တၢ်ဂ့ၢ်လၢအဘၣ်ထွဲလိာ်သးဒီးလံာ်ကုခိၣ် | ပမ့ၢ်သံန့ၣ် ပကျဲကတၢၢ်လံဧါ
ပသံဝံၤအလီၢ်ခံ တၢ်ကမၤအသးဒီးပှၤဒ်လဲၣ်
စီၤလဲနၣ်စံးဝဲ “ယဆိကမိၣ်လၢ တၢ်လီၢ်အိၣ်သၢတီၤလၢ ပှၤသံတဖၣ်အဂီၢ်န့ၣ်မ့ၢ်ဝဲ– မူခိၣ်ဘီမုၢ်, လရာ် မ့တမ့ၢ် တၢ်လီၢ်ဖဲတၢ်မၤကဆှီထီၣ် တၢ်ဒဲးဘး တချုးလၢ ပှၤက့ၤထီၣ်ဆူ မူခိၣ်ဘီမုၢ်အခါန့ၣ်လီၤ. ယသ့ၣ်ညါလၢ ယတကြၢးဒီးမူခိၣ်ဘီမုၢ်ဘၣ်, ဘၣ်ဆၣ် ယတအၢတလၢ လၢယကလဲၤလီၤဆူ လရာ်ပူၤစ့ၢ်ကီးဘၣ်. မ့မ့ၢ်ဘၣ်ဃးဒီး တၢ်လီၢ်ဖဲ တၢ်မၤကဆှီထီၣ် တၢ်ဒဲးဘး တချုးပှၤက့ၤထီၣ်ဆူ မူခိၣ်ဘီမုၢ်အခါန့ၣ် ယတနၢ်ပၢၢ်လီၤတံၢ်လီၤဆဲးဘၣ်. လၢလံာ်စီဆှံပူၤန့ၣ် ယတထံၣ်ဘၣ်နီတဘျီဘၣ်, အိၣ်ဒၣ်ယနၢ်ဟူ ပှၤတဲဒ်န့ၣ်လီၤ.”
စီၤဖနါဒိၣ်စံးဝဲလၢ “ယမၤလိဘၣ်လၢ ပှၤမ့ၢ်သံန့ၣ် အဝဲသ့ၣ်ကလဲၤထီၣ်ဘၣ်ဆူ မူခိၣ်ကိးဂၤဒဲးလီၤ. ဘၣ်ဆၣ်တၢ်န့ၣ် ယတနာ်အီၤဘၣ်. ယဆိကမိၣ်တၢ်သံန့ၣ် မ့ၢ်တၢ်အကတၢၢ်လီၤ. တၢ်မုၢ်လၢ်လၢ ပှၤသံအဂီၢ်တအိၣ်ဝဲနီတမံၤဘၣ်.”
မ့ၢ်နဆိကမိၣ်ဘၣ် တၢ်သံကွၢ်လၢလာ်တဖၣ်အံၤ တဘျီဘျီဧါ. အဒိ တၢ်မၤအသးဒီး ပှၤသံတဖၣ်ဒ်လဲၣ်. ပှၤလၢ ပအဲၣ်ဘၣ်အီၤတဂၤ သံဝဲအခါ မ့ၢ်အဝဲကတူၢ်ဘၣ်တၢ်နးတၢ်ဖှီၣ်လၢ တၢ်လီၢ်တတီၤတီၤဒံးဧါ. မ့ၢ်ပကထံၣ်ဘၣ်က့ၤ အဝဲသ့ၣ်ဒံးဧါ. ပသ့ၣ်ညါလီၤတံၢ်လီၤဆဲး ကသ့ဒ်လဲၣ်. ဝံသးစူၤ ပကကွၢ်သကိး တၢ်လၢလံာ်စီဆှံ သိၣ်လိတၢ်နီၢ်နီၢ်န့ၣ်တက့ၢ်. အဆိကတၢၢ်န့ၣ် ပကသမံသမိးကွၢ် တၢ်လၢလံာ်စီဆှံစံးဝဲဘၣ်ဃးဒီး တၢ်သံအဂ့ၢ်န့ၣ်လီၤ. ခံမံၤတမံၤန့ၣ် ပကတဲသကိး တၢ်မုၢ်လၢ်လၢ ယွၤအကလုၢ်ကထါ လံာ်စီဆှံ ပာ်ဖျါထီၣ်န့ၢ်ပှၤန့ၣ်လီၤ.
