လါဒံၣ်စ့ဘၢၣ်

ယဟိဝၤယွၤန့ၣ် အကဲဝဲ “သ့တၢ်လၢာ်ကစၢ်.” (လီၣ် ၁:၈) အဃိ အအိၣ်ဒီး တၢ်စိတၢ်ကမီၤ လၢကမၤသမူထီၣ်က့ၤပှၤသံ. ယဟိဝၤယွၤန့ၣ် အစိအကမီၤဒိၣ်မးအဃိ အမၤနၢၤဒုၣ်ဒါခဲလၢာ် ဃုာ်ဒီးဒုၣ်ဒါလၢအမ့ၢ် တၢ်သံသ့. (၁ ကရံၣ် ၁၅:၂၆) တၢ်ဂ့ၢ်အဂၤတခါလၢ ပသ့ၣ်ညါလၢ ယဟိဝၤယွၤ အိၣ်ဒီးတၢ်သ့တၢ်ဘၣ်လၢ ကမၤသမူထီၣ်က့ၤပှၤသံန့ၣ် မ့ၢ်လၢအတိၢ်နီၣ်တၢ် ဘၣ်ခဲလၢာ်. ယဟိဝၤယွၤ ကီးန့ၢ်ဝဲ ဆၣ်အမံၤ ကီးဖျၢၣ်ဒဲး. (ၡါ ၄၀:၂၆) တကးဒံးဘၣ် ပှၤသံတဖၣ်န့ၣ် ယဟိဝၤယွၤ နီၣ်ဘၣ်အဝဲသ့ၣ်. (ဘး ၁၄:၁၃; လူၤ ၂၀:၃၈) ပှၤသံလၢ ယဟိဝၤယွၤ ကမၤသမူထီၣ်က့ၤတဖၣ်န့ၣ် ယဟိဝၤယွၤ နီၣ်ဘၣ်အဝဲသ့ၣ် အဂ့ၢ်အကျိၤ လီၤတံၢ်လီၤဆဲး. အဝဲသ့ၣ် အတၢ်ပာ်သူၣ်ပာ်သး, အတၢ်အိၣ်ထီၣ်အိၣ်လီၤ, အတၢ်လဲၤခီဖျိ ဒီးအဝဲသ့ၣ် အတၢ်သ့ၣ်နီၣ်ထီၣ် အိၣ်ဒ်လဲၣ်န့ၣ် ယဟိဝၤယွၤ သ့ၣ်ညါဝဲခဲလၢာ်. ပသ့ၣ်ညါဘၣ်လၢ ယဟိဝၤယွၤ အိၣ်ဒီးတၢ်စိတၢ်ကမီၤလၢ ကမၤသမူထီၣ်က့ၤပှၤသံ ဒီးအဘၣ်သးမၤဝဲ သပှၢ်တၢၢ်အဃိ ပနာ်လၢ အတၢ်အၢၣ်လီၤလၢ အကမၤသမူထီၣ်က့ၤပှၤသံလၢ ခါဆူညါန့ၣ် ကဟဲလၢပှဲၤထီၣ်နီၢ်ကီၢ်. ဒီးလၢညါ ယဟိဝၤယွၤ မၤသမူထီၣ်က့ၤပှၤသံအဃိ အတၢ်အၢၣ်လီၤလၢ ကမၤသမူထီၣ်က့ၤပှၤသံန့ၣ် ပနာ်သ့. အဒိ လၢလံာ်စီဆှံပူၤန့ၣ် ပထံၣ်ဘၣ်လၢ ယဟိဝၤယွၤဟ့ၣ်ဝဲ ပိာ်ခွါလၢအသးတီတနီၤ ဒီးယ့ၣ်ၡူး လၢတၢ်စိတၢ်ကမီၤ ဒ်သိးကမၤသမူထီၣ်က့ၤပှၤသံ. တၢး၂၃.၀၄ ၉-၁၀ ¶၇-၉

ဖဲပတဲတၢ်အခါ ပမ့ၢ်တဲတၢ် သ့သ့ဘၣ်ဘၣ်လၢတၢ်သးစူၤအပူၤ ဒီးတဲတၢ်မုာ်မုာ်န့ၣ် ပှၤကသးအိၣ် ဒိကနၣ်ပှၤ ဒီးကဆဲးတဲတၢ်ဒီးပှၤ. သနာ်က့ ပှၤတဂၤ မ့ၢ်သံကွၢ်ပှၤတၢ်လၢ ကတဲဆါပှၤ ဒီးအမ့ၢ်ဘၣ်သးတဲအါတၢ်ဒီးပှၤ ဘၣ်ဃးဒီး ပတၢ်စူၢ်တၢ်နာ်အဂ့ၢ်န့ၣ် ပတလိၣ် တဲအါတၢ်ဒီးအဝဲသ့ၣ်ဘၣ်. (ကတိၤ ၂၆:၄) ပှၤဒ်န့ၣ်ဒုကအိၣ်တနီၤ ဘၣ်ဆၣ် ပှၤအါတက့ၢ်န့ၣ် ကနၣ်တၢ်လၢ ပတဲတဖၣ်မုာ်မး. ပထံၣ်ဘၣ်လၢ ပမ့ၢ်အိၣ်ဒီး တၢ်သးစူၤန့ၣ် ကကဲဘျုး လၢပဂီၢ်ဒိၣ်မး. အဃိ ဖဲပဘၣ်စံးဆၢက့ၤ ပှၤလၢအသံကွၢ် ပတၢ်နာ်အဂ့ၢ် ဒီးတဲတၢ်ဒီး ပှၤလၢအထံၣ်ကမၣ် ပတၢ်စူၢ်တၢ်နာ် အဂ့ၢ်အခါ ပကဘၣ် ဃ့ယဟိဝၤယွၤလၢ အကမၤစၢၤပှၤ ဒ်သိးပကအိၣ်ဒီး တၢ်သးစူၤ. ပမ့ၢ်အိၣ်ဒီး တၢ်သးစူၤန့ၣ် ကမၤစၢၤပှၤဒ်သိး ပတတဲအါတၢ်ဒီး ပှၤဂၤဘၣ်. ဒီးဖဲပတဲတၢ်ဒီး ပှၤဂၤအခါ ပမ့ၢ်ပာ်ဖျါထီၣ် တၢ်သးစူၤန့ၣ် ကမၤစၢၤဝဲ ပှၤလၢအဒိကနၣ်ပှၤ ဒီးဘၣ်သ့ၣ်သ့ၣ် အဝဲသ့ၣ်ကဆီတလဲ အတၢ်ထံၣ်လၢပဖီခိၣ် ဒီးလၢလံာ်စီဆှံတၢ်မ့ၢ်တၢ်တီ အဖီခိၣ်. အဃိ ဒ်သိး ပကတဲပၠးဘၣ် ပှၤဂၤလၢ ပတၢ်နာ်အဂ့ၢ်အဂီၢ် ပကဘၣ်မၤထွဲ တၢ်ဟ့ၣ်ကူၣ်လၢအမ့ၢ် “အိၣ်ကတဲာ်ကတီၤပာ်စၢၤသုသး ထီဘိ.” ဒီးဖဲပတဲတၢ်ဒီးပှၤဂၤအခါ ပကဘၣ် “ပာ်ဖျါထီၣ် တၢ်သးစူၤ ဒီးတၢ်ပာ်ကဲဒိၣ်မး.” (၁ ပ့း ၃:၁၅) မ်ပပာ်လီၤသးလၢ ပကဆဲးပာ်ဖျါထီၣ် တၢ်သူၣ်စူၤသးစူၤထီဘိ. တၢး၂၃.၀၉ ၁၉ ¶၁၈-၁၉

ပကတဲသကိး ကျဲလွံၢ်ဘိလၢ ကမၤစၢၤပှၤ ဒ်သိး ပကပာ်ဖျါထီၣ် တၢ်ဝံသးစူၤ. တၢ, ပှၤလၢအအိၣ်ဒီး တၢ်ဝံသးစူၤန့ၣ် အတသးဒိၣ်ထီၣ်တၢ် ချ့ချ့ဘၣ်. ဖဲပှၤဂၤမၤအီၤ တဘၣ်ဘၣ်အခါ အအိၣ်ဒီး တၢ်ပၢၤသး ဒီးအတက့ၤမၤကၣ်တၢ် ဒ်ပှၤမၤအီၤအသိးဘၣ်. (၂ မိၤ ၃၄:၆) ခံ, ပှၤလၢအအိၣ်ဒီး တၢ်ဝံသးစူၤန့ၣ် အအိၣ်ခိးတၢ်ကဲ. ပှၤလၢအအိၣ်ဒီး တၢ်ဝံသးစူၤန့ၣ် အမ့ၢ်ဘၣ်အိၣ်ခိးတၢ် ယံာ်န့ၢ်ဒံး အဆိမိၣ်ပာ်စၢၤဝဲသနာ်က့ အတသးအ့န့ ဒီးတဲအါတဲစှၤတၢ်ဘၣ်. (မး ၁၈:၂၆, ၂၇) သၢ, ပှၤလၢအအိၣ်ဒီး တၢ်ဝံသးစူၤန့ၣ် အတမၤကရီတၢ် ဒီးအတကရီ ဆၢတဲာ်တၢ် ချ့ချ့ဘၣ်. တဘျီတခီၣ် လၢတၢ်အိၣ်သး တနီၤနီၤန့ၣ် ပဘၣ်မၤကရီတၢ်အိၣ်. သနာ်က့ ပမ့မ့ၢ် ပှၤလၢအအိၣ်ဒီး တၢ်ဝံသးစူၤန့ၣ် ဖဲပဘၣ်မၤတၢ်လၢ အရ့ဒိၣ်တမံၤမံၤအခါ ပတကရီဆၢတဲာ်တၢ်ချ့ချ့ ဒီးတကရီ မၤဝံၤတၢ်ချ့ချ့ဘၣ်. ဘၣ်ဆၣ် ဒ်သိးပတၢ်မၤ ကဝံၤဝဲဂ့ၤဂ့ၤအဂီၢ် ပပာ်လီၤတၢ်ဆၢကတီၢ် မူာ်မူာ်နီၢ်နီၢ် လၢပကဘၣ်မၤဆိမနုၤလဲၣ်. ပမ့ၢ်မၤ ဒ်န့ၣ်မၣ် ပတၢ်မၤကဝံၤဝဲ ဘၣ်ဆၢဘၣ်ကတီၢ်. လွံၢ်, ပှၤလၢအအိၣ်ဒီး တၢ်ဝံသးစူၤန့ၣ် ဖဲအထံၣ်ဘၣ် တၢ်ကီတၢ်ခဲအခါ အတတဲအါတၢ်ဘၣ်. အကဆဲးအိၣ်ဒီး တၢ်ထံၣ်လၢအဂ့ၤ ဒီးဆဲးမၤ ယဟိဝၤယွၤအတၢ်မၤ လၢတၢ်သးခု. (ကလီး ၁:၁၁) အဃိ ဒ်ပမ့ၢ် ယဟိဝၤပှၤအုၣ်အသး အသိး ကဘၣ်ပာ်ဖျါထီၣ် တၢ်ဝံသးစူၤလၢ ကျဲလွံၢ်ဘိအံၤ. တၢး၂၃.၀၈ ၂၀-၂၁ ¶၃-၆

ပသ့ၣ်ညါလၢ ယဟိဝၤယွၤ သမံသမိးပသးအဃိ အရ့ဒိၣ်လၢ ပကဒီသဒၢပသး. ဖဲယဟိဝၤယွၤ သမံသမိးပသးအခါ အထံၣ်ဝဲ တၢ်အိၣ်လၢပသးပူၤ ဒီးပတၢ်ပာ်သးအိၣ်ဒ်လဲၣ်န့ၣ် အသ့ၣ်ညါဝဲ ဂ့ၤကတၢၢ်. ဒီးယဟိဝၤယွၤ အတၢ်ဟ့ၣ်ကူၣ်န့ၣ် ကမၤစၢၤပှၤဒ်သိး ပကန့ၢ်ဘၣ် တၢ်မူထူယိာ်အဃိ ပမ့ၢ်ဆိမိၣ်ထံ အတၢ်ဟ့ၣ်ကူၣ်ထီဘိန့ၣ် အကအဲၣ်ပှၤ. (ယိၤ ၄:၁၄) တကးဒံးဘၣ် ပတပျဲလၢ မုၣ်ကီၤလံၢ်အတၢ်လံၣ်တၢ်လီ ဒိၣ်စိလၢပဖီခိၣ်ဘၣ် ဒီးပတကွၢ်လိ ပှၤဟီၣ်ခိၣ်ဖိ အလုၢ်လၢ်လၢ အတဂ့ၤတဖၣ်ဘၣ်. (၁ ယိၤ ၅:၁၈, ၁၉) တကးဒံးဘၣ် ပတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤဒိၣ်ထီၣ်န့ၣ် ပကအဲၣ်အီၤဒိၣ်ထီၣ် ဒီးပကပာ်ကဲအီၤအါထီၣ်. ခီဖျိလၢ ပတဘၣ်သး မၤဘၣ်ဒိ ယဟိဝၤယွၤအသးဘၣ်အဃိ လၢပတၢ်ဆိမိၣ်ပူၤနာ်က့ ပတဘၣ်သးမၤကမၣ်အီၤဘၣ်. ဒီပုၢ်ဝဲၢ်မုၣ်မါထၤ လၢအအိၣ်လၢ ကီၢ်ခရိၣ်အ့ၡၢၣ်န့ၣ် အထံၣ်ဘၣ် တၢ်လ့ပစီလၢ အကမၤကမၣ်မုၣ်ကမၣ်ခွါ. အတဲဝဲလၢ “ယကဆိမိၣ်တၢ်လၢအဂ့ၤ ဒီးကမၤနၢၤကွံာ် ယတၢ်မိၣ်န့ၢ်သးလီလၢ ကမၤတၢ်လၢအတဂ့ၤဘၣ်န့ၣ် ဖၣ်ကီညါ. သနာ်က့ ခီဖျိလၢ ယပျံၤယဟိဝၤယွၤအဃိ ကဲထီၣ်တၢ်ဒီသဒၢ လၢယဂီၢ်.” တၢ်ပျံၤယဟိဝၤယွၤ ကဲထီၣ်တၢ်ဒီသဒၢ လၢအဂီၢ်ဒ်လဲၣ်. ဒီပုၢ်ဝဲၢ်မုၣ်မါထၤ တဲဝဲလၢ အဆိမိၣ်ထံဝဲလၢ အမ့ၢ်မၤကမၣ်တၢ်န့ၣ် အကထံၣ်ဘၣ်က့ၤ တၢ်ကီတၢ်ခဲ. အဃိ ပဝဲစ့ၢ်ကီး ပကဘၣ် ဆိမိၣ်ထံတၢ်ဒ်န့ၣ်. တၢး၂၃.၀၆ ၂၀-၂၁ ¶၃-၄

