တၢ်ပၢတၢ်ပြးလၢ အဂၢၢ်ကျၢၤ လၢကပၢဟီၣ်ခိၣ်ဒီဘ့ၣ်န့ၣ်အိၣ်ဧါ—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

ဆၢကတီၢ်ခဲအံၤ လၢဟီၣ်ခိၣ်ဒီဘ့ၣ်န့ၣ် တၢ်ပၢတၢ်ပြးတဖၣ် တၢ်ဂၢၢ်တၢ်ကျၢၤတအိၣ်ဘၣ် ဒီးတၢ်သဘံၣ်သဘုၣ် အိၣ်ဝဲအါမး. ထံကီၢ်လၢ အဖျါလၢ အတၢ်ပၢတၢ်ပြး လဲၤအသးဂ့ၤဂ့ၤဘၣ်ဘၣ် ဒၣ်လဲာ် ခီဖျိလၢ ပှၤတဲဟးဂီၤ ပဒိၣ်ပပှၢ်, တၢ်ဃုထၢထီၣ် ပဒိၣ်ပပှၢ်, တၢ်လီၤမုၢ်လီၤဖးလၢ ပှၤမၤထံဂ့ၢ်ကီၢ်ဂ့ၢ်ဖိတဖၣ်အကျါ ဒီးထံဖိကီၢ်ဖိတဖၣ် ထီဒါ ပဒိၣ်ပပှၢ်အဃိ တၢ်သဘံၣ်သဘုၣ် အိၣ်ထီၣ်ဝဲ.

လံာ်စီဆှံ ပာ်ဖျါထီၣ်ဝဲလၢ တၢ်ပၢတၢ်ပြးလၢ ကအိၣ်ဂၢၢ်ကျၢၤန့ၣ်အိၣ်ဝဲ. ဘၣ်သ့ၣ်သ့ၣ် နကနၢ်ဟူဘၣ် တၢ်ပၢတၢ်ပြးတခါအံၤ အဂ့ၢ်လံ. တၢ်ပၢတၢ်ပြးတခါအံၤ အကဲဝဲ တၢ်ပၢတၢ်ပြးလၢ ယ့ၣ်ၡူးဃ့ဝဲလၢ အတၢ်ထုကဖၣ်အပူၤ.

• “သုကဘၣ်ဃ့ထုကဖၣ်တၢ် ဒ်အံၤလီၤ. ‘ပပၢ်အိၣ်လၢမူခိၣ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်. နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး ဒ်နတၢ်ဘၣ်သး အိၣ်ဝဲအသိးတက့ၢ်.’”—မးသဲ ၆:၉, ၁၀.

ဘၣ်ဃးဒီး ဘီမုၢ်အံၤန့ၣ် လံာ်စီဆှံ ပာ်ဖျါထီၣ်ဝဲဒ်လဲၣ်

ယွၤအဘီအမုၢ် လၢအမ့ၢ် တၢ်ပၢတၢ်ပြးလၢအဂၢၢ်အကျၢၤ

ဘီမုၢ်အံၤ အိၣ်လၢမူခိၣ်.

• ယ့ၣ်ၡူးကိးဝဲ ဘီမုၢ်အံၤလၢ “မူခိၣ်အဘီအမုၢ်.” (မးသဲ ၄:၁၇; ၅:၃, ၁၀, ၁၉, ၂၀) အဃိ အတဲဝဲလၢ “ယဘီယမုၢ်န့ၣ် တဟဲအိၣ်ထီၣ်ခီဖျိလၢ ပှၤဟီၣ်ခိၣ်ဖိအဃိဘၣ်.”—ယိၤဟၣ် ၁၈:၃၆.

ဘီမုၢ်အံၤ ကမၤဟးဂီၤကွံာ် ဟီၣ်ခိၣ်အတၢ်ပၢတၢ်ပြး ဒီးကပၢက့ၤတၢ်လၢအလီၢ်.

