ကၣ်တၢ် အဂီၢ်တဂ့ၤ.+

ဒီးတဘၣ်ပျဲ တၢ်ထီးကျိၣ်ထီးစ့ ဆှၢကမၣ် နကျဲတဂ့ၤ.

၁၉ နမ့ၢ်မၤဒ်န့ၣ်န့ၣ် နမ့ၢ်ဃ့တၢ်မၤစၢၤ

ဒီးနမ့ၢ်ထဲးဂံၢ်ထဲးဘါ သပှၢ်တၢၢ်နာ်က့ မ့ၢ်နကပူၤဖျဲးလၢ တၢ်ကိၢ်တၢ်ဂီၤဧါ.+

၂၀ တဘၣ်ဆၢထံၣ်ဘၣ် မုၢ်နၤဖဲ

ပှၤကလီၤမၢ် သတူၢ်ကလာ် န့ၣ်တဂ့ၤ.

၂၁ ပလီၢ်နသးဒ်သိး နသုတဃၣ်နသးဆူ တၢ်အၢတၢ်သီ အအိၣ်တဂ့ၤ.

လၢတၢ်န့ၣ်အလီၢ် ဆၢတဲာ်လီၤနသးလၢ နကဆဲးတူၢ် တၢ်ကီတၢ်ခဲတက့ၢ်.+

၂၂ ကွၢ်မီၤ, ကစၢ်ယွၤ ဘၣ်တၢ်ပာ်ထီၣ်ထီအီၤ ခီဖျိလၢ အစိအကမီၤ အဃိလီၤ.

ဒီးသရၣ်လၢ အလီၤဂာ်ဒီးအီၤန့ၣ် အိၣ်တဂၤဂၤဧါ.

၂၃ မတဂၤ ကဟံးစုနဲၣ်ကျဲအီၤ+

ဒီးမတဂၤ ကတဲအီၤလၢ တၢ်လၢအမၤဝဲန့ၣ် ကမၣ်န့ၣ်လဲၣ်.+

၂၄ ပှၤအါဂၤသးဝံၣ် စံးထီၣ်ပတြၢၤ ကစၢ်ယွၤ အတၢ်မၤတဖၣ်လီၤ.+

နၤစ့ၢ်ကီး သ့ၣ်နီၣ်ထီၣ်လၢ နကမၤ ဒ်န့ၣ်တက့ၢ်.+

၂၅ ပှၤဟီၣ်ခိၣ်ဖိခဲလၢာ် ထံၣ်ဘၣ်ဝဲ အတၢ်မၤတဖၣ်

ဒီးအဝဲသ့ၣ် ကွၢ်စိဃီၤဝဲ လၢအယံၤလီၤ.

၂၆ ကစၢ်ယွၤ အစိအကမီၤ ဒိၣ်ထဲလဲၣ်န့ၣ် ပသ့ၣ်ညါ တသ့ဘၣ်.+

ဒီးပဒွးကွၢ် အနံၣ်အလါ တဘၣ်ဘၣ်.+

၂၇ ကစၢ်ယွၤ ပာ်ဖှိၣ်ထီၣ် ထံလီၤစီၤ အဖျၢၣ်တဖၣ်,+

ဒီးတၢ်ကသွံ ပာ်ဖှိၣ်ထီၣ်အသး ဒ်မူခိၣ်ထံအသိးလီၤ.

၂၈ ဒီးတၢ်အၢၣ်တဖၣ် ဒုးစူၤလီၤ မူခိၣ်ထံတဖၣ်+

ဒီးဒုးလီၤဖှံၣ် မူခိၣ်ထံလၢ ပှၤဟီၣ်ခိၣ်ဖိ အလိၤလီၤ.

၂၉ တၢ်အၢၣ်လၢ အိၣ်ဝဲအကထြၢတဖၣ် အကထြၢအဂ့ၢ်

ဒီးလီသီၣ်ထီၣ်လၢ ကစၢ်ယွၤ အဒဲပူၤဒ်လဲၣ်အဂ့ၢ်န့ၣ် မ့ၢ်ပှၤနၢ်ပၢၢ် ကသ့တဂၤဂၤဧါ.+

၃၀ အဝဲဒုးကပီၤထီၣ် လီဝၢ်ဒံး+ လၢတၢ်အၢၣ်အဖီခိၣ် ဒ်လဲၣ်ဒ်လဲၣ်

ဒီးအဝဲမၤဘၢပီၣ်လဲၣ် အခံဒးလၢထံ ဒ်လဲၣ်ဒ်လဲၣ်န့ၣ် ကွၢ်မီၤ.

၃၁ ကစၢ်ယွၤဟ့ၣ်လီၤ ပှၤဟီၣ်ခိၣ်ဖိ တၢ်သ့ၣ်တဖၣ်န့ၣ် ဒ်သိးအဝဲသ့ၣ် ဆဲးအိၣ်မူကသ့အဂီၢ်

ဒီးဟ့ၣ်အဝဲသ့ၣ် တၢ်အီၣ် အါအါဂီၢ်ဂီၢ်လီၤ.+

၃၂ အဝဲဖီၣ်ဃာ် လီဝၢ်ဒံး လၢအစုပူၤ

ဒီးအဝဲမၤလိာ်ဝဲလီ ဒ်သိး အကဖျးတၢ်ဖဲ အအဲၣ်ဒိး လၢအကဖျးဝဲ အလီၢ်လီၤ.+

၃၃ အလီသီၣ် ပာ်ဖျါထီၣ်ဝဲအဂ့ၢ်

ဒီးဆၣ်ဖိကီၢ်ဖိတဖၣ် အတၢ်ဟူးတၢ်ဂဲၤန့ၣ် ပာ်ဖျါထီၣ်ဝဲလၢ မတဂၤ ကဟဲဝဲလဲၣ်န့ၣ်လီၤ.

၃၇ “ဖဲယဆိကမိၣ်ထီၣ် တၢ်ဂ့ၢ်အဝဲန့ၣ်အခါ ယသးကနိး

ဒီးယသးဖု* ချ့မးလီၤ.

၂ ကစၢ်ယွၤအကလုၢ်လၢ အသီၣ်သထြုးထီၣ်န့ၣ် ဒိကနၣ်အီၤ လီၤတံၢ်လီၤဆဲး

ဒီးဒိကနၣ်အကလုၢ်လၢ အသီၣ် လီၤဂာ်ဒ် လီသီၣ်အသိးတက့ၢ်.

၃ အဝဲဒုးသီၣ်ထီၣ် လီလၢ မူကပိာ်လိၤ

ဒီးဆှၢလီၤဝဲ လီဝၢ်ဒံး+ တုၤလၢ ဟီၣ်ခိၣ်အနၢၣ် အကတၢၢ်လီၤ.

၄ ဖဲလီဝၢ်ဒံး ကပီၤထီၣ် ဝံၤအခါ တၢ်ကလုၢ် သီၣ်ထီၣ်ဝဲလီၤ.

ကစၢ်ယွၤ အကလုၢ်န့ၣ် လီၤဂာ်ဒ် လီသီၣ်အသိး+

ဒီးဖဲအဝဲ တဲတၢ်အခါ လီဝၢ်ဒံး ဆဲးကပီၤထီၣ်ဝဲလီၤ.

၅ ကစၢ်ယွၤ အကလုၢ်လၢ အလီၤဂာ်ဒ်သိးဒီး လီသီၣ်န့ၣ်+

အမ့ၢ်တၢ်လၢ အလီၤကမၢကမၣ် ဒီးအဝဲ မၤတၢ်လၢ အဒိၣ်အမုၢ်လၢ ပနၢ်ပၢၢ်တသ့ဘၣ်တဖၣ်လီၤ.+

၆ အဝဲဟ့ၣ်လီၤတၢ်ကလုၢ်လၢ မူခိၣ်ဖီ ကလီၤလၢ ဟီၣ်ခိၣ်လိၤ+

ဒီးအဝဲတဲဘၣ် မူခိၣ်ထံလၢ ကစူၤလီၤဝဲ ဖးဒိၣ်လီၤ.+

၇ ဒ်သိး ပှၤဟီၣ်ခိၣ်ဖိ ကသ့ၣ်ညါ ကစၢ်ယွၤ အတၢ်ဖံးတၢ်မၤအဂီၢ်

ကစၢ်ယွၤ မၤပတုာ်ကွံာ် ပှၤဟီၣ်ခိၣ်ဖိခဲလၢာ် အတၢ်ဖံးတၢ်မၤလီၤ.

၈ ဆၣ်ဖိကီၢ်ဖိအဒူ က့ၤနုာ်ဝဲလၢ လ့ကအိပူၤ

ဒီးအိၣ်ဝဲလၢ တၢ်အိၣ်တဒၢ အလီၢ်လီၤ.

၉ ကလံၤန့ၣ် ဟဲအူထီၣ်ဆူၣ်ဆူၣ်လၢ အအိၣ်ပာ်စၢၤအလီၢ်+

ဒီးကလံၤစိးအကလံၤ ဟဲစိာ်ဝဲ တၢ်ချံၣ်လီၤ.+

၁၀ ထံချံၣ်ကိၣ်လိၣ် ဟဲကဲထီၣ်ဝဲ+ ခီဖျိလၢ ကစၢ်ယွၤ အတၢ်ကသါအဃိ

ဒီးထံတဖၣ် လီၤသကၤဝဲလီၤ.+

၁၁ မ့ၢ်လံ ကစၢ်ယွၤ မၤဃၢထီၣ် တၢ်အၢၣ်တဖၣ် ဒီးထံသဝံလီၤ.

ဒီးအဝဲ မၤကပီၤထီၣ် လီဝၢ်ဒံးလၢ+ တၢ်အၢၣ်ကျါလီၤ.