ယ့ၣ်ၡူး သ့ၣ်ညါဝဲလၢ ယဟိဝၤယွၤ အတၢ်တိာ်ပာ်န့ၣ် မ့ၢ်ဝဲဒ်သိး အကပာ်စီဆှံအမံၤ ဒီးအကပာ်ဖျါထီၣ်လၢ တၢ်လံၣ်တၢ်လီ ဘၣ်ဃးဒီးအဂ့ၢ်န့ၣ် တမ့ၢ်တတီ နီတခါဘၣ်. အဃိ ယ့ၣ်ၡူး လၢအမ့ၢ် ပသရၣ်န့ၣ် အသိၣ်လိ အပျဲၢ်အဘီၣ်လၢ ကဃ့ထုကဖၣ် လၢကစၢ်ယွၤ အမံၤအဂီၢ်ဒ်အံၤ. “ပပၢ်အိၣ်လၢမူခိၣ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်.” (မး ၆:၉) ယ့ၣ်ၡူး သ့ၣ်ညါဝဲလၢ တၢ်ဂ့ၢ်အရ့ဒိၣ်တခါအံၤ အဘၣ်ဃးဒီး ကစၢ်ယွၤ အတၢ်ဘၣ်တ့ခဲလၢာ်. လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ပှၤလၢအပာ်စီဆှံ ယဟိဝၤယွၤအမံၤ ထဲသိးဒီး ယ့ၣ်ၡူးန့ၣ် တအိၣ်နီတဂၤဘၣ်. သနာ်က့ ဖဲယ့ၣ်ၡူး အဒုၣ်အဒါတဖၣ် ဖီၣ်အီၤအခါ အဝဲသ့ၣ် ပာ်တၢ်ကမၣ်လၢ ယ့ၣ်ၡူးအလိၤ ဒီးတဲဝဲလၢ ယ့ၣ်ၡူး တပာ်ကဲ ယဟိဝၤယွၤ အမံၤဘၣ်. ယ့ၣ်ၡူး သ့ၣ်ညါစ့ၢ်ကီးလၢ ပှၤတဂၤလၢ အတဲဟးဂီၤ ကစၢ်ယွၤအမံၤစီဆှံန့ၣ် မ့ၢ်ပှၤလၢ အမၤတၢ်ဒဲးဘး အဒိၣ်ကတၢၢ်. ဒီးပှၤပာ်ဒ့ၣ်ပာ်ကမၣ်အီၤ ဒ်န့ၣ်အဃိ ယ့ၣ်ၡူး အသးကဘၣ်ဒိဒိၣ်မး. ဒီးတချုးဖဲ ပှၤဟဲဖီၣ်ယ့ၣ်ၡူးဒံးဘၣ်အခါ ယ့ၣ်ၡူး “တူၢ်ဘၣ်တၢ် နးမး” န့ၣ်ဘၣ်သ့ၣ်သ့ၣ် ကမ့ၢ်လၢ တၢ်ပာ်ဒ့ၣ်ပာ်ကမၣ် တခါအံၤအဃိ.—လူၤ ၂၂:၄၁-၄၄. တၢး၂၄.၀၂ ၁၁ ¶၁၁

လၢသးသမူ အတၢ်ဃ့ၢ်ပြၢအပူၤန့ၣ် ပကဘၣ်အဲၣ် ယဟိဝၤယွၤ ဒီးယ့ၣ်ၡူးဒိၣ်န့ၢ် ပအဲၣ်ပဘူးပတံၢ်ဒံး. (မး ၁၀:၃၇) သနာ်က့ ဒ်သိးပကမၤသးခု ကစၢ်ယွၤ ဒီးယ့ၣ်ၡူးခရံာ် အသးအဂီၢ် ပမူဒါလၢ ပဟံၣ်ဖိဃီဖိအပူၤန့ၣ် ပတဘၣ် ကွၢ်ကပာ် ဒီးသးပ့ၤနီၣ်ကွံာ်အီၤဘၣ်. နီၢ်ကီၢ်န့ၣ် ဒ်သိးပကမၤ ကစၢ်ယွၤဒီးယ့ၣ်ၡူးခရံာ် အတၢ်ဘၣ်သးအဂီၢ် ပကဘၣ် မၤလၢပှဲၤ ပမူဒါလၢ ပဟံၣ်ဖိဃီဖိအပူၤ. (၁ တံၤ ၅:၄, ၈) ပမ့ၢ်မၤဒ်န့ၣ်န့ၣ် ပကသးခုဒိၣ်ထီၣ်. တကးဒံးဘၣ် ယဟိဝၤယွၤ သ့ၣ်ညါဝဲလၢ ပှၤဒီမိၢ်ဝၤ မ့ၢ်ရ့လိာ်သးလၢ တၢ်အဲၣ်တၢ်ကွံ ဒီးတၢ်ပာ်ကဲအပူၤ, မိပါ မ့ၢ်အဲၣ်အဖိ ဒီးသိၣ်လိသီလိအဖိ ဒီးဖိတဖၣ် မ့ၢ်ဒိကနၣ် မိပါအကလုၢ်န့ၣ် ဟံၣ်ဖိဃီဖိ ကအိၣ်ဒီး တၢ်သးခုအါထီၣ်. (အ့း ၅:၃၃; ၆:၁, ၄) ပမ့ၢ်ကဲဝၤမ့ၢ်ဂ့ၤ, မါမ့ၢ်ဂ့ၤ, ဖိမ့ၢ်ဂ့ၤ ပတဘၣ်မၤထွဲထဲ ပကလုာ်ဒူၣ်တၢ်ဆဲးတၢ်လၤ, ပနီၢ်ကစၢ်တၢ်တူၢ်ဘၣ် မ့တမ့ၢ် ပှၤဟ့ၣ်ကူၣ်တၢ် အတၢ်ဟ့ၣ်ကူၣ်ဘၣ်. ပကဘၣ်နာ်န့ၢ် လံာ်စီဆှံ အတၢ်ဟံးစုနဲၣ်ကျဲ. ဒီးပတၢ်ကရၢကရိလံာ်လဲၢ်န့ၣ် အိၣ်ဒီးတၢ်ဟ့ၣ်ကူၣ်လၢ ကမၤစၢၤပှၤ ဒ်သိးပကမၤထွဲ လံာ်စီဆှံ အတၢ်ဟံးစုနဲၣ်ကျဲ အဃိ ပကဘၣ် ဃုကွၢ်တၢ်ဟ့ၣ်ကူၣ်လၢ ပတၢ်ကရၢကရိလံာ်လဲၢ် အပူၤထီဘိ. တၢး၂၃.၀၈ ၂၈ ¶၆-၇

ဒီပုၢ်ဝဲၢ်မုၣ်ကိးဂၤဒဲးန့ၣ် ကဘၣ်မၤအိၣ်ထီၣ် တၢ်သ့တၢ်ဘၣ် လၢအကဲဘျုး. တၢ်သ့တၢ်ဘၣ်တနီၤလၢ ပိာ်မုၣ်တဖၣ် မၤလိဘၣ်ဝဲဖဲ အနီၢ်ဆံးခါန့ၣ် ကကဲဘျုးလၢအဂီၢ် လၢအတၢ်အိၣ်မူ ဒီတစိၤညါ. အဒိ မၤလိသးလၢ နဖးလံာ်ဒီးကွဲးလံာ် ကသ့ဂ့ၤဂ့ၤ. ပမ့ၢ်ကွၢ် လၢတၢ်လီၢ်တနီၤန့ၣ် ပှၤပာ်ပနီၣ်ဝဲလၢ ပိာ်မုၣ်တဖၣ် တလိၣ်မၤလိအသးလၢ ကဖးလိလံာ် ဒီးကွဲးလိလံာ်ဘၣ်. သနာ်က့ တၢ်သ့တၢ်ဘၣ် တခါအံၤ အရ့ဒိၣ်ဒိၣ်မးလၢ ခရံာ်ဖိကိးဂၤဒဲးအဂီၢ်. (၁ တံၤ ၄:၁၃) အဃိ ကျဲးစၢး ဖးလိလံာ် ဒီးကွဲးလိလံာ်ဟီ. နမ့ၢ်ကျဲးစၢး မၤဒ်န့ၣ်န့ၣ် ကကဲဘျုးဒ်လဲၣ်. နဖးလံာ် ဒီးကွဲးလံာ် မ့ၢ်သ့ဂ့ၤဂ့ၤန့ၣ် အကမၤစၢၤနၤဒ်သိး နဃုတၢ်မၤကညီ ဒီးနန့ၢ်ဘၣ်တၢ်မၤကညီ. တကးဒံးဘၣ် နသိၣ်လိ ပှၤဂၤလၢ ကစၢ်ယွၤကလုၢ်ကထါ ကသ့ဂ့ၤဂ့ၤ. ဒီးအရ့ဒိၣ်ကတၢၢ်န့ၣ် ခီဖျိလၢ နဖးလံာ်သ့အဃိ ဖဲနဖး ဒီးဆိကမိၣ်ထံ ကစၢ်ယွၤ အကလုၢ်ကထါအခါ နတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်.—၁ တံၤ ၄:၁၅. တၢး၂၃.၁၂ ၂၀-၂၁ ¶၁၀-၁၁

ဃ့ယဟိဝၤယွၤလၢ ကမၤစၢၤနၤ ဒ်သိးနမၤနၢၤကွံာ် တၢ်လ့ပစီကန့ၢ်. ခီဖျိလၢ ပတလၢတပှဲၤဘၣ်အဃိ ပကဘၣ်ကျဲးစၢး မၤနၢၤကွံာ်တၢ်လ့ပစီထီဘိ. မုၣ်ကီၤလံၢ် ကျဲးစၢးဝဲဆူၣ်ဆူၣ် ဒ်သိးအလ့ပစီပှၤကန့ၢ်အဂီၢ်. အသူဝဲ တၢ်မၤမုာ်မၤဖှံသး လၢအတဂ့ၤဘၣ်တဖၣ် ဒ်သိးပကဆိမိၣ်တၢ်လၢ အတကဆှီဘၣ်. အဃိ ပတၢ်ဆိမိၣ် မ့ၢ်တကဆှီဘၣ်န့ၣ် ပကမၤဘၣ် တၢ်ကမၣ်ဖးဒိၣ် ဒီးပတကဆှီလၢ ယဟိဝၤယွၤ အမဲာ်ညါလၢၤဘၣ်. (မၢ် ၇:၂၁-၂၃; ယၤ ၁:၁၄, ၁၅) ဒ်သိးပမၤနၢၤကွံာ် တၢ်လ့ပစီ ကန့ၢ်အဂီၢ် ပလိၣ်ဘၣ် ယဟိဝၤယွၤ အတၢ်မၤစၢၤ. လၢကစၢ်အတၢ်ထုကဖၣ်န့ၣ် ပထံၣ်ဘၣ်လၢ ယ့ၣ်ၡူးမၢပဃ့စ့ၢ်ကီးလၢ “တဘၣ်ပျဲပလဲၤနုာ်လီၤဆူ တၢ်လ့ပစီအပူၤတဂ့ၤ. မ့မ့ၢ် မၤပူၤဖျဲးပှၤလၢ မုၣ်ကီၤလံၢ် အစုပူၤတက့ၢ်.” (မး ၆:၁၃) ယဟိဝၤယွၤ ဘၣ်သးမၤစၢၤပှၤလံ သနာ်က့ ပကဘၣ်ဃ့အီၤလၢ အကမၤစၢၤပှၤဒံး. ဒီးပကဘၣ်မၤထွဲ ဒ်ပဃ့အီၤအသိးစ့ၢ်ကီး. တၢး၂၃.၀၅ ၆-၇ ¶၁၅-၁၇

