တၢ်လီၤလးလၢ ယ့ၣ်ၡူးမၤဝဲန့ၣ်​ ပန့ၢ်ဘၣ်တၢ်မၤလိဒ်လဲၣ်

၁. ယ့ၣ်ၡူး မၤတၢ်လီၤလး အဆိကတၢၢ်တဘျီဖဲလဲၣ်​ ဒီးအမၤဝဲ မနုၤလဲၣ်.

ထံၣ်တမှံကွၢ်ဖဲ ခ.န ၂၉ န့ၣ်ယ့ၣ်ၡူးစးထီၣ်မၤဝဲ တၢ်စံၣ်တဲၤတဲလီၤတၢ်မၤ. ဘၣ်တဘျီ ယ့ၣ်ၡူးဒီးအမိနီၢ်မၤရံ ဒီးအပျဲၢ်အဘီၣ်တနီၤ လဲၤလၢတၢ်ဖျီအမူး လၢကၤနါ လၢအအိၣ်ဘူးဒီး ယ့ၣ်ၡူးအိၣ်တၢ်လီၢ် ဖဲဝ့ၢ်နစၤရ့း. နီၢ်မၤရံဒီသကီးဒီး တလးမူးပိာ်မုၣ်​ ဒီးတလးမူးပိာ်ခွါ အဟံၣ်ဖိဃီဖိအဃိ အကွၢ်ထွဲစၢၤဝဲ ပှၤတမှံၤလၢအဟဲလၢ တၢ်ဖျီအမူး. သနာ်က့ တချုးဖဲတၢ်ဖျီအမူးဝံၤဒံးဘၣ်န့ၣ်​ စပံးထံလၢပှၤကဟ့ၣ်အီ ပှၤတမှံၤန့ၣ်​ တအိၣ်လၢၤဘၣ်.b တၢ်ကဲထီၣ်သးကၠဲအံၤန့ၣ်​ ကမၤမဲာ်ဆှးဝဲ တလးမူးခံဂၤအံၤ ဒီးအဟံၣ်ဖိဃီဖိဒိၣ်မး. အဃိ နီၢ်မၤရံလဲၤတဲဘၣ်​ ယ့ၣ်ၡူးလၢ “အဝဲသ့ၣ်​ အစပံးထံ တအိၣ်လၢၤဘၣ်.” (ယိၤဟၣ်​ ၂:၁-၃) ယ့ၣ်ၡူးမၤဝဲဒ်လဲၣ်. ယ့ၣ်ၡူးမၤဝဲတၢ်လီၤလးတခါလၢ အမၤကဲထီၣ်ထံလၢ “စပံးထံလၢအဂ့ၤ.”—ယိၤဟၣ်​ ၂:၉, ၁၀.

၂-၃. (က) ယ့ၣ်ၡူးမၤတၢ်လီၤလး မနုၤလဲၣ်. (ခ) ပမ့ၢ်ဆိမိၣ်ထံ ယ့ၣ်ၡူးမၤတၢ်လီၤလးအဂ့ၢ်န့ၣ်​ ကမၤစၢၤပှၤဒ်လဲၣ်.

^၂ ဖဲယ့ၣ်ၡူး မၤတၢ်စံၣ်တဲၤတဲလီၤတၢ်မၤ အဆၢကတီၢ်န့ၣ်​ အမၤတၢ်လီၤလး လၢအဂၤ ဒီဒူၣ်.c အသူဝဲတၢ်စိတၢ်ကမီၤ ဒီးမၤစၢၤပှၤလၢ အကလးတဖၣ်ညါ. အဒိ အမၤတၢ်လီၤလးလၢ အဒုးအီၣ်ဒုးအီ ပှၤဂီၢ်မုၢ်န့ၣ်​ ခံဘျီ. အဒုးအီၣ်ဒုးအီဝဲ ပှၤပိာ်ခွါအဂၤ ၅,၀၀၀ တဘျီ ဒီးအဂၤ ၄,၀၀၀ တဘျီ. နီၢ်ကီၢ်ပမ့ၢ်ဒွးဃုာ်ဒီး ပှၤပိာ်မုၣ်ဒီးဖိသၣ်ခဲလၢာ်န့ၣ်​ ပှၤကအိၣ်လၢအဂၤ ၂၇,၀၀၀ ဘျဲၣ်ညါ. (မးသဲ ၁၄:၁၅-၂၁; ၁၅:၃၂-၃၈) ဖဲယ့ၣ်ၡူးမၤတၢ်လီၤလး ခံဘျီလၢာ်န့ၣ်​ အမၤဘျါစ့ၢ်ကီးပှၤဆါဒီဒူၣ်. (မးသဲ ၁၄:၁၄; ၁၅:၃၀, ၃၁) ထံၣ်တမှံကွၢ် ဖဲပှၤဂီၢ်မုၢ်ထံၣ်ဘၣ်​ ယ့ၣ်ၡူးမၤတၢ်လီၤလးလၢ အမၤဘျါက့ၤအဝဲသ့ၣ်​ ဒီးဒုးအီၣ်ဒုးအီ အဝဲသ့ၣ်အခါ အဝဲသ့ၣ်​ ကသးခုထဲလဲၣ်.

^၃ တၢ်လီၤလးတဖၣ်လၢ ယ့ၣ်ၡူးမၤဝဲန့ၣ်​ ပန့ၢ်ဘၣ်တၢ်မၤလိအါမး. အဃိ လၢတၢ်မၤလိအံၤ ပကတဲသကီး တၢ်လီၤလးတနီၤလၢ ယ့ၣ်ၡူးမၤဝဲန့ၣ်​ ကမၤဂၢၢ်ကျၢၤဒိၣ်ထီၣ်​ ပတၢ်နာ်ဒ်လဲၣ်. တကးဒံးဘၣ်​ ဖဲယ့ၣ်ၡူးမၤတၢ်လီၤလးအခါ အအိၣ်ဒီးတၢ်ဆီၣ်လီၤသး ဒီးတၢ်သးကညီၤ. အဃိ ပကွၢ်လိအဒိအတဲာ် ကသ့ဒ်လဲၣ်န့ၣ်​ ပကတဲသကီးစ့ၢ်ကီး.