၁၂ တၢ်အၢၣ်တဖၣ် ဟးတရံးဝဲဒ် ကစၢ်ယွၤ မၢအီၤအသိး

ဒီးမၤဝဲတၢ်ကိးမံၤဒဲး ဒ်ကစၢ်ယွၤ မၤလိာ်ဝဲအသိးလၢ+ ဟီၣ်ခိၣ် ဒီဘ့ၣ်ညါန့ၣ်လီၤ.

၁၃ အဝဲသူဝဲတၢ်အၢၣ် ဒ်သိး ကစံၣ်ညီၣ်တၢ်,+ ကဒုးစူၤလီၤတၢ် လၢ ဟီၣ်ခိၣ်လိၤ

ဒီးကပာ်ဖျါထီၣ် အတၢ်အဲၣ်လၢအတီ အဂီၢ်လီၤ.+

၁၄ ကနၣ်လၢအံၤ စီၤယိၤဘးဧၢ,

အိၣ်ဘှ့ၣ် ဒီးဆိကမိၣ်ထံ ကစၢ်ယွၤ အတၢ်မၤလၢ အလီၤလိၢ်လီၤလးတဖၣ် ထံထံဆးဆးတက့ၢ်.+

၁၅ ကစၢ်ယွၤ ပၢၤဃာ်တၢ်အၢၣ် ဒ်လဲၣ်ဒ်လဲၣ်

ဒီးအဝဲ ဒုးကပီၤထီၣ် လီဝၢ်ဒံးလၢ တၢ်အၢၣ်အကျါ ဒ်လဲၣ်ဒ်လဲၣ်န့ၣ် မ့ၢ်နသ့ၣ်ညါဧါ.

၁၆ တၢ်အၢၣ်တဖၣ် ဒံလၢတၢ်ဖးဖီ ဒ်လဲၣ် ဒ်လဲၣ်န့ၣ် မ့ၢ်နသ့ၣ်ညါဧါ.+

အဝဲန့ၣ်မ့ၢ်ဝဲ ပှၤလၢအသ့ၣ်ညါနၢ်ပၢၢ်တၢ် လၢလၢပှဲၤပှဲၤတဂၤ အတၢ်မၤလၢ အလီၤလိၢ်လီၤလးတဖၣ်လီၤ.+

၁၇ ဖဲကလံၤလၢ ကလံၤထံးတခီ အူဝဲအခါ ဟီၣ်ခိၣ်န့ၣ် အိၣ်ဝဲဂၢၢ်တပၢၢ် ဘၣ်ဆၣ်

မ့မ့ၢ်နတၢ်ကူတၢ်ကၤန့ၣ် ဘၣ်မနုၤအဃိ အကိၢ်ထီၣ်ဝဲလဲၣ်.+

၁၈ အဝဲသလၣ်ထီၣ်မူခိၣ်+ ဒ်ထးလၢအကျၢၤ* လၢပှၤထူးဘျ့ကတြ့ၣ်ထီၣ်အီၤအသိးလီၤ.

မ့ၢ်နမၤ ဒ်သိးဒီးအီၤသ့ဧါ.

၁၉ တၢ်လၢပတသ့ၣ်ညါဘၣ်န့ၣ် အိၣ်ဒီဒူၣ်အဃိ ပစံးဆၢအီၤ တဘၣ်ဘၣ်.

ပကဘၣ်တဲအီၤ တၢ်မနုၤလဲၣ်န့ၣ် တဲဘၣ်ပှၤသၢၤ.

၂၀ မ့ၢ်ယကြၢးတဲအီၤလၢ ယကဘၣ်တဲအီၤ တၢ်တမံၤမံၤ လၢအကြၢး သ့ၣ်ညါဝဲန့ၣ်ဧါ.

ဒီးမ့ၢ်ပှၤကဘၣ်တဲအီၤ တၢ်ဂ့ၢ်လၢအရ့ဒိၣ်တမံၤမံၤန့ၣ် အိၣ်တဂၤဂၤဧါ.+

၂၁ တၢ်ကပီၤမ့ၢ် ကပြုၢ်ကပြီၤထီၣ်လၢ မူကပိာ်လိၤဒၣ်လဲာ်

တချုးလၢ ကလံၤဟဲအူပျီကွံာ် တၢ်အၢၣ်ဒံးဘၣ်န့ၣ်

ပှၤတထံၣ်ဝဲဘၣ်.

၂၂ လၢကလံၤစိးတခီန့ၣ် တၢ်ကပီၤလၢ အလီၤဂာ်ဒ် ထူအသိးန့ၣ် ကပြုၢ်ထီၣ်ဝဲလီၤ.

ကစၢ်ယွၤ အတၢ်ကဟုကညီၢ်န့ၣ်+ လီၤကမၢကမၣ် ဒိၣ်မးလီၤ.

၂၃ သ့တၢ်လၢာ်ကစၢ်တဂၤ အဂ့ၢ်န့ၣ် ပနၢ်ပၢၢ်တလၢာ်ဘၣ်.+

အဝဲအိၣ်ဒီး တၢ်စိတၢ်ကမီၤအါမး+

ဒီးအတမၤတၢ်လၢ အထီဒါလိာ်အသးဒီး အတၢ်စံၣ်ညီၣ်တီ+ ဒီးအတၢ်တီတၢ်လိၤ နီတဘျီဘၣ်.+

၂၄ အဃိ ပှၤကဘၣ် ပျံၤအီၤလီၤ.+

အဝဲ တဘၣ်သူၣ်ဘၣ်သး ပှၤလၢ အဆိကမိၣ်လီၤအသး လၢ အကူၣ်တၢ်သ့န့ၣ်ဘၣ်.”+

၃၈ ယဟိဝၤယွၤ တဲဆၢဝဲ စီၤယိၤဘး လၢကလံၤမုၢ်အကျါ+ ဒီးတဲဝဲလၢ

၂ “နဒုးအိၣ်ထီၣ် တၢ်သးဒ့ဒီ ဘၣ်ဃးဒီး ယတၢ်ရဲၣ်တၢ်ကျဲၤတဖၣ်

ဒီးနတဲတၢ် ဘၣ်ဃးဒီး တၢ်လၢ နတသ့ၣ်ညါဘၣ်တဖၣ်န့ၣ် မ့ၢ်အကြၢးဧါ.+

၃ ဝံသးစူၤ ပာ်ဆူၣ်နသး ဒ်ပှၤပိာ်ခွါတဂၤအသိး

ဒီးယကသံကွၢ်နၤ ဝံၤဒီး တဲနၢ်ပၢၢ်ယၤတက့ၢ်.

၄ ဖဲယတ့လီၤဟီၣ်ခိၣ်အခါ နအိၣ်ဖဲလဲၣ်.+

နမ့ၢ်ဆိကမိၣ်လၢ နနၢ်ပၢၢ် တၢ်ဂ့ၢ်တခါအံၤန့ၣ် တဲဘၣ်ယၤတက့ၢ်.

၅ ဟီၣ်ခိၣ်ကဘၣ် ဒိၣ်ဝဲထဲလဲၣ်န့ၣ် မတဂၤပာ်ပနီၣ်ဝဲလဲၣ်.

ဒီးမတဂၤထိၣ်ဟီၣ်ခိၣ်လၢ တၢ်ထိၣ်ပျံၤလဲၣ်. နမ့ၢ်သ့ၣ်ညါန့ၣ် တဲယၤတက့ၢ်.

၆ ဟီၣ်ခိၣ်အထူၣ်တဖၣ်န့ၣ် ဘၣ်တၢ်ဆီလီၤအီၤလၢ မနုၤအဖီခိၣ်လဲၣ်.

မတဂၤ ပာ်လီၤ ဟီၣ်ခိၣ်အလၢၢ်သနၢၣ်ထံး တဖျၢၣ်လဲၣ်.+

၇ ဖဲန့ၣ်အခါ ဆၣ်တူၢ်ဂီၤတဖၣ်+ ကိးပသူထီၣ်တပူၤဃီ လၢတၢ်သးခုအပူၤ

ဒီးကစၢ်ယွၤ အဖိခွါတဖၣ်ခဲလၢာ်*+ ကိးသတြီထီၣ်လီၤ.

၈ ဒီးဖဲပီၣ်လဲၣ်အထံ ဖျိးထီၣ်ဝဲ လီၤဂာ်ဒ် အဟးထီၣ်ဝဲလၢ ပှၤဒၢလီၢ်အပူၤအသိး အခါ

မတဂၤ ပံးတြဲၤတဖၣ် ဒ်သိး ကဒူၣ်ဃာ် ပီၣ်လဲၣ်အထံ အဂီၢ်လဲၣ်.+

၉ ဖဲန့ၣ်အခါန့ၣ် ယဒုးကူဒုးသိးထီၣ် ပီၣ်လဲၣ် လၢတၢ်အၢၣ်

ဒီးယဘိၣ်ဘံအီၤလၢ တၢ်ခံးသူ,

၁၀ ဒီးယပာ်ပနီၣ် ပီၣ်လဲၣ်အဆၢ

ဒီးဆီလီၤတ့ၢ်အတြဲၤ ဒီးအနီၣ်ဘိတဖၣ် လၢအလီၢ်,+

၁၁ ဒီးယတဲလၢ ‘နကဘၣ်အိၣ် တုၤ ဖဲန့ၣ်လီၤ, နလဲၤယံၤန့ၢ်အန့ၣ် တသ့ဘၣ်,

ဒီးနလပီလၢ အဒိၣ်ဝဲထီဝဲတဖၣ်န့ၣ် ကဘၣ်ပတုာ်ဝဲ ဖဲန့ၣ်လီၤ.’+

၁၂ မ့ၢ်နမၤလိာ်လၢ မုၢ်ကဆ့ၣ်ဝါထီၣ်

မ့တမ့ၢ် ဒုးနဲၣ်မုၢ်ဆ့ၣ်ဝါလၢ အကဘၣ် ကပီၤထီၣ်လၢ တၢ်လီၢ်ဖဲလဲၣ်န့ၣ် အိၣ်တဘျီဘျီဧါ.+

၁၃ ပှၤလၢအတဲဘၣ် မုၢ်ဆ့ၣ်ဝါထီၣ်လၢ အကဘၣ် ဖီၣ်တံၢ်ဟီၣ်ခိၣ်အနၢၣ်တဖၣ်

ဒီးတရုၤလီၤက့ၤ ပှၤအၢပှၤသီတဖၣ်လၢ အအိၣ်လၢအပူၤန့ၣ် မ့ၢ်အကဲနၤဧါ.+

၁၄ ဖဲမုၢ်အတၢ်ကပီၤ ဆဲးလီၤဘၣ်ဝဲ ဟီၣ်ခိၣ်အခါ လီၤဂာ်ဒ်သိးဒီး တၢ်စဲပနီၣ်တၢ်တခါလၢ ကပံာ်အလိၤအသိး

ဒီးဟီၣ်ခိၣ်န့ၣ် ဖျါဝဲဒ်သိးဒီး တၢ်ကူတၢ်သိးလၢ အဃံအလၤတဘ့ၣ်လီၤ.

