ကွၢ်လိ မူခိၣ်ကလူးလၢ အသးတီတဖၣ် အဒိအတဲာ်

၁-၂. (က) ပလီၤဆီဒီး မူခိၣ်ကလူး လၢကျဲဒ်လဲၣ်. (ခ) ပလီၤဂာ်ဒီး မူခိၣ်ကလူး လၢကျဲဒ်လဲၣ်.

ပကဲယဟိဝၤယွၤ အပှၤဂီၢ်မုၢ်အဃိ ပပၣ်ဃုာ်လၢ အဟံၣ်ဖိဃီဖိလၢ အအိၣ်ဒီး တၢ်အဲၣ်တၢ်ကွံ ဒီးအဘူၣ်ထီၣ်ဘါထီၣ်အီၤအကျါ. ဖဲန့ၣ်ပၣ်ဃုာ်ဒီး ဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ် တကးဒံးဘၣ် ပၣ်ဃုာ်ဒီး မူခိၣ်ကလူးလၢ အကကွဲၢ်တဖၣ်. (ဒၤ ၇:၉, ၁၀) ဖဲပဆိကမိၣ် ဘၣ်ဃးဒီး မူခိၣ်ကလူးအဂ့ၢ်အခါ ဘၣ်သ့ၣ်သ့ၣ် ပကဆိကမိၣ်လၢ အဝဲသ့ၣ်န့ၣ် လီၤဆီန့ၢ်ဒံးပှၤဟီၣ်ခိၣ်ဖိ. အဒိ မူခိၣ်ကလူးတဖၣ်န့ၣ် အိၣ်မူလၢ ပှၤဟီၣ်ခိၣ်ဖိ အမဲာ်ညါဖးယံာ်ညါ. (ဘး ၃၈:၄, ၇) အဝဲသ့ၣ် ဂံၢ်ဆူၣ်န့ၢ် ပှၤဟီၣ်ခိၣ်ဖိဒံး. ဒီးခီဖျိလၢ ပကဲပှၤဟီၣ်ခိၣ်ဖိ ဒီးပတကဲ ပှၤလၢပှၤပှဲၤဘၣ်အဃိ ပတစီဆှံဒီးတီလိၤ ဒ်သိးဒီး မူခိၣ်ကလူးဘၣ်.—လူၤ ၉:၂၆.

^၂ ပလီၤဆီဒီး မူခိၣ်ကလူး သနာ်က့ ပလီၤဂာ်ဒီး အဝဲသ့ၣ် လၢကျဲအါမးစ့ၢ်ကီး. အဒိ ဒ်မူခိၣ်ကလူးအသိး ပကွၢ်လိ ယဟိဝၤယွၤ အတၢ်ဂ့ၤတၢ်ဝါတဖၣ်သ့. ဒီးပအိၣ်ဒီး တၢ်ခွဲးတၢ်ယာ်လၢ ပကဆၢတဲာ်တၢ်လၢ ပနီၢ်ကစၢ်. တကးဒံးဘၣ် မူခိၣ်ကလူးတဖၣ်န့ၣ် အဝဲသ့ၣ်အိၣ်ဒီး အနီၢ်ကစၢ်အမံၤ ဒီးတၢ်ဂ့ၤတၢ်ဝါတဖၣ်. ဒီးလၢယဟိဝၤယွၤ အတၢ်မၤစ့ၢ်ကီး အဝဲသ့ၣ် မူဒါလီၤဆီလိာ်သး. ပဝဲစ့ၢ်ကီး ပလီၤဂာ်ဒီး အဝဲသ့ၣ် လၢကျဲဒ်န့ၣ်. ဒီးဒ်မူခိၣ်ကလူးအသိး ပသ့ၣ်ညါလီၤပသးလၢ ပလိၣ်ဘၣ် ပတၢ်ဘၣ်တ့ကစၢ် ယဟိဝၤယွၤ အတၢ်ဟံးစုနဲၣ်ကျဲ.—၁ ပ့း ၁:၁၂.

၃. မူခိၣ်ကလူးလၢ အသးတီတဖၣ်န့ၣ် ပကွၢ်လိအဝဲသ့ၣ် သ့ဒ်လဲၣ်.

^၃ ပလီၤဂာ်ဒီး မူခိၣ်ကလူး လၢကျဲအါမံၤအဃိ အဝဲသ့ၣ် အဒိအတဲာ် လၢအဂ့ၤန့ၣ် ကဲထီၣ် တၢ်ဂံၢ်တၢ်ဘါလၢပဂီၢ် ဒီးပဟံးန့ၢ် တၢ်မၤလိ လၢအဝဲသ့ၣ် အအိၣ်သ့. မူခိၣ်ကလူးလၢ အသးတီတဖၣ်န့ၣ် အအိၣ်ဒီး တၢ်ဆီၣ်လီၤသး, အအဲၣ်ပှၤဟီၣ်ခိၣ်ဖိ, အအိၣ်ဒီး တၢ်တူၢ်န့ၢ်ခီၣ်ကဲ ဒီးဒ်သိး တၢ်အိၣ်ဖှိၣ် ကကဆှီအဂီၢ် အဝဲသ့ၣ် ဂုာ်ကျဲးစၢး မၤတၢ်ဆူၣ်ဆူၣ်. အဃိ လၢတၢ်မၤလိတခါအံၤ ပကတဲသကိး မူခိၣ်ကလူးလၢ အသးတီတဖၣ် အဒိအတဲာ် ဒီးပကွၢ်လိအဝဲသ့ၣ် ကသ့ဒ်လဲၣ်အဂ့ၢ်.

