ဖဲပသံဝံၤအလီၢ်ခံ တၢ်ကမၤအသးဒီးပှၤဒ်လဲၣ်

လံာ်စီဆှံတဲဝဲဒ်လဲၣ်

လံာ်စီဆှံတဲဝဲလၢ “ပှၤလၢအမူန့ၣ် သ့ၣ်ညါဝဲလၢ အကသံလီၤ. မ့မ့ၢ် ပှၤသံန့ၣ် တသ့ၣ်ညါ တၢ်နီတမံၤဘၣ်.” (စံၣ်တဲၤတဲလီၤတၢ် ၉:၅; စံးထီၣ်ပတြၢၤ ၁၄၆:၄) အဃိ ဖဲပသံအခါ ပတၢ်အိၣ်မူကတၢၢ်ကွံာ်ဝဲ. ပှၤသံတဂၤ အဆိကမိၣ်တၢ်တသ့လၢၤဘၣ်, အမၤတၢ်တသ့လၢၤဘၣ် ဒီးအတတူၢ်ဘၣ်တၢ်လၢၤဘၣ်.

“ကဲထီၣ်ကဒါက့ၤဟီၣ်ခိၣ်ကမူၣ်”

စီၤအၤဒၣ်လၢ အမ့ၢ်ပိာ်ခွါအဆိကတၢၢ်တဂၤန့ၣ် ကစၢ်ယွၤတဲအီၤလၢ ဖဲအသံအခါ တၢ်ကကဲထီၣ်အသးဒီးအီၤဒ်လဲၣ်. ခီဖျိလၢ စီၤအၤဒၣ်တဒိကနၣ် ကစၢ်ယွၤအကလုၢ်ဘၣ်အဃိ ကစၢ်ယွၤတဲဘၣ်အီၤလၢ “နမ့ၢ်ဟီၣ်ခိၣ်ကမူၣ် ဒီးနကကဲထီၣ်ကဒါက့ၤ ဟီၣ်ခိၣ်ကမူၣ်လီၤ.” (၁ မိၤၡ့ ၃:၁၉) တချုးလၢ ကစၢ်ယွၤတ့လီၤစီၤအၤဒၣ်လၢ “ဟီၣ်ခိၣ်ကမူၣ်” ဒံးဘၣ်န့ၣ် စီၤအၤဒၣ်တအိၣ်ဒံးဘၣ်. (၁ မိၤၡ့ ၂:၇) အဃိ ဖဲစီၤအၤဒၣ်သံဝံၤအလီၢ်ခံ အကဲထီၣ်ကဒါက့ၤ ဟီၣ်ခိၣ်ကမူၣ် ဒီးအတအိၣ်လၢၤဘၣ်.

အဃိ မုၢ်မဆါတနံၤအံၤ ပှၤလၢအသံတဖၣ်န့ၣ် ကဲထီၣ်ကဒါက့ၤ ဟီၣ်ခိၣ်ကမူၣ် ဒ်စီၤအၤဒၣ်အသိးလီၤ. ဘၣ်ဃးဒီး ပှၤကညီ ဒီးဆၣ်ဖိကီၢ်ဖိန့ၣ် လံာ်စီဆှံတဲဝဲလၢ “အဝဲသ့ၣ်ခဲလၢာ် ကကဲထီၣ်က့ၤ ဟီၣ်ခိၣ်ကမူၣ်လီၤ.”—စံၣ်တဲၤတဲလီၤတၢ် ၃:၁၉, ၂၀.

ပှၤသံန့ၣ် အတၢ်မုၢ်လၢ်တလၢာ်ဒံးဘၣ်

လံာ်စီဆှံဒိလီၤဝဲ တၢ်သံန့ၣ် ဒ်တၢ်မံအသိး. (စံးထီၣ်ပတြၢၤ ၁၃:၃; ယိၤဟၣ် ၁၁:၁၁-၁၄; မၤတၢ် ၇:၆၀) ပှၤမံလၢ အနၢ်လီၤဖးယိာ်တဂၤန့ၣ် တၢ်ကဲထီၣ်သးလၢ အခိၣ်အဃၢၤဒ်လဲၣ်ဒ်လဲၣ်န့ၣ် အတသ့ၣ်ညါဝဲဘၣ်. ဒ်န့ၣ်အသိး ပှၤသံန့ၣ် တသ့ၣ်ညါတၢ်နီတမံၤလၢၤဘၣ်. လံာ်စီဆှံတဲဝဲလၢ ကစၢ်ယွၤ ကမၤသမူထီၣ်က့ၤပှၤသံ ဒ်ပှၤကိးပၢၢ်ထီၣ်က့ၤပှၤမံအသိး ဒီးအဝဲသ့ၣ် ကအိၣ်မူဘၣ်က့ၤ လၢသီတဘျီ. (ယိၤဘး ၁၄:၁၃-၁၅) ပှၤသံန့ၣ် အတၢ်မုၢ်လၢ်တလၢာ်ဒံးဘၣ်. ကစၢ်ယွၤကမၤဂဲၤဆၢထၢၣ် သမူထီၣ်က့ၤအဝဲသ့ၣ်.