တၢးထီခိးတၢ် online လံာ်ရိဒၢး
တၢးထီခိးတၢ်
online လံာ်ရိဒၢး
ကညီ(စှီၤ)ကျိာ်
ဃုထၢ
  • ဃုကွၢ်
  • လံာ်စီဆှံ
  • လံာ်လဲၢ်တဖၣ်
  • တၢ်အိၣ်ဖှိၣ်ရိဖှိၣ်တဖၣ်
  • nwt စကၤရယၤ ၁:၁-၁၄:၂၁
  • စကၤရယၤ

တၢ်ဂီၤမူတအိၣ်ဘၣ်.

ဝံသးစူၤ, တၢ်ကီတၢ်ခဲအိၣ်လၢ နကကွၢ်တၢ်ဂီၤမူအဂီၢ်.

  • စကၤရယၤ
  • ဟီၣ်ခိၣ်သီ တၢ်ကွဲးကျိာ်ထံ လံာ်စီဆှံ
ဟီၣ်ခိၣ်သီ တၢ်ကွဲးကျိာ်ထံ လံာ်စီဆှံ
စကၤရယၤ

စကၤရယၤ

၁ ဖဲစီၤဒၤရယါဝ့ၣ်​ ပၢတၢ်ခံနံၣ်တနံၣ်+ လါဃိးလါတလါန့ၣ်​ ယဟိဝၤယွၤ တဲတၢ်ဒီး စီၤဘရ့ကံယၤ အဖိခွါ ဝံစကၤရယၤလီၤ.*+ စီၤဘရ့ကံယၤ မ့ၢ်ဝဲ စီၤဧံးဒိၤအဖိခွါလီၤ. ကစၢ်ယွၤ တဲဝဲလၢ ၂ “ယၤ, ယဟိဝၤယွၤ သးပှံၢ်ထီၣ်​ သုပၢ်တဖၣ်​ ဒိၣ်မးလီၤ.+

၃ “တဲဘၣ်အဝဲသ့ၣ်လၢ ‘တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်အံၤ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဟဲက့ၤကဒါက့ၤလၢ ယအိၣ်​ ဒီးယကဟဲက့ၤကဒါက့ၤလၢ သုအိၣ်လီၤ.’+ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.”’

၄ “‘တဘၣ်မၤဒ်သိးဒီး သုပၢ်တဖၣ်တဂ့ၤ. ဝံလၢညါတဖၣ်​ တဲအဝဲသ့ၣ်လၢ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဝံသးစူၤ ပာ်တ့ၢ်ကွံာ် သုကျဲအၢကျဲသီ ဒီးမၤတၢ်အၢလၢၤတဂ့ၤ.’”’+

“ယဟိဝၤယွၤ တဲဝဲလၢ ‘အဝဲသ့ၣ်​ တဒိကနၣ်တၢ်ဘၣ်​ ဒီးအဝဲသ့ၣ်​ တကနၣ်ဃုာ်ယၤ နီတစဲးဘၣ်.’+

၅ “‘သုပၢ်တဖၣ်န့ၣ်​ သံဝဲလံ. ဒီးဝံသ့ၣ်တဖၣ်န့ၣ်​ တအိၣ်မူလၢၤဘၣ်. ၆ ဘၣ်ဆၣ်​ ယမၤလိာ် ယခ့ယပှၤတဖၣ်​ ဒီးယဝံတဖၣ်လၢ ကတဲဘၣ်​ သုပၢ်တဖၣ်​ လၢယတၢ်ကတိၤ ဒီးယတၢ်ဘျၢတဖၣ်​ ဒီးသုပၢ်တဖၣ်န့ၣ်​ ထံၣ်ဝဲလၢ အဟဲလၢထီၣ်ပှဲၤထီၣ်လီၤ.’+ လၢတၢ်န့ၣ်အဃိ အဝဲသ့ၣ်​ ဟဲက့ၤလၢ ယအိၣ်​ ဒီးတဲဝဲလၢ ‘တၢ်သုးမုၢ်ဂီၢ်မုၢ်အကစၢ် ယဟိဝၤယွၤ မၤပှၤဒ် ပတၢ်သကဲာ်ပဝး ဒီးပတၢ်မၤ အိၣ်ဝဲအသိး ဒီးဒ်အတဲပာ်စၢၤဝဲ အသိးလီၤ.’”+

၇ ဖဲစီၤဒၤရယါဝ့ၣ်​ ပၢတၢ်ခံနံၣ်တနံၣ်,+ လါ ၁၁ လါ လၢအမ့ၢ် လါၡဘး* ထီၣ်​ ၂၄ သီတသီန့ၣ်​ ယဟိဝၤယွၤ ဒုးထံၣ်​ စီၤဘရ့ကံယၤ အဖိခွါ လၢအမ့ၢ် ယၤ, စီၤစကၤရယၤလၢ တၢ်ထံၣ်လၢညါခီလီၤ. စီၤဘရ့ကံယၤ မ့ၢ်ဝဲ စီၤဧံးဒိၤအဖိခွါလီၤ. ၈ “ဒီးယထံၣ်ဘၣ်​ တၢ်ထံၣ်လၢညါခီ ဖဲမုၢ်နၤခီ အဆၢကတီၢ်လီၤ. ပှၤတဂၤဒိးဝဲ ကသ့ၣ်လၢ အလွဲၢ်ဂီၤတဒု ဒီးအဝဲ ဆၢထၢၣ်ဝဲ ဂၢၢ်တပၢၢ် ဖဲတၢ်တြီၤပူၤလၢ သ့ၣ်သမ့ၤဟဒးတဖၣ်​ အကျါလီၤ. လၢပှၤတဂၤန့ၣ်​ အလီၢ်ခံန့ၣ်​ အိၣ်ဝဲဒီး ကသ့ၣ်အဂီၤ, ကသ့ၣ်အဃး ဒီးကသ့ၣ်အဝါတဖၣ်လီၤ.”

၉ အဃိ ယတဲလၢ “ယကစၢ်ဧၢ, အဝဲသ့ၣ်​ မ့ၢ်မတၤတဖၣ်လဲၣ်.”

ဒီးမူခိၣ်ကလူးလၢ အတဲတၢ်ဒီးယၤန့ၣ်​ တဲဆၢယၤလၢ “အဝဲသ့ၣ်​ မ့ၢ်မတၤတဖၣ်လဲၣ်န့ၣ်​ ယကဒုးနဲၣ်နၤ.”

၁၀ ပှၤပိာ်ခွါတဂၤလၢ အဆၢထၢၣ်ဝဲ ဂၢၢ်တပၢၢ် လၢသ့ၣ်သမ့ၤဟဒးတဖၣ်​ အကျါန့ၣ်​ တဲဝဲလၢ “ပှၤသ့ၣ်တဖၣ်အံၤန့ၣ်​ ယဟိဝၤယွၤ ဆှၢလီၤအီၤ ဒ်သိး အဝဲသ့ၣ်​ ကဟးဝ့ၤဝီၤဝဲလၢ ဟီၣ်ခိၣ်ချၢလီၤ.” ၁၁ ဒီးအဝဲသ့ၣ်​ တဲဘၣ်​ ယဟိဝၤယွၤ အမူခိၣ်ကလူး လၢအဆၢထၢၣ်ဝဲလၢ သ့ၣ်သမ့ၤဟဒး အကျါတဂၤန့ၣ်လၢ “ပဟးဝ့ၤဝီၤလၢ ဟီၣ်ခိၣ်ချၢလံ. ဟီၣ်ခိၣ်ဒီဘ့ၣ်န့ၣ်​ အိၣ်ဝဲဘှ့ၣ်ဘှ့ၣ်ဘှီၣ်ဘှီၣ်​ ဒီးမုာ်မုာ်ခုၣ်ခုၣ်လီၤ.”+

၁၂ ယဟိဝၤယွၤ အမူခိၣ်ကလူး တဲဝဲလၢ “အိ တၢ်သုးမုၢ်ဂီၢ်မုၢ်အကစၢ် ယဟိဝၤယွၤဧၢ, နသးထီၣ်​ ဝ့ၢ်ယရူၤၡလ့ၣ်​ ဒီးယူဒၤအဝ့ၢ်တဖၣ်​ အနံၣ်​ ၇၀ လံ.+ နတပာ်ဖျါထီၣ်​ နတၢ်သးကညီၤလၢ အဝဲသ့ၣ်အဖီခိၣ်ဘၣ်န့ၣ်​ ကယံာ်ဒံးထဲလဲၣ်.”+

၁၃ ဒီးမူခိၣ်ကလူးတဂၤလၢ အတဲတၢ်ဒီးယၤန့ၣ်​ ယဟိဝၤယွၤ တဲဆၢအီၤမုာ်မုာ် ဒီးကပုာ်လုးလီၤ. ၁၄ ဒီးမူခိၣ်ကလူး လၢအတဲတၢ်ဒီးယၤန့ၣ်​ တဲယၤလၢ “ကိးထီၣ်ဒ်အံၤ, ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ယသးဆူၣ်လၢ ဝ့ၢ်ယရူၤၡလ့ၣ်အဂီၢ် ဒီးယသးဆူၣ်လၢ စံယိၣ်အဂီၢ် ဒိၣ်မးလီၤ.+ ၁၅ လၢအခီၣ်ထံးန့ၣ်​ ယပာ်လီၤယသးလၢ ယကစံၣ်ညီၣ်​ ယပှၤဂီၢ်မုၢ် ဖဲအကြၢး+ ဘၣ်ဆၣ်​ ပှၤကလုာ်တဖၣ်​ မၤအါထီၣ်​ အဝဲသ့ၣ်​ အတၢ်နးတၢ်ဖှီၣ်လီၤ.+ အဃိ ပှၤကလုာ်လၢ အဆိကမိၣ်လီၤအသးလၢ အအိၣ်ဘၣ်​ ဘံၣ်ဘံၣ်ဘၢဘၢတဖၣ်အံၤန့ၣ်+ ယသးဒိၣ်ထီၣ်​ အဝဲသ့ၣ်​ ဒိၣ်မးလီၤ.”’

၁၆ “ယဟိဝၤယွၤ တဲဝဲလၢ “‘ယကဟဲက့ၤကဒါက့ၤလၢ ဝ့ၢ်ယရူၤၡလ့ၣ်အအိၣ်​ လၢတၢ်သးကညီၤအပူၤ+ ဒီးယဟံၣ်ကဘၣ်တၢ်တ့ထီၣ်အီၤ လၢအပူၤလီၤ.+ ဒီးတၢ်ကထုးထီၣ်​ တၢ်ထိၣ်ပျံၤတဘိလၢ ဝ့ၢ်ယရူၤၡလ့ၣ်​ အဖီခိၣ်လီၤ.”+ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.’

၁၇ “ကိးထီၣ်ကဒီးလၢ ‘တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “တၢ်ဂ့ၤတၢ်ဝါလၢ အဟဲလၢယအိၣ်န့ၣ်​ ကအိၣ်ပှဲၤလီၤလာ်လၢ ယဝ့ၢ်တဖၣ်အပူၤ ဒီးယၤ, ယဟိဝၤယွၤ ကမၤမုာ်ထီၣ်ကဒီး စံယိၣ်+ ဒီးဃုထၢထီၣ်ကဒါက့ၤ ဝ့ၢ်ယရူၤၡလ့ၣ်လီၤ.”’”+

၁၈ ဒီးယကွၢ်ထီၣ်တၢ် ဒီးယထံၣ်​ တၢ်အနၢၤ လွံၢ်ဘိလီၤ.+ ၁၉ အဃိ ယသံကွၢ် မူခိၣ်ကလူးလၢ အတဲတၢ်ဒီးယၤတဂၤန့ၣ်လၢ “တၢ်တဖၣ်န့ၣ်​ အကဲမနုၤလဲၣ်.” အဝဲတဲဆၢယၤလၢ “တၢ်အနၢၤတဖၣ်န့ၣ်​ မၤလီၤပြံလီၤပြါ ယူဒၤအပှၤဂီၢ်မုၢ်,+ အံၣ်စရ့လးအပှၤဂီၢ်မုၢ်+ ဒီးဝ့ၢ်ယရူၤၡလ့ၣ်​ အပှၤဂီၢ်မုၢ်လီၤ.”+

၂၀ ဒီးယဟိဝၤယွၤ ဒုးနဲၣ်ယၤ ပှၤစုသ့ဖိ လွံၢ်ဂၤလီၤ. ၂၁ ဒီးယသံကွၢ်လၢ “ပှၤစုသ့ဖိတဖၣ်အံၤ ကမၤမနုၤလဲၣ်.”

ဒီးအဝဲတဲလၢ “တၢ်အနၢၤတဖၣ်န့ၣ်​ မၤလီၤပြံလီၤပြါဝဲ ယူဒၤအပှၤဂီၢ်မုၢ် တုၤလၢ ပှၤမိာ်ထီၣ်ပှၤခိၣ်မး တဘူၣ်နီတဂၤဘၣ်. အဃိ ပှၤစုသ့ဖိတဖၣ်အံၤ ကလဲၤမၤပျံၤမၤဖုး ဒီးကွံာ်လီၤကွံာ် ပှၤကလုာ်အနၢၤတဖၣ်လၢ အသူဝဲ အစိကမီၤ* လၢကထီဒါ ယူဒၤအဟီၣ်ကဝီၤ ဒီးမၤလီၤပြံလီၤပြါ ယူဒၤ အပှၤဂီၢ်မုၢ် အဂီၢ်လီၤ.”

၂ ဒီးယကွၢ်ထီၣ်တၢ် ဒီးယထံၣ်ဘၣ်​ ပှၤတဂၤလၢ အစိာ်ဝဲ တၢ်ထိၣ်ပျံၤလီၤ.+ ၂ အဃိ ယသံကွၢ်အီၤလၢ “နကလဲၤဖဲလဲၣ်.”

အဝဲ တဲဆၢယၤလၢ “ယကလဲၤထိၣ်​ ဝ့ၢ်ယရူၤၡလ့ၣ်​ အလဲၢ်အထီလီၤ.”+

၃ ဒီးမူခိၣ်ကလူးတဂၤလၢ အတဲတၢ်ဒီးယၤန့ၣ်​ ဟးထီၣ်ဝဲ ဒီးမူခိၣ်ကလူးအဂၤတဂၤ ဟဲလၢအအိၣ်လီၤ. ၄ ဒီးအဝဲ တဲဘၣ်အီၤလၢ “လဲၤဃ့ၢ်လၢန့ၣ်ဒီး တဲဘၣ်​ ပိာ်ခွါသးစၢ်တဂၤန့ၣ်လၢ ‘“လၢဝ့ၢ်ယရူၤၡလ့ၣ်​ အပူၤန့ၣ်​ ပှၤကညီ ဒီးဆၣ်ဖိကီၢ်ဖိ အဒၢတဖၣ်​ ကအိၣ်ဝဲဒီဒူၣ်+ အဃိ ပှၤကအိၣ်ဝဲလၢ ဝ့ၢ်တဖျၢၣ်အံၤအပူၤ ဒ်ပှၤအိၣ်လၢ ဝ့ၢ်လၢ အဒူၣ်တအိၣ်ဘၣ်​ အသိးလီၤ.+ ၅ ဒီးယကကဲထီၣ်​ တၢ်ဒူၣ်မ့ၣ်အူ လၢအအိၣ်ဝးတရံးဝ့ၢ်+ ဒီးယတၢ်လၤကပီၤကအိၣ်လၢ အပူၤလီၤ.”’+ ယဟိဝၤယွၤ တဲဝဲဒ်န့ၣ်လီၤ.”

၆ ယဟိဝၤယွၤ တဲဝဲလၢ “မၤချ့ချ့ ဒီးဟးထီၣ်ကွံာ်လၢ ကီၢ်လၢ ကလံၤစိးတခီသၢၤ.+

သုဝဲလၢ ယမၤလီၤပြံလီၤပြါကွံာ်အီၤလၢ မူခိၣ်အကလံၤကျိၤလွံၢ်ကျိၤ အအိၣ်န့ၣ်​ ဟးထီၣ်ကွံာ်သၢၤ.”+ ယဟိဝၤယွၤ တဲဝဲဒ်န့ၣ်လီၤ.

၇ “စံယိၣ်အပှၤဂီၢ်မုၢ်လၢ အအိၣ်လၢ ဝ့ၢ်ဘၤဘူၤလိၣ်အပူၤဧၢ, ဃ့ၢ်ပူၤဖျဲးသုသး ချ့ချ့သၢၤ.+ ၈ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ ဒိးန့ၢ်ဘၣ်​ တၢ်လၤကပီၤဝံၤအလီၢ်ခံ အဝဲဆှၢလီၤယၤလၢ ပှၤကလုာ်တဖၣ်လၢ အဂုာ်န့ၢ်ဆူၣ်​ သုတၢ်တဖၣ်န့ၣ်အအိၣ်+ ဒီးအဝဲ တဲဝဲလၢ ‘ပှၤတဂၤဂ့ၤတဂၤဂ့ၤလၢ အထိးသုန့ၣ်​ မ့ၢ်ဒၣ်ဒ်သိး အထိးဘၣ်​ ယမဲာ်ပှၤဖိလီၤ.*+ ၉ ဒီးခဲအံၤ ယကယၤထီၣ်ယစုလၢ အဝဲသ့ၣ်အဖီခိၣ်​ ဒီးအဝဲသ့ၣ်​ အကုၢ်တဖၣ်န့ၣ်​ ကက့ၤဂုာ်န့ၢ်ဆူၣ်က့ၤ အဝဲသ့ၣ်​ အတၢ်လီၤ.’+ ဒီးသုကသ့ၣ်ညါ သပှၢ်ကတၢၢ် လၢတၢ်သုးမုၢ်ဂီၢ်မုၢ်အကစၢ် ယဟိဝၤယွၤ ဆှၢလီၤယၤလီၤ.

