ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါဖ့ၤဘြူၤအါရံၤ ၄–၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ရိမ့ၤ ၁–၃
“ဆဲးသိၣ်လိ နသးလၢအသ့ၣ်ညါဒၣ်တၢ်”
(ရိမ့ၤ ၂:၁၄, ၁၅) အဂ့ၢ်ဒ်အံၤ, တုၤပှၤကလုာ်တဖၣ်လၢ အတအိၣ်ဘၣ်ဒီး တၢ်သိၣ်တၢ်သီဘၣ်န့ၣ်, တိၢ်န့ၢ်ဒၣ်တၢ်လၢ တၢ်သိၣ်တၢ်သီန့ၣ်ဒီး, တၢ်သိၣ်တၢ်သီ တအိၣ်ဘၣ်ဒီး, အဝဲသ့ၣ်တဖၣ်န့ၣ်, မ့ၢ်တၢ်သိၣ်တၢ်သီလၢ အဂီၢ်ဒၣ်ဝဲလီၤ. ၁၅ အဝဲသ့ၣ်တဖၣ်န့ၣ်, အသးလၢအသ့ၣ်ညါဒၣ်တၢ် အုၣ်ဒၣ်အသးဒီး, မ့ၢ်တၢ်ဒဲးဘးမ့ၢ်ဂ့ၤ, တၢ်မၤပူၤဖျဲးမ့ၢ်ဂ့ၤ, အတၢ်ဆိကမိၣ်ပာ်ဒၣ်လၢ အလိၤယၢ်ခီယၢ်ခီသတးဒီး, ဒုးနဲၣ်ဝဲလၢတၢ်သိၣ်တၢ်သီ အတၢ်မၤအိၣ်ကွဲးအသး လၢအသးအလိၤလီၤ.
သးလၢအသ့ၣ်ညါဒၣ်တၢ်လၢအဂ့ၤ
၆ ပှၤလၢအတသ့ၣ်ညါ ယဟိဝၤယွၤဒၣ်လဲာ် သ့ၣ်ညါဝဲတၢ်အဘၣ် ဒီးတၢ်အကမၣ်န့ၣ်လီၤ. လံာ်စီဆှံ တဲဝဲလၢ “အဝဲသ့ၣ်တဖၣ်န့ၣ်, အသးလၢအသ့ၣ်ညါဒၣ်တၢ် အုၣ်ဒၣ်အသးဒီး, မ့ၢ်တၢ်ဒဲးဘးမ့ၢ်ဂ့ၤ, တၢ်မၤပူၤဖျဲးမ့ၢ်ဂ့ၤ, အတၢ်ဆိကမိၣ်ပာ်ဒၣ်လၢအလိၤ ယၢ်ခီယၢ်ခီ” လီၤ. (ရိမ့ၤ ၂:၁၄, ၁၅) အဒိ ပှၤအါတက့ၢ်နၢ်ပၢၢ်ဝဲလၢ ပမ့ၢ်မၤသံပှၤဂၤ မ့တမ့ၢ် ပမ့ၢ်ဟုၣ်တၢ်န့ၣ် ကမၣ်ဝဲအဃိ အဝဲသ့ၣ်တမၤဝဲဘၣ်. ဖဲန့ၣ်အခါ အဝဲသ့ၣ် မၤထွဲဝဲဒ် အသးလၢအသ့ၣ်ညါဒၣ်တၢ် ဟံးစုနဲၣ်ကျဲအီၤအသိး ဘၣ်ဆၣ် အဝဲသ့ၣ်တသ့ၣ်ညါလီၤအသးဘၣ်. ဒီးခီဖျိလၢ အဝဲသ့ၣ်မၤဝဲဒ်အံၤအဃိ လီၤဂာ်ဒ်အဝဲသ့ၣ် လူၤပိာ်ထွဲ ယဟိဝၤယွၤ အတၢ်ဟံးစုနဲၣ်ကျဲတဖၣ် ဒီးဆၢတဲာ်တၢ်လၢအဘၣ်န့ၣ်သ့ဝဲလီၤ.
(ရိမ့ၤ ၂:၁၅) အဝဲသ့ၣ်တဖၣ်န့ၣ်, အသးလၢအသ့ၣ်ညါဒၣ်တၢ် အုၣ်ဒၣ်အသးဒီး, မ့ၢ်တၢ်ဒဲးဘးမ့ၢ်ဂ့ၤ, တၢ်မၤပူၤဖျဲးမ့ၢ်ဂ့ၤ, အတၢ်ဆိကမိၣ်ပာ်ဒၣ်လၢအလိၤယၢ်ခီယၢ်ခီသတးဒီး, ဒုးနဲၣ်ဝဲလၢ တၢ်သိၣ်တၢ်သီအတၢ်မၤ အိၣ်ကွဲးအသး လၢအသးအလိၤလီၤ.
သးလၢအသ့ၣ်ညါဒၣ်တၢ်လၢအဂ့ၤ
၈ နဆၢတဲာ်တၢ် ဒ်နသးလၢ အသ့ၣ်ညါဒၣ်တၢ် ဟံးစုနဲၣ်ကျဲနၤအသိး ကသ့ဒ်လဲၣ်. ဘၣ်ဃးဒီး တၢ်ဂ့ၢ်တခါဂ့ၤတခါဂ့ၤန့ၣ် ပှၤတနီၤနီၤ သမံသမိးလီၤက့ၤ ထဲဒၣ်အနီၢ်ကစၢ် အတၢ်ဆိကမိၣ်ဒီး အတၢ်တူၢ်ဘၣ်ဝံၤအလီၢ်ခံ အဝဲသ့ၣ်ဆၢတဲာ်တၢ်လီၤ. အဝဲသ့ၣ်ဆိကမိၣ်လၢ အသးလၢအသ့ၣ်ညါဒၣ်တၢ် မ့ၢ်တမၤတံာ်တာ်အီၤဘၣ်န့ၣ် အမၤဖဲအသးသ့ဝဲလီၤ. ဘၣ်ဆၣ် ခီဖျိလၢ ပတလၢတပှဲၤဘၣ်အဃိ ပတၢ်ဆိကမိၣ် ဒီးပတၢ်တူၢ်ဘၣ်တဖၣ် ဆှၢကမၣ်ပှၤသ့ဝဲစ့ၢ်ကီးလီၤ. ဒီးပတၢ်သူၣ်လီသးကွံန့ၣ် ဒိၣ်စိလၢ ပသးလၢအသ့ၣ်ညါဒၣ်တၢ် အဖီခိၣ်သ့ဝဲန့ၣ်လီၤ. ဒ်လံာ်စီဆှံတဲဝဲအသိး “ပှၤကညီအသးန့ၣ် လီန့ၢ်တၢ်ဒိၣ်န့ၢ်အါန့ၢ် တၢ်ခဲလၢာ်တက့ၢ်, ဒီးအၢဝဲဒိၣ်မးလီၤ. မ့ၢ်မတၤသ့ၣ်ညါအီၤသ့တဂၤလဲၣ်.” (ယံးရမံယၤ ၁၇:၉) အဃိ ဘၣ်သ့ၣ်သ့ၣ် တၢ်လၢအကမၣ်တခါန့ၣ် ပဆိကမိၣ်လၢအဘၣ်သ့ဝဲလီၤ. အဒိ တချုးစီၤပီလူး ကဲထီၣ်ပှၤခရံာ်ဖိအခါ အဝဲမၤအၢမၤသီ ကစၢ်ယွၤအပှၤဂီၢ်မုၢ်တဖၣ်လီၤ. ဖဲန့ၣ်အခါ အဝဲနာ်ဝဲလၢ တၢ်လၢအမၤဝဲန့ၣ် ကြၢးဝဲဘၣ်ဝဲ ဒီးအသးလၢအသ့ၣ်ညါဒၣ်တၢ်န့ၣ် တပာ်တၢ်ကမၣ်လၢအလိၤဘၣ်. ဘၣ်ဆၣ် လၢခံစီၤပီလူးတဲဝဲလၢ “ပှၤလၢအစံၣ်ညီၣ်ယၤန့ၣ်, မ့ၢ်ကစၢ် [ယဟိဝၤယွၤ] လီၤ.” (၁ ကရံၣ်သူး ၄:၄; မၤတၢ် ၂၃:၁; ၂ တံၤမသ့း ၁:၃) ဖဲစီၤပီလူးနၢ်ပၢၢ်ထီၣ်လၢ ယဟိဝၤယွၤ တတူၢ်လိာ်တၢ်လၢ အမၤဝဲတဖၣ်အခါ အဝဲသ့ၣ်ညါဝဲလၢ အကဘၣ်ဆီတလဲအတၢ်အိၣ်မူန့ၣ်လီၤ. အဃိ တချုးလၢပမၤတၢ်တမံၤမံၤန့ၣ် ပကဘၣ်သံကွၢ်လီၤပသးလၢ ‘မ့ၢ်ယဟိဝၤယွၤအဲၣ်ဒိးလၢ ယကမၤတၢ်မနုၤလဲၣ်.’
၉ တၢ်ပျံၤယွၤန့ၣ် အခီပညီမ့ၢ်ဝဲ ပပျံၤလၢပကမၤသးအုးဘၣ် ယဟိဝၤယွၤအသးလီၤ. နမ့ၢ်အဲၣ်ပှၤတဂၤဂၤန့ၣ် နတအဲၣ်ဒိးမၤဘၣ်ဒိအသးဘၣ်. ဒ်န့ၣ်အသိး ခီဖျိလၢ ပအဲၣ်ယဟိဝၤယွၤအဃိ ပတအဲၣ်ဒိးမၤဘၣ်ဒိအသးလၢ ကျဲနီတဘိဘၣ်. အဒိ စီၤနဃ့မယၤ ကဲပဒိၣ်ဘၣ်ဆၣ် အဝဲတသူအစိကမီၤဒ်သိး အကကဲဒိၣ်ထီၣ်အဂီၢ်ဘၣ်. လၢတၢ်ဂ့ၢ်မနုၤအဃိလဲၣ်. အဝဲတဲဝဲလၢ “ယဲဒၣ်အံၤယတမၤဘၣ်ဒ်န့ၣ်ဘၣ်, လၢတၢ်ပျံၤယွၤအဃိလီၤ.” (နဃ့မယၤ ၅:၁၅) တၢ်လၢအတဘၣ် ယဟိဝၤယွၤအသးန့ၣ် စီၤနဃ့မယၤ တမၤဝဲနီတမံၤဘၣ်. ဒ်စီၤနဃ့မယၤအသိး ပပျံၤလၢ ပကမၤသးအုးဘၣ် ယဟိဝၤယွၤအသးအဃိ ပတအဲၣ်ဒိးမၤတၢ်လၢ အကမၣ်ဘၣ်. ပမ့ၢ်အဲၣ်ဒိးသ့ၣ်ညါ တၢ်ဘၣ်ယဟိဝၤယွၤအသးန့ၣ် ပကဘၣ်ဖးလံာ်စီဆှံလီၤ.—ကွၢ်တၢ်ဂ့ၢ် ၆ လၢလံာ်အကတၢၢ်တက့ၢ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ရိမ့ၤ ၃:၄) မ်အသုတမၤအသး ဒ်န့ၣ်တဂ့ၤ. ပှၤကညီကိးဂၤဒဲး မ့ၢ်တၢ်ကဘျံးကဘျၣ်ခဲလၢာ်နာ်သက့ဒီး, မ်ယွၤမ့ၢ်တၢ်မ့ၢ်တၢ်တီတက့ၢ်. ဒ်တၢ်ကွဲးအသးအသိးန့ၣ်, ဒ်သိးနကဘၣ် တၢ်ပာ်တီနၤလၢနတၢ်ကတိၤ, ဒီးနကမၤနၢၤတၢ်လၢ နဘၣ်တၢ်စံၣ်ညီၣ် အပူၤလီၤ.
တၢး၀၈ ၆/၁၅ ကဘျံးပၤ ၃၀ အဆၢ ၅
လံာ်စီဆှံ အတၢ်ပာ်ဖျါလၢ လံာ်ရိမ့ၤ
၃:၄. ဖဲပှၤဟီၣ်ခိၣ်ဖိတဖၣ် အတၢ်ကတိၤ တလီၤပလိာ် ဒီးကစၢ်ယွၤ အကလုၢ်ကထါအခါ ပပျဲ “ယွၤမ့ၢ်တၢ်မ့ၢ်တၢ်တီ” ခီဖျိပနာ်န့ၢ် တၢ်ကစီၣ်လၢလံာ်စီဆှံပူၤ ဒီးပမၤထွဲဒ် တၢ်ဘၣ်ယွၤအသးအသိးလီၤ. ဒ်သိး ပှၤအဂၤတဖၣ် ကသ့ၣ်ညါထီၣ်လၢ ယွၤမ့ၢ်တၢ်မ့ၢ်တၢ်တီအဂီၢ် ပမၤစၢၤအဝဲသ့ၣ်သ့ ခီဖျိ ပအိၣ်ဒီး တၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤ ဘီမုၢ်တၢ်သးခုကစီၣ် ဒီးတၢ်လဲၤဒုးကဲထီၣ် ပှၤဂၤလၢ ခရံာ်အပျဲၢ်အဘီၣ် တၢ်မၤပူၤန့ၣ်လီၤ.
(ရိမ့ၤ ၃:၂၄, ၂၅) ဒီးပဘၣ် တၢ်ပာ်တီပာ်လိၤပှၤ ကလီကလီ လၢယွၤအဘျုးအဖှိၣ်လၢ ယ့ၣ်ၡူးခရံာ် အတၢ်ပှ့ၤက့ၤပှၤအဃိလီၤ. ၂၅ ယွၤပာ်ဖျါထီၣ်အီၤလၢတၢ်လုၢ်, လၢတၢ်နာ်အသွံၣ်အဃိ, ဒ်သိးအကဒုးနဲၣ် အတၢ်တီတၢ်လိၤလၢ တၢ်လဲၤကပာ်တၢ် ဒဲးဘးလၢပှၤမၤတ့ၢ်ဝဲ ဖဲယွၤဝံသးစူၤတၢ်အတီၢ်ပူၤ.
