ဘၣ်မနုၤအဃိ ယဟိဝၤပှၤအုၣ်အသးတဖၣ် တသူထူၣ်စုညါလၢ အတၢ်ဘူၣ်ထီၣ်ဘါထီၣ်အပူၤလဲၣ်

ပှၤအါဂၤထံၣ်ဝဲ ထူၣ်စုညါဒ် ဟီၣ်ခိၣ်ဒီဘ့ၣ်ခရံာ်ဖိတၢ်ဘူၣ်တၢ်ဘါ အတၢ်ပနီၣ်လီၤ. ပဝဲယဟိဝၤပှၤအုၣ်အသးတဖၣ် ပမ့ၢ်ခရံာ်ဖိသနာ်က့, ပတသူထူၣ်စုညါလၢ ပတၢ်ဘူၣ်ထီၣ်ဘါထီၣ်အပူၤဘၣ်. လၢမနုၤအဃိလဲၣ်.

တၢ်ဂ့ၢ်တၢတမံၤန့ၣ် လံာ်စီဆှံဒုးနဲၣ်ဖျါဝဲလၢ ယ့ၣ်ၡူးတသံလၢ ထူၣ်စုညါ (cross) အလိၤဘၣ်, သံဒၣ်လၢ တၢၣ်ယိယိဖိတတၢၣ် (stake) အလိၤလီၤ. အါန့ၢ်အန့ၣ်, လံာ်စီဆှံ ဟ့ၣ်ပလီၢ်ခရံာ်ဖိတဖၣ် ဃံးဃံးလၢ “ဃ့ၢ်ဟးဆှဲးတၢ်ဘါတၢ်ဂီၤ”, လၢအခီပညီမ့ၢ် တဘၣ်သူထူၣ်စုညါလၢ တၢ်ဘူၣ်ထီၣ်ဘါထီၣ်အပူၤဘၣ်လီၤ.​—၁ ကရံၣ်သူး ၁၀:၁၄; ၁ ယိၤဟၣ် ၅:၂၁.

ယ့ၣ်ၡူးစံးဝဲဒၣ် “လၢသုအဲၣ်လိာ်ကွံလိာ်သုသးအဃိဒီး, ပှၤခဲလၢာ်ကသ့ၣ်ညါလၢ သုမ့ၢ်ယပျဲၢ်ယဘီၣ်လီၤ.” (ယိၤဟၣ် ၁၃:၃၄, ၃၅) လၢတၢ်န့ၣ်အဃိ, ယ့ၣ်ၡူးဒုးနဲၣ်ဖျါဝဲလၢ တၢ်သ့ၣ်ညါနီၤဖး ယ့ၣ်ၡူးအပျဲၢ်အဘီၣ်နီၢ်နီၢ်န့ၣ် မ့ၢ်တၢ်အဲၣ်လၢတကွၢ်ထဲအဘျုးဒၣ်ဝဲလီၤ. တမ့ၢ်ထူၣ်စုညါ မ့တမ့ၢ် တၢ်ဂီၤတၢ်ဖီၣ်တမံၤမံၤဘၣ်.