၁၀ ယဟိဝၤယွၤ တဲဝဲလၢ “အိ စံယိၣ်အဖိမုၣ်သ့ၣ်ဧၢ, ကိးပသူထီၣ်လၢ တၢ်သးခုအပူၤတက့ၢ်.+ ယဟဲလံ+ ဒီးယကအိၣ်လၢ နပူၤလီၤ.+ ၁၁ ဖဲန့ၣ်အဆၢကတီၢ် ပှၤအါကလုာ် ကဟဲဘူၣ်ထီၣ်ဘါထီၣ်​ ယၤ, ယဟိဝၤယွၤ+ ဒီးအဝဲသ့ၣ်​ ကကဲထီၣ်​ ယပှၤဂီၢ်မုၢ် ဒီးယကအိၣ်လၢနပူၤလီၤ.” ဒီးနကသ့ၣ်ညါလၢ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ ဆှၢလီၤယၤလၢ နအိၣ်လီၤ. ၁၂ ဒီးယဟိဝၤယွၤ ကဟံးန့ၢ်ယူဒၤ ဒ်အတၢ်န့ၢ်သါလၢ ဟီၣ်ခိၣ်စီဆှံအပူၤအသိး ဒီးကဃုထၢထီၣ်ကဒါက့ၤ ဝ့ၢ်ယရူၤၡလ့ၣ်လီၤ.+ ၁၃ ပှၤဟီၣ်ခိၣ်ဖိခဲလၢာ်သ့ၣ်ဧၢ, မ့ၢ်လၢ ယဟိဝၤယွၤ အိၣ်လၢ အတၢ်အိၣ်တၢ်ဆိးအလီၢ်စီဆှံ ဒီးမၤတၢ်လံအဃိ အိၣ်ဘှ့ၣ်လၢ အမဲာ်ညါတက့ၢ်.

၃ ဒီးအဝဲ ဒုးနဲၣ်ယၤလၢ ပှၤလုၢ်တၢ်ခိၣ်​ အဒိၣ်ကတၢၢ် စီၤယိၤၡူ+ ဆၢထၢၣ်လၢ ယဟိဝၤယွၤ အမူခိၣ်ကလူး အမဲာ်ညါ ဒီးမုၣ်ကီၤလံၢ်*+ ဆၢထၢၣ်လၢ အစုထွဲတခီ ဒ်သိး ကထီဒါအီၤ အဂီၢ်လီၤ. ၂ ဒီးယဟိဝၤယွၤ အမူခိၣ်ကလူး တဲဘၣ်မုၣ်ကီၤလံၢ်လၢ “မုၣ်ကီၤလံၢ်ဧၢ, မ်ယဟိဝၤယွၤ သိၣ်ဃီၣ်နၤတက့ၢ်.+ ယဟိဝၤယွၤလၢ အဃုထၢထီၣ်​ ဝ့ၢ်ယရူၤၡလ့ၣ်န့ၣ်+ မ်အသိၣ်ဃီၣ်နၤတက့ၢ်. စီၤယိၤၡူမ့ၢ် သ့ၣ်မုၣ်တကျီၣ်လၢ အကဲၤဝဲလၢ ပှၤထုးထီၣ်ကွံာ်အီၤလၢ မ့ၣ်အူအပူၤ တမ့ၢ်ဧီၤ.”

၃ စီၤယိၤၡူ ကူကၤဝဲတၢ်ကူတၢ်ကၤလၢ အဘၣ်အၢ ဒီးဆၢထၢၣ်လၢ မူခိၣ်ကလူး အမဲာ်ညါလီၤ. ၄ ဒီးမူခိၣ်ကလူး တဲဘၣ်ဝဲ ပှၤအဂၤတဖၣ်လၢ အဆၢထၢၣ်လၢ အမဲာ်ညါလၢ “ဘ့ၣ်လီၤကွံာ် အတၢ်ကူတၢ်ကၤလၢ အဘၣ်အၢတဖၣ်န့ၣ်နီၤ.” ဒီးအဝဲတဲအီၤလၢ “ယမၤလီၤမၢ်ကွံာ် နတၢ်ကမၣ်လံ. ဒီးနကကူကၤဘၣ်​ တၢ်ကူတၢ်ကၤလၢ အဂ့ၤလီၤ.”+

၅ ဒီးယတဲလၢ “ဒုးဖၢၣ်ထီၣ်အီၤ ခိၣ်ဖၢၣ်လီၤဆီလၢ အကဆှီဟီ.”+ ဒီးအဝဲသ့ၣ်​ ဒုးဖၢၣ်ထီၣ်အီၤ ခိၣ်ဖၢၣ်လီၤဆီလၢ အကဆှီ ဒီးဒုးကူထီၣ်ကၤထီၣ်အီၤ တၢ်ကူတၢ်ကၤတဖၣ်လီၤ. ဒီးယဟိဝၤယွၤ အမူခိၣ်ကလူး ဆၢထၢၣ်လၢ တၢ်ကပၤ ဖဲန့ၣ်လီၤ. ၆ ယဟိဝၤယွၤ အမူခိၣ်ကလူး တဲဘၣ်​ စီၤယိၤၡူလၢ ၇ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘နမ့ၢ်အိၣ်မူမၤထွဲဒ် ယတၢ်ဘၣ်သးအသိး ဒီးမၤလၢပှဲၤ မူဒါတဖၣ်လၢ ယဟ့ၣ်လီၤနၤန့ၣ်​ နကကဲထီၣ်​ ယပှၤဂီၢ်မုၢ်*+ အစံၣ်ညီၣ်ကွီၢ် ဒီးနကကွၢ်ထွဲဘၣ်​ ယတၢ်ပျီသ့ၣ်တဖၣ်လီၤ. ဒီးယကဟ့ၣ်လီၤနၤအခွဲး ဒ်သိး နဟဲလၢ ယမဲာ်ညါ ကန့ၢ်ထီဘိအဂီၢ် ဒ်ပှၤလၢ အဆၢထၢၣ်ဖဲအံၤတဖၣ်* အသိးလီၤ.’

၈ “‘ပှၤလုၢ်တၢ်ခိၣ်​ အဒိၣ်ကတၢၢ် စီၤယိၤၡူဧၢ, နၤဒီးနသကိးတဖၣ်လၢ အဆ့ၣ်နီၤလၢနမဲာ်ညါန့ၣ်​ ဝံသးစူၤကနၣ်တက့ၢ်. သုဝဲသ့ၣ်အံၤ မ့ၢ်ဝဲ တၢ်ပနီၣ်တခါလၢ အဘၣ်ဃးဒီး တၢ်လၢ အကမၤအသးလၢ ခါဆူညါလီၤ. ယကဟဲကိးန့ၢ် ယခ့ယပှၤတဂၤ+ လၢအမ့ၢ် တၢ်အဒ့ဘီၣ်လီၤ.+ ၉ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ကွၢ်လၢၢ်တဖျၢၣ်လၢ ယပာ်လီၤလၢ စီၤယိၤၡူအမဲာ်ညါ န့ၣ်တက့ၢ်. လၢလၢၢ်တဖျၢၣ်အံၤ အလိၤန့ၣ်​ အမဲာ်ချံ အိၣ်ဝဲနွံဖျၢၣ်လီၤ.* ဒီးယကစိးပျၤ တၢ်ကွဲးအသးတမံၤလၢ လၢၢ်အလိၤလီၤ. ဒီးယကမၤလီၤမၢ်ကွံာ် ပှၤအိၣ်လၢကီၢ်ပူၤ အတၢ်ကမၣ်​ လၢတနံၤဃီ အတီၢ်ပူၤလီၤ.’+

၁၀ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဖဲတၢ်တနံၤန့ၣ်​ သုဝဲ ကိးဂၤဒဲး သုကကွဲမုာ် ပှၤအိၣ်လၢ သုဟံၣ်ခိၣ်ဟံၣ်ဃၢၤ ဒ်သိး အဝဲသ့ၣ်​ ကဟဲလၢ သုစပံးမုၢ် ဒီးသုချၢၣ်ဒၢထူၣ်​ အဖီလာ်လီၤ.’”+

၄ မူခိၣ်ကလူးတဂၤ လၢအတဲတၢ်ဒီးယၤန့ၣ်​ ဟဲက့ၤ ဒီးမၤပၢၢ်ထီၣ်ယၤ ဒ်ပှၤမၤပၢၢ်ထီၣ်​ ပှၤမံအသိးလီၤ. ၂ ဒီးအဝဲတဲယၤလၢ “နထံၣ်ဘၣ်​ တၢ်မနုၤလဲၣ်.”

ဒီးယတဲအီၤလၢ “ယထံၣ်ဘၣ်​ မ့ၣ်အူဒၢလၢ ပှၤတ့အီၤလၢ ထူဒီဖျၢၣ်+ ဒီးလၢအဖီခိၣ်န့ၣ်​ လီခီဖျၢၣ်အိၣ်ဝဲတဖျၢၣ်​ ဒီးလၢမ့ၣ်အူဒၢအဖီခိၣ်န့ၣ်​ အိၣ်စ့ၢ်ကီးဒီးမ့ၣ်အူ အခွးနွံခွးလီၤ.+ မ့ၣ်အူ အခွးနွံခွးန့ၣ်​ အိၣ်ဒီး တၢ်အပီၤဖိနွံဘိလီၤ. ၃ ဒီးလၢမ့ၣ်အူဒၢအကပၤ ခံကပၤန့ၣ်​ အိၣ်ဒီး သ့ၣ်စၤယံးအထူၣ်ခံထူၣ်+ လၢအစ့ၣ်တထူၣ်​ ဒီးလၢအထွဲတထူၣ်လီၤ.”

၄ ဒီးယသံကွၢ် မူခိၣ်ကလူး လၢအတဲတၢ်ဒီးယၤလၢ “ကစၢ်ဧၢ, တၢ်သ့ၣ်တဖၣ်အံၤ အခီပညီဒ်လဲၣ်.” ၅ ဒီးမူခိၣ်ကလူးတဂၤလၢ အတဲတၢ်ဒီးယၤန့ၣ်​ သံကွၢ်ယၤလၢ “တၢ်သ့ၣ်တဖၣ်အံၤ အခီပညီ ဒ်လဲၣ်န့ၣ်​ နတသ့ၣ်ညါဧီၤ.”

ဒီးယတဲဆၢအီၤလၢ “ယတသ့ၣ်ညါဘၣ်, ကစၢ်ဧၢ.”

၆ ဒီးအဝဲတဲယၤလၢ “အဝဲအံၤမ့ၢ် ယဟိဝၤယွၤ အတၢ်ကတိၤလၢ စီၤစရူဘၤဘ့လး အဂီၢ်လီၤ. ‘“တၢ်ကဟဲကဲထီၣ်အသးန့ၣ်​ တမ့ၢ်လၢ သုးမုၢ်သံၣ်ဘိ အစိကမီၤ အဃိဘၣ်​ ဒီးတမ့ၢ်စ့ၢ်ကီးလၢ ပှၤဟီၣ်ခိၣ်ဖိ အဂံၢ်အဘါ အဃိဘၣ်.+ တၢ်သ့ၣ်တဖၣ်အံၤခဲလၢာ်န့ၣ်​ ကဟဲကဲထီၣ်အသး ခီဖျိလၢ ယသးစီဆှံ အဃိလီၤ.”+ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ. ၇ တၢ်ကီတၢ်ခဲလၢ အဒိၣ်ထဲသိးဒီးကစၢၢ် မ့ၢ်အိၣ်လၢ စီၤစရူဘၤဘ့လး အမဲာ်ညါ+ သနာ်က့ အကကဲထီၣ်က့ၤ တၢ်ပၢၤခိၣ်လီၤ.+ အဝဲ ကဟဲစိာ်ထီၣ်​ တၢ်လုၢ်ဟံၣ်အလၢၢ်လၢ တၢ်ခိၣ်စိၣ်​ ကတၢၢ်တဖျၢၣ်​ ဒီးဖဲန့ၣ်အခါ ပှၤကကိး ပသူထီၣ်လၢ “ဂ့ၤညါ, အဃံလၤညါ.”’”

၈ ယဟိဝၤယွၤ တဲကဒီးယၤလၢ ၉ “စီၤစရူဘၤဘ့လး ဆီလီၤဝဲ တၢ်လုၢ်ဟံၣ်​ အခီၣ်ထံး+ လၢအစု ဒီးအဝဲ ကမၤဝံၤအီၤလၢ အနီၢ်ကစၢ်အစုလီၤ.”+ ဒီးသုကသ့ၣ်ညါဘၣ်လၢ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ ဆှၢလီၤယၤလၢ သုအိၣ်လီၤ. ၁၀ တၢ်စးထီၣ်အသး လၢအခီၣ်ထံး ဆံးဆံးဖိန့ၣ်​ ပှၤတကြၢး ဆိကမိၣ်ဆံးအီၤဘၣ်.+ ဖဲအဝဲသ့ၣ်​ ထံၣ်ဘၣ်ဝဲ နီၣ်ထိၣ်ပျံၤ* လၢစီၤစရူဘၤဘ့လး အစုပူၤအခါ အဝဲသ့ၣ်​ ကသးခုလီၤ. တၢ်သ့ၣ်တဖၣ်န့ၣ်* မ့ၢ်ဝဲ ယဟိဝၤယွၤ အမဲာ်ချံတဖၣ်​ လၢအဃုကွၢ်တၢ် လၢဟီၣ်ခိၣ်ဒီဘ့ၣ်လီၤ.”+

၁၁ ဒီးယသံကွၢ်အီၤလၢ “သ့ၣ်စၤယံးအထူၣ်ခံထူၣ်​ လၢအအိၣ်လၢ မ့ၣ်အူဒၢ အစ့ၣ်တထူၣ်​ ဒီးအထွဲတထူၣ်န့ၣ်​ အခီပညီဒ်လဲၣ်.”+ ၁၂ ဒီးယသံကွၢ်ကဒီးအီၤလၢ “သ့ၣ်စၤယံးခံထူၣ်​ အဒ့တဖၣ်လၢ အဒုးယွၤလီၤသိထူ ခီဖျိလၢ တၢ်အပီၤထူခံဘိန့ၣ်​ အခီပညီဒ်လဲၣ်.”

၁၃ ဒီးအဝဲ သံကွၢ်ယၤလၢ “တၢ်သ့ၣ်တဖၣ်အံၤ အခီပညီ ဒ်လဲၣ်န့ၣ်​ နတသ့ၣ်ညါဧီၤ.”

ဒီးယတဲဆၢအီၤလၢ “ယတသ့ၣ်ညါဘၣ်, ကစၢ်ဧၢ.”

၁၄ အဝဲ တဲယၤလၢ “သ့ၣ်စၤယံး ခံထူၣ်အံၤ မ့ၢ်ဝဲ ပှၤလၢအဘၣ်​ တၢ်ဒိးဖှူအီၤခံဂၤလၢ အဆၢထၢၣ်လၢ ဟီၣ်ခိၣ်ဒီဘ့ၣ်အကစၢ် အကပၤလီၤ.”+

၅ ယကွၢ်ထီၣ်ကဒီးတၢ်ဒီး ယထံၣ်​ လံာ်ထူတထူ ယူၤဝဲလီၤ. ၂ အဝဲသံကွၢ်ယၤလၢ “နထံၣ်ဘၣ်​ တၢ်မနုၤလဲၣ်.”

ဒီးယတဲဆၢလၢ “ယထံၣ်ဘၣ်​ လံာ်ထူတထူ လၢအယူၤဝဲလီၤ. အလဲၢ်ဝဲ အပျၢ်* ၁၀ ဒီးအထီဝဲ အပျၢ် ၂၀ လီၤ.”

၃ ဒီးအဝဲတဲဘၣ်ယၤလၢ “လံာ်ထူတထူအံၤ အိၣ်ဝဲဒီး တၢ်ဆိၣ်အၢလၢ အကရၤလီၤအသးလၢ ဟီၣ်ခိၣ်ဒီဘ့ၣ်လီၤ. လံာ်ထူအံၤ တကပၤန့ၣ်​ တၢ်ကွဲးအသးအိၣ်ဝဲလၢ ပှၤကိးဂၤဒဲးလၢ အဟုၣ်တၢ်န့ၣ်+ အတဘၣ်​ တၢ်စံၣ်ညီၣ်ဒံးဘၣ်​ ဒီးလံာ်ထူအဝဲတကပၤန့ၣ်​ တၢ်ကွဲးအသး အိၣ်ဝဲလၢ ပှၤလၢ အမၤတၢ်အၢၣ်လီၤလၢ အတမ့ၢ်တတီဘၣ်တဖၣ်န့ၣ်+ အတဘၣ်​ တၢ်စံၣ်ညီၣ်ဒံးဘၣ်. ၄ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ယဆှၢလီၤ လံာ်ထူတထူအံၤလံ. ဒီးလံာ်ထူအံၤ ကလဲၤနုာ်လီၤဝဲလၢ ပှၤဟုၣ်တၢ်ဘျၣ်တၢ် အဟံၣ်​ ဒီးပှၤလၢ အမၤတၢ်အၢၣ်လီၤလၢ အတမ့ၢ်တတီဘၣ်လၢ ယမံၤအပူၤတဖၣ်န့ၣ်​ အဟံၣ်လီၤ. ဒီးလံာ်ထူအံၤ ကအိၣ်ဝဲလၢ အဝဲသ့ၣ်အဟံၣ်ပူၤ ဒီးကအီၣ်ကွံာ်ဝဲ အသ့ၣ်ဘၣ်တဖၣ်​ ဒီးအလၢၢ်တဖၣ်လီၤ.’”