မူခိၣ်ကလူးလၢ အသးတီတဖၣ် အိၣ်ဒီးတၢ်ဆီၣ်လီၤသး

၄. (က) မူခိၣ်ကလူးတဖၣ် ပာ်ဖျါထီၣ် တၢ်ဆီၣ်လီၤသးဒ်လဲၣ်. (ခ) ဘၣ်မနုၤအဃိ မူခိၣ်ကလူးတဖၣ် အိၣ်ဒီး တၢ်ဆီၣ်လီၤသးလဲၣ်. (စံးထီၣ်ပတြၢၤ ၈၉:၇)

^၄ မူခိၣ်ကလူးလၢ အသးတီတဖၣ်န့ၣ် အိၣ်ဒီးတၢ်ဆီၣ်လီၤသး. အဝဲသ့ၣ် အိၣ်ဒီး တၢ်လဲၤခီဖျိအါမး, အဂံၢ်ဆူၣ် ဒီးကူၣ်တၢ်သ့ ဘၣ်ဆၣ် အဝဲသ့ၣ် ဒိကနၣ်ဒီးမၤထွဲဝဲ ယဟိဝၤယွၤ အတၢ်ဟံးစုနဲၣ်ကျဲ. (စံး ၁၀၃:၂၀) ဖဲအဝဲသ့ၣ် မၤမူဒါလၢ ယဟိဝၤယွၤ ဟ့ၣ်လီၤအဝဲသ့ၣ်အခါ အဝဲသ့ၣ် တပတြၢၤလီၤသးဘၣ် ဒီးတသူ တၢ်စိတၢ်ကမီၤလၢ ကမၤလၤကပီၤ အနီၢ်ကစၢ်သးဘၣ်. ကစၢ်ယွၤ မ့ၢ်မၢအဝဲသ့ၣ် မၤတၢ်တမံၤမံၤ ဒီးပှၤမ့ၢ်တသ့ၣ်ညါ အဝဲသ့ၣ်အမံၤဘၣ် သနာ်က့ အဝဲသ့ၣ် မၤဝဲလၢ တၢ်သးအိၣ်.a (၁ မိၤ ၃၂:၂၄, ၂၉; ၂ စီၤပၤ ၁၉:၃၅) မူခိၣ်ကလူးတဖၣ် တတူၢ်လိာ်ဝဲ တၢ်လၤကပီၤ နီတမံၤဘၣ် ဒီးအဝဲသ့ၣ်ဟ့ၣ် တၢ်လၤကပီၤခဲလၢာ်လၢ ယဟိဝၤယွၤ. ဘၣ်မနုၤအဃိ မူခိၣ်ကလူးတဖၣ် အိၣ်ဒီး တၢ်ဆီၣ်လီၤသးလဲၣ်. ခီဖျိလၢ အဝဲသ့ၣ် အဲၣ်ယဟိဝၤယွၤ ဒီးပာ်ကဲအီၤ ဒိၣ်မးအဃိ အဝဲသ့ၣ် အိၣ်ဒီး တၢ်ဆီၣ်လီၤသး.—ဖး စံးထီၣ်ပတြၢၤ ၈၉:၇.

၅. ဖဲမူခိၣ်ကလူးတဂၤ ဘှီဘၣ်ထီၣ်က့ၤ စီၤယိၤဟၣ် အတၢ်ထံၣ်အခါ အပာ်ဖျါထီၣ် တၢ်ဆီၣ်လီၤသးဒ်လဲၣ်. (ကွၢ်စ့ၢ်ကီးတၢ်ဂီၤ.)

^၅ ပကကွၢ်သကိး တၢ်အဒိတခါလၢ အဘၣ်ဃးဒီး မူခိၣ်ကလူးတဂၤ ပာ်ဖျါထီၣ် တၢ်ဆီၣ်လီၤသးအဂ့ၢ်. ကဘၣ်ဖဲ ခ.န ၉၆ နံၣ်န့ၣ် မူခိၣ်ကလူးလၢ ပတသ့ၣ်ညါ အမံၤဘၣ်တဂၤ ဒုးထံၣ်ဝဲ တၢ်မၢဖိယိၤဟၣ် တၢ်ထံၣ်လၢညါခီလၢ အလီၤကမၢကမၣ်တခါ. (လီၣ် ၁:၁) ဖဲတၢ်မၢဖိယိၤဟၣ် ထံၣ်ဝဲ တၢ်ထံၣ်လၢညါခီအခါ အမၤဝဲဒ်လဲၣ်. အထိၣ်လီၤပှီၤအသး ဒ်သိး ကဘူၣ်ထီၣ်ဘါထီၣ် မူခိၣ်ကလူး. ဘၣ်ဆၣ် မူခိၣ်ကလူးလၢ အသးတီတဂၤအံၤ တဲအီၤလၢ “ပလီၢ်နသးသၢၤ, တဘၣ်မၤဒ်န့ၣ်တဂ့ၤ. ဘူၣ်ထီၣ်ဘါထီၣ် ကစၢ်ယွၤဟီ. ယမ့ၢ်ဒၣ်ကုၢ်ကဒဲကဒဲ ဒ်သိးဒီး နၤဒီးနဒီပုၢ်ဝဲၢ်တဖၣ်” လီၤ. (လီၣ် ၁၉:၁၀) ပထံၣ်ဘၣ်လၢ မူခိၣ်ကလူးတဂၤအံၤ ဆီၣ်လီၤအသးဒိၣ်မး. အတသးစၢၢ်ဆၢလၢ အကန့ၢ်ဘၣ် တၢ်လၤကပီၤ ဒီးတၢ်စံးထီၣ်ပတြၢၤဘၣ်. အတဲ တၢ်မၢဖိယိၤဟၣ် တဘျီဃီလၢ ဘူၣ်ထီၣ်ဘါထီၣ်လၢ ယဟိဝၤယွၤဟီ. ဒီးမူခိၣ်ကလူး တဂၤအံၤ တဆိကမိၣ်လီၤသးလၢ အဂ့ၤဒိၣ်န့ၢ်ဒံး စီၤယိၤဟၣ်ဘၣ်. မူခိၣ်ကလူး တဂၤအံၤ အစိအကမီၤ မ့ၢ်ဒိၣ်န့ၢ်ဒံး စီၤယိၤဟၣ် ဒီးအမၤဘၣ် ယဟိဝၤယွၤ အတၢ်မၤ အနံၣ်မ့ၢ်အါန့ၢ်ဒံး စီၤယိၤဟၣ် သနာ်က့ အအိၣ်ဒီး တၢ်ဆီၣ်လီၤသး ဒီးအတဲဘၣ် စီၤယိၤဟၣ်လၢ အမ့ၢ်ဒၣ် ကုၢ်ဒ်သိးဒီးအီၤ. ဒီးဖဲမူခိၣ်ကလူး တဂၤအံၤ ဘှီဘၣ်ထီၣ်က့ၤ စီၤယိၤဟၣ် အတၢ်ထံၣ်အခါ အရ့ဒီး စီၤယိၤဟၣ်ဂ့ၤဂ့ၤ ဒီးတဲတၢ်ဒီးအီၤမုာ်မုာ်. ဘၣ်သ့ၣ်သ့ၣ် မူခိၣ်ကလူး တဂၤအံၤ ကသ့ၣ်ညါဝဲလၢ စီၤယိၤဟၣ်ထံၣ်ဘၣ် တၢ်ထံၣ်လၢညါခီအံၤ ဒီးအကမၢကမၣ်အဃိ အထိၣ်လီၤပှီၤအသးဒ်သိး ကဘူၣ်ထီၣ်ဘါထီၣ်အီၤ.