၁၅ ပှၤအၢပှၤသီ အတၢ်ကပီၤအံၤ ဘၣ်တၢ်ထုးကွံာ်အီၤ

ဒီးအဝဲသ့ၣ် အစုလၢ အယူာ်ထီၣ်ဝဲန့ၣ် ကၢ်ကွံာ်ဝဲလီၤ.

၁၆ မ့ၢ်နလဲၤလီၤဘၣ်လၢ ပီၣ်လဲၣ်အထံထီၣ်ပၢၢ် လၢပီၣ်လဲၣ်အခံဒး အအိၣ် တဘျီဘျီဧါ.

မ့ၢ်နဃုသ့ၣ်ညါတၢ်လၢ ပီၣ်လဲၣ်အထံယိာ်ကျါ တဘျီဘျီဧါ.+

၁၇ တၢ်သံအတြဲၤတဖၣ်န့ၣ်+ ဘၣ်တၢ်လီၣ်ဖျါထီၣ်န့ၢ်နၤ တဘျီဘျီဧါ.

မ့ၢ်နထံၣ်ဘၣ် တၢ်ခံးယိာ်* အတြဲၤတဖၣ် တဘျီဘျီဧါ.+

၁၈ ဟီၣ်ခိၣ်အဒိၣ်အလဲၢ် အိၣ်ထဲလဲၣ်န့ၣ် မ့ၢ်နသ့ၣ်ညါဧါ.+

နမ့ၢ်သ့ၣ်ညါ တၢ်သ့ၣ်တဖၣ်န့ၣ် ခဲလၢာ်န့ၣ် တဲဘၣ်ယၤတက့ၢ်.

၁၉ တၢ်ကပီၤန့ၣ် အိၣ်လၢ တၢ်လီၢ်ဖဲလဲၣ် တကပၤလဲၣ်,+

ဒီးတၢ်ခံးန့ၣ် အိၣ်လၢ တၢ်လီၢ်ဖဲလဲၣ်.

၂၀ နက့ၤဆှၢအီၤလၢ အအိၣ်တၢ်လီၢ်ဘၣ်ဧါ.

မ့ၢ်နသ့ၣ်ညါ အဟံၣ်အကျဲဧါ.

၂၁ ဖဲယတ့လီၤ တၢ်သ့ၣ်တဖၣ်န့ၣ်အခါ မ့ၢ်နအိၣ်ဖျဲၣ်ထီၣ်လံဧါ.

မ့ၢ်နသးနံၣ် အိၣ်အါထဲန့ၣ်ညါဧါ.

၂၂ မ့ၢ်နလဲၤနုာ်ဘၣ်လၢ တၢ်ပာ်ဖှိၣ်မူခိၣ်ဖီ အလီၢ်တဖၣ် တဘျီဘျီဧါ.+

မ့ၢ်နထံၣ်ဘၣ် တၢ်ပာ်ဖှိၣ် သူၣ်အလီၢ်တဖၣ် တဘျီဘျီဧါ.+

၂၃ ယပာ်ဃာ် တၢ်သ့ၣ်တဖၣ်န့ၣ် လၢ တၢ်နးတၢ်ဖှီၣ် အဆၢကတီၢ်

ဒီးလၢတၢ်ဒုးအမုၢ်နံၤအဂီၢ်လီၤ.+

၂၄ တၢ်ကပီၤ ဟဲဖးဒ့ထီၣ်အသး လၢကျဲ ဖဲလဲၣ်တဘိလဲၣ်.

ဒီးမုၢ်ထီၣ်အကလံၤလၢ အအူဝဲလၢ ဟီၣ်ခိၣ်လိၤန့ၣ် အအိၣ်ဟဲလၢ တၢ်လီၢ်ဖဲလဲၣ်.+

၂၅ မတဂၤ အိးဟိထီၣ်ကျဲလၢ မူကပိာ်လိၤ ဒ်သိး တၢ်စူၤထံ ကလီၤအါအါအဂီၢ်လဲၣ်.

ဒီးမတဂၤ ဒုးအိၣ်ထီၣ်ကျဲလၢ တၢ်အၢၣ်ခံးသူ ဒီးလီဖျးတၢ် အဂီၢ်လဲၣ်.+

၂၆ မတဂၤ ဒုးစူၤလီၤ မူခိၣ်လၢ ပှၤတအိၣ် နီတဂၤဘၣ်အလီၢ်

ဒီးလၢပှၢ်မုၢ်ကနၢလၢ ပှၤတအိၣ် နီတဂၤဘၣ် အလီၢ်န့ၣ်လဲၣ်.+

၂၇ မတဂၤ မၤဘၣ်စီၣ် ပှၢ်မုၢ်ကနၢ လၢ အဃ့ထီ

ဒီးဒုးမဲထီၣ်နီၣ် ဖဲန့ၣ်လဲၣ်.+

၂၈ တၢ်စူၤထံန့ၣ် အပၢ်အိၣ်ဧါ.+

မ့ၢ်မတဂၤ ထီၣ်ဖိပစီၤထံလဲၣ်.+

၂၉ ထံချံၣ်ကိၣ်လိၣ်န့ၣ် ဟးထီၣ်လၢ မတဂၤ အဒၢလီၢ်ပူၤလဲၣ်.

ဒီးပစီၤထံလီၤသကၤန့ၣ်* မတဂၤ အိၣ်ဖျဲၣ်ထီၣ်အီၤလဲၣ်.+

၃၀ မ့ၢ်မတဂၤ မၤလီၤသကၤ ထံယိာ်အမဲာ်ဖံးခိၣ်

ဒီးဒုးကိၤထီၣ်အီၤ ဒ်လၢၢ် အသိးလဲၣ်.+

၃၁ နစၢထီၣ် ဆၣ်ဒၢမုၢ်ကရူၢ် အပျံၤတဖၣ်သ့ဧါ,

ဒီးနဃဲၣ်လီၤကွံာ် ဆၣ်ယိးမါကရူၢ်+ အပျံၤတဖၣ်သ့ဧါ.

၃၂ နဒုးဟဲထီၣ် ဆၣ်ကရူၢ်တဖၣ်လၢ အဆၢကတီၢ်ဒၣ်ဝဲသ့ဧါ.

နဟံးစုနဲၣ်ကျဲ ဆၣ်ကဆီအကရူၢ် ဒီးအဖိတဖၣ် သ့ဧါ.

၃၃ တၢ်သိၣ်တၢ်သီတဖၣ်လၢ အပၢဆှၢ မူဖျၢၣ်တဖၣ်န့ၣ်* မ့ၢ်နသ့ၣ်ညါဧါ.+

ဒ်သိး တၢ်သိၣ်တၢ်သီတဖၣ်အံၤ ကဘၣ်ထွဲဒီး ဟီၣ်ခိၣ်အဂီၢ်န့ၣ် နမၤဘၣ်ဧါ.

၃၄ မ့ၢ်နမၢတၢ်အၢၣ်

ဒ်သိး တၢ်ကစူၤလီၤဖးဒိၣ် လၢ နလိၤသ့ဧါ.+

၃၅ မ့ၢ်နမၢလီၤ လီဝၢ်ဒံးကသ့ဧါ.

မ့ၢ်လီဝၢ်ဒံး ကဟဲက့ၤ တဲနၤလၢ ‘ပအိၣ်လၢအံၤ’ န့ၣ်ဧါ.

၃၆ မတဂၤ ပာ်လီၤတၢ်ကူၣ်သ့လၢ တၢ်အၢၣ်တဖၣ် အကျါလဲၣ်.+

ဒီးမတဂၤ ဟ့ၣ်လီၤ မူကပိာ်လိၤလၢ တၢ်သ့ၣ်ညါနၢ်ပၢၢ်လဲၣ်.+

၃၇ မတဂၤ အိၣ်ဒီးတၢ်ကူၣ်သ့ တုၤလၢ အဂံၢ်ကွၢ်တၢ်အၢၣ်တဖၣ် သ့လဲၣ်.

ဒီးမတဂၤ လူလီၤမူခိၣ်အထံဒၢတဖၣ် သ့လဲၣ်.+

၃၈ မတဂၤ မၤကဲထီၣ် ဟီၣ်ခိၣ်ကမူၣ် လၢကပံာ်

ဒီးမၤဘုးတာ်ဝဲ* ဟီၣ်ခိၣ်ကိၣ်လိၣ်တဖၣ် န့ၢ်လဲၣ်.

၃၉ နဃုန့ၢ်တၢ်အီၣ် လၢခ့ယုၢ်အဂီၢ်သ့ဧါ.

ဒီးနဒုးအီၣ် ခ့ယုၢ်ဖိတဖၣ်တၢ်အီၣ် တုၤလၢအအီၣ်ဝဲဘျဲ သ့ဧါ.+

၄၀ ဖဲအဝဲသ့ၣ် မံနီၤခိးတၢ်လၢ တၢ်သဒၢအလီၢ်

မ့တမ့ၢ် ဖဲအဝဲသ့ၣ် အိၣ်ခိးခူသူၣ်တၢ်လၢ လ့ကအိပူၤအခါ နဒုးအီၣ်ဒုးအီ အဝဲသ့ၣ်သ့ဧါ.