ဖဲပှၤဒီမိၢ်ဝၤခံဂၤ အတၢ်ရ့လိာ်သးဒီး ယဟိဝၤယွၤ ဂ့ၤဝဲအခါ အဝဲသ့ၣ် ကမၤထွဲဝဲ ယဟိဝၤယွၤ အတၢ်ဟ့ၣ်ကူၣ်. ဒီးတၢ်ဟ့ၣ်ကူၣ်တဖၣ်န့ၣ် ကမၤစၢၤအဝဲသ့ၣ်လၢ အကဟးဆှဲး တၢ်ကီတၢ်ခဲ ဒီးလဲၤခီဖျိ တၢ်ကီတၢ်ခဲလၢ ကမၤလီၤစၢ်အဝဲသ့ၣ် အတၢ်အဲၣ်လိာ်သး တဂၤဒီးတဂၤ. ပှၤလၢအတၢ်ရ့လိာ်သးဒီး ယဟိဝၤယွၤဂ့ၤန့ၣ် အဝဲသ့ၣ်ကျဲးစၢး ကွၢ်လိ ယဟိဝၤယွၤ ဒီးမၤထွဲ ယဟိဝၤယွၤ အတၢ်ဂ့ၤတၢ်ဝါ ဒ်သိးဒီး တၢ်သူၣ်ဂ့ၤသးဝါ, တၢ်ဝံသးစူၤ ဒီးတၢ်ပျၢ်ပှၤဂၤတၢ်ကမၣ်. (အ့း ၄:၃၂–၅:၁) အဃိ ပှၤဒီမိၢ်ဝၤခံဂၤ မ့ၢ်ပာ်ဖျါထီၣ် တၢ်ဂ့ၤတၢ်ဝါတဖၣ်အံၤန့ၣ် အဝဲသ့ၣ်တၢ်အဲၣ်လိာ်သး ကဂၢၢ်ကျၢၤဒိၣ်ထီၣ်. အဒိ ဒီပုၢ်ဝဲၢ်မုၣ်လံနၤန့ၣ် အထီၣ်ပှၢ်န့ၢ် ၂၅ နံၣ်လံ. ဒီးအတဲဝဲလၢ “ပှၤတဂၤ အတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤန့ၣ် နအဲၣ်ဘၣ်အီၤ ဒီးနပာ်ကဲဘၣ်အီၤညီ.” ပကတဲသကီး ပှၤအဒိတနီၤလၢ လံာ်စီဆှံပူၤ. ဖဲယဟိဝၤယွၤ ဃုထၢ ပှၤဒီမိၢ်ဝၤခံဂၤလၢ ကကဲထီၣ် မ့းၡံအၤ အမိအပါအခါ အဃုထၢဝဲ နီၢ်မၤရံဒီးစီၤယိၤသး လၢအဟဲလီၤစၢၤလၢ စီၤဒၤဝံးအစၢၤအသွဲၣ်အကျါ. ခီဖျိလၢ အဝဲသ့ၣ်တၢ်ရ့လိာ်သးဒီး ယဟိဝၤယွၤဂ့ၤဝဲအဃိ ယဟိဝၤယွၤ ဃုထၢအဝဲသ့ၣ်. ဒီးယဟိဝၤယွၤ သ့ၣ်ညါဝဲလၢ အဝဲသ့ၣ်ကအဲၣ်လိာ်သး ဒီးကမၤထွဲ ယဟိဝၤယွၤ အတၢ်ဟံးစုနဲၣ်ကျဲလၢ အတၢ်ဆီဟံၣ်ဆီဃီအပူၤ. တၢး၂၃.၀၅ ၂၁ ¶၃-၄

ယ့ၣ်ၡူးမ့ၢ်ဝဲ ပှၤလၢပှၤပှဲၤ ဒီးအကဲဝဲပခိၣ်တဂၤ ဘၣ်ဆၣ် အသူဝဲပှၤဟီၣ်ခိၣ်ဖိလၢ အတလၢတပှဲၤတဖၣ် ဒ်သိးကတီခိၣ်ရိၤမဲပှၤ လၢဟီၣ်ခိၣ်ချၢ. အဃိ တဘျီတခီၣ် ပကဒိကနၣ် ပှၤလၢအတီခိၣ်ရိၤမဲပှၤအဂီၢ်ကကီဝဲ လီၤဆီဒၣ်တၢ် ဖဲအဝဲသ့ၣ်မၢ ပမၤတၢ်တမံၤမံၤ လၢပတအဲၣ်ဒိးမၤဘၣ်အခါ. ပမ့ၢ်ကွၢ် တၢ်မၢဖိပ့းတရူးန့ၣ် အကပာ်ဖျါထီၣ် တၢ်ဒိကနၣ်န့ၣ် တညီလၢအဂီၢ်ဘၣ်. ဖဲမူခိၣ်ကလူး မၢအအီၣ်ဆၣ်ဖိကီၢ်ဖိလၢ အတကဆှီဘၣ်အခါ စီၤပ့းတရူး ဂ့ၢ်လိာ်ဝဲ တဘျီတကးဘၣ် အဂ့ၢ်လိာ်ဝဲ သၢဘျီညါ. (မၤတၢ် ၁၀:၉-၁၆) ဘၣ်မနုၤအဃိ အဂ့ၢ်လိာ်ဝဲလဲၣ်. တၢ်ဟံးစုနဲၣ်ကျဲအံၤ ကီလၢအဂီၢ် ဒီးအတနၢ်ပၢၢ်ဝဲဘၣ်. ဒီးတၢ်မၢဖိပီလူး ဒိကနၣ်ဝဲခရံာ်ဖိတၢ်အိၣ်ဖှိၣ်သးပှၢ် လၢဝ့ၢ်ယရူၤၡလ့ၣ်အပူၤ အတၢ်ဟံးစုနဲၣ်ကျဲ ဒီးအလဲၤကိးဃုာ်ဝဲပှၤလွံၢ်ဂၤ လၢတၢ်လုၢ်ဟံၣ်ပူၤ ဒီးလဲၤမၤကဆှီထီၣ်အသးဒ်သိး ကပာ်ဖျါထီၣ်အသးလၢ အဒိကနၣ် စီၤမိၤၡ့တၢ်သိၣ်တၢ်သီဒံး. ဘၣ်ဆၣ် စီၤပီလူးသ့ၣ်ညါဝဲလၢ ခရံာ်ဖိတဖၣ်န့ၣ် အဝဲသ့ၣ်တလိၣ်ဒိကနၣ် စီၤမိၤၡ့တၢ်သိၣ်တၢ်သီလၢၤဘၣ်. နီၢ်ကီၢ်န့ၣ် စီၤပီလူး တမၤကမၣ်တၢ် နီတမံၤဘၣ်. ဘၣ်ဆၣ် စီၤပီလူး “ကိးန့ၢ် ပှၤပိာ်ခွါတဖၣ်န့ၣ် ဒီးအဝဲသ့ၣ် မၤသကိး တၢ်မၤကဆှီထီၣ်သး အလုၢ်လၢ်တဖၣ်.” (မၤတၢ် ၂၁:၂၃, ၂၄, ၂၆) ပထံၣ်ဘၣ်လၢ စီၤပီလူးအိၣ်ဒီး တၢ်ဒိကနၣ်အဃိ တၢ်ဃူတၢ်ဖိးအိၣ်လၢ ဒီပုၢ်ဝဲၢ်မုၣ်ခွါတဖၣ်အကျါ.—ရိ ၁၄:၁၉, ၂၁. တၢး၂၃.၁၀ ၁၀ ¶၁၅-၁၆

နကဒီသကိးဒီး ပှၤတဂၤအဂီၢ် နကဘၣ်ပျံၤအီၤန့ၣ် ဘၣ်သ့ၣ်သ့ၣ် နတဆိမိၣ်ဘၣ်ဘၣ်. ဘၣ်ဆၣ် ပှၤလၢအဘၣ်သးကဲ ယဟိဝၤယွၤ အသကိး ဘူးဘူးတံၢ်တံၢ်န့ၣ် အကဘၣ် “ပျံၤ ယဟိဝၤယွၤ. ပမၤယဟိဝၤယွၤအတၢ်မၤ မ့ၢ်ယံာ်ထဲလဲၣ်နာ်က့ ပဝဲခဲလၢာ်န့ၣ် ပကဘၣ် ဆဲးပာ်ကဲ ယဟိဝၤယွၤ ဒီးပျံၤအီၤ. ပပျံၤကစၢ်ယွၤန့ၣ် အဲၣ်ဒိးတဲဝဲ အခီပညီဒ်လဲၣ်. ပှၤလၢအအိၣ်ဒီး တၢ်ပျံၤယဟိဝၤယွၤ လၢအဂ့ၤတကလုာ်န့ၣ် အအဲၣ်ယဟိဝၤယွၤ ဒီးအတဘၣ်သးမၤ တၢ်လၢကမၤဟးဂီၤ အတၢ်ရ့လိာ်သးဒီး ယဟိဝၤယွၤ နီတမံၤဘၣ်. ယ့ၣ်ၡူးန့ၣ်အ “ပျံၤကစၢ်ယွၤ” ဒ်န့ၣ်. (ဧ့ၤ ၅:၇) အဃိ ယ့ၣ်ၡူးအိၣ်ဒီး တၢ်ပျံၤယဟိဝၤယွၤ လၢအဂ့ၤတကလုာ်. (ၡါ ၁၁:၂, ၃) ယ့ၣ်ၡူး အဲၣ်ယဟိဝၤယွၤ ဒီးအဒိကနၣ် ယဟိဝၤယွၤ အကလုၢ်. (ယိၤ ၁၄:၂၁, ၃၁) ဒ်ယ့ၣ်ၡူးအသိး ပပျံၤဒီးပပာ်ကဲ ယဟိဝၤယွၤ ခီဖျိလၢ ယဟိဝၤယွၤန့ၣ် အကဲ တၢ်အဲၣ်တၢ်ကွံ, အအိၣ်ဒီး တၢ်ကူၣ်သ့, တၢ်တီတၢ်လိၤ ဒီးတၢ်စိတၢ်ကမီၤ. တကးဒံးဘၣ် ပသ့ၣ်ညါလၢ ယဟိဝၤယွၤ အဲၣ်ပှၤအဃိ ပမၤထွဲ အတၢ်ဟံးစုနဲၣ်ကျဲဧါ တမၤထွဲဘၣ်ဧါန့ၣ် အဘၣ်သးသ့ၣ်ညါဝဲ. အဃိ တၢ်လၢပမၤန့ၣ် အမၤသးအုး ယဟိဝၤယွၤအသးသ့ မ့တမ့ၢ် အမၤသးခု ယဟိဝၤယွၤအသးသ့.—စံး ၇၈:၄၁; ကတိၤ ၂၇:၁၁. တၢး၂၃.၀၆ ၁၄ ¶၁-၂; ၁၅ ¶၅

ဖဲစီၤပၤဧူးစံယါန့ၢ်ဘၣ် တၢ်စိတၢ်ကမီၤအါထီၣ် ဒီးအမၤတၢ်ကဲထီၣ် အါမံၤအခါ အသးပ့ၤနီၣ်ကွံာ် ယဟိဝၤယွၤ လၢအမ့ၢ်ပှၤလၢ အမၤစၢၤအီၤ ဒီးဟ့ၣ်အီၤတၢ်ဂ့ၤအါမံၤ. ပန့ၢ်ဘၣ် တၢ်မၤလိဒ်လဲၣ်. ပကဘၣ်သ့ၣ်နီၣ်ထီၣ်လၢ ပှၤလၢအဆိၣ်ဂ့ၤပှၤ ဒီးဟ့ၣ်ပှၤတၢ်ခဲလၢာ်န့ၣ် မ့ၢ်ဝဲ ယဟိဝၤယွၤ. အဃိန့ၣ် ပတဘၣ် ပတြၢၤလီၤပသးလၢ တၢ်လၢပမၤကဲထီၣ်တဖၣ်ဘၣ်. ပကဘၣ်ဟ့ၣ် တၢ်လၤကပီၤခဲလၢာ် လၢယဟိဝၤယွၤ အအိၣ်. (၁ ကရံၣ် ၄:၇) ပကဘၣ်အိၣ်ဒီး တၢ်ဆီၣ်လီၤသး ဒီးသ့ၣ်ညါလီၤပသးလၢ ပကဲပှၤတလၢတပှဲၤဘၣ် ဒီးပလိၣ်ဘၣ်လၢ ပှၤကသိၣ်က့ၤသီက့ၤပှၤ. ဒီပုၢ်ဝဲၢ်ခွါ လၢအနံၣ်အိၣ် ၆၀ ဘျဲၣ်တဂၤ တဲဝဲလၢ “ဖဲယမၤကမၣ်တၢ်တစဲးတမွဲး ဒီးပှၤသိၣ်က့ၤသီက့ၤယၤအခါ ယတသးထီၣ်တၢ်ဘၣ်. ယကျဲးစၢး ဒိကနၣ်ဒီးမၤထွဲ တၢ်သိၣ်က့ၤသီက့ၤ ဒီးဆဲးမၤယဟိဝၤယွၤ အတၢ်မၤ လၢအဂ့ၤကတၢၢ်.” အဃိ ပမ့ၢ်ဒိကနၣ် ယဟိဝၤယွၤ အကလုၢ် ဒီးအိၣ်ဒီး တၢ်ဆီၣ်လီၤသးထီဘိန့ၣ် ပကအိၣ်ဒီး တၢ်သးခုနီၢ်ကီၢ် လၢပတၢ်အိၣ်မူပူၤ.—ကတိၤ ၂၂:၄. တၢး၂၃.၀၉ ၁၀ ¶၁၀-၁၁