တၢး၀၈ ၆/၁၅ ကဘျံးပၤ ၂၉ အဆၢ ၆
လံာ်စီဆှံ အတၢ်ပာ်ဖျါလၢ လံာ်ရိမ့ၤ
၃:၂၄, ၂၅—“ယ့ၣ်ၡူးခရံာ်အတၢ်ပှ့ၤက့ၤ” န့ၣ်ကျၢၢ်ဘၢ “တၢ်ဒဲးဘးလၢပှၤမၤတ့ၢ်ဝဲ” တချုးအဟ့ၣ် တၢ်ပှ့ၤက့ၤဒံးဘၣ်အခါဒ်လဲၣ်. ဝံအတၢ်စံးပာ် အဆိကတၢၢ်လၢ ဘၣ်ဃးဒီးမ့းၡံအၤန့ၣ် ဘၣ်တၢ်ပာ်ဖျါထီၣ်အီၤဖဲ ၁ မိၤၡ့ ၃:၁၅ ဒီးဟဲလၢပှဲၤထီၣ်ဖဲ ခ.န ၃၃ ယ့ၣ်ၡူး ဘၣ်တၢ်ပျၤထီအီၤလၢ သ့ၣ်တၢၣ်လိၤအခါန့ၣ်လီၤ. (ကလၤ. ၃:၁၃, ၁၆) ဖဲယဟိဝၤယွၤ တဲဖျါထီၣ်ဝဲ ဝံအတၢ်စံးပာ်အံၤအခါ လၢအဝဲအတၢ်ထံၣ်န့ၣ် လီၤဂာ်ဒ်တၢ်ပှ့ၤက့ၤ ဘၣ်တၢ်ဟ့ၣ်ထီၣ်အီၤဝံၤလံ. မ့ၢ်လၢတၢ်လၢအတြီမၤတံာ်တာ် ကစၢ်ယွၤအတၢ်တိာ်ပာ်သ့န့ၣ် တအိၣ်နီတမံၤဘၣ်အဃိလီၤ. အဃိ စီၤအၤဒၣ် အစၢၤအသွဲၣ်လၢ အနာ်အတၢ်အၢၣ်လီၤတဖၣ်န့ၣ် ကစၢ်ယွၤပျၢ်ကွံာ်အတၢ်ကမၣ်သ့ ခီဖျိ ခါဆူညါ တၢ်ဟ့ၣ်လုၢ်ထီၣ် လၢယ့ၣ်ၡူးကဟ့ၣ်ဝဲန့ၣ်လီၤ. ပှၤအိၣ်မူတ့ၢ်လၢ တချုးခရံာ်ဖိအစိၤတဖၣ်စ့ၢ်ကီး အိၣ်ဒီးတၢ်မုၢ်လၢ်လၢ ကဂဲၤဆၢထၢၣ်သမူထီၣ်က့ၤ ခီဖျိတၢ်ပှ့ၤက့ၤအဃိန့ၣ်လီၤ.—မၤတၢ် ၂၄:၁၅.
တၢ်ဖးလံာ်စီဆှံ
(ရိမ့ၤ ၁:၁-၁၇) ယ့ၣ်ၡူးခရံာ် အခ့အပှၤ, ပှၤတၢ်မၢဖိလၢအဘၣ် တၢ်ကိးအီၤ, ဒီးဘၣ်တၢ်နီၤဖးအီၤလၢ ယွၤအတၢ်သးခုအကစီၣ်အဂီၢ်, ၂ လၢအစံးပာ်ဝဲလၢအဝံတဖၣ် လၢလံာ်စီဆှံအပူၤ, ၃ ဘၣ်ဃးဒီးအဖိခွါ, လၢဖဲအဘၣ်ဃးဒီး တၢ်ဖံးတၢ်ညၣ်န့ၣ် အိၣ်ဖျဲၣ်လၢစီၤဒၤဝံးအချံအသၣ်, ၄ ဒီးဖဲအဘၣ်ဃးဒီးသးအစီအဆှံန့ၣ် တၢ်ပာ်ဖျါထီၣ်အီၤလၢ အမ့ၢ်ယွၤအဖိခွါလၢ တၢ်စိတၢ်ကမီၤလၢ တၢ်ဂဲၤဆၢထၢၣ်က့ၤ လၢတၢ်သံအဃိ, ပကစၢ်ယ့ၣ်ၡူးခရံာ်, ၅ လၢပဒိးန့ၢ် တၢ်ဘျုးတၢ်ဖှိၣ် ဒီးတၢ်မၢဖိအလီၢ်လၢအီၤလၢ ပှၤကလုာ်တဖၣ်ခဲလၢာ် အတၢ်စူၢ်ဘၣ်ဃးဒီး တၢ်နာ်လၢအမံၤအဃိ, ၆ လၢသုအိၣ်စ့ၢ်ကီးလၢ အဝဲသ့ၣ်အကျါ, ပှၤဘၣ်တၢ်ကိးအီၤလၢယ့ၣ်ၡူးခရံာ်, ၇ ယၤစီၤပီလူး, စံးဘၣ်ပှၤခဲလၢာ်, အိၣ်လၢ ဝ့ၢ်ရိမ့ၤအပူၤ, လၢယွၤအဲၣ်အီၤ, ပှၤစီဆှံလၢအဘၣ်တၢ်ကိးအီၤတဖၣ်, မ်တၢ်ဘျုးတၢ်ဖှိၣ် ဒီးတၢ်ဃူတၢ်ဖိးလၢ ပပၢ်ယွၤဒီးကစၢ် ယ့ၣ်ၡူးခရံာ်န့ၣ်, ဘၣ်သုဝဲတက့ၢ်. ၈ တၢ်အဆိအံၤ, ယစံးထီၣ်ပတြၢၤ ယကစၢ်ယွၤအဘျုးအဖှိၣ်, လၢယ့ၣ်ၡူးခရံာ်အဃိ, လၢသုဝဲခဲလၢာ် အဂ့ၢ်လီၤ. အဂ့ၢ်ဒ်အံၤ, သုတၢ်နာ်န့ၣ် ဟူထီသါလီၤလၢ ဟီၣ်ခိၣ်ဒီဘ့ၣ်ညါလီၤ. ၉ အဂ့ၢ်ဒ်အံၤ, ယွၤလၢယမၤ အတၢ်လၢယသး, လၢအဖိခွါ အတၢ်သးခုအကစီၣ်အပူၤတဂၤန့ၣ်, မ့ၢ်တၢ်အုၣ်အသးလၢယဂီၢ်လၢ ယသ့ၣ်နီၣ်ထီၣ်သုတထံၣ်ဃီ, ၁၀ ဒီးယဃ့လၢယတၢ်ထုကဖၣ်အပူၤ တထံၣ်ဃီဒ်သိးမ့ၢ်သ့ဒီး, ခဲကနံၣ်အံၤ, မ့ၢ်ဘၣ်ယွၤအသးဒီး, ယကလဲၤခုၣ်ခုၣ်မုာ်မုာ် ဆူသုအိၣ်လီၤ. ၁၁ အဂ့ၢ်ဒ်အံၤ, တၢ်မိၣ်ထံၣ်ဘၣ်ယသးလၢသု, ဒ်သိးယကဟ့ၣ်သုလၢ တၢ်ဘျုးတမံၤမံၤ ဘၣ်ဃးဒီးသးန့ၣ် ဒ်သိးသုကအိၣ်ဂၢၢ်ဆိးကျၢၤလီၤ. ၁၂ ဒ်ပစံးတၢ်အသိး, တၢ်စူၢ်တၢ်နာ်လၢသုဒီး ယၤယၢ်ခီယၢ်ခီသတးဒီး, ယကဘၣ် တၢ်မၤမုာ်ထီၣ် ယသးသကိး ဒီးသုလၢသုကျါလီၤ. ၁၃ ဒီးဒီပုၢ်ဝဲၢ်သ့ၣ်ဧၢ, တဘၣ်ဘၣ်ယသးလၢ သုတသ့ၣ်ညါဘၣ်လၢ ယပာ်ယသးအါဘျီလၢ ယကလဲၤဆူသုအိၣ်, ဒ်သိးယကန့ၢ်ဘၣ် တၤသၣ်တမံၤမံၤလၢသုကျါ, ဒ်လၢပှၤကလုာ် အဂုၤအဂၤတဖၣ် အကျါအသိးန့ၣ်ဘၣ်. ဘၣ်ဆၣ်ဒီး, တၢ်တြီယၤတုၤခဲကနံၣ်အံၤလီၤ. ၁၄ ပှၤဟ့းလ့ၣ်ဖိမ့ၢ်ဂ့ၤ, ပှၤပှၢ်လၢ်ကျါဖိမ့ၢ်ဂ့ၤ, ပှၤကူၣ်တၢ်သ့မ့ၢ်ဂ့ၤ, ပှၤကူၣ်တၢ် တသ့ဘၣ်မ့ၢ်ဂ့ၤ, ယကမၢ်အိၣ်လၢအလိၤလီၤ. ၁၅ မၤသးဒ်န့ၣ်ဒီး, ဖဲယသ့ဒီးယသးအိၣ်လၢ ယကစံၣ်တဲၤတဲလီၤ တၢ်သးခုအကစီၣ်လၢ သုဝဲသ့ၣ်လၢအအိၣ်လၢရိမ့ၤအပူၤစ့ၢ်ကီးလီၤ. ၁၆ အဂ့ၢ်ဒ်အံၤ, ယမဲာ်တဆှးဘၣ်လၢ ခရံာ်အတၢ်သးခုအကစီၣ်ဘၣ်. အဂ့ၢ်ဒ်အံၤ, မ့ၢ်ယွၤအစိအကမီၤလၢ တၢ်အုၣ်က့ၤခီၣ်က့ၤ ကယဲၢ်ပှၤလၢ အစူၢ်က့ၤနာ်က့ၤတၢ် ကိးဂၤဒဲးအဂီၢ်, ပှၤယူဒၤဖိလၢအဆိ, ဒီးပှၤဟ့းလ့ၣ်ဖိစ့ၢ်ကီးလီၤ. ၁၇ အဂ့ၢ်ဒ်အံၤ, ယွၤအတၢ်တီတၢ်လိၤ အိၣ်ဖျါထီၣ်လၢအပူၤ, လၢတၢ်နာ်ဆူတၢ်နာ်လီၤ. ဒ်တၢ်ကွဲးအသးအသိးန့ၣ်, ပှၤတီပှၤလိၤကမူဝဲလၢတၢ်နာ်လီၤ.
တၢး၀၆ ၆/၁ ကဘျံးပၤ ၁၂-၁၃
ဆဲးအိၣ်ဒီးတၢ်ထံၣ် အကြၢးအဘၣ်လၢ နနီၢ်ကစၢ်ဒီးပှၤဂၤ အတၢ်ဂံၢ်စၢ်ဘါစၢ်
ဒ်သိး ပကအိၣ်ဒီး တၢ်သူၣ်မံသးမုာ်အဂီၢ် ပကဘၣ်အိၣ်ဒီး တၢ်ထံၣ်အကြၢးအဘၣ်လၢ ပနီၢ်ကစၢ် ဒီးပှၤဂၤအတၢ်ဂံၢ်စၢ်ဘါစၢ် အဖီခိၣ်န့ၣ်လီၤ. ဖဲစီၤပီလူး ကွဲးလံာ်ဆူရိမ့ၤအခါ တဲဝဲလၢ “ပှၤခဲလၢာ်မၤတၢ်ဒဲးဘးဒီးတချုးန့ၢ်ဘၣ် ယွၤအလၤအကပီၤဘၣ်.” (ရိမ့ၤ ၃:၂၃) ယွၤအလၤကပီၤန့ၣ် ပနၢ်ပၢၢ်အီၤ လၢလၢပှဲၤပှဲၤတသ့ဘၣ်. အဒိတခါန့ၣ် ပထံၣ်ဘၣ်ဖဲ ၁ မိၤၡ့ ၁:၃၁ လၢအစံးဝဲ– “ဒီးယွၤကွၢ်အတ့လီၤ တၢ်တမံၤလၢ်လၢ်န့ၣ်, ဒီးထံၣ်ဝဲလၢအဂ့ၤမးလီၤ.” ယဟိဝၤယွၤန့ၣ် ဖဲအကွၢ်က့ၤဝဲ တၢ်လၢအတ့လီၤဝဲတဖၣ် တဘျီလၢ်လၢ်အခါ တဲဝဲလၢ “အဂ့ၤမး” သ့ဝဲလီၤ. ပှၤဟီၣ်ခိၣ်ဖိတဖၣ် တဲဝဲဒ်န့ၣ်တသ့ နီတဂၤဘၣ်. လၢတၢ်န့ၣ်အဃိ ပမ့ၢ်အၢၣ်လီၤတူၢ်လိာ်လၢ ပမၤတၢ်တသ့ခဲလၢာ်ဘၣ်န့ၣ် ပကအိၣ်ဒီး တၢ်သူၣ်မံသးမုာ်လီၤ. တကးဒံးဘၣ် ပကဘၣ်နၢ်ပၢၢ်လၢ ဘၣ်ဃးဒီးတၢ်ဂ့ၢ်တမံၤန့ၣ် ယဟိဝၤယွၤအတၢ်ထံၣ်အိၣ်ဒ်လဲၣ် ဒီးပကဘၣ်တူၢ်လိာ်အတၢ်ထံၣ်လီၤ.
