ပှၤသံတဖၣ်အဂီၢ် တၢ်မုၢ်လၢ်အိၣ်ဧါ

ပှၤသံတဖၣ် ကမူထီၣ်ဝဲဒံးဧါ

လံာ်စီဆှံစံးဆၢဝဲလၢ– “အဆၢအကတီၢ်ဟဲဝဲ, လၢကယဲၢ်ပှၤအိၣ်လၢ တၢ်သွၣ်ခိၣ်အပူၤခဲလၢာ်န့ၣ်, ကနၢ်ဟူအ [ယ့ၣ်ၡူး] ကလုၢ်သီၣ်, ဒီးကဟဲက့ၤထီၣ်ဝဲ” လီၤ.—ယိၤဟၣ် ၅:၂၈, ၂၉.

ယ့ၣ်ၡူးတဲဆိပာ်စၢၤဝဲ ဖဲအဘီမုၢ်အတၢ်ပၢအဖီလာ်န့ၣ် တၢ်သွၣ်ခိၣ်ကအိၣ်ကလီဝဲလီၤ. ဖနၣ်ဒိၣ် တဲဝဲလၢ “ဖဲယဖးဘၣ် ယိၤဟၣ် ၅:၂၈, ၂၉ အဆိကတၢၢ်အခါ ယကမၢကမၣ်ဒိၣ်မးလီၤ. တၢ်အံၤဟ့ၣ်ယၤ တၢ်မုၢ်လၢ်နီၢ်နီၢ်ဒီး လၢခါဆူညါအဂီၢ်န့ၣ် ယစးထီၣ်ဆိကမိၣ်ယတၢ်အိၣ်မူ လၢအဂ့ၤတကပၤန့ၣ်လီၤ.”

လၢပျၢၤန့ၣ် ပှၤတီပှၤလိၤ စီၤယိၤဘး ဆိကမိၣ်ဝဲလၢ ဖဲအသံဝံၤအလီၢ်ခံ မုၢ်ကအိၣ်ဝဲတနံၤလၢ ယဟိဝၤယွၤ ကမၤသမူထီၣ်က့ၤအီၤလီၤ. စီၤယိၤဘးသံကွၢ်ဝဲလၢ– “ပှၤကညီမ့ၢ်သံဒီး, ကမူထီၣ်ဒံးစ့ၢ်ကီးဧါ.” ဒီးစီၤယိၤဘးတဲက့ၤဝဲလၢ တၢ်နာ်နီၢ်နီၢ်အပူၤလၢ– “ယကအိၣ်ခိးလၢ ကယဲၢ်ယဒုးတၢ် အမုၢ်နံၤခဲလၢာ်အတီၢ်ပူၤ တုၤလၢတၢ်လဲလိာ်ယၤလီၤ. ကိးထီၣ်တက့ၢ်, ဒီးယကစံးဆၢနၤလီၤ.”—ယိၤဘး ၁၄:၁၄, ၁၅.

တၢ်ဂဲၤဆၢထၢၣ်သမူထီၣ်က့ၤန့ၣ် တမ့ၢ်တၢ်နာ်အသီလၢ နီၢ်မၢ်သၤအဂီၢ်ဘၣ်. ဖဲစီၤလါစရူးသံဝံၤအလီၢ်ခံ ယ့ၣ်ၡူးစံးဘၣ် နီၢ်မၢ်သၤလၢ– “နဒီပုၢ်ဝဲၢ်ခွါ ကဂဲၤဆၢထၢၣ်က့ၤလီၤ.” နီၢ်မၢ်သၤစံးဆၢက့ၤအီၤ– “ကဂဲၤဆၢထၢၣ်က့ၤဝဲလၢ မုၢ်နံၤကတၢၢ် အတၢ်ဂဲၤဆၢထၢၣ်က့ၤန့ၣ်, ယသ့ၣ်ညါလီၤ.” ယ့ၣ်ၡူးစံးဘၣ်ကဒီးအီၤ– “ယဲဒၣ်အံၤယမ့ၢ် တၢ်ဂဲၤဆၢထၢၣ်က့ၤ ဒီးတၢ်မူလီၤ. ပှၤလၢအစူၢ်က့ၤနာ်က့ၤယၤန့ၣ်, မ့ၢ်သံဘၣ်ဆၣ်ဒီး, ကမူထီၣ်ဝဲလီၤ.” (ယိၤဟၣ် ၁၁:၂၃-၂၅) ဒီးယ့ၣ်ၡူးမၤမူထီၣ်က့ၤ စီၤလါစရူးန့ၣ်လီၤ. တၢ်လီၤသူၣ်ပိၢ်သးဝးတခါအံၤ ဟ့ၣ်ပှၤတၢ်မုၢ်လၢ် ဘၣ်ဃးတၢ်လၢ ယ့ၣ်ၡူးကမၤဝဲ ခါဆူညါန့ၣ်လီၤ. ထံၣ်တမှံကွၢ်လၢ ပှၤကဂဲၤဆၢထၢၣ် သမူထီၣ်က့ၤလၢ ဟီၣ်ခိၣ်ဒီဘ့ၣ်ညါန့ၣ်တက့ၢ်.

