အဝဲသ့ၣ်ထံၣ်ဘၣ် ဒီပုၢ်ဝဲၢ်မုၣ်ခွါတဖၣ် တၢ်အဲၣ်

ယိၤမါရၤ ဒီးအဒ့ဖိ မါဆံလိၤ ဒီးဟါဘၢၤန့ၣ်​ အဝဲသ့ၣ်အိၣ်လၢ သဝီ ကွာ်ထံၣ်မၣ်လၣ်. ယိၤမါရၤ စးထီၣ်မၤလိလံာ်စီဆှံဒီး ယဟိဝၤပှၤအုၣ်အသး ဒီးလၢခံ အဒ့ဖိ ခံဂၤမၤလိလံာ်စီဆှံကၠ့ၤ. ဘၣ်ဆၣ်​ အဝဲသ့ၣ်​ ဒီပုၢ်ဝဲၢ်သၢဂၤလၢာ်န့ၣ်​ တထံၣ်တၢ်ဘၣ်​ ဒီးဖးလံာ်လၢ ပှၤမဲာ်တထံၣ်တၢ် အဂီၢ်တဘၣ်ကၠ့ၤဘၣ်. အဃိ ဒီပုၢ်ဝဲၢ်လၢ သိၣ်လိအဝဲသ့ၣ်​ လံာ်စီဆှံန့ၣ်​ ဖးန့ၢ်လံာ်အဆၢ ဒီးလံာ်စီဆှံဆၢ လၢအဝဲသ့ၣ်အဂီၢ်.

တၢ်အိၣ်ဖှိၣ်လီၢ်လၢ အဘူးဒီးအဝဲသ့ၣ်န့ၣ်​ ယံၤဝဲအမံးနံး ၄၀. ဘၣ်ဆၣ်​ ပှၤလဲၤဆှၢ အဝဲသ့ၣ်​ မ့ၢ်တအိၣ်ဘၣ်န့ၣ်​ အဝဲသ့ၣ်လဲၤထီၣ်လၢ အနီၢ်ကစၢ် တသ့ဘၣ်. နာ်က့ ဒီပုၢ်ဝဲၢ်မုၣ်ခွါတဖၣ်​ မၤစၢၤ အဝဲသ့ၣ်​ လၢကထီၣ်ဘၣ်​ တၢ်အိၣ်ဖှိၣ်ကီးဘျီဒဲး. ဒီးဖဲအဝဲသ့ၣ်န့ၢ်ဘၣ်​ ကၠိဖိမူဒါလၢ နွံဖးဖီတၢ်အိၣ်ဖှိၣ်ခါ ဒီပုၢ်ဝဲၢ်တဖၣ်​ မၤစၢၤအဝဲသ့ၣ်​ ဒ်သိးအဝဲသ့ၣ်တိၢ်နီၣ်တၢ်ဂ့ၢ် ကဘၣ်အဂီၢ်.

ဖဲ လါမ့ၤ ၂၀၁၉ န့ၣ်ပှၤစးထီၣ်​ ထီၣ်တၢ်အိၣ်ဖှိၣ်လၢ အဝဲသ့ၣ်သဝီ. ဖဲန့ၣ်အခါ ပှၤလဲၤလၢညါ ဒီမိၢ်ဝၤခံဂၤ ဟဲအိၣ်လၢ အဝဲသ့ၣ်သဝီလံ. ပှၤဒီမိၢ်ဝၤခံဂၤအံၤ အဝဲသ့ၣ်ဖးဒီးကွဲးလံာ်လၢ ပှၤမဲာ်တထံၣ်တၢ်ဘၣ်အဂီၢ် တဘၣ်ဘၣ်. နာ်က့ အဝဲသ့ၣ်ဘၣ်သး သိၣ်လိ ပှၤဒီပုၢ်ဝဲၢ်သၢဂၤအံၤ လၢအဝဲသ့ၣ်​ ဖးလံာ်ဒီးကွဲးလံာ် ကဘၣ်အဂီၢ်. အဃိ ပှၤဒီမိၢ်ဝၤခံဂၤအံၤ လဲၤလၢလံာ်ရိဒၢး ဒီးဟံန့ၢ်လံာ်လဲၢ်လၢ အဘၣ်ဃးဒီး ပှၤမဲာ်တထံၣ်တၢ်ဘၣ်. အဝဲသ့ၣ်မၤလိထီၣ်အသး ဒ်သိးကသိၣ်လိ ပှၤမဲာ်တထံၣ်တၢ်ဘၣ်​ လၢကဖးဒီးကွဲးလံာ်အဂီၢ်.

