ပှၤဖးလံာ်ဖိတဖၣ် အတၢ်သံကွၢ်

ဘၣ်မနုၤအဃိ ပှၤပာ်ထီၣ်​ ယဟိဝၤပှၤအုၣ်အသး အလံာ်အလဲၢ်တဖၣ်လၢ ပှာ်ယဲၤသန့အဂၤတဖၣ်​ မ့တမ့ၢ် လၢစိၣ်ၡဲၣ်​ မံဒံယါလၢအဂၤအပူၤ အခွဲးတအိၣ်နီတဂၤဘၣ်လဲၣ်

ပှၤတနီၤနီၤ ဆိကမိၣ်ဝဲလၢ လံာ်လဲၢ်လၢ ပတၢ်ကရၢကရိထုးထီၣ်ဝဲတဖၣ်​ ဘၣ်တၢ်နီၤလီၤကလီအီၤအဃိ အဝဲသ့ၣ်ပာ်ထီၣ်ဝဲလၢ ပှာ်ယဲၤသန့အဂၤ မ့တမ့ၢ် စိၣ်ၡဲၣ်​ မံဒံယါလၢ အဂၤတဖၣ်အပူၤသ့ဝဲလီၤ. ဘၣ်ဆၣ်​ ပမ့ၢ်ပာ်ထီၣ်အီၤဒ်န့ၣ်န့ၣ်​ ကဲထီၣ်တၢ်ကီတၢ်ခဲဖးဒိၣ်​ ဒီးထီဒါလိာ်သးဒီး တၢ်ဘျၢလၢ ယဟိဝၤပှၤအုၣ်အသးတဖၣ်​ ပာ်လီၤဝဲလၢပှာ်ယဲၤသန့အံၤ အဂီၢ်သ့ဝဲလီၤ. a (ကွၢ်တၢ်ဂ့ၢ်အဘျဲၣ်တက့ၢ်.) ဖဲန့ၣ်​ အိၣ်ဒီးတၢ်ဘျၢ လီၤတံၢ်လီၤဆဲးလၢ “တၢ်ဂီၤ, လံာ်လဲၢ်လၢ အံၣ်လဲးထြီနံးအပူၤ, တၢ်ပနီၣ်တဖၣ်, တၢ်သးဝံၣ်, တၢ်ဂီၤမူ မ့တမ့ၢ် တၢ်ဂ့ၢ်တၢ်ကျိၤလၢ ပှာ်ယဲၤသန့အံၤအပူၤန့ၣ်​ ပှၤတဘၣ်ပာ်ထီၣ်အီၤလၢ အ့ထၢၣ်နဲး (ပှာ်ယဲၤသန့ မ့တမ့ၢ် စိၣ်ၡဲၣ်​ မံဒံယါ တခါဂ့ၤတခါဂ့ၤ လၢပှၤပာ်ထီၣ်တၢ်ဂီၤမူ) အပူၤနီတဂၤဘၣ်.” ဘၣ်မနုၤအဃိ တၢ်ဘျၢတဖၣ်အံၤ အရ့ဒိၣ်လဲၣ်.

