ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါအ့ဖြ့ၣ် ၁–၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ၁ ကရံၣ်သူး ၇–၉
“တၢ်အိၣ်သဘျ့န့ၣ် မ့ၢ်ဝဲ တၢ်ဟ့ၣ်တခါ”
(၁ ကရံၣ်သူး ၇:၃၂) ဘၣ်ဆၣ်ဒီး ယသးအိၣ်လၢသုသုတအိၣ်ဒီး တၢ်ဘၣ်ယိၣ်ဘၣ်ဘီတဂ့ၤလီၤ. ပှၤလၢအတန့ၢ်ဘၣ်အမါန့ၣ်, ကမၤဘၣ်ကစၢ်အသးဒ်လဲၣ်ဒ်လဲၣ်န့ၣ်, ဘၣ်ယိၣ်တၢ်လၢ အဘၣ်ဃးဒီးကစၢ်အဂ့ၢ်လီၤ.
တၢး၁၁ ၁/၁၅ ကဘျံးပၤ ၁၇-၁၈ အဆၢ ၃
သူနတၢ်အိၣ်သဘျ့လၢ တၢ်ကူၣ်သ့အပူၤတက့ၢ်
၃ ပှၤလၢအိၣ်သဘျ့တဂၤန့ၣ် အတၢ်ဆၢကတီၢ် ဒီးအတၢ်သဘျ့အိၣ်အါန့ၢ် ပှၤလၢအဆီဟံၣ်ဆီဃီတဖၣ်လီၤ. (၁ ကရံၣ်. ၇:၃၂-၃၅) အဝဲသ့ၣ်အိၣ်ဒီး တၢ်ခွဲးတၢ်ယာ်လၢ ကမၤအါထီၣ် တၢ်သးခုကစီၣ်တၢ်မၤ, ကမၤအါထီၣ် အတၢ်အဲၣ်လၢပှၤဂၤအဖီခိၣ် ဒီးအတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤထီၣ်အဂီၢ်လီၤ. လၢတၢ်န့ၣ်အဃိ ခရံာ်ဖိအါဂၤန့ၣ် သ့ၣ်ညါဘၣ်ဝဲ တၢ်ဆိၣ်ဂ့ၤလၢအဟဲခီဖျိ အအိၣ်သဘျ့အဃိ အဝဲသ့ၣ်ဆၢတဲာ်လီၤအသးလၢက “တူၢ်လိာ်” ဝဲလၢကအိၣ်သဘျ့ တစိၢ်တလီၢ်လီၤ. ပှၤအဂၤတနီၤနီၤန့ၣ် တဆိကမိၣ်ဝဲလၢ ကအိၣ်သဘျ့ဘၣ် သနာ်က့ ခီဖျိလၢ အတၢ်အိၣ်သးဆီတလဲအဃိ အဝဲသ့ၣ်ဃ့ဘါထုကဖၣ်လၢ ဘၣ်ဃးဒီးအတၢ်အိၣ်သးအံၤအဂီၢ် ဒီးလၢယဟိဝၤယွၤအတၢ်မၤစၢၤအဃိ အဝဲသ့ၣ်တူၢ်လိာ်ဝဲ တၢ်ဆီတလဲအံၤ ဒီးဆဲးအိၣ်သဘျ့ဝဲလီၤ.—၁ ကရံၣ်. ၇:၃၇, ၃၈.
(၁ ကရံၣ်သူး ၇:၃၃, ၃၄) မ့မ့ၢ်ပှၤလၢအအိၣ်ဒီးအမါန့ၣ်, ကမၤဘၣ်အမါအသး ဒ်လဲၣ်ဒ်လဲၣ်န့ၣ်, ဘၣ်ယိၣ်တၢ်လၢအဘၣ်ဃးလၢ ဟီၣ်ခိၣ်အဂ့ၢ်လီၤ. ၃၄ ပမါဒီးပမုၣ်ကနီၤန့ၣ်, တဒ်သိးလိာ်အသးစ့ၢ်ကီးဘၣ်. ပှၤလၢအဝၤတအိၣ်ဘၣ်န့ၣ်, ဘၣ်ယိၣ်တၢ်လၢ အဘၣ်ဃးဒီး ကစၢ်အဂ့ၢ်, ဒ်သိးအနီၢ်ခိမ့ၢ်ဂ့ၤ, အသးမ့ၢ်ဂ့ၤ, ကစီကဆှံလီၤ. မ့မ့ၢ်ပှၤလၢအအိၣ်ဒီးအဝၤန့ၣ်, ကမၤဘၣ်အဝၤအသးဒ်လဲၣ်ဒ်လဲၣ်ဒီး, ဘၣ်ယိၣ်တၢ်လၢအဘၣ်ဃးဒီး ဟီၣ်ခိၣ်အဂ့ၢ်လီၤ.
တၢး၀၈ ၇/၁၅ ကဘျံးပၤ ၂၇ အဆၢ ၁
လံာ်စီဆှံ အတၢ်ပာ်ဖျါလၢ လံာ်ကရံၣ်သူး
၇:၃၃, ၃၄—ပိာ်မုၣ် မ့တမ့ၢ် ပိာ်ခွါလၢအဆီဟံၣ်ဆီဃီတဖၣ် “ဘၣ်ယိၣ်တၢ်လၢအဘၣ်ဃးလၢ ဟီၣ်ခိၣ်အဂ့ၢ်” န့ၣ်အခီပညီဒ်လဲၣ်. စီၤပီလူး အဲၣ်ဒိးပာ်ဖျါထီၣ်ဝဲ တၢ်ဘၣ်ယိၣ်လၢပှၤလၢ အဆီဟံၣ်ဆီဃီတဖၣ် ထံၣ်ဘၣ်ဝဲလၢ အတၢ်အိၣ်မူအပူၤန့ၣ်လီၤ. တၢ်သ့ၣ်တဖၣ်န့ၣ်မ့ၢ်ဝဲ တၢ်အီၣ်တၢ်အီ, တၢ်ကူတၢ်ကၤ ဒီးတၢ်အိၣ်တၢ်ဆိးအလီၢ်တဖၣ်လီၤ. ဘၣ်ဆၣ် တၢ်သ့ၣ်တဖၣ်အံၤအကျါ တပၣ်ဃုာ်ဒီး ဟီၣ်ခိၣ်အတၢ်တဂ့ၤတဘၣ်တဖၣ်လၢ ခရံာ်ဖိတဖၣ် ကဘၣ်ဟးဆှဲးဝဲန့ၣ်ဘၣ်.—၁ ယိၤ. ၂:၁၅-၁၇.
(၁ ကရံၣ်သူး ၇:၃၇, ၃၈) ဘၣ်ဆၣ်ဒီး ပှၤလၢအလီၢ်တအိၣ်ဘၣ်, ဒီးအိၣ်ဂၢၢ်ဆိးကျၢၤလၢအသး, ဒီးအိၣ်ဒီးအစိအကမီၤလၢအသးဒၣ်ဝဲအဖီခိၣ်, ဒီးစံၣ်ညီၣ်လံတၢ်အံၤလၢအသး, လၢအကဟံးဃာ် အပှၤမုၣ်ကနီၤဒၣ်ဝဲန့ၣ်ဒီး, အဝဲဒၣ်မၤတၢ်ဂ့ၤလီၤ. ၃၈ ဒ်န့ၣ်အသိး, ပှၤလၢအဒုးဖျီအီၤန့ၣ်မၤတၢ်ဂ့ၤဘၣ်ဆၣ်ဒီး, ပှၤလၢအတဒုးဖျီဘၣ်န့ၣ်, မၤတၢ်ဂ့ၤတက့ၢ်လီၤ.
တၢး၉၆ ၁၀/၁၅ ကဘျံးပၤ ၁၂-၁၃ အဆၢ ၁၄
တၢ်အိၣ်သဘျ့—မ့ၢ်တၢ်ခွဲးတၢ်ယာ်လၢ ပကမၤတၢ်လၢ တၢ်သဘျ့အပူၤ
၁၄ ခရံာ်ဖိလၢ အအိၣ်သဘျ့တဂၤမ့ၢ်သူဝဲ အတၢ်အိၣ်သဘျ့အံၤလၢ အနီၢ်ကစၢ်အဖီတၢၣ် အဂီၢ်န့ၣ် တ “ဂ့ၤ” န့ၢ်ဒံးခရံာ်ဖိလၢ အဆီဟံၣ်ဆီဃီတဖၣ်ဘၣ်. မ့ၢ်လၢအဝဲသူဝဲ အတၢ်အိၣ်သဘျ့အံၤလၢ အနီၢ်ကစၢ်အဂီၢ် တမ့ၢ်လၢယွၤ “အဘီအမုၢ်” အဂီၢ်အဃိလီၤ. (မးသဲ ၁၉:၁၂) ပိာ်မုၣ် မ့တမ့ၢ် ပိာ်ခွါလၢ တဆီဟံၣ်ဆီဃီတဖၣ်န့ၣ် ကြၢး “ဘၣ်ယိၣ်တၢ်လၢအဘၣ်ဃးဒီး ကစၢ်အဂ့ၢ်” ဒ်သိး “ကမၤဘၣ်ကစၢ်အသး” ဒီး ‘တၢ်တံာ်မုၢ်တံာ်တာ် သုတအိၣ်လၢ ကမၤကစၢ်ယွၤအတၢ်မၤ’ တဂ့ၤအဂီၢ်လီၤ. အဲၣ်ဒိးစံးဝဲ အဝဲသ့ၣ်ကမၤ ယဟိဝၤယွၤ ဒီးယ့ၣ်ၡူးအတၢ်မၤလၢ အသးဒီဖျၢၣ်န့ၣ်လီၤ. ထဲဒၣ်ခရံာ်ဖိ ပိာ်မုၣ် ဒီးပိာ်ခွါလၢ အမၤဝဲဒ်န့ၣ်တဖၣ်န့ၣ် မၤဝဲ “ဂ့ၤ” န့ၢ်ခရံာ်ဖိလၢ အဆီဟံၣ်ဆီဃီတဖၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ ကရံၣ်သူး ၇:၁၁) ဘၣ်ဆၣ်ဒီး မ့ၢ်လဲၤသဒၣ်ဝဲဒီး, အဝၤတအိၣ်ဘၣ်ဒီးမ်အအိၣ်တက့ၢ်. မ့တမ့ၢ်ဘၣ်ဒီး, မ်အဘၣ်လိာ်က့ၤအသးဒီး အဝၤန့ၣ်တက့ၢ်. ဒီးအဝၤတဂၤန့ၣ် မ်အသုတပာ်မၢ်အမါတဂ့ၤ.
lvs ၂၅၁
တၢ်ဂ့ၢ်လၢလံာ်အကတၢၢ်
တဘျီတခီၣ် ခရံာ်ဖိတဂၤ အသးသမူတံၤသကိး မ့ၢ်တမၤကမၣ်မုၣ်ကမၣ်ခွါ သနာ်က့ အဝဲကဆၢတဲာ်လီၤအသးလၢ ကအိၣ်လီၤဖး ဒီးအသးသမူတံၤသကိးလီၤ. (၁ ကရံၣ်သူး ၇:၁၁) ခရံာ်ဖိတနီၤ ဆၢတဲာ်လီၤအသးလၢ ကအိၣ်လီၤဖးဒီး အသးသမူတံၤသကိးလၢ တၢ်ဂ့ၢ်လၢလာ်တဖၣ်အံၤ အဃိလီၤ.
• ပှၤတဂၤတအဲၣ်ဒိး လုၢ်အီၣ်လုၢ်အီ အဟံၣ်ဖိဃီဖိနီတစဲးဘၣ်. အဒိ ဝၤတဂၤ တအဲၣ်ဒိးလုၢ်အီၣ်လုၢ်အီ အဟံၣ်ဖိဃီဖိလၢ နီၢ်ခိတခီအဃိ အဟံၣ်ဖိဃီဖိ အကျိၣ်စ့ မ့တမ့ၢ် တၢ်အီၣ်တၢ်အီတအိၣ်ဘၣ်.—၁ တံၤမသ့း ၅:၈.
• ပှၤတဂၤမၤဒၢၣ်မၤဆါ အသးသမူတံၤသကိး နးနးကလဲာ်. အဒိ ပှၤတဂၤမၤဒၢၣ်မၤဆါ အသးသမူတံၤသကိး တုၤဒၣ်လဲာ်တၢ်ဘၣ်ယိၣ်အလီၢ်အိၣ်ထီၣ်လၢ အတၢ်အိၣ်ဆူၣ်အိၣ်ချ့ဒီး လၢအသးသမူအဂီၢ်လီၤ.—ကလၤတံ ၅:၁၉-၂၁.
• ပှၤတဂၤကဲထီၣ် တၢ်ဘၣ်ယိၣ်အလီၢ်ဖးဒိၣ် လၢအသးသမူတံၤသကိးအနီၢ်သးအဂီၢ်. အဒိ ဝၤ မ့တမ့ၢ် မါ မ့ၢ်ဂုာ်ကျဲးစၢးတြီ အသးသမူတံၤသကိး တုၤဒၣ်လဲာ် အဝဲဘူၣ်ထီၣ်ဘါထီၣ် ယဟိဝၤယွၤတန့ၢ်လၢၤဘၣ်.—မၤတၢ် ၅:၂၉.
(၁ ကရံၣ်သူး ၇:၃၆) ဘၣ်ဆၣ်ဒီးပှၤတဂၤဂၤ မ့ၢ်ဆိကမိၣ်လၢ အမၤအပှၤမုၣ်ကနီၤ တဂ့ၤ တဘၣ်ဘၣ်, ဒီးအယူာ်အထံးမ့ၢ်တလၢကွံာ်ဒီးတၢ်မ့ၢ်ကြၢးဒ်န့ၣ်ဒီး, မ်အမၤတၢ်ဖဲဒၣ်အသးတက့ၢ်. တမ့ၢ်ဘၣ်အမၤတၢ်ဒဲးဘးဘၣ်. မ်အဝဲသ့ၣ်ဒိးဖျီလိာ်အသးတက့ၢ်.
တၢး၀၀ ၇/၁၅ ကဘျံးပၤ ၃၁ အဆၢ ၂
ဟီၣ်ခိၣ်အံၤပှဲၤဒီး တၢ်သကဲာ်ပဝးတဂ့ၤသနာ်က့ နဆဲးအိၣ်ကဆှီသ့
ပှၤသးစၢ်တဖၣ် ဖဲအတၢ်သးကတၢ ဘၣ်ဃးဒီးတၢ်မံဃုာ်အိၣ်ဃုာ် အိၣ်ထီၣ်ဝဲအခါ အဝဲသ့ၣ်တကြၢး ဆီဟံၣ်ဆီဃီတဘျီဃီဘၣ်. တၢ်ဆီဟံၣ်ဆီဃီန့ၣ် ပၣ်ဃုာ်ဒီး တၢ်အၢၣ်လီၤအီလီၤလိာ်သး တဂၤဒီးတဂၤ ဒီးဒ်သိးကမၤလၢပှဲၤ အတၢ်အၢၣ်လီၤအီလီၤအဂီၢ် ကဘၣ်မ့ၢ်ပှၤလၢအဒိၣ်တုာ်ခိၣ်ပှဲၤလီၤ. (၁ မိၤ. ၂:၂၄) အဝဲသ့ၣ်မ့ၢ်အိၣ်ခိးဝဲတုၤလၢ “အယူာ်အထံးမ့ၢ်တလၢကွံာ်” န့ၣ်ဂ့ၤဝဲလီၤ. မ့ၢ်လၢဖဲသးစၢ် အတၢ်သူၣ်လီသးကွံ ဘၣ်ဃးဒီး တၢ်မံဃုာ်အိၣ်ဃုာ် အသဟီၣ်ဆူၣ်အခါ အဝဲသ့ၣ်ဆၢတဲာ်တၢ်လၢ အကမၣ်သ့အဃိလီၤ. (၁ ကရံၣ်သူး ၇:၃၆) ပှၤလၢအဒိၣ်တုာ်ခိၣ်ပှဲၤတဂၤ အဲၣ်ဒိးဆီဟံၣ်ဆီဃီ သနာ်က့ ဃုထၢဝဲပှၤလၢ အကြၢးဒီးအီၤ မ့ၢ်တဘၣ်ဘၣ် ဒီးအဝဲမ့ၢ်မၤကမၣ်မုၣ်ကမၣ်ခွါန့ၣ် မ့ၢ်ပှၤလၢတအိၣ်ဒီး တၢ်ကူၣ်သ့ဘၣ် ဒီးမၤကမၣ်တၢ်လီၤ.