ပှၤကဂဲၤဆၢထၢၣ်သမူထီၣ်က့ၤ ဆူမူခိၣ်န့ၣ်အိၣ်ဧါ

လံာ်စီဆှံစံးဆၢဝဲလၢ– လံာ်စီဆှံပာ်ဖျါထီၣ်ဝဲလၢ ယ့ၣ်ၡူး အတၢ်ဂဲၤဆၢထၢၣ်သမူထီၣ်က့ၤန့ၣ် လီၤဆီလိာ်အသးဒီးပှၤဃိးဂၤ အတၢ်ဂဲၤဆၢထၢၣ်သမူထီၣ်က့ၤန့ၣ်လီၤ. ပှၤဃိးဂၤန့ၣ် ဂဲၤဆၢထၢၣ်သမူထီၣ်က့ၤ လၢဟီၣ်ခိၣ်ချၢလီၤ. မ့မ့ၢ်ဘၣ်ဃးဒီးယ့ၣ်ၡူး အတၢ်ဂဲၤဆၢထၢၣ်သမူထီၣ်က့ၤန့ၣ် ပဖးဘၣ်လၢ– “ယ့ၣ်ၡူး . . . က့ၤထီၣ်ဆူမူခိၣ်, ဒီးအိၣ်ဝဲလၢယွၤအစုထွဲတခီ” လီၤ. (၁ ပ့းတရူး ၃: ၂၁, ၂၂) ပှၤဂဲၤဆၢထၢၣ်သမူထီၣ်က့ၤဆူမူခိၣ်န့ၣ် အိၣ်ထဲယ့ၣ်ၡူးတဂၤလီၤဧါ. ယ့ၣ်ၡူးတဲပာ်စၢၤဝဲ အတၢ်မၢဖိတဖၣ်လၢ– “ယမ့ၢ်လဲၤကတဲာ်ကတီၤ သုလီၢ်တပူၤဒီး, ယကဟဲက့ၤကဒီးဆူ သုအိၣ်လီၤ. ဒီးယကဟံးက့ၤသုဆူ ယကစၢ်ဒၣ်ယဲအအိၣ် ဒ်သိးဖဲယအိၣ်အလီၢ်န့ၣ်, သုကအိၣ်စ့ၢ်ကီးလီၤ.”—ယိၤဟၣ် ၁၄:၃.

ခရံာ်က့ၤထီၣ်ဆူမူခိၣ်ဒီး ကတဲာ်ကတီၤန့ၢ်ဝဲ အပျဲၢ်အဘီၣ်တဖၣ်အလီၢ်အကျဲလီၤ. ပှၤဂဲၤဆၢထၢၣ်သမူထီၣ်က့ၤလၢ မူခိၣ်အံၤန့ၣ် အနီၣ်ဂံၢ်အိၣ်ဝဲ ၁၄၄,၀၀၀ လီၤ. (လီၣ်ဖျါ ၁၄:၁, ၃) ဘၣ်ဆၣ် ယ့ၣ်ၡူးအပျဲၢ်အဘီၣ်တဖၣ်အံၤ ကလဲၤမၤတၢ်မနုၤဖဲန့ၣ်လဲၣ်.