ကြံးအတၢ်ကတိၤလၢ ဘၣ်တၢ်ကွဲးကျိာ်က့ၤလၢ “တၢ်ဒဲးဘး” န့ၣ်ဟဲလီၤစၢၤလၢ တၢ်ကတိၤလၢအမ့ၢ် “တပျာ်ကွံာ်လၢ တၢ်ပနီၣ်” န့ၣ်လီၤ. အဒိ ဆိကမိၣ်ကွၢ် ပှၤခးချံၣ်တဂၤလၢ အဲၣ်ဒိးဒိးန့ၢ်ဘၣ် ခိၣ်ဖးန့ၣ်တက့ၢ်. အဝဲဒိးန့ၢ်ဘၣ်တၢ်ခွဲးတၢ်ယာ်လၢ ကခးပျၢ်သၢဘ့ၣ်လီၤ. ဖဲခးဝဲပျၢ်အဆိကတၢၢ်တဘ့ၣ်အခါ တပျာ်ကွံာ်ဝဲဒီး တၢ်ပနီၣ် ခံပျၢ်လီၤ. ခးကဒီးဝဲ ပျၢ်ခံဘ့ၣ်တဘ့ၣ်အခါ တပျာ်ကွံာ်ဝဲတပ့ၣ်ဒံးလီၤ. လၢခံအဝဲပာ်အသးဂၢၢ်ဂၢၢ် ဒီးခးကဒီးဝဲ ပျၢ်လၢခံကတၢၢ်တဘ့ၣ်အခါ တပျာ်ကွံာ်ဝဲထဲဒၣ် တစုမုၢ်ဒိၣ်လီၤ. ဘူးကဘၣ်လၢ တၢ်ပနီၣ်ဘၣ်ဆၣ် တပျာ်ကွံာ်ဝဲဒံးလီၤ.
ပဝဲကိးဂၤဒဲး ပလီၤဂာ်ဒီး ပှၤခးချံၣ်ဖိလၢ အသးဟးဂီၤတဂၤအံၤလီၤ. တဘျီတခီၣ်ပ “တပျာ်ကွံာ်လၢ တၢ်ပနီၣ်” ဖးအါညါလီၤ. တဘျီတခီၣ် ပဘူးထီၣ်ဒီး တၢ်ပနီၣ် သနာ်က့ ပတပျာ်ကွံာ်ဒံးအဖၢလီၤ. ပဂုာ်ကျဲးစၢးသပှၢ်တၢၢ် သနာ်က့ တၢ်မ့ၢ်တကဲထီၣ်အသးဒ် ပမုၢ်လၢ်အသိးဘၣ်န့ၣ် ပသးကလီၤဘှံးဝဲလီၤ. ခဲအံၤပကက့ၤတဲသကိး ပှၤခးတၢ်ဖိတဂၤအံၤအဂ့ၢ်န့ၣ်လီၤ.
အဝဲတဒိးန့ၢ်ဘၣ် ခိၣ်ဖးလၢအသးလီဝဲနီၢ်နီၢ်တခါန့ၣ်အဃိ အသးဟးဂီၤ ဒီးဟးထီၣ်ကွံာ်ဝဲလီၤ. ဖဲန့ၣ်အခါ ပှၤလၢအတီခိၣ်ရိၤမဲ တၢ်လိာ်ကွဲတဂၤ ကိးက့ၤအီၤဒီး တဲအီၤလၢ “ယဘၣ်သူၣ်ဘၣ်သးနၤအဃိ ယအဲၣ်ဒိးဟ့ၣ်နၤခိၣ်ဖးအံၤ. နဂုာ်ကျဲးစၢးထဲလဲၣ်န့ၣ် ယသ့ၣ်ညါ.” ပှၤခးတၢ်ဖိအံၤ ကသးခုဝဲဒိၣ်မးလီၤ.
ပှၤလၢအဒိးန့ၢ်ဘၣ် ကစၢ်ယွၤအ “တၢ်ဟ့ၣ်” လၢအမ့ၢ်တၢ်မူအထူအယိာ်တဖၣ်န့ၣ် ကအိၣ်ဒီးတၢ်သူၣ်ခုသးခုဒ်န့ၣ်အသိးလီၤ. (ရိမ့ၤ ၆:၂၃) လၢခံန့ၣ် ကယဲၢ်တၢ်လၢ အဝဲသ့ၣ်မၤဝဲခဲလၢာ်န့ၣ် ကဂ့ၤဝဲ ဒီးတတပျာ်ကွံာ်လၢ တၢ်ခးပနီၣ်နီတဘျီလၢၤဘၣ်. အဝဲသ့ၣ်ကအိၣ်ဒီး တၢ်သူၣ်မံသးမုာ်နီၢ်နီၢ်လီၤ. ဆၢကတီၢ်ခဲအံၤ ပမ့ၢ်သ့ၣ်နီၣ်ထီၣ် တၢ်ဂ့ၢ်အံၤန့ၣ် ပကအိၣ်ဒီးတၢ်သူၣ်မံသးမုာ် ဒီးပသးတဘၣ်တံာ်တာ်လၢ ပှၤဂၤအတၢ်ဂံၢ်စၢ်ဘါစၢ်အဃိလၢၤဘၣ်.
လါဖ့ၤဘြူၤအါရံၤ ၁၁–၁၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ရိမ့ၤ ၄–၆
“ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲလၢပှၤ”
(ရိမ့ၤ ၅:၈) မ့မ့ၢ်ဖဲပမ့ၢ် ပှၤတၢ်ဒဲးဘးဖိအဖၢမုၢ်ဒီး, ခရံာ်ဒိးသံအသးလၢပဂီၢ်သတးဒီး, ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲလၢပှၤလီၤ.
(ရိမ့ၤ ၅:၁၂) မ်ဒ်န့ၣ်ဒီး ဒ်တၢ်ဒဲးဘးဟဲနုာ် ဆူဟီၣ်ခိၣ်ချၢလၢပှၤတဂၤအဃိ, ဒီးတၢ်သံတၢ်ပှၢ်လၢ တၢ်ဒဲးဘးအဃိ အသိးန့ၣ်, ဒီးဒ်န့ၣ်အသိးပှၤခဲလၢာ်မၤတ့ၢ် တၢ်ဒဲးဘးသတးဒီး, ပှၤခဲလၢာ်ဘၣ်တၢ်သံတၢ်ပှၢ်.
တၢး၁၁ ၆/၁၅ ကဘျံးပၤ ၁၂ အဆၢ ၅
ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲလၢပှၤ
၅ တၢ်ဂ့ၢ်အဝဲအံၤန့ၣ် စီၤပီလူးစးထီၣ်ဝဲလၢ တၢ်ကတိၤလၢ “မ်ဒ်န့ၣ်ဒီး ဒ်တၢ်ဒဲးဘးဟဲနုာ်ဆူ ဟီၣ်ခိၣ်ချၢလၢပှၤတဂၤအဃိ, ဒီးတၢ်သံတၢ်ပှၢ်လၢ တၢ်ဒဲးဘးအဃိ အသိးန့ၣ်, ဒီးဒ်န့ၣ်အသိးပှၤခဲလၢာ်မၤတ့ၢ် တၢ်ဒဲးဘးသတးဒီး, ပှၤခဲလၢာ်ဘၣ်တၢ်သံတၢ်ပှၢ်” လီၤ. (ရိ. ၅:၁၂) မ့ၢ်လၢကစၢ်ယွၤ ကွဲးနီၣ်ပာ်ဝဲ ဘၣ်ဃးဒီး ပှၤဟီၣ်ခိၣ်ဖိအတၢ်အိၣ်မူ ကဲထီၣ်အသးဒ်လဲၣ်အဂ့ၢ်အဃိ ပသ့ၣ်ညါဘၣ်တၢ်ဂ့ၢ်အံၤလီၤ. ယဟိဝၤယွၤ တ့လီၤပှၤခံဂၤလၢအမ့ၢ် နီၢ်အံၣ်အု ဒီးစီၤအၤဒၣ်န့ၣ်လီၤ. တၢ်ဘၣ်တ့ကစၢ်န့ၣ် လၢဝဲပှဲၤဝဲလီၤ. နီၢ်အံၣ်အုဒီး စီၤအၤဒၣ်စ့ၢ်ကီးလၢပှဲၤဝဲလီၤ. ကစၢ်ယွၤ ဟ့ၣ်အဝဲသ့ၣ် တၢ်မၤလိာ်တခါ ဒီးတဲဘၣ်ဝဲလၢ မ့ၢ်တဒိကနၣ် တၢ်မၤလိာ်အံၤဘၣ်န့ၣ် ကဘၣ်သံဝဲလီၤ. (၁ မိၤ. ၂:၁၇) ဘၣ်ဆၣ် အဝဲသ့ၣ်ဃုထၢဝဲလၢ တဒိကနၣ် ကစၢ်ယွၤအတၢ်မၤလိာ်လၢ အကြၢးအဘၣ်အံၤအဃိ မ့ၢ်ဒၣ်ဂ့ၢ်လိာ်ကွံာ်ဝဲ ယဟိဝၤယွၤ ဒ်အမ့ၢ် ကစၢ်လၢအဟ့ၣ်တၢ်မၤလိာ် ဒီးကစၢ်အတၢ်ပၢန့ၣ်လီၤ.—၅ မိၤ. ၃၂:၄, ၅.
(ရိမ့ၤ ၅:၁၃, ၁၄) အဂ့ၢ်ဒ်အံၤ, တၢ်ဒဲးဘးအိၣ်လၢ ဟီၣ်ခိၣ်ချၢတုၤလီၤလၢ တၢ်သိၣ်တၢ်သီအိၣ်ထီၣ်လီၤ. မ့မ့ၢ်တၢ်သိၣ်တၢ်သီမ့ၢ်တအိၣ်ဘၣ်ဒီး, တၢ်တပာ်ဘၣ်တၢ်ဒဲးဘးဘၣ်. ၁၄ ဘၣ်ဆၣ်ဒီးလၢ စီၤအၤဒၣ်အစိၤ တုၤလီၤလၢ စီၤမိၤၡ့အစိၤန့ၣ်, ပှၤလၢအတမၤဘၣ်တၢ်ဒဲးဘးဒ်စီၤအၤဒၣ် အတၢ်လုၣ်သ့ၣ်ခါပတာ်အသိးဒၣ်လဲာ်န့ၣ်, တၢ်သံပၢဘၣ်အီၤလီၤ. အဝဲဒၣ်န့ၣ်မ့ၢ် ပှၤလၢအကဟဲတဂၤအဒိအတဲာ်လီၤ.
တၢး၁၁ ၆/၁၅ ကဘျံးပၤ ၁၂ အဆၢ ၆
ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲလၢပှၤ
၆ စီၤအၤဒၣ် မၤတၢ်ကမၣ်ဝံၤမး အိၣ်ဖျဲၣ်ထီၣ်ဝဲ အဖိတဖၣ်အဃိ အဝဲသ့ၣ်ခဲလၢာ် န့ၢ်သါဘၣ်တၢ်ဒဲးဘး ဒီးတၢ်ဒဲးဘးအဘူးအလဲလီၤ. နီၢ်နီၢ် အဖိတဖၣ်န့ၣ် တမၤကမၣ် ကစၢ်ယွၤအတၢ်သိၣ်တၢ်သီဘၣ် ဒီးကစၢ်ယွၤ တဟ့ၣ်အဝဲသ့ၣ် တၢ်မၤလိာ်နီတမံၤဘၣ်. (၁ မိၤ. ၂:၁၇) ဘၣ်ဆၣ် စီၤအၤဒၣ်အစၢၤအသွဲၣ်တဖၣ် န့ၢ်သါဘၣ်တၢ်ဒဲးဘးလီၤ. အဃိ တၢ်ဒဲးဘးဒီးတၢ်သံ ပၢအဝဲသ့ၣ်လီၤ. ဖဲကစၢ်ယွၤဟ့ၣ်လီၤ ပှၤအံၣ်စရ့လးဖိတဖၣ် တၢ်မၤလိာ်အခါ အဝဲသ့ၣ် မ့ၢ်ပှၤတၢ်ဒဲးဘးဖိန့ၣ် ဖျါထီၣ်ဝဲလီၤ. (ဖး ရိမ့ၤ ၅:၁၃, ၁၄ တက့ၢ်.) တၢ်ဒဲးဘးလၢပန့ၢ်သါဘၣ်အံၤ မၤဘၣ်ဒိပှၤသ့အဂ့ၢ်န့ၣ် ပဟ့ၣ်တၢ်အဒိလၢ တၢ်ဆါလၢအလီၤစၢၤလၢ မိၢ်ပၢ်ဖံဖု ဒ်သိးဒီး သွံၣ်တပတုာ်တၢ်ဆါ မ့တမ့ၢ် သွံၣ်ဂံၢ်စၢ်တၢ်ဆါတဖၣ်သ့န့ၣ်လီၤ. ရၢၡါ အစီၤပၤ နံၤခိလဲး ၂ ဒီး အဲးလဲစါဒြၤ အဖိခွါအလဲး(စ်)စံၣ်န့ၣ် အိၣ်ဒီးသွံၣ်တပတုာ်တၢ်ဆါလၢ အမ့ၢ်တၢ်ဆါလၢအလီၤစၢၤတဆီဘၣ်တဆီန့ၣ် ဘၣ်သ့ၣ်သ့ၣ် သုကဖးဘၣ်လီၤ. ဟံၣ်ဖိဃီဖိ ဒ်န့ၣ်တဖၣ်အပူၤ ဖိသၣ်တနီၤနီၤန့ၣ် ဘၣ်သ့ၣ်သ့ၣ် ကအိၣ်ဒီးတၢ်ဆါအဝဲအံၤ သနာ်က့ တၢ်ဆါအတၢ်ပနီၣ် တမ့ၢ်ကအိၣ်ဖျါထီၣ်ဒံးဘၣ်. ဘၣ်ဆၣ် မ့မ့ၢ်တၢ်ဒဲးဘးန့ၣ် တမ့ၢ်ဒ်န့ၣ်ဘၣ်. တၢ်ဒဲးဘးအဘူးအလဲလၢ ပဒိးန့ၢ်ဘၣ်လၢ စီၤအၤဒၣ်အအိၣ်န့ၣ် ပဟးဆှဲးအီၤတသ့ဘၣ်. ပှၤခဲလၢာ်ဒိးန့ၢ်ဘၣ်ဝဲအဃိ ဘၣ်သံဝဲလီၤ. အဖိအလံၤအစၢၤအသွဲၣ်ခဲလၢာ် န့ၢ်သါဘၣ်ဝဲလီၤ. ပပူၤဖျဲးထီၣ်လၢ တၢ်ဒဲးဘးအံၤကသ့ဒံးဧါ.