၆. ပကွၢ်လိ မူခိၣ်ကလူးတဖၣ် အတၢ်ဆီၣ်လီၤသး ကသ့ဒ်လဲၣ်.

^၆ ပကွၢ်လိ မူခိၣ်ကလူးတဖၣ် အတၢ်ဆီၣ်လီၤသး ကသ့ဒ်လဲၣ်. ဒ်မူခိၣ်ကလူးအသိး ပဘၣ်သးမၤ ယဟိဝၤယွၤ အတၢ်မၤဆူၣ်ဆူၣ် ဒီးပတဘၣ် ပာ်ကဖၢလၢသးလၢ ပနီၢ်ကစၢ် တၢ်သ့တၢ်ဘၣ် ဒီးတၢ်လၢ ပမၤကဲထီၣ်လိၣ်ထီၣ် အဃိဘၣ်. (၁ ကရံၣ် ၄:၇) ဒီးပမၤ ယဟိဝၤယွၤ အတၢ်မၤ အနံၣ်မ့ၢ်အါန့ၢ် ပှၤဂၤ မ့တမ့ၢ် ပမ့ၢ်န့ၢ်ဘၣ်မူဒါလၢ ပှၤဂၤတန့ၢ်ဘၣ်ဝဲဘၣ်န့ၣ် ပတဘၣ် ဆိကမိၣ်လီၤသးလၢ ပဖၠဲးန့ၢ်ဒံး ပှၤဂၤဘၣ်. ပန့ၢ်ဘၣ်မူဒါမ့ၢ်အါန့ၣ် ပကဘၣ် ဆီၣ်လီၤသးဒံးအါ. (လူၤ ၉:၄၈) ဒ်မူခိၣ်ကလူးအသိး ပဘၣ်သး မၤန့ၢ်တၢ်လၢ ပှၤဂၤအဂီၢ်. ဒီးပတဂုာ်ကျဲးစၢးမၤတၢ် ဒ်သိးပှၤဂၤကဆိကမိၣ်ဒိၣ်ပှၤအဂီၢ်ဘၣ်.

၇. ဖဲပဟ့ၣ်ကူၣ် ပှၤတဂၤဂၤ မ့တမ့ၢ် ဘှီဘၣ်ထီၣ် အတၢ်ထံၣ်အခါ ပပာ်ဖျါထီၣ် တၢ်ဆီၣ်လီၤသး သ့ဒ်လဲၣ်.

^၇ ဖဲပဟ့ၣ်ကူၣ် မ့တမ့ၢ် ဘှီဘၣ်ထီၣ် ဒီပုၢ်ဝဲၢ်မုၣ်ခွါ ဒီးပဖိတဖၣ် အတၢ်ထံၣ်အခါ ပကဘၣ်ပာ်ဖျါထီၣ် တၢ်ဆီၣ်လီၤသး. တဘျီတခီၣ်န့ၣ် ပကဘၣ် ဟ့ၣ်ကူၣ် အဝဲသ့ၣ်လိၤလိၤ. ဘၣ်ဆၣ် သ့ၣ်နီၣ်ထီၣ်က့ၤဖဲ မူခိၣ်ကလူး ဘှီဘၣ်ထီၣ် စီၤယိၤဟၣ် အတၢ်ထံၣ်အခါ အတဲတၢ်ဒီးအီၤမုာ်မုာ်. အဃိ ဖဲပဟ့ၣ်ကူၣ်ပှၤဂၤအခါ ဒ်သိး ပတၢ်ကတိၤ တမၤလီၤစၢ်ပှၤသး တဂ့ၤအဂီၢ် ပကဘၣ် ပလီၢ်ပသး. ဒီးပမ့ၢ် တဆိကမိၣ်ဒိၣ်လီၤသးဘၣ်န့ၣ် ဖဲပဟ့ၣ်ကူၣ်ပှၤဂၤ တၢ်ဂ့ၢ်လၢ အဒိးသန့ၤထီၣ်သးလၢ လံာ်စီဆှံအခါ ပကပာ်ဖျါထီၣ် တၢ်အဲၣ် ဒီးပာ်ကဲပှၤဂၤ.—ကလီး ၄:၆.