ပလံာ်ပလဲၢ်လၢ ပပှာ်ယဲၤသန့အပူၤန့ၣ်​ မ့ၢ်ဝဲ ခီၤဖံၤရဲး(ထ်) (copyrighted) အခီပညီန့ၣ်​ တၢ်သိၣ်တၢ်သီဒီသဒၢဝဲ တၢ်ခဲလၢာ်လၢ အအိၣ်လၢပှာ်ယဲၤသန့အံၤအပူၤလီၤ. တၢ်သိၣ်တၢ်သီအံၤအရ့ဒိၣ်​ မ့ၢ်လၢအဝဲဒီသဒၢဝဲ ဒ်သိးပှၤသုတသူကမၣ်​ လံာ်လဲၢ် ဒီးတၢ်အဂၤလၢအအိၣ်လၢ ပပှာ်ယဲၤသန့အံၤအပူၤတဂ့ၤအဂီၢ်လီၤ. မ့ၢ်လၢ ပှၤလၢအစူးကွံာ်ညိကွံာ်တၢ်နာ် ဒီးပှၤအဂၤတဖၣ်​ အဲၣ်ဒိးမၤဟးဂီၤပတၢ်မၤအဃိလီၤ. ပှၤတဖၣ်အံၤပာ်ထီၣ်ဝဲပလံာ်ပလဲၢ်တဖၣ်လၢ အဝဲသ့ၣ်အပှာ်ယဲၤသ့အပူၤ ဒ်သိးယဟိဝၤပှၤအုၣ်အသး ဒီးပှၤအဂၤတဖၣ်​ ကနုာ်လီၤကွၢ်အပှာ်ယဲၤသန့အဂီၢ်လီၤ. တကးဒံးဘၣ်​ အဝဲသ့ၣ်ပာ်ထီၣ်စ့ၢ်ကီးဝဲ တၢ်လၢအဒုးအိၣ်ထီၣ်​ ပှၤဂၤတဖၣ်​ အတၢ်သးဒ့ဒီလီၤ. (စံးထီၣ်ပတြၢၤ ၂၆:၄; ကတိၤဒိ ၂၂:၅) ပှၤတနီၤနီၤ သူဝဲ ပလံာ်ပလဲၢ်တဖၣ်​ မ့တမ့ၢ် jw.org အတၢ်ပနီၣ်အံၤ ဒ်သိးကဘိးဘၣ်ရၤလီၤတၢ်, သူဝဲလီတဲစိ အဲး (mobile apps) ဒီးလၢတၢ်လၢ အဝဲသ့ၣ်ဆါဝဲတဖၣ်အလိၤန့ၣ်လီၤ. ဘၣ်ဆၣ်​ မ့ၢ်လၢ ပလံာ်ပလဲၢ် ဒီးတၢ်ပနီၣ်န့ၣ်​ အိၣ်ဒီးတၢ်ဘျၢလၢ ဒီသဒၢအီၤအဃိ ပလဲၤထီၣ်လၢရူဒီး မၤပတုာ်အဝဲသ့ၣ်သ့ဝဲလီၤ. (ကတိၤဒိ ၂၇:၁၂) ဘၣ်ဆၣ်​ ပနီၢ်ကစၢ်ဒၣ်ဝဲ မ့ၢ်ပျဲပှၤတနီၤနီၤ မ့တမ့ၢ် ပဒီပုၢ်ဝဲၢ်တဖၣ်လၢကပာ်ထီၣ်​ ပလံာ်ပလဲၢ် လၢပှာ်ယဲၤသန့လၢအဂၤ မ့တမ့ၢ် ကသူ jw.org လၢကဆါတၢ်အဂီၢ်န့ၣ်​ ဘၣ်သ့ၣ်သ့ၣ်​ ပထီၣ်ရူတနၢၤလၢၤဘၣ်.

ပမ့ၢ် ဒီလိး လံာ်လဲၢ်တဖၣ်လၢ ပှာ်ယဲၤသန့အဂၤအပူၤန့ၣ်​ ကဲထီၣ်တၢ်ဘၣ်ယိၣ်သ့ဝဲလီၤ. ယဟိဝၤယွၤ သူဝဲထဲ “တၢ်အကုၢ်အပှၤလၢ အကလုၢ်တီ ဒီးအကူၣ်တၢ်သ့” ဒ်သိးကဟ့ၣ်အီၣ်ပှၤ နီၢ်သးတၢ်အီၣ်န့ၣ်လီၤ. (မးသဲ ၂၄:၄၅) “တၢ်အကုၢ်အပှၤ” အံၤကတဲာ်ကတီၤန့ၢ်ပှၤ နီၢ်သးတၢ်အီၣ်တၢ်အီ ခီဖျိထဲ www.jw.org, tv.jw.org, ဒီး wol.jw.org န့ၣ်လီၤ. ဒီး JW Language^®, JW Library^®, and JW Library Sign Language^® န့ၣ်​ မ့ၢ်ဝဲအဲး (apps) သၢခါလၢ လီတဲစိအဂီၢ်န့ၣ်လီၤ. လၢပှာ်ယဲၤသန့တဖၣ်အံၤအပူၤ တၢ်ဘိးဘၣ်ရၤလီၤလၢ အဘၣ်ဃးဒီး ဟီၣ်ခိၣ်လၢ မုၣ်ကီၤလံၢ်ပၢဝဲအံၤတပၣ်နီတခါဘၣ်. ဘၣ်ဆၣ်​ ပမ့ၢ်ဟံးန့ၢ်ပလံာ်ပလဲၢ်တဖၣ်လၢ ပှာ်ယဲၤသန့လၢအဂၤတဖၣ်အပူၤန့ၣ်​ အဝဲသ့ၣ်ဆီတလဲကွံာ်ဝဲ တၢ်ဂ့ၢ်တၢ်ကျိၤတဖၣ်လၢ ကျဲတဘိဘိသ့ဝဲအဃိ ကဲထီၣ်တၢ်ဘၣ်ယိၣ်သ့ဝဲလီၤ.—စံးထီၣ်ပတြၢၤ ၁၈:၂၆; ၁၉:၈.