အဝဲသ့ၣ်အတၢ်မၤ ကအိၣ်အါဒိၣ်မးလီၤ. လံာ်စီဆှံစံးဝဲလၢ– “ပှၤလၢအဂီၢ်အိၣ်လၢ တၢ်ဂဲၤဆၢထၢၣ် အခီၣ်ထံးတတီၤအံၤ, စီဆှံဝဲ, ဒီးဘၣ်ဆိၣ်ဂ့ၤလီၤ. ပှၤဒ်န့ၣ်အသိးတဖၣ်အဖီခိၣ်, တၢ်သံပှဲၤထီၣ်ခံစုတစုန့ၣ် အစိအကမီၤတအိၣ်ဘၣ်, မ့မ့ၢ်ကကဲထီၣ် ပှၤလုၢ်တၢ်အခိၣ်ဘၣ်ဃးဒီးယွၤ, ဒီးခရံာ်, ဒီးကပၢဘၣ်တၢ်ဒီးအီၤ အနံၣ်တကထိလီၤ.” (လီၣ်ဖျါ ၂၀:၆) ပှၤလၢအဂဲၤဆၢထၢၣ်သမူထီၣ်က့ၤဆူ မူခိၣ်သ့ၣ်တဖၣ်န့ၣ် ကပၢဃုာ်တၢ်ဒီးယ့ၣ်ၡူးလီၤ. အဝဲသ့ၣ်တဖၣ်န့ၣ် ကပၢဟီၣ်ခိၣ်ဒ်စီၤပၤ ဒီးပှၤလုၢ်တၢ်အဒိၣ်အသိးန့ၣ်လီၤ.

လၢခံန့ၣ် မတၤသ့ၣ်တဖၣ် ကဂဲၤဆၢထၢၣ်သမူထီၣ်က့ၤလဲၣ်

လံာ်စီဆှံ စံးဆၢဝဲလၢ– လံာ်စီဆှံပာ်ဖျါထီၣ်ဝဲ တၢ်မၢဖိစီၤပီလူး အတၢ်ကတိၤလၢအမ့ၢ်– “ယအိၣ်ဒီးတၢ်မုၢ်လၢ် ဘၣ်ဃးဒီးယွၤလၢ အဝဲသ့ၣ်အကစၢ်ဒၣ်ဝဲ အၢၣ်လီၤအီလီၤ, လၢပှၤသံအတီမ့ၢ်ဂ့ၤ, တတီဘၣ်မ့ၢ်ဂ့ၤ, ကဂဲၤဆၢထၢၣ်က့ၤလီၤ.” —မၤတၢ် ၂၄:၁၅.

စီၤပီလူးစံးဝဲ “ပှၤသံအတီ” တဖၣ်န့ၣ် ပၣ်ဃုာ်ဒီးမတၤသ့ၣ်တဖၣ်လဲၣ်. ပကကွၢ်သကိးတၢ်အဒိတခါလီၤ. ပှၤတီပှၤလိၤ စီၤဒၤနံးယ့လး တချုးသံဒံးအခါ ဘၣ်တၢ်ဒုးသ့ၣ်ညါအီၤလၢ– “နကအိၣ်ဘှံး, ဒီးဆၢထၢၣ်လၢနဂီၢ်အပူၤ လၢမုၢ်နံၤတဖၣ်အကတၢၢ်လီၤ.” (ဒၤနံးယ့လး ၁၂:၁၃) စီၤဒၤနံးယ့လး ကဂဲၤဆၢထၢၣ်သမူထီၣ်က့ၤ လၢတၢ်လီၢ်ဖဲလဲၣ်. “ပှၤတီပှၤလိၤန့ၢ်ဘၣ်သါ ထံဧိၤကီၢ်ဧိၤ, ဒီးအိၣ်ဝဲဆိးဝဲ လီၤစိၤလီၤထီလီၤ.” (စံးထီၣ်ပတြၢၤ ၃၇:၂၉) ဒီးယ့ၣ်ၡူးစံးပာ်ဝဲလၢ– “ပှၤလၢအသးစူၤတဖၣ်န့ၣ် ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ, အဝဲသ့ၣ်တဖၣ်န့ၣ် ကန့ၢ်ဘၣ်သါ ထံဧိၤကီၢ်ဧိၤလီၤ.” (မးသဲ ၅:၅) စီၤဒၤနံးယ့လး ဒီးပှၤတီပှၤလိၤပိာ်မုၣ်ပိာ်ခွါတဖၣ် ကဂဲၤဆၢထၢၣ်သမူထီၣ်က့ၤ လၢဟီၣ်ခိၣ်ဒီး ကအိၣ်မူဝဲလီၤထူလီၤယိာ်လီၤ.