ခရံာ်ဖိ ဖဲစီၤပီလူးအစိၤန့ၣ် အဝဲသ့ၣ်ဘၣ်အိၣ်ဒီး တၢ်တူၢ်န့ၢ်ခီၣ်ကဲ. ခရံာ်ဖိတဖၣ်န့ၣ် ထံၣ်ဘၣ်တၢ်ကီတၢ်ခဲ ဒ်ပှၤဂၤအသိး တကးဒံးဘၣ် အဝဲသ့ၣ်ထံၣ်ဘၣ် တၢ်ကီတၢ်ခဲ ခီဖျိလၢ အကဲခရံာ်ဖိအဃိစ့ၢ်ကီး. ပှၤယူဒၤဖိတၢ်ဘူၣ်တၢ်ဘါခိၣ်နၢ် ဒီးပှၤရိမ့ၤဖိ ပဒိၣ်တဖၣ် မၤအၢမၤနးအဝဲသ့ၣ် ဒီးအဟံၣ်ဖိဃီဖိ ထီဒါအဝဲသ့ၣ်. (မး ၁၀:၂၁) တကးဒံးဘၣ် လၢတၢ်အိၣ်ဖှိၣ်ပူၤန့ၣ် တဘျီတခီၣ် ပှၤတနီၤ ထီဒါက့ၤတၢ်မ့ၢ်တၢ်တီ ဒီးကျဲးစၢးမၤလီၤဖး တၢ်အိၣ်ဖှိၣ် အဃိ အဝဲသ့ၣ်ကဘၣ် ကျဲးစၢးဟးဆှဲး ပှၤတဖၣ်န့ၣ်. (မၤတၢ် ၂၀:၂၉, ၃၀) ခရံာ်ဖိတဖၣ်ထံၣ်ဘၣ် တၢ်အိၣ်သးဒ်န့ၣ် နာ်က့ အဝဲသ့ၣ်ဆဲးအိၣ်ဒီး တၢ်တူၢ်န့ၢ်ခီၣ်ကဲဒ်လဲၣ်. (လီၣ် ၂:၃) အဝဲသ့ၣ် ဆိမိၣ်ထံဝဲ ပှၤလၢအအိၣ်ဒီး တၢ်တူၢ်န့ၢ်ခီၣ်ကဲ အဒိအတဲာ် လၢအအိၣ်လၢ လံာ်စီဆှံအပူၤ ဒ်သိးဒီး စီၤယိၤဘး. (ယၤ ၅:၁၀, ၁၁) အဝဲသ့ၣ် ဃ့ထုကဖၣ် ဒ်သိးကအိၣ်ဒီး တၢ်ဂံၢ်တၢ်ဘါ. (မၤတၢ် ၄:၂၉-၃၁) တကးဒံးဘၣ် အဝဲသ့ၣ် သ့ၣ်ညါဝဲလၢ အမ့ၢ်အိၣ်ဒီး တၢ်တူၢ်န့ၢ်ခီၣ်ကဲန့ၣ် ယဟိဝၤယွၤ ကဟ့ၣ်အဝဲသ့ၣ်ခိၣ်ဖး. (မၤတၢ် ၅:၄၁) လၢလံာ်စီဆှံ ဒီးပတၢ်ကရၢကရိ လံာ်လဲၢ်အပူၤန့ၣ် ပဖးဘၣ် ပှၤလၢအအိၣ်ဒီး တၢ်တူၢ်န့ၢ်ခီၣ်ကဲ အဂ့ၢ်အါမး. အဃိ ပမ့ၢ်မၤလိ ဒီးဆိမိၣ်ထံ အဝဲသ့ၣ်အဂ့ၢ်မၢ်မၢ်န့ၣ် ပကအိၣ်ဒီး တၢ်တူၢ်န့ၢ်ခီၣ်ကဲစ့ၢ်ကီး. တၢး၂၃.၀၇ ၃ ¶၅-၆

ယဟိဝၤယွၤ ဒီးယ့ၣ်ၡူးန့ၣ် သးအိၣ်မၤစၢၤပှၤထီဘိ. ပမ့ၢ်ဘၣ်ကွၢ် တၢ်မၢဖိပ့းတရူးန့ၣ် အသမၢယ့ၣ်ၡူး ဝံၤအလီၢ်ခံ အဘၣ်ဆၢတဲာ် တၢ်လၢအရ့ဒိၣ်အိၣ်ဝဲ. မ့ၢ်အကပာ်လီၤသးလၢ ကဟ့ၣ်အၡူ ဒီးတပိာ်ယ့ၣ်ၡူး အခံလၢၤဘၣ်ဧါ မ့တမ့ၢ် မ့ၢ်အကဆဲးမၤ ယဟိဝၤယွၤအတၢ်မၤဧါ. အဃိ ဒ်သိး စီၤပ့းတရူး အတၢ်နာ် တလီၤစၢ်တဂ့ၤအဂီၢ် ယ့ၣ်ၡူးဃ့ကညးန့ၢ် တၢ်လၢအဂီၢ် လၢယဟိဝၤယွၤအအိၣ်. ယ့ၣ်ၡူးတဲဘၣ် စီၤပ့းတရူးလၢ အဃ့န့ၢ်တၢ်လၢအဂီၢ် ဒီးအနာ်ဝဲလၢ စီၤပ့းတရူး ကမၤဆူၣ်ထီၣ် ဒီပုၢ်ဝဲၢ်တဖၣ် အဂံၢ်ဘါ. (လူၤ ၂၂:၃၁, ၃၂) ဖဲစီၤပ့းတရူး သ့ၣ်နီၣ်ထီၣ်က့ၤ ယ့ၣ်ၡူး အတၢ်ကတိၤအခါ အသးကမုာ်ထီၣ် ဖးဒိၣ်ညါ. ပဝဲစ့ၢ်ကီး ဖဲပဘၣ်ဆၢတဲာ် တၢ်လၢအရ့ဒိၣ်အခါ ယဟိဝၤယွၤ ကသူဝဲ တၢ်အိၣ်ဖှိၣ်သးပှၢ်တဖၣ် လၢကမၤစၢၤပှၤ ဒ်သိးပကဆဲးအိၣ်ဒီး တၢ်သးတီအဂီၢ်. (အ့း ၄:၈, ၁၁) ပထံၣ်ဘၣ်လၢ ယဟိဝၤယွၤ မၤလၢပှဲၤန့ၢ် စီၤပ့းတရူး ဒီးတၢ်မၢဖိအဂၤတဖၣ် အတၢ်လိၣ်ဘၣ် လၢနီၢ်ခိတကပၤ. အဃိ ပဝဲစ့ၢ်ကီး ပမ့ၢ်ပာ်ဆိ တၢ်စံၣ်တဲၤတဲလီၤတၢ်မၤ လၢပတၢ်အိၣ်မူပူၤန့ၣ် ယဟိဝၤယွၤ ကမၤလၢပှဲၤန့ၢ် ပတၢ်လိၣ်ဘၣ်. တၢး၂၃.၀၉ ၂၄-၂၅ ¶၁၄-၁၅

ပမ့ၢ်မၤဂ့ၤတၢ်လၢ ပှၤဂၤအဖီခိၣ် အါမ့ၢ်ဂ့ၤ စှၤမ့ၢ်ဂ့ၤ ယဟိဝၤယွၤ ထံၣ်ဝဲခဲလၢာ်. ယဟိဝၤယွၤထံၣ်ဝဲ ပတၢ်ဟ့ၣ်လီၤသး ဒီးအပာ်လုၢ်ပာ်ပှ့ၤဝဲ ဒီးအထံၣ်ဝဲဒ်သိးဒီး အကမၢ်အိၣ်ဒီးပှၤ ဒီးအကလိးကဒါပှၤ. နကဲတၢ်အိၣ်ဖှိၣ် အပှၤမၤစၢၤတၢ်ဧါ မ့တမ့ၢ် တၢ်အိၣ်ဖှိၣ်သးပှၢ်တဂၤဧါ. နမ့ၢ်ကဲန့ၣ် ယဟိဝၤယွၤ တသးပ့ၤနီၣ် တၢ်လၢနမၤတ့ၢ်တဖၣ် ဒီးတၢ်အဲၣ်လၢ နပာ်ဖျါထီၣ်တဖၣ်ဘၣ်. (၁ ကရံၣ် ၁၅:၅၈) နဆဲးပာ်ဖျါထီၣ်တၢ်အဲၣ် တုၤလၢခဲအံၤန့ၣ် ယဟိဝၤယွၤထံၣ်ဝဲ. ယဟိဝၤယွၤ ဘၣ်သးဝဲလၢ ပကအဲၣ်အီၤ ဒီးပကအဲၣ်ပှၤဂၤ ဒိၣ်ထီၣ်. ဒ်သိး ပတၢ်အဲၣ်ယဟိဝၤယွၤ ကဒိၣ်ထီၣ်အဂီၢ် ပကဘၣ်ဖးလံာ်စီဆှံ, ဆိမိၣ်ထံ တၢ်လၢပဖး ဒီးဃ့ထုကဖၣ်လၢ အအိၣ်ထီဘိ. ဒ်သိးပတၢ်အဲၣ် ပဒီပုၢ်ဝဲၢ်မုၣ်ခွါ ကဒိၣ်ထီၣ်အဂီၢ် ပကဘၣ်မၤစၢၤ အဝဲသ့ၣ်လၢ နီၢ်ခိတကပၤစ့ၢ်ကီး. ပတၢ်အဲၣ်အံၤ မ့ၢ်ဒိၣ်ထီၣ်အါထီၣ်န့ၣ် ပတၢ်ရ့လိာ်သးဒီး ယဟိဝၤယွၤ ဒီးပဒီပုၢ်ဝဲၢ်မုၣ်ခွါတဖၣ်စ့ၢ်ကီး ကဂ့ၤဒိၣ်ထီၣ်. ယဟိဝၤယွၤ ဒီးဒီပုၢ်ဝဲၢ်မုၣ်ခွါတဖၣ် ကကဲဝဲ ပသကိး လီၤထူလီၤယိာ်. တၢး၂၃.၀၇ ၁၀ ¶၁၁; ၁၁ ¶၁၃; ၁၃ ¶၁၈

ခရံာ်ဖိတဂၤဘၣ်တဂၤ ကကွၢ်ထွဲလီၤ အနီၢ်ကစၢ် တၢ်အိၣ်ဆူၣ်အိၣ်ချ့ဒ်လဲၣ်န့ၣ် အကဘၣ်ဆၢတဲာ်တၢ်လၢ အနီၢ်ကစၢ်. ဖဲခရံာ်ဖိတဖၣ် ဃုထၢ တၢ်ကူစါယါဘျါအခါ အဝဲသ့ၣ်ကဘၣ်မၤထွဲ လံာ်စီဆှံအတၢ်သိၣ်တၢ်သီ လၢကဘၣ်ဟးဆှဲး တၢ်သွံၣ် ဒီးတၢ်ဝံတၢ်နါ အတၢ်ဖံးတၢ်မၤ. (မၤတၢ် ၁၅:၂၀; ကလၤ ၅:၁၉, ၂၀) မ့မ့ၢ်တၢ်ကူစါယါဘျါ လၢအဂၤတဖၣ်န့ၣ် အဝဲသ့ၣ် ကဘၣ်ဆၢတဲာ်တၢ်လၢ အနီၢ်ကစၢ်. ဘၣ်သ့ၣ်သ့ၣ် ပကဆိမိၣ်ဘၣ်လၢ ပတၢ်ကူစါယါဘျါသးန့ၣ် ဂ့ၤန့ၢ်ဒံးပှၤဂၤ ဘၣ်ဆၣ် ပကဘၣ်ပာ်ကဲ ပှၤဂၤအတၢ်ဆၢတဲာ် ဘၣ်ဃးဒီး အဝဲသ့ၣ်တၢ်ကူစါယါဘျါ. အဃိ ပကမၤဒ်န့ၣ်အဂီၢ် ပကဘၣ်နီၣ်ဘၣ် တၢ်ဂ့ၢ်လွံၢ်ထံၣ်. (၁) ထဲဒၣ်ကစၢ်ယွၤ အဘီအမုၢ်န့ၣ် ကမၤလီၤမၢ်ကွံာ် တၢ်ဆူးတၢ်ဆါခဲလၢာ်. (ၡါ ၃၃:၂၄) (၂) ခရံာ်ဖိတဂၤဘၣ်တဂၤ ကဘၣ်ဆိကမိၣ်ထံ ဒီးဆၢတဲာ်တၢ်အဂ့ၤကတၢၢ် လၢအတၢ်အိၣ်ဆူၣ်အိၣ်ချ့အဂီၢ်. ( ရိ ၁၄:၅) (၃) ပတဘၣ်စံၣ်ညီၣ်ပှၤဂၤ တၢ်ဆၢတဲာ် ဒီးဒုးအိၣ်ထီၣ် တၢ်လီၤဃံၢ်လၢ ပှၤဂၤအဂီၢ်ဘၣ်. (ရိ ၁၄:၁၃) (၄) ခရံာ်ဖိတဖၣ် ပာ်ဖျါထီၣ်တၢ်အဲၣ် ဒီးသ့ၣ်ညါဝဲလၢ တၢ်ဃူတၢ်ဖိးလၢ တၢ်အိၣ်ဖှိၣ်ပူၤန့ၣ် အရ့ဒိၣ်န့ၢ် အနီၢ်ကစၢ်တၢ်ထံၣ်ဒံး.—ရိ ၁၄:၁၅, ၁၉, ၂၀. တၢး၂၃.၀၇ ၂၄ ¶၁၅