မူခိၣ်ကလူးတဖၣ် အဲၣ်ပှၤဟီၣ်ခိၣ်ဖိ

၈. (က) ဒ် လူၤကၣ် ၁၅:၁၀ ပာ်ဖျါထီၣ်ဝဲအသိး မူခိၣ်ကလူးတဖၣ် အဲၣ်ပှၤဟီၣ်ခိၣ်ဖိန့ၣ် ပသ့ၣ်ညါဒ်လဲၣ်. (ခ) လၢတၢ်စံၣ်တဲၤတဲလီၤ တၢ်မၤအပူၤန့ၣ် မူခိၣ်ကလူးတဖၣ် မၤစၢၤပှၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၈ တၢ်ကဲထီၣ်သးဒီး ပှၤဟီခိၣ်ဖိဒ်လဲၣ်န့ၣ် မူခိၣ်ကလူးတဖၣ် ဘၣ်သးသ့ၣ်ညါဝဲ. အဝဲသ့ၣ် ထံၣ်ဝဲလၢ ပှၤဟီၣ်ခိၣ်ဖိန့ၣ် အရ့ဒိၣ် ဒီးအဝဲသ့ၣ်အဲၣ်ပှၤဟီၣ်ခိၣ်ဖိ. အဒိ ဖဲပှၤတဂၤ လၢအလီၤဂာ် ဒ်သိးဒီး သိလၢအလီၤမၢ်တဒု ပီၢ်ယၢ်လီၤက့ၤသး ဒီးဟဲက့ၤကဒါလၢ ယဟိဝၤယွၤအအိၣ်အခါ မူခိၣ်ကလူးတဖၣ် သးခုဒိၣ်မး. ဒီးဖဲပှၤတဂၤ ဆီတလဲ အတၢ်အိၣ်မူ ဒီးနုာ်လီၤလၢ တၢ်မ့ၢ်တၢ်တီ အပူၤအခါ မူခိၣ်ကလူးတဖၣ် သးခုစ့ၢ်ကီး. (ဖး လူၤကၣ် ၁၅:၁၀.) တကးဒံးဘၣ် မူခိၣ်ကလူးတဖၣ် ဆီၣ်ထွဲ တၢ်စံၣ်တဲၤတဲလီၤတၢ်မၤစ့ၢ်ကီး. (လီၣ် ၁၄:၆) သနာ်က့ အဝဲသ့ၣ် တစံၣ်တဲၤတဲလီၤ ပှၤဟီၣ်ခိၣ်ဖိလၢ အနီၢ်ကစၢ်ဘၣ်. ဘၣ်သ့ၣ်သ့ၣ် အဝဲသ့ၣ် ဟံးစုနဲၣ်ကျဲ ဒီပုၢ်ဝဲၢ်မုၣ်ခွါလၢ ကလဲၤထံၣ်လိာ်သးဒီး ပှၤလၢအသးအိၣ်မၤလိ ယဟိဝၤယွၤအဂ့ၢ်. ဘၣ်ဆၣ် အဝဲသ့ၣ် ဟံးစုနဲၣ်ကျဲပှၤ လီၤတံၢ်လီၤဆဲးလၢ ပကလဲၤလၢ ပှၤတဂၤဂၤ အအိၣ်ဧါန့ၣ် ပတဲလီၤတံၢ် တသ့ဘၣ်. နီၢ်ကီၢ်န့ၣ် ယဟိဝၤယွၤ သူဝဲအသးစီဆှံ ဒ်သိးအကမၤစၢၤ ပှၤလၢအဘၣ်သး သ့ၣ်ညါအဂ့ၢ် ဒီးအဟံးစုနဲၣ်ကျဲ အခ့အပှၤလၢ ကလဲၤလၢ ပှၤလၢ အဘၣ်သးသ့ၣ်ညါ တၢ်မ့ၢ်တၢ်တီတဖၣ် အအိၣ်သ့. (မၤတၢ် ၁၆:၆, ၇) ဘၣ်ဆၣ် ဖဲပလဲၤ စံၣ်တဲၤတဲလီၤတၢ်အခါ ယဟိဝၤယွၤ သူဝဲအမူခိၣ်ကလူးတဖၣ် လၢကမၤစၢၤပှၤဒံး. အဃိ ဖဲပတဲပှၤဂၤ တၢ်မ့ၢ်တၢ်တီအခါ ပနာ်သပှၢ်တၢၢ်လၢ မူခိၣ်ကလူးတဖၣ် အိၣ်လၢပကပၤ ဒီးမၤစၢၤပှၤ.—ကွၢ်တၢ်လွံၢ်နၢၣ် လၢအမ့ၢ် “ယဟိဝၤယွၤ စံးဆၢအဝဲသ့ၣ် တၢ်ထုကဖၣ်.”b

၉. ပကွၢ်လိ မူခိၣ်ကလူးတဖၣ် ဒီးပာ်ဖျါထီၣ်လၢ ပအဲၣ်ပှၤဂၤ ကသ့ဒ်လဲၣ်.