(ရိမ့ၤ ၅:၁၈) မၤသးဒ်န့ၣ်ဒီး, ဒ်တၢ်စံၣ်ညီၣ်ဃၣ် ဟဲဆူပှၤခဲလၢာ် လၢတၢ်ကမၣ်တမံၤအဃိအသိးန့ၣ်, တၢ်တီတၢ်လိၤဘၣ်ဃးဒီးတၢ်မူ ကဟဲဆူပှၤခဲလၢာ် လၢတၢ်တီတၢ်လိၤတမံၤအဃိ, ဒ်န့ၣ်အသိးလီၤ.
(ရိမ့ၤ ၅:၂၁) ဒ်သိး, ဒ်တၢ်ဒဲးဘးပၢတၢ်လၢ တၢ်သံအဃိအသိးန့ၣ်, တၢ်ဘျုးကပၢတၢ်လၢ တၢ်တီတၢ်လိၤ ပၢၢ်လၢတၢ်မူအထူအယိာ်, လၢပကစၢ်ယ့ၣ်ၡူးခရံာ်အဃိ, ဒ်န့ၣ်အသိးလီၤ.
တၢး၁၁ ၆/၁၅ ကဘျံးပၤ ၁၃ အဆၢ ၉-၁၀
ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲလၢပှၤ
၉ ကြံးအတၢ်ကတိၤလၢအမ့ၢ် “တၢ်ပာ်တီပာ်လိၤ” န့ၣ်အခီပညီမ့ၢ်မနုၤလဲၣ်. ပှၤကွဲးကျိာ်ထံ လံာ်စီဆှံတဂၤ ကွဲးဝဲလၢ– “ကြံးအတၢ်ကတိၤအံၤ ဘၣ်ထွဲလိာ်အသးဒီး သဲစးအတၢ်ကတိၤန့ၣ်လီၤ. တမ့ၢ်လၢ ပှၤမၤကမၣ်တၢ်တဂၤ ဆီတလဲအသးအဃိဘၣ်, မ့ၢ်လၢကစၢ်ယွၤအတၢ်ထံၣ် လၢအဝဲအဖီခိၣ် ဆီတလဲအသးအဃိလီၤ. ပှၤမၤကမၣ်တၢ်တဂၤလၢ ဘၣ်တၢ်ပာ်အီၤလၢအမ့ၢ် ပှၤတတီတလိၤန့ၣ် လဲၤတုၤဆူ ကစၢ်ယွၤအကွီၢ်ဘျီၣ် ဒီးကစၢ်ယွၤ မၤပူၤဖျဲးကွံာ်အီၤလၢ ကွီၢ်အပူၤလီၤ.”
၁၀ ကစၢ်ယွၤလၢ “အစံၣ်ညီၣ်ဟီၣ်ခိၣ်ဒီဘ့ၣ်” တဂၤပျၢ်ကွံာ်ဝဲ ပှၤတတီတလိၤတဂၤ အတၢ်ကမၣ်န့ၣ် ဒိးသန့ၤထီၣ်အသးလၢ တၢ်မနုၤအဖီခိၣ်လဲၣ်. (၁ မိၤ. ၁၈:၂၅) ကစၢ်ယွၤအဲၣ်ပှၤအဃိ ဆှၢလီၤဝဲ အဖိခွါထဲတဂၤဧိၤ ဆူဟီၣ်ခိၣ်ချၢန့ၣ်လီၤ. ယ့ၣ်ၡူး ဘၣ်တၢ်လ့ပစီ, တၢ်ဒုၣ်ဒွဲၣ်စံးအၢ ဒီးဘၣ်တၢ်မၤအီၤတတီတလိၤ သနာ်က့ အဝဲမၤအပၢ်အတၢ်ဘၣ်သး လၢလၢပှဲၤပှဲၤလီၤ. အဝဲအိၣ်ဒီးတၢ်သးတီ တုၤအတူၢ်သံအသးလၢ သ့ၣ်တၢၣ်လိၤတစုလီၤ. (ဧ့ၤ. ၂:၁၀) ယ့ၣ်ၡူး ပှ့ၤက့ၤဝဲ စီၤအၤဒၣ်အဖိအလံၤတဖၣ်လၢ တၢ်သံဒီးတၢ်ဒဲးဘး ခီဖျိဟ့ၣ်လုၢ်ထီၣ်ဝဲ အသးသမူလၢ အလၢပှဲၤအံၤန့ၣ်လီၤ.—မး. ၂၀:၂၈; ရိ. ၅:၆-၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ရိမ့ၤ ၆:၃-၅) ဖဲဒၣ်ပှၤလၢအဒိးဘျၢအသးဆူ ယ့ၣ်ၡူးခရံာ်အပူၤ, ပဝဲဒၣ်အံၤ, ပဒိးဘျၢပသးဆူ အတၢ်သံအပူၤန့ၣ်, သုတသ့ၣ်ညါဘၣ်ဧါ. ၄ မၤသးဒ်န့ၣ်ဒီး, ပဘၣ်တၢ်ခူၣ်လီၤဃုာ်ဒီးအီၤဆူ တၢ်သံအပူၤလၢတၢ်ဘျၢအဃိ, ဒ်သိး, ဒ်ခရံာ်ဂဲၤဆၢထၢၣ်က့ၤလၢ တၢ်သံအပူၤလၢ ပၢ်အလၤကပီၤအသိးန့ၣ်, ပကလဲၤတၢ်ပဝဲဒၣ်လၢတၢ်မူအသီ, ဒ်န့ၣ်အသိးစ့ၢ်ကီးလီၤ. ၅ အဂ့ၢ်ဒ်အံၤ, ပမ့ၢ်ဘၣ်ဃးဒီးအီၤလၢ တၢ်လီၤဂာ်လၢ အတၢ်သံန့ၣ်ဒီး, ပကဘၣ်ဃးဒီးအီၤလၢ အတၢ်ဂဲၤဆၢထၢၣ်က့ၤစ့ၢ်ကီးလီၤ.
တၢး၀၈ ၆/၁၅ ကဘျံးပၤ ၂၉ အဆၢ ၇
လံာ်စီဆှံ အတၢ်ပာ်ဖျါလၢ လံာ်ရိမ့ၤ
၆:၃-၅—တၢ်ဒိးဘျၢလၢ ယ့ၣ်ၡူးခရံာ်အပူၤ ဒီးတၢ်ဒိးဘျၢလၢ အတၢ်သံအပူၤန့ၣ် အခီပညီဒ်လဲၣ်. ဖဲယဟိဝၤယွၤ ဒိးဖှူဝဲခရံာ်အပျဲၢ်အဘီၣ်တဖၣ် လၢအသးစီဆှံအခါ အဝဲသ့ၣ် အိၣ်ဃူအိၣ်ဖိးဒီးခရံာ် ဒီးကဲထီၣ်တၢ်အိၣ်ဖှိၣ်ဖိတဖၣ်လၢ အမ့ၢ်ခရံာ်အမိၢ်ပှၢ် ဒီးခရံာ်မ့ၢ်တၢ်အိၣ်ဖှိၣ်အခိၣ်လီၤ. (၁ ကရံၣ်. ၁၂:၁၂, ၁၃, ၂၇; ကလီး. ၁:၁၈) တၢ်န့ၣ်မ့ၢ် အဝဲသ့ၣ် ဒိးဘျၢထံလၢ ယ့ၣ်ၡူးခရံာ်အပူၤလီၤ. ခရံာ်ဖိလၢ ဘၣ်တၢ်ဒိးဖှူအီၤတဖၣ်န့ၣ် မ့ၢ်လၢအဝဲသ့ၣ် ဘၣ်ဟ့ၣ်လီၤအသး ဒီးဘၣ်တူၢ်ၡူကွံာ်ဝဲ ကယဲၢ်တၢ်မုၢ်လၢ်လၢ ကအိၣ်မူဘၣ်လၢဟီၣ်ခိၣ်အဃိ မ့ၢ်အ “ဒိးဘျၢအသးဆူ [ခရံာ်] အတၢ်သံ” အပူၤလီၤ. အဃိ အဝဲသ့ၣ်အတၢ်သံန့ၣ် တမ့ၢ်တၢ်ပှ့ၤက့ၤ သနာ်က့ မ့ၢ်တၢ်ဟ့ၣ်လုၢ်ထီၣ်တမံၤ ဒ်ယ့ၣ်ၡူးအတၢ်သံအသိးလီၤ. တၢ်ဒိးဘျၢထံဆူ ခရံာ်အတၢ်သံအပူၤန့ၣ် လၢထီၣ်ပှဲၤထီၣ်ဝဲဖဲ အဝဲသ့ၣ်သံဝံၤ က့ၤထီၣ်ဆူမူခိၣ်အခါန့ၣ်လီၤ.
(ရိမ့ၤ ၆:၇) အဂ့ၢ်ဒ်အံၤ, ပှၤလၢအသံန့ၣ်, ဘၣ်ပာ်တီပာ်လိၤကွံာ်အီၤလၢ တၢ်ဒဲးဘးလီၤ.
ပမိၢ်ပၢ်ဖံဖုလၢ အသံတ့ၢ်တဖၣ်အဂီၢ် တၢ်မုၢ်လၢ်မနုၤအိၣ်ဝဲလဲၣ်.
ဖဲပှၤတတီတလိၤတဖၣ် ဂဲၤဆၢထၢၣ်သမူထီၣ်က့ၤအခါ အဝဲသ့ၣ် ကဘၣ်တၢ်စံၣ်ညီၣ်အီၤ ဒ်တၢ်လၢအမၤတ့ၢ်ဝဲလၢ အပူၤကွံာ်တဖၣ်အသိးဧါ. တမ့ၢ်ဘၣ်. ရိမ့ၤ ၆:၇ စံးဝဲလၢ “ပှၤလၢအသံန့ၣ်, ဘၣ်ပာ်တီပာ်လိၤကွံာ်အီၤလၢ တၢ်ဒဲးဘးလီၤ.” ပှၤတတီတလိၤတဖၣ် ဟ့ၣ်က့ၤတၢ်ဒဲးဘးအဘူးအလဲ ခီဖျိဘၣ်သံဝဲလီၤ. အဃိ အဝဲသ့ၣ် တဘၣ်တၢ်စံၣ်ညီၣ်အီၤဒ် တၢ်လၢအမၤတ့ၢ်ဝဲလၢ တချုးအသံဒံးဘၣ်အခါန့ၣ်ဘၣ်. ကဘၣ်တၢ်စံၣ်ညီၣ်အီၤဒ် တၢ်လၢအမၤဝဲ ဖဲအဂဲၤဆၢထၢၣ်သမူထီၣ်က့ၤဝံၤ အခါန့ၣ်လီၤ. အဘျုးကအိၣ်လၢ အဝဲသ့ၣ်အဂီၢ်ဒ်လဲၣ်.
