“သုးဘူးသုသးဆူ ကစၢ်ယွၤအအိၣ်တက့ၢ်. ဒီးအဝဲ ကသုးဘူးအသး ဆူသုအိၣ်လီၤ.”—ယၤကိာ် ၄:၈
ကစၢ်ယွၤ ဒိကနၣ် ပတၢ်ထုကဖၣ် နီၢ်ကီၢ်ဧါ
ဖဲနဃ့ထုကဖၣ်အခါ နဆိကမိၣ်လၢ ကစၢ်ယွၤ တဒိကနၣ် နတၢ်ထုကဖၣ်ဘၣ်န့ၣ် အိၣ်တဘျီဘျီဧါ. ပှၤအါဂၤ ဆိကမိၣ်ဘၣ်ဝဲဒ်န့ၣ်. ပှၤအါဂၤဃ့လၢ ကစၢ်ယွၤ ကမၤစၢၤအဝဲသ့ၣ် ဘၣ်ဃးဒီး အတၢ်ကီတၢ်ခဲ ဘၣ်ဆၣ် အတၢ်ကီတၢ်ခဲအိၣ်ဒံး. အဃိ မ့ၢ်ကစၢ်ယွၤ တဒိကနၣ် အဝဲသ့ၣ် အတၢ်ထုကဖၣ်ဘၣ်ဧါ. တမ့ၢ်ဒ်န့ၣ်ဘၣ်. လံာ်စီဆှံ အၢၣ်လီၤဝဲလၢ ပမ့ၢ်ဃ့ထုကဖၣ် လၢကျဲလၢအဘၣ် ကစၢ်ယွၤအသးန့ၣ် အကဒိကနၣ် ပတၢ်ထုကဖၣ်. လံာ်စီဆှံ တဲဝဲဒ်လဲၣ်န့ၣ် ပကကွၢ်သကိး.
ကစၢ်ယွၤ ဒိကနၣ် တၢ်ထုကဖၣ် သပှၢ်တၢၢ်.
“အိ ပှၤလၢအဒိကနၣ် တၢ်ထုကဖၣ်တဂၤဧၢ, ပှၤအကလုာ်ကလုာ် ကဟဲလၢနအိၣ်လီၤ.”—စံးထီၣ်ပတြၢၤ ၆၅:၂.
ပှၤတနီၤ ဆိကမိၣ်ဝဲလၢ ကစၢ်ယွၤ တဒိကနၣ် တၢ်ထုကဖၣ်ဘၣ်. သနာ်က့ အဝဲသ့ၣ် တူၢ်ဘၣ်ဝဲလၢ အမ့ၢ်ဃ့ထုကဖၣ်န့ၣ် ကမၤစၢၤအီၤဒ်သိး အလဲၤခီဖျိ အတၢ်ကတီတၢ်ခဲကန့ၢ် ဒီးအသးကမုာ်ထီၣ်က့ၤ တစိၢ်ဖိအဃိ အဃ့ထုကဖၣ်တၢ်. ဘၣ်ဆၣ် တၢ်ထုကဖၣ်န့ၣ် တမ့ၢ်တၢ်လၢ အကမၤစၢၤပှၤ ထဲတစိၢ်ဖိဘၣ်. လံာ်စီဆှံ အၢၣ်လီၤဝဲလၢ “ယဟိဝၤယွၤa အိၣ်ဘူးဒီး ပှၤလၢအကိးထီၣ်အီၤ ဒီးပှၤလၢ အကိးထီၣ်အီၤလၢ တၢ်သူၣ်ဘျၢသးဘျၢ အပူၤ ခဲလၢာ်လီၤ. . . . အဝဲနၢ်ဟူ အဝဲသ့ၣ် အတၢ်ကိးပသူထီၣ်လၢ တၢ်မၤစၢၤအဂီၢ်.”—စံးထီၣ်ပတြၢၤ ၁၄၅:၁၈, ၁၉.
အဃိ ပနာ်သ့သပှၢ်တၢၢ်လၢ ယဟိဝၤယွၤနၢ်ဟူဝဲ ပှၤလၢ အဘူၣ်ထီၣ်ဘါထီၣ်အီၤတဖၣ် အတၢ်ထုကဖၣ်. ယဟိဝၤယွၤ တဲဝဲလၢ “သုကကိးထီၣ်ယၤ ဒီးဟဲဃ့ထုကဖၣ် လၢယအိၣ် ဒီးယကဒိကနၣ်သုလီၤ.”—ယံးရမံယၤ ၂၉:၁၂.
ကစၢ်ယွၤ အဲၣ်ဒိးလၢ နကဃ့ထုကဖၣ် လၢအအိၣ်.
“ဆဲးဃ့ထုကဖၣ်တၢ် ထီဘိ.”—ရိမ့ၤ ၁၂:၁၂.