၅ ဒီးမူခိၣ်ကလူး လၢအတဲတၢ်ဒီးယၤန့ၣ်​ ဟဲဘူးထီၣ်​ ဒီးတဲယၤလၢ “ဝံသးစူၤ ကွၢ်ထီၣ်​ ဒီးနကထံၣ်ဘၣ်လၢ တၢ်လၢအဟးထီၣ်တခါန့ၣ်​ အမ့ၢ်တၢ်မနုၤလဲၣ်.”

၆ ယသံကွၢ်လၢ “တၢ်တခါန့ၣ်​ အကဲမနုၤလဲၣ်.”

အဝဲစံးဆၢယၤလၢ “တၢ်လၢအဟးထီၣ်တခါန့ၣ်​ အကဲဝဲ အ့ဖးအတၢ်ဒၢလီၤ.”* ဒီးအဝဲ ဆဲးတဲဝဲလၢ “ပှၤအၢပှၤသီ လၢအအိၣ်လၢ ဟီၣ်ခိၣ်ဒီဘ့ၣ်န့ၣ်* လီၤဂာ်ဒီး တၢ်အဝဲန့ၣ်လီၤ.” ၇ ဒီးယထံၣ်ဘၣ်​ အ့ဖးအတၢ်ဒၢ အခိၣ်ကျးစၢၢ်ထး လၢအကဝီၤကျီၤန့ၣ်​ ဘၣ်တၢ်အိးထီၣ်အီၤ ဒီးပှၤပိာ်မုၣ်တဂၤ ဆ့ၣ်နီၤဝဲလၢ တၢ်ဒၢပူၤလီၤ. ၈ ဒီးအဝဲ တဲဘၣ်ယၤလၢ “ပိာ်မုၣ်တဂၤအံၤမ့ၢ် တၢ်အၢတၢ်သီလီၤ.” ဒီးအဝဲဆီၣ်လီၤက့ၤ ပိာ်မုၣ်တဂၤအံၤလၢ အ့ဖး အတၢ်ဒၢပူၤ ဝံၤဒီး ကးပံးဃာ် တၢ်ဒၢအံၤအခိၣ်လၢ တၢ်ခိၣ်ကျးစၢၢ်ထးလီၤ.

၉ ဒီးယကွၢ်ထီၣ်တၢ်ဒီး ယထံၣ်ဘၣ်​ ပိာ်မုၣ်ခံဂၤ ဟဲယူၤဝဲ လၢကလံၤကျါလီၤ. အဝဲသ့ၣ်​ အိၣ်ဒီးအဒံးတဖၣ်​ ဒ်ထိၣ်ထီကိာ် အဒံးအသိးလီၤ. ဒီးအဝဲသ့ၣ်စိာ်ထီၣ်​ အ့ဖး အတၢ်ဒၢတဖျၢၣ်န့ၣ်​ လၢတၢ်ဖးဖီလီၤ.* ၁၀ ဒီးယသံကွၢ် မူခိၣ်ကလူးလၢ အတဲတၢ်ဒီးယၤလၢ “အဝဲသ့ၣ်​ ကလဲၤစိာ် အ့ဖးအတၢ်ဒၢန့ၣ်​ ဖဲလဲၣ်.”

၁၁ အဝဲ တဲဆၢဝဲလၢ “အဝဲသ့ၣ်​ ကလဲၤစိာ်ဝဲလၢ ကီၢ်ၡံနၢ်*+ ဒီးအဝဲသ့ၣ်​ ကတ့ထီၣ်န့ၢ်အီၤ ဟံၣ်တဖျၢၣ်ဖဲန့ၣ်လီၤ. ဖဲဟံၣ်ဝံၤဝဲအခါ အဝဲကဘၣ်တၢ်ပာ်အီၤဖဲန့ၣ်​ မ့ၢ်လၢအကြၢးဒီးတၢ်လီၢ်အဝဲန့ၣ်အဃိလီၤ.”

၆ ယကွၢ်ထီၣ်တၢ်ဒီး ယထံၣ်ဘၣ်လၢ လ့ၣ်ကဟၣ်လွံၢ်ခိၣ်​ ဟးထီၣ်လၢ ကစၢၢ်ခံဖျၢၣ်​ အကဆူးလီၤ. ကစၢၢ်ခံဖျၢၣ်န့ၣ်​ မ့ၢ်ဝဲ ကစၢၢ်တိၢ်ဘီလီၤ. ၂ ကသ့ၣ်တဖၣ်လၢ အတွံၢ်ဝဲ လ့ၣ်ကဟၣ်​ အဆိကတၢၢ်တခိၣ်န့ၣ်​ အလွဲၢ်ဂီၤ ဒီးကသ့ၣ်တဖၣ်လၢ အတွံၢ်ဝဲ လ့ၣ်ကဟၣ်​ ခံခိၣ်တခိၣ်န့ၣ်​ အလွဲၢ်သူလီၤ.+ ၃ ဒီးကသ့ၣ်တဖၣ်လၢ အတွံၢ်ဝဲ လ့ၣ်ကဟၣ်​ သၢခိၣ်တခိၣ်န့ၣ်​ အလွဲၢ်ဝါ ဒီးကသ့ၣ်တဖၣ်လၢ အတွံၢ်ဝဲ လ့ၣ်ကဟၣ်​ လွံၢ်ခိၣ်တခိၣ်န့ၣ်​ အလွဲၢ် ကံၣ်စံၣ်ပိၣ်တနီၤ ဒီးတနီၤန့ၣ်​ အလွဲၢ်အိၣ်​ အကလုာ်ကလုာ်လီၤ.+

၄ ယသံကွၢ် မူခိၣ်ကလူးလၢ အတဲတၢ်ဒီးယၤလၢ “ကစၢ်ဧၢ, တၢ်သ့ၣ်တဖၣ်အံၤ မ့ၢ်မနုၤလဲၣ်.”

၅ ဒီးမူခိၣ်ကလူး တဲဆၢယၤလၢ “တၢ်သ့ၣ်တဖၣ်န့ၣ်​ မ့ၢ်ဝဲ ပှၤနီၢ်သးဖိလွံၢ်ဂၤ*+ လၢမူခိၣ်​ လၢအဆၢထၢၣ်လၢ ဟီၣ်ခိၣ်ဒီဘ့ၣ်အကစၢ် အမဲာ်ညါ+ ဝံၤဒီး အဟးထီၣ်ဝဲလီၤ. ၆ လ့ၣ်ကဟၣ်လၢ ကသ့ၣ်သူတဖၣ်​ တွံၢ်ဝဲန့ၣ်​ လဲၤဝဲလၢ ကီၢ်လၢ ကလံၤစိးတခီ+ ဒီးကသ့ၣ်ဝါတဖၣ်န့ၣ်​ လဲၤဝဲလၢ ကီၢ်လၢမုၢ်နုာ်တခီ* ဒီးမ့မ့ၢ် ကသ့ၣ်လၢ အလွဲၢ်ကံၣ်စံၣ်ပိၣ်တဖၣ်န့ၣ်​ လဲၤဝဲလၢ ကီၢ်လၢ ကလံၤထံးတခီလီၤ. ၇ ဒီးကသ့ၣ်လၢ အလွဲၢ်အိၣ်​ အကလုာ်ကလုာ်န့ၣ်​ သးဆူၣ်လၢ ကဟးဝ့ၤဝီၤလၢ ဟီၣ်ခိၣ်ချၢလီၤ.” ဒီးအဝဲတဲဝဲလၢ “လဲၤ, ဟးဝ့ၤဝီၤလၢ ဟီၣ်ခိၣ်ချၢတက့ၢ်.” ဒီးကသ့ၣ်တဖၣ်န့ၣ်​ စးထီၣ်ဟးဝ့ၤဝီၤလၢ ဟီၣ်ခိၣ်ချၢလီၤ.

၈ အဝဲကိးယၤ ဒီးတဲဝဲလၢ “ကသ့ၣ်လၢ အလဲၤထီၣ်လၢ ကလံၤစိးတခီန့ၣ်​ မၤခုၣ်လီၤက့ၤ ယဟိဝၤယွၤ အတၢ်သးထီၣ်လၢ ကီၢ်လၢကလံၤစိးတခီ အဖီခိၣ်လီၤ.”

၉ ယဟိဝၤယွၤ တဲကဒီးယၤလၢ ၁၀ “ဟံးန့ၢ်တၢ်လၢ စီၤဃ့လဒဲၤ, စီၤတိၤဘံယာ် ဒီးစီၤယဒါယၤ ဟဲက့ၤစိာ်ဝဲလၢ ပှၤလၢအဘၣ်တၢ်က့ၤဖီၣ်အီၤတဖၣ်​ အအိၣ်တက့ၢ်. ဒီးဖဲတၢ်တနံၤန့ၣ်​ နၤဒီးပှၤလၢ အဟဲလၢ ဘၤဘူၤလိၣ်တဖၣ်အံၤန့ၣ်​ သုကဘၣ်လဲၤလၢ စီၤစဖါနယၤ အဖိခွါ စီၤယိၤၡံယၤ အဟံၣ်လီၤ. ၁၁ နကဘၣ်​ တ့ထီၣ်​ ခိၣ်သလုးတဖျၢၣ်လၢ ထူဒီးစ့ ဒီးဒုးဖျီၣ်ထီၣ်​ စီၤယိၤစါဒး အဖိခွါ ပှၤလုၢ်တၢ်ခိၣ်​ အဒိၣ်ကတၢၢ် စီၤယိၤၡူလီၤ.+ ၁၂ ဒီးတဲအီၤလၢ

“‘တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “ပှၤလၢအမံၤမ့ၢ်ဝဲ တၢ်အဒ့ဘီၣ်န့ၣ်+ ကမဲထီၣ်ဝဲလၢ အနီၢ်ကစၢ် အတၢ်လီၢ် ဒီးကတ့ထီၣ်ဝဲ ယဟိဝၤယွၤ အတၢ်လုၢ်ဟံၣ်လီၤ.+ ၁၃ အမ့ၢ်ပှၤတဂၤလၢ ကသူၣ်ထီၣ်​ ယဟိဝၤယွၤ အတၢ်လုၢ်ဟံၣ်လီၤ. ဒီးအဝဲကမ့ၢ်ပှၤလၢ အဒိးန့ၢ်ဘၣ်ဝဲ တၢ်လၤကပီၤလီၤ. အဝဲကဆ့ၣ်နီၤလၢ အလီၢ်ပစိာ် အဖီခိၣ်​ ဒီးအကပၢတၢ် ဒီးအကကဲထီၣ်စ့ၢ်ကီး ပှၤလုၢ်တၢ်ဒိၣ်လီၤ.+ ဒီးအမူဒါခံခါအံၤ အတၢ်ပညိၣ်န့ၣ်​ အိၣ်တမံၤဃီ ဒီးအတၢ်ပညိၣ်​ ကမ့ၢ်ဝဲလၢ ကဆီၣ်ထွဲ တၢ်ဃူတၢ်ဖိး အဂီၢ်လီၤ. ၁၄ ဒီးခိၣ်သလုးအံၤ ကအိၣ်လၢ ယဟိဝၤယွၤ အတၢ်လုၢ်ဟံၣ်​ လၢတၢ်သ့ၣ်နီၣ်ထီၣ်​ စီၤဃ့လ့ၣ်, စီၤတိၤဘံယာ်, စီၤယဒါယၤ+ ဒီးစီၤစဖါနယၤ အဖိခွါ စီၤဃ့ၣ်​ အဂီၢ်လီၤ. ၁၅ ဒီးပှၤလၢ အအိၣ်ဝဲလၢ အယံၤတဖၣ်န့ၣ်​ ကဟဲမၤစၢၤတၢ် ဒ်သိး ကသူၣ်ထီၣ်​ ယဟိဝၤယွၤ အတၢ်လုၢ်ဟံၣ်​ အဂီၢ်လီၤ.” ဒီးသုကသ့ၣ်ညါဘၣ်လၢ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ ဆှၢလီၤယၤလၢ သုအိၣ်လီၤ. သုမ့ၢ်ဒိကနၣ်​ သုကစၢ် ယဟိဝၤယွၤ အကလုၢ်န့ၣ်​ တၢ်သ့ၣ်တဖၣ်န့ၣ်​ ကဟဲကဲထီၣ်အသးလီၤ.’”

၇ ဖဲစီၤပၤ ဒၤရယါဝ့ၣ်​ ပၢတၢ် လွံၢ်နံၣ်တနံၣ်, လါခွံလါတလါ လၢအမ့ၢ် လါကံးစလ့ၤ,* လါထီၣ်​ လွံၢ်သီတသီန့ၣ်​ ယဟိဝၤယွၤ တဲတၢ်ဒီး စီၤစကၤရယၤလီၤ.+ ၂ ဒီးဝ့ၢ်ဘ့ၤသ့လး အပှၤဂီၢ်မုၢ်န့ၣ်​ ဆှၢလီၤ စီၤၡၢ်အ့စ့ၢ် ဒီးစီၤရ့က့ၣ်လ့မ့းဒီးအပှၤတဖၣ်​ လၢကလဲၤဃ့ကညးတၢ် ဒ်သိး ကန့ၢ်ဘၣ်​ ယဟိဝၤယွၤ အတၢ်သးကညီၤ အဂီၢ်လီၤ. ၃ အဃိ အဝဲသ့ၣ်သံကွၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤ အတၢ်လုၢ်ဟံၣ်​ အပှၤလုၢ်တၢ်ဒိၣ်တဖၣ်​ ဒီးဝံတဖၣ်လၢ “မ့ၢ်ပ* ကဘၣ်ဟီၣ်​ ဒီးဒုၣ်တၢ်အီၣ်လၢ ယဲၢ်လါတလါအတီၢ်ပူၤ+ ဒ်ပမၤတ့ၢ် အါနံၣ်အါလါ အသိးန့ၣ်ဧါ.”

၄ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲကဒီးယၤလၢ ၅ “တဲဘၣ်​ ကီၢ်အပှၤဂီၢ်မုၢ်ခဲလၢာ် ဒီးပှၤလုၢ်တၢ်ဒိၣ်တဖၣ်လၢ ‘သုဒုၣ်တၢ်အီၣ်​ ဒီးဟီၣ်ကိးပသူလၢ ယဲၢ်လါတလါအတီၢ်ပူၤ ဒီးနွံလါတလါအတီၢ်ပူၤ+ လၢအနံၣ်​ ၇၀ အတီၢ်ပူၤ+ ဘၣ်ဆၣ်​ မ့ၢ်သုမၤအီၤလၢ ယဂီၢ် သပှၢ်တၢၢ်ဧါ. ၆ ဖဲသုအီၣ်တၢ်အီတၢ်အခါစ့ၢ်ကီး သုအီၣ်တၢ်အီတၢ်လၢ သုနီၢ်ကစၢ်အဂီၢ် တမ့ၢ်ဧီၤ. ၇ လၢညါ ဖဲသုအိၣ်ဘၣ်မုာ်မုာ်ခုၣ်ခုၣ်လၢ ဝ့ၢ်ယရူၤၡလ့ၣ်​ ဒီးဝ့ၢ်လၢအကပိာ်ကပၤတဖၣ်​ ဒီးဖဲသုအိၣ်လၢ နဲကဲၤ ဒီးၡ့ဖလၣ်အခါ သုကြၢးဒိကနၣ်​ ယၤ, ယဟိဝၤယွၤ အတၢ်ကတိၤ လၢယတဲအီၤ ခီဖျိလၢ ဝံလၢညါတဖၣ်​ တမ့ၢ်ဧီၤ.’”+

၈ ယဟိဝၤယွၤ တဲကဒီး စီၤစကၤရယၤလၢ ၉ “ယၤ, တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘စံၣ်ညီၣ်တၢ် တီတီလိၤလိၤ+ ဒီးရ့လိာ်သး တဂၤဒီးတဂၤလၢ တၢ်အဲၣ်လၢအတီ+ ဒီးတၢ်သးကညီၤအပူၤတက့ၢ်. ၁၀ တဘၣ်လံၣ်အီၣ်လီအီၣ်​ မုၣ်ကမဲ, ဖိၣ်ဃဲ,+ ပှၤထံဂၤကီၢ်ဂၤဖိ+ ဒီးပှၤဖှီၣ်ဖိယာ်ဖိတဂ့ၤ.+ ဒီးတဘၣ်ကူၣ်ထီၣ်​ တၢ်အၢတၢ်သီ လၢတဂၤဒီးတဂၤ အဖီခိၣ်တဂ့ၤ.’+ ၁၁ ဘၣ်ဆၣ်​ အဝဲသ့ၣ်​ တသးအိၣ်ဒိကနၣ်တၢ်ဘၣ်+ ဒီးအဝဲသ့ၣ်​ အခိၣ်ကိၤ ဒီးဃၣ်ဒူၣ်ချၢအသး+ ဒီးအဝဲသ့ၣ်ပံးဃာ်အနၢ် ဒ်သိး အသုတနၢ်ဟူတၢ်တဂ့ၤ အဂီၢ်လီၤ.+ ၁၂ ယၤ, တၢ်သုးမုၢ်ဂီၢ်မုၢ်အကစၢ် ယဟိဝၤယွၤန့ၣ်​ ယဆှၢလီၤ တၢ်သိၣ်တၢ်သီ ဒီးတၢ်ကတိၤတဖၣ်​ လၢယသးစီဆှံ ခီဖျိလၢ ဝံလၢညါတဖၣ်+ ဘၣ်ဆၣ်​ အဝဲသ့ၣ်​ မၤကိၤထီၣ်အသး ထဲသိးဒီး တၢ်မျၢ်တဖျၢၣ်+ ဒီးတဒိကနၣ်ဝဲဘၣ်. အဃိ ယၤ, တၢ်သုးမုၢ်ဂီၢ်မုၢ်အကစၢ် ယဟိဝၤယွၤ သးဒိၣ်ထီၣ်တၢ် ဒိၣ်မးလီၤ.”+

၁၃ “ယၤ, တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဖဲယကိးထီၣ်အခါ အဝဲသ့ၣ်​ တဒိကနၣ်ဝဲဘၣ်.+ အဃိ ဖဲအဝဲသ့ၣ်​ ကိးထီၣ်ယၤအခါ ယတဒိကနၣ်​ စ့ၢ်ကီးဘၣ်.+ ၁၄ ဒီးယမၤလီၤပြံလီၤပြါ အဝဲသ့ၣ်လၢ ကယဲၢ်ပှၤကလုာ်တဖၣ်လၢ အဝဲသ့ၣ်​ တသ့ၣ်ညါဝဲဘၣ်တဖၣ်အကျါ ခီဖျိလၢ ကလံၤမုၢ်လီၤ.+ ဒီးဖဲအဝဲသ့ၣ်​ ဟးထီၣ်ဝံၤအလီၢ်ခံ အဝဲသ့ၣ်​ အကီၢ်န့ၣ်​ အိၣ်သယုၢ်ဝဲ ဒီးပှၤတလ့ၢ်ထီၣ်လ့ၢ်လိၤဖဲန့ၣ်​ နီတဂၤလၢၤဘၣ်.+ နီၢ်ကီၢ်န့ၣ်​ ကီၢ်လၢ အလီၤအိၣ်တဘ့ၣ်အံၤ ကဲထီၣ်က့ၤ တၢ်လီၤပျံၤလီၤဖုးအလီၢ် လၢအဝဲသ့ၣ်​ အဃိလီၤ.’”