တၢ်ဖးလံာ်စီဆှံ
(ရိမ့ၤ ၄:၁-၁၅) မၤသးဒ်န့ၣ်ဒီး, ပကစံးလၢပပၢ်စီၤ အၤဘြၤဟၣ်ထံၣ်န့ၢ်တၢ်ဘၣ်ဃးဒီး တၢ်ဖံးတၢ်ညၣ် လၢမနုၤတမံၤလဲၣ်. ၂ အဂ့ၢ်ဒ်အံၤ, စီၤအၤဘြၤဟၣ် မ့ၢ်ဘၣ်တၢ်ပာ်တီပာ်လိၤလၢ အတၢ်မၤအဃိဒီး, ပာ်အသးကဖၢလၢ အလီၢ်ကအိၣ်ဝဲလီၤ. ဘၣ်ဆၣ်ဒီး လၢယွၤအမဲာ်ညါ တမ့ၢ်ဘၣ်. ၃ အဂ့ၢ်ဒ်အံၤ, တၢ်ကွဲးအသးစံးဝဲဒ်လဲၣ်. စီၤအၤဘြၤဟၣ်နာ်ယွၤဒီး, တၢ်ပးကဲ (အတၢ်နာ်) လၢတၢ်တီတၢ်လိၤ လၢအဂီၢ်လီၤ. ၄ ဒီးပှၤလၢအမၤတၢ်အဂီၢ်န့ၣ် တၢ်ပာ်အဘူးအလဲဒ်လၢ တၢ်ဘျုးအသိးတမ့ၢ်ဘၣ်. မ့ၢ်ဒ်လၢတၢ်ကမၢ်အသိးလီၤ. ၅ မ့မ့ၢ်ပှၤလၢအတမၤဘၣ်တၢ်ဘၣ်, ဒီးနာ်ပှၤလၢအပာ်တီပာ်လိၤ ပှၤတယူးတယီၣ်ဘၣ်ယွၤန့ၣ်, တၢ်ပးကဲအတၢ်နာ်လၢ တၢ်တီတၢ်လိၤလီၤ. ၆ ဒ်န့ၣ်အသိး, စီၤဒၤဝံးစံးလၢ ပှၤလၢအတမၤဘၣ် တၢ်ဘၣ်ဒီးယွၤပာ်တီပာ်လိၤအီၤ, ဘၣ်တၢ်ဆိၣ်ဂ့ၤဝဲအဂ့ၢ်အကျိၤ, ၇ ပှၤလၢအတၢ်ကမၣ်ပျၢ်လံ, ဒီးအတၢ်ဒဲးဘးဘၣ်ကျၢၢ်ဘၢလံန့ၣ်, ဘၣ်ဆိၣ်ဂ့ၤဝဲလီၤ. ၈ ပှၤကညီလၢ ယွၤတပာ်ဘၣ် တၢ်ဒဲးဘးလၢအလိၤတဂၤန့ၣ်, ဘၣ်ဆိၣ်ဂ့ၤဝဲလီၤ. ၉ မၤသးဒ်န့ၣ်ဒီး, တၢ်ဆိၣ်ဂ့ၤန့ၣ်မ့ၢ် အဘၣ်ပှၤလၢ အဒိးတၢ်ကူးတရံးဧါ, မ့ၢ်အဘၣ်စ့ၢ်ကီးပှၤလၢ အတဒိးဘၣ်တၢ်ကူးတရံးလဲၣ်. အဂ့ၢ်ဒ်အံၤ, ပစံးလၢတၢ်ပးကဲတၢ်နာ် လၢတၢ်တီတၢ်လိၤလၢ စီၤအၤဘြၤဟၣ်အဂီၢ်လီၤ. ၁၀ မၤသးဒ်န့ၣ်ဒီး ပးကဲဝဲဒ်လဲၣ်. မ့ၢ်အအိၣ်လၢတၢ်ကူးတရံးအပူၤဧါ, လၢတၢ်တကူးတရံးဘၣ်အပူၤလဲၣ်. လၢတၢ်ကူးတရံးအပူၤတမ့ၢ်ဘၣ်, မ့ၢ်လၢတၢ်တကူးတရံးဘၣ်အပူၤလီၤ. ၁၁ ဒီးဒိးတၢ်ကူးတရံးအတၢ်ပနီၣ် လၢအမ့ၢ် တၢ်နာ်အတၢ်တီတၢ်လိၤလၢ အအိၣ်ဒီးအီၤဖဲအတချုး ဒိးဒံးဘၣ်တၢ်ကူးတရံးန့ၣ်, အတၢ်စဲပနီၣ်ဃာ် ဒ်သိးအကကဲထီၣ် ကယဲၢ်ပှၤနာ်တၢ်, လၢအတဒိးဘၣ် တၢ်ကူးတရံးဘၣ်ခဲလၢာ်အပၢ်, ဒ်သိးတၢ်တီတၢ်လိၤကဘၣ် တၢ်ပးကဲအီၤလၢ အဝဲသ့ၣ်အဂီၢ်လီၤ. ၁၂ ဒီးပှၤဒိးတၢ်ကူးတရံးအပၢ်, ထဲပှၤဒိးတၢ်ကူးတရံးဧိၤအဂီၢ်တမ့ၢ်ဘၣ်, မ့ၢ်ပှၤလၢအယီၢ်စ့ၢ်ကီး ပပၢ်စီၤအၤဘြၤဟၣ် အတၢ်နာ်လၢအအိၣ်ဒီးအီၤလၢ အတချုးဒိးဒံးဘၣ် တၢ်ကူးတရံးဘၣ်, အခီၣ်လီၢ်အဂီၢ်န့ၣ်လီၤ. ၁၃ အဂ့ၢ်ဒ်အံၤ, တၢ်စံးပာ်လၢ စီၤအၤဘြၤဟၣ်မ့ၢ်ဂ့ၤ, အချံအသၣ်မ့ၢ်ဂ့ၤ, တမ့ၢ်ဘၣ် အကန့ၢ်သါဟီၣ်ခိၣ်လၢ တၢ်သိၣ်တၢ်သီအဃိဘၣ်. မ့ၢ်လၢတၢ်နာ်အတၢ်တီတၢ်လိၤအဃိလီၤ. ၁၄ အဂ့ၢ်ဒ်အံၤ, ပှၤဘၣ်ဃးဒီးတၢ်သိၣ်တၢ်သီ မ့ၢ်န့ၢ်သါတၢ်ဒီး, တၢ်နာ်န့ၣ်ကကဲလၢ တၢ်ကလီကလီ, ဒီးတၢ်စံးပာ်န့ၣ် ကဟးဂီၤကွံာ်ဝဲလီၤ. ၁၅ အဂ့ၢ်ဒ်အံၤ, တၢ်သိၣ်တၢ်သီန့ၣ် ဒုးအိၣ်ထီၣ်တၢ်သးထီၣ်လီၤ. အဂ့ၢ်ဒ်အံၤ, ဖဲတၢ်သိၣ်တၢ်သီတအိၣ်ဘၣ်န့ၣ်, တၢ်လုၣ်သ့ၣ်ခါပတာ်တအိၣ်ဘၣ်လီၤ.
လါဖ့ၤဘြူၤအါရံၤ ၁၈–၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ရိမ့ၤ ၇–၈
“မ့ၢ်န ‘ကွၢ်လၢ်တၢ်သပှၢ်ပှၢ်’ ဧါ”
(ရိမ့ၤ ၈:၁၉) အဂ့ၢ်ဒ်အံၤ, တၢ်ဘၣ်တ့န့ၣ်, အတၢ်ကွၢ်လၢ်သပှၢ်ပှၢ်န့ၣ် ကွၢ်လၢ်ယွၤ အဖိခွါတဖၣ် အတၢ်အိၣ်ဖျါအကျဲလီၤ.
တၢး၁၂ ၇/၁၅ ကဘျံးပၤ ၁၁ အဆၢ ၁၇
ဒ်သိးနကအိၣ်ဒီး တၢ်သဘျ့နီၢ်ကီၢ်အဂီၢ် ပျဲယဟိဝၤယွၤလၢ ကဟံးစုနဲၣ်ကျဲနၤ
၁၇ စီၤပီလူးကွဲးဝဲဘၣ်ဃးဒီး ယဟိဝၤယွၤကဟ့ၣ် အခ့အပှၤလၢအိၣ်လၢ ဟီၣ်ခိၣ်ချၢတဖၣ် တၢ်သဘျ့နီၢ်ကီၢ်အဂ့ၢ်လီၤ. အဝဲကွဲးဝဲလၢ “တၢ်ဘၣ်တ့န့ၣ်, အတၢ်ကွၢ်လၢ်သပှၢ်ပှၢ်န့ၣ် ကွၢ်လၢ်ယွၤအဖိခွါတဖၣ် အတၢ်အိၣ်ဖျါအကျဲလီၤ.” ဝံၤတဲကဒီးဝဲလၢ “တၢ်ဘၣ်တ့ဒၣ်လဲာ်န့ၣ် ကထူၣ်ဖျဲးဒီး တၢ်အုၣ်တၢ်ကျၣ်အတၢ်ကဲကုၢ်, ဒီးကလဲၤနုာ်ဆူယွၤအဖိတဖၣ် အတၢ်ထူၣ်ဖျဲးအလၤကပီၤအပူၤလီၤ.” (ရိ. ၈:၁၉-၂၁) “တၢ်ဘၣ်တ့န့ၣ်” မ့ၢ်ဝဲ ပှၤဟီၣ်ခိၣ်ဖိလၢအိၣ်ဒီး တၢ်မုၢ်လၢ်လၢ ကအိၣ်မူဘၣ်လၢဟီၣ်ခိၣ် ဒီးကဒိးန့ၢ်ဘၣ် တၢ်ဆိၣ်ဂ့ၤခီဖျိ ကစၢ်ယွၤအဖိခွါ လၢအဘၣ်တၢ်ဒိးဖှူအီၤတဖၣ် “အတၢ်အိၣ်ဖျါ” လီၤ. တၢ်အိၣ်ဖျါအံၤ ကစးထီၣ်အသးဖဲယွၤ “အဖိခွါ” လၢအဂဲၤဆၢထၢၣ်သမူထီၣ်က့ၤ ဆူမူခိၣ်တဖၣ် ဒီးယ့ၣ်ၡူးခရံာ် မၤဟးဂီၤကွံာ်ဝဲ တၢ်အၢတၢ်သီလၢဟီၣ်ခိၣ် ဒီးကဆှၢဝဲ “ပှၤဂီၢ်မုၢ်ဖးဒိၣ်” လၢဟီၣ်ခိၣ်သီအပူၤ အဆၢကတီၢ်န့ၣ်လီၤ.—လီၣ်. ၇:၉, ၁၄.
(ရိမ့ၤ ၈:၂၀) အဂ့ၢ်ဒ်အံၤ, တၢ်ဘၣ်တ့န့ၣ်ဘၣ်တၢ်ပာ် အီၤလၢတၢ်ကလီကလီအဖီလာ်, ဖဲအသးတမ့ၢ်ဘၣ်, မ့ၢ်ဖဲပှၤအသးလၢ အပာ်အီၤ လၢတၢ်မုၢ်လၢ်အပူၤလီၤ.
တၢး၁၂ ၃/၁၅ ကဘျံးပၤ ၂၃ အဆၢ ၁၁
သးခုလၢတၢ်မုၢ်လၢ်အပူၤ
၁၁ ယဟိဝၤယွၤ ဟ့ၣ်ပှၤဟီၣ်ခိၣ်ဖိတဖၣ် “တၢ်မုၢ်လၢ်” ခီဖျိအဝဲ အၢၣ်လီၤဝဲလၢ ကမၤထူၣ်ဖျဲးထီၣ် ပှၤဟီၣ်ခိၣ်ဖိတဖၣ်လၢ “ဂုၢ်လၢအအိၣ်လၢသီ” လၢမ့ၢ်မုၣ်ကီၤလံၢ် အတၢ်ပၢဖီလာ် ခီဖျိ တၢ်စံးပာ် “ချံသၣ်” န့ၣ်လီၤ. (လီၣ်. ၁၂:၉; ၁ မိၤ. ၃:၁၅) “ချံသၣ်” န့ၣ်မ့ၢ်ဝဲ ယ့ၣ်ၡူးခရံာ်လီၤ. (ကလၤ. ၃:၁၆) ခီဖျိလၢ ယ့ၣ်ၡူးအတၢ်သံ ဒီးအတၢ်ဂဲၤဆၢထၢၣ်သမူထီၣ်က့ၤအဃိ ပှၤဟီၣ်ခိၣ်ဖိတဖၣ် အိၣ်ဒီးတၢ်မုၢ်လၢ်လၢ ကထူၣ်ဖျဲးထီၣ်လၢ တၢ်ဒဲးဘး ဒီးတၢ်သံလီၤ. တၢ်မုၢ်လၢ်အံၤ ဘၣ်ထွဲလိာ်အသးဒီး ပှၤလၢအဂဲၤဆၢထၢၣ်သမူထီၣ်က့ၤဆူမူခိၣ် “ယွၤအဖိခွါတဖၣ် အတၢ်အိၣ်ဖျါ” လီၤ. ပှၤလၢအဘၣ်တၢ်ဒိးဖှူအီၤတဖၣ်န့ၣ် မ့ၢ်ဝဲ “ချံသၣ်” ခံကူာ်တကူာ်လီၤ. အဝဲသ့ၣ်က ‘အိၣ်ဖျါ’ ထီၣ်ဖဲ ယ့ၣ်ၡူးဒီး အဝဲသ့ၣ် မၤဟးဂီၤကွံာ် မုၣ်ကီၤလံၢ် ဒီးတၢ်အၢတၢ်သီလၢဟီၣ်ခိၣ်အခါလီၤ. (လီၣ်. ၂:၂၆, ၂၇) တၢ်အံၤကကဲထီၣ် တၢ်အုၣ်က့ၤခီၣ်က့ၤလၢ သိအဂုၤအဂၤလၢ အထူၣ်ဖျဲးထီၣ်လၢ တၢ်နးတၢ်ဖှီၣ်ဖးဒိၣ်အပူၤလီၤ.—လီၣ်. ၇:၉, ၁၀, ၁၄.
(ရိမ့ၤ ၈:၂၁) အဂ့ၢ်ဒ်အံၤ, တၢ်ဘၣ်တ့ဒၣ်လဲာ်န့ၣ် ကထူၣ်ဖျဲးဒီး တၢ်အုၣ်တၢ်ကျၣ်အတၢ်ကဲကုၢ်, ဒီးကလဲၤနုာ်ဆူ ယွၤအဖိတဖၣ် အတၢ်ထူၣ်ဖျဲး အလၤကပီၤအပူၤလီၤ.
