ယဟိဝၤပှၤအုၣ်အသးတဖၣ်န့ၣ် မ့ၢ်ကရၢအသီ တကရၢဧါ
တမ့ၢ်ဘၣ်, ယဟိဝၤပှၤအုၣ် အသးတဖၣ်န့ၣ် တမ့ၢ်ကရၢ အသီတကရၢဘၣ်. လၢတၢ်န့ၣ်အလီၢ်, ပမ့ၢ်ခရံာ်ဖိ တဖၣ်လၢ အမၤထွဲ ယ့ၣ်ၡူးခရံာ် ပာ်တ့ၢ်ဒိတဲာ် အဂ့ၤကတၢၢ် ဒီးပအိၣ်မူဒ် အတၢ်သိၣ်လိ အသိးလီၤ.
ကရၢအသီ တကရၢန့ၣ် မ့ၢ်မနုၤလဲၣ်.
တၢ်ကတိၤလၢ “ကရၢအသီ တကရၢ” န့ၣ်ပှၤဆိကမိၣ်အီၤ အါမံၤအါမၠိလီၤ. ဘၣ်ဆၣ်, ဆိကမိၣ်ကွၢ် တၢ်ထံၣ်ခံမံၤလၢ ဘၣ်ဃးဒီး ကရၢအသီ တကရၢ ဒီးဘၣ်မနုၤအဃိ တၢ်သ့ၣ်တဖၣ်န့ၣ် တဘၣ်ဃးဒီးပှၤဘၣ်န့ၣ် သမံသမိးကွၢ်တက့ၢ်.
ပှၤတနီၤ ဆိကမိၣ်ဝဲ ကရၢအသီ တကရၢဒ် တၢ်ဘူၣ်တၢ်ဘါအသီ မ့တမ့ၢ် တၢ်ဘူၣ်တၢ်ဘါ လၢအစူၢ်ကမၣ် နာ်ကမၣ်တၢ်လီၤ. ယဟိဝၤပှၤအုၣ် အသးတဖၣ်န့ၣ် တဒုးအိၣ်ထီၣ် တၢ်ဘူၣ်တၢ်ဘါ အသီဘၣ်. လၢတၢ်န့ၣ်အလီၢ်, ပဘူၣ်ထီၣ် ဘါထီၣ်ယွၤဒ် ခရံာ်ဖိလၢ နံၣ်တၢကယၤတဖၣ် အဒိအတဲာ်ဒီး အတၢ်သိၣ်လိလၢ ဘၣ်တၢ်ကွဲးနီၣ် ပာ်လၢ လံာ်စီဆှံ အပူၤလီၤ. (၂ တံၤမသ့း ၃:၁၆, ၁၇) ပနာ်လၢ ဘၣ်ဃးဒီး တၢ်ဘူၣ်တၢ်ဘါန့ၣ် လံာ်စီဆှံစံးတၢ်န့ၣ် အမ့ၢ်အတီ ကတၢၢ်န့ၣ်လီၤ.
ပှၤတနီၤ ဆိကမိၣ်ဝဲ ကရၢအသီ တကရၢဒ် တၢ်ဘူၣ်တၢ်ဘါ ကရၢလၢ အလီၤဘၣ်ယိၣ် လၢအိၣ်ဒီး ပှၤကညီခိၣ်နၢ်လီၤ. ယဟိဝၤပှၤအုၣ် အသးတဖၣ်န့ၣ် တပာ်ပှၤတဂၤဂၤဒ် အဝဲသ့ၣ်အခိၣ်နၢ် အသိးဘၣ်. လၢတၢ်န့ၣ်အလီၢ်, ပဟံးဃာ် တၢ်သိၣ်တၢ်သီလၢ ယ့ၣ်ၡူးပာ်တ့ၢ်လၢ အပျဲၢ်အဘီၣ် တဖၣ်အဂီၢ် ဖဲစံးဝဲလၢ “သုခိၣ်အိၣ် တဂၤဃီ ခရံာ်န့ၣ်လီၤ.”—မးသဲ ၂၃:၁၀.
တလီၤဂာ်ဒီး ကရၢအသီ တကရၢ လၢအလီၤ ဘၣ်ယိၣ်ဘၣ်, ယဟိဝၤပှၤအုၣ် အသးတဖၣ်န့ၣ် မ့ၢ်တၢ်ဘူၣ်တၢ်ဘါလၢ ကဲဘျုးလၢ အကရၢဖိဒီး ပှၤအဂုၤအဂၤလၢ လီၢ်ကဝီၤပူၤလီၤ. အဒိ, ပတၢ်သးခုကစီၣ် တၢ်မၤန့ၣ် မၤစၢၤပှၤအါမးလၢကပာ်တ့ၢ်ကွံာ် တၢ်ညီနုၢ်အီသံး, အီမိာ်, စဲကသံၣ်မူၤဘှီ: လၢအမၤဘၣ်ဒိ တၢ်လီၤ. အါန့ၢ်အန့ၣ်, ပမၤတၢ်ကွဲးလံာ် ဖးလံာ်သ့ အတၢ်ရဲၣ်တၢ်ကျဲၤလၢ ဟီၣ်ခိၣ်ဒီဘ့ၣ်, လၢတၢ်မၤစၢၤ ပှၤအကထိလၢ ကမၤလိ တၢ်ကွဲးလံာ်ဒီး တၢ်ဖးလံာ်လီၤ. ဒီးပပာ်ဃုာ်လၢ တၢ်မၤမုာ်ထီၣ်က့ၤ ပှၤဘၣ်တၢ် တတၢာ်တနါ တဖၣ်လီၤ. ပဂုာ်ကျဲးစၢး မၤတၢ်လၢ အဘျုးအိၣ်လၢ ပှၤဂၤအဂီၢ်, ဒ်ယ့ၣ်ၡူးမၤလိာ်တ့ၢ်ဝဲ အပျဲၢ်အဘီၣ် တဖၣ်န့ၣ်လီၤ.—မးသဲ ၅:၁၃–၁၆.