• လံာ်စီဆှံ တဲဝဲလၢ “ဘီမုၢ်အံၤ ကမၤသဘှံး ဒီးကမၤဟးဂီၤဝဲ [ဟီၣ်ခိၣ်] ဘီမုၢ်သ့ၣ်တဖၣ်အံၤခဲလၢာ် ဒီးထဲဒၣ် ဘီမုၢ်တဘ့ၣ်အံၤန့ၣ် ကအိၣ်ဂၢၢ်ကျၢၤဝဲ လီၤထူလီၤယိာ်.”—ဒၤနံးယ့လး ၂:၄၄.

ယ့ၣ်ၡူး ကကဲစီၤပၤ လၢဘီမုၢ်အံၤ ဒီးဘီမုၢ်အံၤ တဟးဂီၤဝဲ နီတဘျီဘၣ်.

• လံာ်စီဆှံ တဲဝဲလၢ “အတၢ်ပၢတၢ်ပြးန့ၣ် ကအိၣ်ဝဲ လီၤထူလီၤယိာ် ဒီးအဘီမုၢ်န့ၣ် တဟးဂီၤနီတဘျီဘၣ်.”—ဒၤနံးယ့လး ၇:၁၃, ၁၄.

ဘီမုၢ်အံၤ ကဒုးအိၣ်ထီၣ် တၢ်မုာ်တၢ်ခုၣ် ဒီးတၢ်ဘံၣ်တၢ်ဘၢ.

• လံာ်စီဆှံ တဲဝဲလၢ “ပှၤကိးဂၤဒဲး ကအိၣ်မုာ်ဆိးပၢၤ လၢအစပံးလီၢ်တဖၣ် ဒီးအချၢၣ်ဒၢထူၣ်တဖၣ်ဒၣ်ဝဲ အကျါ, ပှၤတမၤပျံၤအီၤ နီတဂၤလၢၤဘၣ်. တၢ်သုးမုၢ်ဂီၢ်မုၢ်အယွၤ အၢၣ်လီၤအီလီၤတ့ၢ် တၢ်အံၤလီၤ.”—မံ ၄:၄, ခ့ခါစှီၤကျိာ်.

ဃုသ့ၣ်ညါအါထီၣ် ဘၣ်ဃးဒီး ယွၤအဘီအမုၢ်

ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ သူအတၢ်ဆၢကတီၢ်အါမး လၢက “စံၣ်တဲၤတဲလီၤ ဘီမုၢ်တၢ်သးခုကစီၣ်.” (မးသဲ ၉:၃၅) တကးဒံးဘၣ် အတဲဆိပာ်စၢၤဝဲလၢ

• “ဘီမုၢ်တၢ်သးခုကစီၣ်န့ၣ် ကဘၣ် တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ ဒ်သိး ကကဲထီၣ် တၢ်အုၣ်အသးလၢ ပှၤကလုာ်ခဲလၢာ် အဂီၢ်လီၤ. ဝံၤဒီး တၢ်အကတၢၢ်န့ၣ် ကတုၤဝဲလီၤ.”—မးသဲ ၂၄:၁၄.

ဆၢကတီၢ်ခဲအံၤ ယွၤအဘီအမုၢ် တၢ်သးခုကစီၣ်န့ၣ် ဘၣ်တၢ်စံၣ်တဲၤတဲလီၤအီၤ လၢထံကီၢ် ၂၄၀ ဘျဲၣ်. ပအဲၣ်ဒိးလၢ နကဃုသ့ၣ်ညါအါထီၣ် ဘၣ်ဃးဒီး ယွၤအဘီအမုၢ် အတၢ်ပၢတၢ်ပြးအဂ့ၢ် ဒီးနကဒိးန့ၢ်ဘၣ်အဘျုး လၢတၢ်ပၢအံၤ အဖီလာ် ဒ်လဲၣ်အဂ့ၢ်.

ကွၢ်တၢ်ဂီၤမူ လၢအမ့ၢ် ယွၤအဘီအမုၢ်န့ၣ် မ့ၢ်မနုၤလဲၣ်