နပာ်လုၢ်ပာ်ပှ့ၤ နတၢ်ရ့လိာ်သးဒီး ယဟိဝၤယွၤဧါ. ပသ့ၣ်ညါလၢ နပာ်လုၢ်ပာ်ပှ့ၤ သပှၢ်တၢၢ်. အဒိ ပမ့ၢ်ကွၢ်က့ၤ လၢအပူၤကွံာ်န့ၣ် ပှၤအါဂၤ ပာ်လုၢ်ပာ်ပှ့ၤဝဲ အတၢ်ရ့လိာ်သးဒီး ယဟိဝၤယွၤ. (စံး ၁၀၄:၃၃, ၃၄) ဒီးပှၤအါဂၤန့ၣ် အဝဲသ့ၣ်သးအိၣ် ဟ့ၣ်လီၤအသးလၢ တၢ်ဘူၣ်ထီၣ်ဘါထီၣ် ယဟိဝၤယွၤအဂီၢ် သပှၢ်တၢၢ်. ပှၤအံၣ်စရ့လးဖိလၢညါ လၢအကဲ ပှၤနစၤရံဖိတဖၣ်န့ၣ် အဝဲသ့ၣ်မ့ၢ် ပှၤလၢအဟ့ၣ်လီၤအသး. ပှၤနစၤရံဖိန့ၣ် အကဲဝဲ ပှၤအံၣ်စရ့လးဖိလၢ အသးဆူၣ် ဒီးအဟ့ၣ်လီၤအသး လီၤလီၤဆီဆီ လၢကမၤ ယဟိဝၤယွၤ အတၢ်မၤ. ဒီးလၢစီၤမိၤၡ့ အတၢ်သိၣ်တၢ်သီအပူၤန့ၣ် ပိာ်ခွါမ့ၢ်ဂ့ၤ ပိာ်မုၣ်မ့ၢ်ဂ့ၤ မၤတၢ်အၢၣ်လီၤ လီၤလီၤဆီဆီလၢ ကအိၣ်မူဒ်ပှၤနစၤရံဖိလၢ ယဟိဝၤယွၤအဂီၢ် တတီၤဖိသ့. (၄ မိၤ ၆:၁, ၂) ဒီးဖဲပှၤအံၣ်စရ့လးဖိတဂၤ မၤတၢ်အၢၣ်လီၤလၢ အကအိၣ်မူဒ် ပှၤနစၤရံဖိအခါ အကဘၣ်မၤထွဲဝဲ တၢ်သိၣ်တၢ်သီလၢ ပှၤအံၣ်စရ့လးဖိ လၢအဂၤတဖၣ် တလိၣ်မၤထွဲဝဲဘၣ်. မ့မ့ၢ်ဒ်န့ၣ်န့ၣ် ဘၣ်မနုၤအဃိ ပှၤအံၣ်စရ့လးဖိတဂၤ မၤတၢ်အၢၣ်လီၤလၢ အကအိၣ်မူ ဒ်ပှၤနစၤရံဖိအသိးလဲၣ်. အမၤတၢ်အၢၣ်လီၤဒ်န့ၣ် ဘၣ်သ့ၣ်သ့ၣ် ခီဖျိလၢ အအဲၣ်ယဟိဝၤယွၤဒိၣ်မး ဒီးအအဲၣ်ဒိး စံးဘျုးက့ၤ ယဟိဝၤယွၤ ခီဖျိလၢ ယဟိဝၤယွၤ ဆိၣ်ဂ့ၤအီၤအါမးအဃိ.—၅ မိၤ ၆:၅; ၁၆:၁၇. တၢး၂၄.၀၂ ၁၄ ¶၁-၂

လၢလံာ်စီဆှံပူၤ ဧ့ၤဘြံၤအတၢ်ကတိၤ လၢအမ့ၢ် “တၢ်သးတီ” မ့တမ့ၢ် “တၢ်အဲၣ်လၢအတီ” န့ၣ်အဲၣ်ဒိးတဲဝဲ တၢ်အဲၣ် ဒီးတၢ်ကဟုကယာ်လၢ ကစၢ်ယွၤပာ်ဖျါထီၣ်ဝဲလၢ အခ့အပှၤတဖၣ်အဖီခိၣ်. ဒီးတၢ်ကတိၤအံၤ အဲၣ်ဒိးတဲစ့ၢ်ကီး တၢ်သးတီလၢ ကစၢ်ယွၤ အခ့အပှၤတဖၣ် ပာ်ဖျါထီၣ်ဝဲ လၢတဂၤဒီးတဂၤအဖီခိၣ်. (၂ မူၤ ၉:၆, ၇) တကးဒံးဘၣ် ယဟိဝၤယွၤ ဘၣ်သးဝဲလၢ ပကတီဒီးအီၤစ့ၢ်ကီး ဒီးပတၢ်သးတီန့ၣ် ပမၤအါထီၣ်အီၤ တဘျီတစဲး တဘျီတစဲးသ့. အဒိ စီၤဒၤနံးယ့လး အတၢ်သးတီ အါထီၣ်ဝဲ တဘျီတစဲး ဒ်လဲၣ်န့ၣ် ခဲအံၤပကတဲသကိး. လၢစီၤဒၤနံးယ့လး အတၢ်အိၣ်မူပူၤ အကတီဒီး ယဟိဝၤယွၤဧါ တတီဘၣ်ဧါန့ၣ် အဘၣ်ပာ်ဖျါထီၣ်ဝဲ အိၣ်တဘျုးဘျီညါ. ဖဲအသးအိၣ် အနံၣ် ၉၀ အခါ အထံၣ်ဘၣ် တၢ်မၤကွၢ် ဖးဒိၣ်တခါ. စီၤပၤဒၤရယါဝ့ၣ် အပဒိၣ်တဖၣ်န့ၣ် သးဟ့ဝဲ စီၤဒၤနံးယ့လးဒိၣ်မး ဒီးတပာ်ကဲ စီၤဒၤနံးယ့လး အကစၢ်ယွၤဘၣ်. အဃိ အဝဲသ့ၣ် ကူၣ်ထီၣ်ဝဲလၢ ကမၤသံ စီၤဒၤနံးယ့လး. အဝဲသ့ၣ် ဒုးအိၣ်ထီၣ် တၢ်သိၣ်တၢ်သီတခါ ဒီးမၢဝဲ စီၤပၤဆဲးလီၤအမံၤ. ဒီးတၢ်သိၣ်တၢ်သီ အိၣ်ဝဲလၢ အသီ ၃၀ အတီၢ်ပူၤန့ၣ် ပှၤတဘၣ်ဃ့ထုကဖၣ်လၢ ယွၤတဂၤဂၤ မ့တမ့ၢ် ပှၤတဂၤဂၤအအိၣ်ဘၣ်. ဘၣ်ဆၣ် ပထံၣ်ဘၣ်လၢ စီၤဒၤနံးယ့လး ပာ်လီၤအသးလၢ အကတီဒီး ယဟိဝၤယွၤ.—ဒၤ ၆:၁၂-၁၅, ၂၀-၂၂. တၢး၂၃.၀၈ ၅ ¶၁၀-၁၂

ယဟိဝၤယွၤ ဘၣ်သးလၢ ပကဆဲးပာ်ဖျါထီၣ်လၢ ပအဲၣ်ဒီပုၢ်ဝဲၢ်မုၣ်ခွါ. အဒိ ဒီပုၢ်ဝဲၢ်မုၣ်ခွါ တဂၤဂၤ မ့ၢ်တရ့ဒီးပှၤဂ့ၤဂ့ၤဘၣ် သနာ်က့ ပကဘၣ်ထံၣ်လၢ အဝဲသ့ၣ် ဂုာ်ကျဲးစၢးမၤထွဲ ယဟိဝၤယွၤ အတၢ်မၤလိာ် ဒီးပတဘၣ်ထံၣ်လၢ အဝဲသ့ၣ် ဘၣ်သးမၤဆါပှၤဘၣ်. (ကတိၤ ၁၂:၁၈) နီၢ်ကီၢ်န့ၣ် ပတကဲပှၤလၢပှၤပှဲၤ နီတဂၤဘၣ်, သနာ်က့ ယဟိဝၤယွၤအဲၣ်ပှၤ. ဒီးပမၤကမၣ်တၢ် သနာ်က့ အဆဲးကဲပသကိး ဒီးအတစၢဃာ် ပတၢ်ကမၣ်ဘၣ်. (စံး ၁၀၃:၉) ပသးခုဒိၣ်မးလၢ ယဟိဝၤယွၤ ပျၢ်ကွံာ်ပတၢ်ကမၣ်. အဃိ ပကဘၣ်ကွၢ်လိအီၤ ဒီးပျၢ်ကွံာ်ပှၤဂၤတၢ်ကမၣ်စ့ၢ်ကီး. (အ့း ၄:၃၂–၅:၁) ပကဘၣ် သ့ၣ်နီၣ်ထီၣ်စ့ၢ်ကီးလၢ တၢ်အကတၢၢ် ဘူးထီၣ်ဒိၣ်မးအဃိ ပကဘၣ် မၤဂ့ၤဒိၣ်ထီၣ် ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါ. ခါဆူညါန့ၣ် ပကထံၣ်ဘၣ် တၢ်မၤအၢမၤနး အါန့ၢ်ခဲအံၤဒံး. ဒီးဘၣ်သ့ၣ်သ့ၣ် ပကလီၤဘၣ်လၢဃိာ်ပူၤ ခီဖျိလၢ ပတၢ်စူၢ်တၢ်နာ် အဃိ. တၢ်မ့ၢ်ကဲထီၣ်သး ဒ်န့ၣ်န့ၣ် ပကလိၣ်ဘၣ် ဒီပုၢ်ဝဲၢ်မုၣ်ခွါ အတၢ်မၤစၢၤ အါန့ၢ်ခဲအံၤဒံး.—ကတိၤ ၁၇:၁၇. တၢး၂၄.၀၃ ၁၅-၁၆ ¶၆-၇

လၢလံာ်စီဆှံအပူၤ ပှၤသးစၢ်လၢ အအိၣ်ဒီးတၢ်ရ့လိာ်သး လၢအဂ့ၤဒီး ယဟိဝၤယွၤ, ဒိးန့ၢ်ဘၣ်ယဟိဝၤယွၤ အတၢ်ဘၣ်သး ဒီးအိၣ်ဒီးတၢ်အိၣ်မူလၢ အလီၤသူၣ်မံသးမုာ်န့ၣ် အိၣ်ဒံးအါမး. အဒိ စီၤဒၤဝံးန့ၣ် ဖဲအသးစၢ်အခါ အဃုထၢလၢ အကကဲ ယဟိဝၤယွၤအသကိး ဒီးလၢခံန့ၣ် အကဲထီၣ် စီၤပၤလၢ အအိၣ်ဒီးတၢ်သးတီ. (၁ စီၤပၤ ၃:၆; ၉:၄, ၅; ၁၄:၈) နမ့ၢ်မၤလိ စီၤဒၤဝံးအဂ့ၢ်န့ၣ် အကမၤဆူၣ်ထီၣ်နဂံၢ်နဘါလၢ နဘၣ်သးမၤ ယဟိဝၤယွၤတၢ်မၤ လၢတၢ်သးတီအပူၤ. တကးဒံးဘၣ် နမ့ၢ်မၤလိစ့ၢ်ကီး စီၤမၢ်ကူး ဒီးစီၤတံၤမသ့းအဂ့ၢ်န့ၣ် နကသ့ၣ်ညါဘၣ်လၢ အဝဲသ့ၣ်ခံဂၤအံၤ လၢအနီၢ်ဆံးခါ တုၤလၢအသံန့ၣ် အဝဲသ့ၣ်ဆဲးမၤ ယဟိဝၤယွၤတၢ်မၤ လၢတၢ်သးတီအပူၤ. နတၢ်အိၣ်မူခါဆူညါ ကမၤအသးဒ်လဲၣ်န့ၣ် ဒိးသန့ၤထီၣ်အသးလၢ တၢ်လၢနမၤအီၤခဲအံၤ. နမ့ၢ်သန့ၤနသးလၢ ယဟိဝၤယွၤ ဒီးတသန့ၤနသးလၢ နနီၢ်ကစၢ်ဘၣ်န့ၣ် အကမၤစၢၤနၤလၢ နကဆၢတဲာ်တၢ်လၢအဘၣ်. ဒီးနကအိၣ်ဒီး တၢ်အိၣ်မူလၢ အလီၤသူၣ်မံသးမုာ်. တကးဒံးဘၣ် သ့ၣ်နီၣ်ထီၣ်လၢ တၢ်လၢနမၤတဖၣ်န့ၣ် ယဟိဝၤယွၤ ပာ်လုၢ်ပာ်ပှ့ၤဝဲ. အဃိ နမ့ၢ်ဃုထၢလၢ နကမၤ ယဟိဝၤယွၤ အတၢ်မၤန့ၣ် မ့ၢ်ဝဲတၢ်ဃုထၢ လၢအဂ့ၤကတၢၢ် လၢနတၢ်အိၣ်မူပူၤ. တၢး၂၃.၀၉ ၁၃ ¶၁၈-၁၉