၈ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲယၤလၢ ၂ “ယၤ, တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘ယကသးဆူၣ်လၢ စံယိၣ်အဂီၢ် သပှၢ်ကတၢၢ်+ ဒီးယကသးဒိၣ်ထီၣ်တၢ် ဒီးယကဒီသဒၢအီၤ လၢယသးဒီဖျၢၣ်လီၤ.’”

၃ “ယဟိဝၤယွၤ တဲဝဲလၢ ‘ယကဟဲက့ၤကဒါက့ၤ လၢစံယိၣ်+ ဒီးအိၣ်ဆိးလၢယရူၤၡလ့ၣ်​ အပူၤလီၤ.+ ဒီးယရူၤၡလ့ၣ်​ ကဘၣ်တၢ်ကိးအီၤလၢ တၢ်မ့ၢ်တၢ်တီအဝ့ၢ်+ ဒီးတၢ်သုးမုၢ်ဂီၢ်မုၢ်အကစၢ် ယဟိဝၤယွၤ အကစၢၢ်စီဆှံလီၤ.’”+

၄ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ပိာ်မုၣ်သးပှၢ် ဒီးပိာ်ခွါသးပှၢ်တဖၣ်​ ကဆ့ၣ်နီၤကဒီးလၢ ဝ့ၢ်ယရူၤၡလ့ၣ်​ အတၢ်ဆါတၢ်ပှ့ၤအလီၢ်လီၤ. မ့ၢ်လၢအဝဲသ့ၣ်​ အသးပှၢ်ဖးဒိၣ်အဃိ အဝဲသ့ၣ်​ ကအိၣ်ဒီး နီၣ်ထိးဘိ ဂၤဘိဂၤဘိ လၢအစုပူၤလီၤ.+ ၅ ဒီးဝ့ၢ်အတၢ်ဆါတၢ်ပှ့ၤ အလီၢ်တဖၣ်န့ၣ်​ ကပှဲၤဝဲဒီး ပှၤဖိသၣ်​ ပိာ်မုၣ်ဒီးပိာ်ခွါတဖၣ်လၢ အဂဲၤလိာ်ကွဲဝဲလီၤ.’”+

၆ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဖဲန့ၣ်အဆၢကတီၢ် ပှၤဂီၢ်မုၢ်အံၤလၢ အအိၣ်တ့ၢ်တဖၣ်​ မ့ၢ်ဆိကမိၣ်ဝဲလၢ တၢ်ကဲထီၣ်အသးဒ်န့ၣ်​ တသ့ဘၣ်သနာ်က့ လၢယဂီၢ်န့ၣ်​ တၢ်လၢအကဲထီၣ်အသး တသ့ဘၣ်န့ၣ်​ ကအိၣ်ဧါ.’ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.”

၇ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ယကမၤပူၤဖျဲးထီၣ်​ ယပှၤဂီၢ်မုၢ်လၢ ကီၢ်တဖၣ်လၢ မုၢ်ထီၣ်​ ဒီးကီၢ်တဖၣ်လၢမုၢ်နုာ် အပူၤလီၤ.+ ၈ ဒီးယကဟဲက့ၤကိးကဒါက့ၤ အဝဲသ့ၣ်​ ဒီးအဝဲသ့ၣ်​ ကအိၣ်ကဆိးလၢ ဝ့ၢ်ယရူၤၡလ့ၣ်​ အပူၤလီၤ.+ ဒီးအဝဲသ့ၣ်​ ကကဲထီၣ်​ ယပှၤဂီၢ်မုၢ် ဒီးယကကဲထီၣ်​ အဝဲသ့ၣ်အကစၢ်ယွၤ+ လၢအမ့ၢ်အတီ ဒီးအတီအလိၤလီၤ.’”

၉ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘သုဝဲလၢ အနၢ်ဟူ တၢ်ကတိၤတဖၣ်အံၤလၢ ဝံတဖၣ်အအိၣ်န့ၣ်+ မ်သုမၤဆူၣ်ထီၣ်​ သုစု* တက့ၢ်.+ တၢ်ကတိၤတဖၣ်အံၤ မ့ၢ်ဝဲတၢ်ကတိၤတဖၣ်လၢ ပှၤတဲပာ်စၢၤအီၤ ဖဲပှၤဆီလီၤ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အတၢ်လုၢ်ဟံၣ်အခီၣ်ထံး အခါလီၤ. ၁၀ တချုးလၢ တၢ်ဆၢကတီၢ် အဝဲန့ၣ်​ ဘၣ်ဒံးဘၣ်န့ၣ်​ ပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ တဒိးန့ၢ်ဘၣ်​ တၢ်အဘူးအလဲဘၣ်.+ ယကမၤဒ်သိး ပှၤကထီဒါလိာ်သး တဂၤဒီးတဂၤ ဒီးခီဖျိလၢ ဒုၣ်ဒါတဖၣ်​ အိၣ်ဝဲအဃိ တၢ်ဘၣ်ယိၣ်ဘၣ်ဘှီ ကအိၣ်ဝဲလၢ ပှၤလ့ၢ်ထီၣ်လ့ၢ်လိၤတဖၣ်​ အဂီၢ်လီၤ.’

၁၁ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ပှၤဂီၢ်မုၢ်အံၤလၢ အအိၣ်တ့ၢ်တဖၣ်န့ၣ်​ ယတစံၣ်ညီၣ်​ အဝဲသ့ၣ်​ ဒ်မုၢ်နံၤလၢညါတဖၣ်​ အသိးလၢၤဘၣ်.+ ၁၂ တၢ်ဃူတၢ်ဖိး အတၢ်ချံ ကဘၣ်တၢ်ဖှံလီၤအီၤ, စပံးမုၢ်ကသၣ်ထီၣ်, ဒီးဟီၣ်ခိၣ်​ ကဒုးမဲထီၣ်သၣ်ထီၣ်တၢ်+ ဒီးမူခိၣ်​ ကဒုးလီၤ ပစီၤထံလီၤ. ပှၤဂီၢ်မုၢ်အံၤလၢ အအိၣ်တ့ၢ်တဖၣ်န့ၣ်​ ယကဟ့ၣ်လီၤ အဝဲသ့ၣ်လၢ တၢ်သ့ၣ်တဖၣ်န့ၣ်ခဲလၢာ် ဒ်တၢ်န့ၢ်သါ အသိးလီၤ.+ ၁၃ ယူဒၤ ဒီးအံၣ်စရ့လး အပှၤဂီၢ်မုၢ်ဧၢ, လၢညါန့ၣ်​ ပှၤကလုာ်တဖၣ်​ ယၢၤထီၣ်သုမံၤလၢ ကဆိၣ်အၢတၢ်အဂီၢ်+ ဘၣ်ဆၣ်​ ယကမၤပူၤဖျဲးသု ဒီးအဝဲသ့ၣ်ကယၢၤထီၣ်သုမံၤ လၢကဆိၣ်ဂ့ၤတၢ်အဂီၢ်လီၤ.+ အဃိ ပျံၤတၢ်တဂ့ၤ.+ မၤဆူၣ်ထီၣ်သုစုတက့ၢ်.’+

၁၄ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်အံၤ ‘ယၤ, တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “မ့ၢ်လၢသုမိၢ်ပၢ်ဖံဖု လၢပျၢၤတဖၣ်​ မၤသးထီၣ်ယၤအဃိ လၢညါန့ၣ်​ ယပာ်လီၤယသးလၢ ယကဒုးလီၤဘၣ်​ တၢ်ကီတၢ်ခဲလၢ သုဖီခိၣ်​ ဒီးယတဆီတလဲ ယတၢ်ဆၢတဲာ်ဘၣ်.*+ ၁၅ မ့မ့ၢ် တဘျီအံၤ ယပာ်လီၤယသးလၢ ယကဆိၣ်ဂ့ၤ ဝ့ၢ်ယရူၤၡယလ့ၣ်​ ဒီးယူဒၤ အပှၤဂီၢ်မုၢ်လီၤ.+ အဃိ ပျံၤတၢ်တဂ့ၤ.”’+

၁၆ “‘သုကဘၣ်​ မၤဒ်အံၤလီၤ. သုကဘၣ်​ တဲလိာ်သးတၢ် တီတီလိၤလိၤ+ ဒီးဖဲသုစံၣ်ညီၣ်တၢ် လၢဝ့ၢ်အတြဲၤတဖၣ်အခါ သုကဘၣ်​ စံၣ်ညီၣ်တၢ် တီတီလိၤလိၤ ဒီးဒုးအိၣ်ထီၣ်​ တၢ်ဃူတၢ်ဖိးလီၤ.+ ၁၇ တဘၣ်ကူၣ်ထီၣ်​ တၢ်လၢသုသးပူၤ ဒ်သိး သုကမၤကီမၤခဲလိာ်သး တဂၤဒီးတဂၤ အဂီၢ်တဂ့ၤ.+ ဒီးတဘၣ်မၤ တၢ်အၢၣ်လီၤလၢ အတမ့ၢ်တတီဘၣ်​ လၢၤတဂ့ၤ.+ တၢ်သ့ၣ်တဖၣ်န့ၣ်​ ယသးဟ့အီၤ ခဲလၢာ်လီၤ.’+ ယဟိဝၤယွၤ တဲဝဲဒ်န့ၣ်လီၤ.”

၁၈ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲကဒီးယၤလၢ ၁၉ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘တၢ်ဒုၣ်တၢ်အီၣ်ဖဲ လါလွံၢ်လါတလါ,+ တၢ်ဒုၣ်တၢ်အီၣ်ဖဲ လါယဲၢ်လါတလါ,+ တၢ်ဒုၣ်တၢ်အီၣ်ဖဲ လါနွံလါတလါ+ ဒီးတၢ်ဒုၣ်တၢ်အီၣ်ဖဲ လါတဆံလါတလါန့ၣ်+ ကမ့ၢ်ဝဲ တၢ်သးခု ဒီးတၢ်သူၣ်ဖှံသးညီ အဆၢကတီၢ် လၢယူဒၤအပှၤဂီၢ်မုၢ်အဂီၢ် ဒီးကမ့ၢ်စ့ၢ်ကီး တၢ်သူၣ်ဖှံသးညီ အဘူၣ်တဖၣ်လီၤ.+ အဃိ အဲၣ်တၢ်မ့ၢ်တၢ်တီ ဒီးတၢ်ဃူတၢ်ဖိးတက့ၢ်.’

၂၀ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲကဒီးယၤလၢ ‘တၢ်ဆၢကတီၢ် ကတုၤလၢ ပှၤဂီၢ်မုၢ်တဖၣ်​ ဒီးပှၤလၢအအိၣ်လၢ ဝ့ၢ်အါဖျၢၣ်အပူၤ ကဟဲဖဲအံၤ ၂၁ ဒီးပှၤဝ့ၢ်ဖိတဖၣ်​ ကလဲၤလၢ တဂၤဒီးတဂၤအဝ့ၢ် ဒီးကတဲလိာ်အသးလၢ “လၢတၢ်သးဆူၣ်အပူၤ မ်ပကလဲၤဃ့ကညးတၢ် ဒ်သိးပကန့ၢ်ဘၣ်​ ယဟိဝၤယွၤ အတၢ်သးကညီၤ ဒီးလဲၤဃု တၢ်သုးမုၢ်ဂီၢ်မုၢ်အကစၢ် ယဟိဝၤယွၤတက့ၢ်. ယၤနာ်က့ ယကလဲၤစ့ၢ်ကီးလီၤ.”+ ၂၂ ပှၤအါဂၤ ဒီးပှၤကလုာ်လၢ အဂံၢ်ဆူၣ်ဘါဆူၣ်တဖၣ်​ ကဟဲဃုဝဲ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ လၢဝ့ၢ်ယရူၤၡလ့ၣ်အပူၤ+ ဒီးကဃ့ကညးတၢ် ဒ်သိး ကန့ၢ်ဘၣ်​ ယဟိဝၤယွၤ အတၢ်သးကညီၤ အဂီၢ်လီၤ.’

၂၃ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဖဲန့ၣ်အဆၢကတီၢ် ပှၤပိာ်ခွါအဂၤတဆံလၢ အဟဲလၢ ပှၤကလုာ်တဖၣ်​ လၢအတဲကျိာ် အကလုာ်ကလုာ်အကျါန့ၣ်*+ ကဖီၣ်ဃာ်ဝဲ ပှၤယူဒၤဖိတဂၤ အဆ့ဖးထီ* ဒီးကဖီၣ်တံၢ်ဃာ်ဝဲဃံးဃံး ဒီးကတဲဝဲလၢ “မ့ၢ်လၢ ပနၢ်ဟူဘၣ်လၢ ကစၢ်ယွၤ အိၣ်ဒီးသုအဃိ+ ပအဲၣ်ဒိးလဲၤပိာ်သုခံလီၤ.”’”+

၉ တၢ်ကစီၣ်​ အိၣ်ဝဲဒ်အံၤ တခါလီၤ.

“ယဟိဝၤယွၤ ကွၢ်လီၤပှၤဟီၣ်ခိၣ်ဖိ+

ဒီးပှၤအံၣ်စရ့လးဖိ အဒူၣ်​ ခဲလၢာ်လီၤ.

အဃိ ယဟိဝၤယွၤ တဲဝဲ တၢ်စံၣ်ညီၣ်ကစီၣ်လၢ အထီဒါဝဲ ဃၤဒြး အတၢ်လီၢ်

ဒီးလီၤဆီဒၣ်တၢ် အထီဒါဝဲ ဝ့ၢ်ဒၤမ့ၤစ့းလီၤ.+

 ၂ ဒီးအထီဒါဝဲ ဝ့ၢ်ဃမါသး+ လၢအအိၣ်လၢအဃၢၤ

ဒီးထီဒါဝဲ ဝ့ၢ်စိၢ်+ ဒီးဝ့ၢ်စံဒိၣ်,+ မ့ၢ်လၢ အဝဲသ့ၣ်​ ဆိကမိၣ်လီၤအသးလၢအကူၣ်တၢ်သ့ဒိၣ်မး အဃိလီၤ.+

 ၃ ဝ့ၢ်စိၢ် တ့ထီၣ်ဝဲ အတၢ်ဒူၣ်* လၢကဒီသဒၢလီၤအသးအဂီၢ်

ဒီးပာ်ဖှိၣ်ထီၣ်စ့ညၣ်​ တုၤလၢ အအိၣ်အါထဲသိးဒီး ဖၣ်ဆါကမူၣ်

ဒီးပာ်ဖှိၣ်ထီၣ်ထူ တုၤလၢ အအိၣ်အါထဲသိးဒီး ဟီၣ်ခိၣ်ကမူၣ်​ လၢကျဲပူၤလီၤ.+

 ၄ ယဟိဝၤယွၤ ကထုးကွံာ် ဝ့ၢ်စိၢ်အတၢ်ဖိတၢ်လံၤတဖၣ်

ဒီးမၤလီၤဘျၢ အသုးမုၢ် လၢပီၣ်လဲၣ်ပူၤ+

ဒီးမ့ၣ်အူကအီၣ်ကွံာ်ဝ့ၢ်စိၢ်လီၤ.+

 ၅ ဝ့ၢ်အၤၡကလိၣ်​ ကထံၣ်ဘၣ်ဝဲ ဒီးကပျံၤတၢ်

ဝ့ၢ်ဂါစၤ ကတူၢ်ဘၣ်​ တၢ်သူၣ်ကိၢ် သးဂီၤဖးဒိၣ်

ဝ့ၢ်ဧ့ကြိၣ်စ့ၢ်ကီး ကတူၢ်ဘၣ်ဝဲဒ်န့ၣ်, မ့ၢ်လၢ အတၢ်မုၢ်လၢ် ဟးဂီၤဝဲ အဃိလီၤ.