တၢ်လီၤလးတဖၣ်အံၤ သိၣ်လိပှၤ ယဟိဝၤယွၤ ဒီးယ့ၣ်ၡူးအဂ့ၢ်

၄. တၢ်လီၤလးလၢ ယ့ၣ်ၡူးမၤဝဲန့ၣ်​ မၤစၢၤပှၤလၢ ပကနာ်န့ၢ်အါထီၣ်​ မတဂၤလဲၣ်.

^၄ တၢ်လီၤလးလၢ ယ့ၣ်ၡူးမၤဝဲန့ၣ်​ မၤစၢၤပှၤလၢ ပကနာ်န့ၢ်အါထီၣ်​ ယ့ၣ်ၡူး ဒီးယဟိဝၤယွၤ. ပသ့ၣ်ညါလၢ တၢ်လီၤလးလၢ ယ့ၣ်ၡူးမၤဝဲန့ၣ်​ အန့ၢ်ဘၣ်​ တၢ်စိတၢ်ကမီၤလၢ ယဟိဝၤယွၤအအိၣ်. ဖဲမၤတၢ် ၁၀:၃၈ န့ၣ်တဲဝဲလၢ “ကစၢ်ယွၤဒိးဖှူအီၤလၢ သးစီဆှံ ဒီးတၢ်စိတၢ်ကမီၤ ဒီးမ့ၢ်လၢ ကစၢ်ယွၤ အိၣ်ဒီးအီၤအဃိ အဝဲလဲၤမၤတၢ်ဂ့ၤလၢ ထံကီၢ်အပူၤ သကုၤဆးဒး ဒီးမၤဘျါက့ၤ ပှၤလၢမုၣ်ကီၤလံၢ် မၤနးမၤဖှီၣ်အီၤ ကိးဂၤဒဲး.” တကးဒံးဘၣ်​ တၢ်လၢယ့ၣ်ၡူးတဲဝဲ ဒီးမၤဝဲကီးမံၤဒဲးန့ၣ်​ အကွၢ်လိဝဲအပါအဃိ ယ့ၣ်ၡူးအတၢ်ပာ်သူၣ်ပာ်သးဖဲ အမၤတၢ်လီၤလးအခါန့ၣ်​ မၤစၢၤပှၤလၢ ပကသ့ၣ်ညါဘၣ်​ ယဟိဝၤယွၤ အတၢ်ဆိကမိၣ်​ ဒီးအတၢ်တူၢ်ဘၣ်စ့ၢ်ကီး. (ယိၤဟၣ်​ ၁၄:၉) တၢ်လီၤလးလၢ ယ့ၣ်ၡူးမၤဝဲန့ၣ်​ ပန့ၢ်ဘၣ်တၢ်မၤလိ မနုၤလဲၣ်. ခဲအံၤ ပကတဲသကီး တၢ်မၤလိသၢခါ.

၅. ဘၣ်မနုၤအဃိ ယ့ၣ်ၡူးမၤတၢ်လီၤလးလဲၣ်. (မးသဲ ၂၀:၃၀-၃၄)

^၅ တၢ, ယ့ၣ်ၡူးဒီးအပၢ် အဲၣ်ပှၤဒိၣ်မး. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အပာ်ဖျါထီၣ်လၢ အအဲၣ်ပှၤဟီၣ်ခိၣ်ဖိ ခီဖျိအမၤတၢ်လီၤလး လၢကမၤစၢၤ ပှၤလၢအထံၣ်ဘၣ်​ တၢ်ကီတၢ်ခဲ. ဘၣ်တဘျီန့ၣ်​ ပှၤမဲာ်တထံၣ်တၢ်ခံဂၤ ကိးပသူထီၣ်ဒီးဃ့ကညး ယ့ၣ်ၡူးလၢ ကမၤစၢၤအဝဲသ့ၣ်. (ဖး မးသဲ ၂၀:၃၀-၃၄.) ဖဲန့ၣ်ပထံၣ်ဘၣ်လၢ ယ့ၣ်ၡူး “သးကညီၤ” အဝဲသ့ၣ်​ ဒီးယ့ၣ်ၡူးမၤစၢၤအဝဲသ့ၣ်​ ဒ်သိး အဝဲသ့ၣ်​ ကထံၣ်ထီၣ်က့ၤတၢ်. ကြံးအတၢ်ကတိၤလၢအမ့ၢ် “သးကညီၤ” န့ၣ်ဘၣ်သးတဲဝဲ အခီပညီ တၢ်သးကညီၤလၢ အဟဲထီၣ်လၢ ပှၤသးပူၤနီၢ်ကီၢ်. ယ့ၣ်ၡူး သးကညီၤပှၤဂၤနီၢ်ကီၢ်အဃိ အပာ်ဖျါထီၣ်တၢ်အဲၣ်​ ခီဖျိအဒုးအီၣ်ဒုးအီ ပှၤလၢတၢ်သၣ်ဝံၤအသး ဒီးမၤဘျါပှၤဘၣ်တၢ်ဆါအၢ. (မးသဲ ၁၅:၃၂; မၢ်ကူး ၁:၄၁) ပသ့ၣ်ညါဘၣ်လၢ ယဟိဝၤယွၤန့ၣ်​ အကဲကစၢ်ယွၤလၢအ “အိၣ်ဒီးတၢ်သးကညီၤ,” အီၤဒီးအဖိခွါန့ၣ်​ အဲၣ်ပှၤဒိၣ်မး ဒီးဖဲပထံၣ်ဘၣ်​ တၢ်ကီတၢ်ခဲအခါန့ၣ်​ အဝဲသ့ၣ်သးဘၣ်ဒိညါ. (လူၤကၣ်​ ၁:၇၈; ၁ ပ့းတရူး ၅:၇) အဃိ အဝဲသ့ၣ်ဘၣ်သး မၤလီၤမၢ်ကွံာ် တၢ်ကီတၢ်ခဲခဲလၢာ်လၢ ပှၤဟီၣ်ခိၣ်ဖိထံၣ်ဘၣ်ဝဲ သပှၢ်တၢၢ်.