တၢ်မၢဖိပီလူး သ့ၣ်ညါဝဲလၢ ဒီပုၢ်ဝဲၢ်မုၣ်ခွါတဖၣ်န့ၣ် တကဲပှၤလၢပှၤပှဲၤဘၣ်. အဒိ ဖဲတၢ်အိၣ်ဖှိၣ်ဖိတနီၤ လၢအအိၣ်လၢ ဝ့ၢ်ယရူၤၡလ့ၣ် ထံၣ်လိာ်သးဒီးအီၤအခါ အဝဲသ့ၣ်တနာ်လၢ စီၤပီလူးကဲထီၣ် ယ့ၣ်ၡူးအပျဲၢ်အဘီၣ်ဘၣ်. (မၤတၢ် ၉:၂၆) လၢခံ ပှၤတနီၤ တဲဟးဂီၤ စီၤပီလူးအဂ့ၢ် ဒ်သိးပှၤတနာ်န့ၢ်အီၤလၢၤတဂ့ၤအဂီၢ်. (၂ ကရံၣ် ၁၀:၁၀) တကးဒံးဘၣ် စီၤပီလူး ထံၣ်ဘၣ်ဝဲလၢ ဒီပုၢ်ဝဲၢ်ခွါလၢ အတီခိၣ်ရိၤမဲတၢ်တဂၤ ဆၢတဲာ်ကမၣ်တၢ်အဃိ အတၢ်ဆၢတဲာ်န့ၣ် ကဲထီၣ်တၢ်လီၤဃံၢ်လၢ ပှၤဂၤအဂီၢ်. (ကလၤ ၂:၁၁, ၁၂) ဒီးစီၤမၢ်ကူး လၢအလဲၤသကိးတၢ်ဒီး စီၤပီလူးန့ၣ် အမၤဟးဂီၤ စီၤပီလူးအသးဒိၣ်မး. (မၤတၢ် ၁၅:၃၇, ၃၈) ခီဖျိလၢ တၢ်ဂ့ၢ်တဖၣ်အံၤအဃိ စီၤပီလူး တကနာ်ဃုာ် ပှၤလၢအမၤဟးဂီၤအသး ဒီးတရ့ဒီးအဝဲသ့ၣ်လၢၤဘၣ်ဧါ. အတမၤဝဲဒ်န့ၣ်ဘၣ်. စီၤပီလူးကွၢ်လၢ ဒီပုၢ်ဝဲၢ်မုၣ်ခွါ အတၢ်ဂ့ၤ ဒီးအဆဲးမၤ ယဟိဝၤယွၤအတၢ်မၤ. စီၤပီလူး ကဆဲးအိၣ်ဒီး တၢ်တူၢ်န့ၢ်ခီၣ်ကဲအဂီၢ် တၢ်မနုၤမၤစၢၤအီၤလဲၣ်. စီၤပီလူး အဲၣ်ဒီပုၢ်ဝဲၢ်မုၣ်ခွါ ဒိၣ်မးအဃိ အတၢ်အဲၣ် မၤစၢၤအီၤဒ်သိး အကကွၢ်လၢ အဝဲသ့ၣ်အတၢ်ဂ့ၤ ဒီးတကွၢ်လၢ အဝဲသ့ၣ် အတၢ်ဂံၢ်စၢ်ဘါစၢ်ဘၣ်. အတၢ်အဲၣ်အံၤ မၤစၢၤအီၤဒ် လံာ်စီဆှံဆၢလၢ တနံၤအံၤတဲဝဲအသိး. တၢး၂၄.၀၃ ၁၅ ¶၄-၅

လံာ်စီဆှံ ပာ်ဖျါထီၣ်ဝဲ ပှၤအါဂၤလၢ အအိၣ်ဒီး တၢ်သးစူၤအဂ့ၢ်. အဒိ ပကကွၢ်သကိး စီၤအံၤစဲးအဂ့ၢ်. ဖဲစီၤအံၤစဲး အိၣ်လၢ ပှၤဖလ့ၡသးဖိ အဟီၣ်ကဝီၤ လၢကရၢ်အခါ ပှၤဖလ့ၡသးဖိ သးက့ၣ်အီၤအဃိ ထံကမျၢလၢ စီၤအံၤစဲးအပါ အခ့အပှၤတဖၣ် ခူၣ်ပာ်စၢၤဝဲန့ၣ် ပှၤဖလ့ၡသးဖိ မၤပှဲၤဝဲဒီးဟီၣ်ခိၣ်. စီၤအံၤစဲး အိၣ်ဒီးတၢ်ခွဲးတၢ်ယာ်လၢ ကန့ၢ်ဘၣ်ဝဲ ထံကမျၢအံၤ ဘၣ်ဆၣ် အတတဲအါတၢ်ဒီး ပှၤဖလ့ၡသးဖိဘၣ်. စီၤအံၤစဲး ဒီးအဟံၣ်ဖိဃီဖိ လဲၤအိၣ်က့ၤလၢ တၢ်လီၢ်အဂၤတတီၤ ဒီးခူၣ်ဝဲထံကမျၢ လၢအဂၤတဖၣ်. (၁ မိၤ ၂၆:၁၂-၁၈) ဘၣ်ဆၣ် ပှၤဖလ့ၡသးဖိ တဲဝဲလၢ ထံလၢအအိၣ်လၢ ထံကမျၢပူၤ ဖဲတၢ်လီၢ်အဂၤတတီၤအံၤန့ၣ် ကဲစ့ၢ်ကီး အဝဲသ့ၣ်အတၢ်. ပှၤဖလ့ၡသးဖိ မၤစီၤအံၤစဲး ဒ်အံၤသနာ်က့ စီၤအံၤစဲး ဆဲးအိၣ်ဃူအိၣ်ဖိးဒီးအဝဲသ့ၣ်ဒံး. (၁ မိၤ ၂၆:၁၉-၂၅) စီၤအံၤစဲးန့ၣ် ပှၤမၤဒိၣ်ထီၣ်အသး သနာ်က့ တၢ်မနုၤမၤစၢၤအီၤလၢ အကဆဲးအိၣ်ဒီး တၢ်သးစူၤလဲၣ်. ပသ့ၣ်ညါလၢ အကွၢ်လိဝဲ အပါစီၤအၤဘြၤဟၣ် လၢအကဲပှၤလၢ အအိၣ်ဃူအိၣ်ဖိးဒီးပှၤဂၤ ဒီးအကွၢ်လိစ့ၢ်ကီး အမိနီၢ်စၤရါလၢ အအိၣ်ဒီး “တၢ်ပာ်သး မုာ်မုာ်ခုၣ်ခုၣ် ဒီးတၢ်သးစူၤ.”—၁ ပ့း ၃:၄-၆; ၁ မိၤ ၂၁:၂၂-၃၄. တၢး၂၃.၀၉ ၁၅ ¶၄

ယဟိဝၤယွၤဆှၢလီၤ အဖိခွါလၢဟီၣ်ခိၣ်ချၢ ဒ်သိး ကသိၣ်လိနဲၣ်လိ ပှၤဂၤလၢ ကစၢ်ယွၤအဘီအမုၢ်အဂ့ၢ်. တကးဒံးဘၣ် ယ့ၣ်ၡူး ဟ့ၣ်လုၢ်ထီၣ်အသး လၢပှၤဟီၣ်ခိၣ်ဖိအဂီၢ် ဒ်သိးအဝဲသ့ၣ် ကထူၣ်ဖျဲးထီၣ်လၢ တၢ်ဒဲးဘးဒီးတၢ်သံ. လၢခံ ယ့ၣ်ၡူး ဂဲၤဆၢထၢၣ်သမူထီၣ်က့ၤ ဒီးက့ၤထီၣ်လၢမူခိၣ် ဒ်သိး အကပၢတၢ်ဒ်စီၤပၤတဂၤ လၢကစၢ်ယွၤ အဘီအမုၢ်အပူၤ. တၢ်ဂ့ၢ်အရ့ဒိၣ်ကတၢၢ်လၢ လံာ်စီဆှံပူၤန့ၣ် အကဲဝဲ ယဟိဝၤယွၤအမံၤ ကဘၣ်တၢ်ပာ်စီဆှံအီၤ ဖဲအတၢ်တိာ်ပာ် လၢဟီၣ်ခိၣ်ချၢ ဟဲလၢပှဲၤထီၣ်ဝဲအခါ. ဒီးအတၢ်တိာ်ပာ်အံၤ ကဟဲလၢပှဲၤထီၣ်ဝဲ ခီဖျိ ကစၢ်ယွၤအဘီအမုၢ် လၢယ့ၣ်ၡူးပၢဝဲ. ယဟိဝၤယွၤ အတၢ်တိာ်ပာ်န့ၣ် တဆီတလဲနီတဘျီဘၣ်. အဝဲအၢၣ်လီၤဝဲလၢ အကမၤလၢပှဲၤထီၣ် အတၢ်တိာ်ပာ်. (ၡါ ၄၆:၁၀; ဧ့ၤ ၆:၁၇, ၁၈) ဒီးကယီကယီန့ၣ် ဟီၣ်ခိၣ်တဘ့ၣ်အံၤ ကကဲထီၣ်ကဒါက့ၤ ပၤရဒံစူး. နီၢ်အံၣ်အု ဒီးစီၤအၤဒၣ် အစၢၤအသွဲၣ်တဖၣ်န့ၣ် ကကဲထီၣ် ပှၤလၢပှၤပှဲၤ ဒီးပှၤတီပှၤလိၤ ဒီးအဝဲသ့ၣ်က “အိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ်.” (စံး ၂၂:၂၆) ထဲန့ၣ်တကးဒံးဘၣ် ယဟိဝၤယွၤ အတၢ်တိာ်ပာ် လၢအဂၤန့ၣ်အိၣ်ဒံး. ယဟိဝၤယွၤ အတၢ်တိာ်ပာ်လၢ အလီၢ်ခံကတၢၢ်န့ၣ် မ့ၢ်ဝဲ အတၢ်ဘၣ်တ့ လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ကအိၣ်ဃူအိၣ်ဖိးတပူၤဃီ. ဖဲန့ၣ်ဝံၤအလီၢ်ခံ အတၢ်ဘၣ်တ့ခဲလၢာ် ကဒိးပၢအသးလၢ အတၢ်ပၢဖီလာ်. (အ့း ၁:၈-၁၁) ပသ့ၣ်ညါဘၣ်လၢ ယဟိဝၤယွၤ ကမၤလၢပှဲၤထီၣ် အတၢ်တိာ်ပာ် လၢကျဲဒ်န့ၣ်အဃိ လီၤသးခုဖးဒိၣ်ညါ. တၢး၂၃.၁၀ ၂၀ ¶၇-၈

ဖဲပှၤယူဒၤဖိတဖၣ် ဟးထီၣ်လၢ ဝ့ၢ်ဘၤဘူၤလိၣ် ဒီးဟဲက့ၤတုၤလၢ ယရူၤၡလ့ၣ်တယံာ်ဘၣ်န့ၣ် အဝဲသ့ၣ်ထံၣ်ဘၣ်ဒီး ကျိၣ်စ့တၢ်ကီတၢ်ခဲ, ထံကီၢ်တၢ်အိၣ်သး တဂၢၢ်တကျၢၤ ဒီးထံကီၢ်လၢ အခိၣ်အဃၢၤတဖၣ် ထီဒါအဝဲသ့ၣ်. အဃိ အဝဲသ့ၣ်ကဘှီထီၣ်က့ၤ ယဟိဝၤယွၤ အတၢ်လုၢ်ဟံၣ်န့ၣ် တညီလၢအဝဲသ့ၣ်အဂီၢ်ဘၣ်. သနာ်က့ ယဟိဝၤယွၤ ဆှၢလီၤဝဲ အဝံခံဂၤ လၢအမ့ၢ် ဝံဃးကဲ ဒီးဝံစကၤရယၤ. ဝံခံဂၤအံၤ မၤစၢၤအဝဲသ့ၣ်ဒ်သိး အဝဲသ့ၣ်ကသးဆူၣ်ထီၣ်က့ၤ ဒီးအဝံခံဂၤအံၤ အတၢ်ဟ့ၣ်ဂံၢ်ဟ့ၣ်ဘါန့ၣ် ကမၤစၢၤအဝဲသ့ၣ်ဒိၣ်မး. (ဃး ၁:၁; ကၤ ၁:၁) ဒီးလၢခံဘူးထီၣ်လၢ အနံၣ် ၅၀ ဃၣ်ဃၣ်ဒီးန့ၣ် ပှၤယူဒၤဖိတဖၣ် လိၣ်ဘၣ်ကဒီး တၢ်ဟ့ၣ်ဂံၢ်ဟ့ၣ်ဘါ. ဖဲန့ၣ်အဆၢကတီၢ် စီၤဧ့စြၤလၢအအိၣ်လၢ ဘၤဘူၤလိၣ်န့ၣ် အက့ၤကဒါ လၢဝ့ၢ်ယရူၤၡလ့ၣ်. စီၤဧ့စြၤန့ၣ် အကဲဝဲ ပှၤကွဲးကူ ယွၤအကလုၢ်ကထါ ဒီးအဟ့ၣ်ဂံၢ်ဟ့ၣ်ဘါ ကစၢ်ယွၤအပှၤဂီၢ်မုၢ် ဒ်သိးအဝဲသ့ၣ်ကပာ်ဆိ တၢ်ဘူၣ်ထီၣ်ဘါထီၣ် ယဟိဝၤယွၤ လၢနီၣ်ဂံၢ်တၢ. (ဧ့ ၇:၁, ၆) လၢညါန့ၣ် ဖဲပှၤထီဒါ ကစၢ်ယွၤအပှၤဂီၢ်မုၢ်အခါ ဝံဃးကဲ ဒီးဝံစကၤရယၤ မၤစၢၤ အဝဲသ့ၣ် ဒ်သိးကဆဲးနာ်န့ၢ် ယဟိဝၤယွၤ. ဆၢကတီၢ်ခဲအံၤ ပတၢ်အိၣ်သး မ့ၢ်ကီခဲထဲလဲၣ် သနာ်က့ ဒ်သိး ပကဆဲးနာ်န့ၢ် ယဟိဝၤယွၤအဂီၢ် ပဟံန့ၢ်တၢ်မၤလိလၢ ဝံတဖၣ်အံၤ အတၢ်မၤစၢၤ သ့စ့ၢ်ကီး.—ကတိၤ ၂၂:၁၉. တၢး၂၃.၁၁ ၁၄-၁၅ ¶၂-၃