^၉ ပကွၢ်လိ မူခိၣ်ကလူး ဒီးပာ်ဖျါထီၣ်လၢ ပအဲၣ်ပှၤဂၤ ကသ့ဒ်လဲၣ်. ဖဲပနၢ်ဟူ ပှၤဘိးဘၣ်သ့ၣ်ညါလီၤလၢ ပှၤတူၢ်လိာ်က့ၤ ပှၤတဂၤဂၤလၢ တၢ်အိၣ်ဖှိၣ်ပူၤအခါ ပပာ်ဖျါထီၣ် တၢ်သးခု ဒ်သိးဒီး မူခိၣ်ကလူးတဖၣ်သ့. ပပာ်ဖျါထီၣ် ပတၢ်သးခု သ့ခီဖျိ ပတူၢ်လိာ်က့ၤ ဒီပုၢ်ဝဲၢ်လၢ အဟဲက့ၤကဒါတဂၤန့ၣ် ဒီးပာ်ဖျါထီၣ်လၢ ပအဲၣ်အီၤ. (လူၤ ၁၅:၄-၇; ၂ ကရံၣ် ၂:၆-၈) တကးဒံးဘၣ် ပကွၢ်လိ မူခိၣ်ကလူး သ့ခီဖျိ ပဂုာ်ကျဲးစၢး စံၣ်တဲၤတဲလီၤတၢ်လၢ အဂ့ၤကတၢၢ်. (စံၣ် ၁၁:၆) ဖဲပစံၣ်တဲၤတဲလီၤတၢ်အခါ ဒ်မူခိၣ်ကလူးတဖၣ် မၤစၢၤပှၤအသိး ပဝဲစ့ၢ်ကီး ပဃုကျဲလၢ ကမၤစၢၤ ဒီပုၢ်ဝဲၢ်မုၣ်ခွါ လၢတၢ်စံၣ်တဲၤတဲလီၤတၢ်မၤ အပူၤသ့. အဒိ ပရဲၣ်ကျဲၤလၢ ပကလဲၤစံၣ်တဲၤတဲလီၤတၢ်ဒီး ပှၤကဲထီၣ် ပှၤစံၣ်တဲၤတဲလီၤတၢ်ဖိ သီသီတဂၤသ့ဧါ. ဒ်သိး ဒီပုၢ်ဝဲၢ်မုၣ်ခွါလၢ အသးပှၢ် ဒီးအတၢ်အိၣ်ဆူၣ်အိၣ်ချ့ တဂ့ၤဘၣ်တဖၣ် ကစံၣ်တဲၤတဲလီၤဘၣ်တၢ်အဂီၢ် ပရဲၣ်ကျဲၤလၢ ကလဲၤစံၣ်တဲၤတဲလီၤတၢ်ဒီး အဝဲသ့ၣ်သ့ဧါ.

၁၀. လၢဒီပုၢ်ဝဲၢ်မုၣ်စၤရါ အတၢ်လဲၤခီဖျိန့ၣ် ပန့ၢ်ဘၣ် တၢ်မၤလိဒ်လဲၣ်.

^၁၀ ခီဖျိလၢ ပတၢ်အိၣ်သးအဃိ ဘၣ်သ့ၣ်သ့ၣ် ပစံၣ်တဲၤတဲလီၤတၢ်တန့ၢ် ဒ်သိးလၢညါလၢၤဘၣ်. ဘၣ်ဆၣ် ပဃုကျဲလၢ ကမၤသကိးတၢ်ဒီး မူခိၣ်ကလူး လၢတၢ်စံၣ်တဲၤတဲလီၤ တၢ်မၤအဂီၢ် သ့ဒံး. ဆိကမိၣ်ကွၢ် ဒီပုၢ်ဝဲၢ်မုၣ်စၤရါc အတၢ်လဲၤခီဖျိ. ဒီပုၢ်ဝဲၢ်မုၣ်စၤရါန့ၣ် အအိၣ်လၢ ကီၢ်အ့ဒံယါ ဒီးအမၤ ပှၤလဲၤလၢညါ အနံၣ် ၂၀ ဝံၤအလီၢ်ခံ အန့ၢ်ဘၣ်တၢ်ဆါလၢ အနးတခါအဃိ အဘၣ်အိၣ်လၢ လီၢ်မံခိၣ်ထီဘိ. အသးကဘၣ်ဒိထဲလဲၣ်န့ၣ် ပထံၣ်တမှံကွၢ်သ့. ဘၣ်ဆၣ် ခီဖျိလၢ ဒီပုၢ်ဝဲၢ်မုၣ်ခွါတဖၣ် အတၢ်မၤစၢၤ ဒီးအဖးလံာ်စီဆှံ ကိးနံၤဒဲးအဃိ လၢခံကယီကယီန့ၣ် အသးခုထီၣ်က့ၤ ဒီးအအိၣ်ဒီး တၢ်ထံၣ်လၢအဂ့ၤ. ဒီပုၢ်ဝဲၢ်မုၣ်အံၤ အဘၣ်ဃုကျဲလၢ အကစံၣ်တဲၤတဲလီၤတၢ်အဂီၢ်. ခီဖျိလၢ အဆ့ၣ်နီၤ တကဲဘၣ်အဃိ အဆ့ၣ်နီၤ ကွဲးလံာ်ပရၢ တကဲဘၣ် ဒီးအစံၣ်တဲၤတဲလီၤတၢ် သ့ထဲလၢ လီတဲစိပူၤ. အဃိ အကိးဝဲ ပှၤလၢ အလဲၤအိၣ်သကိးဝဲလၢညါလၢ လီတဲစိ ဒီးအဝဲသ့ၣ် တဲဘၣ်အီၤ ပှၤလၢအဘၣ်သး မၤလိလံာ်စီဆှံတဖၣ်. လၢခံစှၤကိာ်လါန့ၣ် ဒီပုၢ်ဝဲၢ်မုၣ်စၤရါ အတၢ်မၤလိလံာ်စီဆှံ အိၣ်ဝဲအခါ ၇၀. အမၤလိ အဝဲသ့ၣ် တဝးခဲလၢာ်ဘၣ်အဃိ အရဲၣ်ကျဲၤဝဲလၢ ဒီပုၢ်ဝဲၢ်မုၣ်ခွါ ကမၤလိလံာ်စီဆှံဒီး အပှၤမၤလိလံာ်စီဆှံဖိတနီၤ. ခဲအံၤ အပှၤမၤလိလံာ်စီဆှံဖိ အါဂၤန့ၣ် ဟဲထီၣ် တၢ်အိၣ်ဖှိၣ်လံ. ဒီပုၢ်ဝဲၢ်မုၣ်စၤရါ ဒီးဒီပုၢ်ဝဲၢ်မုၣ်ခွါအဂၤ လၢအတၢ်အိၣ်သး လီၤဂာ်ဒီး ဒီပုၢ်ဝဲၢ်မုၣ်စၤရါန့ၣ် အဝဲသ့ၣ် ဂုာ်ကျဲးစၢး စံၣ်တဲၤတဲလီၤတၢ်လၢ အဂ့ၤကတၢၢ်အဃိ မူခိၣ်ကလူးလၢ အမၤသကိးတၢ်ဒီး အဝဲသ့ၣ်န့ၣ် ကသးခုဒိၣ်မး.