၆. ယဟိဝၤယွၤဟ့ၣ်လီၤ ယ့ၣ်ၡူးတၢ်စိတၢ်ကမီၤ လၢကမၤမနုၤလဲၣ်.

^၆ ခံ, ယဟိဝၤယွၤဟ့ၣ်​ ယ့ၣ်ၡူးတၢ်စိတၢ်ကမီၤလၢ ကမၤလီၤမၢ်ကွံာ် တၢ်ကီတၢ်ခဲ ခဲလၢာ်. ဖဲယ့ၣ်ၡူးမၤတၢ်လီၤလးအခါ အပာ်ဖျါထီၣ်လၢ တၢ်ကီတၢ်ခဲလၢ ပှၤဟီၣ်ခိၣ်ဖိမၤလီၤမၢ်ဝဲ တသ့ဘၣ်တဖၣ်န့ၣ်​ ယ့ၣ်ၡူးမၤလီၤမၢ်ဝဲ သ့ခဲလၢာ်. အဒိ ယ့ၣ်ၡူးအိၣ်ဒီး တၢ်စိတၢ်ကမီၤလၢ အကမၤထူၣ်ဖျဲးထီၣ်ပှၤလၢတၢ်ဒဲးဘး လၢအဒုးအိၣ်ထီၣ်​ တၢ်ကီတၢ်ခဲ, တၢ်ဆူးတၢ်ဆါ ဒီးတၢ်သံ. (မးသဲ ၉:၁-၆; ရိမ့ၤ ၅:၁၂, ၁၈, ၁၉) တၢ်လီၤလးလၢ ယ့ၣ်ၡူးမၤဝဲန့ၣ်​ ပာ်ဖျါထီၣ်လၢ အမၤဘျါဝဲ ပှၤဆူးပှၤဆါ “အကလုာ်ကလုာ်” ဒီးအမၤသမူထီၣ်ပှၤသံ သ့စ့ၢ်ကီး. (မးသဲ ၄:၂၃; ယိၤဟၣ်​ ၁၁:၄၃, ၄၄) တကးဒံးဘၣ်​ အမၤပတုာ်ကွံာ် ကလံၤမုၢ် ဒီးမၤနၢၤကွံာ်ဝဲ တၢ်ဝံတၢ်နါတဖၣ်သ့. (မၢ်ကူး ၄:၃၇-၃၉; လူၤကၣ်​ ၈:၂) ပသ့ၣ်ညါဘၣ်လၢ ယဟိဝၤယွၤဟ့ၣ်လီၤယ့ၣ်ၡူး တၢ်စိတၢ်ကမီၤအဃိ ပသးခုညါ.

၇-၈. (က) ခီဖျိလၢ တၢ်လီၤလးလၢ ယ့ၣ်ၡူးမၤဝဲအဃိ ပနာ်မနုၤသ့လဲၣ်. (ခ) ခါဆူညါ လၢဟီၣ်ခိၣ်သီအပူၤ တၢ်ဆိၣ်ဂ့ၤလၢ နဘၣ်သးထံၣ်​ အဒိၣ်ကတၢၢ်န့ၣ်​ မ့ၢ်မနုၤလဲၣ်.

^၇ သၢ, ပနာ်သ့လၢ ခါဆူညါ လၢကစၢ်ယွၤအဘီအမုၢ် တၢ်ပၢဖီလာ်န့ၣ်​ တၢ်ဆိၣ်ဂ့ၤလၢ ကစၢ်ယွၤအၢၣ်လီၤဝဲတဖၣ်​ ကဟဲလၢပှဲၤထီၣ်​ သပှၢ်တၢၢ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အမၤတၢ်လီၤလးအါမး. ခဲအံၤန့ၣ်​ အကဲထီၣ်​ ယွၤအဘီအမုၢ် အစီၤပၤလံ အဃိ ပသ့ၣ်ညါဘၣ်လၢ ခါဆူညါ အကမၤဝဲတၢ်လီၤလး အါန့ၢ်ဒံးလၢညါ. ဆိမိၣ်ကွၢ် ဖဲယ့ၣ်ၡူးပၢဟီၣ်ခိၣ်အခါ ပကန့ၢ်ဘၣ်​ တၢ်ဆိၣ်ဂ့ၤအါမး. ယ့ၣ်ၡူးကမၤလီၤမၢ်ကွံာ် တၢ်ဆူးတၢ်ဆါ ဒီးကမၤဂ့ၤထီၣ်က့ၤ ပှၤလၢနီၢ်ခိက့ၢ်ဂီၤ တလၢပှဲၤဘၣ်တဖၣ်. (ယၡါယၤ ၃၃:၂၄; ၃၅:၅, ၆; လီၣ်ဖျါ ၂၁:၃, ၄) ပတထံၣ်ဘၣ်​ တၢ်သၣ်ဝံၤလီၤဒိ ဒီးန့ဆၢၣ်တၢ်ဘၣ်ဒိဘၣ်ထံးလၢၤဘၣ်. (ယၡါယၤ ၂၅:၆; မၢ်ကူး ၄:၄၁) တကးဒံးဘၣ်​ ပှၤလၢပအဲၣ်​ လၢအသံသဒၣ်ကွံာ်ပှၤ ဒီးအိၣ်လၢ “တၢ်သွၣ်ခိၣ်တဖၣ်” စ့ၢ်ကီး ပကထံၣ်ဘၣ်က့ၤအဝဲသ့ၣ်. (ယိၤဟၣ်​ ၅:၂၈, ၂၉) ခါဆူညါ လၢဟီၣ်ခိၣ်သီအပူၤ တၢ်ဆိၣ်ဂ့ၤလၢ နဘၣ်သးထံၣ်​ အဒိၣ်ကတၢၢ်န့ၣ်​ မ့ၢ်မနုၤလဲၣ်.