တၢ်ဖးလံာ်စီဆှံ
(၁ ကရံၣ်သူး ၈:၁-၁၃) ဒီးတၢ်လၢ ပှၤလုၢ်ထီၣ်အီၤလၢ တၢ်ဂီၤအဂ့ၢ်အကျိၤန့ၣ်, ပသ့ၣ်ညါလၢပအိၣ်ဒီးတၢ်သ့ၣ်ညါ ကိးဂၤဒဲးလီၤ. တၢ်သ့ၣ်ညါဒုးအိၣ်ထီၣ်သးကဖၢလၢ, မ့မ့ၢ်တၢ်အဲၣ်တၢ်ကွံန့ၣ် မၤထီၣ်မၤထီတၢ်လီၤ. ၂ ဒီးပှၤတဂၤဂၤမ့ၢ်ဆိကမိၣ် လၢအသ့ၣ်ညါ တၢ်တမံၤမံၤဒီး, ဒ်အကြၢးသ့ၣ်ညါဝဲအသိးန့ၣ်, တသ့ၣ်ညါဒံးဘၣ်တၢ်နီတမံၤဘၣ်. ၃ မ့မ့ၢ်ပှၤတဂၤဂၤ မ့ၢ်အဲၣ်ယွၤဒီး, အဝဲဒၣ်ကဘၣ် တၢ်သ့ၣ်ညါအီၤလၢယွၤလီၤ. ၄ မၤသးဒ်န့ၣ်ဒီးတၢ်အီၣ်လၢပှၤလုၢ်ထီၣ်အီၤလၢတၢ်ဂီၤအဂ့ၢ်န့ၣ်, ပသ့ၣ်ညါလၢ တၢ်ဂီၤတမ့ၢ်ဘၣ် တၢ်နီတမံၤဘၣ်လၢဟီၣ်ခိၣ်ချၢ, ဒီးမ့တမ့ၢ်ဘၣ်ယွၤတဂၤဃီဘၣ်ဒီး, ကစၢ်တအိၣ်ဘၣ်နီတဂၤဘၣ်လီၤ. ၅ အဂ့ၢ်ဒ်အံၤ, လၢမူခိၣ်မ့ၢ်ဂ့ၤ, လၢဟီၣ်ခိၣ်မ့ၢ်ဂ့ၤ, တၢ်လၢပှၤကိးအီၤလၢ ကစၢ်တဖၣ်အိၣ်ဝဲ, ဒ်ယွၤအိၣ်အါဂၤဒီး ကစၢ်အိၣ်အါဂၤအသိးနာ်သက့ဒီး, ၆ မ့မ့ၢ်လၢပဝဲဒၣ်, ပၢ်ယွၤအိၣ် တဂၤဃီ, လၢတၢ်ခဲလၢာ်ကဲထီၣ်လၢအီၤ, ဒီးပအိၣ်ပဝဲလၢအဂီၢ်, ဒီးကစၢ်ယ့ၣ်ၡူးခရံာ်တဂၤဃီ, လၢတၢ်ခဲလၢာ် ကဲထီၣ်လၢအီၤ, ဒီးပကဲထီၣ်လၢအီၤလီၤ. ၇ မ့မ့ၢ်တၢ်သ့ၣ်ညါအံၤတအိၣ်ဘၣ် လၢပှၤကိးဂၤဒဲးအပူၤဘၣ်. ဒီးပှၤတနီၤနီၤတုၤခဲကနံၣ်အံၤ အိၣ်ဝဲဒီးအသးလၢအသ့ၣ်ညါဒၣ်တၢ် ဘၣ်ဃးဒီးတၢ်ဂီၤဒီး, အီၣ်တၢ်ဒ်တၢ်လၢပှၤလုၢ်ထီၣ်အီၤ လၢတၢ်ဂီၤအသိးလီၤ. ဒီးအသးလၢ အသ့ၣ်ညါဒၣ်တၢ်အဂံၢ်စၢ်ဘါစၢ်ဒီး, ဘၣ်အၢဝဲလီၤ. ၈ ဘၣ်ဆၣ်ဒီးတၢ်အီၣ် တပာ်ဂ့ၤဘၣ်ပှၤလၢယွၤအမဲာ်ညါဘၣ်. အဂ့ၢ်ဒ်အံၤ, ပမ့ၢ်အီၣ်ဒီး, ပတဂ့ၤထီၣ်ဘၣ်, ပမ့ၢ်တအီၣ်ဘၣ်ဒီး, ပတအၢလီၤဘၣ်. ၉ ဘၣ်ဆၣ်ဒီး ဒ်သိးသုစိသုကမီၤအံၤ, သုတကဲထီၣ်လၢ တၢ်လီၤဃံၤအလီၢ်လၢ ပှၤဂံၢ်စၢ်ဘါစၢ်တဂ့ၤဒီး, ပလီၢ်သုသးတက့ၢ်. ၁၀ အဂ့ၢ်ဒ်အံၤ, ပှၤတဂၤဂၤမ့ၢ်ထံၣ်နၤ, လၢအအိၣ်ဒီးတၢ်သ့ၣ်ညါတဂၤ, ဆ့ၣ်နီၤအီၣ်တၢ်လၢတၢ်ဂီၤအဟံၣ်ပူၤဒီး, ပှၤလၢအဂံၢ်စၢ်အဘါစၢ်တဂၤန့ၣ်, အသးလၢအသ့ၣ်ညါဒၣ်တၢ်, ကကျၢၤထီၣ်တုၤအကအီၣ်တၢ်လၢ ပှၤလုၢ်ထီၣ်အီၤလၢတၢ်ဂီၤ, တမ့ၢ်ဘၣ်ဧါ. ၁၁ ဒီးမ့ၢ်နတၢ်သ့ၣ်ညါအဃိဒီး, နဒီပုၢ်ဝဲၢ်လၢ အဂံၢ်စၢ်ဘါစၢ်, လၢခရံာ်ဒိးသံအသးလၢ အဂီၢ်တဂၤ, ကဟးဂီၤလီၤ. ၁၂ တုၤသုမၤကမၣ်သုဒီပုၢ်ဝဲၢ်ဒ်န့ၣ်, ဒီးမၤဆါအသးလၢအသ့ၣ်ညါဒၣ်တၢ်, လၢအဂံၢ်စၢ်ဘါစၢ်န့ၣ်ဒီး, သုမၤကမၣ်ခရံာ်လီၤ. ၁၃ မၤသးဒ်န့ၣ်ဒီး တၢ်အီၣ် မ့ၢ်ဒုးလီၤကမၣ်ယဒီပုၢ်ဝဲၢ်ဒီး, တစိၤဒၣ်ယၤယတအီၣ်လၢၤဘၣ်တၢ်ညၣ်, ဒ်သိးယဒီပုၢ်ဝဲၢ်သုတလီၤကမၣ်တၢ်တဂ့ၤလီၤ.
တၢး၁၂ ၁၁/၁၅ ကဘျံးပၤ ၂၀
ပှၤလၢအဆၢတဲာ်လီၤအသးလၢ ကအိၣ်သဘျ့တဖၣ်န့ၣ် အခီပညီ အဝဲသ့ၣ်ဒိးန့ၢ်ဘၣ်တၢ်ဟ့ၣ် အလီၤဆီလၢကအိၣ်သဘျ့အဂီၢ်ဧါ.
ဆိကမိၣ်ကွၢ် တၢ်ဂ့ၢ် ဖဲယ့ၣ်ၡူးတဲဝဲ ဘၣ်ဃးဒီး တၢ်အိၣ်သဘျ့အခါတက့ၢ်. ဖဲပှၤဖၤရံၤၡဲတဖၣ် ဟဲလၢယ့ၣ်ၡူးအအိၣ် ဒီးတဲဝဲဘၣ်ဃးဒီး တၢ်မၤပတုာ်ကွံာ် တၢ်ဆီဟံၣ်ဆီဃီအခါ ယ့ၣ်ၡူးတဲနၢ်ပၢၢ်အဝဲသ့ၣ် ယဟိဝၤယွၤ အတၢ်သိၣ်တၢ်သီလၢဘၣ်ဃးဒီး တၢ်ဆီဟံၣ်ဆီဃီအဂီၢ်န့ၣ်လီၤ. တၢ်သိၣ်တၢ်သီအိၣ်လၢ မါတဂၤမ့ၢ်မၤဘၣ် “တၢ်ဘၣ်အၢတမံၤမံၤ” န့ၣ် အဝၤကွဲးန့ၢ်အီၤ လံာ်လီၤဖှၣ်သ့သနာ်က့ လၢအခီၣ်ထံးန့ၣ် တမ့ၢ်ဒ်န့ၣ်ဘၣ်. (၅ မိၤ. ၂၄:၁, ၂) ယ့ၣ်ၡူးတဲဝဲလၢ “ဖဲဒၣ်ပှၤလၢအပာ်မၢ်ကွံာ်အမါလၢ အတမ့ၢ်ဘၣ် တၢ်အဲၣ်ဘၢဝၤအဃိဘၣ်, ဒီးအိၣ်ဃုာ်ဒီးပိာ်မုၣ်လၢ အဂၤတဂၤဂၤန့ၣ် မ့ၢ်အအဲၣ်ဘၢမါလီၤ. ဒီးပှၤလၢအအိၣ်ဃုာ်ဒီး ပိာ်မုၣ်လၢ အဘၣ်တၢ်ပာ်မၢ်ကွံာ်အီၤန့ၣ်, မၤကမၣ်ပှၤမါလီၤ.”—မး. ၁၉:၃-၉.
ဖဲယ့ၣ်ၡူး တဲဝဲဒ်အံၤအခါ အပျဲၢ်အဘီၣ်တဖၣ်တဲဝဲလၢ “တၢ်လၢပှၤကညီအိၣ်ဒီးအမါန့ၣ် မ့ၢ်မၤအသးဒ်န့ၣ်ဒီး, ပှၤတဂ့ၤန့ၢ်မါန့ၢ်ဝၤဘၣ်လီၤ.” ဖဲန့ၣ်အဆၢကတီၢ် ယ့ၣ်ၡူးတဲဆၢက့ၤဝဲလၢ “တၢ်ကတိၤတထံၣ်အံၤ, ပှၤတူၢ်လိာ်တသ့ဘၣ်ခဲလၢာ်ဘၣ်, တူၢ်လိာ်ဝဲသ့ထဲပှၤလၢ တၢ်ဟ့ၣ်တူၢ်လိာ်အီၤ တဖၣ်ဧိၤလီၤ. အဂ့ၢ်ဒ်အံၤ, ပှၤတနီၤနီၤမ့ၢ်ပှၤဒ့ဒံၣ်လၢ အမိၢ်အဟၢဖၢပူၤလံၤလံၤ, ဒီးတနီၤနီၤကဲထီၣ်ပှၤဒ့ဒံၣ်လၢ ပှၤကညီအစုပူၤ, ဒီးတနီၤနီၤမၤဒၣ်အသးလၢပှၤဒ့ဒံၣ်, လၢမူခိၣ်အဘီအမုၢ် အဃိလီၤ. ပှၤလၢအတူၢ်လိာ်သ့, ကတူၢ်လိာ်ဒၣ်ဝဲတက့ၢ်.”—မး. ၁၉:၁၀-၁၂.
တၢ်ကတိၤလၢအမ့ၢ် ပှၤဒ့ဒံၣ်န့ၣ် မ့ၢ်ပှၤလၢအိၣ်ဒီးတၢ်ဂံၢ်စၢ်ဘါစၢ် ဖဲအိၣ်ဖျဲၣ်ထီၣ်လံၤလံၤ, ဘၣ်ဒိသတူၢ်ကလာ်အဃိ မ့တမ့ၢ် မ့ၢ်ပှၤဒ့ဒံၣ်ဖိလၢအသးဒၣ်ဝဲတဖၣ်လီၤ. ဘၣ်ဆၣ် တနီၤန့ၣ် တဒ့ဒံၣ်သနာ်က့ အဲၣ်ဒိးအိၣ်မူဝဲဒ် ပှၤဒ့ဒံၣ်ဖိအသိးလီၤ. အဝဲသ့ၣ် အိၣ်ဒီးတၢ်ခွဲးတၢ်ယာ်လၢ ကဆီဟံၣ်ဆီဃီသနာ်က့ ပၢၤအသး ဒီးအိၣ်သဘျ့လၢ “မူခိၣ်အဘီအမုၢ်” အဂီၢ်လီၤ. ဒ်ယ့ၣ်ၡူးအသိး အဝဲသ့ၣ်ဃုထၢဝဲလၢ ကအိၣ်သဘျ့ ဒီးဟ့ၣ်လီၤအသးလၢ ဘီမုၢ်တၢ်မၤအဂီၢ်လီၤ. အဝဲသ့ၣ်တဟဲအိၣ်ဖျဲၣ်ထီၣ်ဃုာ်ဒီး တၢ်ဟ့ၣ်လၢအမ့ၢ် တၢ်အိၣ်သဘျ့ဘၣ် ဒီးတမ့ၢ်စ့ၢ်ကီး တၢ်ဟ့ၣ်လီၤဆီလၢအဝဲသ့ၣ်အဂီၢ်ဘၣ်. မ့ၢ်လၢအဝဲသ့ၣ် တူၢ်လိာ်ဝဲန့ၢ်အဃိလီၤ. ပမ့ၢ်တဲလၢကျဲအဂၤတမံၤန့ၣ် အဝဲသ့ၣ်တူၢ်လိာ်ဝဲဒ်အမ့ၢ် တၢ်ဟ့ၣ်တခါအသိးလီၤ.
စီၤပီလူး ယၢၤထီၣ်ဝဲ ယ့ၣ်ၡူးအတၢ်ကတိၤ ဒီးတဲဝဲလၢ ခရံာ်ဖိလၢ အအိၣ်သဘျ့မ့ၢ်ဂ့ၤ အဆီဟံၣ်ဆီဃီတဖၣ်မ့ၢ်ဂ့ၤ မၤယွၤအတၢ်မၤသ့လီၤ. ပှၤလၢအပာ်လီၤအသးလၢ ကအိၣ်သဘျ့တဖၣ်န့ၣ် “မၤတၢ်ဂ့ၤတက့ၢ်လီၤ.” လၢကျဲဒ်လဲၣ်. ပှၤလၢအဆီဟံၣ်ဆီဃီတဖၣ် ဒ်သိးအဝဲသ့ၣ် ကလူၤဘၣ် အသးသမူတံၤသကိး အတၢ်ဘၣ်သး, ကကဟုကယာ်အီၤအဂီၢ် ဘၣ်သူဝဲအတၢ်ဆၢကတီၢ် ဒီးအဂံၢ်အဘါလီၤ. မ့မ့ၢ်ပှၤလၢအအိၣ်သဘျ့တဖၣ် တအိၣ်ဒီးမူဒါဒ်အံၤအဃိ မၤအါထီၣ်ကစၢ်ယွၤအတၢ်မၤန့ၢ်ဝဲလီၤ. အဝဲသ့ၣ်အတၢ်အိၣ်သးန့ၣ် တူၢ်လိာ်ဝဲဒ်အမ့ၢ် “တၢ်ဟ့ၣ်” တခါလၢ အဟဲလၢယွၤအအိၣ်လီၤ.—၁ ကရံၣ်. ၇:၇, ၃၂-၃၈.
လံာ်စီဆှံပာ်ဖျါထီၣ်ဝဲလၢ ခရံာ်ဖိတဂၤ တဒိးန့ၢ်ဘၣ်တၢ်ဟ့ၣ်လၢအမ့ၢ် တၢ်အိၣ်သဘျ့အံၤ လၢတၢ်လီၤလိၢ်လီၤလးအပူၤဘၣ်. လၢတၢ်န့ၣ်အလီၢ် ဒ်သိးတၢ်တံာ်တာ်သုတအိၣ်တဂ့ၤ ဒီးဆဲးမၤအါထီၣ် ဘီမုၢ်တၢ်မၤကန့ၢ်အဂီၢ် အဝဲပာ်လီၤအသးလၢ ကအိၣ်သဘျ့ ဒီးတဆီဟံၣ်ဆီဃီဘၣ်. မုၢ်မဆါတနံၤအံၤစ့ၢ်ကီး ခီဖျိလၢ တၢ်ဂ့ၢ်တဖၣ်အံၤအဃိ ပှၤအါဂၤန့ၣ် တူၢ်လိာ်ဝဲလၢကအိၣ်သဘျ့လီၤ. အဃိပှၤအဂၤတဖၣ် ကြၢးဟ့ၣ်ဂံၢ်ဟ့ၣ်ဘါ ပှၤလၢအအိၣ်သဘျ့တဖၣ်လီၤ.
လါအ့ဖြ့ၣ် ၈–၁၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကရံၣ်သူး ၁၀–၁၃
“ယဟိဝၤယွၤန့ၣ် အကလုၢ်တီ”
(၁ ကရံၣ်သူး ၁၀:၁၃) တမ့ၢ်ဘၣ်သုဘၣ်တၢ်လ့ပစီလၢ အတဘၣ်ဒံးဘၣ် ပှၤကညီဘၣ်. ဒီးယွၤမၤဝဲ အကလုၢ်တီသတးဒီး, တၢ်လ့ပစီလၢအဆူၣ်ကဲၣ်ဆိး, လၢသုဒိးတကဲဘၣ်န့ၣ်, တဒုးဒိးဘၣ်သုဘၣ်. မ့မ့ၢ်လၢတၢ်လ့ပစီအပူၤ, ကမၤထီၣ်ကျဲဒ်သိးသုကပူၤဖျဲးလၢအီၤလီၤ.