မူခိၣ်ကလူးတဖၣ် အိၣ်ဒီး တၢ်တူၢ်န့ၢ်ခီၣ်ကဲ

၁၁. မူခိၣ်ကလူးလၢ အသးတီတဖၣ် အိၣ်ဒီး တၢ်တူၢ်န့ၢ်ခီၣ်ကဲန့ၣ် အဝဲသ့ၣ် ပာ်ဖျါထီၣ်ဝဲဒ်လဲၣ်.

^၁၁ မူခိၣ်ကလူးလၢ အသးတီတဖၣ်န့ၣ် အဝဲသ့ၣ်ပာ်လီၤ တၢ်ဒိတၢ်တဲာ်အဂ့ၤလၢ အအိၣ်ဒီး တၢ်တူၢ်န့ၢ်ခီၣ်ကဲ. အဝဲသ့ၣ် ထံၣ်ဘၣ်ဒီး တၢ်တတီတလိၤ ဒီးတၢ်အၢတၢ်သီ လၢအနံၣ် လၢအကထိတဖၣ်ညါ. အဝဲသ့ၣ် ထံၣ်ဘၣ်ဝဲ မုၣ်ကီၤလံၢ် ဒီးမူခိၣ်ကလူး အါမးလၢ အမၤတ့ၢ် ယဟိဝၤယွၤ အတၢ်မၤန့ၣ် ထီဒါက့ၤ ယဟိဝၤယွၤ. (၁ မိၤ ၃:၁; ၆:၁, ၂; ယူ ၆) အဒိ လံာ်စီဆှံ ပာ်ဖျါထီၣ်ဝဲလၢ မူခိၣ်ကလူးလၢ အအၢအသီတဂၤ ထီဒါဝဲ မူခိၣ်ကလူးလၢ အသးတီတဂၤ တဘျုးသီညါ. (ဒၤ ၁၀:၁၃) တကးဒံးဘၣ် စးထီၣ်လၢ နီၢ်အံၣ်အု ဒီးစီၤအၤဒၣ်အစိၤ ဒီးတုၤလီၤလၢ ခဲအံၤန့ၣ် မူခိၣ်ကလူး လၢအသးတီတဖၣ် ထံၣ်ဘၣ်ဝဲလၢ ပှၤဟီၣ်ခိၣ်ဖိလၢ အဃုထၢလၢ ကဘူၣ်ထီၣ်ဘါထီၣ် ယဟိဝၤယွၤန့ၣ် တအိၣ်အါအါဘၣ်. အဝဲသ့ၣ်ထံၣ်ဘၣ် တၢ်အိၣ်သးတဖၣ်အံၤ သနာ်က့ အဝဲသ့ၣ် ဆဲးမၤဒံး ယဟိဝၤယွၤ အတၢ်မၤလၢ တၢ်သးခု ဒီးလၢတၢ်သးဆူၣ်. အဝဲသ့ၣ် သ့ၣ်ညါဝဲလၢ တၢ်ဆၢကတီၢ် မ့ၢ်ဘၣ်န့ၣ် ယဟိဝၤယွၤ ကမၤကတၢၢ်ကွံာ် တၢ်တတီတလိၤခဲလၢာ်.

၁၂. ဒ်သိး ပကအိၣ်ဒီး တၢ်တူၢ်န့ၢ်ခီၣ်ကဲအဂီၢ် ပကဘၣ်မၤဒ်လဲၣ်.