ဝ့ၢ်ဂါစၤအစီၤပၤ တအိၣ်လၢၤဘၣ်,

ဒီးပှၤတအိၣ်လၢ ဝ့ၢ်အၤၡကလိၣ် အပူၤ နီတဂၤလၢၤဘၣ်.+

 ၆ ပှၤထံဂၤကီၢ်ဂၤဖိတဂၤန့ၣ်​ ကလဲၤအိၣ်လၢ ဝ့ၢ်အၤစဒိာ်

ဒီးယကမၤဟးဂီၤကွံာ် ပှၤဖလ့ၡသးဖိ အတၢ်ပာ်ထီၣ်ထီသးလီၤ.+

 ၇ ယကထုးကွံာ် တၢ်သွံၣ်လၢ ပှၤဖလ့ၡသးဖိ အကိာ်ပူၤ

ဒီးတၢ်လီၤသးဘၣ်အၢတဖၣ်​ လၢအမဲကဆူးလီၤ.

ဒီးအပှၤလၢအအိၣ်တ့ၢ်တဖၣ်န့ၣ်​ ကကဲထီၣ်​ ပကစၢ်ယွၤ အတၢ်လီၤ.

ဒီးအကကဲထီၣ်က့ၤဒ် ပှၤခိၣ်ပှၤနၢ်တဂၤအသိး လၢယူဒၤအပူၤ+

ဒီးပှၤဧ့ကြိၣ်ဖိ ကကဲထီၣ်​ ဒ်သိးဒီး ပှၤယဘူၣ်ဖိတဖၣ်လီၤ.+

 ၈ ခဲအံၤ ယထံၣ်ဘၣ်​ တၢ်အိၣ်သး* လၢယနီၢ်ကစၢ် အမဲာ်လံ.

အဃိ ယကသူၣ်လီၤဒဲလၢ ယထံကီၢ်* အမဲာ်ညါ ဒ်ပှၤခိးတၢ်ဖိအသိး+

ဒ်သိး ပှၤသုတလဲၤနုာ်လီၤဟးထီၣ်​ တဂ့ၤအဂီၢ်လီၤ.

ဒီးပှၤလၢ အဆီၣ်တံၢ်မၤနၢၤတၢ် တဟဲခီဂာ်တၢ် ဖဲအံၤလၢၤဘၣ်.+

 ၉ စံယိၣ်အဖိမုၣ်ဧၢ, သူၣ်ဖှံသးညီ ဒိၣ်မးတက့ၢ်.

ယရူၤၡလ့ၣ်​ အဖိမုၣ်ဧၢ, ကိးပသူထီၣ်လၢ တၢ်သးခုအပူၤတက့ၢ်.

ကွၢ်မီၤ, နစီၤပၤ ဟဲလၢနအိၣ်လံ.+

အမ့ၢ်ပှၤတီပှၤလိၤ ဒီးဒုးအိၣ်ထီၣ်​ တၢ်အုၣ်က့ၤခီၣ်က့ၤလီၤ.

အဝဲအိၣ်ဒီး တၢ်ဆီၣ်လီၤသး+ ဒီးအဒိးဝဲကသ့ၣ်ယီၤ လၢအမ့ၢ်

ကသ့ၣ်ယီၤမိၢ် အဖိတဒုလီၤ.*+

၁၀ ယကထုးထီၣ်ကွံာ် လ့ၣ်ကဟၣ်ဒုးသုးလၢ အ့ဖရဲၣ်အတၢ်လီၢ်

ဒီးယကထုးထီၣ်ကွံာ် ကသ့ၣ်တဖၣ်လၢ ဝ့ၢ်ယရူၤၡလ့ၣ် အပူၤလီၤ.

ဒီးပှၤသုးဖိအချံၣ်တဖၣ်​ ကဘၣ်တၢ်ဟံးထီၣ်ကွံာ်အီၤလီၤ.

ဒီးအဝဲ ကဘိးဘၣ်သ့ၣ်ညါဝဲ ပှၤကလုာ်တဖၣ်လၢ တၢ်ဃူတၢ်ဖိး+

ဒီးအဝဲကပၢတၢ် စးထီၣ်လၢ ပီၣ်လဲၣ်လၢမုၢ်ထီၣ်တကပၤ တုၤလၢ ပီၣ်လဲၣ်လၢ မုၢ်နုာ်တကပၤ

ဒီးစးထီၣ်လၢ ထံကျိ* တုၤလၢ ဟီၣ်ခိၣ်အနၢၣ်​ အကတၢၢ်လီၤ.+

၁၁ ပိာ်မုၣ်ဧၢ,* မ့မ့ၢ်နၤန့ၣ်​ ခီဖျိ တၢ်အၢၣ်လီၤအီလီၤလၢ ယမၤဒီးနၤ

လၢ အဘၣ်တၢ်ပာ်ဂၢၢ်ပာ်ကျၢၤအီၤလၢ တၢ်သွံၣ်အဃိ

ယကမၤထူၣ်ဖျဲးထီၣ်ကွံာ် နပှၤဃိာ်ဖိတဖၣ်လၢ တၢ်ပူၤလၢ ထံတအိၣ်ဘၣ်​ အလီၢ်လီၤ.+

၁၂ ပှၤဃိာ်ဖိတဖၣ်လၢ အအိၣ်ဒီး တၢ်မုၢ်လၢ်သ့ၣ်ဧၢ, ဟဲက့ၤကဒါက့ၤလၢ တၢ်အိၣ်သဒၢအလီၢ်တက့ၢ်.+

တနံၤအံၤ ယကတဲနၤလၢ

‘ပိာ်မုၣ်ဧၢ, နကန့ၢ်ဘၣ်​ တၢ်ဆိၣ်ဂ့ၤလၢ ယအိၣ်ခံစးလီၤ.+

၁၃ ယကဖ့ၣ်ထီၣ်​ ယူဒၤဒ် ယချံၣ်အသိး

ဒီးယကဟံးထီၣ်​ အ့ဖရဲၣ်​ ဒ်ပျၢ်တဘိလၢချံၣ်အဂီၢ် အသိးလီၤ.

စံယိၣ်ဧၢ, ယကမၤပၢၢ်ထီၣ်​ နဖိခွါတဖၣ်

ဒ်သိး အကထီဒါ ကီၢ်ကြံး အဖိခွါတဖၣ်လီၤ.

ဒီးယကဒုးကဲထီၣ်နၤ ဒ်သိးဒီး ပှၤသုးဖိလၢ အဂံၢ်ဆူၣ်တဂၤ အနးလီၤ.’

၁၄ ယဟိဝၤယွၤ ကပာ်ဖျါထီၣ်ဝဲလၢ အအိၣ်ဒီး အပှၤဂီၢ်မုၢ်

ဒီးအပျၢ်ကလဲၤထီၣ်ဝဲ ဒ်သိးဒီး လီဝၢ်ဒံးလီၤ.

တၢ်ပၢကစၢ် ယဟိဝၤယွၤ ကအူသီၣ်ထီၣ်ကွဲၤ+

ဒီးအဝဲ ကလဲၤထီၣ်ဝဲ ဒ်ကလံၤမုၢ်လၢ ကလံၤထံးတခီအသိးလီၤ.

၁၅ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ ကဒီသဒၢ အပှၤဂီၢ်မုၢ်

ဒီးအဝဲသ့ၣ်​ ကမၤဟးဂီၤကွံာ် ဒီးယီၢ်တံၢ်လီၤ လၢၢ်လၢပှၤကွံာ်အီၤလၢ နီၣ်ဘျုးလီၤ.*+

အဝဲသ့ၣ်​ ကသးခု ဒီးကိးပသူထီၣ်​ ဒ်ပှၤအီစပံးထံအသိး

ဒီးအဝဲသ့ၣ်​ ကကဲထီၣ်​ ဒ်သိးဒီး လီခီတဖျၢၣ်လၢ စပံးထံ အိၣ်ပှဲၤပှဲၤလၢအပူၤလီၤ.

ဒီးကကဲထီၣ်​ ဒ်သိးဒီး တၢ်လုၢ်လီၢ် အနၢၣ်တဖၣ်လၢ+ အဘၣ်စီၣ်ဒီး တၢ်သွံၣ်လီၤ.

၁၆ ဖဲတၢ်တနံၤန့ၣ်​ ယဟိဝၤယွၤ ကမၤပူၤဖျဲးအဝဲသ့ၣ်

ဒ်ပှၤကွၢ်သိ မၤပူၤဖျဲးအသိ အသိးလီၤ.+

ဒီးအဝဲသ့ၣ်​ ကကဲထီၣ်ဒ်သိးဒီး ခိၣ်သလုးအလၢၢ်လုၢ်ဒိၣ်ပှ့ၤဒိၣ်တဖၣ်​ လၢအကပြုၢ်ကပြီၤလၢ ကီၢ်ပူၤလီၤ.+

၁၇ ကစၢ်ယွၤ အတၢ်ဂ့ၤတၢ်ဝါ အိၣ်ဝဲအါဒိၣ်မး+

ဒီးအလၤကပီၤ ဒိၣ်ဝဲဒိၣ်မးလီၤ.

ဘုဧိၤဟုဧိၤ ကမၤဆူၣ်ထီၣ်​ ပှၤဖိၣ်သၣ်ခွါတဖၣ်​ အဂံၢ်အဘါ

ဒီးစပံးထံအသီ ကမၤဆူၣ်ထီၣ်​ ပှၤမုၣ်ကနီၤတဖၣ်​ အဂံၢ်အဘါလီၤ.”+

၁၀ “ဃ့ယၤ, ယဟိဝၤယွၤ ဒ်သိး မူခိၣ်ကစူၤလီၤ ဖဲတၢ်ကိၢ်ထီၣ်သီ အဆၢကတီၢ်တက့ၢ်.

ယၤ, ယဟိဝၤယွၤန့ၣ်​ ယဒုးအိၣ်ထီၣ်​ တၢ်အၢၣ်ခံးသူတဖၣ်

ဒီးဒုးစူၤလီၤဝဲ တၢ်စူၤထံလီၤ.+

ဒီးယဒုးမဲထီၣ်​ တၢ်မုၢ်တၢ်ဘိလၢ တၢ်ပျီပူၤ လၢပှၤကိးဂၤဒဲး အဂီၢ်လီၤ.

 ၂ တရၤဖး တၢ်ဂီၤတၢ်ဖှီၣ်တဖၣ်* တဲလံၣ်တဲလီတၢ်လီၤ.

ပှၤလၢအဖး တၢ်ကမၤအသးလၢ ခါဆူညါတဖၣ်​ အတၢ်ထံၣ်လၢညါခီန့ၣ်​ မ့ၢ်ဝဲ တၢ်လံၣ်တၢ်လီလီၤ.

အဝဲသ့ၣ်​ တဲတၢ်ဘၣ်ဃးဒီး အတၢ်မံမီၢ် လၢအဘျုးတအိၣ်ဘၣ်တဖၣ်

ဒီးအဝဲသ့ၣ်​ ဂုာ်ကျဲးစၢး မၤမုာ်ထီၣ် ပှၤသး ဘၣ်ဆၣ်​ အကဲထီၣ် တၢ်ကလီကလီလီၤ.

အဃိ ပှၤဂီၢ်မုၢ် ကဟးဖျိး ဒ်သိးဒီး သိတဖၣ်လီၤ.

ပှၤကွၢ်သိတအိၣ်ဘၣ်အဃိ အဝဲသ့ၣ်​ ကဘၣ်နးဘၣ်ဖှီၣ်လီၤ.

 ၃ ယကသးဒိၣ်ထီၣ်​ ပှၤကွၢ်သိတဖၣ်

ဒီးယကစံၣ်ညီၣ်​ ခိၣ်နၢ်လၢ အမၤနၢၤအီၣ်ဃီၣ်တၢ်လီၤ.

ယၤ, တၢ်သုးမုၢ်ဂီၢ်မုၢ် အကစၢ်ယဟိဝၤယွၤန့ၣ်​ ယဃၣ်ဃီၤယသးဆူ ယသိလၢအမ့ၢ်+ ယူဒၤ အပှၤဂီၢ်မုၢ်တဖၣ်​ အအိၣ်လံ.

ဒီးယဒုးကဲထီၣ်​ အဝဲသ့ၣ်​ ဒ်သိးဒီး ယကသ့ၣ်လၢအဂံၢ်ဆူၣ်ဘါဆူၣ်လၢ တၢ်ဒုးအပူၤလံ.

 ၄ ပှၤအခိၣ်တဂၤ ကဟဲလီၤစၢၤဝဲလၢ ယူဒၤလီၤ.

ပှၤပၢတၢ်လၢ အဆီၣ်ထွဲတၢ်တဂၤန့ၣ် ကဟဲလီၤစၢၤဝဲလၢ ယူဒၤလီၤ.

ပှၤသုးဖိအချံၣ်န့ၣ်​ ကဟဲလီၤစၢၤဝဲလၢ ယူဒၤလီၤ.

ဒီးပှၤကွၢ်ထွဲတၢ်ကိးဂၤဒဲး ဒီးအဝဲသ့ၣ်​ ခဲလၢာ်န့ၣ်​ ကဟဲလီၤစၢၤဝဲလၢ ယူဒၤလီၤ.

 ၅ အဝဲသ့ၣ်​ ကလီၤဂာ်ဒ်သိးဒီး ပှၤသုးဖိလၢ အဂံၢ်ဆူၣ်ဘါဆူၣ်တဖၣ်

ဒီးလၢတၢ်ဒုးပူၤန့ၣ်​ အဝဲသ့ၣ်​ ကယီၢ်တံၢ်လီၤ ကပံာ်လၢ အအိၣ်လၢ ကျဲပူၤလီၤ.

မ့ၢ်လၢ ယၤ, ယဟိဝၤယွၤ အိၣ်ဒီးအဝဲသ့ၣ်အဃိ အဝဲသ့ၣ်​ ကဒုးတၢ်+

ဒီးဒုၣ်ဒါလၢ အဒိးကသ့ၣ်တဖၣ်န့ၣ်​ ကမဲာ်ဆှးလီၤ.+

 ၆ ယကဒုးဆူၣ်ထီၣ်​ ယူဒၤအပှၤဂီၢ်မုၢ်

ဒီးယကမၤပူၤဖျဲး စီၤယိၤသး အစၢၤအသွဲၣ်လီၤ.+

ယကဒုး ဟဲက့ၤကဒါက့ၤ အဝဲသ့ၣ်​ လၢအထံအကီၢ်

မ့ၢ်လၢ ယကပာ်ဖျါထီၣ်​ တၢ်သးကညီၤလၢ အဝဲသ့ၣ်​ အဖီခိၣ်​ အဃိလီၤ.+

ဒီးအဝဲသ့ၣ်​ ကလီၤဂာ်ဒီး ပှၤလၢ ယတပာ်တ့ၢ်အီၤ နီတဘျီဘၣ်​ အသိးလီၤ.+

ယမ့ၢ်အဝဲသ့ၣ်​ အကစၢ် ယဟိဝၤယွၤ ဒီးယကစံးဆၢ အဝဲသ့ၣ်လီၤ.

 ၇ ဒီးအ့ဖရဲၣ်အပှၤဂီၢ်မုၢ် ကဘၣ်ကဲထီၣ်​ ဒ်သိးဒီး ပှၤသုးဖိလၢ အဂံၢ်ဆူၣ် ဘါဆူၣ်တဂၤလီၤ.

ဒီးအဝဲသ့ၣ်​ ကသူၣ်ဖှံသးညီ ဒ်ပှၤလၢအအီဘၣ်​ စပံးထံအသိးလီၤ.+

အဝဲသ့ၣ်​ အဖိတဖၣ်န့ၣ်​ ကထံၣ်ဘၣ်ဝဲ ဒီးကသူၣ်ဖှံသးညီလီၤ.

ဒီးအဝဲသ့ၣ်​ ကသးခုဝဲလၢ ယၤ, ယဟိဝၤယွၤ အပူၤလီၤ.+

 ၈ ‘ယကကွ့ကလံၤလၢ အဝဲသ့ၣ်အအိၣ်​ ဒီးယကပာ်ဖှိၣ်ထီၣ်က့ၤ အဝဲသ့ၣ်​ တပူၤဃီလီၤ.

ယကပှ့ၤက့ၤ အဝဲသ့ၣ်+ ဒီးအဝဲသ့ၣ်​ ကအါထီၣ်ဂီၢ်ထီၣ်ဝဲလီၤ.

ဒီးအဝဲသ့ၣ်​ ကဆဲးအါထီၣ်ဂီၢ်ထီၣ်ဝဲ ကွ့ၢ်ကွ့ၢ်လီၤ.

 ၉ ယကမၤလီၤပြံလီၤပြါ အဝဲသ့ၣ်​ ဒ်တၢ်ချံအသိး လၢပှၤဂီၢ်မုၢ်တဖၣ်အကျါ

ဘၣ်ဆၣ်​ ဖဲအဝဲသ့ၣ်​ အိၣ်လၢတၢ်လီၢ် လၢအယံၤအခါ အဝဲသ့ၣ်​ ကသ့ၣ်နီၣ်ထီၣ်ယၤလီၤ.