ပှၤဖးလံာ်ဖိတဖၣ် အတၢ်သံကွၢ်
တၢ်မၢဖိပီလူးကွဲးဝဲလၢ “တၢ်လ့ပစီလၢအဆူၣ်ကဲၣ်ဆိး, လၢသုဒိးတကဲဘၣ်န့ၣ်” ယဟိဝၤယွၤ“တဒုးဒိးဘၣ်သုဘၣ်.” (၁ ကရံၣ်သူး ၁၀:၁၃) လံာ်စီဆှံတဆၢအံၤ အဲၣ်ဒိးတဲဝဲလၢ ယဟိဝၤယွၤ ဃုထၢဆိပာ်ဝဲတၢ်မၤကွၢ် လၢပဂီၢ်လၢပတူၢ်အီၤကဲ လၢပကဘၣ်ကွၢ်ဆၢၣ်မဲာ်ဘၣ်အီၤန့ၣ်ဧါ.
▪ တၢ်ကတိၤအံၤမ့မ့ၢ် အမ့ၢ်အတီန့ၣ် ပတၢ်အိၣ်မူကဘၣ်ဒိဒ်လဲၣ်, ဆိကမိၣ်ကွၢ်တၢ်အဒိတခါတက့ၢ်. အဒိ, ဒီပုၢ်ဝဲၢ်ခွါတဂၤ အဖိခွါမၤသံလီၤအသးလီၤ. ဖဲန့ၣ်ပၢ်အံၤအသးကဘၣ်ဒိဝဲဒိၣ်မးလီၤ. ဒီးအဝဲကဆိကမိၣ်ဝဲလၢ မ့ၢ်ယဟိဝၤယွၤ ကွၢ်ဝဲတၢ်ကမၤအသးခါဆူညါ ဒီးဃုထၢပာ်ဝဲလၢ အီၤဒီးအမါကဘၣ်တူၢ်ဝဲတၢ်သူၣ်အုးသးအုးဧါန့ၣ်လီၤ. လၢမုၢ်နံၤခံကတၢၢ်အံၤအပူၤ ပဝဲအါဂၤ ပထံၣ်ဘၣ်တၢ်သူၣ်အုးသးအုးအါမံၤလီၤ. လၢတၢ်န့ၣ်အဃိ မ့ၢ်ပကြၢးနာ်လၢ ယဟိဝၤယွၤဃုထၢဆိပာ်ဝဲ တၢ်လၢကဟဲကဲထီၣ်အသးလၢ ပတၢ်အိၣ်မူအပူၤခဲလၢာ်န့ၣ်ဧါ.
ဖဲပသမံသမိးကွၢ် ၁ ကရံၣ်သူး ၁၀:၁၃ အခါ ပကထံၣ်ဘၣ်လၢ လံာ်စီဆှံတပာ်ဖျါဝဲလၢ ယဟိဝၤယွၤ ဃုထၢဆိပာ်ဝဲတၢ်မၤကွၢ် လၢပဂီၢ်လၢပကဘၣ်ကွၢ်ဆၢၣ်မဲာ်အီၤန့ၣ်ဘၣ်. ဘၣ်မနုၤအဃိ ပတဲဒ်န့ၣ်သ့လဲၣ်. ပကသမံသမိးကွၢ်တၢ်ဂ့ၢ်လွံၢ်ထံၣ်လီၤ.
တၢ်ဂ့ၢ်တၢတထံၣ်န့ၣ်, ယဟိဝၤယွၤဟ့ၣ်လီၤပှၤဟီၣ်ခိၣ်ဖိ တၢ်ခွဲးတၢ်ယာ်လၢ ကဃုထၢတၢ်လၢ တၢ်သဘျ့အပူၤလီၤ. အဝဲအဲၣ်ဒိးလၢ ပမၤတၢ်ဆၢတဲာ်လၢ ပနီၢ်ကစၢ်လီၤ. (၅ မိၤၡ့ ၃၀:၁၉, ၂၀; ယိၤၡူ ၂၄:၁၅) ပမ့ၢ်မၤတၢ်ဆၢတဲာ်လၢ အဘၣ်ယဟိဝၤယွၤအသးန့ၣ် ပခိးကွၢ်လၢ်ယွၤအတၢ်ဟံးစုနဲၣ်ကျဲသ့ဝဲလီၤ. (ကတိၤဒိ ၁၆:၉) ဘၣ်ဆၣ် ပမ့ၢ်မၤတၢ်ဆၢတဲာ်လၢကမၣ်န့ၣ် ပကဘၣ်တူၢ်ဘၣ်တၢ်လၢ အဟဲကဲထီၣ်အသးလၢ ပတၢ်ဆၢတဲာ်အဃိလီၤ. (ကလၤတံ ၆:၇) လၢတၢ်န့ၣ်အဃိ ယဟိဝၤယွၤမ့ၢ် ဃုထၢန့ၢ်ပှၤတၢ်လၢပကဘၣ်တူၢ်န့ၣ် မ့ၢ်ပအိၣ်ဒီး တၢ်ဃုထၢတၢ်လၢတၢ်သဘျ့နီၢ်နီၢ်ဒံးဧါ.
ခံထံၣ်တထံၣ်န့ၣ်, ယဟိဝၤယွၤတဒီသဒၢပှၤလၢ တၢ်ကီတၢ်ခဲလၢ အဟဲကဲထီၣ်အသးခီဖျိ “တၢ်ဘၣ်အတီၤ” အဃိဘၣ်. (စံၣ်တဲၤတဲလီၤတၢ် ၉:၁၁) ဘၣ်သ့ၣ်သ့ၣ်ပှၤတဂၤ ကဘၣ်ဒိဘၣ်ထံးလၢ တၢ်ဘၣ်အတီၤအဃိလီၤ. အဒိယ့ၣ်ၡူးတဲဝဲတၢ်ဂ့ၢ်ဘၣ်ဃး ပှၤ ၁၈ ဂၤသံဝဲလၢ တၢးလီၤပှီၢ်ဘၣ်အဝဲသ့ၣ်အဃိန့ၣ်လီၤ. အဝဲတဲဖျါဝဲလီၤတံၢ်လီၢ်ဆဲးလၢ အဝဲသ့ၣ်သံန့ၣ် တမ့ၢ်လၢယွၤအဃိဘၣ်. (လူၤကၣ် ၁၃:၁-၅) လၢတၢ်န့ၣ်အဃိ တချုးလၢ တၢ်လၢအလီၤသူၣ်အုးသးအုးကဲထီၣ်အသးဒံးအခါ ပတဲလၢ ယွၤဆၢတဲာ်ပာ်စၢၤဝဲလၢ မတၤကဘၣ်သံလဲၣ် ဒီးမတၤကဘၣ်မူလဲၣ်န့ၣ် တသ့ဝဲဘၣ်.
သၢထံၣ်တထံၣ်န့ၣ်, ပဝဲတဂၤစုာ်စုာ် ပကဘၣ်အိၣ်တီအိၣ်လိၤ ဒီးယဟိဝၤယွၤလီၤ. မုၣ်ကီၤလံၢ်တဲဝဲလၢ ယဟိဝၤယွၤအခ့အပှၤတဖၣ် မၤယွၤအတၢ်မၤမ့ၢ်လၢ တၢ်လၢယွၤဟ့ၣ်အဝဲသ့ၣ်တဖၣ်အဃိလီၤ. မုၣ်ကီၤလံၢ်ဒုၣ်ဒွဲၣ်ဝဲလၢ ပမ့ၢ်ဘၣ်ကွၢ်ဆၢၣ်မဲာ်ဒီးတၢ်မၤကွၢ်တဖၣ်န့ၣ် ပတတီဒီးယွၤလၢၤဘၣ်. (ယိၤဘး ၁:၉-၁၁; ၂:၄; လီၣ်ဖျါ ၁၂:၁၀) ယဟိဝၤယွၤမ့ၢ် ဒီသဒၢပှၤဒ်သိး ပသုတထံၣ်ဘၣ် တၢ်မၤကွၢ်တနီၤတဂ့ၤအဂီၢ်န့ၣ် ကဖျါလၢ မုၣ်ကီၤလံၢ်တဲတၢ်န့ၣ်ဘၣ်ဝဲလီၤ.
လွံၢ်ထံၣ်တထံၣ်န့ၣ်, ယဟိဝၤယွၤတဃုထၢဝဲလၢ အကသ့ၣ်ညါဆိတၢ်ကမၤအသး ဒီးပှၤလၢခါဆူညါခဲလၢာ်ဘၣ်. ယဟိဝၤယွၤ မ့ၢ်အဲၣ်ဒိးဃုထၢဝဲလၢ ကသ့ၣ်ညါဆိ တၢ်ကမၤအသးလၢ ခါဆူညါခဲလၢာ်န့ၣ်သ့ဝဲလီၤ. (ယၡါယၤ ၄၆:၁၀) ဘၣ်ဆၣ် လံာ်စီဆှံပာ်ဖျါန့ၢ်ပှၤလၢ အဝဲတဃုထၢဝဲလၢ ကသ့ၣ်ညါတၢ်လၢခါဆူညါခဲလၢာ်ဘၣ်. (၁ မိၤၡ့ ၁၈:၂၀, ၂၁; ၂၂:၁၂) ယဟိဝၤယွၤန့ၣ် ပှဲၤဝဲဒီးတၢ်အဲၣ်တၢ်ကွံဒီး တီဝဲလိၤဝဲအဃိ ပျဲဝဲပဝဲဒၣ်တဂၤစုာ်စုာ်ကမၤတၢ်ဆၢတဲာ်လၢတၢ်သဘျ့အပူၤလီၤ.—၅ မိၤၡ့ ၃၂:၄; ၂ ကရံၣ်သူး ၃:၁၇.
မ့မ့ၢ်ဒ်န့ၣ်န့ၣ် စီၤပီလူးအတၢ်ကတိၤလၢ အတဲဝဲလၢ “တၢ်လ့ပစီလၢ အဆူၣ်ကဲၣ်ဆိး, လၢသုဒိးတကဲဘၣ်န့ၣ်” ယဟိဝၤယွၤ “တဒုးဒိးဘၣ်သုဘၣ်” အဲၣ်ဒိးစံးဝဲအခီပညီဒ်လဲၣ်. ဖဲအံၤ စီၤပီလူးအဲၣ်ဒိးတဲဝဲလၢ ဖဲပဘၣ်ကွၢ်ဆၢၣ်မဲာ်ဒီးတၢ်မၤကွၢ်အဖၢမုၢ်န့ၣ် ယဟိဝၤယွၤကမၤန့ၢ်ပှၤတၢ်မနုၤလဲၣ်န့ၣ်လီၤ. တအဲၣ်ဒိးတဲဝဲလၢ တချုးလၢပထံၣ်ဘၣ်တၢ်မၤကွၢ်အခါန့ၣ်ဘၣ်. ပမ့ၢ်နာ်န့ၢ်ယဟိဝၤယွၤန့ၣ် ပမ့ၢ်ထံၣ်ဘၣ်တၢ်မၤကွၢ်ဒ်လဲၣ်ဂ့ၤဒ်လဲၣ်ဂ့ၤ ဒ်သိးပတူၢ်ကန့ၢ်အဂီၢ် ယဟိဝၤယွၤကမၤစၢၤပှၤလီၤ. (စံးထီၣ်ပတြၢၤ ၅၅:၂၂) ခဲအံၤ ပကတဲသကိးတၢ်ဂ့ၢ်ခံခါလၢ ဘၣ်မနုၤအဃိစီၤပီလူးတဲဝဲဒ်အံၤန့ၣ်လဲၣ်.
တၢ်ဂ့ၢ်အဆိကတၢၢ်တထံၣ်န့ၣ်, တၢ်မၤကွၢ်လၢ ပထံၣ်ဘၣ်တဖၣ်န့ၣ် တမ့ၢ်တၢ်မၤကွၢ်အသီလၢအ “တဘၣ်ဒံးဘၣ် ပှၤကညီ” တဖၣ်ဘၣ်. မ့ၢ်လၢ ပအိၣ်မူဘၣ်လၢ မုၣ်ကီၤလံၢ်အတၢ်ပၢအဖီလာ်အဃိ ပကထံၣ်ဘၣ် တၢ်ကီတၢ်ခဲ ဒီးတၢ်သူၣ်အုးသးအုးန့ၣ်လီၤ. ဘၣ်ဆၣ်ပမ့ၢ်ဒိးသန့ၤထီၣ်ပသးလၢ ယဟိဝၤယွၤန့ၣ် တၢ်မၤကွၢ်လၢပဘၣ်ကွၢ်ဆၢၣ်မဲာ်တဖၣ်, ပတူၢ်ကကဲဒီး ပဆဲးတီဒီးယွၤသ့ဝဲလီၤ. (၁ ပ့းတရူး ၅:၈, ၉) ဖဲ ၁ ကရံၣ်သူးအဆၢဒိၣ် ၁၀ န့ၣ် စီၤပီလူးပာ်ဖျါထီၣ်ဝဲ တၢ်မၤကွၢ်တနီၤလၢ ပှၤအံၣ်စရ့လးဖိတဖၣ်ကွၢ်ဆၢၣ်မဲာ်ဘၣ်ဝဲ ဖဲအအိၣ်လၢ ပှၢ်မုၢ်ကနၢအခါန့ၣ်လီၤ. (၁ ကရံၣ်သူး ၁၀:၆-၁၁) ပှၤလၢ သန့ၤအသးလၢ ယဟိဝၤယွၤန့ၣ်တူၢ်ဝဲတၢ်မၤကွၢ်တဖၣ် ကဲဝဲလီၤ. ဘၣ်ဆၣ်ပှၤအံၣ်စရ့လးဖိတနီၤန့ၣ် တဒိကနၣ်ယဟိဝၤယွၤအကလုၢ်ဘၣ်. ဒီးမ့ၢ်လၢ အဝဲသ့ၣ် တဒိးသန့ၤအသးလၢယဟိဝၤယွၤအဃိ တတီဒီးယဟိဝၤယွၤလၢၤဘၣ်.
တၢ်ဂ့ၢ်ခံထံၣ်တထံၣ်န့ၣ် ယဟိဝၤယွၤ မ့ၢ် “ကစၢ်လၢအကလုၢ်တီ” လီၤ. တၢ်အံၤအဲၣ်ဒိးစံးဝဲအခီပညီဒ်လဲၣ်. ပမ့ၢ်ကွၢ်လၢ တၢ်စံၣ်စိၤတဲစိၤအပူၤန့ၣ် ပသ့ၣ်ညါဘၣ်လၢ ယဟိဝၤယွၤမၤစၢၤဝဲ အခ့အပှၤလၢညါတဖၣ်ဒ်လဲၣ်န့ၣ်လီၤ. ပသ့ၣ်ညါဘၣ်လၢ “ပှၤလၢအအဲၣ်အီၤဒီး တိၢ်န့ၢ်အတၢ်မၤလိာ်တဖၣ်” န့ၣ်ယဟိဝၤယွၤမၤစၢၤအဝဲသ့ၣ် လၢတၢ်သးတီအပူၤလီၤ. (၅ မိၤၡ့ ၇:၉) ပသ့ၣ်ညါဘၣ်လၢ ယဟိဝၤယွၤန့ၣ် တီဒီးအတၢ်အၢၣ်လီၤထီဘိလီၤ. (ယိၤၡူ ၂၃:၁၄) ပနာ်သ့သပှၢ်ကတၢၢ်လၢ (၁) တၢ်မၤကွၢ်လၢ ပတူၢ်ဘၣ်တဖၣ်န့ၣ် ယဟိဝၤယွၤ တဟ့ၣ်အခွဲးလၢ အကကီထီၣ်တုၤဒၣ်လဲာ် ပတူၢ်အီၤတကဲလၢၤဘၣ်ဒီး (၂) အဝဲ “ကမၤထီၣ်ကျဲ” လၢပဂီၢ်လီၤ.
ယဟိဝၤယွၤ “ကမၤထီၣ်ကျဲ” လၢပှၤလၢ ဒိးသန့ၤထီၣ်အသးလၢ အီၤတဖၣ်အဂီၢ်ဒ်လဲၣ်. ပမ့ၢ်တဲတီတီန့ၣ် အဝဲမၤလီၤမၢ်ကွံာ် တၢ်မၤကွၢ်တခါဂ့ၤတခါဂ့ၤသ့ဝဲလီၤ. ဘၣ်ဆၣ်သ့ၣ်နီၣ်ထီၣ် စီၤပီလူးအတၢ်ကတိၤလၢအမ့ၢ် ယဟိဝၤယွၤ “ကမၤထီၣ်ကျဲ ဒ်သိးသုကပူၤဖျဲး” အဂီၢ်လီၤ. ညီနုၢ်ယဟိဝၤယွၤမၤထီၣ်န့ၢ်ပှၤကျဲ ခီဖျိမၤဆူၣ်ထီၣ်ပဂံၢ်ပဘါဒ်သိး ပဆဲးတီဒီးအီၤကန့ၢ်အဂီၢ်လီၤ. ပကတဲသကိးကျဲတနီၤလၢ အဝဲမၤဆူၣ်ထီၣ်ပဂံၢ်ပဘါန့ၣ်လီၤ.