စီၤပီလူးစံးဝဲ ပှၤသံ “တတီ” တဖၣ်န့ၣ်ပၣ်ဃုာ်ဒီး မတၤသ့ၣ်တဖၣ်လဲၣ်. အဝဲသ့ၣ်ကမ့ၢ် ပှၤအကကွဲၢ်အကထိတဖၣ် ဒီးလၢအဝဲသ့ၣ်အကျါအါဂၤန့ၣ် တန့ၢ်ဘၣ်တၢ်ခွဲးတၢ်ယာ်လၢ ကမၤလိလံာ်စီဆှံ တၢ်မ့ၢ်တၢ်တီ ဖဲအတချုးသံဒံးဘၣ်အခါန့ၣ်လီၤ. ပှၤသံတ့ၢ်တဖၣ်အံၤ ဂဲၤဆၢထၢၣ်သမူထီၣ်က့ၤ ဝံၤအလီၢ်ခံန့ၣ် အဝဲသ့ၣ်ကအိၣ်ဒီးတၢ်ခွဲးတၢ်ယာ်လၢ ကသ့ၣ်ညါဘၣ် ယဟိဝၤယွၤa ဒီးယ့ၣ်ၡူးအဂ့ၢ်န့ၣ်လီၤ. (ယိၤဟၣ် ၁၇:၃) ပှၤလၢအဆၢတဲာ်အသးလၢ ကမၤတၢ်ဘၣ်ယွၤအသးန့ၣ် ကအိၣ်မူဘၣ် လီၤထူလီၤယိာ်လီၤ.

ဟီၣ်ခိၣ်အတၢ်အိၣ်သး ကမၤသးဒ်လဲၣ်

လံာ်စီဆှံစံးဆၢဝဲလၢ– ယွၤ “ကထွါကွံာ်အမဲာ်ထံ ခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုး တအိၣ်လၢၤဘၣ်, ဒီးတၢ်ဟီၣ်တၢ်ယၢၤ တအိၣ်လၢၤဘၣ်, ဒီးတၢ်ဘှံးသူၣ်ဘှံးသး တအိၣ်လၢၤဘၣ်.” (လီၣ်ဖျါ ၂၁:၄) “ကသူၣ်ဟံၣ်, ဒီးကအိၣ်ဝဲဆိးဝဲလၢအပူၤ, ဒီးကသူၣ်စပံးအလီၢ်, ဒီးကအီၣ်အတၤသၣ်လီၤ.”—ယၡါယၤ ၆၅:၂၁.

ထံၣ်တမှံကွၢ်လၢ နကအိၣ်မူဘၣ်လၢ တၢ်အိၣ်သးဒ်အံၤတဖၣ် ဃုာ်ဒီးပှၤလၢနအဲၣ်ဘၣ်အီၤလၢ အဂဲၤဆၢထၢၣ်သမူထီၣ်က့ၤန့ၣ်တက့ၢ်. ဘၣ်ဆၣ် တၢ်သံကွၢ်လၢအရ့ဒိၣ် အိၣ်တ့ၢ်ဝဲတခါလီၤ. တၢ်ဂဲၤဆၢထၢၣ်သမူထီၣ်က့ၤ ကအိၣ်ဝဲအနီၢ်ကီၢ်န့ၣ် နသ့ၣ်ညါလီၤတံၢ်လီၤဆဲး ကသ့ဒ်လဲၣ်.