^၁၂ ပကွၢ်လိ မူခိၣ်ကလူးတဖၣ် အတၢ်တူၢ်န့ၢ်ခီၣ်ကဲ ကသ့ဒ်လဲၣ်. ဒ်မူခိၣ်ကလူးတဖၣ်အသိး ပကထံၣ်ဘၣ် တၢ်တတီတလိၤ ဒီးတၢ်ထီဒါဘၣ်ဆၣ် ပနာ်သပှၢ်တၢၢ်လၢ တၢ်ဆၢကတီၢ် မ့ၢ်ဘၣ်န့ၣ် ကစၢ်ယွၤ ကမၤလီၤမၢ်ကွံာ် တၢ်အၢတၢ်သီခဲလၢာ်. အဃိ ဒ်မူခိၣ်ကလူးတဖၣ်အသိး “ပတဘၣ်တူၢ်ၡူပသးလၢ ပကဆဲးမၤတၢ်ဂ့ၤအဂီၢ်ဘၣ်.” (ကလၤ ၆:၉) တကးဒံးဘၣ် ကစၢ်ယွၤ အတၢ်အၢၣ်လီၤတဖၣ် မၤစၢၤပှၤလၢ ပကအိၣ်ဒီး တၢ်တူၢ်န့ၢ်ခီၣ်ကဲ. (၁ ကရံၣ် ၁၀:၁၃) ဒီးဒ်သိး ပကအိၣ်ဒီး တၢ်ဝံသးစူၤ ဒီးတၢ်သးခုအဂီၢ် ပကဘၣ်ဃ့ ယဟိဝၤယွၤ အသးစီဆှံ တၢ်မၤစၢၤ. (ကလၤ ၅:၂၂; ကလီး ၁:၁၁) ဒီးဖဲပှၤထီဒါပှၤအခါ ပကဘၣ်နာ်န့ၢ် ယဟိဝၤယွၤ လၢာ်လၢာ်ဆ့ဆ့ ဒီးပတဘၣ်ပျံၤတၢ်ဘၣ်. ယဟိဝၤယွၤ ကမၤစၢၤပှၤထီဘိ ဒီးအကမၤဆူၣ်ထီၣ် ပဂံၢ်ပဘါ.—ဧ့ၤ ၁၃:၆.

မူခိၣ်ကလူးတဖၣ် မၤစၢၤတၢ်ဒ်သိး တၢ်အိၣ်ဖှိၣ် ကဆဲးအိၣ်ကဆှီအဂီၢ်

၁၃. ဖဲမုၢ်နံၤခံကတၢၢ်တဖၣ် အတီၢ်ပူၤန့ၣ် မူခိၣ်ကလူးတဖၣ် ဒိးန့ၢ်ဘၣ်မူဒါ လီၤလီၤဆီဆီဒ်လဲၣ်. (မးသဲ ၁၃:၄၇-၄၉)

^၁၃ ဖဲမုၢ်နံၤခံကတၢၢ်တဖၣ် အတီၢ်ပူၤန့ၣ် ယဟိဝၤယွၤ ဟ့ၣ်လီၤ မူခိၣ်ကလူးတဖၣ် မူဒါလီၤလီၤဆီဆီ. (ဖး မးသဲ ၁၃:၄၇-၄၉.) ဒီးပထံၣ်ဘၣ်လၢ တၢ်သးခုကစီၣ်န့ၣ် ထုးန့ၢ်ဝဲ ပှၤဟီၣ်ခိၣ်ဖိလၢ အကကွဲၢ်တဖၣ် အသးဒိၣ်မး. အဒိ ပှၤတနီၤန့ၣ် ဆီတလဲက့ၤ အတၢ်အိၣ်မူ ဒီးအိၣ်မူဒ် ကစၢ်ယွၤ အတၢ်ဘၣ်သးအသိး. ဘၣ်ဆၣ် ပှၤအဂၤတနီၤန့ၣ် တကနၣ်ဃုာ်ဝဲဘၣ်. အဃိ မူခိၣ်ကလူးတဖၣ်န့ၣ် အိၣ်ဒီးမူဒါလၢက “နီၤဖးဝဲ ပှၤအၢလၢ အအိၣ်လၢ ပှၤတီပှၤလိၤအကျါ.” တၢ်ကတိၤအံၤ အဲၣ်ဒိးတဲဝဲလၢ မူခိၣ်ကလူးတဖၣ်န့ၣ် မၤစၢၤတၢ်ဒ်သိး တၢ်အိၣ်ဖှိၣ် ကဆဲးအိၣ်ကဆှီအဂီၢ်. ဘၣ်ဆၣ် တအဲၣ်ဒိးတဲဝဲလၢ ပှၤတဂၤဂၤလၢ အပာ်တ့ၢ်ကွံာ် တၢ်မ့ၢ်တၢ်တီန့ၣ် အဟဲက့ၤကဒါလၢ ယဟိဝၤယွၤအအိၣ် တသ့ဘၣ်န့ၣ်ဘၣ်. ဒီးတအဲၣ်ဒိးတဲဝဲလၢ တၢ်ကီတၢ်ခဲ တအိၣ်ထီၣ်လၢ တၢ်အိၣ်ဖှိၣ်အပူၤ နီတဘျီစ့ၢ်ကီးန့ၣ်ဘၣ်. အဃိ ပသ့ၣ်ညါလၢ ဒ်သိးတၢ်အိၣ်ဖှိၣ် ကဆဲးအိၣ်ကဆှီအဂီၢ် မူခိၣ်ကလူးတဖၣ် မၤတၢ်ဆူၣ်မး.

