ခရံာ်ဖိနီၢ်ကီၢ်န့ၣ် ကဘၣ်မ့ၢ် ပှၤဒ်လဲၣ်—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

မုၢ်မဆါတနံၤအံၤ ပှၤအါဂၤန့ၣ် ကိးလီၤအသးလၢ ခရံာ်ဖိ ဘၣ်ဆၣ် အဝဲသ့ၣ် တရ့ဒီးပှၤဂၤ ဂ့ၤဂ့ၤဘၣ်. အဝဲသ့ၣ်တနီၤန့ၣ် အဲၣ်လီၤထဲအသး, မၤတၢ်တတီတလိၤဘၣ် ဒီးတအိၣ်ဒီး တၢ်သူၣ်ဂ့ၤသးဝါဘၣ်. ဒီးမ့မ့ၢ် အဂၤတနီၤန့ၣ် တတီဒီး အသးသမူတံၤသကိးဘၣ်. အဃိ ပှၤအါဂၤ ဆိကမိၣ်ထီၣ်ဝဲလၢ “ခရံာ်ဖိနီၢ်ကီၢ်န့ၣ် ကဘၣ်မ့ၢ် ပှၤဒ်လဲၣ်.”

ခရံာ်ဖိနီၢ်ကီၢ်န့ၣ် ကဘၣ်မ့ၢ် ပှၤဒ်လဲၣ်

ပှၤတဂၤ ကတဲလီၤအသးလၢ အမ့ၢ်ခရံာ်ဖိန့ၣ် ညီလီၤ. ဘၣ်ဆၣ် ထဲပတဲလီၤပသးလၢ ပကဲခရံာ်ဖိန့ၣ် တလၢပှဲၤဒံးဘၣ်. လံာ်စီဆှံ တဲဝဲလၢ တၢ်လၢခရံာ်ဖိန့ၣ် မ့ၢ်ဝဲ ယ့ၣ်ၡူးအပျဲၢ်အဘီၣ်. (မၤတၢ် ၁၁:၂၆) ယ့ၣ်ၡူးအနီၢ်ကစၢ် တဲဝဲလၢ “သုမ့ၢ်မၤထွဲ ယတၢ်ကတိၤတဖၣ် ထီဘိန့ၣ် သုမ့ၢ်ယပျဲၢ်ယဘီၣ်တဖၣ် အနီၢ်ကီၢ်လီၤ.” (ယိၤဟၣ် ၈:၃၁) ပှၤတဂၤမး မၤပိာ်ထွဲ ယ့ၣ်ၡူးအတၢ်ကတိၤ လီၤတံၢ်လီၤဆဲး ခဲလၢာ်တန့ၢ်ဘၣ်. ဘၣ်ဆၣ် ခရံာ်ဖိတဖၣ်န့ၣ် ဂုာ်ကျဲးစၢး မၤထွဲယ့ၣ်ၡူး အတၢ်သိၣ်လိတဖၣ် ဒီးအိၣ်မူမၤထွဲဝဲ ကိးနံၤဒဲး. ဘၣ်ဃးဒီး တၢ်ဂ့ၢ်အံၤ ပကကွၢ်သကိး တၢ်အဒိတနီၤ.

ခရံာ်ဖိနီၢ်ကီၢ်န့ၣ် ပာ်ဖျါထီၣ်တၢ်အဲၣ်

တၢ်လၢယ့ၣ်ၡူးတဲဝဲ– “ယဟ့ၣ်သု တၢ်မၤလိာ် အသီတထံၣ်လၢ အဲၣ်လိာ်သုသး တဂၤဒီးတဂၤတက့ၢ်. ဒ်ယအဲၣ်သုအသိးန့ၣ် သုဝဲစ့ၢ်ကီး အဲၣ်လိာ်သုသး တဂၤဒီးတဂၤတက့ၢ်. သုမ့ၢ် အဲၣ်လိာ်ကွံလိာ် သုသးကဒဲကဒဲန့ၣ် ပှၤခဲလၢာ် ကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်လီၤ.”—ယိၤဟၣ် ၁၃:၃၄, ၃၅.

