တၢ်ဒုးတၢ်ယၤလၢ ကီၢ်အံၣ်စရ့ ဒီးထံကီၢ်လၢ အခိၣ်အဃၢၤတဖၣ်—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

တၢ်ဒုးတၢ်ယၤ ကဲထီၣ်လၢ ကီၢ်အံၣ်စရ့ ဒီးကီၢ်အံၤရၤအဘၢၣ်စၢၤ ဒီးကီၢ်အမဲရကၤ မၤဘၣ်ဃးအသးလၢ တၢ်ဒုးတၢ်ယၤအံၤစ့ၢ်ကီး. အဃိ ပှၤအါဂၤဘၣ်ယိၣ်ဝဲလၢ တၢ်အိၣ်သး ကနးဒိၣ်ထီၣ် ဒီးထံကီၢ်အါဘ့ၣ် ကပၣ်ဃုာ်လၢ တၢ်ဒုးအံၤ. ဘၣ်ဃးဒီးတၢ်ဂ့ၢ်အံၤ မ့ၢ်ပဒိၣ်ပပှၢ်တဖၣ် မၤလီၤမၢ်ကွံာ် တၢ်မၤဆူၣ်မၤစိး ဒီးတၢ်ဒုးတၢ်ယၤ ဒီးအဝဲသ့ၣ် ဒုးအိၣ်ထီၣ် တၢ်ဃူတၢ်ဖိးလၢ ဟီၣ်ခိၣ်ဒီဘ့ၣ် ကသ့ဧါ.

တၢ်ဒုးလၢ အကဲထီၣ်လၢ ကီၢ်အံၣ်စရ့ ဒီးကီၢ်အံၤရၤအဘၢၣ်စၢၤန့ၣ် ပှၤလၢအသ့ၣ်ညါ လံာ်စီဆှံ အတၢ်စံးပာ်န့ၣ် ဘၣ်သ့ၣ်သ့ၣ် အဝဲသ့ၣ် ကဆိကမိၣ်ဝဲလၢ မ့ၢ်အၢ်မက့းဒိၣ်အတၢ်ဒုး လၢလံာ်လီၣ်ဖျါ ပာ်ဖျါထီၣ်ဝဲန့ၣ် ကစးထီၣ်ဝဲဧါ.

ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

ပဒိၣ်ပပှၢ်တဖၣ် မၤကတၢၢ်ကွံာ် တၢ်ဒုးတၢ်ယၤလၢ ကီၢ်အံၣ်စရ့ ဒီးထံကီၢ်လၢ အခိၣ်အဃၢၤတဖၣ်သ့ဧါ

လံာ်စီဆှံတဲဝဲလၢ “တဘၣ်နာ်န့ၢ် ပဒိၣ်ဖးဒိၣ်တဖၣ် ဒီးပှၤဟီၣ်ခိၣ်ဖိ လၢအအုၣ်က့ၤခီၣ်က့ၤတၢ် တသ့ဘၣ်န့ၣ်တဂ့ၤ.”—စံးထီၣ်ပတြၢၤ ၁၄၆:၃.

ပဒိၣ်ပပှၢ်တဖၣ် မၤဂ့ၤထီၣ် တၢ်အိၣ်သးလၢ ကီၢ်အံၣ်စရ့ ဒီးထံကီၢ်လၢ အခိၣ်အဃၢၤတဖၣ် ကန့ၢ်ဧါန့ၣ် ပတသ့ၣ်ညါဘၣ်. ဘၣ်ဆၣ် လံာ်စီဆှံ တဲဝဲလၢ ပှၤမၤထံဂ့ၢ်ကီၢ်ဂ့ၢ် ခိၣ်နၢ်တဖၣ်မ့ၢ်ဂ့ၤ, ပဒိၣ်ပပှၢ်တဖၣ်မ့ၢ်ဂ့ၤ ဒီးပှၤအဂၤတဖၣ်မ့ၢ်ဂ့ၤ အဝဲသ့ၣ် မၤကတၢၢ်ကွံာ် တၢ်ဒုးတၢ်ယၤ ဒီးဒုးအိၣ်ထီၣ် တၢ်ဃူတၢ်ဖိးနီၢ်ကီၢ် တသ့ဘၣ်. ထဲဒၣ် ကစၢ်ယွၤ တဂၤလီၤ “ကမၤကတၢၢ်ကွံာ် တၢ်ဒုးတၢ်ယၤလၢ ဟီၣ်ခိၣ်ချၢ.”—စံးထီၣ်ပတြၢၤ ၄၆:၉.