၁၄-၁၅. ဒ်သိး တၢ်အိၣ်ဖှိၣ် ကဆဲးအိၣ်ကဆှီအဂီၢ် ပကွၢ်လိ မူခိၣ်ကလူးတဖၣ် အဒိအတဲာ် ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၄ ပကွၢ်လိ မူခိၣ်ကလူးတဖၣ် အဒိအတဲာ် ကသ့ဒ်လဲၣ်. ဒ်သိး တၢ်အိၣ်ဖှိၣ် ကဆဲးအိၣ်ကဆှီလၢ နီၢ်ခိဒီးနီၢ်သးအဂီၢ် ပကွၢ်လိ မူခိၣ်ကလူး သ့ခီဖျိ ပဂုာ်ကျဲးစၢး မၤတၢ်လၢ ပဘၣ်မၤ. အဃိ ပကဘၣ် ဂုာ်ကျဲးစၢး မၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤ. ဒီးပမၤဒ်အံၤ သ့ခီဖျိ ပရ့ဒီး ပှၤလၢ အအဲၣ်ယဟိဝၤယွၤ ဒီးဟးဆှဲး တၢ်တမံၤဂ့ၤ တမံၤဂ့ၤလၢ အကမၤဟးဂီၤ ပတၢ်ရ့လိာ်သးဒီး ယဟိဝၤယွၤ. ပမ့ၢ်မၤဒ်န့ၣ်န့ၣ် တၢ်အိၣ်ဖှိၣ် ကဆဲးအိၣ်ကဆှီဝဲ. (စံး ၁၀၁:၃) တကးဒံးဘၣ် ပမၤစၢၤ ဒီပုၢ်ဝဲၢ်မုၣ်ခွါတဖၣ်လၢ အဝဲသ့ၣ် ကဆဲးတီဒီး ယဟိဝၤယွၤ သ့စ့ၢ်ကီး. အဒိ ပမ့ၢ်သ့ၣ်ညါလၢ ဒီပုၢ်ဝဲၢ်မုၣ်ခွါတဂၤဂၤ မၤဘၣ်တၢ်ကမၣ်ဖးဒိၣ်န့ၣ် ပကဘၣ်မၤဒ်လဲၣ်. ခီဖျိလၢ ပအဲၣ်အီၤအဃိ ပကဘၣ် ဟ့ၣ်ကူၣ်အီၤလၢ အကလဲၤတဲတၢ်ဒီး တၢ်အိၣ်ဖှိၣ်သးပှၢ်. ဘၣ်ဆၣ် အမ့ၢ်တမၤထွဲ ပတၢ်ဟ့ၣ်ကူၣ်ဘၣ်န့ၣ် ပကဘၣ် လဲၤတဲတၢ်ဒီး တၢ်အိၣ်ဖှိၣ်သးပှၢ်. ပမၤဒ်န့ၣ်န့ၣ် ခီဖျိလၢ ပအဲၣ်ဒိးလၢ ပဒီပုၢ်ဝဲၢ်တဂၤအံၤ ကန့ၢ်ဘၣ် တၢ်မၤစၢၤလၢအချ့.—ယၤ ၅:၁၄, ၁၅.

^၁၅ ပှၤလၢ အမၤဘၣ်တၢ်ကမၣ်ဖးဒိၣ်န့ၣ် ပှၤကဘၣ် ထုးထီၣ်ကွံာ်အီၤလၢ တၢ်အိၣ်ဖှိၣ်အပူၤ. အဃိ ပ “တဘၣ်ရ့လိာ်သးဒီး” အဝဲသ့ၣ်ဘၣ်.d (၁ ကရံၣ် ၅:၉-၁၃) တၢ်ရဲၣ်တၢ်ကျဲၤတခါအံၤ ကဲထီၣ်တၢ်မၤစၢၤဒ်သိး တၢ်အိၣ်ဖှိၣ် ကဆဲးအိၣ်ကဆှီအဂီၢ်. ဒီးပှၤလၢ ပှၤထုးထီၣ်ကွံာ်အီၤန့ၣ် ပပာ်ဖျါထီၣ်တၢ်အဲၣ် လၢအဖီခိၣ်ခီဖျိ ပတရ့ဒီးအဝဲသ့ၣ် ဒီးတတဲတၢ်ဒီး အဝဲသ့ၣ်ဘၣ်. ပမ့ၢ်မၤဒ်န့ၣ်န့ၣ် ကမၤစၢၤ အဝဲသ့ၣ်ဒ်သိး အကသ့ၣ်ညါလီၤသးလၢ အကဘၣ် ဟဲက့ၤကဒါလၢ ယဟိဝၤယွၤအအိၣ်. အဝဲသ့ၣ် မ့ၢ်ဟဲက့ၤကဒါန့ၣ် ယဟိဝၤယွၤ ဒီးမူခိၣ်ကလူးတဖၣ် ကသးခု ဒီးပဝဲစ့ၢ်ကီး ပကသးခု.—လူၤ ၁၅:၇.

၁၆. နဘၣ်သးကွၢ်လိ မူခိၣ်ကလူး အတၢ်ဂ့ၤတၢ်ဝါ မနုၤလဲၣ်.

^၁၆ ပမၤလိဘၣ် မူခိၣ်ကလူးတဖၣ်အဂ့ၢ် ဒီးပမၤသကိးဘၣ်တၢ်ဒီး အဝဲသ့ၣ်အဃိ မ့ၢ်ဝဲတၢ်ခွဲးတၢ်ယာ် ဖးဒိၣ်တခါ. မူခိၣ်ကလူးလၢ အသးတီတဖၣ်န့ၣ် အိၣ်ဒီး တၢ်ဆီၣ်လီၤသး, အဲၣ်ပှၤဟီၣ်ခိၣ်ဖိ, အိၣ်ဒီး တၢ်တူၢ်န့ၢ်ခီၣ်ကဲ ဒီးဒ်သိး တၢ်အိၣ်ဖှိၣ် ကဆဲးအိၣ်ကဆှီအဂီၢ် အဝဲသ့ၣ် မၤတၢ်ဆူၣ်ဆူၣ်. အဃိ ပမ့ၢ်ကွၢ်လိအဝဲသ့ၣ်န့ၣ် ပဝဲစ့ၢ်ကီး ပကကဲဘၣ် ယဟိဝၤယွၤ အဟံၣ်ဖိဃီဖိ လီၤထူလီၤယိာ်.