တၢ်လၢယ့ၣ်ၡူးမၤဝဲ– ယ့ၣ်ၡူးန့ၣ် တကွၢ်ဒိၣ်ဆံးအါစှၤတၢ်ဘၣ်, အဝဲပာ်ဖျါထီၣ် တၢ်အဲၣ်လၢ ပှၤကိးကလုာ် ကိးဂၤဒဲး အဖီခိၣ်. အဒိ အမၤဘျါက့ၤ ပှၤဆူးပှၤဆါ, ဒုးအီၣ်ဒုးအီပှၤဂၤ တၢ်အီၣ် ဒီးအဟ့ၣ်လီၤ အသးသမူ လၢပှၤဂၤအဂီၢ်.—မးသဲ ၁၄:၁၄-၂၁; ၂၀:၂၈.

တၢ်လၢခရံာ်ဖိနီၢ်ကီၢ်တဖၣ်မၤဝဲ– အဝဲသ့ၣ် ပာ်ဖျါထီၣ်တၢ်အဲၣ် ခီဖျိ ဟ့ၣ်တၢ်ညီ, တကွၢ်ဒိၣ်ဆံးအါစှၤတၢ်ဘၣ် ဒီးပျၢ်ပှၤဂၤ အတၢ်ကမၣ်. အဝဲသ့ၣ် မၤစၢၤ ပှၤလၢအလိၣ်ဘၣ် တၢ်မၤစၢၤ ဒီးသးအိၣ်တူၢ်ဆါအသး လၢပှၤဂၤအဂီၢ်.—၁ ယိၤဟၣ် ၃:၁၆.

ခရံာ်ဖိနီၢ်ကီၢ်တဖၣ် မၤတၢ်တီတီလိၤလိၤ

တၢ်လၢယ့ၣ်ၡူးတဲဝဲ– “ယမ့ၢ် . . . တၢ်မ့ၢ်တၢ်တီ.”—ယိၤဟၣ် ၁၄:၆.

တၢ်လၢယ့ၣ်ၡူးမၤဝဲ– ယ့ၣ်ၡူးန့ၣ် အတဲတၢ် ဒီးမၤတၢ် တီတီလိၤလိၤခဲလၢာ်. အဒိ အဝဲတမၤလံၣ်မၤလီတၢ် ဒ်သိး ပှၤကမၤ တၢ်လၢအအဲၣ်ဒိးမၢပှၤမၤ မ့တမ့ၢ် ကတိၤကဘျံးကဘျၣ်တၢ် ဒ်သိး ပှၤကနာ် တၢ်လၢအတမ့ၢ်တတီန့ၣ်ဘၣ်. ပှၤအါဂၤ သ့ၣ်ညါလၢ ယ့ၣ်ၡူးန့ၣ် မၤတၢ်တီတီလိၤလိၤ. ဖဲပှၤထီဒါအီၤအခါဒၣ်လဲာ် အဝဲမၤတၢ်တီတီလိၤလိၤဒံး.—မးသဲ ၂၂:၁၆; ၂၆:၆၃-၆၇.

တၢ်လၢခရံာ်ဖိနီၢ်ကီၢ်တဖၣ်မၤဝဲ– အဝဲသ့ၣ် တလံၣ်တၢ်ဘၣ်. အဝဲသ့ၣ် ဟ့ၣ်တၢ်ခိတၢ်သွဲ, တဟုၣ်တၢ်ဘၣ်, အဝဲသ့ၣ် မၤတၢ်မၤဆူၣ်ဆူၣ် ဒီးတီတီလိၤလိၤ. (ရိမ့ၤ ၁၃:၅-၇; အ့းဖ့းစူး ၄:၂၈) အဝဲသ့ၣ် တလံၣ်အီၣ်ပှၤဂၤဘၣ်, တဟုၣ်ကွၢ်လံာ် လၢတၢ်ဒိးစဲးဆၢကတီၢ်ဘၣ် ဒီးဖဲအတီၣ်ထီၣ် တၢ်မၤအခါ တတဲလံၣ်တဲလီ ဘၣ်ဃးဒီး အနီၢ်ကစၢ် အဂ့ၢ်ဘၣ်.—ဧ့ၤဘြံၤ ၁၃:၁၈.