၄၁ ဖဲစိးဝၣ်ဃးဖိတဖၣ် ဟးယဲၤယီၤအသး ခီဖျိလၢ အတၢ်အီၣ် တအိၣ်ဘၣ်အဃိ

ဒီးဃ့တၢ်မၤစၢၤ လၢကစၢ်ယွၤ အအိၣ်အခါ

မတဂၤ ကတဲာ်ကတီၤန့ၢ် အဝဲသ့ၣ် အမိၢ်အပၢ်တၢ်အီၣ် ဒ်သိး ကဟ့ၣ်ဒုးအီၣ်က့ၤ အဝဲသ့ၣ် အဂီၢ်လဲၣ်.+

၃၉ “မဲာ်တဲးလဲးမံၤတဖၣ် ဖှံလီၤအဖိလၢ အခါဖဲလဲၣ်န့ၣ် မ့ၢ်နသ့ၣ်ညါစ့ၢ်ကီးဧါ.+

ဒီးဖဲတၤဟိဖှံလီၤအဖိအခါ မ့ၢ်နခိးကွၢ်အီၤ တဘျီဘျီဧါ.+

၂ အဝဲသ့ၣ် ကဘၣ်ဒၢဝဲ ပှဲၤလါလဲၣ်န့ၣ် မ့ၢ်နဂံၢ်အီၤဧါ.

ဒီးအဝဲသ့ၣ် ကဖှံလီၤအဖိလၢ ဆၢကတီၢ်ဖဲလဲၣ်န့ၣ် မ့ၢ်နသ့ၣ်ညါ စ့ၢ်ကီးဧါ.

၃ ဖဲအဝဲသ့ၣ် ကိာ်လီၤ ဒီးဖှံလီၤအဖိ ဝံၤအခါ

အဟၢဖၢဆါ လီၤမၢ်ကွံာ်ဝဲလီၤ.

၄ အဝဲသ့ၣ် အဖိတဖၣ် ဒိၣ်ထီၣ်လၢ ပှၢ်လၢ်ကျါ ဒီးအဂံၢ်ဆူၣ်ထီၣ်ဝဲ

ဒီးဟးထီၣ်ဝဲလၢအယံၤ ဒီးတဟဲက့ၤလၢ အဝဲသ့ၣ် အအိၣ်လၢၤဘၣ်.

၅ မတဂၤ ပျၢ်လီၤကွံာ် ကသ့ၣ်ယီၤမံၤလဲၣ်.+

ဒီးမတဂၤ ဃဲၣ်လီၤကွံာ် ကသ့ၣ်ယီၤမံၤ အပျံၤလဲၣ်.

၆ ယဒုးကဲထီၣ် ပှၢ်မုၢ်ကနၢလၢ အဝဲသ့ၣ်အတၢ်အိၣ်တၢ်ဆိးအလီၢ်

ဒီးအဝဲသ့ၣ် အိၣ်ဝဲလၢ တၢ်လီၢ်လၢအအိၣ်ဒီး အံသၣ်လီၤ.

၇ ကသ့ၣ်ယီၤမံၤန့ၣ် အိၣ်ယံၤဒီး ဝ့ၢ်အတၢ်သီၣ်တၢ်သဲ

ဒီးဖဲန့ၣ်န့ၣ် အတနၢ်ဟူဘၣ် ပှၤကိးဃါအီၤလၢ ပှၤကမၢအီၣ်အီၤအဂီၢ် နီတဂၤဘၣ်.

၈ ဒီးအလဲၤဃုအီၣ်အဆၣ်လၢ တၢ်လူၢ်တၢ်တြီၤတဖၣ်အလိၤ

ဒီးဟးဃုဝဲ တၢ်မုၢ်တၢ်ဘိလၢ အလါဟ့ ကိးမံၤဒဲးလီၤ.

၉ ကျီၢ်ဖါမံၤန့ၣ် နမၢအီၣ်အီၤ ကန့ၢ်ဧါ.+

ဖဲမုၢ်နၤခီန့ၣ် မ့ၢ်အကမံလၢ နကျီၢ်ကရၢအပူၤဧါ.

၁၀ မ့ၢ်နစၢဃာ် ကျီၢ်ဖါမံၤလၢပျံၤ ဒ်သိးကထဲၣ်တၢ်* အဂီၢ် ကန့ၢ်ဧါ.

ဖဲနထဲၣ်တၢ်လၢ တၢ်တြီၤပူၤအခါ မ့ၢ်အကဟးပိာ်နခံဧါ.

၁၁ မ့ၢ်လၢ ကျီၢ်ဖါမံၤ အဂံၢ်ဆူၣ်ဘါဆူၣ်အဃိ

နမၢအမၤန့ၢ်နၤ တၢ်ဖံးတၢ်မၤလၢ အဃၢ ဘူၣ်ဧါ.

၁၂ နမုၢ်လၢ်လၢ ကျီၢ်ဖါမံၤ ကဟဲက့ၤစိာ်န့ၢ်နၤဘုလၢ နကူးအီၤတဖၣ်

ဒီးကပာ်ဖှိၣ်ဝဲလၢ နကြဲၢ်ပူၤန့ၣ် ကသ့ဧါ.

၁၃ ထိၣ်ကီၤလၤအူး မ့ၢ်တပျုာ်ဝဲ အဒံးဆ့လၢ တၢ်သးခုအပူၤ

ဘၣ်ဆၣ် မ့ၢ်ပှၤထိၣ်သတြီၤအဒံးဆ့ ဒီးထိၣ်ထီကိာ် အဒံးဆ့ ကသ့ဧါ.+

၁၄ အဝဲ ပာ်တ့ၢ်အဒံၣ်လၢ ဟီၣ်ခိၣ်လိၤ

ဒီးမၤကလၢၤထီၣ်ဝဲလၢ မဲးကျါလီၤ.

၁၅ ဒီးတဘၣ်ယိၣ်ဝဲလၢ ပှၤကယီၢ်သဘှံးဘၣ်ဖုး အဒံၣ်ဘၣ်,

ဒီးတဘၣ်ယိၣ်ဝဲလၢ ဆၣ်ဖိကီၢ်ဖိ အမံၤ ကယီၢ်ဘၣ် အဒံၣ်ဘၣ်.

၁၆ အရ့ဒီးအဖိတဖၣ် ဆူၣ်ဆူၣ်ကိၤကိၤ ဒ်အတမ့ၢ် အဖိဘၣ်အသိးလီၤ.+

ဒီးအတဘၣ်ယိၣ် စ့ၢ်ကီးလၢ အတၢ်မၤတဖၣ် ကကဲထီၣ် တၢ်ကလီကလီဘၣ်,

၁၇ မ့ၢ်လၢ ကစၢ်ယွၤ တဟ့ၣ်အီၤ တၢ်ကူၣ်သ့ဘၣ်

ဒီးတဟ့ၣ်လီၤအီၤ တၢ်သ့ၣ်ညါနၢ်ပၢၢ် နီတစဲးဘၣ်အဃိလီၤ.

၁၈ ဖဲအဆၢထၢၣ်တပျုာ် အဒံးဆ့အခါ

အနံၤဘၣ်ဝဲ ကသ့ၣ် ဒီးပှၤဒိးကသ့ၣ် ဖိလီၤ.

၁၉ မ့ၢ်နဟ့ၣ်လီၤ ကသ့ၣ်တဖၣ် တၢ်ဂံၢ်တၢ်ဘါဧါ+

ဒီးမ့ၢ်နဒုးသိးထီၣ် အကိာ်ဘိလၢ အဆူၣ်ကဖူၣ်ဧါ.

၂၀ ဒီးနဒုးဖု* အီၤ ဒ်သိးဒီးဒွဲၣ်န့ၣ် သ့ဧါ.

ကသ့ၣ် သါသဖှိထီၣ်ဖးဒိၣ်န့ၣ် လီၤပျံၤလီၤဖုး ဒိၣ်မးလီၤ.+

၂၁ ကသ့ၣ်အခီၣ်မ့ၣ်န့ၣ် ဝာ်တၢ်လၢဟီၣ်ခိၣ်လိၤ ဖဲတၢ်တြီၤပူၤ ဒီးဖုဝဲပှဲၤဒီး တၢ်ဂံၢ်တၢ်ဘါ+

ဒီးလဲၤသဖှိလၢ တၢ်ဒုးပျီပူၤလီၤ.+

၂၂ အတပျံၤတၢ်နီတမံၤဘၣ် ဒီးနံၤဘၣ် တၢ်လၢအလီၤပျံၤလီၤဖုး တဖၣ်လီၤ.+

ဒီးအတဃၣ်က့ၤအသးလၢ နးအဃိဘၣ်.

၂၃ ဒီးပှၤဒိးကသ့ၣ်ဖိ အပျၢ်ပီၤန့ၣ် ဘၣ်ထံးဝဲ ကသ့ၣ်အကပၤ

ဒီးအဘီန့ၣ် ကပြုၢ်ကပြီၤဝဲလီၤ.

၂၄ ဖဲကသ့ၣ်နၢ်ဟူ ကွဲၤသီၣ်ထီၣ်အခါ

အအိၣ်ခိးတၢ် တချုးလၢၤဘၣ်, အကနိးဝဲလၢ တၢ်သူၣ်ပိၢ်သးဝး အပူၤ ဒီးဃ့ၢ်သဖှိဝဲလီၤ.

