စီၤယၤကိာ်အိၣ်ဒီး အဟံၣ်ဖိဃီဖိဖးဒိၣ် အဂ့ၢ်

လၢတၢ်ဂီၤပူၤအံၤန့ၣ် ကွၢ်ဟံၣ်ဖိဃီဖိတဒူၣ် လၢအဒိၣ်နးမး တဘီ. မ့ၢ်ဝဲယၤကိာ်အဖိခွါ ၁၂ ဂၤအဂီၤလီၤ. အဖိမုၣ်တဖၣ်စ့ၢ်ကီး အိၣ်ဝဲလီၤ. သုသ့ၣ်ညါ အဖိခွါအဖိမုၣ်တဖၣ်အမံၤ တနီၤဧါ. ပကကွၢ်သကိးအမံၤတနီၤဘီၣ်.

လ့ၤအၤဆံးစၢ်ထီၣ် ရူၤဘ့ၣ်, စူၤမ့းအိၣ်, လ့ၤဝံဒီး ယူဒၤတဖၣ်လီၤ. ရၤဃ့လးတခီ မၤအဖိတန့ၢ်ဘၣ်အဃိ အသးအုးဒိၣ်မးန့ၣ်လီၤ. လၢတၢ်န့ၣ်အဃိ, ဒုးအိၣ်ဃုာ် အကုၢ်မုၣ်ဘံၤလဟၤဒီးယၤကိာ်လီၤ. ထဲန့ၣ်ဒီး မၤန့ၢ်ဝဲဖိခွါ ဒၣ်, ဒီးနးသၤလံခံဂၤန့ၣ်လီၤ. လ့ၤအၤစ့ၢ်ကီး ဒုးအိၣ်ဃုာ်ဝဲအကုၢ်မုၣ် စံၤလပၤဒီးယၤကိာ်န့ၣ်လီၤ. စံၤလပၤစ့ၢ်ကီး ဆံးစၢ်ထီၣ်ဝဲ ဖိခွါခံဂၤ လၢအမ့ၢ်ကးဒီးအၤၡ့ၢ်န့ၣ်လီၤ. လၢခံ လ့ၤအၤမၤန့ၢ်ကဒီးအဖိခွါခံဂၤန့ၣ်လီၤ. မ့ၢ်ဝဲဒၣ်ယံးစၣ်ကၢ်, ဒီးစဘူလိၣ်လီၤ.

လၢခံကတၢၢ်န့ၣ် ရၤဃ့လးမၤန့ၢ် အဖိတဂၤလီၤ. ဟ့ၣ်ဝဲအမံၤလၢ ယိၤသးန့ၣ်လီၤ. လၢခံပကသ့ၣ်ညါဘၣ် ယိၤသးအဂ့ၢ်အါမးဒံးန့ၣ်လီၤ. ဘၣ်မနုၤအဃိလဲၣ်န့ၣ် တၢ်လၢယိၤသးန့ၣ် မ့ၢ်ပှၤတဂၤလၢအကဲထီၣ် ပှၤလၢအကါဒိၣ်ဝဲဒိၣ်မးတဂၤန့ၣ်လီၤ. ဖိခွါ ၁၁ ဂၤအံၤ ယၤကိာ်မၤန့ၢ်ဝဲဒၣ်ဖဲအအိၣ်ဝဲလၢ ရၤဃ့လးအပါပၢ် လၤဘၣ်အဟံၣ်အခါန့ၣ်လီၤ.

ယၤကိာ်အဖိမုၣ်တဖၣ်စ့ၢ်ကီး အိၣ်ဝဲလီၤ. ဘၣ်ဆၣ် လံာ်စီဆှံပာ်ဖျါထီၣ်ထဲဒၣ် အဖိမုၣ်တဂၤအမံၤလီၤ. မ့ၢ်ဝဲဒံနၤန့ၣ်လီၤ.

ယၤကိာ်န့ၣ် ပာ်လီၤအသးလၢ ကဟးထီၣ်ဝဲလၢ လၤဘၣ်အအိၣ်ဒီး ကက့ၤဆူကနၤဟၣ် အကတီၢ်တုၤဝဲလံန့ၣ်လီၤ. ဒ်န့ၣ်အဃိ ယၤကိာ်န့ၣ် ပာ်ဖှိၣ်ဝဲ အဟံၣ်ဖိဃီဖိဖးဒိၣ်, အသိတဖၣ် ဒီးအဂီၤဖံးတဖၣ်ဝံၤဒီး စးထီၣ်ဝဲဒၣ်တၢ်လဲၤဖးထီ လၢအယံၤဒိၣ်မးန့ၣ်လီၤ.

ယၤကိာ်ဒီးအပှၤဟံၣ်ဖိဃီဖိ တုၤလၢကီၢ်ကနၤဧၣ်တယံာ်ဘၣ်ဒီး ရၤဃ့လးဆံးစၢ်ထီၣ်ကဒီး အဖိခွါတဂၤန့ၣ်လီၤ. တၢ်မၤအသးဖဲ အဝဲသ့ၣ် အိၣ်ဒံးလၢကျဲဖးဖီအခါလီၤ. ရၤဃ့လးဘၣ်အိၣ်ဖျဲၣ်ဝဲကီအဃိ အိၣ်ဖျဲၣ်ဝဲအခါ သံဘၣ်အသးလီၤ. ဖိခွါဖိလၢအအိၣ်ဖျဲၣ်ဝဲတခီ တဘၣ်တၢ်နီတမံၤဘၣ်. ယၤကိာ်ယုၢ်အမံၤလၢ ဘံၣ်ယၤမံၣ်န့ၣ်လီၤ.

ပအဲၣ်ဒိးတိၢ်နီၢ် ယၤကိာ်အဖိခွါ ၁၂ ဂၤအမံၤန့ၣ်လီၤ. ဘၣ်မနုၤအဃိလဲၣ်န့ၣ် မ့ၢ်လၢ အံၣ်စရ့လးဒီကလုာ်န့ၣ် အိၣ်ဟဲလီၤစၢၤလၢအဝဲသ့ၣ်အဃိန့ၣ်လီၤ. မ့ၢ်ဘၣ်စံးနီၢ်နီၢ်သၢပျၢၤ, ပှၤအံၣ်စရ့လးဖိ ၁၂ ဒူၣ်န့ၣ် ဘၣ်တၢ်ယုၢ်အမံၤစုာ်စုာ်လၢ ယၤကိာ်အဖိခွါအဂၤ ၁၀ ဒီး ယိၤသးအဖိခွါခံဂၤ အမံၤတဖၣ်န့ၣ်လီၤ. ဖိသၣ်တဖၣ်အံၤ အိၣ်ဖျဲၣ်ထီၣ်ခဲလၢာ်ဝံၤအလီၢ်ခံ အံၤစဲးအိၣ်မူဝဲဒံး ဖးယံာ်ညါန့ၣ်လီၤ. မ့ၢ်လၢအလံၤတဖၣ် အါဝဲထဲအံၤအဃိ ကသးခုဝဲဒိၣ်မးန့ၣ်လီၤ. ဘၣ်ဆၣ်သနာ်က့ တၢ်မၤအသးဒီး အလံၤမုၣ်ဒံနၤဒ်လဲၣ်န့ၣ် ပကကွၢ်သကိးတက့ၢ်.