ခရံာ်ဖိနီၢ်ကီၢ်တဖၣ် အိၣ်ဒီးတၢ်သူၣ်ဂ့ၤသးဝါ

တၢ်လၢယ့ၣ်ၡူးတဲဝဲ– “ပှၤလၢတၢ်ဘှံးအသး ဒီးဝံတၢ်ယိးတၢ်ဃၢ ခဲလၢာ်သ့ၣ်ဧၢ, ဟဲလၢ ယအိၣ်တက့ၢ်. ယကမၤဆူၣ်ထီၣ် သုသးဂံၢ်ဘါလီၤ. ယိးထီၣ် ယနီၣ်ယိးဘိ ဒီးမၤလိတၢ်လၢ ယအိၣ်တက့ၢ်. မ့ၢ်လၢယသးစူၤ ဒီးယအိၣ်ဒီးတၢ်ဆီၣ်လီၤသးအဃိ သုကဒိးန့ၢ်ဘၣ် တၢ်ဂံၢ်တၢ်ဘါလီၤ. ယနီၣ်ယိးဘိန့ၣ် ပှၤယိးဘၣ်အီၤညီ ဒီးယတၢ်ဝံတၢ်ယိးန့ၣ် ဖှံဝဲလီၤ.”—မးသဲ ၁၁:၂၈-၃၀.

တၢ်လၢယ့ၣ်ၡူးမၤဝဲ– ယ့ၣ်ၡူးန့ၣ် အသးဂ့ၤ ဒီးပှၤရ့ဘၣ်အီၤညီ. အဝဲသးအိၣ် ပှၤဖိသၣ်တဖၣ်, မၤမုာ်ထီၣ်က့ၤ ပှၤလၢအသူၣ်ကိၢ်သးဂီၤတၢ် ဒီးရ့ဒီးပှၤဂၤလၢ တၢ်ပာ်ကဲအပူၤ.—မၢ်ကူး ၁၀:၁၃-၁၅; လူၤကၣ် ၉:၁၁.

တၢ်လၢခရံာ်ဖိနီၢ်ကီၢ်တဖၣ်မၤဝဲ– အဝဲသ့ၣ် တဲတၢ်ဒီးပှၤဂၤမုာ်မုာ်. အဝဲသ့ၣ် တဲတၢ်လၢ တၢ်ပာ်ကဲအပူၤ ဒီးတတဲတၢ် ဆူၣ်ဆူၣ်ကိၤကိၤဘၣ်. (အ့းဖ့းစူး ၄:၂၉, ၃၁, ၃၂) အဝဲသ့ၣ် သူၣ်အိၣ်သးအိၣ်ပှၤဂၤ ဒီးဃုကျဲလၢ ကမၤစၢၤပှၤဂၤ.—ကလၤတံ ၆:၁၀.

ခရံာ်ဖိနီၢ်ကီၢ်တဖၣ်န့ၣ် တီဒီးအသးသမူ တံၤသကိး

တၢ်လၢယ့ၣ်ၡူးတဲဝဲ– “တၢ်လၢကစၢ်ယွၤ ဒုးအိၣ်ဃုာ်ဝဲန့ၣ် မ်ပှၤဟီၣ်ခိၣ်ဖိသု တထုးဖးအီၤတဂ့ၤ.”—မၢ်ကူး ၁၀:၉.

တၢ်လၢယ့ၣ်ၡူးမၤဝဲ– ယ့ၣ်ၡူးန့ၣ် တဆီဟံၣ်ဆီဃီ နီတဘျီဘၣ်. သနာ်က့ အဝဲဟ့ၣ်ဂံၢ်ဟ့ၣ်ဘါ ပှၤဂၤလၢ ကတီဒီး အသးသမူတံၤသကိး. (မးသဲ ၁၉:၉) တကးဒံးဘၣ် ယ့ၣ်ၡူး ဟ့ၣ်ပလီၢ်ဝဲ ဘၣ်ဃးဒီး တၢ်လၢကမၤလီၤဖး တၢ်ဆီဟံၣ်ဆီဃီ.—မးသဲ ၅:၂၈.

တၢ်လၢခရံာ်ဖိနီၢ်ကီၢ်တဖၣ်မၤဝဲ– အဝဲသ့ၣ်ဟးဆှဲး တၢ်လၢကမၤဘၣ်ဒိ အတၢ်ဆီဟံၣ်ဆီဃီ. (ဧ့ၤဘြံၤ ၁၃:၄) ဒီးခရံာ်ဖိ နီၢ်ဒီမိၢ်ဝၤတဖၣ်န့ၣ် ရ့လိာ်အသးလၢ တၢ်အဲၣ်ဒီး တၢ်ပာ်ကဲပူၤ.—အ့းဖ့းစူး ၅:၂၈, ၃၃.