တၢ်မၤအသးဒီးပှၤသံဒ်လဲၣ်
လံာ်စီဆှံစံးဆၢဝဲလၢ– “ပှၤလၢအမူဒံးန့ၣ် သ့ၣ်ညါဝဲလၢအကသံလီၤ. မ့မ့ၢ်ပှၤသံန့ၣ် တသ့ၣ်ညါဘၣ် တၢ်နီတမံၤဘၣ်. ဒီးအဘူးအလဲတအိၣ်လၢၤဘၣ်. အဂ့ၢ်ဒ်အံၤ, ပှၤသးပ့ၤနီၣ် တၢ်သ့ၣ်နီၣ်ထီၣ်က့ၤအီၤလီၤ. ကယဲၢ်တၢ်လၢနစုထံၣ်န့ၢ်လၢ နကမၤတမံၤလၢ်လၢ်န့ၣ် မၤအီၤလၢနဂံၢ်နဘါခဲလၢာ်တက့ၢ်. အဂ့ၢ်ဒ်အံၤ, တၢ်မၤမ့ၢ်ဂ့ၤ, တၢ်ကူၣ်မ့ၢ်ဂ့ၤ, တၢ်သ့ၣ်ညါမ့ၢ်ဂ့ၤ, တၢ်ကူၣ်သ့မ့ၢ်ဂ့ၤ, တအိၣ်ဘၣ်လၢ ပျုၤပူၤဖဲနလဲၤတၢ်န့ၣ်ဘၣ်လီၤ.” a—စံၣ်တဲၤတဲလီၤ ၉:၅, ၁၀.
ပျုၤပူၤန့ၣ် ဘၣ်တၢ်ဒိလီၤအီၤဒ်တၢ်လီၢ်တခါ မ့တမ့ၢ် တၢ်အိၣ်သးတခါလၢ တၢ်သ့ၣ်ညါနၢ်ပၢၢ် ဒီးတၢ်ဟူးတၢ်ဂဲၤတအိၣ်လၢၤဘၣ်. ပမ့ၢ်တဲလိၤလိၤန့ၣ် ပျုၤပူၤမ့ၢ်ဝဲတၢ်သံအလီၢ်လီၤ. ပှၤတီပှၤလိၤ စီၤယိၤဘးဆိကမိၣ်ဝဲလၢ ပျုၤပူၤန့ၣ် မ့ၢ်တၢ်လီၢ်ဒ်လဲၣ်တကလုာ်လဲၣ်. စီၤယိၤဘးအတၢ်ဖိတၢ်လံၤ ဒီးအတၢ်ထူးတၢ်တီၤတဖၣ် ဟါမၢ်ကွံာ်ဝဲလီၤ. ဒီးအဖိအဂၤတဆံသံကွံာ်ဝဲလၢ တသီအတီၢ်ပူၤလီၤ. မ့မ့ၢ်စီၤယိၤဘးန့ၣ် အနီၢ်ခိဒီတဂၤ အိၣ်ပှဲၤဝဲဒီးတၢ်ဝ့အၢတဖၣ်န့ၣ်လီၤ. အဝဲဃ့ကညးကစၢ်ယွၤလၢ– “အိ, မ်နပာ်တဒၢယၤလၢပျုၤပူၤ, မ်နပာ်ခူသူၣ်ယၤ” တက့ၢ်. (ယိၤဘး ၁:၁၃-၁၉; ၂:၇; ၁၄:၁၃) ဖျါတြၢၢ်ကလာ်လၢ စီၤယိၤဘးတဆိကမိၣ်ဝဲ ပျုၤပူၤဒ်သိးဒီး တၢ်လီၢ်တခါလၢ အဝဲကတူၢ်ဘၣ်တၢ်နးတၢ်ဖှီၣ်လၢ မ့ၣ်အူန့ၣ်ဘၣ်. လၢတၢ်န့ၣ်အလီၢ် အဝဲသ့ၣ်ညါဝဲလၢ ပျုၤပူၤန့ၣ် မ့ၢ်တၢ်အိၣ်ဘှံးအလီၢ်လၢ ပတတူၢ်ဘၣ် တၢ်နီတမံၤလၢၤဘၣ်.
ပမၤလိဘၣ်ဃးဒီး ပှၤသံတဖၣ် အတၢ်အိၣ်သးလၢ ကျဲအဂၤတဘိသ့ဝဲစ့ၢ်ကီးလီၤ. ပကသမံသမိးကွၢ် လံာ်စီဆှံအတၢ်ကွဲးနီၣ် ဘၣ်ဃးပှၤသံလၢအဂဲၤဆၢထၢၣ်သမူထီၣ်က့ၤ ဃိးဂၤအဂ့ၢ်န့ၣ်လီၤ.— ကွၢ်လၢတၢ်လွံၢ်နၢၣ်အပူၤ ဘၣ်ဃးဒီး “ပှၤဂဲၤဆၢထၢၣ်သမူထီၣ်က့ၤ ဃိးဂၤအဂ့ၢ် လၢလံာ်စီဆှံအပူၤ” တက့ၢ်.