ပပာ်ဖျါထီၣ်လၢ ပအဲၣ်ပဒီပုၢ်ဝဲၢ်မုၣ်ခွါ ကသ့ဒ်လဲၣ်. ပပာ်ဖျါထီၣ်သ့ခီဖျိ ပမၤမုာ်ထီၣ်က့ၤ အဝဲသ့ၣ်အသး. တကးဒံးဘၣ် ပမ့ၢ်အိၣ်ဒီး တၢ်ဒိသူၣ်ဒိသးန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကမၤထွဲ တၢ်ဟ့ၣ်ကူၣ် လၢအမ့ၢ် “ဆဲး . . . မၤမုာ်ထီၣ်လိာ်သး တဂၤဒီးတဂၤ.” (၁ သ့း ၄:၁၈) ဒီးပဆဲးမၤဒိၣ်ထီၣ်အါထီၣ် တၢ်အဲၣ်လၢ တဂၤဒီးတဂၤ အဖီခိၣ် ကသ့ဒ်လဲၣ်. ပမၤသ့ခီဖျိ ပကျဲးစၢးပျၢ်ကွံာ် ပဒီပုၢ်ဝဲၢ်မုၣ်ခွါအတၢ်ကမၣ်. ဆၢကတီၢ်ခဲအံၤ ဘၣ်မနုၤအဃိ ပကဘၣ် ဆဲးမၤဒိၣ်ထီၣ်အါထီၣ် တၢ်အဲၣ်လၢ တဂၤဒီးတဂၤ အဖီခိၣ်လဲၣ်. စီၤပ့းတရူး တဲဝဲလၢ “တၢ်ခဲလၢာ် အကတၢၢ်န့ၣ် ဘူးထီၣ်လံ. အဃိ, . . . သုကဘၣ် အဲၣ်လိာ်ကွံလိာ်သုသးဒိၣ်မး.” (၁ ပ့း ၄:၇, ၈) ဟီၣ်ခိၣ်လၢ မုၣ်ကီၤလံၢ်ပၢဝဲအံၤ ကကတၢၢ် ဘူးထီၣ်မၣ်ဘူးထီၣ်အဃိ တၢ်ကကဲထီၣ်သးဒ်လဲၣ်. ယ့ၣ်ၡူး တဲဆိပာ်စၢၤဝဲလၢ “ပှၤကလုာ်ခဲလၢာ် ကသးဟ့သုလၢ ယမံၤအဃိ.” (မး ၂၄:၉) ဒ်သိး ပလဲၤခီဖျိ ပှၤဂၤအတၢ်သးဟ့ ကန့ၢ်အဂီၢ် ပကဘၣ် အိၣ်ဃူအိၣ်ဖိး. ပမ့ၢ်အိၣ်ဃူအိၣ်ဖိးန့ၣ် မုၣ်ကီၤလံၢ် မၤလီၤဖးပှၤ တန့ၢ်ဘၣ်.—ဖံလံး ၂:၁, ၂. တၢး၂၃.၁၁ ၁၃ ¶၁၈-၁၉

လံာ်စီဆှံ တၢ်မ့ၢ်တၢ်တီန့ၣ် အိၣ်ဒီး အစိကမီၤဒိၣ်မး. ပမ့ၢ်သိၣ်လိပှၤဂၤ ဘၣ်ဃးဒီး ယဟိဝၤယွၤအဂ့ၢ် ဒီးအတၢ်ပာ်သူၣ်ပာ်သးန့ၣ် ပကထံၣ်ဘၣ် တၢ်လီၤကမၢကမၣ်တဖၣ်. ပကထံၣ်ဘၣ်လၢ မုၣ်ကီၤလံၢ် အတၢ်လံၣ်တၢ်လီ လၢအမၤခံးပှၤဂၤအသးန့ၣ် ကလီၤမၢ်ကွံာ် ကယီကယီ ဒီးပှၤကထံၣ်ထီၣ် ယဟိဝၤယွၤ အတၢ်ဂ့ၤတၢ်ဝါ ဒ်ပထံၣ်ထီၣ်အသိး. ပှၤဂၤ ကသ့ၣ်ညါဘၣ်လၢ ယဟိဝၤယွၤ အိၣ်ဒီးတၢ်စိတၢ်ကမီၤ ဒိၣ်ဒိၣ်မုၢ်မုၢ်အဃိ အဝဲသ့ၣ် ကကမၢကမၣ်ဒိၣ်မး. (ၡါ ၄၀:၂၆) အဝဲသ့ၣ် သ့ၣ်ညါဘၣ်ဝဲလၢ ယဟိဝၤယွၤ မ့ၢ်ပှၤလၢအစံၣ်ညီၣ်တၢ် တီတီလိၤလိၤအဃိ အဝဲသ့ၣ် နာ်န့ၢ်ယဟိဝၤယွၤ. (၅ မိၤ ၃၂:၄) အဝဲသ့ၣ် ကဒိးန့ၢ်ဘၣ် တၢ်ကူၣ်သ့အါမး လၢယဟိဝၤယွၤအအိၣ်. (ၡါ ၅၅:၉; ရိ ၁၁:၃၃) ဒီးအဝဲသ့ၣ် သ့ၣ်ညါဘၣ်ဝဲလၢ ကစၢ်ယွၤ မ့ၢ်တၢ်အဲၣ်တၢ်ကွံအဃိ အဝဲသ့ၣ် သးမုာ်ထီၣ်ဒိၣ်မး. (၁ ယိၤ ၄:၈) အဃိ အဝဲသ့ၣ် မ့ၢ်ဆဲးမၤဂ့ၤထီၣ် အတၢ်ရ့လိာ်သးဒီး ယဟိဝၤယွၤန့ၣ် အဝဲသ့ၣ် အတၢ်မုၢ်လၢ်လၢ ကအိၣ်မူဘၣ် လီၤထူလီၤယိာ် ဒ်ကစၢ်ယွၤအဖိအသိးန့ၣ် ကဟဲလၢပှဲၤထီၣ်နီၢ်ကီၢ်. ပန့ၢ်ဘၣ် တၢ်ခွဲးတၢ်ယာ်လီၤဆီ လၢပကမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ် ဒီးသုးဘူးသးလၢ ကစၢ်ယွၤအအိၣ်အဃိ ပသးခုဖးဒိၣ်ညါ. ပမ့ၢ်ဆဲးမၤစၢၤပှၤဂၤ ဒ်န့ၣ်န့ၣ် ယဟိဝၤယွၤ ကထံၣ်ပှၤဒ် “ပှၤလၢ အမၤသကိးတၢ်” ဒီးအီၤ.—၁ ကရံၣ် ၃:၅. တၢး၂၄.၀၂ ၁၂ ¶၁၅

နမ့မ့ၢ် ပှၤမၤလိလံာ်စီဆှံဖိတဂၤ မ့တမ့ၢ် နမ့ၢ်ဒိၣ်ထီၣ်ဘၣ်လၢ တၢ်မ့ၢ်တၢ်တီအပူၤန့ၣ် နဆိကမိၣ်လၢ နကဒိးဘျၢထံဧါ. နဖီတၢၣ်မ့ၢ်အိၣ် ဒ်န့ၣ်န့ၣ် အဂ့ၤဒိၣ်မး. ဘၣ်ဆၣ် တချုးလၢ နဒိးဘျၢထံဒံးဘၣ်န့ၣ် နကဘၣ်ဟ့ၣ်လုၢ်ထီၣ်ဆိသး လၢယဟိဝၤယွၤအအိၣ်. နကဘၣ် ဟ့ၣ်လုၢ်ထီၣ်သးလၢ ယဟိဝၤယွၤ အအိၣ်ဒ်လဲၣ်. နဟ့ၣ်လုၢ်ထီၣ်သး သ့ခီဖျိ နဃ့ထုကဖၣ်လၢ ယဟိဝၤယွၤအအိၣ် ဒီးတဲအီၤလၢ နကဘူၣ်ထီၣ်ဘါထီၣ် ထဲအီၤတဂၤ ဒီးနကပာ်ဆိ အတၢ်ဘၣ်သးလၢ နီၣ်ဂံၢ်တၢ လၢနတၢ်အိၣ်မူအပူၤ. ဝံၤဒီး နအၢၣ်လီၤ ယဟိဝၤယွၤလၢ နကဆဲးအဲၣ်အီၤ “လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ, လၢနတၢ်ကူၣ်တၢ်ဆး ခဲလၢာ် ဒီးလၢနဂံၢ်နဘါ ခဲလၢာ်.” (မၢ် ၁၂:၃၀) ဖဲနဟ့ၣ်လုၢ်ထီၣ်သးလၢ ယဟိဝၤယွၤအအိၣ်အခါ ပှၤလၢအသ့ၣ်ညါဝဲန့ၣ် မ့ၢ်ထဲ နၤဒီးယဟိဝၤယွၤခံဂၤလီၤ, ပှၤဂၤတသ့ၣ်ညါဝဲ နီတဂၤဘၣ်. မ့မ့ၢ် တၢ်ဒိးဘျၢထံန့ၣ် နဘၣ်မၤအီၤလၢ ပှၤအါဂၤအမဲာ်ညါ. ဒီးဖဲနဒိးဘျၢထံအခါ နပာ်ဖျါထီၣ်လၢ ပှၤအါဂၤအမဲာ်ညါလၢ နဟ့ၣ်လုၢ်ထီၣ်သးဝံၤလံ. ဖဲနဟ့ၣ်လုၢ်ထီၣ်သးလၢ ယဟိဝၤယွၤ အအိၣ်အခါ နမၤတၢ်အၢၣ်လီၤ အရ့ဒိၣ်တခါဒီး ယဟိဝၤယွၤ. နကဘၣ် ပာ်လီၤသးလၢ နကမၤလၢပှဲၤ နတၢ်အၢၣ်လီၤတခါန့ၣ် ဒီးယဟိဝၤယွၤ ဘၣ်သးလၢ နကမၤလၢပှဲၤအီၤစ့ၢ်ကီး.—စံၣ် ၅:၄. တၢး၂၄.၀၃ ၂ ¶၂; ၃ ¶၅