^၈ ဖဲယ့ၣ်ၡူးမၤတၢ်လီၤလးအခါ အပာ်ဖျါထီၣ်လၢ အအိၣ်ဒီး တၢ်ဆီၣ်လီၤသး ဒီးတၢ်ဒိသူၣ်ဒိသးအဃိ ပဘၣ်သးကွၢ်လိ အတၢ်ဂ့ၤတၢ်ဝါ. ခဲအံၤ ပကတဲသကီး တၢ်အဒိခံခါ. အဆိကတၢၢ်န့ၣ်​ ပကတဲသကီး တၢ်ကဲထီၣ်သးဖဲ တၢ်ဖျီအမူးလၢ ကၤနါအပူၤ.

မၤလိန့ၢ် တၢ်ဆီၣ်လီၤသး

၉. ဖဲတၢ်ဖျီအမူး အဆၢကတီၢ်န့ၣ်​ ယ့ၣ်ၡူးမၤမနုၤလဲၣ်. (ယိၤဟၣ်​ ၂:၆-၁၀)

^၉ ဖး ယိၤဟၣ်​ ၂:၆-၁၀. နီၢ်ကီၢ်န့ၣ်​ ဖဲစပံးထံလၢာ်ဝဲ လၢတၢ်ဖျီအမူးအဆၢကတီၢ် ယ့ၣ်ၡူး တလိၣ်မၤတၢ်နီတမံၤဘၣ်. ဝံအတၢ်စံးပာ် တတဲဆိပာ်စၢၤဝဲလၢ မ့းၡံအၤ ကဘၣ်မၤတၢ်လီၤလး ဒီးမၤကဲထီၣ်ထံလၢ စပံးထံဘၣ်. ဘၣ်ဆၣ်​ ဆိမိၣ်ကွၢ် ဖဲနဖျီသးအခါ တၢ်အီၣ်တၢ်အီ မ့ၢ်လၢာ်ဘၣ်ဖုးန့ၣ်​ နသးကမၤသးဒ်လဲၣ်. ပထံၣ်ဘၣ်လၢ ယ့ၣ်ၡူးဒိသူၣ်ဒိသး ဒီးသးကညီၤဝဲ ဟံၣ်ဖိဃီဖိ တဒူၣ်အံၤ, လီၤဆီဒၣ်တၢ် တလးမူးခံဂၤန့ၣ်​ ယ့ၣ်ၡူးတအဲၣ်ဒိးလၢ အဝဲသ့ၣ်ကမဲာ်ဆှးဘၣ်. အဃိ ဒ်လံာ်အဆၢလၢအခီၣ်ထံး ပာ်ဖျါထီၣ်ဝဲအသိး ယ့ၣ်ၡူး မၤဝဲတၢ်လီၤလးတခါလၢ အမၤကဲထီၣ်ထံလၢ စပံးထံန့ၣ်​ အိၣ်ဝဲ ၃၉၀ လံၤထၢၣ်​ (၁၀၃ ကၤလၤ) ညါ. ဘၣ်သ့ၣ်သ့ၣ်​ စပံးထံလၢ ယ့ၣ်ၡူးမၤကဲထီၣ်ဝဲန့ၣ်​ ကအိၣ်ပိၣ်ဒီဒူၣ်ညါ အဃိ ပှၤထီၣ်ပှၢ်သီခံဂၤအံၤ မ့ၢ်ဆဲးသူဝဲ မ့တမ့ၢ် ဆါဝဲန့ၣ်​ ကန့ၢ်စ့ဒီဒူၣ်​ ဒီးအဝဲသ့ၣ်​ ကသးခုဒိၣ်မး.

၁၀. ဖဲယိၤဟၣ်​ အဆၢဒိၣ်​ ၂ န့ၣ်ပသ့ၣ်ညါအါထီၣ်​ တၢ်ဂ့ၢ်အရ့ဒိၣ်မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၁၀ ပကတဲသကီးအါထီၣ်​ တၢ်ဂ့ၢ်အရ့ဒိၣ်တနီၤလၢ ယိၤဟၣ်​ အဆၢဒိၣ်​ ၂ ပာ်ဖျါထီၣ်ဝဲ. နပာ်သူၣ်ပာ်သးကၠ့ၤဧါ. ယ့ၣ်ၡူး တလူလီၤထံလၢကတံၤပူၤ လၢအနီၢ်ကစၢ်ဘၣ်. ယ့ၣ်ၡူး တဘၣ်သးလၢ ပှၤကသးစၢၢ်ဆၢအီၤဘၣ်အဃိ အမၢပှၤမၤစၢၤတၢ်ဖိ ဖဲန့ၣ်တဖၣ်​ လူလီၤထံလၢကတံၤပူၤ. (အဆၢဖိ ၆, ၇) ဒီးယ့ၣ်ၡူးမၤကဲထီၣ်ထံလၢ စပံးထံဝံၤအလီၢ်ခံ အတလဲၤဟ့ၣ်လီၤ စပံးထံအံၤလၢ မူးခိၣ်​ လၢအနီၢ်ကစၢ်ဘၣ်. ဘၣ်ဆၣ်​ အမၢပှၤမၤစၢၤတၢ်ဖိ လဲၤဟ့ၣ်လီၤဝဲဟီ. (အဆၢဖိ ၈) ဒီးယ့ၣ်ၡူးတလဲၤစိာ်ထီၣ်​ စပံးထံခွးလၢ ပှၤမဲာ်ညါဒီးတတဲဝဲလၢ ‘အီကွၢ်စပံးထံလၢ ယမၤကဲထီၣ်တခါအံၤထံၣ်’ န့ၣ်ဘၣ်.

