နလဲၤခီဖျိ တၢ်သယုၢ်သညိကန့ၢ်အဂီၢ် ရ့ဒီးပှၤဂၤ—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံ မၤစၢၤနၤသ့ဧါ

ဖဲ ၂၀၂၃ န့ၣ် ပှၤကူၣ်ဘၣ်ကူၣ်သ့လၢ တၢ်အိၣ်ဆူၣ်အိၣ်ချ့တကပၤ သ့ၣ်ညါထီၣ်ဝဲလၢ တၢ်သယုၢ်သညိန့ၣ် အကဲဝဲ တၢ်ဆါတခါလၢ အလီၤဘၣ်ယိၣ်ဒိၣ်မး. အဃိ အဝဲသ့ၣ် ကဘၣ်ဂုာ်ကျဲးစၢးဃုကျဲလၢ ကဘှီဝဲတၢ်ဆါတခါအံၤ. တၢ်သယုၢ်သညိ လီၤမၢ်ကန့ၢ်ဒံးဧါ.

• အမဲရကၤ ကသံၣ်သရၣ်ဖးဒိၣ် ဘံဘံၤ မူသၢၤ တဲဝဲလၢ “ဖဲပတူၢ်ဘၣ်လၢ ပအိၣ်သယုၢ်သညိအခါ ပမ့ၢ်တရ့ဒီး ပှၤနီတဂၤလၢၤဘၣ်န့ၣ် အကမၤဘၣ်ဒိ ပတၢ်အိၣ်ဆူၣ်အိၣ်ချ့ဒိၣ်ထီၣ် ဒီးပတသးခုလၢၤဘၣ်. ဘၣ်ဆၣ် ဒ်သိးတၢ်တကဲထီၣ်အသး ဒ်န့ၣ်တဂ့ၤအဂီၢ် တၢ်လၢပမၤသ့အိၣ်ဝဲ.” ပမၤတၢ်မနုၤသ့လဲၣ်. အဝဲဆဲးတဲဝဲလၢ “ပလဲၤခီဖျိ တၢ်သယုၢ်သညိသ့ခီဖျိ ပမၤဂ့ၤထီၣ် ပတၢ်ရ့လိာ်သးဒီးပှၤဂၤ ကိးနံၤဒဲး.”a

ပှၤတူၢ်ဘၣ် တၢ်သယုၢ်သညိန့ၣ် တမ့ၢ်ထဲလၢ ပှၤအိၣ်တဂၤအဃိဘၣ်. ပှၤတနီၤန့ၣ် အအိၣ်လၢပှၤအါဂၤအကျါ သနာ်က့ အတူၢ်ဘၣ်လၢ အအိၣ်သယုၢ်သညိဒံး. ပမ့ၢ်တူၢ်ဘၣ် တၢ်သယုၢ်သညိ လၢတၢ်ဂ့ၢ် တမံၤဂ့ၤတမံၤဂ့ၤအဃိ သနာ်က့ လံာ်စီဆှံမၤစၢၤပှၤသ့. လံာ်စီဆှံ ဟ့ၣ်ကူၣ်ပှၤလၢ ပမ့ၢ်မၤဂ့ၤထီၣ် ပတၢ်ရ့လိာ်သးဒီး ပှၤဂၤန့ၣ် ကမၤလီၤစှၤ ပတၢ်သယုၢ်သညိ.

လံာ်စီဆှံ အတၢ်ဟံးစုနဲၣ်ကျဲလၢ ကမၤစၢၤပှၤ

တဲတၢ်ဒီးပှၤဂၤမုာ်မုာ် ဒီးဒိကနၣ်န့ၢ်ပှၤဂၤဂ့ၤဂ့ၤ. ဖဲပတဲတၢ်ဒီးပှၤဂၤအခါ တမ့ၢ်ထဲလၢ ပဘၣ်ပာ်ဖျါထီၣ် ပတၢ်တူၢ်ဘၣ်တခါဘၣ်, ပကဘၣ်ဒိကနၣ် တၢ်လၢ အဝဲသ့ၣ်တဲဝဲစ့ၢ်ကီး. နမ့ၢ်ပာ်ဖျါထီၣ်လၢ နသးအိၣ်ပှၤဂၤအနီၢ်ကီၢ်န့ၣ် နတၢ်ရ့လိာ်သးဒီးအဝဲသ့ၣ် ကဂ့ၤဒိၣ်ထီၣ်.

• လံာ်စီဆှံ အတၢ်ဟံးစုနဲၣ်ကျဲ– “တဘၣ်ကွၢ်လီၤထဲလၢ သုနီၢ်ကစၢ် အဘျုးတဂ့ၤ. ဆိကမိၣ်န့ၢ်တၢ်လၢ ပှၤဂၤအဂီၢ် စ့ၢ်ကီးတက့ၢ်.”—ဖံလံးပံၤ ၂:၄.

ရ့ဒီးပှၤအကလုာ်ကလုာ်. တဘၣ်ရ့ထဲ ပှၤလၢအနံၣ်ဒ်သိးဒီးနၤ မ့တမ့ၢ် တကလုာ်ဃီဒီးနၤတဂ့ၤ. ဂုာ်ကျဲးစၢး ရ့ဒီး ပှၤသးစၢ်, ပှၤသးပှၢ် ဒီးပှၤလၢအကလုာ် တဒ်သိးဒီးနၤဘၣ်တဖၣ်.

• လံာ်စီဆှံ အတၢ်ဟံးစုနဲၣ်ကျဲ– “အိးထီၣ်သုသးလဲၢ်လဲၢ်တက့ၢ်.”—၂ ကရံၣ်သူး ၆:၁၃.

နမ့ၢ်အဲၣ်ဒိးသ့ၣ်ညါအါထီၣ် ဘၣ်ဃး ဒ်သိးပတၢ်ရ့လိာ်သးဒီးပှၤဂၤ ကဂ့ၤဒိၣ်ထီၣ်အဂီၢ် ပကဘၣ်မၤဒ်လဲၣ်န့ၣ် ဖးကွၢ် တဂ့ၢ်လၢအမ့ၢ် “ဃုကျဲလၢ ကဒိးန့ၢ်ဘၣ်သကိး.”