၂၅ ဖဲကွဲၤသီၣ်ထီၣ်အခါ အမၤသီၣ်ထီၣ် အကလုၢ် ‘ဟဲး, ဟဲး’

ဒီးအနၢဘၣ်ဝဲ တၢ်ဒုးအစိလၢအယံၤ

ဒီးနၢ်ဟူဘၣ်ဝဲ သုးခိၣ်သုးနၢ် အတၢ်ကိးပသူထီၣ် ဒီးတၢ်ဒုးတၢ်ယၤ အကလုၢ်လီၤ.+

၂၆ မ့ၢ်နဟ့ၣ်လံာ်လ့ တၢ်နၢ်ပၢၢ်

ဒ်သိး အကလဲၤယူၤလၢ ကလံၤထံးန့ၣ်ဧါ.

၂၇ ဒီးမ့ၢ်နဟ့ၣ်လီၤ တၢ်ကလုၢ်လၢ လံာ်ကြီကြာ်န့ၣ် ကဘၣ်ယူၤလၢ တၢ်ဖးဖီ+

ဒီးကဘၣ် တ့ထီၣ်အသွံလၢ တၢ်ဖးဖီန့ၣ်ဧါ.+

၂၈ ဖဲမုၢ်နၤခီန့ၣ် အမံဝဲလၢ လ့အဖီခိၣ်

ဒီးအိၣ်ဆိးဝဲလၢ အတၢ်အိၣ်တၢ်ဆိးအလီၢ် လၢလၢၢ် အဖီခိၣ်လီၤ.

၂၉ ဖဲန့ၣ်န့ၣ် အကွၢ်စိလီၤတၢ် ဒ်သိး ကဃုအီၣ်အဆၣ်+

ဒီးအမဲာ်ချံန့ၣ် ထံၣ်စိတၢ်လၢ အယံၤလီၤ.

၃၀ အဝဲသ့ၣ် အဖိတဖၣ်န့ၣ် ဆူးအီၣ်တၢ်သွံၣ်

ဒီးဖဲတၢ်သံစိၣ် အိၣ်ဝဲအလီၢ်န့ၣ် အဝဲသ့ၣ် အိၣ်ဝဲလီၤ.”+

၄၀ ယဟိဝၤယွၤ ဆဲးတဲ စီၤယိၤဘးလၢ

၂ “ပှၤလၢအဃုတၢ်ကမၣ်န့ၣ် မ့ၢ်အကြၢးတဲအါတၢ်ဒီး သ့တၢ်လၢာ်ကစၢ်ဧါ.+

မ်ပှၤတဂၤလၢ အအဲၣ်ဒိးသိၣ်ဃီၣ် ကစၢ်ယွၤန့ၣ် စံးဆၢတၢ်တက့ၢ်.”+

၃ ဒီးစီၤယိၤဘး တဲဆၢ ယဟိဝၤယွၤလၢ

၄ “ယတမ့ၢ် တၢ်နီတမံၤဘၣ်.+

ယစံးဆၢနၤ ကဘၣ်ဒ်လဲၣ်.

အဃိ ယကအိၣ်ဘှ့ၣ်လီၤ.+

၅ ယတဲတၢ်ဝံၤ တဘျီခံဘျီလံ မ့မ့ၢ် ခဲအံၤန့ၣ် ယတတဲလၢၤဘၣ်

ဒီးယတတဲအါထီၣ် တၢ် နီတမံၤလၢၤဘၣ်.”

၆ ယဟိဝၤယွၤ တဲဆၢဝဲ စီၤယိၤဘး လၢကလံၤမုၢ်အကျါ+ ဒီးတဲဝဲလၢ

၇ “ဝံသးစူၤ ပာ်ဆူၣ်နသး ဒ်ပှၤပိာ်ခွါတဂၤအသိး

ဒီးယကသံကွၢ်နၤ ဝံၤဒီး တဲနၢ်ပၢၢ်ယၤတက့ၢ်.+

၈ မ့ၢ်နတဲလၢ ယမၤတၢ် တတီဘၣ်ဟီဧါ.

မ့ၢ်နပာ်ဒ့ၣ်ပာ်ကမၣ်ယၤ ဒ်သိး နကဖျါတီဖျါလိၤ အဂီၢ်ဧါ.+

၉ မ့ၢ်နစု အိၣ်ဒီးအစိအကမီၤ ထဲသိးဒီး ယွၤလၢအမ့ၢ်အတီတဂၤ အစုဧါ.+

မ့ၢ်နမၤသီၣ် နကလုၢ် ဒ်လီသီၣ် ဒ်သိးဒီးအီၤ သ့ဧါ.+

၁၀ နမၤဒ်န့ၣ် မ့ၢ်န့ၢ်န့ၣ် ဝံသးစူၤ ကယၢကယဲထီၣ်နသးလၢ တၢ်လၤကပီၤ ဒီးတၢ်ကဟုကညီၢ်

ဒီးကူထီၣ်သိးထီၣ် တၢ်လီၤဘီလီၤမုၢ် ဒီးတၢ်ဃံတၢ်လၤတက့ၢ်.

၁၁ ပျၢ်လီၤ နတၢ်သးဒိၣ်ခဲလၢာ်

ဒီးကွၢ်ပှၤလၢ အပာ်ထီၣ်ထီအသး ကိးဂၤဒဲး ဒီးဆီၣ်လီၤအဝဲသ့ၣ်တက့ၢ်.

၁၂ ကွၢ်ပှၤလၢ အပာ်ထီၣ်ထီအသး ကိးဂၤဒဲး ဒီးဆီၣ်လီၤအဝဲသ့ၣ်

ဒီးယီၢ်တံၢ် ပှၤအၢပှၤသီ တဘျီဃီတက့ၢ်.

၁၃ ဒီးဘျၢလီၤ အဝဲသ့ၣ်ခဲလၢာ်လၢ ဟီၣ်ခိၣ်ကမူၣ်ကျါ

ဒီးစၢဃာ် အဝဲသ့ၣ် လၢတၢ်ခံးအလီၢ်တက့ၢ်.

၁၄ နမၤဒ်န့ၣ် မ့ၢ်န့ၢ်န့ၣ် ယကတူၢ်လိာ်လၢ*

နမၤပူၤဖျဲးနသးလၢ နနီၢ်ကစၢ်ဂံၢ်ဘါသ့လီၤ.

၁၅ ကွၢ်လၢ ကသ့ၣ်ထံမီၤ, ယတ့လီၤအီၤဒ်သိး ယတ့လီၤနၤလီၤ.

ကသ့ၣ်ထံန့ၣ် အီၣ်ဝဲနီၣ် ဒ်သိးဒီး ကျီၢ်ဖါလီၤ.

၁၆ ကွၢ်မီၤ အဂံၢ်အဘါအိၣ်ဝဲလၢ အယီၢ်ဒ့

ဒီးအဟၢဖၢ အယုၢ်ညၣ်တဖၣ်န့ၣ် အဂံၢ်အဘါ ဆူၣ်ဒိၣ်မးလီၤ.

၁၇ အမၤဆှိၣ်ထီၣ် အခံမဲၢ် ဒ်သ့ၣ်ဆှိအ့ရ့းအသိး

ဒီးအကံၣ်ဒုၣ် အထူၣ်အပျၢ်တဖၣ် ပိၤအသးလီၤ.

၁၈ အဃံန့ၣ် လီၤဂာ်ဒ် တိၢ်ဘီ အဘိတဖၣ်,

ဒီးအခီၣ်န့ၣ် လီၤဂာ်ဒ် နီၣ်ထိးဘိထးတဖၣ်လီၤ.

၁၉ လၢကစၢ်ယွၤ အတၢ်ဘၣ်တ့တဖၣ် အကျါန့ၣ် အမ့ၢ်နီၣ်ဂံၢ်တၢလီၤ.

ထဲအတၢ်ဘၣ်တ့ ကစၢ်တဂၤန့ၣ် မၤသံအီၤလၢနးသ့လီၤ.

၂၀ ဒီးကစၢၢ်ကလိလၢ ဆၣ်ဖိကီၢ်ဖိလၢ အဒူတဖၣ် လိာ်ကွဲဝဲ အလီၢ်န့ၣ်

ဒုးမဲထီၣ် တၢ်အီၣ်တၢ်အီလၢ ကသ့ၣ်ထံ အဂီၢ်လီၤ.

၂၁ အမံနီၤဝဲလၢ သ့ၣ်တပှီာ်တၤဆှုၣ် အဖီလာ်

ဒီးလၢတပိၢ်လၢ အအိၣ်လၢ ကပံာ်ကျါ အကဒုလာ်လီၤ.

၂၂ သ့ၣ်တပှီာ်တၤဆှုၣ် အကဒု လီၤဘၣ်အီၤ

ဒီးပံၢ်သလီ အထူၣ်လၢ အအိၣ်လၢ တၢ်တြီၤပူၤတဖၣ် အိၣ်ဝးတရံး အီၤလီၤ.

၂၃ ထံကျိမ့ၢ်ယွၤလီၤ တပျုာ်တပျီၤ နာ်က့ ကသ့ၣ်ထံ တပျံၤတၢ်ဘၣ်.

ထံကျိယၢ်ဒ့ၣ်+ မ့ၢ်ယွၤလီၤဘၣ်အမဲာ်ဆူၣ်ဆူၣ် သနာ်က့ အတဘၣ်ယိၣ်တၢ်ဘၣ်.

၂၄ ဖဲအကွၢ်တၢ်အခါ မ့ၢ်မတဂၤ ဖီၣ်အီၤ ကန့ၢ်လဲၣ်.

ဒီးမတဂၤ တုၢ်ဖျိ အနါဒ့လၢ နီၣ်ကွး ကသ့လဲၣ်.

၄၁ “မ့ၢ်နတခွဲ သမၣ်*+ လၢတခွဲကနၣ်န့ၢ်ဧါ.

နစၢဘံတံၢ် အပျ့ၤလၢ ပျံၤန့ၢ်ဧါ.

၂ မ့ၢ်နတုၢ်ဖျိ သမၣ်အနါဒ့ပူၤလၢ ပျံၤန့ၢ်ဧါ.

နဘျးအခၣ်လၢ နီၣ်ကွး ကန့ၢ်ဧါ.

၃ မ့ၢ်အကဃ့တၢ်သးကညီၤ လၢနအိၣ်ဧါ.