တၢး၁၂ ၃/၁၅ ကဘျံးပၤ ၂၃ အဆၢ ၁၂
သးခုလၢတၢ်မုၢ်လၢ်အပူၤ
၁၂ ဖဲယ့ၣ်ၡူးပၢတၢ် အနံၣ်တကထိအတီၢ်ပူၤ ပှၤဟီၣ်ခိၣ်ဖိ “တၢ်ဘၣ်တ့” တဖၣ် ကထူၣ်ဖျဲးထီၣ်ဝဲနီၢ်နီၢ်လီၤ. ဖဲန့ၣ်အဆၢကတီၢ် “ယွၤအဖိခွါတဖၣ်” က ‘အိၣ်ဖျါ’ ထီၣ်လၢကျဲအဂၤတဘိ ခီဖျိအဝဲသ့ၣ် ကမၤတၢ်ဒ်ပှၤလုၢ်တၢ်အဒိၣ်အသိး ဒီးကမၤစၢၤဝဲ ပှၤဟီၣ်ခိၣ်ဖိတဖၣ် ဒ်သိးကဒိးန့ၢ်ဘၣ် တၢ်အဘျုးလၢ ယ့ၣ်ၡူးခရံာ် အတၢ်ပှ့ၤက့ၤအဂီၢ်န့ၣ်လီၤ. ဖဲယွၤအဘီအမုၢ်ပၢဟီၣ်ခိၣ် အဆၢကတီၢ် ပှၤဟီၣ်ခိၣ်ဖိတဖၣ် ကပူၤဖျဲးထီၣ်လၢ တၢ်ဒဲးဘး ဒီးတၢ်သံလီၤ. ပှၤဟီၣ်ခိၣ်ဖိလၢအိၣ်ဒီး တၢ်ဒိကနၣ်တဖၣ် “ကထူၣ်ဖျဲးဒီး တၢ်အုၣ်တၢ်ကျၣ်အတၢ်ကဲကုၢ်” ကယီကယီလီၤ. ဖဲအနံၣ်တကထိ ဒီးတၢ်မၤကွၢ်လၢ အလီၢ်ခံကတၢၢ်အတီၢ်ပူၤ အဝဲသ့ၣ်မ့ၢ်ဆဲးအိၣ်ဒီး တၢ်သးတီန့ၣ် အမံၤကအိၣ်ကွဲးအသးလၢ “လံာ်မူတကကြူၢ်” အပူၤလီၤထူလီၤယိာ်လီၤ. အဝဲသ့ၣ် “ကလဲၤနုာ်ဆူယွၤအဖိတဖၣ် အတၢ်ထူၣ်ဖျဲးအလၤကပီၤအပူၤလီၤ.” (လီၣ်. ၂၀:၇, ၈, ၁၁, ၁၂) မ့ၢ်တၢ်မုၢ်လၢ်လၢ အလီၤကမၢကမၣ်ဒိၣ်မးလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ရိမ့ၤ ၈:၆) အဂ့ၢ်ဒ်အံၤ, တၢ်ဖံးတၢ်ညၣ် အသးအိၣ် တၢ်န့ၣ်မ့ၢ်တၢ်သံလီၤ. မ့မ့ၢ်သးအသးအိၣ်တၢ်န့ၣ်, မ့ၢ်တၢ်မူဒီးတၢ်ဃူတၢ်ဖိးလီၤ.
မ့ၢ်နသ့ၣ်နီၣ်ထီၣ်ဒံးဧါ.
“တၢ်ဖံးတၢ်ညၣ် အသးအိၣ်တၢ်” ဒီး “သးအသးအိၣ်တၢ်” န့ၣ် အတၢ်လီၤဆီမ့ၢ်မနုၤလဲၣ်. (ရိမ့ၤ ၈:၆)
ပှၤလၢအသးစၢၢ်ဆၢမၤတၢ်လၢ ဘၣ်ဃးဒီးတၢ်ဖံးတၢ်ညၣ်န့ၣ် အဝဲသ့ၣ်တဲသကိး တၢ်ဂ့ၢ်လၢဘၣ်ဃးထဲဒၣ် တၢ်ဖံးတၢ်ညၣ်အသးအိၣ်တၢ်တဖၣ်န့ၣ်လီၤ. ပှၤလၢမၤတၢ်လၢ ဘၣ်ဃးဒီးသးအသးအိၣ်တၢ်န့ၣ် လၢအတၢ်အိၣ်မူအပူၤ အဝဲပာ်ဆိဝဲ တၢ်လၢအဘၣ်ဃးဒီး ကစၢ်ယွၤ ဒီးကစၢ်ယွၤ အတၢ်ဆိကမိၣ်လီၤ. ခရံာ်ဖိလၢအမၤဝဲဒ်အံၤတဂၤန့ၣ် အဝဲပျဲဝဲလၢ ယွၤအသးစီဆှံ ကဟံးစုနဲၣ်ကျဲအီၤလီၤ. တၢ်ဖံးတၢ်ညၣ် အသးအိၣ်တၢ်န့ၣ် မ့ၢ်တၢ်သံလီၤ. မ့မ့ၢ် သးအသးအိၣ်တၢ်န့ၣ် မ့ၢ်တၢ်မူ ဒီးတၢ်ဃူတၢ်ဖိးလီၤ.—တၢး၁၆.၁၂, ကဘျံးပၤ ၁၀-၁၄.
(ရိမ့ၤ ၈:၂၆, ၂၇) ဒ်န့ၣ်အသိး, သးန့ၣ်မၤစၢၤပဂံၢ်စၢ်ပဘါစၢ်တဖၣ်လီၤ. အဂ့ၢ်ဒ်အံၤ, တၢ်လၢပဂ့ၤဃ့ဘါထုကဖၣ်တၢ်န့ၣ်, ပတသ့ၣ်ညါဘၣ်. မ့မ့ၢ်သးန့ၣ်အကစၢ်ဒၣ်ဝဲ, ဃ့န့ၢ်ပဂီၢ်အိၣ်ဒီး တၢ်ကအုကစွါလၢ ပစံးဘၣ်တဲဘၣ် တသ့ဘၣ်လီၤ. ၂၇ ဒီးပှၤလၢအဃုကွၢ်သးတဖၣ်န့ၣ်, သ့ၣ်ညါသးန့ၣ် အတၢ်ဆိကမိၣ်တၢ်လီၤ. အဂ့ၢ်ဒ်အံၤ, ဃ့န့ၢ်ပှၤစီဆှံအဂီၢ်ဖဲဒၣ်ယွၤအသးလီၤ.
တၢး၀၉ ၁၁/၁၅ ကဘျံးပၤ ၇ အဆၢ ၂၀
နတၢ်ထုကဖၣ်န့ၣ် ပာ်ဖျါထီၣ်လၢ နမ့ၢ်ပှၤဒ်လဲၣ်တဂၤလဲၣ်.
၂၀ တဘျီတခီၣ် ဖဲပဃ့ထုကဖၣ်အခါ ပကဘၣ်တဲတၢ်မနုၤလဲၣ်န့ၣ် ပတသ့ၣ်ညါဘၣ်. စီၤပီလူး ကွဲးဝဲလၢ “တၢ်လၢပဂ့ၤဃ့ဘါထုကဖၣ်တၢ်န့ၣ်, ပတသ့ၣ်ညါဘၣ်. မ့မ့ၢ်သးန့ၣ်အကစၢ်ဒၣ်ဝဲ, ဃ့န့ၢ်ပဂီၢ်အိၣ်ဒီး တၢ်ကအုကစွါလၢ ပစံးဘၣ်တဲဘၣ် တသ့ဘၣ်လီၤ. ဒီးပှၤ [ကစၢ်ယွၤ] လၢအဃုကွၢ်သးတဖၣ်န့ၣ်, သ့ၣ်ညါသးန့ၣ် အတၢ်ဆိကမိၣ်တၢ်လီၤ.” (ရိ. ၈:၂၆, ၂၇) ယဟိဝၤယွၤကွဲးလီၤဝဲ တၢ်ထုကဖၣ်အဂ့ၢ်အါမးလၢ လံာ်စီဆှံအပူၤလီၤ. တၢ်ဃ့ကညးလၢ လံာ်စီဆှံအပူၤန့ၣ် ကစၢ်ယွၤတူၢ်လိာ်ဝဲဒ်သိး ပတၢ်ထုကဖၣ်အသိး ဒီးစံးဆၢက့ၤဝဲလီၤ. ကစၢ်ယွၤသ့ၣ်ညါပှၤ တကးဒံးဘၣ် သ့ၣ်ညါဝဲ တၢ်ဂ့ၢ်လၢပှၤကွဲးလံာ်စီဆှံတဖၣ် ကွဲးဝဲခီဖျိလၢ အသးစီဆှံန့ၣ်လီၤ. ဖဲသးစီဆှံ “ဃ့န့ၢ်” တၢ်လၢပဂီၢ်အခါ ယဟိဝၤယွၤ စံးဆၢက့ၤဝဲ ပတၢ်ဃ့ထုကဖၣ်န့ၣ်လီၤ. ဘၣ်ဆၣ် ဖဲပသ့ၣ်ညါအါထီၣ် ယွၤအကလုၢ်ကထါအခါ တၢ်လၢပကြၢးဃ့တဖၣ်န့ၣ် ကဟဲထီၣ်လၢပသးပူၤလီၤ.
တၢ်ဖးလံာ်စီဆှံ
(ရိမ့ၤ ၇:၁၃-၂၅) မၤသးဒ်န့ၣ် ဒီးတၢ်အဂ့ၤအဝါန့ၣ်, မ့ၢ်အကဲထီၣ်တၢ်သံလၢယဂီၢ်န့ၣ်ဧါ. မ်အသုတမၤအသးဒ်န့ၣ်တဂ့ၤ. မ့မ့ၢ်တၢ်ဒဲးဘး, ဒ်သိးအကအိၣ်ဖျါလၢအမ့ၢ် တၢ်ဒဲးဘးဒီးမၤသံယၤလၢတၢ်ဂ့ၤ, ဒ်သိးတၢ်ဒဲးဘး ကကဲထီၣ်တၢ်ဒဲးဘးအဒိၣ်အမုၢ်, လၢတၢ်မၤလိာ်အဃိလီၤ. ၁၄ အဂ့ၢ်ဒ်အံၤ, ပသ့ၣ်ညါလၢတၢ်သိၣ်တၢ်သီဘၣ်ဃး ဒီးသးန့ၣ်လီၤ. မ့မ့ၢ်ယဲဒၣ်အံၤ, ယဘၣ်ဃး ဒီးတၢ်ဖံးတၢ်ညၣ်, ယဘၣ်တၢ်ဆါကွံာ်ယၤဆူ တၢ်ဒဲးဘးအစုပူၤလီၤ. ၁၅ အဂ့ၢ်ဒ်အံၤ, တၢ်လၢယမၤန့ၣ်, ယတသ့ၣ်ညါဘၣ်. အဂ့ၢ်ဒ်အံၤ, တၢ်လၢယဆၢန့ၣ် ယတမၤဘၣ်. မ့မ့ၢ်တၢ်လၢ ယသးဟ့န့ၣ် ယမၤလီၤ. ၁၆ ဘၣ်ဆၣ်ဒီး ယမ့ၢ်မၤတၢ်လၢ ယတဆၢဘၣ်န့ၣ်ဒီး, ယအၢၣ်လီၤအီလီၤလၢ တၢ်သိၣ်တၢ်သီမ့ၢ်တၢ်ဂ့ၤတၢ်ဝါလီၤ. ၁၇ ဒီးခဲကနံၣ်အံၤ, တမ့ၢ်လၢၤဘၣ်ယၤလၢ အမၤတၢ်န့ၣ်ဘၣ်. မ့ၢ်တၢ်ဒဲးဘးလၢ အအိၣ်ဝဲဆိးဝဲလၢယပူၤလီၤ. ၁၈ အဂ့ၢ်ဒ်အံၤ, ယသ့ၣ်ညါလၢ တၢ်ဂ့ၤတအိၣ် တဆိးဘၣ်လၢယပူၤ, ဒ်ပစံးတၢ်အသိး, လၢယဖံးယညၣ်အပူၤလီၤ. အဂ့ၢ်ဒ်အံၤ, ဆၢတၢ်ဂ့ၤန့ၣ်, အိၣ်ဒီးယၤလီၤ. မ့မ့ၢ်မၤတၢ်ဂ့ၤန့ၣ်, ယတထံၣ်န့ၢ်ဘၣ်. ၁၉ အဂ့ၢ်ဒ်အံၤ, တၢ်ဂ့ၤလၢယဆၢန့ၣ်, ယတမၤဘၣ်, မ့မ့ၢ်တၢ်အၢလၢယတဆၢဘၣ်န့ၣ်, ယမၤလီၤ. ၂၀ ဘၣ်ဆၣ်ဒီး တၢ်လၢယတဆၢဘၣ်န့ၣ်, ယမ့ၢ်မၤဒီး, တမ့ၢ်လၢၤဘၣ်ယမၤယဲဘၣ်, မ့ၢ်တၢ်ဒဲးဘးလၢ အအိၣ်ဝဲဆိးဝဲလၢယပူၤလီၤ. ၂၁ မၤသးဒ်န့ၣ်ဒီး, ယထံၣ်န့ၢ် တၢ်သိၣ်တၢ်သီတမံၤအံၤ, တုၤယဆၢမၤတၢ်ဂ့ၤဒီး, တၢ်အၢအိၣ်ဒီးယၤလီၤ. ၂၂ အဂ့ၢ်ဒ်အံၤ, ဖဲဒၣ်ပှၤလၢညါခီ, ယမုာ်လၤလၢ ယွၤအတၢ်သိၣ်တၢ်သီလီၤ. ၂၃ ဘၣ်ဆၣ်ဒီး ယထံၣ်တၢ်သိၣ်တၢ်သီအဂၤ, အိၣ်လၢယဂီၤတဖၣ်အပူၤ, လၢအဒုးလိာ်ယၤလိာ်အသး ဒီးယသးအတၢ်သိၣ်တၢ်သီ, ဒီးဒုးကဲကုၢ်ယၤလၢတၢ်ဒဲးဘး အတၢ်သိၣ်တၢ်သီအိၣ်လၢ ယဂီၤတဖၣ်အပူၤလီၤ. ၂၄ ပှၤအဖှီၣ်ယၤအံၤဧၢ, မ့ၢ်မတၤကထုးထီၣ်ကွံာ်ယၤလၢ တၢ်သံအံၤ အကစၢ်မိၢ်ပှၢ်တဂၤလဲၣ်. ၂၅ ယစံးထီၣ်ပတြၢၤယွၤ အဘျုးအဖှိၣ်လၢ ပကစၢ်ယ့ၣ်ၡူးခရံာ်အဃိလီၤ. မၤသးဒ်န့ၣ်ဒီးယကစၢ်ဒၣ်ယဲအံၤ, လၢသးန့ၣ်, ယမ့ၢ်ယွၤအတၢ်သိၣ်တၢ်သီ အကုၢ်အပှၤလီၤ. မ့မ့ၢ်လၢတၢ်ဖံးတၢ်ညၣ်န့ၣ်, ယမ့ၢ်တၢ်ဒဲးဘး အတၢ်သိၣ်တၢ်သီအကုၢ်အပှၤလီၤ.