၁၁. ယ့ၣ်ၡူးမၤကဲထီၣ်ထံလၢ စပံးထံန့ၣ်​ ပန့ၢ်ဘၣ်တၢ်မၤလိဒ်လဲၣ်.

^၁၁ ယ့ၣ်ၡူးမၤကဲထီၣ်ထံလၢ စပံးထံန့ၣ်​ ပန့ၢ်ဘၣ်တၢ်မၤလိဒ်လဲၣ်. ပမၤလိန့ၢ်ဘၣ်​ တၢ်ဆီၣ်လီၤသး. ယ့ၣ်ၡူးတပာ်ထီၣ်ထီသးလၢ အမၤတၢ်လီၤလးသ့အဃိဘၣ်. အမၤတၢ်မ့ၢ်ကဲထီၣ်​ တမံၤမံၤနာ်က့ အတပတြၢၤလီၤအသး နီတဘျီဘၣ်. ယ့ၣ်ၡူးပာ်ဖျါထီၣ်​ တၢ်ဆီၣ်လီၤသး ဒီးဟ့ၣ်တၢ်လၤကပီၤခဲလၢာ်လၢ အပါအအိၣ်ထီဘိ. (ယိၤဟၣ်​ ၅:၁၉, ၃၀; ၈:၂၈) ပမ့ၢ်ကွၢ်လိ ယ့ၣ်ၡူးန့ၣ်​ ပကဆီၣ်လီၤသး ဒီးပမၤတၢ်မ့ၢ်ကဲထီၣ်​ တမံၤမံၤန့ၣ်​ ပတတဲဂ့ၤလီၤပသး ဒ်သိးပှၤကထံၣ်ဒိၣ်ပှၤအဂီၢ်ဘၣ်. ပမ့ၢ်မၤဘၣ်​ ယဟိဝၤယွၤအတၢ်မၤလၢ အလီၤဆီတမံၤမံၤန့ၣ်​ ပတဘၣ်​ ပတြၢၤလီၤပသးဘၣ်, ဘၣ်ဆၣ်​ ပကဘၣ်ပတြၢၤလၢ ယဟိဝၤယွၤဟီ. (ယံးရမံယၤ ၉:၂၃, ၂၄) ယဟိဝၤယွၤ မ့ၢ်တမၤစၢၤပှၤဘၣ်န့ၣ်​ ပမၤတၢ် တကဲထီၣ်နီတမံၤဘၣ်. အဃိ ဖဲပမၤတၢ်ကဲထီၣ်​ တမံၤဂ့ၤတမံၤဂ့ၤန့ၣ်​ ပကဘၣ်ဟ့ၣ်​ တၢ်လၤကပီၤ ခဲလၢာ်လၢ ယဟိဝၤယွၤအအိၣ်.—၁ ကရံၣ်သူး ၁:၂၆-၃၁.

၁၂. ပကွၢ်လိ ယ့ၣ်ၡူးအတၢ်ဆီၣ်လီၤသး သ့ဒ်လဲၣ်. ဟ့ၣ်တၢ်အဒိ.

^၁၂ ပကွၢ်လိ ယ့ၣ်ၡူးတၢ်ဆီၣ်လီၤသး သ့လၢအဂၤတခါဒံး. ဆိမိၣ်ကွၢ် တၢ်အဒိတခါ. ဒီပုၢ်ဝဲၢ်ခွါသးစၢ်လၢ အကဲတၢ်အိၣ်ဖှိၣ်အပှၤမၤစၢၤတၢ်တဂၤ ကဘၣ်ဟ့ၣ်​ ကမျၢၢ်တၢ်စံၣ်တဲၤတဲလီၤ အဆိကတၢၢ်တဘျီအဃိ တၢ်အိၣ်ဖှိၣ်သးပှၢ်တဂၤ မၤစၢၤအီၤလၢ အကကတဲာ်ကတီၤ အတၢ်စံၣ်တဲၤတဲလီၤ. ခီဖျိလၢ တၢ်အိၣ်ဖှိၣ်သးပှၢ် မၤစၢၤအီၤဂ့ၤဂ့ၤအဃိ အဟ့ၣ်တၢ်စံၣ်တဲၤတဲလီၤ ဂ့ၤဒိၣ်မး ဒီးတၢ်အိၣ်ဖှိၣ်ဖိတဖၣ်​ န့ၢ်ဂံၢ်န့ၢ်ဘါဒိၣ်မး. တၢ်အိၣ်ဖှိၣ်ဝံၤဘျီ ဒီပုၢ်ဝဲၢ်တဂၤ ဟဲလၢတၢ်အိၣ်ဖှိၣ်သးပှၢ်အအိၣ်​ ဒီးတဲအီၤလၢ ‘ဒီပုၢ်ဝဲၢ်ခွါတဂၤအံၤ ဟ့ၣ်တၢ်စံၣ်တဲၤတဲလီၤ ဖၣ်ဂ့ၤညါနီၤ.’ ဖဲန့ၣ်​ မ့ၢ်တၢ်အိၣ်ဖှိၣ်သးပှၢ်တဂၤန့ၣ်​ ကတဲလၢ ‘မ့ၢ်, သနာ်က့ ယဘၣ်မၤစၢၤအီၤ ဖၣ်ယံာ်ညါ’ န့ၣ်ဧါ. မ့တမ့ၢ် အကဆီၣ်လီၤသး ဒီးတဲလၢ ‘မ့ၢ်ဒၢး, အမၤဝဲဂ့ၤဒိၣ်မး ယသးခုစၢၤအီၤစ့ၢ်ကီး’ န့ၣ်ဧါ. ပမ့ၢ်အိၣ်ဒီးတၢ်ဆီၣ်လီၤသးန့ၣ်​ ဖဲပမၤစၢၤပှၤဂၤလၢ အမၤတၢ်ကဲထီၣ်​ တမံၤမံၤအခါ ပတပတြၢၤလီၤ ပနီၢ်ကစၢ်သးဘၣ်. ပသ့ၣ်ညါလၢ ယဟိဝၤယွၤထံၣ်ဝဲ ဒီးပာ်လုၢ်ပာ်ပှ့ၤ တၢ်လၢပမၤအဃိ ပသးခုလံ. (ထိၣ်သတြီၤဒီး မးသဲ ၆:၂-၄; ဧ့ၤဘြံၤ ၁၃:၁၆) ပမ့ၢ်ကွၢ်လိ ယ့ၣ်ၡူး ဒီးအိၣ်ဒီး တၢ်ဆီၣ်လီၤသးန့ၣ်​ ပသ့ၣ်ညါလၢ ယဟိဝၤယွၤ ကသးခုနီၢ်ကီၢ်.—၁ ပ့းတရူး ၅:၆.