ဒီးအဝဲသ့ၣ်​ ဒီးအဖိခွါတဖၣ်​ ကန့ၢ်ဘၣ် တၢ်ဂံၢ်တၢ်ဘါ လၢအသီ ဒီးကဟဲက့ၤကဒါက့ၤ လၢယအိၣ်လီၤ.

၁၀ ယကဒုးဟးထီၣ်အဝဲသ့ၣ်​ လၢကီၢ်အဲၤကူပတူးအပူၤ

ဒီးပာ်ဖှိၣ်ထီၣ်အဝဲသ့ၣ်​ ဒီးဒုးဟးထီၣ်အဝဲသ့ၣ်​ လၢကီၢ်အၤၡူၢ်+

ဒီးလဲၤဆှၢအဝဲသ့ၣ်လၢ ကံးလဧး+ ဒီးလဘၤနိၣ်​ အဟီၣ်ကဝီၤလီၤ.

ဒီးဖဲတၢ်လီၢ်တဖၣ်န့ၣ်အပူၤ ဒၣ်လဲာ် အဝဲသ့ၣ်​ အိၣ်ဝဲတတြီၢ်ဘၣ်.+

၁၁ ယကလဲၤခီဂာ်ပီၣ်လဲၣ်​ ဒီးခွံခွးထီၣ်အထံ

ဒီးယကတီၢ်လီၤ ပီၣ်လဲၣ်အလပီတဖၣ်လီၤ.+

ဒီးထံကျိနံၤလါ အထံခဲလၢာ်န့ၣ်​ ကလီၤသံးကွံာ်ဝဲလီၤ.

ဒီးအၤၡူၢ် အတၢ်ပာ်ထီၣ်ထီအသးန့ၣ်​ ကဘၣ်တၢ်ဆီၣ်လီၤအီၤ

ဒီးအဲၤကူပတူး အစိကမီၤန့ၣ်* ကလီၤမၢ်ကွံာ်ဝဲလီၤ.+

၁၂ ယၤ ယဟိဝၤယွၤန့ၣ်​ ယကဒုးဆူၣ်ထီၣ်​ အဝဲသ့ၣ်+

ဒီးအဝဲသ့ၣ်​ ကလဲၤတၢ်လၢ ယမံၤအပူၤလီၤ.’+ ယၤ, ယဟိဝၤယွၤ တဲဝဲဒ်န့ၣ်လီၤ.”

၁၁ “အိ လဘၤနိၣ်ဧၢ, အိးထီၣ် နပဲတြီတဖၣ်

ဒ်သိးမ့ၣ်အူကအီၣ်ကွံာ် နသ့ၣ်ဆှိအ့ရ့းတဖၣ်​ အဂီၢ်တက့ၢ်.

 ၂ သ့ၣ်ကၠူနံးဖၢၤဧၢ, မ့ၢ်လၢ သ့ၣ်ဆှိအ့ရ့းလီၤကူၢ်လံအဃိ ဟီၣ်ထီၣ်ယၢၤထီၣ်သၢၤ.

ဒီးသ့ၣ်လၢအဒိၣ်အထီတဖၣ်​ ဘၣ်တၢ်မၤဟးဂီၤအီၤလံ.

ဘၤၡၣ်အသ့ၣ်ထိးဖၣ်ဧၢ, ဟီၣ်ထီၣ်ယၢၤထီၣ်

မ့ၢ်လၢ သ့ၣ်ပှၢ်လၢအတီၣ်န့ၣ်​ ဘၣ်တၢ်မၤဟးဂီၤကွံာ်အီၤလံ.

 ၃ ကနၣ်လၢန့ၣ်, ပှၤကွၢ်သိတဖၣ်န့ၣ်​ မ့ၢ်လၢအဝဲသ့ၣ်​ အလၤကပီၤ ဘၣ်တၢ်မၤဟးဂီၤကွံာ်အီၤလံအဃိ

အဝဲသ့ၣ်​ ဟီၣ်ထီၣ်ဝဲလံ.

ကနၣ်လၢန့ၣ်, မ့ၢ်လၢယၢ်ဒ့ၣ်​ အသ့ၣ်ပှၢ်တပှီာ်တီၣ်​ ဘၣ်တၢ်မၤဟးဂီၤအီၤလံအဃိ

ခ့ယုၢ်ဖိတဖၣ်​ ကညီၤထီၣ်လံ.

၄ “ယကစၢ် ယဟိဝၤယွၤ တဲဝဲလၢ ‘သိတဖုလၢ အဘၣ်တၢ်ပာ်လီၤဆီအီၤလၢ တၢ်ကမၤသံအီၤအဂီၢ်န့ၣ်​ ကွၢ်ထွဲအီၤ ဒ်ပှၤကွၢ်သိတဂၤအသိးတက့ၢ်.+ ၅ ပှၤလၢအပှ့ၤ သိတဖၣ်အံၤန့ၣ်​ မၤသံအီၤ+ ဘၣ်ဆၣ်​ ပှၤတဟံးန့ၢ်အဝဲသ့ၣ်အရ့ဘၣ်. ဒီးပှၤလၢအဆါလီၤ သိတဖၣ်အံၤန့ၣ်+ တဲဝဲလၢ “ယကကဲဒိၣ်ထီၣ်​ အဃိ မ်ယဟိဝၤယွၤ ဘၣ်တၢ်စံးထီၣ်ပတြၢၤအီၤတက့ၢ်.” ဒီးပှၤကွၢ်သိတဖၣ်န့ၣ်​ တသးကညီၤ အသိတဖၣ်အံၤဘၣ်.’+

၆ “ယဟိဝၤယွၤ တဲဝဲလၢ ‘ယတသးကညီၤ ပှၤလၢအအိၣ်ဝဲဆိးဝဲလၢ ကီၢ်အံၤအပူၤလၢၤဘၣ်. ယကဟ့ၣ်လီၤကွံာ် ပှၤတဂၤစုာ်စုာ်လၢ ပှၤလၢအဟံၣ်ခိၣ်ဟံၣ်ဃၢၤအစုပူၤ ဒီးအစီၤပၤအစုပူၤ ဒီးအဝဲသ့ၣ်​ ကမၤဟးဂီၤကွံာ်ဝဲ ကီၢ်အံၤလီၤ. ဒီးယတမၤပူၤဖျဲးထီၣ်​ အဝဲသ့ၣ်လၢ ပှၤသ့ၣ်တဖၣ်န့ၣ်​ အစုပူၤဘၣ်.’”

၇ ဒီးသိတဖုလၢ ဘၣ်တၢ်ပာ်လီၤဆီအီၤလၢ တၢ်ကမၤသံအီၤအဂီၢ် လၢအမ့ၢ် သုဝဲသိလၢ အဘၣ်နးဘၣ်ဖှီၣ်တဖၣ်န့ၣ်​ ယစးထီၣ်ကွၢ်ထွဲသုလၢ သုဘျုးအဂီၢ်လီၤ.+ အဃိ ယဟံးန့ၢ် နီၣ်ထိးဘိခံဘိ ဒီးတဘိန့ၣ်​ ယကိးအီၤလၢ တၢ်သူၣ်ဂ့ၤသးဝါ ဒီးအဝဲတဘိန့ၣ်​ ယကိးအီၤလၢ တၢ်ဃူတၢ်ဖိးလီၤ.+ ဒီးယစးထီၣ်​ ကွၢ်ထွဲ သိတဖုန့ၣ်လီၤ. ၈ လၢတလါအတီၢ်ပူၤန့ၣ်​ ယထုးထီၣ်ကွံာ် ပှၤကွၢ်သိသၢဂၤ, မ့ၢ်လၢ ယဝံသးစူၤ အဝဲသ့ၣ်​ တကဲလၢၤဘၣ်​ အဃိလီၤ. ဒီးအဝဲသ့ၣ်​ သးဘၣ်အၢယၤ စ့ၢ်ကီးလီၤ. ၉ ဒီးယတဲလၢ “ယတကွၢ်ထွဲသု ဒ်ပှၤကွၢ်သိတဂၤ အသိးလၢၤဘၣ်. ပှၤလၢ အကသံန့ၣ်​ သံဒၣ်ဝဲ, ပှၤလၢ အကလီၤမၢ်န့ၣ်​ လီၤမၢ်ဒၣ်ဝဲ. မ့မ့ၢ်ပှၤလၢ အအိၣ်တ့ၢ်တဖၣ်န့ၣ်​ ကအီၣ်လိာ်သး တဂၤဒီးတဂၤ အညၣ်ဒၣ်ဝဲ.” ၁၀ ယဟံးထီၣ်​ ယနီၣ်ထိးဘိလၢ အဘၣ်တၢ်ကိးအီၤလၢ တၢ်သူၣ်ဂ့ၤသးဝါ+ ဒီးယဒီၣ်တဲာ်ကွံာ်အီၤ တကူာ်တကူာ် ဒ်သိးကပာ်ဖျါထီၣ်လၢ ယမၤဟးဂီၤကွံာ် ယတၢ်အၢၣ်လီၤအီလီၤ လၢယမၤဒီး ပှၤဂီၢ်မုၢ်ခဲလၢာ်လီၤ. ၁၁ အဃိ ဖဲတၢ်တနံၤန့ၣ်​ ယတၢ်အၢၣ်လီၤအီလီၤ ဟးဂီၤကွံာ်လီၤ. ဒီးသိလၢ အဘၣ်ကီဘၣ်ခဲလၢ သိတဖုအကျါ လၢအကွၢ်ယၤန့ၣ်​ သ့ၣ်ညါဝဲလၢ အဝဲန့ၣ်မ့ၢ် တၢ်ကစီၣ်လၢ အဟဲလၢ ယဟိဝၤယွၤ အအိၣ်လီၤ.

၁၂ ဒီးယတဲအဝဲသ့ၣ်လၢ “သုမ့ၢ်အဲၣ်ဒိးဟ့ၣ်ယၤ ယပှ့ၤန့ၣ်​ ဟ့ၣ်ဟီ, သုမ့ၢ်တအဲၣ်ဒိးဟ့ၣ်ဘၣ်န့ၣ်​ ကအိၣ်ဒၣ်ဝဲ.” ဒီးအဝဲသ့ၣ်ဟ့ၣ်လီၤ ယပှ့ၤလၢ စ့ညၣ်အဘ့ၣ်​ ၃၀ လီၤ.+

၁၃ ဒီးယဟိဝၤယွၤ တဲယၤလၢ “လၢအဝဲသ့ၣ်​ အတၢ်ထံၣ်န့ၣ်​ ယလုၢ်ယပှ့ၤအိၣ်ထဲန့ၣ်လီၤဧါ. ကွံာ်လီၤစ့တဖၣ်န့ၣ်လၢ တၢ်လုၢ်ဒိၣ်ပှ့ၤဒိၣ်အလီၢ်ဟီ.”+ အဃိ ယဟံးန့ၢ် စ့ညၣ်အဘ့ၣ်​ ၃၀ ဒီးယကွံာ်လီၤလၢ ယဟိဝၤယွၤ အတၢ်လုၢ်ဟံၣ်​ အတၢ်လုၢ်ဒိၣ်ပှ့ၤဒိၣ်​ အလီၢ်ပူၤလီၤ.+

၁၄ ဒီးယနီၣ်ထိးဘိ ခံဘိတဘိ လၢအဘၣ်တၢ်ကိးအီၤလၢ တၢ်ဃူတၢ်ဖိးန့ၣ်+ ယဒီၣ်တဲာ်ကွံာ်အီၤ တကူာ်တကူာ် ဒ်သိးကပာ်ဖျါထီၣ်လၢ ယမၤဟးဂီၤကွံာ် ဒီပုၢ်ဝဲၢ် အတၢ်ရ့လိာ်သးလၢ ယူဒၤ ဒီးအံၣ်စရ့လး အဘၢၣ်စၢၤလီၤ.+

၁၅ ဒီးယဟိဝၤယွၤ တဲယၤလၢ “ဟံးထီၣ်ပှၤကွၢ်သိလၢ အတကျီးဘၣ်​ အတၢ်ဖိတၢ်လံၤတဖၣ်,+ ၁၆ မ့ၢ်လၢ ယကပျဲလၢ ပှၤကွၢ်သိတဂၤ ဟဲပၢၢ်ထီၣ်လၢ ကီၢ်ပူၤအဃိလီၤ. ပှၤကွၢ်သိတဂၤအံၤ အတကွၢ်ထွဲ သိလၢအဘူးကသံတဖၣ်ဘၣ်.+ ဒီးအဝဲတဃု သိဖိလၢ အဟးဖျိးဘၣ်​ ဒီးတမၤဘျါ သိလၢအဘၣ်ဒိဘၣ်ထံးဘၣ်+ ဒီးတဒုးအီၣ်​ သိလၢ အအိၣ်ဆူၣ်တဖၣ်​ အဆၣ်ဘၣ်. လၢတၢ်န့ၣ်အလီၢ် အဝဲ အီၣ်ကွံာ် သိလၢအဘီၣ်တဖၣ်အညၣ်+ ဒီးအဲးကွံာ် သိတဖၣ်​ အခီၣ်မ့ၣ်လီၤ.+

၁၇ ပှၤကွၢ်သိလၢ အတကျီးဘၣ်လၢ အပာ်တ့ၢ်ကွံာ် သိတဖုန့ၣ်+ ကဘၣ်ကီဘၣ်ခဲ သပှၢ်တၢၢ်လီၤ.+

နးတဘ့ၣ်​ ကကျီအစု ဒီးအမဲာ်ချံလၢ အထွဲတခီလီၤ.

ဒီးအစုန့ၣ်​ ကဃ့ထီသံ

ဒီးမ့မ့ၢ် အမဲာ်ချံလၢအထွဲ တခီန့ၣ် တထံၣ်တၢ် နီတစဲးလၢၤဘၣ်.”

၁၂ တၢ်ကစီၣ်​ အိၣ်ဝဲဒ်အံၤ တခါလီၤ.

ယဟိဝၤယွၤ မ့ၢ်ကစၢ်လၢ

အသလၣ်ထီၣ်​ မူခိၣ်,+

ဒုးအိၣ်ထီၣ်​ ဟီၣ်ခိၣ်+

ဒီးဟ့ၣ်လီၤ ပှၤဟီၣ်ခိၣ်ဖိလၢ တၢ်မူအသဟီၣ်လီၤ.*

အဝဲတဲဝဲလၢ “အဝဲအံၤမ့ၢ် ယၤ,

ယဟိဝၤယွၤ အတၢ်ကတိၤလၢ ဘၣ်ဃးဒီး ပှၤအံၣ်စရ့လးဖိလီၤ.

၂ ယကဒုးကဲထီၣ်​ ဝ့ၢ်ယရူၤၡလ့ၣ်​ ဒ်သိးဒီး စပံးထံတခွးလၢ အဒုးဟးကနူၤကပၤ ပှၤလၢ အအိၣ်ဝးတရံးအီၤ ခဲလၢာ်လီၤ. ဒီးပှၤကဟဲကဝီၤဃာ် ယူဒၤ ဒီးဝ့ၢ်ယရူၤၡလ့ၣ်လီၤ.+ ၃ ဖဲန့ၣ်အခါ ယကဒုးကဲထီၣ်​ ဝ့ၢ်ယရူၤၡလ့ၣ်​ ဒ်သိးဒီး လၢၢ်လၢ အဃၢတဖျၢၣ်လၢ ပှၤခဲလၢာ် အဂီၢ်လီၤ. ဒီးပှၤလၢ အစိာ်ထီၣ်အီၤ ကိးဂၤဒဲးန့ၣ်​ ကဘၣ်ဒိဘၣ်ထံး နးမးလီၤ.+ ဒီးပှၤကလုာ်ခဲလၢာ်လၢ ဟီၣ်ခိၣ်ချၢန့ၣ်​ ကဟဲပာ်ဖှိၣ်ထီၣ်အသး ဒ်သိး ကဒုးအီၤ အဂီၢ်လီၤ.+ ၄ ယဟိဝၤယွၤ တဲဝဲလၢ “ဖဲန့ၣ်အခါ ယကမၤပျံၤမၤဖုး ကသ့ၣ်တဖၣ်​ ဒီးယကမၤပျုၢ် ပှၤဒိးကသ့ၣ်တဖၣ်လီၤ. ယကကွၢ်ထွဲ ယူဒၤ အပှၤဂီၢ်မုၢ် ဘၣ်ဆၣ်​ ပှၤကလုာ်တဖၣ်​ အကသ့ၣ်န့ၣ်​ ယကမၤဘျီၣ်​ အမဲာ်ကိးဒုဒဲးလီၤ. ၅ ဒီးယူဒၤ အပှၤခိၣ်ပှၤနၢ်တဖၣ်န့ၣ်​ ကတဲလီၤအသးလၢ ‘ပှၤလၢအအိၣ်လၢ ဝ့ၢ်ယရူၤၡလ့ၣ်ပူၤန့ၣ်​ မ့ၢ်ဝဲ ပတၢ်ဂံၢ်တၢ်ဘါလၢ အဟဲလၢ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ အအိၣ်လီၤ.’+ ၆ ဖဲန့ၣ်အခါ ယကဒုး ကဲထီၣ်ယူဒၤ အပှၤခိၣ်ပှၤနၢ်တဖၣ်​ ဒ်မ့ၣ်အူပူၣ်​ လၢသ့ၣ်တဖၣ်​ အကျါအသိး ဒီးဒ်ဆှိတဘိလၢ အကဲၤဝဲလၢ ဘုကဒိၣ်တဖၣ်​ အကျါအသိးလီၤ.+ ဒီးအဝဲသ့ၣ်​ ကအူအီၣ်ကွံာ် ပှၤလၢ အအိၣ်ဝးတရံးအီၤခဲလၢာ်လၢ အစုစ့ၣ်တခီမ့ၢ်ဂ့ၤ လၢအစုထွဲတခီ မ့ၢ်ဂ့ၤလီၤ.+ ဒီးပှၤလၢ အအိၣ်လၢ ဝ့ၢ်ယရူၤၡလ့ၣ်အပူၤန့ၣ်​ ကဆဲးအိၣ်လၢ အဝဲသ့ၣ်​ အနီၢ်ကစၢ်အတၢ်လီၢ် လၢအမ့ၢ် ဝ့ၢ်ယရူၤၡလ့ၣ်လီၤ.+