လါဖ့ၤဘြူၤအါရံၤ ၂၅–လါမၢ်ၡး ၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ရိမ့ၤ ၉–၁၁
“တၢ်အဒိလၢ ဘၣ်ဃးဒီး သ့ၣ်စၤယံး”
(ရိမ့ၤ ၁၁:၁၆) ကိၣ်အဆိမ့ၢ်စီဆှံဒီး, ကစီဆှံဒီလိၣ်ညါစ့ၢ်ကီး, ဒီးတၢ်အဂံၢ်မ့ၢ်စီဆှံဒီး, အဒ့အဖီကစီဆှံစ့ၢ်ကီးလီၤ.
တၢး၁၁ ၅/၁၅ ကဘျံးပၤ ၂၃ အဆၢ ၁၃
‘ယွၤအတၢ်ကူၣ်ဘၣ်ကူၣ်သ့န့ၣ် ယိာ်ဆံးဒိၣ်လဲၣ်’
၁၃ ပှၤလၢအကကဲထီၣ် စီၤအၤဘြၤဟၣ် အချံအသၣ်တဖၣ်န့ၣ် စီၤပီလူး ထိၣ်သတြီၤ အဝဲသ့ၣ်ဒီး သ့ၣ်စၤယံးအဒ့လီၤ. (ရိ. ၁၁:၂၁) သ့ၣ်စၤယံးအဂ့ၤန့ၣ် ဘၣ်တၢ်ဒိလီၤအီၤလၢ ကစၢ်ယွၤအတၢ်အၢၣ်လီၤအီလီၤလၢ အမၤဝဲဒီးစီၤအၤဘြၤဟၣ် လၢအဟဲလၢထီၣ်ပှဲၤထီၣ်ဝဲလီၤ. သ့ၣ်စၤယံးအဂံၢ်န့ၣ် ကဆှီဝဲ ဒီးဘၣ်တၢ်ဒိလီၤအီၤလၢ ယဟိဝၤယွၤလၢ အဟ့ၣ်ဝဲ နီၢ်သးအံၣ်စရ့လးဖိတဖၣ် အသးသမူန့ၣ်လီၤ. (ၡါ. ၁၀:၂၀; ရိ. ၁၁:၁၆) အထူၣ်န့ၣ် ဘၣ်တၢ်ဒိလီၤအီၤလၢ စီၤအၤဘြၤဟၣ်အချံအသၣ် အဆိကတၢၢ်တကူာ် လၢအမ့ၢ်ယ့ၣ်ၡူးလီၤ. အဒ့တဖၣ်န့ၣ် ဘၣ်တၢ်ဒိလီၤအီၤလၢ ပှၤလၢအပၣ်ဃုာ်လၢ အၤဘြၤဟၣ်အချံအသၣ် ခံကူာ်တကူာ်အကျါတဖၣ် ‘အနီၣ်ဂံၢ်အလၢအပှဲၤ’ လီၤ.
(ရိမ့ၤ ၁၁:၁၇) ဒီးအဒ့အဖီတနီၤနီၤ မ့ၢ်ဘၣ်တၢ်မၤကၢ်ကွံာ်အီၤ, ဒီးနဲဒၣ်နမ့မ့ၢ် သ့ၣ်စၤယံးအမံၤ, လၢတၢ်ထီထီၣ်အီၤလၢဒ့အလီၢ်, ဒီးနန့ၢ်ဃုာ်သ့ၣ်စၤယံးအဂံၢ်ဒီးအသိဒီး,
(ရိမ့ၤ ၁၁:၂၀, ၂၁) ဘၣ်လံ, အဝဲသ့ၣ် ဘၣ်တၢ်မၤကၢ်ကွံာ်အီၤလၢ တၢ်တနာ်ဘၣ်အဃိ, ဒီးနအိၣ်ဂၢၢ်ဆိးကျၢၤနဲ လၢတၢ်နာ်အဃိလီၤ. သုတပာ်ထီၣ်ထီနသးတဂ့ၤ. မ့မ့ၢ်ပျံၤတၢ်တက့ၢ်. ၂၁ အဂ့ၢ်ဒ်အံၤ, ယွၤမ့ၢ်တသးလီဘၣ်ဒ့အနီၢ်နီၢ်တဖၣ်ဒီး, တသးလီဘၣ်နၤဘၣ်ဖုးလီၤ.
တၢး၁၁ ၅/၁၅ ကဘျံးပၤ ၂၄ အဆၢ ၁၅
‘ယွၤအတၢ်ကူၣ်ဘၣ်ကူၣ်သ့န့ၣ် ယိာ်ဆံးဒိၣ်လဲၣ်’
၁၅ လၢတၢ်န့ၣ်အဃိ ဒ်သိးယဟိဝၤယွၤ အတၢ်တိာ်ပာ် ကလၢထီၣ်ပှဲၤထီၣ်အဂီၢ် အဝဲမၤတ့ၢ်ဝဲ တၢ်မနုၤတဖၣ်လဲၣ်. စီၤပီလူးတဲနၢ်ပၢၢ်ပှၤလၢ သ့ၣ်စၤယံးအဂ့ၤ အဒ့လၢ ဘၣ်တၢ်ဒီၣ်တဲာ်ကွံာ်အီၤတဖၣ်အလီၢ်န့ၣ် ဘၣ်တၢ်ထီထီၣ်က့ၤ သ့ၣ်စၤယံးအမံၤအဒ့တဖၣ်လီၤ. (ဖး ရိမ့ၤ ၁၁:၁၇, ၁၈ တက့ၢ်.) လၢတၢ်န့ၣ်အဃိ ခရံာ်ဖိလၢအဘၣ် တၢ်ဒိးဖှူအီၤတနီၤ လၢအအိၣ်လၢ ရိမ့ၤတၢ်အိၣ်ဖှိၣ်အပူၤန့ၣ် မ့ၢ်ဝဲပှၤလၢဘၣ် တၢ်ထီထီၣ်အီၤလၢ သ့ၣ်စၤယံးအဂ့ၤအလိၤန့ၣ်လီၤ. အဝဲသ့ၣ်ကဲထီၣ် စီၤအၤဘြၤဟၣ်အချံအသၣ် ခီဖျိကျဲဒ်အံၤန့ၣ်လီၤ. အခီၣ်ထံးန့ၣ် အဝဲသ့ၣ်တဖၣ် လီၤဂာ်ဒီးသ့ၣ်စၤယံးအမံၤ အဒ့တဖၣ်အဃိ အဝဲသ့ၣ်တအိၣ်ဒီး တၢ်ခွဲးတၢ်ယာ်လၢ ကပၣ်ဃုာ်လၢ စီၤအၤဘြၤဟၣ် အတၢ်အၢၣ်လီၤအီလီၤအပူၤဘၣ်. ဘၣ်ဆၣ် ယဟိဝၤယွၤအိးထီၣ်ကျဲ ဒ်သိးအဝဲသ့ၣ် ကကဲထီၣ်ဘၣ် နီၢ်သးအံၣ်စရ့လးဖိအဂီၢ်လီၤ.—ရိ. ၂:၂၈,၂၉.
(ရိမ့ၤ ၁၁:၂၅, ၂၆) ပုၢ်သ့ၣ်ဝဲၢ်သ့ၣ်ဧၢ, ဒ်သိးသုသုတပာ်သုသး လၢသုကူၣ်ဘၣ်ကူၣ်သ့တဂ့ၤဒီး, ယသးအိၣ်လၢ သုကသ့ၣ်ညါတၢ်ခူသူၣ်အံၤ လၢပှၤကလုာ်တဖၣ်အတၢ် လၢထီၣ်ပှဲၤထီၣ် တချုးဟဲနုာ်ဒံးဘၣ် အဖၢမုၢ်ဒီး, တၢ်သူၣ်ကိၤသးကိၤ ဘၣ်လံအံၣ်စရ့လး တနီၤနီၤလံလီၤ. ၂၆ ဒီးဒ်န့ၣ်အသိး အံၣ်စရ့လးခဲလၢာ် ကတုၤလၢတၢ်အုၣ်က့ၤခီၣ်က့ၤအီၤ, ဒ်တၢ်ကွဲးအသးအသိး, ပှၤအုၣ်က့ၤခီၣ်က့ၤတၢ် ကဟဲထီၣ်လၢ စံယိၣ်အပူၤ, ဒီးကဒုးဟးထီၣ်ကွံာ် တၢ်တယူးတယီၣ်ဘၣ်ယွၤလၢ ယၤကိာ်အပူၤလီၤ.
တၢး၁၁ ၅/၁၅ ကဘျံးပၤ ၂၅ အဆၢ ၁၉
‘ယွၤအတၢ်ကူၣ်ဘၣ်ကူၣ်သ့န့ၣ် ယိာ်ဆံးဒိၣ်လဲၣ်’
၁၉ ယွၤအတၢ်တိာ်ပာ်လၢ ဘၣ်ဃးဒီး “ယွၤအအံၣ်စရ့လး” ဟဲလၢထီၣ်ပှဲၤထီၣ်ဝဲလၢ ကျဲလၢအလီၤကမၢကမၣ်န့ၣ်လီၤ. (ကလၤ. ၆:၁၆) ဒ်စီၤပီလူးတဲဝဲအသိး “အံၣ်စရ့လးဖိခဲလၢာ် ကတုၤလၢတၢ်အုၣ်က့ၤခီၣ်က့ၤ” လီၤ. (ရိ. ၁၁:၂၆) “အံၣ်စရ့လးဖိခဲလၢာ်” လၢအမ့ၢ် နီၢ်သးအံၣ်စရ့လးဖိ အနီၣ်ဂံၢ်မ့ၢ်လၢထီၣ်ပှဲၤထီၣ်ဝဲဖဲ တၢ်ဆၢကတီၢ်လၢ ယဟိဝၤယွၤပာ်ပနီၣ်ဝဲန့ၣ် အဝဲသ့ၣ်ကပၢတၢ် ဒ်စီၤပၤ ဒီးပှၤလုၢ်တၢ်အဒိၣ်အသိး လၢမူခိၣ်လီၤ. ဒ်သိးယဟိဝၤယွၤ အတၢ်တိာ်ပာ် သုတလၢထီၣ်ပှဲၤထီၣ်တဂ့ၤအဂီၢ် တၢ်တြီအီၤတန့ၢ်နီတမံၤဘၣ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ရိမ့ၤ ၉:၂၁-၂၃) ပှၤလၢအတ့သပၢၤန့ၣ်, တ့သပၢၤလၢတၢ်လၤ ကပီၤအဂီၢ်, ဒီးတ့သပၢၤလၢ တၢ်လၤကပီၤတအိၣ်ဘၣ် အဂီၢ်လၢဟီၣ်ခိၣ် တလိၣ်ဃီန့ၣ်, အစိအကမီၤအိၣ်ဝဲ, တမ့ၢ်ဘၣ်ဧါ. ၂၂ ဒီးယွၤအသး မ့ၢ်အိၣ်လၢအကဒုးနဲၣ် အသးထီၣ်, ဒီးလီၣ်ဖျါထီၣ်အစိအကမီၤဒီး, မ့ၢ်ဝံသးစူၤဃဲးဃဲးတၢ်သးထီၣ် အသပၢၤလၢ အကတီၤအသးလၢ တၢ်ဟးဂီၤအဂီၢ်န့ၣ်, ၂၃ ဒီးဒ်သိးအကလီၣ်ဖျါထီၣ်စ့ၢ်ကီး အလၤထူးအကပီၤတီၤလၢ တၢ်သးကညီၤအသပၢၤလၢ အကတီၤပာ်ဝဲလၢတၢ်လၤကပီၤအဂီၢ်,
တၢး၁၃ ၆/၁၅ ကဘျံးပၤ ၂၅ အဆၢ ၅
ပျဲယဟိဝၤယွၤလၢ ကဘှီနၤတက့ၢ်
၅ ပှၤဟီၣ်ခိၣ်ဖိတဖၣ် မ့ၢ်တတူၢ်လိာ်ဝဲ ပှၤတ့သပၢၤ ယဟိဝၤယွၤ အတၢ်ဘှီဂ့ၤထီၣ်က့ၤအီၤဘၣ်န့ၣ် တၢ်ကမၤအသးဒ်လဲၣ်. ဖဲန့ၣ်အခါ အဝဲကသူဝဲ အတၢ်စိတၢ်ကမီၤဒ်လဲၣ်. ဆိကမိၣ်ကွၢ် ပှၤတ့သပၢၤတဂၤ သူဝဲကပံာ် ဒီးတ့ထီၣ်သပၢၤ ဒ်အအဲၣ်ဒိးတ့ဝဲအသိး တန့ၢ်ဘၣ်အခါ ကမၤဝဲဒ်လဲၣ်. ဘၣ်သ့ၣ်သ့ၣ် အဝဲကဆၢတဲာ်လီၤအသးလၢ ကတ့က့ၤဝဲလၢအသီတဖျၢၣ် မ့တမ့ၢ် တသူဝဲကပံာ်အံၤလၢၤဘၣ် ဒီးကတၢၢ်ကွံာ်ဝဲလီၤ. ပှၤတ့သပၢၤတဂၤ တ့ဝဲသပၢၤအကျိၤအကျဲမ့ၢ်ကမၣ်န့ၣ် တၢ်ကကဲထီၣ်အသးဒ်အံၤလီၤ. ဘၣ်ဆၣ် ပှၤတ့သပၢၤ ယဟိဝၤယွၤန့ၣ် ဘှီပှၤလၢကျဲလၢအဘၣ်ထီဘိလီၤ. (၅ မိၤ. ၃၂:၄) ပှၤတဂၤ မ့ၢ်တတူၢ်လိာ်ဝဲလၢ ယဟိဝၤယွၤ ကဘှီဂ့ၤထီၣ်က့ၤအီၤဘၣ်န့ၣ် မ့ၢ်ဒၣ်အဝဲအတၢ်ကမၣ်လီၤ. ယဟိဝၤယွၤ ဘှီဘၣ်ထီၣ်က့ၤ ပှၤဟီၣ်ခိၣ်ဖိန့ၣ် သန့ၤထီၣ်အသးလၢအဝဲသ့ၣ် အတၢ်ပာ်သူၣ်ပာ်သးအဖီခိၣ်လီၤ. ပှၤလၢအဒိကနၣ် ယဟိဝၤယွၤ အကလုၢ်န့ၣ် ကကဲထီၣ်ပှၤလၢ ယဟိဝၤယွၤ သူအီၤသ့လီၤ. အဒိ ခရံာ်ဖိလၢ အဘၣ်တၢ်ဒိးဖှူအီၤတဖၣ်န့ၣ် မ့ၢ်ဝဲ “တၢ်သးကညီၤအသပၢၤ” လၢဘၣ်တၢ်ဘှီဂ့ၤထီၣ်က့ၤအီၤ ဒ်သိးကကဲထီၣ် “သပၢၤလၢတၢ်လၤကပီၤအဂီၢ်” လီၤ. ဘၣ်ဆၣ် ပှၤလၢတတူၢ်လိာ်ကစၢ်ယွၤ အတၢ်ဟ့ၣ်ကူၣ်ဟ့ၣ်ဖးတဖၣ်န့ၣ် မ့ၢ် “သပၢၤလၢအကတီၤအသးလၢ တၢ်ဟးဂီၤအဂီၢ်” န့ၣ်လီၤ.—ရိ. ၉:၁၉-၂၃.