• ဒ်သိး နကသ့ၣ်ညါအါထီၣ် တၢ်ဂ့ၢ်အံၤအဂီၢ် ဖးတၢးထီခိၣ်တၢ် လၢအခိၣ်တီမ့ၢ်ဝဲ “တၢ်ဒုးတၢ်ယၤ ကကတၢၢ်ကွံာ်—ဒ်လဲၣ်”

တၢ်ဒုးတၢ်ယၤလၢ ကီၢ်အံၣ်စရ့ ဒီးထံကီၢ်လၢ အခိၣ်အဃၢၤတဖၣ်န့ၣ် မၤလၢပှဲၤထီၣ် လံာ်စီဆှံ အတၢ်စံးပာ်ဧါ

လံာ်စီဆှံတဲဝဲလၢ “သုကနၢ်ဟူဘၣ် တၢ်ဒုးတၢ်ယၤအသီၣ် ဒီးတၢ်ဒုးတၢ်ယၤ အကစီၣ်လီၤ. . . . ပှၤကလုာ် တဒူၣ်ဒီးတဒူၣ် ကဒုးလိာ်အသး ဒီးဘီမုၢ်တဘ့ၣ်ဒီးတဘ့ၣ် ကဒုးလိာ်အသးလီၤ.”—မးသဲ ၂၄:၆, ၇.

တၢ်ဒုးတၢ်ယၤလၢ ကီၢ်အံၣ်စရ့ ဒီးထံကီၢ်လၢ အခိၣ်အဃၢၤတဖၣ်န့ၣ် အမ့ၢ်ဝဲ တၢ်ပနီၣ်တခါလၢ ပအိၣ်မူဘၣ်လၢ “တၢ်အစိၤလၢ အလီၢ်ခံကတၢၢ်” လၢလံာ်စီဆှံ ကိးဝဲစ့ၢ်ကီးလၢ “မုၢ်နံၤခံကတၢၢ်တဖၣ်.” (မးသဲ ၂၄:၃; ၂ တံၤမသ့း ၃:၁) တၢ်ဒုးတၢ်ယၤလၢ ပထံၣ်ဘၣ်ခဲအံၤန့ၣ် ဒုးသ့ၣ်ညါပှၤလၢ တယံာ်လၢၤဘၣ်န့ၣ် ကစၢ်ယွၤ ကမၤကတၢၢ်ကွံာ် တၢ်ဒုးတၢ်ယၤ ဒီးတၢ်ကီတၢ်ခဲ ခဲလၢာ်လၢ ပှၤဟီၣ်ခိၣ်ဖိ ထံၣ်ဘၣ်ဝဲ.

• ဒ်သိး နကသ့ၣ်ညါအါထီၣ် တၢ်ဂ့ၢ်အံၤအဂီၢ် ဖးတၢ်ဂ့ၢ်လၢ အခိၣ်တီမ့ၢ်ဝဲ “‘မုၢ်နံၤခံကတၢၢ်တဖၣ်အပူၤ’ လၢအမ့ၢ် ‘တၢ်အကတၢၢ် အဆၢကတီၢ်’ အတၢ်ပနီၣ်န့ၣ် မ့ၢ်မနုၤလဲၣ်.”

အၢ်မက့းဒိၣ်အတၢ်ဒုး ကစးထီၣ်ဝဲလၢ ကီၢ်အံၣ်စရ့ ဒီးထံကီၢ်လၢ အခိၣ်အဃၢၤတဖၣ်ဧါ

လံာ်စီဆှံတဲဝဲလၢ “[အဝဲသ့ၣ်] ဒုးအိၣ်ဖှိၣ်ဝဲ စီၤပၤတဖၣ်လၢ တၢ်လီၢ်လၢ အဘၣ်တၢ်ကိးအီၤလၢ ဧ့ၤဘြံၤကျိာ်လၢ အၢ်မက့းဒိၣ်.”—လီၣ်ဖျါ ၁၆:၁၆.