မ့ၢ်အကတဲတၢ်ဒီးနၤ ကပုာ်လုးဧါ.

၄ မ့ၢ်အကမၤ တၢ်အၢၣ်လီၤအီလီၤ ဒီးနၤ

ဒ်သိး အကကဲနကုၢ် ထီဘိ အဂီၢ်ဧါ.

၅ နကလိာ်ကွဲဒီးအီၤ ဒ်နလိာ်ကွဲဒီး ထိၣ်တဘ့ၣ်အသိးဧါ.

မ့ၢ်နကစၢဃာ်အီၤဒီးပျံၤ လၢနဖိမုၣ်တဖၣ် အဂီၢ်ဧါ.

၆ ပှၤမၤညၣ်ဖိတဖၣ် ကဆါအီၤဧါ.

မ့ၢ်အဝဲသ့ၣ် ကဒီၣ်လီၤအီၤ ဒီးနီၤဖးလီၤအီၤလၢ ပှၤပနံာ်တၢ်ကၤတၢ်ဖိတဖၣ် အကျါဧါ.

၇ မ့ၢ်နဆဲးဖျိအဘ့ၣ်လၢ ဘီဆဲးညၣ် အါဘ့ၣ်+

မ့တမ့ၢ် ဆဲးဖျိအခိၣ်သၣ်ဃံလၢ နီၣ်ဆဲးညၣ်တဖၣ် ကသ့ဧါ.

၈ နမ့ၢ်ထိးကွၢ်အီၤ ထဲတဘျီန့ၣ်

နကတိၢ်နီၣ် တၢ်လၢအမၤနၤ ဒီးနတမၤဒ်န့ၣ် နီတဘျီလၢၤဘၣ်.

၉ ပှၤမ့ၢ်မုၢ်လၢ်လၢ ကဖီၣ်န့ၢ်သမၣ်န့ၣ် မ့ၢ်တၢ်ကလီကလီလီၤ.

ထဲဒၣ် ပှၤထံၣ်အီၤန့ၣ် ပှၤပျံၤတၢ် ဒိၣ်မး.

၁၀ ပှၤလဲၤမၤဒိၣ်ထီၣ်အသး တဘူၣ် နီတဂၤဘၣ်.

အဃိ မ့မ့ၢ်ယၤန့ၣ် မတဂၤဂဲၤဆၢထၢၣ် ထီဒါယၤ ကန့ၢ်လဲၣ်.+

၁၁ ပှၤလၢအဟ့ၣ်ဆိယၤတၢ် ဒီးယကဘၣ် ဟ့ၣ်ကဒါက့ၤအီၤန့ၣ် အိၣ်တဂၤဂၤဧါ.+

တၢ်လၢအအိၣ်လၢ မူခိၣ်ဖီလာ် ခဲလၢာ်န့ၣ် မ့ၢ်ယတၢ်လီၤ.+

၁၂ ယကတဲတၢ် ဘၣ်ဃးဒီး သမၣ်အခီၣ်အဂ့ၢ်

ဒီးအဂံၢ်ဆူၣ်ဘါဆူၣ် ထဲလဲၣ် ဒီးအနီၢ်ခိက့ၢ်ဂီၤ ဘၣ်တၢ်တ့လီၤအီၤ လီၤကမၢကမၣ် ထဲလဲၣ်လီၤ.

၁၃ မတဂၤ ကုၣ်ကွံာ်* အဘ့ၣ် လၢအတီၣ်သ့လဲၣ်.

မတဂၤ ကလဲၤဘူးဒီး အကိာ်ပူၤလၢ အအိးထီၣ်ဃာ်အသးလဲၣ်.

၁၄ အခၣ်ဃံလၢ အဒိၣ်အလဲၢ်န့ၣ် မတဂၤ အိးထီၣ်အီၤ ကဘူၣ်လဲၣ်.

အမဲတဖၣ်န့ၣ် လီၤပျံၤလီၤဖုး ဒိၣ်မးလီၤ.

၁၅ အချၢဃံန့ၣ်အိၣ်ဒီး အသဘျံး အကျိၤတဖၣ်လၢ

အဘုးတာ်လိာ်အသး ဃံးဃံးလီၤ.

၁၆ အသဘျံး တဘ့ၣ်ဒီးတဘ့ၣ်န့ၣ် ဘုးတာ်လိာ်သးဘူးဘူး တုၤဒၣ်လဲာ်

ကလံၤနုာ်လီၤလၢ အသဘျံးကဆူး တန့ၢ်ဘၣ်.

၁၇ ဒီးကျးတံၢ်လိာ်သး တဘ့ၣ်ဒီးတဘ့ၣ်

ဒီးအိၣ်စဲထီလိာ်အသး ဒီးပှၤအိးထီၣ်အီၤ တန့ၢ်ဘၣ်.

၁၈ ဖဲအကဆဲအခါ တၢ်ကပီၤ ဟဲကပီၤထီၣ်ဝဲ

ဒီးအမဲာ်ချံန့ၣ် လီၤဂာ်ဒ် တၢ်ကပီၤ ဆဲးလီၤလၢ ဂီၤခီအသိးလီၤ.

၁၉ လီဝၢ်ဒံးကပီၤထီၣ်လၢ အကိာ်ပူၤ

ဒီးမ့ၣ်အူဖီတဖၣ် ပ့ၢ်ထီၣ်ဝဲလီၤ.

၂၀ မ့ၣ်အူခုၣ် ဟဲထီၣ်ဝဲလၢ အနါဒ့ပူၤ

ဒ်ဖၣ်ကပူၤလၢ ပှၤဒွဲၣ်အူဝဲနီၣ် လၢအပူၤ အသိးလီၤ.

၂၁ အတၢ်ကသါန့ၣ် မၤကဲၤထီၣ် မ့ၣ်အူအ့ၣ်

ဒီးမ့ၣ်အူလၣ် ဟဲထီၣ်လၢ အကိာ်ပူၤလီၤ.

၂၂ အကိာ်ဘိ အဂံၢ်အဘါဆူၣ်ဒိၣ်မး

ဒီးပှၤလၢအထံၣ်အီၤန့ၣ် ပျံၤတၢ် ဒိၣ်မးလီၤ.

၂၃ အဘ့ၣ်အကထြၢတဖၣ်န့ၣ် ဘုးတာ်လိာ်သးဃံးဃံး

ဒီးကိၤဒိၣ်မး ဒီးလီၤဂာ်ဒ်သိးဒီး ထးဘ့ၣ်ဘၣ်လၢ ပှၤသုးအီၤ တန့ၢ်ဘၣ်.

၂၄ အသးန့ၣ် ကိၤဝဲဒ် လၢၢ်အသိး

ဒီးကိၤဝဲဒ် ဆၢၣ်ဂူာ်လၢၢ်အသိးလီၤ.

၂၅ ဖဲသမၣ်ဟဲထီၣ်အခါ ပှၤလၢအဂံၢ်ဆူၣ်ဘါဆူၣ်ဒၣ်လဲာ် ပျံၤတၢ်ဒိၣ်မး.

ဒီးဖဲအဆ့ဆိ အခံမဲၢ်လၢ ထံကျါအခါ ပှၤသးလီၤကတုၤလီၤ.

၂၆ ပှၤမၤနၢၤအီၤလၢ နးမ့ၢ်ဂ့ၤ,

ဘီမ့ၢ်ဂ့ၤ, ဘီဖိမ့ၢ်ဂ့ၤ, ပျၢ်မ့ၢ်ဂ့ၤ တန့ၢ်ဘၣ်.+

၂၇ ထးန့ၣ် အပာ်ဝဲ ဒ်သိးဒီး လီၢ်ဘိ

ဒီးတိၢ်ဘီန့ၣ် ပာ်ဝဲ ဒ်သိးဒီး သ့ၣ်လၢအကျၣ်လီၤ.

၂၈ ပှၤမ့ၢ်ခးအီၤဒီးပျၢ် သနာ်က့ အတဃ့ၢ်ဘၣ်.

ဒီးပှၤမ့ၢ်ကွံာ်အီၤလၢလၢၢ် လၢ နီၣ်ဘျုးန့ၣ်* လီၤဂာ်ဒ်သိးဒီး ပှၤကွံာ်အီၤဒီး လီၢ်ဘိလီၤ.*

၂၉ နီၣ်တီၢ်န့ၣ် အပာ်ဝဲဒ်သိးဒီး လီၢ်ဘိ

ဒီးဖဲပှၤကွံာ်အီၤဒီး ဘီအခါ အနံၤဘၣ် ဘီအသီၣ်လီၤ.

၃၀ အဟၢဖၢန့ၣ် လီၤဂာ်ဒ်သိးဒီး သပၢၤဟီၣ်ခိၣ် အက့လၢ အကနၣ်အ့ၣ်တဖၣ်

ဒီးဖဲအလဲၤတၢ်အခါ အကျိၤအိၣ်တ့ၢ်လၢ ကပံာ်ကျါ ဒ်နီၣ်ယီၢ်ဘု အကျိၤအသိးလီၤ.+

၃၁ အဒုးကလာ်ထီၣ်ပီၣ်လဲၣ် ဒ်ထံကလာ်ထီၣ်လၢ သပၢၤပူၤအသိး

ဒီးခွံခွးထီၣ် ပီၣ်လဲၣ်ဒ် သိကလာ်လၢ သပၢၤပူၤအသိးလီၤ.

၃၂ ဖဲအယူၤထံအခါ အကျိၤ ဖျါကပီၤတ့ၢ်လၢ အလီၢ်ခံ

အဃိ ပှၤဆိကမိၣ်ဘၣ်ဝဲလၢ ပီၣ်လဲၣ်အိၣ်ဒီး အခိၣ်ဆူၣ်ဝါလီၤ.