(ရိမ့ၤ ၁၀:၂) အဂ့ၢ်ဒ်အံၤ, ယအုၣ်ယသးလၢအဂီၢ် လၢအသးဂဲၤလိာ်ဝဲလၢယွၤ အဂီၢ်ဘၣ်ဆၣ်ဒီး တမ့ၢ်ဘၣ်ဒ် တၢ်သ့ၣ်ညါအသိးဘၣ်.
it-1 ကဘျံးပၤ ၁၂၆၀ အဆၢ ၂
သူၣ်က့ၣ်သးကါ, တၢ်သးကါ
တၢ်သူၣ်ဆူၣ်သးဆူၣ်လၢအကမၣ်. ပှၤတဂၤမ့ၢ်အိၣ်ဒီး တၢ်သူၣ်ဆူၣ်သးဆူၣ် ဒီးတၢ်သူၣ်က့ၣ်သးကါလၢ တၢ်ဂ့ၢ်တခါအဂီၢ် သနာ်က့ ဘၣ်သ့ၣ်သ့ၣ် အဝဲအတၢ်သူၣ်ဆူၣ်သးဆူၣ်န့ၣ် ကမၣ်ဝဲသ့ ဒီးတဘၣ်ကစၢ်ယွၤအသးဘၣ်. တၢ်ကဲထီၣ်အသးဒီး ပှၤယူဒၤဖိလၢ တၢ်မၢဖိအစိၤတဖၣ်ဒ်အံၤလီၤ. အဝဲသ့ၣ်ဃုဝဲ တၢ်တီတၢ်လိၤ ခီဖျိမၤဝဲဒ် စီၤမိၤၡ့အတၢ်သိၣ်တၢ်သီအိၣ်ဝဲအသိးလီၤ. ဘၣ်ဆၣ် စီၤပီလူးပာ်ဖျါထီၣ်ဝဲလၢ အဝဲသ့ၣ်အတၢ်သူၣ်ဆူၣ်သးဆူၣ်န့ၣ် တလီၤပလိာ်လိာ်အသးဒီး တၢ်မ့ၢ်တၢ်တီဘၣ်အဃိ ကမၣ်ဝဲလီၤ. လၢတၢ်န့ၣ်အဃိ အဝဲသ့ၣ်တအိၣ်ဒီး ယွၤအတၢ်တီတၢ်လိၤနီၢ်နီၢ်ဘၣ်. ဒ်သိးအဝဲသ့ၣ်ကကဲထီၣ် ပှၤတီပှၤလိၤ ဒီးခီဖျိလၢ တၢ်သိၣ်တၢ်သီအဃိ အဝဲသ့ၣ်သုတဘၣ် တၢ်စံၣ်ညီၣ်တဂ့ၤအဂီၢ် အဝဲသ့ၣ်ကဘၣ်ထံၣ်လီၤက့ၤ အတၢ်ကမၣ် ဒီးကဘၣ်ဟဲက့ၤဆူ ကစၢ်ယွၤအအိၣ် ခီဖျိလၢ ယ့ၣ်ၡူးလီၤ. (ရိ. ၁၀:၁-၁၀) ဖဲန့ၣ်အကျါ ပၣ်ဃုာ်ဒီး ပှၤတၢ်စူးဖိ စီၤစီလူးလီၤ. ဖဲအဝဲအိၣ်လၢ ယူဒၤတၢ်ဘူၣ်တၢ်ဘါပူၤအခါ အဝဲအိၣ်ဒီးတၢ်သူၣ်ဆူၣ်သးဆူၣ်လၢ အကမၣ် ခီဖျိ “မၤအၢမၤသီယွၤအတၢ်အိၣ်ဖှိၣ်နးမး” လီၤ. အဝဲမၤထွဲဝဲဒ် တၢ်သိၣ်တၢ်သီအသိး လီၤတံၢ်လီၤဆဲးအဃိ တဲဝဲလၢ “တၢ်ပာ်တၢ်ကမၣ်လၢယလိၤ အလီၢ်တအိၣ်ဘၣ်.” (ကလၤ. ၁:၁၃, ၁၄; ဖံလံး. ၃:၆) အဝဲအိၣ်ဒီး တၢ်သူၣ်ဆူၣ်သးဆူၣ်လၢ ယူဒၤတၢ်ဘူၣ်တၢ်ဘါအဂီၢ်န့ၣ် မ့ၢ်တၢ်လၢအကမၣ်လီၤ. ဘၣ်ဆၣ် အဝဲမ့ၢ်ပှၤလၢ အသူၣ်ဘျၢသးဘျၢအဃိ ယဟိဝၤယွၤ ပာ်ဖျါထီၣ်အတၢ်သးကညီၤ ခီဖျိယ့ၣ်ၡူး ဒီးမိၤအီၤဆူ တၢ်ဘူၣ်တၢ်ဘါအမ့ၢ်အတီအပူၤလီၤ.—၁ တံၤ. ၁:၁၂, ၁၃.
တၢ်ဖးလံာ်စီဆှံ
(ရိမ့ၤ ၁၀:၁-၁၅) ပုၢ်သ့ၣ်ဝဲၢ်သ့ၣ်ဧၢ, ယဆၢတၢ်လၢ ယသူၣ်ကံၢ်သးလဲ, ဒီးယတၢ်ထုကဖၣ် ယွၤလၢအံၣ်စရ့လးအဂီၢ်, မ့ၢ်ဒ်သိးအကတုၤက့ၤလၢ တၢ်အုၣ်က့ၤခီၣ်က့ၤအီၤလီၤ. ၂ အဂ့ၢ်ဒ်အံၤ, ယအုၣ်ယသးလၢအဂီၢ် လၢအသးဂဲၤလိာ်ဝဲလၢယွၤအဂီၢ် ဘၣ်ဆၣ်ဒီး တမ့ၢ်ဘၣ်ဒ်တၢ်သ့ၣ်ညါအသိးဘၣ်. ၃ အဂ့ၢ်ဒ်အံၤ, တသ့ၣ်ညါဘၣ် ယွၤအတၢ်တီတၢ်လိၤဘၣ်ဒီး, ဃုမၤဂၢၢ်မၤကျၢၤ အတၢ်တီတၢ်လိၤဒၣ်ဝဲသတးဒီး, တဆီၣ်လီၤဘၣ်အသးလၢ ယွၤအတၢ်တီတၢ်လိၤ အဖီလာ်ဘၣ်. ၄ အဂ့ၢ်ဒ်အံၤ, ခရံာ်မ့ၢ် တၢ်သိၣ်တၢ်သီအကတၢၢ်လၢ တၢ်တီတၢ်လိၤအဂ့ၢ်, လၢကယဲၢ်ပှၤလၢ အစူၢ်က့ၤနာ်က့ၤတၢ်အဂီၢ်လီၤ. ၅ အဂ့ၢ်ဒ်အံၤ, စီၤမိၤၡ့ကွဲးဝဲလၢ တၢ်တီတၢ်လိၤဟဲလၢ တၢ်သိၣ်တၢ်သီအဂ့ၢ်, လၢပှၤလၢအမၤတၢ်န့ၣ်တဖၣ်, ကမူဝဲလၢအပူၤလီၤ. ၆ မ့မ့ၢ်တၢ်တီတၢ်လိၤဟဲလၢ တၢ်နာ်န့ၣ်, စံးဝဲဒ်အံၤ, သုတစံးလၢနသးကံၢ်ပူၤ, မ့ၢ်မတၤကလဲၤထီၣ် ဆူမူခိၣ် တဂၤလဲၣ်, ဒ်ပစံးတၢ်အသိး, ဒ်သိးအကဆှၢလီၤ ခရံာ်န့ၣ်တဂ့ၤ. ၇ မ့ၢ်မတၤကလဲၤလီၤဆူ တၢ်ယိာ်ပူၤတဂၤလဲၣ်, ဒ်ပစံးတၢ်အသိး, ဒ်သိးအကဆှၢထီၣ် ခရံာ်လၢတၢ်သံန့ၣ်တဂ့ၤ. ၈ မ့ၢ်အစံးဝဲဒ်လဲၣ်, အကလုၢ်အကထါအိၣ်ဘူးဒီးနၤ, အိၣ်ဝဲလၢနကိာ်ပူၤ, ဒီးလၢနသးကံၢ်ပူၤလီၤ. ဒ်ပစံးတၢ်အသိး, တၢ်အကလုၢ် ဘၣ်ဃးဒီးတၢ်နာ်လၢ ပစံၣ်တဲၤတဲလီၤအီၤလီၤ. ၉ အဂ့ၢ်ဒ်အံၤ, နမ့ၢ်အၢၣ်လီၤအီလီၤ ကစၢ်ယ့ၣ်ၡူးလၢနထးခိၣ်, ဒီးနာ်လၢနသးလၢ ယွၤဒုးဂဲၤဆၢထၢၣ်က့ၤအီၤလၢ တၢ်သံန့ၣ်ဒီး, နကတုၤလၢတၢ်အုၣ်က့ၤခီၣ်က့ၤနၤလီၤ. ၁၀ အဂ့ၢ်ဒ်အံၤ, လၢပသးန့ၣ် ပစူၢ်က့ၤနာ်က့ၤတၢ် တုၤလၢတၢ်တီတၢ်လိၤ, ဒီးလၢပထးခိၣ် ပအၢၣ်လီၤအီလီၤတၢ် တုၤလၢတၢ်အုၣ်က့ၤခီၣ်က့ၤန့ၣ်လီၤ. ၁၁ အဂ့ၢ်ဒ်အံၤ, တၢ်ကွဲးအသးစံးဝဲဒၣ်, ကယဲၢ်ပှၤလၢ အစူၢ်က့ၤနာ်က့ၤအီၤ တဂၤလၢ်လၢ်န့ၣ်, အမဲာ်တဆှးဘၣ်ဝဲဘၣ်. ၁၂ အဂ့ၢ်ဒ်အံၤ, ပှၤယူဒၤဖိဒီးပှၤဟ့းလ့ၣ်ဖိ အတၢ်တလီၤဆီဘၣ်. အဂ့ၢ်ဒ်အံၤ, မ့ၢ်ပှၤခဲလၢာ်အကစၢ်တဂၤဃီ, ဒီးထူးဝဲတီၤဝဲလၢ ကယဲၢ်ပှၤလၢ အကိးထီၣ်အီၤ ခဲလၢာ်အဂီၢ်လီၤ. ၁၃ အဂ့ၢ်ဒ်အံၤ, ကယဲၢ်ပှၤလၢ အကိးထီၣ် ကစၢ်အမံၤန့ၣ်, ကတုၤလၢ တၢ်အုၣ်က့ၤခီၣ်က့ၤအီၤလီၤ. ၁၄ မၤသးဒ်န့ၣ်ဒီး, အဝဲသ့ၣ်ကကိးထီၣ် ပှၤလၢအတနာ်ဘၣ်ဝဲန့ၣ်ဒ်လဲၣ်. ဒီးကနာ်ပှၤလၢ အတနၢ်ဟူဘၣ်ဝဲအဂ့ၢ်န့ၣ်, ဒ်လဲၣ်. ဒီးပှၤမ့ၢ်တစံၣ်တဲၤတဲလီၤဘၣ်ဒီး, ကနၢ်ဟူဝဲဒ်လဲၣ်. ၁၅ ဒီးတၢ်မ့ၢ်တမၢလီၤအီၤဘၣ်ဒီး, ကစံၣ်တဲၤတဲလီၤဝဲဒ်လဲၣ်. ဒ်တၢ်ကွဲးအသးအသိးန့ၣ်, ပှၤလၢအစံၣ်တဲၤတဲလီၤ တၢ်ဃူတၢ်ဖိးအတၢ်သးခုအကစီၣ်, လၢအစံၣ်တဲၤတဲလီၤ တၢ်ဂ့ၤအတၢ်သးခုအကစီၣ်တဖၣ်, အခီၣ်အဃံအလၤဆံးဒိၣ်လဲၣ်.