အၢ်မက့းဒိၣ်အတၢ်ဒုးန့ၣ် တမ့ၢ်တၢ်ဒုးလၢ အကဲထီၣ်အသးလၢ ပှၤဟီၣ်ခိၣ်ဖိ အပဒိၣ်ပပှၢ် အဘၢၣ်စၢၤဘၣ် ဒီးအတစးထီၣ်စ့ၢ်ကီး အသးလၢ ကီၢ်အံၣ်စရ့ ဒီးထံကီၢ်လၢ အခိၣ်အဃၢၤတဖၣ်ဘၣ်. အၢ်မက့းဒိၣ်အတၢ်ဒုးန့ၣ် ကကဲထီၣ်အသးလၢ ဟီၣ်ခိၣ်ဒီဘ့ၣ်. ဒီးတၢ်ဒုးအံၤ ကကဲထီၣ်အသးလၢ ပှၤဟီၣ်ခိၣ်ဖိ အပဒိၣ်ပပှၢ်ခဲလၢာ် ဒီးကစၢ်ယွၤ အဘၢၣ်စၢၤ.

• ဒ်သိး နကသ့ၣ်ညါအါထီၣ် တၢ်ဂ့ၢ်အံၤအဂီၢ် ဖးတၢ်ဂ့ၢ်လၢ အခိၣ်တီမ့ၢ်ဝဲ “အၢ်မက့းဒိၣ် အတၢ်ဒုးန့ၣ် မ့ၢ်မနုၤလဲၣ်”

ဖဲပသူၣ်ကိၢ်သးဂီၤတၢ်အခါန့ၣ် ပပာ်ပသးမုာ်မုာ်ခုၣ်ခုၣ် ကသ့ဒ်လဲၣ်

လံာ်စီဆှံတဲဝဲလၢ “တဘၣ် သူၣ်ကိၢ်သးဂီၤတၢ် နီတမံၤတဂ့ၤ. လၢတၢ်ခဲလၢာ်အပူၤန့ၣ် တဲဖျါထီၣ် သုတၢ်ဃ့တဖၣ်လၢ ကစၢ်ယွၤအအိၣ် ခီဖျိလၢ တၢ်ဃ့ထုကဖၣ် ဒီးတၢ်ဃ့ကညးတၢ် ဃုာ်ဒီး တၢ်စံးဘျုးစံးဖှိၣ်က့ၤတၢ်တက့ၢ်.”—ဖံလံးပံၤ ၄:၆.

ယဟိဝၤယွၤa အဲၣ်ဒိးလၢ ပကဃ့ထုကဖၣ်လၢအအိၣ်. ကစၢ်ယွၤ သးအိၣ်ပှၤအဃိ အကဒိကနၣ် ပတၢ်ထုကဖၣ် ဒီးကမၤစၢၤပှၤဒ်သိး ပတသူၣ်ကိၢ်သးဂီၤတၢ် အါတလၢတဂ့ၤအဂီၢ်. (၁ ပ့းတရူး ၅:၇) အမၤစၢၤပှၤ ခီဖျိ အဒုးသ့ၣ်ညါပှၤလၢ ဘၣ်မနုၤအဃိ တၢ်ဒုးတၢ်ယၤ အိၣ်အါထဲအံၤလဲၣ်. တကးဒံးဘၣ် အဒုးသ့ၣ်ညါပှၤလၢ အကမၤကတၢၢ်ကွံာ် တၢ်ဒုးတၢ်ယၤဒ်လဲၣ် ဒီးအကမၤလီၤမၢ်ကွံာ် တၢ်လၢအဆါ ဒီးတၢ်နးတၢ်ဖှီၣ်ခဲလၢာ်ဒ်လဲၣ်.—လီၣ်ဖျါ ၂၁:၃, ၄.

• ဒ်သိး နကသ့ၣ်ညါအါထီၣ် ဘၣ်ဃးဒီး ကစၢ်ယွၤ မၤစၢၤပှၤဒ်လဲၣ်အဂီၢ်န့ၣ် ဖးတၢ်ဂ့ၢ်လၢ အခိၣ်တီမ့ၢ်ဝဲ “လံာ်စီဆှံန့ၣ် အိၣ်ဒီးတၢ်ကတိၤလၢ အမၤမုာ်ထီၣ်နသးသ့..”