ပမ့ၢ်တီၣ်ထီၣ်​ လံာ်လဲၢ်လၢ ပှာ်ယဲၤသန့လၢ ပှၤကွဲးဖျါထီၣ်ပှၤတၢ်ထံၣ်​ (comments) သ့န့ၣ်​ ကဲထီၣ်ဝဲတၢ်ခွဲးတၢ်ယာ်လၢ ပှၤလၢစူးကွံာ်ညိကွံာ်တၢ်နာ် ဒီးပှၤအဂၤတဖၣ်လၢ ကတဲဟးဂီၤ ယဟိဝၤယွၤအတၢ်ကရၢကရိန့ၣ်လီၤ. ဒီပုၢ်ဝဲၢ်တနီၤနီၤ တဲအါတၢ်ဒီးပှၤသ့ၣ်တဖၣ်အံၤလီၤ. အဝဲသ့ၣ်မၤဝဲဒ်န့ၣ်န့ၣ်​ တကဲထီၣ်တၢ်လၢ အမၤလၤကပီၤယဟိဝၤယွၤဘၣ်. တၢ်တဲသကိးတၢ်လၢ အ့ထၢၣ်နဲးအပူၤဒ်အံၤန့ၣ်​ တမ့ၢ်ကျဲအဂ့ၤတဘိလၢ ပကဘှီဘၣ်ထီၣ်​ ပှၤဂၤအတၢ်ဆိကမိၣ်ဒီး မၤစၢၤအဝဲသ့ၣ်လၢ ကနၢ်ပၢၢ်ထီၣ်တၢ်မ့ၢ်တၢ်တီအဂီၢ်န့ၣ်ဘၣ်. (၁ တံၤမသ့း ၆:၃-၅; ၂ တံၤမသ့း ၂:၂၃-၂၅) တကးဒံးဘၣ်​ ပှၤတနီၤနီၤ တ့ထီၣ်​ စိၣ်ၡဲၣ်​ မံဒံယါ အခီး(ထ်) (social media accounts) ဒီးပာ်မၤအသးဒ်သိးအဝဲသ့ၣ်မ့ၢ်ပှၤလၢ ပတၢ်ကရၢကရိအပူၤ မ့တမ့ၢ် ပှၤပၢဆှၢတၢ်ကမံးတံာ်တဂၤဂၤလီၤ. ဘၣ်ဆၣ်​ တမ့ၢ်ဘၣ်, ပှၤပၢဆှၢတၢ်ကမံးတံာ်န့ၣ်​ အဝဲသ့ၣ်​ တအိၣ်ဒီး အနီၢ်ကစၢ် စိၣ်ၡဲၣ်​ မံဒံယါ အခီး(ထ်) မ့တမ့ၢ် ပှာ်ယဲၤသန့လၢ ကပာ်ဖျါထီၣ်အနီၢ်ကစၢ်အဂ့ၢ် (social media site) နီတဂၤဘၣ်.

ဖဲပဒုးနဲၣ်ပှၤဂၤလၢ jw.org အခါ မ့ၢ်ဝဲ ပဆီၣ်ထွဲမၤစၢၤတၢ်စံၣ်တဲၤတဲလီၤ “တၢ်သးခုကကစီၣ်” တၢ်မၤလီၤ. (မးသဲ ၂၄:၁၄) ပပှာ်ယဲၤသန့တဖၣ်န့ၣ်​ ဂ့ၤဒိၣ်ထီၣ်ဝဲ ကွ့ၢ်ကွ့ၢ်လီၤ. ပအဲၣ်ဒိးလၢ ကကဲဘျုးလၢ ပှၤကိးဂၤဒဲးအဂီၢ်လီၤ. ပဆှၢန့ၢ်ပှၤဂၤ လံာ်လဲၢ်လၢ အံမ့(လ်) မ့တမ့ၢ် လံး(ခ်) (link) လၢ ကဆှၢအဝဲသ့ၣ်ဆူ ပပှာ်ယဲၤသန့သ့ဝဲလီၤ. ပမ့ၢ်မၤဒ်န့ၣ်န့ၣ်​ မ့ၢ်ဝဲ ပမၤစၢၤပှၤဂၤ ဒ်သိးအဝဲသ့ၣ်ကသ့ၣ်ညါဝဲလၢ ကျဲထဲတဘိလၢ ယဟိဝၤယွၤ ဟ့ၣ်ပှၤနီၢ်သးတၢ်အီၣ်န့ၣ်​ မ့ၢ်ဝဲ ခီဖျိလၢ “တၢ်အကုၢ်အပှၤလၢ ကလုၢ်တီ, ဒီးကူၣ်တၢ်သ့” န့ၣ်လီၤ.