၃၃ လၢဟီၣ်ခိၣ်ချၢန့ၣ် တၢ်ဘၣ်တ့လၢ အလီၤဂာ် ဒ်သိးဒီးအီၤ

လၢအတပျံၤတၢ်နီတမံၤဘၣ်န့ၣ် တအိၣ်နီတခါဘၣ်.

၃၄ အကွၢ်ဟ့ဝဲ ဆၣ်ဖိကီၢ်ဖိ လၢ အပာ်ကဖၢလၢအသး

ဒီးအကဲစီၤပၤလၢ ဆၣ်ဖိကီၢ်ဖိလၢ အဒူအဃိၤ ဖးဒိၣ်ခဲလၢာ် အဖီခိၣ်လီၤ.”

၄၂ စီၤယိၤဘး တဲဆၢက့ၤ ယဟိဝၤယွၤလၢ

၂ “ခဲအံၤ ယသ့ၣ်ညါလၢ နမၤတၢ်သ့ ခဲလၢာ်လီၤ.

တၢ်လၢ နဆၢတဲာ်လၢ နကမၤန့ၣ် တၢ်တြီဃာ်အီၤ တန့ၢ်နီတမံၤဘၣ်.+

၃ နတဲလၢ ‘ပှၤလၢအတသ့ၣ်ညါတၢ်ဘၣ်န့ၣ် မ့ၢ်အကြၢး ဒုးအိၣ်ထီၣ် တၢ်သးဒ့ဒီ ဘၣ်ဃးဒီး ယတၢ်ရဲၣ်တၢ်ကျဲၤတဖၣ်ဧါ.’+

မ့ၢ်လံ, လၢညါန့ၣ် ယတဲတၢ်ဘၣ်ဆၣ် ယတနၢ်ပၢၢ်တၢ်ဘၣ်

ဒီးယတဲတၢ် ဘၣ်ဃးဒီး တၢ်လၢ အလီၤလိၢ်လီၤလး ဒိၣ်တလၢ လၢယဂီၢ် လၢယတသ့ၣ်ညါနၢ်ပၢၢ်အီၤဘၣ် တဖၣ်လီၤ.+

၄ ဒီးနတဲယၤလၢ ‘ဝံသးစူၤ ဒိကနၣ် ဒီးယကတဲတၢ်

ဒီးယကသံကွၢ်နၤ ဝံၤဒီး တဲနၢ်ပၢၢ်ယၤ’ လီၤ.+

၅ လၢညါ ယနၢ်ဟူဘၣ်နဂ့ၢ်

ဘၣ်ဆၣ် ခဲအံၤန့ၣ် ယထံၣ်ဘၣ်နၤလၢ ယမဲာ်လံ.

၆ ယပီၢ်ယၢ်လီၤက့ၤယသး လၢတၢ်လၢ ယတဲအဃိလီၤ.+

အဃိ ယဆ့ၣ်နီၤလၢ ဟီၣ်ခိၣ်ကမူၣ် ဒီးဖၣ်ဆါကျါလီၤ.”+

၇ ဖဲယဟိဝၤယွၤ တဲဘၣ် စီၤယိၤဘးလၢ တၢ်ကတိၤတဖၣ်န့ၣ် ဝံၤအလီၢ်ခံ ယဟိဝၤယွၤတဲဘၣ် ပှၤတ့ၤမၣ်ဖိ စီၤအလံဖးစးလၢ

“နၤ ဒီးနသကိးခံဂၤန့ၣ်+ မ့ၢ်လၢ သုတတဲ တၢ်မ့ၢ်တၢ်တီ ဘၣ်ဃးဒီးယဂ့ၢ်+ ဒ်သိးဒီး ယခ့ယပှၤ စီၤယိၤဘးဘၣ် အဃိ ယသးဒိၣ်ထီၣ်သုလီၤ. ၈ ခဲအံၤ လဲၤမူၤကျီၢ်ဖါနွံဒု ဒီးသိဖါနွံဒုလၢ ယခ့ယပှၤ စီၤယိၤဘးအအိၣ် ဒီးလုၢ်ထီၣ် တၢ်လုၢ်ဒွဲၣ်အူလၢ သုနီၢ်ကစၢ် အဂီၢ်တက့ၢ်. ဒီးယခ့ယပှၤ စီၤယိၤဘးန့ၣ် ကဃ့ထုကဖၣ်န့ၢ်တၢ်လၢ သုဂီၢ်လီၤ.+ ဒီးဖဲအဃ့ကညးဝဲ ဒ်သိး ယသုတသိၣ်ဃီၣ်သုလၢ သုတဲနါစိၤတၢ်အဃိ တဂ့ၤအဂီၢ်အခါ ယကဒိကနၣ်လီၤ. သုဝဲသ့ၣ်အံၤ သုတတဲ တၢ်မ့ၢ်တၢ်တီ ဘၣ်ဃးဒီးယဂ့ၢ် ဒ်သိးဒီး ယခ့ယပှၤ စီၤယိၤဘး တဲဝဲဘၣ်.”

၉ အဃိ ပှၤတ့ၤမၣ်ဖိ စီၤအလံဖးစး, ပှၤၡူဧၤဖိ စီၤဘံးလဒး ဒီးပှၤနၤမးဖိ စီၤစိဖၢ်န့ၣ် လဲၤမၤဝဲဒ် ယဟိဝၤယွၤ တဲဝဲအသိးလီၤ. ဒီးယဟိဝၤယွၤ ဒိကနၣ်ဝဲ စီၤယိၤဘး အတၢ်ထုကဖၣ်လီၤ.

၁၀ ဖဲစီၤယိၤဘး ဃ့ဘါထုကဖၣ်န့ၢ်တၢ်လၢ အသကိးတဖၣ်အဂီၢ်+ ဝံၤအလီၢ်ခံ ယဟိဝၤယွၤ မၤလီၤမၢ်ကွံာ် အတၢ်နးတၢ်ဖှီၣ်+ ဒီးဟ့ၣ်က့ၤအီၤ အတၢ်ထူးတၢ်တီၤတဖၣ်လီၤ. ယဟိဝၤယွၤ ဟ့ၣ်က့ၤအီၤတၢ် အါန့ၢ်ဒံး တၢ်အိၣ်ဒီးအီၤလၢညါ ခံစးလီၤ.+ ၁၁ စီၤယိၤဘး အဒီပုၢ်ဝဲၢ်မုၣ် ဒီပုၢ်ဝဲၢ်ခွါခဲလၢာ် ဒီးအသကိးလၢညါတဖၣ်ခဲလၢာ်န့ၣ်+ ဟဲလၢအအိၣ် ဒီးအီၣ်သကိးတၢ်ဒီးအီၤ လၢအဟံၣ်လီၤ. အဝဲသ့ၣ် ပာ်ဖျါထီၣ် တၢ်သးကညီၤ လၢအဖီခိၣ် ဒီးမၤမုာ်ထီၣ်ဝဲ စီၤယိၤဘးလၢ တၢ်ကီတၢ်ခဲလၢ ယဟိဝၤယွၤ ပျဲဘၣ်အီၤ အဃိလီၤ. ဒီးအဝဲသ့ၣ် တဂၤစုာ်စုာ်န့ၣ် ဟ့ၣ်အီၤစ့တဘ့ၣ် ဒီးနၢ်ဒံးထူအကွီၤ တကွီၤလီၤ.

၁၂ ဒီးယဟိဝၤယွၤဆိၣ်ဂ့ၤ စီၤယိၤဘး အါန့ၢ်ဒံး လၢအခီၣ်ထံးလီၤ.+ အဃိ စီၤယိၤဘး အိၣ်ဒီးသိအဒု ၁၄,၀၀၀, ကီၤလၤအူး အဒု ၆,၀၀၀, ကျီၢ်ဖါအခိၣ်* ၁,၀၀၀ ဒီးကသ့ၣ်ယီၤမိၢ်အဒု ၁,၀၀၀ လီၤ.+ ၁၃ စီၤယိၤဘး န့ၢ်ဘၣ်ကဒီး အဖိခွါနွံဂၤ ဒီးအဖိမုၣ် သၢဂၤလီၤ.+ ၁၄ အဝဲ ကိးန့ၢ်ဝဲ အဖိမုၣ် အဒိၣ်ကတၢၢ်တဂၤ အမံၤလၢ နီၢ်ယမံမၤ ဒီးခံဂၤတဂၤန့ၣ်လၢ နီၢ်ကစံဧၤ ဒီးသၢဂၤတဂၤန့ၣ်လၢ နီၢ်က့ရၣ်ဟးပူးလီၤ. ၁၅ လၢထံကီၢ်ပူၤန့ၣ် ပှၤပိာ်မုၣ်လၢ အဒိၣ်တၢ်ဂ့ၤ ထဲသိးဒီး စီၤယိၤဘး အဖိမုၣ်တဖၣ်န့ၣ် တအိၣ်နီတဂၤဘၣ်. ဒီးစီၤယိၤဘး ဟ့ၣ်လီၤအဖိမုၣ်တဖၣ် တၢ်န့ၢ်သါ ဃုာ်ဒီး အဝဲသ့ၣ် အဒီပုၢ်ဝဲၢ်ခွါတဖၣ်လီၤ.

၁၆ တၢ်န့ၣ်ဝံၤအလီၢ်ခံ စီၤယိၤဘး ဆဲးအိၣ်မူဝဲ အနံၣ် ၁၄၀ ဒီးအဝဲထံၣ်ဘၣ် အဖိအလံၤတဖၣ် တုၤလၢ လွံၢ်စိၤတစိၤလီၤ. ၁၇ စီၤယိၤဘးန့ၣ် အိၣ်မူဘၣ်ဝဲ ပှဲၤဒီးတၢ်သူၣ်မံသးမုာ် တုၤလၢ အသးပှၢ်ထီၣ်ဖးဒိၣ် ဒီးသံဝဲလီၤ.

ဧ့ၤဘြံၤအတၢ်ကတိၤဒိ လၢအမ့ၢ် ယွၤအဖိခွါတဖၣ်န့ၣ် အဲၣ်ဒိးတဲဝဲ မူခိၣ်ကလူးတဖၣ်.