▪ ယဟိဝၤယွၤ “မၤမုာ်ထီၣ်ပှၤလၢ ပတၢ်နးတၢ်ဖှီၣ် ခဲလၢာ်အပူၤ” လီၤ. (၂ ကရံၣ်သူး ၁:၃, ၄) ယဟိဝၤယွၤ ကမၤမုာ်ထီၣ်က့ၤပသး, ပတၢ်တူၢ်ဘၣ် ဒီးကမၤလီၤစှၤပတၢ်ဘၣ်ယိၣ်ဘၣ်ဘှီ ခီဖျိ အကလုၢ်ကထါလံာ်စီဆှံ, အသးစီဆှံဒီး အကုၢ်အပှၤလၢ အကလုၢ်တီန့ၣ်လီၤ.—မးသဲ ၂၄:၄၅; ယိၤဟၣ် ၁၄:၁၆, ရိမ့ၤ ၁၅:၄.
▪ ယဟိဝၤယွၤသူဝဲအသးစီဆှံ ဒ်သိးကဟံးစုနဲၣ်ကျဲပှၤန့ၣ်လီၤ. (ယိၤဟၣ် ၁၄:၂၆) သးစီဆှံကမၤစၢၤပှၤဒ်သိး ပကသ့ၣ်နီၣ်ထီၣ်လံာ်စီဆှံ အတၢ်ဂ့ၢ်တၢ်ကျိၤဒီး အတၢ်ဟံးစုနဲၣ်ကျဲ ဒ်သိးပကမၤတၢ်ဆၢတဲာ်လၢ အအိၣ်ဒီးတၢ်ကူၣ်သ့န့ၣ်လီၤ.
▪ ယဟိဝၤယွၤသူဝဲ အမူခိၣ်ကလူးလၢ ကမၤစၢၤပှၤအဂီၢ် သ့ဝဲလီၤ.—ဧ့ၤဘြံၤ ၁:၁၄.
▪ ယဟိဝၤယွၤသူဝဲ ဒီပုၢ်ဝဲၢ်မုၣ် ဒီးဒီပုၢ်ဝဲၢ်ခွါလၢ ကမၤစၢၤပှၤသ့ဝဲစ့ၢ်ကီးလီၤ. အဝဲသ့ၣ်အတၢ်စံးတၢ်ကတိၤဒီး အတၢ်မၤစၢၤတဖၣ်န့ၣ် မၤဆူၣ်ထီၣ်ပဂံၢ်ပဘါလီၤ.—ကလီးစဲ ၄:၁၁.
လၢတၢ်န့ၣ်အဃိ ပန့ၢ်ဘၣ်တၢ်မၤလိလၢ စီၤပီလူး အတၢ်ကတိၤဖဲ ၁ ကရံၣ်သူး ၁၀:၁၃ န့ၣ်ဒ်လဲၣ်. ယဟိဝၤယွၤ တဃုထၢဆိဝဲ တၢ်မၤကွၢ်လၢ ပကဘၣ်ကွၢ်ဆၢၣ်မဲာ်န့ၣ်ဘၣ်. ဘၣ်ဆၣ် ပနာ်သ့သပှၢ်ကတၢၢ်လၢ ဖဲပဘၣ်ကွၢ်ဆၢၣ်မဲာ်ဒီး တၢ်မၤကွၢ်အခါ ပမ့ၢ်ဒိးသန့ၤထီၣ်ပသးလၢ ယဟိဝၤယွၤန့ၣ် ပလဲၤခီဖျိတၢ်မၤကွၢ်ကန့ၢ်လီၤ. တကးဒံးဘၣ် ပနာ်သ့သပှၢ်ကတၢၢ်လၢ ဖဲပဘၣ်ကွၢ်ဆၢၣ်မဲာ်ဒီး တၢ်မၤကွၢ်အခါ ယဟိဝၤယွၤကအိးဟိထီၣ်န့ၢ်ပှၤကျဲ ဒ်သိးပဆဲးတီဒီးအီၤကသ့အဂီၢ်လီၤ.
(၁ ကရံၣ်သူး ၁၀:၁၃) တမ့ၢ်ဘၣ်သုဘၣ်တၢ်လ့ပစီလၢ အတဘၣ်ဒံးဘၣ် ပှၤကညီဘၣ်. ဒီးယွၤမၤဝဲ အကလုၢ်တီသတးဒီး, တၢ်လ့ပစီလၢအဆူၣ်ကဲၣ်ဆိး, လၢသုဒိးတကဲဘၣ်န့ၣ်, တဒုးဒိးဘၣ်သုဘၣ်. မ့မ့ၢ်လၢတၢ်လ့ပစီအပူၤ, ကမၤထီၣ်ကျဲဒ်သိးသုကပူၤဖျဲးလၢအီၤလီၤ.
(၁ ကရံၣ်သူး ၁၀:၁၃) တမ့ၢ်ဘၣ်သုဘၣ်တၢ်လ့ပစီလၢ အတဘၣ်ဒံးဘၣ် ပှၤကညီဘၣ်. ဒီးယွၤမၤဝဲ အကလုၢ်တီသတးဒီး, တၢ်လ့ပစီလၢအဆူၣ်ကဲၣ်ဆိး, လၢသုဒိးတကဲဘၣ်န့ၣ်, တဒုးဒိးဘၣ်သုဘၣ်. မ့မ့ၢ်လၢတၢ်လ့ပစီအပူၤ, ကမၤထီၣ်ကျဲဒ်သိးသုကပူၤဖျဲးလၢအီၤလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ ကရံၣ်သူး ၁၀:၈) ဒီးသုတမၤကမၣ်မုၣ်ကမၣ်ခွါ, ဒ်အဝဲသ့ၣ်တနီၤနီၤ မၤကမၣ်မုၣ်ကမၣ်ခွါ, ဒီးလီၤဃံၤဝဲခံကလးသၢကထိလၢ မုၢ်တနံၤဃီအသိးန့ၣ်တဂ့ၤ.
တၢး၀၄ ၄/၁ ကဘျံးပၤ ၂၉
ပှၤဖးလံာ်ဖိတဖၣ် အတၢ်သံကွၢ်
ပှၤအံၣ်စရ့လးဖိတဖၣ် ဘၣ်သံလၢ အမၤကမၣ်မုၣ်ကမၣ်ခွါအဃိန့ၣ် ၄ မိၤၡ့ ၂၅:၉ ပာ်ဖျါဝဲအဂၤ ၂၄,၀၀၀ သနာ်က့ ဘၣ်မနုၤအဃိ ၁ ကရံၣ်သူး ၁၀:၈ န့ၣ်ပာ်ဖျါဝဲလၢအဂၤ ၂၃,၀၀၀ လဲၣ်.
လံာ်စီဆှံအဆၢခံဆၢအံၤ ပာ်ဖျါထီၣ်ဝဲနီၣ်ဂံၢ်တဖၣ် တဒ်သိးလိာ်အသးဘၣ်န့ၣ် တၢ်ဂ့ၢ်ကအိၣ်ဝဲအါမံၤလီၤ. တၢ်ဂ့ၢ်တမံၤန့ၣ် ဘၣ်သ့ၣ်သ့ၣ် အနီၣ်ဂံၢ်ကမ့ၢ်ဝဲ ၂၃,၀၀၀ ဒီး ၂၄,၀၀၀ အဘၢၣ်စၢၤလီၤ.
ဆိကမိၣ်ကွၢ် တၢ်ဂ့ၢ်အဂၤတမံၤတက့ၢ်. လၢပျၢၤဝ့ၢ်ကရံၣ်သူးန့ၣ် မ့ၢ်ဝ့ၢ်လၢအပှဲၤဒီး တၢ်မၤကမၣ်မုၣ်ကမၣ်ခွါအဃိ ဖဲစီၤပီလူးကွဲးလံာ်ဆူ ကရံၣ်သူး တၢ်အိၣ်ဖှိၣ်အအိၣ်အခါ အဝဲသူဝဲ တၢ်ဂ့ၢ်လၢ တၢ်မၤအသးဒီး ပှၤအံၣ်စရ့လးဖိတဖၣ်လၢၡံးထံၣ် ဒီးဟ့ၣ်ပလီၢ်အဝဲသ့ၣ်လီၤ. အဝဲကွဲးဝဲလၢ– “သုတမၤကမၣ်မုၣ်ကမၣ်ခွါ, ဒ်အဝဲသ့ၣ်တနီၤနီၤ မၤကမၣ်မုၣ်ကမၣ်ခွါ, ဒီးလီၤဃံၤဝဲခံကလးသၢကထိလၢ မုၢ်တနံၤဃီအသိးန့ၣ်တဂ့ၤ.” စီၤပီလူးပာ်ဖျါထီၣ်ဝဲထဲလၢ ပှၤလၢယဟိဝၤယွၤ စံၣ်ညီၣ်သံအီၤလၢ တၢ်မၤကမၣ်မုၣ်ကမၣ်ခွါအဃိန့ၣ် အနီၣ်ဂံၢ်အိၣ်ဝဲအဂၤ ၂၃,၀၀၀ လီၤ.—၁ ကရံၣ်သူး ၁၀:၈.
ဘၣ်ဆၣ်ဖဲ ၄ မိၤၡ့ ၂၅ န့ၣ်ပာ်ဖျါဝဲလၢ “အံၣ်စရ့လးမၤစဲဘူးလိာ်အသးဒီး ဘဧၤလးပဧိၢ်လီၤ. ဒီးယွၤအသးထီၣ်ကဲၤထီၣ်ဘၣ်အံၣ်စရ့လးလီၤ.” လၢခံယဟိဝၤယွၤ တဲဘၣ်စီၤမိၤၡ့လၢ ကဘၣ်မၤသံ “ပှၤဂီၢ်မုၢ်အခိၣ်ခဲလၢာ်” လီၤ. ဒီးစီၤမိၤၡ့ လဲၤတဲဘၣ် စံၣ်ညီၣ်ကွီၢ်တဖၣ်လၢ ကမၤဝဲမူဒါအံၤအဂီၢ်လီၤ. လၢခံကတၢၢ် ဖဲစီၤပံၤနဃၣ် မၤသံဝဲ ပှၤအံၣ်စရ့လးဖိလၢ အဟဲက့ၤကိး ပှၤမံးဒယၣ်မုၣ်တဂၤန့ၣ် ဝံၤအလီၢ်ခံ “တၢ်သံသတြိာ်အိၣ်ကတီၢ်ဝဲ” လီၤ. တၢ်ကွဲးနီၣ်တခါအံၤ ဘၣ်တၢ်မၤကတၢၢ်ကွံာ်အီၤလၢ “ဒီးပှၤလၢအသံလၢ တၢ်သံသတြိာ်န့ၣ် မ့ၢ်ပှၤခံကလးလွံၢ်ကထိလီၤ.”—၄ မိၤၡ့ ၂၅:၁-၉.
လီၤဂာ်လၢ ၄ မိၤၡ့အပူၤ ပာ်ဖျါဝဲနီၣ်ဂံၢ်န့ၣ် ပၣ်ဃုာ်ဒီး “ပှၤဂီၢ်မုၢ်အခိၣ်ခဲလၢာ်” လၢစံၣ်ညီၣ်ကွီၢ်တဖၣ် မၤသံဝဲ ဒီးပှၤလၢယဟိဝၤယွၤ စံၣ်ညီၣ်သံအီၤတဖၣ်န့ၣ်လီၤ. ပှၤဂီၢ်မုၢ်အခိၣ်တဖၣ်လၢ စံၣ်ညီၣ်ကွီၢ်တဖၣ် မၤသံဝဲန့ၣ် အနီၣ်ဂံၢ် ကအိၣ်တကထိဃၣ်ဃၣ်အဃိ ခဲလၢာ်ကအိၣ်ဝဲ ၂၄,၀၀၀ န့ၣ်လီၤ. ပှၤဂီၢ်မုၢ်အခိၣ် မ့တမ့ၢ် ပှၤလၢအကဲခိၣ်ကဲနၢ်တဖၣ်အံၤ မ့ၢ်မၤကမၣ်မုၣ်ကမၣ်ခွါမ့ၢ်ဂ့ၤ, မ့ၢ်ပၣ်ဃုာ်လၢမူးပွဲတဖၣ်အပူၤမ့ၢ်ဂ့ၤ မ့တမ့ၢ် မ့ၢ်ပျဲလၢပှၤကလဲၤမူးပွဲအဂီၢ်မ့ၢ်ဂ့ၤ အဝဲသ့ၣ်အတၢ်ကမၣ်အိၣ်လၢ “မၤစဲဘူးလိာ်အသးဒီး ဘဧၤလးပဧိၢ်” အဃိန့ၣ်လီၤ.
ဘၣ်ဃးဒီး တၢ်ကတိၤ “မၤစဲဘူး” န့ၣ်လံာ်တဘ့ၣ် တဲဝဲလၢ “တၢ်ကတိၤအံၤ အခီပညီအိၣ်လၢ ပှၤတဂၤ မၤစဲဘူးအသးဒီး ပှၤအဂၤတဂၤ” လီၤ. ပှၤအံၣ်စရ့လးဖိတဖၣ် မ့ၢ်ပှၤလၢအဟ့ၣ်လုၢ်ထီၣ်အသးဆူ ယဟိဝၤယွၤအအိၣ်လီၤ. ဘၣ်ဆၣ်ဖဲ အဝဲသ့ၣ် “မၤစဲဘူးအသးဒီး ဘဧၤလးပဧိၢ်” အခါ မ့ၢ်ဒၣ်မၤဟးဂီၤဝဲ အတၢ်ရ့လိာ်သးဒီးယွၤလီၤ. ပူၤကွံာ်အနံၣ် ၇၀၀ ဝံၤအလီၢ်ခံ ခီဖျိလၢဝံဟိၤၡ့န့ၣ် ယဟိဝၤယွၤ တဲဘၣ်ပှၤအံၣ်စရ့လးဖိတဖၣ်လၢ “အဝဲသ့ၣ်လဲၤဝဲဆူ ဘဧၤလးပဧိၢ်, ဒီးမၤလီၤဖးအသးလၢ တၢ်မဲာ်ဆှးအလီၢ်အဂီၢ်, ဒီးကဲထီၣ်တၢ်သးဘၣ်အၢအလီၢ်န့ၣ် ဒ်တၢ်လၢအအဲၣ်ဝဲအသိးန့ၣ်လီၤ.” (ဟိၤၡ့ ၉:၁၀) ပှၤလၢအမၤဒ်န့ၣ်အသိးတဖၣ် ဘၣ်တၢ်စံၣ်ညီၣ်လီၤ. အဃိ စီၤမိၤၡ့ ဟ့ၣ်ပလီၢ် ပှၤအံၣ်စရ့လးဖိတဖၣ်လၢ “တၢ်လၢယွၤမၤဝဲလၢ ဘဧၤလးပဧိၢ်အဃိန့ၣ် သုမဲာ်ထံၣ်ဘၣ်လံ. အဂ့ၢ်ဒ်အံၤ, ကယဲၢ်ပှၤလၢအလဲၤပိာ် ဘဧၤလးပဧိၢ်အခံခဲလၢာ်န့ၣ် ယွၤသုကစၢ် မၤဟးဂီၤကွံာ်အီၤလၢသုကျါလံ.”—၅ မိၤၡ့ ၄:၃.
(၁ ကရံၣ်သူး ၁၁:၅, ၆) မ့မ့ၢ်ကယဲၢ်ပိာ်မုၣ်လၢအဘါထုကဖၣ်တၢ်မ့ၢ်ဂ့ၤ, ကတိၤတၢ်လၢ ဝံကျိာ်မ့ၢ်ဂ့ၤ, မ့ၢ်တကျၢၢ်ဘၢဘၣ်အခိၣ်ဒီး, မ့ၢ်အမၤဟးဂီၤ အခိၣ်အလၤအကပီၤလီၤ. အဂ့ၢ်ဒ်အံၤ, မ့ၢ်ဒ်သိးသိးဒီးတၢ်လူၤအခိၣ်လီၤ. ၆ အဂ့ၢ်ဒ်အံၤ, ပိာ်မုၣ်မ့ၢ်တကျၢၢ်ဘၢဘၣ်အသးဒီး, မ်အလူၤအခိၣ်တက့ၢ်. ဘၣ်ဆၣ်ဒီးတံာ်အခိၣ်မ့ၢ်ဂ့ၤ, လူၤအခိၣ်မ့ၢ်ဂ့ၤ, မ့မ့ၢ်တၢ်မဲာ်ဆှးလၢ ပိာ်မုၣ်ဒီး, မ်အကျၢၢ်ဘၢအသးတက့ၢ်.