ပူၤကွံာ် စှၤကိာ်လါဘျီ ပှၤဒီပုၢ်ဝဲၢ်သၢဂၤအံၤ အဝဲသ့ၣ်ဖးလံာ်လၢ ပှၤမဲာ်တထံၣ်တၢ်ဘၣ်​ အဂီၢ်န့ၣ်ဘၣ်ဝဲ. အဃိ မၤစၢၤအဝဲသ့ၣ်​ လၢအတၢ်ရ့လိာ်သးဒီး ယဟိဝၤယွၤ ဂ့ၤဒိၣ်ထီၣ်. ခဲအံၤ ယိၤမါရၤ, မါဆံလိၤ ဒီးဟါဘၢၤန့ၣ်​ အဝဲသ့ၣ်​ မၤဝဲ ပှၤလဲၤလၢညါ. မါဆံလိၤကဲစ့ၢ်ကီး တၢ်အိၣ်ဖှိၣ်အပှၤမၤစၢၤတၢ်. ကိးနံၤဒဲးန့ၣ်​ အဝဲသ့ၣ်မၤယဟိဝၤယွၤ အတၢ်မၤဆူၣ်မး. အဃိ ဒီပုၢ်ဝဲၢ်လၢအတၢ်အိၣ်ဖှိၣ်ပူၤ ထံၣ်အဝဲသ့ၣ်​ တၢ်သးဆူၣ်ဘျီ အဝဲသ့ၣ်သးဆူၣ်ထီၣ်လၢ ကမၤယဟိဝၤယွၤ အတၢ်မၤစ့ၢ်ကီး.

ပှၤဒီပုၢ်ဝဲၢ် သၢဂၤအံၤ သးခုဒိၣ်မး ခီဖျိလၢ ဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်ပူၤ မၤစၢၤအဝဲသ့ၣ်အဃိ. ယိၤမါရၤတဲဝဲလၢ “စးထီၣ်လၢ ပထံၣ်လိာ်သးဒီး ယဟိဝၤပှၤအုၣ်အသးန့ၣ်​ ပထံၣ်ဘၣ်လၢ အဝဲသ့ၣ်ပာ်ဖျါထီၣ်​ ခရံာ်ဖိအတၢ်အဲၣ်နီၢ်နီၢ်.” မါဆံလိၤစ့ၢ်ကီး တဲဝဲလၢ “လၢတၢ်အိၣ်ဖှိၣ်ပူၤ ပအိၣ်ဒီးသကီးလၢအဂ့ၤဒီဒူၣ်​ ဒီးပအိၣ်ဒီးဟံၣ်ဖိဃီဖိလၢ ဟီၣ်ခိၣ်ဒီဘ့ၣ်​ လၢအအိၣ်ဃူဃူဖိးဖိး ဒီးအဲၣ်လိာ်သး.” ယိၤမါရၤဒီးအဒ့ဖိန့ၣ်​ အဝဲသ့ၣ်အိၣ်ခီးကွၢ်လၢ် တၢ်ဆၢကတီၢ်လၢ ယဟိဝၤယွၤ ကမၤကဲထီၣ်က့ၤ ဟီၣ်ခိၣ်အံၤလၢ ပၤရဒံစူး.—စံးထီၣ်ပတြၢၤ ၃၇:၁၀, ၁၁; ယၡါယၤ ၃၅:၅.