အခီပညီလိၤလိၤ “စၤတၣ်.” မံၤအံၤအခီပညီမ့ၢ်ဝဲ “ပှၤလၢအထီဒါတၢ်.”

မ့ၢ်စ့ၢ်ကီး “ပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ် ဒီးအသူၣ်ဘျၢသးဘျၢ.”

မ့ၢ်စ့ၢ်ကီး “အဟံၣ်.”

အခီပညီလိၤလိၤ “စၤတၣ်.” မံၤအံၤအခီပညီမ့ၢ်ဝဲ “ပှၤလၢအထီဒါတၢ်.”

အခီပညီလိၤလိၤ “ဖံးဘ့ၣ်လၢ ဖံးဘ့ၣ်အဂီၢ်.”

လၢဧ့ၤဘြံၤကျိာ်န့ၣ်မ့ၢ်ဝဲ ‘လဝံးအသၤ.’ ကွၢ် တၢ်ကတိၤအခီပညီ.

မ့ၢ်ဝဲ တၢ်မုၢ်တၢ်ဘိလၢ အအိၣ်ဒီး တၢ်ဘျိၣ်ဘျ့လၢ အဝံၣ်အဆၢတအိၣ်ဘၣ်.

မ့ၢ်စ့ၢ်ကီး “စံၣ်ထီၣ်.”

အခီပညီလိၤလိၤ “ဒီပုၢ်ဝဲၢ်တဖၣ်.”

ဖဲအံၤန့ၣ် ဖျါလၢစီၤယိၤဘး တဲတၢ်ဒီးကစၢ်ယွၤ.

လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.

အခီပညီလိၤလိၤ “တုၤလၢ ယယူၢ်လီၤယထးခိၣ်ထံ န့ၢ်တကွံး.”

မ့ၢ်စ့ၢ်ကီး “ပှၤလၢအစူးကွံာ်ညိကွံာ်တၢ်နာ်.”

အခီပညီလိၤလိၤ “ဟံၣ်.”

မ့ၢ်စ့ၢ်ကီး “လဲၤကိးထီၣ်အီၤလၢရူ.”

အခီပညီလိၤလိၤ “အိၣ်ဒီး သးလၢအကူၣ်တၢ်သ့.”

ဘၣ်သ့ၣ်သ့ၣ် တၢ်သးသမူဖးဒိၣ်တမံၤ လၢအအိၣ်လၢ ပီၣ်လဲၣ်ပူၤ.

မ့ၢ်စ့ၢ်ကီး “ယသးသမူ, ယတၢ်ကသါ.”

လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.

မ့ၢ်စ့ၢ်ကီး “တၢ်ကသါ.”

မ့ၢ်စ့ၢ်ကီး “ခါပး.”

မ့ၢ်စ့ၢ်ကီး “ပှၤလၢအစူးကွံာ်ညိကွံာ်တၢ်နာ်.”

မ့ၢ်ဝဲ လီၢ်ခိၣ်ဆၢၣ်.

အခီပညီလိၤလိၤ “အဝဲ” ဒီးဘၣ်သ့ၣ်သ့ၣ် အဲၣ်ဒိးတဲဝဲ စီၤယိၤဘး.

လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.

အဲၣ်ဒိးတဲဝဲ အိၣ်ခိးလၢ တၢ်သွၣ်ခိၣ်အပူၤ.

အခီပညီလိၤလိၤ “အပှၤစီဆှံတဖၣ်.”

မ့ၢ်စ့ၢ်ကီး “တၤဝဲ.”

ဖဲအံၤန့ၣ် အဝဲဘီၣ်န့ၣ် အဲၣ်ဒိးတဲဝဲလၢ အတၢ်အိၣ်မူ ဘီၣ်ထီၣ်ညီထီၣ် ဒီးအပာ်ထီၣ်ထီအသး.

အဲၣ်ဒိးတဲဝဲ တၢ်မုၢ်လၢ်အိၣ်လၢ အဝဲကကိညၢ်လီၤက့ၤ.

မ့ၢ်စ့ၢ်ကီး “ပှၤလၢအစူးကွံာ်ညိကွံာ်တၢ်နာ်.”

မ့ၢ်ဝဲ ကစၢ်ယွၤ.

ကွၢ် တၢ်ကတိၤအခီပညီ.

မ့ၢ်စ့ၢ်ကီး “ပှၤလၢအစူးကွံာ်ညိကွံာ်တၢ်နာ်.”

လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.

ဘၣ်သ့ၣ်သ့ၣ် အဲၣ်ဒိးတဲဝဲ စီၤယိၤဘး ဒီးပှၤလၢအလီၤဂာ်ဒီးအီၤ မ့တမ့ၢ် ပှၤလၢအသးကညီၤအီၤတဖၣ်.

မ့ၢ်စ့ၢ်ကီး “တၢ်သံလၢ အလီၤပျံၤလီၤဖုး.”

အခီပညီလိၤလိၤ “ယ နဲဖဲး(ၡ်) (ne′phesh).” ကွၢ် တၢ်ကတိၤအခီပညီ.

အခီပညီလိၤလိၤ “ဖဲယဂဲၤဆၢထၢၣ်အခါ.”

အခီပညီလိၤလိၤ “ယပူၤဖျဲးဒီးယမဲအဘ့ၣ်.”

မ့ၢ်စ့ၢ်ကီး “ယကလ့ၢ်တဖၣ် ဟးဂီၤလံ.”

မ့ၢ်စ့ၢ်ကီး “ပှၤလၢအစူးကွံာ်ညိကွံာ်တၢ်နာ်.”

မ့ၢ်စ့ၢ်ကီး “စံၣ်ထီၣ်.”

လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.

အခီပညီလိၤလိၤ “ကပံာ်ကိၣ်လိၣ်တဖၣ်လၢ တၢ်တြီၤအပူၤ ကဆၢဘၣ်အီၤ.”

အခီပညီလိၤလိၤ “ထံကျိ.”

အခီပညီလိၤလိၤ “နစုမ့ၢ်ကဆှီ.”

မ့ၢ်စ့ၢ်ကီး “တၢ်သူအသးလၢထံ.”

လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.

အခီပညီလိၤလိၤ “ရၤဃး.”

မ့ၢ်စ့ၢ်ကီး “အတၢ်ကသါ.”

မ့ၢ်စ့ၢ်ကီး “ပှၤလၢအစူးကွံာ်ညိကွံာ်တၢ်နာ်.”

မ့ၢ်စ့ၢ်ကီး “အထြၢ.”

အခီပညီလိၤလိၤ “လၢၢ်မ့ၣ်.”

မ့ၢ်စ့ၢ်ကီး “ကီၢ်အဲၤသံအီးပး.”

မ့ၢ်စ့ၢ်ကီး “ဒီးပျၢ်လၢယစုပူၤန့ၣ် ကခးတၢ် ထီဘိ.”

မ့ၢ်စ့ၢ်ကီး “စံၢ်တံၢ်ဃာ်.”

မ့ၢ်စ့ၢ်ကီး “ယတထံၣ်ဘၣ် မုၢ်အတၢ်ကပီၤဘၣ်.”

အခီပညီလိၤလိၤ “ယစုမ့ၢ်ဘၣ်အၢ.”

ဖဲအံၤန့ၣ်ဖျါလၢ စီၤအလံဟူၤ တဲတၢ်ဒီးစီၤယိၤဘး.

အခီပညီလိၤလိၤ “လၢယပူၤန့ၣ် လီၤဂာ်ဒ် စပံးထံအဒၢလၢ အတအိၣ်ဒီး ကလံၤဟဲနုာ်ဟးထီၣ် အလီၢ်ဘၣ်အသိး.”

အခီပညီလိၤလိၤ “လီၤဂာ်ဒ် ထၢၣ်တၢ်ဖံးအသီလၢ အဘူးကသ့ၣ်ဖးအသိး.”

မ့ၢ်စ့ၢ်ကီး “ပှၤလၢအစူးကွံာ်ညိကွံာ်တၢ်နာ်.”

ဖျါလၢအဲၣ်ဒိးတဲဝဲ ကစၢ်ယွၤ.

မ့ၢ်စ့ၢ်ကီး “ပှၤလၢအစူးကွံာ်ညိကွံာ်တၢ်နာ်.”

မ့ၢ်ဝဲ ဃဲသဲခွါ.

မ့ၢ်စ့ၢ်ကီး “သးစံၣ်.”

မ့ၢ်စ့ၢ်ကီး “မဲာ်ထံကလၤလၢ ပှၤတ့အီၤလၢထး.”

မ့ၢ်စ့ၢ်ကီး “တၢ်သံအကဒု.”

မ့ၢ်ဝဲ ပစီၤထံခဲထီၣ်.

အခီပညီလိၤလိၤ “မူခိၣ်.” မ့ၢ်စ့ၢ်ကီး “ဆၣ်ဒီးဟီၣ်ခိၣ်ဖျၢၣ်တဖၣ်.”

မ့ၢ်စ့ၢ်ကီး “စဲဘူး.”

မ့ၢ်စ့ၢ်ကီး “ထူတၢ်.”

မ့ၢ်စ့ၢ်ကီး “စံၣ်.”

မ့ၢ်စ့ၢ်ကီး “ပတြၢၤနၤ.”

လၢဧ့ၤဘြံၤကျိာ်န့ၣ်မ့ၢ်ဝဲ ‘လဝံးအသၤ.’ ကွၢ် တၢ်ကတိၤအခီပညီ.

မ့ၢ်စ့ၢ်ကီး “အိးကွံာ်.”

မ့ၢ်ဝဲ ပျံၤလၢပှၤသူအီၤ ဒ်သိး ကကွံာ်လၢၢ်အဂီၢ်.

မ့ၢ်ဝဲ လီၢ်ခိၣ်ဆၢၣ်.

မ့ၢ်စ့ၢ်ကီး “အစူၣ်.”