မၤလိန့ၢ် တၢ်ဒိသူၣ်ဒိသး

၁၃. ဖဲယ့ၣ်ၡူးလဲၤလၢ ဝ့ၢ်နၤအံၣ်အခါ အထံၣ်ဘၣ်​ မနုၤလဲၣ်​ ဒီးအမၤဝဲဒ်လဲၣ်. (လူၤကၣ်​ ၇:၁၁-၁၅)

^၁၃ ဖး လူၤကၣ်​ ၇:၁၁-၁၅. ဖဲယ့ၣ်ၡူးမၤ တၢ်စံၣ်တဲၤတဲလီၤတၢ်မၤ န့ၢ်တနံၣ်ဒီးတဝာ်န့ၣ်​ တၢ်ကဲထီၣ်သးတခါ. ယ့ၣ်ၡူးလဲၤလၢ ဝ့ၢ်နၤအံၣ်​ လၢအမ့ၢ်ဝဲ ပှၤကၤလံၤလါဖိအဝ့ၢ် ဒီးဝ့ၢ်အံၤအိၣ်ဘူးဒီး ဝ့ၢ်ၡူန့ၣ်. လၢညါပူၤကွံာ်အနံၣ်​ ၉၀၀ န့ၣ်ဝံအလံၤၡါ မၤသမူထီၣ်ဝဲ ပိာ်မုၣ်တဂၤ အဖိခွါ ဖဲဝ့ၢ်ၡူန့ၣ်အံၤ. (၂ စီၤပၤ ၄:၃၂-၃၇) ဖဲယ့ၣ်ၡူး လဲၤဘူးထီၣ်ဒီး ဝ့ၢ်အတြဲၤအခါ အထံၣ်ဝဲ ပှၤဟးထီၣ်လၢဝ့ၢ်ချၢ ဒီးပှၤတဖၣ်န့ၣ်​ ကလဲၤခူၣ်လီၤပှၤသံ. ပှၤလၢအသံတဂၤန့ၣ်​ အကဲဝဲ မုၣ်ကမဲတဂၤအဖိခွါ. မုၣ်ကမဲအံၤ အဖိခွါအိၣ်ထဲတဂၤ ဒီးအဖိခွါ သံသဒၣ်ကွံာ်အီၤအဃိ လီၤသးအုးဒိၣ်မး. သနာ်က့ မုၣ်ကမဲအံၤ တအိၣ်ထဲတဂၤဘၣ်. ပှၤဝ့ၢ်ဖိအိၣ်ဒီးအီၤဒီဒူၣ်. ယ့ၣ်ၡူး ထံၣ်အဝဲသ့ၣ်ဘျီ အမၢပှၤအိၣ်ပတုာ် ဒီးအမၤသမူထီၣ်က့ၤ မုၣ်ကမဲတဂၤအံၤအဖိခွါ. လံာ်တၢ်သးခုကစီၣ်​ လွံၢ်ဘ့ၣ်​ ပာ်ဖျါထီၣ်ဝဲ ယ့ၣ်ၡူး မၤသမူထီၣ်က့ၤပှၤသံအဂ့ၢ်န့ၣ်​ အိၣ်ဝဲသၢဘျီ. ဒီးယ့ၣ်ၡူး မၤသမူထီၣ်က့ၤ မုၣ်ကမဲအဖိခွါန့ၣ်​ အကဲဝဲ အဆိကတၢၢ်တဘျီ.

၁၄. ဖဲ လူၤကၣ်​ အဆၢဒိၣ်​ ၇ န့ၣ်ပထံၣ်ဘၣ်​ တၢ်ဂ့ၢ်အရ့ဒိၣ်​ မနုၤတနီၤလဲၣ်. (ကွၢ်စ့ၢ်ကီးတၢ်ဂီၤ.)