၇ “ဒီးယဟိဝၤယွၤ ကမၤပူၤဖျဲးဆိ ယူဒၤအဒဲတဖၣ်​ ဒ်သိး စီၤဒၤဝံး အစၢၤအသွဲၣ်* အလၤကပီၤ ဒီးပှၤလၢအအိၣ်လၢ ဝ့ၢ်ယရူၤၡလ့ၣ်အပူၤတဖၣ်​ အလၤကပီၤ သုတဒိၣ်န့ၢ် ယူဒၤအပှၤလၢအဂၤတဖၣ်​ တဂ့ၤအဂီၢ်လီၤ. ၈ ဖဲတၢ်တနံၤန့ၣ်​ ယဟိဝၤယွၤ ကဒီသဒၢ ပှၤလၢအအိၣ်လၢ ဝ့ၢ်ယရူၤၡလ့ၣ်အပူၤ+ ဒီးဖဲတၢ်တနံၤန့ၣ်​ ပှၤလၢအလီၤဃံၢ်* လၢအဝဲသ့ၣ်အကျါန့ၣ်​ အဂံၢ်ကဆူၣ်ထီၣ်​ ဒ်စီၤဒၤဝံးအသိးလီၤ. ဒီးစီၤဒၤဝံး အစၢၤအသွဲၣ်* အစိအကမီၤ ကအိၣ်ဒ် ယွၤတဂၤအသိး ဒီးကလီၤဂာ်ဒ် ယဟိဝၤယွၤ အမူခိၣ်ကလူးလၢ အလဲၤတၢ်လၢ အဝဲသ့ၣ်​ အမဲာ်ညါလီၤ.+ ၉ ဖဲတၢ်တနံၤန့ၣ်​ ယကမၤဟးဂီၤကွံာ် ကယဲၢ်ပှၤကလုာ်လၢ အဟဲထီဒါ ဝ့ၢ်ယရူၤၡလ့ၣ်​ သပှၢ်ကတၢၢ်လီၤ.+

၁၀ “ယကလူလီၤ ယသးစီဆှံလၢ စီၤဒၤဝံး အစၢၤအသွဲၣ်* အဖီခိၣ်​ ဒီးလၢပှၤလၢ အအိၣ်လၢ ဝ့ၢ်ယရူၤၡလ့ၣ်အပူၤတဖၣ်​ အဖီခိၣ်လီၤ. အဝဲသ့ၣ်​ ကဒိးန့ၢ်ဘၣ်​ ယတၢ်ဘၣ်သး ဒီးအဝဲသ့ၣ်​ ကဃ့ကညးတၢ်လၢ ယအိၣ်လီၤ. အဝဲသ့ၣ်​ ကကွၢ်ဝဲ ပှၤလၢအဝဲသ့ၣ်​ ဆဲးဝဲတဂၤ+ ဒီးအဝဲသ့ၣ်​ ကဟီၣ်ကိးပသူလၢ အဃိ ဒ်ပှၤလၢ အဟီၣ်ဝဲလၢ အဖိခွါ အိၣ်ထဲတဂၤ သံဝဲအဃိ အသိးလီၤ. ဒီးအဝဲသ့ၣ်​ ကသးအုးလၢအဃိ ဒိၣ်မး ဒ်သိးဒီး ပှၤလၢအသးအုးဝဲလၢ အဖိခွါဝဲၢ်ကိ သံဝဲအဃိလီၤ. ၁၁ ဖဲတၢ်တနံၤန့ၣ်​ တၢ်ဟီၣ်တၢ်ယၢၤ ကအိၣ်ဝဲနးမး လၢဝ့ၢ်ယရူၤၡလ့ၣ်အပူၤ ဒ်ပှၤဟီၣ်ထီၣ်ယၢၤထီၣ်လၢ ဟၤဒးရံးမိၣ်​ လၢမကံးဒိၤ အတၢ်ပၢၤခိၣ်​ အသိးလီၤ.+ ၁၂ တၢ်ဟီၣ်တၢ်ယၢၤ ကအိၣ်ထီၣ်ဝဲလၢ ကီၢ်ပူၤလီၤ. ဟံၣ်ဖိဃီဖိ တဒူၣ်စုာ်စုာ် ကဟီၣ်ဝဲ တပူၤစုာ်စုာ်လီၤ. ဒီးစီၤဒၤဝံး အစၢၤအသွဲၣ်​ အဟံၣ်ဖိဃီဖိတဖၣ်​ ကဟီၣ်ဝဲတပူၤ ဒီးပှၤပိာ်မုၣ်လၢ အအိၣ်ဒီး အဝဲသ့ၣ်န့ၣ်​ ကဟီၣ်ဝဲတပူၤလီၤ. စီၤနၤသၣ်​ အစၢၤအသွဲၣ်+ အဟံၣ်ဖိဃီဖိတဖၣ်​ ကဟီၣ်ဝဲတပူၤ ဒီးပှၤပိာ်မုၣ်လၢ အအိၣ်ဒီး အဝဲသ့ၣ်န့ၣ်​ ကဟီၣ်ဝဲတပူၤလီၤ. ၁၃ စီၤလ့ၤဝံ အစၢၤအသွဲၣ်+ အဟံၣ်ဖိဃီဖိတဖၣ်​ ကဟီၣ်ဝဲတပူၤ ဒီးပှၤပိာ်မုၣ်လၢ အအိၣ်ဒီး အဝဲသ့ၣ်န့ၣ်​ ကဟီၣ်ဝဲတပူၤလီၤ. ဒီးစီၤၡံမံၤ အစၢၤအသွဲၣ်+ အဟံၣ်ဖိဃီဖိတဖၣ်​ ကဟီၣ်ဝဲတပူၤ ဒီးပှၤပိာ်မုၣ်လၢ အအိၣ်ဒီး အဝဲသ့ၣ်န့ၣ်​ ကဟီၣ်ဝဲတပူၤလီၤ. ၁၄ တကးဒံးဘၣ်​ ဟံၣ်ဖိဃီဖိ အဒူၣ်အဂၤသ့ၣ်တဖၣ်​ တဒူၣ်စုာ်စုာ် ဒီးပှၤပိာ်မုၣ်လၢ အအိၣ်ဒီးအဝဲသ့ၣ်န့ၣ်​ ကဟီၣ်ဝဲယၢၤဝဲ တပူၤစုာ်စုာ်လီၤ.

၁၃ “ဖဲတၢ်တနံၤန့ၣ်​ တၢ်ကခူၣ်န့ၢ် ထံကမျၢတဖျၢၣ်* လၢစီၤဒၤဝံးအစၢၤအသွဲၣ်* ဒီးပှၤလၢအအိၣ်လၢ ယရူၤၡလ့ၣ်အဂီၢ် လၢတၢ်ကမၤကဆှီထီၣ်​ တၢ်ဒဲးဘး ဒီးတၢ်လၢအတကဆှီဘၣ်တဖၣ်​ အဂီၢ်လီၤ.”+

၂ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ဖဲတၢ်တနံၤန့ၣ်​ ယကမၤဟးဂီၤကွံာ် တၢ်ဂီၤတၢ်ဖှီၣ်တဖၣ်​ လၢကီၢ်ပူၤ+ ဒီးတၢ်တသ့ၣ်နီၣ်ထီၣ်​ အီၤလၢၤဘၣ်. ဒီးယကမၤလီၤမၢ်ကွံာ် ဝံတဖၣ်လၢကီၢ်ပူၤ+ ဒီးတၢ်ဝံတၢ်နါ အစိအကမီၤလီၤ. ၃ ဒီးပှၤတဂၤ မ့ၢ်တဲကဒီးတၢ်ဒ် ဝံအသိးန့ၣ်​ အမိၢ်အပၢ်လၢ အထီၣ်ဖိအီၤန့ၣ်​ ကတဲအီၤလၢ ‘မ့ၢ်လၢ နတဲလံၣ်တဲလီတၢ်လၢ ယဟိဝၤယွၤအမံၤပူၤ အဃိ နကဘၣ်သံလီၤ.’ ဒီးမ့ၢ်လၢ အတဲတၢ်ဒ် ဝံအသိးအဃိ အမိၢ်အပၢ်လၢ အထီၣ်ဖိအီၤန့ၣ်​ ကဆဲးသံအီၤလီၤ.+

၄ “ဖဲတၢ်တနံၤန့ၣ်​ ဝံတဂၤစုာ်စုာ်လၢ အတဲတၢ်ဒ် ဝံအသိးန့ၣ်​ ကမဲာ်ဆှးဝဲလၢ အတၢ်ထံၣ်လၢညါခီ အဃိလီၤ. အဝဲသ့ၣ်​ တကူတသိး ဝံအတၢ်ကူတၢ်သိး*+ ဒ်သိး ကလံၣ်န့ၢ်လီန့ၢ် ပှၤဂၤ အဂီၢ်လၢၤဘၣ်. ၅ ဒီးအဝဲ ကတဲဝဲလၢ ‘ယတမ့ၢ် ဝံဘၣ်. ပှၤပှ့ၤယၤ ဒ်ကုၢ်တဂၤအသိးလၢ ယနီၢ်ဆံးခါလံၤလံၤ အဃိ ယမ့ၢ် ပှၤသူၣ်တၢ်ဖျးတၢ်ဖိလီၤ.’ ၆ ဒီးပှၤတဂၤဂၤ မ့ၢ်သံကွၢ်အီၤလၢ ‘တၢ်ပူၤလီၢ်တဖၣ်လၢ နလိၤန့ၣ်* ဟဲကဲထီၣ်သးဒ်လဲၣ်’ န့ၣ်အဝဲ ကတဲဆၢက့ၤဝဲလၢ ‘ပှၤတီၢ်ယၤလၢ ယသကိးတဖၣ်​ အဟံၣ်ပူၤအဃိ ယအိၣ်ဒီး တၢ်ပူၤလီၢ်တဖၣ်အံၤလီၤ.’”

 ၇ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “အိ နးဧၢ, ပၢၢ်ထီၣ်​ ဒီးလဲၤကျီ ယပှၤကွၢ်သိ+

ဒီးကျီကွံာ် ပှၤတဂၤ လၢအမ့ၢ် ယသကိးသၢၤ.

ကျီကွံာ် ပှၤကွၢ်သိ+ ဒီးသိတဖၣ်ကလီၤပြံလီၤပြါဝဲလီၤ.+

ဒီးယကသိၣ်က့ၤသီက့ၤ ပှၤလၢအရ့တဒိၣ်ဘၣ်တဖၣ်လီၤ.”

 ၈ ယဟိဝၤယွၤ တဲဝဲလၢ “လၢကီၢ်ဒီဘ့ၣ်အပူၤန့ၣ်

ပှၤခံပူ ကဘၣ်တၢ်မၤဟးဂီၤအီၤ ဒီးမၤသံကွံာ်အီၤ

ဒီးပှၤသၢပူတပူန့ၣ်​ ကအိၣ်တ့ၢ်ဝဲလၢ အပူၤလီၤ.

 ၉ ဒီးပှၤသၢပူတပူၤအံၤ ယကဒုးလဲၤခီဂာ်အီၤလၢ မ့ၣ်အူလီၤ.

ဒီးယကပှံၢ်စီ အဝဲသ့ၣ်​ ဒ်သိးဒီး ပှၤပှံၢ်စီ စ့ညၣ်

ဒီးယကမၤကွၢ် အဝဲသ့ၣ်​ ဒ်သိးဒီး ပှၤမၤကွၢ်ထူလီၤ.+

အဝဲသ့ၣ်​ ကကိးထီၣ်ယမံၤ

ဒီးယကစံးဆၢ အဝဲသ့ၣ်လီၤ.

ယကတဲလၢ ‘အဝဲသ့ၣ်​ မ့ၢ်ယပှၤဂီၢ်မုၢ်’+

ဒီးအဝဲသ့ၣ်​ ကတဲဝဲလၢ ‘ယဟိဝၤမ့ၢ် ပယွၤလီၤ.’”

၁၄ “ကွၢ်မီၤ, ယဟိဝၤယွၤ အမုၢ်နံၤဟဲလံ. ဖဲန့ၣ်အခါ တၢ်လၢပှၤဂုာ်န့ၢ်ဆူၣ်အီၤလၢ န* ပူၤန့ၣ်​ ပှၤကနီၤလီၤအီၤလၢ နပူၤလီၤ. ၂ ကစၢ်ယွၤ ကပာ်ဖှိၣ်ထီၣ်​ ပှၤကလုာ်ခဲလၢာ် လၢကဒုးဝဲ ဝ့ၢ်ယရူၤၡလ့ၣ်​ ဒီးပှၤကမၤန့ၢ်ဝဲဝ့ၢ် ဒီးကဂုာ်န့ၢ်ဆူၣ်တၢ်အိၣ်လၢ ဟံၣ်တဖၣ်အပူၤ ဒီးကဖီၣ်ဆူၣ်ပှၤပိာ်မုၣ်တဖၣ်လီၤ. ဒီးပှၤဝ့ၢ်ဖိတဝာ်န့ၣ်​ ကဘၣ်တၢ်က့ၤဖီၣ်အီၤ ဒီးပှၤလၢအအိၣ်တ့ၢ်တဖၣ်န့ၣ်​ ကအိၣ်တ့ၢ်ဘၣ်လၢ ဝ့ၢ်ပူၤလီၤ.

၃ “ယဟိဝၤယွၤ ကလဲၤထီၣ်ဒုး ပှၤကလုာ်တဖၣ်န့ၣ်+ ဒ်အဒုးတၢ်လၢ အပူၤကွံာ် ဖဲတၢ်ဒုးအမုၢ်နံၤန့ၣ်လီၤ.+ ၄ ဖဲတၢ်တနံၤန့ၣ်​ အဝဲကပာ်လီၤအခီၣ်လၢ ကစၢၢ်သ့ၣ်စၤယံးအလိၤလီၤ.+ ကစၢၢ်သ့ၣ်စၤယံးန့ၣ်​ ဃၣ်အသးလၢ ဝ့ၢ်ယရူၤၡလ့ၣ်အအိၣ်​ ဒီးအိၣ်ဝဲလၢ ဝ့ၢ်ယရူၤၡလ့ၣ်​ အမုၢ်ထီၣ်တခီလီၤ. ဒီးကစၢၢ်သ့ၣ်စၤယံးန့ၣ်​ ကသ့ၣ်ဖးလၢအခၢၣ်သး စးထီၣ်လၢ မုၢ်ထီၣ်တခီ တုၤလၢ မုၢ်နုာ်တခီ ဒီးကစၢၢ်တခီန့ၣ်​ ကသုးအသးလၢ ကလံၤစိးတခီ ဒီးအဝဲတခီန့ၣ်​ ကသုးအသးလၢ ကလံၤထံးတခီလီၤ. အဃိ ကစၢၢ်ကဆူးဖးဒိၣ်တခါ ကဟဲအိၣ်ထီၣ်ဝဲလီၤ. ၅ သုကလဲၤဃ့ၢ်ပူၤဖျဲးသုသးလၢ ယကစၢၢ်တဖၣ်အံၤ အကဆူး မ့ၢ်လၢ ကစၢၢ်ကဆူးအံၤ ကအိၣ်ဝဲတုၤလၢ အၤစ့လးတၢ်လီၢ်အဃိလီၤ. သုကဘၣ်​ ဃ့ၢ်ပူၤဖျဲးသုသး ဒ်သိးဒီး သုဃ့ၢ်ပူၤဖျဲးသုသး လၢဟီၣ်ခိၣ်ဟူး ဖဲယူဒၤ အစီၤပၤ ဧူးစံယါ အစိၤလီၤ.+ ဒီးယကစၢ် ယဟိဝၤယွၤ ကဟဲဝဲဒီး အပှၤစီဆှံ ခဲလၢာ်ကအိၣ်ဒီးအီၤလီၤ.+