(၁ ကရံၣ်သူး ၁၁:၁၀) မၤသးဒ်န့ၣ်ဒီး ပိာ်မုၣ်ဂ့ၤအိၣ်ဒီး အစိအကမီၤလၢအခိၣ်အဖီခိၣ်, လၢကလူးတဖၣ်အဃိလီၤ.
တၢး၁၅ ၂/၁၅ ကဘျံးပၤ ၃၀
ပှၤဖးလံာ်ဖိတဖၣ် အတၢ်သံကွၢ်
ပှၤစံၣ်တဲၤတဲလီၤတၢ်ဖိ ပိာ်မုၣ်တဂၤ မ့ၢ်မၤလိ လံာ်စီဆှံဒီးပှၤဂၤလၢ ပှၤစံၣ်တဲၤတဲလီၤတၢ်ဖိ ပိာ်ခွါတဂၤအမဲာ်ညါန့ၣ် အဝဲကြၢးဖၢၣ်အခိၣ်ဧါ.
▪ “ပှၤဖးလံာ်ဖိတဖၣ် အတၢ်သံကွၢ်” လၢလါယူၤလံ ၁၅, ၂၀၀၂ တၢးထီခိးတၢ် အပူၤန့ၣ် ပာ်ဖျါဝဲလၢ ဒီပုၢ်ဝဲၢ်မုၣ်တဂၤ မ့ၢ်မၤတၢ်မၤလိလံာ်စီဆှံဒီးပှၤဂၤလၢ ဒီပုၢ်ဝဲၢ်ခွါလၢ အဒိးဘျၢထံဝံၤမ့ၢ်ဂ့ၤ, တဒိးဘျၢထံဒံးဘၣ်မ့ၢ်ဂ့ၤ တဂၤအမဲာ်ညါန့ၣ် အဝဲကဘၣ်ဖၢၣ်အခိၣ်လီၤ. ဘၣ်ဆၣ် ဖဲပဆိကမိၣ်ထံက့ၤ တၢ်ဂ့ၢ်အံၤအခါ ပသ့ၣ်ညါဘၣ်လၢ ပကြၢး ဘှီဘၣ်ထီၣ်က့ၤ တၢ်ဟံးစုနဲၣ်ကျဲအံၤလီၤ.
ဖဲဒီပုၢ်ဝဲၢ်မုၣ်တဂၤ မၤဝဲတၢ်မၤလိလံာ်စီဆှံဒီးပှၤဂၤအခါ ဒီပုၢ်ဝဲၢ်ခွါလၢ အဒိးဘျၢထံဝံၤတဂၤ မ့ၢ်အိၣ်ဖဲန့ၣ်န့ၣ် ဒီပုၢ်ဝဲၢ်မုၣ်အံၤ ကဘၣ်ဖၢၣ်ဝဲအခိၣ်သပှၢ်တၢၢ်လီၤ. မ့ၢ်လၢအဝဲပာ်ကဲဝဲ ယဟိဝၤယွၤ အတၢ်ရဲၣ်တၢ်ကျဲၤ ဘၣ်ဃးဒီးတၢ်ကဲခိၣ်ကဲနၢ် လၢခရံာ်ဖိတၢ်အိၣ်ဖှိၣ်ပူၤ ဒီးအဝဲမၤဝဲ မူဒါလၢညီနုၢ် ဒီပုၢ်ဝဲၢ်ခွါတဂၤ ကဘၣ်မၤဝဲအဃိလီၤ. (၁ ကရံၣ်. ၁၁:၅, ၆, ၁၀) ဒီပုၢ်ဝဲၢ်ခွါတဂၤအံၤ မ့ၢ်တုၤထီၣ်ထီၣ်ဘး ဒီးမၤဝဲမ့ၢ်သ့န့ၣ် ဒီပုၢ်ဝဲၢ်မုၣ်အံၤ ပျဲဝဲလၢ ဒီပုၢ်ဝဲၢ်ခွါအံၤ ကမၤဝဲတၢ်မၤလိလံာ်စီဆှံသ့လီၤ.
ဘၣ်ဆၣ် ဒီပုၢ်ဝဲၢ်မုၣ်တဂၤ မ့ၢ်မၤဝဲ တၢ်မၤလိလံာ်စီဆှံဒီးပှၤဂၤလၢ ဒီပုၢ်ဝဲၢ်ခွါလၢ တဒိးဘျၢထံဒံးဘၣ် ဒီးမ့တမ့ၢ်အဝၤဘၣ်န့ၣ် တလိၣ်လၢအဝဲ ကဘၣ်ဖၢၣ်အခိၣ်ဘၣ်. သနာ်က့ ဒီပုၢ်ဝဲၢ်မုၣ်တနီၤနီၤ လၢတၢ်အိၣ်သးဒ်အံၤအပူၤ ခီဖျိလၢအသးလၢအသ့ၣ်ညါဒၣ်တၢ်အဃိ အဝဲသ့ၣ်ကအဲၣ်ဒိး ဖၢၣ်အခိၣ်လီၤ.
တၢ်ဖးလံာ်စီဆှံ
(၁ ကရံၣ်သူး ၁၀:၁-၁၇) အဂ့ၢ်ဒ်အံၤ, ပုၢ်သ့ၣ်ဝဲၢ်သ့ၣ်ဧၢ, ယသးတအိၣ်ဘၣ်လၢ သုတသ့ၣ်ညါဘၣ်, လၢပပၢ်သ့ၣ်ခဲလၢာ်အိၣ်လၢ တၢ်အၢၣ်အဖီလာ်, ဒီးခီဂာ်ပီၣ်လဲၣ်, ၂ ဒီးဒိးဘျၢအသးခဲလၢာ်လၢတၢ်အၢၣ်ဒီး ပီၣ်လဲၣ်အပူၤဆူစီၤမိၤၡ့အပူၤ, ၃ ဒီးအီၣ်တၢ်အီၣ် ဘၣ်ဃးဒီးသးတမံၤဃီခဲလၢာ်, ဒီးအီတၢ်အီ ဘၣ်ဃးဒီးသးတမံၤဃီခဲလၢာ်လီၤ. ၄ အဂ့ၢ်ဒ်အံၤ, အီတၢ်လၢ လၢၢ်ဘၣ်ဃးဒီးသးလၢ အပိာ်အခံ, ဒီးလၢၢ်န့ၣ်မ့ၢ်ခရံာ်လီၤ. ၅ ဘၣ်ဆၣ်ဒီးပှၤအါ တက့ၢ်တဖၣ်န့ၣ်, တဘၣ်ယွၤအသးဘၣ်. အဂ့ၢ်ဒ်အံၤ, တၢ်ကလ့ၢ်လီၤအီၤလၢပှၢ်မုၢ်ကနၢလီၤ. ၆ ဒီးတၢ်တဖၣ်န့ၣ် ကဲတၢ်အဒိအတဲာ်လၢပဂီၢ်, ဒ်သိးပသုတသးကွံတၢ်အၢတၢ်သီ, ဒ်အဝဲသ့ၣ်သးကွံတၢ်အသိးန့ၣ်တဂ့ၤ. ၇ ဒီးသုတကဲထီၣ်ပှၤဘါတၢ်ဂီၤ ဒ်အဝဲသ့ၣ်တနီၤနီၤအသိးတဂ့ၤ. ဒ်တၢ်ကွဲးအသးအသိးန့ၣ်, ပှၤဂီၢ်မုၢ်ဆ့ၣ်နီၤ အီၣ်တၢ်ဒီးအီတၢ်ဒီး, ဂဲၤဆၢထၢၣ်လိာ်ကွဲတၢ်လီၤ. ၈ ဒီးသုတမၤကမၣ်မုၣ်ကမၣ်ခွါ, ဒ်အဝဲသ့ၣ်တနီၤနီၤ မၤကမၣ်မုၣ်ကမၣ်ခွါ, ဒီးလီၤဃံၤဝဲခံကလးသၢကထိလၢ မုၢ်တနံၤဃီအသိးန့ၣ်တဂ့ၤ. ၉ ဒီးသုတလ့ပစီခရံာ် ဒ်အဝဲသ့ၣ်တနီၤနီၤလ့ပစီတၢ်အသိး, ဒီးသံဝဲလၢဂုၢ်တဖၣ်န့ၣ်တဂ့ၤ. ၁၀ ဒီးသုတကဒူးကဒ့ၣ်တၢ်, ဒ်အဝဲသ့ၣ်တနီၤနီၤကဒူးကဒ့ၣ်တၢ်အသိး, ဒီးတၢ်မၤဟးဂီၤတၢ်န့ၣ်, မၤဟးဂီၤအီၤန့ၣ်, တဂ့ၤ. ၁၁ ဒီးတၢ်န့ၣ်တဖၣ်ခဲလၢာ် မၤအသးလၢ အဝဲသ့ၣ်အလိၤ, ဒီးကဲလၢတၢ်အဒိအတဲာ်, ဒီးအိၣ်ကွဲးအသးလၢပဝဲဒၣ်, လၢတၢ်အစိၤကတၢၢ် ဟဲဘၣ်အီၤအဂီၢ်, ဒ်သိးပကဘၣ် တၢ်သိၣ်က့ၤသီက့ၤန့ၣ်လီၤ. ၁၂ မၤသးဒ်န့ၣ်ဒီး ပှၤလၢအဆိကမိၣ်လၢ အအိၣ်ဆၢထၢၣ်န့ၣ်, ဒ်သိးအသုတလီၤဃံၤတဂ့ၤဒီး, မ်အပလီၢ်အသးတက့ၢ်. ၁၃ တမ့ၢ်ဘၣ်သုဘၣ်တၢ်လ့ပစီလၢ အတဘၣ်ဒံးဘၣ် ပှၤကညီဘၣ်. ဒီးယွၤမၤဝဲ အကလုၢ်တီသတးဒီး, တၢ်လ့ပစီလၢအဆူၣ်ကဲၣ်ဆိး, လၢသုဒိးတကဲဘၣ်န့ၣ်, တဒုးဒိးဘၣ်သုဘၣ်. မ့မ့ၢ်လၢတၢ်လ့ပစီအပူၤ, ကမၤထီၣ်ကျဲဒ်သိးသုကပူၤဖျဲးလၢအီၤလီၤ. ၁၄ မၤသးဒ်န့ၣ်ဒီး ပှၤလၢယအဲၣ်အီၤသ့ၣ်ဧၢ, ဃ့ၢ်ဟးဆှဲးတၢ်ဘါတၢ်ဂီၤတက့ၢ်. ၁၅ ယစံးဘၣ်တဲဘၣ်သု ဒ်ပှၤကူၣ်တၢ်သ့တဖၣ်အသိးန့ၣ်လီၤ. တၢ်လၢယစံးတၢ်န့ၣ်, စံၣ်ညီၣ်သုဝဲတက့ၢ်. ၁၆ တၢ်ဆိၣ်ဂ့ၤအလီခီလၢ ပဆိၣ်ဂ့ၤအီၤန့ၣ်, တမ့ၢ်ဘၣ်တၢ်ရ့လိာ် ဒီးခရံာ်အသွံၣ်ဘၣ်ဧါ. ကိၣ်လၢပစိၢ်ဘျဲးအီၤန့ၣ်, တမ့ၢ်ဘၣ်တၢ်ရ့လိာ်ဒီးခရံာ်အနီၢ်ခိဘၣ်ဧါ. ၁၇ အဂ့ၢ်ဒ်အံၤ, ပဝဲဒၣ်ပအိၣ်အါဂၤဒီး, ပမ့ၢ်ကိၣ်တဖျၢၣ်ဃီ, ပမ့ၢ်နီၢ်တဂၤဃီလီၤ. အဂ့ၢ်ဒ်အံၤ, ပအီၣ်ကိၣ်တဖျၢၣ်ဃီခဲလၢာ်လီၤ.
လါအ့ဖြ့ၣ် ၂၂–၂၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ကရံၣ်သူး ၁၄–၁၆
“ယွၤကမ့ၢ်တၢ်ခဲလၢာ်, လၢတၢ်ခဲလၢာ်အပူၤ”
(၁ ကရံၣ်သူး ၁၅:၂၄, ၂၅) တုၤနုၤတစု, တုၤအမၤဟးဂီၤကွံာ်ကယဲၢ်တၢ်အခိၣ်, ဒီးတၢ်အစိအကမီၤ, ဒီးတၢ်အဂံၢ်အဘါခဲလၢာ်, တုၤအဟ့ၣ်က့ၤဘီမုၢ်လၢပၢ်ယွၤအစုပူၤဒီး, တၢ်အကတၢၢ်ကဘၣ်လီၤ. ၂၅ အဂ့ၢ်ဒ်အံၤ, ခရံာ်ဘၣ်ပၢတၢ်တုၤ အပာ်လီၤကယဲၢ်အဒုၣ်အဒါလၢ အခီၣ်ဖီလာ်ခဲလၢာ်လီၤ.
တၢး၉၈ ၇/၁ ကဘျံးပၤ ၂၁ အဆၢ ၁၀
“တၢ်သံကဘၣ်တၢ်မၤဟးဂီၤအီၤ”
၁၀ “လၢခံကတၢၢ်” န့ၣ်အဲၣ်ဒိးစံးဝဲ ယ့ၣ်ၡူးပၢတၢ်အနံၣ်တကထိအကတၢၢ် ဒီးကမ့ၢ်ဝဲတၢ်ဆၢကတီၢ်ဖဲ အဝဲဟ့ၣ်က့ၤ ဘီမုၢ်လၢအပၢ် ဒီးအယွၤအစုပူၤ လၢတၢ်ဆီၣ်လီၤသး ဒီးတၢ်သးတီအပူၤလီၤ. (လီၣ်ဖျါ ၂၀:၄) ဖဲန့ၣ်အဆၢကတီၢ် ကစၢ်ယွၤအတၢ်တိာ်ပာ်လၢ “ကဒုးအိၣ်ဖှိၣ်တၢ်ခဲလၢာ်လၢ အခိၣ်တဂၤဃီ ခရံာ်အပူၤ” န့ၣ် ကလၢထီၣ်ပှဲၤထီၣ်ဝဲလီၤ. (အ့းဖ့းစူး ၁:၉, ၁၀) အဆိကတၢၢ်န့ၣ် ယ့ၣ်ၡူးကမၤဟးဂီၤကွံာ်ဝဲ “ကယဲၢ်တၢ်အခိၣ် ဒီးတၢ်အစိအကမီၤ ဒီးတၢ်အဂံၢ်အဘါခဲလၢာ်” လၢအတြီဝဲ ပှၤလၢအမၤယွၤ အတၢ်ဘၣ်သးတဖၣ်လီၤ. တၢ်မၤဟးဂီၤတခါအံၤန့ၣ် တအဲၣ်ဒိးတဲဝဲထဲ အၢ်မက့းဒိၣ်တခါဧိၤဘၣ်. (လီၣ်. ၁၆:၁၆; ၁၉:၁၁-၂၁) စီၤပီလူး တဲဝဲလၢ “အဂ့ၢ်ဒ်အံၤ, ခရံာ်ဘၣ်ပၢတၢ်တုၤ အပာ်လီၤကယဲၢ်အဒုၣ်အဒါလၢ အခီၣ်ဖီလာ်ခဲလၢာ်လီၤ. ဒုၣ်ဒါလၢအကဘၣ် တၢ်ဟးဂီၤလၢ ခံကတၢၢ်န့ၣ်, မ့ၢ်တၢ်သံလီၤ.” (၁ ကရံၣ်သူး ၁၅:၂၅, ၂၆) စီၤအၤဒၣ် အတၢ်ဒဲးဘး ဒီးတၢ်သံန့ၣ် ကလီၤမၢ်ကွံာ်ဝဲခဲလၢာ်လီၤ. အဃိ ကစၢ်ယွၤ ကဒုးအိၣ်ကလီ “တၢ်သွၣ်ခိၣ်” ခီဖျိ ကမၤသမူထီၣ်က့ၤ ပှၤလၢအသံတ့ၢ်တဖၣ်လီၤ.—ယိၤဟၣ် ၅:၂၈.