^၁၄ ခဲအံၤ ပကကွၢ်အါထီၣ်​ တၢ်ဂ့ၢ်အရ့ဒိၣ်တနီၤလၢ လူၤကၣ်​ အဆၢဒိၣ်​ ၇. မုၣ်ကမဲလၢ အသးဘၣ်ဒိတဂၤအံၤ ယ့ၣ်ၡူး “ထံၣ်အီၤ” ဝံၤဘျီ “အသးကညီၤဘၣ်အီၤ.” (အဆၢဖိ ၁၃) ဘၣ်သ့ၣ်သ့ၣ်​ ဖဲအဟးလၢ အဖိခွါအစိၣ်ကပၤအခါ ယ့ၣ်ၡူးထံၣ်လၢ အဟီၣ်အဃိ ယ့ၣ်ၡူးနၢ်ပၢၢ်စၢၤအီၤ. ယ့ၣ်ၡူး သးကညီၤဘၣ်အီၤ ဒီးအပာ်ဖျါထီၣ်​ တၢ်ဒိသူၣ်ဒိသး လၢအဖီခိၣ်. ယ့ၣ်ၡူး လဲၤတဲတၢ်ဒီးအီၤလၢ အကလုၢ်မုာ်မုာ် ဒီးတဲအီၤလၢ “ဟီၣ်တဂ့ၤ.” ဝံၤဘျီ ယ့ၣ်ၡူး မၤသမူထီၣ်က့ၤ မုၣ်ကမဲအံၤ အဖိခွါဒီး “ဟ့ၣ်လီၤအီၤလၢအမိၢ်.”—အဆၢဖိ ၁၄, ၁၅.

၁၅. ဘၣ်ဃးဒီး ယ့ၣ်ၡူးမၤသမူထီၣ်က့ၤ မုၣ်ကမဲအဖိခွါန့ၣ်​ ပန့ၢ်ဘၣ်တၢ်မၤလိ ဒ်လဲၣ်.

^၁၅ ဘၣ်ဃးဒီး ယ့ၣ်ၡူးမၤသမူထီၣ်က့ၤ မုၣ်ကမဲအဖိခွါန့ၣ်​ ပန့ၢ်ဘၣ်​ တၢ်မၤလိဒ်လဲၣ်. ပမၤလိဘၣ်လၢ ပကဘၣ်​ ပာ်ဖျါထီၣ်​ တၢ်ဒိသူၣ်ဒိသးလၢ ပှၤလၢ အသးအုးဒီးသးဘၣ်ဒိတဖၣ်​ အဖီခိၣ်. ပမၤသမူထီၣ်က့ၤပှၤသံ ဒ်သိးယ့ၣ်ၡူးမၤဝဲဒု တသ့ဘၣ်. သနာ်က့ ပကွၢ်လိယ့ၣ်ၡူး သ့ခီဖျိ ပကွၢ်ပှၤလၢ အသးအုးဒီးသးဘၣ်ဒိတဂၤ အတၢ်အိၣ်သး ဒီးပာ်ဖျါထီၣ်​ တၢ်ဒိသူၣ်ဒိသးလၢအဖီခိၣ်. ဒ်သိး အသးကမုာ်ထီၣ်က့ၤအဂီၢ် ပကဘၣ်​ လဲၤတဲဆိတၢ်ဒီးအီၤ ဒီးမၤန့ၢ်အီၤ တၢ်တမံၤမံၤ.d (ကတိၤဒိ ၁၇:၁၇; ၂ ကရံၣ်သူး ၁:၃, ၄; ၁ ပ့းတရူး ၃:၈) ပမ့ၢ်တဲတၢ်ကတိၤယိယိဖိ ဒီးမၤန့ၢ်အီၤ တၢ်ဆံးဆံးဖိတခါခါနာ်က့ ကမၤမုာ်ထီၣ်အသး ဒီးဟ့ၣ်ဂံၢ်ဟ့ၣ်ဘါအီၤ ဖးအါညါ.

၁၆. တၢ်ဂီၤလၢ ပာ်ဖျါထီၣ်က့ၤဝဲ ဒီပုၢ်ဝဲၢ်မုၣ်လၢ အဖိမုၣ်ဖိသံသဒၣ်ကွံာ်အီၤတဂၤ အတၢ်လဲၤခီဖျိန့ၣ်​ နန့ၢ်ဘၣ်တၢ်မၤလိ ဒ်လဲၣ်.

^၁၆ ပကကွၢ် တၢ်လဲၤခီဖျိတခါ. ပူၤကွံာ်စှၤနံၣ်န့ၣ်​ ဖဲပှၤထီၣ်တၢ်အိၣ်ဖှိၣ်​ ဒီးသးဝံၣ်တၢ်အဆၢကတီၢ် ဒီပုၢ်ဝဲၢ်မုၣ်တဂၤ ထံၣ်ဝဲ ဒီပုၢ်ဝဲၢ်မုၣ်လၢ အဂၤတဂၤဟီၣ်ဝဲ. တၢ်သးဝံၣ်တဖျၢၣ်န့ၣ်​ အဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤ ဒီးဒီပုၢ်ဝဲၢ်မုၣ်လၢ အဟီၣ်တဂၤန့ၣ်​ အဖိမုၣ်ဖိ သံသဒၣ်ကွံာ်အီၤ တယံာ်ဒံးဘၣ်. ဒီပုၢ်ဝဲၢ်မုၣ်လၢ အထံၣ်အီၤန့ၣ်​ လဲၤလၢအအိၣ်တဘျီဃီ, ဆၢထၢၣ်လၢအကပၤဒီးဖိးဟုအီၤ ဒီးဆဲးသးဝံၣ်တၢ်ဒီးအီၤ. တၢ်တနံၤန့ၣ်​ ဒီပုၢ်ဝဲၢ်မုၣ်လၢ အဟီၣ်တဂၤအံၤ လဲၤထီၣ်တၢ်အိၣ်ဖှိၣ်အဃိ အသးခုဒိၣ်မး. အတဲဝဲလၢ “ဖဲပလိၣ်ဘၣ်​ တၢ်မၤစၢၤအခါ ပန့ၢ်ဘၣ်တၢ်မၤစၢၤ လၢတၢ်အိၣ်ဖှိၣ်လီၢ် ဒီးဒီပုၢ်ဝဲၢ်မုၣ်ခွါတဖၣ်​ မၤစၢၤယၤအဃိ ယအဲၣ်အဝဲသ့ၣ်​ ဒိၣ်ထီၣ်ညါ.” ပမၤလိဘၣ်လၢ ပဘၣ်​ ပာ်ဖျါထီၣ်တၢ်ဒိသူၣ်ဒိသးလၢ ပှၤလၢအသးအုးဒီး “အသးလီၤသဘှံး” အဖီခိၣ်. (စံးထီၣ်ပတြၢၤ ၃၄:၁၈) ဒီးတၢ်လၢပမၤန့ၣ်​ မ့ၢ်ကဲဝဲ တၢ်ဆံးဆံးဖိနာ်က့ ယဟိဝၤယွၤထံၣ်ဝဲ ဒီးအဘၣ်သးဝဲနီၢ်ကီၢ်.