ပှၤလၢအဆီဟံၣ်ဆီဃီန့ၣ် အဝဲသ့ၣ် ကထံၣ်ဘၣ် တၢ်ကီတၢ်ခဲ. ဒီးလံာ်စီဆှံ ပာ်ဖျါထီၣ်ဝဲ ပျီပျီလၢ ပှၤဒီမိၢ်ဝၤန့ၣ် “ကအိၣ်ဒီးတၢ်ကီတၢ်ခဲ အါမံၤ.” (၁ ကရံၣ် ၇:၂၈) ဘၣ်မနုၤအဃိလဲၣ်. ခီဖျိလၢ ပှၤဒီမိၢ်ဝၤန့ၣ် အဝဲသ့ၣ် တကဲပှၤလၢပှၤပှဲၤဘၣ်, အတၢ်ပာ်သူၣ်ပာ်သး ဒီးအတၢ်ဘၣ်သး တဒ်သိးလိာ်သးဘၣ်. အဝဲသ့ၣ် ဒိၣ်ထီၣ်တၢ်လီၢ် ဒီးလုၢ်လၢ်စ့ၢ်ကီး တဒ်သိးလိာ်သးဘၣ်. အဃိ အဝဲသ့ၣ်ဖျီသး န့ၢ်တတီၤဖိမၣ် အကသ့ၣ်ညါဘၣ်လိာ်သး တၢ်ပာ်သူၣ်ပာ်သး လၢအတသ့ၣ်ညါဝဲဒံးဘၣ်တဖၣ်. ခီဖျိလၢ တၢ်ဂ့ၢ်တဖၣ်အံၤအဃိ တၢ်ကီတၢ်ခဲ အိၣ်ထီၣ်လၢ ပှၤဒီမိၢ်ဝၤခံဂၤ အဘၢၣ်စၢၤသ့. ဘၣ်သ့ၣ်သ့ၣ် တၢ်ကီတၢ်ခဲ အိၣ်ထီၣ်န့ၣ် ခီဖျိလၢ အဝဲသ့ၣ်ခံဂၤလၢာ်အဃိ ဒီးနီၢ်ကီၢ်န့ၣ် အဝဲသ့ၣ် ကဘၣ်မၤစၢၤလိာ်သး ဒ်သိး ကမၤဘၣ်ဂီၢ်က့ၤ တၢ်ဂ့ၢ်ကီ. သနာ်က့ အဝဲသ့ၣ် ကပာ်တၢ်ကမၣ်လၢ တဂၤဒီးတဂၤအလိၤ. ဘၣ်သ့ၣ်သ့ၣ် အဝဲသ့ၣ် ကဆိကမိၣ်လၢ အမ့ၢ်အိၣ်လီၤဖး မ့တမ့ၢ် မၤကတၢၢ်ကွံာ် တၢ်ဆီဟံၣ်ဆီဃီန့ၣ်ကဂ့ၤ. ဘၣ်ဆၣ် အဝဲသ့ၣ် မ့ၢ်မၤဒ်အံၤန့ၣ် အတၢ်ကီတၢ်ခဲ ကဘၣ်ဂီၢ်က့ၤဧါ. တဘၣ်ဂီၢ်က့ၤဘၣ်. ပှၤဒီမိၢ်ဝၤခံဂၤ မ့ၢ်အိၣ်ဒီး တၢ်ကီတၢ်ခဲ သနာ်က့ ယဟိဝၤယွၤ ဘၣ်သးလၢ အဝဲသ့ၣ် ကဆဲးအိၣ် တပူၤဃီ. တၢး၂၄.၀၃ ၁၆ ¶၈; ၁၇ ¶၁၁

နဟ့ၣ်လုၢ်ထီၣ်သး ဒီးဒိးဘျၢထံမ့ၢ်ဝံၤသနာ်က့ ခီဖျိလၢ နဆဲးမၤလိအါထီၣ် ယဟိဝၤယွၤအဂ့ၢ် ဒီးနအဲၣ်အီၤဒိၣ်ထီၣ်အဃိ နတၢ်မုၢ်လၢ် လၢနကအိၣ်မူဘၣ် လီၤထူလီၤယိာ်လၢ ပၤရဒံစူးအပူၤန့ၣ် ဟဲဂၢၢ်ကျၢၤဒိၣ်ထီၣ်. (ဧ့ၤ ၅:၁၃–၆:၁) ဒီးဘၣ်သ့ၣ်သ့ၣ် နလဲၤခီဖျိဘၣ် တၢ်ဂ့ၢ်လၢ ရိမ့ၤ ၅:၂-၄ ပာ်ဖျါထီၣ်ဝဲလံ. နထံၣ်ဘၣ် တၢ်နးတၢ်ဖှီၣ် ဘၣ်ဆၣ် နအိၣ်ဒီး တၢ်တူၢ်န့ၢ်ခီၣ်ကဲအဃိ နသ့ၣ်ညါလၢ ယဟိဝၤယွၤ ဘၣ်သူၣ်ဘၣ်သးနၤ. ဒီးခီဖျိလၢ နသ့ၣ်ညါလၢ ယဟိဝၤယွၤအဲၣ်နၤ ဒီးအဘၣ်သူၣ်ဘၣ်သးနၤအဃိ ခဲအံၤန့ၣ် နနာ်သပှၢ်တၢၢ်လၢ နကန့ၢ်ဘၣ် တၢ်ဆိၣ်ဂ့ၤလၢ ကစၢ်ယွၤအၢၣ်လီၤနၤ. အဃိ ခဲအံၤန့ၣ် နတၢ်မုၢ်လၢ် ဂၢၢ်ကျၢၤဒိၣ်န့ၢ်ဒံး နတၢ်မုၢ်လၢ်လၢ အခီၣ်ထံးသီသီဒံး. နတၢ်မုၢ်လၢ်အံၤ အကဲဝဲ တၢ်နီၢ်ကီၢ် ဒီးအကဲဘျုး လၢနဂီၢ်ဒိၣ်မး. နတၢ်မုၢ်လၢ်အံၤ မၤစၢၤနၤလၢ နတၢ်အိၣ်မူ ကိးသနၢၣ်ဒဲး ဒီးမၤစၢၤနၤလၢ နကရ့ဒီးနဟံၣ်ဖိဃီဖိဒ်လဲၣ်, နကဆၢတဲာ်တၢ်ဒ်လဲၣ် ဒီးနကသူနတၢ်ဆၢကတီၢ်ဒ်လဲၣ်. ဘၣ်ဃးဒီး တၢ်မုၢ်လၢ်လၢ ပန့ၢ်ဘၣ် ခီဖျိလၢ ကစၢ်ယွၤ ဘၣ်သူၣ်ဘၣ်သးပှၤ အဃိန့ၣ် တၢ်မၢဖိပီလူး တဲအါထီၣ်ဝဲ တၢ်ဂ့ၢ်လၢအရ့ဒိၣ်တခါ. အတဲဘၣ်ပှၤလၢ ပတၢ်မုၢ်လၢ် ကဟဲလၢပှဲၤထီၣ်နီၢ်ကီၢ်.—ရိ ၁၅:၁၃. တၢး၂၃.၁၂ ၁၂-၁၃ ¶၁၆-၁၉

ဖဲပထံၣ်ဘၣ် တၢ်အိၣ်သးကီခဲနးမးအခါ ပတၢ်တူၢ်ဘၣ်, ပတၢ်ဆိကမိၣ် ဒီးတၢ်လၢပမၤစ့ၢ်ကီးန့ၣ် ကလီၤဆီဝဲ. အဒိ ဒ်ကဘီတဘ့ၣ် လၢကလံၤမုၢ်ဆီၣ်ဖျိးအီၤ လၢအံၤတပူၤ လၢန့ၣ်တပူၤအသိး ဖဲပထံၣ်ဘၣ် တၢ်အိၣ်သးကီခဲနးမးအခါ ပဝဲစ့ၢ်ကီး ပတၢ်တူၢ်ဘၣ် တဂၢၢ်ကျၢၤဘၣ် ဒီးအကထီၣ်ကလီၤ ခဲအံၤခဲအံၤ. ဖဲပတၢ်တူၢ်ဘၣ်တဖၣ် လုၢ်ဘၢကွံာ်ပှၤအခါ ယဟိဝၤယွၤ ကမၤစၢၤပှၤဒ်လဲၣ်. ကစၢ်ယွၤ အၢၣ်လီၤပှၤလၢ အကဟ့ၣ်လီၤပှၤ တၢ်ဘံၣ်တၢ်ဘၢ. တၢ်ကတိၤအံၤ အဲၣ်ဒိးတဲစ့ၢ်ကီး အခီပညီလၢ ကစၢ်ယွၤ ကမၤဂၢၢ်ထီၣ်ပသး. အဒိ ဖဲကလံၤမုၢ်လီၤလၢ ပီၣ်လဲၣ်ပူၤအခါ ကဘီလၢ အလဲၤတၢ်တဘ့ၣ်န့ၣ် ကဟူးဝးဝဲ လၢအံၤတပၤ လၢန့ၣ်တပၤ. ဒ်သိးကဘီကဂၢၢ် ဒီးတဟူးဝးဝဲ အါအါတဂ့ၤအဂီၢ် လၢကဘီအကပၤ ခံကပၤလၢာ်န့ၣ် အိၣ်ဝဲဒီးကဘီအနီၣ်ကၢၤ. ကဘီအနီၣ်ကၢၤအံၤ မၤဂၢၢ်ထီၣ်ဝဲကဘီ အဃိ ပှၤဒိးကဘီဖိတဖၣ် ကအိၣ်ဘၣ်ပူၤပူၤဖျဲးဖျဲး ဒီးလဲၤဘၣ်တၢ်ဂ့ၤဂ့ၤ. ဘၣ်ဆၣ် ကဘီမ့ၢ်ဆဲးလဲၤတၢ်မၣ် ကဘီအနီၣ်ကၢၤအံၤ မၤတၢ်ကသ့ဂ့ၤဂ့ၤ. ဒ်န့ၣ်အသိး ဖဲပထံၣ်ဘၣ် တၢ်အိၣ်သးကီခဲနးမးအခါ ပမ့ၢ်ဆဲးမၤ ယဟိဝၤယွၤအတၢ်မၤ လၢတၢ်သးတီအပူၤမၣ် ယဟိဝၤယွၤ ကမၤဂၢၢ်ထီၣ်ပသး. တၢး၂၄.၀၁ ၂၂ ¶၇-၈

ဖဲနပျံၤတၢ်အခါ သံကွၢ်လီၤနသးဒ်အံၤ. ‘လၢအပူၤကွံာ်န့ၣ် ယဟိဝၤယွၤ မၤစၢၤတ့ၢ်ယၤဒ်လဲၣ်.’ ဒီးဆိကမိၣ်ထံစ့ၢ်ကီး ယဟိဝၤယွၤ အတၢ်ဘၣ်တ့တဖၣ်အဂ့ၢ်. အဒိ ပမ့ၢ် “ကွၢ်” ထိၣ်ဒီးဖီတဖၣ်န့ၣ် ယဟိဝၤယွၤ တတ့လီၤ အဝဲသ့ၣ် ဒ်အက့ၢ်အဂီၤအသိးဘၣ် ဒီးအဝဲသ့ၣ် ဘူၣ်ထီၣ်ဘါထီၣ် ယဟိဝၤယွၤ တသ့ဘၣ်. ဘၣ်ဆၣ် ပသ့ၣ်ညါဘၣ်လၢ ယဟိဝၤယွၤ သးအိၣ်အဝဲသ့ၣ် ဒီးကွၢ်ထွဲ အဝဲသ့ၣ်ဂ့ၤဂ့ၤ. အဃိ ပနာ်သပှၢ်တၢၢ်လၢ ယဟိဝၤယွၤ ကသးအိၣ်ပှၤ ဒီးကွၢ်ထွဲပှၤဂ့ၤန့ၢ်ဒံး အကွၢ်ထွဲ ထိၣ်ဒီးဖီတဖၣ်ဒံး. ပမ့ၢ်ဆိကမိၣ်ထံ တၢ်ဂ့ၢ်အံၤ လီၤတံၢ်လီၤဆဲးန့ၣ် ပတၢ်နာ်န့ၢ်ယဟိဝၤယွၤ ကဂၢၢ်ကျၢၤဒိၣ်ထီၣ်. (မး ၆:၂၅-၃၂) ပကဘၣ် ဆိကမိၣ်ထံစ့ၢ်ကီး ဘၣ်ဃးဒီး ယဟိဝၤယွၤ မၤစၢၤတ့ၢ် ပှၤလၢအဘူၣ်ထီၣ်ဘါထီၣ်အီၤ အဂ့ၢ်. ပကမၤဒ်န့ၣ်အဂီၢ် ပမၤလိ ပှၤလၢအအိၣ်ဒီးတၢ်နာ် လၢလံာ်စီဆှံအပူၤ တဂၤဂၤအဂ့ၢ်သ့ မ့တမ့ၢ် ပဖးဘၣ်ဃးဒီး ယဟိဝၤယွၤ အပှၤဂီၢ်မုၢ် လၢဆၢကတီၢ်ခဲအံၤ အတၢ်လဲၤခီဖျိအဂ့ၢ်သ့. ထဲန့ၣ်တကးဒံးဘၣ် ပကဘၣ် ဆိကမိၣ်ထံစ့ၢ်ကီး ဘၣ်ဃးဒီး ယဟိဝၤယွၤ ပာ်ဖျါထီၣ်လၢ အသးအိၣ် ပဝဲတဂၤဘၣ်တဂၤ ဒ်လဲၣ်အဂ့ၢ်. အဒိ ဆိကမိၣ်ထီၣ်က့ၤလၢ ယဟိဝၤယွၤ မူၤဃီၤနၤလၢ တၢ်မ့ၢ်တၢ်တီ အပူၤဒ်လဲၣ်. (ယိၤ ၆:၄၄) ယဟိဝၤယွၤ စံးဆၢ နတၢ်ထုကဖၣ်ဒ်လဲၣ်. (၁ ယိၤ ၅:၁၄) ဒီးဆိကမိၣ်ထီၣ်က့ၤလၢ ခီဖျိလၢ ယ့ၣ်ၡူးဟ့ၣ်လုၢ်ထီၣ်သးအဃိ ကိးနံၤဒဲးန့ၣ် နန့ၢ်ဘၣ်အဘျုး ဒ်လဲၣ်.—အ့း ၁:၇; ဧ့ၤ ၄:၁၄-၁၆. တၢး၂၄.၀၁ ၃ ¶၆; ၇ ¶၁၇