(၁ ကရံၣ်သူး ၁၅:၂၆) ဒုၣ်ဒါလၢအကဘၣ်တၢ်ဟးဂီၤလၢ ခံကတၢၢ်န့ၣ်, မ့ၢ်တၢ်သံလီၤ.
kr ကဘျံးပၤ ၂၃၇ အဆၢ ၂၁
ဘီမုၢ်န့ၣ် ကမၤလၢပှဲၤထီၣ် ယွၤအတၢ်ဘၣ်သးလၢ ဟီၣ်ခိၣ်
၂၁ ခီဖျိလၢ တၢ်ဒဲးဘး ဒီးတၢ်ဆူးတၢ်ဆါအဃိ ပဘၣ်သံလီၤ. တၢ်သံအံၤ ကကဲထီၣ်အသးဒ်လဲၣ်. ပ “ဒုၣ်ဒါလၢ . . . ခံကတၢၢ်” န့ၣ် မ့ၢ်ဝဲတၢ်သံလီၤ. ပှၤဟီၣ်ခိၣ်ဖိလၢ တလၢတပှဲၤတဖၣ် ဘၣ်ဟ့ၣ်ၡူအသးလၢ ဒုၣ်ဒါအံၤအစုပူၤလီၤ. (၁ ကရံၣ်. ၁၅:၂၆) ဘၣ်ဆၣ် တၢ်သံန့ၣ်မ့ၢ်ဒုၣ်ဒါလၢ ယဟိဝၤယွၤ တြီဆၢအီၤတန့ၢ်ဘၣ်န့ၣ်ဧါ. ဒ်ဝံယၡါယၤ တဲဆိပာ်ဝဲအသိး- “တၢ်သံလီၤဘျၢလံလီၤထူလီၤယိာ်လံ, ဒီးကစၢ်ယွၤထွါကွံာ်မဲာ်ထံလၢ ကယဲၢ်ပှၤအမဲာ်, ဒီးကဟံးထီၣ်ကွံာ် အပှၤဂီၢ်မုၢ်အတၢ်ဒုၣ်ဒွဲၣ်လၢ ဟီၣ်ခိၣ်ဒီဘ့ၣ်ညါလီၤ. အဂ့ၢ်ဒ်အံၤ, ယွၤကတိၤတၢ်လီၤ.” (ၡါ. ၂၅:၈) နထံၣ်တမှံကွၢ် တၢ်ဆၢကတီၢ်အံၤကသ့ဧါ. ပှၤခူၣ်လီၤပှၤသံ, တၢ်သွၣ်ခိၣ် ဒီးတၢ်သူၣ်အုးသးအုးတဖၣ် တအိၣ်လၢၤဘၣ်. ဖဲယဟိဝၤယွၤ အတၢ်အၢၣ်လီၤအီလီၤလၢ ပှၤသံတဖၣ် ကဂဲၤဆၢထၢၣ်သမူထီၣ်က့ၤ ဟဲလၢထီၣ်ပှဲၤထီၣ်အခါ ကအိၣ်တ့ၢ်ထဲ တၢ်သူၣ်ခုသးခုအမဲာ်ထံလီၤ. (ဖး ယၡါယၤ ၂၆:၁၉ တက့ၢ်.) အလီၢ်ခံကတၢၢ်န့ၣ် တၢ်သူၣ်ဘၣ်ဒိသးဘၣ်ဒိလၢ အကဲထီၣ်အသးလၢ တၢ်သံအဃိတဖၣ် ကလီၤမၢ်ကွံာ်ဝဲခဲလၢာ်လီၤ.
(၁ ကရံၣ်သူး ၁၅:၂၇, ၂၈) အဂ့ၢ်ဒ်အံၤ, ပာ်လံတၢ်ခဲလၢာ်လၢအခီၣ်ဖီလာ်လံ. ဘၣ်ဆၣ်ဒီးလၢအစံး, ပာ်လံတၢ်ခဲလၢာ်လၢ အဖီလာ်တဘၣ်ဃးဘၣ် ဒီးပှၤလၢ အပာ်တၢ်ခဲလၢာ်လၢ အဖီလာ်တဂၤန့ၣ်ဘၣ်, အိၣ်ဖျါဝဲလီၤ. ၂၈ ဒီးတုၤတၢ်ခဲလၢာ် ဘၣ်တၢ်ပာ်အီၤလၢအဖီလာ်ဒီး, ဖိခွါအကစၢ်ဒၣ်ဝဲဒၣ်လဲာ်, ကအိၣ်စ့ၢ်ကီးလၢပှၤလၢ အပာ်တၢ်ခဲလၢာ်လၢ အဖီလာ်တဂၤန့ၣ်, အဖီလာ်, ဒ်သိးယွၤကမ့ၢ်တၢ်ခဲလၢာ်, လၢတၢ်ခဲလၢာ်အပူၤလီၤ.
တၢး၁၂ ၉/၁၅ ကဘျံးပၤ ၁၂ အဆၢ ၁၇
တၢ်ဃူတၢ်ဖိးလၢ အနံၣ်တကထိ အတီၢ်ပူၤ ဒီးအလီၢ်ခံတဖၣ်
၁၇ တၢ်ကတိၤလၢကဂ့ၤန့ၢ်ဒံး “ယွၤကမ့ၢ်တၢ်ခဲလၢာ်, လၢတၢ်ခဲလၢာ်အပူၤ” န့ၣ် တအိၣ်နီတမံၤဘၣ်. တၢ်ကတိၤအံၤ အခီပညီဒ်လဲၣ်. ဆိကမိၣ်ကွၢ် လၢဧ့ၤဒ့ၣ်တၤသၣ်လီၢ်ပူၤ ဖဲစီၤအၤဒၣ် ဒီးနီၢ်အံၣ်အု အတၢ်ရ့လိာ်သးဒီးယဟိဝၤယွၤ ဂ့ၤဝဲအဆၢကတီၢ်န့ၣ်တက့ၢ်. မူဟီၣ်ကယၢ ပၢတၢ်ကစၢ် ယဟိဝၤယွၤ အနီၢ်ကစၢ်ဒၣ်ဝဲန့ၣ် ပၢဝဲတၢ်ဘၣ်တ့ခဲလၢာ် လၢအအိၣ်လၢ မူခိၣ် ဒီးဟီၣ်ခိၣ်န့ၣ်လီၤ. အဝဲသ့ၣ် ရ့ဘၣ်ဒီးယဟိဝၤယွၤ ဘူးဘူးတံၢ်တံၢ်, ဘူၣ်ထီၣ်ဘါထီၣ်အီၤ ဒီးဒိးန့ၢ်ဘၣ် တၢ်ဆိၣ်ဂ့ၤတဖၣ်သ့လီၤ. ကစၢ်ယွၤမ့ၢ် “တၢ်ခဲလၢာ်, လၢတၢ်ခဲလၢာ်အပူၤ” လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ ကရံၣ်သူး ၁၄:၃၄, ၃၅) မ်သုပိာ်မုၣ်သ့ၣ်တဖၣ်အိၣ်ဘှီၣ် လၢတၢ်အိၣ်ဖှိၣ်တဖၣ်အပူၤတက့ၢ်. အဂ့ၢ်ဒ်အံၤ, တၢ်တဒုးကတိၤဘၣ်အီၤဘၣ်. မ့မ့ၢ်ဘၣ်အိၣ်လၢတၢ်အဖီလာ်, ဒ်တၢ်သိၣ်တၢ်သီ စံးစ့ၢ်ကီးဝဲအသိးန့ၣ်လီၤ. ၃၅ ဒီးမ့ၢ်မိၣ်မၤလိအသးလၢ တၢ်တမံၤမံၤဒီး, မ်အသံကွၢ်အဝၤဒၣ်ဝဲလၢ ဟံၣ်ပူၤတက့ၢ်. အဂ့ၢ်ဒ်အံၤ, ပိာ်မုၣ်ကတိၤတၢ်လၢ တၢ်အိၣ်ဖှိၣ်အပူၤ, မ့ၢ်တၢ်မဲာ်ဆှးလီၤ.
တၢး၁၂ ၉/၁ ကဘျံးပၤ ၉, တၢ်လွံၢ်နၢၣ်
တၢ်မၢဖိပီလူး တြီဝဲဒ်သိး ပိာ်မုၣ်တဖၣ် သုတကတိၤတၢ်တဂ့ၤန့ၣ်ဧါ.
တၢ်မၢဖိပီလူး ကွဲးဝဲလၢ “မ်ပိာ်မုၣ်သ့ၣ်တဖၣ်အိၣ်ဘှီၣ် လၢတၢ်အိၣ်ဖှိၣ်တဖၣ်အပူၤတက့ၢ်.” (၁ ကရံၣ်သူး ၁၄:၃၄) တၢ်အံၤအခီပညီ ဒ်လဲၣ်. မ့ၢ်အဝဲဆိကမိၣ်ဆံးဝဲ ပိာ်မုၣ်တဖၣ်အတၢ်သ့တၢ်ဘၣ်န့ၣ်ဧါ. တမ့ၢ်ဘၣ်. နီၢ်နီၢ်န့ၣ် အဝဲပာ်ဖျါထီၣ်ဝဲ ပိာ်မုၣ်တဖၣ် အတၢ်သိၣ်လိနဲၣ်လိလၢ အကဲဘျုးတဖၣ်အဂ့ၢ်လီၤ. (၂ တံၤမသ့း ၁:၅; တံတူး ၂:၃-၅) ဖဲစီၤပီလူးကွဲးဝဲလံာ်လၢ ပှၤလၢအအိၣ်လၢ ကရံၣ်သူးတဖၣ်အအိၣ်အခါ အဝဲတဲဝဲလၢ ဖဲပှၤစူၢ်တၢ်နာ်တၢ်တဂၤ စံၣ်တဲၤတဲလီၤတၢ်အခါ ပှၤကဘၣ် “အိၣ်ဘှီၣ်” န့ၣ် တမ့ၢ်ထဲပိာ်မုၣ်တဖၣ်ဘၣ်. ပၣ်ဃုာ်စ့ၢ်ကီးဒီး ပှၤလၢအကတိၤတၢ်လၢ ဝံကျိာ် ဒီးပှၤကတိၤကျိာ် အကလုာ်ကလုာ်တဖၣ်လီၤ. (၁ ကရံၣ်သူး ၁၄:၂၆-၃၀, ၃၃) ဖဲန့ၣ်အဆၢကတီၢ် ပိာ်မုၣ်တနီၤန့ၣ် မ့ၢ်လၢအဝဲသ့ၣ် အသူၣ်ဆူၣ်သးဆူၣ်လၢ တၢ်ဘူၣ်တၢ်ဘါအသီအဂီၢ်အဃိ ဒ်လုၢ်လၢ်အိၣ်ဝဲအသိး ဘၣ်သ့ၣ်သ့ၣ်အဝဲသ့ၣ် ကနုာ်လီၤသံကွၢ်တၢ်လီၤ. လၢတၢ်န့ၣ်အဃိ ဒ်သိးအသုတကဲထီၣ် တၢ်တံာ်တာ်တဂ့ၤအဂီၢ် စီၤပီလူး ဟ့ၣ်ဂံၢ်ဟ့ၣ်ဘါအဝဲသ့ၣ်လၢက “သံကွၢ်အဝၤဒၣ်ဝဲလၢဟံၣ်” လီၤ.—၁ ကရံၣ်သူး ၁၄:၃၅.
(၁ ကရံၣ်သူး ၁၅:၅၃) အဂ့ၢ်ဒ်အံၤ, တၢ်အုၣ်သံအံၤ, ဘၣ်သိးထီၣ်တၢ်တအုၣ်သံဘၣ်, ဒီးတၢ်သံသ့အံၤ, ဘၣ်သိးထီၣ် တၢ်သံတသ့ဘၣ်လီၤ.
it-1 ကဘျံးပၤ ၁၁၉၇-၁၁၉၈
တအုၣ်သံဘၣ်
ဒ်ယ့ၣ်ၡူးဂဲၤဆၢထၢၣ်သမူထီၣ်က့ၤအသိး ပှၤလၢကန့ၢ်သါဘၣ်တၢ် ဒ်ယ့ၣ်ၡူးအသိးတဖၣ်စ့ၢ်ကီး ကဂဲၤဆၢထၢၣ်သမူထီၣ်က့ၤ ဒ်ပှၤနီၢ်သးဖိလၢ အသံတသ့ဘၣ်, တအုၣ်သံဘၣ်အသိးလီၤ. ဖဲ ၁ ကရံၣ်သူး ၁၅:၄၂-၅၄ န့ၣ် စီၤပီလူးပာ်ဖျါထီၣ်ဝဲ လီၤတံၢ်လီၤဆဲးလၢ အဝဲသ့ၣ်ကအိၣ်ဒီး တၢ်သးတီတုၤအသံတစုဝံၤ ကဒိးန့ၢ်ဘၣ်ဝဲ နီၢ်ခိလၢအသံတသ့ ဒ်ပှၤနီၢ်သးဖိတဖၣ်အသိးလီၤ. လၢတၢ်န့ၣ်အဃိ တၢ်သံတသ့ဘၣ်န့ၣ် အဲၣ်ဒိးတဲဝဲသးသမူလၢ အကတၢၢ်တအိၣ် ဒီးအသံတသ့ဘၣ်န့ၣ်လီၤ. တအုၣ်သံဘၣ်န့ၣ် မ့ၢ်ဝဲသးသမူ မ့တမ့ၢ် က့ၢ်ဂီၤလၢ ကစၢ်ယွၤဟ့ၣ်အဝဲသ့ၣ်န့ၣ်လီၤ. တမ့ၢ်က့ၢ်ဂီၤလၢ အုၣ်သံ ဒီးဟးဂီၤဝဲသ့န့ၣ်ဘၣ်. အခီပညီဖျါလၢ အဝဲသ့ၣ်ကဆဲးမူဝဲလၢ ခါဆူညါအဂီၢ်န့ၣ် တလိၣ်ဘၣ်တၢ်နီတမံၤလၢၤဘၣ်. အဝဲသ့ၣ်တလိၣ် သန့ၤအသးလၢ တၢ်အဂံၢ်အဘါတမံၤမံၤ ဒ်တၢ်ဘၣ်တ့အဂၤ လၢအိၣ်ဒီးနီၢ်ခိက့ၢ်ဂီၤ ဒီးပှၤနီၢ်သးဖိ အဂၤတဖၣ်အသိးဘၣ်. တၢ်အံၤပာ်ဖျါထီၣ်ဝဲလၢ ကစၢ်ယွၤ နာ်န့ၢ်အဝဲသ့ၣ်လီၤ. အဝဲသ့ၣ်အိၣ်မူဒၣ်အတၢ်သ့ ဒီးသံတသ့လၢၤဘၣ်သနာ်က့ ဘၣ်အိၣ်ဒံးလၢ ယွၤအတၢ်ပၢအဖီလာ်လီၤ. ဒ်အခိၣ်ယ့ၣ်ၡူးခရံာ်အသိး အဝဲသ့ၣ် မၤထွဲအပၢ်အတၢ်ဘၣ်သး ဒီးအတၢ်ဟံးစုနဲၣ်ကျဲလီၤ.—၁ ကရံၣ်. ၁၅:၂၃-၂၈; see immortality; soul.