နီၢ်ကစၢ် တၢ်မၤလိလံာ်စီဆှံ လၢကမၤဂၢၢ်ကျၢၤဒိၣ်ထီၣ်​ နတၢ်နာ်

၁၇. လၢတၢ်မၤလိတခါအံၤန့ၣ်​ နမၤလိဘၣ်​ မနုၤလဲၣ်.

^၁၇ ပမ့ၢ်မၤလိ ယ့ၣ်ၡူးမၤတၢ်လီၤလးအဂ့ၢ် လၢလံာ်တၢ်သးခုကစီၣ်​ လွံၢ်ဘ့ၣ်အပူၤန့ၣ်​ ပတၢ်နာ် ကဂၢၢ်ကျၢၤဒိၣ်ထီၣ်ဖးဒိၣ်. တၢ်လီၤလးတဖၣ်န့ၣ်​ သိၣ်လိပှၤလၢ ယဟိဝၤယွၤ ဒီးယ့ၣ်ၡူး အဲၣ်ပှၤဒိၣ်မး. ပသ့ၣ်ညါဘၣ်လၢ ယ့ၣ်ၡူး အိၣ်ဒီးတၢ်စိတၢ်ကမီၤလၢ ကမၤဘၣ်ဂီၢ်က့ၤ ပှၤဟီၣ်ခိၣ်ဖိ အတၢ်ကီတၢ်ခဲ. ဒီးပနာ်သပှၢ်တၢၢ်လၢ တၢ်အၢၣ်လီၤလၢ ကစၢ်ယွၤအဘီအမုၢ် ကမၤန့ၢ်ပှၤန့ၣ်​ တယံာ်လၢၤဘၣ်​ အကဟဲလၢပှဲၤထီၣ်ခဲလၢာ်. အဃိ ဖဲပမၤလိ ယ့ၣ်ၡူးမၤတၢ်လီၤလးအဂ့ၢ်အခါ ပကဘၣ်ဆိမိၣ်ထံ ဘၣ်ဃးဒီး ပကဘၣ်မၤထွဲ ယ့ၣ်ၡူး အတၢ်ဂ့ၤတၢ်ဝါ လၢပတၢ်အိၣ်မူပူၤ. မ့ၢ်သ့န့ၣ်​ ပာ်လီၤတၢ်ဆၢကတီၢ်လၢ နကမၤလိ ဘၣ်ဃးဒီး တၢ်လီၤလးအဂၤတဖၣ်လၢ ယ့ၣ်ၡူးမၤဝဲ ဖဲနမၤ နီၢ်ကစၢ် တၢ်မၤလိလံာ်စီဆှံ မ့တမ့ၢ် ဟံၣ်ဖိဃီဖိ တၢ်မၤလိလံာ်စီဆှံအခါ. ဒီးတၢ်ဂ့ၢ်လၢ နမၤလိဘၣ်တဖၣ်န့ၣ်​ တဲပၠးစ့ၢ်ကီးပှၤဂၤ. နမ့ၢ်မၤဒ်န့ၣ်န့ၣ်​ ကကဲထီၣ်​ တၢ်ဂံၢ်တၢ်ဘါအါမး.—ရိမ့ၤ ၁:၁၁, ၁၂.

၁၈. တၢ်မၤလိ လၢခံတခါန့ၣ်​ ပကတဲသကီး တၢ်ဂ့ၢ်မနုၤလဲၣ်.

^၁၈ လံာ်စီဆှံ ပာ်ဖျါထီၣ်ဝဲလၢ တချုးလၢ ယ့ၣ်ၡူး အတၢ်စံၣ်တဲၤတဲလီၤတၢ်မၤ ဘူးကဝံၤန့ၣ်​ အမၤသမူထီၣ်က့ၤပှၤသံလၢ အလီၢ်ခံကတၢၢ်တဘျီ. ဘၣ်ဆၣ်​ အမၤသမူထီၣ်က့ၤပှၤသံ တဘျီအံၤန့ၣ်​ အလီၤဆီ ခီဖျိလၢ အမၤသမူထီၣ်က့ၤ အသကီး လၢအအဲၣ်ဝဲဒိၣ်မး ဒီးတၢ်အိၣ်သး တဘျီအံၤ လီၤဆီစ့ၢ်ကီး. ယ့ၣ်ၡူး မၤတၢ်လီၤလးတဘျီအံၤ ပကန့ၢ်ဘၣ်တၢ်မၤလိ ဒ်လဲၣ်. ဒီးပမၤဂၢၢ်ကျၢၤဒိၣ်ထီၣ်​ ပတၢ်မုၢ်လၢ် ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤ ကသ့ဒ်လဲၣ်. ပကတဲသကီး တၢ်စံးဆၢ လၢတၢ်မၤလိ လၢခံတခါ.