လံာ်စီဆှံ တဲဘၣ်ပှၤလၢ “ဃ့ထုကဖၣ်တၢ် ထီဘိ” ဒီး “ဆဲးဃ့ထုကဖၣ်တၢ် ကိးဆၢကတီၢ်ဒဲး.” အဃိ ပသ့ၣ်ညါဘၣ်လၢ ယဟိဝၤယွၤ အဲၣ်ဒိးလၢ ပကဃ့ထုကဖၣ် လၢအအိၣ်.—မးသဲ ၂၆:၄၁; အ့းဖ့းစူး ၆:၁၈.
ဘၣ်မနုၤအဃိ ကစၢ်ယွၤ အဲၣ်ဒိးလၢ ပကဃ့ထုကဖၣ် လၢအအိၣ်လဲၣ်. ဆိကမိၣ်ကွၢ် တၢ်ဂ့ၢ်အံၤ. ပါတဂၤ အဖိမ့ၢ်ဃ့အီၤ တၢ်မၤစၢၤန့ၣ် အကသးခုဒိၣ်မး. အဖိတၢ်တူၢ်ဘၣ် အိၣ်ဒ်လဲၣ် ဒီးအလိၣ်ဘၣ် မနုၤလဲၣ်န့ၣ် ဘၣ်သ့ၣ်သ့ၣ် အသ့ၣ်ညါဝဲလံ. ဘၣ်ဆၣ် ဖဲအနၢ်ဟူလၢ အဖိဃ့အီၤ တၢ်မၤစၢၤအခါ အသ့ၣ်ညါဘၣ်ဝဲလၢ အဖိအဲၣ်အီၤ ဒီးနာ်န့ၢ်အီၤ. ဒ်န့ၣ်အသိး ဖဲပဃ့ထုကဖၣ်လၢ ယဟိဝၤယွၤ အအိၣ်အခါ ပပာ်ဖျါထီၣ်လၢ ပနာ်န့ၢ်အီၤ ဒီးပအဲၣ်ဒိး မၤဂ့ၤထီၣ် ပတၢ်ရ့လိာ်သးဒီးအီၤ.—ကတိၤဒိ ၁၅:၈; ယၤကိာ် ၄:၈.
ကစၢ်ယွၤ သးအိၣ်နၤ နီၢ်ကီၢ်.
“မ့ၢ်လၢ ကစၢ်ယွၤ သးအိၣ်သုအဃိ ပာ်ထီၣ် သုတၢ်ဘၣ်ယိၣ်ဘၣ်ဘှီခဲလၢာ်လၢ အအိၣ်တက့ၢ်.”—၁ ပ့းတရူး ၅:၇.
ကစၢ်ယွၤအဲၣ်ပှၤ ဒီးသးအိၣ်ပှၤ ဒိၣ်မးအဃိ အအဲၣ်ဒိးလၢ ပကဃ့ထုကဖၣ် လၢအအိၣ်. ပထံၣ်ဘၣ် တၢ်ကီတၢ်ခဲ ဒီးပဘၣ်ယိၣ်တၢ်န့ၣ် ကစၢ်ယွၤ သ့ၣ်ညါဝဲခဲလၢာ် ဒီးအသးအိၣ် မၤစၢၤပှၤ.
လၢစီၤပၤဒၤဝံး အတၢ်အိၣ်မူ ဒီတစိၤညါန့ၣ် အဃ့ထုကဖၣ်လၢ ယဟိဝၤယွၤအအိၣ်, ဃ့အတၢ်မၤစၢၤ ဒီးတဲဘၣ်အီၤလၢ အတၢ်ဆိကမိၣ် ဒီးအတၢ်တူၢ်ဘၣ်. (စံးထီၣ်ပတြၢၤ ၂၃:၁-၆) စီၤဒၤဝံးန့ၣ် ကစၢ်ယွၤ ထံၣ်အီၤဒ်လဲၣ်. ကစၢ်ယွၤ အဲၣ်စီၤဒၤဝံး ဒီးဒိကနၣ် အတၢ်ထုကဖၣ် အဘျီအါမး. (မၤတၢ် ၁၃:၂၂) ဒ်န့ၣ်အသိး ကစၢ်ယွၤအဲၣ်ပှၤ ဒီးသးအိၣ်ပှၤအဃိ အဒိကနၣ် ပတၢ်ထုကဖၣ်.