၆ “ဖဲတၢ်တနံၤန့ၣ်​ တၢ်ကပီၤလၢ အလုၢ်ဒိၣ်ပှ့ၤဒိၣ်န့ၣ်​ တကပီၤထီၣ်ဝဲလၢၤဘၣ်+ ဒီးတၢ်ဖိတၢ်လံၤတဖၣ်​ ကချံၣ်ဒီးကိၣ်လိၣ်ထီၣ်လီၤ. ၇ တၢ်တနံၤန့ၣ်​ ကဘၣ်တၢ်သ့ၣ်ညါအီၤလၢ ယဟိဝၤယွၤ အမုၢ်နံၤလီၤ.+ ဒီးမုၢ်ဆါဒီးမုၢ်နၤ အဆၢတအိၣ်ဘၣ်​ ဒီးဖဲဟါလီၤခီ ဒၣ်လဲာ် တၢ်ကပီၤ ကအိၣ်ဝဲလီၤ. ၈ ဖဲတၢ်တနံၤန့ၣ်​ ထံမူလၢ+ ဝ့ၢ်ယရူၤၡလ့ၣ်​ အပူၤန့ၣ်​ ကယွၤလီၤဝဲလီၤ.+ ထံတဝာ်န့ၣ်​ ကယွၤလီၤဝဲဆူ ပီၣ်လဲၣ်လၢ အအိၣ်လၢ မုၢ်ထီၣ်တခီ+ ဒီးမ့မ့ၢ်အဝဲတဝာ်န့ၣ်​ ကယွၤလီၤဝဲဆူ ပီၣ်လဲၣ်လၢ အအိၣ်လၢ မုၢ်နုာ်တခီလီၤ.+ တၢ်ကကဲထီၣ်အသးဒ်န့ၣ်​ လၢတၢ်ကိၢ်ခါ ဒီးတၢ်ဂိၢ်ခါလီၤ. ၉ ဒီးယဟိဝၤယွၤ ကကဲစီၤပၤလၢ ဟီၣ်ခိၣ်ဒီဘ့ၣ်အဖီခိၣ်လီၤ.+ ဒီးဖဲတၢ်တနံၤန့ၣ်​ ပှၤကိးဂၤဒဲး ကဘူၣ်ထီၣ်ဘါထီၣ်​ ထဲယဟိဝၤယွၤတဂၤ+ ဒီးအဝဲသ့ၣ်​ ကစံးထီၣ်ပတြၢၤ ထဲဒၣ်အမံၤလီၤ.+

၁၀ “ကီၢ်ဒီဘ့ၣ်​ စးထီၣ်လၢ ဝ့ၢ်က့ဘၤ+ တုၤလၢ ဝ့ၢ်ရံးမိၣ်လၢ+ အအိၣ်လၢ ဝ့ၢ်ယရူၤၡလ့ၣ်​ အကလံၤထံး တခီန့ၣ်​ ကကဲထီၣ်​ ဒ်သိးဒီး ဧၤရဘၤ+ အတၢ်တြီၤလီၤ. ဒီးမ့မ့ၢ် ဝ့ၢ်ယရူၤၡလ့ၣ်န့ၣ်​ ကဘၣ်တၢ်ပာ်ထီၣ်ထီအီၤလၢ အအိၣ်ပာ်စၢၤလၢညါအလီၢ်+ ဒီးပှၤကအိၣ်ကဆိးလၢ အပူၤ စးထီၣ်လၢ ဘံၣ်ယၤမံၣ်အတြဲၤ+ တုၤလၢ တြဲၤလၢ အဆိကတၢၢ်တခါအလီၢ် ဒီးတုၤလီၤလၢ တၢ်အသနၢၣ်အတြဲၤ ဒီးစးထီၣ်လၢ ဃနၤန့လး အတၢးထီ+ တုၤလၢ စီၤပၤ အစပံးကျီးတဖၣ်လီၤ. ၁၁ ဒီးပှၤကအိၣ်လၢ ဝ့ၢ်ယရူၤၡလ့ၣ်အပူၤ ဒီးဝ့ၢ်ယရူၤၡလ့ၣ်​ တဘၣ်တၢ်ဆိၣ်အၢအီၤ လၢအကဟးဂီၤအဂီၢ် နီတဘျီလၢၤဘၣ်.+ ဒီးပှၤကအိၣ်ဘၣ်လၢ ဝ့ၢ်ယရူၤၡလ့ၣ်အပူၤ ဘံၣ်ဘံၣ်ဘၢဘၢလီၤ.+

၁၂ “တၢ်စံၣ်ညီၣ်လၢ ယဟိဝၤယွၤ ကစံၣ်ညီၣ်ဝဲ ကယဲၢ်ပှၤလၢ အဟဲဒုး ဝ့ၢ်ယရူၤၡလ့ၣ်န့ၣ်​ မ့ၢ်ဝဲဒ်အံၤလီၤ.+ ဖဲအဝဲသ့ၣ်​ ဆၢထၢၣ်ဒံးအခါ အညၣ်ကအုၣ်ထီၣ်ဝဲ ဒီးအမဲာ်ချံ ကအုၣ်ထီၣ်ဝဲလၢ အမဲာ်သကွီၤ အပူၤလီၤ. ဒီးအဝဲသ့ၣ်အပျ့ၤန့ၣ်​ ကအုၣ်ထီၣ်ဝဲလၢ အကိာ်ပူၤလီၤ.

၁၃ “ဖဲတၢ်တနံၤန့ၣ်​ ယဟိဝၤယွၤ ကဒုးအိၣ်ထီၣ်​ တၢ်သဘံၣ်သဘုၣ်ဖးဒိၣ်လၢ အဝဲသ့ၣ်​ အကျါဝးဝး ဒီးအဝဲသ့ၣ်​ တဂၤစုာ်စုာ် ကဖီၣ်တံၢ်အသကိးအစု ဒီးကဒုးလိာ်အသး ကဒဲကဒဲလီၤ.+ ၁၄ ဒီးဖဲတၢ်ဒုးကဲထီၣ်လၢ ဝ့ၢ်ယရူၤၡလ့ၣ်အခါ ယူဒၤ အပှၤဂီၢ်မုၢ်စ့ၢ်ကီး ကနုာ်လီၤပၣ်ဃုာ်လီၤ. ဒီးအဝဲသ့ၣ်​ ကဟံးန့ၢ် ပှၤကလုာ်လၢ အအိၣ်ဝးတရံးအီၤ ခဲလၢာ် အတၢ်ထူးတၢ်တီၤ အဃိ အဝဲသ့ၣ်​ ကပာ်ဖှိၣ်ထီၣ် ထူ, စ့ ဒီးတၢ်ကူတၢ်သိး အါအါဂီၢ်ဂီၢ်လီၤ.+

၁၅ “ဒီးကသ့ၣ်တဖၣ်, ကသ့ၣ်လၤတဖၣ်,* ကီၤလၤအူးတဖၣ်, ကသ့ၣ်ယီၤတဖၣ်​ ဒီးဆၣ်ဖိကီၢ်ဖိ ခဲလၢာ်လၢ အအိၣ်လၢ ဒုၣ်ဒါ အဒဲကဝီၤတဖၣ်အပူၤန့ၣ်​ တၢ်ဆါသံသတြိာ် ဒ်န့ၣ်တကလုာ် ကဘၣ်အီၤလီၤ.

၁၆ “လၢပှၤကလုာ်လၢ အဟဲဒုး ဝ့ၢ်ယရူၤၡလ့ၣ်တဖၣ်အကျါ ပှၤလၢအအိၣ်တ့ၢ် ကိးဂၤဒဲးန့ၣ်​ ကလဲၤထီၣ်​ လၢဝ့ၢ်ယရူၤၡလ့ၣ်​ တနံၣ်ဘၣ်တနံၣ်+ ဒ်သိး ကဘူၣ်ထီၣ်ဘါထီၣ်ဝဲ စီၤပၤလၢအမ့ၢ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ+ ဒီးကမၤဝဲ ဘူၣ်ဒဲအဂီၢ်လီၤ.+ ၁၇ ဒီးပှၤတဂၤဂ့ၤတဂၤဂ့ၤလၢ ပှၤအဒူၣ်တဖၣ်လၢ ဟီၣ်ခိၣ်ချၢ အကျါန့ၣ်​ မ့ၢ်တလဲၤထီၣ်လၢ ဝ့ၢ်ယရူၤၡလ့ၣ်​ ဒီးဘူၣ်ထီၣ်ဘါထီၣ်​ စီၤပၤလၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤဘၣ်န့ၣ်​ တၢ်တစူၤလီၤန့ၢ် အဝဲသ့ၣ်ဘၣ်.+ ၁၈ ဒီးပှၤအဲၤကူပတူးဖိတဖၣ်​ မ့ၢ်တဟဲထီၣ်​ ဒီးနုာ်လီၤလၢ ဝ့ၢ်ပူၤဘၣ်န့ၣ်​ တၢ်တစူၤလီၤန့ၢ် အဝဲသ့ၣ်ဘၣ်. လၢတၢ်န့ၣ်အလီၢ် အဝဲသ့ၣ်​ ကတူၢ်ဘၣ်​ တၢ်ဆါသံသတြိာ် ဒ်သိးဒီး ပှၤကလုာ်တဖၣ်လၢ ယဟိဝၤယွၤ ဒုးလီၤဘၣ်​ တၢ်ဆါသံသတြိာ် လၢအလိၤ ခီဖျိလၢ အဝဲသ့ၣ်​ တဟဲထီၣ်​ မၤဘူၣ်ဒဲဘၣ်အဃိလီၤ. ၁၉ အဝဲန့ၣ်​ မ့ၢ်ဝဲ တၢ်စံၣ်ညီၣ်လၢ ပှၤအဲၤကူပတူးဖိ ဒီးပှၤကလုာ်ခဲလၢာ် လၢအတဟဲထီၣ်မၤဘူၣ်ဒဲဘၣ်တဖၣ်​ အဂီၢ်လီၤ.

၂၀ “ဖဲတၢ်တနံၤန့ၣ်​ တၢ်ကတိၤတဖၣ်​ လၢအမ့ၢ် ‘ယဟိဝၤယွၤ မ့ၢ်တၢ်စီဆှံ အဂံၢ်ခီၣ်ထံး’+ န့ၣ်ကဘၣ်တၢ်ကွဲးလီၤအီၤလၢ ဒၢလွဲလၢ အလီၤကစဲၤလၢ ကသ့ၣ်တဖၣ်​ အလိၤလီၤ. ဒီးသပၢၤဖီအီၣ်တၢ်တဖၣ်လၢ+ ယဟိဝၤယွၤ အတၢ်လုၢ်ဟံၣ်ပူၤန့ၣ်​ ကစီဆှံထဲသိးဒီး လီခီဖျၢၣ်တဖၣ်လၢ+ အအိၣ်လၢ တၢ်လုၢ်လီၢ် အမဲာ်ညါလီၤ. ၂၁ သပၢၤဖီအီၣ်တၢ်လၢ ဝ့ၢ်ယရူၤၡလ့ၣ်​ ဒီးယူဒၤအပူၤ ကိးဖျၢၣ်ဒဲးန့ၣ်​ ကစီဆှံ ဒီးကမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤ အတၢ် ဒီးပှၤလၢ အကဟဲလုၢ်ထီၣ်တၢ် ကိးဂၤဒဲးန့ၣ်​ ကဟဲနုာ်လီၤဝဲ ဒီးကသူဝဲဒ်သိး ကချီတၢ်အဂီၢ်လီၤ. ဖဲတၢ်တနံၤန့ၣ်​ လၢတၢ်သုးမုၢ်ဂီၢ်မုၢ်အကစၢ် ယဟိဝၤယွၤ အဟံၣ်န့ၣ်​ ပှၤကနၤဧၣ်ဖိ* တအိၣ်လၢၤဘၣ်.”+

အခီပညီမ့ၢ်ဝဲ “ယဟိဝၤ သ့ၣ်နီၣ်ထီၣ်က့ၤ.”

ကွၢ် တၢ်ဂ့ၢ်ဘၣ်ထွဲလိာ်သး ခ၁၅.

အခီပညီလိၤလိၤ “ယူာ်ထီၣ်အနၢၤ.”

မ့ၢ်စ့ၢ်ကီး “မဲာ်ချံ.”

အခီပညီလိၤလိၤ “စၤတၣ်.” မံၤအံၤ အခီပညီမ့ၢ်ဝဲ “ပှၤလၢအထီဒါတၢ်.”

အခီပညီလိၤလိၤ “ယဟံၣ်.”

ဖျါလၢအဲၣ်ဒိးတဲဝဲ မူခိၣ်ကလူးအဂၤတဖၣ်.

ဘၣ်သ့ၣ်သ့ၣ်​ အခီပညီမ့ၢ်ဝဲ တၢ်မဲာ်ချံနွံဖျၢၣ်​ ကွၢ်ဝဲလၢၢ်တဖျၢၣ်အံၤ.

မ့ၢ်စ့ၢ်ကီး “စၢၢ်သၣ်အနီၣ်ထိၣ်.”

‘တၢ်သ့ၣ်တဖၣ်န့ၣ်’ ကအဲၣ်ဒိးတဲဝဲ မ့ၣ်အူအခွးနွံဖျၢၣ်​ မ့တမ့ၢ် ယဟိဝၤယွၤ အမဲာ်ချံတဖၣ်.

ကွၢ် တၢ်ဂ့ၢ်ဘၣ်ထွဲလိာ်သး ခ၁၄.

အခီပညီလိၤလိၤ “အ့ဖး.” ဖဲအံၤ အဲၣ်ဒိးတဲဝဲလၢ တၢ်ဒၢ မ့တမ့ၢ် နာ်လၢ ပှၤသူဝဲဒ်သိး ကထိၣ်ဝဲအ့ဖးအဂီၢ်. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.

မ့ၢ်စ့ၢ်ကီး “ကီၢ်တဘ့ၣ်အံၤ.”

အခီပညီလိၤလိၤ “မူခိၣ်ဒီးဟီၣ်ခိၣ်အဘၢၣ်စၢၤ.”

မ့ၢ်ဝဲ ပှၤဘၤဘူၤလိၣ်ဖိ အကီၢ်.

ဘၣ်သ့ၣ်သ့ၣ်​ အဲၣ်ဒိးတဲဝဲ မူခိၣ်ကလူး လွံၢ်ကရူၢ်.

မ့ၢ်စ့ၢ်ကီး “ကီၢ်လၢအတလၢကွံာ် ပီၣ်လဲၣ်.”

ကွၢ် တၢ်ဂ့ၢ်ဘၣ်ထွဲလိာ်သး ခ၁၅.

အခီပညီလိၤလိၤ “ယ.”

မ့ၢ်စ့ၢ်ကီး “အိၣ်ဒီးတၢ်သးဒူ.”

မ့ၢ်စ့ၢ်ကီး “ယတတူၢ်ဘၣ်​ တၢ်သးအုးဘၣ်.”

အခီပညီလိၤလိၤ “လၢပှၤကလုာ်အကျိာ်ခဲလၢာ်အကျါ.”

မ့ၢ်စ့ၢ်ကီး “တၢ်ကူတၢ်ကၤ အခီၣ်ထံး.”

မ့ၢ်စ့ၢ်ကီး “တိာ်ဧိၤတာ်ဧိၤ.”

ဖျါလၢအဲၣ်ဒိးတဲဝဲ တၢ်ဆီၣ်တံၢ်မၤနၢၤလၢ အပှၤဂီၢ်မုၢ် တူၢ်ဘၣ်ဝဲ.

အခီပညီလိၤလိၤ “ဟံၣ်.”

မ့ၢ်စ့ၢ်ကီး “ကသ့ၣ်ယီၤဖါဖိတဒု.”

မ့ၢ်ဝဲ ထံကျိဖရၤသး.

မ့ၢ်ဝဲ ဝ့ၢ်စံယိၣ်လၢအမ့ၢ် ဝ့ၢ်ယရူၤၡလ့ၣ်.

မ့ၢ်ဝဲ ပျံၤလၢပှၤသူအီၤ ဒ်သိး ကကွံာ်လၢၢ်အဂီၢ်.

မ့ၢ်စ့ၢ်ကီး “ဟံၣ်ဖိဃီဖိ အယွၤတဖၣ်.”

အခီပညီလိၤလိၤ “နီၣ်ထိးဘိ.”

မ့ၢ်စ့ၢ်ကီး “တၢ်ကသါ.”

အခီပညီလိၤလိၤ “ဟံၣ်.”

မ့ၢ်စ့ၢ်ကီး “ပှၤလၢအဂံၢ်စၢ်ဘါစၢ်ကတၢၢ်.”

အခီပညီလိၤလိၤ “ဟံၣ်.”

အခီပညီလိၤလိၤ “ဟံၣ်.”

မ့ၢ်စ့ၢ်ကီး “ထံပူၤတပူၤ.”

အခီပညီလိၤလိၤ “ဟံၣ်.”

မ့ၢ်စ့ၢ်ကီး “ဝံအတၢ်ကူတၢ်သိးလၢ ပှၤတ့အီၤလၢ ဆၣ်ဖိကီၢ်ဖိအဆူၣ်.”

အခီပညီလိၤလိၤ “လၢနစုခံခီ အဘၢၣ်စၢၤ.” မ့ၢ်ဝဲ လၢအသးနါပှၢ် မ့တမ့ၢ် အချၢဃံအလိၤ.

မ့ၢ်ဝဲ ဝ့ၢ်ယရူၤၡလ့ၣ်.

ဧ့ၤဘြံၤအတၢ်ကတိၤ တဖျၢၣ်အံၤ အဲၣ်ဒိးတဲဝဲ ကသ့ၣ်လၢ အကးပြါဒီးကသ့ၣ်ယီၤ.

ဘၣ်သ့ၣ်သ့ၣ်​ ကမ့ၢ် “ပှၤဆါတၢ်ပှ့ၤတၢ်ဖိ.”

    ကညီ (စှီၤ) လံာ်လဲၢ်တဖၣ် (၂၀၀၂–၂၀၂၅)
    ဟးထီၣ်
    နုာ်လီၤ
    • ကညီ(စှီၤ)ကျိာ်
    • နီၤလီၤ
    • တၢ်ဂ့ၢ်အဂၤလၢ အဘၣ်ထွဲတဖၣ်
    • Copyright © 2025 Watch Tower Bible and Tract Society of Pennsylvania
    • တၢ်ဘျၢလၢနကသူအဂီၢ်
    • တၢ်ဂ့ၢ်ခူသူၣ် အတၢ်ဘျၢ
    • တၢ်လၢဘၣ်ဃးဒီး တၢ်ဂ့ၢ်ခူသူၣ်
    • JW.ORG
    • နုာ်လီၤ
    နီၤလီၤ