တၢ်ဖးလံာ်စီဆှံ
(၁ ကရံၣ်သူး ၁၄:၂၀-၄၀) ပုၢ်သ့ၣ်ဝဲၢ်သ့ၣ်ဧၢ, လၢသးလၢ အသ့ၣ်ညါနၢ်ပၢၢ်တၢ်အပူၤန့ၣ်, သုတမ့ၢ်ဖိသၣ်တဂ့ၤ, မ့မ့ၢ်လၢသးလၢ အသးဟ့တၢ်အပူၤန့ၣ်, မ်သုမ့ၢ်ဖိသၣ်အီၣ်နုၢ်တက့ၢ်. မ့မ့ၢ်လၢသးလၢ အသ့ၣ်ညါနၢ်ပၢၢ်တၢ်အပူၤန့ၣ်, မ်သုကဲလၢပှၤဒိၣ်တုာ်ခိၣ်ပှဲၤတက့ၢ်. ၂၁ တၢ်ကွဲးအသးလၢတၢ်သိၣ်တၢ်သီအပူၤ, လၢပျ့ၤအဂၤတဖၣ်, ဒီးလၢပျုၤအဂုၤအဂၤ, ယကကတိၤတၢ်ဒီးပှၤဂီၢ်မုၢ်အံၤ, ဒီးဒ်န့ၣ်အသိးဒၣ်လဲာ်, တဒိကနၣ်ဘၣ်ယကလုၢ်ဘၣ်, ကစၢ်စံးဝဲဒၣ်. ၂၂ မၤသးဒ်န့ၣ်ဒီး တၢ်အပျ့ၤတဖၣ်မ့ၢ်လၢ တၢ်ပနီၣ်အဂီၢ်, လၢပှၤနာ်တၢ်အဂီၢ်တမ့ၢ်ဘၣ်, မ့ၢ်လၢပှၤတစူၢ်တနာ်ဘၣ်တၢ်အဂီၢ်လီၤ. မ့မ့ၢ်တၢ်ကတိၤလၢ ဝံအကျိာ်န့ၣ် တမ့ၢ်ဘၣ်လၢ ပှၤတစူၢ်တနာ်ဘၣ်တၢ်အဂီၢ်ဘၣ်. မ့ၢ်လၢပှၤနာ်တၢ်အဂီၢ်လီၤ. ၂၃ မၤသးဒ်န့ၣ်ဒီး တၢ်အိၣ်ဖှိၣ်ခဲလၢာ် မ့ၢ်အိၣ်ဖှိၣ်တပူၤဃီဒီး, ပှၤခဲလၢာ်မ့ၢ်ကတိၤတၢ်လၢ တၢ်အပျ့ၤတဖၣ်ဒီး, ပှၤလၢအတသ့ဘၣ်မ့ၢ်ဂ့ၤ, ပှၤလၢအတစူၢ်တနာ်ဘၣ်မ့ၢ်ဂ့ၤ, မ့ၢ်ဟဲနုာ်ဒီး, ကစံးလၢသုမ့ၢ်ပှၤအပျုၢ်, တမ့ၢ်ဘၣ်ဧါ. ၂၄ မ့မ့ၢ်ပှၤခဲလၢာ် မ့ၢ်ကတိၤတၢ်လၢဝံအကျိာ်, ဒီးပှၤလၢအတသ့ဘၣ်မ့ၢ်ဂ့ၤ, ပှၤလၢအတစူၢ်တနာ်ဘၣ်မ့ၢ်ဂ့ၤ, မ့ၢ်ဟဲနုာ်ဒီး, ကဘၣ်တၢ်သိၣ်ဃီၣ်အီၤ လၢပှၤခဲလၢာ်, ဒီးကဘၣ်တၢ်စံၣ်ညီၣ်အီၤ လၢပှၤခဲလၢာ်, ၂၅ ဒီးတၢ်ကထုးဖျါထီၣ်အသး အတၢ်ခူသူၣ်သတးဒီး, ကဆုးလီၤအခိၣ်ပိာ်လီၤအမဲာ် ဒီးဘါထီၣ်ယွၤ, ဒီးကအုၣ်အသးလၢ ယွၤအိၣ်လၢသုကျါနီၢ်နီၢ်လီၤ. ၂၆ မၤသးဒ်န့ၣ်ဒီး, ပုၢ်သ့ၣ်ဝဲၢ်သ့ၣ်ဧၢ, မ့ၢ်ဒ်လဲၣ်. တုၤသုအိၣ်ဖှိၣ်ရိဖှိၣ်ဒီး, သုအိၣ်တဂၤတဂၤဒီးတၢ်သးဝံၣ် အိၣ်ဒီးတၢ်သိၣ်တၢ်သီ, အိၣ်ဒီးတၢ်အပျ့ၤ, အိၣ်ဒီးတၢ်လီၣ်ဖျါ, အိၣ်ဒီးတၢ်ကတိၤကျိးတၢ် အဆၢစုာ်စုာ်လီၤ. မ်ပှၤမၤတၢ်ခဲလၢာ်လၢ တၢ်မၤထီၣ်မၤထီအဂီၢ်တက့ၢ်. ၂၇ ပှၤမ့ၢ်ကတိၤတၢ်လၢ တၢ်အပျ့ၤတဂၤဂၤဒီး, ဘၣ်ကတိၤတၢ်ထဲခံဂၤသၢဂၤဧိၤ, ဒီးကတိၤတၢ်တဂၤဘၣ်တဂၤ, ဒီးမ်ပှၤတဂၤကတိၤကျိး တၢ်အဆၢတက့ၢ်. ၂၈ ဒီးပှၤကတိၤကျိးတၢ်အဆၢ မ့ၢ်တအိၣ်ဘၣ်ဒီး, မ်အအိၣ်ဘှီၣ်လၢ တၢ်အိၣ်ဖှိၣ်အပူၤတက့ၢ်. ဒီးမ်အကတိၤတၢ်လၢ အကစၢ်ဒၣ်ဝဲ ဒီးယွၤန့ၣ်တက့ၢ်. ၂၉ ဒီးဝံတဖၣ်န့ၣ်, မ်အကတိၤတၢ်ခံဂၤမ့ၢ်ဂ့ၤ, သၢဂၤမ့ၢ်ဂ့ၤ, ဒီးအဂၤတဖၣ် ကစံၣ်ညီၣ်တၢ်အဆၢန့ၣ်တက့ၢ်. ၃၀ ဘၣ်ဆၣ်ဒီး တၢ်မ့ၢ်လီၣ်ဖျါထီၣ် တၢ်တမံၤမံၤ လၢပှၤတဂၤဒၣ်လၢအဆ့ၣ်နီၤဖဲန့ၣ်ဒီး, ပှၤဂံၢ်ခိၣ်တဂၤ, မ်အအိၣ်ဘှီၣ်တက့ၢ်. ၃၁ အဂ့ၢ်ဒ်အံၤ, ဒ်သိးပှၤခဲလၢာ်ကဘၣ် တၢ်သိၣ်က့ၤသီက့ၤအီၤဒီး တၢ်မၤမုာ်ထီၣ်အသးဒီး, သုကတိၤတၢ်တဂၤဒီးတဂၤ လၢဝံအကျိာ်သ့လီၤ. ၃၂ ဒီးဝံအသးအိၣ်လၢဝံအဖီလာ်လီၤ. ၃၃ အဂ့ၢ်ဒ်အံၤ, ယွၤတဘၣ်ဃးဘၣ်ဒီး တၢ်တၢထီၣ်တၢလီၤဘၣ်. မ့ၢ်အဘၣ်ဃးဒီးတၢ်ဃူတၢ်ဖိး, ဒ်လၢပှၤစီဆှံအတၢ်အိၣ်ဖှိၣ် ခဲလၢာ်အပူၤအသိးန့ၣ်လီၤ. ၃၄ မ်သုပိာ်မုၣ်သ့ၣ်တဖၣ်အိၣ်ဘှီၣ် လၢတၢ်အိၣ်ဖှိၣ်တဖၣ်အပူၤတက့ၢ်. အဂ့ၢ်ဒ်အံၤ, တၢ်တဒုးကတိၤဘၣ်အီၤဘၣ်. မ့မ့ၢ်ဘၣ်အိၣ်လၢတၢ်အဖီလာ်, ဒ်တၢ်သိၣ်တၢ်သီ စံးစ့ၢ်ကီးဝဲအသိးန့ၣ်လီၤ. ၃၅ ဒီးမ့ၢ်မိၣ်မၤလိအသးလၢ တၢ်တမံၤမံၤဒီး, မ်အသံကွၢ်အဝၤဒၣ်ဝဲ လၢဟံၣ်ပူၤတက့ၢ်. အဂ့ၢ်ဒ်အံၤ, ပိာ်မုၣ်ကတိၤတၢ်လၢ တၢ်အိၣ်ဖှိၣ်အပူၤ, မ့ၢ်တၢ်မဲာ်ဆှးလီၤ. ၃၆ မ့ၢ်ဒ်လဲၣ်, မ့ၢ်ယွၤအကလုၢ်အကထါ ဟဲထီၣ်လၢသုအိၣ်ဧါ. မ့ၢ်အဟဲထဲဆူသုအိၣ်ဧါ. ၃၇ ပှၤတဂၤဂၤမ့ၢ်ဆိကမိၣ်လီၤအသးလၢ အမ့ၢ်ဝံမ့ၢ်ဂ့ၤ, လၢအဘၣ်ဃးဒီးသးမ့ၢ်ဂ့ၤ, မ်အအၢၣ်လီၤအီလီၤလၢ တၢ်လၢယကွဲးန့ၢ်သု, မ့ၢ်ကစၢ်အတၢ်မၤလိာ်န့ၣ်တက့ၢ်. ၃၈ ဘၣ်ဆၣ်ဒီး ပှၤတဂၤဂၤမ့ၢ်တသ့ၣ်ညါဘၣ်ဒီး, ကအိၣ်ဒၣ်ဝဲလၢ တၢ်တသ့ၣ်ညါဘၣ်တက့ၢ်. ၃၉ မၤသးဒ်န့ၣ်ဒီး, ပုၢ်သ့ၣ်ဝဲၢ်သ့ၣ်ဧၢ, ဂဲၤလိာ်ဆၢကတိၤတၢ်လၢ ဝံအကျိာ်တက့ၢ်. ဒီးတြီကတိၤတၢ်လၢ တၢ်အပျ့ၤတဖၣ်တဂ့ၤ. ၄၀ တၢ်ခဲလၢာ်န့ၣ်, မ်ပှၤမၤဂ့ၤဂ့ၤဘၣ်ဘၣ်, တဂ့ၢ်တဂ့ၢ်တက့ၢ်.
လါအ့ဖြ့ၣ် ၂၉–လါမ့ၤ ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကရံၣ်သူး ၁–၃
“ယဟိဝၤမ့ၢ် ‘တၢ်မၤမုာ်ခဲလၢာ်အကစၢ်’”
(၂ ကရံၣ်သူး ၁:၃) ယွၤပကစၢ်ယ့ၣ်ၡူးခရံာ်အပၢ်, တၢ်သးကညီၤအပၢ်, ဒီးတၢ်မၤမုာ်ခဲလၢာ်အကစၢ်, မ်အဘၣ်တၢ်စံးထီၣ်ပတြၢၤအီၤတက့ၢ်.
“ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်”
၄ ပပၢ်ယဟိဝၤယွၤစ့ၢ်ကီး ထံၣ်ဘၣ်ဝဲပှၤလၢ အအဲၣ်ဘၣ်ဝဲတဖၣ်သံဝဲန့ၣ်လီၤ. အဒိ, ဖဲစီၤအၤဘြၤဟၣ်, စီၤအံၤစဲး, စီၤယၤကိာ်, စီၤမိၤၡ့ ဒီးစီၤပၤဒၤဝံး သံအခါန့ၣ် ယဟိဝၤယွၤ ထံၣ်ဝဲလီၤ. (၄ မိၤၡ့ ၁၂:၆-၈; မးသဲ ၂၂:၃၁, ၃၂; မၤတၢ် ၁၃:၂၂) လံာ်စီဆှံပာ်ဖျါထီၣ်ဝဲလၢ ယဟိဝၤယွၤ ခိးကွၢ်လၢ်ဝဲ မုၢ်နံၤလၢအဝဲ ကမၤဂဲၤဆၢထၢၣ်သမူထီၣ်က့ၤ ပှၤတီပှၤလိၤတဖၣ်အံၤန့ၣ်လီၤ. (ယိၤဘး ၁၄:၁၄, ၁၅) အဝဲသ့ၣ်မ့ၢ် ဂဲၤဆၢထၢၣ်သမူထီၣ်က့ၤန့ၣ် အတၢ်အိၣ်မူကပှဲၤဒီး တၢ်အိၣ်ဆူၣ်အိၣ်ချ့ဒီး တၢ်သူၣ်ခုသးခုလီၤ. တကးဒံးဘၣ် ယဟိဝၤယွၤထံၣ်ဘၣ်စ့ၢ်ကီး အဖိဝဲၢ်ကိသံန့ၣ်လီၤ. လံာ်စီဆှံတဲဝဲလၢ ယ့ၣ်ၡူးမ့ၢ် ယွၤ “အတၢ်သူၣ်ဖှံသးညီ” လီၤ. (ကတိၤဒိ ၈:၂၂, ၃၀) လၢတၢ်န့ၣ်အဃိ ဖဲအဖိခွါဘၣ်တၢ်မၤသံအီၤ ဆှုၣ်မဲာ်ကဲၤမဲာ်အခါ အဝဲအသးကဘၣ်ဒိဝဲ ဒိၣ်မးလီၤ.—ယိၤဟၣ် ၅:၂၀; ၁၀:၁၇.
(၂ ကရံၣ်သူး ၁:၄) အဝဲဒၣ်မၤမုာ်ထီၣ်ပှၤလၢ ပတၢ်နးတၢ်ဖှီၣ်ခဲလၢာ်အပူၤ, ဒ်သိး ပကမၤမုာ်ထီၣ်ပှၤလၢ အဘၣ်တၢ်နးတၢ်ဖှီၣ်တမံၤမံၤ, လၢတၢ်မုာ်လၢ ယွၤမၤမုာ်ပသးန့ၣ်လီၤ.
“ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်”
၁၄ တဘျီတခီၣ် နကဘၣ်လဲၤတဲတၢ်ဒီး ပှၤလၢအသူၣ်အုးသးအုးတဖၣ်ဒ်လဲၣ်န့ၣ် နတသ့ၣ်ညါဘၣ်. ဘၣ်ဆၣ် လံာ်စီဆှံစံးဝဲလၢ “မ့မ့ၢ်ပှၤကူၣ်တၢ်သ့အပျ့ၤန့ၣ် မၤဘျါက့ၤတၢ်လီၤ.” (ကတိၤ. ၁၂:၁၈) ပှၤအါဂၤန့ၣ် ဒ်သိးကမၤမုာ်ထီၣ်က့ၤပှၤဂၤအဂီၢ် အဝဲသ့ၣ်ဃုထံၣ်န့ၢ် တၢ်ဂ့ၢ်လၢ လံာ်လၢအမ့ၢ် When Someone You Love Dies အပူၤန့ၣ်လီၤ. (ကွၢ်တၢ်ဂ့ၢ်အဘျဲၣ်တက့ၢ်.) တဘျီတခီၣ် ကျဲအဂ့ၤကတၢၢ်တဘိလၢ ပမၤစၢၤပှၤဂၤသ့န့ၣ် မ့ၢ်ဝဲ “ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်.” (ရိမ့ၤ ၁၂:၁၅) ဒီပုၢ်ဝဲၢ်မုၣ် ကဲဘံၤန့ၣ် ခီဖျိလၢအဝၤသံအဃိ အဝဲတဲဝဲလၢ တဘျီတခီၣ် အဝဲပာ်ဖျါထီၣ်အတၢ်တူၢ်ဘၣ်တဘၣ်ဘၣ် အိၣ်ဒၣ်အဝဲဟီၣ်ဝဲန့ၣ်လီၤ. အဝဲတဲကဒီးဝဲလၢ “လၢတၢ်န့ၣ်အဃိ ဖဲယသကိးသ့ၣ်တဖၣ် ဟီၣ်ဒီးယၤအခါ ယဒိးန့ၢ်ဘၣ်တၢ်မၤမုာ်ထီၣ်က့ၤန့ၣ်လီၤ. ဖဲအဝဲသ့ၣ်ဟီၣ်ဒီးယၤအခါ ယတတူၢ်ဘၣ်လၢ ယသးအုးထဲတဂၤဧိၤဘၣ်.”
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ ကရံၣ်သူး ၁:၂၂) လၢအစဲဃာ်ပနီၣ်ပှၤ, ဒီးဟ့ၣ်လီၤသးအတၢ်ဟ့ၣ်ကီၤလၢ ပသးကံၢ်ပူၤလီၤ.
ပှၤဖးလံာ်ဖိတဖၣ် အတၢ်သံကွၢ်
တၢ်စဲဃာ်ပနီၣ် ဒီးတၢ်ဟ့ၣ်ကီၤလၢ ခရံာ်ဖိလၢအဘၣ်တၢ်ဒိးဖှူအီၤတဖၣ် ဒိးန့ၢ်ဘၣ်ဝဲလၢယွၤန့ၣ် မ့ၢ်မနုၤလဲၣ်.—၂ ကရံၣ်. ၁:၂၁, ၂၂.
▪ တၢ်ဟ့ၣ်ကီၤ– လံာ်တဘ့ၣ်ပာ်ဖျါဝဲ ၂ ကရံၣ်သူး ၁:၂၂ အပူၤ ကြံးအတၢ်ကတိၤလၢ ဘၣ်တၢ်ကွဲးကျိာ်က့ၤလၢ “တၢ်ဟ့ၣ်ကီၤ” န့ၣ်မ့ၢ်ဝဲ “တၢ်ကတိၤလၢဘၣ်ဃးဒီး သဲစးဒီးတၢ်ပနံာ်တၢ်ကၤ” န့ၣ်လီၤ. ဒီးအခီပညီအိၣ်လၢ “တၢ်ဟ့ၣ်လီၤစ့ အဆိကတၢၢ်တဘျီ, ပာ်လီၤ, တၢ်ဟ့ၣ်ဆိစ့, တၢ်ပာ်ကီၤတၢ်လီၤ. ပှၤဟ့ၣ်ဆိပာ်စ့တစဲးလၢ တၢ်လၢပှၤအဲၣ်ဒိးပှ့ၤအီၤတခါအဂီၢ်လီၤ. အဃိ လံာ်အုၣ်သးအံၤ ပာ်ဂၢၢ်ပာ်ကျၢၤဝဲလၢ ပှၤကြၢးဒိးန့ၢ်ဘၣ်တၢ်လီၤ. ခိၣ်ဖးလၢ ပှၤဘၣ်တၢ်ဒိးဖှူအီၤတဖၣ် ကဒိးန့ၢ်ဘၣ်ဝဲအဂ့ၢ်န့ၣ် ပထံၣ်ဘၣ်ဖဲ ၂ ကရံၣ်သူး ၅:၁-၅ အပူၤလီၤ. အဝဲသ့ၣ် ကဒိးန့ၢ်ဘၣ် အက့ၢ်အဂီၤလၢ အအုၣ်တသ့ဘၣ် လၢမူခိၣ် တကးဒံးဘၣ် ကဒိးန့ၢ်ဘၣ် တၢ်ဆိၣ်ဂ့ၤလၢ အသံတသ့ဘၣ်လီၤ.—၁ ကရံၣ်. ၁၅:၄၈-၅၄.