“ယအဲၣ် ယဟိဝၤယွၤ မ့ၢ်လၢအနၢ်ဟူ ယကလုၢ်”
တၢ်ကတိၤတဖၣ်အံၤ အကဲဝဲ ပှၤကွဲးထါစံးထီၣ်ပတြၢၤတဂၤ အတၢ်ကတိၤ. အသ့ၣ်ညါလၢ ကစၢ်ယွၤ နၢ်ဟူ အတၢ်ထုကဖၣ်အဃိ ကဲဘျုးလၢအဂီၢ်ဒိၣ်မး. အတူၢ်ဘၣ်လၢ အတၢ်ရ့လိာ်သးဒီး ယဟိဝၤယွၤ ဂ့ၤဒိၣ်ထီၣ် ဒီးအအိၣ်ဒီး တၢ်ဂံၢ်တၢ်ဘါလၢ အကလဲၤခီဖျိ တၢ်ကိၢ်တၢ်ဂီၤ ဒီးတၢ်သးအုး.—စံးထီၣ်ပတြၢၤ ၁၁၆:၁-၉.
ပမ့ၢ်နာ်သပှၢ်တၢၢ်လၢ ကစၢ်ယွၤနၢ်ဟူ ပတၢ်ထုကဖၣ်န့ၣ် ပကဆဲးဃ့ထုကဖၣ် လၢအအိၣ်. ဆိကမိၣ်ကွၢ် ဖဲဒြိၤအတၢ်လဲၤခီဖျိအံၤ. ဖဲဒြိၤန့ၣ် အအိၣ်လၢ ကီၢ်စပ့ၣ် အကလံၤစိးတခီ. ခီဖျိလၢ ကါဘၣ်တဲးအဃိ အဖိခွါလၢအသးအိၣ် ၁၉ နံၣ်တဂၤသံဝဲ. ဖဲဒြိၤ သးအုးဒိၣ်မးအဃိ အတဲဘၣ် ကစၢ်ယွၤလၢ အတၢ်တူၢ်ဘၣ် လီၤတံၢ်လီၤဆဲး. အဃ့ထုကဖၣ် ခဲအံၤခဲအံၤ ဒ်သိးအကဒိးန့ၢ်ဘၣ် တၢ်မၤစၢၤ ဒီးတၢ်မၤမုာ်ထီၣ်က့ၤသး. အမၤဝဲဒ်န့ၣ်အဃိ တၢ်ကဲထီၣ်သးဒ်လဲၣ်. ဖဲဒြိၤ တဲဝဲလၢ “ယဟိဝၤယွၤ စံးဆၢ ယတၢ်ထုကဖၣ် ခီဖျိအသူဝဲ ခရံာ်ဖိဒီပုၢ်ဝဲၢ်မုၣ်ခွါ လၢကမၤစၢၤ ဒီးမၤမုာ်ထီၣ်က့ၤ ယၤဒီးယမါ အသး.”
ယဟိဝၤယွၤ စံးဆၢပတၢ်ထုကဖၣ် ခီဖျိအသူဝဲ ပသကိးလၢ အအဲၣ်ပှၤ ဒ်သိးကမၤစၢၤပှၤ ဒီးမၤမုာ်ထီၣ်က့ၤပသး
ခဲအံၤ ဖဲဒြိၤအဖိခွါ တဂဲၤဆၢထၢၣ် သမူထီၣ်က့ၤဒံးဘၣ် သနာ်က့ တၢ်ထုကဖၣ် မၤစၢၤအီၤ ဒီးအဟံၣ်ဖိဃီဖိ သပှၢ်တၢၢ်. အမါမရံယၤ ခါမဲၤ တဲဝဲလၢ “ဒ်သိး ယလဲၤခီဖျိ တၢ်သးအုးနးမး ကန့ၢ်အဂီၢ် တၢ်ထုကဖၣ် မၤစၢၤယၤ. ဖဲယဃ့ထုကဖၣ်အခါ ယဒိးန့ၢ်ဘၣ် တၢ်သူၣ်မံသးမုာ် ဒီးယသးဂၢၢ်ထီၣ်အဃိ ယသ့ၣ်ညါလၢ ယဟိဝၤယွၤ နၢ်ပၢၢ်ယတၢ်တူၢ်ဘၣ်.”
လံာ်စီဆှံ ဒီးပှၤဂၤအတၢ်လဲၤခီဖျိ ပာ်ဖျါထီၣ်ဝဲ ၡဲၡဲဖိလၢ ကစၢ်ယွၤ ဒိကနၣ် တၢ်ထုကဖၣ်. သနာ်က့ ကစၢ်ယွၤ တစံးဆၢ တၢ်ထုကဖၣ် ခဲလၢာ်ဘၣ်. တၢ်ထုကဖၣ်တနီၤန့ၣ် ဘၣ်မနုၤအဃိ ကစၢ်ယွၤ တစံးဆၢဝဲဘၣ်လဲၣ်.
a ယဟိဝၤန့ၣ် မ့ၢ်ဝဲကစၢ်ယွၤအမံၤ.—စံးထီၣ်ပတြၢၤ ၈၃:၁၈.