စီၤယၤကိာ်လဲၤဆူဟၤရၣ် အဂ့ၢ်

ပှၤတဖၣ်အံၤလၢ ယၤကိာ်ကတိၤတၢ်ဒီးအဝဲသ့ၣ်န့ၣ် မတၤလဲၣ်သုသ့ၣ်ညါဧါ. ယၤကိာ်လဲၤတၢ် ယံာ်မုၢ်နံၤအါမးဝံၤအလီၢ်ခံ ထံၣ်လိာ်အသးဒီးအဝဲသ့ၣ် လၢထံပူၤတပူၤအကပၤလီၤ. အဝဲသ့ၣ်ကွၢ်အသိတဖၣ်လီၤ. ယၤကိာ်သံကွၢ်အဝဲသ့ၣ် ‘သုအိၣ်ဖဲလဲၣ်.’

အဝဲသ့ၣ်စံးဆၢဝဲဒၣ် ‘လၢဟၤရၣ်တခီလီၤ.’

ယၤကိာ်သံကွၢ်ဝဲဒၣ် ‘တၢ်လၢလၤဘၣ်န့ၣ်သုသ့ၣ်ညါဧါ.’

စံးဆၢဝဲသ့ၣ်လၢ ‘ပသ့ၣ်ညါလီၤ. ကွၢ်လၢန့ၣ်, အဖိမုၣ်ရၤဃ့လးဟဲဝဲဒီး အသိတဖၣ်န့ၣ်လီၤ.’ ရၤဃ့လးဟဲလၢအယံၤတစဲးန့ၣ်သုထံၣ်ဧါ.

ယၤကိာ်ထံၣ်ဘၣ်ရၤဃ့လးလၢ အဟဲဝဲဒီးအဖါတံၢ်အသိတဖၣ်အခါ တလ့ၣ်ကွံာ်ဝဲလၢၢ် လၢအအိၣ်လၢထံပူၤအဖီခိၣ် ဒ်သိးသိတဖၣ်အီထံကသ့အဂီၢ်န့ၣ်လီၤ. လၢတၢ်န့ၣ်အလီၢ်ခံ ယၤကိာ်နၢမူဝဲရၤဃ့လးဒီး တဲဘၣ်ဝဲလၢအမ့ၢ်မတၤလဲၣ်န့ၣ်လီၤ. ရၤဃ့လးတခီ လၢတၢ်သးခုအဒိၣ်အမုာ်အပူၤ က့ၤဆူဟံၣ်ဒီးတဲဘၣ်ဝဲ အပၢ်လၤဘၣ်လၢ တၢ်ဂ့ၢ်အံၤခဲလၢာ်န့ၣ်လီၤ.

လၤဘၣ်သးခုဝဲဒိၣ်မးလၢ ယၤကိာ်ကအိၣ်လၢအဟံၣ်အဃိန့ၣ်လီၤ. ဖဲယၤကိာ်ဃ့ဝဲ ရၤဃ့လးအခါ လၤဘၣ်စ့ၣ်ကီးသးခုဝဲလီၤ. ဘၣ်ဆၣ် တဲဝဲဒၣ်ယၤကိာ်လၢ ကန့ၢ်ဘၣ် ရၤဃ့လးအဂီၢ်န့ၣ် ကဘၣ်မၤတၢ်လၢအစံာ်ပူၤနွံနံၣ်လီၤ. ယၤကိာ်န့ၣ် အဲၣ်ဘၣ်ဝဲဒၣ်ရၤဃ့လးဒိၣ်မးအဃိ မၤဝဲတၢ်သၢၣ်. ဘၣ်ဆၣ် တုၤတၢ်တ့တၢ်ဖျီအမုၢ်နံၤအခါ တၢ်မၤအသးဒ်လဲၣ်န့ၣ် သုသ့ၣ်ညါဧါ.

လၤဘၣ်န့ၣ် ဟ့ၣ်ယၤကိာ် အဖိမုၣ်အဒိၣ်လ့ၤအၤ လၢရၤဃ့လးအလီၢ်န့ၣ်လီၤ. ယၤကိာ်ဘၣ်အသးလၢ ကမၤကဒီးတၢ်ဒီးလၤဘၣ် ​ဆူညါနွံနံၣ်အဃိ လၤဘၣ်ဒုးအိၣ်ဃုာ်ဝဲ ရၤဃ့လးစ့ၢ်ကီး လၢအီၤန့ၣ်လီၤ. ဖဲဆၢကတီၢ်အခါအဝဲန့ၣ် ယွၤဟ့ၣ်ပိာ်ခွါတဖၣ်အခွဲးလၢ ကဟံးန့ၢ်အမါအါန့ၢ်တဂၤန့ၣ်လီၤ. ဘၣ်ဆၣ်ဒီး မ့မ့ၢ်ခဲအံၤတခီ ဒ်လံာ်စီဆှံစံးဝဲအသိး ပိာ်ခွါတဂၤန့ၣ် အမါကဘၣ်အိၣ်ဒၣ် ထဲတဂၤန့ၣ်လီၤ.