ခ့ခါကြံးသူဝဲ တၢ်ကတိၤအံၤ ဘၣ်ထွဲလိာ်အသးဒီး ပသံးဖဲပှၤသ့ၣ်နံၤဖးသီ လၢတၢ်ဖျီအဂီၢ်အခါလီၤ. တၢ်အဒိအံၤ ဘၣ်တၢ်သူအီၤလၢ ပှၤလၢကကဲထီၣ် ခရံာ်အတလးမူးပိာ်မုၣ်တဖၣ်အဂီၢ်အဃိ ကြၢးဝဲဘၣ်ဝဲလီၤ.—၂ ကရံၣ်. ၁၁:၂; လီၣ်. ၂၁:၂, ၉.
▪ တၢ်စဲဃာ်ပနီၣ်– လၢပျၢၤန့ၣ် ပှၤမၤတၢ်စဲပနီၣ် ဒ်သိးကပာ်ဖျါတၢ်အုၣ်သးလၢ ပှၤတဂၤအတၢ်, တၢ်မ့ၢ်တၢ်တီ, တၢ်သးလီၤပလိာ်လိာ်သးအဂီၢ်လီၤ. ပှၤလၢအဘၣ်တၢ်ဒိးဖှူအီၤတဖၣ်န့ၣ် ဘၣ်တၢ် “စဲဃာ်ပနီၣ်” ခီဖျိယွၤအသးစီဆှံ ဒီးအဝဲသ့ၣ်ကဲထီၣ်ဝဲ ယွၤအတၢ်လီၤ. (အ့း. ၁:၁၃, ၁၄) ဘၣ်ဆၣ် တၢ်စဲဃာ်ပနီၣ်အံၤ လီၤမၢ်ကွံာ်ဝဲသ့လီၤ. မ့မ့ၢ်တၢ်စဲဃာ်ပနီၣ်လၢ အလီၤမၢ်တသ့ဘၣ်န့ၣ် ကဒိးန့ၢ်ဘၣ်ဝဲဖဲ တချုးလၢအသံဒံးဘၣ် မ့တမ့ၢ် တချုးလၢ တၢ်နးတၢ်ဖှီၣ်ဖးဒိၣ် စးထီၣ်အသးဒံးဘၣ် တၢ်ဆၢကတီၢ်တတီၤတီၤန့ၣ်လီၤ.—အ့း. ၄:၃၀; လီၣ်. ၇:၂-၄.
(၂ ကရံၣ်သူး ၂:၁၄-၁၆) ဒီးယွၤလၢ အဒုးနဲၣ်ဖျါထီၣ် အတၢ်မၤနၢၤပှၤလၢ ခရံာ်အပူၤတဘိယူၢ်ဃီ, ဒီးလီၣ်ဖျါထီၣ် အတၢ်သ့ၣ်ညါအတၢ်နၢမူကိးပူၤဒဲး လၢပစုပူၤန့ၣ်, မ်ပှၤစံးထီၣ်ပတြၢၤ အဘျုးအဖှိၣ်တက့ၢ်. ၁၅ အဂ့ၢ်ဒ်အံၤ, လၢပှၤလၢအတုၤလၢ တၢ်အုၣ်က့ၤခီၣ်က့ၤအဂီၢ်, ဒီးလၢပှၤလၢအတုၤလၢ တၢ်ဟးဂီၤအဂီၢ်, ပမ့ၢ်ခရံာ်အတၢ်နၢမူလၢ ယွၤအမဲာ်ညါလီၤ. ၁၆ လၢပှၤအံၤအဂီၢ် ပမ့ၢ်တၢ်သံအနၢ မူဆူတၢ်သံလီၤ. မ့မ့ၢ်လၢအဝဲသ့ၣ်အဂီၢ်, ပမ့ၢ်တၢ်မူ အနၢမူဆူတၢ်မူလီၤ. ဒီးလၢတၢ်အံၤအဂီၢ်, မ့ၢ်မတၤမၤတၢ်သ့ တဂၤလဲၣ်.
တၢး၁၀ ၈/၁ ကဘျံးပၤ ၂၃
မ့ၢ်နသ့ၣ်ညါဧါ.
ဖဲတၢ်မၢဖိပီလူး တဲဝဲလၢ ဘၣ်ဃးဒီး “တၢ်မၤနၢၤ” အဂ့ၢ်အခါ အဝဲအဲၣ်ဒိးတဲဝဲ တၢ်မနုၤလဲၣ်.
▪ စီၤပီလူး ကွဲးဝဲလၢ “ဒီးယွၤလၢ အဒုးနဲၣ်ဖျါထီၣ် အတၢ်မၤနၢၤပှၤလၢ ခရံာ်အပူၤတဘိယူၢ်ဃီ, ဒီးလီၣ်ဖျါထီၣ်အတၢ်သ့ၣ်ညါအတၢ်နၢမူကိးပူၤဒဲး လၢပစုပူၤန့ၣ်, မ်ပှၤစံးထီၣ်ပတြၢၤအဘျုးအဖှိၣ်တက့ၢ်. အဂ့ၢ်ဒ်အံၤ, လၢပှၤလၢအတုၤလၢ တၢ်အုၣ်က့ၤခီၣ်က့ၤအဂီၢ်, ဒီးလၢပှၤလၢအတုၤလၢတၢ်ဟးဂီၤအဂီၢ်, ပမ့ၢ်ခရံာ်အတၢ်နၢမူလၢယွၤအမဲာ်ညါလီၤ. လၢပှၤအံၤအဂီၢ်ပမ့ၢ်တၢ်သံအနၢမူဆူတၢ်သံလီၤ. မ့မ့ၢ်လၢအဝဲသ့ၣ်အဂီၢ်, ပမ့ၢ်တၢ်မူအနၢမူဆူတၢ်မူလီၤ. ဒီးလၢတၢ်အံၤအဂီၢ်, မ့ၢ်မတၤမၤတၢ်သ့တဂၤလဲၣ်.”—၂ ကရံၣ်သူး ၂:၁၄-၁၆.
စီၤပီလူး ကအဲၣ်ဒိးတဲဝဲ ပှၤလဲၤတရံးတၢ်အမူးပွဲလၢ ပှၤရိမ့ၤဖိတဖၣ် မၤဝဲဒ်သိးကမၤလၤကပီၤ အသုးခိၣ်လၢ အမၤနၢၤ အဒုၣ်အဒါတဖၣ်လီၤ. ဖဲပှၤမၤမူးပွဲအံၤအဆၢကတီၢ် ပှၤကမျၢၢ်တဖၣ် မၤလၤကပီၤဝဲ သုးခိၣ်ဒီးအသုးမုၢ်တဖၣ် ဒီးတကတီၢ်ဃီန့ၣ် အဝဲသ့ၣ်ပာ်ဖျါထီၣ်ဝဲ တၢ်ဖိတၢ်လံၤလၢ အဒိးန့ၢ်ဘၣ်ဝဲလၢ အဒုၣ်အဒါတဖၣ်အအိၣ် ဒီးပှၤလၢအဝဲသ့ၣ်ဖီၣ်န့ၢ်ဝဲတဖၣ်လီၤ. တကးဒံးဘၣ် အဝဲသ့ၣ်ဟဲစိာ်ဝဲ ကျီၢ်တဖၣ်လၢ ကလုၢ်ထီၣ်တၢ်အဂီၢ်လီၤ. ဖဲအဝဲသ့ၣ် လဲၤတရံးတၢ်ဝံၤအခါ လုၢ်ထီၣ်ဝဲကျီၢ်တဖၣ်လီၤ. ဒီးမၤသံကွံာ်ဝဲ ဒုၣ်ဒါလၢအဖီၣ်န့ၢ်ဝဲတဖၣ်အါမးလီၤ.
လံာ်တဘ့ၣ် လၢအမ့ၢ် The International Standard Bible Encyclopedia ပာ်ဖျါဝဲလၢ တၢ်ကတိၤဒိလၢအမ့ၢ် “ခရံာ်အတၢ်နၢမူ” လၢအမ့ၢ် တၢ်မူလၢပှၤတနီၤအဂီၢ် ဒီးတၢ်သံလၢပှၤတနီၤအဂီၢ်န့ၣ် “ကဟဲလီၤစၢၤလၢ ပှၤရိမ့ၤဖိတဖၣ် အလုၢ်လၢ်လၢမၤဝဲ ပှၤလဲၤတရံးတၢ် အမူးပွဲအခါ ဒွဲၣ်ဝဲတၢ်နၢမူန့ၣ်လီၤ. တၢ်နၢမူလၢ အခၢၣ်စးဝဲ တၢ်မၤနၢၤအံၤန့ၣ် ဒုးသ့ၣ်ညါဝဲ ဒုၣ်ဒါလၢ ဘၣ်တၢ်ဖီၣ်န့ၢ်အီၤတဖၣ်လၢ တယံာ်လၢၤဘၣ်အဝဲသ့ၣ် ကဘၣ်တၢ်မၤသံအီၤန့ၣ်လီၤ.”
တၢ်ဖးလံာ်စီဆှံ
(၂ ကရံၣ်သူး ၃:၁-၁၈) မ့ၢ်ပမၤထီၣ်သီကဒီး တၢ်စံးထီၣ်ပတြၢၤလီၤက့ၤပသးန့ၣ်ဧါ. မ့ၢ်ပန့ၢ်လံာ်တူၢ်လိာ်တၢ်, ဒ်ပှၤတနီၤနီၤအသိး ဆူသုအိၣ်မ့ၢ်ဂ့ၤ, လံာ်တူၢ်လိာ်တၢ်လၢ သုအိၣ်မ့ၢ်ဂ့ၤ, အလီၢ်အိၣ်ဧါ. ၂ သုဝဲသ့ၣ်, သုမ့ၢ်ပလံာ်ကွဲးအသးလၢပသးအလိၤ, ဒီးပှၤကညီသ့ၣ်ညါဝဲဒီး ဖးဝဲခဲလၢာ်လီၤ. ၃ သုအိၣ်ဖျါလၢ သုမ့ၢ်ခရံာ်အလံာ်လၢ ပမၤအီၤ, အိၣ်ကွဲးအသးလၢ ကသံၣ်ထံတမ့ၢ်ဘၣ်, မ့ၢ်လၢယွၤလၢ အမူဝဲတဂၤန့ၣ်အသး, လၢလၢၢ်ဘ့ၣ်ဘၣ်အလိၤတမ့ၢ်ဘၣ်, မ့ၢ်လၢသးအဖံးအညၣ် ဘ့ၣ်ဘၣ်အလိၤလီၤ. ၄ ဒီးပအိၣ်ဒီးတၢ်နာ်ယွၤ ဒ်န့ၣ်လၢခရံာ်အဃိလီၤ. ၅ တမ့ၢ်ဘၣ်ပသ့တၢ်လၢ ပကစၢ်ဒၣ်ပဝဲလၢ ပကကူၣ်တၢ်တမံၤမံၤဒ်လၢပကစၢ်ဒၣ် ပဝဲအသိးဘၣ်. မ့မ့ၢ်ပသ့တၢ်န့ၣ် မ့ၢ်လၢယွၤလီၤ. ၆ ဒီးအဝဲဒၣ်မၤသ့ထီၣ်ပှၤ, ဒ်သိးပကကဲထီၣ် တၢ်အၢၣ်လီၤအီလီၤအသီအခ့အပှၤ ဘၣ်ဃးဒီးလံာ်ဖျၢၣ်တမ့ၢ်ဘၣ်, မ့ၢ်အဘၣ်ဃးဒီးသးလီၤ. အဂ့ၢ်ဒ်အံၤ, လံာ်ဖျၢၣ်မၤသံတၢ်, မ့မ့ၢ်သးန့ၣ်မၤမူတၢ်လီၤ. ၇ ဘၣ်ဆၣ် ဒီးတၢ်မၤလိာ်ဘၣ်ဃးဒီးတၢ်သံ, ကွဲးအသးလၢလၢၢ်အလိၤ, မ့ၢ်အိၣ်ဒီးအလၤအကပီၤ တုၤဒၣ်လဲာ် ပှၤအံၣ်စရ့လးဖိကွၢ်ထံကွၢ်ဆး စီၤမိၤၡ့ အမဲာ်တကဲဘၣ်လၢ အမၤအလၤကပီၤလၢ အကဟါမၢ်တ့ၢ်ဝဲအဃိဒီး, ၈ တၢ်မၤလိာ်ဘၣ်ဃးဒီးသးကအိၣ်ဒီး အလၤအကပီၤဒိၣ်န့ၢ်အန့ၣ်တက့ၢ်, တမ့ၢ်ဘၣ်ဧါ. ၉ အဂ့ၢ်ဒ်အံၤ, တၢ်မၤလိာ်ဘၣ်ဃးဒီး တၢ်စံၣ်ညီၣ်ဃၣ် မ့ၢ်အိၣ်ဒီးအလၤအကပီၤဒီး, တၢ်မၤလိာ်ဘၣ်ဃးဒီး တၢ်တီတၢ်လိၤ, အလၤအကပီၤ အိၣ်ဒိၣ်န့ၢ်အါန့ၢ်အန့ၣ်တက့ၢ်လီၤ. ၁၀ အဂ့ၢ်ဒ်အံၤ, တၢ်လၢအအိၣ်တ့ၢ်ဒီး အလၤကပီၤန့ၣ်, အလၤကပီၤတအိၣ်လၢၤဘၣ်, လၢတၢ်အိၣ်ဒီး အလၤကပီၤဒိၣ်ဝဲန့ၣ်အဃိလီၤ. ၁၁ အဂ့ၢ်ဒ်အံၤ, တၢ်လၢအဟါမၢ်မ့ၢ်အိၣ်ဒီး အလၤကပီၤဒီး, တၢ်လၢအအိၣ်ဝဲဆိးဝဲန့ၣ်, အိၣ်ဒီးအလၤကပီၤ ဒိၣ်န့ၢ်အါန့ၢ်အန့ၣ်တက့ၢ်လီၤ. ၁၂ မၤသးဒ်န့ၣ်ဒီး ပအိၣ်ဒီးတၢ်မုၢ်လၢ် ထဲထဲအံၤဒီး, ပကတိၤတၢ်လၢတၢ်အိၣ်ဖျါဖးဒိၣ်လီၤ. ၁၃ ဒီးတမ့ၢ်ဘၣ်ဒ် စီၤမိၤၡ့လၢအကျၢၢ်ဘၢ ထီၣ်အမဲာ်, ဒ်သိးပှၤအံၣ်စရ့လးဖိ သုတကွၢ်ထံတၢ်လၢ အဟါမၢ်န့ၣ်အကတၢၢ်တဂ့ၤ, အသိးဘၣ်. ၁၄ ဘၣ်ဆၣ်ဒီးအဝဲသ့ၣ် အသးသ့ၣ်ညါနၢ်ပၢၢ်တၢ်န့ၣ်, ကိၤထီၣ်လီၤ. ၁၅ အဂ့ၢ်ဒ်အံၤ, တုၤမုၢ်မဆါတနံၤအံၤ, လၢပှၤဖးလံာ် တၢ်အၢၣ်လီၤအီလီၤလီၢ်လံၤန့ၣ်ဒီး, နီၣ်ကျၢၢ်ဘၢမဲာ်အံၤ, အိၣ်ဒၣ်တၢ်, ဒီးတအိၣ်ဖျါထီၣ်ဘၣ်လၢ တၢ်အံၤလၢထီၣ်ပှဲၤထီၣ်လၢ ခရံာ်အပူၤဘၣ်. ၁၆ ဘၣ်ဆၣ် ဒီးတုၤမုၢ်မဆါတနံၤအံၤ, တုၤပှၤဖးစီၤမိၤၡ့ဒီး, နီၣ်ကျၢၢ်ဘၢမဲာ်န့ၣ်အိၣ်လၢအသးအလိၤလီၤ. ဘၣ်ဆၣ်ဒီး တုၤမ့ၢ်အဃၣ်က့ၤအသးဆူ ကစၢ်အအိၣ်ဒီး, တၢ်ဟံးထီၣ်ကွံာ် နီၣ်ကျၢၢ်ဘၢမဲာ်န့ၣ်လီၤ. ၁၇ ဒီးကစၢ်မ့ၢ်သးန့ၣ်, ဒီးဖဲဒၣ်ကစၢ်အသးအိၣ်ဝဲန့ၣ်, တၢ်ထူၣ်ဖျဲးအိၣ်ဝဲလီၤ. ၁၈ မ့မ့ၢ်ပဝဲဒၣ်ခဲလၢာ်အံၤ, ပမဲာ်တကျၢၢ်ဘၢဘၣ်ဒီး, ပကွၢ်ကစၢ်အလၤကပီၤ ဒ်လၢမဲာ်ထံကလၤအပူၤအသိးသတးဒီး, ပဘၣ်တၢ်လဲလိာ်ပသးဆူ တၢ်အက့ၢ်အဂီၤတမံၤဃီအံၤ, လၢတၢ်လၤကပီၤဆူတၢ်လၤကပီၤ, ဒ်လၢကစၢ်အသးအသိးန့ၣ်လီၤ.