ပှၤဃိးဂၤအံၤ ဖဲအဝဲသ့ၣ် ဂဲၤဆၢထၢၣ်သမူထီၣ်က့ၤအခါ တတဲဝဲဒၣ်လၢ အဝဲသ့ၣ်လဲၤတုၤဝဲဆူ တၢ်လီၢ်လၢအမုာ်အခုၣ် မ့တမ့ၢ် တၢ်မၤနးမၤဖှီၣ်အလီၢ်န့ၣ်ဘၣ်. ပှၤသ့ၣ်တဖၣ်အံၤ မ့ၢ်လဲၤတုၤဆူ တၢ်လီၢ်ဒ်အံၤတဖၣ်န့ၣ် ဖဲအဝဲသ့ၣ်ဂဲၤဆၢထၢၣ်သမူထီၣ်က့ၤအခါ ကတဲဘၣ်ပှၤဂၤ ဘၣ်ဃးဒီးတၢ်လီၢ်သ့ၣ်တဖၣ်အံၤအဂ့ၢ် တမ့ၢ်ဘၣ်ဧါ. ဒီးအဝဲသ့ၣ် မ့ၢ်လဲၤတုၤဘၣ်ဆူ တၢ်လီၢ်သ့ၣ်တဖၣ်န့ၣ်ဒီး ကဘၣ်တၢ်ကွဲးဖျါထီၣ်အီၤလၢ လံာ်စီဆှံပူၤ တမ့ၢ်ဘၣ်ဧါ. ဘၣ်ဆၣ် တၢ်ဂ့ၢ်သ့ၣ်တဖၣ်န့ၣ် တဘၣ်တၢ်ပာ်ဖျါအီၤလၢ လံာ်စီဆှံအပူၤဘၣ်. ဘၣ်ဆၣ် ဘၣ်ဃးဒီးတၢ်လီၢ်တဖၣ်အံၤန့ၣ် ပှၤဃိးဂၤလၢ အဂဲၤဆၢထၢၣ်သမူထီၣ်က့ၤန့ၣ် တတဲဝဲတၢ်နီတမံၤဘၣ်. ဘၣ်မနုၤအဃိလဲၣ်. မ့ၢ်လၢအဝဲသ့ၣ်တဖၣ်န့ၣ် တသ့ၣ်ညါတၢ်နီတမံၤဘၣ်. ဒီးလီၤဂာ်ဒ် အဝဲသ့ၣ်မံဝဲလၢ တၢ်မံဖးယိာ်အပူၤန့ၣ်လီၤ. လံာ်စီဆှံစ့ၢ်ကီး ပာ်ဖျါထီၣ်ဝဲလၢတၢ်သံန့ၣ် လီၤဂာ်ဒ်တၢ်မံအသိးန့ၣ်လီၤ. အဒိ လံာ်စီဆှံတဲဝဲလၢ စီၤဒၤဝံးဒီး စီၤစတ့းဖၣ်ခံဂၤလၢာ် “မံသပ့ၤဝဲလီၤ.”—မၤတၢ် ၇:၆၀; ၁၃:၃၆.
လၢပှၤသံတဖၣ်အဂီၢ် တၢ်မုၢ်လၢ်မနုၤအိၣ်လဲၣ်. အဝဲသ့ၣ်ပၢၢ်ထီၣ်က့ၤလၢ တၢ်သံကသ့ဧါ.
a ဧ့ၤဘြံၤအတၢ်ကတိၤလၢ အမ့ၢ် “ၡံအိ” ဒီးကြံးအတၢ်ကတိၤလၢ အမ့ၢ် “ဟ့ဒံ” န့ၣ်ဘၣ်တၢ်ကွဲးကျိာ်ထံအီၤလၢ “ပျုၤပူၤ” န့ၣ်လီၤ. ပှၤတနီၤဆိကမိၣ်ဝဲလၢ ပျုၤပူၤန့ၣ်မ့ၢ်တၢ်လီၢ်တတီၤလၢ ပှၤသံတဖၣ် က့ၤအိၣ်မူဘၣ်က့ၤဒီး အဘူးအတံၢ်လၢ အသံတ့ၢ်တဖၣ်န့ၣ်လီၤ. တၢ်န့ၣ်တမ့ၢ် လံာ်စီဆှံအတၢ်သိၣ်လိသီလိဘၣ်.